Месяца августа в 6-й день

На Го́споди, воззва́х: стихиры на 4, глас 1.

Подобен: Небе́сных чино́в:

И́же с Моисе́ом глаго́лавый дре́вле / на горе́ Сина́йстей о́бразы, глаго́ля: / Аз есмь Бог Сый; / днесь же на горе́ Фаво́рстей преобрази́ся, / началообра́зное показу́я, луча́ми облиста́яся. / Те́мже, Христе́, велича́ю Твою́ си́лу. (2)

Пое́мь осо́бь Твоя́, Христе́, ученики́, / Петра́, Иа́кова и Иоа́нна, / во́лею на го́ру сих возве́л еси́, / чу́до стра́шное показа́в / и нестерпи́мое Боже́ственнаго прише́ствия Твоего́ издале́ча / присносу́щное благоле́пие.

Твоего́, Христе́, прише́ствия непостижи́маго / тре́петни бы́вше апо́столи дре́вле, / ниц на зе́млю па́дше, / Боже́ственней Твое́й дивля́хуся си́ле: / со́лнца просия́в светле́е, Бла́же, / неизрече́нною си́лою Твое́ю.

Сла́ва, и ны́не, глас 8: Мрак зако́нный / све́тлый преображе́ния прия́т о́блак, / в не́мже Моисе́й и Илия́ бы́вше / и пресве́тлыя сла́вы сподо́бльшеся, Бо́гу глаго́лаху: / Ты еси́ Бог наш, Царь веко́в.

На стиховне стихиры, глас 2.

Подобен: До́ме Евфра́фов:

Днесь Христо́с / на горе́ Фаво́рстей, / Ада́мово премени́в / очерне́вшее естество́, / просвети́в, богосоде́ла.

Стих: Твоя́ суть небеса́, / и Твоя́ есть земля́.

Сия́нием доброде́телей / просве́щшеся, вопие́м, / на горе́ святе́й зря́ще Боже́ственное / Госпо́дне Преображе́ние.

Стих: Фаво́р и Ермо́н / о И́мени Твое́м возра́дуетася.

Со́лнце у́бо, / зе́млю уясня́я, / а́бие захо́дит, / Христо́с же, со сла́вою облиста́в на горе́, / мир просвети́л есть.

Слава, и ныне, глас и подобен тойже:

Ви́деша на Фаво́ре / Моисе́й же и Илия́ / от Де́вы Отрокови́цы / Бо́га воплоща́ема, / челове́ком на избавле́ние.

Тропарь, глас 7:

Преобрази́лся еси́ на горе́, Христе́ Бо́же, / показа́вый ученико́м Твои́м сла́ву Твою́, / я́коже можа́ху, / да возсия́ет и нам, гре́шным, / Свет Твой присносу́щный / моли́твами Богоро́дицы, / Светода́вче, сла́ва Тебе́.

Стихология не бывает, токмо аще есть Неделя, тогда поем кафизму всю; аще в понедельник, первый антифон.

На Го́споди, воззва́х: стихиры на 8,

самогласны, глас 4, по дважды. Космы монаха:

Пре́жде Креста́ Твоего́, Го́споди, / гора́ Небеси́ подо́бящися, / и о́блак, я́ко сень, протяза́шеся, / Тебе́ преобразу́ющуся, / от Отца́ же свиде́тельствуему: / та́мо бе Петр со Иа́ковом и Иоа́нном, / я́ко хотя́ху бы́ти с Тобо́ю и во вре́мя преда́ния Твоего́, / да, ви́девше чудеса́ Твоя́, / не устраша́тся страда́ний Твои́х, / и́мже поклони́тися нам в ми́ре сподо́би, / вели́кия ра́ди Твоея́ ми́лости.

Пре́жде Креста́ Твоего́, Го́споди, / пои́м ученики́ на го́ру высо́ку, / преобрази́лся еси́ пред ни́ми, / луче́ю си́лы озаря́я их, / отсю́ду у́бо человеколю́бием, / отону́ду вла́стию, / показа́ти хотя́ воскресе́ния све́тлость, / его́же и нас, Бо́же, в ми́ре сподо́би, / я́ко Ми́лостив и Человеколю́бец.

Гора́, я́же, иногда́ мра́чна и ды́мна, / ны́не же честна́ и свята́ есть, / на не́йже но́зе Твои́ стоя́сте, Го́споди, / преве́чное бо сокрове́нное та́инство / напосле́док явле́но сотвори́, / стра́шное Твое́ преображе́ние, / Петру́, и Иоа́нну, и Иа́кову. / И́же, такова́ сия́ния лица́ Твоего́ не терпя́ще / и све́тлости риз Твои́х, / ниц на лице́ земли́ покрыва́хуся, / и́же и у́жасом одержи́ми, дивля́хуся, / ви́дяще Моисе́я и Илию́, глаго́люща с Тобо́ю, / хотя́щая приключи́тися Тебе́; / и глас от Отца́ свиде́тельствоваше, глаго́ля: / Сей есть Сын Мой возлю́бленный, / о Не́мже благоизво́лих, / Того́ послу́шайте, / И́же и да́рует ми́рови ве́лию ми́лость.

На горе́ высо́це преобра́жся, Спас, / верхо́вныя име́я ученики́, / пресла́вно облиста́л есть, / показу́я, я́ко высото́ю доброде́телей облиста́вше / и Боже́ственней сла́ве сподо́бятся. / Глаго́лющии со Христо́м Моисе́й и Илия́ пока́зоваху, / я́ко живы́ми и ме́ртвыми облада́ет / и и́же дре́вле зако́ном и проро́ки глаго́лавый есть Бог, / Ему́же и глас Оте́ч из о́блака све́тла послу́шествоваше, глаго́лющий: / Того́ послу́шайте, / И́же Кресто́м а́да плени́вша / и ме́ртвым да́рующа живо́т ве́чный.

Слава, и ныне, глас 6. Анатолия:

Прообразу́я воскресе́ние Твое́, Христе́ Бо́же, / тогда́ поя́т три Твоя́ ученики́, / Петра́, и Иа́кова, и Иоа́нна, / на Фаво́р возше́л еси́. / Тебе́ же, Спа́се, преобразу́ющуся, / Фаво́рская гора́ Све́том покрыва́шеся, / ученицы́ Твои́, Сло́ве, / поверго́ша себе́ до́лу на земли́, / не терпя́ще зре́ти неви́димаго зра́ка, / А́нгели служа́ху стра́хом и тре́петом, / небеса́ убоя́шася, / земля́ вострепета́, / ви́дяще на земли́ сла́вы Го́спода.

Вход. Прокимен дне. И чтения.

Исхо́да чте́ние

Рече́ Госпо́дь к Моисе́ю: взы́ди ко Мне на го́ру и ста́ни та́мо, и дам ти скрижа́ли ка́менныя, зако́н и за́поведи, я́же написа́х взако́нити им. И воста́в Моисе́й и Иису́с, предстоя́й ему́, взыдо́ша на го́ру Бо́жию. И ста́рцем рече́: безмо́лвствуйте та́мо, до́ндеже возврати́мся к вам, и се Ааро́н и Ор с ва́ми, а́ще кому́ прилучи́тся суд, да и́дут к ним. И взы́де Моисе́й на го́ру, и покры́ о́блак го́ру. И сни́де сла́ва Бо́жия на го́ру Сина́йскую, и покры́ ю о́блак шесть дней, и призва́ Госпо́дь Моисе́я в день седмы́й из среды́ о́блака. Виде́ние же сла́вы Госпо́дни, я́ко огнь, паля́ на версе́ горы́, пря́мо сыно́в Изра́илевых. И вни́де Моисе́й посреде́ о́блака, и взы́де на го́ру, и бе та́мо на горе́, четы́редесять дней и четы́редесять ноще́й.

Исх.24:12–18

Исхо́да чте́ние

Во днех о́нех, глаго́ла Госпо́дь к Моисе́ю лице́м к лицу́, я́ко а́ще бы кто возглаго́лал к своему́ дру́гу, и отсыла́шеся в полк; слуга́ же Иису́с, сын Нави́н, ю́ноша не исхожда́ше из ски́нии. И рече́ Моисе́й ко Го́споду: се Ты мне глаго́леши, изведи́ лю́ди сия́, Ты же не яви́л ми еси́, его́же по́слеши со мно́ю. Ты же мне рекл еси́: вем тя па́че всех, и благода́ть и́маши у Мене́. А́ще у́бо обрето́х благода́ть пред Тобо́ю, яви́ми Сама́го Тебе́ разу́мно, да ви́жу Тя: я́ко да обре́т бу́ду благода́ть пред Тобо́ю, и да разуме́ют, я́ко лю́дие Твои́ язы́к сей. И глаго́ла ему́ Госпо́дь: Аз Сам предыду́ пред тобо́ю и упоко́ю тя. И рече́ к Нему́ Моисе́й: а́ще Сам Ты не ше́ствуеши с на́ми, да не изведе́ши мя отсю́ду. И ка́ко ве́домо бу́дет вои́стинну, я́ко обрето́х благода́ть у тебе́, аз же и лю́дие Твои́, то́чию иду́щу Ти с на́ми? И просла́влен бу́ду аз же и лю́дие Твои́ па́че всех язы́к, ели́цы суть на земли́. Рече́ же Госпо́дь к Моисе́ю: сие́ сло́во твое́, е́же рекл еси́, сотворю́, обре́л бо еси́ благода́ть предо Мно́ю, и вем тя па́че всех. И глаго́ла Моисе́й: покажи́ ми сла́ву Твою́. И рече́: Аз предыду́ пред тобо́ю сла́вою Мое́ю и воззову́ о и́мени Мое́м, Госпо́дь пред тобо́ю. И поми́лую, его́же а́ще ми́лую, и уще́дрю, его́же а́ще ще́дрю. И рече́: не возмо́жеши ви́дети лице́ Мое́: не бо у́зрит челове́к лице́ Мое́, и жив бу́дет. И рече́ Госпо́дь: се ме́сто у Мене́, и ста́неши на ка́мени, до́ндеже у́бо пре́йдет сла́ва Моя́, и положу́ тя в разсе́лине ка́мене, и покры́ю руко́ю Мое́ю над тобо́ю, до́ндеже мимоиду́. И отыму́ ру́ку Мою́, и тогда́ у́зриши за́дняя Моя́, лице́ же Мое́ не яви́т ти ся. И у́треневав, Моисе́й зау́тра взы́де на го́ру Сина́йскую, я́коже глаго́ла ему́ Госпо́дь. И сни́де Госпо́дь во о́блаце, и предста́ Ему́ та́мо Моисе́й, и призва́ и́менем Госпо́дним. И мимои́де Госпо́дь пред лице́м его́, и призва́: Госпо́дь Бог Щедр и Ми́лостив, Долготерпели́в, и Многоми́лостив, и И́стинен. И потща́вся Моисе́й, прини́к на зе́млю, поклони́ся Го́сподеви.

Исх.33:11–23, 34:4–6, 8

Ца́рств тре́тиих чте́ние

Во днех о́нех, прии́де Илия́ в Вирсави́ю, я́же есть земля́ Иу́дова, и оста́ви о́трочища своего́ та́мо. И сам по́йде в пусты́ню путь дне, и прии́де, и се́де под сме́рчием, и у́спе, и сон ви́де та́мо, под са́дом. И се не́кий прикосну́ся ему́, и рече́ ему́: воста́ни, яждь и пий. И воззре́ Илия́, и се при возгла́вии его́ опресно́к ячме́нный и корча́г воды́; и воста́, и яде́, и пит, и, обра́щься, у́спе. И обра́щся А́нгел Госпо́день втори́цею, и косну́ся его́, и рече́ ему́: воста́ни, яждь и пий, я́ко мног от Тебе́ путь. И воста́, и яде́, и пит, и и́де в кре́пости я́ди тоя́ четы́редесять дней и четы́редесять ноще́й до горы́ Хори́вския. И вни́де та́мо в пеще́ру, и всели́ся в ней. И се глаго́л Госпо́день к нему́, и рече́ ему́ Госпо́дь: изы́ди и ста́ни на горе́ пред Го́сподем. И се Госпо́дь мимои́дет, и дух ве́лий и кре́пок разоря́я го́ры, и сокруша́я ка́мение пред Го́сподем: и не в ду́се Госпо́дь. И по ду́се трус, и не в тру́се Госпо́дь. И по тру́се огнь, и не во огни́ Госпо́дь. И по огни́ глас хла́да то́нка, и та́мо Госпо́дь. И бысть, я́ко услы́ша Илия́, покры́ лице́ свое́ ми́лотию свое́ю, и изы́де, и ста близ пеще́ры. И рече́ Госпо́дь к нему́: иди́ и возврати́ся в путь твой, и по́йдеши в путь пусты́ни Дама́сковы, и пома́жеши Елиссе́я, сы́на Асафа́това, вме́сто тебе́ проро́ка.

3Цар.19:3–9, 11–13, 15–16

На литии стихиры самогласны, глас 2:

И́же Све́том Твои́м всю вселе́нную освяти́в, / на горе́ высо́це преобрази́лся еси́, Бла́же, / показа́в ученико́м Твои́м си́лу Твою́, / я́ко мир избавля́еши от преступле́ния. / Те́мже вопие́м Ти: / Милосе́рде Го́споди, спаси́ ду́ши на́ша.

И́же на горе́ Фаво́рстей преобра́жся во сла́ве, Христе́ Бо́же, / и показа́в ученико́м Твои́м сла́ву Твоего́ Божества́, / озари́ и нас све́том Твоего́ разуме́ния / и наста́ви на стезю́ за́поведей Твои́х, / я́ко еди́н Благ и Человеколю́бец.

И́же пре́жде со́лнца Свет Христо́с / теле́сне на земли́ жи́тельствуя / и пре́жде Креста́ вся, я́же стра́шнаго смотре́ния, соверши́в боголе́пно, / днесь на Фаво́рстей горе́, / та́йно Тро́ицы о́браз показу́я, / изя́щныя три ученики́, / Петра́, и Иа́кова, и Иоа́нна, на ню возве́л еси́ наедине́ / и, ма́ло скрыв пло́ти восприя́тие, / преобрази́лся еси́ пред ни́ми, / явля́я началообра́зныя добро́ты благоле́пие / и то не всесоверше́нно: / о́во известву́я ты́я, вку́пе и щадя́, / да не ка́ко со зра́ком и е́же жи́ти погубя́т, / но я́ко можа́ху вмеща́ти, теле́сныма очи́ма стерпя́ще. / И проро́ков верхо́вныя, Моисе́я и Илию́, приве́л еси́, / непрекосло́вне свиде́тельствующия Его́ Божество́ / и я́ко Той есть и́стинное Оте́ческаго Существа́ сия́ние, / госпо́дствуяй живы́ми и ме́ртвыми. / Тем и о́блак, я́коже сень, объя́т их, / и глас свы́ше Оте́ч / из о́блака шу́мно предсвиде́тельствующ и глаго́лющ: / Сей есть, Его́же нетле́нно из чре́ва пре́жде денни́цы роди́х, / Сын возлю́бленный Мой, / Его́же посла́х спасти́ / во Отца́ и Сы́на и Ду́ха Свята́го креща́емыя / и испове́дающия ве́рно, / я́ко неразде́льна есть еди́на держа́ва Божества́, / Того́ послу́шайте. / Сам у́бо, Человеколю́бче Христе́ Бо́же, / и нас озари́ Све́том непристу́пныя Твоея́ сла́вы / и досто́йны покажи́ насле́дники / безконе́чнаго Ца́рствия Твоего́, я́ко Пребла́г.

Слава, глас 5: Прииди́те, взы́ дем на го́ру Госпо́дню / и в дом Бо́га на́шего / и у́зрим сла́ву

преображе́ния Его́, / сла́ву я́ко Единоро́днаго от Отца́, / све́том прии́мем Свет / и, возвы́шени бы́вше ду́хом, / Тро́ицу единосу́щную воспои́м во ве́ки.

И ныне, глас тойже: Зако́на и проро́ков / Тя, Христе́, Творца́ и Испо́лнителя свиде́тельствоваша, / зря́ще во о́блаце, / Моисе́й Богови́дец и Илия́ огнеколесни́чник / и неопа́льный небоше́ственник / в преображе́нии Твое́м. / С ни́миже и нас Твоего́ просвеще́ния сподо́би, Влады́ко, / пе́ти Тя во ве́ки.

На стиховне стихиры самогласны, глас 1:

И́же дре́вле с Моисе́ом глаго́лавый на горе́ Сина́йстей о́бразы, / Аз есмь, глаго́ля, Сый, / днесь на горе́ Фаво́рстей преобра́жся пред ученики́, / показа́ началообра́зную добро́ту зра́ка, / в Себе́ восприи́м челове́ческое существо́, / и таковы́я благода́ти свиде́тели поста́вль – Моисе́я и Илию́, / о́бщники творя́ше весе́лия, / провозвеща́ющия сла́вное Креста́ ра́ди / и спаси́тельное воскресе́ние.

Стих: Твоя́ суть небеса́, / и Твоя́ есть земля́.

Твоего́ Единоро́днаго Сы́на прови́дев Ду́хом / плотско́е к челове́ком прише́ствие, / Богооте́ц Дави́д издале́ча к весе́лию созыва́ет тварь / и проро́чески взыва́ет: / Фаво́р и Ермо́н о И́мени Твое́м возра́дуются. / На сию́ бо возше́д го́ру, Спа́се, со ученики́ Твои́ми, / очерне́вшее Ада́мово естество́, / преобра́жся, облиста́ти па́ки сотвори́л еси́, / претвори́в е в Твоего́ Божества́ сла́ву же и све́тлость. / Те́мже вопие́м Ти: / Соде́телю вся́ческих, Го́споди, сла́ва Тебе́.

Стих: Фаво́р и Ермо́н / о И́мени Твое́м возра́дуетася.

Неодержи́мое Твоего́ светоли́тия, / и непристу́пное Божества́, / зря́ще апо́столов лу́чшии, / на горе́ Преображе́ния, Безнача́льне Христе́, / Боже́ственным измени́шася у́жасом / и, о́блаком осия́вшеся све́тлым, / глас слы́шаху Оте́ч, известву́ющ та́инство Твоего́ вочелове́чения, / я́ко еди́н еси́ и по воплоще́нии, / Сын Единоро́дный / и Спас ми́ра.

Слава, и ныне, глас 6: Петру́, и Иа́кову, и Иоа́нну, / лу́чшим ученико́м Твои́м, Го́споди, / днесь показа́л еси́ на горе́ Фаво́рстей / сла́ву Боже́ственнаго Твоего́ зра́ка: / ви́дяху бо ри́зы Твоя́, облиста́вшия, я́ко свет, / и лице́ Твое́ па́че со́лнца, / не терпя́ще зре́ти нестерпи́мое Твоего́ сия́ния, / на зе́млю низпа́даху, / ника́коже зре́ти могу́ще. / Глас же слы́шаху, свиде́тельствующ свы́ше: / Сей есть Сын Мой возлю́бленный, / прише́дый в мир спасти́ челове́ка.

На благословении хлебов, тропарь, глас 7:

Преобрази́лся еси́ на горе́, Христе́ Бо́же, / показа́вый ученико́м Твои́м сла́ву Твою́, / я́коже можа́ху, / да возсия́ет и нам, гре́шным, / Свет Твой присносу́щный / моли́твами Богоро́дицы, / Светода́вче, сла́ва Тебе́. (3)

И чтение праздника.

На Бог Госпо́дь:

тропарь праздника, трижды, глас 7:

Преобрази́лся еси́ на горе́, Христе́ Бо́же, / показа́вый ученико́м Твои́м сла́ву Твою́, / я́коже можа́ху, / да возсия́ет и нам, гре́шным, / Свет Твой присносу́щный / моли́твами Богоро́дицы, / Светода́вче, сла́ва Тебе́. (3)

По 1-м стихологии седален, глас 4.

Подобен: Удиви́ся Ио́сиф:

Челове́ческое измене́ние, е́же со сла́вою Твое́ю, Спа́се, / второ́е и стра́шное Твоего́ прише́ствия показу́я, / на горе́ Фаво́рстей преобрази́лся еси́. / Илия́ и Моисе́й глаго́лаху с Тобо́ю, / и трие́х от учени́к спризва́в, / и́же, ви́девше, Влады́ко, сла́ву Твою́, блиста́нию Твоему́ удиви́шася. / И́же тогда́ сим Свет Твой возсия́вый, просвети́ ду́ши на́ша.

Сла́ва, и ны́не, тойже.

По 2-м стихословии седален,

глас и подобен тойже

На горе́ Фаво́рстей преобрази́лся еси́, Иису́се, / и о́блак све́тел, протяза́ющся, я́ко сень, апо́столы сла́вою покры́, / те́мже и на зе́млю ниц па́даху, / не терпя́ще зре́ти све́тлости непристу́пныя сла́вы лица́ Твоего́, / Безнача́льне Спа́се, Христе́ Бо́же. / И́же тогда́ сим Свет Твой возсия́вый, просвети́ ду́ши на́ша.

Сла́ва, и ны́не, тойже.

Величание:

Велича́ем Тя́, / живода́вче Христе́, / и почита́ем пречи́стыя пло́ти Твоея́ / пресла́вное / преображе́ние.

Псалом избранный

Лик 1: Ве́лий Госпо́дь и хва́лен зело́, во гра́де Бо́га на́шего, на святе́й горе́ Его́. 2: Прие́мля кро́ткия Госпо́дь, смире́нныя же возно́сит. 1: Кто взы́дет на го́ру Госпо́дню, или́ кто ста́нет на ме́сте святе́м Его́? 2: Го́споди, кто обита́ет в жили́щи Твое́м? 1: Или́ кто всели́тся в горе́ святе́й Твое́й? 2: Посли́ свет Твой и и́стину Твою́. 1: Просвеща́еши Ты ди́вно от гор ве́чных. 2: Вселе́нную, и исполне́ние ея́ Ты основа́л еси́. 1: Фаво́р и Ермо́н о и́мени Твое́м возра́дуетася. 2: Го́споди, во све́те лица́ Твоего́ по́йдут. 1: И о и́мени Твое́м возра́дуются весь день. 2: И бу́ди све́тлость Го́спода Бо́га на́шего на нас, от ны́не и до ве́ка.

Сла́ва, и ны́не: Аллилу́иа, трижды.

По полиелеи седален, глас тойже.

Подобен: Вознесы́йся:

Возше́д со ученики́ на го́ру и во сла́ве О́тчи облиста́в, / с Моисе́ом Илия́ Тебе́ предстоя́т, / зако́н и проро́цы бо я́ко Бо́гу слу́жат. / Ему́же и сыновство́ есте́ственное Роди́тель испове́дая, нарица́ше Сы́на, / Его́же воспева́ем с Тобо́ю и Ду́хом.

Слава, и ныне, глас 8.

Подобен: Повеле́нное:

Сокрове́нную мо́лнию под пло́тию существа́ Твоего́, Христе́, / и Боже́ственнаго благоле́пия на святе́й показа́л еси́ горе́, Благоде́телю, / просия́в су́щим с Тобо́ю ученико́м, / и, разуме́вше нестерпи́му су́щу сла́ву Твою́, – Свят еси́, – возопи́ша, / я́ко, непристу́пен сый, ви́ден был еси́ пло́тию ми́рови, / Еди́не Человеколю́бче.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Фаво́р и Ермо́н / о И́мени Твое́м возра́дуетася. Стих: Твоя́ суть небеса́, и Твоя́ есть земля́.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х

Его́, хвали́те Его́ в утверже́нии си́лы Его́.

Евангелие от Луки, зачало 45

Во вре́мя о́но, пое́м Иису́с Петра́, и Иоа́нна, и Иа́кова, взы́де на гору́ помоли́тися. И бысть, егда́ моля́шеся, виде́ние лица́ Его́ и́но, и одея́ние Его́ бело́ блиста́яся. И се му́жа два с Ним глаго́люща, я́же бе́ста Моисе́й и Илия́, я́вльшася во сла́ве: глаго́ласта же исхо́д Его́, и́же хотя́ше сконча́ти во Иерусали́ме. Петр же, и су́щии с ним, бя́ху отягче́ни сном: убу́ждшеся же ви́деша сла́ву Его́, и о́ба му́жа стоя́ща с Ним. И бысть, егда́ разлучи́стася от Него́, рече́ Петр ко Иису́су: Наста́вниче, добро́ есть нам зде бы́ти, и сотвори́м се́ни три, еди́ну Тебе́, и еди́ну Моисе́ови, и еди́ну Илии́: не ве́дый, е́же глаго́лаше. Се же ему́ глаго́лющу, бысть о́блак, и осени́ их: убоя́шася же, вше́дшим им во о́блак. И глас бысть из о́блака, глаго́ля: Сей есть Сын Мой Возлю́бленный, Того́ послу́шайте. И егда́ бысть глас, обре́теся Иису́с еди́н, и ти́и умолча́ша, и никому́же возвести́ша в ты́я дни ничесо́же от тех, я́же ви́деша.

Лк.9:28–36

По 50-м псалме

Слава: Вся́ческая днесь ра́дости испо́лнишася: / Христо́с преобрази́ся пред ученики́.

И ныне, тойже.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

Стихира самогласна, глас 5:

Божества́ Твоего́, Спа́се, ма́лу зарю́ обнажи́в / совозше́дшим с Тобо́ю на го́ру, / преми́рныя Твоея́ сла́вы сотвори́л еси́ рачи́тели. / Те́мже ужа́сно зовя́ху: / добро́ есть нам зде бы́ти. / С ни́миже и мы Тебе́, преобра́жшагося Спа́са Христа́, / пое́м во ве́ки.

Канона два: кир Космы, глас 4, и кир Иоанна, глас 8, ирмосы обою канонов по дважды, тропари вси поем на 12.

Канон, глас 4. Песнь 1

Ирмос: Ли́цы изра́ильтестии, / невла́жными стопа́ми / понт Чермны́й и вла́жную глубину́ прогна́вше, / вса́дники триста́ты враги́ ви́дяще в ней погруже́ны, / с весе́лием поя́ху: / пои́м Бо́гу на́шему, я́ко просла́вися.

Глаго́лы живо́тныя друго́м Христо́с / и о Боже́ственнем наказу́я Ца́рствии, рече́: / во Мне Отца́ позна́йте, / Све́том я́ко облиста́я непристу́пным, в ра́дости пою́ще: / пои́м Бо́гу на́шему, я́ко просла́вися.

Си́лою язы́к облече́теся дру́зи ученицы́, / чу́дни же бу́дете в бога́тстве их, я́ко сла́вы напо́лнитеся, / я́ко явлю́ся светле́е со́лнца, облиста́я в ра́дости пою́щих: / пои́м Бо́гу на́шему, я́ко просла́вися.

Днесь Христо́с, на горе́ Фаво́рстей просия́в я́сно Боже́ственною заре́ю, / я́коже обеща́ся, ученико́м обнажи́ зрак, / светоно́сныя же напо́лнившеся Боже́ственныя зари́, в ра́дости поя́ху: / пои́м Бо́гу на́шему, я́ко просла́вися.

Другий канон, глас 8.

Песнь 1

Ирмос: Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Моисе́й, на мо́ри проро́чески ви́дев / о́блаком и столпо́м дре́вле о́гненным сла́ву Госпо́дню, вопия́ше: / Изба́вителю и Бо́гу на́шему пои́м.

Я́ко ка́менем, те́лом покры́вся, / обоже́нием, Неви́димаго зря, Моисе́й Богови́дец взыва́ше: / Изба́вителю и Бо́гу на́шему пои́м.

Ты на горе́ зако́нней и на Фаво́рстей / ви́ден был еси́ Моисе́ем во мра́це дре́вле, / во Све́те же ны́не непристу́пнем Божества́.

Катавасия: Крест начерта́в, Моисе́й / впря́мо жезло́м Чермно́е пресече́, / Изра́илю пешеходя́щу; / то́же обра́тно фарао́новым колесни́цам, / уда́рив, совокупи́, / вопреки́ написа́в непобеди́мое ору́жие. / Тем Христу́ пои́м, Бо́гу на́шему, я́ко просла́вися.

Песнь 3

Ирмос: Лук си́льных изнемо́же, / и немощству́ющии препоя́сашася си́лою, / сего́ ра́ди утверди́ся в Го́споде се́рдце мое́.

Во всего́ Ада́ма обле́кся, Христе́, / очерне́вшее, измени́в, просвети́л еси́ дре́вле естество́ / и измене́нием зра́ка Твоего́ богосоде́лал еси́.

Столпо́м огнезра́чным и о́блаком дре́вле / И́же в пусты́ни Изра́иля веды́й, / днесь на горе́ Фаво́рстей неизрече́нно во све́те Христо́с просия́.

Ин. Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

Осеня́ющая сла́ва в се́ни пе́рвее и Моисе́еви бесе́дующи, Твоему́ уго́днику, / о́браз бысть облиста́вшаго неизрече́нно / на Фаво́ре, Влады́ко, Твоего́ преображе́ния.

Совзыдо́ша Ти, Сло́ве Единоро́дный, / вы́шнии апо́стольстии верси́ на го́ру Фаво́рскую, / и сопредста́ша Ти Моисе́й же и Илия́, я́ко Бо́жия слуги́, Еди́не Человеколю́бче.

Бог Сло́во Сый, весь зе́млен бысть, / всему́ Божеству́ смеси́в челове́чество во ипоста́си Свое́й, / ю́же во двою́ существу́ Моисе́й и Илия́ же ви́деша на горе́ Фаво́ре.

Катавасия: Жезл во о́браз та́йны прие́млется, / прозябе́нием бо предразсужда́ет свяще́нника; / неплодя́щей же пре́жде Це́ркви, / ны́не процвете́ Дре́во Креста́, / в держа́ву и утвержде́ние.

Седален, глас 4.

Подобен: Удиви́ся Ио́сиф:

На горе́ Фаво́рстей преобрази́лся еси́, Иису́се, / посреде́ Илии́ и Моисе́я прему́дрых, со Иа́ковом, и Петро́м, и Иоа́нном. / Петр же, сопребыва́я, сия́ Тебе́ глаго́лаше: / добро́ зде есть сотвори́ти три се́ни: / еди́ну Моисе́ю, и еди́ну Илии́, и еди́ну Тебе́, Влады́це Христу́. / И́же тогда́ Свет Твой сим возсия́вый, просвети́ ду́ши на́ша.

Сла́ва, и ны́не, тойже.

Песнь 4

Ирмос: Услы́шах сла́вное смотре́ние Твое́, Христе́ Бо́же, / я́ко роди́лся еси́ от Де́вы, / да от ле́сти изба́виши зову́щия: / сла́ва си́ле Твое́й, Го́споди.

Зако́н в Сина́и писа́нием вообража́я, Христе́ Бо́же, / во о́блаце, и огни́, и мра́це, и в ви́хре яви́лся еси́ носи́м: / сла́ва си́ле Твое́й, Го́споди.

Да уве́риши сла́вное строе́ние Твое́, Христе́ Бо́же, / я́ко Сый пре́жде век и То́йже на о́блаце восхожде́ние положи́вый, / на Фаво́ре неизрече́нно просия́л еси́.

Соглаго́люще, предстоя́ху раболе́пно Тебе́, Влады́це Христу́, / к ни́мже па́рою огня́ и мра́ка и то́нким хла́дом бесе́довал еси́: / сла́ва си́ле Твое́й, Го́споди.

Возвеща́ху сла́вное Креста́ ра́ди Твоего́, на Фаво́р прише́дше, / и́же во огни́ Тя и купине́ дре́вле предви́девый Моисе́й / и взя́тый на колесни́це о́гненней Илия́, Христе́.

Ин. Ирмос: Из пло́ти Твоея́ лучи́ Божества́ / исхожда́ху проро́ком и апо́столом. / Тем нача́льницы, по́юще, взыва́ху: / сла́ва си́ле Твое́й, Го́споди.

И́же купину́ сохрани́вый неврежде́нну, прикосну́вшуюся огню́, / Моисе́ю богосия́нную плоть показа́л еси́, Влады́ко, пою́щему: / сла́ва си́ле Твое́й, Го́споди.

Скры́ся заре́ю Божества́ чу́вственное со́лнце, / я́ко на горе́ Фаво́ре ви́дев Тя преобразу́ющася, Иису́се мой: / сла́ва си́ле Твое́й, Го́споди.

Огнь, не опаля́я ве́щи теле́сныя, ви́ден бысть невеще́ствен, / я́коже Моисе́ю и апо́столом яви́лся еси́, Илии́ же, Влады́ко, / еди́н от двою́, во дву соверше́нну естеству́.

Катавасия: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Песнь 5

Ирмос: От све́та пресеки́й перворо́дный свет, / я́ко во све́те дела́ пою́т Тя, Христе́, Соде́теля, / во све́те Твое́м пути́ на́ша напра́ви.

Пред лице́м Твои́м го́ры уклони́шася, / свет бо и пред нога́ми, неботе́чныя лучи́, Христе́, со́лнца прии́де, / зрак зе́млен я́ко прия́ти благоволи́л еси́.

Се Спас, – / вопия́ху Моисе́й и Илия́ ученико́м, / на горе́ святе́й Фаво́рстей оглаша́емым, – / Христо́с, Его́же дре́вле провозвести́хом Су́щаго Бо́га.

Неизме́нное естество́, челове́ческому приме́шся, / оби́льно невеще́ственнаго Божества́ Свет / изобнажи́в апо́столом, неизрече́нно возсия́.

Тя, присносу́щное сия́ние, во Оте́честей сла́ве / ученицы́ я́ко ви́девше возсия́вша, Христе́, Тебе́ вопия́ху: / во све́те Твое́м пути́ на́ша напра́ви.

Ин. Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго? / Но обрати́ мя и к све́ту за́поведей Твои́х / пути́ моя́ напра́ви, молю́ся.

Вети́йствующий язы́к Твоего́ вели́чества не мо́жет веща́ти: / я́ко бо, Держа́й живо́т и сме́ртию Влады́й, / предста́вил еси́ на Фаво́рстей горе́ Моисе́я и Илию́, / свиде́тельствующия Твое́ Божество́.

И́же рука́ми неви́димыми созда́в по о́бразу Твоему́, Христе́, челове́ка, / началообра́зную Твою́ в созда́нии добро́ту показа́л еси́, / не я́ко во о́бразе, но я́ко Сам Сый по существу́, / Бог был еси́ и Челове́к.

Сраствори́вся неслия́нно, угль горя́щ показа́л еси́ нам Божества́, / попаля́ющ у́бо грехи́, ду́ши же просвеща́ющ, на Фаво́рстей горе́, / Моисе́я со Илие́ю, ученико́в же старе́йшия удиви́л еси́.

Катавасия: О треблаже́нное Дре́во, / на не́мже распя́ся Христо́с, Царь и Госпо́дь! / И́мже паде́ дре́вом прельсти́вый, / Тобо́ю прельсти́вся, / Бо́гу пригвозди́вшуся пло́тию, / подаю́щему мир душа́м на́шим.

Песнь 6

Ирмос: Внегда́ скорбе́ти ми, / возопи́х ко Го́споду, / и услы́ша мя Бог спасе́ния моего́.

Сия́ния па́че со́лнца Свет ясне́йший, Спас, просия́в на Фаво́ре, / нас просвети́л есть.

Возше́д на го́ру Фаво́рскую, преобрази́лся еси́, Христе́, / и, лесть всю омрачи́в, нас просвети́л еси́.

Тя Бо́га позна́вше сла́внии апо́столи, / на Фаво́ре же, Христе́, уди́вльшеся, коле́на преклони́ша.

Ин. Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, и услы́ши мя, / Бо́же спасе́ния моего́.

Я́ко ве́лие и стра́шное узре́ся виде́ние днесь: / с небесе́ у́бо чу́вственное, от земли́ же несравне́нное / облиста́ Со́лнце пра́вды мы́сленное на горе́ Фаво́рстей.

Пре́йде у́бо сень зако́нная, изнемо́гшая, / прии́де же я́ве Христо́с и́стина, – Моисе́й возопи́, / на Фаво́ре ви́дев Твое́ Божество́.

Столп о́гненный – Христа́ преобразу́ющуся, / о́блак же – я́ве благода́ть Ду́ха, осени́вшую на Фаво́ре, / предсказа́ша явле́ннейше.

Катавасия: Во́днаго зве́ря во утро́бе / дла́ни Ио́на крестови́дно распросте́р, / спаси́тельную Страсть прообража́ше я́ве. / Тем, тридне́вен изше́д, / преми́рное Воскресе́ние прописа́ше / Пло́тию пригвожде́ннаго Христа́ Бо́га / и тридне́вным Воскресе́нием мир просве́щшаго.

Кондак, глас 7. Самогласен:

На горе́ преобрази́лся еси́, / и я́коже вмеща́ху ученицы́ Твои́, / сла́ву Твою́, Христе́ Боже́, ви́деша, / да егда́ Тя у́зрят распина́ема, / страда́ние у́бо уразуме́ют во́льное, / ми́рови же пропове́дят, / я́ко Ты еси́ вои́стинну О́тчее сия́ние.

Икос: Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы, / возми́теся и возвы́ситеся на высоту́ Боже́ственнаго восхожде́ния. / Притеце́м к Петру́ и к Зеведе́евым / и вку́пе со о́неми Фаво́рскую го́ру дости́гнем, / да ви́дим с ни́ми сла́ву Бо́га на́шего, глас же услы́шим, / его́же свы́ше слы́шаша и пропове́даша О́тчее сия́ние.

Песнь 7

Ирмос: Авраа́мстии иногда́ в Вавило́не о́троцы / пе́щный пла́мень попра́ша, / пе́сньми взыва́юще: / оте́ц на́ших Бо́же, благослове́н еси́.

Облиста́вшеся Све́том непристу́пныя сла́вы на Фаво́рстей горе́, / апо́столи Христу́ вопия́ху: / оте́ц на́ших Бо́же, благослове́н еси́.

Сия́нием Боже́ственнаго шу́ма, и росода́тельным о́блаком, Христе́, / и заре́ю Твое́ю наслажда́еми, апо́столи поя́ху: / оте́ц на́ших Бо́же, благослове́н еси́.

В непристу́пном Све́те, я́ко ви́де Тя Петр, / на Фаво́рстей горе́ облиста́вша, Христе́, возопи́: / оте́ц на́ших Бо́же, благослове́н еси́.

С Нача́льником жи́зни Христо́м су́ще, де́ти Зеведе́евы, / я́ко испусти́ зра́ка Свет, возгреме́ша: / оте́ц на́ших Бо́же, благослове́н еси́.

Ин. Ирмос: О́троцы евре́йстии в пещи́ / попра́ша пла́мень дерзнове́нно / и на ро́су огнь преложи́ша, вопию́ще: / благослове́н еси́, Го́споди Бо́же, во ве́ки.

Ны́не ви́дена бы́ша апо́столом неви́димая Божества́ во пло́ти, / на горе́ Фаво́рстей облиста́вша, вопию́щим: / благослове́н еси́, Го́споди Бо́же, во ве́ки.

Ужасо́шася стра́хом, уди́вльшеся благоле́пию Боже́ственнаго Ца́рства, / на горе́ Фаво́рстей апо́столи, вопию́ще: / благослове́н еси́, Го́споди Бо́же, во ве́ки.

Ны́не неуслы́шанная услы́шана бы́ша: / без отца́ бо Сын от Де́вы Оте́ческим гла́сом сла́вно свиде́тельствуется, / я́ко Бог и Челове́к То́йже во ве́ки.

Положе́нием не был еси́ Вы́шняго, существо́м же Сын возлю́блен, / пре́жде Сый, нам прибли́жился еси́ непрело́жно: / благослове́н еси́, Го́споди Бо́же, во ве́ки.

Катавасия: Безу́мное веле́ние мучи́теля злочести́ваго / лю́ди поколеба́, / ды́шущее преще́ние и злохуле́ние богоме́рзкое; / оба́че три о́троки не устраши́ я́рость зве́рская, / ни огнь снеда́яй, / но противоды́шущу росоно́сному Ду́ху, / со огне́м су́ще, поя́ху: / Препе́тый отце́в и нас Бо́же, благослове́н еси́.

Песнь 8

Ирмос: В Вавило́не о́троцы, / Боже́ственною распала́еми ре́вностию, / мучи́теля и пла́мене преще́ния му́жески попра́ша / и, посреде́ огня́ вве́ржени, ороша́еми, поя́ху: / благослови́те, вся дела́ Госпо́дня, Го́спода.

Манове́нием вся нося́й, нога́ми пречи́стыми на го́ру взы́де Фаво́рскую Христо́с, / на не́йже па́че со́лнечныя лучи́ облиста́ лице́м, / и́же зако́ну старе́йшия и благода́ти показа́ пою́щия: / благослови́те, вся дела́ Госпо́дня, Го́спода.

Непристу́пною сла́вою на горе́ я́влься неизрече́нно Фаво́рстей, / неодержи́мый и незаходи́мый Свет, О́тчее сия́ние, / тварь уясни́в, челове́ки обожи́, пою́щия: / благослови́те, вся дела́ Госпо́дня, Го́спода.

Священноле́пно стоя́ще Моисе́й же и Илия́ на горе́ Фаво́ре, / Боже́ственныя начерта́ние я́сно ипоста́си ви́девше, / Христа́, во Оте́честей облиста́вша сла́ве, воспева́ху: / благослови́те, вся дела́ Госпо́дня, Го́спода.

И́же во зра́це Боже́ственнаго ра́ди явле́ния лице́ просла́вися иногда́ Моисе́ово, / Христо́с же, я́ко ри́зою, Све́том и сла́вою одева́ется, / Све́та бо самоде́телен Сый, озаря́ет пою́щия: / благослови́те, вся дела́ Госпо́дня, Го́спода.

От светоро́дна о́блака Христа́ ученицы́ объя́та зря́ще на Фаво́ре / и ни́цы на зе́млю па́дше, ум просве́щше, / со Отце́м Сего́ поя́ху и Ду́хом: / благослови́те, вся дела́ Госпо́дня, Го́спода.

Ин. Ирмос: Седмери́цею пещь / халде́йский мучи́тель / Богочести́вым неи́стовно разжже́, / си́лою же лу́чшею спасе́ны, сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Услы́шавше, Влады́ко, от Отца́ свиде́тельствуема, / и я́ко челове́ческа тверде́йша зра́ка зре́ти лица́ Твоего́ блиста́ния не терпя́ще, / Твои́ ученицы́ на зе́млю ниц па́даху, со стра́хом пою́ще: / свяще́нницы, благослови́те, лю́дие, превозноси́те во вся ве́ки.

Ца́рствующим еси́ Царь прекра́сен и и́же всю́ду владя́щим Госпо́дь си́лен, / Блаже́н и во све́те живы́й непристу́пнем, / Ему́же ученицы́ уди́вльшеся, Моисе́й же и Илия́ вопия́ху: / о́троцы, благослови́те, свяще́нницы, воспо́йте, / лю́дие, превозноси́те во вся ве́ки.

Я́ко Не́бом владу́щему, и земле́ю госпо́дствующему, / и над преиспо́дними о́бласть иму́щему, Христе́, предста́ша Ти: / от земли́ у́бо – апо́столи, я́ко с Небесе́ же Фесви́тянин Илия́, / Моисе́й же – от ме́ртвых, пою́ще согла́сно: / лю́дие, превозноси́те во вся ве́ки.

Уны́ние ражда́ющия печа́ли на земли́ оста́виша апо́столов избра́ннии, Человеколю́бче, / я́ко Тебе́ после́доваша, ко и́же от земли́ преложе́нию Боже́ственнаго жития́. / Те́мже и, по достоя́нию Твоего́ Богоявле́ния улучи́вше, поя́ху: / лю́дие, превозноси́те Его́ во ве́ки.

Катавасия: Благослови́те, о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во, / и огнь в ро́су претво́ршее, / и превозноси́те всем жизнь подава́ющаго / Ду́ха Всесвята́го во ве́ки.

На 9-й песни Честне́йшую: не поем, аще и в Неделю, но поем припев праздника: Велича́й, душе́ моя́, / на Фаво́ре преобрази́вшагося Го́спода.

Таже ирмос: Рождество́ Твое́: Посем вторый лик поет тойже припев и ирмос. И ко второму канону припевают тойже припев.

Песнь 9

Ирмос: Рождество́ Твое́ нетле́нно яви́ся: / Бог из боку́ Твое́ю про́йде, / я́ко Плотоно́сец яви́ся на земли́ / и с челове́ки поживе́. / Тя, Богоро́дице, тем вси велича́ем.

Ужа́сни но́вым светоли́тием внеза́пу ученицы́ осве́щшеся, друг дру́га зря́ху, / уди́вльшеся же и к земли́ прекло́ньшеся, / Тебе́, Влады́це всех, поклони́шася.

Шум из о́блака посыла́шеся богогла́сен, известву́я чу́до: / Оте́ц бо Све́тов, – Сей есть Сын Мой возлю́бленный, – апо́столом вопия́ше, / Того́ послу́шайте.

Но́вая ви́девше и пресла́вная, глас Оте́ческий внуши́вше, / на Фаво́ре Словесе́ слуги́, изображе́ние Первообра́знаго, / Сей есть, – вопия́ху, – Спас наш.

О́бразе непреме́нный Су́щаго, недви́жиме, печа́ть неизме́нна, / Сы́не, Сло́ве, му́дросте и мы́шце, десни́це Вы́шняго, Си́ло, / Тя воспева́ем со Отце́м же и Ду́хом.

Ин. Ирмос: Устраши́ся всяк слух / неизрече́нна Бо́жия снизхожде́ния, / я́ко Вы́шний во́лею сни́де да́же и до пло́ти, / от деви́ческаго чре́ва быв Челове́к. / Те́мже Пречи́стую Богоро́дицу, ве́рнии, велича́ем.

Да Твое́ пока́жеши я́ве неизрече́нное второ́е сни́тие, / я́ко да Вы́шний Бог яви́шася, / стоя́ посреде́ бого́в, апо́стол на Фаво́ре, / Моисе́я же и Илию́, неизрече́нно осия́л еси́. / Те́мже вси Тя, Христе́, велича́ем.

Прииди́те, Мне покори́теся, лю́дие, возше́дше на го́ру святу́ю пренебе́сную, / невеще́ственно ста́нем во гра́де Жива́го Бо́га / и у́зрим мы́сленно Божество́ невеще́ственное, / Отца́ и Ду́ха, в Сы́не Единоро́днем облиста́ющее.

Привле́кл еси́ любо́вию мя, Спа́се, / и премени́л еси́ Боже́ственным Твои́м жела́нием, / но попали́ огне́м невеще́ственным грехи́ моя́ / и насы́титися Твоея́ пи́щи сподо́би, / да, обое́ игра́я, велича́ю, Бла́же, вели́чия Твоя́.

Катавасия: Та́ин еси́, Богоро́дице, рай, / невозде́ланно возрасти́вший Христа́, / И́мже кре́стное живоно́сное на земли́ насади́ся Дре́во. / Тем, ны́не возноси́му, / покланя́ющеся Ему́, Тя велича́ем.

Светилен:

Све́те неизме́нный, Сло́ве, Све́та Отца́ нерожде́нна, в явле́ннем све́те Твое́м, / днесь на Фаво́ре Свет ви́дехом Отца́, Свет и Ду́ха, / Све́том наставля́ющаго всю тварь. (3)

На хвалитех, Вся́кое дыха́ние:

поставим стихи 4, глас 4.

Подобен: Зва́нный свы́ше:

Пре́жде Честна́го Креста́ Твоего́ и страда́ния, / пои́мь, и́хже проразсуди́л еси́, от свяще́нных учени́к, / на Фаво́рскую, Влады́ко, возше́л еси́ го́ру, / показа́ти восхоте́в сим сла́ву Твою́: / и́же и ви́девше Тя, преобрази́вшася / и па́че со́лнца просия́вша, / ни́цы па́дше, / си́ле Твое́й удиви́шася, взыва́юще: / Ты безле́тен Свет еси́, Христе́, / и сия́ние О́тчее, / а́ще и во́лею плоть яви́лся еси́, Неизме́нне. (2)

И́же пре́жде век Сый Бог Сло́во, / И́же Све́том, я́ко ри́зою, одева́яйся, / преобразу́ющийся пред ученики́ Твои́ми, / па́че со́лнца, Сло́ве, просия́л еси́, / Моисе́й же и Илия́ Тебе́ предста́ша, / ме́ртвым и живы́м Тя, Го́спода, пове́дающе / и Твое́ сла́вяще неизрече́нное смотре́ние, и ми́лость, / и мно́гое милосе́рдие, / и́мже спасл еси́ мир, / грехо́м погиба́ющий.

От Деви́ческаго о́блака Тя рожде́нна, / и плоть бы́вша, / и на горе́ Фаво́рстей преобразу́ющася, Го́споди, / и о́блаком све́тлым Тя окружа́ема, / глас Роди́телев возлю́бленнаго Тя Сы́на, / ученико́м предстоя́щим Тебе́, я́ве ска́зоваше, / я́ко Единосу́щна и Единопресто́льна. / Те́мже Петр удивля́яся, – / добро́ есть зде бы́ти, – глаго́лаше, / не ве́дый, е́же глаго́лаше, / Благоде́телю Многоми́лостиве.

Слава, и ныне, глас 8. Византиево:

Поя́т Христо́с Петра́, Иа́кова и Иоа́нна, / на го́ру высоку́ еди́ны / и преобрази́ся пред ни́ми и просвети́ся лице́ Его́, я́ко со́лнце, / ри́зы же Его́ бы́ша белы́, я́ко свет; / и яви́шася Моисе́й и Илия́ с Ним, глаго́люще, / и о́блак све́тел осени́ их. / И се глас из о́блака, глаго́лющ: / Сей есть Сын Мой возлю́бленный, / о Не́мже благоволи́х, / Того́ послу́шайте.

Славословие великое, и отпуст:

Иже на горе́ Фаво́рстей преобрази́выйся во сла́ве, пред святы́ми Свои́ми ученики́ и апо́столы Христо́с, и́стинный Бог наш, моли́твами пречи́стыя Своея́ Ма́тере и всех святы́х, поми́лует и спасе́т нас, я́ко Благ и Человеколю́бец.

Антифон 1, глас 2

Стих 1. Псалом 65: Воскли́кните Го́сподеви, вся земля́, / по́йте же И́мени Его́, дади́те сла́ву хвале́ Его́.

Моли́твами Богоро́дицы, Спа́се, спаси́ нас.

Паки другий лик тойже стих: Воскли́кните Го́сподеви:

Моли́твами Богоро́дицы, Спа́се, спаси́ нас.

И паки 1-й лик, стих 2-й. Псалом 76: Глас гро́ма Твоего́ в колеси́, освети́ша мо́лния Твоя́ вселе́нную, / подви́жеся и тре́петна бысть земля́.

Моли́твами Богоро́дицы, Спа́се, спаси́ нас.

Таже 2-й лик, стих 3. Псалом 103: Во испове́дание и в велеле́поту обле́клся еси́, / одея́йся све́том, я́ко ри́зою.

Моли́твами Богоро́дицы, Спа́се, спаси́ нас.

Сла́ва, и ны́не: Моли́твами Богоро́дицы, Спа́се, спаси́ нас.

Антифон 2

Псалом 47. Стих 1: Го́ры Сио́нския, ре́бра се́верова, / град Царя́ Вели́каго.

Спаси́ ны, Сы́не Бо́жий, / преобрази́выйся на горе, поющия Ти: / Аллилу́иа.

Другий лик, тойже.

Псалом 77, стих 2: И введе́ я́ в го́ру святы́ни Своея́, / го́ру сию́, ю́же стяжа́ десни́ца Его́.

Спаси́ ны, Сы́не Бо́жий, преобрази́выйся на горе, поющия Ти: / Аллилу́иа.

Стих 3: Го́ру Сио́ню, ю́же возлюби́, / и созда́, я́ко единоро́га, святи́лище Свое́.

Спаси́ ны, Сы́не Бо́жий, преобрази́выйся на горе, поющия Ти: / Аллилу́иа.

Сла́ва, и ны́не: Единоро́дный Сы́не и Сло́ве Бо́жий:

Антифон 3. Псалом 124, глас 7

Стих 1: Наде́ющиися на Го́спода, / я́ко гора́ Сио́н, не подви́жится во век.

Тропарь, глас 7:

Преобрази́лся еси́ на горе́, Христе́ Бо́же, / показа́вый ученико́м Твои́м сла́ву Твою́, / я́коже можа́ху, / да возсия́ет и нам, гре́шным, / Свет Твой присносу́щный / моли́твами Богоро́дицы, / Светода́вче, сла́ва Тебе́.

Стих 2: Го́ры о́крест Его́, / и Госпо́дь о́крест люде́й Свои́х от ны́не и до ве́ка.

Тропарь: Преобрази́лся еси́:

Псалом 14. Стих 3: Го́споди, кто обита́ет в жили́щи Твое́м? / Или́ кто всели́тся во святу́ю го́ру Твою́?

Тропарь: Преобрази́лся еси́:

Псалом 23. Стих 4: Кто взы́дет на го́ру Госпо́дню? / Или́ кто ста́нет на ме́сте святе́м Его́? Тропарь: Преобрази́лся еси́:

Входное:

Го́споди, посли́ Свет Твой и и́стину Твою́, / та мя наста́виста, и введо́ста мя в го́ру святу́ю Твою́.

Тропарь, глас 7:

Преобрази́лся еси́ на горе́, Христе́ Бо́же, / показа́вый ученико́м Твои́м сла́ву Твою́, / я́коже можа́ху, / да возсия́ет и нам, гре́шным, / Свет Твой присносу́щный / моли́твами Богоро́дицы, / Светода́вче, сла́ва Тебе́.

Слава, и ныне, кондак, глас тойже:

На горе́ преобрази́лся еси́, / и я́коже вмеща́ху ученицы́ Твои́, / сла́ву Твою́, Христе́ Боже́, ви́деша, / да егда́ Тя у́зрят распина́ема, / страда́ние у́бо уразуме́ют во́льное, / ми́рови же пропове́дят, / я́ко Ты еси́ вои́стинну О́тчее сия́ние.

Трисвятое.

Прокимен, глас 4:

Я́ко возвели́чишася дела́ Твоя́, Го́споди, / вся прему́дростию сотвори́л еси́. Стих: Благослови́, душе́ моя́, Го́спода, Го́споди Бо́же мой, возвели́чился еси́ зело́.

Апостол, Петрова послания, зачало 65

Бра́тие, потщи́теся изве́стно ва́ше зва́ние и избра́ние твори́ти. Сия́ бо творя́ще, не и́мате согреши́ти никогда́же. Си́це бо оби́льно припода́стся вам вход в ве́чное Ца́рство Го́спода на́шего и Спа́са Иису́са Христа́. Сего́ ра́ди не обленю́ся воспомина́ти при́сно вам о сих, а́ще и ве́дите, и утвержде́ни есте́ в настоя́щей и́стине. Пра́ведно бо мню́, доне́леже есмь в сем телеси́, возставля́ти вас воспомина́нием: ве́дый, я́ко ско́ро есть отложе́ние телесе́ моего́, я́коже и Госпо́дь наш Иису́с Христо́с сказа́ мне. Потщу́ся же и всегда́ име́ти вас по мое́м исхо́де, е́же о сих па́мять твори́ти. Не ухищре́нным бо ба́снем после́довавше, сказа́хом вам си́лу и прише́ствие Го́спода на́шего Иису́са Христа́, но самови́дцы бы́вше вели́чествию О́наго. Прие́м бо от Бо́га Отца́ честь и сла́ву, гла́су прише́дшу к Нему́ такову́ от велеле́пныя сла́вы: Сей есть Сын Мой Возлю́бленный, о Не́мже Аз благоизво́лих. И сей глас мы слы́шахом с небесе́ сшедш, с Ним су́ще на горе́ святе́й. И и́мамы изве́стнейшее проро́ческое сло́во, ему́же внима́юще я́коже свети́лу сия́ющу в те́мнем ме́сте, до́бре творите́, до́ндеже день озари́т, и денни́ца возсия́ет в сердца́х ва́ших.

2Петр.1:10–19

Аллилуиа, глас 8: Твоя́ суть небеса́, и Твоя́ есть земля́. Стих: Блаже́ни лю́дие, ве́дущии воскликнове́ние.

Евангелие Матфея, зачало 70

Во вре́мя о́но, поя́т Иису́с Петра́ и Иа́кова и Иоа́нна бра́та его́, и возведе́ их на гору́ высоку́ еди́ны. И преобрази́ся пред ни́ми: и просвети́ся лице́ Его́ я́ко со́лнце: ри́зы же Его́ бы́ша белы́ я́ко свет. И се яви́стася им Моисе́й и Илия́, с Ним глаго́люща. Отвеща́в же Петр рече́ ко Иису́сови: Го́споди, добро́ есть нам зде бы́ти: а́ще хо́щеши, сотвори́м зде три се́ни, Тебе́ еди́ну, и Моисе́ови еди́ну, и еди́ну Илии́. Еще́ же ему́ глаго́лющу, се о́блак све́тел осени́ их и се глас из о́блака глаго́ля: Сей есть Сын Мой Возлю́бленный, о Не́мже благоволи́х: Того́ послу́шайте. И слы́шавше ученицы́, падо́ша ни́цы, и убоя́шася зело́. И присту́пль Иису́с, прикосну́ся их, и рече́: воста́ните, и не бо́йтеся. Возве́дше же о́чи свои́, никого́же ви́деша, то́кмо Иису́са еди́наго. И сходя́щим им с горы́, запове́да им Иису́с, глаго́ля: никому́же пове́дите виде́ния, до́ндеже Сын Челове́ческий из ме́ртвых воскре́снет.

Мф.17:1–9

За Достойно:

Велича́й, душе́ моя́, / на Фаво́ре преобрази́вшагося Го́спода.

Ирмос, глас 4: Рождество́ Твое́ нетле́нно яви́ся: / Бог из боку́ Твое́ю про́йде, / я́ко Плотоно́сец яви́ся на земли́ / и с челове́ки поживе́. / Тя, Богоро́дице, тем вси велича́ем.

И до отдания.

Причастен: Го́споди, во све́те Лица́ Твоего́ по́йдем / и о И́мени Твое́м возра́дуемся во ве́ки. Аллилу́иа, трижды.

На трапезе же разрешаем на рыбу, и елей, и вино, аще среда или пяток.

Подобает ведати: Яко предание имамы от святых отец, от спасительнаго сего праздника Преображения снедати гроздие, идеже обретается, благословение приемше от иерея. Принесену бывшу гроздию в церковь и по анафоре раздроблену.

Глаголется же сия молитва на благословение гроздия от святителя или от иерея:

Бо́же, Спаси́телю наш, благоволи́вый виногра́д нарещи́ Единоро́днаго Твоего́ Сы́на, Го́спода Бо́га и Спа́са на́шего Иису́са Христа́, и Тем плод безсме́ртия нам дарова́, Сам и ны́не пло́дный сей виногра́д благослови́ и нас, рабы́ Твоя́, вкуша́ющия от него́, И́стиннаго Виногра́да прича́стники сотвори́, неврежде́нну жизнь на́шу сохрани́, и мир нам всегда́ да́руй, и ве́чными Твои́ми неотъе́млемыми дарова́нии жизнь на́шу украси́, моли́твами Пречи́стыя Влады́чицы на́шея Богоро́дицы и Присноде́вы Мари́и и всех Твои́х святы́х, от ве́ка Тебе́ благоугоди́вших, я́ко Благ и Человеколю́бец Бог еси́, и Тебе́ сла́ву возсыла́ем, Безнача́льному Отцу́, со Единоро́дным Твои́м Сы́ном и с Пресвяты́м, и Благи́м, и Животворя́щим Твои́м Ду́хом, ны́не, и при́сно, и во ве́ки веко́в. Ами́нь.

Молитва над всяким плодом

Го́споди, Бо́же наш, положи́вый ве́рующим в Тя по́льзование творе́нии Твои́ми, Сам благослови́ предлежа́щия плоды́ сия́ сло́вом Твои́м, мо́лимся Тебе́, ми́лостию и человеколю́бием Единоро́днаго Сы́на Твоего́, с Ни́мже благослове́н еси́, со Пресвяты́м, и Благи́м, и Животворя́щим Твои́м Ду́хом ны́не, и при́сно, и во ве́ки веко́в. Ами́нь.