[Глава 29] Слу́жба о́бща по вся́ дни́ ко Го́споду на́шему Иису́су Христу́
В ве́чер,
на Го́споди воззва́х, стихи́ры, гла́с 6.
Подо́бен: Всю́ отложи́вше:
Егда́ хо́щеши приити́, су́д пра́ведный сотвори́ти, Судие́ пра́веднейший, на Престо́ле сла́вы Твоея́ седя́й: река́ о́гненная пред Твое́ суди́лище ужаса́ющая, влече́т все́х, предстоя́щым Тебе́ небе́сным си́лам, челове́ком же суди́мым стра́хом, я́коже ко́ждо соде́ла. Тогда́ на́с пощади́, и ча́сти, Христе́, сподо́би спаса́емых, я́ко благоутро́бен, ве́рою мо́лим Тя́.
Кто́ о мне́ не пла́чет преступи́вшем за́поведь Вы́шняго, невоздержа́ния ра́ди, во а́д всели́хся вме́сто рая́: сне́ди сла́дкия виде́нием сме́рть исхода́таих, и стра́нен ея́ ра́ди Бо́жия сла́вы и жи́зни яви́хся: но приими́ мя ка́ющагося, Го́споди, я́ко ми́лостив и человеколю́бец, вели́кия ра́ди Твоея́ ми́лости.
Ви́ждь мою́ ско́рбь и боле́знь, и прегреше́ний безме́рное мно́жество: души́ же моея́ озлобле́ние, и у́мное прельще́ние. Вонми́ гла́су отча́яннаго и осужде́ннаго, и да́ждь ми́ Го́споди, ду́х сокруше́нный, смире́нное се́рдце, исто́чник сле́з, и мно́гих мои́х согреше́ний проще́ние, вели́кия ра́ди Твоея́ ми́лости.
И в мине́и свята́го, 3.
Сла́ва: Бо́же, хотя́й все́м челове́ком спасти́ся, вонми́ моли́тве мое́й, и да не отри́неши сле́з мои́х я́ко су́етных: кто́ бо прии́де к Тебе́ пла́чя, и не а́бие спасе́н бы́сть? кто́ же возопи́ те́пле, и не а́бие услы́шан? но о Влады́ко, ско́р обрета́ешися во спасе́ние все́х моля́щихся Тебе́, я́ко в ми́лости непобеди́мый.
И ны́не, Богоро́дичен:
Человеколю́бия Твоего́ пучи́ну, благоутро́бия глубину́, и бла́гости щедро́ты неизче́тныя, покажи́, Пречи́стая Де́во, на мне́ окая́ннем, утоли́ па́жить грехо́вную, целому́дрие пода́вши, и соблюди́ с душе́ю и те́ло мое́ нескве́рно.
На стихо́вне стихи́ры, гла́с 6:
В стра́шное прише́ствие Твое́, Христе́, да не услы́шим: не ве́м ва́с. Упова́ние бо на Тя́, Спа́се, возложи́хом, а́ще и Твоя́ повеле́ния не сохрани́хом небреже́ния ра́ди на́шего: но пощади́ ду́шы на́ша, мо́лимся.
Сти́х: К Тебе́ возведо́х о́чи мои́:
Покая́ния не стяжа́х, ниже́ па́ки сле́з: сего́ ра́ди молю́ Тя, Христе́ Бо́же, пре́жде конца́ обрати́ти мя́, и да́ти ми́ умиле́ние, я́ко да изба́вимся от му́ки.
Сти́х: Поми́луй на́с Го́споди, поми́луй на́с:
Му́ченицы Твои́ Го́споди, не отверго́шася Тебе́, ни отступи́ша от за́поведей Твои́х: те́х моли́твами поми́луй на́с.
Сла́ва, и ны́не, Богоро́дичен:
Никто́же притека́яй к Тебе́, посра́млен от Тебе́ исхо́дит, Пречи́стая Богоро́дице Де́во: но про́сит благода́ти, и прие́млет дарова́ние к поле́зному проше́нию.
Во вто́рник ве́чера, или́ в четверто́к, глаго́ли Крестобогоро́дичен:
На дре́ве Живо́т на́ш зря́щи Всенепоро́чная Бо́га ви́сящ, ма́терски рыда́ющи вопия́ше: Сы́не Мо́й, и Бо́же Мо́й, спаси́ любо́вию пою́щыя Тя́.
Та́же, Ны́не отпуща́еши раба́ Твоего́: И про́чая.
На у́трени,
по 1-й кафи́сме седа́лен, гла́с 5:
Судии́ седя́щу, и а́нгелом стоя́щым, трубе́ глася́щей, пла́мени горя́щу, что́ сотвори́ши, душе́ моя́, ведо́ма на су́д? тогда́ бо лю́тая твоя́ предста́нут, и та́йная облича́тся согреше́ния. Те́мже пре́жде конца́ возопи́й судии́: Бо́же, очи́сти мя́, и спаси́ мя. [Два́жды.]
Сла́ва, и ны́не, Богоро́дичен:
Мы́сленный виногра́де, израсти́вший на́м гро́зд Боже́ственный, от Него́же напоя́емся вино́м нетле́ния, источи́ мое́й души́ умиле́ние, во́ду очище́ния, Твои́ми моли́твами.
Крестобогоро́дичен: Вознесе́на на дре́во я́ко ви́де, ро́ждшая Тя́, Спа́се, боле́зней кроме́, рыда́ше с пла́чем, и взыва́ше: увы́ Мне́ сладча́йший Сы́не, уязвля́юся душе́ю, на Кресте́ зря́щи Тя́ пригвожде́нна посреде́ двою́ злоде́ю, судо́м злоде́йственным.
По 2-й кафи́сме седа́лен, гла́с 6.
Помышля́ю де́нь стра́шный, и пла́чуся дея́ний мои́х лука́вых: ка́ко отвеща́ю безсме́ртному Царю́? или́ ко́им дерзнове́нием воззрю́ на судию́ блу́дный а́з Благоутро́бный О́тче, Сы́не Единоро́дный, Ду́ше Святы́й, поми́луй мя́. [Два́жды.]
Сла́ва, и ны́не, Богоро́дичен:
Ско́рый Тво́й покро́в, и по́мощь, и ми́лость, покажи́ на рабы́ Твоя́, и во́лны, чи́стая, укроти́ су́етных помысло́в, и па́дшую мою́ ду́шу возста́ви Богоро́дице: ве́м бо, ве́м Де́во, я́ко мо́жеши, ели́ка и хо́щеши.
Крестобогоро́дичен: Кресто́м Сы́на Твоего́ Богоблагода́тная, и́дольская пре́лесть вся́ упраздни́ся, и де́монская кре́пость попра́ся: сего́ ра́ди ве́рнии, по до́лгу Тя́ при́сно пое́м и благослови́м, и Богоро́дицу вои́стинну испове́дающе, Тя́ велича́ем.
Кано́н ко Го́споду на́шему Иису́су Христу́, гла́с 6.
Пе́снь 1.
Ирмо́с: Помо́щник и покрови́тель, бы́сть мне́ во спасе́ние, Се́й мо́й Бо́г, и просла́влю Его́, Бо́г Отца́ моего́, и вознесу́ Его́: сла́вно бо просла́вися.
Егда́ прии́деши, Бо́же, во тма́х, и ты́сящах а́нгельских небе́сных нача́л, и мене́ на о́блацех окая́ннаго сподо́би сре́сти Тя́ Христе́.
Не вни́ди со мно́ю в су́д, нося́й моя́ дея́ния, словеса́ изыску́яй, и исправля́яй стремле́ния: но щедро́тами Твои́ми презира́я моя́ лю́тая, спаси́ мя Всеси́льне.
Ужаса́ет мя́, и страши́т о́гнь негаси́мый гее́нский, че́рвь го́рький, скре́жет зубо́в: но осла́би ми́, оста́ви, и стоя́нию мя́, Христе́, избра́нных Твои́х соучини́.
Богоро́дичен: Преклоне́н мно́жеством искуше́ний, и лю́тыми дея́ньми, вы́ю душе́вную и теле́сную преклоня́ю Тебе́ Чи́стая, и вопию́ Ти приле́жно: Ты́ мя испра́ви.
Пе́снь 3.
Ирмо́с: Утверди́ Го́споди, на ка́мени за́поведей Твои́х, подви́гшееся се́рдце мое́, я́ко еди́н свя́т еси́, и Госпо́дь.
Госпо́дь гряде́т, и кто́ стерпи́т стра́х Его́? кто́ яви́тся лицу́ Его́, но гото́ва бу́ди, о душе́ моя́! к сре́тению.
Нестерпи́мый, Го́споди, гне́в ка́ко стерплю́ суда́ Твоего́, преслу́шав твое́ повеле́ние? но пощади́, пощади́ мя в ча́с суда́.
Поми́луй, Го́споди, поми́луй мя́, вопию́ Ти, егда́ прии́деши со а́нгелы Твои́ми, отда́ти все́м по достоя́нию дея́ний.
Богоро́дичен: Две́рь благода́тная, отве́рзшая ве́рным две́ри небе́сныя, покая́ния две́ри светоза́рныя отве́рзи ми́, Влады́чице, и вра́т сме́ртных свободи́.
Седа́лен, гла́с 6:
Во юдо́ли пла́ча, в ме́сте е́же положи́л еси́, егда́ ся́деши Ми́лостиве, сотвори́ти пра́ведный су́д, не объяви́ моя́ та́йная, ниже́ посрами́ пред а́нгелы: но пощади́ мя, Бо́же, и поми́луй мя́.
Богоро́дичен: Упова́ние ми́ра блага́я Богоро́дице Де́во, Твое́ и еди́ное стра́шное предста́тельство молю́: умилосе́рдися на удобообстоя́тельныя лю́ди, умоли́ ми́лостиваго Бо́га, изба́витися душа́м на́шым от вся́каго преще́ния, еди́на благослове́нная.
Пе́снь 4.
Ирмо́с: Услы́ша проро́к прише́ствие Твое́ Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х Тво́й, и убоя́хся. Сла́ва си́ле Твое́й Го́споди.
Наста́ де́нь, уже́ при две́рех су́д: душе́, бо́дрствуй, иде́же ца́рие вку́пе и кня́зи, бога́тии и убо́зии собира́ются, и восприи́мет по достоя́нию соде́янных от челове́к ки́йждо.
Неумы́тный су́д Тво́й, неутае́нное Твое́ суди́ще хитросло́вия, не вити́й худо́жество кра́дущее, не свиде́телей непщева́ние отража́ющее пра́ведное: в Тебе́ бо Бо́зе все́х сокрове́нная предстоя́т.
Да не прииду́ в зе́млю пла́ча, да не ви́жду ме́сто тьмы́, Христе́ мо́й Сло́ве, ниже́ свя́зан бу́ду рука́ми и нога́ми, вне́ черто́га Твоего́ изве́рженный, оде́жду нетле́ния оскверне́нную име́яй всеокая́нный.
Богоро́дичен: Кре́посте моя́ Пречи́стая, прибе́жище, необори́мая стено́, и к Бо́гу моли́твенница су́щая, ве́чнующаго пла́мене и гее́нны свободи́ мя.
Пе́снь 5.
Ирмо́с: От но́щи у́тренююща, Человеколю́бче просвети́, молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.
Тре́пет неисповеди́мый и стра́х та́мо, прии́дет бо Госпо́дь, и де́ло с ни́м коего́ждо от челове́к: и кто́ отсю́ду у́бо себе́ не воспла́чет?
Пощади́, пощади́, Го́споди, созда́ние Твое́, согреши́х, осла́би ми́, я́ко естество́м чи́стый са́м еси́ еди́н: и ины́й ра́зве Тебе́ никто́же е́сть вне́ скве́рны.
Ни сле́з, ниже́ покая́ния и́мам, ниже́ умиле́ния: са́м ми́ сия́, Спа́се, я́ко Бо́г, да́руй.
Богоро́дичен: Оскверне́н по́мыслы, и окаля́н мно́гими паде́ньми, Ма́ти Бо́жия, Тя́ молю́: еди́на нескве́рная, уще́дри и спаси́ мя хода́тайством Твои́м.
Пе́снь 6.
Ирмо́с: Возопи́х все́м се́рдцем мои́м к ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.
Во страшне́м, Христе́, прише́ствии Твое́м, егда́ яви́шися с небесе́, и поста́вятся Престо́ли, и кни́ги разгну́тся: пощади́, пощади́ тогда́, Спа́се, созда́ние Твое́.
Та́мо ничто́же помощи́ мо́жет, Бо́гу су́щу судии́, ни тща́ние, ни ко́зни, ни Сла́ва, ни дру́жба, ра́зве от де́л кре́пость твоя́, о душе́ моя́!
Возми́ твое́, да не услы́шу, Го́споди, отсыла́емь от Тебе́, ниже́ е́же поиди́ во о́гнь прокля́тых, но возжеле́ннаго гла́са пра́ведных.
Богоро́дичен: Очище́ние и́мамы Тя́ всегда́ у Бо́га, Пренепоро́чная: те́мже испроси́ изба́вити все́х Пречи́стая, я́же та́мо муче́ний стра́шных, Богоро́дицу вои́стинну испове́дающих Тя́.
Конда́к, гла́с 1:
Егда́ прии́деши, Бо́же, на зе́млю со сла́вою, и трепе́щут вся́ческая, река́ же о́гненная пред суди́щем влече́т, кни́ги разгиба́ются, и та́йная явля́ются: тогда́ изба́ви мя́ от огня́ неугаси́маго, и сподо́би мя́ одесну́ю Тебе́ ста́ти, Судие́ пра́веднейший.
И́кос: Суди́ще Твое́ стра́шное, и су́д пра́веднейший, дела́ же моя́ лю́тая: но са́м ми́лостиве, предвари́в спаси́ мя, и му́ки свободи́, изба́ви же, Влады́ко, ко́злищ ча́сти, и сподо́би одесну́ю Тебе́ ста́ти, Судие́ пра́веднейший.
Пе́снь 7.
Ирмо́с: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ на́м: но не преда́ждь на́с до конца́, отце́в Бо́же.
Госпо́дь гряде́т суди́ти, кто́ стерпи́т виде́ние Его́? вострепещи́ душе́ окая́нная, вострепещи́, и угото́ви исхо́дищу дела́ Твоя́: да ми́лостива и милосе́рда обря́щеши Его́, отце́в Бо́га благослове́нна.
Припа́даю Ти́ и приношу́ Тебе́ я́коже сле́зы глаго́лы моя́: согреши́х я́коже не согреши́ блудни́ца, и беззако́нновах, я́ко и́ный никто́же на земли́: но уще́дри, Влады́ко, творе́ние Твое́ и призови́ мя.
Две́рь Твою́ не затвори́ ми тогда́, Го́споди, Го́споди, но отве́рзи ми́ ю́ ка́ющемуся, и боле́зненно к Тебе́ от се́рдца припа́дающу, Бо́же, и поми́луй мя́.
Богоро́дичен: Егда́ в нощи́ Жени́х прии́дет суди́ти земли́, тогда́ во сре́тение его́ со све́тлою свеще́ю, благоволи́ Пречи́стая изы́ти ми́, и поклони́тися Того́ прише́ствию.
Пе́снь 8.
Ирмо́с: Его́же во́инства небе́сная сла́вят, и трепе́щут херуви́ми и серафи́ми, вся́ко дыха́ние и тва́рь, по́йте, благослови́те и превозноси́те во вся́ ве́ки.
Стра́шнаго втора́го Твоего́, Го́споди, прише́ствия помышля́я сре́тение, трепе́щу преще́ния Твоего́, бою́ся гне́ва Твоего́: от сего́ мя часа́, зову́, спаси́ во ве́ки. [Два́жды.]
Все́х судие́ Бо́же мо́й и Го́споди, да услы́шу тогда́ гла́с Тво́й возжеле́нный: да уви́жу све́т Тво́й вели́кий: да узрю́ селе́ния Твоя́: да узрю́ сла́ву Твою́, ра́дуяся во ве́ки.
Богоро́дичен: В де́нь суда́ яви́ся, Влады́чице, и предста́ни ми́, му́ки и огня́ свобожда́ющи, да спасе́н бы́в Тобо́ю, воспою́ Твою́ необори́мую благода́ть.
Пе́снь 9.
Ирмо́с: Безсе́меннаго зача́тия рождество́ несказа́нное, Ма́тере безму́жныя нетле́нен пло́д: Бо́жие бо рожде́ние обновля́ет естества́. Те́мже Тя́ вси́ ро́ди я́ко Богоневе́стную Ма́терь, правосла́вно велича́ем.
Госпо́дь гряде́т гре́шныя му́чити, пра́ведныя же спасти́: воспла́чимся, возрыда́им, и прии́мем чу́вство о́наго дне́, во́ньже безве́стная и та́йная откры́в, челове́ком отда́ст по достоя́нию.
Дании́л убоя́ся часа́ истяза́ния, а́з же окая́нный что́ постражду́ от него́, гряды́й Го́споди, стра́шнаго дне́? но да́ждь ми́ пре́жде конца́ благоуго́дно Тебе́ послужи́ти, и улучи́ти Ца́рствие Твое́.
О́гнь гото́вится, че́рвь устроя́ется: весе́лие, Сла́ва, ослабле́ние, све́т невече́рний, ра́дость пра́ведных. И кто́ блаже́нный избе́гнути не восхо́щет муче́ния пе́рвых, насле́дивый втора́я?
Богоро́дичен: Страсте́й волне́ние смуща́ет мя́, и сластьми́ погружа́ет, Де́во пренепоро́чная, ко́рмчию Христа́ ро́ждшая, ру́ку ми́ по́мощи простри́, и спаси́ мя, еди́на спасе́ние, ве́рою блажа́щих Тя́.
Свети́лен.
Подо́бен: Жены́ услы́шите:
Егда́ Престо́ли поста́вятся, и кни́ги разве́рзутся, и егда́ хо́щеши суди́ти су́д челове́ческим дея́нием, не осуди́ на́с, Влады́ко, во о́гнь гее́нский, я́же от пе́рсти созда́л еси́: но Твоего́ Ца́рствия на́с сподо́би, Спа́се.
Богоро́дичен: Его́же от Твои́х крове́й родила́ еси́ Чи́стая, соверше́нна челове́ка, и Бо́га и́стинна, и Го́спода, умоли́ Того́, изба́витися на́м огня́ ве́чнующаго.
На стихо́вне стихи́ры, гла́с 6:
На́га мя́ обре́т доброде́телей вра́г, стрело́ю грехо́вною уязви́: но Ты́, Бо́же, я́ко вра́чь ду́ш и теле́с, я́звы души́ моея́ исцели́, и поми́луй мя́.
Сти́х: Испо́лнихомся зау́тра ми́лости Твоея́, Го́споди:
Се́рдца моего́ стру́пы, от мно́гих грехо́в прозя́бшыя ми́, исцели́, Спа́се, я́ко ду́ш и теле́с вра́чь, и подая́ прося́щым прегреше́ний проще́ние, при́сно да́руй ми́ сле́зы покая́ния, дая́ ми разреше́ние долго́в, Го́споди, и поми́луй мя́.
Сти́х: И бу́ди све́тлость Го́спода Бо́га на́шего:
Го́споди, а́ще не бы́хом святы́я Твоя́ име́ли моли́твенники, и благосты́ню Твою́ ми́лующую на́с: ка́ко сме́ли бы́хом, Спа́се, пе́ти Тя́, его́же славосло́вят непреста́нно а́нгели? Сердцеве́дче, пощади́ ду́шы на́ша.
Сла́ва, и ны́не, Богоро́дичен:
Мари́е чи́стая, злата́я кади́льнице, еди́наго от неразлу́чныя Тро́ицы прия́телище су́щая, на не́же Оте́ц изво́ли, Сы́н же де́йством Всесвята́го Ду́ха всели́ся во чре́во Твое́ всеосвяще́нное. Того́ у́бо моли́ приле́жно, пода́ти на́м грехо́в оставле́ние в де́нь су́дный.
Крестобогоро́дичен.
Подо́бен: Всю́ отложи́вше:
А́гнца Своего́, А́гница нескве́рная дре́вле, и непоро́чная Влады́чица, на дре́ве кре́стнем я́ко узре́, ма́терски восклица́ше, и дивя́щися вопия́ше: Ча́до сладча́йшее, что́ зре́ние сие́ но́вое и пресла́вное? ка́ко со́нм безблагода́тный суди́щу пила́тову предаде́ Тя, и осужда́ет на сме́рть Живота́ вся́ческих? но воспева́ю Твое́ неизрече́нное, Сло́ве, схожде́ние.
Та́же, Бла́го е́сть испове́датися Го́споди: и Трисвято́е. По О́тче на́ш: тропа́рь, и ектениа́, и отпу́ст.
Та́же, ча́с 1-й. Псалмы́ обы́чны, и коне́чный отпу́ст.
Блаже́нна, гла́с 6:
Помяни́ мя, Бо́же, Спа́се мо́й, егда́ прии́деши во Ца́рствии Твое́м: и спаси́ мя, я́ко Еди́н Человеколю́бец.
Петро́в пла́ч прие́мый, приими́ и мое́, Христе́, покая́ние, и да́руй ми́ согреше́ний проще́ние.
Пропове́давый покая́ние челове́ком, Госпо́день Крести́телю и Предте́че, молю́ Тя, пока́ятися мне́ от души́ сподо́би.
Треволне́ния подъе́мше страсте́й святи́и, су́щыя в бу́ри боле́зней при́сно избавля́ете: те́мже блажи́ми есте́.
Сла́ва: Проро́ки прославля́емый, Спа́се мо́й, в Тро́ице, про́сто и несме́сно, Предте́чи моли́твами спаси́ мя.
И ны́не: Засту́пнице кре́пкая су́щым в ско́рбех, заступи́ от жите́йских страсте́й прило́га, и спаси́ мя, Влады́чице.
Апо́стол к колоса́ем, зача́ло 258.
Бра́тие, облецы́теся у́бо [я́коже избра́ннии Бо́жии, свя́ти и возлю́бленни,] во утро́бы щедро́т, бла́гость, смиреному́дрие, кро́тость и долготерпе́ние: Прие́млюще дру́г дру́га, и проща́юще себе́, а́ще кто́ на кого́ и́мать порече́ние: я́коже и Христо́с прости́л е́сть ва́м, та́ко и вы́. Над все́ми же си́ми стяжи́те любо́вь, я́же е́сть соу́з соверше́нства: И ми́р Бо́жий да водворя́ется в сердца́х ва́ших, во́ньже и зва́ни бы́сте во еди́ном те́ле: и благода́рни быва́йте. Сло́во Христо́во да вселя́ется в ва́с бога́тно, во вся́кой прему́дрости, уча́ще и вразумля́юще себе́ саме́х во псалме́х и пе́ниих, и пе́снех духо́вных, о благода́ти пою́ще в сердца́х ва́ших Го́сподеви.
Ева́нгелие от Ма́рка, зача́ло 37.
Рече́ Госпо́дь: и́же хо́щет по Мне́ ити́, да отве́ржется себе́, и во́змет кре́ст сво́й, и по Мне́ гряде́т. И́же бо а́ще хо́щет ду́шу свою́ спасти́, погуби́т ю́: а и́же погуби́т ду́шу свою́ Мене́ ра́ди и Ева́нгелиа, то́й спасе́т ю́. Ка́я бо по́льза челове́ку, а́ще приобря́щет ми́р ве́сь, и оттщети́т ду́шу свою́? Или́ что́ да́ст челове́к изме́ну на души́ свое́й? И́же бо а́ще постыди́тся Мене́, и Мои́х слове́с в ро́де се́м прелюбоде́йнем и гре́шнем, и Сы́н Челове́ческий постыди́тся его́, егда́ прии́дет во сла́ве Отца́ своего́ со а́нгелы святы́ми. И глаго́лаше и́м: ами́нь глаго́лю ва́м, я́ко су́ть не́цыи от зде́ стоя́щих, и́же не и́мут вкуси́ти сме́рти, до́ндеже ви́дят Ца́рствие Бо́жие прише́дшее в си́ле.