Пятница

На Го́споди воззва́х, поста́вим стихо́в 6, и пое́м настоя́щыя подо́бны три́ трипе́снца, господи́на Ио́сифа. Гла́с 4.

Подо́бен: Да́л еси́ зна́мение:

В ре́бра прободе́н, и на Дре́ве пове́шен, жи́знь мне́ источи́л еси́, зло́бою зми́я, дре́ва снеде́нием умерщвле́нному. Те́мже сла́влю Тя́ Христе́, и молю́ благоутро́бие Твое́: страсте́м и воста́нию покло́нника мя́ покажи́, умиле́нием соверша́юща по́стное по́прище.

Боле́знь обра́вша от сада́, первосозда́ннаго от рая́ изгна́л еси́: пригвозди́вся же я́ко Челове́к Спа́се на Дре́ве, сего́ вво́диши. Те́мже Ти́ зову́ Изба́вителю: от боле́зней мои́х ны́не мя́ исхити́, посто́м очи́стив мя́, и покая́нием и слеза́ми, Иису́се Преблаги́й, Спа́се ду́ш на́ших.

И́на стихи́ра подо́бна, гла́с 5, господи́на Фео́дора:

Подобен: Го́споди, при Моисе́и:

Го́споди, животворя́щий Тво́й Кре́ст воспева́ем: се́й бо жи́знь в ми́ре процвете́, сме́рть умертви́в: его́же Тебе́ и ны́не в моли́тву приво́дим: во дне́х святы́х укрепи́ ны постя́щыяся, и да́руй на стра́сти кре́пость, и ми́ра побе́дное, за мно́жество ми́лости Человеколю́бче.

И Мине́и 3. Сла́ва, и ны́не, Богоро́дичен.

Проки́мен, псало́м 35, гла́с 4: Го́споди, на небеси́ ми́лость Твоя́, и и́стина Твоя́ до о́блак. Сти́х: Пра́вда Твоя́ я́ко го́ры Бо́жия: судьбы́ Твоя́ бе́здна мно́га.

Бытия́ чте́ние. [Быт. 5:1–24.]

Сия́ кни́га бытия́ челове́ча, во́ньже де́нь сотвори́ Бо́г Ада́ма: по о́бразу Бо́жию сотвори́ его́. Му́жа и жену́ сотвори́ и́х, и благослови́ и́х: и нарече́ и́мя ему́ Ада́м, во́ньже де́нь сотвори́ и́х. Поживе́ же Ада́м ле́т две́сте три́десять, и роди́ сы́на по ви́ду своему́, и по о́бразу своему́: и нарече́ и́мя ему́ Си́ф. Бы́ша же дни́е Ада́мовы, я́же поживе́, по е́же роди́ти ему́ Си́фа, ле́т се́дмь со́т, и роди́ сы́ны и дще́ри. И бы́ша вси́ дни́е Ада́мовы, я́же поживе́, ле́т де́вять со́т и три́десять: и у́мре. Поживе́ же Си́ф ле́т две́сте пя́ть, и роди́ Ено́са: И поживе́ Си́ф, по е́же роди́ти ему́ Ено́са, ле́т се́дмь со́т и се́дмь, и роди́ сы́ны и дще́ри. И бы́ша вси́ дни́е Си́фовы, ле́т де́вять со́т и двана́десять: и у́мре. И поживе́ Ено́с ле́т сто́ де́вятьдесят, и роди́ Каина́на: И поживе́ Ено́с, по е́же роди́ти ему́ Каина́на, ле́т се́дмь со́т и пятьна́десять, и роди́ сы́ны и дще́ри. И бы́ша вси́ дни́е Ено́совы ле́т де́вять со́т и пя́ть: и у́мре. И поживе́ Каина́н ле́т сто́ се́дмьдесят, и роди́ Малелеи́ла. И поживе́ Каина́н, по е́же роди́ти ему́ Малелеи́ла, ле́т се́дмь со́т и четы́редесять, и роди́ сы́ны и дще́ри. И бы́ша вси́ дни́е Каина́новы, ле́т де́вять со́т и де́сять: и у́мре. И поживе́ Малелеи́л ле́т сто́ шестьдеся́т пя́ть, и роди́ Иа́реда. И поживе́ Малелеи́л, по е́же роди́ти ему́ Иа́реда, ле́т се́дмь со́т и три́десять, и роди́ сы́ны и дще́ри. И бы́ша вси́ дни́е Малелеи́ловы, ле́т о́смь со́т и де́вятьдесят пя́ть: и у́мре. И поживе́ Иа́ред ле́т сто́ шестьдеся́т два́, и роди́ Ено́ха. И поживе́ Иа́ред, по е́же роди́ти ему́ Ено́ха, ле́т о́смь со́т, и роди́ сы́ны и дще́ри. И бы́ша вси́ дни́е Иа́редовы ле́т девятьсо́т и шестьдеся́т два́: и у́мре. И поживе́ Ено́х ле́т сто́ шестьдеся́т пя́ть, и роди́ Мафуса́ла. угоди́ же Ено́х Бо́гу, и поживе́ Ено́х, по е́же роди́ти ему́ Мафуса́ла, ле́т две́сте, и роди́ сы́ны и дще́ри. И бы́ша вси́ дни́е Ено́ховы ле́т три́ста шестьдеся́т пя́ть. И угоди́ Ено́х Бо́гу, и не обрета́шеся, зане́ преложи́ его́ Бо́г.

Проки́мен, псало́м 36, гла́с 6: Потерпи́ Го́спода, и сохрани́ пу́ть Его́. Сти́х: Не ревну́й лука́внующым, ниже́ зави́ди творя́щым беззако́ние.

При́тчей чте́ние. [Глава́ 6:3–20.]

Твори́ сы́не, я́же а́з запове́дую ти́, и спаса́йся: и́деши бо в ру́це злы́х за твоего́ дру́га, бу́ди не ослабева́я: поощря́й же и твоего́ дру́га, его́же испоручи́л еси́. Не да́ждь сна́ твои́ма очи́ма, ниже́ да воздре́млеши твои́ма ве́ждома: Да спасе́шися а́ки се́рна от тене́т, и я́ко пти́ца от се́ти. Иди́ ко мра́вию, о лени́ве, и поревну́й, ви́дев пути́ его́, и бу́ди о́наго мудре́йший. О́н бо не су́щу ему́ земледе́льцу, ниже́ ну́дящаго его́ иму́щий, ниже́ под влады́кою сы́й, Гото́вит в жа́тву пи́щу, и мно́гое в ле́то твори́т угото́вание. или́ иди́ ко пчеле́, и уве́ждь, ко́ль де́лательница е́сть, де́лание же ко́ль честно́е твори́т: ея́же трудо́в ца́рие и прости́и во здра́вие употребля́ют, люби́ма же е́сть все́ми и сла́вна: а́ще си́лою и немощна́ су́щи, [но] прему́дростию почте́на произведе́ся. Доко́ле, о лени́ве, лежи́ши; когда́ же от сна́ воста́неши; Ма́ло у́бо спи́ши, ма́ло же седи́ши, ма́ло же дре́млеши, ма́ло же объе́млеши пе́рси рука́ма: Пото́м же на́йдет тебе́ а́ки зо́л пу́тник убо́жество: ску́дость же а́ки благи́й тече́ц. а́ще же не лени́в бу́деши, прии́дет я́ко исто́чник жа́тва твоя́, ску́дость же а́ки злы́й тече́ц [от тебе́] отбежи́т. Му́ж безу́мен и законопресту́пный хо́дит в пути́ не бла́ги: То́йже намиза́ет о́ком, и зна́мение дае́т ного́ю, учи́т же помава́нием пе́рстов. Развраще́нно же се́рдце куе́т зла́я: на вся́кое вре́мя таковы́й мяте́жы составля́ет гра́ду. Сего́ ра́ди внеза́пу прихо́дит ему́ поги́бель, разсече́ние и сокруше́ние неисце́льное. Я́ко ра́дуется о все́х, и́хже ненави́дит Бо́г: сокруша́ется же за нечистоту́ души́. О́ко досади́теля, язы́к непра́ведный, ру́це пролива́ющыя кро́вь пра́веднаго: И се́рдце кую́щее мы́сли злы́, и но́зе тща́щиися зло́ твори́ти, потребя́тся. Разжиза́ет лжи́ свиде́тель непра́веден, и насыла́ет суды́ посреде́ бра́тий. Сы́не, храни́ зако́ны отца́ твоего́, и не отри́ни наказа́ния ма́тере твоея́.

На стихо́вне самогла́сен дне́. Гла́с 5. Не пости́вшеся по за́поведи Созда́вшаго, от сада́ ра́зума первозда́ннии, сме́рть от преслуша́ния приплоди́ша, дре́ва же жи́зни и ра́йския сла́дости устрани́вшеся. те́мже пости́мся ве́рнии от пи́щей тле́нных, и страсте́й всегуби́тельных, да от боже́ственнаго креста́ жи́знь обы́мем, и со благоу́мным разбо́йником к нача́льному оте́честву возрати́мся, прие́млюще от Христа́ Бо́га ве́лию ми́лость. [Два́жды.]

Му́ченичен: О земны́х все́х неради́вше, и на му́ки му́жески дерзну́вше, блаже́нных наде́жд не погреши́сте, но небе́сному ца́рствию насле́дницы бы́сте, всехва́льнии му́ченицы, иму́ще дерзнове́ние к человеколю́бцу Бо́гу, ми́р ми́рови испроси́те, и душа́м на́шым ве́лию ми́лость.

Сла́ва, и ны́не, Крестобогоро́дичен.

Подо́бен: Ра́дуйся по́стником:

А́гнца своего́, А́гница иногда́ зря́щи к заколе́нию тща́щася, усе́рдно после́доваше, сия́ вопию́щи Ему́: ка́мо и́деши Ча́до мое́ сладча́йшее Христе́, чесо́ ра́ди ско́рое тече́ние сие́, Долготерпели́ве, тече́ши неле́ностно; Иису́се возжеле́ннейший безгре́шне, многоми́лостиве Го́споди, да́ждь Ми́ сло́во Рабе́ Твое́й, Сы́не Мо́й вселюбе́знейший, не пре́зри Мене́ Ще́дре молча́, Тя́ стра́нно ро́ждшую, Бо́же Всеще́дре, да́руяй ми́рови ве́лию ми́лость.

Тро́ичны гла́са.

По 1-м стихосло́вии седа́льны кре́стны осмогла́сника, с богоро́дичным.

По 2-м же стихосло́вии глаго́лем настоя́щыя седа́льны, гла́с 4.

Подо́бен: Ско́ро предвари́

Поще́нием возвыша́ющеся от земноревни́тельных страсте́й вознесе́м Го́спода возне́сшагося на Кре́ст, и ми́р возвы́сившаго. Пии́м во чу́встве умиле́ния питие́, прии́мем де́нь во уме́ и ча́с, во́ньже ве́чному Судии́ предста́нем. [Два́жды.]

Крестобогоро́дичен. Подо́бен:

Безневе́стная Ма́ти Твоя́, я́ко ви́де на Кре́ст Тя́ возвыша́ема, рыда́ющи и пла́чущи сицева́я глаго́лаше: что́ но́вое и стра́нное сие́ Сы́не Мо́й чу́до? ка́ко тя́ беззако́нный наро́д ко кресту́ пригвожда́ет, все́х Тя́ жи́знь, све́та Моего́ сладча́йшаго?

По 3-м стихосло́вии седа́лен господи́на Фео́дора, гла́с 5.

Подо́бен: Сия́ет дне́сь:

Сия́ет Го́споди, благода́ть Креста́ Твоего́, всю́ вселе́нную облиста́ющая, кре́пость бесо́вскую потребля́ет, и поще́ния тече́ние ны́не благоукраша́ет: в не́мже укрепля́я, поми́луй на́с. [Два́жды.]

Крестобогоро́дичен, гла́с то́йже.

Подо́бен: Собезнача́льное:

Вознесе́на на Дре́ве я́ко ви́де, ро́ждшая Тя́ Ма́ти кроме́ боле́зней, и рыда́ше с пла́чем, и взыва́ше: увы́ Мне́ сладча́йший Сы́не, уязвля́юся ны́не душе́ю, на Кресте́ зря́щи Тя́, посреде́ двою́ злоде́ю, а́ки злоде́я пригвожда́ема.

Кано́н Мине́и, и настоя́щыя трипе́снцы по чи́ну и́х, господи́на Ио́сифа. И стихосло́вится пе́снь. Гла́с 4.

Пе́снь 5.

Ирмо́с: Нечести́вии не у́зрят сла́вы Твоея́ Христе́:

Во́лею Влады́ко возне́слся еси́ на Кре́ст, и низве́ргл еси́ врага́: те́мже во́лею низве́ржена мя́ похотьми́ в про́пасть, благоутро́бием Твои́м испра́ви.

Омраче́на мя́ страстьми́ безме́стными душе́ю, просвети́ Иису́се, омрачи́вый со́лнце на Кресте́ просте́рся, и просвети́вый вся́ вселе́нныя исполне́ния.

По́стную пучи́ну преплы́ти ти́хо сподо́би мя́ Христе́, утиша́я во́лны мы́сли моея́, и в приста́нища Воскресе́ния окорми́.

Богоро́дичен: Чи́стую чисто́тствующим почти́м умо́м, добро́ту Иа́ковлю, Боже́ственными дея́ньми украша́ющеся, благоче́стно воспои́м, я́ко Ма́терь Бо́га на́шего.

И́ный трипе́снец господи́на Фео́дора, гла́с 5.

Ирмо́с: От но́щи покланя́ющияся:

Ты́ распе́нся тле́ния избавля́еши мя́, и прободе́н бы́в обезсме́ртствуеши мя́: сла́влю Твою́ неизрече́нную ми́лость, я́ко прише́л еси́ Христе́, да спасе́ши мя́.

На Кресте́ просте́р дла́ни Твоя́, мы́сленнаго Амали́ка уби́л еси́, лю́ди Твоя́ спаса́яй Го́споди. Сего́ ра́ди пое́м держа́ву Твою́.

Тро́ичен: В тре́х Ли́цах Божество́, еди́но нача́ло всепресу́щное, воспои́м Отца́ безнача́льнаго, и Сы́на, и Ду́ха Свята́го.

Богоро́дичен: Его́же не́бо вмести́ти не можа́ше, Ты́ во чре́ве заче́нши родила́ еси́. О стра́ннаго и неизрече́ннаго чудесе́! Те́мже Тя́ вси́ пое́м, Пречи́стая.

Сла́ва Тебе́ Бо́же на́ш, сла́ва Тебе́.

Мене́ ра́ди претерпе́вый распя́тие, о́цет пи́вый, и реки́й: соверши́шася! соверши́ мое́ по́стное по́прище, удостоя́я мя́ ви́дети Твое́ воста́ние.

Ирмо́с: От но́щи покланя́ющыяся Тебе́ Христе́ поми́луй и ми́р да́руй: зане́ све́т повеле́ния Твоя́, бы́ша исцеле́ния рабо́м Твои́м Человеколю́бче.

Пе́снь 8.

Ирмо́с: О́троки благочести́выя:

На Кресте́ пригво́ждься за благоутро́бие, разбо́йнику ра́й отве́рзл еси́: ны́не же разбие́на мя́ де́монскою лю́тостию, и в души́ всепло́тную я́зву прии́мша уврачу́й, отверза́я ми́ две́ри покая́ния Твои́м человеколю́бием.

Посто́м просвети́вше пло́ть, ду́шу доброде́тельми утучни́м, убо́гия напита́им, бога́тство неистощи́мое на небесе́х купу́юще, и воззове́м: Го́спода по́йте дела́ и превозноси́те Его́ во ве́ки.

Стра́стию Твое́ю тва́рь поколеба́ся, на Кресте́ Тя́ ви́девше пригвожда́ема, Спа́се Преблаги́й. Те́мже молю́ Тя, прило́ги коле́блемый при́сно змии́ными, утверди́ у́м мо́й Ще́дре, на тве́рдем ка́мени Твои́х хоте́ний.

Богоро́дичен: Две́ре Бо́жия заключе́на, е́юже еди́н про́йде Госпо́дь, напра́ви мя́ к стезя́м Боже́ственным, и отве́рзи ми́ спасе́ния две́ри, Богоблагода́тная: к Тебе́ бо прибега́ю Де́во, еди́ней предста́тельнице ро́да челове́ческаго.

И́ный. Ирмо́с: Творца́ тва́ри:

Дре́во всесвято́е, на не́мже Ты́ Христе́ мо́й распя́лся еси́, поя́ преблагословлю́ Тя́ во вся́ ве́ки.

На Голго́фе, беззако́ннии Тя́ Христе́, распе́нше уби́ша: но живе́ши, и спаса́еши на́с во ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: Странноле́пно разделя́ется Тро́ица, и пребыва́ет неразде́льна, я́ко Бо́г, Его́же превозно́сим во вся́ ве́ки.

Богоро́дичен: Моли́тву сотвори́ о пою́щих Тя́ Пречи́стая, изба́витися вся́ких искуше́ний и бе́д.

Сла́ва Тебе́ Бо́же на́ш, сла́ва Тебе́.

Креста́ Твоего́ Го́споди, си́лою вжили́в мя́, сподо́би благоду́шно сконча́ти поста́ тече́ние.

Хва́лим, благослови́м, покланя́емся Го́сподеви:

Ирмо́с: Творца́ тва́ри, Его́же ужаса́ются а́нгели, по́йте лю́дие, и превозноси́те во вся́ ве́ки.

Пе́снь 9.

Ирмо́с: Ка́мень нерукосе́чный от несеко́мыя горы́:

Ка́мень Тя́ отсече́нный прови́де проро́к, от горы́ Де́вы Спа́се, сокруши́вшаго ка́мение Твои́м распя́тием. Те́мже отягче́на мя́ нечу́вствия ка́мением, я́ко Всеще́дрый, свободи́.

Пости́ся от зло́бы душе́ моя́, Боже́ственною любо́вию наслажда́ющися, две́ри отве́рзи вся́ким благи́м ви́дом, загражда́ющи лука́вства вхо́д, воздержа́нием и моле́нием.

Мене́ осужде́наго спаси́, осуди́вый Кресто́м Твои́м Влады́ко Спа́се мо́й вражду́, и да не пока́жеши гее́нне пови́нна, оскверне́наго страстьми́, и грехми́ омраче́наго.

Богоро́дичен: Пощади́ мя́ Христе́, егда́ прии́деши суди́ти ми́ру со сла́вою, разреши́ мглу́ зло́б мои́х, мольба́ми Ро́ждшия Тя́, и насле́дника сотвори́ Небе́снаго Ца́рствия Твоего́.

И́ный. Ирмо́с: Иса́ие лику́й:

Па́ки ра́й отверза́еши еди́ною распе́нся, в не́мже причаща́яся жи́зни ра́дуюся, сме́рти избавля́яся ве́чныя преслуша́ния: те́мже Человеколю́бче, я́ко Бо́га моего́ велича́ю Тя́.

Кля́твы орга́н, благослове́ния показа́ся печа́ть, Тво́й животво́рный Го́споди Кре́ст, на не́мже Тя́ взира́юще, оживля́емся уме́ршии пре́жде, и воспева́юще Тя́, я́ко влады́ку велича́ем.

Тро́ичен: Еди́ну существо́м воспева́ю Тя́ безнача́льная Тро́ице честна́я, живонача́льная, несеко́мая еди́нице, О́тче нерожде́нный, и рожде́нный Сло́ве и Сы́не, Ду́ше святы́й, спаси́ ны́ пою́щыя Тя́.

Богоро́дичен: Па́че ума́ Рождество́ Твое́ Богома́ти, без му́жа бо зача́тие в Тебе́, и де́вственно рожде́ние бы́сть, и́бо Бо́г е́сть рожде́йся: Его́же велича́юще, Тя́ Де́во ублажа́ем.

Сла́ва Тебе́ Бо́же на́ш, сла́ва Тебе́.

Кре́сте честны́й, кре́посте моя́ и прибе́жище, бу́ди ми́ просвеще́ние ны́не воздержа́тельно, веселя́ и очища́я мя́, избавля́я от искуше́ний: да прославля́я тебе́, Влады́ку велича́ю Христа́.

Ирмо́с: Иса́ие лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́: Его́же велича́юще, Де́ву ублажа́ем.

Свети́лен гла́са.

На стихо́вне самогла́сен, два́жды, гла́с 8:

Страстоуби́йца по́ст настоя́щий, озло́бленныя от греха́ уврачева́ти обещава́ется: его́же я́ко богода́ннаго помо́щника почти́м, богопи́санныя скрижа́ли Моисе́ом прии́мше. Не предызбере́м сокруши́вшаго и́х невоздержа́нием: не бу́дем о́бщницы, и́хже телеса́ падо́ша в пусты́ни: не возсе́туим иуде́йски, но церко́вно просвети́мся: не фарисе́йски лицеме́руим, но ева́нгльски удобри́мся, хва́лящеся о Кресте́ Христа́, Изба́вителя ду́ш на́ших.

Му́ченичен: Что́ вы нарече́м святи́и; херуви́мы ли; я́ко на ва́с почи́л е́сть Христо́с. Серафи́мы ли; я́ко непреста́нно просла́висте его́. а́нгелы ли; те́ла бо отврати́стеся. си́лы ли; де́йствуете бо чудесы́. мно́гая ва́ша имена́, и бо́льшая дарова́ния: моли́те спасти́ся душа́м на́шым.

Сла́ва и ны́не, Крестобогоро́дичен, гла́с то́йже:

Что́ чу́дное и изя́щное? Де́ва Го́сподеви вопия́ше ма́терски: боле́зни, и́хже не име́х внегда́ роди́ти Тя́ Сы́не, о́стрии каса́ются се́рдца Моего́. Не терплю́ на Кресте́ пригвожде́на Тя́ зря́щи, све́те о́чию Мое́ю: потщи́ся у́бо воста́ни, я́ко да просла́влю с ми́ром ужа́сное смотре́ние Твое́.

На 6-м часе́ тропа́рь проро́чества, гла́с 1:

В нощи́ и во дни́ припа́даем Тебе́ Го́споди, пода́ти оставле́ние грехо́в душа́м на́шым, да в ми́ре поклони́мся Тебе́, и славосло́вим человеколю́бче.

Проки́мен, псало́м 37, гла́с 4: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Сти́х: Я́ко стре́лы Твоя́ унзо́ша во мне́.

Проро́чества Иса́иина чте́ние. [Ис. 7:1–14]

Бы́сть во дни́ Аха́за сы́на Иоафа́мля, сы́на Ози́и, царя́ Иу́дина, взы́де Раси́н ца́рь Ара́мль, и Факе́й сы́н Ромели́ев, ца́рь Изра́илев на Иерусали́м воева́ти на него́, и не возмого́ша разори́ти его́. И возвести́ся в дому́ Дави́дове, глаго́ля: совеща́ся Ара́м со Ефре́мом. и ужасе́ся душа́ его́, и душа́ люде́й его́: я́коже в дубра́ве дре́во ве́тром восколе́блется. И рече́ Госпо́дь ко Иса́ии: изы́ди во сре́тение Аха́зу, ты́, и оста́вшийся Иасу́в сы́н тво́й, к купе́ли го́рняго пути́, села́ бели́льнича. И рече́ши ему́: блюди́ е́же молча́ти, и не бо́йся, ниже́ душа́ твоя́ да изнемо́жет от двою́ дре́ву главе́нь дымя́щихся си́х: егда́ бо гне́в я́рости Моея́ бу́дет, па́ки исцелю́. Сы́н же Ара́мль, и сы́н Ромели́ев, я́ко совеща́ста сове́т лука́вый на тя́, глаго́люще: Взы́дем во Иуде́ю, и собесе́довавше с ни́ми отврати́м я́ к на́м, и воцари́м в не́й сы́на Тавеи́лева. Сия́ же глаго́лет Госпо́дь Савао́ф, не пребу́дет сове́т се́й, ниже́ сбу́дется: Глава́ Ара́му Дама́ск, Дама́ску Раси́н: но еще́ шестьдеся́т и пя́ть ле́т, оскуде́ет ца́рство Ефре́мово от люде́й. Глава́ же Ефре́мови Соморо́н, Соморо́ну сы́н Ромели́ев: и а́ще не уве́рите, ниже́ и́мате разуме́ти. И приложи́ Госпо́дь глаго́лати ко Аха́зу, реки́й: Проси́ себе́ зна́мения от Го́спода Бо́га твоего́ во глубину́, или́ в высоту́. И рече́ Аха́з: не и́мам проси́ти, ниже́ искушу́ Го́спода. И рече́ [Иса́иа] слы́шите у́бо до́ме Дави́дов, еда́ ма́ло ва́м е́сть тру́д дая́ти челове́ком, и ка́ко даете́ Го́сподеви тру́д? Сего́ ра́ди да́ст Госпо́дь Са́м ва́м зна́мение.

Проки́мен, псало́м 38, Гла́с 6: Услы́ши моли́тву мою́ Го́споди, и моле́ние мое́ внуши́. Сти́х: Ре́х: сохраню́ пути́ моя́, е́же не согреша́ти ми́ язы́ком мои́м.