[Глава 25] Слу́жба о́бща священноиспове́днику и преподобноиспове́днику
Ве́чера,
на Го́споди воззва́х, стихи́ры, гла́с 4.
Подо́бен: Я́ко до́бля:
И́стины водруже́ние, ꙳ и ве́ры утвержде́ние, ꙳ и догма́тов предложи́теля тя́ зна́ем, ꙳ благоче́стия согла́сника, ꙳ чистоты́ селе́ние, ꙳ и прия́телище избра́нное, ꙳ благово́ние Ду́ха, ꙳ и превели́кое сокро́вище уче́ний, ꙳ и основа́ние Христо́вы це́ркве, ꙳ священноявле́нне Богодухнове́нне, и́мярек.
Апо́столов прее́мника, ꙳ страда́льцев единонра́вна, ꙳ по́стников единоревни́теля восхваля́ем тя́, ꙳ и учи́телей печа́ть, ꙳ и Боже́ственное изображе́ние, ꙳ Христо́ва тайноводи́теля Богоно́се всехва́льне, ꙳ и Богото́чную реку́ ꙳ разуме́ний беззако́нников и ху́льников мы́сли потопля́юща, ꙳ прему́дре, и́мярек.
Прему́дрости тала́нт ꙳ умно́жив пребога́те, ꙳ ра́дости сподо́бился еси́ Го́спода твоего́. ꙳ Испещре́н благода́тию ꙳ Боже́ственнаго сия́ния, ꙳ и заре́ю мы́сленно сия́я духо́вною, ꙳ ны́не предстои́ши десни́це жизноно́сней, ꙳ отту́ду луча́ми ꙳ всегда́ облиста́емь сла́вне, и́мярек.
Сла́ва, и ны́не, Богоро́дичен.
Скве́рну отмы́й стра́стнаго се́рдца моего́, Богоро́дице всепе́тая, и вся́ я́звы и гное́ния сего́, я́же от греха́ очи́сти, Чи́стая, и ума́ моего́ уста́ви непостоя́ние: я́ко да си́лу Твою́ и вели́кое заступле́ние велича́ю, окая́нный и непотре́бный ра́б Тво́й.
Крестобогоро́дичен: Распина́ема ви́дящи, ꙳ и в ре́бра пробода́ема копие́м, ꙳ Пречи́стая, Христа́ Человеколю́бца, ꙳ пла́чущи вопия́ше: ꙳ что́ сие́ Сы́не Мо́й, ꙳ что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м, ꙳ и тщи́шися безча́дствовати Мя́ Вселюбе́знейше? ꙳ дивлю́ся Благоутро́бне, ꙳ Твоему́ во́льному распя́тию.
А́ще и́мать, самогла́сен. Сла́ва, гла́с 6:
Излия́ся благода́ть во устна́х твои́х преподо́бне о́тче, и́мярек, и бы́л еси́ па́стырь Христо́вы це́ркве, учя́ слове́сныя о́вцы ве́ровати в Тро́ицу Единосу́щную во еди́ном Божестве́.
Богоро́дичен: Никто́же притека́я к Тебе́, посра́млен от Тебе́ исхо́дит, пречи́стая Богоро́дице Де́во: но про́сит благода́ти, и прие́млет дарова́ние к поле́зному проше́нию.
Крестобогоро́дичен: Пречи́стая, я́ко ви́де Тебе́ на Кресте́ пове́шена, пла́чущи вопия́ше ма́терски: Сы́не Мо́й и Бо́же Мо́й, сладча́йшее Мое́ Ча́до, ка́ко терпи́ши стра́сть поно́сную?
А́ще пра́зднуеши с полиеле́ем, глаго́ли Богоро́дичен воскре́сный: Кто́ тебе́ не ублажи́т:
Вхо́д. Проки́мен дне́.
Чте́ния преподо́бническая, [пи́сана в конце́ кни́ги сея́.]
На стихо́вне стихи́ры, гла́с 8.
Подо́бен: О пресла́внаго чудесе́!
О́тче всему́дре, и́мярек, ꙳ це́рковь Христо́ву ꙳ уясни́л еси́ пе́сньми, ꙳ Боже́ственная поя́ пресла́вне, ꙳ де́йством о́тче Ду́ха твою́ цевни́цу ударя́я, ꙳ всеподо́бней Дави́дове подо́бяся: ꙳ е́юже возглаша́я, ꙳ Боже́ственными пе́сньми вся́ привле́кл еси́.
Сти́х: Честна́ пред Го́сподем сме́рть преподо́бных его́.
О́тче пресла́вне, и́мярек, мирски́я отсту́пль мяте́жныя молвы́, ꙳ ко Христо́ве прите́кл еси́ тишине́ преподо́бне, ꙳ и виде́нии Боже́ственных дея́ний, ꙳ всебога́тыми я́ве светлостьми́, ꙳ вои́стинну обогати́лся еси́, ꙳ и ве́рным пре́дал еси́, ꙳ Боголе́пным сия́я ꙳ житие́м преблаже́нне.
Сти́х: Блаже́н му́ж боя́йся Го́спода, в за́поведех Его́ восхо́щет зело́.
Прииди́те земноро́днии, ꙳ пе́сньми свяще́нное и честно́е ꙳ преподо́бнаго торжество́, и́мярек, ꙳ дне́сь благоче́стно воспои́м: ꙳ се́ бо вои́стинну Боже́ственнаго сия́ния ꙳ сподо́бися све́т прия́ти. ꙳ О неизрече́ннаго благосе́рдия Твоего́ Влады́ко Го́споди, ꙳ и́мже мы́ позна́хом, ꙳ сла́вити Тя́ преблага́го!
Сла́ва, гла́с 8:
Мона́хов мно́жества, наста́вника тя́ почита́ем о́тче на́ш, и́мярек: твое́ю бо стезе́ю вои́стинну пра́во ходи́ти позна́хом, блаже́н еси́ Христу́ рабо́тав, и вра́жию обличи́л еси́ си́лу, а́нгелов собесе́дниче, преподо́бных соприча́стниче и пра́ведных, с ни́миже моли́ся Го́сподеви, поми́ловатися душа́м на́шым.
И ны́не, Богоро́дичен воскре́сн: Безневе́стная Де́во:
А́ще ли не пра́зднуеши, глаго́ли се́й Богоро́дичен:
А́з Де́во свята́я Богоро́дице, к покро́ву Твоему́ прибега́ю: ве́м, я́ко обря́щу тобо́ю спасе́ние: мо́жеши бо Чи́стая, помощи́ мне́.
Крестобогоро́дичен: Ю́ница нескве́рная, Юнца́ ви́дящи на дре́ве пригвожда́ема во́лею, рыда́ющи жа́лостне, увы́ Мне́ вопия́ше, Люби́мейшее ча́до! Что́ Ти со́нм воздаде́ безблагода́тный евре́йский, хотя́ Мя обезча́дствовати от Тебе́ Вселюбе́зне?
Тропа́рь во уста́ве.
А́ще ли не́сть уста́ва, глаго́ли се́й тропа́рь, гла́с 8:
Правосла́вия наста́вниче, благоче́стия учи́телю и чистоты́, вселе́нныя свети́льниче, архиере́ев Богодухнове́нное удобре́ние, и́мярек, прему́дре, уче́ньми твои́ми вся́ просвети́л еси́, цевни́це духо́вная. Моли́ Христа́ Бо́га спасти́ся душа́м на́шым.
Сла́ва, и ны́не, Богоро́дичен, или́ Крестобогоро́дичен.
На у́трени,
на Бо́г Госпо́дь, тропа́рь то́йже.
По 1-й кафи́сме, седа́лен, гла́с 4.
Подо́бен: Вознесы́йся:
Земны́х и тле́нных наслажде́ния, и ми́ра красоты́, и пи́щи вре́менныя небре́гл еси́, в пусты́ни житие́ возлюби́л еси́: отсю́ду сподо́бился еси́ му́ченическому и по́стническому ли́ку сочета́тися. С ни́миже моли́ спасти́ рабы́ твоя́. [Два́жды.]
Сла́ва, и ны́не, Богоро́дичен:
Чи́стая, всенепоро́чная и неискусобра́чная, еди́на безле́тнаго Сы́на и Сло́ва Бо́жия в ле́те ро́ждшая: Того́ со святы́ми и честны́ми апо́столы, му́ченики и проро́ки и преподо́бными, молю́ дарова́ти на́м очище́ние, и ве́лию ми́лость.
По 2-й кафи́сме седа́лен, гла́с 4:
Подо́бен: Ско́ро предвари́:
Христу́ после́довав, ми́р оста́вил еси́, и пло́ть покори́в воздержа́нием я́ве, преблаже́нне, и́мярек, отону́дуже свяще́ния пома́зание име́л еси́. Ны́не же к невеще́ственным преста́вился еси́ лико́м, моля́ о все́х на́с восхваля́ющих тя́. [Два́жды.]
Сла́ва, и ны́не, Богоро́дичен:
Еди́на ро́ждшая Творца́ все́х, еди́на украси́вшая челове́чество рождество́м Твои́м Пречи́стая, изба́ви мя́ се́тей льсти́ваго велиа́ра: поста́ви мя́ на ка́мени Христо́вых хоте́ний, Того́ моля́щи приле́жно, Его́же воплоти́ла еси́.
По Хвали́те и́мя Госпо́дне,
припе́в священноиспове́днику:
Велича́ем тя́ святи́телю о́тче, и́мярек:
Псало́м: Услы́шите сия́ вси́ язы́цы:
Преподобноиспове́днику же припе́в:
Ублажа́ем тя́ преподо́бне о́тче, и́мярек:
Псало́м: Терпя́ потерпе́х:
По полиеле́и седа́лен, гла́с 3:
Подо́бен: Боже́ственныя ве́ры:
Боже́ственным ду́хом просвеще́н, пропове́дал еси́ со дерзнове́нием правосла́вия преда́ние, всеблаже́нне, и́мярек, и мучи́теля беззако́нна посрами́л еси́, в заточе́ния непра́ведно отсыла́емь: о́тче преподо́бне, Христа́ Бо́га моли́, грехо́в оставле́ние пода́ти, чту́щым любо́вию святу́ю па́мять твою́. [Два́жды.]
Сла́ва, и ны́не, Богоро́дичен:
Ки́йждо иде́же спаса́ется, та́мо пра́ведно и притека́ет: и ко́е ино́е таково́е прибе́жище, я́ко Ты́ Богоро́дице, покрыва́ющее ду́шы на́ша?
Степе́нна, 1-й антифо́н 4-го гла́са.
Проки́мен: Честна́ пред Го́сподем сме́рть преподо́бных Его́.
Сти́х: Что́ возда́м Го́сподеви о все́х, я́же воздаде́ ми?
Вся́кое дыха́ние:
Ева́нгелие, пи́сано в конце́ кни́ги сея́.
По 50-м псалме́, стихи́ра, гла́с 6.
Преподо́бне о́тче, во всю́ зе́млю изы́де веща́ние исправле́ний твои́х: те́м на небесе́х обре́л еси́ мзду́ трудо́в твои́х, де́монов погуби́л еси́ полки́, а́нгелов пости́гл еси́ чи́ны, и́хже житию́ непоро́чно поревнова́л еси́: дерзнове́ние име́я ко Христу́ Бо́гу, ми́р испроси́ душа́м на́шым.
Кано́н, гла́с 6.
Пе́снь 1.
Ирмо́с: Я́ко по су́ху пешеше́ствовав Изра́иль, по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м вопия́ше.
Всемы́сленно Тебе́ Спа́се возлюби́ свяще́нный, и́мярек, ко страда́нию приложи́вся кре́пко, ско́рби и боле́зни и по́двиги терпя́, до́ндеже обре́те пи́щу безконе́чную.
Кро́вными кропле́нии сла́ное неве́рствия мо́ре утоли́л еси́: река́ бы́л еси́ Христо́ва, напая́я вои́стинну це́рковь при́сно.
Распросте́ртыя по́двиги на земли́, прине́сл еси́ Бо́гу сла́вне, и́мярек, и Ца́рствия небе́снаго сподо́бився венцы́ прия́ти, и ве́чнующий живо́т неруши́мый.
Богоро́дичен: Укра́шена добро́тою доброде́телей, Богома́ти чи́стая, Бо́га и́стиннаго доброде́тель зачала́ еси́, на́с Боже́ственными доброде́тельми просвети́вшаго.
Пе́снь 3
Ирмо́с: Не́сть свя́т, я́коже Ты́ Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Ни ве́ждома дрема́ния, ни очи́ма сна́ вда́л еси́ преподо́бне о́тче, и́мярек, до́ндеже до́м яви́лся еси́ Святы́я Тро́ицы, и прему́дрости сокро́вище, ми́р обогаща́я златоза́рными уче́нии блаже́нне.
Боже́ственных повеле́ний храни́тель бы́в Богому́дре, и́мярек, в темни́цах затворе́н бы́л еси́, отверза́я ве́рным затво́р учи́тельнаго пути́, на широту́ ра́зума вводя́щаго.
Си́лою Боже́ственною укрепи́вся, безкре́постную де́рзость беззако́нных низложи́л еси́, испове́данием тве́рдым, всесвяще́нный, и́мярек, страда́льче, я́ко ору́жник Боже́ственнаго полка́.
Богоро́дичен: Прему́дрость и Сло́во О́тчее, пре́жде сы́й все́х ве́к, в после́дняя ле́та неизрече́нно воплоти́выйся от неискусобра́чныя Тебе́ Ма́тере, Богоро́дицу Тя́ соде́ла.
Седа́лен, гла́с 4.
Подо́бен: Яви́лся еси́ дне́сь:
Сла́вное Со́лнце, я́ко денни́цу на высоте́ поста́ви тя́ свое́й це́ркви, ве́рныя просвеща́я словесы́ твои́ми, небе́сный таи́нниче, и́мярек, Богому́дре о́тче на́ш.
Сла́ва, и ны́не, Богоро́дичен:
Чи́стая всенепоро́чная, и неискусобра́чная, еди́на безле́тнаго Сы́на и Сло́ва Бо́жия, в ле́те ро́ждшая: Того́ со святы́ми и честны́ми апо́столы, му́ченики, и проро́ки, и преподо́бными, моли́ дарова́ти на́м очище́ние и ве́лию ми́лость.
Крестобогоро́дичен: На кресте́ Тя воздви́жена я́ко узре́ Пречи́стая Ма́ти Твоя́ Сло́ве Бо́жий, ма́терски рыда́ющи веща́ше: что́ но́вое и стра́нное Сы́не Мо́й, чу́до? Ка́ко Жи́знь все́х приближа́ешися сме́рти, оживи́ти хотя́ уме́ршыя, я́ко милосе́рд?
Пе́снь 4.
Ирмо́с: Христо́с моя́ си́ла, Бо́г и Госпо́дь, честна́я це́рковь Боголе́пно пое́т взыва́ющи, от смы́сла чи́ста о Го́споде пра́зднующи.
Копие́м словесы́ твои́ми безбо́жие пронзи́л еси́, и страда́нии твои́ми я́ко мече́м бесо́вския полки́ победи́л еси́, и́хже зло́бы изба́ви чту́щыя тя́ всехва́льне, и́мярек.
Не жру́ бесо́м, ни устраша́юся сме́рти, ни му́к веще́й, священному́ченик, и́мярек, взыва́ше: но еди́наго Бо́га испове́дую в Тро́ице познава́ема.
Ви́дев Го́споди Твоего́ смире́ния пресла́вную высоту́, свы́ше строе́ния тебе́ сло́во да́рует: и́мже ересе́й лю́тая смири́шася возноше́ния, о́тче.
Богоро́дичен: Я́ко две́рь приводя́щую к Боже́ственному вхо́ду, я́ко ра́й Боже́ственный, я́ко мы́сленное ме́сто свяще́ния, я́ко добро́ту Иа́ковлю Де́ву ублажа́ем.
Пе́снь 5.
Ирмо́с: Бо́жиим све́том Твои́м, Бла́же, у́тренюющих Ти́ ду́шы любо́вию озари́, молю́ся, Тя́ ве́дети Сло́ве Бо́жий, и́стиннаго Бо́га, от мра́ка грехо́внаго взыва́юща.
Сле́з твои́х тече́нием всему́дре о́тче, и́мярек, сласте́й изсуши́л еси́ пучи́ну, и изли́тием уче́ний твои́х ересе́й пото́ки блаже́нне загради́л еси́.
Це́рковь бы́л еси́ вмести́тельна о́тче, и́мярек, Тро́ице вои́стинну, укра́шен благода́тию, и озаре́нием честны́х доброде́телей, и учи́тельным смире́нием.
Терпе́нием твои́м низложи́в вся́ шата́ния лука́ваго, того́ вре́да мя́ изба́ви, бо́дра вся́чески содева́я, стезя́ми приводя́щими к Бо́гу сла́вне, и́мярек.
Богоро́дичен: Пое́м, Всечи́стая, из Тебе́ пло́ть стра́стную и сме́ртную на́с ра́ди прие́мшаго, и ви́димо рождество́ сме́шеною несли́тною ипоста́сию.
Пе́снь 6.
Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.
Свети́ло бы́в страда́ний твои́х све́том просвеща́я концы́, испове́дал еси́ и́мя Христо́во пред мучи́тели страстоте́рпче Госпо́день всехва́льне, и́мярек.
Язы́к тво́й я́ко тро́сть скоропи́сца кни́жника, вои́стинну бы́сть, испове́дая ра́зум всече́стен, в скрижа́лех серде́ц начерта́яй о́тче, и́мярек, зако́на духо́внаго.
Твоего́ пла́вающии поуче́ния стяжава́юще тишину́, о́тче Богоглаго́ливе, пучи́ны треволне́ния избавля́ются душевре́днаго, и от ины́х ересе́й приходя́щии ве́рою спаса́ются.
Богоро́дичен: Ду́х Святы́й на Тя́, Чи́стая, де́вства храни́ло наше́д, соде́ла честно́е селе́ние Всенепоро́чная Сы́на вы́шняго Всеблаже́нная.
Конда́к во уста́ве.
А́ще ли не́сть уста́ва, глаго́ли се́й конда́к, гла́с 2:
Наслади́вся Богому́дре воздержа́ния, и жела́ния плотска́я ты́ успи́л еси́, яви́вся ве́рою возраща́емь, и я́ко живота́ дре́во ра́йское процве́л еси́, и́мярек, о́тче свяще́нный.
И́кос: Отве́рзи ми́ устне́ пресвяще́нне, Богоприя́тными твои́ми моли́твами, предстоя́ Бо́гу всесла́вне преподо́бне му́чениче, да воспою́ блаже́нное твое́ житие́, и возглаго́лю досто́йно доброде́тели твоя́, я́же на земли́ те́плою любо́вию соверши́л еси́: испове́дник бо бы́л еси́ кре́пок, воздержа́ние ве́рою испра́вив, бде́ние и чистоту́ возлюби́л еси́, и́мярек, о́тче свяще́нный.
Пе́снь 7.
Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.
Я́ко пресве́тло житие́ твое́ бы́сть Богому́дре поще́ния ра́ди, та́ко яви́ся твое́ страда́ние тве́рдо: Христа́ бо просла́вил еси́ я́ве, вопия́: благослове́н Бо́г оте́ц на́ших.
Целому́дрия чистоты́ препоя́сався му́жеством, Богоуго́дный о́тче, и́мярек, и муче́ния вене́ц све́тел восприи́м благода́тию, вопия́л еси́: благослове́н Бо́г оте́ц на́ших.
Некла́няющиися пречи́стей ико́не Твое́й, Спа́се, нечести́вии слугу́ Твоего́ многора́нно оскорбля́ху, при́сно глаго́люща, и вопию́ща к Тебе́: благослове́н Бо́г оте́ц на́ших.
Богоро́дичен: Седя́й в не́дрех Роди́тельных неопи́сан Рречи́стая, ны́не же от Твои́х не́др произше́д седи́т опи́сан, Твоему́ подо́бяся о́бразу, за е́же спасти́ Ада́ма, Ада́м бы́в.
Пе́снь 8.
Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Светоно́сно показа́лся еси́, я́коже друго́е со́лнце, поуче́ние посыла́я конце́м, тьму́ несветя́щую вся́каго греха́ отима́я блаже́нне, и́мярек, све́том покая́ния.
Струя́ми Боже́ственных уче́ний огражда́емь, река́ я́коже от друга́го Еде́ма изше́л еси́, лице́ земли́ напоя́я Богоуго́дниче, и́мярек, и нече́стия пле́велы потопля́я.
Украсова́лся еси́ всеблаже́нне добро́тою слове́с твои́х, Свята́го бо Ду́ха яви́лся еси́ тро́сть, напису́я ве́рным благочести́вно ра́зум Боже́ственный, превознося́ Христа́ во ве́ки.
Богоро́дичен: Ко Твоему́ прибега́ю покро́ву Всенепоро́чная, и заступле́ние ны́не животу́ моему́ Тя́ предлага́ю, я́же па́че ума́ Бо́га Сло́ва ро́ждшая: Его́же превозно́сим во ве́ки.
Пе́снь 9.
Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя́ ублажа́ем.
Я́ко све́т, я́ко луна́, я́ко вели́кое со́лнце, я́ко мо́лния Христо́ве це́ркви возсия́в, и ве́рных мы́сли просвети́л еси́, в невече́рнем све́те всели́вся, поя́ трисвяты́ми гла́сы Тро́ицу несозда́нную.
Земля́ святы́м гро́бом обогати́ся, и́мярек, и свяще́нным всехва́льне твои́м те́лом, и пра́ведных взыгра́шася ду́си, а́нгели же, блаже́нне, ду́х тво́й прия́ша: с ни́миже все́х на́с помина́й пою́щих тебе́.
Хра́м ду́ха Пресвята́го бы́в, и река́ во́д живо́тных наполня́ема, и це́ркве основа́ние недви́жимое, степе́нь правосла́вия, струя́ приснотеку́щая, Боже́ственнаго покая́ния исто́чник достоди́вный, и́мярек.
Богоро́дичен: Я́коже ка́пля небе́сная во Твое́ чре́во, Де́во, до́ждь сни́де, и изсуши́ ле́стная тече́ния, источи́в нетле́ния и избавле́ния все́м челове́ком, Тобо́ю Богоблагода́тная.
Свети́лен.
Страда́ние у́бо пе́рвее до́бре искуси́вся, второ́е посто́м тече́ние Боже́ственное соверши́в, на небеса́ возше́л еси́, и Христу́ предстои́ши, и́мярек, о́тче преподо́бне: за на́с моли́ся те́пле пою́щих тя́.
Богоро́дичен: Ра́дость неизрече́нную ро́ждши Го́спода, ра́дости на́с небе́сныя прича́стники сотвори́, все́х Тебе́ почита́ющих Пречи́стая, и благодаре́ние от души́ принося́щих Тебе́: не забу́ди рабо́в Твои́х, Благослове́нная Мари́е.
На хвали́тех стихи́ры, гла́с 4.
Подо́бен: Да́л еси́ зна́мение:
Благода́ть Ду́ха, о́тче и́мярек, ꙳ тебе́ возсия́вши, ꙳ све́тло просвети́ тя: ꙳ отсю́ду ума́лил еси́ страсте́й но́щь, ꙳ и безстра́стия де́нь пости́гл еси́, ꙳ чи́сте чисте́йшему све́ту совоку́плься, ꙳ в не́мже жи́тельствуя ꙳, не забу́ди Богогла́се, ꙳ ве́рою пою́щих свяще́нную твою́ па́мять. [Два́жды.]
Благода́ть жела́нную тебе́, ꙳ и́мярек, нося́ небе́сную, ꙳ земны́х небре́гл еси́: ꙳ сего́ ра́ди я́ко безпло́тен, ꙳ страда́тельное избра́л еси́ житие́, ꙳ я́ко присносу́щныя сла́дости пото́ка, ꙳ благоче́стно наслади́тися хотя́ Богоприя́тне, ꙳ и слеза́ми преподо́бне изсуши́л еси́ ꙳ му́тный исто́чник страсте́й, ꙳ и напои́л еси́ душепи́щныя кла́сы. ꙳
Благода́ть исцеле́ний, и́мярек, ꙳ от благода́ти Боже́ственныя досто́йно прия́л еси́: ꙳ отсю́ду духо́в тебе́ лука́вых ꙳ низлага́ется пре́лесть, ꙳ и неду́г неудо́бных тли́ отбе́г преше́л еси́: ꙳ источа́еши бо преподо́бне я́ко во́ды благода́тныя твоя́ струи́, от ни́хже напоя́еми, ꙳ воспева́ем па́мять твою́.
Сла́ва, гла́с 5.
Преподо́бне о́тче, не да́л еси́ сна́ твои́ма очи́ма, ни ве́ждома твои́ма дрема́ния, до́ндеже ду́шу и те́ло от страсте́й свободи́л еси́, и тебе́ сама́го угото́вал еси́ Ду́ху жили́ще: прише́д бо Христо́с со Отце́м, оби́тель у тебе́ сотвори́, и единосу́щныя Тро́ицы уго́дник бы́в, великопропове́дниче о́тче на́ш, и́мярек, моли́ся о душа́х на́ших.
И ны́не, Богоро́дичен:
Блажи́м Тя́ Богоро́дице Де́во, и сла́вим Тя́ ве́рнии по до́лгу, гра́д непоколеби́мый, сте́ну необори́мую, тве́рдую предста́тельницу, и прибе́жище ду́ш на́ших.
Крестобогоро́дичен: Зря́щи дре́вле А́гнца и Сы́на Своего́, Де́ва Ма́ти и Всеблаже́нная Отрокови́ца на Кре́ст воздви́жена, вопия́ше слезя́щи: увы́ Мне́ Сы́не Мо́й, ка́ко умира́еши, Бо́г естество́м сы́й безсме́ртен?
А́ще и́мать на стихо́вне Сла́ву, глаго́ли вече́рний.
И ны́не, Богоро́дичен, или́ Крестобогоро́дичен.