Четверг

на Го́споди воззва́х поста́вим стихо́в 10: и пое́м настоя́щий самогла́сен два́жды, и му́ченичен, и подо́бны 3.

Самогла́сен, гла́с 1:

Духо́вный, бра́тие, взе́мше по́ст, язы́ком не глаго́лите льсти́вная, ниже́ полага́йте претыка́ния бра́ту в собла́зн: но покая́нием просвети́вше души́ свещу́ слеза́ми, возопии́м Христу́: оста́ви на́м грехопаде́ния на́ша, я́ко Человеколю́бец.

Му́ченичен: Всехва́льнии му́ченицы, ва́с ни земля́ потаи́ла е́сть, но не́бо прия́т: отверзо́шася ва́м ра́йская врата́ и вну́трь бы́вше, дре́ва жи́зни наслажда́етеся, Христу́ моли́теся, дарова́тися душа́м на́шым ми́ру, и ве́лией ми́лости.

И́ны стихи́ры господи́на Ио́сифа, гла́с 3.

Подо́бен: Ве́лия Креста́:

Боже́ственных апо́стол Го́споди моле́ньми, по́стное вре́мя до́бре на́м соверши́ти, умиле́нием по́мысла сподо́би, я́ко Бла́г благоутро́бне, да спаса́еми Тя́ прославля́ем вси́.

Подо́бен:

Вели́кое и стра́шное Твое́ Го́споди прише́ствие, в не́мже седя́ су́д пра́ведный сотвори́ши, да не у́бо осу́диши мя́ осужде́ннаго: но я́ко Бо́г пощади́ мя, апо́стол Твои́х благоприя́тными моли́твами.

И́на стихи́ра господи́на Фео́дора, гла́с 6.

Подо́бен: Всю́ отложи́вше:

Христо́вы апо́столи, земны́м свети́ла, сокро́вища миробога́тная, всему́драго ра́зума Бо́га на́шего: ва́с пою́щыя искуше́ний изба́вите святы́ми ва́шими моли́твами, и вре́мя на́м по́стное проводи́ти ю́ношески подаю́щи в ми́ре жи́знь на́шу: да благоуго́дно предвари́вше стра́сть Христо́ву, со дерзнове́нием прино́сим пе́ния Бо́гу на́шему.

И в мине́и 4. Сла́ва, и ны́не, Богоро́дичен:

Проки́мен, псало́м 31, гла́с 6: Весели́теся о Го́споде, и ра́дуйтеся пра́веднии. Сти́х: Блаже́ни, и́хже оста́вишася беззако́ния.

Бытия́ чте́ние. [Быт. 4:16–26.]

Изы́де Ка́ин от лица́ Бо́жия, и всели́ся в зе́млю Наи́д, пря́мо Еде́му. И позна́ Ка́ин жену́ свою́, и заче́нши роди́ Ено́ха: и бе́ зи́ждяй гра́д, и именова́ гра́д во и́мя сы́на своего́, Ено́х. Роди́ся же Ено́ху Гаида́д, и Гаида́д роди́ Малелеи́ла: и Малелеи́л роди́ Мафуса́ла: Мафуса́л же роди́ Ламе́ха. И взя́ себе́ Ламе́х две́ жены́: и́мя еди́ной Ада́, и и́мя вторе́й Селла́. И роди́ Ада́ Иови́ла: се́й бя́ше оте́ц живу́щих в селе́ниих скотопита́телей. И и́мя бра́ту его́, Иува́л: се́й бя́ше показа́вый певни́цу, и гу́сли. Селла́ же и та́я роди́ Фо́вела, се́й бя́ше млатоби́ец, кова́чь ме́ди и желе́за: сестра́ же Фо́велова, Ноема́. Рече́ же Ламе́х свои́м жена́м: Ада́ и Селла́, услы́шите гла́с мо́й жены́ Ламе́ховы, внуши́те моя́ словеса́: я́ко му́жа уби́х в я́зву мне́, и ю́ношу в стру́п мне́. Я́ко седми́цею отмсти́ся от Ка́ина, от Ламе́ха же се́дмьдесять седми́цею. Позна́ же Ада́м Е́ву жену́ свою́, и заче́нши роди́ сы́на, и именова́ и́мя ему́ Си́ф, глаго́лющи: воскреси́ бо ми́ Бо́г се́мя друго́е, вме́сто А́веля, его́же уби́ Ка́ин. И Си́фу бы́сть сы́н: именова́ же и́мя ему́ Ено́с, се́й упова́ призыва́ти и́мя Го́спода Бо́га.

Проки́мен, псало́м 32, гла́с 1: Бу́ди Го́споди ми́лость Твоя́ на на́с, я́коже упова́хом на Тя́. Сти́х: Ра́дуйтеся пра́веднии о Го́споде:

При́тчей чте́ние. [Притч. 5:15–23, 6:1–3.]

Сы́не, пи́й во́ды от свои́х сосу́дов, и от твои́х кладенце́в исто́чника: Да преизлива́ются тебе́ во́ды от твоего́ исто́чника, во твои́ же пути́ да происхо́дят твоя́ во́ды. Да бу́дут тебе́ еди́ному име́ния, и да никто́же чу́ждь причасти́тся тебе́. Исто́чник твоея́ воды́ да бу́дет тебе́ тво́й, и весели́ся с жено́ю я́же от ю́ности твоея́. Еле́нь любве́, и жребя́ твои́х благода́тей да бесе́дует тебе́, твоя́ же да преды́дет тебе́, и да бу́дет с тобо́ю во вся́ко вре́мя: в дру́жбе бо сея́ спребыва́яй, умно́жен бу́деши. Не мно́г бу́ди к чужде́й, ниже́ объя́т бу́ди объя́тии не твоея́. Пред очи́ма бо су́ть Бо́жиима путие́ му́жа, вся́ же тече́ния его́ назира́ет. Законопреступле́ния му́жа уловля́ют: плени́цами же свои́х грехо́в ки́йждо затяза́ется. Се́й скончава́ется с ненака́занными: от мно́жества же своего́ жития́ изве́ржется, и погиба́ет за безу́мие.Сы́не, а́ще поручи́шися за твоего́ дру́га, преда́си твою́ ру́ку врагу́. Се́ть бо крепка́ му́жу свои́ устне́, и пленя́ется устна́ми свои́х у́ст. Твори́ сы́не, я́же а́з запове́даю ти́, и спаса́йся.

И а́бие преждеосвяще́нная Литурги́а.

Тро́ичны гла́са.

По 1-м стихосло́вии седа́льны апо́стольския Осмогла́сника, с Богоро́дичным.

По 2-м же стихосло́вии глаго́лем настоя́щыя седа́льны, гла́с 3.

Подо́бен: Красоте́ де́вства.

Христо́с лоза́ кра́сная, гро́здия ва́с принесе́, сла́дость спаси́тельную напая́ющыя земли́, апо́столи богоно́снии: те́мже мя́ изба́вите сласте́й пия́нства, молю́ся, струи́ умиле́ния души́ мое́й да́рующе в боже́ственнем поще́ния дни́: я́ко да спа́сся живо́т получу́.

Сла́ва, то́йже.

И ны́не, Богоро́дичен: Милосе́рдия Твоего́ бога́тство безме́рное, и могу́тства Твоего́ держа́ву непребори́мую прие́мля во у́м, притеко́х к кро́ву твоему́, ско́рбию содержи́мь, и лю́те недоумева́я, зову́ из глубины́ моего́ се́рдца со слеза́ми: Де́во Богоро́дице, помога́й ми́, еди́на ми́ру предста́тельство.

По 3-м стихосло́вии седа́лен, гла́с 6.

Подо́бен: Го́споди предстоя́ше:

Го́споди благоуве́тлив бу́ди на́м, в сие́ боже́ственное вре́мя, сле́зы точи́ти Тебе́ от се́рдца сподо́би всегда́, ко отмове́нию скве́рн душе́вных, и к прозябе́нию святы́х за́поведей: я́ко да си́це постя́щеся, досто́йно благоугоди́м Тебе́, и всечестну́ю Твою́ стра́сть все́м ви́дети благоизво́ли, моли́твами Твои́х мироспаси́тельных апо́стол, сла́ва Тебе́.

Сла́ва, то́йже.

И ны́не, Богоро́дичен: Милосе́рдия исто́чник Пречи́стая, Честна́я Де́во Ма́ти Богоро́дице, бога́тно на ны́ Чи́стая изле́й, и да́руй на́м согреше́ний оставле́ние: ты́ бо еси́ предста́тельство на́ше и Боже́ственный покро́в.

Кано́н Мине́и, и настоя́щий трипе́снец господи́на Ио́сифа. Гла́с 3.

Пе́снь 4.

Ирмо́с: Еда́ в река́х прогне́ваешися:

Пия́нство сласте́й душетле́нных угаси́вше, умиле́ния питие́м, поста́ ра́ди угобзи́мся.

Пости́ся душе́ невоздержа́ния сне́ди, наслади́ся до́брых виде́ньми, да вы́шнюю трапе́зу улучи́ши.

У́глие огня́ невеще́ственнаго су́ще, попали́те страсте́й мои́х вещество́, боже́ственнии апо́столи Спа́совы.

Богоро́дичен: Пло́ть Христу́ от Твоея́ взаи́м да́вшая, умертви́ пло́ти моея́ стра́сти, жизнороди́тельнице Чи́стая Де́во.

И́ный трипе́снец господи́на Фео́дора. Гла́с 6.

Ирмо́с: услы́ша проро́к прише́ствие Твое́ Го́споди:

Двоенадеся́тице апо́столов, Пе́тре, Па́вле, Иа́кове и Иоа́нне, Андре́е, Варфоломе́е, Фили́ппе, Фомо́ и Матфе́е и Иа́кове, с Си́моном и Иу́дою, моли́твы сотвори́те Христу́, спасти́ся на́м.

Мре́жи уче́ний вве́ргше в мо́ре жития́ стра́нно, к трие́м сто́ и пятьдеся́т, та́йно язы́ки я́ко ры́бы пре́жде улови́сте, сия́ ко Го́споду приве́дше святи́и апо́столи.

Сла́ва, тро́ичен: Сы́на от Отца́ и Ду́ха сла́влю, я́ко от со́лнца све́т, и лучу́. О́ваго у́бо рожде́ственне, зане́ и рожде́ние: о́ваго же происхо́дне, зане́ и происхожде́ние, собезнача́льную Боже́ственную Тро́ицу, покланя́емую от вся́кия тва́ри.

Богоро́дичен: Де́во Младе́нца роди́вшая, и чистоту́ соблю́дшая, Чи́стая Ты́ яви́лася еси́, Бо́га ро́ждши и Челове́ка, еди́наго Того́ во обою́ зра́ку: чу́до Твое́ Де́во Ма́ти, ужаса́ет вся́кий слу́х и по́мысл.

Сла́ва Тебе́ Бо́же на́ш, сла́ва Тебе́.

Вы́ есте́ све́т ми́ру, я́коже ва́м рече́ Христо́с, сия́нием сло́ва: но моли́теся апо́столи, великоду́шно препроводи́ти на́м по́прище воздержа́ния, и поклони́тися Того́ Воскресе́нию.

Ирмо́с: Услы́ша проро́к прише́ствие Твое́ Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х тво́й и убоя́хся, сла́ва си́ле Твое́й Го́споди.

Пе́снь 8.

Ирмо́с: В пла́мень ко отроко́м:

Умертви́вся мно́гими грехи́, ме́ртвую приношу́ ду́шу в житии́. Те́мже мя́ уще́дрите живоно́сными моли́твами ва́шими богови́дцы, ученицы́ Спа́совы.

Объя́т бы́в греха́ мгло́ю, а́ду прибли́жихся отча́яния вои́стинну. Те́мже мя́ просвети́те, Со́лнца сла́вы та́йныя лучи́, су́ще богови́дцы.

От страсте́й воздержи́ся, и спаса́йся душе́ стра́стная: отложе́ние бо бра́шен, по́ст неприя́тный, пра́ве и́щущым, а́ще и прегреше́ний исправле́ние не бу́дет.

Богоро́дичен: Купину́ огне́м горя́щую, Моисе́й Тя́ предзря́ше, Де́во Богома́ти. Те́мже угаси́ мои́х страсте́й пе́щь, и огня́ гее́нны исхити́ и спаси́.

И́ный. Ирмо́с: Его́же во́инства:

Из Иа́кова я́ко дванадесятоколе́нное, апо́стол из Тебе́ друга́я двоенадеся́тица яви́ся Христе́ в ми́ре, е́юже отроди́ся вся́кий ве́рный в сло́ве, Тебе́ воспева́яй во ве́ки.

Мы́сленнаго фарао́на колесни́цы потопи́вше та́йне, я́ко в Чермне́м, лю́ди Госпо́дни к земли́ богове́дения изведо́сте пою́щыя, апо́столи, во ве́ки.

Благослови́м Отца́, и Сы́на, и Свята́го Ду́ха, Го́спода.

Еди́наго Бо́га по Существу́ чту́, три́ Ипоста́си пою́ определи́тельне, и́ныя, но не и́наковыя, поне́же Божество́ еди́но в трие́х Ли́цех: и́бо Оте́ц, и Сы́н, и Боже́ственный Ду́х.

Богоро́дичен: Из светле́йшаго чре́ва Твоего́ проше́д, я́ко Жени́х из черто́га возсия́ Христо́с, све́т ве́лий су́щым во тьме́, и́бо пра́вды Со́лнце облиста́в, просвети́ Чи́стая ми́р.

Сла́ва Тебе́ Бо́же на́ш, сла́ва Тебе́.

Христо́вы таи́нницы и сопресто́льницы, приле́жно о на́с гре́шных всегда́ моля́щиися, и ны́не моли́те поще́ние все́ чи́сте преити́.

Хва́лим, благослови́м, покланя́емся Го́сподеви:

Ирмо́с: Его́же во́инства небе́сная сла́вят, и трепе́щут херуви́ми и серафи́ми, вся́ко дыха́ние и тва́рь, по́йте, благослови́те, и превозноси́те во вся́ ве́ки.

Пе́снь 9.

Ирмо́с: На Сина́йстей горе́:

Ре́ки бы́вше апо́столи, исто́чника у́мнаго, и во́ду живу́ю благоисточи́вше се́рдцем чи́стым, моего́ греха́ струи́ изсуши́те моли́твами ва́шими, и ко спасе́ния путе́м наста́вите.

Грехо́вная обурева́ет бу́ря окая́нную мою́ ду́шу, десни́цу я́ко Петру́ мне́ простри́, Окорми́телю благи́й: да мя́ глубина́ не покры́ет отча́яния, сне́дь да не бу́ду ки́ту душетле́нному, Христе́ Многоми́лостиве.

Апо́стольский ли́к мо́лит Тя́ Иису́се Всецарю́, мо́лят Тя́ а́нгельстии чи́ни за мно́жество щедро́т, лю́дем Твои́м пода́ждь злы́х избавле́ние, жития́ исправле́ние, и Ца́рствия Твоего́ присвое́ние.

Богоро́дичен: Де́вство и рождество́ стеко́стася па́че естества́ на Тебе́, ковче́же честна́го освяще́ния, Ма́ти Де́во Чи́стая. Те́мже ве́рою вопию́ Ти: всего́ мя́ освяти́, всего́ изба́ви вся́каго де́йства страсте́й оскорбля́ющих мя́.

И́ный. Ирмо́с: Безсе́меннаго зача́тия:

В ми́ре я́ко безпло́тнии, и во пло́ти я́ко а́нгели, сло́во еди́но в се́рдце нося́ще, привлеко́сте язы́ки во Христо́ву еди́ну ве́ру, прему́дрыя и вети́и я́ко юро́ди обличи́вше ра́зумом, всеблаже́ннии апо́столи.

Пе́тре, ве́ры ка́меню, и основа́ние: Па́вле пропове́дниче, и учи́телю язы́ков: сы́на Зеведе́ова, с про́чею осмери́цею Христу́ моли́теся приле́жно, благомо́щно преити́ на́м поще́ния по́прище.

Сла́ва: Еди́наго единороди́телю, единоро́днаго Сы́на О́тче, и еди́не еди́наго све́те, све́та сия́ние: и еди́ный еди́не еди́наго Бо́га, Святы́й Ду́ше, Го́спода Госпо́дь вои́стинну сы́й. О Тро́ице, Еди́нице Свята́я, спаси́ мя́ богосло́вяща Тя́.

И ны́не, Богоро́дичен: Чу́до рождества́ Твоего́ удивля́ет мя́ Всенепоро́чная, ка́ко зачина́еши безсе́менно необыме́ннаго; рцы́, ка́ко де́вствуеши, ро́ждши я́ко Ма́ти; е́же па́че естества́ ве́рою прие́м, Рожде́нному поклони́ся: ели́ка хо́щет бо, и мо́жет.

Сла́ва Тебе́ Бо́же на́ш, сла́ва Тебе́.

Си́лою Ду́ха к царе́м и князе́м изше́дше, ника́коже убоя́вшеся, ни огня́, ни меча́, победи́сте вся́кую пре́лесть, и спаса́ете челове́ки, воево́ды Госпо́дни су́ще, всеблаже́ннии апо́столи.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́, те́мже Тя́ вси́ ро́ди, я́ко Богоневе́стную Ма́терь, правосла́вно велича́ем.

Свети́лен гла́са.

На стихо́вне самогла́сен, два́жды. Гла́с 8:

Покая́ния вре́мя, и жи́зни ве́чныя хода́тай на́м е́сть по́стный по́двиг, а́ще простре́м ру́ки во благотворе́ние: ничесо́же бо та́ко спаса́ет ду́шу, я́коже подая́ние тре́бующым. ми́лостыня растворе́нная посто́м, от сме́рти избавля́ет челове́ка: сию́ целу́им, е́йже ничто́же ра́вно, дово́льна бо е́сть спасти́ ду́шы на́шя.

Му́ченичен: В броня́ ве́ры обо́лкшеся до́бре, и о́бразом кре́стным вооружи́вше себе́, во́ини благомо́щнии показа́стеся, мучи́телем му́жески проти́вистеся, и диа́волю пре́лесть потреби́сте, победи́теле бы́вше венце́в сподо́бистеся: моли́теся Христу́ о на́с, во е́же спасти́ся душа́м на́шым.

Сла́ва, и ны́не, Богоро́дичен, гла́с то́йже: А́з Де́во Свята́я Богоро́дице, к покро́ву Твоему́ прибега́ю, ве́м, я́ко обря́щу Тобо́ю спасе́ние: мо́жеши бо Чи́стая помощи́ ми.

На 6-м часе́ тропа́рь проро́чества, гла́с 1:

Па́дшыя возста́ви ны́, отвра́щшыяся обрати́ к Тебе́ Бо́же, я́ко Человеколю́бец, земны́я содержа́й концы́.

Проки́мен, псало́м 33, гла́с 6: Взыска́х Го́спода, и услы́ша мя́, и от все́х скорбе́й мои́х изба́ви мя́. Сти́х: Благословлю́ Го́спода на вся́кое вре́мя.

Проро́чества Иса́иина чте́ние. [Ис. 6:1–12.].

Бы́сть в ле́то, в не́же у́мре Ози́а ца́рь, ви́дех Го́спода седя́ща на престо́ле высо́це, и превознесе́нне, и испо́лнь до́м сла́вы Его́. И серафи́ми стоя́ху о́крест его́, ше́сть кри́л еди́ному, и ше́сть кри́л друго́му: и двема́ у́бо покрыва́ху ли́ца своя́, двема́ же покрыва́ху но́ги своя́, и двема́ лета́ху. И взыва́ху дру́г ко дру́гу, и глаго́лаху: Свя́т, Свя́т, Свя́т Госпо́дь Савао́ф: испо́лнь вся́ земля́ сла́вы его́. И взя́ся наддве́рие от гла́са, и́мже вопия́ху, и до́м напо́лнися ды́ма. И реко́х: о окая́нный а́з, я́ко умили́хся, я́ко челове́к сы́й, и не чи́сты устне́ имы́й, посреде́ люде́й нечи́стыя устне́ иму́щих а́з живу́: и Царя́ Го́спода Савао́фа ви́дех очи́ма мои́ма. И по́слан бы́сть ко мне́ еди́н от серафи́мов, и в руце́ свое́й имя́ше у́гль горя́щь, его́же клеща́ми взя́т от олтаря́, И прикосну́ся устна́м мои́м, и рече́: се́ прикосну́ся сие́ устна́м твои́м, и оти́мет беззако́ния твоя́, и грехи́ твоя́ очи́стит. И слы́шах гла́с Го́спода глаго́люща: кого́ послю́ и кто́ по́йдет к лю́дем си́м; и реко́х: се́ а́з е́смь, посли́ мя́. И рече́: иди́ и рцы́ лю́дем си́м: слу́хом услы́шите, и не уразуме́ете: и ви́дяще, у́зрите, и не уви́дите: Одебеле́ бо се́рдце люде́й си́х, и уши́ма свои́ма тя́жко слы́шаша, и о́чи свои́ смежи́ша: да не когда́ у́зрят очи́ма, и уши́ма услы́шат, и се́рдцем уразуме́ют, и обратя́тся и исцелю́ я́. И реко́х: доко́ле Го́споди? и рече́: до́ндеже опусте́ют гра́ди, от е́же ненаселе́ным бы́ти, и до́мы, от е́же не бы́ти челове́ком, и земля́ оста́нется пуста́. И посе́м продолжи́т Бо́г челове́ки, и умно́жатся оста́вльшиися на земли́.

Проки́мен, псало́м 34, гла́с 6: Воста́ни Го́споди, и вонми́ суду́ моему́. Сти́х: Суди́ Го́споди оби́дящыя мя́.