Месяца августа в 1-й день

Обычная кафизма.

На Го́споди, воззва́х: стихиры на 6.

Креста 3, глас 4.

Подобен: Зва́нный свы́ше:

Днесь ра́дуется ве́рных мно́жество Боже́ственное: / явля́ется бо Небе́сный Крест конце́м, / осиява́ет твердь Све́том непристу́пным, / возду́х озаря́ет / и земли́ лице́ украша́ет. / Пое́т Боже́ственными пе́сньми Це́рковь Христо́ва, / слу́жит, почита́ющи / свы́ше ю соблюда́ющий Крест Боже́ственный и пречу́дный. / Его́же си́лою укрепля́еми, / Влады́це присту́пим, зову́ще: / умири́ мир и просвети́ ду́ши на́ша.

Да ра́дуется тварь и игра́ет: / днесь бо облиста́ Крест в конце́х с Небесе́, / земна́я просвеща́я, / и совоку́плены показа́ расточе́ныя. / Днесь лику́ют с ли́ки а́нгельскими челове́цы, / и́бо браня́щее средогра́дие, Кресто́м разоре́но, / во еди́но вся я́ве совокупи́. / Тем, предсия́я па́че со́лнца, / всю тварь просвеща́ет благода́тию, / и уясня́ет, и спаса́ет / ве́рно того́ чту́щия.

Па́че со́лнечныя зари́ / хотя́й ми́рови, я́коже скиптр честны́й, / Царя́ Христа́ и кончи́ну показа́ти, / Крест Боже́ственный се предсия́ет я́сно в конце́х. / Сей возведе́ из а́да род челове́ч, / а́да вельми́ плени́в, врага́ низложи́в, / де́монов горды́ню до конца́ погуби́. / Ны́не же проявля́ет воскресе́ние Спа́сово / и спаса́ет зову́щия: / умири́ мир и просвети́ ду́ши на́ша.

И святых 3, глас 1.

Подобен: Всехва́льнии му́ченицы:

Зако́на верх, седмию́ столпы́ возвы́шен, / мучи́тельство не поколеба́, / и́бо ско́тский гони́теля гнев му́жески претерпе́ша, / те́ло преда́вше секу́щим, / благоро́днии ю́ноши и бра́тия, / Моисе́йским преда́нием храни́телие.

Па́че зри́мых ум вои́стинну возвы́сивше, / у́ды плотски́я отсеца́ху / благочести́вии и до́блии о́троцы / с ма́терию Богому́дрою, / вели́кими наде́ждами вжиля́еми, / я́же ны́не получи́ша, / у Авраа́ма почи́вше на ло́нех, пра́отца своего́.

Душе́вною до́блестию тве́рдо себе́ вооружи́вше / и я́рость я́ко преоби́девше, / проти́ву борцу́ кре́пко прилежа́ху / благоче́стия ра́ди / и зако́на оте́ческаго хране́нием / свяще́ннейший Елеаза́р и прему́дрии ю́ноши / с ма́терию Богому́дрою.

Слава, глас 8. Иоанна монаха:

Святи́и Маккаве́и мучи́телю глаго́лаху: / нам, о Антио́ше, еди́н Царь Бог, от Него́же бы́хом / и к Нему́ обраща́емся. / Мир ждет ин нас, / ви́димаго высоча́йший и тверде́йший, / оте́чество же нам – Иерусали́м кре́пкий и неги́бнущий, / торжество́ же – е́же со А́нгелы житие́. / Го́споди, моли́твами их поми́луй и спаси́ нас.

И ныне, глас тойже. Иоанна монаха:

Его́же дре́вле Моисе́й прообрази́в собо́ю, / Амали́ка низложи́в, победи́, / и Дави́д песнопе́вец / подно́жию Твоему́, вопия́, кла́нятися повелева́ше, / Честно́му Кресту́ Твоему́, Христе́ Бо́же, / днесь, гре́шнии, кла́няемся, / устна́ми недосто́йными / Тя, изво́лившаго пригвозди́тися на нем, воспева́юще, мо́лимся: / Го́споди, с разбо́йником Ца́рствия Твоего́ сподо́би нас.

На стиховне Октоиха

Слава, глас 8, Космы монаха: Ду́ши пра́ведных в руце́ Госпо́дни, / я́коже Авраа́ма, и Исаа́ка, и Иа́кова, / и́же пре́жде зако́на пра́отцы и Маккаве́ов пра́деди, / ны́не восхваля́емых от нас: / си́и бо крепкоду́шнии Авраа́мстии вну́цы су́ще, / ве́ре поревнова́вше своего́ пра́отца Авраа́ма, / и да́же до сме́рти подвиза́шася за благоче́стие. / Благоче́стно бо воспита́вшеся / и зако́нно пострада́вше, / нече́стие обличи́ша го́рдаго Антио́ха / и, ничто́же предпоче́тше вре́менныя жи́зни, / ве́чныя ра́ди вся Бо́гу возложи́ша: / ду́шу, му́жество, ра́зум, / те́ло мя́гкое и воздая́ния чистоты́ воспита́нием. / О, ко́рене благочести́ва, / из него́же вы прозябо́сте, Маккаве́и! / О, ма́тере святы́я, / ро́ждшия равночи́сленное седмери́цы число́! / Но мо́лим вас, Маккаве́и, / с ма́терию ва́шею Соломони́ею / и му́дрым свяще́нником Елеаза́ром, / егда́ предстоите́ Христу́ Бо́гу, / Его́же ра́ди потруди́стеся, / труды́ плодо́в ва́ших прия́ти от Него́, / приле́жну мольбу́ сотвори́те о челове́честве: / твори́т бо, ели́ко хо́щет, / и испо́лнит хоте́ния ва́ша, боя́щихся Его́.

И ныне, глас тойже: Глас проро́ка Твоего́ Моисе́я, Бо́же, / испо́лнися, глаго́ляй: / у́зрите живо́т ваш, ви́сящ пред очесы́ ва́шими. / Днесь Крест воздвиза́ется, / и мир от ле́сти свобожда́ется; / днесь Христо́во воскресе́ние обновля́ется, / и концы́ земли́ ра́дуются, / в кимва́лех дави́дски песнь Тебе́ принося́ще и глаго́люще: / соде́лал еси́ спасе́ние посреде́ земли́, Бо́же, / Крест и воскресе́ние, / и́хже ра́ди нас спасл еси́, Бла́же и Человеколю́бче, / Всеси́льне Го́споди, сла́ва Тебе́.

Тропарь, глас 1:

Боле́зньми святы́х, и́миже о Тебе́ пострада́ша, / умоле́н бу́ди, Го́споди, / и вся на́ша боле́зни исцели́, / Человеколю́бче, мо́лимся.

Слава, и ныне,

тропарь Креста, глас тойже:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство.

Известно же да бывает: Яко прежде клепания входит иерей в сосудохранительницу и полагает Честный Крест на жертвеннице. И по отпущении вечерни иерей и диакон облекутся

в ризы. И диакон покадит Честный Крест и речет: Благослови́, влады́ко. Иерей: Благослове́н Бог наш: Таже, Трисвятое. По О́тче наш: тропарь Креста. Сла́ва, и ны́не: кондак. И взимает иерей Крест с блюдом на главу и вносит в олтарь, предыдут пред ним со двема лампадами. И

полагает Крест на трапезе, на Евангельском месте, а Евангелие на Горнее место. И возжгут пред ним свещу на всю нощь.

На Бог Госпо́дь:

тропарь Креста дважды, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство. (2)

Слава: тропарь мучеников, глас тойже:

Боле́зньми святы́х, и́миже о Тебе́ пострада́ша, / умоле́н бу́ди, Го́споди, / и вся на́ша боле́зни исцели́, / Человеколю́бче, мо́лимся.

И ныне: тропарь Креста.

И обычныя кафизмы, и седальны Октоиха. И чтение. Канон Октоиха един на 4 и Креста на 6, глас 6, и мучеников на 4, глас 8. Аще ли случится праздник сей в субботу и аще храм Христов или Богородицы, и поем канон храма со ирмосом на 4, и Креста на 6, и святых на 4. Катавасия: Крест начерта́в:

Канон Креста, егоже краегранесие:

Кре́сту покланя́юся, ве́рных спасе́нию.

Глас 6. Песнь 1

Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

Кресту́, ве́рных спасе́нию, покланя́юся, / и те́пле облобыза́ю, и, объе́мля, вопию́: / Дре́во всеблаже́нное Христо́во, / ду́шу мою́ и ум просвети́, молю́ся.

Победоно́сно яви́ся на стра́сти и бе́сы днесь зна́мение Креста́. / Те́мже, ве́рнии вси, све́тло просве́щше ду́ши, ны́не облобыза́ем.

Лучеза́рная облиста́ет сия́ния Крест Честны́й / и просвеща́ет ве́рно покланя́ющияся ему́ днесь, / освяща́я ду́ши на́ша и телеса́.

Жизнода́тельный Крест предлежа́щ и зримь / светови́дную зарю́ препосыла́ет благода́тей: / присту́пим и прии́мем просвеще́ние, весе́лие, и спасе́ние, и оставле́ние, / хвале́ние Го́сподеви принося́ще.

Богородичен: Пресвята́я Де́во, Я́же Христа́ пло́тию ро́ждши, / пострада́вшаго нас ра́ди во́лею на Кресте́, / Тя блажа́щия че́стно спаса́й мольба́ми Твои́ми.

Ин канон мучеников на 4, глас 8.

Песнь 1

Ирмос: Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: / Изба́вителю и Бо́гу на́шему пои́м.

Лик седмочи́сленных страда́лец, я́влься еди́ным нра́вом в лю́тых, / по утвержде́нию оте́ческаго зако́на, умре́ти не отреко́шася.

Сла́ву презре́вше, я́же на земли́, жела́нием Боже́ственнаго Ца́рствия, / вся́ку боле́знь претерпе́ша Боже́ственнии Маккаве́и, / те́мже досто́йно ны́не чту́тся.

Зако́на храни́телие Моисе́ева, вои́стинну до́блии Маккаве́и, / бра́тия друг со дру́гом яви́шася, / внегда́ попра́ти им Антио́хово безбо́жие.

Богородичен: Чи́ни Тя А́нгел и челове́к, Безневе́стная Ма́ти, восхваля́ют непреста́нно: / Зижди́теля бо всех, я́ко Младе́нца, на руку́ Твое́ю понесла́ еси́.

Катавасия: Крест начерта́в, Моисе́й / впря́мо жезло́м Чермно́е пресече́, / Изра́илю пешеходя́щу; / то́же обра́тно фарао́новым колесни́цам, / уда́рив, совокупи́, / вопреки́ написа́в непобеди́мое ору́жие. / Тем Христу́ пои́м, Бо́гу на́шему, я́ко просла́вися.

Песнь 3

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Ору́жие дре́вле жи́зни блаже́нное дре́во дарова́ся храни́ти / за преслуша́ние первозда́ннаго Ада́ма, / Крест же сему́ путь сотвори́.

Очи́ма, устна́ми и душа́ми, ли́цы и сердцы́ / поклони́мся вси Пресвято́му Кресту́ Жизнода́вца Христа́, / и́мже мир весь освяща́ется.

Хра́мы Бо́гу проро́чески днесь бы́вше, / покланя́ющеся дре́ву Пресвята́го Креста́, / и насле́дницы Его́, со стра́хом вси того́ целу́ем.

Песносло́вим тя, Кре́сте, ве́рою моля́щиися си́ле твое́й: / изми́ нас се́тей вра́жиих и упра́ви нас к приста́нищу всех спасе́ния, пою́щих тя.

Богородичен: Де́вою родила́ еси́ Сы́на, / пре́жде Тебе́ рожде́ннаго от Отца́ пре́жде век, без ма́тере от Бо́га, / распя́таго пло́тию, да спасе́т пре́жде согре́шшия.

Ин. Ирмос: Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, / Еди́не Человеколю́бче.

По оте́ческим ходя́ще исправле́нием зако́нным, / блаже́ннии Христо́вы страда́льцы, / жизнь нестаре́емую ва́шими стяжа́сте кровьми́, прехва́льнии.

Ни огнь, ни меч преврати́ти когда́ возмо́же / до́блесть нра́ва, блаже́ннии, ва́шу, я́же в ве́ре, / в не́йже упраздни́сте мучи́телей шата́ния.

Му́ки претерпе́ша за Христа́ Бо́га прехва́льнии му́ченицы / и свы́ше прия́ша побе́ды по́чести, / непреста́нно моля́щеся спасти́ ду́ши на́ша.

Богородичен: Де́вою родила́ еси́, Неискусобра́чная, / и Де́вою пребыла́ еси́ Ма́ти Безневе́стная, Богоро́дице Мари́е, / Христа́ Бо́га на́шего моли́ спасти́ся нам.

Катавасия: Жезл во о́браз та́йны прие́млется, / прозябе́нием бо предразсужда́ет свяще́нника; / неплодя́щей же пре́жде Це́ркви / ны́не процвете́ Дре́во Креста́ / в держа́ву и утвержде́ние.

Кондак святых, глас 2.

Подобен: Вы́шних ища́:

Прему́дрости Бо́жия столпи́ седмочи́сленнии / и Боже́ственнаго Све́та свети́льницы седмосве́щнии, / Маккаве́и всему́дрии, / пре́жде му́чеников преве́лии му́ченицы, / с ни́миже всех Бо́гу моли́теся / спасти́ся почита́ющим вас.

Икос: Хвали́ те́пле, Сио́не, Бо́га твоего́, / я́ко укрепи́л есть сей вереи́ врат твои́х и сы́ны твоя́ благослови́. / Си́и бо, я́ко во́инство непобеди́мое, / ополче́ние вои́стинну до́блественно и крепкому́дренно, / проти́ву кова́рством злочести́вых богому́дренно ста́ша, / вку́пе побе́ды венцы́ Небе́снаго Сио́на прие́млют / и Боже́ственному престо́лу предстоя́т, о всех непреста́нно моля́щеся. / Проси́те спасти́ся пою́щим вас.

Седален святых, глас 8.

Подобен: Прему́дрости:

Благоче́стно наказа́вшеся, о́троцы му́дрии, му́ченически, / мучи́телей преще́ния му́жески посрами́сте, / я́ко зако́на побо́рницы и отцу́ послу́шницы бы́сте, святи́и, / с ма́терию Богому́дрою усе́рдно пострада́сте. / Те́мже и сме́ртию живо́т иску́пльше вои́стинну Небе́сный, / ве́чно ра́дуетеся, Маккаве́и крепкоду́шнии, / моли́те Христа́ Бо́га согреше́ний оставле́ние дарова́ти / чту́щим любо́вию святу́ю па́мять ва́шу.

Слава, и ныне, Креста, глас 6:

Крест Твой, Го́споди, освяти́ся, / в нем бо быва́ют исцеле́ния немощны́м во гресе́х, / его́же ра́ди припа́даем Ти, поми́луй нас.

Песнь 4

Ирмос: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста, о Го́споде пра́зднующи.

Да кропи́т вся земля́ ра́дование, да веселя́тся древа́ дубра́вная, / днесь обоже́на Всечестны́м Кресто́м, сия́ющи конце́м.

Показа́вый орга́н умерщвле́ния, / живоно́сно ми́рови, победотво́рное ору́жие непобеди́мое, пресла́вный Кре́сте, / сердца́ на́ша просвети́.

Ты Боже́ственная побе́да, ты соде́лование на́шего спасе́ния, / ты ве́рным соодоле́ние и Боже́ственная же́ртва, / о Всечестны́й Кре́сте, пою́щия тя освяти́.

Не́бо всей земли́ свесели́тся, / страстоте́рпцы, му́ченицы, апо́столи, ду́ши пра́ведных ра́достно ны́не ра́дуются, / и вся спаса́ет зри́мо предлежа́щее посреде́ жизнода́тельное Дре́во, / и ве́рныя освяща́ет благода́тию.

Богородичен: Вои́стинну Ты яви́лася еси́, / вои́стинну родила́ еси́ Сы́на Вы́шняго, / на Кресте́ ру́це просте́ршаго, Де́во Ма́ти Мари́е, / и мир призва́вшаго.

Ин. Ирмос: Из горы́ приосене́нныя, Сло́ве, проро́к, / еди́ныя Богоро́дицы, / хотя́ща воплоти́тися богови́дно усмотри́ / и со стра́хом славосло́вяше си́лу Твою́.

Зако́н, блаже́ннии, написа́вше, я́коже дре́вле Моисе́й, / во свои́х скрижа́лех по́мысла не преступи́сте сего́ да́же до сме́рти, / но тве́рдо подвиза́стеся.

Зако́нныя Бо́гу принося́ще же́ртвы и моисе́йскому ревну́юще житию́, / преоби́деша вся́ко законоположе́ние мучи́тельское, / страстоте́рпцы Христо́вы.

Я́коже ка́мень во́лненное стоя́ние, / си́це мно́ги му́ки, страда́льцы, / му́жеским умо́м, Маккаве́и, да́же до сме́рти претерпе́сте.

Троичен: Безнача́льная Тро́ице, Еди́нице покланя́емая, / сопресто́льная Еди́нице, Тро́ице воспева́емая, / му́ченик мольба́ми изба́ви нас от бед и напа́стей, воспева́ющих Тя.

Богородичен: Ра́дуйся от нас, Свята́я Богоро́дице. / Ра́дуйся, ра́дость ро́ждшая ми́рови. / Ра́дуйся, еди́на заступле́ние челове́ком, / благослове́нная Богоро́дице Чи́стая.

Катавасия: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Песнь 5

Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Поды́мем с ра́достию преблаже́нный Крест, / в це́рквах и гра́дех сей предложе́нный, и поклони́мся, / да долго́в прии́мем оставле́ние.

Умерщвля́ется змий лука́вый ны́не, и́же тьмы нача́льник, / сия́ния не терпя́, е́же облиста́ет Живоно́сный Крест, / Боже́ственнаго Царя́ ски́птро честно́е.

Я́ко пресве́тла звезда́ и я́ко би́сер благоле́пен и пресия́нное со́лнце, / вся озаря́ет земли́ концы́ Крест Госпо́день, / его́же облобыза́ем.

Воскли́кните, язы́цы, воспо́йте, игра́йте, коле́на, и по́йте Бо́гу, / да́вшему Креста́ неруши́мое утвержде́ние, е́же ны́не предлежи́т; / вси ве́рнии, ра́дуемся, я́ко того́ ра́ди блага́я прие́млюще.

Богородичен: Спасе́нию Тя нача́ло, вси ве́рнии, ве́дуще, ублажа́ем, Чи́стая: / Ты бо пре́жде Су́щаго пло́тию родила́ еси́, / хоте́нием Свои́м пригвожде́нна на Кресте́.

Ин. Ирмос: От но́щи неве́дения / Богове́дением просвети́вый концы́, / просвети́ мя у́тром человеколю́бия Твоего́, Го́споди.

Я́коже оте́ческий зако́н не разо́рших, святи́и му́ченицы, / венцы́ пра́ведными Христо́с вас Сам венча́.

Елеаза́ру равноста́тни в ра́зуме я́вльшеся, блаже́ннии де́ти, / и принесо́стеся со о́нем Христу́, духо́вное всесожже́ние.

И́же святы́ми свобожда́яй от ле́сти вся́ческая, / спаси́ нас, Го́споди, тех моли́твами, я́ко Благоутро́бен.

Богородичен: Херуви́мов я́вльшися честне́йши, Де́во Всепе́тая, / моли́ся Сы́ну Твоему́ спасти́ ду́ши пою́щих Тя.

Катавасия: О треблаже́нное Дре́во, / на не́мже распя́ся Христо́с, Царь и Госпо́дь! / И́мже паде́ дре́вом прельсти́вый, / Тобо́ю прельсти́вся, / Бо́гу пригвозди́вшуся пло́тию, / подаю́щему мир душа́м на́шим.

Песнь 6

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

Я́ко Боже́ствен сосу́д, я́ко свети́льник све́тел, в це́рквах днесь, / и в хра́мех, и граде́х Крест предлежа́щ ви́дяще, / и Уясни́вшаго сего́ воспое́м.

Умерщвля́ется смерть, и уморя́ется тление, и бесо́встии полцы́ отбега́ют, / побе́дный и стра́шный днесь предлежа́щ видяще Крест Христо́в, / не смеюще прикоснутися ему.

Воспева́юще Тя, Бо́га, и Царя́, и Го́спода, я́ко дарова́л еси́ нам Крест сте́ну неруши́му, / его́же ны́не облобыза́ем ра́достию и лю́тых отбега́ем.

Богородичен: Я́дом змии́ным пра́баба пи́щею, я́же во Еде́ме, пома́зася, / Де́ва же, ро́ждши Нача́льника жи́зни, / источи́ ми́ру нетле́ние и воскресе́ние.

Ин. Ирмос: Ри́зу мне пода́ждь све́тлу, / одея́йся све́том, я́ко ри́зою, / Многоми́лостиве Христе́ Бо́же наш.

Ри́зою себе́ му́ченическою оде́явше, святи́и, / сию́ труды́ страда́ния ва́шего испестри́сте.

Жела́юще бы́ти со Христо́м, всесла́внии му́ченицы, / тече́ние страда́ния неукло́нным по́мыслом преидо́сте.

Зако́н, и́же предаде́ Моисе́й, храня́ще, святи́и, зако́нно пострада́ша, / посра́мльше Антио́ха мучи́теля.

Богородичен: Еди́на сло́вом пло́тию Сло́ва ро́ждшая, / изба́ви, мо́лимся, от сете́й врага́ ду́ши на́ша.

Катавасия: Во́днаго зве́ря во утро́бе / дла́ни Ио́на крестови́дно распросте́р, / спаси́тельную Страсть прообража́ше я́ве. / Тем, тридне́вен изше́д, / преми́рное Воскресе́ние прописа́ше / Пло́тию пригвожде́ннаго Христа́ Бо́га / и тридне́вным Воскресе́нием мир просве́щшаго.

Кондак, глас 4. Подобен:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ си́лою Твое́ю ве́рныя лю́ди Твоя́, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Икос: И́же до тре́тияго Небесе́ восхище́н бысть в рай, / и глаго́лы слы́шав неизрече́нныя и Боже́ственныя, / и́хже не леть язы́ки челове́ческими глаго́лати, / что гала́том пи́шет, я́ко рачи́телие писа́ний прочто́сте и позна́сте: / мне, глаго́лет, хвали́тися да не бу́дет, / то́кмо во еди́ном Кресте́ Госпо́дни, на не́мже страда́в, уби́ стра́сти. / Того́ у́бо и мы изве́стно да держи́м, Крест Госпо́день, хвалу́ вси: / есть бо нам спаси́тельное сие́ Дре́во / ору́жие, ми́ра непобеди́мая побе́да.

Песнь 7

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.

Спаси́тельному дре́ву поклони́мся, Кресту́ пресвято́му, / ему́же слу́жат а́нгельская вся во́инства, / предлежа́щ ви́дяще, ве́рнии, источа́ющ нам освяще́ние и жизнь.

Победоно́сный яви́ся пресвяты́й Крест Животода́вца Христа́, / свы́ше же бесо́м всем мно́жество отгоня́, ва́рварское шата́ние, / и победи́теля явля́я во́инство на́ше.

Я́ко одушевле́нну, тебе́, припа́дая, взыва́ю: / Кре́сте мой пресвяты́й, ты ми просвети́ ду́шу, и ум, и слух, и устне́, / и язы́к, и дыха́ние, и о́чи к путе́м Ца́рства Христо́ва.

Пое́м, сла́вим, и покланя́емся, и велича́ем Твою́, Христе́, держа́ву, / я́ко подаде́ нам, рабо́м Твои́м, Крест Боже́ственный, / сла́дость неисчерпа́емую и храни́лище душа́м и те́лом на́шим.

Богородичен: Ю́ноши три пещь не опали́, Рождество́ прообразу́ющи Твое́, / и́бо Боже́ственный огнь Тя не опали́, всели́вся в Тя и вся научи́в пе́ти: / благослове́н Бог оте́ц на́ших.

Ин. Ирмос: В нача́ле зе́млю основа́вый / и Небеса́ сло́вом утверди́вый, / благослове́н еси́ во ве́ки, Го́споди, Бо́же оте́ц на́ших.

Му́ченическими пострада́вше боле́зньми, / мучи́тельских не устраши́стеся преще́ний, Христу́ вопию́ще: / благослове́н Бог оте́ц на́ших.

Терпе́ния пожда́вше боле́зней, / вра́жия лю́тая победи́сте кова́рства, Христу́ вопию́ще: / благослове́н Бог оте́ц на́ших.

Богородичен: И́же во утро́бу Де́выя всели́выйся / и Тоя́ ра́ди Ада́ма обно́вль, / благослове́н Бог оте́ц на́ших.

Катавасия: Безу́мное веле́ние / мучи́теля злочести́ваго лю́ди поколеба́, / ды́шущее преще́ние и злохуле́ние богоме́рзкое, / оба́че три о́троки не устраши́ я́рость зве́рская, / ни огнь снеда́яй, / но противоды́шущу росоно́сному Ду́ху, / со огне́м су́ще, поя́ху: / препе́тый отце́в и нас Бо́же, благослове́н еси́.

Песнь 8

Ирмос: Ужасни́ся, боя́йся, Не́бо, / и да подви́жатся основа́ния земли́: / се бо в мертвеце́х вменя́ется в Вы́шних Живы́й / и во гроб мал странноприе́млется. / Его́же, о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Твой Крест прообразу́я Иа́ков иногда́, на вну́ки поло́жь дла́ни преме́нно / и благослови́в их, благода́ти во язы́цех науча́я: / о́троцы, благослови́те, свяще́нницы, по́йте, / лю́дие, превозноси́те Его́ во ве́ки.

О, неизрече́ннаго Твоего́, Христе́, сни́тия и неизглаго́ланных благи́х! / Воплоти́ся и, ра́спят быв, смерть прие́м, / и реши́ши челове́ки от кля́твы, источи́в нетле́ние на треблаже́ннем Дре́ве, / препросла́вленный Крест сей во ве́ки.

Пресвяты́й Крест, Боже́ственную побе́ду, жи́зни нача́льника, / ле́сти потреби́теля, днесь похва́лим Крест всесвяты́й Госпо́день, / бесо́в губи́теля и ва́рваров прогони́теля, ве́рных победотво́рца и покрови́теля.

Богородичен: Гвоздьми́ пригвожде́на Христа́, копие́м прободе́на в нетле́нная ре́бра, / тро́стием в главу́ бие́ма, желчь вкуша́юща, зря́щи, Де́ва вопия́ше: / где Твоя́ добро́та за́йде, прекра́сное Сло́во, / Препросла́вленне па́че сыно́в челове́ческих?

Ин. Ирмос: Безнача́льнаго Царя́ сла́вы, / Его́же трепе́щут Небе́сныя си́лы, / по́йте, свяще́нницы, / лю́дие, превозноси́те во вся ве́ки.

И́стины рачи́телие и зако́на изве́стнии храни́телие бы́вше, прехва́льнии му́ченицы, / пое́те Христа́ во ве́ки.

Седмора́сленный плод свята́го ко́рене я́ко вои́стинну, / седмь Маккаве́и, му́ченики Госпо́дни, почти́м досто́йно.

Зако́ну ревни́тели, единоду́шныя страда́льцы, ве́рнии, / седмь Маккаве́й с ро́ждшею их почти́м досто́йно.

Троичен: Тро́ице Нераздели́мая, Еди́нице, / в Божестве́ сла́влю Еди́ну / и в трие́х пою́ Тя ли́цех, Еди́ну си́лу.

Богородичен: В после́дняя нас ра́ди от Де́вы воплоще́ннаго Бо́га, / свяще́нницы, по́йте и превозноси́те Его́ во ве́ки.

Катавасия: Благослови́те, о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во / и огнь в ро́су претво́ршее / и превозноси́те всем жизнь подава́ющаго / Ду́ха Всесвята́го во ве́ки.

Песнь 9

Ирмос: Бо́га / челове́ком невозмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и / Тя ублажа́ем.

Тле́нни от преслуша́ния бы́хом, Бо́жия за́поведи престу́пницы я́вльшеся: / сего́ ра́ди смерть прии́де челове́ком. / Те́мже безсме́ртия процвете́ днесь побе́дный Крест Христо́в, его́же целу́ем.

Се Дре́во пресвято́е кре́пкая наде́жда ве́рным яви́ся, кля́твы избавле́ние, / челове́ком ра́дость предлежи́т, облича́я тьмы нача́льника, / сему́ поклони́мся, ве́рнии, с весе́лием.

Нача́ло благослове́ния, и утвержде́ние христиа́н, и стена́, и тве́рдое заступле́ние, / и кля́твы избавле́ние яви́ся нам Дре́во вожделе́нное, ору́жие непобеди́мое, / просвети́ и освяти́ нас, покланя́ющихся тебе́.

Богородичен: Хра́ме и две́ре освяще́ния, Престо́ле Бо́жий, / о́блаче и све́щниче всесве́тлый и ковче́же благода́ти, Всенепоро́чная, / че́стне покланя́ющияся о́бразу честно́му Единоро́днаго Твоего́ Сы́на покры́й и сохрани́.

Ин. Ирмос: Велича́ем Тя, Ма́терь Бо́жию, / и сла́вим Тя, Богоро́дице Де́во, / я́ко Спа́са ро́ждшую душ на́ших.

Сокро́вище Боже́ственных дарова́ний вои́стинну показа́стеся, / бога́тство неотъе́млемое, всехва́льнии му́ченицы.

Моли́твенницы до́блии к Зижди́телю всех су́ще, / испроси́те невла́емую жизнь душа́м на́шим.

И́же Боже́ственною ре́вностию и теплото́ю души́ творя́щия ва́шу па́мять / сохрани́те неснеда́емы от лука́ваго.

Троичен: С Сы́ном Отцу́ и Ду́ху пра́вому поклони́мся, со А́нгелы зову́ще: / сла́ва в Вы́шних Бо́гу.

Богородичен: Ра́дуйся, две́ре свята́я, Бо́гу отве́рстая, еди́ному Прему́дрому, / Ю́же осени́ Дух Пресвяты́й.

Катавасия: Та́ин еси́, Богоро́дице, рай, / невозде́ланно возрасти́вший Христа́, / И́мже Кре́стное Живоно́сное на земли́ насади́ся Дре́во; / тем, ны́не возноси́му, / покланя́ющеся ему́, Тя велича́ем.

Светилен Октоиха

Слава, мучеников: Чу́дныя воспое́м Маккаве́и, Елиаза́ра, о́троки и Соломони́ю: / си́и бо низложи́ша шата́ния началозло́бнаго зми́я / и, зако́на служи́телие бы́вше, венча́шася.

И ныне, Креста: Крест – храни́тель всея́ вселе́нныя, / Крест – красота́ Це́ркве, / Крест – на́ша держа́ва, / Крест – ве́рных утвержде́ние, / Крест – А́нгелов сла́ва и де́монов я́зва.

На хвалитех стихиры на 6, Креста 3, глас 1.

Подобен: Небе́сных чино́в:

Небе́сная ше́ствия / Крест Честны́й гото́вит всем, / тому́ покланя́ющимся ве́рою несумне́нною, / и лико́м невеще́ственных сил / И́же на нем Пригвозди́выйся / сочета́ет любо́вию пою́щия того́.

Кла́няющеся ве́рою Кресту́ Честно́му, / на нем распе́ншагося воспое́м Влады́ку, / Того́ манове́нием, / устне́ вку́пе и ду́шу очища́юще, / и сия́нии сего́ мы́сленными уясни́мся, / хва́ляще его́.

Го́ресть дре́вле услажда́я, Моисе́й / изба́ви Изра́иля, / о́браз Креста́ напису́я, / мы же сего́, вси ве́рнии, / та́йно и Боже́ственно вообража́юще в сердца́х на́ших, / всегда́ спаса́емся держа́вою его́.

И святых 3, самогласны, глас тойже:

Многострада́льная ма́ти, / к подвиго́м созва́вши своя́ де́ти, глаго́лаше: / авраа́мстей седи́ не после́дуйте, / да заколе́нию Исаа́кову причастите́ся. / Ти́и же приима́ху наставля́ющую, / предпостиза́ху уча́щую, / друг по дру́зе томле́ния му́ки ви́дяще, / и́хже моли́твами, Бо́же, поми́луй нас.

Глас 4: Седмь столпи́ избра́ннии / от еди́наго ка́мене слове́снаго усе́чени бы́ша, / непоколеби́м показа́ша зако́на столп. / Те́мже благоволи́, Спа́се, / в ми́ре сохрани́тися душа́м на́шим.

Глас 5: И́же зако́на храни́телие / и Соломони́и сы́нове, / на суди́щи стра́ждуще, ко Антио́ху вопия́ху: / мы, Антио́ше, за оте́ческий зако́н терпи́м. / Не отлучи́т же нас ни огнь, ни меч, ни зве́рие, ни ра́ны, / но вку́пе у́мрем с ма́терию ста́рицею / и учи́телем отце́м, / живу́ще и сра́дующеся в неконча́емыя ве́ки.

Слава, глас 4: На Маккаве́и собра́вшуюся рать, / прииди́те, у́зрим, ве́рнии, му́жество: / мучи́тель бо царь, вся язы́ки удержа́в, / держи́м бе́яше от ста́рца и дете́й седьми́ / и еди́ныя жены́. / Те́мже моли́твами их, Бо́же, / поми́луй нас.

И ныне, Креста, глас тойже: Пособи́вый, Го́споди, кро́ткому Дави́ду покори́ти иноплеме́нника, / ве́рному на́шему во́инству спобо́рствуй / и ору́жием Креста́ низложи́ враги́ на́ша. / Покажи́, Благоутро́бне, на нас дре́вния ми́лости Твоя́, / и да разуме́ют вои́стинну, я́ко Ты еси́ Бог, / и, на Тя наде́ющиися, побежда́ем, / моля́щиися обы́чно Пречи́стей Твое́й Ма́тери / дарова́тися нам ве́лией ми́лости.

Славословие великое, тихо, со гласом.

Иерею же оболчену сущу во всю одежду священническую, приходит с кадилом к святей трапезе, предходящу ему диакону с лампадою, и кадит святую трапезу и Честный Крест, и тако взимает Честный Крест с блюдом на главу, и исходит северными дверьми из олтаря, предъидущим ему со двема лампадами и с кадилом; приходит же прямо царских дверей и стоит, ожидая конца трисвятаго. Кончаваему же трисвятому, возглашает иерей: Прему́дрость, про́сти.

И клирицы трижды поют тропарь, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство.

И тако приходит иерей, нося на главе Честный Крест, пред святыя царския двери ко аналогию, емуже украшену сущу, полагает на нем Честный Крест. И творит поклонение Честному Кресту, трижды, поя тихогласно:

Кресту́ Твоему́ / покланя́емся, Влады́ко, / и свято́е воскресе́ние Твое́ сла́вим.

И ликове тоже поют велегласно, трижды. Таже целуют Честный Крест и покланяются паки единою.

Поюще стихиры самогласны, глас 2:

Прииди́те, ве́рнии, / Животворя́щему Дре́ву поклони́мся, / на немже Христо́с, Царь сла́вы, во́лею ру́це распросте́р, / вознесе́ нас на пе́рвое блаже́нство, / я́же пре́жде враг сла́стию укра́д, / изгна́ны от Бо́га сотвори́. / Прииди́те, ве́рнии, Дре́ву поклони́мся, / и́мже сподо́бихомся неви́димых враг сокруши́ти главы́. / Прииди́те, вся оте́чествия язы́ков, / Крест Госпо́день пе́сньми почти́м: / ра́дуйся, Кре́сте, па́дшаго Ада́ма соверше́нное избавле́ние, / о тебе́ бо ве́рнейший ца́рие на́ши хва́лятся, / я́ко твое́ю си́лою исма́ильтеския лю́ди держа́вно покаря́юще. / Тя ны́не со стра́хом христиа́не целу́юще, / на тебе́ пригвозди́вшагося Бо́га сла́вим, глаго́люще: / Го́споди, на том пригвозди́выйся, поми́луй нас, / я́ко Благ и Человеколю́бец.

Глас 5: Зря́щи Тя тварь вся, на Кресте́ на́га ви́сяща, / Соде́теля и Зижди́теля всех, / изменя́шеся стра́хом и рыда́ше, / со́лнце же свет омрачи́, / и земля́ колеба́шеся, / ка́мение же разседа́шеся, / и хра́ма све́тлость раздира́шеся, / ме́ртвии воста́ша от гробо́в, / и а́нгельския си́лы ужасо́шася, глаго́люще: / о, чудесе́! Судия́ су́дится / и стра́ждет хотя́ за спасе́ние ми́ра и обновле́ние.

Глас 8: Днесь Влады́ка тва́ри / и Госпо́дь сла́вы / на Кресте́ пригвожда́ется / и в ре́бра пробода́ется, / же́лчи и о́цта вкуша́ет / сла́дость Церко́вная, / венце́м от те́рния облага́ется. / Покрыва́яй не́бо о́блаки / оде́ждею облачи́тся поруга́ния, / и зауша́ется бре́нною руко́ю / руко́ю созда́вый челове́ка; / по плеще́ма бие́н быва́ет / одева́яй не́бо о́блаки. / Заплева́ния и ра́ны прие́млет, / поноше́ния и зауше́ния / и вся терпи́т мене́ ра́ди, осужде́ннаго, / Изба́витель мой и Бог, / да спасе́т мир от пре́лести, я́ко Благоутро́бен.

Слава, и ныне, глас тойже: Днесь неприкоснове́нный существо́м / прикоснове́н мне быва́ет, / и стра́ждет стра́сти / свобожда́яй мя от страсте́й; / свет подава́яй слепы́м / от беззако́нных усте́н оплева́ется / и дае́т плещи́ за плене́нныя на ра́ны. / Сего́ Чи́стая Де́ва и Ма́ти на Кресте́ зря́щи, / боле́зненно веща́ше: / увы́ Мне, Ча́до Мое́, / что сие́ сотвори́л еси́? / Кра́сный добро́тою па́че всех челове́к, / бездыха́нный и беззра́чный явля́ешися, / не име́я ви́да, ниже́ добро́ты. / Увы́ Мне, Мой Све́те, / не могу́ спя́ща зре́ти Тя, / утро́бою уязвля́юся, / и лю́тое ору́жие се́рдце Мое́ прохо́дит. / Воспева́ю Твоя́ стра́сти, / покланя́юся благоутро́бию Твоему́, / Долготерпели́ве, сла́ва Тебе́.

Посем ектении. Поми́луй нас, Бо́же: И Испо́лним у́треннюю моли́тву: Диакон: Прему́дрость. Иерей отпуст, и первый час. На 1-м часе тропарь Креста. Сла́ва: святых. И ны́не: Богородичен часов. По О́тче наш: кондак Креста и совершенный отпуст.

На часех: тропарь Креста. Сла́ва: святых. И ны́не: Богородичен часов. По трисвятом, кондаки пременяем.

Блаженны от канона Креста, песнь 3-я на 4, и святых, песнь 6-я на 4.

По входе тропарь Креста, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство.

И тропарь мучеников, глас тойже:

Боле́зньми святы́х, и́миже о Тебе́ пострада́ша, / умоле́н бу́ди, Го́споди, / и вся на́ша боле́зни исцели́, / Человеколю́бче, мо́лимся.

Слава: кондак мучеников, глас 2.

Подобен: Вы́шних ища́:

Прему́дрости Бо́жия столпи́ седмочи́сленнии / и Боже́ственнаго Све́та свети́льницы седмосве́щнии, / Маккаве́и всему́дрии, / пре́жде му́чеников преве́лии му́ченицы, / с ни́миже всех Бо́гу моли́теся / спасти́ся почита́ющим вас.

И ныне: кондак Креста, глас 4:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ си́лою Твое́ю ве́рныя лю́ди Твоя́, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Трисвятое.

Прокимен Креста, глас 6:

Спаси́, Го́споди, лю́ди Твоя́ / и благосло́ви достоя́ние Твое́. Стих: К Тебе́, Го́споди, воззову́, Бо́же мой, да не премолчи́ши от Мене́.

Другий мучеников, глас 4: Святы́м, и́же суть на земли́ Его́, удиви́ Госпо́дь вся хоте́ния Своя́ в них.

Апостол Креста, к Коринфяном, зачало 125

Бра́тие, сло́во кре́стное погиба́ющим у́бо юро́дство есть, а спаса́емым нам си́ла Бо́жия есть. Пи́сано бо есть: погублю́ прему́дрость прему́дрых, и ра́зум разу́мных отве́ргу. Где прему́др? Где кни́жник? Где совопро́сник ве́ка сего́? Не обуи́ ли Бог прему́дрость ми́ра сего́? Поне́же бо в прему́дрости Бо́жией не разуме́ мир прему́дростию Бо́га, благоизво́лил Бог бу́йством про́поведи спасти́ ве́рующих. Поне́же и иуде́е зна́мения про́сят, и е́ллини прему́дрости и́щут: Мы же пропове́дуем Христа́ ра́спята, иуде́ем у́бо собла́зн, е́ллином же безу́мие. Саме́м же зва́нным, иуде́ем же и е́ллином, Христа́, Бо́жию си́лу и Бо́жию прему́дрость.

1Кор.1:18–24

И святых, ко Евреем, зачало 330

Бра́тие, святи́и вси ве́рою победи́ша ца́рствия, соде́яша пра́вду, получи́ша обетова́ния, загради́ша уста́ львов, угаси́ша си́лу о́гненную, избего́ша о́стрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х. Прия́ша жены́ от воскресе́ния ме́ртвыя своя́: ини́и же избие́ни бы́ша, не прие́мше избавле́ния, да лу́чшее воскресе́ние улуча́т: друзи́и же руга́нием и ра́нами искуше́ние прия́ша, еще́ же и уз и темни́ц. Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех, и в ко́зиях ко́жах, лише́ни, скорбя́ще, озло́блени. И́хже не бе досто́ин [весь] мир, в пусты́нях скита́ющеся, и в гора́х, и в верте́пах, и в про́пастех земны́х. И си́и вси послу́шествовани бы́вше ве́рою, не прия́ша обетова́ния, Бо́гу лу́чшее что о нас предзре́вшу, да не без нас соверше́нство прии́мут. Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку отло́жше, и удо́бь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и соверши́теля Иису́са.

Евр.11:33–12:2

Аллилуиа, глас 4

Стих: Помяни́ сонм Твой, его́же стяжа́л еси́ исперва́. Стих: Бог же Царь наш пре́жде ве́ка содела́ спасение́ посреде́ земли́. И святых: Воззва́ша пра́веднии, и Госпо́дь услы́ша их и от всех скорбе́й их изба́ви их.

Евангелие Креста, от Иоанна, зачало 60

Во вре́мя о́но, сове́т сотвори́ша архиере́е и ста́рцы на Иису́са, я́ко да убию́т Его́. И приведо́ша Его́ к Пила́ту, глаго́люще: возми́, возми́, распни́ Его́. Глаго́ла им Пила́т: поими́те Его́ вы и распни́те. Аз бо не обрета́ю в Нем вины́. Отвеща́ша ему́ иуде́е: мы зако́н и́мамы, и по зако́ну на́шему до́лжен есть умре́ти, я́ко Себе́ Сы́на Бо́жия сотвори́. Егда́ же слы́ша Пила́т сие́ сло́во, па́че убоя́ся. И вни́де в прето́р па́ки, и глаго́ла Иису́сови: отку́ду еси́ Ты? Иису́с же ответа́ не даде́ ему́. Глаго́ла же Ему́ Пила́т: мне ли не глаго́леши? Не ве́си ли, я́ко власть и́мам распя́ти Тя, и власть и́мам пусти́ти Тя? Отвеща́ Иису́с: не и́маши вла́сти ни еди́ныя на Мне, а́ще не быти дано́ свы́ше. Пила́т же слы́шав сие́ сло́во, изведе́ вон Иису́са, и се́де на суди́щи, на ме́сте глаго́лемем Лифострото́н, евре́йски же Гавва́фа. Бе же пято́к Па́сце, час же я́ко шесты́й. И глаго́ла Иуде́ом: се Царь ваш. Они́ же вопия́ху: возми́, возми́, распни́ Его́. Глаго́ла им Пила́т: Царя́ ли ва́шего распну́? Отвеща́ша архиере́е: не и́мамы царя́, то́кмо ке́саря. Тогда́ же предаде́ Его́ им, да ра́спнется. Пое́мше же Иисуса, и ведо́ша. И нося́ крест Свой, изы́де в глаго́лемое Ло́бное ме́сто, е́же глаго́лется евре́йски Голго́фа. Иде́же пропя́ша Его́ и с Ним и́на два, сю́ду и сю́ду, посреде́ же Иису́са. Написа́ же и ти́тла Пила́т, и положи́ на кресте́. Бе же напи́сано: Иису́с Назоряни́н, Царь Иуде́йский. Сего́ же ти́тла мно́зи что́ша от Иуде́й, я́ко близ бе ме́сто гра́да, иде́же пропя́ша Иису́са. И бе напи́сано: евре́йски, гре́чески, ри́мски. Стоя́ху же при кресте́ Иису́сове Ма́ти Его́ и сестра́ Ма́тере Его́, Мари́я Клео́пова, и Мари́я Магдали́на. Иису́с же ви́дев Ма́терь, и ученика́ стоя́ща, его́же любля́ше, глаго́ла Ма́тери Свое́й: Же́но, се сын Твой. Пото́м же глаго́ла ученику́: се Ма́ти твоя́. И от того́ часа́ поя́т Ю́ учени́к во своя́ си. Посе́м ве́дый Иису́с, я́ко вся уже́ соверши́шася, и прикло́нь главу́, предаде́ дух. Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их, и во́змут. Приидо́ша же во́ини, и пе́рвому у́бо преби́ша го́лени, и друго́му распя́тому с Ним. На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений. Но еди́н от во́ин копие́м ре́бра Ему́ прободе́, и а́бие изы́де кровь и вода́. И ви́девый свиде́телствова, и и́стинно есть свиде́тельство его́.

Мф.27:1–2; Ин.19:6Б-11А, 13–20, 25–28А, 30Б-35А

И святых, от Матфея, зачало 38

Рече́ Госпо́дь Свои́м ученико́м: всяк у́бо и́же испове́сть Мя пред челове́ки, испове́м его́ и Аз пред Отце́м Мои́м, и́же на Небесе́х, а и́же отве́ржется мене́ пред челове́ки, отве́ргуся его́ и Аз пред Отце́м Мои́м, и́же на Небесе́х. Не мни́те, я́ко приидо́х воврещи́ мир на зе́млю: не приидо́х воврещи́ мир, но мечь. Приидо́х бо разлучи́ти челове́ка на отца́ своего́, и дщерь на ма́терь свою́, и неве́сту на свекро́вь свою́. И врази́ челове́ку дома́шнии его́. И бысть, егда́ соверши́ Иису́с запове́дая обемана́десяте ученико́ма свои́ма, пре́йде отту́ду учи́ти, и пропове́дати во граде́х их.

Мф.10:32–36, 11:1

Причастен

Креста: Зна́менася на нас свет лица Твоего́, Го́споди. И святых: Ра́дуйтеся, пра́веднии, о Го́споде, / пра́вым подоба́ет похвала́. / Аллилу́иа, трижды.

Ряд же вычитаем напред или под зачало.

В сий 1-й день августа во обителех и приходских храмех совершают чин священия воды, и бывает сипе: приуготовану столу и украшену и воде в чаше, или исходим на источники. И благословившу иерею, глаголется трисвятое.

И псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Таже, Бог Госпо́дь: трижды, во глас 4

Бог Госпо́дь и яви́ся нам, / благослове́н Гряды́й во и́мя Госпо́дне.

Стих 1: Испове́дайтеся Го́сподеви, я́ко благ, я́ко в век ми́лость Его́.

Стих 2: Обыше́дше обыдо́ша мя и и́менем Госпо́дним противля́хся им.

Стих 3: Не умру́, но жив бу́ду и пове́м дела́ Госпо́дня.

Стих 4: Ка́мень, Его́же небрего́ша зи́ждущии, Сей бысть во главу́ у́гла, от Го́спода бысть Сей и есть ди́вен во очесе́х на́ших.

И настоящия тропари, глас 4:

К Богоро́дице приле́жно ны́не притеце́м, / гре́шнии и смире́ннии, и припаде́м, / в покая́нии зову́ще из глубины́ души́: / Влады́чице, помози́, на ны милосе́рдовавши, / потщи́ся, погиба́ем от мно́жества прегреше́ний, / не отврати́ Твоя́ рабы́ тщи, / Тя бо и еди́ну наде́жду и́мамы. [Дважды.]

Слава, и ныне: Не умолчи́м никогда́, Богоро́дице, / си́лы Твоя́ глаго́лати, недосто́йнии: / áще бо Ты не бы предстоя́ла моля́щи, / кто бы нас избáвил от толи́ких бед; / кто же бы сохрани́л до ны́не свобо́дны; / не отсту́пим, Влады́чице, от Тебе́, / Твоя́ бо рабы́ спасáеши при́сно от вся́ких лю́тых.

Таже, псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниих зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от Мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Таже, поем тропари сия, глас 6:

Е́же ра́дуйся А́нгелом прии́мшая / и ро́ждшая Зижди́теля Твоего́, / Де́во, спаса́й Тя велича́ющия. (Дважды.)

Воспева́ем Сы́на Твоего́, Богоро́дице, / и вопие́м: Пречи́стая Влады́чице, / вся́кия беды́ изба́ви рабы́ Твоя́.

Царе́м, проро́ком и апо́столом, / и му́чеником Ты еси́ похвала́ / и Предста́тельница мiру, Всенепоро́чная.

Язы́к всяк правосла́вных похваля́ет и блажи́т, / и сла́вит Пречи́стое Рождество́ Твое́, / Мари́е Богоневе́стная.

Даждь, Христе́ мой, и мне, недосто́йному, / долго́в оставле́ние, молю́ся, / Тя ро́ждшия моли́твами, я́ко Благоутро́бен.

На Тя моя́ упова́ния возложи́х, Богоро́дице, / спаси́ мя моли́твами Твои́ми, / да́руй ми прегреше́ний оставле́ние.

Оживи́ мя, ро́ждшая Жизнода́вца и Спа́са, / спаси́ моли́твами Твои́ми, / Благослове́нная, наде́ждо душ на́ших.

Зижди́теля всех во утро́бе Твое́й заче́ншая, / Де́во Всенепоро́чная, / моли́твами Твои́ми спаси́ ду́ши на́ша.

Богоро́дице, ро́ждшая сло́вом па́че сло́ва, / Сло́во, Всепе́тая, / Того́ моли́ спасти́ ду́ши на́ша.

Ми́лостива мне Судию́ же и Сы́на Твоего́, / прегреши́вшему па́че вся́каго челове́ка, / Твои́ми моли́твами соде́лай, Влады́чице.

По до́лгу вопие́м Ти: / ра́дуйся, Богоро́дице, Чи́стая Присноде́во, / моля́щеся моли́твами Твои́ми спасти́ся.

Тя. Изба́ви мя огня́ ве́чнаго / и мук, предлежа́щих мне, Богороди́тельнице, / я́ко да ублажа́ю

Не пре́зри моле́ния Твои́х рабо́в, / мо́лимся, Влады́чице Всепе́тая, / я́ко да изба́вимся вся́каго обстоя́ния.

Неду́гов и вся́ких боле́зней, / и бед нас свободи́, / к свяще́нному Твоему́ покро́ву прибега́ющих.

Стра́нное чу́до, е́же в Тебе́, Богороди́тельнице: / нас бо ра́ди по нам роди́ся / всех Зижди́тель из Тебе́ и Бог наш.

Храм Твой, Богоро́дице, / показа́ся врачевство́ неду́гов безме́здное / и оскорбля́емых душ утеше́ние.

Пресвята́я Богоро́дице, ро́ждшая Спа́са, / от бед спаси́ / и вся́кия ины́я ну́жды рабы́ Твоя́.

Изба́ви от вся́каго преще́ния, находя́щаго на рабы́ Твоя́, / Пресвята́я Влады́чице, / и вся́каго вре́да душе́внаго же и теле́снаго.

Спаси́ всех моли́твами Твои́ми, Де́во Богоро́дице, / к Тебе́ притека́ющих, / и изба́ви вся́кия ну́жды и ско́рби.

Кто, притека́яй в храм Твой, Богоро́дице, / не прие́млет ско́ро исцеле́ния / душе́внаго, вку́пе и теле́снаго, Пречи́стая?

От всех умоля́емь, Ще́дре, / святы́х и го́рних чино́в, / очи́сти мя Ро́ждшею Тя.

Пощади́, Спа́се, ду́ши уме́рших бра́тий на́ших / в наде́жди жи́зни / и осла́би, оста́ви им согреше́ния.

Ра́дуйся, мiра очисти́лище, Де́во, / ра́дуйся, ру́чко и све́щниче всезлаты́й, / Боже́ственныя ма́нны и све́та, Богоневе́сто.

Пое́м Тя, Бо́га, еди́наго в Тро́ице, / вопию́ще глас трисвяты́й, / моля́щеся спасе́ние получи́ти.

Слава: О Де́во, ро́ждшая Спа́са / и Влады́ку мiра и Го́спода, / Того́ моли́ спасти́ ду́ши на́ша.

И ныне: Ра́дуйся, горо́, ра́дуйся, купино́, / ра́дуйся, врата́, ра́дуйся, ле́ствице, / ра́дуйся, Боже́ственная трапе́зо, / ра́дуйся, всех по́моще, Влады́чице.

Моли́твами, Ми́лостиве, Ма́тере Твоея́ Пречи́стыя / и всех святы́х Твои́х / Твоя́ ми́лости лю́дем Твои́м да́руй.

Моли́твами сла́вных Арха́нгел и А́нгел, / и го́рних чино́в / рабы́ Твоя́, Спа́се, до́бре сохрани́.

Моли́твами честна́го и сла́внаго Крести́теля Твоего́, / Проро́ка, Предте́чи, / Христе́ Спа́се мой, рабы́ Твоя́ сохрани́.

Моли́твами сла́вных апо́столов и му́чеников, / и всех святы́х Твои́х / Твоя́ ми́лости лю́дем Твои́м да́руй.

Моли́твами сла́вных безсре́бренник, / Богоро́дице, рабы́ Твоя́ сохрани́, / я́ко еси́ предста́тельство мiра и утвержде́ние.

Слава: Отца́ и Сы́на славосло́вим, / и Ду́ха Свята́го, глаго́люще: / Тро́ице Свята́я, спаси́ ду́ши на́ша.

И ныне: Неизрече́нно в после́дняя заче́ншая / и ро́ждшая Созда́теля Твоего́, / Де́во, спаса́й Тя велича́ющия.

Таже: Милосе́рдия две́ри отве́рзи нам, / благослове́нная Богоро́дице, / наде́ющиися на Тя, да не поги́бнем, / но да изба́вимся Тобо́ю от бед: / Ты бо еси́ спасе́ние ро́да христиа́нскаго.

Таже диакон: Го́споду помо́лимся.

Лик: Го́споди, поми́луй.

Священник: Я́ко свят еси́, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Таже, настоящия тропари, глас 6:

Ны́не наста́ вре́мя, всех освяща́ющее, / и пра́ведный нас ждет Судия́, / но обрати́ся, душе́, к покая́нию, / я́ко блудни́ца, зову́щи со слеза́ми: / Го́споди, поми́луй мя.

Вода́ми одожди́вый, Христе́, исто́чник исцеле́ний, / во всечестне́м хра́ме Де́вы днесь / Твоего́ благослове́ния окропле́нием / отгоня́еши неду́ги немощству́ющих, / Врачу́ душ и теле́с на́ших.

Де́ва родила́ еси́ Неискусобра́чная / и Де́во пребыла́ еси́, Ма́ти Безневе́стная, / Богоро́дице Мари́е, / Христа́ Бо́га на́шего моли́ спасти́ся нам.

Пресвята́я Богоро́дице Де́во, / рук на́ших дела́ испра́ви / и проще́ние прегреше́ний на́ших испроси́, / внегда́ пе́ти нам а́нгельское пе́ние:

Святы́й Бо́же, / Святы́й Кре́пкий, / Святы́й Безсме́ртный, / поми́луй нас. Трижды.

Отпевше же по обычаю, и по трисвятом диакон глаголет: Во́нмем.

Священник: Мир всем.

Лик: И ду́хови твоему́.

Чтец, прокимен, глас 3:

Госпо́дь просвеще́ние мое́ / и Спаси́тель мой, кого́ убою́ся? Стих: Госпо́дь Защи́титель живота́ моего́, от кого́ устрашу́ся?

Диакон: Прему́дрость.

Чтец: Ко Евре́ем посла́ния свята́го апо́стола Па́вла чте́ние. Диакон: Во́нмем.

Апостол к Евреем, зачало 306

Бра́тие, Святя́й и освяща́емии от Еди́наго вси, ея́же ра́ди вины́ не стыди́тся бра́тию нарица́ти их, глаго́ля: возвещу́ и́мя Твое́ бра́тии Мое́й, посреде́ Це́ркве воспою́ Тя. И па́ки: Аз бу́ду наде́яся Нань. И па́ки: се Аз и де́ти, я́же Ми дал есть Бог. Поне́же у́бо де́ти приобщи́шася пло́ти и кро́ви, и Той прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола. И изба́вит сих, ели́цы стра́хом сме́рти чрез все житие́ пови́нни бе́ша рабо́те. Не от А́нгел у́бо когда́ прие́млет, но от се́мене Авраа́мова прие́млет. Отню́дуже до́лжен бе по всему́ подо́битися бра́тии, да ми́лостив бу́дет и ве́рен Первосвяще́нник в тех, я́же к Бо́гу, во е́же очи́стити грехи́ людски́я. В не́мже бо пострада́, Сам искуше́н быв, мо́жет и искуша́емым помощи́.

Евр.2:11–18

Священник: Мир ти. Чтец: И ду́хови твоему́.

Аллилуиа, глас 6

Стих 1: Отры́гну се́рдце мое́ сло́во бла́го. Стих 2: Глаго́лю аз дела́ моя́ царе́ви.

И посем возглашает диакон: И о сподо́битися нам слы́шанию свята́го Ева́нгелия Го́спода Бо́га мо́лим.

Лик: Го́споди, поми́луй, трижды.

Диакон: Прему́дрость, про́сти, услы́шим свята́го Ева́нгелия.

Священник: Мир всем.

Лик: И ду́хови твоему́.

Диакон: От Иоа́нна свята́го Ева́нгелия чте́ние.

Лик: Сла́ва Тебе́, Го́споди, сла́ва Тебе́.

Священник: Во́нмем.

Евангелие от Иоанна, зачало 14

Во вре́мя о́но, взы́де Иису́с во Иерусали́м. Есть же во Иерусали́мех на о́вчей купе́ли, я́же глаго́лется евре́йски Вифесда́, пять притво́р иму́щи. В тех слежа́ше мно́жество боля́щих, слепы́х, хромы́х, сухи́х, ча́ющих движе́ния воды́. А́нгел бо Госпо́день на вся́ко ле́то схожда́ше в купе́ль и возмуща́ше во́ду, и и́же пе́рвее вла́зяше по возмуще́нии воды́, здрав быва́ше, яце́м же неду́гом одержи́м быва́ше.

Ин.5:1–4

Лик: Сла́ва Тебе́, Го́споди, сла́ва Тебе́.

Таже, диакон ектению:

Диакон: Ми́ром Го́споду помо́лимся.

Лик: Го́споди, поми́луй.

О свы́шнем ми́ре и спасе́нии душ на́ших, Го́споду помо́лимся.

О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.

О святе́м хра́ме сем и с ве́рою, благогове́нием и стра́хом Бо́жиим входя́щих в онь, Го́споду помо́лимся.

О Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем Преосвяще́ннейшем митрополи́те (или архиепи́скопе, или епи́скопе) (имярек), честне́м пресви́терстве, во Христе́ диа́констве и о всем при́чте и лю́дех, Го́споду помо́лимся.

О Богохрани́мей стране́ на́шей, власте́х и во́инстве ея́, Го́споду помо́лимся.

О гра́де сем, (или о ве́си сей, или о святе́й оби́тели сей,) вся́ком гра́де, стране́ и ве́рою живу́щих в них, Го́споду помо́лимся.

О бла́горастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.

О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.

О е́же освяти́тися вода́м сим си́лою и де́йствием, и наи́тием Свята́го Ду́ха, Го́споду помо́лимся.

О е́же снизходи́ти на во́ды сия́ очисти́тельному Пресу́щныя Тро́ицы де́йству, Го́споду помо́лимся.

О е́же бы́ти воде́ сей цели́тельной душ и теле́с, и вся́кия сопроти́вныя си́лы отгна́тельней, Го́споду помо́лимся.

О е́же низпосла́ти Го́споду Бо́гу благослове́ние Иорда́ново и освяти́ти во́ды сия́, Го́споду помо́лимся.

О всех тре́бующих от Бо́га по́мощи и заступле́ния, Го́споду помо́лимся.

О е́же просвети́тися нам просвеще́нием ра́зума, Единосу́щною Тро́ицею, Го́споду помо́лимся.

Я́ко да Госпо́дь Бог наш пока́жет ны сы́ны и насле́дники Ца́рствия Своего́, воды́ сея́ причаще́нием же и кропле́нием, Го́споду помо́лимся.

О изба́витися нам от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Возглас: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Таже молитву сию:

Го́споди Бо́же наш, Вели́кий в сове́те и ди́вный в де́лех, всея́ тва́ри Соде́телю, храня́й заве́т Твой и ми́лость Твою́ лю́бящим Тя и соблюда́ющим повеле́ния Твоя́, всех в ну́ждах умиле́нныя прие́мляй сле́зы, сего́ бо ра́ди прише́л еси́ в ра́бии зра́це, не привиде́нии нас устраша́я, но здра́вие те́лу и́стинное подава́яй и глаго́ляй: се здрав был еси́, ктому́ не согреша́й, но и от бре́ния здра́вы о́чи соде́лал еси́ и, умы́тися повеле́в, све́ту всели́тися сотвори́л еси́ сло́вом. Сопроти́вных страсте́й во́лны смуща́яй, и жития́ сего́ сла́ное мо́ре изсуша́яй, и тяжелоно́сныя сласте́й укроща́яй во́лны; Сам, Человеколю́бче Царю́, да́вый нам снегосве́тлою оде́ятися оде́ждею, от воды́ же и Ду́ха, и прича́стием же воды́ сея́, и окропле́нием Твое́ благослове́ние нам низпосли́, скве́рну страсте́й омыва́ющее. Ей, мо́лимся, посети́ на́шу, Бла́же, не́мощь и исцели́ на́ша неду́ги душе́вныя же и теле́сныя, ми́лостию Твое́ю, моли́твами Всепречи́стыя, Преблагослове́нныя Влады́чицы на́шея Богоро́дицы и Присноде́вы Мари́и, си́лою честна́го и животворя́щаго Креста́, предста́тельствы честны́х Небе́сных сил безпло́тных, честна́го, сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных апо́стол, преподо́бных и Богоно́сных оте́ц на́ших, и́же во святы́х оте́ц на́ших, вели́ких иера́рхов и вселе́нских учи́телей: Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х оте́ц на́ших Афана́сия и Кири́лла, патриа́рхов Александри́йских; и́же во святы́х отца́ на́шего Спиридо́на, Тримифу́нтскаго чудотво́рца; и́же во святы́х отца́ на́шего Никола́я, архиепи́скопа Мирлики́йскаго, чудотво́рца; и́же во святы́х оте́ц на́ших Мефо́дия и Кири́лла, учи́телей слове́нских; свята́го равноапо́стольнаго вели́каго кня́зя Влади́мира и святы́я равноапо́стольныя вели́кия княги́ни О́льги; и́же во святы́х оте́ц на́ших всея́ Росси́и чудотво́рцев Михаи́ла, Петра́, Алекси́я, Ио́ны, Мака́рия, Фили́ппа, И́ова, Ермоге́на, Филаре́та, Инноке́нтия и Ти́хона; свята́го и сла́внаго великому́ченика Гео́ргия Победоно́сца; свята́го и сла́внаго великому́ченика Дими́трия Мироточи́ваго; святы́х и добропобе́дных му́чеников; преподо́бных и богоно́сных оте́ц на́ших; святы́х и пра́ведных Богооте́ц Иоаки́ма и А́нны; святы́х сла́вных чудотво́рцев и безсре́бренников Космы́ и Дамиа́на, Ки́ра и Иоа́нна, Пантелеи́мона и Ермола́я, Сампсо́на и Диоми́да, Моки́я и Аники́ты, Фалале́я и Три́фона, святы́х седми́ му́ченик Маккаве́й, Ави́ма, Антони́на, Гу́рия, Елеаза́ра, Евсево́на, Али́ма и Марке́лла, и ма́тере их святы́я Соломони́и, и учи́теля их свята́го му́ченика Елеаза́ра, и́хже и па́мять соверша́ем, и всех святы́х Твои́х.

Спаси́, Го́споди, и поми́луй Вели́каго Господи́на и отца́ на́шего (имярек), Святе́йшаго Патриа́рха Моско́вскаго и всея́ Ру́си, и господи́на на́шего преосвяще́ннейшаго (имярек), митрополи́та (или архиепи́скопа, или епи́скопа егоже есть область), да́руй им душе́вное и теле́сное здра́вие, и рабо́тному Тебе́ сему́ христиа́нскому жи́тельству во всем ми́лостив бу́ди. Помяни́, Го́споди, вся́кое епи́скопство правосла́вных, пра́во пра́вящих сло́во Твоея́ и́стины, и весь свяще́ннический и мона́шеский чин, и спасе́ние их. Помяни́, Го́споди, ненави́дящих и лю́бящих нас, служа́щих бра́тий на́ших, предстоя́щих и благосло́вною вино́ю отше́дших и запове́давших нам, недосто́йным, моли́тися о них. Помяни́, Го́споди, в плене́нии и ско́рбех су́щих бра́тий на́ших и поми́луй их по вели́цей ми́лости Твое́й, вся́кия ну́жды избавля́яй.

Я́ко Ты еси́ исто́чник исцеле́ний, Христе́ Бо́же наш, и Тебе́ сла́ву возсыла́ем со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Священник: Мир всем.

Лик: И ду́хови твоему́.

Диакон: Главы ва́ша Го́сподеви приклони́те.

Лик: Тебе́ Го́споди.

Священник же молитву тайно:

Приклони́, Го́споди, у́хо Твое́ и услы́ши ны, И́же во Иорда́не крести́тися изво́ливый и освяти́вый во́ды, и благослови́ всех нас, и́же преклоне́нием своея́ вы́и назна́менающих рабо́тное воображе́ние, и сподо́би нас испо́лнитися освяще́ния Твоего́, воды́ сея́ причаще́нием, и да бу́дет нам, Го́споди, во здра́вие души́ и те́ла.

Возглас: Ты бо еси́ освяще́ние на́ше, и Тебе́ сла́ву и благодаре́ние, и поклоне́ние возсыла́ем, со Безнача́льным Твои́м Отце́м, и Всесвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в.

Лик: Ами́нь.

Таже взем честный крест, благословляет воды трижды, крестообразно низводя и возводя и́ право, и поя настоящий тропарь, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды на сопроти́вныя да́руя / и Твое́ сохраня́я Кресто́м Твои́м жи́тельство. Трижды.

И посем поют тропарь сей, глас 2:

Твои́х даро́в досто́йны нас сотвори́, Богоро́дице Де́во, / презира́ющи согреше́ния на́ша / и подаю́щи исцеле́ния / ве́рою прие́млющим благослове́ние Твое́, Пречи́стая.

Таже лобзает иерей честный крест, такожде и вси людие, и кропит всех священною водою, олтарь и церковь всю.

Людие же поют настоящий тропарь, глас 4:

Исто́чник исцеле́ний иму́ще, святи́и безсре́бреницы, / исцеле́ния подава́ете всем тре́бующим, / я́ко преве́лиих дарова́ний сподо́бльшиися / от приснотеку́щаго Исто́чника, Спа́са на́шего. / Глаго́лет бо к вам Госпо́дь, / я́ко единоревни́телем апо́стольским: / се дах вам власть на ду́хи нечи́стыя, / я́коже тех изгони́ти, / и цели́ти вся́кий неду́г и вся́кую я́зю. / Те́мже в повеле́ниих Его́ до́бре жи́тельствовавше, / ту́не прия́сте, / ту́не подава́ете, / исцеля́юще стра́сти душ и теле́с на́ших.

Слава, и ныне, глас тойже: При́зри на моле́ния Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи, / Тя бо еди́ну тве́рдое и изве́стное утвержде́ние и́мамы / и Твое́ предста́тельство стяжа́хом, / да не постыди́мся, Влады́чице, Тя призыва́ющии. / Потщи́ся на умоле́ние Тебе́ ве́рно вопию́щих: / ра́дуйся, Влады́чице, все́х по́моще, ра́досте и покро́ве, / и спасе́ние душ на́ших.

Влады́чице, приими́ моли́твы рабо́в Твои́х / и изба́ви нас от вся́кия ну́жды и печа́ли.

По кроплении же ектения:

Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Лик: Го́споди, поми́луй, трижды.

Еще́ мо́лимся о Вели́ком Господи́не и отце́ на́шем, Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имя рек), и о всей во Христе́ бра́тии на́шей.

Лик: Го́споди, поми́луй, трижды.

Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.

Лик: Го́споди, поми́луй, трижды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих, (имярек, и помина́ет и́хже хо́щет) и всех правосла́вных христиа́н.

Лик: Го́споди, поми́луй, трижды.

Еще́ мо́лимся о е́же сохрани́тися гра́ду сему́ (или ве́си сей), и свято́му хра́му сему́ (аще же во обители: святе́й оби́тели сей), и вся́кому гра́ду и стране́, от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни; о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гнев на ны дви́жимый, и изба́вити ны от належа́щаго и пра́веднаго Своего́ преще́ния и поми́ловати ны.

Лик: Го́споди, поми́луй, 40.

Священник же возглашает:

Услы́ши ны, Бо́же, Спа́сителю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь. Священник: Мир всем. Лик: И ду́хови твоему́.

Диакон: Главы ва́ша Го́сподеви приклони́те.

Лик: Тебе́ Го́споди.

Священник молитву сию велегласно:

Влады́ко многоми́лостиве, Го́споди Иису́се Христе́, Бо́же наш, моли́твами всепречи́стыя Влады́чицы на́шея Богоро́дицы и Присноде́вы Мари́и, си́лою Честна́го и Животворя́щаго Креста́, предста́тельствы честны́х Небе́сных сил безпло́тных, честна́го, сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных апо́стол, святы́х сла́вных и добропобе́дных му́ченик, преподо́бных и богоно́сных оте́ц на́ших, и́же во святы́х оте́ц на́ших и вселе́нских вели́ких учи́телей и святи́телей: Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х отца́ на́шего Никола́я, архиепи́скопа Мирлики́йскаго, чудотво́рца; и́же во святы́х оте́ц на́ших Мефо́дия и Кири́лла, учи́телей Слове́нских; свята́го равноапо́стольнаго вели́каго кня́зя Влади́мира и святы́я равноапо́стольныя вели́кия княги́ни О́льги; и́же во святы́х оте́ц на́ших, всея́ Росси́и чудотво́рцев Михаи́ла, Петра́, Алекси́я, Ио́ны, Мака́рия, Фили́ппа, И́ова, Ермоге́на, Филаре́та, Инноке́нтия и Ти́хона; святы́х и пра́ведных Богооте́ц Иоаки́ма и А́нны; святы́х седми́ му́ченик Маккаве́й, Ави́ма, Антони́на, Гу́рия, Елеаза́ра, Евсево́на, Али́ма и Марке́лла, и ма́тере их святы́я Соломони́и, и учи́теля их свята́го му́ченика Елеаза́ра, и всех святы́х Твои́х, благоприя́тну сотвори́ моли́тву на́шу, да́руй нам оставле́ние прегреше́ний на́ших, покры́й нас кро́вом крилу́ Твое́ю, отжени́ от нас вся́каго врага́ и супоста́та, умири́ на́шу жизнь, Го́споди, поми́луй нас и мiр Твой, и спаси́ ду́ши на́ша, я́ко благ и человеколю́бец.

Лик: Ами́нь.

И отпуст.

Молитва на благословение новаго меда

Необыме́нный в ми́лости и неизрече́нный во щедро́тах, Го́споди Иису́се Христе́, ди́вен Сый во сла́ве и творя́й чудеса́. Ты, де́йством Свята́го Ду́ха иногда́ благослови́вый Изра́иля и его́ ме́дом насы́тивый от ка́мене, Сам и ны́не при́зри свы́ше на созда́ние Твое́ сие́, и благослове́нием Твои́м Небе́сным благослови́ и освяти́ со́ты пчел и от них мед, и пода́ждь ему́ де́йственну благода́ть, па́че всех соверше́нну, да всяк от него́ вкуша́ющий, прие́млющий и яду́щий обря́щет благополу́чное здра́вие, и пи́щею се́ю насы́тится, и испо́лнится вся́каго бла́га. Я́ко Ты еси́ подава́яй вся́ческая блага́я и Тебе́ сла́ву возсыла́ем со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не, и при́сно, и во ве́ки веко́в. Ами́нь.

И кропит священною водою.