Понедельник

На Го́споди воззва́х: поста́вим стихо́в 6, и пое́м стихи́ры пра́здника 3.

Стихи́ры пра́здника, глас 5.

Подо́бен: Ра́дуйся по́стником:

Гвоздьми́ пригвозди́вся, кля́тву ю́же на дре́ве, Дре́вом потреби́л еси́: положи́в же Ся во гро́бе, я́же от ве́ка ме́ртвыя Боже́ственною си́лою воскреси́л еси́, Твою́ си́лу велегла́сно сла́вим: Па́сха Боже́ственная Иису́се Всеси́льне, Животе́ наш, О́тчее сия́ние. Те́мже небе́сная с земны́ми ра́дуются, побе́дныя пе́сни Тебе́ победотво́рче Сло́ве пою́ще, Христе́ Вседержи́телю, подаю́щему ми́рови ве́лию ми́лость.

У́бо с ме́ртвыми Живо́т, под земле́ю же невече́рнее Со́лнце, еще́ и ны́не е́сть, мироно́сиц лик рыда́я вопия́ше: прииди́те теце́м тща́тельно, и у́зрим у гро́ба свята́го. Вну́трь же сего́ блиста́ющася а́нгела узре́вше, недоуме́ющеся ужаса́хуся: и́же преложи́в их рыда́ние, возопи́: Жизнода́вец воскре́се, не ужаса́йтеся любоче́стнии, Той ца́рствует, да́руяй ми́рови ве́лию ми́лость.

Ра́но же́нский лик, пре́жде со́лнца, су́щаго взыска́ше со́лнца, во гроб заше́дшаго тогда́, светоза́рный же тем провозглаша́ше а́нгел: возсия́ Свет, озаря́яй во тме́ спя́щыя, светоза́рным ученико́м возвести́те: пла́чь в ра́дость преложи́те, Па́сху же ра́достную и мироспаси́тельную, несумне́нным се́рдцем пле́щуще лику́йте: Христо́с воскре́се, да́руяй ми́рови ве́лию ми́лость.

И Мине́и 3. Сла́ва и ны́не: глас 1:

Мироно́сицы жены́ ко гро́бу что́ приидо́сте? что́ и́щете жива́го в ме́ртвых? Воскре́се Госпо́дь, дерза́йте, вопие́т а́нгел.

Та́же: Све́те ти́хий:

На стихо́вне стихи́ра воскре́сна, глас 2:

Пре́жде век от Отца́ ро́ждшемуся Бо́жию Сло́ву, вопло́щшемуся от Де́вы Мари́и, прииди́те поклони́мся: Кре́ст бо претерпе́в, погребе́нию предаде́ся, я́ко Сам восхоте́: и воскре́с из ме́ртвых, спасе́ мя заблужда́ющаго челове́ка.

Стих: К Тебе́ возведо́х о́чи мои́:

Согреши́х к Тебе́ Спа́се, я́ко блу́дный сын, приими́ мя О́тче ка́ющася, и поми́луй мя́ Бо́же.

Стих: Поми́луй нас Го́споди, поми́луй нас:

Му́ченичен: Земна́го наслажде́ния не возлюби́вшии страстоте́рпцы, небе́сных благи́х сподо́бишася, и а́нгелом согра́ждане бы́ша: Го́споди, моли́твами их, поми́луй и спаси́ нас.

Сла́ва, и ны́не: глас 1:

Со стра́хом приидо́ша жены́ на гроб, арома́ты те́ло Твое́ пома́зати тща́щияся, и сие́ не обре́тше, недоумева́хуся друга́ ко друзе́й, не ве́дуще Воскресе́ния. Но предста́ им а́нгел, и рече́: воскре́се Христо́с, да́руяй нам ве́лию ми́лость.

Та́же: Ны́не отпуща́еши: Тропа́рь: Благообра́зный Ио́сиф: Сла́ва: Егда́ снизше́л еси́: И ны́не: Мироно́сицам: [зри́] А́ще ли и́мать святы́й тропа́рь, глаго́лем пре́жде тропа́рь: Благообра́зный ио́сиф: Сла́ва: свята́го: И ны́не: Мироно́сицам женам: [Тропа́рь: Благообра́зный Ио́сиф: и тропа́рь воскре́сен: Егда́ снизше́л еси́ к сме́рти: в ве́чер глаго́лем их пременя́юще, во всю́ седми́цу, я́коже и пре́жде о сем явле́но е́сть.] И ектениа́, и отпу́ст. Слу́жба же свята́го Мине́и случи́вшагося в сию́ Неде́лю, пое́тся на Повече́рии. По Трисвято́м конда́к еди́н Трио́ди пра́зднику. Си́це глаго́лем да́же и до Неде́ли всех святы́х.

Нача́ло обы́чное, я́коже указа́ся в понеде́льник вторы́я седми́цы по Па́сце. На Бог Госпо́дь: тропа́рь, глас 2: Благообра́зный Ио́сиф: два́жды. Сла́ва: Егда́ снизше́л еси́: И ны́не: Мироно́сицам жена́м: Си́це же глаго́лются тропари́ сия́ чрез всю́ седми́цу. [А́ще е́сть тропа́рь свята́го, глаго́лем тропа́рь пре́жде: Благообра́зный Ио́сиф: еди́ножды. И тропа́рь: Егда́ снизше́л еси́: еди́ножды. Сла́ва: свята́го: И ны́не: Мироно́сицам жена́м:]

По 1-м стихосло́вии седа́лен, глас 2:

Ка́мень гро́бный запеча́тати не возбрани́в, ка́мень ве́ры воскресы́й по́дал еси́ всем, Го́споди, сла́ва Тебе́.

Стих: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Я́ко во́лны морски́я воста́ша на мя́ беззако́ния моя́, и я́ко кора́бль в пучи́не, аз еди́н погружа́юся согреше́ньми мно́гими: но в ти́хое приста́нище наста́ви мя́ Го́споди, покая́нием, и спаси́ мя.

Стих: Ди́вен Бог во святы́х Свои́х, Бог Изра́илев.

Му́ченичен: Тебе́ оде́ющаго не́бо о́блаки, иму́ще святи́и одея́ние, в ми́ре му́ки от беззако́нных претерпе́ша, пре́лесть и́дольскую упраздни́ша. Тех моли́твами и нас свободи́ от неви́димаго врага́ Спа́се, и спаси́ ны.

Сла́ва, и ны́не, Богоро́дичен:

Благоутро́бия су́щи исто́чник, ми́лости сподо́би нас Богоро́дице, при́зри на лю́ди согреши́вшыя, яви́ я́ко при́сно си́лу Твою́: на Тя́ бо упова́юще, ра́дуйся, вопие́м Ти́, я́коже иногда́ Гаврии́л безпло́тных архистрати́г.

И чте́ние.

По 2-м стихосло́вии, седа́лен, глас 2.

Подо́бен: Вы́шних ищя́:

Ми́ра те́пле гро́бу прино́сят жены́ Спа́се, а́нгела све́тлостию ду́ши веселя́ху, и Бо́га Тя́ всех пропове́даху, и ученико́м вопия́ху: вои́стинну воскре́се из гро́ба всех Живо́т.

Сла́ва, и ны́не: то́йже. И чте́ние.

Та́же, Воскресе́ние Христо́во: еди́ножды. Кано́н пра́здника со ирмосы́ на 8, и Мине́и на 4. По 3-й пе́сни, седа́лен свята́го По 6-й пе́сни конда́к пра́зднику: Ра́доватися мироно́сицам: И и́кос. И чтем Про́лог, ексапостила́рии пра́здника: Сла́ва, свята́го: И ны́не: пра́здника.

На хвали́тех стихи́ры на 4, глас 2:

Вся́кое дыха́ние и вся́ тва́рь, Тя́ сла́вит Го́споди, я́ко Кресто́м сме́рть упраздни́л еси́, да пока́жеши лю́дем, е́же из ме́ртвых Твое́ Воскресе́ние, я́ко еди́н Человеколю́бец. [Два́жды.]

Соде́янных мно́ю лю́тых помышля́я безме́стная, к Твои́м прибега́ю щедро́там, мытаря́ подража́я, и блудни́цу слези́вшую, и блу́днаго сы́на. Те́мже и припа́даю Ти́ Ми́лостиве, пре́жде да́же не осу́диши мя́, пощади́ мя Бо́же, и поми́луй мя́.

За Христа́ пострада́вше да́же до сме́рти, о страстоте́рпцы му́ченицы! ду́ши у́бо и́мате на небесе́х в руце́ Бо́жии, и по всему́ ми́ру почита́ются ва́шя мо́щи, свяще́нницы и ца́рие кла́няются, и лю́дие вси́ веселя́тся, и мы́ обы́чно вопие́м: сон честны́й пред Го́сподем сме́рть преподо́бных Его́.

Сла́ва, и ны́не: глас 2:

Приидо́ша на гроб Магдали́на, и друга́я Мари́а, и́щуще Го́спода, и а́нгела ви́деша я́ко мо́лнию седя́ща на ка́мени, и глаго́люща им: что́ и́щете жива́го с ме́ртвыми? воскре́се, я́коже рече́, в Галиле́и Его́ обря́щете. К Нему́ же возопии́м: воскресы́й из ме́ртвых, Го́споди, сла́ва Тебе́.

На стихо́вне стихи́ры пра́здника, глас 6:

Подо́бен: Тридне́вен:

Начни́те лю́дие псало́мски, воспо́йте Христа́ с ра́достию: Па́сха ве́лия возсия́ нам, воскресы́й из гро́ба Христо́с Жизнода́вец, и Изба́витель всего́ созда́ния.

Стих: Благоволи́л еси́ Го́споди зе́млю Твою́, возврати́л еси́ плен Иа́ковль.

Ра́доватися мироно́сицам рек, Е́вино осужде́ние разруши́в, и ра́дость ученико́м воскре́с посыла́еши, пропове́дати е́же из гро́ба тридне́вное Твое́ Воскресе́ние.

Стих: Ми́лость и и́стина срето́стеся. пра́вда и мир облобыза́стася.

Па́сху честну́ю и святу́ю, Христо́с нам озари́, прииди́те вси́ просвети́мся душа́ми: се́ бо ны́не де́нь возсия́, в сий ра́дуйтеся и весели́теся.

Сла́ва и ны́не: глас 2:

Возлия́ша ми́ра со слеза́ми, на гроб Твой жены́, и испо́лнишася ра́дости уста́ их, внегда́ глаго́лати: воскре́се Госпо́дь.

На литурги́и, на блаже́ннах, пе́снь 1-я пра́здника, на 6. По вхо́де тропари́: Благообра́зный Ио́сиф: Егда́ снизше́л еси́ к сме́рти: Мироно́сицам жена́м: И хра́ма свята́го: И тропа́рь свята́го, а́ще е́сть. А́ще ли бу́дет и друга́го свята́го тропа́рь, то́ рцы́ его́: та́же конда́к хра́ма. Сла́ва: свята́го. А́ще ли бу́дет и друга́го свята́го конда́к, та́кожде рцы́ его́: И ны́не, конда́к пра́здника: Ра́доватися мироно́сицам:

Та́кожде глаго́лем тропари́, по вся́ дни́ сея́ святы́я седми́цы, кроме́ свята́го полиеле́йнаго. Си́це быва́ет слу́жба ве́чер, и на Утрени, по вся́ дни́ сея́ седми́цы.