Среда

От нача́ла вече́рни начина́ем покло́ны. На Го́споди воззва́х, стихи́ры я́ко обы́чно.

На стихо́вне самогла́сен, гла́с 1:

Ра́достно прии́мем ве́рнии богодохнове́нное завеща́ние поста́, я́коже пре́жде ниневи́тяне: и па́ки, блудни́цы и мытари́: я́же покая́ния про́поведь от Иоа́нна е́сть. Воздержа́нием угото́вимся к преселе́нию в Сио́н, Влады́чняго священноде́йства. Слеза́ми предочи́стимся в не́м боже́ственнаго умове́ния. Помо́лимся ви́дети обра́зныя зде́ Па́схи соверше́ние, и и́стинныя явле́ния. Угото́вимся на поклоне́ние Креста́, и Воскресе́ния Христа́ Бо́га, вопию́ще к Нему́: не посрами́ нас от ча́яния на́шего Человеколю́бче.

Сти́х: К Тебе́ возведо́х о́чи мои́:

И па́ки ту́же стихи́ру.

Сти́х: Поми́луй на́с Го́споди, поми́луй на́с:

Му́ченичен: О до́брыя ку́пли ва́шея святи́и! Я́ко кро́ви да́сте, и Небеса́ насле́довасте: и вре́менно искуси́вшееся, ве́чно ра́дуетеся. Вои́стину до́брая ва́ша ку́пля: тле́нная бо оста́вльше, нетле́нная восприя́сте, и со А́нгелы лику́юще пое́те непреста́нно Тро́ицу Единосу́щную.

Сла́ва, и ны́не, крестобогоро́дичен:

Подо́бен: Прехва́льнии му́ченицы:

Де́ва нескве́рная, иногда́ на дре́ве ви́девши, Его́же роди́ из безсе́менныя утро́бы, не терпя́щи утро́бнаго уязвле́ния, власы́ терза́ющи глаго́лаше: ма́нием содержа́й тва́рь всю́, ка́ко я́ко осужде́нный на кре́ст вознесе́н еси́, вся́ко хотя́й спасти́ челове́чество.

Ны́не отпуща́еши: По Три́святом, тропа́рь: Богоро́дице Де́во ра́дуйся: Покло́н 1. Сла́ва: Крести́телю Христо́в: Покло́н 1. И ны́не: Моли́те за ны́: Покло́н 1. Под Твое ́благоутро́бие прибега́ем Богоро́дице: без покло́на. Го́споди поми́луй, 40. Сла́ва, и ны́не: Честне́йшую Херуви́м: И́менем Госпо́дним благослови́ о́тче. Иере́й: Сы́й благослове́н Христо́с Бо́г на́ш: И мы́ глаго́лем моли́тву: Небе́сный Царю́: и покло́ны три́ вели́кия, с моли́твою свята́го Ефре́ма: Го́споди и Влады́ко живота́ моего́: и про́чих, 12. Па́ки сконча́вше покло́ны, глаго́лем моли́тву вышепи́санную Го́споди и Влады́ко живота́ моего́: и покло́н еди́н вели́кий. Трисвято́е. По О́тче на́ш: Го́споди поми́луй, 12. Сла́ва, и ны́не: Го́споди поми́луй, три́жды. Благослови́: И отпу́ст. Повече́рие пое́м вели́кое с покло́ны. По Досто́йно е́сть, тропари́ дневны́я и хра́му. И отпу́ст ме́ньший. Та́кожде и проти́ву пятка́ твори́м.

Полу́нощница, с покло́ны ея́.

На у́трени: Пое́м Аллилу́иа в настоя́щий гла́с окто́иха, и тро́ичны гла́са, и обы́чныя кафи́змы две́. Я́ко в сре́ду и в пято́к седми́цы сы́рныя неде́ли пое́м Аллилу́иа.

Сотворя́ем и покло́ны ве́чер и у́тро, я́коже вы́ше рече́ся. И по́ст соверша́ем по чи́ну, а́ще и ко́еголибо прилучи́тся свята́го, и тропа́рь име́яй бу́дет. Междоча́сия же не пое́м.

А́ще же пра́здник сре́тения Госпо́дня, или́ хра́м ко́его свята́го, пое́м тропа́рь, и покло́нов не твори́м, то́чию по три́ покло́ны вели́ких.

По 1-м стихосло́вии седа́льны осмогла́сника кре́стны.

По 2-м стихосло́вии седа́лен трио́ди: Гла́с 2.

Подо́бен: Благоутро́бия су́щи:

С ми́ром прейти́ на́м смире́нным, предочище́ние благоволи́ посто́в, неизрече́нным человеколю́бием Твои́м Христе́ Бо́же: низложи́ вра́жия кова́рствия, и кресто́м Твои́м вся спаси́, еди́не све́дый серде́чная.

Сла́ва, то́йже. И ны́не, крестобогоро́дичен. Подо́бен:

Предстоя́щи кресту́ Твоему́, безсе́менно ро́ждшая Тя́, и не терпя́щи зре́ти непра́ведно стра́ждуща, рыда́ше с пла́чем, и вопия́ше Ти́: ка́ко стра́ждеши естество́м безстра́стный, сладча́йший Сы́не; пою́ Твою́ кра́йнюю благосты́ню.

Зде́ чте́м сло́во о посте́, вели́каго Васи́лия, его́же нача́ло: Утеша́йте утеша́йте: и псало́м 50. Кано́н во окто́ихе кресту́ со ирмосо́м на 6: и в мине́и свята́го на 4: и в трио́ди на 4. В ко́их же пе́снех приспе́ет трипе́снец, и пое́м кано́н трио́ди со ирмосо́м на 6: и трипе́снец на 8. И последи́ ирмо́с трипе́снца. В си́х же пе́снех оставля́ется кано́н окто́иха, и мине́и: И пое́м мине́и в вы́шних пе́снех си́це: 1 пе́снь кано́на окто́иха со ирмосо́м на 4: И в мине́и свята́го 1-ю и 3-ю пе́снь, на 6: И в трио́ди на 4. Подо́бне пое́м осму́ю с шесто́ю и девя́тую с седмо́ю пе́сньми.

Кано́н трио́ди.

Пе́снь 1. Гла́с 4. Творе́ние господи́на Андре́я Кри́тскаго.

Ирмо́с: Воспою́ Тебе́ Го́споди Бо́же мо́й, я́ко изве́л еси́ лю́ди из рабо́ты еги́петския: покры́л же еси́ колесни́цы фарао́новы и си́лу.

Постя́ся Госпо́дь челове́чески, ко изображе́нию на́шему, побежда́ет искуси́теля, показу́я на́ше, и преде́лы подпису́я на́м.

Моисе́й боже́ственный на Сина́и, воздержа́нием Бо́гу лице́м к лицу́ глаго́лати сподо́бися: тому́ ве́рнии поревну́им.

Очи́сти Го́споди, лю́ди Твоя́, и призре́в я́ко Бо́г ми́лостивым о́ком, посети́ все́х мно́жеством ми́лости Твоея́.

Богоро́дичен: К Тебе́ вси́ притека́ем Богоро́дице, я́ко побо́рнице тве́рдей, на моли́тву дви́жуще Тя́, изба́вити ста́до Твое́ от вся́каго обстоя́ния.

Пе́снь 3.

Ирмо́с: В Го́споде Бо́зе мое́м се́рдце мое́ утверди́ся: те́м немощству́ющии препоя́сашася си́лою.

Чу́дный Ено́х воздержа́нием преложи́ся от земли́: тому́ образоревну́юще преложи́мся от тли́ к животу́.

Моли́твами и поще́ньми Изба́вителя умо́лим: сра́дуется бо Созда́тель покая́нию созда́ний свои́х.

Гото́вися о душе́, и предочи́стися пре́жде стра́сти Христо́вы, да воскресе́нием духо́вно спра́зднуеши Ему́.

Богоро́дичен: Я́ко ро́ждшая Бо́га, о на́с непреста́нно моли́ся: к Тебе́ бо Богоро́дице, гре́шнии прибега́ем.

Та́же трипе́снец Ио́сифа. Гла́с 2:

Пе́снь 3.

Ирмо́с: На ка́мени мя ве́ры:

Просте́рл еси́ дла́ни на кресте́ Твое́м, умертви́л еси́ умерщвле́нием Твои́м кля́тву, оживи́л еси́ стра́стию Твое́ю челове́ки. Те́мже пое́м Твое́ боже́ственное распя́тие, Иису́се Человеколю́бче Бо́же на́ш.

Сне́дию дре́ва умертви́вшеся, дре́вом ожи́хом Креста́ Твоего́. Того́ у́бо прино́сим Тебе́ в моли́тву: благода́ть и ми́лость на́м низпосли́, Благоде́телю Влады́ко многоми́лостиве.

Преддве́рия отверзо́шася поще́ния, по́прище приближа́ется воздержа́ния, горя́щим усе́рдием воста́нем, прие́млюще да́р богода́нный, утоля́ющий зно́й прегреше́ний.

Вре́мя блаже́нное поста́, лучи́ испуща́ющее покая́ния возсия́, присту́пим любоче́стно, отгоня́юще тьму́ глубоча́йшую ле́ности, вси́ веселя́щеся.

По́ст освяти́м любому́дренно, пропове́даим воздержа́ние страсте́й, возопии́м во слеза́х Влады́це: да́ждь на́м Го́споди благода́ть, соде́йствующую в Твоя́ хоте́ния, Многоми́лостиве.

Прии́мше дарова́ния поста́ просла́вим Да́вшаго во спасе́ние, и сие́ соде́лаим трудолю́бно, да оставле́ние согреше́ний на́ших от руки́ восприи́мем Сотво́ршаго.

Богоро́дичен: Утоли́ смуще́ние страсте́й мои́х, исцели́ я́звы души́ моея́, воздви́гни мя́ от сна́ уны́ния хода́тайством Твои́м, и предста́тельством, Пресвята́я Влады́чице Ма́ти Де́во.

И́ный, гла́с то́йже:

Ирмо́с: Непло́дствовавший мо́й ум:

Возне́сшуся Ти Спа́се, во́лею на кре́ст, вся́ тва́рь земна́я подви́жеся, и раздра́ся хра́мная заве́са.

Уязви́лся еси́ на кресте́ Иису́се мо́й мене́ ра́ди, и прободе́н в ре́бра Бла́же: отню́дуже ве́рою покланя́юся боже́ственней держа́ве Твое́й.

Сла́ва, тро́ичен: Прекло́нь коле́на на зе́млю, Отцу́ покланя́юся, Сы́на сла́влю, и Ду́ха воспева́ю, единово́льное нача́ло, и триипоста́сное.

Богоро́дичен: Непостижи́мо е́сть та́инство, Чи́стая, Твоего́ рожде́ния: ражда́еши бо Мари́е неискусому́жно Бо́га, и пребыва́еши нетле́нна.

Сла́ва Тебе́ Бо́же на́ш, сла́ва Тебе́.

По́стное время́, си́лою Твое́ю Христе́, освяти́в, спаси́ вся́ ны́ сете́й вра́жиих, покланя́ющияся Тебе́.

Ирмо́с: Непло́дствовавший мо́й ум, плодоно́сен Бо́же покажи́ ми, Де́лателю до́брых, Насади́телю благи́х, благоутро́бием Твои́м.

Седа́лен мине́и свято́му. Сла́ва, и ны́не, крестобогоро́дичен.

Пе́снь 4.

Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся Го́споди.

Авраа́м доброде́телию и страннолю́бием Тро́ицу прия́т, а́нгельски прише́дшую.

Бога́тство некра́домое воздержа́ния е́сть да́р: и си́м обогати́выйся, обогати́тся Божество́м.

Сла́ва: Прииди́те, воспла́чим вку́пе сло́вом, ве́рою вопию́ще: Бо́же, очи́сти ны́ мно́го согре́шшыя.

Богоро́дичен: Ма́ти непоро́чная, благослове́нная, чи́стая Де́во, Сы́ну Твоему́ и Бо́гу на́шему, о ми́ре моли́ся.

Пе́снь 5.

Ирмо́с: Возсия́вый све́т, и просвети́вый у́тро, и показа́вый де́нь: сла́ва Тебе́, сла́ва Тебе́, Иису́се Сы́не Бо́жий.

Пости́вся дре́вле Моисе́й в горе́ Сина́йстей, богови́дец яви́ся: и Илия́ на о́гненней колесни́це возноша́шеся.

Поще́нием иногда́ му́дрый Иса́ия, у́гля о́наго клеще́ю вкуша́ет, егда́ ко устна́м его́ прикосну́ся.

Сла́ва: Пости́вся пре́жде Дании́л, и трие́ о́троцы вку́пе, че́люсти льво́в сокруши́вше, горя́щий пла́мень попра́ша.

Богоро́дичен: Богороди́тельнице чи́стая, Бо́га по чре́ве Твое́м носи́вшая нетле́нно, сохрани́ ста́до Твое́, и соблюди́ невреди́мо.

Пе́снь 6.

Ирмо́с: Я́коже проро́ка Ио́ну от ки́та изба́вил еси́ Христе́ Бо́же: и мене́ из глубины́ прегреше́ний возведи́, и спаси́ мя еди́не Человеколю́бче.

Ио́ну в ки́те честно́е спасе́ поще́ние иногда́: пости́мся у́бо от се́рдца, и убежи́м о́наго в гее́нне тле́ния.

Ниневи́тяне же па́ки гне́в Бо́жий претвори́ша те́плым покая́нием и любо́вию: те́м ны́не любе́зно вси́ поревну́им.

Сла́ва: Настоя́щий по́ст созыва́ет на́с на покая́ние: притеце́м у́бо с любо́вию, и уразуме́им, что́ е́сть да́р воздержа́ния.

Богоро́дичен: Несказа́нно ро́ждшая Спа́са ми́ру Христа́ Бо́га на́шего, Того́ моля́щи не преста́й, ро́д ве́сь спасти́ воспева́ющих Тя́.

Конда́к свята́го: а́ще святы́й не и́мать конда́ка, глаго́лем му́ченичен гла́са, и́же и седа́лен.

Пе́снь 7.

Ирмо́с: Оте́ц на́ших Бо́же, не посрами́ на́с, но да́руй на́м со дерзнове́нием вопи́ти Тебе́: благослове́н еси́ Бо́же оте́ц на́ших

Бу́дем и мы́ я́ко Дании́л о́ный, львы́ иногда́ посто́м укроти́вый в ро́ве рыка́ющия.

Ю́ношам тре́м поревну́им со стра́хом, да убе́гнем огня́ гее́нскаго, я́коже си́и вавило́нския пещи́.

Сла́ва: Пости́мся и мы́ чи́стым се́рдцем, и очи́стим те́ло, и ве́сь вся́ко дух Бо́гу посвяти́м.

Богоро́дичен: Де́во Ма́ти чи́стая, из Тебе́ воплоще́ннаго преве́чнаго Сло́ва моля́щи не престай, спасти́ся душа́м на́шим.

Песнь 8.

Ирмо́с: Царя́ Христа́, Его́же испове́даша плене́нии о́троцы, в пещи́ глаго́люще ве́лиим гла́сом, вся дела́ по́йте Го́спода.

Пости́вся пре́жде Ио́сиф, смше́ния избеже́ беззако́нныя жены́, и ца́рство улучи́. Те́мже и мы́ угаси́м поще́нием разжже́нныя стре́лы врага́ велиа́ра.

Поще́нием Дави́д побе́ду поста́ви на иноплеме́нника, и ца́рство обре́те: те́мже и мы прии́мем воздержа́нием побе́ду на враги́, и во Го́споде венча́ни бу́дем.

Сохрани́м и мы́ доброде́тели их, И́овлево му́жество, Иа́ковле незло́бие, ве́ру Авраа́мову, целому́дрие Ио́сифово, и Дави́дову до́блесть.

Богоро́дичен: Царя́ Христа́, Его́же роди́ на́м Де́ва Мари́я, и по рождестве́ пребы́сть Де́ва чи́стая, вся дела́ госпо́дня Го́спода по́йте, и превозноси́те Его́ во ве́ки.

Та́же трипе́снец и́ный. Ирмо́с: В пе́щь о́гненную:

Крестоявленно Моисей длани возводя на горе, враги побеждаше: Ты же Спасе, на кресте ру́це просте́р, умертви́л еси́ всепа́губное а́да мучи́тельство.

Гвоздьми́ прибие́н на кресте́, и в ре́бра прободе́н Христе́ Спа́се мо́й, кля́твы изба́вил еси́ земноро́дныя, и ра́дости несконча́емыя о́бщники показа́л еси́: те́мже благослови́м человеколю́бие Твое́.

Воздержа́ния вре́мя возсия́вшее мы́сленно просвеща́ет душе́вная чу́вства, и страсте́й мглу́ отго́нит: те́мже лобыза́им сие́ от се́рдца, превознося́ще во ве́ки.

Стра́сти всегуби́тельныя душе́вныя, сла́сти смертоно́сныя по́ст умерщвля́ет, и и́стинно в постоя́нии твори́т се́рдца устремле́ния и движе́ния: се́й у́бо ве́рою восприи́мем любе́зно.

Не поста́ нача́ло настоя́щий святы́й де́нь ве́рнии ве́дуще, се́й чи́стым помышле́нием почти́м, но вхо́д глаго́люще, и прише́ствие к преддве́рию по́стному.

Предприе́млет де́сно боголюбе́зную ду́шу предпу́тиями добре́йший по́ст, предочисти́тельных по́честей преподо́бный, степе́ньми и ле́ствицею, к се́й прило́жься ны́нешний де́нь.

Богоро́дичен: Отверзи толкущим нам, и милость Твою призывающим, скорое человеков прибе́жище, и тве́рдая во все́х Де́во помо́щнице, и су́щим в ну́ждах изве́стная Засту́пнице.

Ины́й.

Ирмо́с: В купине́ Моисе́ю:

Вознесы́йся на кре́ст все́х Влады́ко, Ада́ма со Е́вою па́ки воззва́л еси́, и в ра́й Христе́ Спа́се вве́л еси́, Тя воспева́ющия во вся́ ве́ки.

Тебе́ возне́сшуся Христе́ на кре́ст во́лею, лучи́ со́лнечныя стра́хом помрачи́шася, и за́йде де́нь: отоню́дуже Тя́ разбо́йник Бо́га испове́да во вся́ ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: Ра́вна Отцу́ Сы́на, и Свята́го Ду́ха ве́ровахом бы́ти Святу́ю Тро́ицу в Божестве́ еди́ном: Е́йже ве́рою покланя́емся, А́риево уче́ние при́сно попира́юще.

Богоро́дичен: Ка́ко Тя́ воспою́, я́коже подоба́ет, Богоро́дице Де́во, смра́дными греха́ми аз ны́не помраче́нный; но у́бо Пресвята́я, прости́ мое́ дерзнове́ние убо́гаго моего́ пе́ния.

Сла́ва Тебе́ Бо́же на́ш, сла́ва Тебе́.

Кре́сте, ве́рных упова́ние, царе́й ору́жие, свяще́нников сла́во, мона́шествующих кре́посте, Твое́ю си́лою вся Тя́ славосло́вящия спаса́й во ве́ки.

Хва́лим, благослови́м, покланя́емся Го́сподеви:

Ирмо́с: В купине́ Моисе́ю Де́вы чу́до, на Сина́йстей горе́, прообрази́вшаго иногда́, по́йте, благослови́те, и превозноси́те во вся́ ве́ки.

И стихосло́вится Честне́йшую:

Пе́снь 9.

Ирмо́с: Велича́ем вси́ человеколю́бие Твое́ Христе́ Спа́се на́ш, сла́во раб Твои́х и ве́нче ве́рных, возвели́чивый па́мять ро́ждшия Тя́.

Моисе́й во Еги́пте мо́ре раздели́, и лю́ди проведе́, и сия́ препита́ в пусты́ни непрохо́дней, посто́м творя́ чудеса́.

Иису́с Нави́н воздержа́нием лю́ди освяти́, и насле́дствова зе́млю обетова́нную, Иорда́н преше́д пре́жде.

Гедео́н о́ный, то́кмо с треми́ сты́ муже́й хлепта́вшими, побежда́ет иноплеме́нники воздержа́нием и моли́твою: тому́ ревну́юще и мы́ уподо́бимся.

Богоро́дичен: Ра́дуйся Всечестна́я, Чи́стая де́вства похвало́, А́нгелов утвержде́ние, челове́ков помо́щнице, ми́ра ра́досте, Мари́е, и Ма́ти, и рабо́ Бо́га на́шего.

Та́же три́песнец. Ирмо́с: От Бо́га Сло́ва:

На кресте́ просте́р боже́ственныя дла́ни, совокупи́л еси́ пре́жде расточе́ныя, Изба́вителю: и Отцу́ осужде́ное хода́тайством я́ко да́р прине́сл еси́ существо́ челове́ков: сего́ ра́ди пое́м пречи́стое Твое́ распя́тие.

Свята́го поста́ возсия́вшая благода́ть, лучи́ испуща́ет нам предочища́ющия, па́ки тече́ние помышле́ний, и зе́ницы тьму́ отгоня́ющия, ве́рнии: сего́ ра́ди усе́рдно се́й восприи́мем.

Светоно́сное поще́ние, дарова́ний боже́ственных ча́шу поче́рпшее на́м, дне́сь все́м предъя́вляет: хотя́щии сея́ причасти́тися на по́льзу души́, все́х Влады́це, соде́йствовати на́м помо́лимся.

Гвоздьми́ боже́ственных Твои́х ру́к пригвозди́л еси́ Ще́дре на́ша грехи́ на кресте́: копие́м же ре́бр Твои́х растерза́л еси́ лука́вое писа́ние согреше́ний, и паде́ний лю́тых. Сего́ ра́ди пое́м пречи́стое Твое́ распя́тие.

Доброде́телей добре́йшая отверза́еся стезя́, по́прище боже́ственных поще́ний, сие́ все́м благоукраша́ется: подвиза́тися зако́нно хотя́щии, проси́те Христа́, ми́рное от высоты́ вре́мя на́м дарова́ти.

Богоро́дичен: Скоре́йшею моли́твою, бо́дрым Твои́м покро́вом, держа́вною Твое́ю Влады́чице чи́стая по́мощию, ны́не соблюди́ ве́рныя Твоя́ рабы́ от вся́каго сопроти́внаго прило́га, и страсте́й и прегреше́ний, и напа́стей спаси́.

И́ный. Ирмо́с: Преесте́ственно пло́тию:

На дре́ве кре́стнем во́лею пригво́ждься, все́х на́с свободи́л еси́ кля́твы зако́нныя: те́м Тя́ по до́лгу велича́ем Христе́.

Вси́ покланя́емся страсте́м Твои́м Спа́се, я́же во́лею восприя́л еси́, да свободи́ши ро́д челове́ческий рабо́ты вра́жия.

Тро́ичен: Присносу́щно Оте́ц и нетле́нно Сы́на роди́, и Ду́х е́сть единосу́щен Отцу́ же и Сы́нови, Неразде́льная Тро́ица.

Богоро́дичен: Да́ти проще́ния прегреше́ний Мари́е преблагослове́нная, от Тебе́ вопло́щшагося моли́ Спа́са, на́м гре́шным.

Сла́ва Тебе́ Бо́же на́ш, сла́ва Тебе́.

Лобыза́ющия Тя́, си́лою Твое́ю Кре́сте, по́стное вре́мя прейти́ в ми́ре сподо́би, и изба́ви рабо́ты вра́жия.

Ирмо́с: Преесте́ственно пло́тию Заче́ншую во чре́ве, от Отца́ безле́тно предвозсия́вшее Сло́во, в пе́снех немо́лчных велича́ем ве́рнии.

Свети́лен во окто́ихе гла́са, три́жды: тро́ичен.

На стихо́вне самогла́сен дне́, гла́с 1:

От бра́шен постя́щися душе́ моя́, и страсте́й не очи́стившися, всу́е ра́дуешися неяде́нием: а́ще бо не вина́ ти бу́дет ко исправле́нию, я́ко ло́жная возненави́дена бу́деши от Бо́га, и злы́м де́моном уподо́бишися, николи́же яду́щим. Да не у́бо согреша́ющи, по́ст непотре́бен сотвори́ши: но непоколеби́ма к стремле́нием безме́стным пребыва́й, мня́щи предстоя́ти распя́тому Спа́су, па́че же сраспя́тися тебе́ ра́ди Распе́ншемуся, вопию́щи к Нему́: помяни́ мя Го́споди, егда́ прии́деши во ца́рствии Твое́м.

Глаго́лем се́й два́жды.

Та́же му́ченичен: Ва́с прехва́льнии му́ченицы, ни ско́рбь, ни теснота́, ни гла́д, ни гоне́ние, ни беда́, ни я́рость звере́й, ни ме́чь, ниже́ о́гнь претя́й разлучи́ти от Бо́га возмого́ша: любо́вию же па́че к Нему́, я́ко в чужди́х подви́гшеся телесе́х, естество́ забы́сте, сме́рть презре́вше: те́мже и по достоя́нию боле́зней ва́ших мзду́ прия́сте, небе́снаго ца́рствия насле́дницы бы́сте. Моли́теся о душа́х на́ших.

Сла́ва, и ны́не, крестобогоро́дичен. Подо́бен: Небе́сных чино́в:

Вознесе́на я́ко ви́де на кресте́ А́гнца,/ непоро́чная Де́ва, пла́чущи вопия́ше:/ сладча́йшее мое́ Ча́до,/ что́ но́вое, и пресла́вное виде́ние;/ ка́ко держа́й вся́ дла́нию,// на дре́ве пригвозди́лся еси́ пло́тию;

Та́же, Бла́го е́сть: Трисвято́е. И О́тче на́ш: И тропа́рь: В хра́ме стоя́ще сла́вы Твоея́: Го́споди поми́луй, 40. Сла́ва, и ны́не: Честне́йшую херуви́м: И́менем Госпо́дним благослови́ о́тче. Иере́й: Сы́й благослове́н Христо́с Бо́г на́ш, всегда́ ны́не и при́сно, и во ве́ки веко́в, ами́нь. Та́же, Небе́сный Царю́: И твори́м 3 покло́ны вели́кия с моли́твою свята́го Ефре́ма: Го́споди и Влады́ко живота́ моего́: И про́чих покло́нов 12: излегка́ утомле́ния ра́ди, глаго́люще себе́ вта́й на ки́йждо покло́н: Бо́же очи́сти мя гре́шнаго. И па́ки сконча́вше покло́ны, глаго́лем моли́тву всю́ вышеопи́санную: Го́споди и Влады́ко живота́ моего́: И покло́н еди́н вели́кий. Присовокупля́ем же и 1-й ча́с. Начина́ет игу́мен, или́ экклисиа́рх или́ предстоя́щий мона́х: Прииди́те, поклони́мся, три́жды. Покло́ны 3, и ча́с 1-й, Во́ньже чте́м и оглаше́ния студи́това. На 1-м часе́ тропа́рь: Зау́тра услы́ши гла́с мо́й: Ско́ро, без пе́ния. Стопы́ моя́ напра́ви: и Да испо́лнятся уста́: По Трисвято́м тропа́рь: Ско́ро предвари́: Го́споди поми́луй, 40. И молитву: И́же на вся́кое вре́мя: Го́споди поми́луй: три́жды. Сла́ва, и ны́не: Честне́йшую херуви́м: И́менем Госпо́дним: И обы́чныя покло́ны. Трисвято́е. Го́споди поми́луй, 12. Христе́ све́те: И отпу́ст. И исхожде́ние в притво́р: И лития́ за упоко́й.

В ту́южде сре́ду сы́рную. Пое́м часы́, 3-й, и 6-й, с покло́ны, и тропари́ по́стными: на часе́х в кампа́н не ударя́ют.

Тропа́рь проро́чества, гла́с 3:

Царю́ святы́й всеси́льне, Его́же боя́тся и трепе́щут вся́ческая, спаси́ на́с: мо́жеши бо прости́ти грехи́, я́ко благоутро́бен. Сла́ва, и ны́не, то́йже.

Проки́мен, гла́с 6: Спаси́ Господи лю́ди Твоя́, и благослови́ достоя́ние Твое́. Сти́х: К Тебе́ Го́споди воззову́:

Проро́чества Ио́илева чте́ние. [Глава 2, ст. 12–26].

Та́ко глаго́лет Госпо́дь: обрати́теся ко Мне́ все́м се́рдцем ва́шим в посте́ и в пла́чи, и в рыда́нии, И расто́ргните сердца́ ва́ша, а не ри́зы ва́ша, и обрати́теся ко Го́споду Бо́гу ва́шему, я́ко ми́лостив и ще́рд е́сть, долготерпели́в и многоми́лостив, и раская́вайся о зло́бах. Кто́ ве́сть, обрати́тся ли, и раска́ется, и оста́вит за собо́ю благослове́ние, и же́ртву, и возлия́ние Го́споду Бо́гу ва́шему; Воструби́те трубо́ю в Сио́не, освяти́те по́ст, пропове́дите цельбу́. Собери́те лю́ди, освяти́те це́рковь, избери́те старе́йшины, совокупи́те младе́нцы ссу́щия сосцы́: да изы́дет жени́х от ло́жа своего́ и неве́ста от черто́га своего́. Между́ степе́ньми же́ртвенника воспла́чутся жерцы́ служа́щии Го́споду, и реку́т: пощади́ Го́споди лю́ди Твоя́, и не да́ждь достоя́ния Твоего́ на укори́зну, да не облада́ют и́ми язы́цы, да не реку́т во язы́цех: где е́сть Бо́г и́х; И возревнова́ Госпо́дь о земли́ Свое́й, и пощаде́ лю́ди Своя́. И отвеща́ Госпо́дь лю́дем Свои́м, и рече́: се́ А́з ва́м послю́ пшени́цу, и вино́, и ма́сло древя́ное, и насы́титеся их, и не да́м ва́с ксему́ на поруга́ние во язы́цех. И су́щаго от се́вера отжену́ от ва́с, и отри́ну его́ на зе́млю безво́дную, и погублю́ лице́ его́ в мо́ри пе́рвем, и за́дняя его́ в мо́ре после́днем: и взы́дет гни́лость его́, и взы́дет смра́д его́, я́ко возвели́чи дела́ своя́. Дерза́й земле́, ра́дуйся и весели́ся, я́ко возвели́чи Госпо́дь, е́же сотвори́ти. Дерза́йте ско́ти по́льстии, я́ко прозя́бнуша поля́ пусты́ни, я́ко дре́во принесе́ пло́д сво́й, виногра́д и смо́кви да́ша си́лу свою́: И ча́да Сио́ня ра́дуйтеся, и весели́теся о Го́споде Бо́зе ва́шем, я́ко даде́ ва́м пи́щу в пра́вду, и одожди́т ва́м до́ждь ра́нний и по́здний, я́коже и пре́жде. И напо́лнятся гу́мна ва́ша пшени́цы, и преизлию́тся точи́ла вино́м и еле́ем. И возда́м ва́м вме́сто ле́т, в ня́же поядо́ша пру́зи и мши́ца, и си́плеве, и гу́сеницы, си́ла Моя́ вели́кая, ю́же посла́х на вы́. И сне́сте яду́ще и насы́титеся, и похвали́те И́мя Го́спода Бо́га ва́шего, я́же сотвори́ с ва́ми чудеса́: и не посрамя́тся лю́дие мои́ во ве́к.

Проки́мен гла́с 7: Госпо́дь кре́пость лю́дем Свои́м да́ст, Госпо́дь благослови́т лю́ди Своя́ ми́ром.

Сти́х: Принеси́те Го́сподеви сы́нове Бо́жии.

Та́же, Ско́ро да предваря́т: Трисвято́е. И про́чая по обы́чаю поста́. И моли́тва: Бо́же и Го́споди Си́л:

Вку́пе же пое́м и 9-й ча́с, и моли́тву: Влады́ко Го́споди Иису́се Христе́ Бо́же на́ш: Посе́м изобрази́тельныя, и блаже́нны: Во Ца́рствии Твое́м: Ско́ро, без пе́ния. Сла́ва, и ны́не: Помяни́ нас Го́споди: и покло́ны три́. Ли́к небе́сный: И про́чая. И по О́тче на́ш: Кондаки́ хра́ма, и свято́му. Сла́ва, конда́к: Со святы́ми упоко́й: И ны́не, конда́к: Предста́тельство христиа́н: Го́споди поми́луй, 40. Сла́ва, и ны́не: Честне́йшую херуви́м: Покло́ны три́ вели́кия, и про́чих 12.

Посе́м други́й ли́к начина́ет вече́рню: Прииди́те поклони́мся: три́жды, и псало́м: Благослови́ душе́ моя́ Го́спода: И про́чая.

На Го́споди воззва́х, стихи́ры, я́ко обы́чно.

Сла́ва, и ны́не, богоро́дичен.

Проки́мен, гла́с 5: Бо́же, во и́мя Твое́ спаси́ мя, и в си́ле Твое́й суди́ ми. Сти́х: Бо́же, услы́ши моли́тву мою́, внуши́ глаго́лы у́ст мои́х.

Проро́чества Ио́илева чте́ние. [Глава 3, ст. 12–21].

Та́ко глаго́лет Госпо́дь: да воста́нут и взы́дут вси́ язы́цы на юдо́ль Иосафа́тову, я́ко та́мо ся́ду разсуди́ти вся́ язы́ки я́же о́крест. Испусти́те серпы́, я́ко предстои́т обыма́ние виногра́да: вни́тиде, топчи́те, я́ко испо́лнь точи́ло, излива́ются подточи́лия, я́ко умно́жишася зло́бы их. Гла́си прогласи́ша на по́ли суде́бнем, я́ко бли́з де́нь Госпо́день на юдо́ли суде́бней. Со́лнце и луна́ поме́ркнут, и зве́зды скры́ют све́т сво́й. Госпо́дь же от Сио́на воззове́т, и от Иерусали́ма да́ст гла́с Сво́й, и потрясе́тся не́бо и земля́: Госпо́дь же пощади́т люди́ Своя́, и укрепи́т [Госпо́дь] сы́ны Изра́илевы. И уве́сте, я́ко А́з Госпо́дь Бо́г ва́ш, вселя́яся в Сио́не в горе́ Мое́й святе́й: и бу́дет Иерусали́м свя́т, и иноплеме́нницы не про́йдут сквозе́ его́ ктому́. И бу́дет в то́й де́нь иска́плют го́ры сла́дость, и хо́лми источа́т млеко́, и вси́ исто́чницы Иу́дины источа́т во́ды, и исто́чник от до́му Госпо́дня изы́дет, и напои́т водоте́чь си́тия [евр. ситти́м] Еги́пет в поги́бель бу́дет, и Идуме́я в по́ле поги́бели бу́дет за озлобле́ние сыно́в Иу́диных, поне́же пролия́ша кро́вь пра́ведную на земли́ свое́й. Иуде́я же во ве́ки насели́тся, и Иерусали́м в ро́ды родо́в. И взыщу́ кро́ви и́х и не обезвиню́: и Госпо́дь всели́тся в Сио́не.

Проки́мен, гла́с 6: Да упова́ет Изра́иль на Го́спода, от ны́не и до ве́ка. Сти́х: Го́споди, не вознесе́ся се́рдце мое́, ниже́ вознесо́стеся о́чи мои́. И Сподо́би Го́споди в ве́чер се́й:

На стихо́вне самогла́сен дне́, гла́с 3:

Возсия́ весна́ по́стная, цве́т покая́ния, очи́стим у́бо себе́ бра́тие, от вся́кия скве́рны, Светода́вцу пою́ще рце́м: сла́ва Тебе́, еди́не Человеколю́бче.

Сти́х же глаго́лем: К Тебе́ возведо́х: И повторя́ем самогла́сен. Та́же сти́х: Поми́луй на́с Го́споди: и му́ченичен:

Му́ченицы Твои́ Го́споди, ве́рою утве́рждшеся, упова́нием извести́вшеся, любо́вию Креста́ Твоего́ душе́вно соедини́вшеся, вра́жие мучи́тельство разруши́ша, и улучи́вше венцы́, со безпло́тными мо́лятся о душа́х на́ших.

Сла́ва, и ны́не, богоро́дичен: Первосвята́я, чи́стая, похвала́ су́щи небе́сных чино́в, апо́столов пе́ние, проро́ков сбытие́, Влады́чице, приими́ моли́твы на́ша.

Ны́не отпуща́еши: по Трисвято́м, тропа́рь свято́му: Сла́ва, и ны́не, богоро́дичен его́. Аще́ не́сть, тогда́ тропа́рь дне́. Сла́ва, и ны́не, богоро́дичен, по гла́су тропаря́. Ектения́: Поми́луй на́с Бо́же: Покло́ны 3 вели́кия. Бу́ди и́мя Госпо́дне: Благословлю́ Го́спода: Досто́йно е́сть: И отпу́ст. И исхожде́ние в притво́р. И быва́ет обы́чная лития́ о усо́пших. [зри́] Разу́мно же да бу́дет, я́ко в Палести́не, е́же е́сть во Иерусали́мской стране́, не прия́хом от святы́х оте́ц сотворя́ти соверше́нныя литурги́и в сре́ду и в пято́к сы́рныя неде́ли, ниже́ преждеосвяще́нныя: в та бо два́ дни́ пое́м аллилу́ия с покло́ны ве́чер и у́тро, я́коже вы́ше рече́ся.

По вече́рни же, в си́х дву́ дне́х, яди́м сы́р и я́йца, соблюда́юще и пра́вило во святы́х отца́ на́шего Ники́фора, патриа́рха Константинопо́льского, испове́дника, глаго́люща: подоба́ет пости́тися мона́хом в сре́ду, и пято́к сыроя́стный. Отвраща́ет же сие́ пра́вило преда́ние иакови́тское и тетради́тскую е́ресь. [зри́] В сре́ду сы́рную ве́чер. Повече́рие пое́м ма́лое. И пое́м кано́н, и́же в мине́и на ряду́, в суббо́ту хотя́щаго прилучи́тися свята́го.