[глⷡ҇а м҃а] Ѡ҆ слꙋжи́телехъ и҆ про́чихъ пребыва́нїихъ бра́тскихъ

Досто́итъ вѣ́дати ꙗ҆̀же ѿ ст҃ы́хъ ѻ҆тє́цъ прїѧ́хомъ: ѡ҆ вели́кагѡ же васі́лїа,и҆ ѿ житїѧ̀ ст҃а́гѡ ѻ҆тца̀ на́шегѡ пахѡ́мїа, и҆ ѿ ст҃а́гѡ кассїа́на ри́млѧнина,и҆ ѡ҆ про́чихъ ѻ҆бщежи́тельныхъ завѣща́нїй ст҃ы́хъ ѻ҆тє́цъ, ка́кѡ подоба́етъ и҆мѣ́ти ᲂу҆ста́въ слꙋжа́щымъ во ст҃ѣ́й ѻ҆би́тели ѻ҆́бщагѡ житїѧ̀, дневникѡ́мъ бы́ти въ церко́внѣй слꙋ́жбѣ параекклисїа́рхѡмъ. И҆ во ᲂу҆ста́вѣ ᲂу҆́бѡ ст҃а́гѡ пахѡ́мїа, а҆́гг҃лъ предадѐ є҆мꙋ̀ по трѝ седми̑цы и҆змѣнѧ́тисѧ, по́варꙋ и҆ про́чымъ слꙋжи́телємъ. Во ст҃а́гѡ же кассїа́на по седми́цѣ є҆ди́ной, та́кожде и҆ въ по́стныхъ вели́кагѡ васі́лїа. Сегѡ̀ ра́ди подоба́етъ комꙋ́ждо ѿ бра́тїй по є҆ди́номꙋ мѣ́сѧцꙋ рабо́тати поварско́е слꙋже́нїе, и҆ про́чихъ. И҆ па́ки дрꙋгі́й слꙋже́нїе прїе́млѧ рабо́таетъ бра́тїи, ꙗ҆́коже и҆ гдⷭ҇ь глаго́летъ, и҆ понꙋжда́етъ є҆́же люби́ти и҆ рабо́тати дрꙋ́гъ дрꙋ́гꙋ. А҆́ще ли ᲂу҆вѣ́стьнастоѧ́тель ко́его ѿ бра́тїй дово́льна сꙋ́ща, во є҆́же слꙋжи́ти и҆по́льзоватисѧ, кꙋ́пнѡ и҆ по́льзовати, и҆ попꙋща́ти лѣ́по є҆́сть того̀ въслꙋже́нїе: и҆́бо нижѐ сїѐ є҆́сть не неподо́бно, но и҆ по преда́нїю ст҃ы́хъѻ҆тє́цъ, ꙗ҆́коже и҆ ст҃ы́й кассїа́нъ во ѻ҆бщежи́тельныхъ завѣща́нїѧхъ глаго́летъ.