[Глава 26] Слу́жба о́бща безме́здником и чудотво́рцем

Ве́чер,

на Го́споди воззва́х, стихи́ры, гла́с 4.

Подо́бен: Да́л еси́ зна́мение:

Вода́ми духо́вными ꙳ я́ко ре́ки наводня́емы, ꙳ и я́ве напо́лншеся, тва́рь напоя́ете Богозна́меньми, ꙳ и пресла́вными исцеле́ний дарова́нии, ꙳ и душетле́нныя стра́сти изсуша́ете, ꙳ и неду́ги исцеля́ете, ꙳ и отгоня́ете ду́хи, ꙳ Богоно́снии безсре́бреницы, и́мярек, ꙳ моли́твенницы о душа́х на́ших.

Стра́сти безслове́сныя ꙳ поко́рше святи́и, ꙳ душе́вными си́лами, ꙳ челове́ком и ското́м благодея́ние подава́ете, ꙳ от Христа́ дарова́нием исцеле́ний обога́щшеся. ꙳ Те́мже свяще́нное ва́ше, ꙳ и светоно́сное торжество́ соверша́юще, ꙳ про́сим очище́ния душа́м на́шым.

Святы́й хра́м ва́ш, ꙳ я́ко не́бо показа́ся светоза́рное и спаси́тельное, ꙳ и я́ко зве́зды чудеса́ спаси́тельная ны́не притяжа́вше, ꙳ я́коже со́лнце све́тло, ꙳ Боже́ственных исцеле́ний де́йство, и́мярек, преблаже́нне, ꙳ и́мярек, пресла́вне, ꙳ Госпо́дни служи́тели, и моли́твенницы о душа́х на́ших.

А́ще и́мать самогла́сен, Сла́ва, гла́с 8.

Кто́ не удиви́тся; кто́ не просла́вит; кто́ не воспое́т ве́рно му́дрых и пресла́вных безсре́бренников чудеса́; я́ко и по свято́м и́х преставле́нии все́м подаю́т притека́ющым ве́рою бога́тно врачева́ние: и честны́я и святы́я мо́щи те́х то́чат благода́ть врачева́ний. О дво́ице свята́я! о честны́я главы́! о му́дросте и сла́во, от Бо́га да́нныя ва́м благода́ти! те́мже пе́сньми зове́м благоде́телю Бо́гу, показа́вшему ты́я на врачева́ние ду́ш и теле́с на́ших.

И ны́не, Богоро́дичен:

Ра́дуйся, вселе́нныя похвало́. Ра́дуйся, хра́ме Госпо́день. Ра́дуйся, горо́ приосене́нная. Ра́дуйся, все́х прибе́жище. Ра́дуйся, све́щниче златы́й. Ра́дуйся, сла́во правосла́вных честна́я. Ра́дуйся, Мари́е Ма́ти Христа́ Бо́га. Ра́дуйся, раю́. Ра́дуйся, Боже́ственная трапе́зо. Ра́дуйся, се́не. Ра́дуйся, ру́чко всезлата́я. Ра́дуйся, все́х упова́ние.

Крестобогоро́дичен:

Подо́бен: Го́споди, а́ще и на суди́щи:

На кресте́ пове́шена зря́щи чи́сто Тебе́ ро́ждшая Го́спода, и бли́з бы́вши, пла́чущи глаго́лаше: Ча́до, что́ сие́ стра́ждеши пло́тию, и тщи́шися безча́дствовати Мя́? потщи́ся просла́витися, я́ко да возвели́чуся стра́стию Твое́ю.

А́ще пра́зднуеши с полиеле́ем, глаго́ли Богоро́дичен воскре́сный: Ца́рь небе́сный:

Вхо́д. Проки́мен дне́.

Чте́ния 3 му́ченическая, [пи́сана в конце́ кни́ги сея́.]

На стихо́вне стихи́ры, гла́с 1:

Подо́бен: Небе́сных чино́в:

Чуде́с луча́ми облиста́вше ꙳ вселе́нную всю́ просвети́сте, ꙳ святи́и безме́здницы, ꙳ пресве́тлии свети́льницы, ꙳ небеси́ уподо́бистеся благода́тию, ꙳ высо́каго жи́тельства доброде́тельми, ꙳ зве́зды предлага́еми.

Сти́х: Святы́м, и́же су́ть на земли́ его́, удиви́ Госпо́дь вся́ хоте́ния своя́ в ни́х.

Дождеро́дныя о́блаки преизя́ществующя, ꙳ многотеку́щими благода́тей чудесы́, ꙳ му́ченицы Госпо́дни, ꙳ всю́ зе́млю мы́сленно напоя́ете, ꙳ здра́вая песнопе́ния Бо́гу ꙳ приноси́ти понужда́ющя.

Сти́х: Се́ что́ добро́ или́ что́ красно́, но е́же жи́ти бра́тии вку́пе.

Исцеля́ти стра́сти души́ и телесе́, ꙳ хи́трость от Бо́га и́стинно прие́мше, ꙳ му́ченицы Госпо́дни, ꙳ преесте́ственно исцеля́ете вся́, ꙳ не челове́ческими лечба́ми враче́бными, ꙳ но Боже́ственными дохнове́ньми.

Сла́ва, гла́с 4:

Исто́чник исцеле́ний иму́ще святи́и безсре́бреницы, и́мярек, исцеле́ния подае́те все́м тре́бующым, я́ко велича́йших даро́в сподо́бльшеся от приснотеку́щаго исто́чника Спа́са Христа́. Рече́ бо к ва́м Госпо́дь, я́ко единоревни́телем апо́столов: се́ да́х ва́м вла́сть над ду́хи нечи́стыми, я́коже ты́я изгони́ти, и цели́ти вся́к неду́г и вся́ку я́зю. Те́мже в повеле́ниих Его́ до́бре пожи́вше, ту́не прия́сте, ту́не подае́те, врачу́юще стра́сти ду́ш и теле́с на́ших.

И ны́не, Богоро́дичен воскре́сный: При́зри на моле́ния:

А́ще ли не пра́зднуеши, глаго́ли се́й Богоро́дичен:

Богоро́дице все́х Цари́це, правосла́вных похвало́, ерети́чествующих шата́ния разори́, и ли́ца и́х посрами́ не кла́няющихся, ниже́ чту́щих, Пречи́стая, честны́й Тво́й о́браз.

Крестобогоро́дичен: Распина́ема ви́дящи, ꙳ и в ре́бра пробода́ема копие́м, ꙳ Пречи́стая, Христа́ Человеколю́бца, ꙳ пла́чущи вопия́ше: ꙳ что́ сие́ Сы́не Мо́й? ꙳ что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м? ꙳ и тщи́шися безча́дствовати Мя́ Вселюбе́знейше? ꙳ дивлю́ся Благоутро́бне, Твоему́ во́льному распя́тию.

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 8:

Святи́и безсре́бреницы и чудотво́рцы, посети́те не́мощи на́ша: ту́не прия́сте, ту́не дади́те на́м.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме седа́лен, гла́с 2.

Вели́ких досто́йни бы́вше дарова́ний сла́внии, во смире́ннем житии́ на земли́ пожи́сте, и преходя́ще всю́ду, ту́не боля́щым неду́ги и стра́сти исцеля́юще, яви́стеся а́нгелом собесе́дницы, и́мярек, ве́рнии, бра́тие прекра́снии, и на́ша стра́сти моли́твами ва́шими исцели́те. [Два́жды.]

Сла́ва, и ны́не, Богоро́дичен:

Милосе́рдия су́щи исто́чник, ми́лости сподо́би на́с Богоро́дице, при́зри на лю́ди согреши́вшыя, яви́ я́ко при́сно си́лу Твою́: на Тя́ бо упова́юще, ра́дуйся, вопие́м Ти́, я́коже иногда́ Гаврии́л, безпло́тных архистрати́г.

По 2-й кафи́сме седа́лен, гла́с 1.

Страстоте́рпцы Христо́вы, и́мярек, моли́теся за ны́, ве́рою приходя́щыя к ва́м: вы́ бо моли́твами ва́шими подае́те исцеле́ния благода́ть, и премно́гия неду́ги отгоня́ете, я́ко сохра́нницы жи́зни на́шея. [Два́жды.]

Сла́ва, и ны́не, Богоро́дичен:

Пречи́стая Богоро́дице, на небесе́х благослове́нная, и на земли́ славосло́вимая, ра́дуйся Неве́сто неневе́стная.

По Хвали́те и́мя Госпо́дне, припе́в:

Велича́ем ва́с чудотво́рцы сла́внии, и́мярек, и чте́м честна́я страда́ния ва́ша, я́же за Христа́ претерпе́ли есте́.

Псало́м избра́нный: Бо́г на́м прибе́жище и си́ла:

По полиеле́и, седа́лен, гла́с 5:

Подо́бен: Собезнача́льное сло́во:

Возсия́ дне́сь пра́зднество страстоте́рпцев, и́мярек, име́ют бо с небесе́ зарю́. Ли́к а́нгельский торжеству́ет, и челове́ческий ро́д спра́зднует: те́мже си́и мо́лят о душа́х на́ших. [Два́жды.]

Сла́ва, и ны́не, Богоро́дичен:

Ди́вныя Де́вы та́йна, всему́ ми́ру яви́ся спасе́ние, из Нея́же роди́ся ра́дость: Го́споди, сла́ва Тебе́.

Степе́нна, 1-й антифо́н, 4-го гла́са.

Проки́мен: Святы́м, и́же су́ть на земли́ его́, удиви́ Госпо́дь вся́ хоте́ния Своя́ в ни́х.

Сти́х: Предзре́х Го́спода предо мно́ю вы́ну:

Вся́кое дыха́ние:

Ева́нгелие, [пи́сано в конце́ кни́ги сея́.]

По 50-м псалме́ стихи́ра, гла́с 1:

Светоза́рная, и свята́я, и благообра́зная му́чеников, и́мярек, всепра́зднственная па́мять, я́же всю́ зе́млю просвеща́ющи, мра́к грехо́вный отгоня́ющи, лечба́м благода́ть источа́ет.

Кано́н, гла́с 8.

Пе́снь 1.

Ирмо́с: Истря́сшему в мо́ри мучи́тельство фарао́не, и Изра́иля су́шею наста́вльшему пои́м Христу́: я́ко просла́вися во ве́ки.

Я́вльшаго во все́м ми́ре безме́здники и врачи́, и́мярек, и все́х исцеля́ющыя неду́ги благода́тию, воспои́м изба́вителя Спа́са Христа́: я́ко просла́вися во ве́ки.

От духо́вных благода́тей ре́ки чуде́сныя источа́ют святи́и, и неду́ги исцеля́ют, восхва́лим ве́рнии да́вшаго и́м вла́сть сию́: я́ко просла́вися во ве́ки.

Моле́ния безсре́бреницы вра́чеве, Бо́гу принеси́те, я́ко да изба́вит ны́ искуше́ний и скорбе́й мно́гих, и тре́петнаго и стра́шнаго тогда́ муче́ния.

Богоро́дичен: Засту́пнице при́сно скорбя́щих, спасе́ние и упова́ние неча́емых Богоро́дице всехва́льная, моли́ при́сно Христа́, изба́витися на́м от бе́д.

Пе́снь 3.

Ирмо́с: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии твое́м.

Та́йныя лучи́ земны́м яви́л еси́ Го́споди, святы́я Твоя́, и́мярек, просвеща́ющыя ве́сь ми́р, яви́ и на на́с ми́лости Твоя́!

Я́ко ту́не прия́сте да́р от Бо́га, ту́не и подае́те исцеле́ния, прогоня́юще бе́сы, по глаго́лу Го́спода Бо́га на́шего.

Ми́р пое́т ва́ша, святи́и, всегда́ мно́гая благодея́ния, и чуде́с мно́жество, чудотво́рцы вра́чеве, а́нгел все́х равностоя́теле.

Богоро́дичен: Прозя́бшую от Дави́да на земли́, и Бо́га ро́ждшую воплоще́ннаго из Тебе́, хва́лим Тя́ Пречи́стая, я́ко се́нь и Престо́л, и две́рь Бо́жию.

Седа́лен, гла́с 4.

Подо́бен: Вознесы́йся на Кре́ст:

До́лу влеку́щыя сла́сти попра́вше, к муче́ния страда́льцы Боже́ственней высоте́ све́тло взя́стеся благода́тию, и́мярек, и и́мярек, вселе́нныя свети́льницы. Те́мже мо́лимся, омраче́ния греха́ и неду́гов изба́вите ны́, су́щаго над все́ми Бо́га моля́ще.

Сла́ва, и ны́не, Богоро́дичен:

Стена́ непобеди́мая на́м христиа́ном еси́ Богоро́дице Де́во, к Тебе́ бо прибега́юще, невреди́мы пребыва́ем, и па́ки согреша́юще, и́мамы Тя́ моли́твенницу. Те́м благодаря́ще вопие́м Ти́: ра́дуйся Благода́тная, Госпо́дь с Тобо́ю.

Крестобогоро́дичен: Де́во Пренепоро́чная Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́: Его́же благослове́нная моля́щи не преста́й, проще́ние прегреше́ний на́м дарова́ти.

Пе́снь 4.

Ирмо́с: Та́йно проро́к предзря́, от Де́вы Тя́, Сло́ве, воплоща́ема, пе́сненно вопия́ше: сла́ва си́ле Твое́й Го́споди.

Ди́вен Спа́с е́сть Бо́г на́ш, я́ко лежа́т во гробе́х святы́х его́ на́ги ко́сти, и де́йствуют в ми́ре чудеса́ ди́вна и стра́шна: сла́ва си́ле Твое́й Го́споди.

Земна́я оста́вльше я́ко тле́емая, Сио́на бы́сте насле́дницы, и Христо́ва Ца́рствия досто́йни гра́ждане, святи́и.

Досто́йно хвали́ми есте́ на земли́ исцели́тели неду́жных безме́здницы, и́мярек: я́ко и по кончи́не вся́ от неду́г свобожда́ете.

Богоро́дичен: Ра́дуйся, ски́ние Бо́жия сла́вы: ра́дуйся, ору́жие и Престо́ле о́гненный: ра́дуйся, горо́ приосене́нная, от Нея́же отсече́ся ка́мень, Христо́с.

Пе́снь 5.

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве Тебе́ ино́го не ве́мы.

Прии́мше вла́сть от Бо́га безме́здницы, и́мярек, все́х исцеля́ете неду́жных боле́зни.

Ве́лия дарова́ния Госпо́дня, служи́тели святи́и, сподо́бившеся, ту́не врачу́ете все́х.

Моли́твами святы́х служи́телей, и́мярек, Ты́ Спа́се на́ш, да́ждь ми́ру всему́ Твоя́ ми́лости, я́ко милосе́рд.

Богоро́дичен: Де́ву по рождестве́ хва́лим Тя́ Богоро́дице: Ты́ бо ми́ру Сло́во Бо́жие пло́тию родила́ еси́.

Пе́снь 6.

Ирмо́с: Я́коже проро́ка изба́вил еси́ из глубины́ преиспо́дния, Христе́ Бо́же, и мене́ от грехо́в мои́х изба́ви я́ко Человеколю́бец, и упра́ви живо́т мо́й, молю́ся.

Я́коже в мо́ри жите́йстем без бу́ри преше́дше пучи́ну, во спаси́тельное приста́нище в вы́шнее Ца́рство, безме́здницы, благоче́стно приста́сте.

Исто́чники приснотеку́щии, чуде́сную благода́ть источа́ете, неду́ги отгоня́юще безме́здницы святи́и: моли́теся о душа́х на́ших.

Живу́ще му́ченицы ра́достно на небесе́х, в честны́й хра́м ва́ш приити́ потщи́теся, и на́ша неду́ги теле́сныя, и серде́чныя стра́сти исцели́те.

Богоро́дичен: Вы́шшую херуви́м и всея́ тва́ри, восхва́лим еди́ну ро́ждшую Зижди́теля и Го́спода, и отве́рзшую две́ри ра́йския на́м.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 2:

Благода́ть прии́мше исцеле́ний, простира́ете здра́вие су́щым в ну́ждах вра́чеве, чудотво́рцы пресла́внии: но ва́шим посеще́нием ра́тников де́рзости низложи́те, ми́р исцеля́юще чудесы́.

И́кос: Вся́каго ра́зума и му́дрости прехо́дит сло́во му́дрых враче́й, и все́м ра́зум подае́т: вы́шняго бо благода́ть прие́мше, неви́димо здра́вие да́руют все́м. Отню́дуже и мое́й по́вести благода́ть дарова́ся пе́ти, я́ко Богоно́сныя уго́дники Христо́вы и служи́тели, исцеле́ний мно́жество подаю́щыя: боле́зни бо все́х избавля́ют ми́р, исцеля́юще чудесы́.

Пе́снь 7.

Ирмо́с: В нача́ле зе́млю основа́вый, и небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́ших.

Возвели́чивый па́мять сла́вно прему́дрых безме́здников на земли́, благослове́н еси́ Го́споди Бо́же оте́ц на́ших.

Показа́вый версту́ честну́ю, святы́я чудотво́рцы все́м, благослове́н еси́ Го́споди Бо́же оте́ц на́ших.

Па́мять честну́ю творя́ще безме́здников, ра́достию вопие́м Ти́ Ще́дре: благослове́н еси́ Го́споди Бо́же оте́ц на́ших.

Богоро́дичен: Всели́выйся во чре́во Де́вы, и в не́м Ада́ма обнови́вый, благослове́н еси́ Го́споди Бо́же оте́ц на́ших.

Пе́снь 8.

Ирмо́с: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте, и превозноси́те во вся́ ве́ки.

Пода́вшаго свы́ше дарова́ния исцеле́ний свои́м безме́здником, ту́не исцели́ти неду́ги, Го́спода по́йте, и превозноси́те Его́ во ве́ки.

Да́вшаго благода́ть святы́м исцеля́ти неду́жных не́мощи, и ду́ш врачева́ти стра́сти, Го́спода по́йте, и превозноси́те Его́ во ве́ки.

Житие́ у́бо па́че челове́к, и доброде́тельную жи́знь, ки́й челове́к безме́здников не восхва́лит? ве́лия бо чудеса́ на земли́ творя́ху при́сно. Го́спода по́йте, и превозноси́те Его́ во ве́ки.

Богоро́дичен: Все́льшагося во чре́во Де́вы, из Нея́же стра́шно па́че словесе́, ве́тхаго Ада́ма обно́вльшаго, Го́спода по́йте, и превозноси́те Его́ во ве́ки.

Пе́снь 9.

Ирмо́с: Проявле́нное на горе́ законополо́жнику во огни́ и купине́, рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Вселе́нское врачевство́ отве́рзеся, ра́ка ва́ша святи́и безме́здники, и́мярек, к не́йже притека́юще ве́рнии достодо́лжно, вси́ исцеле́ние взе́млют.

Прииди́те исцели́теся от разли́чных неду́г, челове́цы боля́щии: гряди́те же и ско́ти, я́ко исто́чник чуде́с от ра́ки святы́х истека́ет.

В се́ла вы́шняя вселя́еми святи́и, посреде́ на́с бы́вше неви́димо милосе́рдствуете, посреде́ хра́ма ва́шего пе́сни возсыла́ющих вседержи́телю, и блажа́щих приле́жно ва́с всехва́льнии.

Богоро́дичен: Ты́ еси́ Богоро́дице стена́ на́ша и ору́жие, Ты́ еси́ засту́пнице притека́ющих к Тебе́: Тебе́ же ны́не вси́ мо́лимся, да избу́дем от вра́г на́ших.

Свети́лен.

Подо́бен: Не́бо звезда́ми:

Чудоде́йственнии свети́льницы, и́мярек, со и́мярек, душе́вныя на́ша неду́ги и теле́сныя исцели́те, от Го́спода прие́мше благода́ть исцеле́ний.

Богоро́дичен: От Бо́га ми́рови пода́нных благи́х, Ты́ вина́ была́ еси́ Богоро́дице: но и ны́не моли́ о о́бщем спасе́нии благопреме́ннаго Бо́га.

На хвали́тех стихи́ры, гла́с 2.

Вра́чеве немощству́ющих, сокро́вища врачева́ний, спаси́телие ве́рных, безсре́бреницы всесла́внии, в ну́ждах зову́щыя и боля́щыя исцели́те, моля́ще Бо́га блага́го, изба́витися на́м от се́тей вра́жиих. [Два́жды.]

Исто́чник исцеле́ний, еди́наго то́кмо в ле́те исцелева́ше, хра́м же безсре́бреников, все́ мно́жество исцеля́ет неду́гующих: неоску́дно бо е́сть и неиждива́емое бога́тство святы́х. Те́х моли́твами Христе́ поми́луй на́с.

Ра́дуется ли́к святы́х во ве́ки, Ца́рство во небе́сное насле́доваша: земля́ мо́щи и́х прие́мши, благово́ние возве́я: раби́ Христо́вы бы́ша, всели́вшеся в жи́знь ве́чную.

Сла́ва, гла́с 6:

Безконе́чна е́сть святы́х благода́ть, ю́же от Христа́ прия́ша. Те́мже и мо́щи и́х от Боже́ственныя си́лы непреста́нно де́йствуют чудеса́: и́хже имена́ ве́рою призыва́ема, неисце́льныя боле́зни исцеля́ют. И́миже Го́споди, и на́с душе́вных и теле́сных страсте́й свободи́, я́ко Человеколю́бец.

И ны́не, Богоро́дичен:

Преложе́ние скорбя́щих, премене́ние боля́щих еси́ Богоро́дице всепе́тая, спаси́ гра́д и лю́ди: бори́мых умире́ние, обурева́емых тишина́, еди́на предста́тельнице ве́рных.

Крестобогоро́дичен: Пречи́стая я́ко ви́де Тя́ на Кресте́ пове́шена, пла́чущи вопия́ше ма́терски: Бо́же Мо́й, Сладча́йшее Ча́до Мое́, ка́ко терпи́ши стра́сть поно́сную?

А́ще и́мут на стихо́вне Сла́ву, глаго́ли вече́рний:

И ны́не, Богоро́дичен, или́ Крестобогоро́дичен.