[глⷡ҇а к҃з] Ѡ҆ канѡна́рсѣ

Подоба́етъ вѣ́дати, ꙗ҆́кѡ до́лжно є҆́сть канѡна́рхꙋ по є҆́же твори́ти поклоне́нїе, и҆ нача́ти канѡна́рхати, ѡ҆жида́ти конца̀ стїхи́ры, и҆ тогда̀ твори́ти поклоне́нїе ра́вно вкꙋ́пѣ съ бра́тїѧми: И҆ въ дрꙋгꙋ́ю странꙋ̀ ѿше́дъ, и҆ та́мѡ твори́тъ та́кожде. На коне́чный же сті́хъ: ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ: є҆гда̀ начина́етсѧ стїхи́ра, собира́ютсѧ ѻ҆́ба ли̑ка насредѝ ра́внѡ, ни є҆ди́номꙋ предходѧ́щꙋ, дрꙋго́мꙋ же на мѣ́стѣ стоѧ́щꙋ, и҆лѝ є҆ди́номꙋ поклоне́нїе творѧ́щꙋ, дрꙋго́мꙋ же небрегꙋ́щꙋ: но вкꙋ́пѣ собра́вшымсѧ ѻ҆бѣ́ма ли́кома по ѻ҆бы́чаю своемꙋ̀, и҆ ста́вшымъ ѿсю́дꙋ и҆ ѿѻнꙋ́дꙋ. И҆ канѡна́рхꙋ посредѣ̀ стоѧ́щꙋ, твори́тъ бл҃гочи́ннѡ всѣ̑мъ покло́нъ.

Та́кожде и҆ ѻ҆́ба ли̑ка творѧ́тъ покло́нъ, ꙗ҆́кѡ ѿ є҆ди́нагѡ тѣлесѐ и҆зсыла́юще кꙋ́пнѡ, ра́внѣ и҆ бл҃гочи́ннѣ, не преклонѧ́юще колѣ̑на, но вы́ю свою̀ со бл҃гоговѣ́нїемъ, и҆ воздвиза́юще повы́шше гла́съ, и҆ пою́ще: Ꙗ҆́кѡ ᲂу҆тверди́сѧ млⷭ҇ть є҆гѡ̀ на на́съ:

Сла́ва, и҆ ны́нѣ, бг҃оро́диченъ, подо́бенъ гла́са стїхи́ръ мине́и.

По сконча́нїи же, па́ки всѣ̑мъ съ канѡна́рхомъ сотво́ршымъ поклоне́нїе, и҆ на своѧ̑ мѣста̀ ѿходѧ́щымъ, ра́внѡ и҆ бл҃гочи́ннѡ постꙋпа́юще, то́йже канѡна́рхъ прокі́менъ пое́тъ, и҆ а҆ллилꙋ́їа, ѿкрове́нною главо́ю, и҆ до́лженъ є҆́сть ѡ҆жида́ти, до́ндеже соверши́тсѧ прокі́менъ, и҆ а҆ллилꙋ́їа: и҆ тогда̀ поклоне́нїе по ѻ҆бы́чаю твори́тъ.

Та́кожде, и҆ на стїхо́внꙋ подоба́етъ всѣ̑мъ сходи́тисѧ на средѝ, и҆ сотво́рше ра́вно поклоне́нїе, пою́тъ стїхо́внꙋ стїхи́рꙋ, ѡ҆жида́ти же канѡна́рхꙋ подо́бнѡ, ꙗ҆́коже и҆ пре́жде.

И҆ сконча́вшꙋсѧ бг҃оро́дичнꙋ, та́кожде твори́тъ поклоне́нїе, и҆ на мѣ́сто своѐ ѿхо́дитъ. Подоба́етъ же є҆мꙋ̀ покрове́нною главо́ю канѡна́рхати, и҆зрѧ́днѣе же, є҆гда̀ насредѝ стои́тъ, бл҃гочи́нїѧ ра́ди.