5-й день

Святи́теля Ио́ны, архиепи́скопа Новгоро́дскаго, чудотво́рца

Святы́х му́ченик Галактио́на и Еписти́мии

НА МАЛОЙ ВЕЧЕ́РНИ

Стихи́ры, глас 8.

Подо́бен: О, пресла́внаго чудесе́:

Водруже́ние и́стины,/ благоче́стия согла́сника тя зна́ем/ и ве́ры освяще́ние,/ чистоты́ же селе́ние,/ прия́телище избра́нно,/ святи́телю преподо́бне Ио́но, мо́лим тя:/ в ми́ре нам моли́ сохрани́тися,/ да при́сно сла́вим и воспева́ем Го́спода на́шего,/ прославля́ющаго и тебе́ ра́ди подаю́щаго нам спасе́ние/ и ве́лию ми́лость.

Житие́ твое́ доброде́тельми украси́л еси́,/ свети́льник я́ве быв и храни́тель Христо́ву ста́ду,/ дея́ния бо виде́ния я́ве показа́л еси́ восхожде́нием,/ я́ко ду́шу согласи́л еси́ де́тельно,/ и изря́дно к виде́нию взя́тся,/ и зри́ши Го́спода, о́тче Ио́но./ Ему́же приле́жно моли́ся/ дарова́ти мир ми́рови,/ спасе́ние же и мно́гую ми́лость/ почита́ющим нам свяще́нную па́мять твою́.

Воздержа́нием пре́жде умертви́в плотска́я мудрова́ния,/ священноде́йственник был еси́,/ Бо́жия Боже́ственно соверша́я/ и честне́йшим по́мыслом чи́сте прикаса́яся,/ служи́тель яви́лся еси́ Вседержи́телю, архиере́ю Ио́но./ Его́же умоли́, яко Всеми́лостива и Бла́га,/ дарова́ти мир ми́рови/ и душа́м на́шим ве́лию ми́лость.

Сла́ва, глас 4:

Весели́ся и ра́дуйся, Вели́кий Но́вгра́де,/ да игра́ют сы́ны твоя́ в тебе́,/ све́тло торжеству́юще в памя́ть иера́рха Ио́ны,/ сирота́м и вдова́м предста́теля,/ скорбя́щих уте́шителя,/ прибега́ющим к нему́ помо́щника и те́пла засту́пника,/ призыва́ющих его́ ско́ро послу́шающа,/ сердца́ на́ша на милосе́рдие и ти́хость прелага́юща/ и проти́вныя примиря́юща:/ предсто́ит бо Го́сподеви, моля́ся умири́ти ми́ра/ и спасти́ ду́ши на́ша.

И ны́не, Богоро́дичен:

Ве́лие и пресла́вное, е́же о Тебе́ бы́вшее, чу́до,/ и кто́ дово́лен изглаго́лати си́лы Госпо́дня,/ я́же о Тебе́ бы́вшия, Богоро́дице?/ Устраша́ет бо ум наш вели́ка виде́ния достоя́ния,/ я́ко непостижи́маго Твоего́ та́инства глаго́лати не могу́ще./ Кто́ бо слы́ша от ве́ка Де́ву дои́вшу/ и Ма́терь без му́жа я́вльшуся на земли́,/ и Своего́ Соде́теля я́ко Младе́нца на руку́ носи́вшу?/ Те́мже тя вси ро́ди ублажа́ем.

На стихо́вне стихи́ры, глас 7:

О́тче свяще́нне Ио́но,/ ты освяти́лся еси́ благода́тию Всесвята́го Ду́ха/ слове́сному ста́ду Христо́ву,/ но я́ко Влады́це твоему́ подража́тель,/ ми́ловати нас жив сый не преста́л еси́./ И ны́не та́коже моля́ не преста́й/ изба́вити нас от вся́каго лю́таго обстоя́ния/ и спасти́ ду́ши на́ша.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Глас 1:

О́тче преподо́бне Ио́но,/ ты, земна́я мудрова́ния воздержа́нием умертви́в,/ ду́шу напра́вил еси́ к невла́емому⁶⁸ наслажде́нию./ Проси́ нам невла́емо преити́ пучи́ну жития́,/ прелага́я стро́потное в тишину́,/ подая́ хва́лящим тя мир и спасе́ние, блаже́нне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

О́тче Ио́но блаже́нне,/ да́нный тебе́ тала́нт умно́жил еси́,/ ра́дости сподо́бився Го́спода твоего́,/ испещре́н благода́ти сия́нием,/ заре́ю духо́вною блиста́я,/ предстои́ши Го́споду./ Проси́ изба́витися нам вся́каго гне́ва и озлобле́ния,/ да в ми́ре сла́вяще Го́спода,/ при́сно тя ублажа́ем.

Сла́ва, глас 5:

Прииди́те, ве́рных сосло́вие,/ соше́дшеся, восхва́лим архиере́я Ио́ну,/ и́бо до́брый па́стырь,/ пасо́мыя руководя́ к ве́ре сло́вом и́стинным/ и ве́ру изве́ствовати доброде́тельми наказу́я./ Те́ми Христо́с возда́л есть сему́ мзду,/ я́ко до́брому рабу́ Своему́,/ и нам, блажа́щим па́мять его́,/ да́рует, я́ко Бла́г,/ мно́жество щедро́т Свои́х его́ ра́ди/ и бо́гатую ми́лость.

И ны́не, Богоро́дичен:

Ра́дуйся, две́ре мы́сленная,/ е́юже про́йде преве́чный Бог;/ ра́дуйся, же́зле Ааро́нов,/ израсти́вший цвет от ко́рене Иессе́ева;/ ра́дуйся, трапе́зо,/ я́же Хлеб жи́зни на пи́щу всему́ пода́вши ро́ду челове́ческому,/ Де́во Ма́ти Чи́стая.

Тропа́рь, глас 4 ( зри день сей ни́же: Тропа́рь свята́го)

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: поста́вим стихо́в 8 и пое́м стихи́ры, глас 6.

Подо́бен: Все отло́жше:

Я́коже звезда́ возсия́л еси́ на тве́рди Церко́вней,/ озаря́я мир исправле́нием Сло́ва и́стиннаго, му́дре Ио́но,/ вдовы́ и сироты́ снабдева́я оте́чески/ и ни́щия ми́луя,/ оби́димыя изима́я, вражды́ утоля́я,/ мир утвержда́я./ Христо́вых за́поведей де́лателю, о́тче всесвяще́нне,/ проси́ ми́ра ми́рови, мо́лим тя,/ и спасе́ния душа́м на́шим.

Досто́йно на тя архиере́йства нарече́ние прии́де, препо́добне о́тче,/ отроча́ти еще́ тебе́ су́щу:/ дея́ния бо в тебе́ Богоуго́дная воспита́ема,/ кро́тость с незло́бием./ Тем во дворы́ Госпо́дни вселя́ешися,/ я́ко тако́в подоба́ше архиере́й бы́ти преподо́бен./ Но я́ко и́маши дерзнове́ние,/ моли́, мо́лим тя, умири́ти мир/ и спасти́ ду́ши на́ша.

Преподо́бне архиере́ю,/ изво́лил еси́ примета́ти⁶⁹ себе́ в дому́ Бо́жии/ па́че, не́же жи́ти в се́лех ми́ра,/ и по́стническими пра́вилы испытова́шеся,/ после́дуя знаменоно́сцем, отце́м вели́ким,/ Варлаа́му и Се́ргию./ Те́мже и Госпо́дь изведе́ тя па́стыря лю́дем Свои́м/ и я́ко ве́рну рабу́ стро́ити ду́ши сих поручи́./ За ня́же моли́ поми́ловати я́ и спасти́.

Сла́ва, глас 1:

Прииди́те, Вели́каго Нова́гра́да лю́дие,/ духо́вне торжеству́им,/ днесь бо день поко́я трудо́в до́браго на́шего па́стыря,/ в о́ньже пе́сней трубо́ю возглаша́юще:/ ра́дуйся, свети́ло све́тлое ми́рови;/ ра́дуйся, мы́сленнаго Со́лнца све́тлый о́бразе;/ ра́дуйся, заря́ми доброде́телей осиява́я вся./ Но, о́тче прекра́сне,/ хода́таю ми́ра и засту́пниче те́плый ста́ду твоему́,/ не преста́й моли́тися, мо́лимся тебе́,/ спасти́ся нам от вся́каго наве́та,/ любо́вию чту́щим свяще́нную па́мять твою́.

И ны́не, Богоро́дичен: Всеми́рную сла́ву:

Вход, проки́мен дне. Чте́ния 3 святи́тельская

При́тчей чте́ние (главы́ 10, 3, 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ мои́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум, и смы́сл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6, 8, 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды объи́мет./ Свет пра́ведным всегда́,/ и от Го́спода обря́щут благода́ть и сла́ву,/ язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго:/ постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности мое́я./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница¹³³ бо есть Бо́жия хи́трости/ и обрета́тельница дел Его́./ Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто,/ весть дре́вняя и бы́ти хотя́щая разсмо́трит:/ свесть изви́тия слове́с и разреше́ния гада́ний,/ зна́мения, и чудеса́ проразуме́ет,/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся Сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тва́рьми/ и да управля́ет мир в преподо́бии и пра́вде,/ даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (гла́вы 4, 6, 7, 2):

Похваля́ему пра́веднику возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от челове́ков,/ и уго́дна Го́споду душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете,/ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости Наста́вник есть,/ и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость:/ есть бо в ней Дух Разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия;/ та́я дру́ги Бо́жия и проро́ки устроя́ет./ Благоле́пнейши же есть со́лнца/ и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та́я, угожда́ющия ей, от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ от ловя́щих,/ и по́двиг кре́пок подаде́ им./ Да разуме́ют вси,/ я́ко си́льнейши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́веднаго/ и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго,/ я́ко неуго́ден нам есть:/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́ний на́ших,/ и тя́жек нам есть, и ви́димь:/ я́ко неподо́бно ины́м житие́ его́,/ и измене́ны стези́ его́./ В поруга́ние вмени́хомся ему́:/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо,/ а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́,/ и иску́сим беззло́бство его́:/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их./ И не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла́./ Щедр и ми́лостив,/ и дая́й преподо́бным Свои́м благода́ть,/ и Свое́ю мы́шцею го́рдым противля́яйся.

На лити́и стихи́ры, глас 1:

Све́тлый соде́ловает пра́здник днесь/ свяще́нный храм честна́го и сла́внаго Крести́теля Госпо́дня,/ ра́достно Христо́ва Це́ркви блаже́ннаго святи́теля Ио́ны,/ я́ко ми́ро благово́нное, облагоуха́я нам свяще́нныя благода́ти,/ и боле́зней отгна́ние,/ и яко ло́зу виногра́да живо́тнаго,/ вино́ иска́пающую исцеле́ния,/ возвеселя́ющее сердца́ напа́стных печа́лей разгна́нием./ Те́м мо́лимся ему́,/ прося́ще ми́ра и спасе́ния душ на́ших.

Глас 3:

Ты, укра́шен доброде́тельными дея́нии,/ Несозда́нныя Тро́ицы храм освяще́н был еси́,/ созда́л еси́ свяще́нныя хра́мы Госпо́дню И́мени,/ и во и́мя сла́внаго Крести́теля,/ и вели́ких святи́телей, и Богоно́сных оте́ц./ И ны́не с ни́ми водворя́яся,/ моли́ о творя́щих па́мять твою́/ изба́витися от лука́ваго ловле́ния и собла́зн проти́внаго,/ иера́рше Ио́но блаже́нне.

Глас 4:

Весели́ся и ра́дуйся, вели́кий Но́вгра́де,/ да игра́ют сы́ны твоя́ в тебе́,/ све́тло торжеству́юще в па́мять архиере́я Ио́ны,/ сиро́т и вдов предста́теля,/ скорбя́щих уте́шителя,/ прибега́ющим к нему́ помо́щника и те́пла засту́пника,/ призыва́ющим его́ ско́ро послу́шающа,/ сердца́ на́ша на милосе́рдие и ти́хость прелага́юща/ и проти́вныя примиря́юща:/ предстои́т бо Го́сподеви, моли́ся умири́ти мир/ и спасти́ ду́ши на́ша.

Сла́ва, глас 4:

Прииди́те, лю́дие,/ и́же вели́каго Нова́гра́да порожде́ние,/ всяк род и во́зраст,/ пе́сньми почти́м до́браго па́стыря,/ я́ко того́ предстоя́нием ко Христу́/ дарова́шася блага́я вся гра́ду на́шему от Бо́га/ и всем преде́лом его́,/ и́бо благослови́шася бла́гостию венцы́ лет епи́скопства его́./ Госпо́дь даст бла́гость его́ ра́ди,/ и земля́ на́ша подаваше плоды́ своя́,/ насы́тися вся́ка душа́ благоволе́ния тогда́,/ умири́шася вси язы́цы проти́внии,/ и приклони́шася стра́н христолю́бцы влады́ки держа́внии,/ ми́лостивныма очи́ма смотря́юще,/ ти́хое промышле́ние подава́ху,/ ра́дость и мир вся́ческая приима́ше./ Но, о блаже́нне Ио́но,/ и ны́не такова́я да́руй лю́дем твои́м,/ да и честну́ю па́мять твою́, чту́ще/ при́сно, ублажа́ем.

И ны́не, Богоро́дичен: При́зри на моле́ния:

На стихо́вне стихи́ры, глас 2:

После́дователя тя позна́хом, о́тче,/ кро́ткаго и незло́биваго Влады́ки Христа́:/ ти́хое бо сло́во и нра́ва молчали́вое/ от ю́ности се́ возрасте́ в тебе́,/ смире́ние же, и кра́сное, кро́тости совоспита́емо,/ и с седино́ю спросия́ющу ра́зуму./ Те́мже И́же вся ве́дый Госпо́дь/ произведе́ тя па́стыря слове́сному ста́ду Своему́/ и на престо́ле первопресто́льника Бо́жия Це́ркве посади́ тя,/ я́ко па́ствующа сии́ преподо́бием и пра́вдою.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Не по земли́ ни́зитися,/ ниже́ на тле́ющая взира́ти,/ и ревнова́ти миродержи́телем/ по́мыслы души́ твоея́ утверди́шася, свяще́нне Ио́но,/ но возвы́сился еси́ на высоту́ безсме́ртныя доброде́тели,/ безсме́ртныя жи́зни рачи́телю,/ я́ко поучи́лся еси́ навы́кнути у кро́ткаго Учителя/ и смире́ннаго се́рдцем вои́стинну Влады́ки Хри́ста и Бо́га./ Того́ моли́, блаже́нне,/ уще́дрити мир/ и спасти́ и просвети́ти ду́ши на́ша.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Возлюби́ чи́стая душа́ твоя́, блаже́нне Ио́но,/ чистоту́ Боже́ственных чисти́тель,/ и́же верх учи́тельства, и пра́вило доброде́телей,/ и естества́ украше́ние,/ вои́стинну Небеси́ изъявле́ние⁷⁰,/ иера́рхом нача́ла:/ Боже́ственнаго Никола́я и Вели́каго Васи́лия,/ Богосло́ва Григо́рия, Златоу́стаго же Иоа́нна,/ и́хже свяще́нныя хра́мы воздви́гл еси́,/ я́ко вои́стинну во дворы́ их жела́я всели́тися,/ и́же во све́те присносу́щныя ра́дости/ Живота́ ве́чнаго, Началопа́стыря Христа́./ Того́ с ни́ми, иера́рше, не преста́й моли́/ умири́ти мир и спасти́ ду́ши на́ша.

Сла́ва, глас 6:

Преподо́бне, блаже́нне, архиере́ю свяще́нне Ио́но,/ кро́тость и незло́бие твое́ удиви́ша кни́зи благочести́выя,/ и вои́стинну от души́ возлюби́ша тя:/ ра́ди бо доброде́телей исправле́ния/ обре́л еси́ благода́ть от Бо́га./ Те́мже и кня́зи почто́ша тя,/ моли́тв твои́х и благослове́ния тре́бующе,/ при́сно благопослу́шны быва́ху преподо́бию твоему́,/ и лю́ди твоя́ незло́бием снабдева́юще./ Но и ны́не лю́дем твои́м предстоя́ бу́ди,/ и благопоспеше́ние да́руй моли́твами твои́ми,/ и душа́м на́шим ве́лию ми́лость.

И ны́не, Богоро́дичен: Творе́ц и Изба́витель:

На благослове́нии хле́бов. Тропа́рь свята́го, глас 4:

Исправле́ние ве́ры, и о́браз кро́тости,/ и я́коже сад посреде́ рая́,/ преподо́бными де́лы твои́ми мир просвеща́еши,/ и сего́ ра́ди к моще́м твои́м любо́вию прикаса́емся и ве́рно вопие́м:/ предста́ни в по́мощь воспева́ющим па́мять твою́ светоно́сную, о́тче Ио́но,/ и моли́ спасти́ся душа́м на́шим. _{(Два́жды)}

И Богоро́дице Де́во, ра́дуйся: еди́ножды.

НА У́ТРЕНИ

На Бог Госпо́дь: тропа́рь святи́телю два́жды. Сла́ва, и ны́не, Богоро́дичен: Е́же от ве́ка утае́ное:

По 1-м стихосло́вии седа́лен, глас 1:

Плоды́ слове́сныя принося́, му́дре Ио́но, Го́сподеви,/ восхваля́я архиере́и с преподо́бными Его́ пе́сньми,/ с ни́миже в земли́ живы́х ра́дуешися,/ я́ко сла́ву их возлюби́л еси́./ Те́мже с ни́ми, о́тче свяще́нне, о нас, восхваля́ющих тя,/ не преста́й моля́ Царя́ Небе́снаго/ и Спа́са всего́ ми́ра Христа́, Еди́наго Человеколю́бца.

Сла́ва, и ны́не, Богоро́дичен:

Проро́цы Тя я́сно провозвести́ша, Отрокови́це, Ма́терь Бо́жию,/ и Апо́столи Боже́ственнии в ми́ре пропове́даша, и мы́ ве́ровахом./ Те́мже вси́, благочестному́дренне почита́юще, воспева́ем Тя/ и Богоро́дицу вои́стинну при́сно имену́ем.

По 2-м стихосло́вии седа́лен, глас 8:

Любо́вь тво́я Боже́ственная возведе́ тя, па́стыря изря́дна, слове́сному мно́жеству:/ все́ю бо душе́ю к Боже́ственней любви́ прилепи́лся еси́/ и святы́м честны́я хра́мы созда́л еси́,/ и ле́поту сим свяще́нными ико́нами утворя́я,/ Боже́ственному Предте́чи и пресве́тлым учи́телем Васи́лию, Григо́рию и Иоа́нну с мудрым Никола́ем,/ преподо́бному Ону́фрию и Се́ргию чудотво́рцу,/ пе́сньми же похваля́я чуде́снаго Варлаа́ма и Са́вву,/ Евфи́мия же со Ио́ною митрополи́том./ Те́мже ны́не слику́еши им,/ с ни́миже, о́тче свяще́нне,/ моли́ о нас, любо́вию чту́щих честну́ю па́мять твою́.

Сла́ва, и ны́не, Богоро́дичен:

Недви́жимое утвержде́ние ве́ры и честны́й дар душ на́ших,/ Богоро́дицу пе́сньми величае́м, ве́рнии:/ ра́дуйся, Ка́мень Жи́зни во чре́ве Твое́м вмести́вшая;/ ра́дуйся, конце́й наде́ждо, скорбя́щих заступле́ние;/ ра́дуйся, Неве́сто Неневе́стная.

По полиеле́и седа́лен, глас 8:

Возлюби́вшаго за благоутро́бие земны́я/ возлюби́л еси́ Христа́,/ сла́вою спаси́тельною тебе́ просла́вльшаго,/ доброде́тельми свяще́нными сия́юща, я́ко Бо́гови угожда́юща./ Те́мже и всем ра́тным мир возвеща́юща,/ де́монская стремле́ния возража́юща,/ иера́рше Ио́но блаже́нне./ Ему́же не преста́й моля́ся согреше́ний проще́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х,/ и я́ко к те́плому защище́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ Воплоще́нному без се́мене,/ моли́ся приле́жно о всех рабе́х Свои́х,/ непреста́нно моля́щихтися, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́.

Степе́нна, 1-й антифо́н, глас 4. Проки́мен, глас 4: Честна́ пред Го́сподем смерть преподо́бных Его́. Вся́кое дыха́ние: Ева́нгелие от Иоа́нна, зача́ло 35 от полу́: Рече́ Госпо́дь ко прише́дшим к Нему́ иуде́ом: не входя́й две́рьми:

По 50-м псалме́ стихи́ра, глас 6:

По и́мени твоему́ и житие́, преблаже́нне,/ по Госпо́дни бо за́поведи це́лость голуби́цы вои́стинну стяжа́л еси́:/ с кро́тостию бо незло́бием удобри́ся прекра́сная душа́ твоя́,/ ю́же я́ко любе́зну неве́сту/ и нескве́рну предста́вити потща́лся еси́/ Пречи́стому Еди́ному и Безсме́ртному Жениху́, Христу́./ Того́ моли́, иера́рше, при́сно/ мир ми́рови дарова́ти/ и душа́м на́шим ве́лию ми́лость.

Кано́н Богоро́дицы со ирмосо́м на 6, глас 4, и свята́го кано́н на 8. Глас 4.

Песнь 1

Ирмо́с: Триста́ты кре́пкия,/ Рождейся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Избра́ тя благода́ть, о́тче, от утро́бы ма́тере твоея́/ поста́вити тя проро́ка лю́дем свои́м,/ хода́тайствовати ко Го́споду о спасе́нии ми́ра/ и оставле́нии неве́ждеств их, блаже́нне.

Руко́ю вели́каго архиере́я Ио́ны/ со и́же о не́м собо́ра свяще́нных муже́й судо́м/ прие́млеши пома́зание архиере́йства, Ду́хом воздвиза́емь, Ио́но,/ и па́стырь вели́кому гра́ду, свяще́нне, полага́емь.

Блаже́ннаго Михаи́ла сбы́стся на тебе́ прорече́ние,/ не вне́шнюю бо на тебе́ нищету́ зря́ше,/ но вну́треннее преспе́яние души́ твоея́ духо́вными очесы́ смотря́я,/ а́ще и еще́ о́трочищу ти су́щу, блаже́нне.

Богоро́дичен: Пресве́тлая свеще́ Со́лнца сла́вы,/ души́ моея́ огнь, угаше́нный при́сно уны́нием, возжзи́,/ Боже́ственных дел еле́ем, Пречи́стая, напая́ющи,/ да ве́рою и любо́вию при́сно Тя сла́влю, Богороди́тельнице.

Катава́сия: Отве́рзу уста́ моя́:

Песнь 3

Ирмо́с: С высоты́ снизше́л еси́ во́лею на зе́млю/ превы́шше вся́каго нача́ла/ и смире́нное возне́сл еси́/ из а́да преиспо́дняго/ естество́ челове́ческое,/ несть бо свя́т, па́че Тебе́, Человеколю́бче.

От ю́ности твоея́ Боже́ственное просвеще́ние, Ио́но, на тебе́ сия́ше,/ я́коже преподо́бный прови́де, и́же ми́ру юро́д, Бо́гу же прему́др:/ я́ко Бо́гу избра́н еси́ из чре́ва ма́тере твоея́, свяще́нне.

Мир усмири́ся моли́твами твои́ми, иера́рше, во твое́м епи́скопстве,/ но, я́ко тогда́, и ны́не Бо́жие человеколю́бие умоли́ приле́жно/ в ми́ре утверди́тися ми́ру, Ио́но.

Плоды́ Го́споду нача́ток дел твои́х прине́сл еси́,/ плоды́ же земли́ моли́твами твои́ми умно́жил еси́./ И ны́не моли́, блаже́нне, земли́ на́шей плодоно́сие при́сно подава́ти,/ яко благопослу́шна тя име́ем.

Богоро́дичен: Е́вину дре́внюю кля́тву,/ Христа́ ро́ждши, Ма́ти Чи́стая, пресве́тло разреши́ла еси́,/ И́же всех венчава́ющаго благослове́ньми:/ не́сть бо, Пречи́стая, па́че Тебе́, ины́я Помо́щницы.

Седа́лен, глас 4:

Доброде́тельми светя́ся, о́тче, па́ствити Христо́вы о́вцы поставля́емь,/ и преподо́бнаго Се́ргия красе́н храм вну́трь епи́скопии воздви́гл еси́./ Я́ко душе́ю любя́ того, по́двиги его́ почита́я/ и смоли́твенника себе́ о ста́де твое́м ко Го́споду полага́я,/ ны́не сра́дуешися Ему́, о́тче свяще́нне,/ моли́ спасти́ся душа́м на́шим.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вси от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

Песнь 4

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя и хвале́ние.

Боже́ственнаго Предте́чи, вели́каго Иоа́нна, храм свяще́нный воздви́гл еси́,/ я́ко ве́рен, ду́шу тому́ и те́ло в снабде́ние⁷¹ возлага́я, о́тче свяще́нне.

Я́ко рачи́тель и подража́тель тепл Крести́телю Госпо́дню показа́лся еси́,/ те́мже в хра́ме его́, его́же тому́ созда́л еси́, те́ло твое́ полага́еши,/ и во дворы́ его́ прия́тися жела́я.

Возлюби́л еси́, архиере́ю, свяще́нных муже́й/ пе́сньми восхваля́ти свяще́нныя их па́мяти,/ я́ко рачи́тель добро́ты их и подража́тель дея́ний Боголюбе́зных.

Богоро́дичен: Име́я Тя Помо́щницу, кого́ убою́ся когда́ или устрашу́ся?/ Кто́ же, хотя́ ско́рбная навести́ рабу́ Твоему́,/ и не устраши́тся Тебе́, Пречи́стая,/ и не паде́т под но́зе?

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.

Приноси́мое я́ко че́стно возложе́ние Бо́гу/ и освяще́нно первопресто́льником Росси́йским, Ио́ною,/ твое́ свяще́нное па́стырства возведе́ние,/ я́ко пасу́щу ти Госпо́дни лю́ди, Ио́но святи́телю,/ преподо́бием и кро́тостию.

А́ще и на преставле́ние митрополи́том Ио́ною зово́м саме́м погребсти́ его́,/ отре́кся еси́ ста́рости ра́ди приити́, Ио́но свяще́нне,/ оба́че обеща́лся еси́ ему́/ ви́дети того́ по свое́м преставле́нии во све́те Христо́ве.

Пе́сньми поче́л еси́ па́мять иера́рха, Ио́ны митрополи́та,/ и хвала́ми, я́ко досто́йно, ублажи́л еси́ того́:/ сам ны́не, иера́рше Ио́но, прича́ствуеши похвала́м его́/ и по сотворе́нию твоему́ к бли́жнему восприе́млеши.

Богоро́дичен: Низложи́, Влады́чице, враго́в мои́х шата́ние, Пренепоро́чная,/ Тя́ бо и́мам и Предста́тельницу, и наде́жду, и по́мощь кре́пкую./ Ты́ мя соблюди́, Чи́стая, наве́та вра́жия, избавля́ющи ла́яния тех.

Песнь 6

Ирмо́с: Пучи́ною жите́йскою/ дея́ньми мои́ми снидо́х во а́д,/ но, я́ко от ки́та Ио́на, та́ко вопию́:/ из глубины́ зо́л возведи́, молю́ся,/ Сы́не Бо́жий и Сло́ве.

Прильпе́ любо́вию душа́ твоя́ к Госпо́дню Крести́телю, святи́телю Богоблаже́нне,/ те́мже те́ло твое́ честно́е в честне́м хра́ме его́ нетле́нно/ во мно́га ле́та соблюде́но яви́ся.

Красота́ гове́ния твоего́ е́же ко Го́споду/ привлече́ благода́ть благоле́пию души́ твоея́, свяще́нне,/ и возведе́ тя Вели́кому Нову́гра́ду отца́ и первопресто́льника,/ Госпо́дня свяще́нства преподо́бна показа́.

Просла́ви тя Госпо́дь, Ио́но,/ те́ло тво́е соблюде́ во мно́га ле́та нетле́нно,/ явля́я тя о́бщника раб Свои́х, и́хже подража́тель в житии́ бы́л еси́,/ сим и по сме́рти досто́йно соублажа́ешися, блаже́нне.

Богоро́дичен: Всесвята́я Де́во, Предста́тельнице и покро́ве всех ве́рных,/ предста́ни и изба́ви ны враг на́ших нападе́ния,/ и от вся́кия ско́рби, и Стра́шнаго Суда́ испыта́ния,/ да ве́рою при́сно пою́ Тя.

Конда́к, глас 4:

Свы́ше прия́л еси́ Боже́ственную благода́ть/ ходатайствовати Бо́гу и челове́ком,/ яко архиере́й возноше́ние вознося́,/ и мир лю́дем твои́м снося́,/ и оби́лие плодо́в, Ио́но блаже́нне;/ ты́ бо еси́ Вели́каго Нова́гра́да похвала́/ и су́щих о нем ра́дость.

И́кос:

Похва́лим досто́йно ны́не иера́рха,/ я́ко от чре́ва ма́тере своея́ избра́н Бо́гу во освяще́ние,/ и, о́трочищ еще сый,/ пронарече́н во архиере́йство гра́ду своему́ от Бо́га./ Те́мже не от челове́к произведе́н архиере́й,/ но свы́ше пронарече́н и Духом пома́зан,/ священноде́йствуя Богоприя́тно,/ и умире́ние, и тишину́ моли́твами свои́ми да́рует,/ и оби́лие плодо́в./ То́й бо Вели́каго Нова́гра́да слава/ и всех, и́же о нем, ра́дость.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Зи́ждеши Боже́ственному И́мени/ бога́тною руко́ю в пусты́нях уда́лено, Ио́но,/ свяще́нныя хра́мы вели́ких Богоуго́дник,/ Боже́ственных архиере́й с преподо́бными.

Но́ву оби́тель составля́еши вели́ких трие́х иера́рх/ и мона́шестей черте́ благоути́шно приста́нище, о́тче,/ ме́стным же удале́нием обруча́я им безмо́лвие.

Виногра́д насажда́я Бо́гу,/ огра́ду свяще́нную, вино́ износя́щую веселя́щее,/ в свяще́нных хра́мех Боже́ственное пе́ние,/ И́же в Тро́ице Еди́ному, хвали́му и благослови́му Бо́гу оте́ц на́ших.

Богоро́дичен: Еди́ну Всесвяту́ю, Еди́ному Бо́гу вселе́ние еди́но пречи́сто,/ от Иоаки́ма и Анны ражда́ему, свяще́нным хра́мом почита́я,/ я́ко в не́м воспева́ти всепе́тое Де́вы Рождество́.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.

Кро́ткое и молчали́вое нра́ва твоего́ восприе́м, Госпо́дь, блаже́нне,/ поста́ви тя па́стыря лю́дем Свои́м,/ на кого́ бо при́зрит?/ Но на кро́ткаго и молча́щаго, трепе́щущаго слове́с Его́.

Уста́ вдов благослови́ша тя,/ заступле́ния от Тебе́ сподо́бльшеся, иера́рше блаже́нне,/ благоугожда́ющаго Бо́гу, по непоро́чному И́ову,/ и оби́димыя от наси́лия изима́ющаго.

Лю́дие твои́, священнонача́льниче преподо́бне,/ се́товаху сиротства́ своего́ в твое́м к Бо́гу отше́ствии,/ до́браго па́стыря своего́,/ ны́не же свяще́нною па́мятию твое́ю возра́довашася вся́ческая.

Богоро́дичен: На Тя́ всю наде́жду спасе́ния моего́ возложи́х, Богома́ти Неискусобра́чная,/ и Тя́ призыва́ю при́сно на помо́щь:/ спаси́ мя от напа́стей и печа́ли врага́,/ разреши́ плени́цу зол мои́х и Суда́ мя исхити́.

Песнь 9

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев,/ в ни́хже посети́ нас Восто́к с высоты́,/ и напра́вил ны есть на путь ми́ра.

Блаже́ннаго Евфи́мия престо́л насле́довал еси́, свяще́нне Ио́но,/ я́ко подража́тель доброде́телей его́ был еси́/ и, пе́сньми сего́ ублажи́в па́мять изря́дно,/ сам ны́не обществу́ешися хвала́м его́,/ я́ко соводворя́ешися ему́ во Све́те незаходи́мем.

В зе́млю кро́тких со архиере́и досто́йно всели́лся еси́,/ иера́рше Ио́но, кро́ткаго Учи́теля учениче́./ Тому́ предста́ни о нас, пою́щих па́мять твою́,/ и испроси́ нам собла́знов оставле́ние, и шу́ия ча́сти в день Суда́ избавле́ние,/ и лю́тыя гее́нны⁷², блаже́нне.

Не изнемо́жет всяк глаго́л, и́же от Бо́га,/ убо́га тя и сироту́ Оте́ц сиро́т прие́млет, Бог,/ и́же на престо́ле со кня́зи посади́ тя,/ лю́дем Свои́м я́ко досто́йна па́стыря производя́,/ отца́ сирота́м и засту́пника вдова́м те́пла положи́ тя, Ио́но блаже́нне.

Богоро́дичен: Просвети́, Чи́стая, любо́вию чту́щих Тя и велича́ющих,/ разреши́ стра́сти на́ша./ Тем, Де́во, уста́ви бу́рю, лука́ваго собла́зны от сре́ды отжени́,/ ва́рвары покори́ правосла́вным лю́дем моли́твами Твои́ми.

Свети́лен:

Трисо́лнечнаго Све́та, сла́вы сия́нием, трие́х учи́телей све́том озари́вся,/ вся просвеща́еши, просия́в де́тельми и благода́тию, преподо́бне священнонача́льниче.

Богоро́дичен: Сла́дость А́нгелов, скорбя́щих ра́досте,/ христиа́н предста́тельнице, Де́во, Ма́ти Госпо́дня,/ заступи́вши ны, спаси́ от ве́чнаго муче́ния.

На хвали́тех стихи́ры на 4, глас 6.

Подо́бен: Все отло́жше:

Я́ко звезда́, возсия́л еси́/ на тве́рди Церко́вней,/ озаря́я мир исправле́нием Сло́ва и́стиннаго,/ прему́дре Ио́но:/ вдовы́ и сироты́ снабдева́я оте́чески/ и ни́щия ми́луя,/ оби́димыя изыма́я, вражды́ утоля́я,/ мир утвержда́я,/ Христо́вых за́поведей де́лателю, о́тче всесвяще́нне,/ проси́ ми́ра ми́ру, мо́лим тя,/ и спасе́ния душа́м на́шим.

Досто́йно на тя архиере́йства нарече́ние прии́де, преподо́бне о́тче,/ отроча́ти и еще́ тебе́ су́щу:/ дея́ния бо в тебе́ благоуго́дная совоспита́ема,/ кро́тость с незло́бием./ Тем во дворы́ Госпо́дни вселя́ешися,/ я́ко тако́в подоба́ше архие́рей бы́ти преподо́бен,/ но я́ко и́маши дерзнове́ние,/ моли́, мо́лим тя,/ умири́ти мир и спасти́ ду́ши наша.

Преподо́бне архиере́ю,/ изво́лил еси́ примета́ти себе́ в дому́ Бо́жии/ па́че, не́же жи́ти в се́лех ми́ра,/ по́стническими пра́вилы испытова́шеся,/ после́дуя знаменоно́сцем вели́ким,/ Варлаа́му и Се́ргию./ Те́мже и Госпо́дь изведе́ тя па́стыря лю́дем Свои́м,/ и, я́ко ве́рну рабу́, стро́ити ду́ши сих поручи́,/ за ни́хже и моли́/ поми́ловати я́ и спасти́.

Сла́ва, глас 4. Самогла́сен:

Прииди́те, лю́дие,/ и́же Вели́каго Нова́гра́да порожде́ние,/ всяк род и во́зраст,/ и пе́сньми почти́м до́браго па́стыря,/ я́ко того́ предстоя́нием ко Христу́/ дарова́шася блага́я вся гра́ду на́шему от Бога/ и всем преде́лом его́,/ и́бо благослови́шася бла́гостию венцы́ лет епи́скопства его́./ Госпо́дь даде́ бла́гость его́ ра́ди,/ и земля́ на́ша подава́ше плоды́ своя́,/ насы́тися вся́ка душа́ благоволе́ния тогда́,/ умири́шася вси язы́цы проти́внии/ и приклони́шася стран христолю́бцы влады́ки держа́внии,/ ми́лостивными очесы́ смотря́ще,/ ти́хое промышле́ние подава́ху,/ ра́дость и мир вси́ческая приима́ху./ Но, о блаже́нне Ио́но,/ и ны́не такова́я да́руй лю́дем твои́м,/ да честну́ю па́мять твою, при́сно чту́ще, ублажа́ем.

И ны́не, Богоро́дичен.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен свята́го: Уста́ моя́ возглаго́лют прему́дрость, и поуче́ние се́рдца моего́ ра́зум. Стих: Услы́шите сии́ вси язы́цы, внуши́те вси, живу́щии по вселе́нней. Апо́стол ко Евре́ем, зача́ло 318. Аллилу́ия, глас 2: Уста́ пра́веднаго поуча́тся прему́дрости, и язы́к его́ возглаго́лет суд. Стих: Зако́н Бо́га его́ се́рдце его́. Ева́нгелие от Иоа́нна, зача́ло 36. Прича́стен: В па́мять ве́чную:

Святитель Иона, архиепископ Новгородский, в миру Иоанн, рано остался сиротой и был усыновлен одной благочестивой вдовой Наталией, жившей в Новгороде. Она заботилась о воспитании мальчика и отдала его в школу. Блаженный Михаил Клопский, встретив однажды юношу Иоанна на улице, предсказал, что он будет архиепископом Новгорода, и посоветовал прилежно учиться.

Иоанн принял постриг в Отенской пустыни, в 50-ти верстах от города, был игуменом этой обители, откуда новгородцы в 1458 году избрали его в архиепископы, после смерти святого Евфимия. Святитель Иона пользовался большим уважением в Москве, и в его святительство московские князья не посягали на независимость Новгорода. Московский митрополит, святитель Иона (1449–1461), был другом новгородского святителя и хотел видеть его своим преемником.

Архиепископ Иона по обету, данному им в одну из поездок в Москву, построил в Новгороде первый на севере Руси храм в честь Преподобного Сергия Радонежского (1463). Заботясь о возрождении преданий новгородской церковной старины, он вызвал в Новгород известного составителя житий святых иеромонаха Пахомия Логофета, который написал, на основании местных источников, службы и жития наиболее известных новгородских святых и канон святителю Ионе, митрополиту Московскому по его прославлении.

К тому времени относится начало основания Соловецкого монастыря. Святитель Иона оказал большую помощь и содействие устройству обители. Преподобному Зосиме он выдал особую благословенную грамоту, по которой отдавал (вместе с мирскими властями Новгорода) во владение новой обители весь Соловецкий остров.

Твердый поборник Православия, он горячо защищал свою паству от проповедников католичества, усилия которых были тщетными в Новгородской земле.

После многих трудов святитель, чувствуя приближение своей кончины, написал духовную грамоту, завещая похоронить тело его в Отенской обители, о которой много заботился при жизни и воздвиг там два храма – в честь Трех Вселенских Святителей и во имя Святителя Николая. 5 ноября 1470 года, причастившись Святых Таин, святитель отошел ко Господу.

До наших дней дошло послание святителя к митрополиту Феодосию, написанное в 1464 году. Житие святителя имеется также в Великих Минеях-Четьих митрополита Макария, 5 ноября. В 1553 году, после открытия мощей архиепископа Ионы, было составлено слово об этом событии, принадлежащее перу инока Зиновия Отенского. Особое сказание о чудесах святителя встречается в рукописях XVII века.

На Го́споди, воззва́х: стихи́ры му́чеником, глас 8.

Подо́бен: О, пресла́внаго чудесе́:

Млеко́м воспита́н ве́ры,/ мук ра́ди мно́гих, Галактио́не, и скорбе́й/ во Христо́в дости́гл еси́ во́зраст,/ быв прия́тна же́ртва и соверше́нно заколе́ние/ самово́льным стремле́нием, всебога́те./ О, тве́рдыя твоея́ и изве́стныя ве́ры,/ е́юже Бо́га получи́л еси́,/ обожа́емь ны́не соверше́ннейше.

Худо́жественне взыска́ла еси́ благи́х Исто́чника,/ жела́нных кра́йнейшее;/ Того́ све́тлостьми и ду́шу и помышле́ние озари́ла еси́, Богоблаже́нная,/ и низложи́ла еси́ кре́пкими противле́нии/ многоко́зненнаго и дре́вняго мучи́теля,/ мона́шествующих Боже́ственное украше́ние,/ му́ченице многострада́льная.

Два свети́льника пресве́тлая Восто́ка у́мнаго/ возсиява́ют благода́тию,/ и тва́рь всю благоче́стно озаря́ют/ превосходя́щими страда́ний све́тлостьми/ и врачева́ний Боже́ственными разжже́нии./ И́хже пресве́тлый пра́здник почита́юще,/ тех ра́ди вся освяща́ющаго Христа́ просла́вим.

Сла́ва, и ны́не, Богоро́дичен.

Подо́бен то́йже.

Ра́дуйся, ду́ш просвеще́ние,/ греша́щих проще́ние,/ неради́вых исправле́ние;/ ра́дуйся, утеше́ние и ра́дость,/ скорбя́щих Помо́щнице;/ ра́дуйся, Блага́я, немощны́х душ исцеле́ние;/ ра́дуйся, примире́ние к Бо́гу и Хода́таице,/ Серафи́мов всех я́ко су́щи святе́йши, Чи́стая.

Крестобогоро́дичен:

Тя ви́дящи пригвожда́ема на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ у́вы Мне́! – вопия́ше,– Ча́до сла́дкое:/ ра́ны непра́ведно ка́ко терпи́ши,/ врачу́, исцели́вый челове́ческое неможе́ние/ и от тли всех изба́вивый/ милосе́рдием Твои́м.

Тропа́рь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Те́х моли́твами/ спаси́ ду́ши на́ша.

НА У́ТРЕНИ

О́ба кано́на Окто́иха и святы́х кано́н на 4. Его́же краегране́сие: Сопру́г страда́льцев несопру́жен пе́ти подоба́ет. Глас 8.

Песнь 1

Ирмо́с: Истря́сшему в мо́ри мучи́тельство фарао́не/ и Изра́иля су́шею наста́вльшему,/ пои́м Христу́,/ я́ко просла́вися во ве́ки.

Животворя́щей Тро́ице, всеблаже́нне, предстоя́ ра́достно/ и, све́тлыми мо́лниями просвеща́емь,/ испроси́ просвеще́ние соверша́ющим твою́ святу́ю па́мять.

Ду́хом Святы́м распали́в твою ду́шу,/ пожже́ стра́сти плотски́я посто́м/ и погаси́л еси́ огнь безбо́жия кро́вными струя́ми.

Род, и бога́тство, и держа́ву Христа́ ра́ди оста́вив/ и взем, преподо́бне, крест,/ мона́шествовал еси́ Боголе́пно со Еписти́миею блаже́нною, твое́ю сопру́гою.

Богоро́дичен: Засту́пнице скорбя́щих,/ спасе́ние и наде́жде ненаде́ющихся, Богоро́дице всепе́тая,/ моли́ приле́жно изба́витися нам от бед.

Песнь 3

Ирмо́с: Утверже́й сло́вом Небеса́/ и зе́млю основа́вый на вода́х мно́гих,/ утверди́ мя к пе́нию славосло́вия Твоего́, Го́споди.

Дневну́ю звезду́ от непло́дных чре́сл, му́ченице,/ тя произведе́ ро́ждшая тя,/ нощь безбо́жия разоря́ющу.

Чистото́ю любве́ одержи́мь, де́вствовати научи́л еси́ с тобо́ю сопру́жницу;/ с не́юже пострада́в зако́нно, му́чениче Галактио́не, просла́вися.

О́ле жены́, преди́ искуше́ния му́ченическая/ научи́вшияся вся приклю́чшаяся открове́нием Боже́ственным,/ и низложи́вши мучи́теля.

Богоро́дичен: Умерщвле́на страстьми́ вре́дными,/ жи́ва сотвори́ мя, Живо́т ро́ждшая,/ разори́вшаго, Отрокови́це, всю сме́ртную си́лу.

Седа́лен, глас 4.

Подо́бен: Ско́ро предвари́:

Посто́м украси́в твоея́ зри́тельное души́,/ луча́ми же страда́ния просвеща́еши ве́рныя, Галактио́не блаже́нне./ Тем твой святы́й и светоно́сный день ве́рою соверша́юще,/ благоче́стно тебе́ вопие́м:/ я́ко име́я дерзнове́ние к Бо́гу, моли́ спасти́ся нам.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

Крестобогоро́дичен:

Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́./ Его́же, Благослове́нная, моля́щи не преста́й/ проще́ние прегреше́ний нам дарова́ти.

Песнь 4

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися Богови́дно усмотри́/ и со стра́хом славосло́вяше си́лу Твою́.

А́гнцы слове́снии яви́стеся, па́стырю Всецарю́ я́вственно после́дующе,/ и в Небе́сней огра́де, венцено́сцы, с му́ченики всели́стеся.

Сопряже́ние избра́нно яви́стеся,/ разделя́юще бразду́ честна́го и до́браго свиде́тельства,/ и соде́ласте клас, в жи́тницах Небе́сных соблюда́емь.

По Христе́ усека́еми, до́блии, но́зе, и главы́, и но́гти, и ру́ки,/ искорени́сте лесть нече́стия и победоно́сцы яви́стеся.

Богоро́дичен: Язы́к земны́х досто́йне не мо́жет воспе́ти Тя, Бо́жию Роди́тельницу я́вльшуюся,/ Всенепоро́чная Пречи́стая, христиа́н Прибе́жище.

Песнь 5

Ирмо́с: У́тренююще вопие́м Ти,/ Го́споди, спаси́ ны:/ Ты бо еси́ Бо́г наш,/ ра́зве Тебе́, ино́го не ве́мы.

Я́ко млеко́м, воспита́вся по́стнически, Галактио́не,/ во исполне́ние соверше́нное Христо́вых страсте́й дости́гл еси́.

Умо́м очище́нным ви́дела еси́, Еписти́мие,/ взята́ превысо́ко святы́х на поко́ище.

Му́чеников соводворе́ние получи́сте в Вы́шних,/ безсме́ртную сла́ву, преподобному́ченицы, обрето́сте.

Богоро́дичен: Родила́ еси́ в ле́то Безле́тнаго, Пречи́стая,/ бы́вша Челове́ка, да спасе́т челове́ка.

Песнь 6

Ирмо́с: Ри́зу мне́ пода́ждь све́тлу,/ одея́йся све́том, я́ко ри́зою,/ Многоми́лостиве Христе́, Бо́же наш.

Ба́нею Боже́ственнаго просвеще́ния к безсопру́жным приступи́сте,/ кро́вию последи́ кре́щшеся, страда́льцы, соверше́ннейше.

Мно́гим жесто́чеством ду́шу просвети́в, посто́м,/ кра́сну яви́л еси, Галактио́не, све́том страда́ния.

На колесни́це кро́ви ва́шея все́дше, му́ченицы,/ и путь постиго́сте Небе́сный,/ в не́мже почива́ете.

Богоро́дичен: Равноче́стна родила́ еси́ Отцу́ Сы́на, Неискусобра́чная,/ и млеко́м пита́ла еси́ Пита́теля всех па́че ума́.

Конда́к, глас 2

Подо́бен: Вы́шних ища́:

Му́ченик Христо́вых полко́м причто́стеся/ до́бре хра́брствовавшим,/ све́тло подвиза́вшеся, Галактио́не сла́вне,/ с честно́ю сопру́жницею и сострада́вшею тебе́ Еписти́миею./ Еди́ному Бо́гу непреста́нно моли́теся о всех нас.

Песнь 7

Ирмо́с: Ангелом о́троки из огня́ спасы́й/ и гремя́щую пещь преложи́вый на ро́су,/ благослове́н еси́, Бо́же оте́ц на́ших.

Уневе́стившися Сло́ву, Еписти́мие, Боже́ственному,/ ти обнажи́ти тща́щияся ослепи́ла еси́ неве́рныя,/ и пока́явшияся Све́та ча́да яви́ла еси́.

Пожре́ти бого́м безду́шным отре́кшеся отню́д,/ и́стинному Бо́гу на́шему и душ Влады́це/ же́ртва, му́ченицы, честна́я принесо́стеся.

На огнь муче́ния приведе́н, Галактио́не,/ кро́вными пото́ки безбо́жия пла́мень, му́чениче, погаси́л еси́, му́дре, вопия́:/ благослове́н еси́, Го́споди, Бо́же оте́ц на́ших.

Богоро́дичен: С Вы́шними все́ми Небе́сными чи́нми велегла́сно Тя вси,/ Богороди́тельнице Отрокови́це, Тобо́ю спасе́ннии, блажи́м.

Песнь 8

Ирмо́с: Безнача́льнаго Царя́ сла́вы,/ Его́же трепе́щут Небе́сныя си́лы,/ по́йте, свяще́нницы,/ лю́дие, превозноси́те во вся ве́ки.

Равноче́стны чистото́ю и ра́вни поще́нием и страда́нием су́ще,/ ра́вныя от Бо́га получи́сте да́ры, до́блии страда́льцы.

Сочета́ние нетле́нием сохрани́сте, возжеле́вше Ангельское житие́,/ с ни́миже ра́достно, Госпо́дни страстоно́сцы, лику́ете досто́йно.

Стоя́ пред суди́щем му́жески,/ пропове́дал еси́, му́чениче, Еди́наго Го́спода Бо́га и́стиннаго/ и многобо́жия разруши́л еси́ шата́ние.

Богоро́дичен: Я́ко че́стен и превы́шший престо́л,/ су́щую Бо́га Вы́шняго воспое́м, лю́дие,/ еди́ну по Рождестве́ Ма́терь и Де́ву.

Песнь 9

Ирмо́с: Проявле́нное на горе́ законополо́жнику во огни́ и купине́/ Рожде́ство Присноде́вы/ в на́ше ве́рных спасе́ние,/ пе́сньми немо́лчными велича́ем.

Столп яви́лся еси́, Богому́дре, Небе́сный,/ Це́ркве основа́ние и столп благоче́стия,/ и му́чеников и по́стников, Галактио́не, утвержде́ние/ и Боже́ственное удобре́ние.

Процвела́ еси́ в де́вственных цве́тех, я́коже шипо́к⁷³,/ и во удо́лиих⁷⁴ му́ченических благово́нствующи, я́ко кри́н⁷⁵,/ Еписти́мие де́во, му́ченице Госпо́дня./ Тем тя согла́сно ублажа́ем.

Све́том Трисо́лнечныя све́тлости озаре́ни,/ к тому́ преидо́сте ны́не, сы́нове Све́та я́вльшеся./ Моли́теся просвеще́ние дарова́ти, му́ченицы, ве́рою хва́лящим вы.

Богоро́дичен: Ты еси́, Богоро́дице, ору́жие на́ше и стена́,/ Ты еси́ заступле́ние к Тебе́ прибега́ющим:/ Тя ны́не на моли́тву подвиза́ем, да изба́вимся от враг на́ших.

Святые мученики Галактион и Епистимия. Богатые и знатные супруги Клитофон и Левкиппия, жившие в городе Емесе Финикийском, долгое время были бездетны. Много золота отдали супруги языческим жрецам, но оставались бесплодными.

Городом Емесом в III-м веке управлял поставленный Римом сириец Секунд. Он был беспощадный и ревностный гонитель христиан и для их устрашения велел выставить на улицах изощренные орудия пыток. Достаточно было малейшего подозрения в принадлежности к «секте галилеян» (так язычники именовали христиан), чтобы человек был схвачен и предан мучениям. Несмотря на это, многие христиане добровольно отдавали себя в руки палачей, желая пострадать за Христа.

Один старый человек, по имени Онуфрий, скрывавший под рубищем нищего свое иноческое и пресвитерское достоинство, ходил по Емесу из дома в дом, прося подаяния. Везде, где он видел возможность отвратить людей от языческого заблуждения, он проповедовал о Христе. Однажды он пришел в богатый дом Левкиппии. Принимая от нее милостыню, инок почувствовал, что женщина печальна, и спросил ее о причине этой печали. Она поведала старцу о своем семейном несчастье. Утешая ее, Онуфрий рассказал ей о Едином Истинном Боге, о Его всемогуществе и милости, о том, что Он всегда дает просимое тем, кто с верой обращается к Нему. Надежда наполнила душу Левкиппии. Она уверовала, приняла святое Крещение и стала тайной исповедницей христианства. Вскоре после того во сне ей было открыто, что она родит сына, который станет истинным последователем Христа. Сначала Левкиппия скрывала от мужа свою радость, но, когда младенец родился, она открыла мужу свою тайну и убедила его креститься.

Младенца назвали Галактионом. Родители воспитали его в христианской вере и дали ему прекрасное образование. Он мог сделать блестящую карьеру. Галактион же стремился к непорочной, иноческой жизни – уединению и молитве.

Когда Галактиону было 24 года, отец решил его женить и нашел невесту, красивую и знатную девушку по имени Епистимия. Сын не противился воле отца, однако, по Промыслу Божьему, свадьба была на некоторое время отложена. Часто посещая невесту, Галактион постепенно открыл ей свою веру, обратил ее ко Христу и сам тайно крестил ее. Вместе с Епистимией крестился и один из ее рабов Евтолмий. Новообращенные решили, по примеру Галактиона, посвятить себя иноческой жизни. Покинув город, они скрылись на горе Публион, где было два тайных монастыря, мужской и женский. Новые иноки должны были взять на себя основную физическую работу, так как насельники обоих монастырей были стары и немощны. Несколько лет иноки подвизались в трудах, посте и молитвах. Однажды Епистимии было во сне видение: она и Галактион стоят в дивном дворце перед Светлым Царем, и Царь подает им золотые венцы. Это было предвестием их скорой мученической кончины.

Язычникам стало известно о существовании монастырей, куда был послан отряд, чтобы схватить их насельников. Однако монахи и монахини успели укрыться в горах. Только Галактион не захотел бежать и остался в келье, читая Священное Писание. Когда Епистимия увидела, что воины ведут связанного Галактиона, она стала умолять игумению отпустить ее, потому что хотела принять муки за Христа вместе со своим обручником-учителем. Игумения со слезами благословила Епистимию на подвиг.

Святые перенесли тяжелейшие пытки, молясь и прославляя Христа. По приказу судьи их четвертовали.

Евтолмий, бывший раб Епистимии, брат ее во Христе и сподвижник в иноческом делании, тайно предал честному погребению тела святых мучеников и составил в назидание современникам и потомкам их житие.