Суббота

по е́же Христо́с воскре́се: и ектении́, на Го́споди воззва́х: поста́вим стихо́в 6, и пое́м стихи́ры воскре́сны, гла́с 8:

Вече́рнюю пе́снь, и слове́сную слу́жбу, Тебе́ Христе́ прино́сим: я́ко благоволи́л еси́ поми́ловати на́с воскресе́нием.

Го́споди, Го́споди, не отве́ржи на́с от Твоего́ лица́: но благоволи́ поми́ловати на́с Воскресе́нием.

Ра́дуйся, Сио́не святы́й, ма́ти Церкве́й, Бо́жие жили́ще, ты́ бо прия́л еси́ пе́рвый, оставле́ние грехо́в, воскресе́нием.

Восто́чны⁶ три́, гла́с то́йже:

Е́же от Бо́га Отца́ Сло́во, пре́жде ве́к ро́ждшееся, в после́дняя же времена́, То́ежде от Неискусобра́чныя вопло́щшееся во́лею, распя́тие сме́ртное претерпе́: и дре́вле умерщвле́ннаго челове́ка спасе́ Свои́м Воскресе́нием.

Е́же из ме́ртвых Твое́ Воскресе́ние славосло́вим Христе́, и́мже свободи́л еси́ Ада́мский ро́д от а́дова мучи́тельства: и дарова́л еси́ ми́рови я́ко Бо́г жи́знь ве́чную, и ве́лию ми́лость.

Сла́ва Тебе́ Христе́ Спа́се, Сы́не Бо́жий единоро́дный, пригвозди́выйся на Кресте́, и воскресы́й из гро́ба тридне́вен.

Сла́ва:

Тебе́ сла́вим Го́споди, во́лею на́с ра́ди Кре́ст претерпе́вшаго, и Тебе́ покланя́емся Всеси́льне Спа́се: не отве́ржи на́с от лица́ Твоего́, но услы́ши и спаси́ ны Воскресе́нием Твои́м, Человеколю́бче.

И ны́не: Богоро́дичен:

Ца́рь Небе́сный за человеколю́бие на земли́ яви́ся, и с челове́ки поживе́: от Де́вы бо Чи́стыя пло́ть прие́мый, и из Нея́ проше́дый с восприя́тием: еди́н е́сть Сы́н, сугу́б естество́м, но не ипоста́сию. Те́мже соверше́нна Того́ Бо́га, и соверше́нна Челове́ка вои́стинну пропове́дающе, испове́дуем Христа́ Бо́га на́шего: Его́же моли́ Ма́ти Безневе́стная, поми́ловатися душа́м на́шим.

Вхо́д: Све́те ти́хий: Проки́мен гла́с 8: Да́л еси́ достоя́ние боя́щымся Тебе́ Го́споди. Сти́х: От коне́ц земли́ к Тебе́ воззва́х. Сти́х: Покры́юся в кро́ве кри́л Твои́х. Сти́х: Та́ко воспою́ и́мени Твоему́ во ве́ки. И па́ки: Да́л еси́ достоя́ние боя́щымся Тебе́ Го́споди. Та́же, ектениа́, Сподо́би Го́споди в ве́чер се́й: и про́чая.

На стихо́вне стихи́ра воскре́сна, гла́с 8:

Возше́л еси́ на Кре́ст Иису́се, снизше́дый с небесе́: прише́л еси́ на сме́рть Животе́ безсме́ртный, к су́щым во тьме́ Све́т и́стинный: к па́дшым все́х Воскресе́ние, просвеще́ние, и Спа́се на́ш, сла́ва Тебе́.

Та́же стихи́ры па́схи, с припе́вы и́х: Христо́с воскре́се: три́жды. И отпу́ст.

См. Пасхальный канон и стихиры Пасхи

восле́дование все́, я́ко предписа́ся.

На хвали́тех стихи́ры воскре́сны на 4, гла́с 8:

Го́споди, а́ще и суди́лищу предста́л еси́ от Пила́та суди́мый, но не отступи́л еси́ от престо́ла со Отце́м седя́й: и воскре́с из ме́ртвых, ми́р свободи́л еси́ от рабо́ты чужда́го, я́ко Ще́др и Человеколю́бец.

Го́споди, а́ще и я́ко ме́ртва во гро́бе иуде́и положи́ша: но я́ко Царя́ спя́ща во́ини Тя́ стрежа́ху, и я́ко живота́ сокро́вище, печа́тию печа́таша: но воскре́сл еси́, и по́дал еси́ нетле́ние душа́м на́шим.

Го́споди, ору́жие на диа́вола Кре́ст Тво́й да́л еси́ на́м: трепе́щет бо и трясе́тся, не терпя́ взира́ти на си́лу его́: я́ко ме́ртвыя возставля́ет, и сме́рть упраздни́. сего́ ра́ди покланя́емся погребе́нию Твоему́ и воста́нию.

А́нгел Тво́й Го́споди, Воскресе́ние пропове́давый, стра́жи у́бо устраши́, жена́м же возгласи́ глаго́ля: что́ и́щете Жива́го с ме́ртвыми? Воскре́се Бо́г сы́й, и вселе́нней жи́знь дарова́.

Та́же стихи́ры па́схи, с припе́вы и́х: Христо́с воскре́се: три́жды. Ектении́, и отпу́ст, и ча́с пе́рвый. Часы́ па́схи.

На литурги́и антифо́ны па́схи. Проки́мен апо́стола, гла́с 3: Госпо́дь просвеще́ние мое́, и спаси́тель мо́й, кого́ убою́ся? Сти́х: Госпо́дь защи́титель живота́ моего́, от кого́ устрашу́ся? Апо́стол дея́ний, зача́ло 8: Держа́щуся: Аллилу́иа, гла́с 5: Госпо́дь воцари́ся, в ле́поту облече́ся. Сти́х: И́бо утверди́ вселе́нную, я́же не подви́жится. Ева́нглие Иоа́нна, зача́ло 11: Прии́де Иису́с и ученицы́ его́: И про́чее литурги́и. Прича́стен: Те́ло Христо́во приими́те:

По отпу́сте Литурги́и, иду́щым бра́тиям из це́ркве в трапе́зу, пре́жде несе́т диа́кон а́ртос, без о́браза Воскресе́ния Христо́ва. Параекклисиа́рху же с бра́тиею в то́ вре́мя ударя́ющым во вся́ зво́ны. В трапе́зе же внегда́ ся́дут бра́тия, кела́рь раздроби́в хле́б, во все́й седми́це воздвиза́емый, вме́сто пресвяты́я, раздае́т бра́тиям пре́жде обы́чнаго и́х яде́ния, и та́ко потребля́ем и́. Пе́рвее ре́кше: Христо́с воскре́се: Та́же: О́тче на́ш: И благослове́ние обы́чное трапе́зы. И седа́ем я́сти. Чте́ц же начина́ет чте́ние. На трапе́зе утеше́ние ве́лие бра́тии. Воста́вше же от трапе́зы, пое́м: Христо́с воскре́се: три́жды. Благослове́н Бо́г ми́луяй, и пита́яй на́с: Та́же, Сла́ва тебе́ Го́споди, сла́ва Тебе́ Святы́й: Сла́ва, и ны́не: Го́споди поми́луй. Три́жды. Благослови́. И взе́м диа́кон хле́б обы́чный, во все́м ле́те возвыша́емый трема́ пе́рсты, обе́ма рука́ма, зна́менует и́м панагиа́рь крестови́дно, глаго́ля: вме́сто, Вели́ко и́мя Святы́я Тро́ицы. Христо́с воскре́се: [Еди́ножды.] На́м отвеща́ющым: Вои́стинну воскре́се. Та́же наднося́ ча́сть над о́браз Богоро́дичный глаго́лет: Пресвята́я Богоро́дице, помога́й на́м. Мы́ же: Тоя́ моли́твами Христе́ Бо́же, поми́луй и спаси́ на́с. И глаго́лем: Блажи́м Тя́ вси́ ро́ди: и ирмо́с 9-я пе́сни: Свети́ся, свети́ся: с тропари́ обе́ма ея́, и па́ки: Свети́ся, свети́ся: Та́же глаго́лет настоя́тель [а́ще же не́сть, глаго́лет иере́й]: В премно́гия мольбы́ преблагослове́нныя влады́чицы: Мы́ же рече́м: Тоя́ моли́твами: Иере́й же: Ми́лостив и ще́др Госпо́дь, пи́щу даде́ боя́щымся его́. Мы́ же: Христо́с воскре́се: три́жды. Трисвято́е. По О́тче на́ш: Ипакои́: Предвари́вшыя у́тро: Сла́ва, и ны́не: А́ще и во гро́б: Го́споди поми́луй. Три́жды. Благослови́. Благослове́н Бо́г ми́луяй, и пита́яй на́с от Свои́х бога́тых даро́в: Мы́ же рече́м: Ами́нь. И проще́ние обы́чное.

Си́це же твори́м, и до отда́ния пра́здника Па́схи.