[глⷡ҇а л҃и] Ѡ҆ є҆́же не подоба́етъ ꙗ҆́сти кромѣ̀ ѻ҆́бщїѧ трапе́зы

Потре́бно є҆́сть вѣ́дати: ꙗ҆́кѡ не подоба́етъ по преда́нїю ꙗ҆́сти комꙋ̀ ѻ҆со́бь, па́че же настоѧ́телю: но а҆́ще бꙋ́детъ ра́ди воздержа́нїѧ вѧ́щшагѡ и҆ по́двига и҆лѝ нѣ́кїѧ и҆ны́ѧ бл҃госло́вныѧ вины̀, повелѣ́нїемъ дꙋхо́внѣ настоѧ́щагѡ, во сп҃се́нїе дꙋ́шъ да быва́етъ: а҆ не по кова́рствꙋ бѣсо́вскомꙋ, и҆ сїѐ не неподо́бно, нижѐ не свидѣ́тельствовано: но и҆ свидѣ́тельства мнѡ́жайша и҆́мамы въ по́стныхъ вели́кагѡ васі́лїа, ꙗ҆́коже є҆гда̀ глаго́летъ, ꙗ҆́кѡ проти́вꙋ мѣ́стꙋ и҆ растворе́нїю. Си́це и҆ пи́ща да быва́етъ. И҆ па́ки во є҆́же ѡ҆ ст҃о́мъ пахѡ́мїи, пи́ща премѣне́нна бы́сть ѿ ст҃а́гѡ, и҆ бж҃е́ственнагѡ а҆́гг҃ла, и҆ нѣ́цыи же ѿ ст҃ы́хъ въ мꙋже́хъ же и҆ жена́хъ, во ѻ҆́бщихъ житїѧ́хъ пости́шасѧ вѧ́щшимъ посто́мъ и҆ бдѣ́нїемъ, и҆ ничто́же возбранѧ́юще: то́чїю ѡ҆ по́двигахъ да быва́етъ, а҆́ще и҆ согласꙋ́етсѧ въ сла́вꙋ бж҃їю, а҆ не на вре́дъ дꙋшѝ.