[Глава 28] Слу́жба воскре́сная шеста́го гла́са
В суббо́ту ве́чера, на ма́лей вече́рни,
на Го́споди воззва́х, стихи́ры на 4, гла́с 6, повторя́юще пе́рвую.
Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.
Побе́ду име́яй Христе́:
Дне́сь Христо́с сме́рть попра́в:
Тебе́ Го́споди, су́щаго по все́й тва́ри:
Сла́ва, и ны́не, Богоро́дичен:
Досто́йно е́сть я́ко вои́стинну блажи́ти Тя́ Богоро́дицу: в Твое́ бо пречи́стое вше́д чре́во все́х Соде́тель, пло́ть бы́сть, не преложи́вся естество́м, ниже́ мечта́вся о смотре́нии, но восприя́тей из Тебе́ слове́сно одушевле́нней пло́ти соедини́вся, по ипоста́си: отню́дуже благоче́стно во обои́х естества́х явля́ющихся ра́знство твори́м. Того́ моли́ Честна́я Пресвята́я, низпосла́ти на́м ми́р и ве́лию ми́лость.
На стихо́вне стихи́ра воскре́сна, гла́с 6:
Воскре́сние Твое́ Христе́ Спа́се:
И ины́я стихи́ры Пресвяты́я Богоро́дицы.
Подо́бен: Всю́ отложи́вше:
Сти́х: Помяну́ и́мя Твое́ во вся́ком ро́де и ро́де.
Кля́твою я́ко обеща́ твоему́ пра́отцу дре́вле Бо́г преле́тный, в после́дняя ле́та соверши́, произше́д Пречи́стая, от чре́ва Твоего́ Боже́ственнаго: и́бо вои́стинну возсия́ из Тебе́ Госпо́дь, дла́нию содержа́й концы́: Его́же и мне́ благоуве́тлива сотвори́ в ча́с су́дный Де́во Мари́е, Того́ Ца́рствия мя́ получи́ти, доброде́телей возвыше́нием, и страсте́й умерщвле́нием.
Сти́х: Слы́ши дщи́ и ви́ждь, и приклони́ у́хо твое́.
Ума́ чистото́ю Иса́иа Де́во издале́ча прорече́, роди́ти иму́щую Созда́теля всея́ тва́ри Тя́ Честна́я Пречи́стая: Ты́ бо яви́лася еси́ еди́на во ве́ки Всенепоро́чная. Те́мже Тя́ молю́, оскверне́нную мою́ ду́шу очи́сти, и све́тлости Боже́ственныя о́бщника мя́ покажи́, и Боже́ственнаго Сы́на Твоего́ стоя́ния десна́го, егда́ ся́дет, я́коже пи́сано е́сть, суди́ти ми́ру всему́.
Сти́х: Лицу́ Твоему́ помо́лятся бога́тии лю́дстии.
Сме́рти разруше́ние рождество́м Твои́м яви́ся: Ты́ бо отрокови́ца еси́ Живота́ нетле́ннаго пребыва́ние. Те́мже Тя́ молю́: во гробе́х а́довых страсте́й мои́х слежа́щаго Ты́ воскреси́, и к весе́лию и оживле́нию Де́во руководи́, ко блаже́нному воздая́нию, и неги́бленныя и Боже́ственныя сподо́би ра́дости: иде́же сла́дость присносу́щная, иде́же све́т невече́рний.
Сла́ва, и ны́не, Богоро́дичен:
Прииди́те вси́ язы́цы, во гла́се ра́дования Пресвяту́ю Де́ву и Богоро́дицу восхва́лим, челове́ческаго существа́ горни́ло, неизрече́нных чуде́с де́лателище, о То́й бо бы́ша но́вая: Безнача́льный начина́ется, Сло́во одебелева́ет, Бо́г челове́к быва́ет, да Бо́га челове́ка соде́лает, не премене́нием есте́ств, но соедине́нием по ипоста́си: происхо́дит бо еди́н от двою́ сопроти́вных, во двои́х соверше́нных естества́х неразде́льне познава́емый, хоте́тельне же и де́тельне по обою́ существу́: то́йже по исто́тному ве́руемь быва́я, ра́ди спаси́тельнаго смотре́ния, Христо́с Бо́г на́ш, ми́рови подая́ очище́ние, ми́р и ве́лию ми́лость.
Та́же, Ны́не отпуща́еши: Трисвято́е.
И по О́тче на́ш, тропа́рь воскре́сен.
Сла́ва, и ны́не, Богоро́дичен его́.
И отпу́ст.
На вели́цей вече́рни,
на Го́споди воззва́х, поста́вим стихо́в 10: и пое́м настоя́щыя воскре́сны стихи́ры. Гла́с 6.
Сти́х: Изведи́ из темни́цы ду́шу мою́, испове́датися и́мени Твоему́.
Побе́ду име́яй, Христе́, ю́же на а́да, на Кре́ст возше́л еси́: да во тьме́ сме́рти седя́щыя воскреси́ши с собо́ю и́же в ме́ртвых свобо́дь: источа́яй живо́т от Своего́ све́та, Всеси́льне Спа́се, поми́луй на́с.
Сти́х: Мене́ жду́т пра́ведницы, до́ндеже возда́си мне́.
Дне́сь Христо́с сме́рть попра́в, я́коже рече́, воскре́се, и ра́дование ми́рови дарова́, да вси́ взыва́юще, пе́снь та́ко рце́м: Исто́чниче жи́зни, Непристу́пный све́те, Всеси́льне Спа́се, поми́луй на́с.
Сти́х: Из глубины́ воззва́х к тебе́ Го́споди, Го́споди услы́ши гла́с мо́й.
Тебе́ Го́споди, су́щаго по все́й тва́ри, гре́шнии ка́мо бежи́м? на небеси́ са́м живе́ши: во а́де попра́л еси́ сме́рть. Во глубины́ морски́я? та́мо рука́ Твоя́ Влады́ко. К Тебе́ прибега́ем, Тебе́ припа́дающе мо́лимся: Воскресы́й из ме́ртвых, поми́луй на́с.
И́ны стихи́ры восто́чны꙾, гла́с то́йже.
Сти́х: Да бу́дут у́ши Тво́й вне́млюще гла́су моле́ния моего́.
Кресто́м Твои́м, Христе́, хва́лимся, и воскресе́ние Твое́ пое́м и сла́вим: Ты́ бо еси́ Бо́г на́ш, ра́зве Тебе́ ино́го не ве́мы.
Сти́х: А́ще беззако́ния на́зриши Го́споди, Го́споди кто́ постои́т? я́ко у тебе́ очище́ние е́сть.
Вы́ну благословя́ще Го́спода, пое́м воскресе́ние Его́: Кре́ст бо претерпе́вый, сме́ртию сме́рть погуби́.
Сти́х: И́мене ра́ди Твоего́ потерпе́х Тя́ Го́споди, потерпе́ душа́ моя́ в сло́во Твое́, упова́ душа́ моя́ на Го́спода.
Сла́ва си́ле Твое́й Го́споди, я́ко упраздни́л еси́ держа́ву иму́щаго сме́рти: обнови́л еси́ на́с Кресто́м Твои́м, да́руяй на́м живо́т и нетле́ние.
Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.
Погребе́ние Твое́ Го́споди, у́зы а́довы сокруши́вшее растерза́, е́же из ме́ртвых воскресе́нием, ми́р просвети́: Го́споди сла́ва Тебе́.
Та́же мине́и стихи́ры свята́го.
Сла́ва, свята́го, а́ще и́мать, а́ще ли ни́: Сла́ва, и ны́не, Богоро́дичен:
И́ны стихи́ры Богоро́дице, творе́ние Па́вла Аморре́йскаго, гла́с 3.
Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.
Ви́дящи не́мощь мою́ теле́сную, и душе́вное страда́ние, и серде́чное озлобле́ние, посеще́ния сподо́би мя́ Боже́ственнаго, Всенепоро́чная Де́во: спаси́ мя, молю́ся, те́плыми Твои́ми моли́твами.
Сти́х: Хвали́те Го́спода вси́ язы́цы, похвали́те его́ вси́ лю́дие.
Все́х преидо́х, Влады́чице, согреше́ньми: но мно́жества си́х деви́це очи́щши, ми́лостей получи́ти ми́, Чи́стая, сподо́би, в бу́дущем суде́ Сы́на и Бо́га Твоего́.
Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к:
Мно́жество согреше́ний мои́х, зову́щаго очи́сти Чи́стая, и чу́вствий мои́х неуста́вная движе́ния моли́твенным мече́м ссецы́: я́ко да ве́рою и любо́вию пою́ Твое́ безсе́менное рождество́.
Сла́ва, и ны́не, Богоро́дичен:
Кто́ Тебе́ не ублажи́т, Пресвята́я Де́во? кто́ ли не воспое́т Твоего́ пречи́стаго рождества́? безле́тно бо от Отца́ возсия́вый Сы́н единоро́дный, То́йже от Тебе́ Чи́стыя про́йде неизрече́нно вопло́щься, естество́м Бо́г сы́й, и естество́м бы́в челове́к на́с ра́ди, не во двою́ лицу́ разделя́емый, но во двою́ естеству́, несли́тно познава́емый: Того́ моли́ Чи́стая всеблаже́нная, поми́ловатися душа́м на́шым.
Вхо́д: Све́те ти́хий:
Проки́мен дне́: Госпо́дь воцари́ся: и про́чее по обы́чаю.
На стихо́вне стихи́ры, гла́с 6.
Воскре́сние Твое́ Христе́ Спа́се, а́нгели пою́т на небесе́х: и на́с на земли́ сподо́би чи́стым се́рдцем Тебе́ сла́вити.
[По алфави́ту.] Сти́х: Госпо́дь воцари́ся в ле́поту облече́ся.
Врата́ сокруши́в ме́дная, и вереи́ а́довы сотры́й, я́ко Бо́г всеси́лен, ро́д челове́ческий па́дший воскреси́л еси́. Сего́ ра́ди и мы́ согла́сно вопие́м: воскресы́й из ме́ртвых Го́споди, сла́ва Тебе́.
Сти́х: И́бо утверди́ вселе́нную, я́же не подви́жится.
Тле́ния на́с дре́вняго Христо́с испра́вити хотя́, на Кресте́ пригвожда́ется, и во гро́бе полага́ется. Его́же мироно́сицы жены́ со слеза́ми иска́ху, пла́чуще глаго́лаху: увы́ на́м Спа́се все́х, ка́ко изво́лил еси́ во гро́бе всели́тися? всели́выйся же хотя́й, ка́ко укра́ден бы́л еси́? ка́ко преложи́лся еси́? ко́е же ме́сто, Твое́ живоно́сное скры́ те́ло? но Влады́ко, я́ко обеща́лся еси́ на́м, яви́ся, и утоли́ от на́с рыда́ние сле́з. Пла́чущымся же и́м, а́нгел к ни́м возопи́: от пла́ча преста́вше апо́столом рцы́те: я́ко воскре́се Госпо́дь: ми́рови да́руяй очище́ние, и ве́лию ми́лость.
Сти́х: До́му Твоему́ подоба́ет святы́ня:
Распны́йся я́ко восхоте́л еси́, Христе́, и сме́рть погребе́нием Твои́м плени́вый, тридне́вен воскре́сл еси́, я́ко Бо́г со сла́вою, ми́рови да́руяй безконе́чную жи́знь, и ве́лию ми́лость.
Сла́ва, и ны́не, Богоро́дичен:
Творе́ц и изба́витель мо́й Пречи́стая, Христо́с Госпо́дь, из Твои́х ложе́сн проше́д, в мя́ оболки́йся, пе́рвыя кля́твы Ада́ма свободи́. Те́мже Ти́ Всечи́стая, я́ко Бо́жии Ма́тери же и Де́ве вои́стинну, вопие́м немо́лчно: ра́дуйся а́нгельски, ра́дуйся Влады́чице, предста́тельство и покро́ве, и спасе́ние ду́ш на́ших.
Та́же, ны́не отпуща́еши: Трисвято́е,
и по О́тче на́ш: глаго́лем тропа́рь воскре́сен, гла́с 6:
А́нгельския си́лы на гро́бе Твое́м, и стрегу́щии омертве́ша, и стоя́ше Мари́а во гро́бе, и́щущи пречи́стаго те́ла Твоего́. Плени́л еси́ а́д, не искуси́вся от него́, сре́тил еси́ Де́ву, да́руяй живо́т: воскресы́й из ме́ртвых Го́споди, сла́ва Тебе́.
Сла́ва, и ны́не, Богоро́дичен:
Благослове́нную нареки́й Твою́ Ма́терь, прише́л еси́ на стра́сть во́льным хоте́нием возсия́в на Кресте́, взыска́ти хотя́ Ада́ма, глаго́ля а́нгелом: сра́дуйтеся мне́, я́ко обре́теся поги́бшая дра́хма. Вся́ му́дре устро́ивый, Бо́же на́ш, сла́ва Тебе́.
Та́же и отпу́ст.
В суббо́ту на повече́рии,
кано́н Пресвяте́й Богоро́дице, гла́с 6.
Пе́снь 1.
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Неоску́дную благода́ть иму́щи я́ко Боже́ственную, Ма́ти безневе́стная, к Тебе́ прибега́ющих не пре́зри, от бе́д и скорбе́й при́сно спаса́ющи.
Се́ вре́мя наста́ мне́ уны́ния, воста́ни Пречи́стая Влады́чице, и по́мощи да́ждь ми́ ру́ку: Ты́ бо ми́р Боже́ственнаго весе́лия испо́лнила еси́.
Сла́ва: Держа́вный Тво́й покро́в Богороди́тельнице, я́ко засту́пница су́щи, да́ждь мне́ вско́ре, напа́стьми одержи́му, и невре́дна от си́х сохрани́ мя.
И ны́не: Души́ мое́й сме́рть притека́ет, искуше́ния же ненави́дящих, я́ко а́спиды обыдо́ша погуби́ти мя́: но сама́ мя Богоро́дице спаси́.
Пе́снь 3.
Ирмо́с: Разшири́шася на враги́ моя́ уста́ моя́, я́ко утверди́ся о Го́споде се́рдце мое́.
Умерщвле́нную ду́шу мою́ прегреше́ньми, живо́т я́ко ро́ждшая Богоро́дице, оживи́.
От вся́каго искуше́ния соблюди́ к Тебе́ прибега́ющих Богоро́дице, упова́ние на́ше.
Сла́ва: От востаю́щих на мя́ напа́стей го́рько, спаси́ мя Ма́ти Го́спода моего́ пренепоро́чная.
И ны́не: Я́же ми́рови спасе́ние подаю́щи, Боже́ственным рождество́м Твои́м, от бе́д мя́ премени́.
Пе́снь 4.
Ирмо́с: Услы́ша проро́к прише́ствие твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слу́х Тво́й, и убоя́хся, сла́ва си́ле Твое́й, Го́споди.
Изнемо́же нището́ю кре́пость души́ моея́, Богороди́тельнице, и лю́тое на мя́ омраче́ние нападе́, от прегреше́ний имы́й нахо́д: при́зри я́ко светоно́сный о́блак Бо́жий, и просвети́ мя, молю́ся.
Бу́ри зо́л мои́х, и смуще́ние прегреше́ний, преложи́ в тишину́ спасе́ния, я́ко су́щи приста́нище Всенепоро́чная: рыка́юще и́щут мя́ я́ко льво́ве пожре́ти, па́губы те́х изба́ви мя́, молю́ся.
Сла́ва: В нощи́ и во дни́, на земли́ же и в мо́ри и на вся́ком ме́сте спасе́ние тве́рдое су́щи Богоро́дице, покро́ве непобеди́мый спаса́й мя́: по Бо́зе бо на Тя́ вои́стинну христиа́не упова́ем.
И ны́не: От вели́ких и разли́чных прегреше́ний же и напа́стей всегда́ спаса́еши мя́: те́мже я́ко ро́ждшую Тя́ Го́спода молю́, и к Тебе́ прибега́ю, непобеди́мей по́мощи скорбя́щым: от бе́д изведи́ мя мольба́ми Твои́ми.
Пе́снь 5.
Ирмо́с: Све́т возсия́й ми́ру, Христе́, просвети́ се́рдце мое́, от но́щи Тебе́ зову́ща, и спаси́ мя.
Спасе́ния Тя́ покро́в сла́вим, Сло́ва Ма́ти Всенепоро́чная, наве́т не боя́щеся челове́ческих.
Иму́ще Тя́ сте́ну необори́му, искуше́ний же и печа́лей воста́ния избавля́емся, Пречи́стая.
Сла́ва: Изми́ мя от злы́х челове́к язы́ка, Чи́стая: я́коже бо бри́тва изъостри́ся, погуби́ти иски́й ду́шу мою́ го́рько.
И ны́не: Приле́жно Ти́ припа́даю моля́ся, я́ко Ма́ти Зижди́теля моего́, одержа́щих мя́ бе́д свободи́.
Пе́снь 6.
Ирмо́с: Ки́том пожре́н грехо́вным, вопию́ тебе́ Христе́: я́ко проро́ка из истле́ния мя́ свободи́.
Го́рести вку́с прие́м, Боже́ственныя сла́дости отчужди́хся Пречи́стая. Те́мже вопию́ Ти: да́руй ми́ по́мощь.
Омраче́ние страсте́й раба́ мя тли́ соде́ла: те́мже Све́т ро́ждшая, свободи́ мя Влады́чице.
Сла́ва: Согла́сно Тебе́ и ве́рно испове́даюся Пречи́стая, и пожру́ Ти же́ртву, Тобо́ю изба́влься ско́рби.
И ны́не: Отверзо́шася на мя́ непра́вды уста́ Влады́чице: те́мже мя́ я́ко засту́пница си́х вско́ре свободи́.
Та́же, Го́споди поми́луй, три́жды.
Сла́ва, и ны́не, конда́к, гла́с 6.
Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы: но предвари́ я́ко блага́я на по́мощь на́с, ве́рно зову́щих Ти́: ускори́ на моли́тву, и потщи́ся на умоле́ние, предста́тельствующи при́сно Богоро́дице, чту́щих Тя́.
Пе́снь 7.
Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́ Бо́же оте́ц на́ших.
Искуше́ния души́ моея́, ю́же ту́чнии юнцы́ ны́не обыдо́ша, Пресвята́я Де́во, сама́ мя си́х свободи́.
Защища́ющи то́щно в беде́ су́щих, и в печа́ли ра́дость, Богоро́дице, подаю́щи всегда́.
Сла́ва: Побежде́на мя́ всего́ отча́янием де́л и печа́ли, огради́ мя Де́во, я́ко покро́в все́м неруши́мый.
И ны́не: Предста́тельством твои́м избавля́емся бе́д и скорбе́й, и обрета́ем бога́тство ве́лие неистоща́емое.
Пе́снь 8.
Ирмо́с. Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
От челове́ческих снеда́юся озлобле́ний, и молю́ся: Богоро́дице, изба́ви мя́ су́етнаго сове́та и́х.
Победи́хся в печа́лех искуше́нии мои́ми, и молю́ся: Влады́чице, от си́х мя́ спаси́ невреди́ма.
Сла́ва: Спаси́ мя Чи́стая, от челове́ка льсти́ва, и язы́ка, и у́ст, и мучи́тельства, и вся́кия ну́жды.
И ны́не: И́же нра́вом прельща́емь е́смь, без отве́та сы́й Богоро́дице, зову́: вся́ческих мя́ изба́ви зо́л.
Пе́снь 9.
Ирмо́с: Е́же ра́дуйся от а́нгела прии́мшая, и ро́ждшая созда́теля Твоего́, Де́во, спаси́ Тя́ велича́ющыя.
Ми́лостива ми́ в печа́лех жития́, Богоро́дице, бу́ди, и спаси́ от бе́д ны́не прибега́ющаго к Тебе́.
Вои́стинну еди́на на земли́ и в мо́ри, яви́лася еси́ Чи́стая, кро́в неразори́мь, прибега́ющым к Тебе́ несумне́нною душе́ю.
Сла́ва: Без ума́ себе́ вся́ческими порабо́тивша лю́тыми паде́ньми, мольба́ми Твои́ми свобо́ду пода́ждь ми́ Всепе́тая.
И ны́не: Тя́ наде́жду и заступле́ние тве́рдое стяжа́в Чи́стая, велича́я Тя́ я́ко Бо́гу, пе́снь ве́рою скончава́ю.
Та́же, Досто́йно е́сть: И трисвято́е. И по О́тче на́ш: Конда́к гла́са. И про́чее по обы́чаю. И отпу́ст.
В неде́лю у́тра,
нача́ло полу́нощницы.
Иере́й: Благослове́н Бо́г на́ш. И мы́ глаго́лем: Ами́нь. Сла́ва тебе́, Бо́же на́ш, сла́ва Тебе́. Царю́ Небе́сный: Трисвято́е, Пресвята́я Тро́ице: О́тче на́ш: иере́й: Я́ко Твое́ е́сть Ца́рство: Го́споди поми́луй, 12 Сла́ва, и ны́не: Прииди́те, поклони́мся: три́жды. Псало́м 50: Поми́луй мя́, Бо́же:
И а́бие глаго́лем:
Кано́н Пресвяте́й и Живонача́льней Тро́ице, [его́же краестро́чие: Шесто́е пе́ние приношу́ Тебе́ Божество́].
Творе́ние Митрофа́ново. Гла́с 6.
Пе́снь 1.
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.
Припе́в: Пресвята́я Тро́ице Бо́же на́ш, сла́ва Тебе́.
Три́ ипоста́си пое́м Богонача́льны еди́нственнаго естества́, неизме́нный зра́к блага́го человеколю́бца Бо́га, прегреше́ний очище́ние на́м да́рующаго.
Пресу́щный еди́не и трисия́нный начерта́ньми Го́споди, в Божестве́ еди́ном сы́й, вразуми́ на́с, и сподо́би Твоего́ Боже́ственнаго сия́ния.
Сла́ва: Невестоукраси́в Па́вел ю́же от язы́к це́рковь, еди́ному Тебе́ триипоста́сному Бо́гу покланя́тися научи́, от Него́же, и И́мже, и в Не́мже вся́ бы́ша.
И ны́не, Богоро́дичен:
Из чре́ва Твоего́ про́йде у́мное, Богоро́дице, Со́лнце, и осия́ на́с трисве́тлаго Божества́ заря́ми: Его́же пою́ще, благоче́стно Тя́ ублажа́ем.
Пе́снь 3.
Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х Бла́же, и утверди́вый на́с на ка́мени испове́дания Твоего́.
Украси́в, трисве́тлый Бо́же, чи́ны небе́сныя, устро́ил еси́ пе́ти Тя́ трисвяты́ми гла́сы, с ни́миже приими́ и на́с, воспева́ющих Твою́ бла́гость.
Еди́но непрело́жное Тро́ичное, сообра́зное еди́нственное Богонача́лие пою́ще, мо́лим Тя́ те́пле, грехо́в мно́гих низпосла́ти ны́не на́м проще́ние.
Сла́ва: У́ме безнача́льный О́тче, сообра́зный Бо́жий Сло́ве, и Ду́ше Боже́ственный, благи́й и пра́вый, воспева́ющыя ве́рно Твою́ держа́ву, соблюди́ я́ко благоутро́бен.
И ны́не, Богоро́дичен:
Па́жить потреби́ тли́, челове́к по существу́ бы́в Бо́г мо́й во утро́бе Твое́й Чи́стая, и родонача́льники пре́жняго осужде́ния еди́н свободи́.
Та́же, Го́споди поми́луй, три́жды.
Седа́лен, гла́с 6:
Подо́бен: Е́же о на́с:
Влады́ко Бо́же, при́зри с небесе́, и ви́ждь на́ше смире́ние, я́ко ще́др, и умилосе́рдися Человеколю́бче преблаги́й: ни отку́ду бо наде́емся проще́ние получи́ти злы́х, и́миже согреши́хом: те́мже бу́ди с на́ми, и никто́же на ны́.
Сла́ва, и ны́не, Богоро́дичен:
Влады́чице чи́стая, при́зри Богоро́дице, ви́ждь на́ших я́зв боле́зни, и умилосе́рдися Пречи́стая, и исцели́ со́вестное жже́ние, Твое́ю ми́лостию ороша́ющи, и вопию́щи рабо́м Твои́м: А́з е́смь с ва́ми, и никто́же на вы́.
Пе́снь 4.
Ирмо́с: Христо́с моя́ си́ла, Бо́г и Госпо́дь, честна́я це́рковь Боголе́пно пое́т взыва́ющи, от смы́сла чи́ста о Го́споде пра́зднующи.
Возвыша́яй мы́сль, Еди́нице трисве́тлая, и ду́шу и се́рдце твои́х певе́ц ско́ро возведи́, и сия́ния Твоего́ и све́тлости сподо́би.
Претвори́ и преобрази́ от зло́бы мя́ вся́кия к доброде́тели, еди́на неизъображе́нная и неизме́нная Тро́ице, и твои́ми заря́ми просвети́.
Сла́ва: Помы́слив пре́жде, му́дре соста́вил еси́ а́нгелов чи́ны, служи́тельныя Твоея́ бла́гости, Триипоста́сная еди́нице: с ни́миже приими́ мою́ хвалу́.
И ны́не, Богоро́дичен:
И́же естество́м несозда́нный и Бо́г присносу́щный, созда́нное восприе́м челове́ческое естество́, возъобрази́ во святе́й Твое́й утро́бе, Богоро́дице Присноде́во.
Пе́снь 5.
Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Помышля́юще естество́ Богонача́льное, промысли́тельное и спаси́тельное все́х су́щее Влады́ко, трисве́тлое же еди́но, к Тебе́ у́тренюем проще́ния прося́ще грехопаде́ний.
О́тче безнача́льный Бо́же, и соприсносу́щный Сы́не, и Ду́ше Святы́й, утверди́, единонача́льная Тро́ице, Твоя́ певцы́, и от вся́кия напа́сти изба́ви и ско́рби.
Сла́ва: Управля́яй сия́ньми Богоде́тельными, и к благоугожде́нию Твоего́ Триипоста́снаго Божества́, Со́лнце сла́вы, наставля́я мя́ при́сно, и Боже́ственнаго Ца́рствия сотвори́ прича́стника.
И ны́не, Богоро́дичен:
И́же вся́ нося́й, и соблюда́яй всеси́льною Твое́ю руко́ю, Сло́ве Бо́жий неизме́нне, сохрани́ и соблюди́ Тя сла́вящыя, моли́твами ро́ждшия Тя́ Богома́тере.
Пе́снь 6.
Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Прему́дрость и ра́зум, Богонача́лие Трисве́тлое певце́м Твои́м да́руй, и добро́ты луча́ми светоде́тельныя Твоея́ бла́гости, осиява́тися все́х сподо́би. [Два́жды.]
Сла́ва: Све́те неразде́льный по существу́, трисия́нне, вседержи́тельне, непристу́пне, сердца́ озари́, ве́рно хва́лящих держа́ву Твою́, и к Боже́ственней любви́ впери́.
И ны́не, Богоро́дичен:
В Тя́ всели́ся, Присноде́во, я́ве содержи́тель и Госпо́дь все́х, и еди́ному трисия́нному зра́ку Божества́ челове́ки покланя́тися научи́л е́сть.
Го́споди поми́луй, три́жды.
Седа́лен, гла́с 6.
Подо́бен: Е́же о на́с:
О́тче и Сы́не, со Ду́хом Святы́м, при́зри на ны́ ве́рою Тебе́ покланя́ющыяся, и сла́вящыя держа́ву Твою́, Благоутро́бне, со о́гненными бре́ннии: ино́го бо ра́зве Тебе́ не ве́мы, и возопи́й пою́щым Тя́: А́з е́смь с ва́ми, и никто́же на вы́.
Сла́ва, и ны́не, Богоро́дичен:
При́зри на ны́, всепе́тая Богоро́дице, возсия́й просвеще́ние сердца́м омраче́нным, и озари́ ста́до Твое́ Пречи́стая, ели́ко бо хо́щеши и мо́жеши, я́ко Ма́ти су́щи Зижди́теля Твоего́. И возопи́й моля́щым Тя́: А́з е́смь с ва́ми, и никто́же на вы́.
Пе́снь 7.
Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́ Бо́же оте́ц на́ших.
Кре́пкую мне́ мы́сль устро́й, Трисве́тлая начерта́ньми еди́нице, е́же храни́ти и соблюда́ти Боже́ственныя за́поведи Твоя́, и всегда́ пе́ти Тебе́ ве́рно: благослове́н еси́ Бо́же оте́ц на́ших.
Я́ко то́ждеством естества́ пое́мый, неизрече́нно еди́нственный Бо́же, ли́цы же Тро́ицы нося́ число́, соблюди́ все́х на́с от разли́чных искуше́ний и обстоя́ний.
Сла́ва: Соесте́ственна и соприсносу́щна сла́вим еди́наго Тя́ по существу́ Бо́га, сво́йствы неслия́нне ипоста́сными, Тро́ице, разли́чное про́сто предлага́юще, во зра́це непреме́ннем я́ве.
И ны́не, Богоро́дичен:
Бо́г пресу́щный прия́т Пречи́стая, от чре́ва Твоего́ чи́стаго, на́ше человеколюбе́зне смеше́ние я́ве, и все́х научи́ вопи́ти: благослове́н еси́ Бо́же оте́ц на́ших.
Пе́снь 8.
Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти, Тя́ превозно́сим во вся́ ве́ки.
Очище́ние прегреше́ний ско́ро пода́ждь ми́, и страсте́й многообра́зных избавле́ние, сообра́зная Тро́ице, Еди́нице триипоста́сная: да Тя́ сла́влю во вся́ ве́ки.
Воли́тель ми́лости изве́ствован, я́ко Бо́г ми́лостив, все́х поми́луй, Трисве́тлая еди́нице, и Тро́ице преблага́я, славосло́вящих Твое́ вели́чествие.
Сла́ва: От све́та присносу́щнаго Отца́, све́та соприсносу́щна ро́ждшася Сло́ва, со Ду́хом исхо́дным све́том, ве́рою сла́вим, и превозно́сим во вся́ ве́ки.
И ны́не, Богоро́дичен:
Врача́ челове́ком Пречи́стая родила́ еси́, всеси́льнаго Сло́ва, Христа́ Го́спода, прароди́тельныя я́звы все́х исцеля́юща, превознося́щих Его́ во ве́ки.
Пе́снь 9.
Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще с небе́сными во́и Тя́ ублажа́ем.
Зре́ти чи́нове херуви́мстии, Влады́ко, добро́ты Твоея́ сла́вы не могу́ще, крилы́ покрыва́ющеся, непреста́нно Тро́ичную пе́снь вопию́т, и триипоста́сную Твоего́ Богонача́лия еди́нственнаго держа́ву сла́вяще.
Твоя́ сия́ния Со́лнце незаходи́мое, Твои́х рабо́в пода́ждь сердца́м, и просвети́ ду́шы, и изба́ви от мно́гих прегреше́ний, Еди́не всеми́лостиве, и Триипоста́сне, и нетле́нныя Твоея́ жи́зни на́с сподо́би.
Сла́ва: Е́же све́т единоче́стный, и трисо́лнечный, и светоде́тельный, Божество́ су́щее, озари́ ве́рою Тя́ пою́щих и от мра́чнаго изба́ви злоде́йства, и сподо́би светле́йших Твои́х селе́ний, я́ко преблаги́й.
И ны́не, Богоро́дичен:
Прему́дре челове́ка пре́жде созда́ Сы́н Тво́й, Де́во, и истле́вшаго обнови́ Тобо́ю, Всепе́тая: и Боже́ственнаго све́та зари́ невече́рния все́х испо́лни, Тя́ Богоро́дицу и́стинною ве́рою сла́вящих.
Та́же припе́вы Григо́риа Синаи́та:
Досто́йно е́сть я́ко вои́стинну, сла́вити Тя́ Бо́га Сло́ва, Его́же трепе́щут и трясу́тся херуви́мы, и славосло́вят си́лы небе́сныя, воскре́сшаго тридне́вно из гро́ба Христа́ Жизнода́вца стра́хом просла́вим.
Воспои́м вси́ Боголе́пно пе́сньми Боже́ственными, Отца́, и Сы́на, и Ду́ха Боже́ственнаго, Триипоста́сную держа́ву, еди́но Ца́рство и Госпо́дьство.
Ю́же пою́т вси́ земноро́днии, и славосло́вят си́лы небе́сныя, от все́х ве́рно покланя́емую, Еди́ницу по существу́ триипоста́сную.
Господонача́льную херуви́м, и Богонача́льную без сравне́ния серафи́м, неразде́льную Тро́ицу во еди́нице, су́щее Богонача́лие Тя́ велича́ем.
Отцу́ безнача́льному и Бо́гу, собезнача́льному Сло́ву со Ду́хом покланя́юся: неразлу́чное еди́но соединя́емое существо́, Тричи́сленную еди́ницу пе́сньми почти́м.
Лучеза́рныя Твоя́ мо́лния возсия́й ми́, Бо́же мо́й триипоста́сне, Вседе́телю, и до́м мя́ покажи́ Твоея́ непристу́пныя сла́вы, све́тел и светоно́сен и неизме́нен.
Его́же трепе́щут и трясу́тся херуви́ми и славосло́вят а́нгельская во́инства, от Де́вы неизрече́нно вопло́щшагося Христа́ Жизнода́вца стра́хом просла́вим.
Та́же, Трисвято́е. Пресвята́я Тро́ице: О́тче на́ш: Ипакои́ гла́са. Го́споди поми́луй, 40. Сла́ва, и ны́не: Честне́йшую херуви́м: И возгла́с от свяще́нника: Бо́же уще́дри ны́:
И моли́тва глаго́лется от иере́а:
Всемогу́щая и Животворя́щая Свята́я Тро́ице, и светонача́льная, я́же ми́рную вся́кую и преми́рную тва́рь, за еди́ну бла́гость от не су́щих приведы́й, и промышля́я, и содержа́щи, и́же по про́чих Твои́х неизрече́нных о земно́м ро́де благодея́ниих, и покая́ние на́м, ра́ди плотска́го неможе́ния, до сме́рти дарова́вый: не оста́ви на́с окая́нных в лука́вых на́ших дея́ниих умре́ти, ниже́ злонача́льнику и зави́стцу и губи́телю посме́шство бы́ти: зри́ши бо, Благосе́рде, ели́к у́бо о́наго на на́с наве́т и вражда́, ели́ко же и на́ше страстова́ние и сла́бость и небреже́ние. Но неоску́дныя Твоя́ бла́гости соде́лай на на́с, мо́лим на вся́кий де́нь и ча́с прогне́вающии Тя́, честны́х и животво́рных за́поведей преступле́нием. И вся́ у́бо всего́ преше́дшаго живота́ на́шего, и до ны́нешняго часа́ согреше́нная на́ми, в дея́ниих или́ глаго́ланиих или́ в помышле́ниих, оста́ви и прости́. Сподо́би же на́с, про́чее сконча́ти житие́ в покая́нии, и умиле́нии, и соблюде́нии святы́х Твои́х повеле́ний. А́ще у́бо сла́достию прельсти́вшеся, многообра́зне согреши́хом, или́ ме́рзкими похотьми́ неполе́зными и вре́дными обольсти́вшеся препроводи́хом: А́ще гне́вом и я́ростию подви́гшеся безслове́сною, кого́ бра́та на́шего оскорби́хом: А́ще язы́ком неизбе́жных и стро́потных, и кре́пких сете́й объя́хомся: А́ще ко́им чу́вств на́ших, или́ все́ми, во́лею, или́ нево́лею, ве́дуще или́ не ве́дуще, от восхище́ния или́ поуче́ния, безу́мно поползо́хомся: А́ще же лука́выми по́мыслы и су́етными со́весть оскверни́хом: А́ще ли ко́им други́м о́бразом прегреши́хом от предприя́тия и обы́чая томи́ми зла́го, прости́ на́м и оста́ви вся́ Всеще́дре, Пребла́же и Многоми́лостиве. И да́руй на́м про́чее бо́дрость и си́лу, во е́же твори́ти во́лю Твою́ бла́гу, и благоуго́дну, и соверше́нну: Да нощна́го и мра́чнаго зла́, светови́дным покая́нием преме́ншеся, и я́ко во дни́ благообра́зно ходя́ще, и очище́ни объяви́мся человеколю́бию Твоему́ недосто́йнии, воспева́юще Тя́ и велича́юще во ве́ки, ами́нь.
В неде́лю на у́трени
по екса́ псалме́х, Бо́г Госпо́дь и яви́ся: на гла́с 6, и глаго́лем тропа́рь: А́нгельския Си́лы на гро́бе Твое́м: два́жды Сла́ва, и ны́не: Благослове́нную нареки́й Твою́ Ма́терь:
И обы́чное стихосло́вие псалтиря́.
По 1-м стихосло́вии седа́льны воскре́сны, гла́с 6.
Гро́бу отве́рсту, а́ду пла́чущуся, Мари́а вопия́ше ко скры́вшымся апо́столом: изыди́те виногра́да де́лателие, пропове́дите воскресе́ния сло́во: воскре́се Госпо́дь, подая́й ми́рови ве́лию ми́лость.
Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́:
Го́споди, предстоя́ше гро́бу Твоему́ Мари́а Магдали́на, и пла́чущи вопия́ше, вертогра́даря Тя́ мня́щи, глаго́лаше: где́ скры́л еси́ ве́чный Живо́т? где́ положи́л еси́, И́же на Престо́ле херуви́мстем? стрегу́щии бо Сего́, от стра́ха омертве́ша. Или́ Го́спода моего́ дади́те ми́, или́ со мно́ю возопи́йте: И́же в ме́ртвых бы́в, и ме́ртвыя воскреси́в, сла́ва Тебе́.
Сла́ва, и ны́не Богоро́дичен:
Преднапису́ет Гедео́н зача́тие, и сказу́ет Дави́д рождество́ Твое́, Богоро́дице: сни́де бо, я́ко до́ждь на руно́, Сло́во во чре́во Твое́, и прозябла́ еси́ без се́мене, Земле́ свята́я, ми́рови спасе́ние, Христа́ Бо́га на́шего, Благода́тная.
По 2-м стихосло́вии седа́льны воскре́сны, гла́с 6:
Живо́т во гро́бе возлежа́ше, и печа́ть на ка́мени надлежа́ше, я́ко Царя́ спя́ща во́ини стрежа́ху Христа́: и враги́ Своя́ неви́димо порази́вый воскре́се Госпо́дь.
Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.
Преднапису́ет Ио́на гро́б Тво́й, и сказу́ет Симео́н воста́ние Боже́ственное, безсме́ртне Го́споди: соше́л бо еси́ я́ко ме́ртв во гро́б, разруши́вый а́дова врата́. Воскре́сл же еси́ кроме́ тле́ния я́ко Влады́ка, во спасе́ние мира, Христе́ Бо́же на́ш, просвети́вый су́щыя во тьме́.
Сла́ва, и ны́не, Богоро́дичен:
Богоро́дице Де́во, моли́ Сы́на Твоего́, во́лею пригвожде́ннаго на Кресте́, и воскре́сшаго из ме́ртвых Христа́ Бо́га на́шего, спасти́ся душа́м на́шым.
По непоро́чных ипакои́, гла́с 6:
Во́льною и животворя́щею Твое́ю сме́ртию, Христе́, врата́ а́дова сокруши́в я́ко Бо́г, отве́рзл еси́ на́м дре́вний ра́й, и воскре́с из ме́ртвых, изба́вил еси́ от тле́ния живо́т на́ш.
Та́же степе́нна, гла́с 6, по два́жды:
На не́бо о́чи мои́ возвожу́ к Тебе́, Сло́ве, уще́дри мя́, да живу́ Тебе́.
Поми́луй на́с уничиже́нных, устроя́я благопотре́бныя Твоя́ сосу́ды, Сло́ве.
Сла́ва: Свято́му Ду́ху, вся́кая всеспаси́тельная вина́, а́ще ко́ему се́й по достоя́нию дхне́т: ско́ро взе́млет от земны́х, восперя́ет, возраща́ет, устроя́ет горе́.
И ны́не, то́йже.
Антифо́н 2:
А́ще не Госпо́дь бы бы́л в на́с, никто́же от на́с проти́ву возмо́гл бы вра́жиим бра́нем одоле́ти: побежда́ющии бо от зде́ возно́сятся.
Зубы́ и́х да не я́та бу́дет душа́ моя́, я́ко птене́ц, Сло́ве: увы́ мне́, ка́ко и́мам от врага́ избы́ти, грехолюби́в сы́й?
Сла́ва: Святы́м Ду́хом обоже́ние все́м, благоволе́ние, ра́зум, ми́р и благослове́ние: равноде́тельный бо е́сть Отцу́ и Сло́ву.
И ны́не, то́йже.
Антифо́н 3:
Наде́ющийся на Го́спода враго́м стра́шни, и все́м ди́вни: горе́ бо зря́т.
В беззако́ния ру́к свои́х, пра́ведных жре́бий, помо́щника Тя́ име́яй Спа́се не простира́ет.
Сла́ва: Свята́го Ду́ха держа́ва на все́х: Ему́же Вы́шняя во́инства покланя́ются со вся́ким дыха́нием до́льным.
И ны́не, то́йже.
Проки́мен, гла́с 6: Го́споди, воздви́гни си́лу Твою́, и прииди́ во е́же спасти́ на́с.
Сти́х: Пасы́й Изра́иля вонми́, наставля́яй я́ко овча́ Ио́сифа.
Вся́кое дыха́ние да хва́лит Го́спода.
Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.
Ева́нгелие воскре́сно, у́треннее 6, от Луки́ зача́ло 114.
Во вре́мя о́но, воскре́с Иису́с от ме́ртвых, ста́ посреде́ ученик свои́х, и глаго́ла и́м: ми́р ва́м. Убоя́вшеся же и пристра́шни бы́вше, мня́ху ду́х ви́дяще. И рече́ и́м, что́ смуще́ни есте́? и почто́ помышле́ния вхо́дят в сердца́ ва́ша? Ви́дите руце́ Мои́, и но́зе Мои́, я́ко са́м А́з е́смь: осяжи́те Мя́ и ви́дите, я́ко ду́х пло́ти и ко́сти не и́мать, я́коже Мене́ ви́дите иму́ща. И сие́ ре́к, показа́ и́м ру́це и но́зе. Еще́ же не ве́рующым и́м от ра́дости, и чудя́щымся, рече́ и́м: и́мате ли что́ сне́дно зде́? Они́ же да́ша Ему́ ры́бы печены́ ча́сть, и от пче́л со́т. И взе́м, пред ни́ми яде́. Рече́ же и́м: сия́ су́ть словеса́, я́же глаго́лах к ва́м, еще́ сы́й с ва́ми, я́ко подоба́ет сконча́тися все́м напи́санным в зако́не Моисе́ове, и проро́цех, и псалме́х о Мне́. Тогда́ отве́рзе и́м у́м разуме́ти писа́ния, И рече́ и́м: я́ко та́ко пи́сано е́сть, и та́ко подоба́ше пострада́ти Христу́, и воскре́снути от ме́ртвых в тре́тий де́нь: И пропове́датися во и́мя Его́ покая́нию, и отпуще́нию грехо́в, во все́х язы́цех, наче́нше от Иерусали́ма. Вы́ же есте́ свиде́телие си́м. И се́ А́з послю́ обетова́ние Отца́ моего́ на вы́: вы́ же седи́те во гра́де Иерусали́мсте, до́ндеже облече́теся си́лою свы́ше. Изве́д же и́х во́н до Вифа́нии, и воздви́г руце́ свои́, и благослови́ и́х. И бы́сть егда́ благословля́ше и́х, отступи́ от ни́х, и возноша́шеся на не́бо. И ти́и поклони́шася ему́, и возврати́шася во Иерусали́м с ра́достию вели́кою. И бя́ху вы́ну в це́ркви, хва́ляще и благословя́ще Бо́га. Ами́нь.
Та́же: Воскре́сние Христо́во ви́девше, поклони́мся свято́му Го́споду Иису́су, еди́ному безгре́шному. Кресту́ Твоему́ покланя́емся Христе́, и свято́е воскресе́ние Твое́ пое́м и сла́вим: Ты́ бо еси́ Бо́г на́ш, ра́зве Тебе́ ино́го не зна́ем, и́мя Твое́ имену́ем. прииди́те вси́ ве́рнии, поклони́мся свято́му Христо́ву воскресе́нию, се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м воскресе́ние Его́: распя́тие бо претерпе́в, сме́ртию сме́рть разруши́.
По 50-м псалме́, Сла́ва:
Моли́твами апо́столов, Ми́лостиве, очи́сти мно́жества согреше́ний на́ших.
И ны́не: Моли́твами Богоро́дицы, Ми́лостиве, очи́сти мно́жества согреше́ний на́ших.
Та́же, гла́с 6:
Поми́луй мя́ Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.
Та́же: Воскре́с Иису́с от гро́ба, я́коже прорече́, даде́ на́м живо́т ве́чный и ве́лию ми́лость.
А́ще ли неде́ля мытаря́, или́ блу́днаго, или́ мясопу́стная, и сыропу́стная, и в про́чия неде́ли Вели́каго поста́, вме́сто моли́твами апо́столов:
Сла́ва, гла́с 8:
Покая́ния отве́рзи ми́ две́ри Жизнода́вче: у́тренюет бо ду́х мо́й ко хра́му свято́му Твоему́, хра́м нося́й теле́сный, ве́сь оскверне́н: но я́ко ще́др очи́сти, благоутро́бною Твое́ю ми́лостию.
И ны́не, Богоро́дичен:
На спасе́ния стези́ наста́ви мя́ Богоро́дице: сту́дными бо окаля́х ду́шу грехми́ и в ле́ности все́ житие́ мое́ ижди́х: но Твои́ми моли́твами изба́ви мя́ от вся́кия нечистоты́.
Та́же, гла́с 6: Поми́луй мя́ Бо́же: [пи́сан вы́ше сего́].
Посе́м: Мно́жества соде́янных мно́ю лю́тых, помышля́я окая́нный, трепе́щу стра́шнаго дне́ су́днаго: но наде́яся на ми́лость благоутро́бия Твоего́, я́ко Дави́д вопию́ ти: поми́луй мя́ Бо́же, по вели́цей твое́й ми́лости.
Кано́н воскре́сен. Гла́с 6.
Пе́снь 1.
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на, ви́дя потопля́ема, Бо́гу побе́дную пе́снь пои́м, вопия́ше.
Припе́в: Сла́ва Го́споди свято́му воскресе́нию Твоему́.
Распросте́ртыми дла́ньми на Кресте́, Оте́ческаго испо́лнил еси́ благоволе́ния благи́й Иису́се вся́ческая: те́мже побе́дную пе́снь Тебе́ вси́ пое́м.
Стра́хом к Тебе́ я́ко рабы́ня, сме́рть повеле́вшися, приступи́ Влады́це живота́, то́ю подаю́щему на́м безконе́чный живо́т и воскресе́ние.
Богоро́дичен: Своего́ прие́мши Соде́теля, я́ко Са́м восхоте́, от безсе́меннаго Твоего́ чре́ва, па́че ума́ воплоща́ема, Чи́стая, тва́рей вои́стинну яви́лася еси́ Влады́чица.
И́н кано́н Кре́стовоскре́сен.
Пе́снь 1.
Ирмо́с: Волно́ю морско́ю скры́вшаго дре́вле, гони́теля мучи́теля, под земле́ю скры́ша, спасе́нных о́троцы: но мы́ я́ко отрокови́цы, Го́сподеви пои́м: сла́вно бо просла́вися.
Суди́лищу Пила́тову предстои́т хотя́й, беззако́нному суду́, я́ко суди́мь Судия́, и от руки́ непра́вды по лицу́ зауша́ется Бо́г: Его́же трепе́щут земля́ и небе́сная.
Просте́рл еси́ Боже́ственныя дла́ни Твоя́ Спа́се, на Пречи́стом Твое́м и Живоно́сном Кресте́, и собра́л еси́ язы́ки в позна́ние Твое́ Влады́ко, покланя́ющыяся Го́споди сла́вному Твоему́ распя́тию.
Крестобогоро́дичен: Стоя́ше сле́з исто́чники испуща́ющи Пренепоро́чная, при Кресте́ Твое́м Спа́се, я́же от ребра́ Твоего́ ка́пли крове́й зря́щи Христе́, и Твою́ безприкла́дную ми́лость сла́вящи.
И́н кано́н Пресвяте́й Богоро́дице, [его́же краестро́чие: Ма́ти Бо́жия, незави́стную ми́ да́ждь благода́ть.]
Ирмо́с: Я́ко по су́ху пешеше́ствовав Изра́иль:
Прича́щшися Е́ва саду́ преслуша́ннаго бра́шна, кля́тву введе́: но сию́ разреши́ла еси́ Чи́стая, благослове́ния нача́ток, Христа́ ро́ждши.
Я́же би́сера от Боже́ственныя мо́лнии Христа́ ро́ждши, страсте́й мои́х мглу́, и прегреше́ний смуще́ние Чи́стая, разжени́ све́том Твоея́ све́тлости.
Язы́ков ча́яние Иа́ков, из Тебе́ воплоща́емаго предзря́ше та́йно, у́мныма очи́ма, Бо́га, изба́вльшаго на́с хода́тайством Твои́м.
Оскуде́вшым князе́м от коле́на Иу́дова, Пречи́стая, Сы́н Тво́й и Бо́г, проше́д во́ждь, над концы́ земны́ми ны́не вои́стинну воцари́ся.
Пе́снь 3.
Ирмо́с: Не́сть свя́т, я́коже Ты́ Го́споди Бо́же мо́й, вознесы́й ро́г ве́рных Твои́х Бла́же, и утверди́вый на́с на ка́мени испове́дания Твоего́.
Бо́га распина́ема пло́тию зря́щи тва́рь, разруша́шеся стра́хом: но содержи́тельною дла́нию на́с ра́ди распя́таго, кре́пко держи́ма бе́.
Сме́ртию сме́рть разоре́на, лежи́т окая́нная без дыха́ния: живота́ бо не терпя́щи Боже́ственнаго прираже́ния, умерщвля́ется кре́пкий, и да́руется все́м воскресе́ние.
Богоро́дичен: Боже́ственнаго рождества́ Твоего́ Чи́стая, вся́кий естества́ чи́н превосхо́дит чу́до: Бо́га бо преесте́ственне зачала́ еси́ во чре́ве, и ро́ждши пребыва́еши Присноде́ва.
И́н.
Ирмо́с: Тебе́ на вода́х пове́сившаго всю́ зе́млю неодержи́мо тва́рь ви́девши на ло́бнем ви́сима, у́жасом мно́гим содрага́шеся, не́сть свя́т, ра́зве Тебе́ Го́споди, взыва́ющи.
Во гро́бе тридне́вствовавый, воскреси́л еси́ животворя́щим воста́нием пре́жде умерщвле́ныя, и осужде́ния разреши́вшеся ра́достно веселя́хуся, се́ избавле́ние прише́л еси́, Го́споди, взыва́юще.
Сла́ва Твоему́ воста́нию Спа́се на́ш, я́ко на́с от а́да тле́ния, и сме́рти изба́вил еси́, я́ко всеси́лен. И пою́ще глаго́лем: не́сть свя́т, ра́зве Тебе́ Го́споди, Человеколю́бче.
Богоро́дичен: Ты́ от Тебе́ ро́ждшагося я́ко ви́дела еси́ уя́звлена копие́м, уязви́лася еси́ се́рдцем Пресвята́я Всенепоро́чная, и ужаса́ющися глаго́лала еси́: что́ Тебе́ воздаде́, Ча́до, наро́д пребеззако́нный?
И́н.
Ирмо́с: Не́сть свя́т, я́коже Ты́:
Тле́нную мою́ пло́ть и сме́ртную, Всечи́стая Богома́ти, из чре́ва Твоего́ несказа́нно прие́м благи́й, и обезтле́нив сию́, ве́чне себе́ связа́л е́сть.
Бо́га воплоща́ема из Тебе́ зря́ще Де́во, ужаса́хуся стра́хом ли́цы а́нгельстии: и я́ко Ма́терь Бо́жию, немо́лчными пе́сньми Тя́ почита́ют.
Ужасе́ся го́ру у́мную ви́дев Тя́ проро́к Дании́л, из нея́же ка́мень отсече́ся кроме́ ру́к: и де́монская ка́пища, Богома́ти, кре́пко сокруши́.
Не мо́жет сло́во Тя́ челове́ческое, ниже́ язы́к Де́во, похвали́ти досто́йно: из Тебе́ бо без се́мене жизнода́вец Христо́с, воплоти́тися Пречи́стая благоволи́.
Пе́снь 4.
Ирмо́с: Христо́с моя́ си́ла, Бо́г и Госпо́дь, честна́я це́рковь Боголе́пно пое́т взыва́ющи, от смы́сла чи́ста о Го́споде пра́зднующи.
Дре́во процвело́ е́сть Христе́, и́стинныя жи́зни: Кре́ст бо водрузи́ся, и напое́н бы́в кро́вию и водо́ю, от нетле́ннаго Твоего́ ребра́ живо́т на́м прозябе́.
Не ктому́ зми́й мне́ ло́жне обоже́ние подлага́ет: Христо́с бо благоде́латель челове́ческаго естества́, ны́не невозбра́нно стезю́ живота́ мне́ отве́рзе.
Богоро́дичен: Я́ко вои́стинну неизвеща́нная и непостижи́мая, я́же Твоего́ Боголе́пнаго Богоро́дице, су́ть рождества́, су́щым на земли́ и на небеси́, Присноде́во та́инства!
И́н.
Ирмо́с: На Кресте́ Твое́ Боже́ственное истоща́ние, прови́дя Авваку́м, ужа́сся вопия́ше: Ты́ си́льных пресе́кл еси́ держа́ву Бла́же, приобща́яся су́щым во а́де, я́ко всеси́лен.
Честны́й Кре́ст Тво́й почита́ем, и гво́зди Христе́, и свято́е копие́ с тро́стию, вене́ц и́же от те́рний, и́миже от а́дова истле́ния изба́вихомся.
Гро́б Спа́се, Тя́ подъя́т во́лею ме́ртва о на́с я́вльшагося, но ника́коже возмо́же сло́ве удержа́ти: я́ко Бо́г бо воскре́сл еси́ спаса́ти ро́д на́ш.
Крестобогоро́дичен: Богороди́тельнице Присноде́во, Спа́са Христа́ челове́ком ро́ждшая, от бе́д и му́ки изба́ви на́с, прибега́ющих ве́рою к Боже́ственному покро́ву Твоему́.
И́н.
Ирмо́с: Христо́с моя́ си́ла, Бо́г и Госпо́дь:
Пое́м Пречи́стая, Тебе́ Всенепоро́чную, и́же Тобо́ю спа́сшиися, и благоче́стно пою́ще взыва́ем: благослове́на, я́же Бо́га Присноде́во ро́ждшая.
Све́т незаходи́мый Де́во, родила́ еси́ су́щым во тьме́ жития́, пло́тию светя́щ Всеблаже́нная: и пою́щым Тя́, ра́дость Присноде́во источи́ла еси́.
Благода́ть процвете́, зако́н преста́, Тобо́ю Всесвята́я: Ты́ бо Чи́стая, родила́ еси́ Го́спода, подаю́щаго на́м Присноде́во оставле́ние.
Ме́ртва мя́ показа́ сада́ вкуше́ние: жи́зни же дре́во, из Тебе́ я́вльшееся Пречи́стая, воскреси́, и ра́йския сла́дости насле́дника мя́ устро́и.
Пе́снь 5.
Ирмо́с: Бо́жиим све́том Твои́м Бла́же, у́тренюющих Ти́ ду́шы любо́вию озари́, молю́ся, Тя́ ве́дети Сло́ве Бо́жий, и́стиннаго Бо́га, от мра́ка грехо́внаго взыва́юща.
Уступа́ют мне́ херуви́ми ны́не, и пла́менное ору́жие Влады́ко, плещи́ мне́ дае́т, Тя́ ви́девше Сло́ве Бо́жий и́стиннаго Бо́га, разбо́йнику пу́ть сотво́ршаго в ра́й.
Не ктому́ бою́ся е́же в зе́млю Влады́ко Христе́ возвраще́ния: Ты́ бо от земли́ мя возве́л еси́ забве́ннаго, благоутро́бия ра́ди мно́гаго, к высоте́ нетле́ния воскресе́нием Твои́м.
Богоро́дичен: И́же Бо́гу Тя́ от души́, Влады́чице ми́ра блага́я, испове́дающих спаси́: Тебе́ бо предста́тельство непобори́мое и́мамы, и́стинную Богороди́тельницу.
И́н.
Ирмо́с: Богоявле́ния Твоего́ Христе́, к на́м ми́лостивно бы́вшаго, Иса́иа све́т ви́дев невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х, и вси́ земноро́днии возра́дуются.
Сне́дию дре́ва во Еде́ме прельсти́выйся, во тлю́ поползе́ родонача́льник, преслу́шавый Го́споди за́поведи Твоея́, Преблаги́й: но сего́ Кресто́м па́ки возве́л еси́ в пе́рвую добро́ту, послушли́в Отцу́ Спа́се бы́вый.
Свое́ю сме́ртию Бла́же, сме́рти потреби́ся держа́ва, исто́чник жи́зни на́м истече́, и безсме́ртие дарова́ся: сего́ ра́ди погребе́нию твоему́, и воскресе́нию ве́рою покланя́емся, и́мже я́ко Бо́г ми́р ве́сь просвети́л еси́.
Крестобогоро́дичен: Живы́й на небесе́х и Творе́ц все́х Госпо́дь во Твою́ Всенепоро́чная, всели́ся неизрече́нно утро́бу, просла́вивый Тя́ превы́шшую небе́с, и святе́йшую чино́в невеще́ственных: те́мже ны́не и́же на земли́ Тя́ ублажа́ем.
И́н.
Ирмо́с: Бо́жиим све́том Твои́м Бла́же:
Чистото́ю возсия́вши све́тло, Боже́ственное пребыва́ние Влады́ки всепе́тая была́ еси́: Ты́ бо еди́на Ма́ти Бо́жия яви́лася еси́, во объя́тиих я́ко Младе́нца Сего́ носи́вши.
Нося́щи добро́ту у́мную, красне́йшия Твоея́ души́, неве́ста Бо́жия была́ еси́, запеча́тствована де́вством чи́стая, и све́том чистоты́ ми́р просвеща́ющи.
Да рыда́ет собра́ние злочести́вых, не пропове́дающих Тя́ я́ве чи́стую Богома́терь: Ты́ бо врата́ Бо́жия све́та яви́лася еси́ на́м, мра́к прегреше́ний разгоня́ющи.
Пе́снь 6.
Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к вопию́ ти: возведи́ от тли́ живо́т мо́й Многоми́лостиве.
Распина́емь Влады́ко гвоздьми́, у́бо кля́тву ю́же на на́с потреби́л еси́: копие́м же пробода́емь в ребро́, Ада́мово рукописа́ние растерза́в, ми́р свободи́л еси́.
Ада́м низведе́ся, ле́стию запя́т бы́в, ко а́дове про́пасти: но и́же естество́м Бо́г же и ми́лостив, сше́л еси́ на взыска́ние, и на ра́му поне́с, совоскреси́л еси́.
Богоро́дичен: Пречи́стая Влады́чице, ро́ждшая челове́ком ко́рмчию Го́спода, страсте́й мои́х непостоя́нное и лю́тое утоли́ смуще́ние, и тишину́ пода́ждь се́рдцу моему́.
И́н.
Ирмо́с: Я́т бы́сть, но не удержа́н в пе́рсех ки́товых Ио́на: Тво́й бо о́браз нося́, страда́вшаго, и погребе́нию да́вшагося, я́ко от черто́га от зве́ря изы́де, приглаша́ше же кустоди́и, храня́щии су́етная и ло́жная, ми́лость сию́ оста́вили есте́.
Христоуби́йца и пророкоуби́йца бы́сть евре́йское мно́жество: я́ко бо проро́ки дре́вле и́стины су́щыя та́йныя лучи́, уби́ти не убоя́ся, си́це и ны́не Го́спода, Его́же пропове́даху они́ тогда́, за́вистию влеко́ми уби́ша: но на́м бы́сть живо́т умерщвле́ние Его́.
Я́т бы́л еси́, но не удержа́н, Спа́се, во гро́бе: а́ще бо и во́лею вкуси́л еси́ сме́рти, сло́ве, но воскре́сл еси́ я́ко Бо́г безсме́ртен, совоздви́гнувый у́зники су́щыя во а́де, и ра́дость жена́м вме́сто печа́ли пре́жния па́ки премени́вый.
Крестобогоро́дичен: Безче́стен Тво́й и ску́ден яви́ся ви́д плотски́й па́че челове́ков, во вре́мя стра́сти: и́бо Божества́ существо́м красе́н добро́тою Дави́ду показа́ся. Но жезло́м Твоего́ Ца́рствия, враго́в сотры́й кре́пость, глаго́лаше Чи́стая: о Сы́не Мо́й и Бо́же, от гро́ба воста́ни.
И́н.
Ирмо́с: Жите́йское мо́ре:
Вели́кий преднаписа́ во проро́цех Моисе́й Тя́ ковче́г, и трапе́зу, и све́щник, и ру́чку, обра́зно назна́менуя воплоще́ние, е́же из Тебе́ вы́шняго, Ма́ти Де́во.
Умерщвля́ется сме́рть, и тле́ние упражня́ется Ада́мова осужде́ния, о Влады́чице, плоду́ Твоему́ прирази́вшееся: жи́знь бо родила́ еси́, от истле́ния избавля́ющую пою́щих Тя́.
Зако́н изнемо́же, и се́нь мимои́де, па́че ума́ и смы́сла я́вльшейся ми́ благода́ти, е́же от Тебе́ Де́во рождества́, Бо́га и Спа́са, Многопе́тая.
Конда́к, гла́с 6.
Живонача́льною дла́нию уме́ршыя, от мра́чных удо́лий жизнода́вец воскреси́в все́х Христо́с Бо́г, воскресе́ние подаде́ челове́ческому ро́ду: е́сть бо все́х Спаси́тель, воскресе́ние, и живо́т, и Бо́г все́х.
И́кос: Кре́ст и погребе́ние Твое́, Жизнода́вче, воспева́ем ве́рнии, и покланя́емся, я́ко а́да связа́л еси́ безсме́ртне, я́ко Бо́г всеси́льный: и ме́ртвыя совоскреси́л еси́, и врата́ сме́ртная сокруши́л еси́, и держа́ву а́дову низложи́л еси́ я́ко Бо́г. Те́мже земноро́днии славосло́вим Тя́ любо́вию воскре́сшаго, и низложи́вшаго вра́жию держа́ву всепа́губную, и все́х воскреси́вшаго в Тя́ ве́ровавших, и ми́р изба́вльшаго от стре́л змии́ных, и от пре́лести вра́жия, я́ко Бо́г все́х.
Пе́снь 7.
Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́ Бо́же оте́ц на́ших.
Рыда́ющее в стра́сти Твое́й со́лнце во мра́к облече́ся, и во дни́ по все́й, Влады́ко, земли́ све́т поме́рче, вопия́: благослове́н еси́ Бо́же оте́ц на́ших.
Облеко́шася, Христе́, схожде́нием Твои́м во све́т преиспо́дняя, пра́отец же весе́лия испо́лнь яви́ся, ликовству́я взыгра́ся, вопия́: благослове́н еси́ Бо́же оте́ц на́ших.
Богоро́дичен: Тобо́ю Ма́ти Де́во, све́т возсия́ все́й вселе́нней све́тлый: Зижди́теля бо Ты́ все́х родила́ еси́ Бо́га. Его́же проси́ Всечи́стая, на́м низпосла́ти ве́рным ве́лию ми́лость.
И́н.
Ирмо́с: Неизрече́нное чу́до, в пещи́ изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: изба́вителю Бо́же благослове́н еси́.
О стра́ннаго о́браза! Изра́иля избавле́й от рабо́ты фарао́нския, распина́ется во́лею от него́, и разреша́ет вери́ги согреше́ний. Его́же ве́рою пое́м: изба́вителю Бо́же благослове́н еси́.
Тебе́ Спа́са на ло́бнем распя́ша, пребеззако́нных о́троцы нечести́вии, врата́ ме́дная и вереи́ сломи́вшаго, во спасе́ние на́с пою́щих: изба́вителю Бо́же благослове́н еси́.
Богоро́дичен: Е́вы дре́вния свобожде́ние ро́ждшая, от кля́твы разреша́еши Ада́ма Де́во чи́стая, те́мже со а́нгелы Тя́, с Сы́ном Твои́м пое́м и вопие́м: изба́вителю Бо́же благослове́н еси́.
И́н.
Ирмо́с: Росода́тельну у́бо пе́щь:
Ю́нош трие́х пе́щь не опали́, рождество́ прообразу́ющих Твое́: Боже́ственный бо о́гнь Тебе́ не опали́в, всели́ся в Тя́, и вся́ научи́ вопи́ти: благослове́н еси́ Бо́же оте́ц на́ших.
Блажа́т концы́ Тя́ Всечи́стая Ма́ти, я́коже прорекла́ еси́, просвеща́еми светолу́чными сия́ньми Твои́ми и благода́тию, пою́ще вопию́т: благослове́н еси́ Бо́же оте́ц на́ших.
Па́губныя у́бо зу́бы в мя́ вонзе́ зми́й лука́внейший, но са́м Тво́й Богома́ти, сокруши́ Сы́н, кре́пость же мне́ даде́ вопи́ти: благослове́н еси́ Бо́же оте́ц на́ших.
Очисти́лище естества́ Ты́ еси́ еди́на Богоблаже́нная, на ра́му во херуви́мску седя́щаго Бо́га во объя́тиих нося́щи, вопие́ши: благослове́н еси́ Бо́же оте́ц на́ших.
Пе́снь 8.
Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Иуде́йския дре́вле пророкоуби́йцы лю́ди, Богоуби́йцы за́висть ны́не соде́ла, Тебе́ на Кре́ст возне́сшыя, Сло́ве Бо́жий: Его́же превозно́сим во вся́ ве́ки.
Небе́снаго кру́га не оста́вил еси́, и во а́д соше́д, всего́ совоздви́гл еси́ лежа́щаго во гно́ищи Христе́, челове́ка, Тя́ превознося́ща во вся́ ве́ки.
Богоро́дичен: От Све́та светода́вца Сло́ва зачала́ еси́, и ро́ждши неизрече́нно Сего́ просла́вилася еси́: ду́х бо в Тя́ Отрокови́це Бо́жий всели́ся. Те́мже Тя́ пое́м во вся́ ве́ки.
И́н.
Ирмо́с: Ужасни́ся боя́йся не́бо, и да подви́жатся основа́ния земли́: се́ бо в мертвеце́х вменя́ется, в вы́шних живы́й, и во гро́б ма́л странноприе́млется: Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.
Ужасе́ся вся́к слу́х, ка́ко Вы́шний во́лею прии́де на зе́млю, а́дову кре́пость разруши́ти кресто́м и погребе́нием, и вся́ воздви́гнути зва́ти: о́троцы благослови́те, свяще́нницы воспо́йте, лю́дие превозноси́те во вся́ ве́ки.
Преста́ а́дово мучи́тельство, и ца́рство уничижи́ся про́чее: на Кресте́ бо на земли́ водрузи́вся, и́же над все́ми Бо́г, сего́ могу́тство низложи́: Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.
О неизрече́ннаго Твоего́, Христе́, человеколю́бия, и неизглаго́ланных бла́г! мене́ бо ви́дя погиба́юща во а́дове темни́це, стра́сти претерпе́вый изба́вил еси́: те́мже Тя́ благослови́м все́х Влады́ку, и превозно́сим во вся́ ве́ки.
И́н.
Ирмо́с: Из пла́мене преподо́бным:
Позлаще́нною ри́зою я́коже Цари́цу Сы́н Тво́й просвети́в заре́ю Ду́ха, Тебе́ одесну́ю себе́ поста́ви Пречи́стая, Его́же превозно́сим во вся́ ве́ки.
И́же хоте́нием еди́ным ми́р водрузи́вый, от Пречи́стыя Твоея́ утро́бы пло́ть взе́млет, свы́ше сию́ назда́ти хотя́: Его́же превозно́сим во вся́ ве́ки.
Счета́нием Сло́ва ко мне́ челове́ку, Боже́ственное жили́ще была́ еси́ Пречи́стая, просия́вши я́ве де́вства све́тлостию: те́мже Тя́ пое́м во вся́ ве́ки.
Златоза́рный Тя́ све́щник предвообрази́, прии́мшую несказа́нно све́т непристу́пный, ра́зумом Свои́м озаря́ющ вся́ческая: те́мже Тя́ пое́м Чи́стая во ве́ки.
Та́же пое́м, Честне́йшую:
Пе́снь 9.
Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти: Тобо́ю же Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя́ ублажа́ем.
Страсте́й неприча́стен Ты́ пребы́л еси́ Сло́ве Бо́жий, пло́тию приобщи́вся страсте́м: но реши́ши от страсте́й челове́ка, страсте́м бы́в стра́сть, Спа́се на́ш: Еди́н бо еси́ безстра́стен и всеси́лен.
Тлю́ сме́ртную прие́м, и тле́ния соблю́л еси́ те́ло Твое́ невку́сно: Твоя́ же животворя́щая и Боже́ственная Влады́ко, душа́ во а́де не оста́влена бы́сть: но я́коже от сна́ воскре́с, на́с совоздви́гл еси́.
Тро́ичен: Бо́га отца́, Сы́на собезнача́льна, вси́ челове́цы устна́ми у́бо чи́стыми сла́вим, неизрече́нную же и пресла́вную Ду́ха Всесвята́го си́лу чти́м: еди́на бо еси́ всеси́льная Тро́ице неразлу́чная.
И́н.
Ирмо́с: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́г, ве́рою и любо́вию Тя́ велича́ющыя.
А́ще и во гро́б соше́л еси́, я́ко ме́ртв жизнода́вче: но а́дову кре́пость разруши́л еси́, Христе́, совоздви́гнув ме́ртвыя, я́же и поглоти́, и воскресе́ние все́м пода́л еси́, я́ко Бо́г ве́рою и любо́вию Тя́ велича́ющым.
Да ра́дуется тва́рь, и да процвете́т я́ко кри́н: Христо́с бо от ме́ртвых воста́ я́ко Бо́г. Где́ твое́ сме́рте, ны́не жа́ло, воззове́м? где́ твоя́, а́де, побе́да: низложи́ тя́ в зе́млю возвы́сивый ро́г на́ш, я́ко благоутро́бен.
Крестобогоро́дичен: Но́сиши нося́щаго вся́, и де́ржиши я́ко Младе́нца в рука́х, из руки́ избавля́ющаго на́с бори́теля врага́, Пречи́стая Влады́чице: и ви́диши на Кре́ст дре́ва возвыша́ема от гро́ба зло́бы на́с возвы́сившаго.
И́н.
Ирмо́с: Бо́га челове́ком не возмо́жно ви́дети:
Звезда́ сия́ющи заря́ми Божества́ от Иа́кова, от мра́ка содержи́мым возсия́: Тобо́ю бо Всечи́стая Христо́с Бо́г Сло́во воплоще́нно, и́мже просвеща́еми, с небе́сными во́и Тя́ ублажа́ем.
Укре́плься си́лою Твое́ю и благода́тию, Тебе́ пе́снь усе́рдно от се́рдца возложи́х: но сию́ приими́ Де́во чи́стая, благода́ть воздаю́щи Твою́ многосве́тлую, от нетле́нных сокро́вищ, Богоблаже́нная.
Поста́в показа́лася еси́ я́ве Божества́, в не́мже ри́зу телесе́ Сло́во истка́, Богосоде́лав мо́й Де́во зра́к: в него́же обле́кся все́х Спасе́, от смы́сла чи́ста Тебе́ велича́ющих.
Ме́ртвым воскресе́ние ны́не дарова́ся, Твои́м несказа́нным и неизрече́нным рождество́м, Богоро́дице всечи́стая: Жи́знь бо из Тебе́ пло́тию обле́кшися, все́м возсия́, и сме́ртную дря́хлость, я́ве разруши́.
По катава́сии ектениа́: и Свя́т Госпо́дь Бо́г на́ш.
Посе́м ексапостила́рий у́тренний, гла́с 6.
Показу́я я́ко челове́к, Спа́се еси́ по существу́, посреде́ ста́в воскре́с от гро́ба, и бра́шна сопричасти́лся еси́, учи́л еси́ креще́нию покая́ния: а́бие же к небе́сному возне́слся еси́ Отцу́, и ученико́м Уте́шителя посла́ти обеща́л еси́, пребоже́ственный Богочелове́че, сла́ва Твоему́ воста́нию.
Сла́ва, и ны́не, Богоро́дичен:
Творе́ц созда́ния, и Бо́г все́х, пло́ть челове́ческую прия́т от пречи́стых крове́й Твои́х, Всесвята́я Де́во, и истле́вшее мое́ все́ естество́ новосоде́ла, па́ки я́коже пре́жде рождества́, оста́вль по рождестве́. Те́мже Тя́ ве́рно вси́ восхваля́ем, зову́ще: ра́дуйся, Влады́чице ми́ра.
На хвали́тех стихи́ры воскре́сны, гла́с 6.
Сти́х: Сотвори́ти в ни́х су́д напи́сан, сла́ва сия́ бу́дет все́м преподо́бным его́.
Кре́ст Тво́й, Го́споди, жи́знь и воскресе́ние лю́дем Твои́м е́сть: и наде́ющиися на Него́, Тебе́ воскре́сшаго Бо́га на́шего пое́м, поми́луй на́с.
Сти́х: Хвали́те Бо́га во святы́х Его́, хвали́те Его́ во утвержде́нии си́лы Его́.
Погребе́ние Твое́, Влады́ко, ра́й отве́рзе ро́ду челове́ческому: и от истле́ния изба́вльшеся, Тебе́ воскре́сшаго Бо́га на́шего пое́м, поми́луй на́с.
Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.
Со Отце́м и Ду́хом Христа́ воспои́м, воскре́сшаго из ме́ртвых, и к Нему́ вопии́м: Ты́ живо́т еси́ на́ш, и воскресе́ние, поми́луй на́с.
Сти́х: Хвали́те Его́ во гла́се тру́бнем, хвали́те Его́ во псалти́ри и гу́слех.
Тридне́вен воскре́сл еси́, Христе́, от гро́ба, я́коже пи́сано е́сть, совоздви́гнувый пра́отца на́шего: те́мже Тя́ и сла́вит ро́д челове́ческий, и воспева́ет Твое́ воскресе́ние.
И́ны стихи́ры, Анато́лиевы, гла́с то́йже.
Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.
Го́споди, ве́лие и стра́шно е́сть Твоего́ воскресе́ния та́инство: та́ко бо произше́л еси́ от гро́ба, я́ко жени́х от черто́га, сме́ртию сме́рть разруши́вый, да Ада́ма свободи́ши. Те́мже на небесе́х а́нгели ликовству́ют, и на земли́ челове́цы сла́вят, е́же на на́с бы́вшее благоутро́бие Твое́ Человеколю́бче.
Сти́х: Хвали́те то́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.
О пребеззако́ннии иуде́е, где́ су́ть печа́ти и сре́бреницы, я́же да́сте во́ином? не укра́дено бы́сть сокро́вище, но воскре́се я́ко си́лен: са́ми же посрами́стеся, отве́ргшиися Христа́ Го́спода сла́вы, пострада́вша и погребе́на, и воскре́сша из ме́ртвых: Тому́ поклони́мся.
Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.
Запеча́тану гро́бу, ка́ко окра́дени бы́сте иуде́е стра́жи поста́вльше, и зна́мения поло́жше? две́рем заключе́нным про́йде Ца́рь. Или́ я́ко ме́ртва предста́вите, или́ я́ко Бо́гу поклони́теся, с на́ми пою́ще: сла́ва Го́споди Кресту́ Твоему́, и воскресе́нию Твоему́.
Сти́х: Испове́мся Тебе́ Го́споди, все́м се́рдцем мои́м, пове́м вся́ чудеса́ Твоя́.
Живоприя́тнаго Твоего́ гро́ба, мироно́сицы жены́, рыда́юще достиго́ша, Го́споди, и ми́ра нося́ще те́ло Твое́ пречи́стое пома́зати иска́ху. Обрето́ша же светоно́сна а́нгела на ка́мени седя́ща, и к ни́м веща́юща и глаго́люща: что́ слезите́, и́же из ре́бр источи́вшаго жи́знь ми́рови? что́ и́щете я́ко ме́ртва во гро́бе безсме́ртнаго, те́кше же па́че возвести́те того́ ученико́м, сла́внаго Его́ воскресе́ния всеми́рное ра́дование: и́мже и на́с, Спа́се, просвети́вый, да́руй очище́ние и ве́лию ми́лость.
Сла́ва, гла́с 6. Стихи́ра ева́нгльская:
И́стинный ми́р Ты́, Христе́, к челове́ком Бо́жий, ми́р Тво́й дая́й по воста́нии ученико́м, пристра́шны показа́л еси́ я́, мня́щыя ду́х ви́дети: но ути́шил еси́ мяте́ж души́ и́х, показа́вый ру́це и но́зе Твои́. Оба́че не ве́рующым еще́, бра́шен причаще́нием, и уче́ний воспомина́нием, отве́рзл еси́ и́х у́м, е́же разуме́ти писа́ния: и́мже и Оте́ческое обетова́ние обеща́в, и благослови́в я́, отступи́л еси́ на не́бо. Те́мже с ни́ми покланя́емся Тебе́, Го́споди, сла́ва Тебе́.
И ны́не, Богоро́дичен:
Преблагослове́нна еси́, Богоро́дице Де́во, вопло́щшим бо ся из тебе́ а́д плени́ся, Ада́м воззва́ся, кля́тва потреби́ся, е́ва свободи́ся, сме́рть умертви́ся, и мы́ ожи́хом. Те́м воспева́юще вопие́м: благослове́н Христо́с Бо́г, благоволи́вый та́ко, сла́ва тебе́.
Славосло́вие вели́кое.
По славосло́вии тропа́рь воскре́сный, и в 1 у́бо гла́с, 3, 5, 7, глаго́лем се́й:
Дне́сь спасе́ние ми́ру бы́сть, пое́м воскре́сшему из гро́ба, и нача́льнику жи́зни на́шея: разруши́в бо сме́ртию сме́рть, побе́ду даде́ на́м и ве́лию ми́лость.
Во гла́с же, 2, 4, 6, 8, глаго́лем се́й:
Воскре́с из гро́ба, и у́зы растерза́л еси́ а́да, разруши́л еси́ осужде́ние сме́рти, Го́споди, вся́ от сете́й врага́ изба́вивый: яви́вый же себе́ апо́столом твои́м, посла́л еси́ я́ на про́поведь, и те́ми ми́р тво́й по́дал еси́ вселе́нней, еди́не многоми́лостиве.
На литурги́и
Блаже́нна, гла́с 6:
Помяни́ мя, Бо́же Спа́се мо́й, егда́ прии́деши во Ца́рствии Твое́м: и спаси́ мя я́ко Еди́н Человеколю́бец.
Сти́х: Блаже́ни чи́стии се́рдцем, я́ко ти́и Бо́га у́зрят.
Дре́вом Ада́ма прельсти́вшагося, дре́вом кре́стным па́ки спа́сл еси́, и разбо́йника вопию́ща: помяни́ мя Го́споди, во Ца́рствии Твое́м.
Сти́х: Блаже́ни миротво́рцы, я́ко ти́и сы́нове Бо́жии нареку́тся.
А́дова врата́ и вереи́ сокруши́вый Жизнода́вче, воскреси́л еси́ вся́, Спа́се, вопию́щыя: сла́ва воста́нию Твоему́.
Сти́х: Блаже́ни изгна́ни пра́вды ра́ди, я́ко те́х е́сть Ца́рство небе́сное.
Помяни́ мя, и́же сме́рть плени́вый погребе́нием Твои́м, и воскресе́нием Твои́м ра́дости вся́ испо́лнивый, я́ко благоутро́бен.
Сти́х: Блаже́ни есте́, егда́ поно́сят ва́м и изжену́т, и реку́т вся́к зо́л глаго́л на вы́ лжу́ще Мене́ ра́ди.
Мироно́сицы ко гро́бу прише́дше, а́нгела зову́ща слы́шаху: Христо́с воскре́се, просвети́вый вся́ческая.
Сти́х: Ра́дуйтеся и весели́теся, я́ко мзда́ ва́ша мно́га на небесе́х.
И́же на дре́ве кре́стнем пригвозди́вшагося, и ми́р от пре́лести изба́вльшаго, согла́сно вси́ Христа́ воспои́м.
Сла́ва, Тро́ичен:
Отца́, и Сы́на славосло́вим, и Ду́ха Свята́го, глаго́люще: Тро́ице свята́я, спаси́ ду́шы на́ша.
И ны́не, Богоро́дичен:
Неизрече́нно в после́дняя заче́нши, и ро́ждши созда́теля Твоего́ Де́во, спаса́й Тя́ велича́ющыя.
На литурги́и проки́мен, гла́с 6:
Спаси́, Го́споди, лю́ди Твоя́, и благослови́ достоя́ние Твое́.
Сти́х: К Тебе́ Го́споди, воззову́ Бо́же мо́й, да не премолчи́ши от Мене́.
Та́же Апо́стол к ефесе́ем, зача́ло 233:
Бра́тие, возмога́йте во Го́споде, и в держа́ве кре́пости Его́: Облецы́теся во вся́ ору́жия Бо́жия, я́ко возмощи́ ва́м ста́ти проти́ву ко́знем диа́вольским: я́ко не́сть на́ша бра́нь к кро́ви и пло́ти: но к нача́лом и ко власте́м, и к миродержи́телем тьмы́ ве́ка сего́, к духово́м зло́бы, поднебе́сным. Сего́ ра́ди приими́те вся́ ору́жия Бо́жия, да возмо́жете проти́витися в де́нь лю́т, и вся́ соде́явше ста́ти. Ста́ните у́бо препоя́сани чресла́ ва́ша и́стиною, и обо́лкшеся в броня́ пра́вды, И обу́вше но́зе во угото́вание благовествова́ния ми́ра: Над все́ми же восприи́мше щи́т ве́ры, в не́мже возмо́жете вся́ стре́лы лука́ваго разжже́нныя угаси́ти. И шле́м спасе́ния восприими́те, и ме́чь духо́вный, и́же е́сть глаго́л Бо́жий.
Аллилу́иа, гла́с 6: Живы́й в по́мощи Вы́шняго:
Сти́х: Рече́т Го́сподеви: засту́пник мо́й еси́.
Ева́нгелие от Луки́, зача́ло 71:
Во вре́мя о́но, бе́ уча́ Иису́с на еди́ном от со́нмищ в суббо́ту. И се́ жена́ бе́ иму́щи ду́х неду́жен ле́т осмьна́десять, и бе́ слука́: и не могу́щи восклони́тися отню́д. Ви́дев же ю́ Иису́с, пригласи́, и рече́ е́й: же́но, отпущена́ еси́ от неду́га твоего́. И возложи́ на ню́ ру́це: и а́бие простре́ся, и сла́вляше Бо́га. Отвеща́в же старе́йшина собо́ру, негоду́я, зане́ в суббо́ту исцели́ ю́ Иису́с, глаго́лаше наро́ду: ше́сть дни́й е́сть, в ня́же досто́ит де́лати: в ты́я у́бо приходя́ще цели́теся, а не в де́нь суббо́тный. Отвеща́в же у́бо ему́ Госпо́дь, и рече́: лицеме́ре, ко́ждо ва́с в суббо́ту не отреша́ет ли своего́ вола́, или́ осла́ от я́слий, и ве́д напая́ет? Сию́ же дще́рь Авраа́млю су́щу, ю́же связа́ сатана́ се́ осмо́е на́десяте ле́то, не досто́яше ли разреши́тися е́й от ю́зы сея́, в де́нь суббо́тный? И сия́ Ему́ глаго́лющу, стыдя́хуся вси́ противля́ющиися Ему́: и вси́ лю́дие ра́довахуся о все́х сла́вных быва́ющих от Него́.
Прича́стен:
Хвали́те Го́спода с небе́с, хвали́те Его́ в вы́шних.