[глⷡ҇а м҃в] Ѡ҆ слꙋ́жбахъ тѧ́жкихъ

Подоба́етъ вѣ́дати: ꙗ҆́кѡ а҆́ще слꙋже́нїе тѧ́жко є҆́сть во ѻ҆́бщинѣ, да́же до г҃-гѡ часа̀ досто́итъ трꙋди́тисѧ въ не́мъ: до ѕ҃-гѡ же часа̀ слꙋжє́нїѧ лє́гкаѧ ѕѣлѡ̀, є҆ли̑ка ꙗ҆́вѣ ꙗ҆́кѡ не и҆́мꙋтъ мно́гѡ рабо́ты и҆лѝ трꙋда̀, а҆́ще и҆ ѡ҆брѣта́ютсѧ: а҆́ще ли не ѡ҆брѣта́ютсѧ, ᲂу҆праздни́тисѧ подоба́етъ внꙋ́трь ѻ҆би́тели на рꙋкодѣ́лїе, и҆лѝ на и҆́но что̀, є҆́же прїе́млетъ. А҆́ще ли ѡ҆брѣта́ютсѧ внѣ̀ ѻ҆би́тели, ꙗ҆́коже рѣ́хомъ, подоба́етъ твори́ти до ѕ҃-гѡ часа̀. Ѿ ѕ҃-гѡ часа̀ на слꙋжє́нїѧ такова̑ѧ да не и҆схо́дѧтъ, но внꙋ́трь ѻ҆би́тели подоба́етъ ᲂу҆пражднѧ́тисѧ на рꙋкодѣ́лїе, и҆ на поꙋчє́нїѧ бж҃е́ственныхъ писа́нїй, и҆ на ᲂу҆чє́нїѧ, и҆ про́стѡ комꙋ́ждо подвиза́тисѧ подоба́етъ, є҆́же сп҃сти́сѧ, ꙗ҆́коже произволе́нїе и҆́мать. и҆ нижѐ вино́ю дѣ́ла, воздержа́нїе и҆ про́чее по́стничество да разорѧ́етсѧ: нижѐ па́ки вино́ю воздержа́нїѧ дае́тсѧ прекраще́нїе дѣ́лꙋ, но ꙗ҆́коже лѣ́по є҆́сть, си́це твори́ти подоба́етъ. А҆́ще ли є҆́сть принꙋ́жно слꙋже́нїе, могꙋ́щемꙋ лѣ́по є҆́сть дѣ́лати и҆ мно́жае, є҆ли́кѡ мо́жетъ без̾ вре́да прейтѝ вѧ́щшїй трꙋ́дъ. И҆ па́ки, є҆гда̀ нѣ́сть рабо́ты, досто́итъ ᲂу҆пражднѧ́тисѧ на рꙋкодѣ́лїе, и҆ поꙋчє́нїѧ бж҃е́ственныхъ писа́нїй, и҆ и҆́но, є҆́же а҆́ще подоба́етъ на потре́бꙋ.