22/4 Празднование Казанской иконе Божией Матери (в память избавления Москвы и России от поляков в 1612 году). Равноапостольного Аверкия, епископа Иерапольского, чудотворца (ок. 167). Семи отроков, иже во Ефесе (ок. 250; 408–450). Преподобных Феодора (1409) и Павла (XV) Ростовских, первостроителей Борисоглебского монастыря. Андрониковской иконы Божией Матери (1281–1332).

Тропарь Божией Матери ради иконы Ее Казанская, глас 4

Засту́пнице усе́рдная,/ Ма́ти Го́спода Вы́шняго,/ за всех мо́лиши Сы́на Твоего́ Христа́ Бо́га на́шего/ и все́м твори́ши спасти́ся,/ в держа́вный Твой покро́в прибега́ющим./ Всех нас заступи́, о Госпоже́ Цари́це и Влады́чице,/ и́же в напа́стех и в ско́рбех, и в боле́знех, обремене́нных грехи́ мно́гими,/ предстоя́щих и моля́щихся Тебе́/ умиле́нною душе́ю и сокруше́нным се́рдцем/ пред пречи́стым Твои́м о́бразом со слеза́ми,/ и невозвра́тно наде́жду иму́щих на Тя,/ избавле́ния всех зол,/ всем поле́зная да́руй/ и вся спаси́, Богоро́дице Де́во,/ Ты бо еси́ Боже́ственный Покро́в рабо́м Твои́м.

Кондак, глас 8

Притеце́м, лю́дие, к ти́хому сему́ и до́брому приста́нищу,/ ско́рой Помо́щнице, гото́вому и те́плому спасе́нию, покро́ву Де́вы,/ ускори́м на моли́тву и потщи́мся на покая́ние,/ источа́ет бо нам неоску́дныя ми́лости Пречи́стая Богоро́дица,/ предваря́ет на по́мощь, и избавля́ет от вели́ких бед и зол/ благонра́вныя и богобоя́щияся рабы́ Своя́.

Величание

Велича́ем Тя,/ Пресвята́я Де́во,/ и чтим о́браз Твой святы́й,/ о́т него́ же истека́ет благода́тная по́мощь/ всем, с ве́рою притека́ющим к нему́.

Тропарь равноапостольному Аверкию, епископу Иерапольскому, чудотворцу, глас 4

И́стины пропове́дник и чудотво́рец ди́вен показа́лся еси́,/ си́рот оте́ц и ни́щих засту́пник,/ бо́дрый па́стырь слове́снаго ста́да, бесо́м стра́шен,/ всех у́бо от тех нападе́ний заступа́й, вопию́щих ти:/ Аве́ркие о́тче наш,/ моли́ Христа́ Бо́га,/ да спасе́т ду́ши на́ша.

Кондак, глас 8

Я́ко свяще́нника превели́каго и апо́столов совсе́льника,/ Це́рковь почита́ет тя вся ве́рных, Аве́ркие,/ ю́же твои́ми моли́твами соблюда́й, блаже́нне,/ непобеди́му и необурева́ему от вся́кия е́реси, и нескве́рну,/ я́ко приснопа́мятный.

Величание

Велича́ем тя,/ святы́й равноапо́стольный Аве́ркие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь святым семи отрокам, иже во Ефесе, глас 4

Благоче́стия пропове́дники и воскресе́ния уме́рших изобрази́тели,/ Це́ркви столпы́ седмочи́сленныя,/ о́троки всеблаже́нныя пе́сньми восхвали́м,/ ти́и бо по мно́гих ле́тех нетле́ния, а́ки от сна воста́вше,/ всем возвести́ша Я́ве ме́ртвых воста́ние.

Ин тропарь, глас тойже

Ве́лия ве́ры чудесе́,/ в пеще́ре, я́ко в черто́зе ца́рском,/ святи́и се́дьм о́троцы пребы́ша и умро́ша без тли,/ и по мно́зех вре́менех возста́ша, я́ко от сна,/ во увере́ние Воскресе́ния всех челове́ков./ Тех моли́твами,/ Христе́ Бо́же, поми́луй нас.

Кондак, глас тойже

Просла́вивый на земли́ святы́я Твоя́,/ пре́жде втора́го и стра́шнаго прише́ствия Твоего́, Христе́,/ пресла́вным воста́нием отроко́в показа́л еси́ Воскресе́ние неве́дящим е́,/ нетле́нна одея́ния и телеса́ яви́в,/ и царя́ уве́рил еси́ вопи́ти:/ вои́стину есть ме́ртвых воста́ние.

Ин кондак, глас тойже

Ми́ра су́щая тле́нная презре́вше,/ и нетле́нныя да́ры прие́мше,/ уме́рше, кро́ме тле́ния пребы́ша;/ те́мже востаю́т по мно́гих ле́тех,/ все погре́бше лю́тых неве́рие;/ я́же во хвале́нии днесь,/ ве́рнии, восхваля́юще, Христа́ воспои́м.

Величание

Велича́ем вас,/ святи́и седьм о́троцы, и́же во Ефе́се,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Тропарь преподобным Феодору и Павлу Ростовским, первостроителям и основателям Борисоглебского монастыря, глас 8

Звезда́м заря́ послуша́ния жизнь лу́чших показа́,/ я́ко два свети́ла сия́юще нам,/ Фео́дор и Па́вел Богому́дрии, Росто́вская похвало́,/ житие́м чи́стым Богу присво́ишася.

Кондак, глас 2

Волне́ний мно́жество невла́жно проходя́ще... (общий преподобным).

Величание

Ублажа́ем вас,/ преподо́бнии отцы́ Фео́доре и Па́вле,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.