Акафист Пресвятей Бо́городице в честь Благовещения Ея

Кондак 1

Избра́нней в предве́чнем сове́те Богоотрокови́це Мари́и послужи́ти ве́лию та́инству Боговоплоще́ния, сия́ющей де́вственною чистото́ю па́че вы́шшия небе́сныя чистоты́, благогове́йная пе́ния принесе́м Тебе́, Богоро́дице, о всера́достном от арха́нгела благове́щении Твое́м. Ты же, я́ко обра́дованная и ра́дость па́дшим лю́дем пода́ти могу́щая, изба́ви на́с от вся́ких бе́д и грехо́вныя печа́ли и возведи́ на́с к небе́сней ра́дости, да с Гаврии́лом вопие́м Тебе́: Ра́дуйся, Благода́тная, Гос­по́дь с Тобо́ю.

Икос 1

Арха́нгел Гаврии́л, предстоя́й пре­сто́лу Бо́жию, вы́ну зри́т непристу́пную боже́ственную сла́ву, егда́ же прии́де вре́мя избавле́ния челове́ков, прият повеле́ние Госпо́дне: «Бу́ди служи́тель стра́шному чудеси́ и та́инству сокрове́нному: милосе́рдием Мои́м подви́гся ко взыска́нию заблу́дшаго Ада́ма, сни́ти тщу́ся. Гряди́ у́бо во гра́д Назаре́т, в не́мже отрокови́ца Мари́я обита́ет, да прелюбе́зную красоту́ де́вства у́зриши. Гряди́ к сему́ одуше́вленному Бо́жию киво́ту, ко второ́му небеси́, на земли́ су́щему. Иди́ к се́й Оби́тели воплоще́ния Моего́ и возвести́ нетле́нное Мое́ от Нея́ пришествие. Блю́ди же, да не смути́ши и да не устраши́ши ду́шу Де́вы, да в ра́дости бу́дет, а не в печа́ли благове́стие твое́. Сего́ ради приступи́ к Не́й кро́тко, и пе́рвый глас тво́й ра́дость Е́й да при­несе́т, и да возопие́ши Е́й си́це: Ра́дуйся, Бла­года́тная, Е́юже ра́дость возсия́ет; ра́дуйся, Обра́дованная, Е́юже кля́тва исче́знет. Ра́дуйся, Благослове́нная, Е́юже тва́рь обновля́ется; ра́дуйся, Препросла́вленная, Е́юже ве́сь ми́р спаса́ется. Ра́дуйся, Богоизбра́нная Отрокови́це, па́дшаго Ада́ма воззва́ние; ра́дуйся, Пренепоро́чная Де́во, сле́з Е́виных избавле́ние. Ра́дуйся, Благода́тная, Госпо́дь с Тобо́ю».

Кондак 2

Ви́дев арха́нгел Гаврии́л, я́ко чело­веколюбец Госпо́дь умилосе́рдися, ги́блющий зря́ ро́д челове́ч, удиви́ся зело́, ка́ко Бо́г, Его́же небеса́ вмести́ти не мо́гут, в деви́честей хо́щет вмести́тися утро́бе, ка́ко не опали́т Ю о́гнь божества́, ка́ко Бо́г, на Него́же херуви́ми и серафи́ми воззре́ти не сме́ют, хо́щет во о́бразе раба́ яви́тися на земли́, да с челове́ки поживе́т. Сему́ неизрече́нному та́инству чудя́ся, со стра́хом возопи́ Бо́гу: Аллилу́ия.

Икос 2

Ра́зум неуразумева́емы́й стра́шнаго та́инства открыва́я, рече́ Владыка а́нгелов ко архистрати́гу: «Что смуща́ешися, Гаврии́ле, о но́вости ве́щи? А́ще не опали́ о́гнь купину́, в пусты́ни горе́вшую и не сгора́вшую, не опали́т вся́чески утробу Деви́чу о́гнь божества́ Моего́, но па́че ороси́т Ю и освяти́т благода́ть Моя́. Иде́же бо хо́щет Бо́г, побежда́ются естес­тва́ уста́вы». Гаврии́л же, сия́ слы́шав, ра́дости испо́лнися боже́ственныя, и оты́де в Назаре́т, исполня́я повеле́ние Госпо́дне, помы́шляя в себе́, ка́ко вни́дет к Отрокови́це и ка́ко возвести́т Е́й та́инство чуде́сное, во е́же не смути́ти Ея́ деви́ческий по́мысл, и рече́ к себе́: «Возве­щу́ у́бо Е́й пе́рвее ра́дость, и целу́я воспою́ гла́с таковы́й: Ра́дуйся, ра́досте всему́ ми́ру, Тебе́ бо еди́ней подоба́ет ра́доватися; ра́дуйся, сла́досте а́нгелов, от Тебе́ бо еди́ныя благоволи́ Госпо́дь воплоти́тися. Ра́дуйся, неувяда́емый цве́те чистоты́, Ты бо небе́сное благоуха́ние всему́ ми́ру яви́ла еси́; ра́дуйся, белосне́жный кри́не де́вства, Ты́ бо ра́йское де́вство на земли́ насади́ла еси́. Ра́дуйся, сокро́вище, па́че всего́ дража́й­шее, Твоея́ бо добро́ты возжела́ Ца́рь Небе́сный; ра́дуйся, у́тро всему́ ми́ру светле́йшее, Твои́м бо све́том разго́нится мра́к грехо́вный. Ра́дуйся, Благода́тная, Госпо́дь с Тобо́ю».

Кондак 3

Си́лою боже́ственною укрепля́емый, слете́ с небе́сных высо́т вели́кий арха́нгел и в Назаре́т гра́д прии́де, и обре́те Святу́ю Де́ву во вну́треннем черто́зе Свое́м не о жите́йских пеку́щуюся, но в моли́тве и чте́нии кни́жнем пребыва́ющую. Та́ бо, разгну́вши кни́гу Иса́ии проро́ка, чита́ше словеса́ его́: «Се, Де́ва во чре́ве прии́мет и роди́т Сы́на, и нареку́т и́мя Ему́ Емману́ил». И распаля́шеся Сия́ серафи́мскою любо́вию не то́чию к иму́щему ско́ро приити́ Христу́, но и к деви́це о́ной, я́же и́мать роди́ти Того́, и размышля́ше, ко́ль неизрече́нно е́сть та́инство сие́ и ко́ль вели́ко е́сть досто́инс­тво деви́цы тоя́, и моля́шеся о е́же уви́дети ю́, и а́ще возмо́жно, после́днейшею бы́ти рабы́нею тоя́, да с ра́достию воспое́т Бо́гу: Аллилу́ия.

Икос 3

Име́я страх ве́лий и благогове́ние к Богоотрокови́це, Ю́же Бо́г избра́ бы́ти Влады́чицу не́ба и земли́, вели́кий арха́нгел прибли́жися ко вну́тренним две́рем черто́га Тоя́, и се́ а́бие внеза́пу предста́ Преблагослове́нней с кро́тостию вели́кою, предста́ Пренепоро́чней небе́сный ве́стник, да ра́дость всему́ ми́ру благовести́т, предста́ безпло́тный чи́стой Де́ве, да безче́стие же́нское в че́сть преложи́т, и между́ Созда́телем и созда́нием уневе́щение да сотвори́т, и све́тлым гла́сом а́бие глаго́ла Неискусобра́чней: Ра́дуйся, Благода́тная, лику́й ны́не и весели́ся, я́ко Госпо́дь с Тобо́ю; ра́дуйся, Благослове́нная, слы́ши ны́не и приклони́ у́хо Твое́, я́ко возжела́ Ца́рь добро́ты Твоея́. Ра́дуйся, Обра́дованная, я́ко благослове́нна Ты́ в жена́х; ра́дуйся, Преблагослове́нная, я́ко ве́лия сла́ва Твоя́ на небесе́х. Ра́дуйся, Богоизбра́нная Отрокови́це, я́ко спасе́тся Тобо́ю от пре́лести ве́сь ро́д челове́ческий; ра́дуйся, преизя́щная Деви́це, я́ко возвесели́тся о Тебе́ ве́сь превысо­ча́йший собо́р а́нгельский. Ра́дуйся, Благода́т­ная, Госпо́дь с Тобо́ю.

Кондак 4

Бу́рю вну́трь иму́щи помышле́ний сумни́тельных, смяте́ся Пресвята́я Де́ва, таково́е небе́сное благове́стие услы́шавши, помы́с­ливши же в Себе́, каково́ бу́дет целова́ние сие́, рече́ ко арха́нгелу: «Е́ва, прама́терь Моя́, прие́мши ра́зум змии́н, лиши́ся пи́щи боже́ственныя и изгна́на бы́сть из ра́я, те́мже и А́з бою́ся целова́ния стра́ннаго твоего́, стыдя́щися поползнове́ния. Сего́ ра́ди отступи́ от две́рей Мои́х, и не веща́й глаго́лов, и́хже сбытия́ ника́коже мо́жеши показа́, да не обольще́на бу́ду. Что́ у́м Мо́й и ду́шу смуща́еши? А́з же в тишине́ ду́ха Моего́ воспева́ти бу́ду: Аллилу́ия».

Икос 4

Слы́ша арха́нгел смире́нных глаго́л Пресвяты́я Де́вы высоту́, рече́ к Не́й: «Что́ мене́ бои́шися, Всенепоро́чная, па́че Тебе́ боя́щегося? Что́ мене́ благогове́еши, Влады́чице, Тебе́ че́стно благогове́ющему? Не удивля́йся стра́н­ному моему́ зра́ку, не ужаса́йся, арха́нгел бо е́смь. Зми́й прельсти́ Е́ву иногда́, а́з же Бо́жий предста́тель по́слан бы́х Боже́ственный сове́т предве́чный пове́дати Тебе́. Не бо́йся, Мари­а́м, обрела́ бо еси́ благода́ть у Бо́га безме́рныя ра́ди де́вственныя чистоты́ Твоея́. Сего́ ра́ди зачне́ши во чре́ве и роди́ши Сы́на и нарече́ши и́мя Ему́ Иису́с. Се́й бу́дет ве́лий и Сы́н Вы́шняго нарече́тся. И да́ст Ему́ Госпо́дь Бо́г престо́л Дави́да отца́ Его́ и воцари́тся в дому́ Иа́ковли во ве́ки и ца́рствию Его́ не бу́дет конца́. Благовеству́я же сие́ ве́лие благоче́стия та́инство, со стра́хом вопию́ Тебе́ сицева́я: Ра́дуйся, звезда́ незаходи́мая, вводя́щая в ми́р вели́кое со́лнце, Христа́; ра́дуйся, заре́ присносия́ющая, явля́ющая челове́ком всего́ ми́ра Творца́. Ра́дуйся, па́че у́тра светле́йшая, все́м во тьме́ гре­ха́ седя́щим све́т благода́ти облиста́ющая; ра́дуйся, па́че зла́та дража́йшая, все́м неве́дущим Бо́га сокро́вище ве́ры показу́ющая. Ра́дуйся, ле́ствице небесная, е́юже Бо́г нисхо́дит с небес; ра́дуйся, мо́сте, к небеса́м приводя́й, и́мже ми́р исполня́ется чуде́с. Ра́дуйся, Благода́тная, Госпо́дь с Тобо́ю».

Кондак 5

Богодухнове́нныя глаго́лы арха́нгеловы слы́шавши, Пресвята́я Де́ва смути́ся па́че бы́вшаго, зане́ ти́и рождества́ Е́й возвеща́ху. Сего́ ра́ди рече́ ко архистрати́гу: «Глаго́ли Мне́ я́вственнейше, ка́ко зачну́, Де́ва су́щи Отрокови́ца, бра́ку неприча́стная? Ка́ко бу́дет сия́, иде́же му́жа не зна́ю? Ка́ко убо глаго́леши, я́ко рожду́, бою́ся, еда́ ле́сть глаго́леши?» Сия́ рече́ не неве́рия ра́ди, но я́ко не ве́де, ка́ко мо́жет роди́ти, естества́ зако́ны превосше́дши. Сего́ ра́ди рече́ ко а́нгелу: «Скажи́ Ми́ о́браз рожде́ния, во е́же не повреди́тися де́вству Моему́, и тогда́ обря́щеши се́рдце Мое́ к Бо́жию изволе́нию гото́вое, да с ра́достию воспою́ Бо́гу: Алли­луйя”.

Икос 5

Ви́дев арха́нгел вели́чие ве́ры Пречи́стыя, рече́ к Не́й: «Глаго́лы, я́же мне́ веща́еши, обычая е́сть рождества́ челове́ков сме́ртных, зако́ном же естества́ не рабо́тает Иису́с, Соде́тель естества́, Отрокови́це. И́щеши уве́дети от Мене́ о́браз зача́тия Твоего́, но то́й несказа́нен е́сть: Ду́х Святый на́йдет на Тя́ и Си́ла Вы́шняго осени́т Тя́, те́мже и рожда́емое Свя́то нарече́тся Сы́н Бо́жий. Того́ во чре́ве прии́меши и То́й соверши́т в Тебе́ неве́домое зача́тие, о Пресвя­та́я Де́во. Сего́ ра́ди прославля́ю Тя́ си́це: Ра́дуйся, Ду́ха Пресвята́го Неве́сто Богоизбра́н­ная и преднарече́нная; ра́дуйся, Бо́га Отца́ Дщи́ прелюби́мая и превожделе́нная. Ра́дуйся, сви́тче боже́ственный, в не́мже пе́рстом О́тчим напису́ется в Тебе́ Бо́жие Сло́во; ра́дуйся, златы́й свети́льниче, и́мже о́гнь божества́ возсия́ет всему́ ми́ру. Ра́дуйся, глубина́ неисчерпа́е­мая, неудобозри́мая и а́нгельскима очи́ма; ра́дуйся, высота́ неизглаго́ланная, неудобовосходи́мая челове́ческими по́мыслы. Ра́дуйся, Бла­года́тная, Госпо́дь с Тобо́ю».

Кондак 6

«Пропове́дника боже́ственнаго и ве́стника небе́снаго Тя́ ве́рую бы́ти, – рече́ Пре­свята́я Де́ва ко а́нгелу, – ви́жду бо Тя́ а́нгель­скою облиста́ема све́тлостию, оба́че стыжду́ся ско́ро ве́ровати словесе́м твои́м, не уве́девши пе́рвее со вся́кою изве́стностию. Слы́шах бо свяще́нную не́кую де́ву, Емману́ила ражда́ющую, проро́ком дре́вле предрече́нную. Сего́ ра́ди хошу́ разуме́ти, ка́ко естество́ челове́ческое претерпи́т божества́ срастворе́ние, да позна́ю та́инства си́лу и с ве́рою воспою́ Бо́гу: Аллилу́ия».

Икос 6

«Возсиява́ет ны́не, Пречи́стая, Тобо́ю всему́ миру ве́лие та́инство воплоще́ния Бо́­жия, – рече арха́нгел к Богоро́дице, – Ты́ бо еси́ о́ная свята́я де́ва, о не́йже предрече́ Иса́ия. Ты еси́ дверь божества́, чистото́ю запечат­ле́нная и де́вством храни́мая, юже Иезекии́ль предви́де. Госпо́дь про́йдет Тобо́ю, я́коже со́л­нечная луча́ сткло́ или́ криста́лл прохо́дит, просвеща́ющи и освяща́ющи Тя́ боже́ственною сла́вою, во еже бы́ти Тебе́ и́стинней Ма́­тери Бо́жией, ражда́ющей соверше́ннаго Бо́га и соверше́ннаго Челове́ка, и Де́ве нетле́нней, я́коже пре́жде рождества́, та́кожде в рождество́ и по рождестве́ Твое́м, роди́ши бо Сы́на, соблюда́юща Твое́ де́вство неврежде́нно. Сего́ ра́ди, прославля́я вели́чие та́йны Твое́й, вопию́ Тебе́ сицева́я: Ра́дуйся, купино́ неопали́мая, ю́же не опали́т о́гнь божества́, Моисе́ем предзри́мая; ра́дуйся, две́ре затворе́нная, Е́юже про́й­дет Бо́г, Иезекии́лем предрече́нная. Ра́дуйся, ски́ние преди́вная, я́же невмести́маго Бо́га не те́сно вмести́т, Авраа́мом прообразова́нная; ра́дуйся, руно́ ороше́нное, на него́же Влады́ка, я́ко ка́пля дожде́вная, ти́хо сни́дет, Гедео́ном предвеща́нное. Ра́дуйся, земле ненасе́янная, Сло́во небе́сное, я́ко пшени́цу плодоно́сную, чи́сто прозяба́ющая; ра́дуйся, ни́во неора́нная, Сы́на Бо́жия, я́ко кла́с божественный, яве произраща́ющая. Ра́дуйся, Благодатная, Госпо́дь с Тобо́ю».

Кондак 7

Хотя́щи ве́ровати стра́шней та́йне, арха́нгелом возвеще́нной, Пресвята́я Де́ва смути́ся, помы́шляющи высоты́ сия́ вели́чество, и стыдя́щися, глаго́лаше: «Рцы Ми́, Гаврии́ле, и́стиннейше, ка́ко нетле́нней бы́вши чистоте́ Мое́й, рожду́ с пло́тию Безпло́тнаго? Чудеса́ всегда́ бы́ша мно́жицею боже́ственною си́­лою чудоде́йствуема, де́ва же неискусому́жне никогда́же роди́. Сего́ ради ка́ко мо́жет все́ми Невмести́мый и все́ми Неви́димый во чре́во деви́че всели́тися, е́же Са́м созда́? Рцы Ми́ сия, да с ве́рою воспою́ Бо́гу: Аллилу́ия».

Икос 7

«Н́ова и стра́шна, и чу́дна Твоя́ та́инс­тва, – рече́ а́нгел Бо́городице, – и новую тва́рь показа́ Тобо́ю все́х Творе́ц Госпо́дь, Ты́ бо еди́на Царя́ воплоща́ема прии́меши во утро́бе, да еди́на Ма́ти Сы́на Бо́жия нарече́шися, Чи́стая. Сего́ ра́ди не диви́ся чудеси́ и да не сумни́шися: Бо́г иде́же хо́щет, побежда́ется естества́ чи́н, вся́ бо возмо́жна су́ть Всемогу́щему. И я́коже от ре́бр Ада́мовых создана́ бысть Е́ва без ма́тере дре́вним Богозда́нием, та́ко и ны́не от Твоего́ де́вства воплоща́ется без отца́ все́х Госпо́дь. И да уве́рит Тя́ же́зл Ааро́нов, невла́жно прозя́б­ший, и руно́ Гедео́ново, зане́, я́ко росу́, зача́­тие прии́меши, нетле́нная Де́ва су́щи. Та́кожде и купина́, во огни́ неопа́льна пребы́вшая, да возвести́т Ти́, я́ко прии́меши о́гнь божества́, Присноде́во, и по рожде́стве пребу́деши чи́с­тая. Сего́ ра́ди приими́ целова́ние мое́, да вси́ племена́ земна́я с ра́достию воспою́т Тебе́: Ра́дуйся, же́зле Ааро́нов, нетле́ние всему́ ми́ру прозябший; ра́дуйся, фи́никс Дави́дов, безсме́ртие па́дшим лю́дем процве́тший. Ра́дуйся, ски́ние небе́сная, от херуви́мов осеня́емая и ублажа́емая; ра́дуйся, свята́я святы́х бо́льшая, от серафи́мов почита́емая и присносла́вимая. Ра́дуйся, ча́ше безсме́ртнаго Царя́, в не́йже растворя́ется от Свята́го Ду́ха всеми́рная ра́­дость; ра́дуйся, ста́мно боже́ственныя ма́нны, от Нея́же ве́рным уготовля́ется неизрече́нная сла́ва. Ра́дуйся, Благода́тная, Госпо́дь с Тобо́ю».

Кондак 8

«Стра́ннаго рождества́ сего́ вели́чество смуща́ет Мя́, – рече́ Пресвята́я Де́ва ко а́н­гелу? – поне́же Всеблаги́й благоволи́ па́че ума́ всели́тися в Мя́, да хра́м чи́ст душе́ю и пло́тию соблюде́н бу́ду Ему́. Гла́с ра́дования глаго́л твои́х прие́мши, весе́лия боже́ственнаго исполня́юся, да упраздни́тся ны́не Мно́ю дре́внее Е́вино осужде́ние и да возда́стся Мно́ю дне́сь до́лг челове́ков, да вси́ све́тлому благове́щению сему́ ра́дующеся, благода́рственно воспою́т Бо́гу; Аллилу́ия».

Икос 8

«Вся́ тва́рь ны́не о Тебе́ ра́дуется, Бла­года́тная, а́нгельский собо́р и челове́ческий ро́д, – рече́ арха́нгел, – я́ко даде́ся Тебе́ ра́­дость боже́ственная и я́ко вся́кое обетова́­ние Бо́жие Тобо́ю ны́не прие́млет коне́ц: Тобо́ю дне́сь благослови́ся Авраа́м о се́мени свое́м. Тобо́ю ны́не свободи́ся Е́ва от дре́вния печа́ли. Тобо́ю лику́ет Ада́м, я́ко дне́сь исполня́ется пе́рвое благове́стие па́дшим лю́дем: се́мя Жены́ сотре́т главу́ зми́я. Тобо́ю вся́ тва́рь ны́не начина́ет свобожда́тися от ра́бства тле́нию в свобо́ду сла́вы ча́д Бо́жиих. Тобо́ю ны́не подаде́ся всему́ ро́ду челове́ческому вся́кая ра́дость и весе́лие ве́чное, да вси́ во ве́ки восхва́лят Тя́ си́це: Ра́дуйся, обра́дованная Де́во, от дре́вних патриа́рхов прообразова́нная; ра́дуйся, свята́я Богоневе́сто, все́ми проро́ки дре́вле предвоз­веще́нная. Ра́дуйся, вертогра́де заключе́нный, во́ньже Ца́рь Небе́сный возжела́ вни́ти; ра́дуйся, кла́дезю запечатле́нный, от него́же никто́же возмо́жет испи́ти. Ра́дуйся, са́де боже́ственный, в не́мже от все́х цвето́в Свято́го Ду́ха ра́йское благоуха́ние во ве́сь ми́р изнесе́ся; ра́дуйся, раю новонасажде́нный, в не́мже боже́ственное Дре́во Жи́зни посреде́ Тебе́ к прозябе́нию угото́вися. Ра́дуйся, Благода́тная, Госпо́дь с Тобо́ю».

Кондак 9

Вся́кое естество́ а́нгельское удиви́ся ны́не о Тебе́, Пречи́стая, слы́шаще ди́вное Твое́ со арха́нгелом Гаврии́лом собесе́дование и наипа́че моле́ние Твое́ сие́: «Ду́шу очи́сти, Те́ло освяти́, це́рковь сотвори́ Мя́ вмести́тельну Бо́­жию и скйнию благоукраше́нну, да наи́тием Пресвято́го Ду́ха сотворю́ся хра́м одушевле́н и Ма́терь чи́стая Жи́зни». Егда́ же по моли́тве се́й изрекла́ еси́ из глубины смире́ннаго се́рдца Твоего́: «Се, раба́ Госпо́дня, бу́ди Ми́ по глаго́лу твоему́, да всели́тся Бо́г в Мя́», вся́ небе́сныя си́лы просла́виша Бо́га, ви́дяще, я́ко гото́во се́рдце Твое́ к прия́тию Боже́ственному, и со стра́хом, и с ра́достию воспе́ша Ему́: Аллилу́ия.

Икос 9

Вити́я боже́ственный святы́й арха́нгел Гаврии́л бы́сть в стра́се и в молча́нии глубо́цем и прекрати́ глаго́лы своя, егда́, Пресвята́я Де́во, Ты́ изрекла́ еси́ смире́нное сло́во Свое́: «Се раба́ Госпо́дня, бу́ди Ми́ по глаго́лу твоему́». В нача́ле мирска́го бытия́ тво́рческим сло́вом си́м: «Да бу́дет», Творце́м изрече́нным, создана́ бы́ша вся́ческая, ви́димая и неви́димая. Ны́не же сло́во сие́, Де́вою изрече́нное, низведе́ Творца́ тва́ри в ми́р се́й и та́ко открыва́ется дне́сь е́же от ве́ка та́инство вели́кое: Сын Бо́жий Сын Де́вы быва́ет, да бо́га Ада́ма соде́лает. Соприсносу́щное Сло́во О́тчее, не разлучи́вся от го́р­них, сни́де на зе́млю и бы́сть пло́ть и всели́ся в ны́, неизрече́нно же истоща́ется и во утро́бу Деви́чу вселя́ется. Да ра́дуется у́бо не́бо и земля́ и со арха́нгелом да пое́т Пречи́стей Де́ве си́це: Ра́дуйся, не́бо земно́е, до го́рних высо́т смире́нным ду́хом возше́дшее; ра́дуйся, селе́ние небе́сное, Сло́во Бо́жие неизрече́нно вмести́вшее. Ра́дуйся, Благослове́нная, зача́тие преве́чнаго Бо́га нетле́нно прие́мшая; ра́дуйся, Благода́тная, черто́г де́вства Твоего́ в зача́­тии еди́на сохра́ньшая. Ра́дуйся, чи́стая Де́во, естества уста́вы в Боговоплоще́нии пресла́вно победи́вшая; ра́дуйся, Богоневе́сто, естество́ а́нгельское в благове́щении Твое́м преди́вно возвесели́вшая. Ра́дуйся, Благода́тная, Госпо́дь с Тобо́ю.

Кондак 10

Спасти́ хотя́й ми́р, человеколю́бец Госпо́дь сни́де, я́ко до́ждь на руно́, в пречи́стую утро́бу Твою́, о Богома́ти, и а́бие неизрече́н­ным наи́тием Свято́го Ду́ха соде́яся неве́домое зачатие, и преве́чное Сло́во Бо́жие пло́ть бы́сть и всели́ся в Тя́, восприя́в ю́ от Пречи́стых Кро­ве́й Твои́х без услажде́ния плотско́го, но не без услажде́ния духо́внаго; тогда́ бо деви́ческое се́рдце Твое́ боже́ственным испо́лнися жела́­нием и ду́х Тво́й горя́ше пла́менем серафи́мския любве́, у́м же весь, а́ки вне себе́ бы́в, в Бо́зе углубля́шеся. И тако услажда́ющися неизрече́ннаго Боголю́бия сего́ и у́мнаго Богови́дения, поклони́лася еси́ воплоща́емому от Тебе́ Го́споду Твоему́ и ра́достно воспе́ла еси́ Ему́: Аллилу́ия.

Икос 10

Стена еси́ де́вам, Богоро́дице Де́во, и́бо де́встенно от Ду́ха Свята зачала́ еси́ предве́чнаго Бо́га и Де́ва пребыла́ еси́ и тако Е́ву от дре́вния печа́ли свободи́ла еси́. Дне́сь ра́дость благове́щения, де́вственное торжество́ и та́инство вели́ко, нача́ло на́шего спасе́ния. Дне́сь весели́тся не́бо и ра́дуется земля́. Сего́ ра́ди вели́кий Гаврии́л пе́рвый от всея́ твари, разу­ме́в ду́хом вели́кое Боговоплоще́ния та́инство, поклони́ся со стра́хом ве́лиим вопло́щшемуся в Деви́чей утро́бе Спа́су ми́ра и вопло́щшую Пре­чи́стую Де́ву почти́ подоба́ющим поклоне́нием, я́ко Цари́цу не́ба и земли́, и с благогове́нием ве́лиим воспе́ Е́й такова́я: Ра́дуйся, высо́каго та́инства воплоще́ния Бо́жия пречу́дное совер­ше́ние; ра́дуйся, неизрече́ннаго составле́ния пло́ти Христо́вы пресла́вное явле́ние. Ра́дуйся, черто́же безсе́меннаго уневе́щения, в не́мже Творе́ц всего́ ми́ра дне́сь вмести́ся; ра́дуйся, ковче́же Боже́ственнаго воплоще́ния, и́мже ра́дость ве́лия всей вселе́нной ны́не дарова́ся. Ра́дуйся, Деви́це, Боготка́нную порфи́ру от пречи́стыя пло́ти Твоея́ Сло́ву Бо́жию истка́вшая; ра́дуйся, Отрокови́це, нетле́нную багряни́цу от де́вственных крове́й Твои́х Агнцу Бо́жию взаимода́вшая. Ра́дуйся, Благода́тная, Госпо́дь с Тобо́ю.

Кондак 11

Пе́ние всеумиле́нное принесла́ еси́, Пречи́стая, егда́ по отше́ствии арха́нгелове посети́ла еси́ пра́ведную Елисаве́ту, ю́жику Твою́, и возвести́ла е́й ра́дость Благове́щения, в весе́лии ду́ха глаго́лющи: «Вели́чит душа́ Моя́ Го́спода и возра́довася ду́х Мо́й о Бо́зе Спа́се Мое́м. Я́ко призре́ на смире́ние рабы́ Своей, се́ бо отны́не ублажа́т Мя́ вси́ ро́ди». Сие́ посеще́ние Твое́ возвесели́ пра́ведную Елисаве́ту и взыгра́ся от ра́дости младе́нец Иоа́нн во чре́ве ея́, и испо́лнися Ду́ха Свя́та Елисаве́т, и рече́: «Отку́ду мне́ сие́, да прии́де Ма́ти Го́спода моего́ ко мне́». Да взыгра́ется ны́не и на́ш ду́х, ощуща́я в де́нь Благове́щения Твоего́ ра́дость посе­ще́ния Твоего́. Сего́ ра́ди со Елисаве́тою возопие́м Тебе́: “Благослове́на Ты́ в жена́х и благослове́н Пло́д чре́ва Твоего́», Ему́же вы́ну да пое́м вси́: Аллилу́ия.

Икос 11

Све́т ве́лий и боже́ственный возсия́ в душе́ Твое́й, Пречи́стая, егда́ по гла́су арха́н­гела Ду́х Святы́й сни́де на Тя́ и си́ла Вы́шняго осени́ Тя́ и егда́ а́бие зачала́ еси́ в Богоблагода́тней де́вственней утро́бе Свое́й Творца́ све́тов, Его́же све́т во тьме́ све́тит и тьма́ Его́ не объя́т. То́й просвети́ Тя́, я́ко со́лнце, све́том божества́ Своего́, всю́ просла́ви и обожи́, сего́ ра́ди сияет добро́та Твоя́, блиста́ет чистоты́ Твоей све́тлость, я́коже предрече́ о Тебе́ в пе́снех Ду́х Свя­ты́й: «Вся́ добра́ еси́, бли́жняя Моя́, и поро́ка не́сть в Тебе́». Вся́ избра́нна, вся́ преукра́шена яви́лася еси́, Ю́же Бо́г возлюби́, вся́ чи́стая и боже́ственныя сла́вы испо́лнена. Си́м боже́ственным Твои́м све́том просвеща́емии, да вос­пое́м Тя́ и мы́ в пе́снех я́ко Ма́терь Све́та си́це: Ра́дуйся, свеще́ боже́ственнаго све́та, Све́т невече́рний в утро́бе Твое́й поне́сшая; ра́дуйся, луче́ у́мнаго Со́лнца, ве́сь ми́р све́том лица́ Бо́­жия просвети́вшая. Ра́дуйся, небе́сный свети́льниче, на све́щнице земно́м все́й вселе́нней возжже́нный; ра́дуйся, живоно́сный исто́чниче, благода́тию Ду́ха Свята́го преизоби́льно ороше́нный. Ра́дуйся, светоно́сная Де́во, Ея́же ра́ди све́т Бо́гове́дения дне́сь на́м все́м возсия́; ра́дуйся, избра́нная Богоневе́сто, Е́юже ны́не ра́дость неизрече́нная ве́сь мир облиста́. Ра́дуйся, Благода́тная, Госпо́дь с Тобо́ю.

Кондак 12

Благода́ть боже́ственная и ра́дость ве́лия процвете́ дне́сь всему́ миру, Пречи́стая, в светоносный де́нь Благове́щения Твоего́, я́ко Тебе́ ра́ди в де́нь он дре́вняя печа́ль преста́ и нача́ло спасе́ния челове́ков положи́ся: Сын Божий Сын Де́вы яви́ся и земля́, Евы ра́ди про­клята́ бы́вши, Тобо́ю, Де́во, дне́сь па́ки благослови́ся. Херуви́м от дре́ва Жи́зни отступа́ет, и врата́ ра́йская ве́рным дне́сь па́ки отверза́ются, ми́р же ве́сь испо́лнися ра́дости, отне́леже вели́кий Гаврии́л «Ра́дуйся!» Тебе́, Де́во, свы́ше возгласи́. Сего́ ра́ди небеса́ у́бо досто́йно дне́сь да веселя́тся, земля́ же да ра́дуется, вся́кое же дыха́ние и тва́рь да пою́т о Тебе́ Бо́гу: Аллилу́ия.

Икос 12

Пою́ще всера́достное от арха́нгела благове́щение Твое́, Бо́городице, восхваля́ем вси́ стра́шное, пресла́вное и ве́лие та́инство чи́стаго и де́вственнаго от Ду́ха Свята́го зача́­тия Твоего́, поклоня́емся нетле́нно зача́тому от Тебе́ Сы́ну Твоему́ Христу́ Бо́гу на́шему и от всего́ се́рдца ве́руем и испове́дуем, я́ко и в боже́ственном зача́тии, и по рождестве́ Твое́м пребыла́ еси́ Присноде́ва. Сего́ ра́ди с Гаврии́лом принесе́м Тебе́ сицевы́й арха́нгельский гла́с: Ра́дуйся, Благода́тная, облече́нная в Со́лнце, сия́ющая благода́тию и сла́вою все́й вселе́нней; ра́дуйся, Благослове́нная, от восто́к со́лнца до за́пад препе́тая и превозноси́мая по все́й поднебе́сней. Ра́дуйся, а́нгельское вели́кое удивле́ние, Гаврии́ла красотою де́вства Своего́ удивившая; ра́дуйся, всему́ миру благо́е весе́лие, па́дшия лю́ди ра́достию благове́щения Твоего́ возвеселившая. Ра́дуйся, смире́нная рабо́ Госпо́дня, высото́ю смире́ния Своего́ Бо́га на зе́млю низве́дшая; ра́дуйся, милосе́рдная Ма́ти Бо́га Вы́шняго, Ма́терним заступле́нием Свои́м мно́гия гре́шники ко Христу́ приве́дшая. Ра́дуйся, Благода́тная, Госпо́дь с Тобо́ю.

Кондак 13

О всепе́тая Параклита¹ Неве́сто чи́стая, бра́ка не позна́вшая Де́во, арха́нгела красото́ю де́вства удиви́вшая и Бо́гу Сло́ву пло́ть нетле́нно дне́сь заимода́вшая, ны́нешняя на́ша прие́мши приноше́ния о всера́достном от Гаврии́ла благове́щении Твое́м, Христу́ Бо́гу обруче́нныя в де́встве сохрани́, все́х же в чистоте́ укрепи́ и от бе́д изба́ви, да, свобо́ждшеся Тобо́ю от ве́чных му́к, Тобо́ю ра́й да обря́щем, иде́же вси́ да воспое́м о Тебе́ Бо́гу: Аллилу́ия.

Сей Кондак читается трижды, затем 1-й Икос и 1-й Кондак

Молитва

О пресвята́я Богоизбра́нная Де́во, Свята́го Уте́шителя Ду́ха всенепоро́чная Неве́сто, Пребоже́ственнаго же Отца́ Небе́снаго Дщи́ превожделе́нная, посреде́ те́рния ми́ра сего́ Те́м обрете́нная, я́ко крин пресве́тлый, добро́тою девства блиста́ющийся, да Сы́ну Бо́жию чи́стая Ма́ти неискусобра́чная бу́деши! Что́ у́бо воздадим Тебе́ в пресве́тлый день се́й Благове́щения, во́ньже арха́нгела Гаврии́ла красо­тою безме́рнаго де́вства Своего́ удиви́ла еси́ и от то́го неизрече́нное обра́дование восприя́ла еси́? Что́ принесе́м Тебе́ за вся́ утеше́ния Твоя́, и́миже возвесели́ла еси́ в де́нь се́й ве́сь ми́р ви́димый и неви́димый, наипа́че же па́дший дре́вле ро́д челове́ч?

Дне́сь спасе́ния на́шего нача́ло и е́же от ве́ка та́инства явле́ние: ны́не у́бо Слово Бо́жие ти́хо сни́де с небе́с, я́ко ка́пля, ка́плющая на зе́млю, и всели́ся в Твою Богоблагода́тную де́вственную утро́бу, и бы́сть пло́ть спасе́ния на́шего ра́ди. Сего́ ра́ди дне́сь а́нгели лику́ют на небесе́х и вся́ тва́рь весели́тся и ра́дуется, пра́зднующе нача́ло свобожде́ния Своего́ от рабо́ты истле́ния в свобо́ду сла́вы ча́д Божиих. Ны́не ра́дуется же́нское естество, Евы ра́ди па́дшее. Та́ бо, повину́вшися зми́ю, печа́ль роди́ жена́м и неудержа́нно введе́ сме́рть. Ты же, Де́во, разреши́ла еси́ от го́рькия рабо́ты ве́сь род чело­ве́ч и свобо́дою Христо́вою естество́ же́нское почти́ла еси́, зане́ де́вством чи́стым па́ки и́с­тинную жи́знь ввела́ еси́ и сего́ ра́ди жены́, де́вство держа́ще, врага́ яве побежда́ти начи­на́ют. Ны́не Ада́м лику́ет, ви́дев, я́ко в пресве́т­лый де́нь се́й испо́лнися на Тебе́ пе́рвое ра́йское благове́стие, я́ко Се́мя Жены́ сотре́т главу́ зми́я. С ним же ликовству́ет ны́не ве́сь ро́д челове́ч, поне́же Тобо́ю, Пречи́стая, упраздни́ся дне́сь дре́внее отвраще́ние Бо́жие к челове́ком, Бо́га бо па́ки привела́ еси́ к на́м. Сего́ ра́ди зри́м Тя́ ны́не, я́коже дре́вле Иа́ков, я́ко ле́ствипу высо́­кую, е́юже сни́де Бо́г на зе́млю, и я́ко мо́ст пречу́ден, и́мже су́щих от земли́ па́ки возво́диши на не́бо. Что́ воздади́м Тебе́, Цари́це не́ба и земли́, за вся́ сия, и́миже ра́дость несказа́нную подала́ еси́ па́дшим и заблу́дшим лю́дем Твои́м? Вся́ на́ша же́ртвы и приноше́ния ничто́же су́ть пре́д вели́чеством благодея́ний Твои́х. Еди́ное то́чию уго́дно Тебе́: се́рдце сокруше́нно и смире́нно, его́же и Сын Тво́й и Госпо́дь наш не уничижи́т Сего́ ра́ди мо́лим Тя́: испо́лни на́с от превосходя́щия высоты́ смире́ния Своего́, ели́ка вмести́ти возмо́жем, да принесе́м Ти́ во всесвяты́й де́нь Благове́щения Твоего́ Твоя́ от Твои́х, во е́же во вся́цем де́ле бла́зе не мы́слити высо́кая, но вы́ну в смире́нии ду́ха пребыва́ти. Сею перве́йшею доброде́телию укра́шени, в пресве́тлый де́нь сего́ пра́здника Твоего́ в кро́­тости и чистоте́ се́рдца со арха́нгелом Гаврии́лом возопии́м Тебе́: Ра́дуйся, Благода́тная, ра́дуйся, Обра́дованная, ра́дуйся, Преблагослове́нная, Госпо́дь с Тобо́ю и Тобо́ю с на́ми во ве́ки веко́в. Ами́нь.

Тропарь, глас 4

Дне́сь спасения на́шего глави́зна/ и еже от века та́инства явление: / Сын Бо́жий Сын Девы быва́ет,/ и Гаврии́л благода́ть благовеству́ет./ Те́мже и мы́ с ним Бо́городице возопии́м:/ ра́дуйся, Благода́тная, / Госпо́дь с Тобо́ю.

Кондак, глас 8

Взбра́нной Воево́де победи́тельная,/ я́ко изба́влыпеся от злы́х,/ благода́рственная воспису́ем Ти́ раби́ Твои́, Бо́городице;/ но, я́ко иму́щая держа́ву непобеди́мую,/ от вся́ких на́с бед свободи́, да зове́м Ти́:/ Ра́дуйся, Неве́сто неневе́стная.

Величание

Арха́нгельский гла́с вопие́м Ти́, Чи́стая; ра́дуйся, Благода́тная, Госпо́дь с Тобо́ю.

Хотя́ торжественное празднование дня Благовеще­ния началось в 4-м веке, иконы, изображающие это со­бы́тие, появились несравненно раньше. Уже в римских катакомбах находили изображения Благовещения, от­носящиеся к началу 2-го века. Из икон Благовещения, прославившихся своей чудотворной силой, известны две находящиеся в Москве: в Успенском собо́ре Устюжская и в церкви Благовещения, что́ на Житном царском дворе. Житницы эти примыкали к башне, служившей местом заключения преступников. Предание гласит, что́ сюда был заключен при Иоанне Грозном один оклеветанный воевода. Он молился Богоматери, и однажды Она яви­лась ему и обещала Свою помощь. Пришедшие за узни­ком посланные от Царя́ были поражены́, увидев на стене башни самописаную икону Благовещения. Царь, узнав об этом чуде, освободил воеводу, а при о́бразе приказал воздвигнуть часовню. Празднование иконе совершается 25 марта / 7 апреля.