[Глава 17] Слу́жба о́бща священному́чеником двема́, и мно́гим

Ве́чера,

на Го́споди воззва́х, стихи́ры, гла́с 1.

Подо́бен: Всехва́льнии му́ченицы:

Святи́тельскую оде́жду ꙳ све́тло вои́стинну украси́сте ꙳ муче́ния кро́вию, ꙳ и обою́ду све́тло украси́вшеся, ꙳ со а́нгелы зижди́телю предста́сте, ꙳ уго́дницы сла́внии, ꙳ Его́же моли́те, ꙳ дарова́ти душа́м на́шым ꙳ ми́р и ве́лию ми́лость.

Богодухнове́нныя орга́ны, ꙳ вои́стинну на́м яви́стеся, ꙳ возвеща́юще неизрече́нная Бо́жия та́инства ꙳ писа́ния Боже́ственнаго, ꙳ и́дольское безу́мие облича́юще, ꙳ все́х ко Христу́ приведо́сте. ꙳ Его́же моли́те, ꙳ дарова́ти душа́м на́шым ꙳ ми́р и ве́лию ми́лость.

Сло́вом Богоразу́мия ꙳ лю́ди от неве́дения прему́дрии, ꙳ до конца́ изба́висте, ꙳ и приведо́сте спасе́ны сия́ ꙳ Сло́ву возсия́вшему, ꙳ из Отца́ рожде́нному Христу́ Бо́гу на́шему: ꙳ Тому́ помоли́теся, ꙳ дарова́ти душа́м на́шым ꙳ ми́р и ве́лию ми́лость.

Сла́ва, и ны́не, Богоро́дичен:

Де́во всепе́тая, ю́же в Тебе́ та́йну Моисе́й проро́ческима ви́де очи́ма, купину́ горя́щу и неопаля́ему: Божества́ бо о́гнь утро́бу Твою́ чи́стая, не опали́. Те́мже мо́лим Тя́, я́ко Ма́терь Бо́га на́шего, ми́р испроси́ти ми́рови и ве́лию ми́лость.

Крестобогоро́дичен: У креста́ Твоего́ предстоя́щи, ꙳ Сло́ве Бо́жий, ꙳ А́гница и непоро́чная Ма́ти Твоя́ ꙳ рыда́ющи вопия́ше: ꙳ увы́ Мне́, Сы́не, ꙳ ка́ко умира́еши на Кресте́? ꙳ увы́ Мне́, Све́те мо́й сла́дкий, ꙳ где́ Твоея́ добро́ты ꙳ ны́не за́йде зра́к, ꙳ красне́йший па́че все́х челове́к?

А́ще и́мать самогла́сен. Сла́ва, гла́с 8:

От вре́менных кру́г прише́дше Богозва́ннии, седмери́цею бие́ми, и стру́жеми преходя́ще, и вси́ распина́еми за Христа́, ни о́гнь, ни ра́ны, ни ору́жие, ду́ш ва́ших разсла́биша кре́пости, и попра́ли есте́ бесо́вскую кре́пость, священному́ченицы сла́внии: те́м моли́те Христа́ Бо́га, спасти́ ду́шы на́ша.

И ны́не, Богоро́дичен:

А́з, Де́во свята́я Богоро́дице, к покро́ву твоему́ прибега́ю, ве́м, я́ко обря́щу Тобо́ю спасе́ние: мо́жеши бо Чи́стая, помощи́ мне́.

Крестобогоро́дичен:

Подо́бен: О пресла́внаго чудесе́!

Тя́ ви́дящи пригвожда́ема ꙳ на Кресте́ Иису́се, ꙳ и стра́сти прие́млюща во́лею Влады́ко, ꙳ Де́ва и Ма́ти Твоя́, ꙳ увы́ мне́, вопия́ше, ꙳ ча́до сла́дкое! ра́ны непра́ведно ка́ко терпи́ши? ꙳ Врачу́ исцели́вый челове́ческое неможе́ние, ꙳ и от тли́ вся́ изба́вивый ꙳ благоутро́бием Твои́м.

А́ще ли пра́зднуеши с полиеле́ем, глаго́ли Богоро́дичен воскре́сный: Ца́рь небе́сный:

Вхо́д. Проки́мен дне́.

Чте́ния 3, му́ченическая, [пи́саны в конце́ кни́ги сея́].

На стихо́вне стихи́ры, гла́с 4.

Подо́бен: Я́ко до́бля:

Я́ко зве́зды многосве́тлыя ꙳ мы́сленно возсия́вше на церко́вней тве́рди, ꙳ всю́ тва́рь просвеща́ете, ꙳ тьму́ прогоня́юще по́двигом све́та, ꙳ и чуде́с сия́ньми: ꙳ те́м дне́сь веселя́щеся, ꙳ соверша́ем светоно́сную ꙳ и святу́ю ва́шу па́мять, ꙳ священному́ченицы сла́внии.

Сти́х: Свяще́нницы Твои́ облеку́тся в пра́вду, и преподо́бнии Твои́ возра́дуются:

Апо́столом равноче́стнии, ꙳ священнонача́льницы бы́вше,  ꙳ по́мысл купноревни́тельный восприе́мше, ꙳ не убоя́вшеся безбо́жия мучи́тельскаго суровства́: ꙳ но му́жески и кре́пко Спа́са пропове́давше ꙳ претерпе́сте многоразли́чныя зло́бы, ꙳ того́ ра́ди бу́дущая возда́ния ꙳ ны́не восприе́млете, всему́дрии.

Сти́х: Блаже́н му́ж боя́йся Го́спода, в за́поведех Его́ восхо́щет зело́.

Слу́жбы принося́ще честны́я всеси́льнии, ꙳ и же́ртву непоро́чную Влады́це Христу́ ꙳ всесожже́ния соверше́нна ꙳ Тому́ принесо́сте себе́ страда́льчески, ꙳ священнонача́льницы блаже́ннии: ꙳ Его́же моли́те, ꙳ от тли́ и бе́д изба́вити ꙳ ве́рою соверша́ющих ꙳ честну́ю па́мять ва́шу.

Сла́ва, гла́с 4:

Му́ченицы непобеди́мии, иера́рси прехва́льнии, и свети́льницы всеми́рнии, столпи́ непобори́мии Боже́ственныя це́ркве, и степе́нь уче́ний, и наста́вницы благочести́вых, и потреби́телие бы́сте ересе́й, отцы́ Богому́дреннии, све́тлии наста́вницы ду́ш на́ших, а́нгелом собесе́дницы, и Тро́ице побо́рницы.

И ны́не, Богоро́дичен:

Скве́рну отмы́й страстна́го се́рдца моего́, Богоро́дице всепе́тая, и вся́ я́звы и гное́ния сего́, я́же от греха́ очи́сти Чи́стая, и ума́ моего́ уста́ви непостоя́ние: я́ко да си́лу Твою́ и вели́кое заступле́ние велича́ю окая́нный непотре́бный ра́б Тво́й.

Крестобогоро́дичен.

Подо́бен: Я́ко до́бля:

Распина́ема ви́дящи, ꙳ и в ре́бра пробода́ема копие́м, ꙳ Пречи́стая, Христа́ Человеколю́бца, ꙳ пла́чущи вопия́ше: ꙳ что́ сие́ Сы́не Мо́й, ꙳ что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м, ꙳ и тщи́шися безча́дствовати Мя́ Вселюбе́знейше? ꙳ дивлю́ся, благоутро́бне, Твоему́ во́льному распя́тию.

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с: но моли́твами и́х в ми́ре упра́ви живо́т на́ш.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме седа́лен, гла́с 8.

Подо́бен: Прему́дрости:

Пучи́ны прему́дрости уча́ще, духо́вныя глубины́, Тро́ическое еди́но Божество́ пропове́дали есте́ преподо́бнии, исписа́вше а́нгельския чи́ны, и та́йны те́х сия́ний Богому́дрии: те́м и ни́жнее святи́тельство устроя́юще, ко еди́ному возведо́стеся соедине́нию священному́ченицы. Моли́те Христа́ Бо́га, согреше́ний оставле́ние дарова́ти, чту́щым любо́вию святу́ю па́мять ва́шу. [Два́жды.]

Сла́ва, и ны́не, Богоро́дичен:

Со́лнца о́блаче разу́мнаго, Боже́ственнаго све́та свети́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослепле́нием страсте́й, безстра́стия заре́ю просвети́, молю́ся, и оскверне́ное мое́ се́рдце омы́й пото́ки умиле́ния, покая́ния же слеза́ми: и от тиме́ния мя́ очи́сти де́л мои́х, да любо́вию зову́ Ти: Богоро́дице Присноде́во, моли́ Христа́ Бо́га, прегреше́ний оставле́ние пода́ти ми́, Тебе́ бо име́ю наде́жду ра́б Тво́й.

По 2-й кафи́сме седа́лен, гла́с 5:

Подо́бен: Собезнача́льное Сло́во:

Апо́стольским веща́нием огласи́вше сво́й у́м, и упа́сше преподо́бнии ве́рных соста́в, же́ртву чи́сту принесли́ есте́ Царю́ и Творцу́, вопло́щшемуся за ны́ от Де́вы Богоро́дицы, и воскре́сшему со сла́вою: Его́же пред мучи́тели испове́даша священному́ченицы. [Два́жды.]

Сла́ва, и ны́не, Богоро́дичен:

Те́плая предста́тельнице и непобеди́мая, упова́ние изве́стное и непосты́дное, стено́ и покро́ве и приста́нище прибега́ющым к Тебе́, Присноде́во чи́стая, Сы́на Твоего́ и Бо́га моли́ со а́нгелы, ми́р да́ти ми́ру, и спасе́ние, и ве́лию ми́лость.

По Хвали́те и́мя Госпо́дне:

Припе́в: Велича́ем ва́с священному́ченицы Христо́вы, и чте́м святу́ю па́мять ва́шу: вы́ бо мо́лите за на́с Христа́ Бо́га на́шего.

Псало́м избра́нный: Услы́шите сия́ вси́ язы́цы:

По полиеле́и седа́лен, гла́с 1:

Подо́бен: Ка́мени запеча́тану:

Пло́д Богоразу́мия возде́лавше труды́ свои́ми, из ко́рене безбо́жия исто́ргли есте́ остны́ уче́ния, и ма́стию пома́завшеся благода́тию, упасли́ есте́ лю́ди священному́ченицы, и зако́нно пострада́вше, сугу́бы по́чести от Христа́ сподо́бистеся, сла́ва да́вшему ва́м кре́пость: сла́ва венча́вшему ва́с: сла́ва даю́щему ва́ми все́м исцеле́ние. [Два́жды.]

Сла́ва, и ны́не, Богоро́дичен:

Ру́це твои́ Боже́ственнеи, и́миже Созда́теля понесла́ еси́ Де́во пресвята́я, вопло́щшагося бла́гостию, просте́рши умоли́ Его́, изба́вити на́с от искуше́ний, и страсте́й, и бе́д, хва́лящих Тя́ любо́вию, и вопию́щих: сла́ва все́льшемуся в Тя́: сла́ва проше́дшему из Тебе́: сла́ва изба́вльшему на́с рождество́м Твои́м.

Та́же, степе́нна, 1-й антифо́н 4-го гла́са.

Проки́мен: Честна́ пред Го́сподем сме́рть преподо́бных Его́:

Сти́х: Что́ возда́м Го́сподеви о все́х я́же воздаде́ ми,

Вся́кое дыха́ние:

Ева́нгелие священному́чеником, [пи́сано в конце́ кни́ги сея́].

По 50-м псалме́ стихи́ра, гла́с 4, самогла́сна:

Я́ко столпи́ су́ще це́ркве Христо́вы, сте́ны разори́ли есте́ неве́рствия кре́пко, самобра́тия му́ченицы: те́м пре́жде сме́рти ерети́ческую бу́рю разруши́сте, моля́щеся о душа́х на́ших.

Кано́н, гла́с 4.

Пе́снь 1.

Ирмо́с: Мо́ря Чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Бо́жиим светоли́тием сла́внии облиста́еми, светоно́сное сие́ и све́тлое пра́зднество ва́ше благоче́стно сла́вящих, страсте́й мглы́ изба́вите.

Посра́млен бы́сть нечести́вый страда́льцы и служи́тели Твои́ми Христе́ Царю́, приложи́вся и́м и сво́й ту́л лука́вый испраздни́в, низложи́ти не возмо́же те́х кре́пости.

Во́д животворя́щих и духо́вных исполня́еми, иста́явших зно́ем лю́таго безбо́жия напои́сте, и к воде́ святе́й и спаси́тельней наста́висте.

Богоро́дичен: Разреши́ся прароди́тельное преступле́ние па́че у́мным рождество́м Твои́м Пречи́стая, и пе́рвый восприя́ша ра́йский вхо́д, велегла́сно хва́лящии Тя́.

Пе́снь 3.

Ирмо́с: Весели́тся о тебе́ це́рковь Твоя́ Христе́, зову́щи: Ты́ моя́ кре́пость Го́споди, и прибе́жище и утвержде́ние.

Разжиза́еми мы́сленно Уте́шителевым огне́м, погаси́ша ле́сти лю́таго запале́ния, священному́ченицы ра́дующеся.

Ду́ха све́том сла́внии, су́щих во тме́ лю́те привлеко́сте к све́ту свяще́ннаго креще́ния.

Зла́то искуше́но огне́м муче́ния яви́стеся, му́ченических страда́ний святи́и, иму́ще запечатле́ние.

Богоро́дичен: Избавля́ющаго челове́ки от наси́лия вра́жия, родила́ еси́ си́льнаго Бо́га, пречи́стая Де́во всенепоро́чная.

Седа́лен, гла́с 3.

Подо́бен: Боже́ственныя ве́ры:

Ми́ром пома́зания освяти́вшеся, па́стырие яви́стеся лю́дем Богому́дрым, и я́ко а́гнцы чи́сти поже́ршеся, принесо́стеся Сло́ву началопа́стырю поже́ршемуся я́ко овча́ти, му́ченицы всехва́льнии, и свети́льницы всеми́рнии, те́мже торжеству́ем всю́ любо́вию Боже́ственную па́мять ва́шу.

Сла́ва, и ны́не, Богоро́дичен:

Прибе́жище и си́ла на́ша Богоро́дице, держа́вная по́мощь ми́ра, моли́твами Твои́ми покры́й рабы́ Твоя́ от вся́кия ну́жды, еди́на благослове́нная.

Крестобогоро́дичен: Же́зл си́лы стяжа́вшии, Кре́ст Сы́на Твоего́ Богоро́дице, те́м низлага́ем враго́в шата́ния, любо́вию Тя́ непреста́нно велича́юще.

Пе́снь 4.

Ирмо́с: Вознесе́на Тя́ ви́девши це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й Го́споди.

Свяще́нных му́ченик ли́к да пое́тся, святи́тельства благода́тию, и муче́нием украша́емь, воспева́ющих с весе́лием: сла́ва си́ле Твое́й Го́споди.

Науче́ни бы́вше Боже́ственным та́йнам, отцы́ Богоно́снии, лю́ди в преподо́бии и пра́вде вои́стинну упасо́сте, и коне́ц Боже́ственный прия́сте муче́нием.

Укра́шен бы́в Боже́ственными апо́стольскими, и проро́ческими дарова́нии, священному́ченик ли́к Боже́ственный взыва́ет веселя́ся: сла́ва си́ле Твое́й Го́споди.

Богоро́дичен: Богоглаго́лании оглаша́еми Богоро́дице, е́же о Тебе́ ви́дяще сбытие́, ра́дуйся пренепоро́чная Де́во, Тебе́ зове́м, изба́вленнии рождество́м Твои́м.

Пе́снь 5.

Ирмо́с: Ты́ Го́споди мо́й, све́т в ми́р прише́л еси́, све́т святы́й, обраща́яй из мра́чна неве́дения ве́рою воспева́ющыя Тя́.

Боже́ственными заря́ми прему́драго пропове́дания, возсия́сте седя́щым во тме́ преле́стней све́т благода́тный.

Ны́не зря́ще Христа́ лице́м к лицу́, све́та неизрече́ннаго наслажда́етеся: Тому́ за ны́ моли́теся.

Бо́жия река́ Христо́ва уче́ния испо́лншися в ва́с, загради́сте пото́ки преле́стныя, и умы́ ве́рных тве́рде напои́сте.

Богоро́дичен: Еди́ну от все́х родо́в избра́в Тя́ Госпо́дь, Богоро́дице, из тебе́ воплоти́ся, обожи́в челове́чество.

Пе́снь 6.

Ирмо́с: Пожру́ ти со гла́сом хвале́ния Го́споди, це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Му́жеством и му́дростию пожи́в Го́споди, святы́х Твои́х ли́к, пра́вдою и моли́твою и целому́дрием, о тебе́ ны́не ра́дуется.

Наде́ждею ве́чнаго живота́ укрепля́еми, теле́сная раздробле́ния веселя́щеся претерпе́сте до́блии, и́же Боже́ственным проро́ком святи́и ревни́тели.

Зако́ны воспита́ни духо́вными прему́дрии, беззако́ннующым зако́ны спаси́тельныя предложи́сте, и к све́ту благове́рия си́х приведо́сте.

Богоро́дичен: В ме́ртвость от живота́ совлече́н бы́сть в раи́ Ада́м, твои́м же Де́во обезсме́ртися животворя́щим рождество́м, пречи́стая Богоневе́сто.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 3:

Подо́бен: Де́ва дне́сь:

Я́ко свети́льницы незаходи́мии разу́мнаго со́лнца, соше́дшеся дне́сь восхва́лим пе́сньми, возсия́ли бо есте́ су́щым во тьме́ неразу́мия, все́х созыва́юще к высоте́ благоче́стия священному́ченицы. Те́м вопие́м ва́м: ра́дуйтеся по́стников все́х основа́ние.

И́кос: И́же испе́рва Боже́ственную добро́ту, Иису́се животода́вче, озари́ мне́: я́ко да воспою́ Твоя́ святи́тели, и́же по Тебе́ подви́гшыяся да́же до сме́рти, и вра́жию си́лу низложи́вше кре́пце, и богоме́рзкое нече́стие обличи́вше, кре́стною си́лою утве́рждшеся Христе́, от Тебе́ сла́ву прия́ша досто́йно, те́мже зове́м и́м: ра́дуйтеся по́стников все́х основа́ние.

Пе́снь 7.

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Святи́тельства просвеще́ни ми́ром Богому́дрии, Боже́ственною му́ченическою кро́вию, Боголе́пно обою́ду прославля́етеся, вопию́ще: благослове́н еси́ в хра́ме сла́вы Твоея́ Го́споди.

Упра́вльше я́коже во мгнове́ние земна́я мудрова́ния, я́ко в корабли́ пречи́стыя сла́вы прехва́льнии возвыша́еми, взыва́ша: благослове́н еси́ в хра́ме сла́вы Твоея́ Го́споди.

Не неве́дуще проти́внаго умышле́ния, вся́ко мучи́тельное ве́дение преле́стное отрази́ша сла́внии священному́ченицы, пою́ще: благослове́н еси́ в хра́ме сла́вы Твоея́ Го́споди.

Богоро́дичен: Зе́млю у́бо мгло́ю, не́бо же о́блаки одева́яй Госпо́дь, в пло́ть ме́ртвенную из крове́й Твои́х Де́вце, оде́яся, во оде́жду сла́вы безсме́ртия одева́я челове́ки.

Пе́снь 8.

Ирмо́с: Ру́це распросте́р Дании́л, льво́в зия́ния в ро́ве затче́: о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся́ дела́ Госпо́дня Го́спода.

Бие́ми жи́лами, и боле́зньми плотски́ми, живо́т нетле́нный священному́ченицы исхода́таили есте́ все́м служа́щым ме́ртвым бого́м, и́же, спасе́ни бы́вше, с ва́ми при́сно взыва́ют: благослови́те вся́ дела́ Госпо́дня Го́спода.

Гро́здие виногра́да мы́сленнаго священному́ченицы су́ще, ны́не вино́ источа́ете исцеле́ния, и веселите́ сердца́ все́х ве́рою восхваля́ющих ва́с, и вопию́щих: благослови́те вся́ дела́ Госпо́дня Го́спода.

Священному́ченичестии гро́би чудеса́ источи́ша вселе́нней, всезла́го де́мона привиде́ния ле́стная сокруша́юще, благоле́пная же исцеле́ния подаю́т вопию́щым: благослови́те вся́ дела́ Госпо́дня Го́спода.

Богоро́дичен: Ви́ден бы́сть я́ко Челове́к, из Тебе́ ражда́емь пресу́щный, сугу́б естество́м Пречи́стая, де́йствы же и хоте́нии, и́мже уподо́блься во́лею и я́влься, Ему́же пое́м ве́рою: благослови́те вся́ дела́ Госпо́дня Го́спода.

Пе́снь 9.

Ирмо́с: Ка́мень нерукосе́чный, от несеко́мыя горы́ Тебе́ Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся, Тя́ Богоро́дице велича́ем.

Священному́ченик святы́х свяще́нную соверша́юще па́мять, прииди́те вси́ велегла́сно пе́сньми свяще́нными си́х почти́м, о на́с моля́щихся всеще́дрому Бо́гу на́шему.

Сло́вом уте́шени бы́вше, вся́ скве́рны ду́ш ва́ших очи́стивше, и ко́жныя оде́жды му́ками совле́кшеся, в прекра́сную ри́зу спасе́ния облеко́стеся.

Собра́шася лю́дие в па́мять страстоте́рпец святы́х благода́ти восприя́ти, и до́блия священному́ченики воспе́ти, и́же пострада́ша му́жески, и низложи́ша злонача́льнаго.

Богоро́дичен: Нося́щи на рука́х Христа́, ма́нием нося́щаго вся́ческая, сего́ я́ко Сы́на Твоего́ умоли́, от вра́жиих наве́т изба́вити мя́ Пречи́стая, и бе́здною ми́лости объя́ти, и спасти́ мя.

Свети́лен.

Подо́бен: Жены́ услы́шите:

Ны́не благонаро́чит яви́ся на́м де́нь, иму́щий свяще́нных прее́мник, свяще́нных апо́стол, и Богоно́сныя ку́пно пропове́дники ве́ры, и непобеди́мыя му́ченики: и́хже моле́бную па́мять ве́рно вси́ соверша́ем.

Богоро́дичен: Сове́та Вели́каго А́нгела О́тча родила́ еси́ Христа́ Царя́ Сла́вы препе́тая Отрокови́це, Его́же Кре́ст священному́ченицы пропове́давше, просвети́ша язы́ки, и научи́ша Тя́ Богоро́дицу сла́вити, и покланя́тися Твоему́ рождеству́.

На хвали́тех стихи́ры, гла́с 4.

Подо́бен: Я́ко до́бля:

Свяще́нным пома́занием, ꙳ и му́ченическою кро́вию, ꙳ Бо́гу прибли́жишася священному́ченицы всесла́внии, ꙳ цве́т есте́ственный, ꙳ добро́та слове́сная, ꙳ прему́дрости верхо́вники, ꙳ пра́вости Богосло́вия, ꙳ пра́вило ве́ры, ꙳ всесоста́вное исправле́ние, ꙳ и це́рквам благоле́пие. [Два́жды.]

Стра́ждущым прославле́ние, ꙳ му́чеником велича́ние подпису́юще, ꙳ уве́ристеся Богому́дрии, ꙳ дерза́ти до́блественно ꙳ на разли́чныя му́ки, ꙳ и ю́зы и темни́цы, ꙳ и теле́с обнаже́ния, ꙳ и вяза́ния, ꙳ и сту́дени лю́тыя, ꙳ по́слежде и на ра́ны и сме́рть священному́ченицы.

Многообра́зных ра́ди муче́ний ꙳ совле́кшеся умерщвле́ния, ꙳ му́ченицы сла́внии, ꙳ в нетле́ния ри́зу облеко́стеся, ꙳ и ны́не на небесе́х живете́, ꙳ Боже́ственному Престо́лу всегда́ предстоя́ще: ꙳ те́мже ве́рою ꙳ всесве́тлую па́мять ва́шу пра́зднуем, ꙳ ра́ку моще́й ва́ших облобыза́юще.

Сла́ва, гла́с 8:

Во святи́телех и му́ченицех преидо́сте преподо́бнии, ве́рнии яви́стеся па́стырие, и Христо́ву испи́вше ча́шу. Те́м во обои́х благоугоди́вше Христу́, тому́ моли́теся о все́х на́с с го́рними слуга́ми, во све́те ны́не водворя́ющеся.

И ны́не, Богоро́дичен:

Арха́нгела Гаврии́ла гла́с восприи́мше рце́м: ра́дуйся Ма́ти Бо́жия, я́же жизнода́вца Христа́ ми́ру ро́ждшая.

Крестобогоро́дичен: Ю́ница нескве́рная, Юнца́ ви́дящи на дре́ве пригвожда́ема во́лею, рыда́ющи жа́лостне, увы́ Мне́, вопия́ше, люби́мейшее Ча́до! что́ Ти со́нм воздаде́ неблагода́рный евре́йский, хотя́ Мя обезча́дствовати от Тебе́ Вселюбе́зне?

А́ще и́мут Сла́ву на стихо́вне, глаго́ли вече́рний.

И ны́не, Богоро́дичен, или́ Крестобогоро́дичен.