[глⷡ҇а л҃ѕ] Ѡ҆ молча́нїи на трапе́зѣ

Мно́гꙋ же ѻ҆па́сствꙋ подоба́етъ бы́ти, є҆́же не проглаго́лати никомꙋ́же на трапе́зѣ ѿню́дъ каково́либо сло́во, кромѣ̀ стїха̀ и҆ чте́нїѧ: є҆гда́ же нꙋ́жды вре́мѧ приключи́тс, настоѧ́телю до́лжно є҆́сть проглаго́лати є҆ди́номꙋ то́чїю, и҆лѝ слꙋжа́щемꙋ трапе́зѣ, но со щадѣ́нїемъ и҆ благоговѣ́нїемъ.

Ѡ҆ со́чивѣ же и҆ ѻ҆во́щїи.

Си́це досто́итъ бы́ти по ᲂу҆ста́вꙋ вели́кихъ монастыре́й: бо́бъ, сочеви́ца, горо́хъ, є҆гда̀ сꙋ́ть ѡ҆бварє́на, по є҆ди́ной по́лной ми́скѣ коемꙋ́ждо ѿ бра́тїй, по ра́внꙋ. Ꙗ҆́коже ᲂу҆́бѡ и҆ ѿ ѻ҆де́жды: ѻ҆́ва ᲂу҆́бѡ сꙋ́ть прїѡбрѣ́тна, ѻ҆́ва же скꙋпѣ̑йша: ꙗ҆́коже речѐ и҆ вели́кїй васі́лїй: ꙗ҆̀же ᲂу҆до́бь прїѡбрѣта́ємаѧ, и҆ нꙋ́жнꙋю потре́бꙋ и҆сполнѧ̑ющаѧ, подоба́етъ и҆збира́ти проти́вꙋ вре́мене. На сꙋхоѧде́нїи же ꙾стафи́ды꙾ ꙾вїногра́дъ сꙋхі́й꙾, и҆ ма́слицы, и҆ ꙗ҆́гѡды ві̑нныѧ сꙋ́хи, ре́кше є҆ди́но ко́еждо на кі́йждо де́нь: ма́слицъ ᲂу҆́бѡ ча́шицꙋ по́лнꙋ пи́тїю: стафи́дъ же ра́внꙋ: ѻ҆рѣ́хѡвъ ѕ҃: смо́квей и҃ сре́днихъ: ма̑лыѧ ᲂу҆́бѡ, и҆ вели̑кїѧ ра́знствꙋютъ. Та́кѡ ᲂу҆́бѡ досто́итъ и҆ ѿ про́чихъ ѻ҆воще́хъ подо́бныхъ си̑мъ: ꙗ҆́коже вы́ше рѣ́хомъ, ѿ прѧже́ныхъ со́чивѣхъ. Сїѧ̑ же всѧ̑, и҆ варє́на же и҆ сꙋ́рѡва, є҆гда́ же сꙋ́ть сꙋха̀, та́коже подо́бно є҆́сть. Є҆гда́ же вре́мѧ и҆́мать зелєна̀, и҆ пи́ща и҆ мѣ́ра ра́знствꙋетъ. Ѿ ѕе́лей же ꙗ҆́коже є҆́сть, подо́бно и҆ варє́на и҆ сꙋ́рѡва, и҆ є҆ще́ же и҆ ква́шєна, рекѡ́мыѧ а҆рме́а и҆ комбо́ста: фа́во сла́но, и҆ рѣ́па со ᲂу҆́ѯꙋсомъ, и҆ прѡ́чаѧ подѡ́бнаѧ си̑мъ ᲂу҆готѡ́влена, и҆ подоба̑ющаѧ въ пѡ́стныѧ дни̑, и҆ нꙋ́жнꙋю потре́бꙋ и҆сполнѧ̑ющаѧ. Си́це ᲂу҆̀бо ѡ҆кормлѧ́еми бж҃їею бл҃года́тїю, лихои́мства свободи́мсѧ, ꙗ҆́коже нѣ́кїй ѿ ст҃ы́хъ глаго́летъ: ꙗ҆́кѡ лихоимѣ́нїе є҆́сть сїѐ, є҆́же и҆зли́шнее и҆ па́че потре́бы. ѿѻнꙋ́дꙋже и҆ а҆пⷭ҇лъ, ꙗ҆̀же ѿ бж҃їѧ црⷭ҇твїѧ на́съ ѿлꙋча̑ющаѧ и҆зсчита́ѧ, и҆ сїю̀ стра́сть ко и҆нѣ̑мъ, глаго́летъ: ꙗ҆́кѡ лихои́мцы црⷭ҇твїѧ бж҃їѧ не наслѣ́дѧтъ. А҆ є҆́же ли́шше стѧжева́ти, ѡ҆ всѧ́кой ве́щи прїе́млетсѧ.

Сїѧ̑ же всѧ̑ ѻ҆бщежи́тельнїи чи́ни преда́ша. Сокоѧде́нїѧ же и҆ сꙋхоѧде́нїѧ мѣ́рꙋ всѣ̑мъ ѻ҆па́снѡ повелѣ́ша: и҆ познава́нїе ра́вности, и҆ прозѧба́ющихъ собла́знъ, и҆ про́чихъ ви́нъ, къ хотѧ́щымъ со множа́йшими жи́ти, сегѡ̀ ра́ди ᲂу҆́бѡ а҆́ще и҆ когда̀ нѣ́сть ма́сла, и҆ прилꙋчи́тсѧ и҆́но что̀ твори́ти, въ потре́бꙋ по нꙋ́жди. А҆́ще ли прилꙋ́чаемъ ни сегѡ̀ нѣ́сть, не досто́итъ пещи́сѧ ѡ҆ се́мъ. Въ сꙋббѡ́тꙋ, ꙗ҆́коже и҆ предвари́вше мно́жицею рѣ́хомъ, въ нача́лѣ є҃-гѡ часа̀ подоба́етъ поставлѧ́ти трапе́зꙋ, и҆ ꙗ҆́сти два̀ ꙗ҆дє́нїѧ, ꙗ҆́коже вы́ше рѣ́хомъ: кромѣ́ же си́хъ, а҆́ще по́слетъ бг҃ъ что́либо, подоба́етъ ꙗ҆́сти всѧ̑ ꙗ҆̀же сꙋ́ть, во сла́вꙋ бж҃їю. Не досто́итъ же пещи́сѧ, ꙗ҆́коже бж҃е́ственнїи ѻ҆тцы̀ преда́ша. И҆ са́мъ гдⷭ҇ь глаго́летъ: ꙗ҆́кѡ не пецы́тесѧ что̀ ꙗ҆́сте, и҆ прѡ́чаѧ. И҆ а҆пⷭ҇лъ и҆зли́шнѧѧ попечє́нїѧ ѿсѣца́ѧ, речѐ: и҆мꙋ́ще же пи́щꙋ и҆ ѡ҆дѣѧ́нїе, си́ми дово́льни бꙋ́демъ.

Та́кожде и҆ въ недѣ́лю, въ г҃-й ча́съ, ре́кше, на концѣ̀ є҆гѡ̀ лѣ́по є҆́сть поставлѧ́ти трапе́зꙋ, и҆ ꙗ҆́сти два̀ варє́нїѧ: а҆́ще ли по́слетъ хрⷭ҇то́съ, и҆ и҆́но что̀ не слага́ющеесѧ ѻ҆боемꙋ̀ ꙗ҆́стїю, подоба́етъ ꙗ҆́сти и҆ тре́тїе, ꙗ҆́коже предреко́хомъ, по нꙋ́жди. Не досто́итъ же прїима́ти сѐ во ᲂу҆ста́въ, но по слꙋ́чаю а҆́ще бꙋ́детъ: ꙗ҆́сти же въ сꙋббѡ́тꙋ, и҆ ве́черъ, подо́бнѣ же и҆ въ недѣ́лю, и҆ въ пра́здники, въ ни́хже что́либо забавле́нїе ско́рагѡ вкꙋше́нїѧ не бꙋ́детъ, на кото́рыйждо ꙗ҆́кѡ подо́бно є҆́сть.

Та́кожде и҆ ѡ҆ вїнѣ̀, ꙗ҆́коже предреко́хомъ, быва́ти до́лжно є҆́сть.

Въ вели̑кїѧ же пра́здники, си́рѣчь хрⷭ҇тѡ́вы, и҆ бг҃оро́дичны, и҆ прⷣтє́чевы, ржⷭ҇тво̀ и҆ ᲂу҆сѣкнове́нїе: и҆ є҆щѐ къ си̑мъ ст҃ы́хъ а҆пⷭ҇лъ петра̀ и҆ па́ѵла, въ како́въ ли́бо де́нь прилꙋчи́тсѧ, въ понедѣ́льникъ, и҆лѝ сре́дꙋ, и҆лѝ пѧто́къ, си́це твори́ти подоба́етъ: въ хрⷭ҇тѡ́вы ᲂу҆́бѡ и҆ въ бг҃оро́дичныѧ, ꙗ҆́кѡ въ де́нь недѣ́льный, кромѣ̀ то́чїю ст҃ы́ѧ м҃-цы: подо́бнѣ же и҆ прⷣте́чєвы, и҆ рече́нныхъ ст҃ы́хъ а҆пⷭ҇лъ. Въ срє́днїѧ же пра́здники, въ ѕ҃-й ча́съ подоба́етъ поставлѧ́ти трапе́зꙋ и҆ ве́черю: ѡ҆ снѣ́ди же, ꙗ҆́коже и҆ въ про́чихъ дне́хъ. А҆́ще ли слꙋчи́тсѧ въ де́нь по́стенъ сꙋ́хо ꙗ҆́сти досто́итъ на ѡ҆бѣ́дѣ. А҆́ще ли и҆ варе́нїе подоба́етъ, без̾ ᲂу҆слажде́нїѧ да быва́етъ, а҆́ще ᲂу҆го́дно є҆́сть бг҃ꙋ: и҆лѝ мно́жицею и҆ со ᲂу҆слажде́нїемъ, є҆гда̀ не зри́тсѧ бѣда̀ дꙋшѝ.

Въ ма̑лыѧ же пра́здники, въ ѳ҃-й ча́съ подоба́етъ ꙗ҆́сти, ꙗ҆́коже ᲂу҆го́дно бг҃ꙋ да быва́етъ, ꙗ҆́коже и҆ въ про́чыѧ дни̑, є҆ди́ною же дне́мъ. А҆́ще ли подоба́етъ и҆ въ ма̑лыѧ пра́здники, варе́нїе без̾ є҆ле́а да быва́етъ, а҆́ще ᲂу҆го́дно є҆́сть бг҃ꙋ, и҆лѝ съ є҆ле́емъ, є҆гда̀ бѣда̀ дꙋше́внаѧ не зри́тсѧ. Сїе́ же разсꙋжде́нїе снѣ́ди пра́здничной и҆звѣствова́ное, по смотре́нїю бы́сть всѧ́кѡ ст҃ы́хъ ѻ҆тє́цъ сїѧ̑ преда́вшихъ: и҆̀же ᲂу҆̀бо ѿ ѻ҆тє́цъ воѡбражє́нныѧ пра́здники, со ѻ҆па́сствомъ, и҆ со стра́хомъ же и҆ ра́зꙋмомъ бж҃їимъ, въ снѣ́дехъ проходи́ти досто́итъ, и҆ въ са́мыхъ тѣ́хъ просты́хъ дне́хъ, мно́жае же па́че въ по́стныхъ: на мно́гихъ бо мѣ́стѣхъ взако́ненныхъ бж҃е́ственныхъ писа́нїѧхъ ѡ҆брѣта́ютсѧ ѿлꙋчены̀ снѣ́ди въ пра́здникахъ, и҆ премѣне́ны. но ꙗ҆́коже и҆ въ ста́рчествѣхъ глаго́летъ: ꙗ҆́кѡ пра́здникъ не вїнопи́тїемъ смотрѧ́й сотворѧ́ти, но ѡ҆бновле́нїемъ ᲂу҆ма̀, и҆ дꙋше́вною чистото́ю, ѡ҆б̾ѧда́ѧйсѧ же и҆ ѡ҆пива́ѧйсѧ прогнѣвлѧ́етъ па́че преднача́льствꙋющагѡ торжество̀.