Вторник

на Го́споди воззва́х: поста́вим стихо́в 6. И пое́м настоя́щыя стихи́ры пра́здника 3. Глас 2.

Подо́бен: Егда́ от Дре́ва:

Егда́ мироно́сицы Тя́ Христе́, зело́ ра́но взыска́ху всех Живота́, ми́ры и арома́ты иму́щыя идя́ху, и любо́вию пла́чущыя, слы́шаху от гро́ба ю́ношу глаго́люща: преста́ните пла́чуще, оба́че ва́шему спасе́нию ра́дующеся возопи́йте всем: я́ко воста́ Госпо́дь.

Ве́мы, о благообра́зный Ио́сифе! тебе́ я́ко херуви́мскую колесни́цу, Царя́ Христа́ на ра́му свое́ю поне́сша, и со креста́ сне́мша, ублажа́ем ру́це твои́, и о́чи боже́ственнии: почита́ем дла́ни твоя́, и́миже Со́лнца Сло́ва и Бо́га, на гроб нося́ положи́л еси́. Те́мже и па́мять твою́ любо́вию почита́ем.

Яви́ся торжество́ нам боголе́пных мироно́сиц, и Ио́сифа честна́го, я́коже други́й рай, исто́чник подая́й жи́зни: благода́тныя во́ды источа́яй ми́рови, излива́ет воста́ния Христо́ва струи́ те́пле. Мно́жества ве́рных пра́зднуют и взыва́ют: сла́ва да́вшему Свое́ Воскресе́ние конце́м.

И мине́и 3. Сла́ва, и ны́не: глас 2:

Мироно́сицы ра́но бы́вшя, и гроб Твой со тща́нием дости́гшя, иска́ху Тебе́ Христе́, во е́же пома́зати пречи́стое те́ло Твое́, и а́нгеловыми глаго́лы огласи́вшеся, радостотво́рныя о́бразы апо́столом пропове́даху: я́ко воскре́се Нача́льник спасе́ния на́шего, плени́вый сме́рть, ми́рови же да́руяй живо́т ве́чный, и ве́лию ми́лость.

Та́же: Све́те ти́хий:

На стихо́вне стихи́ры, глас 2. Воскре́сна:

Христо́с Спас наш, е́же на ны́ рукописа́ние пригвозди́в на Кресте́ загла́ди, и сме́ртную держа́ву упраздни́: покланя́емся Его́ тридне́вному Воскресе́нию.

Стих: К Тебе́ возведо́х о́чи мои́:

Умили́телен: Вопию́ Ти Христе́ Спа́се, мытаре́вым гла́сом: очи́сти мя́ я́коже о́наго, и поми́луй мя́ Бо́же.

Стих: Поми́луй нас:

Му́ченичен: Святы́м му́чеником моля́щымся о нас, и Христа́ пою́щым, вся́ка пре́лесть преста́, и челове́ческий род ве́рою спаса́ется.

Сла́ва, и ны́не:

Почто́ ми́ра со слеза́ми, о учени́цы растворя́ете, ка́мень отвали́ся, гроб истощи́ся: ви́дите тлю́ живото́м попра́нную. Печа́ти свиде́тельствующя я́вственне, спя́щыя лю́те стра́жники непокори́вых, сме́ртное спасе́ся пло́тию Бо́жиею, ад рыда́ет, те́кше ра́достию рцы́те апо́столом: умертви́вый Христо́с сме́рть, перворожде́н из ме́ртвых, вас предваря́ет в Галиле́и.

Та́же, Ны́не отпуща́еши: Трисвято́е. Тропари́ обы́чно. И отпу́ст.

тропари́ пра́здника по обы́чаю. По 1-м стихосло́вии седа́льны, глас 2:

Не́дро пречи́стое в вы́шних не истощи́вый, погребе́ние и Воскресе́ние от всех прия́л еси́: Го́споди сла́ва Тебе́.

Стих: Го́споди, да не я́ростию Твое́ю обличи́ши мене́:

Аз е́смь дре́во непло́дное, Го́споди, умиле́ния плода́ не нося́ отню́д, и посече́ния бою́ся, и огня́ о́наго устраша́юся неугаси́маго. Те́мже Тя́ молю́: пре́жде о́ныя ну́жди обрати́, и спаси́ мя.

Стих: Ди́вен Бог во святы́х Свои́х, Бог Изра́илев:

Му́ченичен: Просвети́вый святы́я Твоя́ па́че зла́та, и просла́вивый преподо́бныя Твоя́ я́ко Благ, те́ми умоле́н быва́я Христе́ Бо́же, жи́знь на́шу умири́, я́ко Человеколю́бец, и моли́тву испра́ви я́ко кади́ло, еди́не во святы́х почива́яй.

Сла́ва, и ны́не: Богоро́дичен:

Зако́нов утаи́вшися естества́, Боже́ственному рождеству́ де́вство совокупи́ла еси́: еди́на бо родила́ еси́ пре́жде Тебе́ Ро́ждшагося безле́тно. Те́мже Тя́ Богоро́дице велича́ем.

По 2-м стихосло́вии, седа́лен пра́здника, глас 2:

Подо́бен: Вы́шних ищя́:

Мироно́сицы у́тро прише́дшыя и гроб то́щь ви́девшыя, апо́столом глаго́лаху: тле́ние низложи́ держа́вный, и су́щих во а́де восхити́ уз: пропове́дите дерзнове́нием, я́ко воскре́се Христо́с Бог, да́руя ми́рови ве́лию ми́лость.

Сла́ва, и ны́не: то́йже.

Воскресе́ние Христо́во: и псало́м 50. Кано́н пра́здника, со ирмосы́ на 8: и Мине́и на 4. Конда́к и ексапостила́рий пра́здника. На хвали́тех, поста́вим стихи́ 4, и пое́м настоя́щыя стихи́ры Осмогла́сника, глас 2:

Да реку́т иуде́е, ка́ко во́ини погуби́ша стрегу́щии Царя́? почто́ бо ка́мень не сохрани́ Ка́мене жи́зни? Или́ погребе́ннаго да дадя́т, или́ Воскре́сшему да покло́нятся, глаго́люще с на́ми: сла́ва мно́жеству щедро́т Твои́х, Спа́се наш, сла́ва Тебе́. [Два́жды.]

Беззако́ния моя́ пре́зри Го́споди, от Де́вы рожде́йся, и се́рдце мое́ очи́сти, храм то́ творя́ Свята́го Твоего́ Ду́ха: да мя́ не уничижи́ши от Твоего́ лица́, безме́рную име́яй ми́лость.

Му́ченичен:

Кре́ст Христо́в восприе́мше святи́и му́ченицы, ору́жие непобеди́мое, всю́ диа́волю кре́пость упраздни́ша, и прии́мше венцы́ небе́сныя, стена́ нам бы́ша, о нас моля́щеся.

Сла́ва, и ны́не: глас 2:

Мироно́сицы жены́, у́тру глубоку́, арома́ты взе́мшя, Госпо́дня гро́ба достиго́ша, я́же не наде́яхуся обре́тшя, помышля́ху благогове́юще ка́менному отвале́нию, и дру́га ко друзе́й глаго́лаху: где́ су́ть печа́ти гро́ба? где́ е́сть Пила́това кустоди́а, и опа́сное утвержде́ние? Бы́сть же возвести́тель не ве́дущым жена́м, блиста́яйся а́нгел, и глаго́ляй к ним: что́ с рыда́нием и́щете жива́го, и оживотвори́вшаго род челове́ческий? Воста́ Христо́с Бог наш из ме́ртвых я́ко всеси́лен, подая́й всем нам нетле́ние и жи́знь, просвеще́ние и ве́лию ми́лость.

На стихо́вне стихи́ры пра́здника, глас 2:

Подо́бен: Егда́ от Дре́ва:

Свет трисо́лнечный на земли́ дне́сь я́сно блиста́ет, и мрак взе́млет страсте́й, явля́ется Воскресе́ние Христо́во, соблюда́ющее ве́рныя: апо́стольстии лику́ют чи́ни любо́вию, Ио́сиф весели́тся, и мироно́сиц честны́х па́мять све́тлая венча́ет ве́рно тех восхваля́ющыя, и Боже́ственное воста́ние сла́вящыя.

Стих: Благоволи́л еси́ Го́споди зе́млю Твою́, возврати́л еси́ плен Иа́ковль.

Взем на ра́мо Ио́сифе, в десни́це О́тчей Сы́на седя́щаго, ми́ро неистощи́мое с ми́ры погре́бл еси́, ми́рови воскресе́ние предложи́л еси́ гро́бу, одева́ющагося све́том я́ко ри́зою, ка́мением спокрыва́еши неизрече́нно. Те́мже Его́ пое́м пе́сньми, светоно́сная страда́ния и Воскресе́ние.

Стих: Ми́лость и и́стина срето́стеся, пра́вда и мир облобыза́стася.

Удивля́ется а́нгелов мно́жество, и тебе́ Ио́сифе зря́ще Христа́ погреба́юща, мир ублажа́ет тя́, ве́рнии чуди́мся: честно́е же Воскресе́ние чту́ще боже́ственно, и с мироно́сицами тя́ те́пле почита́ем. Те́мже и вопие́м непреста́нно: моли́ся с ни́ми спасти́ся и нам бед же и скорбе́й.

Сла́ва, и ны́не: глас 1:

Со стра́хом приидо́ша жены́ на гроб, арома́ты те́ло Твое́ пома́зати тща́щияся, и сие́ не обре́тше, недоумева́хуся дру́га ко друзе́й, не ве́дуще Воскресе́ния. Но предста́ им а́нгел, и рече́: воскре́се Христо́с, да́руяй нам ве́лию ми́лость.

Та́же, час пе́рвый. И отпу́ст.