[глⷡ҇а м҃д] Ѡ҆ дѣ́ланїи во ѻ҆́бщинѣ

Подоба́етъ вѣ́дати, ꙗ҆́кѡ всѣ̑мъ бра́тїѧмъ лѣ́по є҆́сть дѣ́лати, ꙗ҆́коже и҆ предрече́сѧ: ѻ҆ба́че въ каковѣ́йлюбо хи́трости, кі́йждо хꙋдо́жнѣ и҆́мать: и҆ могꙋ́щемꙋ ᲂу҆́бѡ подоба́етъ дѣ́лати зе́млю до ᲂу҆ста́вленнагѡ вре́мене, и҆ пото́мъ дѣ́лати въ рꙋкодѣ́лїи свое́мъ. Не могꙋ́щїи же зе́млю дѣ́лати, такові́и во и҆ны́хъ нѣ́кїихъ разли́чныхъ, и҆ проти́вꙋ си́лы да дѣ́лаютъ, и҆ по а҆пⷭ҇льскомꙋ сло́вꙋ, не дѣ́лаѧй бо, речѐ, да не ꙗ҆́стъ: пребыва́нїе бо, речѐ и҆ потре́ба бра́тнѧѧ ѿ ни́хъ хо́щетъ стро́итисѧ. И҆́же ли ѿ бра́тїи и҆лѝ небл҃гоꙋ́менъ є҆́сть на рꙋкодѣ́лїе: и҆лѝ сѐ ᲂу҆́бѡ нѣ́сть, и҆ по кова́рствꙋ же нѣ́коемꙋ и҆ лꙋка́вствꙋ не наꙋча́етсѧ, такова́го подоба́етъ на множа́йшее дѣ́ло земно́е ᲂу҆строѧ́ти, а҆́ще є҆́сть тѣ́ломъ здра́въ, и҆ пи́щею крѣ́покъ.

А҆́ще ли є҆́сть не́мощенъ во ѻ҆бои́хъ, на и҆на̑ѧ слꙋжє́нїѧ подоба̑ющаѧ да повелѣва́етъ, ꙗ҆́коже и҆ бж҃е́ственнїи ѻ҆тцы̀ глаго́лютъ, ꙗ҆́кѡ да не безпло́денъ бꙋ́детъ, и҆ не вина̀ собла́знꙋ въ про́чїихъ бра́тїѧхъ, ꙗ҆́коже речѐ гдⷭ҇ь: лꙋка́вый ра́бе и҆ лѣни́вый, и҆ прѡ́чаѧ. ꙗ҆́коже пре́жде реко́хомъ ѡ҆ пи́щи и҆ питїѝ, ꙗ҆́кѡ ра́ди бл҃госло́вны нѣ́кїѧ вины̀ быва́ти ѻ҆со́бнѣ: и҆ а҆́бїе приведо́хомъ ᲂу҆каза́нїе бл҃госло́вно ѿ бж҃е́ственныхъ писа́нїй. Тѣ́мже ѡ҆́бразомъ по бл҃госло́внѣй винѣ̀, съ настоѧ́щагѡ зако́ннымъ повелѣ́нїемъ же и҆ понꙋжде́нїемъ, а҆́ще на по́льзꙋ є҆́сть, да быва́етъ и҆ ѡ҆ нѣ́кихъ дѣ́лающихъ: и҆ да бꙋ́детъ ко́ждо ѻ҆со́бнѡ дѣ́лаѧ подо́бное є҆мꙋ̀.

А҆́ще ли нѣ́сть по чрезслове́снѣй винѣ̀: вни́кнꙋвъ бо въ житїѐ ст҃а́гѡ пахѡ́мїа, и҆ сѐ ѡ҆брѧ́щеши та́мѡ по мно́гꙋ, и҆зрѧ́днѣе же ѡ҆ ѻ҆́номъ, и҆́же двѣ̀ рогози́нѣ содѣ́лавшемъ на де́нь въ ке́ллїи свое́й ѻ҆со́бь, со гнилы́мъ по́мысломъ и҆ тщесла́внымъ ᲂу҆се́рдїемъ.

Сїе́ же и҆ и҆ні́и ѿ ѻ҆тє́цъ мно́зи пра́вымъ по́мысломъ содѣ́ѧша и҆ наꙋчи́ша: ѻ҆па́сство же мно́гое предано̀ бы́сть на́мъ ѡ҆ се́мъ ѿ ст҃ы́хъ ѻ҆тє́цъ, ꙗ҆́кѡ да ѿ пра́ведныхъ трꙋдѡ́въ и҆ своегѡ̀ дѣ́ланїѧ дневнꙋ́ю пи́щꙋ притѧ́жемъ себѣ̀, и҆ прѡ́чаѧ нꙋ̑жднаѧ потрє́бнаѧ тѣлесѝ. Гдⷭ҇ь и҆ пречⷭ҇таѧ є҆гѡ̀ мт҃и, ꙗ҆̀же ѡ҆ на́съ ᲂу҆пра́витъ.