Акафист Го́споду наше́му Иису́су Христу́ и Пресвяте́й Его́ Ма́тери в че́сть Сре́тения Госпо́дня

Кондак 1

Избра́ннаго Царя́ избра́нная Ма́ти зри́тся ны́не от Вифлее́ма в Иерусали́м гря­ду́щи, Богомладе́нец же Иису́с, я́ко на о́блаце ле́гце, во объя́тиих Тоя́ носи́м быва́ет. Мы́ же недосто́йнии, срета́юще Царя́ сла́вы и Пресвя­ту́ю Ма́терь Де́ву, с Симео́ном ста́рцем вопие́м Преблагослове́нней: Гряди́, Пречи́стая, Госпо́дь с Тобо́ю и Тобо́ю с на́ми.

Икос 1

А́нгел небе́сных небе́снии ли́цы прини́кше на зе́млю, зря́т Своего́ Творца́ и Вла­дыку, перворожде́нна всея́ тва́ри, во объятиях Деви́ческих от Ма́тере неискусому́жныя, я́ко младе́нца, носи́ма и ко хра́му во Иерусали́м гряду́ща, и ра́дующеся пою́т Тому́ и Цари́це Де́ве хвалу́ пра́здничную: «Гряди́, Царю не́ба и земли́, во гра́д Вели́каго Царя́, Сио́н святый; гряди́, превы́шний Бо́же, от го́рних высо́т в рукотворе́нный хра́м земны́й. Гряди́, едино­ро́дный Сы́не Бо́жий, всели́тися с челове́ки на земли́; гряди́, непоро́чный А́гнче Бо́жий, принести́ся ко Го́споду, живу́щему на небеси́. Гряди́, чи́стая голуби́це, Свята́го Ду́ха безму́ж­няя Неве́сто; гряди́, нескве́рная а́гнице, А́гнца Христа́ нетле́нная Ма́ти. Гряди́, Богоизбра́нная Отрокови́це, Бо́га Отца́ превожделе́нная Дще́ре; гряди́, Небесная Цари́це, всему миру блага́я Влады́чице. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 2

Ви́дящи Пресвята́я Де́ва Себе́ в чистоте́ по рождестве́ Христо́ве су́щую и не тре́бующую очище́ния, зане́ Христо́с про́йде от Нея́, я́коже луча́ со́лнечная криста́лл прохо́дит, не повреди́в де́вственныя чистоты́ Пречи́стыя Ма́тере Своей, оба́че, смире́нна су́щи, не гордя́шеся о нетле́нней чистоте́ Свое́й, и, егда́ испо́лнишася дни́е очище́ния Ея́ зако́нного, воста́вши со святы́м Ио́сифом Обру́чником от Вифлее́ма, вознесо́ста Боже́ственна Младе́нца, да поста́вят Его́ пред Го́сподем во Иерусали́ме, с ра́достию пою́ще Ему́: Аллилу́ия.

Икос 2

Разуме́в Ти́ издале́ча, Де́во, Бо́га нося́щую воплоще́нна на руку́ Твое́ю, Иса́ия предвозвести́: «Се́, Госпо́дь сиди́т на о́блаце ле́гце». Ты же, о Бо́гома́ти, в Иерусали́м иду́щи и Боже́ственнаго Младе́нца во объя́тиих нося́щи, помышля́ла еси́, ка́ко Ма́ти соде́ялася и Де́ва пребыла́ еси́. Оба́че ве́дущи, я́ко па́че естества́ рожде́ние сие́ бы́сть, со тре́петом глаго́лала еси́ в Себе́: «Ка́ко возымену́ю Тя́, Сы́не Мой? А́ще Челове́ка нареку́ Тя́, ве́м, я́ко превы́ше челове́ка еси́, де́вство Мое́ соблюды́й нетле́нно, я́ко боже́ственно е́сть зача́тие Твое́. Аще Бо́га нареку́ Тя́, ви́жду Тя́ во все́м подобна челове́ку, кроме́ греха́. Сего́ ра́ди пропове́дую Тя́ соверше́нна Бо́га и соверше́нна Человека су́ща». Мы́ же, срета́юще пришествие Тоя́, Чи́стую чи́сто почти́м, глаго́люще та́ко: Гряди́, чи́стая Де́во, чи́стаго Бо́га чи́сто родившая; гряди́, безму́жная Ма́ти Емману́илова, бра́ка не позна́вшая. Гряди́, честне́йшая херуви́м, Ея́же чистоте́ Гаврии́л удиви́ся; гряди́, сла́внейшая без сравне́ния серафи́м, Е́йже все естество́ а́н­гельское поклони́ся. Гряди́, земле ненасе́янная, я́же израсти́ на́м Кла́с живота́; гряди́, купино́ неопалимая, ю́же в рождестве́ не опали́ о́гнь божества́. Гряди́, вмести́лище невмести́мое, на Ню́же шестокрила́тии и многоочи́тии взира́ти не мо́гут; гряди́, престо́ле огнезра́чный, Ю́же земноро́днии по достоя́нию восхвали́ти недоуме́ют. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 3

Си́лою боже́ственною управля́ема, прии́де Пресвята́я Де́ва во святы́й гра́д Иерусали́м, я́ко светоно́сный де́нь, со́лнце пра́вды Христа́ всему́ миру возсиява́ющи. Сия́ бо я́ве яви́ся престо́л херуви́мский, зело́ высо́к, сла́­вою де́вственною превознесе́н. Та́ бо на руку́ Свое́ю но́сит Царя́ сла́вы, Ему́же незри́мо предстоя́т шестокрила́тии серафи́мы, со всеми небесными силами вопию́ще: Аллилу́ия.

Икос 3

Иму́щи Богоприя́тную Де́ва утро́бу, востече́ ко хра́му, держа́щи на руку́ Свое́ю Богомладе́нца Христа́, и, преклони́вши коле́на Своя́ пред Го́сподем, с весе́лием и благогове́нием глаго́ла: «О Преве́чный Отче, се́ Сы́н Тво́й, Его́же посла́л еси́ воплоти́тися от Мене́ спасе́­ния ра́ди челове́ческаго. Се́ пло́д утро́бы Мое́й, Ду́хом Твои́м Святы́м во Мне́ зача́тый и неизре­че́нно произше́дый, се́ пе́рвенец Мо́й. Приими́ воплоще́нное от Мене́ Твое́ Сло́во, приими́ Тво­его́ от Мене́ Сы́на, Его́же Тебе́ приношу́, да Того́ пло́тию и кро́вию, от Мене́ прия́тою, искупи́ши ро́д челове́ч». Мы́ же, сему́ тайному моле́нию Твоему́, Пречи́стая, вне́млюще, вопие́м Сы́ну Твоему́ и Бо́гу на́шему та́ко: Гряди́, пресла́дкий Иису́се, я́ко до́ждь с небесе́, на чи́стую зе́млю кро́тко и ти́хо снисше́дый; гряди́, сладча́йший Животе́, я́ко ка́пля, ка́плющая на зе́млю, в воплоще́нии незри́мо Себе́ яви́вый. Гряди́, все­милостивый Спа́се, взыска́ти и спасти́ поги́бшия прише́дый; гряди́, Па́стырю предо́брый, заблу́дшия о́вцы понести́ на Себе́ восхоте́вый. Гряди́, Врачу́ безнаде́жных, не́мощи и боле́зни на́ша на Себе́ носи́ти изво́ливый; гряди́, А́гнче Бо́жий, грехи́ всего́ ми́ра взя́ти на Себе́ возжела́вый. Гряди́, Го́споди сла́вы, на о́блаце ле́гце носи́мый, пре́лести тьму́ отгна́ти име́вый; гряди́, Царю ми́ра, на престо́л Дави́дов прише́дый, ца́рство не от ми́ра сего́ явля́яй. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 4

Бу́рю вну́трь име́яй помышле́ний сумни́тельных, вели́кий архиере́й Бо́жий Заха́рия смути́ся, зря Пресвяту́ю Де́ву со Отроча́тем на ме́сте нечи́стых же́н пре́д две́рьми хра́ма ста́вшую и зако́ннаго очище́ния проси́ти прише́дшую, ве́дый Ю́ во свята́я святы́х воспита́нную, и уразуме́ ду́хом, я́ко сия Ма́ти и по рождестве́ е́сть Де́ва чи́стая. Сего́ ра́ди поста́ви Ю́ на ме́сте девиц, иде́же жена́м, иму́­щим му́жа, стоя́ти не подоба́ше, и сре́тив Ю́, со стра́хом и с ра́достию воспе́ я́вльшемуся Бо́гу: Аллилу́ия.

Икос 4

Слы́ша Заха́рия ди́вныя пре́д Бо́гом глаго́лы Твоя́, Пречи́стая, и ви́дев, я́ко хо́щеши возложи́ти возлю́бленное Ча́до Свое́ на́ ру́це Его́, я́ко архиере́я Бо́жия, а́ки в ру́це Самому́ Бо́гу влага́ющи, и я́ко вку́пе принесла́ еси́ Бо́гу же́ртву ни́щих, по рече́нному в зако́не, два́ птенца́ голуби́на, умили́ся се́рдцем и с ве́рою и со стра́хом Бо́жиим прия́т Богомладе́нца, и я́ко зако́на творцу́ и Бо́гу изрече́ Ему́ та́ко: Гряди́, Ве́тхий де́ньми, дре́вле на Сина́е Моисе́ем зако́н дарова́вый; гряди́, Отроча́ мла́до, ны́не зако́н испо́лнити хотя́й, ко хра́му прише́дый. Гряди́, престо́л име́яй не́бо, земны́й хра́м небе́сною сла́вою испо́лнити восхоте́вый; гряди́, воплоти́выйся от Де́вы, челове́ческое естес­тво́ обо́жити возжела́вый. Гряди́, да́же до ра́бия о́браза низше́дый, да нас, рабо́в греха́, рабы́ пра́вды Бо́жия сотвори́ши; гряди́, сия́ние сы́й ипоста́си О́тчия, да на́с ча́да Отца́ Небе́снаго яви́ши. Гряди́, зако́на Исполни́телю, птенцы́ голуби́ны Бо́гу принесы́й, да мы́, я́ко голуби́цы чи́стыя, на небеса́ возлети́м; гряди́, Ми́лости Пода́телю, ми́лости, а не же́ртвы восхоте́вый, да и мы́ с еле́ем ми́лования Тебе́ усря́щем. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 5

Богосве́тлая звезда́ возсия́, егда́ прии́де Ду́хом в це́рковь святы́й ста́рец Симео́н. То́й, ю́ношествуя ду́хом, престаре́в же те́лом, пра́веден бе́ и благочести́в, ве́рою живя́, ча́я уте́хи Изра́илевы, обеща́но бо бе́ ему́ Ду́хом Святы́м не ви́дети сме́рти, до́ндеже не ви́дит Христа́ Госпо́дня, во плоти́ прише́дша. То́й воззре́в на Пречи́стую Де́ву и на держи́мое Е́ю Отроча́, ви́де благода́ть Бо́жию и, позна́в Ду́­хом, я́ко Се́й е́сть ожида́емый Месси́я, присту­пи́ к Нему́ со тща́нием и, возда́в Бо́гу благодаре́ние ве́лие, со стра́хом Бо́жиим и с ра́достию серде́чною воспе́ Ему́: Аллилу́ия.

Икос 5

Ви́дев ста́рец Симео́н на руку́ Деви́чу Созда́вшаго челове́ки и, Влады́ку разуме́в Его́, а́ще и я́ко Младе́нец ви́ден бы́сть, ве́сь испо́лнися ра́дости неизрече́нныя и себе́ забыв, глаго́лет ве́село: «Тебе́ жела́ю, Бо́же отце́в и Го́споди ми́лости, на Тя́ взира́ю, объе́млющаго вся́ сло́вом Свои́м, Тебе́ срета́ю, влады́чествующаго жи́знию и сме́ртию, Тебе́ ча́ю, соедини́вшаго не́бо и зе́млю, Тебе́ а́лчу, ме́ртвыя воскреша́ющаго, Тебе́ жа́жду, стра́ждущыя утеша́ющаго, и Тебе́ вопию си́це: Гряди́, все́ми проро́ки ча́емый, посети́ на́с Твои́м спасе́нием; гряди́, все́ми языки жела́емы́й, просвети́ти на́с Твои́м открове́нием. Гряди́, от ю́га прише́дый Искупи́телю наш, да изба́виши Ада́ма и Е́ву от греха́ и кля́твы дре́вния; гряди́, на земли́ яви́выйся Спа­сителю наш, да с челове́ки поживе́ши и изведе́ши я из тьмы́ и се́ни сме́ртныя. Гряди́, Про­светителю наш, благовести́ти ле́то Госпо́дне прия́тно; Гряди́, Свободи́телю наш, отпусти́ти сокруше́нныя се́рдцем во отраду, гряди́, Пас­тырю и Учи́телю, пропове́дати плене́нным отпуще́ние и слепы́м прозре́ние; Гряди́, Тво́рче и Влады́ко, возвести́ти ни́щим спасе́ние и все́м челове́ком проще́ние. Гряди́, Пречи́стая, Госпо́дь с Тобо́ю и Тобо́ю с нами».

Кондак 6

Пропове́дник ди́вный прише́ствия Христо́ва яви́ся Богоно́сец Симео́н, егда́, па́че исполня́лся Ду́ха, пе́рвый от челове́к позна́ Творца́ Своего́, во пло́ти прише́дша, и пе́рвый испове́да Того́ божество́, вопия́ Ему́, я́ко от лица́ все́х живу́щих на земли́: «Тебе́ поклоня́емся, я́ко Ты́ еси́ Бо́г на́ш; Тебе́ мо́лимся, я́ко Ты́ еси́ хра́м на́ш; Тебе́ слу́жим, я́ко Ты́ еси́ зако́на Творе́ц. Ты́ еси́ Бо́г пе́рвый и не́сть ина́го Бо́га па́че Тебе́, и ина́го Сы́на, единосу́щна Отцу́. Тобо́ю живе́м и дви́жемся и есмы́. Ты́ красе́н еси́ па́че все́х сынов челове́ческих, я́ко Бо́г и Челове́к. Сего́ ра́ди весели́ся ны́не, не́бо, я́ко поми́лова Бо́г лю́ди Своя́, и лику́йте, основа́ния земли́ и су́щии во а́де, я́ко яви́ся ны́не ме́ртвым воскресе́ние. Уви́дех бо ны́не Спаси́теля ми́ра и вопию Ему́: Аллилу́ия».

Икос 6

Возсия́ всему́ ми́ру просвеще́ние и́стины, егда́ Пресвята́я Де́ва подаде́ ста́рцу Симео́ну пречи́стыми рука́ма Свои́ма Боже́ственнаго Младе́нца, я́ко у́гль животворя́щ та́инственно от же́ртвенники Бо́жия, глаго́лющи: «Приими́, честны́й ста́рче, Го́спода Твоего́, приими́ Сокро́вище неисчерпа́емое и Си́лу непостижи́мую. Обыми́ Нетле́ние и обнови́ся и просвети́ся от Со́лнца пра́вды. Не опаля́ет бо о́гнь благода́ти Го́спода Моего́, но па́че просвеща́ет. То́й бо очи́стит грехи́ Твоя́ и вся́ безза́кония Твоя́ очи́стит, да бу́деши нача́ток очище́ния всего́ ми́ра, и та́ко совлече́ши вся́ ве́тхая и во вся́ но́вая да облече́шися». Сему́ милостивому веща́нию Пречи́стыя вне́млюще, возопие́м Ей такова́я: Гряди́, небе́сною чистото́ю сия́ющая Деви́це, Све́т невече́рний на́м просия́вшая; Гряди́, пречу́дная ми́ра го́рняго Цари́це, во го́рния оби́тели нас возводя́щая. Гряди́, купино та́инственная, Е́юже о́гнь божес­тва́ от го́рних высо́т всему́ ми́ру возжже́ся; Гряди́, светоно́сный о́блаче, Е́юже Богомладе́нец Христо́с во спасе́ние все́м принесе́ся. Гряди́, огненный престо́ле неви́димаго Царя́; Гряди́, небе́сный Киво́те, вмести́вшая Христа́. Гряди́, Пресвята́го Ду́ха святе́йшая пала́то; Гряди́, безсме́ртнаго Царя́ нескве́рная Неве́сто. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 7

Хотя́й святы́й ста́рец Симео́н но́вое очище́ние получи́ти, я́коже дре́вле Иса́ия, поклони́ся Пречи́стей Богома́тери, прИкосну́ся боже́ственным стопа́м Ея́, глаго́ля: «О́гнь но́сиши, Чи́стая, бою́ся объя́ти Младе́нца, ми́ром влады́чествующа. Ты́ бо, я́ко крило́ма а́нгельскима, рука́ма просвеща́еши мя́, пода́вши, Его́же херуви́ми кри́лы носи́ти трепе́щут». Сего́ Симео́н, простре́ ру́це, прия́т в честна́я объя́тия своя́, и с ра́достию возопи́: Аллилу́ия.

Икос 7

Но́вое и пресла́вное чу́до соверши́ся дне́сь: Симео́н ста́рец прие́млет тле́нныма рука́ма Творца́, созда́вшаго человека, да Бо́г с челове́ки поживе́т и челове́ки небесе́ сотвори́т Прие́м же жела́емаго и ви́дев обеща́ний сбы́тие, то́й, я́коже зре́лая пшени́ца, прося́ще о разреше́нии теле́сном и, я́коже ле́бедь бе́лый, седи́­нами украше́нный, на зака́те жития́ своего́ ве́село возопи́: «Ви́деста о́чи мои́ спасе́ние Твое́, е́же от ве́ка та́инство сокрове́нное. Те́мже ны́не отпусти́ мя, Владыко, раба́ Твоего́, по глаго́лу Твоему́, с ми́ром от соу́за сея́ пло́ти к чу́дному и нестаре́емому животу́, да отходя́ от зде́шних, ра́достную ве́сть принесу́ отце́м мои́м о Твое́м в ми́р прише́ствии». Сего́ ра́ди вопие́м Ти́: Гряди́, Иису́се, Жи́зни Пода́телю, жи́знь и воскресе́ние все́м ве́рным Твои́м дарова́ти; гряди́, Владыко, сме́рти низложи́телю, от ве́чныя сме́рти лю́ди Твоя́ свободи́ти. Гряди́, безсме́ртный Царю, от тьмы́ и се́ни сме́ртныя ве́чныя у́зники разреши́ти; гряди́, сладча́йший Животе́, врата́ ра́й­ская к чу́дному животу́ па́ки Ада́му отве́рсти. Гряди́, жела́емы́й Женише́, я́ко жела́ет и скончава́ется душа́ моя́ во дворы́ Госпо́дни; гряди́, превожделе́нный Све́те, я́ко обре́те се́рдце мое́ во юдо́ли пла́ча хра́мину о Бо́зе жи́ве. Гряди́, предве́чный Боже, я́ко бли́з боя́щихся Тебе́ спасе́ние Твое́; гряди́, всеще́дрый Спа́се, я́ко ми́р мно́г лю́бящим Тя́ принесе́ сло́во Твое́. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 8

Стра́шныя глаго́лы ди́внаго ста́рца о Отроча́ти слы́шавше, Ио́сиф и Пречи́стая Де́ва чудя́хуся о глаго́лемых о Не́м: ви́деста бо Симео́на к Младе́нцу веща́юща, но не я́ко ко младе́нцу, но я́ко к Ве́тхому де́ньми и к Бо́гу моля́щагося, живота́ и сме́рти вла́сть иму́щему и могу́щему а́бие к ино́й Жи́зни отпусти́ти того, и слага́юще вся́ глаго́лы сия в се́рдце свое́м, благода́рственно возопи́ша Бо́гу: Аллилу́ия.

Икос 8

Ве́сь быв в Бо́зе, святы́й ста́рец Симео́н испо́лнися ду́ха проро́ческаго и мно́­гая изрече́ о Боже́ственном Младе́нце, я́ко да́же до а́да прии́дет и плене́нным пода́ст все́м оставле́ние и слепы́м прозре́ние и я́ко и немы́м пода́ст глаго́лати. И обра́щься к Мари́и, Ма́тери Его́, провозгласи́ Е́й: «Се, лежи́т Се́й на паде́ние и на воста́ние ве́рным мно́гим во Изра́или, и в зна́мение пререка́емое. И Тебе́ самой, о безсме́ртная Ма́ти, ду́шу про́йдет ору́жие печа́ли, егда́ у́зриши Сы́на Твоего́ на кресте́ пригвожде́нна, да откры́ются помышле́ния многих серде́ц во спасе́ние от гре́х их». Сему́ предрече́нию вне́млюще, вопие́м Пречи́стей та́ко: гряди́, Ма́ти и Де́во, в де́вственнем рождестве́ Твое́м боле́зней ма́терних избе́гшая; гряди́, А́гнца и Па́стыря Ма́ти, у креста́ Сы́на Твоего́ боле́зни серде́чныя понести́ иму́щая, гряди́, ра́досте на́ша, приобщи́тися страсте́м Христо́вым, да в явле́нии сла́вы Его́ с Ни́м возра́дуешися; гряди́, в печа́лех утеше́ние, искуси́тися, я́ко зла́то в горни́ле, да и сама́ искуша́емы́м помощи́ возмо́жеши. Гряди́, Обра́дованная, печа́ль роди́вшую жена́м Е́ву возвесели́ти иму́щая; гряди́, Препросла́вленная, весь ми́р скорбями Свои́ми от скорбе́й свободи́ти хотя́щая. Гряди́, честне́йшая всея́ тва́ри Де́во, всю ви́димую тва́рь рождество́м Свои́м обнови́вшая; гряди́, святе́йшая святы́х, все́м Ма́ти, а́нгелы и челове́ки во сре́тении Твое́м соедини́вшая. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 9

Вся́кое естество́ а́нгельское удиви́ся вели́кому Бо́га на́шего к челове́ком низше́ствию, глаго́люще: «Чу́дная зри́м ны́не и пресла́вная, непостижи́мая и несказа́нная: Ада́ма бо Созда́вый во объя́тиих ста́рчих вмеща́ется. По́лны су́ть концы ми́ра бла́гости Его́, полна́ вся́ тва́рь хвале́ния Его́, по́лно е́сть все́ челове́чество снисхожде́ния Его́. Небе́сная, земна́я и преиспо́дняя по́лна су́ть благоутро́бия Его́, по́лна ми́лости Его́, по́лна щедро́т, по́лна даро́в, по́лна благодея́ния Его́. Испо́лнь не́бо и земля́ сла́вы Его́! Сего́ ра́ди, вси́ язы́цы, восплещите рука́ма, пою́ще Ему́: Аллилу́ия».

Икос 9

Вити́я боже́ственный богови́дец Симео́н, а́ще и мно́го изрече́, хваля́ и благодаря́ Пренепоро́чную Ма́терь Бо́жию, ро́ждшую ми́ру Бо́га и челове́ка, Спа́са ду́ш на́ших, оба́че не возмо́же благохвали́ти по достоя́нию, Ю́же и преми́рнии у́ми недоумева́ют воспева́ти, оба́че любо́вию побежда́емы́й, велича́ше Ю́, глаго́ля: «Святе́йшее и ди́вное Жили́ще Бо́жие, Ты́ еси́ нача́ло, среди́на и коне́ц на́шего пра́здника. Ты́ возсия́ла еси́ све́т Со́лнца, Ты́ отверзла еси́ исто́чник человеколю́бия Сы́на Твоего́, па́мять Твоя́ превы́шши вся́кого сло́ва и вели́чие Твое́ превосхо́дит не́мощь на́шу. Молю́ Тя́: непре­ста́нно па́мятуй на́с, хва́лящих Тя́ и в восто́рзе духо́вном вопию́щих Тебе́ си́це: Гряди́, ве́чно несконча́емая ра́досте на́ша, ра́дость, Хрис­та́, всему́ ми́ру яви́вшая; гряди́, при́сно убла­жа́емая сла́досте на́ша, о́гнь божества́ рука́ма неопа́льно держа́щая. Гряди́, заре присносия́тельная, от ве́тхаго ми́ра но́вою благода́тию хра́м просвети́вшая; гряди́, свеще́ неугаса́ю­щая, во Сре́тение Твое́ ду́ши ве́рных све́том Христо́вым осия́вша., Гряди́, О́гнь небе́сный рука́ма носи́вшая, да Тобо́ю святы́ня и красо­та́ во святи́лищи возгори́тся; гряди́, Све́т невече́рний нетле́нно, я́ко Присноде́ва, роди́вшая, да Тобо́ю спасе́ние все́м конце́м земли́ возвести́тся. Гряди́, одушевле́нный Киво́те Божий, я́ко Тобо́ю но́вая благода́ть спаси́тельная всему́ ми́ру яви́ся; гряди́, скиния Бо́жия с челове́ки, я́ко Тобо́ю Бо́г Бого́в в Сио́не над все́ми людьми́ воцари́ся. Гряди́, Пречи́стая, Госпо́дь с Тобо́ю и Тобо́ю с нами”.

Кондак 10

Спасе́ния пропове́дница яви́ся Богодухнове́нная А́нна, проро́чеством сия́ю­щая и в зако́не непоро́чная: не отхожда́ше бо от хра́ма Госпо́дня де́нь и но́щь, в моли́твах и посте́ служа́щи. Та, исше́дши с праведным Симео́ном во сре́тение Богомладе́нцу Хрис­ту, провеща́ше стра́шная, испове́дующи Его́ Творца́ не́бу и земли́. И объе́мши Того, приложи́ уста́ своя́ ко усто́м Его́, и всели́ся Дух во усте́х ея́, и возопи́: «Ты́ еси́ Бо́г и Сын челове́ч, Сы́н ца́рствия и уничиже́ния. Ты́ слы́шиши и безмо́лствуеши, ви́диши и неви́дим еси́, всеве́дущ и сокрове́н». И та мно́гая проро́чески изрече́ о принесе́нном Младе́нце все́м ча́ющим избавле́ния во Иерусали́ме, Богоро́дицу же пропове́дающи велича́ше. О Дщи́ Фану́илева, прииди́ и ста́ни с на́ми, вопию́щи Бо́гу: Аллилу́ия.

Икос 10

Царю́ Преве́чный и Сло́ве Бо́жий! Ты́ пло́тию ны́не всему́ ми́ру яви́лся еси́ во хра́ме, от Де́вы Ма́тере, я́ко Младе́нец руконоси́м, да с челове́ки поживе́ши и все́м су́щим от Ада́ма да возвести́ши спасе́ние. Дре́вняя ны́не вся́ мимоидо́ша и се́ бы́ша вся́ но́ва. Пра́вда Твоя́ с небесе́ прини́че, и ми́лость Твою́ посла́л еси́ на́м, и благода́ть Твоя́ воцари́ся на земли́, я́ко прише́л еси́ взыска́ти и спасти́ поги́бшыя. Сего́ ради никого́же отверга́еши, никого́же отвраща́ешися, я́коже дре́вле Зана, и́же прИкосну́ся к киво́ту заве́та Твоего́ и пораже́н бы́сть сме́ртию. Ны́не же блудни́ца припаде́ к Тебе́ и уцелому́дрися, кровоточи́вая прИкосну́ся к Тебе́ и очи́стися, мытари́ и гре́шницы возлежа́т с Тобо́ю и в дру́ги Твоя́ прие́млются, я́ко вся́ тружда́ющыяся и обремене́нныя призвал еси́ к Себе́. Сего́ ради с радостию срета́ем прише́ствие Твое́, вопию́ще та́ко: Гряди́, о Христе́, все́х Царю, и воста́ни на сре́тение на́ше; гряди́, Иисусе, ду́ш на́ших Врачу́, и изы́ди на по́мощь и спасе́ние на́ше. Гряди́, Па́стырю на́ш до́брый, на взыска́ние прише́дый заблу́дшаго овча́те, взыщи́ и на́с заблу́ждших; гряди́, Утеши́телю благи́й, поги́бшую дра́хму взыска́вый и обреты́й, обря́щи ду́ши люде́й поги́бших. Гряди́, Всеще́дре и Человеколю́бче, и приими́ на́с во Оте́ческая объя́тия Своя́; гряди́, Всеми́лостиве и Благоутро́бне, всели́ на́с в ра́йския оби́тели Твоя́. Гряди́, Утеши́телю скорбя́щих, защити́ и упра́ви на́с, в мо́ре жите́йския суеты́ плыву́­щих; гряди́, Спаси́телю заблу́ждших, спаси́ и воздви́гни на́с, в бе́здне греха́ утопа́ющих. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 11

Пе́ние всеумиле́нное приноша́ху о явле́нии Твое́м, Христе́, Богоно́сец Симео́н и пра́ведная А́нна, ду́хом пламене́юще, усты́ же ра́достно пропове́дающе Твое́ в ми́р прише́ствие все́м ча́ющим избавле́ния. Кни́жницы же и фарисе́и, слы́шаще такова́я о Отороча́ти свиде́тельства, негодова́ху, наипа́че же осужда́ху, а́ки я́внаго законопресту́пника, Заха́рию, я́ко Ма́терь на ме́сте деви́ческом поста́ви, и сего́ ра́ди вско́ре уби́ша Его́ между́ же́ртвенником и алтаре́м. Богомладе́нец же Христо́с отнесе́н бы́сть от зло́бы И́родовой во Еги́пет, да бу́дет та́мо в зна́мение ве́чное и да ве́дом бу́дет Госпо́дь еги́птяном и да сотворя́т та́мо же́ртву и да́р, пою́ще Ему́: Аллилу́ия.

Икос 11

Све́т во открове́ние язы́ков бы́л еси́, со́лнце пра́вды Христе́, на о́блаце ле́гце носи́м, я́коже Симео́н дне́сь проро́чески провозгласи́, да яви́ши нача́ло но́выя благода́ти, наче́н от Еги́пта и да́же до после́дних земли́, я́ко Ты́ еси́ исто́чник живота́ и све́т челове́ков, да Све́т во тьме све́тится, и тьма́ Его́ не объят. Се́ю заре́ю божества́ Твое́ю просвети́ и на́шу душе́вную тьму́, да вси́, возже́гше в се́рдце доброде́телей свещи́, с Симео́ном и с А́нною, я́ко свещено́сцы но́вии, с любо́вию усря́щем Тя́, вопию́ще Тебе́ и Пречи́стей Ма́тери Твое́й си́це: Гряди́, Иису́се, све́те ми́ра, да во све́тлости святы́х Твои́х на́с просвети́ши; гряди́, Христе́ Спа́се, во све́те живы́й непристу́пнем, да во све́те лица́ Твоего́ на́с обожи́ши. Гряди́, Со́лнце пра́вды, я́ко да возсия́ет во дне́х Твои́х пра́вда и ми́р на земли́; гряди́, Све́те святы́й, я́ко да прии́дет в сердца́ на́ша о́гнь любве́ и ве́ры с небесе́. Гряди́, Небе́сный Царю, я́ко да благослове́но и пресве́тло бу́дет прише́ствие Твое́; гряди́, Тво́рче и Влады́ко, я́ко да с горя́щими свети́льники чистоты́ изы́дем во сре́тение Твое́. Гряди́, тихий и невече́рний Све́те, да в ти́хости и безмо́лвии поживе́м вся́ дни́ живота́ Своего́; гряди́, Едино­ро́дный Сы́не Бо́жий и Сло́ве, да с тре́петом и в ра́дости соверши́м спасе́ние свое́. Гряди́, Пречи́стая, Госпо́дь с Тобо́ю и Тобо́ю с нами.

Кондак 12

Благода́ть но́вая испо́лни дне́сь ве́тхий хра́м зако́нный, егда прише́л еси́ в о́нь, Христе́, я́ко младе́нец, руконоси́м, да испо́л­нится Агге́я, проро́ка Твоего́, предрече́ние: «Прии́дет Желаемы́й все́ми языки, и испо́лню хра́м се́й сла́вою, зане́ ве́лия бу́дет сла́ва хра́ма сего́ после́дняго, па́че пе́рваго, и на ме́сте се́м да́м ми́р». Сего́ ради да украси́тся неизрече́н­ною божества Твоего́ заре́ю и на́ша Це́рковь но́вая, гото́вящаяся Тя́ све́тло, я́ко Жениха, прия́ти, и на́ша душе́вныя ру́ки просвети́, да я́коже Симео́н простре́м я́ в чистоте́ на сре́те­ние Твое́, с весе́лием вопию́ще Тебе́: Аллилу́ия.

Икос 12

Пою́ще, о Богома́ти, во хра́м Госпо́­день с Боже́ственным Младе́нцем на сре́тение всему́ ми́ру прише́ствие Твое́, восхваля́ем неиз­рече́нную па́че а́нгел де́вственную чистоту́ Твою, поклоня́емся возсия́вшему от Тебе́ со́л­нцу пра́вды Христу́, да с Симео́ном усря́щем Его́ и прии́мем во объя́тия своя́. С А́нною испове́дуем божество́ Его́, с Ио́сифом принесе́м Ему́ в да́р, я́ко два́ птенца́ голуби́на, на́шу ду́шу и те́ло, и с му́дрыми де́вами свети́льники ду́ш на́ших све́тло укра́сим, и горя́щия свещи́ и́с­тинному Све́ту, Христу́, я́вльшемуся во открове́ние ми́ра, принесе́м, и, испле́тше дне́сь песни, я́коже цветы́, принесе́м Тебе́, я́ко вене́ц благодаре́ния, сицевы́я похвалы: Гряди́, благо­да́тная Бо́городице Де́во, да под кровом де́вства Своего́ на́с в де́встве и чистоте́ сохрани́ши; гряди́, светоносная Влады́чня пала́то, да благода́тию Свое́ю на́с до́м Ду́ха Свята́го сотвори́ши. Гряди́, па́че у́тра светле́йшая Де́во, да и на́с сыны дне́ до конца́ жития́ соблюде́ши; гряди́, Со́лнце носящая, Ма́ти Све́та, да и на́с све́том благода́ти Твоея́ просвети́ши. Гряди́, вели́каго та́инства свята́я служи́тельнице, да и на́с Сы́ну Твоему́ и Бо́гу свя́то служи́ти научи́ши; гряди́, всему́ ми́ру блага́я помо́щнице, да и на́с от ми́ра, пло́ти и диа́вола невреди́мо защити́ши. Гряди́, о Деви́це Мари́е, да просвети́ши на́ша души́, помраче́нныя страстьми́; гряди́, о ди́вная Отрокови́це, да сохрани́ши лю́ди Твоя́, ослепле́нныя грехми́. Гряди́, Пречи́стая, Госпо́дь с Тобо́ю и Тобо́ю с на́ми.

Кондак 13

О всепе́тая Ма́ти и Де́во, прине́сшая во святи́лище все́х святы́х святе́йшее Сло1во во сре́тение на́ше и спасе́ние ми́ру! Пра́здничное прие́мши сие́ приноше́ние на́ше, покры́й и соблюди́ на́с от вся́кия ну́жды и печа́ли и изба́ви на́с от вся́кия грехо́вныя вра́жия се́ти. Ты́ же, я́ко дверь божества́ нетле́нно бы́вшая, отве́рзи все́м спасти́ся жела́ющим врата́ небесная, да изба́влыпеся Тобо́ю от ве́чныя му́ки, воспое́м во сре́тении Госпо́дни на возду́се: Аллилу́ия.

Сей Кондак читается трижды, затем 1-й Икос и 1-й Кондак

Молитва 1-я, ко Го́споду на́шему Иисусу Христу

Господи Иису́се Христе́, единоро́дный Сы́не и Сло́ве Бо́жий, дре́вле во проро́цех ви́денный, я́коже зерца́лом в гада́нии, в после́док же дни́й си́х пло́тию от Пресвяты́я Де́вы Мари́и нетле́нно рожде́нный и в четыредесяты́й де́нь се́й во святи́лище во сре́тение всему́ ми́ру от То́й, я́ко младе́нец руконоси́м, явле́нный и во объя́тиих пра́веднаго Симео́на во спасе́ние все́м су́щим от Ада́ма носи́мый! Ко́ль пресла́вно и пресве́тло Твое́ на руку́ Богома́тере во хра́м Госпо́день принесе́ние и от свята́го ста́рца боже́ственное сре́тение Твое́! Дне́сь небеса́ веселя́тся и ра́дуется земля́, я́ко ви́дена бы́ша ше́ствия Твоя́, Бо́же, ше́ствия Бо́га на́­шего Царя́, Иже во святе́м. Дре́вле Моисе́й восхоте́ ви́дети сла́ву Твою, но не возмо́же уви́дети лица́ Твоего́, зане́ яви́л еси́ ему́ то́чию за́дняя Своя́. В пресве́тлый же де́нь се́й сре́тения Тво­его́ Ты́ яви́л еси́ Себе́ челове́ком во святи́лищи, сия́я неизрече́нным све́том божества́, да вку́пе с Симео́ном ви́дят Тя́ лице́м к лицу́ и рука́ми да осяжут Тя́, и восприе́мше во объя́тия своя, да позна́ют Тя́ Бо́га, во пло́ти прише́дша. Сего́ ра́ди прославля́ем неизрече́нное снисхожде́ние и ве́лие человеколю́бие Твое́, я́ко прише́ствием Твои́м дарова́л еси́ ны́не небе́сную ра́дость па́д­шему дре́вле роду челове́чу. Ты́ бо пра́ведным судом Свои́м изгна́л еси́ прароди́тели на́ша из ра́я сла́дости в ми́р сей, ны́не же поми́ловал еси́ на́с и па́ки отве́рзл на́м ра́йския оби́тели и обрати́л еси́ пла́ч на́ш на ра́дость, да па́дший Ада́м ктому́ уже́ да не стыди́тся Тебе́ за пре­слуша́ние и да не бу́дет скрыва́тися лица́ Твоего́, Тобо́ю призыва́емый, я́ко прише́л еси́ ны́не, да во́зьмеши на Себе́ гре́х его́, да омы́еши его́ Свое́ю кровию и да облече́ши его́, на́га су́ща, в ри́зу спасе́ния и оде́жду весе́лия и украси́ши Его́, я́ко неве́сту, красото́ю. На́с же все́х, боже́ственное Твое́ сре́тение воспомина́ющих, сподо́би с му́дрыми де́вами изы́ти на сре́тение Тебе́, Небе́сному Жениху́ на́шему, с горя́щими свети́льники ве́ры, любве́ и чистоты́, да лицезри́м оча́ми ве́ры боже́ственное лице́ Твое́, да восприи́мем Тя́ в душе́вная объя́тия своя, и да понесе́м Тя́ в се́рдце свое́м во вся́ дни́ живота́ Своего́, да бу́деши на́м в Бо́га и мы́ в лю́ди Твоя́. В после́дний же и стра́шный де́нь прише́ствия Твоего́, егда́ вси́ святи́и изы́дут на после́днее и вели́кое сре́тение Твое́ на возду́се, сподо́би и на́с усре́сти Тя́, да та́ко всегда́ с Господом бу́дем. Сла́ва милосе́рдию Твоему́, сла́ва ца́рствию Твоему́, сла́ва смотре́нию Твоему́, еди́не Человеколю́бче, я́ко Твое́ е́сть ца́рство, и си́ла, и сла́ва, со Безначальным Твои́м Отце́м и Пресвяты́м и Благи́м и Животворя́щим Твои́м Ду́хом ны́не и при́сно и во ве́ки веко́в. Ами́нь.

Молитва 2-я, ко Пресвятей Влады́чице Бо́городице

О Пресвята́я, небесною чистото́ю сия́ющая Де́во, кро́ткая голуби́це, нескве́рная а́гнице, ми́ру блага́я помо́щнице, Ма́ти Христа Бо́га на́шего́! Ты́ еси́ начало, среди́на и коне́ц ны́нешния ра́дости на́шея, я́ко из Тебе́ возсия́ со́л­нце пра́вды Христо́с Бо́г наш и Того́ принесла́ еси́ на святы́х объя́тиих Свои́х в четыредеся́тый де́нь се́й во святи́лище на сре́тение на́ше и на ра́дость и спасе́ние всему́ ми́ру. Сего́ ра́ди и ублажа́ем и прославля́ем Тя́, я́ко Ты́ еси́ ски́ния Бо́га с челове́ки, Богосло́вом предзри́мая, е́юже Бо́г всели́ся с на́ми, да мы́ лю́дие Его́ будем. Ты́» еси́ две́рь небе́сная, Иезекии́лем предрече́н­ная, е́юже отверзо́шася па́ки нам вхо́ды в ра́йския оби́тели. Ты́ еси́ ле́ствица высо́кая, Иа́ко­вом предви́димая, е́юже сни́де Бо́г на зе́млю, и мо́ст, преводя́й су́щыя от земли́ на не́бо. Те́мже мо́лим Тя́, взира́юще, я́ко вошла́ еси́ во святи́лище, нося́щи О́гнь небе́сный рука́ма Свои́ма, Богоблагода́тная. Огне́м моли́твы Твоея́ попали́ о́гнь страсте́й на́ших, да изба́вимся ве́чнаго огня́ гее́нскаго. Во святи́лище пришла́ еси́ очище́ния ра́ди зако́ннаго, очище́ния не тре́бующая, я́ко Де́ва чи́стая, и си́м научи́ на́с, ка́ко подоба́ет на́м храни́ти себе́ в целому́дрии и чистоте́ и с каковым смире́нием подоба́ет на́м провожда́ти по́двиг де́вства, па́мятующим, ка́ко Ты́, превы́шши херуви́м су́щая, ста́ла еси́ на ме́сте нечи́стых же́н. Ты́, о Ма́ти Пресвята́я, сама́ су́щи Боговмести́мый хра́м Божий, при­несла́ еси́ в церковь зако́нную превожделе́ннаго Сы́на Твоего́, Христа́ Бо́га на́шего. Сподо́би и на́с па́че всего́ на земли́ люби́ти хра́мы́ Сы́на Твоего́, посеща́ти я во вся́ дни живота́ на́шего, зре́ти та́мо красоту́ Госпо́дню, я́ко лу́чше еди́н де́нь примета́тися во дво́рех Госпо́дних, па́че не́же жи́ти в селе́ниих гре́шничих. Наипа́че же да́руй на́м, Пречи́стая, я́коже Симео́ну, неосужде́нно носи́ти Сы́на Твоего́ и Бо́га на́шего в серде́чных объя́тиих свои́х, егда́ прича́стницы бу́дем пречи́стаго тела и кро́ве Его́, и помози́ на́м тогда́ сугу́бо храни́ти себе́ во святы́ни и стра́се Бо́жии, да не растли́м хра́м пло́ти на́шея. И та́ко вы́ну срета́юще, о Богома́ти, Сы́на Твоего́ в сердца́х и душа́х на́ших, да сподо́бимся моли́твами Твои́ми дости́гнути и блаже́ннаго о́наго сре́тения Госпо́дня на возду́се, егда́ со все́ми святы́ми вы́ну бу́дем сла́вити и воспева́ти пресвято́е и́мя Его́, со Отце́м и Святы́м Ду́хом, и Твое́ Ми́лостивое предста́тельство, ны́не и при́сно и во ве́ки веко́в. Ами́нь.

Тропарь, глас 1

Ра́дуйся, благода́тная Богоро́дице Де́во,/ из Тебе́ бо возсия́ Со́лнце пра́вды, Христо́с Бо́г на́ш,/ просвеща́яй су́щыя во тьме́./ Весели́ся и Ты́, ста́рче пра́ведный,/ прие́мый во объя́тия Свободи́теля ду́ш на́ших,/ да́рующаго на́м вос­кресение.

Кондак, глас1

Утро́бу Деви́чу освяти́вый рождество́м Твои́м,/ и ру́це Симео́не благослови́вый,/ я́коже подоба́ше, предвари́в,/ и ны́не спа́сл еси́ на́с, Христе Боже;/ но умири́ во бране́х жительс­тво,/ еди́не Человеколю́бче.

Величание

Велича́ем Тя́, Живода́вче Христе́, и чти́м Пречи́стую Ма́терь Твою́, Е́юже по зако́ну ны́не прине́слся еси́ в хра́м Госпо́день.

В праздник Сре́тения Господня Церковь воспоминает важное собы́тие в земной Жи́зни Господа на́шего Иисуса Христа (Лк.2:22–40). В 40-й де́нь по рождении Богомладе́нец бы́л принесен в Иерусали́мский хра́м. По зако́ну Моисееву (Лев.12) женщине, родившей младенца муж­ского пола, в продолжение 40 дней бы́ло запрещено входить в хра́м Божий. После этого срока мать приходила в хра́м с младенцем, что́бы принести Господу благодарс­твенную и очистительную жертву. Пресвята́я Де́ва, Ма́терь Бо́жия, не имела нужды в очищении, ибо неискусомужно родила Исто́чник чистоты́ и святости, но по глубо­кому смирению Она подчинилась предписанию зако́на. В то время жил в Иерусали́ме пра́ведный старец Симео́н. Ему бы́ло открове́ние, что́ он не умрет, пока не увидит Христа Спасителя. По внушению свы́ше, благочести́вый старец пришел в хра́м в то время, когда Пресвята́я Богородица и пра́ведный Иосиф принесли туда Младенца Иисуса, что́бы исполнить законный обряд. Богоприимец Симео́н взял Богомладенца на руки, и благословив Бо́га, изрек пророчество о Спасителе ми́ра: «Ны́не отпускаешь раба Твоего́, Владыка, по слову Твоему с миром, ибо виде­ли очи мои спасе́ние Твое, которое Ты́ уготовал пред лицем всех народов, свет к просвещению язычников и сла­ву народа Твоего́ Израиля» (Лк.2:29–32). Пресвято́й Деве пра́ведный Симео́н сказал: «Се лежит Сей на паде­ние и на восстание многих в Израиле и в предмет прере­каний, и Тебе́ Самой оружие про́йдет душу, да откроют­ся помышления многих сердец» (Лк.2:35). В хра́ме была́ также 84-летняя вдовица А́нна пророчица, дочь Фануилова, «которая не отходила от хра́ма, постом и молит­вой служа Бо́гу де́нь и ночь. И она в то время, подойдя, славила Господа и говорила о Нем (Богомладенце) всем, ожидавшим избавле́ния в Иерусали́ме» ( Лк.2:37–38). Праздник Сре́тения – двунадесятый. Празднуется 2 фев­раля /15 февраля.