[глⷡ҇а л҃ѳ] Ѡ҆ ѻ҆де́ждахъ и҆ ѻ҆бꙋ́щахъ, и҆ все́й тѣле́снѣй потре́бѣ

Ꙗ҆́кѡ ᲂу҆́бѡ ѡ҆ пи́щи мона́хѡмъ рѣ́ша бж҃е́ственнїи ѻ҆тцы̀, добро̀ є҆́сть просто́е и҆ не и҆зли́шнее и҆збира́ти: по томꙋ́же ѡ҆́бразꙋ и҆ ѡ҆дѣѧ́нїе и҆мѣ́ти нꙋ́ждно, ꙗ҆́коже вели́кїй васі́лїй въ по́стныхъ свои́хъ словесѣ́хъ, тонкоча́стнѣ нѣ́какѡ сказꙋ́етъ, ѡ҆ подоба́ющей всѧ́цѣй потре́бѣ мона́хꙋ. Потре́бно є҆́сть и҆ на́мъ проти́вꙋ си́лы си̑мъ ᲂу҆ста́вѡмъ послѣ́довати: лѣ́по ᲂу҆́бѡ є҆́сть, є҆ди́номꙋ комꙋ́ждо ѿ бра́тїй двѣ̀ ѻ҆дє́жды и҆мѣ́ти, є҆ди́нꙋ ве́тхꙋ и҆ скро́панꙋ, дрꙋгꙋ́ю же здра́вꙋ, за є҆́же премѣнѧ́тисѧ, ꙗ҆кова́ же проти́вꙋ мѣ́стꙋ рꙋ̑бища твори̑ма сꙋ́ть, и҆ па́че и҆нѣ́хъ сꙋ́ть ᲂу҆до́бь кꙋпꙋ́єма, ꙗ҆́коже бж҃е́ственнїи ѻ҆тцы̀ повелѣ́ша. А҆́ще ли ѿ и҆ны́ѧ страны̀ ѡ҆брѣта́ютсѧ, и҆ сꙋ́ть малоцѣ̑ннѣйша, и҆ прѡ́ста, и҆ немѧтє́жна, и҆ неꙋкраси̑ма, и҆ подоба́етъ ᲂу҆до́бнѣйшее во все́мъ гони́ти. Та́кожде и҆ вє́рхнѧѧ ма́нтїа ѿ нище́тныхъ и҆ просты́хъ во́лнъ и҆мѣ́ти подоба́етъ, ꙗ҆́кѡ да слꙋ́жатъ зимѣ̀, во внꙋ́трь же и҆ внѣ̀: въ лѣ́тѣ бо не мно́гѡ на потре́бꙋ сꙋ́ть, ꙗ҆́коже ѻ҆тцы̀ повелѣва́ютъ. Та́кожде и҆ холе́вы є҆ди́ны, ꙗ҆́коже бы нище́тны ѕѣлѡ̀, дрꙋго́е же ѡ҆дѣѧ́нїе на потре́бꙋ зи́мнꙋю: и҆ про́стѡ рещѝ, а҆́ще что̀ и҆́но на потре́бꙋ є҆́сть тѣле́съ. И҆ подоба́етъ ѡ҆́бразꙋ на́шемꙋ ѿ внꙋ́трь же и҆ внѣ̀: ѻ҆ба́че во все́мъ, ꙗ҆́коже рече́сѧ, хꙋдо́е же и҆ скꙋ́дное, и҆ ко є҆ди́номꙋ смотре́нїю, то́чїю потре́бꙋ и҆сполнѧ́ющее. Сїѐ ᲂу҆́бѡ ᲂу҆го́дно є҆́сть, и҆ во все́мъ ключа́емое незазо́рно. и҆ ꙾ша́пкꙋ꙾[[꙾подка́пъ꙾]] до́лжно є҆́сть и҆мѣ́ти є҆ди́нꙋ, и҆ пла́тъ и҆мꙋ́щъ покро́въ, ꙗ҆ково́ же є҆́сть и҆ ѡ҆дѣѧ́нїе, си́це и҆ то̀ и҆мѣ́ти.