[Глава 16] Слу́жба о́бща священному́ченику еди́ному
Ве́чер,
на Го́споди воззва́х, стихи́ры, гла́с 1.
Подо́бен: Всехва́льнии му́ченицы:
Богому́дре блаже́нне, и́мярек, ꙳ очервле́ньми твоея́ кро́ве, ꙳ свяще́нную твою́ оде́жду украси́л еси́: ꙳ от си́лы бо благоче́стно в си́лу, ꙳ и от сла́вы в сла́ву Боже́ственную ꙳ ра́дуяся преше́л еси́, ꙳ и ны́не моли́ся, ꙳ дарова́ти душа́м на́шым ꙳ ми́р и ве́лию ми́лость.
Же́ртву пе́рвее ꙳ Бо́гу принося́ безкро́вную, ꙳ я́ко свяще́нник зако́ннейший, ꙳ Богоглаго́ливе всече́стне, ꙳ по́слежде я́ко всепло́дие ꙳ и прия́тну же́ртву, ꙳ тебе́ сама́го кро́вию, ꙳ я́ко му́ченик и́стиннейший, ꙳ Христу́ прине́сл еси́, Его́же моли́ о пою́щих тя́.
Му́ченик во́инства, ꙳ Христу́ о́тче, приве́л еси́ ꙳ уче́нии твои́ми и наказа́нии, ꙳ учя́ и наказу́я, ꙳ и я́ве о́браз Богому́дре, тебе́ сама́го предлага́я. ꙳ С ни́миже моли́ся, ꙳ дарова́ти душа́м на́шым ꙳ ми́р и ве́лию ми́лость.
Сла́ва, и ны́не, Богоро́дичен:
Прегреше́ний пучи́ною обурева́емь, к ти́хому приста́нищу Твоея́ пречи́стыя мольбы́ Богоро́дице, прибе́г, взыва́ю Ти́: спаси́ мя, держа́вную Твою́ просте́рши десни́цу рабу́ Твоему́, Пренепоро́чная.
Крестобогоро́дичен: У Креста́ предстоя́щи Сы́на и Бо́га Твоего́, и долготерпе́ние Того́ смотря́ющи, глаго́лаше пла́чущи Ма́ти чи́стая: увы́ Мне́, Ча́до Сладча́йшее, что́ сия́ стра́ждеши не пра́ведно, Сло́ве Бо́жий, да спасе́ши челове́чество?
А́ще и́мать самогла́сен, Сла́ва, гла́с 6:
Свяще́нник законне́йший, да́же до кончи́ны твоея́ бы́л еси́, блаже́нне и́мярек: священноде́йствуя бо Боже́ственная и неизглаго́ланная та́инства, кро́вь твою́ излия́л еси́ за Христа́ Бо́га, и же́ртву благоприя́тну себе́ приве́л еси́. Те́м дерзнове́ние име́я к Нему́, приле́жно моли́ся о ве́рою и любо́вию соверша́ющих твою́ пречестну́ю па́мять, и почита́ющым сию́ изба́витися напа́стей и вся́ких бе́д и обстоя́ний.
И ны́не Богоро́дичен:
Бо́га из Тебе́ воплоти́вшагося разуме́хом, Богоро́дице Де́во: Того́ моли́ о спасе́нии ду́ш на́ших.
Крестобогоро́дичен: Ви́дящи Тя́ распина́ема, Христе́, Тебе́ ро́ждшая, вопия́ше: что́ стра́нное е́же ви́жу та́инство, Сы́не Мо́й? ка́ко на дре́ве умира́еши пло́тию пове́шен, жи́зни пода́телю?
А́ще пра́зднуеши с полиеле́ем, и ты́ глаго́ли Богоро́дичен воскре́сный: Кто́ тебе́ не ублажи́т:
Вхо́д. Проки́мен дне́.
Чте́ния 3 святи́тельская, [пи́саны в конце́ кни́ги сея́].
На стихо́вне стихи́ры, самогла́сны, гла́с 6.
Кро́вию обагри́в твою́ свяще́нную оде́жду, вше́л еси́ во свята́я святы́х, свя́т ты́ бы́в, и́мярек, сла́вне, и я́ве всегда́ наслажда́яся обоже́ния, украша́емь и муче́нием сия́я, и а́нгел показу́яся чисте́йшими причаще́нии. Те́м тя́ чти́м, и любо́вию пра́зднуем твое́ свяще́ннейшее торжество́ достоблаже́нне.
Сти́х: Пра́ведник я́ко фи́никс процвете́т, я́ко ке́др, и́же в Лива́не, умно́жится.
Желе́зом око́ван, непреткнове́нно стезю́ ше́ствовал еси́, преподо́бне, к небе́сному гра́ду веду́щую, честны́ми твои́ми ра́нами, и́мярек, всему́дре, я́коже у́тварию обложе́н. В него́же вше́д я́ко победи́тель и́стиннейший и му́ченик непобеди́мь, и священноде́йственник свяще́ннейший, пое́ши со а́нгелы песнопе́ние Боже́ственное чи́сто: Свя́т, Свя́т, Свя́т, Тро́ице единосу́щная.
Сти́х: Насажде́ни в дому́ Госпо́дни, во дво́рех Бо́га на́шего процвету́т.
Восхо́дный степе́нь це́рковь стяжа́, свяще́нныя твоя́ по́двиги, священному́чениче и́мярек, ю́же и храни́ши незы́блему и ненаве́тну от волко́в держа́вных, пропове́дающую до́блести твоя́, и велича́ющую твоя́ страда́ния, я́же за Христа́ зако́нно пострада́л еси́ блаже́нне.
Сла́ва, гла́с 4.
В це́рковь небе́сную свяще́нно вше́л еси́, свяще́нно облива́емь блаже́нне, кро́вию, и Тро́ице предстои́ши, бога́тно сия́я отту́ду блиста́нии истека́ющими пребога́те. Те́мже дне́сь, и́мярек, твою́ па́мять светоно́сную соверша́юще, чу́вствия души́ просвеща́ем.
И ны́не, Богоро́дичен: воскре́сный.
А́ще ли не пра́зднуеши, глаго́ли се́й Богоро́дичен:
Ту́чами Ду́ха Пресвята́го Пречи́стая, мою́ мы́сль ороси́, я́же ка́плю ро́ждшая Христа́, неизче́тно безме́рная беззако́ния челове́ком щедро́тами измы́вшую: изсуши́ исто́чник страсте́й мои́х, и пото́ка мя́ сподо́би пи́щи живы́я при́сно, моли́твами Твои́ми.
Крестобогоро́дичен: На кресте́ Тя я́ко узре́ ꙳ пригвожде́на Го́споди, ꙳ А́гница и Ма́ти Твоя́ дивля́шеся, ꙳ и что́ виде́ние сие́, взыва́ше, ꙳ Сы́не возжеле́нне? ꙳ сия́ Ти́ неве́рный собо́р воздаде́ беззако́нный, ꙳ и́же мно́гих Твои́х чуде́с наслади́выйся, ꙳ но сла́ва неизглаго́ланному ꙳ соше́ствию Твоему́ Влады́ко.
Тропа́рь во уста́ве.
А́ще ли не́сть уста́ва, глаго́ли се́й тропа́рь, гла́с 4:
И нра́вом прича́стник, и престо́лом наме́стник апо́столом бы́в, дея́ние обре́л еси́ Богодухнове́нне, в виде́ния восхо́д: сего́ ра́ди сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче и́мярек, моли́ Христа́ Бо́га спасти́ся душа́м на́шым.
Сла́ва, и ны́не, Богоро́дичен, или́ Крестобогоро́дичен.
На у́трени,
на Бо́г Госпо́дь, тропа́рь то́йже.
По 1-й кафи́сме седа́лен, гла́с 3.
Подо́бен: Боже́ственныя ве́ры:
Мо́рем ве́ры испове́дания, пре́лести угаси́л еси́ злосла́вие, обличи́в и́дольское безбо́жие, и всесожже́ние Боже́ственное бы́в, чудотворе́нием озаря́еши концы́ о́тче преподо́бне. Христа́ Бо́га моли́ дарова́ти на́м ве́лию ми́лость. [Два́жды.]
Сла́ва, и ны́не, Богоро́дичен:
Боже́ственная ски́ния была́ еси́ Сло́ва, еди́на пречи́стая Де́во Ма́ти, чистото́ю а́нгелы превозше́дшая, па́че все́х мене́ пе́рсть бы́вша, оскверне́на плотски́ми прегреше́ньми, очи́сти моли́тв Твои́х Боже́ственными вода́ми, подаю́щи Чи́стая, ве́лию ми́лость.
По 2-й кафи́сме седа́лен, гла́с 4.
Подо́бен: Яви́лся еси́ дне́сь:
Возсия́в я́коже со́лнца заря́, блиста́еши преподо́бне всему́ ми́ру све́тло уче́нии твои́ми Богогла́се и́мярек, светоно́сне му́чеником похвало́. [Два́жды.]
Сла́ва, и ны́не, Богоро́дичен:
Пречи́стеи руце́ Твои́ Де́во ма́ти, просте́рши, покры́й упова́ющыя на Тя́, и Сы́ну Твоему́ зову́щыя: все́м пода́ждь Христе́, ми́лости Твоя́.
По Хвали́те и́мя Госпо́дне:
Припе́в:
Велича́ем тя́ священному́чениче, и́мярек, и чте́м святу́ю па́мять твою́: ты́ бо мо́лиши за на́с Христа́ Бо́га на́шего.
Псало́м избра́нный: Услы́шите сия́ вси́ язы́цы:
По полиеле́и седа́лен, гла́с 8.
Подо́бен: Прему́дрости:
Окормля́емь си́лою вседе́тельною, и ве́трилом окриля́емь кре́стным, легко́ преплы́л еси́ жите́йскую бу́рю, и к Боже́ственным приста́нищем вои́стинну дости́гл еси́, доброде́телей ку́плю мно́гу стяжа́в, ю́же Влады́це все́х прине́сл еси́, и е́же благи́й ра́бе, слы́шал еси́, и си́м после́дующая: те́мже, и́мярек, блаже́нне, моли́ Христа́ Бо́га, грехо́в оставле́ние пода́ти, чту́щым любо́вию святу́ю па́мять твою́. [Два́жды.]
Сла́ва, и ны́не, Богоро́дичен:
В напа́сти многоплете́нныя впа́д, от вра́г ви́димых и неви́димых, бу́рею одержи́мь безчи́сленных согреше́ний мои́х: и я́ко к те́плому защище́нию и покро́ву моему́, Чи́стая, к приста́нищу притека́ю Твоея́ бла́гости. Те́мже Пречи́стая, из тебе́ воплоще́нному безсе́менно моли́ся приле́жно о все́х рабе́х твои́х, непреста́нно моля́щих ти ся, Богоро́дице Пречи́стая, моля́щи его́ при́сно, согреше́ний оставле́ние дарова́ти, воспева́ющым досто́йно сла́ву Твою́.
Степе́нна, 1-й антифо́н 4-го гла́са.
Проки́мен: Честна́ пред Го́сподем сме́рть преподо́бных Его́.
Сти́х: Что́ возда́м Го́сподеви о все́х, я́же воздаде́ ми́?
Вся́кое дыха́ние:
Ева́нгелие священному́ченику, [пи́сано в конце́ кни́ги сея́].
По 50-м псалме́ стихи́ра, гла́с 4:
Сосу́д свяще́н Ду́ха Свята́го бы́л еси́, ду́шу очи́стив от страсте́й свяще́нне, отсю́ду Боже́ственное пома́зание свято́е прия́л еси́, святи́тель ты́ бы́в, и наста́вник люде́й Богому́дрых, и му́ченик непобеди́мь, на́с ра́ди стра́сти претерпе́вшаго, и безстра́стие источи́вшаго, страда́льче и́мярек.
Кано́н, гла́с 2.
Пе́снь 1.
Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския: я́ко просла́вися.
Христо́вым светоли́тием просвеща́емь, священному́чениче сла́вне, и́мярек моли́твами твои́ми преблаже́нне, омраче́нную ду́шу мою́ просвети́, я́ко да воспева́ю тя́.
Просвеще́нием спаси́тельнаго пропове́дания, чи́стому се́рдцу твоему́, я́ко зерца́ло нескве́рное о́тче возсия́в, лучы́ все́м испусти́л еси́.
Посто́м твои́м страстна́я игра́ния вся́, и воздержа́нием жела́ние претвори́л еси́, и разли́чными по́двиги взя́лся к безстра́стней высоте́.
Богоро́дичен: Бо́га из Тебе́ вопло́щшагося све́мы, безсе́меннаго хоте́ния, су́щаго пре́жде всея́ тва́ри, и пре́жде все́х ве́к: те́мже Тя́ су́щую Богоро́дицу воспева́ем.
Пе́снь 3.
Ирмо́с: Утверди́ на́с в Тебе́, Го́споди, дре́вом умерщве́й гре́х, и стра́х Тво́й всади́ в сердца́ на́с пою́щих Тя́.
Всесоверше́нну же́ртву жи́ву, себе́ Христу́ прине́сл еси́ муче́нием, со́вестию му́ченическою, преди́ пострада́в воздержа́нием.
Житие́ твое́ свяще́нно, и сло́во Боже́ственно, и дея́ния Боже́ственная, прие́мля восхожде́ния в се́рдцы твое́м, и́стиннаго Боговиде́ния, его́же получи́л еси́.
Упра́вив Богоразу́мно преподо́бне, у́м тво́й, за́поведьми Спа́совыми, досто́ин яви́лся еси́, и ве́ры побо́рник непобеди́мый.
Богоро́дичен: От ме́ртвости у́м на́ш оттрясла́ еси́, ро́ждши су́щее безсме́ртие, и оде́жду на́м изтка́ла еси́ нетле́ния, Де́вце, рождество́м Твои́м.
Седа́лен, гла́с 3:
Боже́ственным Ду́хом просвеще́н, свере́пство мучи́телей, дерзнове́нием па́стырским священному́чениче велему́дренно посрами́л еси́: и преше́д пре́лести пучи́ну, ко приста́нищу Боже́ственному дости́гл еси́ о́тче преподо́бне. Христа́ Бо́га моли́ дарова́ти на́м ве́лию ми́лость.
Сла́ва, и ны́не, Богоро́дичен:
Ки́йждо иде́же спаса́ется, та́мо пра́ведно и притека́ет: и ко́е ино́е таково́е прибе́жище, я́ко Ты́ Богоро́дице, покрыва́ющее ду́шы на́ша?
Крестобогоро́дичен: Же́зл си́лы стяжа́вшии, Кре́ст Сы́на Твоего́ Богоро́дице, те́м низлага́ем враго́в шата́ния, любо́вию Тя́ непреста́нно велича́юще.
Пе́снь 4.
Ирмо́с: Услы́шах Го́споди, сла́вное Твое́ смотре́ние, и просла́вих Человеколю́бче непостижи́мую Твою́ си́лу.
Всесожже́ние Боже́ственное ты́, и чиста́ же́ртва прине́слся еси́ Спа́су все́х, священному́чениче прему́дре.
Ста́до Христо́во, преподо́бне, наставля́я к све́ту Богоразу́мия, безбо́жия тьму́ отгна́л еси́.
Безбо́жия глубину́ реко́ю твои́х по́тов, о́тче, я́ко священному́ченик изсуши́л еси́.
Богоро́дичен: Просвети́ Пречи́стая, омраче́нную ду́шу мою́ све́том Твои́м, я́же Све́т ро́ждшая еди́н ипоста́сный.
Пе́снь 5.
Ирмо́с: Све́та пода́телю, и веко́в тво́рче Го́споди, во све́те Твои́х повеле́ний наста́ви на́с: ра́зве бо Тебе́ ино́го Бо́га не зна́ем.
Бога́тство и сла́ву све́тлую, и долготу́ жи́зни, и живо́т нетле́нен, и́стинная прему́дрость Христо́с, тебе́ дарова́ блаже́нне, я́ко изря́дне того́ возлю́бльшу.
Жезло́м ве́ры отгоня́еши ересе́й лови́твы, и сою́зом любве́ спря́г ста́до твое́, наде́ждею и ве́рою сохраня́еши невре́дно.
Отрази́в воздержа́нием пи́щу, накорми́л еси́ ду́шу твою́, пи́щу име́я непреста́нныя моли́твы и поуче́ние, и е́же к Бо́гу вознося́щее смире́ние.
Богоро́дичен: Тя́ засту́пницу Чи́стая, и наде́жду тве́рду, и держа́ву и покро́в, и сте́ну стяжа́хом вси́, и в Ца́рство Небе́сное вводя́щий мо́ст.
Пе́снь 6.
Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́ Бо́же мя́ возведи́.
Же́ртва и жри́тель бы́в, поже́рл еси́ себе́ Бо́гу ве́ры ра́ди: и соблюда́еши безскве́рнено Тому́ служи́тельства твоего́ соверше́ние.
Умертви́лся еси́, Богоглаго́ливе, ми́ру всему́, еди́ному же Бо́гу жи́в пребыва́я, ко Христу́ преста́вился еси́ живото́м нетле́нным обогаща́емь.
Ны́не в безконе́чную сла́ву преше́д от земли́, окая́нную ду́шу мою́ страстьми́, преподо́бне, приле́жным очище́нием твоея́ моли́твы уврачу́й.
Богоро́дичен: Взе́млющаго грехи́ всего́ ми́ра Пречи́стая, Христа́ заче́нши Пренепоро́чная, не преста́й прося́щи грехо́в проще́ния рабо́м Твои́м.
Конда́к во уста́ве.
А́ще ли не́сть уста́ва, глаго́ли се́й конда́к, гла́с 4:
Подо́бен: Вознесы́йся на Кре́ст:
Во святи́телех благоче́стно пожи́в, и муче́ния пу́ть проше́д, и́дольския угаси́л еси́ же́ртвы, и побо́рник бы́в твоему́ ста́ду, Богому́дре. Те́мже тя́ почита́юще та́йно вопие́м ти́: от бе́д изба́ви ны́ при́сно твои́ми мольба́ми, о́тче на́ш, и́мярек.
И́кос: Ве́рно любо́вию совоку́пльшеся в па́мять свяще́ннаго страда́льца, и сего́ пе́сньми восхва́лим дне́сь, я́ко да благода́ти от него́ наслади́мся: ду́шы бо спаса́ет от страсте́й и бе́д, я́ко му́ченик, и я́ко ве́рен святи́тель, и побо́рник моля́щих его́ от души́. Те́мже вопие́м ему́: от бе́д изба́ви ны́ при́сно твои́ми мольба́ми о́тче на́ш, и́мярек.
Пе́снь 7.
Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́ Бо́же оте́ц на́ших.
Прему́дрости ча́ша яви́лся еси́ доброде́тели испо́лнена, и созва́в пропове́данием высо́каго жития́ твоего́ ста́до твое́, сие́ упра́вил еси́ Богому́дре, и с ни́ми о́тче взыва́еши: благослове́н Бо́г оте́ц на́ших.
В хра́мы та́мо су́щыя, в жили́ще че́стно дости́гл еси́, со а́нгелы водворя́яся, и с ни́ми о́тче лику́еши. Те́мже тя́ чту́ще преблаже́нне, со дерзнове́нием зове́м: благослове́н Бо́г оте́ц на́ших.
Блаже́н еси́, и добро́ ти е́сть ны́не водвори́вшуся, иде́же пра́ведных во́инства, иде́же му́ченическая селе́ния, иде́же прему́дрых апо́стол ли́цы вопию́т: благослове́н Бо́г оте́ц на́ших.
Богоро́дичен: Ты́ еди́на Бо́гу вся́ческая му́дростию созда́вшему Ма́ти позна́лася еси́ неискусобра́чная, Де́во пречи́стая. Те́мже Ти́ благоче́стно взыва́юще глаго́лем: благослове́на я́же Бо́га пло́тию ро́ждши.
Пе́снь 8.
Ирмо́с: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.
Священноде́йствовав благоче́стно Христо́ву слу́жбу та́йную, слове́сное овча́ са́м прине́слся еси́ ему́ же́ртва прия́тна и благоуго́дна, всесоверша́ема кро́вию, преблаже́нне.
Свяще́нства оде́жду де́лы твои́ми прему́дре, украси́в, яви́лся еси́ целому́дрия ключа́рь, воздержа́ния пи́ща и́стинная, моли́твы учи́тель, покая́ния наста́вник, и зако́н жи́зни.
Предложе́нию вре́мя, покая́нию пло́д при́сно предлага́емь, и смоко́вница непло́дная посече́нием прети́т: душе́ моя́, прокля́тия убо́йся, восприими́ же Христа́, благопло́дие доброде́тельное.
Богоро́дичен: Не пре́зри, Засту́пнице стра́шная, гла́са ра́б Твои́х и от вся́кия беды́ и преще́ния лю́таго, Де́во свята́я, все́х исхити́: преклоня́ет бо Бо́га ма́терняя моли́тва Твоя́.
Пе́снь 9.
Ирмо́с: От Бо́га Бо́га Сло́ва, неизече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.
Увяди́л еси́ о́тче, разли́чныя вра́жия стре́лы, огне́м воздержа́ния, и чистоты́ у́глием, плотску́ю попали́в ти́ну, и́стинныя та́мо су́щия све́тлости пресла́вно сподо́бился еси́.
Светоно́сная твоя́, о́тче, возсия́вши па́мять, просвеща́ет ду́шы благогове́йно сию́ соверша́ющих, досточу́дне, и прича́стники Бо́жия све́та явле́нно си́х соверша́ет: ю́же досто́йно, Богому́дре, пе́сньми велича́ем.
Вене́ц нося́ща тя́, о́тче, и по́честь побе́ды прии́мша от Бо́жия десни́цы, и по́двиги сконча́вша, и све́та испо́лньшася Бо́жия, ве́рующе ве́рнии ко Христу́ моле́бника те́пла тя́ предлага́ем.
Богоро́дичен: Я́ко Богоро́дицу Тя́, Де́во и Ма́терь Сло́ва, хода́таицу су́щую на́м, присносу́щнаго Бо́жия живота́, и пра́вды со́лнце возсия́вшую на́м, ве́рнии единому́дренно пе́сньми велича́ем.
Свети́лен.
Подо́бен: Не́бо звезда́ми:
Я́ко священному́ченик, вяза́ти и реша́ти име́яй вла́сть, разреши́ зо́л мои́х сою́з, и к любви́ Бо́жией причти́ мя и Ца́рствия прича́стника, блаже́нне, соде́лай моли́твами твои́ми.
Богоро́дичен: Просвети́ Чи́стая, ду́шу мою́ грехи́ потемне́вшую, и ве́чнующаго мя́ пла́мене и мра́ка изба́ви хода́тайством Твои́м, я́ко да с весе́лием хвалю́ Твое́ вели́чие.
На хвали́тех стихи́ры, гла́с 4.
Подо́бен: Да́л еси́ зна́мение:
Благода́ть духо́вная, ꙳ и́мярек, о́тче тебе́ возсия́вши, ꙳ све́тло просвети́ тя: ꙳ отсю́ду ума́ли страстну́ю но́щь, ꙳ и безстра́стия де́нь пости́же, ꙳ чи́сте чисте́йшему све́ту совоку́плься. ꙳ О не́мже жи́тельствуя, ꙳ не забу́ди Богогла́се священному́чениче, ꙳ ве́рою пою́щих па́мять твою́. [Два́жды.]
Благода́ть жела́нную, ꙳ священному́чениче, и́мярек, нося́ небе́сную, ꙳ земны́я же небре́гл еси́: ꙳ сего́ ра́ди я́ко безпло́тен, ꙳ страда́льческое избра́л еси́ житие́, ꙳ я́ко присносу́щнаго пото́ка пи́щи, ꙳ благонаслади́тися хотя́ Богоприя́тне, ꙳ и слеза́ми ми́ изсуши́л еси́, му́тный исто́чник страсте́й, и напои́л еси́ душепи́щныя кла́сы.
Те́ло преоби́дел еси́ ꙳ ураня́емое бие́ньми, ꙳ и огню́ приближа́емое: ꙳ у́м бо впери́л еси́ непобеди́мым жела́нием, ꙳ прекра́сною добро́тою, ꙳ Боже́ственнаго рачи́теля, ꙳ Его́же сла́дким уязви́вся жела́нием, ꙳ му́чеников удобре́ние, святи́телей украше́ние, ꙳ страда́льче, и́мярек, а́нгелов собесе́дниче.
Сла́ва, гла́с 4:
Но́в са́д я́коже ма́слина, на Бо́жией трапе́зе положи́лся еси́, я́ко сы́н ходя́щих по пути́ Госпо́дню: муче́ния ра́ди благослови́ тя́ Госпо́дь, и у́зриши блага́я вы́шняго Сио́на, наслажда́яся Боже́ственнаго ра́дования со все́ми святы́ми, священному́чениче, и́мярек, достойнопе́тый: и́мже о́бщники на́с бы́ти мольба́ми твои́ми сотвори́.
И ны́не, Богоро́дичен:
Богоро́дице, все́х Цари́це, правосла́вных похвало́, ерети́чествующих шата́ния разори́, и ли́ца и́х посрами́, не кла́няющихся ниже́ чту́щих пречи́стая, честны́й Тво́й о́браз.
Крестобогоро́дичен: Распина́ема ви́дящи, ꙳ и в ре́бра пробода́ема копие́м, Пречи́стая, Христа́ человеколю́бца, ꙳ пла́чущи вопия́ше: ꙳ что́ сие́ Сы́не Мо́й? ꙳ что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м, ꙳ и тщи́шися безча́дствовати Мя́ Вселюбе́знейше? ꙳ дивлю́ся Благоутро́бне, ꙳ Твоему́ во́льному распя́тию.
А́ще и́мать, Сла́ву на стихо́вне, глаго́ли вече́рний.
И ны́не, Богоро́дичен, или́ Крестобогоро́дичен.