21/3 Преподобного Илариона Великого (371–372). Перенесение мощей святителя Илариона, епископа Меглинского (1206). Преподобного Илариона, схимника Печерского, в Дальних пещерах почивающего (XI). Преподобного Илариона Псковоезерского, Гдовского (1476).

Тропарь преподобному Илариону Великому, глас 8

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́, /и был еси свети́льник вселе́нней, сия́я чудесы́,/ Иларио́не о́тче наш,/ моли́ Христа́ Бо́га спасти́ся душа́м на́шим.

Ин тропарь, глас тойже

Я́ко и́ноков утвержде́ние, наста́вник же гра́ждан пусты́нных,/ и чудотво́рец, благода́тию Вели́кому Анто́нию подо́бяся,/ помо́щник в страсте́х бе́дствующим неотсту́пен, Иларио́не о́тче наш,/ моли́ за чту́щия святу́ю па́мять твою́.

Кондак, глас 3

Я́ко свети́льника незаходи́маго, у́мнаго тя со́лнца,/ соше́дшеся днесь восхваля́ем в пе́снех,/ возсия́л бо еси́ су́щим во тьме неве́дения,/ вся возводя́ к Боже́ственней высоте́, Иларио́не./ Те́мже вопие́м:/ ра́дуйся, о́тче, всех по́стников основа́ние.

Величание

Ублажа́ем тя,/ преподо́бне о́тче Иларио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь святителю Илариону, епископу Меглинскому, глас 3

Чу́до яви́вся извеще́ния,/ де́ды возсия́л еси́ доброде́телей Бо́жиих,/ мона́шествующих ли́ки упасл еси́,/ архиере́йская седа́лища исчи́стил еси́,/ ерети́ческаго же нападе́ния не усумне́вся,/ це́ркви Христо́вы воздви́гл еси́,/ преподо́бне Иларио́не,/ у́мер, я́ко спя,/ те́ло же твое́ це́ло и нетле́нно соблюдено́ бысть,/ и подае́т цельбы́ боля́щим от разли́чных неду́г,/ и де́моны прогоня́ет;/ сего́ ра́ди мо́лим тя: моли́ спасти́ся душа́м на́шим.

Кондак, глас тойже

Я́ко светоно́сна яви́ся, архиере́е, па́мять твоя́,/ тьму разруши́ уны́ния, и свет облиста́ даро́в Небе́сных,/ вся созыва́ющи на ра́дость./ От Бо́га бо, Иларио́не, благода́ть обре́л еси́/ и мона́хом был еси́ сте́пень*.

Величание

Велича́ем тя,/ святи́телю о́тче Иларио́не,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Тропарь преподобному Илариону, схимнику Печерскому, в Дальних пещерах почивающему, глас 1

Вои́стину досто́йно нарече́н был еси́ Иларио́н²²,/ ти́хостей бо и кро́ток нрав по и́мени твоему́ име́л еси́, блаже́нне,/ и́мже кро́ткому Го́споду Иису́су благоугоди́в,/ моли́ся Ему́ о нас, рабе́х твои́х.

Кондак, глас 2

Вели́кий а́нгельский о́браз и́ноческаго чи́на, святу́ю схи́му, я́ко прие́м,/ и второ́е отрица́ние су́етнаго ми́ра сего́ я́ко сотво́рь,/ тща́лся еси́ все́ми о́бразы, преподо́бне Иларио́не,/ обеща́ние де́лом испо́лнити/ и о́бразу свято́му прили́чне пожи́ти,/ тем тя чтим и ублажа́ем.

Величание

Ублажа́ем тя,/ преподо́бне о́тче Иларио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Тропарь преподобному Илариону Псковоезерскому, Гдовскому, глас 4

В моли́твах бо́дрствуя,/ пресве́тлый храм Ду́ха Свята́го был еси́,/ те́мже и чудотво́рец преди́вный яви́лся еси́,/ преподо́бне о́тче наш Иларио́не./ О нас моли́ Христа́ Бо́га/ све́том Боже́ственнаго позна́ния просвети́ти ны/ и спасти́ ду́ши на́ша.

Кондак, глас 2

Чистото́ю душе́вною боже́ственно вооружи́вся... (общий преподобному).

Величание

Ублажа́ем тя,/ преподо́бне о́тче Иларио́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.