Четверг

обы́чное стихосло́вие. На Го́споди воззва́х, поста́вим стихо́в 10. и пое́м настоя́щий самогла́сен дне́ два́жды.

Гла́с 5:

Бога́тый в страсте́х сы́й, преле́стною лицеме́рия обложе́н е́смь оде́ждою, веселя́ся в злы́х невоздержа́ния, и безме́рное немилосе́рдие показу́ю, презира́я мо́й у́м, пред две́рьми пове́рженный покая́ния, а́лчущий вся́каго бла́га, и боля́щий невнима́нием мои́м: но Ты́ Го́споди Ла́заря мя́ сотвори́, ни́щаго греха́ми, да не ка́ко тре́буяй, не получу́ пе́рста ороша́юща, боле́знующу моему́ язы́ку в негаси́мом огни́: в не́дрех же патриа́рха Авраа́ма всели́ мене́, я́ко Человеколю́бец.

Му́ченичен: Несы́тною любо́вию души́ Христа́ не отверго́стеся святи́и му́ченицы, и́же разли́чныя ра́ны страсте́й претерпе́вше, мучи́телей де́рзость низложи́сте: непрекло́нну и невреди́му ве́ру сохра́нше, на небеса́ преста́вистеся. Те́мже и дерзнове́ние получи́вше к Нему́, проси́те дарова́ти на́м ве́лию ми́лость.

И́ны стихи́ры господи́на Ио́сифа. Гла́с 5.

Подо́бен: Ра́дуйся по́стником:

Об ону́ страну́ Иорда́на пло́тию ходя́ Иису́се, с тобо́ю су́щым вопи́л еси́: дру́г Ла́зарь уже́ у́мре, и погребе́нию ны́не предаде́ся. Те́мже ра́дуюся дру́зи Мои́ ва́с ра́ди, да ве́сте, я́ко вся́ ве́м, Бо́г сы́й непрело́жный, а́ще и явля́юся ви́димый челове́к. и́дем у́бо оживи́ти его́, я́ко да сме́рть ощути́т сего́ побе́ду, и соверше́нное разруше́ние, я́ве е́ сотворю́, подая́ ми́рови ве́лию ми́лость.

Ма́рфу и Мари́ю ве́рнии подража́юще, ко Го́споду по́слем Боже́ственная дея́ния я́ко моли́твы, я́ко да прише́д на́ш у́м воскреси́т, ме́ртв лежа́щий лю́те во гро́бе ле́ности нечу́вственный, стра́ха Боже́ственнаго ника́коже ощуща́ющий, и де́йств живо́тных ны́не не иму́щий, зову́ще: ви́ждь Го́споди, и я́коже дру́га Твоего́ Ла́заря дре́вле, Ще́дре, предста́нием воздви́гл еси́ стра́шным, си́це все́х оживи́, подая́й ве́лию ми́лость.

И́на стихи́ра господи́на Фео́дора, гла́с 6.

Подо́бен: Го́споди на гро́б:

Двоеде́нствует Ла́зарь во гро́бе, су́щыя от ве́ка ви́дит уме́ршия, та́мо зри́т стра́хи стра́нныя, мно́жество неисче́тное а́довыми держи́мое у́зами: те́мже сро́дницы рыда́ют го́рько, предви́дяще гро́б его́. Христо́с же и́дет оживи́ти дру́га Своего́, еди́но от все́х соверши́ти согла́сие: благослове́н еси́ Спа́се, поми́луй на́с.

И в мине́и 4.

Проки́мен, псало́м 114. Гла́с 4: Благоугожду́ пред Го́сподем во стране́ живы́х.

Сти́х: Возлюби́х, я́ко услы́шит Госпо́дь гла́с моле́ния моего́.

Бытия́ чте́ние. [Быт.43:26–31, 45:1–16.]

Принесо́ша Ио́сифу бра́тия его́ да́ры, я́же имя́ху в рука́х свои́х, в до́м: и поклони́шася ему́ лице́м до земли́. И вопроси́ и́х: здра́ви ли есте́? и рече́ и́м: здра́в ли е́сть оте́ц ва́ш ста́рец, его́же реко́сте, еще́ ли жи́в е́сть? Они́ же реко́ша: здра́в е́сть ра́б тво́й оте́ц на́ш, еще́ жи́в е́сть. и рече́: благослове́н челове́к о́ный Бо́гу. и прини́кше поклони́шася ему́. Воззре́в же очи́ма свои́ма Ио́сиф, ви́де Вениами́на бра́та своего́ единома́терня, и рече́: се́й ли е́сть бра́т ва́ш юне́йший, его́же реко́сте ко мне́ привести́? и рече́: Бо́г да поми́лует тя́ ча́до. Возмути́ся же Ио́сиф, подви́жеся бо утро́ба его́ о бра́те свое́м, и иска́ше пла́кати: вше́д же в ло́жницу, пла́кася та́мо. И умы́в лице́, изше́д удержа́ся. И не можа́ше Ио́сиф удержа́тися все́м предстоя́щым ему́, но рече́: отосли́те все́х от мене́: и не предстоя́ше ни еди́н Ио́сифу, егда́ познава́шеся бра́тии свое́й. И испусти́ гла́с с пла́чем: слы́шаша же вси́ Еги́птяне, и слы́шано бы́сть в дому́ фарао́нове. Рече́ же Ио́сиф бра́тии свое́й: а́з е́смь Ио́сиф: еще́ ли оте́ц мо́й жи́в е́сть? и не мого́ша бра́тия отвеща́ти ему́: смути́шася бо. Рече́ же Ио́сиф бра́тии свое́й: прибли́житеся ко мне́, и прибли́жишася. и рече́: а́з е́смь Ио́сиф бра́т ва́ш, его́же прода́сте во Еги́пет. Ны́не у́бо не скорби́те, ниже́ же́стоко ва́м да яви́тся, я́ко прода́сте мя́ се́мо: на жи́знь бо посла́ мя Бо́г пред ва́ми. Сие́ бо второ́е ле́то гла́д на земли́, и еще́ пя́ть ле́т оста́, в ни́хже не бу́дет ора́ния, ни жа́твы. Посла́ бо мя́ Бо́г пред ва́ми оста́вити ва́м оста́нок на земли́, и препита́ти ва́ш оста́нок ве́лий. Ны́не у́бо не вы́ посла́сте мя́ се́мо, но Бо́г: и сотвори́ мя я́ко отца́ фарао́ну, и господи́на всему́ до́му его́, и кня́зя все́й земли́ Еги́петстей. Потща́вшеся у́бо, взы́дите ко отцу́ моему́, и рцы́те ему́: сия́ глаго́лет сы́н тво́й Ио́сиф: сотвори́ мя Бо́г господи́на все́й земли́ Еги́петстей: сни́ди у́бо ко мне́, и не уме́дли. И всели́шися в земли́ Гесе́мли Арави́йстей, и бу́деши близ мене́ ты́, и сы́нове твои́, и сы́нове сыно́в твои́х, о́вцы твоя́, и воло́ве твои́, и ели́ка су́ть твоя́: И препита́ю тя́ та́мо, еще́ бо пя́ть ле́т бу́дет гла́д на земли́, да не поги́бнеши ты́, и сы́нове твои́, и вся́ име́ния твоя́. Се́ о́чи ва́ши ви́дят, и о́чи Вениами́на бра́та моего́, я́ко уста́ моя́ глаго́лющая к ва́м. Возвести́те у́бо отцу́ моему́ всю́ сла́ву мою́ су́щую во Еги́пте, и ели́ка ви́дите: и ускори́вше, приведи́те отца́ моего́ се́мо. И напа́д на вы́ю Вениами́на бра́та своего́, пла́кася над ни́м: и Вениами́н пла́кася на вы́и его́. И облобыза́в всю́ бра́тию свою́, пла́кася над ни́ми: и по си́х глаго́лаша к нему́ бра́тия его́. И пронесе́ся гла́с в дому́ фарао́нове, глаго́люще: приидо́ша бра́тия Ио́сифова: возра́довася же фарао́н, и раби́ его́.

Проки́мен, псало́м 115 гла́с 4: Моли́твы моя́ Го́сподеви возда́м пред все́ми людьми́ Его́. Сти́х: Ве́ровах, те́мже возглаго́лах, а́з же смири́хся зело́.

При́тчей чте́ние. [Притч.21:23–31, 22:1–4.]

И́же храни́т своя́ уста́ и язы́к, соблюда́ет от печа́ли ду́шу свою́. Проде́рзый, и велича́вый, и гордели́вый, губи́тель нарица́ется: а и́же памятозло́бствует, беззако́нен. По́хоти лени́ваго убива́ют: не произволя́ют бо ру́це его́ твори́ти что́. Нечести́вый жела́ет ве́сь де́нь по́хоти злы́я, пра́ведный же ми́лует и ще́дрит неща́дно. Же́ртвы нечести́вых ме́рзость Го́сподеви: ибо беззако́нно прино́сят я́. Свиде́тель ло́жный поги́бнет, му́ж же послушли́в сохраня́емь возглаго́лет. Нечести́в му́ж безсту́дно стои́т лице́м: пра́вый же са́м разумева́ет пути́ своя́. Не́сть прему́дрости, не́сть му́жества, не́сть сове́та у нечести́ваго. Ко́нь уготовля́ется на де́нь бра́ни: от Го́спода же по́мощь. Лу́чше и́мя до́брое, не́же бога́тство мно́го, па́че же сребра́ и зла́та благода́ть блага́я. Бога́т и ни́щ срето́ста дру́г дру́га: обои́х же Госпо́дь сотвори́. Худо́г ви́дев лука́ваго му́чима кре́пко, са́м наказу́ется; безу́мнии же мимоше́дше отщети́шася. Ро́д прему́дрости стра́х Госпо́день, и бога́тство, и сла́ва, и живо́т.

И про́чее возсле́дование преждеосвяще́нных.

Тро́ичны гла́са. По 1-м стихосло́вии седа́льны апо́стольския осмогла́сника. По 2-м же стихосло́вии глаго́лем седа́лен, господи́на Ио́сифа. Гла́с 5.

Подо́бен: Собезнача́льное:

Виде́ние и дея́ние, я́ко сопря́гшеся, на Христо́ву мольбу́ посла́ти потщи́мся, уме́рший на́ш у́м я́коже ина́го Ла́заря, я́ко да оживи́т Свои́м предста́нием стра́шным, ве́тви пра́вды тому́ принести́, и зва́ти: благослове́н Гряды́й во и́мя Госпо́дне.

Сла́ва, то́йже.

И ны́не, Богоро́дичен: Души́ моея́ стра́сти многоболе́зненныя, и пло́ти моея́ неду́ги вско́ре исцели́: ума́ моего́ извраще́ния поста́ви Всенепоро́чная, и в тишине́ помышле́ния, моли́твы приноси́ти чи́стыя Царю́ Все́х сподо́би Богоро́дице, и испроси́ти грехо́в оставле́ние.

По 3-м стихосло́вии, седа́лен господи́на Фео́дора, гла́с 6.

Подо́бен: А́нгельския:

Двоеде́нствует дне́сь Ла́зарь уме́рый, и о се́м пролива́ют печа́ли сле́зы сро́дницы, Мари́а с Ма́рфою, ка́мень предви́дящи гро́бный. Предста́ Зижди́тель с Свои́ми ученики́, сме́рть плени́ти, да́руяй живо́т. Те́мже вопие́м ему́: Го́споди сла́ва Тебе́.

Сла́ва, то́йже.

И ны́не, Богоро́дичен: Свята́я Влады́чице чи́стая, Бо́га на́шего Ма́ти, Все́х Творца́ неизрече́нно ро́ждшая, моли́ со апо́столы свяще́нными всегда́ бла́гость Его́, страсте́й на́с изба́вити, и оставле́ние на́м да́ти грехо́в.

Кано́н в мине́и: и трипе́снец господи́на Ио́сифа. И стихосло́вится пе́снь. Гла́с 5.

Пе́снь 4.

Ирмо́с: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Заре́ю Ва́шего утеше́ния, затворе́нных в се́ни грехо́вней просвети́те, благоче́стно светоно́снии Ва́с восхваля́ющих апо́столи.

Любо́вь с милосе́рдием спря́гше, и на умоле́ние Христу́ вернии посла́ти потщи́мся, я́ко да и на́с воскреси́т от гро́ба та́йных страсте́й на́ших.

Любве́ плотски́я не пощади́м, умерщвле́ни душе́ю, и любо́вию прилепи́мся Изба́вителю, я́ко да от а́дова на́с изба́вит стра́шнаго осужде́ния.

Проре́кл еси́ Ла́зарево успе́ние, его́же по ма́ле воздви́г, от ссу́щих цветонося́щих прия́л еси́ хвалу́, стра́сти Твоея́ Спа́се мо́й о́бразы.

Богоро́дичен: Из тебе́ Боже́ственная Вода́ истече́ безсме́ртия и жи́зни, Богороди́тельнице Всенепоро́чная: ю́же вкуша́ющии, жа́жды, Чи́стая, смертоно́сныя избавля́ются.

И́ный господи́на Фео́дора, гла́с 6.

Ирмос: Услы́шах слу́х Тво́й, и убоя́хся, разуме́х дела́ Твоя́, и ужасо́хся: сла́ва си́ле Твое́й Го́споди.

Погреба́ется Ла́зарь, и на гро́бе я́же о Ма́рфе ны́не рыда́ют и пла́чут, предста́ти тебе́ Животода́вцу, жела́ющыя.

Сме́рть начина́ет трепета́ти, е́же к не́й сни́тия Твоего́ Христе́ ощуща́ющи: я́ко жи́знь бо, тще́тну сию́ показа́л еси́ конце́м.

Тро́ичен: Еди́нице Про́стая, Несозда́нная, Безнача́льное Естество́, в Тро́ице пева́емое ипоста́сьми, спаси́ ны ве́рою покланя́ющыяся держа́ве Твое́й.

Богоро́дичен: Из Отца́ безле́тна Сына, в ле́то Богороди́тельнице, неискусому́жно родила́ еси́, стра́нно чу́до, пребы́вши Де́ва доя́щи.

Сла́ва Тебе́ Бо́же на́ш, сла́ва Тебе́.

Сни́дитеся, прииди́те, и́же в пусты́нях и пеще́рах, сре́сти гряду́щаго на жребя́ти, Го́спода сла́вы в пе́снех.

Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся: сла́ва си́ле Твое́й Го́споди.

Пе́снь 8.

Ирмо́с: Тебе́ Вседе́телю в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Ка́мень тя́жкий от се́рдца моего́ отъя́ти, моли́те Всеще́драго, ка́мение яви́вшеся, краеуго́льнаго ка́мене, богоглаго́ливии апо́столи Госпо́дни.

И́дем, Твои́м провозглаша́л еси́ друго́м, дру́г Мо́й Ла́зарь уже́ у́спе: сего́ воздвиза́я, усплю́ сме́рти всепа́губную зло́бу во ве́ки.

Кро́тцы душе́ю, и смире́ни нра́вом бы́вше, благода́тию прии́мем кро́ткаго все́х гряду́щаго Влады́ку, горды́ню сокруши́ти лука́ваго.

Богоро́дичен: Две́рь Тя́ све́та просвеще́нную ви́дит проро́к, Всенепоро́чная, Светода́вца бо ражда́еши несказа́нно, на́м уподо́бившася: его́же превозно́сим во вся́ ве́ки.

И́ный.

Ирмо́с: Преподо́бнии Твои́ о́троцы в пещи́ херуви́мы подража́ху, трисвяту́ю пе́снь воспева́юще: благослови́те, по́йте, и превозноси́те во вся́ ве́ки.

Мари́а же и Ма́рфа ны́не рыда́ют, во гро́бе лежа́ща ви́дяще Ла́заря, и боле́зненно вопию́т: а́ще бы бы́л Христо́с зде́, сро́дник на́ш не бы́ у́мерл.

А́д да ча́ет погуби́тися, и́бо Жи́знь прихо́дит Ла́заря воздви́гнути вопию́ща: благослови́те, по́йте, и превозноси́те во вся́ ве́ки.

Благослови́м Отца́, и Сына, и Свята́го Ду́ха, Го́спода.

Тро́ичен: Безнача́льным и Рождество́м же и происхожде́нием, Отцу́ покланя́юся ро́ждшему, Сына прославля́ю ро́ждшася, воспева́ю совозсия́вша Отцу́ же и Сы́ну, Ду́ха Свята́го.

Богоро́дичен: Его́же родила́ еси́ Де́во несказа́нно, всегда́ я́ко Человеколю́бца не преста́й моля́щи, да от бе́д спасе́т к Тебе́ прибега́ющыя.

Сла́ва Тебе́ Бо́же на́ш, сла́ва Тебе́.

Доброде́тели я́ко ве́тви, и я́ко ва́иа, ко сре́тению угото́вим, и Царю́ Христу́ ве́рнии возопие́м: благослови́те, по́йте, и превозноси́те во вся́ ве́ки.

Хва́лим, благослови́м, покланя́емся Го́сподеви:

Ирмо́с: Преподо́бнии Твои́ о́троцы в пещи́ херуви́мы подража́ху, трисвяту́ю пе́снь воспева́юще: благослови́те, по́йте, и превозноси́те во вся́ ве́ки.

Пе́снь 9.

Ирмо́с: Иса́ие лику́й, Де́ва име́ во чре́ве, и роди́ Сына Емману́ила, Бо́га же и челове́ка, Восто́к и́мя ему́: Его́же велича́юще, Де́ву ублажа́ем.

Дру́жбы изба́ви мя́ льсти́ваго влады́ко Христе́, дру́ги Твоя́ му́дрыя ученики́ показа́вый, с ни́миже ше́д возста́вил еси́ дру́га Твоего́ ве́рнаго, Спа́се, Ла́заря, благода́рно воспева́юща Тя́.

Исполне́нием Го́споди поста́, испо́лни на́ша сердца́ же и у́м, Благоутро́бне, ра́дости, апо́стол Твои́х мольба́ми, чи́сте возлюби́вших Тя́, Спа́са ду́ш на́ших.

Смердя́ гнойми́ зло́бы, во гро́бе живу́ ле́ности Христе́. Те́мже вопию́ Ти: воздви́гни, спаси́ мя, я́ко да и а́з с ве́твьми доброде́телей усря́щу Тя́, взыва́я оса́нна Бо́гу.

Богоро́дичен: Во дву́ во́лю и существу́ родила́ еси́ на́м Сына Отрокови́це, единоро́дна Отцу́, бы́вша челове́ка, да на́с пока́жет о́бщники естества́, Пречи́стая, Боже́ственнейшаго, Пребоже́ственный.

И́ный.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.

В гро́бе Ла́зарь двоеде́нствует дне́сь, и над ни́м пролива́ете сле́зы Мари́а же и Ма́рфа, я́ко сестры́ родны́я: Христо́с же гряде́т к нему́ с боже́ственными апо́столы, показа́ти ве́лие чу́до.

Сме́рте всепа́губная, приими́ разруше́ние, вра́тницы же твои́ закле́пы да блюду́т: и́бо глаго́лом сокруши́т твоя́ врата́ Христо́с, Ла́заря возста́вив. Пи́й пе́рвое сие́ а́де проро́к тебе́ вопие́т с на́ми.

Тро́ичен: Еди́наго Единороди́телю, единоро́днаго Сына О́тче: и еди́не еди́наго Све́те, Све́та Сия́ние: и еди́ный Еди́не еди́наго Бо́га, Святы́й Ду́ше, Го́спода Госпо́дь, вои́стинну сы́й. о Тро́ице Еди́нице свята́я, спаси́ мя богосло́вяща Тя́.

Богоро́дичен: Чу́до Рождества́ Твоего́ удивля́ет мя́ Всенепоро́чная, ка́ко зачина́еши безсе́менно Необиме́ннаго? рцы́, ка́ко де́вствуеши, ро́ждши я́ко Ма́ти? е́же па́че естества́ ве́рою прие́м, Рожде́нному поклони́ся, ели́ка хо́щет бо и мо́жет.

Сла́ва Тебе́ Бо́же на́ш, сла́ва Тебе́.

Госпо́дь гряде́т все́сти, я́коже пи́сано, на жребя́: лю́дие гото́витеся со стра́хом прия́ти Царя́ Все́х с ва́ием, я́ко Победи́теля Сме́рти, из а́да воздви́гшаго Ла́заря.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен пло́д: Бо́жие бо рожде́ние обновля́ет естества́, те́мже Тя́ вси́ ро́ди, я́ко Богоневе́стную Ма́терь, правосла́вно велича́ем.

Свети́лен гла́са.

На стихо́вне самогла́сен дне́, два́жды. Гла́с 5:

Прииди́те пре́жде конца́ вси́ бра́тие чи́стым се́рдцем присту́пим ко благоутро́бному Бо́гу, жите́йская обстоя́ния отри́нувше, о душа́х попече́ние сотвори́м, бра́шен сласте́й воздержа́нием гнуша́ющеся, о ми́лостыни попеце́мся: то́ю бо, я́коже пи́сано е́сть, прия́ша не́цыи учреди́вше А́нгелы. Напита́им убо́гими, напита́вшаго на́с свое́ю пло́тию: облеце́м себе́ во оде́ющагося све́том я́ко ри́зою, да моли́твами Пречи́стыя Богоро́дицы, и Де́вы Ма́тере, оставле́ние получи́вше грехо́в, со умиле́нием к Нему́ возопии́м: Го́споди, изба́ви на́с от шу́яго отве́та, и сподо́би на́с десна́го Твоего́ предстоя́ния, я́ко Ми́лостив и Человеколю́бец.

Му́ченичен: В му́ках су́ще святи́и, веселя́щеся вопия́ху: измене́ния на́м сия́ су́ть ко Влады́це: вме́сто настоя́щих ра́н теле́сных све́тлое одея́ние в Воскресе́ние процвете́т на́м, вме́сто безче́стия венцы́, вме́сто у́з темни́чных ра́й, и вме́сто осужде́ния со злоде́и, со А́нгелы житие́. Те́мже моли́твами и́х Го́споди, спаси́ ду́шы на́шя.

Сла́ва, и ны́не, Богоро́дичен.

Подо́бен: Благода́тная:

Предизбра́нная от все́х родо́в услы́ши гла́с на́ш, и да́руй проше́ния ду́ш на́ших, избавле́ние страсте́й и боле́зней апо́стол ра́ди, вся́ могу́щая я́ко Ма́ти Бо́жия.

На 6-м часе́ тропа́рь проро́чества. Гла́с 1:

Гла́са ра́б твои́х Го́споди не забу́ди, помяни́, я́ко всегда́ упова́ние на Тя́ положи́хом вся́ могу́щаго, и помози́ на́м, мо́лимся.

Проки́мен, псало́м 117, гла́с 4: Сия́ врата́ Госпо́дня, пра́веднии вни́дут в ня́.

Сти́х: Испове́дайтеся Го́сподеви, я́ко бла́г.

Проро́чества Иса́иина чте́ние. [Ис. 65:8–16.]

Та́ко глаго́лет Госпо́дь: и́мже о́бразом обрета́ется я́года на гре́зне, и реку́т, не погуби́ его́, я́ко благослове́ние е́сть в не́м: та́ко сотворю́ служа́щаго Ми́ ра́ди, не и́мам все́х погуби́ти ра́ди его́. И изведу́ из Иа́кова се́мя, и из Иу́ды, и насле́дит го́ру святу́ю Мою́, и насле́дят избра́ннии Мои́, и раби́ Мои́, и вселя́тся та́мо. И бу́дут в дубра́ве огра́ды стадо́м, и юдо́ль Ахо́рская в поко́ище говя́дов лю́дем Мои́м, и́же взыска́ша Мене́. Вы́ же оста́вившии Мя́, и забыва́ющии го́ру святу́ю Мою́, и уготовля́ющии де́мону трапе́зу, и исполня́ющии ща́стию растворе́ние: А́з преда́м ва́с под ме́чь, вси́ закла́нием паде́те: я́ко зва́х ва́с, и не послу́шасте: глаго́лах, и преслу́шасте, и сотвори́сте лука́вое предо Мно́ю, и я́же не хоте́х, избра́сте. Сего́ ра́ди та́ко глаго́лет Госпо́дь: се́ рабо́тающии Ми́ я́сти бу́дут, вы́ же вза́лчете. се́ рабо́тающии Ми́ пи́ти бу́дут, вы́ же возжа́ждете: Се́ рабо́тающии Ми́ возра́дуются, вы́ же посрамите́ся: се́ рабо́тающии Ми́ возвеселя́тся в весе́лии се́рдца, вы́ же возопие́те в боле́зни се́рдца ва́шего, и от сокруше́ния ду́ха воспла́четеся. Оста́вите бо и́мя ва́ше в насыще́ние избра́нным Мои́м, ва́с же избие́т Госпо́дь. рабо́тающым же Мне́ нарече́тся и́мя но́вое, Е́же благослови́тся на земли́: благословя́т бо Бо́га и́стиннаго.

Проки́мен, псало́м 118, гла́с 4: Пу́ть за́поведей Твои́х теко́х, егда́ разшири́л еси́ се́рдце мое́.

Сти́х: Законоположи́ мне́ Го́споди пу́ть оправда́ний Твои́х.