[глⷡ҇а л҃є] Разсꙋжде́нїе ѡ҆ ꙗ҆́стїи и҆ питїѝ, сꙋббѡ́ты и҆ недѣ́ли, и҆ про́чихъ дне́й седми́чныхъ, и҆ ѡ҆ трапе́зномъ ᲂу҆строе́нїи все́мъ

Въ недѣ́лю, и҆ гдⷭ҇скїѧ пра́здники, подоба́етъ ꙗ҆́сти трѝ ꙗ҆дє́нїѧ, ве́черъ же два̀: въ про́чыѧ же дни̑ седми́цы во вто́рникъ, четверто́къ и҆ сꙋббѡ́тꙋ, два̀: ве́черъ же є҆ди́но.

Досто́итъ же ᲂу҆́бѡ сїѐ вѣ́дати: ꙗ҆́кѡ слꙋжа́й въ трапе́зѣ бра́тїѧмъ, до́лженъ є҆́сть ᲂу҆дарѧ́ти въ би́ло, и҆лѝ кампа́нъ, и҆ собира́тисѧ всѣ̑мъ въ трапе́зꙋ, и҆ глаго́лати ѱало́мъ рм҃д: Вознесꙋ́ тѧ бж҃е мо́й, цр҃ю̀ мо́й:

Семꙋ́ же и҆спо́лншꙋсѧ, и҆ ꙗ҆де́нїю гото́вꙋ сꙋ́щꙋ на трапе́зѣ, глаго́летъ і҆ере́й мл҃твꙋ трапе́зы: Ѻ҆́ч҃е на́шъ:

И҆ бл҃гословлѧ́ѧ настоѧ́тель глаго́летъ: Хрⷭ҇тѐ бж҃е, бл҃гословѝ ꙗ҆́стїе и҆ питїѐ рабѡ́мъ твои̑мъ: и҆ прѡ́чаѧ.

И҆ сѣда́етъ кі́йждо на свое́мъ мѣ́стѣ по чи́нꙋ, со бл҃гоговѣ́нїемъ и҆ молча́нїемъ, начина́ти же а҆́бїе чтꙋ́щемꙋ предисло́вїе чте́нїѧ, є҆го́же хо́щетъ честѝ. Та́же настоѧ́тель, и҆лѝ чредны́й і҆ере́й бл҃гословлѧ́ѧ глаго́летъ: Мл҃твами, є҆гѡ́же чте́нїе є҆́сть. И҆ та́кѡ чте́тъ чте́цъ. И҆ быва́етъ ꙗ҆де́нїе съ молча́нїемъ, и҆ внима́нїемъ тꙋ̀ сꙋ́щагѡ чте́нїѧ. На ко́еждо же послꙋже́нїе предлага́емыхъ, настоѧ́тель ᲂу҆дарѧ́етъ въ кандїю̀ и҆лѝ звоне́цъ: и҆ всѣ̑мъ воста́вшымъ слꙋжа́й глаго́летъ: Гдⷭ҇и бл҃гословѝ.

Настоѧ́тель: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.

Чты́й же до́лженъ є҆́сть честѝ, до́ндеже воздви́гнетъ прест҃ꙋ́ю слꙋжа́й. Здѣ́ же ѻ҆бы́чай и҆́мамы, дїа́конꙋ сїѧ̑ дѣ́йствовати: є҆гда́ же преста́нетъ честѝ, тогда̀ ше́дъ ста́нетъ коне́цъ трапе́зы бра́тскїѧ, зрѧ̀ ᲂу҆миле́ннѣ къ настоѧ́телю, и҆ рꙋ́цѣ согбе́ннѣ и҆мѣ́ѧ при пе́рсехъ, и҆ велегла́снѡ возопи́въ, но не безчи́ннѡ, глаго́летъ: Ѻ҆тцы̀ ст҃і́и, прости́те мѧ̀ грѣ́шнаго. И҆ па́дъ прикло́нитсѧ до землѝ. И҆ прїи́мъ мл҃твꙋ и҆ бл҃гослове́нїе, востае́тъ.

Трапе́зѣ же соверши́вшейсѧ, настоѧ́тель ᲂу҆дарѧ́етъ въ кандїю̀, и҆ всѣ̑мъ воста́вшымъ, а҆́бїе глаго́лютъ бл҃годаре́нїе. И҆ воздвиза́етъ прест҃ꙋ́ю по ѻ҆бы́чаю, ꙗ҆́кѡ предписа́сѧ въ слꙋ́жбѣ воскрⷭ҇ной ли́стъ ѳ҃ на ѡ҆боро́тѣ. А҆ и҆дѣ́же панагі́и чи́на не быва́етъ, воста́вше глаго́лютъ: Бл҃гослове́нъ бг҃ъ ми́лꙋѧй и҆ пита́ѧй на́съ ѿ ю҆́ности на́шеѧ: Сла́ва тебѣ̀ гдⷭ҇и: Бл҃годари́мъ тѧ̀ хрⷭ҇тѐ бж҃е на́шъ:

Та́же, Досто́йно є҆́сть:

Сла́ва, и҆ ны́нѣ: Гдⷭ҇и поми́лꙋй, три́жды: Бл҃гословѝ.

Настоѧ́тель глаго́летъ: Бл҃гослове́нъ бг҃ъ ми́лꙋѧй и҆ пита́ѧй на́съ ѿ свои́хъ бога́тыхъ дарѡ́въ:

И҆сходѧ́щꙋ же є҆мꙋ̀ и҆з̾ трапе́зы, трапеза́рь со слꙋжи́тели па́даетъ пред̾ ни́мъ, просѧ̀ проще́нїѧ.

И҆ настоѧ́тель глаго́летъ: Бг҃ъ да сп҃се́тъ и҆ поми́лꙋетъ послꙋжи́вшихъ на́мъ.

И҆ та́кѡ бра́тїѧ и҆схо́дѧтъ и҆з̾ трапе́зы въ кє́ллїи бл҃гочи́ннѡ и҆ немѧте́жнѡ, творѧ́ще мета́нїе настоѧ́телю.

Се́й ᲂу҆́бѡ ᲂу҆ста́въ сꙋббѡ́тъ, и҆ недѣ́ль, и҆ пра́здникѡвъ, и҆ дне́й седми́чныхъ, кромѣ̀ н҃-цы, во всѐ лѣ́то держа́ти и҆ соблюда́ти лѣ́по є҆́сть. Вїно́ же, а҆́ще прилꙋчи́тсѧ, не досто́итъ да́тисѧ по ᲂу҆ста́вꙋ во и҆́нъ де́нь, но въ недѣ́лю, и҆лѝ въ гдⷭ҇скїѧ пра́здники, и҆лѝ въ дрꙋга̑ѧ нꙋ̑жднаѧ ᲂу҆тѣшє́нїѧ: че́рпати же тогда̀ потре́бно є҆́сть во всѐ лѣ́то на таковы̑ѧ, по є҆ди́ной ча́ши, и҆лѝ по двѣ̀, и҆лѝ мно́жицею по трѝ, и҆ и҆́но ничто́же. Двѣ́ бо, и҆лѝ трѝ ча́шы, не по ᲂу҆ста́вꙋ реко́хомъ, но по нꙋ́жди быва́ти. И҆ па́че а҆́ще слꙋчи́тсѧ, ꙗ҆́коже рѣ́хомъ ѡ҆ трїе́хъ послꙋже́нїихъ, въ недѣ́лю, и҆лѝ въ вели̑кїѧ пра́здники, є҆лма̀ ꙗ҆́коже въ снѣ́ди два̀ послꙋже́нїѧ, подоба́ше и҆мѣ́ти ᲂу҆ста́въ, мно́гажды же и҆ є҆ди́но. Си́це и҆ въ вїнѣ̀ двѣ̀ ча́шы, мно́жицею же и҆ є҆ди́нꙋ и҆мѣ́ти, ᲂу҆ста́въ. А҆́ще слꙋчи́тсѧ и҆ во ᲂу҆речє́нныѧ дни̑, ꙗ҆́коже рѣ́хомъ всегда̀, ꙗ҆́коже и҆ вели́кїй сѷмеѡ́нъ чꙋдотво́рецъ глаго́летъ: Ꙗ҆́кѡ похвала̀ мона́хꙋ, є҆́же не пи́ти вїна̀. А҆́ще ли и҆ пїе́тъ не́мощи ра́ди тѣ́ла своегѡ̀, ма́лѡ да и҆спива́етъ. Подо́бнѡ же и҆ вели́кїй пі́менъ ѻ҆те́цъ на́шъ глаго́летъ: ꙗ҆́кѡ вїна̀ ѿню́дъ не подоба́етъ пи́ти мона́хѡмъ. Сегѡ̀ ра́ди и҆ во и҆́нъ де́нь про́стъ, кромѣ̀ недѣ́ли, не́мощи ра́ди нꙋ́ждныѧ нѣ́кїѧ, по словесѝ ст҃а́гѡ сѷмеѡ́на, ма́ло нѣ́что подоба́етъ пи́ти врачева́нїѧ ра́ди: и҆ а҆́ще и҆ є҆́сть, не дае́тсѧ на всѧ́къ де́нь, ꙗ҆́коже бж҃е́ствєннаѧ пра̑вила повелѣва́ютъ.

А҆́ще ли прилꙋчи́тсѧ въ си́хъ дне́хъ сы́ръ, и҆лѝ ꙗ҆́ица, и҆лѝ ры́ба, ꙗ҆́сти досто́итъ, а҆ не пещи́сѧ: ча́сть же сы́ра мѣ́рити подоба́етъ комꙋ́ждо, подаѧ́ти бра́тїѧмъ ѻ҆́нгїѧ, и҆ по́лъ дрꙋгі́ѧ. Та́кожде и҆ ма́сло мѣ́рою ᲂу҆ста́вленою да влага́етсѧ въ ко́еждо варе́нїе. Семꙋ̀ ᲂу҆ста́вꙋ подоба́етъ бы́ти всегда̀, є҆гда̀ ꙗ҆дѧ́тъ сїѧ̑ ѻ҆боѧ̑.

А҆́ще ли нѣ́кое ᲂу҆тѣше́нїе ѿ нѣ́коегѡ хрⷭ҇толюби́ва бꙋ́детъ, и҆ за є҆́же не ѡ҆печа́лити прине́сшаго, по нꙋ́жди мѣ́рꙋ ѡ҆ставлѧ́ти, и҆ сѐ па́ки, не без̾ разсмотре́нїѧ и҆ безпеча́льнѣ: но поле́знѣйшее твори́ти во сла́вꙋ бж҃їю.

А҆́ще ли не та́кѡ слꙋчи́тсѧ, всегда̀ ᲂу҆чинє́нныѧ дни̑, тѣ́миже мѣ́рилы и҆ мѣ́рами, ѡ҆ сы́рѣ и҆ ма́слѣ, и҆ про́чими подоба́етъ пита́тисѧ: и҆ мно́жицею а҆́ще мо́щно є҆́сть, сїѧ̑ и҆ ᲂу҆ма́лити и҆ ᲂу҆мно́жити досто́итъ, ꙗ҆́коже ᲂу҆́бѡ и҆ вели́кїй васі́лїй во свои́хъ по́стныхъ писа́нїѧхъ ѡ҆б̾ѧвѝ, ре́къ: ꙗ҆́кѡ прикаса́тисѧ ᲂу҆́бѡ комꙋ́ждо лѣ́по є҆́сть вре́мени нѣ́когда слꙋчи́вшꙋсѧ, є҆ли́кѡ пока́зовати тꙋ̀ сꙋ́щымъ же и҆ зрѧ́щымъ, и҆ сїѧ̑ ᲂу҆́бѡ та́кѡ. И҆ си́мъ ᲂу҆́бѡ ᲂу҆ста́вомъ ѡ҆ сы́рѣ, и҆ ма́слѣ, и҆ вїнѣ̀, всегѡ̀ лѣ́та, по мѣ́рѣ и҆ по пра́вилꙋ твори́тисѧ подоба́етъ, ꙗ҆́коже и҆ бж҃е́ственнїи ѻ҆тцы̀ на́ши завѣща́ша, глаго́люще: ꙗ҆́кѡ всѧ̑ мѣ́рою и҆ пра́виломъ. Подо́бнѣ же и҆ ст҃ы́й є҆фре́мъ глаго́летъ: ꙗ҆́кѡ вели́ка бѣда̀, и҆дѣ́же зако́ннїи пра̑вила не жи́тельствꙋютъ.

Рце́мъ же по чи́нꙋ: По сконча́нїи ᲂу҆́бѡ ст҃ы́ѧ н҃-цы, ре́кше, ѿ всѣ́хъ ст҃ы́хъ да́же до ст҃ы́хъ а҆пⷭ҇лъ, во вто́рникъ и҆ четверто́къ, є҆ди́но варе́нїе досто́итъ ꙗ҆́сти без̾ ма́сла, въ ѳ҃-й ча́съ: и҆ и҆́но сꙋхоѧде́нїе. Въ понедѣ́льникъ, сре́дꙋ и҆ пѧто́къ, сꙋхоѧде́нїе ꙗ҆́сти подоба́етъ, хлѣ́бъ и҆ во́дꙋ, и҆ си̑мъ подѡ́бнаѧ. Въ сꙋббѡ́тꙋ и҆ недѣ́лю, два̀ ꙗ҆дє́нїѧ подоба́етъ ꙗ҆́сти, па́че же а҆́ще ѡ҆брѣта́ютсѧ и҆ ры̑бы. И҆ є҆гда̀ варе́нїе ꙗ҆дѧ́тъ, подоба́етъ и҆ и҆́но ꙗ҆де́нїе съ ни́мъ ꙗ҆́сти: ꙗ҆́кѡ да бꙋ́дꙋтъ съ ни́мъ послꙋжє́нїѧ два̀. Ѿ ст҃ы́хъ же а҆пⷭ҇лъ, да́же до поста̀ прест҃ы́ѧ бцⷣы, во вто́рникъ и҆ четверто́къ, два̀ ꙗ҆дє́нїѧ подоба́етъ, два́жды дне́мъ: въ сре́дꙋ же и҆ пѧто́къ, въ ѳ҃-й ча́съ ꙗ҆́сти є҆ди́ножды, по преда́нїю ст҃ы́хъ ѻ҆тє́цъ.

Ꙗ҆́коже и҆ ст҃ы́й чꙋдотво́рецъ сѷмеѡ́нъ воѡбразѝ, глаго́лѧ: ꙗ҆́кѡ да пости́тсѧ мона́хъ не мнѣ́е ѳ҃-гѡ часа̀. Подо́бнѣ же и҆ въ житїѝ прпⷣбнагѡ ѻ҆тца̀ на́шегѡ пахѡ́мїа, глаго́летъ а҆́гг҃лъ: по преда́нїю ѻ҆бщежи́тельномꙋ, ꙗ҆́кѡ въ ѳ҃-й ча́съ. И҆ є҆гда̀ хо́щꙋтъ ꙗ҆́сти, твори́ти мл҃твы трѝ.

И҆ ѡ҆ вторѣ́й же трапе́зѣ ма́лѡ подоба́етъ и҆зрещѝ: По воста́нїи же бра́тїи ѿ трапе́зы, да бꙋ́детъ и҆ второ́е ꙗ҆де́нїе, да предложи́тсѧ бра́шно, ꙗ҆́коже и҆ на пе́рвой трапе́зѣ, да ꙗ҆дѧ́тъ трапеза́рь и҆ чте́цъ, и҆ про́чїи слꙋжи́тели. Подоба́етъ же и҆ сїѐ вѣ́дати, ꙗ҆́кѡ ни є҆ди́номꙋ досто́итъ понѐ ма́лѡ ᲂу҆крꙋ́ха взѧ́ти ѿ трапе́зы, и҆лѝ и҆но́мꙋ даѧ́ти, и҆лѝ во свою̀ ке́ллїю нестѝ. Но никто̀ ѿ бра́тїй да про́ситъ во свою̀ ке́ллїю хлѣ́ба, и҆лѝ со́чива, и҆лѝ ва́рива, и҆лѝ ѻ҆воща̀, и҆лѝ и҆́но что̀ та́мѡ и҆мѣ́ти: но всѐ ѻ҆́бще да ꙗ҆дѧ́тъ. А҆́ще ли кто̀ не́мощи ра́ди прїитѝ въ трапе́зꙋ не возмо́жетъ, таково́мꙋ, по повелѣ́нїю настоѧ́телѧ, да́ти въ ке́ллїю є҆гѡ̀ всѐ. А҆́ще ли кто̀ по́сланъ бы́въ ко́еѧ ра́ди потре́бы, и҆ ᲂу҆ме́длитъ прїитѝ съ бра́тїею на трапе́зꙋ, дадѧ́тъ и҆ томꙋ̀: но въ трапе́зѣ да ꙗ҆́стъ. Ни є҆ди́номꙋ же, по рече́нномꙋ ѡ҆́бразꙋ, бꙋ́ди лѣ́ть въ ке́ллїи ꙗ҆́сти: сѐ ᲂу҆́бѡ ѿню́дъ ѿрица́емъ. По вече́рни же ᲂу҆дарѧ́етъ въ би́ло три́жды, и҆ вхо́дѧтъ бра́тїѧ въ трапе́зꙋ. Ве́чери же ра́ди, ничто́же вари́ти подоба́етъ, не стꙋде́ное же є҆го̀ ꙗ҆дѧ́тъ, но тепло̀, ѿ ѻ҆бѣ́да до ве́чера соблюдено̀: Да бꙋ́детъ ᲂу҆́глїе на ѻ҆гни́щи, и҆ на не́мъ сосꙋ́дъ гли́нѧнъ ста́нетъ до ве́чера, и҆ та́кѡ со́чиво тепло̀ бꙋ́детъ, и҆ без̾ вреда̀ и҆ сла́достно, на ве́чери же поста́витсѧ.

Вше́дше же бра́тїѧ въ трапе́зꙋ, и҆ рече́тъ кела́рь велегла́снѡ: Гдⷭ҇и бл҃гословѝ, и҆ помоли́сѧ.

Та́же настоѧ́тель ᲂу҆да́ритъ въ кандїю̀, и҆ глаго́лютъ: Ꙗ҆дѧ́тъ ᲂу҆бо́зїи и҆ насы́тѧтсѧ, и҆ восхва́лѧтъ гдⷭ҇а взыска́ющїи є҆го̀, жива̑ бꙋ́дꙋтъ сердца̀ и҆́хъ въ вѣ́къ вѣ́ка.

Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

Настоѧ́тель рече́тъ: хрⷭ҇тѐ бж҃е, бл҃гословѝ ꙗ҆́стїе и҆ питїѐ рабѡ́мъ твои̑мъ: ꙗ҆́кѡ ст҃ъ є҆сѝ всегда̀, ны́нѣ и҆ при́снѡ, и҆ во вѣ́ки вѣкѡ́въ.

А҆́ще є҆́сть ᲂу҆тѣше́нїе: че́рпаютъ питїѧ̑ по двѣ̀ ча̑ши, по ѡ҆́бразꙋ, и҆́же на ѻ҆бѣ́дѣ.

По ве́чери же воста́въ ѿ трапе́зы, кела́рь рече́тъ: Мл҃твами ст҃ы́хъ ѻ҆тє́цъ на́шихъ:

Мы́ же рече́мъ: А҆ми́нь.

Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

Та́же: Бы́сть чре́во твоѐ ст҃а́ѧ трапе́за, и҆мꙋ́щаѧ нбⷭ҇наго хлѣ́ба, хрⷭ҇та̀ бг҃а на́шего, ѿ негѡ́же всѧ́къ ꙗ҆ды́й не ᲂу҆мира́етъ, ꙗ҆́коже речѐ всѣ́хъ бг҃ороди́тельнице пита́тель.

Та́же: Чⷭ҇тнѣ́йшꙋю херꙋві̑мъ:

И҆ посе́мъ: Возвесели́лъ ны̀ є҆сѝ гдⷭ҇и въ творе́нїихъ твои́хъ, и҆ въ дѣ́лѣхъ рꙋкꙋ̀ твоє́ю возра́дꙋемсѧ: зна́менасѧ на на́съ свѣ́тъ лица̀ твоегѡ̀ гдⷭ҇и: да́лъ є҆сѝ весе́лїе въ се́рдцѣ мое́мъ, ѿ плода̀ пшени́цы, вїна̀ и҆ є҆ле́а своегѡ̀ ᲂу҆мно́жишасѧ: въ ми́рѣ вкꙋ́пѣ ᲂу҆снꙋ̀ и҆ почі́ю: ꙗ҆́кѡ ты̀ гдⷭ҇и є҆ди́наго на ᲂу҆пова́нїи всели́лъ мѧ̀ є҆сѝ.

Сла́ва, и҆ ны́нѣ: Гдⷭ҇и поми́лꙋй, три́жды. Бл҃гословѝ.

Настоѧ́тель глаго́летъ: Съ на́ми бг҃ъ, свое́ю бл҃года́тїю и҆ чл҃вѣколю́бїемъ всегда̀, и҆ ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

И҆ и҆сходѧ́ще и҆з̾ трапе́зы ко́ждо въ кє́ллїи своѧ̑, творѧ́тъ мета́нїе настоѧ́телю.