Месяца июля в 27-й день

На Го́споди, воззва́х: стихиры, глас 1:

Стеце́мся ве́рою и любо́вию / и по до́лгу восхва́лим страстоте́рпца Пантелеи́мона, / ю́ности обузда́теля, в ста́рости жезл, / в боле́знех засту́пника, безсре́бреника цели́теля, / ни́щих обогати́теля, в благоше́ствиих до́браго води́теля, / в мо́ри ко́рмчию, во́инов побо́рника тве́рдаго. / Моля́щеся, си́це рцем: / о пресла́вне великому́чениче Пантелеи́моне, / предвари́, и изми́ от вся́кия ну́жды и боле́зни, / и спаси́ притека́ющия к тебе́ моли́твами твои́ми.

Страстоте́рпче Пантелеи́моне прехва́льне, / от Христо́вы любве́ ни огнь, ни ра́ны, ни меч, / ни и́ны му́ки разлучи́ти тя возмого́ша, / но, му́жески став в Христо́вом испове́дании посреде́ мучи́телей, / пострада́л еси́, Богому́дре, до конца́ / и ны́не, венцено́сец, лику́я на Небесе́х, / приле́жно моли́ся о душа́х на́ших.

Да ра́дуются собо́ри ве́рных по всей земли́ / в пра́зднственный день па́мяти / страстоте́рпца Христо́ва Пантелеи́мона, / страсть прие́мшаго / за И́же страсть кре́стную претерпе́вшаго, Царя́ Христа́, / и горды́ню безбо́жных низложи́вшаго де́рзостно, / его́же мо́лим приле́жно / во дворы́ ра́йския дости́гнути / ве́рою творя́щим па́мять его́.

До́бляго страда́льца Пантелеи́мона, / по благоче́стии до́бре подвиза́вшася, / прииди́те, лю́дие, воспои́м, глаго́люще: / ра́дуйся, тве́рдый ве́ры побо́рниче; / ра́дуйся, Христа́ име́вый в себе́, я́коже Па́вел; / ра́дуйся, пла́вающих небу́рное приста́нище; / ра́дуйся, на́ша похвало́ / и Це́ркви ве́рных ра́дование.

Слава, глас 2: Возсия́ днесь сла́вная па́мять твоя́, / Пантелеи́моне многострада́льне, / созыва́ющи нас, празднолю́бцев, / на хвалу́ и сла́ву Христу́ Бо́гу на́шему, / в тебе́ исто́чник чуде́с нам я́вльшему. / Те́мже, притека́юще к честны́м моще́м твои́м, / исцеле́ний дарова́ния прие́млем, / венча́вшаго тебе́ Спа́са Христа́ / непреста́нно сла́вяще.

И ныне, Богородичен: Спаси́ от бед рабы́ Твоя́, Богоро́дице Де́во, / я́ко вси по Бо́зе к Тебе́ прибега́ем, / я́ко к неруши́мей стене́ и предста́тельству.

На стиховне стихиры, глас 2.

Подобен: До́ме Евфра́фов:

Благоче́стие возлюби́в, / му́чениче, ма́терне, / избежа́в же му́жески / оте́ческаго преще́ния, / Христу́ Бо́гу после́довал еси́.

Стих: Пра́ведник, я́ко фи́никс, процвете́т, / и, я́ко кедр, и́же в Лива́не, умно́жится.

Возсия́л еси́ нам / от Никомиди́и, / я́ко со́лнце, преблаже́нне, / прогоня́я тьму ми́ра / заря́ми чуде́с твои́х.

Стих: Насажде́ни в дому́ Госпо́дни, / во дво́рех Бо́га на́шего процвету́т.

Просла́ви твою́, Богому́дре, / в конце́х ми́ра / па́мять Христо́с, / Того́ бо жела́я, / кровь твою́ излия́л еси́.

Слава, глас и подобен тойже:

Добро́то страда́льцев, / благоле́пие му́чеников, / правосла́вных храни́телю, / приими́ ны́не хвалу́ / ве́рою сла́вящих тя.

И ныне, Богородичен: Горе́ святы́х ли́цы, / Богоро́дице Де́во, / пою́т Тя с до́льными, / сла́вяще непреста́нно / рождество́ Твое́, Пречи́стая.

Тропарь, глас 3:

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

На Го́споди, воззва́х: стихиры, глас 4.

Подобен: Зва́нный свы́ше:

И́же по достоя́нию / зван быв Пантелеи́мон, / егда́ человеколю́бное всем просте́рл еси́ душ попече́ние, / и теле́с исцеле́ние показу́я, / тогда́ тезоиме́нным зва́нием обогати́лся еси́, / доброде́тели воздая́ние / и благоче́стия возме́здие, му́чениче, обре́т, / венцено́сец и непобеди́м во́ин я́влься / Христа́ Бо́га на́шего. / Его́же моли́ спасти́ и просвети́ти ду́ши на́ша. (2)

И́же от невеще́ственных исто́чник Спаси́теля / Боже́ственных исцеле́ний при́сно благода́ть почерпа́я, / и бога́тно излива́я, / и подава́я приступа́ющим к тебе́, всеблаже́нне, / всех сла́вное твое́ и всесвяще́нное / и светоно́сное торжество́ ве́рно соверша́ющих, / благода́тию Боже́ственною сих озари́. / Богоподо́бным пома́зан именова́нием, / я́ве и бла́гостию, / е́йже моли́ всем дарова́тися, пою́щим тя. (2)

Му́ками мно́гими искуси́ся / твоя́ ны́не огнепа́льная любо́вь / ко е́же су́щему жела́нию, / мо́рем и огне́м зави́стно бори́м. / Те́мже, злонача́льнаго испрове́рг, / живоно́сное де́йство Уте́шителя / я́ве прия́т богатода́тельное. / Е́юже и жи́ва пресла́вно уме́ршаго, / Богому́дре, показа́л еси́, / и разли́чная исцеле́ния соде́лал еси́, преблаже́нне.

Ины стихиры, глас 2. Самогласны:

Анатолиево: Безме́здно благода́ть дае́ши челове́ком, / Пантелеи́моне му́чениче сла́вне, / и ду́хи отго́ниши призыва́нием Христо́вым, / и слепы́м ви́дети да́руеши, / я́ко Того́ уго́дник и́скренний; / но моли́, врачу́ всеблаже́нне, / дарова́ти ми́ру мир тверд / и тя лю́бящим ве́лию ми́лость.

Ма́тере благочести́выя возжела́л еси́ ве́ру, / о́тчее испра́вил еси́ нече́стие: / Ермола́я бо утве́рждься уче́нии, / сим и Креще́ние соверши́л еси́, / Пантелеи́моне му́чениче сла́вне. / Ми́лостиваго Бо́га, / неду́гующих врачу́ и страсте́й отгони́телю, / моли́ изба́витися от напа́стей / ве́рою творя́щим пречестну́ю па́мять твою́.

Отри́нул еси́ пре́лесть отца́, всесла́вне, / и словеса́ ма́терня смы́сленно прие́мь, / па́че зла́та плод прине́сл еси́ по Госпо́дню гла́су / и врач изря́ден яви́лся еси́, / Пантелеи́моне, му́чениче сла́вне, / ше́ствуя же благода́ти путе́м, / обре́л еси́ лежа́ща ни́зу младе́нца, ехи́дною угрызе́на, / и к Бо́гу моли́тву сотвори́в, и приле́жно помоли́вся, / а́бие о́трока воскреси́л еси́ / и зве́ря растерза́л еси́. / Те́мже помина́й нас, ве́рою творя́щих твою́ па́мять, / я́ко да обря́щем ми́лость в День Су́дный.

Слава, глас 6. Византиево: Возсия́ днесь честна́я па́мять безсре́бреника, / ве́рныя созыва́ющи на трапе́зу та́йную, / и к торжеству́ пра́зднственному водя́щи празднолю́бных составле́ния, / наста́ бо ны́не нам чудоде́йственный врач, / неду́ги всем исцеля́яй, / Пантелеи́мон, тве́рдый страда́лец, / и мо́лится приле́жно Го́сподеви / спасти́ся душа́м на́шим.

И ныне, Богородичен: Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Вход. Прокимен дне и чтения три.

Проро́чества Иса́иина чте́ние

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́ в них? Или́, я́же от нача́ла, кто слы́шана сотвори́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз Свиде́тель, глаго́лет Госпо́дь Бог, и о́трок его́же избра́х. Да позна́ете, и ве́руете Ми, и разуме́ете, я́ко Аз есмь, пре́жде Мене́ не бысть ин бог, и по Мне не бу́дет. Аз есмь Бог, и несть ра́зве Мене́ спаса́яй. Аз возвести́х и спасо́х, уничижи́х и не бе в вас чу́ждий. Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй. Сотворю́, и кто отврати́т то? Си́це глаго́лет Госпо́дь Бог, избавля́яй вас Святы́й Изра́илев.

Ис.43:9–14

Прему́дрости Соломо́новы чте́ние

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их. И е́же от нас ше́ствие сокруше́ние, они́ же суть в ми́ре. И́бо пред лице́м челове́ческим, а́ще и му́ку прии́мут, упова́ние их безсме́ртия испо́лнено. И в ма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ле искуси́ их и, я́ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́; я́ко благода́ть и ми́лость в преподо́бных Его́, и посеще́ние во избра́нных Его́.

Прем.3:1–9

Прему́дрости Соломо́новы чте́ние

Пра́ведницы во ве́ки живу́т, и в Го́споде мзда их, попече́ние их у Вы́шняго. Сего́ ра́ди прии́мут Ца́рствие благоле́пия, и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т их. Прии́мет всеору́жие рве́ние Свое́, и вооружи́т тварь в месть враго́м. Облече́тся в броня́ пра́вды, и возложи́т шлем, суд нелицеме́рен. Прии́мет щит непобеди́мый преподо́бие, поостри́т же напра́сный гнев во ору́жие, спобо́рет же с ним мир на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. И от каменоме́тныя я́рости испо́лнь паду́т гра́ды, вознегоду́ет на них вода́ морска́я, ре́ки же потопя́т я́ на́гло. Сопроти́в ста́нет им дух си́лы и, я́ко ви́хор, разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните судии́ конце́в земли́, внуши́те держа́щии мно́жества и гордя́щиися о наро́дех язы́к, я́ко дана́ есть от Го́спода держа́ва вам и си́ла от Вы́шняго.

Прем.5:15–24, 6:1–3

На литии стихиры, глас 1. Византиево:

По́двигом до́брым подвиза́лся еси́ / и тече́ние сконча́л еси́ муче́ния твоего́, / му́чениче Пантелеи́моне, / те́мже в Вы́шних со А́нгелы лику́еши, / досто́йно боле́зней твои́х прие́м Вы́шнее Ца́рство, / моли́ у́бо, врачу́ всеблаже́нне, / дарова́ти нам ве́лию ми́лость.

Глас 2: Ки́ими пе́сненными добро́тами / тебе́, Пантелеи́моне, почти́м? / Теле́сною красото́ю и душе́вною добро́тою све́тло просиява́юща, / у́мным раче́нием просвеще́нна / и ра́зума хи́тростию укра́шенна, / ю́на во́зрастом, / ве́дца же смы́слом, / возра́сшаго Боже́ственными уче́нии / и стяжа́вшаго Христа́ усе́рдною любо́вию.

Ки́ими пе́сньми тебе́, Пантелеи́моне, возвели́чим? / Его́же па́че естества́ словесы́ и де́лы просла́ви Госпо́дь / и мно́жеством возвы́си чуде́с, / его́же заре́ю мно́гих даро́в просвети́ / и сла́вою венце́в Боже́ственных украси́, / его́же в беда́х предста́теля тре́бующим / дарова́ Христо́с Бог наш, / име́яй ве́лию ми́лость.

Ки́ими похва́льными пе́сньми / тебе́, Пантелеи́моне, возвели́чим? / Христоподо́бною благосты́нею озаре́нна / и подаю́ща всем прося́щим ве́лию ми́лость, / Боже́ственным тезоимени́тством укра́шенна / и де́лы Всеми́лостиваго показа́нна, / я́ко приснотеку́щая река́ воды́ живы́я, / исцеле́ния пролива́юща притека́ющим к тебе́ с ве́рою.

Глас 5, самогласен: Всесве́тлая му́ченика па́мять / сия́ет, я́ко со́лнце, конце́м / и непреста́нно подава́ет ве́рным исцеле́ния, / неду́ги отгоня́ющи и стра́сти исцеля́ющи, / мо́лится бо при́сно Пантелеи́мон Христу́ Бо́гу / дарова́ти душа́м на́шим ве́лию ми́лость.

Слава, глас тойже. Византиево:

Прииди́те, мучениколю́бцы, / единому́дренно вси восхва́лим страстоте́рпца Христо́ва, / по благоче́стии до́бре подви́гшася / и по́честию побе́дною оде́явшася, / свети́льника вселе́нныя и присносия́ющую звезду́ Це́ркве. / Те́мже и к нему́, вопию́ще, рцем: / Пантелеи́моне, му́чениче сла́вне, / бу́ди нам душа́м же и те́лом спасе́ние / и покро́в недви́жим, / моля́ся ко Го́споду о нас непреста́нно, / во е́же спасти́ нас.

И ныне, Богородичен: Блажи́м Тя, Богоро́дице Де́во, / и сла́вим Тя, ве́рнии, по до́лгу, / град непоколеби́мый, сте́ну необори́мую, / тве́рдую Предста́тельницу / и прибе́жище душ на́ших.

На стиховне стихиры, глас 1:

До́бляго страда́льца Пантелеи́мона / по благоче́стии подвиза́вшася, / прииди́те, лю́дие, воспои́м, глаго́люще: / ра́дуйся, тве́рдый ве́ры побо́рниче по проро́цех и апо́столех; / ра́дуйся, Христа́ в себе́ име́вый, подо́бяся де́лы Па́влу; / ра́дуйся, пла́вающим небу́рное приста́нище; / ра́дуйся, на́ша похвало́ и Це́ркве ве́рных ра́дование.

Стих: Пра́ведник, я́ко фи́никс, процвете́т / и, я́ко кедр, и́же в Лива́не, умно́жится.

От младе́нчества до́брую стезю́ обре́т, / ми́лостию Христо́вою пома́зав се́рдце, / боле́зни цели́ши прося́щим усе́рдно, / отню́дуже и уме́ршаго воздви́гл еси́ моли́твами твои́ми / и восприя́л еси́ Небе́сное Ца́рствие, / Пантелеи́моне всеблаже́нне.

Стих: Насажде́ни в дому́ Госпо́дни, / во дво́рех Бо́га на́шего процвету́т.

Страстоте́рпца Христо́ва похва́лим, / му́драго Пантелеи́мона, / и́же зми́я уби́ си́лою кре́стною, / и моли́твами Ермола́евыми о́трока воскреси́, / и несвяще́нныя посрами́ му́дрости словеса́, / и́же и мо́лится непреста́нно / всем пода́ти согреше́ний проще́ние.

Ины стихиры, поемыя в Русской обители

святаго великомученика Пантелеимона на Афоне.

Глас 5:

Ра́дуйся, Пантелеи́моне му́дре, / ма́тернее возлюби́вый благоче́стие, / отца́ же нече́стие возненави́девый / и ко благоче́стию богому́дрыми сего́ наста́вивый увеща́нии, / свяще́ннейшим Ермола́ем / науче́н ве́ре соверше́ннейше, / угрызе́нна же ехи́дною и умерщвле́нна о́трока / моли́твою твое́ю воздви́гнувый, / зми́я ви́димаго растерза́в и неви́димаго, / Христа́ моли́, чудоде́йственниче, / дарова́ти нам ве́лию ми́лость.

Стих: Пра́ведник, я́ко фи́никс, процвете́т / и, я́ко кедр, и́же в Лива́не, умно́жится.

Ра́дуйся, Пантелеи́моне тве́рде, / доблему́дренне предста́вый судя́щему / и пред сим велегла́сно Христа́ испове́давый, / Бо́га и́стиннаго, треблаже́нне, / ника́коже устраша́яся / стра́шных ору́дий муче́ния, / но претерпе́в му́жественне бие́ния, / опале́ния же и строга́ния, / кипя́щее о́лово и всесокруши́тельное ко́ло, / боре́ние со зверьми́ и водо́ю, / боже́ственныя же главы́ усече́ние, / дерзнове́ние у́бо име́я ко Го́споду, / Тому́, великому́чениче, моли́ся / дарова́ти нам ве́лию ми́лость.

Стих: Насажде́ни в дому́ Госпо́дни, / во дво́рех Бо́га на́шего процвету́т.

Ра́дуйся, Пантелеи́моне благосе́рде, / с Небесе́ по достоя́нию прие́мый от Всеми́лостиваго Спа́са / именова́ние всеми́лостиваго, / е́же уверя́еши де́лы вои́стинну, / всех ми́луя, к тебе́ притека́ющих, / врачу́ ско́рый неду́гующих, / исцеле́ний реко́ приснотеку́щая, / исто́чниче чуде́с неисчерпа́емый, / му́чеников похвало́, безсре́бреников сла́во, / Христу́ моли́ся, целе́бниче, / даровати ве́лию ми́лость.

Слава, глас 8. Византиево: Ма́тернее возлюби́в благоче́стие, / о́тчим же безбо́жием возгнуша́вся, / Врачу́ душ во́ин быв, / враче́бне себе́ наказа́л еси́ / и, Боже́ственною благода́тию во обои́х благоиску́сен, / страсте́й всегуби́тель и душ врач показа́лся еси́, / но, я́коже во страда́ниих тве́рдое / и в моли́твах при́снопребыва́тельное стяжа́в, / Пантелеи́моне, му́чениче Христо́в, / приле́жно моли́ спасти́ся душа́м на́шим.

И ныне, Богородичен, глас тойже: Безневе́стная Де́во, / я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем подаю́щи очище́ние прегреше́ний, / ны́не на́ша моле́ния прие́млющи, / моли́ спасти́ся всем нам.

Тропарь святаго дважды, глас 3:

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

И Богоро́дице Де́во: единожды.

На Бог Госпо́дь:

тропарь великомученика дважды, глас 3:

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

И ныне, Богородичен: Тя, хода́тайствовавшую спасе́ние ро́да на́шего, / воспева́ем, Богоро́дице Де́во: / пло́тию бо, от Тебе́ восприя́тою, Сын Твой и Бог наш, / Кресто́м восприи́м страсть, / изба́ви нас от тли я́ко Человеколю́бец.

По 1-й стихологии седален, глас 1:

Ма́тернее благоче́стие соблю́л еси́, блаже́нне, / о́тчее же нече́стие благоче́стно испра́вил еси́, / сего́ ра́ди и благода́ть прия́л еси́ от Бо́га Вседержи́теля, / врачева́ти немощству́ющих боле́зни, му́чениче сла́вне Пантелеи́моне, / всех с ве́рою и любо́вию к тебе́ прибега́ющих. (2)

Слава, и ныне, Богородичен: Наде́ждо христиа́н, Всесвята́я Де́во, / Его́же родила́ еси́, Бо́га, па́че ума́ и сло́ва, / непреста́нно моли́ с Небе́сными си́лами / дарова́ти отпуще́ние согреше́ний всем нам и исправле́ние жития́, / ве́рою и любо́вию Тя сла́вящим.

По 2-й стихологии седален, глас 4:

Я́ко во́ина Христо́ва непобеди́маго и борца́ му́жественнейшаго, / тя вси, ве́рнии, восхваля́ем, му́чеников добро́то, / ве́рою пра́зднующе святу́ю па́мять твою́, му́чениче всехва́льне. / Честны́я же по́двиги согла́сно славосло́вим, му́дре, / и Спаси́теля Христа́ велича́ем. (2)

Слава: Пострада́л еси́ му́жественне за Христа́, / и ве́ру пропове́дав отцу́ твоему́, извле́кл еси́ того́, всехва́льне, из ро́ва нече́стия, / и мучи́телей не убоя́вся безбо́жнаго умышле́ния, / де́монов посрами́л еси́ безси́лъную де́рзость. / Сего́ ра́ди благода́ть от Христа́ стяжа́л еси́ врачева́ти боле́зни и изгони́ти ду́хи вра́жия. / Пантелеи́моне всехва́льне, моли́ся Христу́ Бо́гу прегреше́ний оставле́ние дарова́ти / пра́зднующим любо́вию святу́ю па́мять твою́.

И ныне, Богородичен: Родила́ еси́ неизрече́нно Бо́га, пре́жде век от Отца́ возсия́вшаго / и в после́дняя времена́ от чре́ва Твоего́, Богоро́дице, я́вльшагося, / Свет во открове́ние язы́ков и спасе́ние всего́ ми́ра, / в просвеще́ние во тьме седя́щим и утеше́ние ве́рою пою́щим Тя. / Сего́ у́бо моли́ просвети́ти мя, Влады́чице, све́том ра́зума / и пода́ти се́рдцу моему́ умиле́ние, да омы́ю слеза́ми грехи́ моя́.

Величание:

Велича́ем тя, / страстоте́рпче святы́й, великому́чениче и целе́бниче Пантелеи́моне, / и чтим честна́я страда́ния твоя́, / я́же за Христа́ / претерпе́л еси́.

Псалом избранный

1 лик: Бог нам Прибе́жище и Си́ла. 2: Помо́щник в ско́рбех обре́тших ны зело́. 1: Сего́ ра́ди не убои́мся, внегда́ смуща́ется земля́. 2: Бо́же, кто уподо́бится Тебе́; да не премолчи́ши, ниже́ укроти́ши, Бо́же. 1: Я́ко се врази́ Твои́ возшуме́ша, и ненави́дящии Тя воздвиго́ша главу́. 2: На лю́ди Твоя́ лука́вноваша во́лею, и совеща́ша на святы́я Твоя́. 1: Положи́ша тру́пия рабо́в Твои́х, бра́шна пти́цам небе́сным. 2: Пло́ти преподо́бных Твои́х звере́м земны́м. 1: Пролия́ша кровь их я́ко во́ду. 2: Я́ко Тебе́ ра́ди умерщвля́еми есмы́ весь день. 1: Вмени́хомся я́ко о́вцы заколе́ния. 2: Положи́л еси́ нас в при́тчу во язы́цех. 1: И бых я́звен весь день. 2: Разже́гл еси́ ны, я́коже разжиза́ется сребро́. 1: Проидо́хом сквозе́ огнь и во́ду, и изве́л еси́ нас в поко́й. 2: Весели́теся о Го́споде, и ра́дуйтеся пра́веднии. 1: Я́ко Госпо́дь в ро́де пра́ведных. 2: И насле́дие их в век бу́дет. 1: Воззва́ша пра́веднии и Госпо́дь услы́ша их. 2: Свет возсия́ пра́веднику и пра́вым се́рдцем весе́лие. 1: В па́мять ве́чную бу́дет пра́ведник. 2: Святы́м, и́же суть на земли́ Его́, удиви́ Госпо́дь вся хоте́ния Своя́ в них. 1: Ди́вен Бог во святы́х Свои́х. 2: Пра́ведник я́ко фи́никс процвете́т, я́ко кедр, и́же в Лива́не, умно́жится. 1: Возвесели́тся пра́ведник о Го́споде и упова́ет на Него́. 2: И похва́лятся вси пра́вии се́рдцем.

Сла́ва, и ны́не: Аллилу́иа, трижды.

По полиелеи седален, глас 4:

Торжеству́ют днесь собо́ри ве́рных / честны́я по́двиги твоя́, Пантелеи́моне страстоте́рпче, / прославля́юще Животода́вца, яви́вшаго тебе́ кре́пкаго нам предста́теля. (2)

Слава, и ныне, Богородичен: Ма́терь Бо́жию Тя све́мы вси, Де́ву вои́стинну и по рождестве́ я́вльшуюся, / любо́вию притека́ющии к Твое́й бла́гости: / Тебе́ бо и́мамы, гре́шнии, Предста́тельницу, / Тебе́ стяжа́хом в напа́стех спасе́ние, Еди́ну Всенепоро́чную.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Пра́ведник, я́ко фи́никс, процвете́т / и, я́ко кедр, и́же в Лива́не, умно́жится. Стих: Насажде́ни в дому́ Госпо́дни / во дво́рех Бо́га на́шего процвету́т.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Луки, зачало 106

Рече́ Госпо́дь Свои́м ученико́м: внемли́те от челове́к, возложа́т на вы ру́ки своя́ и иждену́т, предаю́ще на со́нмища и темни́цы, ведо́мы к царе́м и влады́кам, и́мене Моего́ ра́ди, прилучи́тся же вам во свиде́тельство. Положи́те у́бо на сердца́х ва́ших, не пре́жде поуча́тися отвещава́ти. Аз бо дам вам уста́ и прему́дрость, е́йже не возмо́гут проти́витися или́ отвеща́ти вси противля́ющиися вам. Пре́дани же бу́дете и роди́тели, и бра́тиею, и ро́дом, и дру́ги, и умертвя́т от вас. И бу́дете ненави́дими от всех и́мене Моего́ ра́ди. И влас главы́ ва́шея не поги́бнет. В терпе́нии ва́шем стяжи́те ду́шы ва́ша.

Лк.21:12–19

По 50-м псалме

Слава: Моли́твами свята́го великому́ченика Пантелеи́мона, / Ми́лостиве, очи́сти / мно́жества согреше́ний на́ших.

[Стихира, глас 2: Ми́лостиваго Христа́, Пантелеи́моне, / моли́ ны́не, врачу́ Бо́жий, / изба́вити мя страсте́й / и поми́ловати мя.]

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира самогласна, глас 3:

Возсия́ днесь сла́вная па́мять твоя́, / Пантелеи́моне многострада́льне, / созыва́ющи нас, празднолю́бцев, / на хвалу́ и сла́ву Христу́ Бо́гу на́шему, / в тебе́ исто́чник чуде́с нам я́вльшему, / тем, притека́юще к ра́це моще́й твои́х, / исцеле́ний дарова́ния прие́млем, / венча́вшаго тебе́ Спа́са Христа́ воспева́юще во ве́ки, / непреста́нно сла́вяще.

Канон Богородицы со ирмосом на 6 и святаго два канона на 8. Канон первый, глас 2, егоже краегранесие: Пантелеи́мона, всеизря́днаго му́ченика, пою́. Творение Феофаново.

Песнь 1

Ирмос: Во глубине́ постла́ иногда́ / фараони́тское всево́инство преоруже́нная си́ла, / вопло́щшееся же Сло́во всезло́бный грех потреби́ло есть; / препросла́вленный Госпо́дь сла́вно бо просла́вися.

Припев: Святы́й великому́чениче и целе́бниче Пантелеи́моне, моли́ Бо́га о нас.

Присту́пль усе́рдно ко Христу́, / пре́жде сконча́ния, е́же о Христе́, мертвеца́ пе́рвее воздви́гл еси́. / Ны́не же мя, пребога́те, умерщвле́на грехо́вным угрызе́нием, / твои́ми моли́твами, о Пантелеи́моне, оживотвори́.

Возсия́, я́коже звезда́, нося́ в ю́ности ста́ростный и богому́дрый ра́зум, / добро́тою же те́ла благоле́пие души́ стяжа́в, / препросла́вленному Сло́ву яви́лся еси́ прекра́сен.

Умертви́вся ми́ру и во Христа́, блаже́нне, оде́явся ба́нею Креще́ния, / был еси́ богоно́сен орга́н и прия́телище де́йства Ду́ху, / всем угожда́я, всем уврачу́я неду́ги.

Прему́дрость сестру́ себе́ притвори́в и прича́стник жи́зни ведо́м, / от нея́ почти́лся еси́ / и венце́м дарова́ний украси́лся еси́, / Боже́ственныя зари́, блаже́нне, облиста́я све́тлостию.

Богородичен: Благослове́ньми, Пресвята́я Чи́стая, / естество́, уда́лено преслуша́нием бы́вшее от Зижди́теля, / Христа́ ро́ждши, венча́ла еси́ и тле́ния свободи́ла еси́. / Те́мже, ра́дующеся, вси вернии, Тя ублажа́ем.

Ин канон, поемый в Русской обители

святаго великомученика Пантелеимона на Афоне.

Глас 4. Песнь 1

Ирмос: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

С Моисе́ем сла́вным и Мариа́м Богому́дрою / днесь не глубину́ чермну́ю, но мо́ре преходя́ще до́блестей и чуде́с вели́каго в му́ченицех, / того́ воспои́м, ра́дующеся.

Зако́н похвале́ний побежда́ется све́тлостию нра́ва твоего́ и по́двигов вели́чеством, / еди́н Христо́с досто́йно сла́вити тя весть / боже́ственною у Себе́ све́тлостию.

Днесь пра́зднует Никомиди́я и сия́ оби́тель твоя́, Пантелеи́моне, / вся́кому граду и оби́тели ве́рных спра́зднующим па́мять твою́ / и о тебе́ Пресвяту́ю Тро́ицу велича́ющим.

Богородичен: Свет ро́ждшая Боже́ственный и невече́рний, / души́ моея́ зе́ницы просвети́, Присноде́во, / пе́ти Тя со све́тлым в страстоте́рпцех цели́телем на́шим, Всепе́тая.

Песнь 3

Ирмос: Процвела́ есть пусты́ня, я́ко крин, Го́споди, / язы́ческая неплодя́щая Це́рковь / прише́ствием Твои́м, / в не́йже утверди́ся мое́ се́рдце.

Словеса́ Ду́ха услы́шав, / был еси́ я́ко земля́ до́брая и благопло́дная, / прие́мый се́мя многоце́нно / и роди́вый, треблаже́нне, спасе́ние душа́м.

Умертви́л еси́ мудрова́ние змии́на угрызе́ния и ду́шу оживи́л еси́, / богодохнове́нно возроди́вся и Царю́ всех предстоя́.

Посрами́л еси́ безбо́жное мучи́телей повеле́ние и ко Христу́ прите́кл еси́, / вме́сто всех Сего́ стяжа́в, / и был еси́, Богому́дре, вели́кий купе́ц.

Ма́тере твоея́ благоче́стие возлю́бль, сла́вне, / о́тчее же возненави́дел еси́ безбо́жие многомяте́жное, / я́ко име́я ра́зум, лу́чшее избра́л еси́.

Богородичен: Нося́й Боже́ственным манове́нием всю тварь, Госпо́дь / на руку́ но́сится Твое́ю, Де́во. / Его́же ны́не моли́ изба́вити от бед пою́щия Тя.

Ин. Ирмос: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Презре́в кра́сная ми́ра, красе́н, я́ко шипо́к, яви́лся еси́, всеизря́дне, / утверди́вшу ти се́рдце свое́ в любви́ Христа́, жела́ний кра́я.

Ма́тере твоея́ благоче́стие возлю́бль, сла́вне, / возненави́дел еси́ злоче́стие отца́, я́ко па́губное, / и того́ ко благоче́стию богому́дро приве́л еси́.

Тобо́ю, Пантелеи́моне, просла́вися Госпо́дь, во Святе́й Тро́ице сла́вимый, / на Небеси́ просла́вив тя / и на земли́ сла́вну творя́ па́мять твою́.

Богородичен: Моли́твами ми́лости тезоимени́таго му́ченика / низпосли́ нам, Госпоже́, Боже́ственную ми́лость / от Воплоти́вшагося из Тебе́ ми́лости ра́ди.

Седален, глас 4.

Подобен: Удиви́ся Ио́сиф:

До́бляго страда́льца благоче́стия Христо́ва восхва́лим све́тло Пантелеи́мона, ве́рнии, / псалмы́, и пе́нии и пе́сньми духо́вными, / и́мже мучи́тельство неви́димаго врага́ си́лою Боже́ственною попра́ся / и неду́гов исцеле́ние бога́тно от Го́спода дарова́ся / творя́щим ве́рно Боже́ственный и честны́й пра́здник его́.

Слава, глас тойже: Ермола́я му́драго, му́чениче, слове́с послу́шал еси́ / и оста́вил еси́ а́бие худо́жество земно́е, я́ко ме́рзко, я́ко не кре́пко, я́ко губи́тельно, / име́я Христо́вы стра́сти, уче́ния жи́зни в се́рдце твое́м, / неисце́льно стра́ждущим здра́вие, Пантелеи́моне, да́руя. / Те́мже моли́ся о творя́щих любо́вию па́мять твою́.

И ныне, Богородичен: Треволне́нии страстны́ми, безсо́вестный аз, обурева́емь, Чи́стая, призыва́ю Тя те́пле: / да не пре́зриши мене́, окая́ннаго, поги́бнути, бе́здну милосе́рдия ро́ждши, / ра́зве бо Тебе́ наде́жды не и́мам, / да не враго́м у́бо обра́дование и смех, наде́явся на Тя, явлю́ся, / и́бо мо́жеши, ели́ко хо́щеши, я́ко Ма́ти су́щи всех Бо́га.

Песнь 4

Ирмос: Прише́л еси́ от Де́вы не хода́тай, ни А́нгел, / но Сам, Го́споди, вопло́щся, / и спасл еси́ всего́ мя, челове́ка. / Тем зову́ Ти: сла́ва си́ле Твое́й, Го́споди.

После́дуя Влады́це любо́вию, / расточи́л еси́ бога́тство ни́щим, / себе́ обнажа́я к страда́нию, / е́же и проше́л еси́, ве́чныя наде́жды прови́дев.

Хвале́ния Бо́гу же́ртву прине́сл еси́, / я́ве возгнуша́вся и́дольских треб, / все же шата́ние нечести́вых, страстоте́рпче, попра́л еси́.

Снеда́емым за́вистию и гне́вом бори́мым, / непобори́мую си́лу сим предста́вил еси́, му́чениче, / и победи́л еси́ злочести́вое томле́ние, вооружи́вся.

И́же ста́рца Симео́на рука́ми держи́мый, / ста́рца тя глаго́лы, Пантелеи́моне, улови́ к Боже́ственному разуме́нию / и ко мно́гих спасе́нию и избавле́нию.

Богородичен: Ю́ныя и де́вы во след Тебе́ потеко́ша, / Де́ву и Отрокови́цу Тя и Ма́терь зря́ще, / еди́на бо обоя́ во еди́но собрала́ еси́ несказа́нно, Богоневе́сто.

Ин. Ирмос: Неизсле́дный Бо́жий сове́т, / е́же от Де́вы воплоще́ния Тебе́, Вы́шняго, / проро́к Авваку́м, усмотря́я, зовя́ше: / сла́ва си́ле Твое́й, Го́споди.

Хотя́й всем спасе́ния и и́стины позна́ния / Ермола́я тя глаго́лы, Богоизбра́нне, улови́ к боже́ственному разуме́нию / и ко мно́гих спасе́нию.

Я́ко Ио́сиф прекра́сный, / в цве́те ю́ности благоче́стия, и ра́зума, и милосе́рдия ко всем испо́лнился еси́, / благоугожда́я Вы́шнему и зовя́: / сла́ва си́ле Твое́й, Го́споди.

Я́ко име́я дерзнове́ние к Бо́гу Триипоста́сному, / ми́рная и преми́рная блага́я проси́ почита́ющим тя, великому́чениче, / и о тебе́ зову́щим: / сла́ва си́ле Твое́й, Го́споди.

Богородичен: Вои́стинну па́че ума́ есть воплоще́ние от Тебе́, Пречи́стая, Сы́на Бо́жия, / в Него́же уве́ровав от се́рдца, Пантелеи́мон взыва́ше: / сла́ва си́ле Твое́й, Го́споди.

Песнь 5

Ирмос: Просвеще́ние во тьме лежа́щих, / спасе́ние отча́янных, Христе́, Спа́се мой, / к Тебе́ у́тренюю, Царю́ мира, / просвети́ мя сия́нием Твои́м, / ино́го бо, ра́зве Тебе́, бо́га не зна́ю.

Ра́достно по́двиги подъя́л еси́ муче́ния, огражде́н си́лою Боже́ственною, / и, терпе́нием тве́рдо муче́ния подъе́мля, ра́дуяся, вопия́л еси́: / ино́го бо, ра́зве Тебе́, бо́га не зна́ем.

На по́двиг борьбы́ вступи́в, блаже́нне, Боже́ственною си́лою превозмо́гл еси́ / безбо́жных нечести́вое тира́нство и неи́стовство идолослуже́ния, / обле́кся во Христа́, Судию́ и Венча́теля по́двигов.

Ю́ношеско ты противле́ние име́я и тве́рдостию души́ возставле́ние стяжа́в, / вся́ку я́зву до́блественне претерпе́л еси́, / и му́жеским, блаже́нне, умо́м, / благода́тию Боже́ственнаго Креста́ укрепля́емь.

Несогла́сное отри́ну веща́ние заблу́ждших, / Небе́сным уче́нием страда́лец и мно́гим спасе́нию пресла́вну бысть вино́вник, / Твои́м де́йством, Христе́, укрепля́емь.

Богородичен: Рече́ния прему́дрых, и гада́ния вся, Препросла́вленная, / и проро́к прорече́ния Тя прообража́ху проявле́нно напосле́док бы́ти Бо́жию Роди́тельницу, / ины́я бо, ра́зве Тебе́, чи́стыя не зна́ем.

Ин. Ирмос: Ужасо́шася вся́ческая / в честне́м вхожде́нии Твое́м: / Ты бо, Неискусобра́чная Де́во, / внутрь вошла́ еси́ в храм Бо́жий, / я́коже честне́йший храм, / всем воспева́ющим Тя / мир подава́ющая.

Де́лы уве́ритися хотя́ в ве́ре, / в не́йже от Ермола́я освяще́н был еси́, / я́ко, узре́в же отроча́ ме́ртво, / моли́твою твое́ю воздви́гл еси́ того́, досточу́дне, / зми́я же умертви́л еси́.

Неисце́льныя стра́сти еди́ным Христа́ призыва́нием исцеля́ющу тебе́, / слепа́го просвети́л еси́, треблаже́нне, / пре́жде све́тлаго твоего́ страда́льчества тве́рдость показуя веры.

Неможе́ния душ и теле́с свободи́ рабы́ Твоя́, Тро́ице Единосу́щная, / и сохрани́ ны, поврежде́нны от искуше́ний и омраче́нны страстьми́, / Пантелеи́мона предста́тельством.

Богородичен: Необори́мый покро́в Твой, Влады́чице, / и заступле́ние ублажа́емаго на́ми великому́ченика / да бу́дут при́сно с на́ми, / спаса́юще нас от вся́каго наве́та враг ви́димых и неви́димых.

Песнь 6

Ирмос: В бе́здне грехо́вней валя́яся, / неизсле́дную милосе́рдия Твоего́ призыва́ю бе́здну: / от тли, Бо́же, мя возведи́.

И́долы ле́стныя оплева́л еси́ / и возноси́мую пре́лесть упраздни́л еси́, / чудоде́йствуя ди́вная и творя́ исцеле́ния, Богому́дре.

Вене́чник показа́лся еси́, всеизря́дне, / сквозе́ бо огнь ты проше́л еси́ и во́ду, / и, на колеси́ протяза́емь, / пресла́вно погуби́л еси́ безу́мныя.

Мучи́телей суровство́ низложи́в, / неудо́бь носи́мая бие́ния теле́сная душе́вною кре́постию, / пострада́л еси́, Богому́дре, благода́тию.

Богородичен: Содержа́й концы́ земли́, я́ко Бог, / Твои́ми, рука́ми, Чи́стая, держи́тся описа́нием те́ла, / И́же Боже́ственным зра́ком неопи́санный.

Ин. Ирмос: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Слепа́го зре́ние теле́сное и душе́вное показа́ того́ му́ченика тве́рда, / тебе́ же, свя́те, чудоде́йственника и нача́ло по́двигов твои́х за Христа́, / и́хже до́блественно соверши́л еси́.

Мече́м му́жества твоего́, доблему́дре, разсе́кл еси́ мучи́телей кова́рства, / преще́ния же и вся́кое на тя шата́ние, / и зми́я льстивому́дреннаго главу́ сокруши́л еси́.

Словесы́ и дея́нии и́дольскую лесть облича́я, / приве́л еси́ ко Све́ту Трисо́лнечнаго Богонача́лия мно́гия никомиди́йцы, / Пантелеи́моне Богосве́тле.

Богородичен: Твое́ достоя́ние, Сло́ве, необори́мо яви́, / правосла́вным лю́дем побе́ды подая́ на враги́, / моли́твами Богоро́дицы и Твоего́ победоно́снаго му́ченика.

Кондак, глас 5:

Подража́тель сый Ми́лостиваго / и исцеле́ний благода́ть от Него́ прие́м, / страстоте́рпче и му́чениче Христа́ Бо́га, / моли́твами твои́ми душе́вныя на́ша неду́ги исцели́, / отгоня́ при́сно борца́ собла́зны от вопию́щих ве́рно: / спаси́ ны, Го́споди.

Икос: Безсре́бренника па́мять, до́бляго страда́льца, ве́рнаго целе́бника, / благоче́стно воспое́м, христолю́бцы, да прии́мем ми́лость, / па́че же оскве́рншии, я́коже и аз, своя́ хра́мы, / душа́м бо и те́лом, возлю́бленнии, исцеле́ния подава́ет. / Потщи́мся у́бо, ве́рная бра́тия, в сердца́х на́ших име́ти его́ кре́пость, / избавля́юща от ле́сти вопию́щия: / спаси́ ны, Го́споди.

Песнь 7

Ирмос: Те́лу злато́му прему́дрыя де́ти не послужи́ша, / и в пла́мень са́ми поидо́ша, / и бо́ги их обруга́ша, / среди́ пла́мене возопи́ша, и ороси́ я́ А́нгел: / услы́шася уже́ уст ва́ших моли́тва.

Зако́нно стражда́ и победи́в врага́, / приста́нище благоути́шно су́щим в мо́ри, сла́вне, обурева́емым был еси́, / свет же су́щим во тьме жития́, / и пе́ти научи́л еси́: / благослове́н Бог оте́ц на́ших.

Блаже́н еси́, и добро́ тебе́ есть ны́не, преблаже́нне, / восприи́мшему пребога́тную и блаже́нную наде́жду твою́, / угото́ванную ве́рою Го́сподеви зову́щим: / благослове́н Бог оте́ц на́ших.

Святы́х ду́ши, и пра́ведных ли́цы, / и Безпло́тных чи́ни А́нгельстии прия́ша слико́вника тя, блаже́нне, / мече́м бо усе́чен быв во главу́, пое́ши, ра́дуяся: / благослове́н Бог оте́ц на́ших.

Богородичен: Ору́жие, е́же пре́жде дре́ва живо́тнаго нас отлучи́вшее, / ны́не, обраща́емо, прие́млет зна́менавшияся Кро́вию, из ребр Сы́на Твоего́ изше́дшею, Пренепоро́чная. / Благослове́на еси́, Бо́га пло́тию ро́ждшая.

Ин. Ирмос: Не послужи́ша тва́ри Богому́дрии, / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог, благослове́н еси́.

Да пока́жется де́лы ве́ра, – взыва́л еси́, сла́вне, пред одро́м разсла́бленнаго, / и Кого́ призыва́нием сей а́бие воздвиза́ется, / Той есть отце́в Бог благослове́нный.

Постыжде́н бысть зело́ Максимиа́н, / зря о И́мени Христо́ве ходя́ща разсла́бленнаго, / не име́я же что провеща́ти, / по ласка́тельствах му́кам предае́т тя, пою́ща: / препе́тый отце́в Бо́же, благослове́н еси́.

Тебе́, непобеди́ме, в коно́б с кипя́щим о́ловом мучи́тель вве́рже, / но явле́йся ти Госпо́дь огнь у́бо угаси́, / о́лово же устуди́в, пе́ти тя возбуди́: / Триипоста́сный отце́в Бо́же, благослове́н еси́.

Богородичен: Глас Тебе́ ра́достно прино́сим, Богоневе́сто, / ра́дуйся, – зовуще, – Помо́щнице ве́рных и му́чеников утвержде́ние, / Сы́ну Твоему́ зову́ще: / препе́тый отце́в Бо́же, благослове́н еси́.

Песнь 8

Ирмос: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га / по́йте, дела́, я́ко Го́спода / и превозноси́те во вся ве́ки.

Благоприя́тное твоея́ хи́трости душе́вное ослепле́ние о́тчее исцеля́ет, / подаю́щее свет ве́рою, преблаже́нне, притека́ющим / и ко Спа́су Христу́ наставля́ющее.

За Христа́ закла́н быв, к ве́чней жи́зни премину́л еси́ / и Богозва́нен яви́лся еси́ именова́нием Бо́жиим, Богому́дре. / Тем почита́ем тя и превозно́сим Христа́ во ве́ки.

Вити́йское отложи́в лю́тое му́дрых глумле́ние, / Христо́вым призыва́нием боле́зненных страсте́й коре́ния посека́еши, / исцеля́я превознося́щия Христа́ во ве́ки.

Богородичен: Безсме́ртия зарю́ ве́мы исто́чника Тя, Богоро́дице, / я́ко ро́ждшую Сло́во Безсме́ртнаго Отца́, всех сме́рти избавля́ющего, / превознося́щих Его́ во ве́ки.

Ин. Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Тя́жкий ка́мень на твою́ вы́ю привяза́ша / и в мо́ре тя вверго́ша нечести́вии, / но ка́мень, а́ки лист, по вода́м пла́ваше, / руково́дством же стра́нным су́ше отдае́шися ты, всече́стне.

Звере́м кровожа́дным люте́йший звере́й вдаде́ тя, страстоте́рпче, / па́ки же к тебе́ Госпо́дь ди́вен яви́ся, / зве́ри бо укроти́ и сих состяза́тися сотвори́, / кто бы из них пе́рвый поклони́лся тебе́ / и твоя́ но́ги облобыза́л, прехва́льне.

Мно́жества уве́ровавших ви́дя, царь возъяри́ся па́че / и вся зве́ри повеле́ уби́ти, / тебе́ же, великому́чениче, заключи́ти в темни́цу, Тро́ицу во Еди́нице пою́ща: / Го́спода по́йте, дела́, / и превозноси́те Его́ во вся ве́ки.

Богородичен: Не премени́в естества́ Иису́с, / из Тебе́ бо во всего́ челове́ка облече́ся, Богороди́тельнице, / Его́же страсть Пантелеи́мон кре́пце изобрази́в, ра́дуяся, пое́т Тому́: / Го́спода по́йте, дела́, / и превозноси́те Его́ во вся ве́ки.

На 9-й песни Честнейшую: не поем, но поем припевы праздника.

Припев: Велича́й, душе́ моя́, / Честне́йшую Го́рних во́инств, / Де́ву Пречи́стую Богоро́дицу.

Таже ирмос канона Пресвятыя Богородицы. Посем вторый лик поет тойже припев и ирмос. Тойже припев поем и к тропарем канона Богородицы.

Песнь 9

Ирмос: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.

Припев: Велича́й, душе́ моя́, / в страстоте́рпцех пресве́тлаго свети́льника.

Преста́вился еси́, ра́дуяся, к жела́нию коне́чному, / иде́же всели́вcя, преблаже́нне, блаже́нный коне́ц прия́ти вои́стинну сподо́бился еси́, / сый со Влады́кою твои́м во ве́ки безконе́чныя.

Припев: Велича́й, душе́ моя́, / безсре́бреников похвалу́ и украше́ние.

Жела́ние получи́л еси́ и любве́ твоея́ исполне́ние, / ка́плющей еще́ те́плей кро́ви, за Христа́ излия́вшейся, / от Него́же, ра́дуяся, прия́л еси́ венцы́ по́двигов твои́х.

Припев: Велича́й, душе́ моя́, / цели́теля неду́жных, по зва́нии всех ми́лующаго.

Львов уста́ и звере́й зия́ния, я́коже Дании́л дре́вле, ты обузда́л еси́, / весть бо стыде́тися, му́чениче, доброде́тели и безслове́сное естество́. / Те́мже тя, пресла́вне, соше́дшеся, ублажа́ем.

Припев: Велича́й, душе́ моя́, / цели́теля неду́жных, по зва́нии всех ми́лующаго.

Бога́тную бла́гость тебе́ Христо́с да́рует, / сокро́вище исцеле́ний нам да́руя / и всеми́лостива изволе́нием тя пода́в вся́кому скорбя́щему, / и приста́нище ти́хое, и предста́теля, и защи́тителя.

Припев: Велича́й, душе́ моя́, / Чи́стую Де́ву и Еди́ну Богоро́дицу.

Богородичен: Я́ко руно́, Всенепоро́чная, дождь Небе́сный во утро́бе заче́нши, / нам родила́ еси́ тишину́ Даю́щаго / я́ко Бо́га Того́ пою́щим / и Тя, Всепе́тую Богоро́дицу, пропове́дающим.

Ин. Ирмос: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, Богоро́дице, / Чи́стая Присноде́во.

Припев: А́нгели, страда́ние твое́ зря́ще, удиви́шася, / ка́ко в те́ле, свя́те, безпло́тнаго прехва́льне победи́л еси́.

К колеси́ привя́занный, ди́вен был еси́, досточу́дне, / безу́мныя бо то́е па́че погуби́, / би́ти у́бо тя повеле́ Максимиа́н и отсещи́ главу́ твою́, / мечу́ же прегну́вшуся, / спекула́тора и во́ины к ве́ре во Христа́ обрати́л еси́.

Припев: А́нгели, зря́ще тя, лесть низложи́вшаго, / ублажа́ху тебе́, твердому́дренне.

О уби́йцах и о всем ми́ре моли́вшуся ти, сла́вне, / свы́ше по достоя́нию нарече́н был еси́ Пантелеи́мон, / де́лы оправда́я именова́ние, / млеко́ же истече́ из тебе́ вме́сто кро́ве, / и та́ко, венцено́сный, Христу́ предста́л еси́.

Припев: А́нгели свеселя́тся челове́ком в па́мяти Пантелеи́мона, / Тро́ице предстоя́щаго.

Свы́ше назира́еши, великому́чениче, па́мять твою́ любо́вию соверша́ющих / и хода́тайствуеши тем у Трисо́лнечнаго Божества́ грехо́в проще́ние, мир же и спасе́ние, / е́же и нам проси́, тя велича́ющим.

Припев: Со А́нгелы ро́дивси, блажи́м Тя, / Богоневе́стная Мари́е.

Богородичен: Све́тло испове́да победоно́сный Пантелеи́мон всех Влады́ку / из Твоея́, Благода́тная, возсия́вша утро́бы, / тве́рдо испи́ за Того́ ча́шу страда́ния / и утеше́ние прия́ с весе́лием, / лику́я с му́ченики и все́ми святы́ми.

Таже оба лика, вкупе соше́дшеся, поют первый припев канона Богородицы: Велича́й, душе́ моя́, / Честне́йшую Го́рних во́инств, Де́ву Пречи́стую, Богоро́дицу.

Посем катавасия.

Светилен.

Подобен: Ученико́м:

Ми́лостивую твою́ ду́шу прови́де Бог, Пантелеи́мона тя пропове́да, / безсре́бренно бо тре́бующим исцеле́ние источа́еши, свя́те, / мучи́телей свире́пство терпе́нием твои́м победи́вый. (2)

Слава, и ныне: Пантелеи́моне всему́дре, честны́х безсре́бренников свяще́нная красото́ / и Боже́ственных му́чеников великопобе́дная сла́во, / свы́ше побе́ды испроси́ правосла́вным, и ми́ру мир, / и ве́рно сла́вящим тя, свя́те, спасе́ние, / с Богоро́дицею о всех моля́ся.

На хвалитех стихиры на 4, глас 8.

Подобен: О, преславнаго чудесе́:

Де́ло промышле́ния Вы́шняго, / е́же на тебе́ бы́вшее, / све́тло показа́ся, / теле́сныя бо стра́сти цели́ти я́вственно, / Пантелеи́моне, науча́емь, / душ обре́лся еси́ врач изря́ден, / сло́вом благода́ти уврачу́я вся / и мра́чныя ле́сти избавля́я к тебе́ притека́ющия.

Ми́лости Бо́жии подо́бяся, / Пантелеи́мон я́ве именова́ся, / сугу́бо прие́м и́мя и подо́бное ве́щи. / Я́ко сострада́телен бо, ми́луеши всех, / сугу́бо подая́ сим исцеле́ние, / пита́я и целя́, / и к ра́зуму, сла́вне, наставля́я Боже́ственному / и пресве́тлому Христо́ву, пребога́те.

Добро́тою, Богому́дре, теле́сною / душе́вную добро́ту благоду́шно премени́л еси́ / и у́мное благоле́пие плотско́ю красото́ю / и зря́щия, му́чениче, удиви́л еси́, / зна́меньми сия́я и чудесы́, / цве́том ю́ности, / состаре́вшихся ра́зум прие́м, / ве́рою же и благода́тию просвеща́емь.

Глас 5, самогласен, Германово:

Всесве́тлая му́ченика па́мять сия́ет, я́ко со́лнце, конце́м / и непреста́нно подава́ет ве́рным исцеле́ния, / неду́ги отгоня́ющи и стра́сти исцеля́ющи, / мо́лится бо при́сно Пантелеи́мон Христу́ / дарова́ти душа́м на́шим ве́лию ми́лость.

Слава, глас 4, Византиево: Днесь просия́ страстоно́сца па́мять, / прииди́те, ве́рнии, духо́вно возвесели́мся / и пе́сньми сего́ венча́ем, / и́бо неви́димаго врага́ си́лою кре́стною му́жески победи́л есть, / и мучи́телей безме́рных мук не убоя́вся, / зако́нно по́честь прия́т Вы́шняго зва́ния, / и ны́не со А́нгелы ве́чно почива́ет. / Но, о му́чениче Христо́в Пантелеи́моне, / врачу́ неду́гующих и приста́нище обурева́емых, / не преста́й моля́ся Ми́лостивому Бо́гу / спасти́ся душа́м на́шим.

И ныне, Богородичен, глас тойже: Богоро́дицу пе́сньми немо́лчными благоче́стно пое́м, вопию́ще: / ра́дуйся, горо́ свята́я, / ра́дуйся, престо́ле огнено́сный всех Царя́, / ра́дуйся, похвало́ А́нгелов и святы́х сла́во.

Блаженны от канона святаго, песни 3-я на 4, и песнь 6-я на 4.

Тропарь великомученика, глас 3:

Страстоте́рпче святы́й и целе́бниче Пантелеи́моне, / моли́ Ми́лостиваго Бо́га, / да прегреше́ний оставле́ние / пода́ст душа́м на́шим.

Кондак, глас 5:

Подража́тель сый Ми́лостиваго / и исцеле́ний благода́ть от Него́ прие́м, / страстоте́рпче и му́чениче Христа́ Бо́га, / моли́твами твои́ми душе́вныя на́ша неду́ги исцели́, / отгоня́ при́сно борца́ собла́зны от вопию́щих ве́рно: / спаси́ ны, Го́споди.

Прокимен, глас 4:

Ди́вен Бог во святы́х Свои́х, / Бог Изра́илев. Стих: В це́рквах благослови́те Бо́га, Го́спода от исто́чник Изра́илевых.

Апостол к Тимофею, зачало 292

Ча́до Тимофе́е, возмога́й во благода́ти, я́же о Христе́ Иису́се, и я́же слы́шал еси́ от Мене́ мно́гими свиде́тели, сия́ преда́ждь ве́рным челове́ком, и́же дово́льни бу́дут и ины́х научи́ти. Ты у́бо злопостражди́ я́ко добр во́ин Иису́с Христо́в. Никто́же бо во́ин быва́я обязу́ется ку́плями жите́йскими, да воево́де уго́ден бу́дет. А́ще же и постра́ждет кто, не венча́ется, а́ще не зако́нно му́чен бу́дет. Тружда́ющемуся де́лателю пре́жде подоба́ет от плода́ вкуси́ти. Разуме́й, я́же глаго́лю: да даст у́бо тебе́ Госпо́дь ра́зум о всем. Помина́й Го́спода Иису́са Христа́ воста́вшаго от ме́ртвых, от се́мене Дави́дова, по благовествова́нию моему́, в не́мже злостражду́ да́же до уз, я́ко злоде́й, но сло́во Бо́жие не вя́жется. Сего́ ра́ди вся терплю́ избра́нных ра́ди, да и ти́и спасе́ние улуча́т е́же о Христе́ Иису́се, со сла́вою ве́чною.

2Тим.2:1–10

Аллилуия, глас 2

Стих: Пра́ведник, я́ко фи́никс, процвете́т / и, я́ко кедр, и́же в Лива́не, умно́жится. Стих: Насажде́ни в дому́ Госпо́дни / во дво́рех Бо́га на́шего процвету́т.

Евангелие от Иоанна, зачало 52

Рече́ Госпо́дь Свои́м ученико́м: сия́ запове́даю вам, да лю́бите друг дру́га. А́ще мир вас ненави́дит, ве́дите, я́ко Мене́ пре́жде вас возненави́де. А́ще от ми́ра бы́сте бы́ли, мир у́бо свое́ люби́л бы: я́коже от ми́ра не́сте, но Аз избра́х вы от ми́ра, сего́ ра́ди ненави́дит вас мир. Помина́йте сло́во, е́же Аз рех вам: несть раб бо́лий го́спода своего́. А́ще Мене́ изгна́ша, и вас изжену́т: а́ще сло́во Мое́ соблюдо́ша, и ва́ше соблюду́т. Но сия́ вся творя́т вам за и́мя Мое́, я́ко не ве́дят Посла́вшаго Мя. А́ще не бых прише́л и глаго́лал им, греха́ не бы́ша име́ли: ны́не же вины́ не и́мут о гресе́ свое́м. Ненави́дяй Мене́, и Отца́ Моего́ ненави́дит. А́ще дел не бых сотвори́л в них, и́хже ин никто́же сотвори́, греха́ не бы́ша име́ли: ны́не же и ви́деша, и возненавидеша Мене́ и Отца́ Моего́. Но да сбу́дется сло́во, пи́санное в зако́не их, я́ко возненави́деша Мя ту́не. Егда́ же прии́дет Уте́шитель, Его́же Аз послю́ вам от Отца́, Дух и́стины, И́же от Отца́ исхо́дит, Той свиде́тельствует о Мне. И вы же свиде́тельствуете, я́ко искони́ со Мно́ю есте́. Сия́ глаго́лах вам, да не соблазните́ся. От со́нмищ иждену́т вы, но прии́дет час, да всяк, и́же убие́т вы, мни́тся слу́жбу приноси́ти Бо́гу.

Ин.15:17–16:2

Причастен:

В па́мять ве́чную бу́дет пра́ведник, / от слу́ха зла не убои́тся. / Аллилу́иа, трижды.

Молитва

О, вели́кий Христо́в уго́дниче и пресла́вный целе́бниче, великому́чениче Пантелеи́моне! Душе́ю на Небеси́ Престо́лу Бо́жию предстоя́й и Триипоста́сныя сла́вы Его́ наслажда́яйся, те́лом же и ли́ком святы́м на земли́ в Боже́ственных хра́мех почива́яй и да́нною ти свы́ше благода́тию разли́чная источа́яй чудеса́, при́зри ми́лостивым твои́м о́ком на предстоя́щия лю́ди и честне́й твое́й ико́не уми́льно моля́щияся и прося́щия от Тебе́ целе́бныя по́мощи и заступле́ния. Простри́ ко Го́споду Бо́гу на́шему те́плыя своя́ моли́твы и испроси́ душа́м на́шим оставле́ние согреше́ний. Се бо мы за беззако́ния на́ша не сме́юще возвести́ оче́с на́ших к высоте́ Небе́сней, ниже́ вознести́ глас моле́бный к Его́ в Божестве́ непристу́пней сла́ве, се́рдцем сокруше́нным и ду́хом смире́нным тебе́, хода́тая ми́лостива ко Влады́це и моли́твенника за ны, гре́шныя, призыва́ем, я́ко ты прия́л еси́ благода́ть от Него́ неду́ги отгоня́ти и стра́сти исцеля́ти. Тебе́ у́бо про́сим: не пре́зри нас, недосто́йных, моля́щихся тебе́ и твоея́ по́мощи тре́бующих. Бу́ди нам в печа́лех уте́шитель, в неду́зех лю́тых стра́ждущим врач, напа́ствуемым ско́рый покрови́тель, очесе́м неду́гующим прозре́ния да́тель, ссу́щим и младе́нцем в ско́рбех гото́вейший предста́тель и исцели́тель. Исхода́тайствуй всем вся, я́же ко спасе́нию поле́зная, я́ко да твои́ми ко Го́споду Бо́гу моли́твами получи́вше благода́ть и ми́лость, просла́вим всех благи́х Исто́чника и Даропода́теля, Бо́га Еди́наго в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.