29-й день

Свята́го му́ченика Парамо́на и преподо́бнаго Ака́кия, и́же в Ле́ствице свиде́тельствованнаго

На Го́споди, воззва́х: стихи́ры мученика 3, глас 4.

Подо́бен: Зва́нный свы́ше:

Светоявле́нием я́ве озаря́емь,/ всеблаже́нне Парамо́не, Боже́ственнаго Ду́ха,/ тьму глубоча́йшую до конца́ возненави́дел еси́ многобо́жия,/ и прише́л еси́, благоключи́мное вре́мя прие́мь, всеблаже́нне,/ к предлежа́щим страда́нием доблему́дренно,/ и, победоно́сец я́влься,/ низложи́л еси́ го́рдаго и ра́тника всех земны́х,/ велича́я Христа́./ Его́же моли́ спасти́ и просвети́ти ду́ши на́ша.

За всех Бо́га и Царя́/ мно́жество многочи́сленное закала́емое разуме́в, Парамо́не,/ Боже́ственною ре́вностию разже́глся еси́ и возопи́л еси́:/ Христо́в раб и́скренний есмь всегда́,/ разуме́йте, пребеззако́ннии мучи́тели,/ я́ко бо а́гнец незло́бив, закла́тися се ны́не самозва́н приидо́х./ Не пецы́теся у́бо:/ же́ртва прия́тна Пожре́нному пло́тию мене́ ра́ди во́льно/ бы́ти понужда́юся.

Седмочи́сленною честву́емь десяти́цею,/ трегу́бно же честны́й,/ со́тницею лик страда́льцев/ многобо́жную низложи́л еси́ лесть пребеззако́ннующих ве́рою,/ с ни́миже венча́лся еси́,/ подвиза́вся доблему́дренно, Парамо́не,/ и лико́м Безтеле́сных, ра́дуяся, сочи́слился еси́./ С ни́миже моли́ся/ вся́кия ско́рби и напа́стей изба́витися нам,/ тя чту́щим и при́сно блажа́щим.

А́ще изво́лит настоя́тель пе́ти аллилу́ия, да пою́т сии́ стихи́ры Богоро́дице пре́жде, глас 8, подо́бен то́йже:

Из Безнача́льна Отца́ Сын безле́тно,/ снизхожде́ния ра́ди и спасе́ния челове́ков,/ Бог челове́к бысть,/ да пода́ст первозда́нному ны́не рай,/ тогда́ и все естество́ изба́вится от пре́лести зми́евы,/ и о́браз па́дший спасе́т я́ко Благопремени́тель./ Отону́дуже Ма́терь соде́ла/ Невесторо́дицу чи́сту, я́ко нескве́рну,/ Ю́же, я́ко анки́ру²⁴² вси и приста́нище, ублажа́ем.

Воплоще́нна Созда́теля всех/ име́ла еси́ во утро́бе Твое́й, Богоблаже́нная,/ вообрази́вшаго челове́ка,/ пре́жде па́дшаго преступле́нием змии́ным,/ Бо́га бо родила́ еси́ пло́тию несказа́нно нам/ и из тле́ния свободи́ла еси́ естество́ все обветша́вшее/ Рождество́м Твои́м./ Те́мже пое́м и сла́вим Твою́ благода́ть, Де́во безневе́стная,/ моли́тися не преста́й/ спасти́ся ду́шам на́шим.

Да Твоея́ всем мно́жество ми́лости и бла́гости откры́еши нам/ неопредели́мую пучи́ну,/ грехи́ рабо́в Твои́х вся загла́ди,/ и́маши бо, Всенепоро́чная, я́ко Ма́ти су́щи Бо́жия,/ власть созда́ния и во́диши вся,/ я́ко хо́щеши, си́лою Твое́ю,/ и́бо благода́ть Ду́ха Свята́го,/ я́ве все́льшаяся в Тя,/ соде́йствует Ти во всем при́сно, Всеблаже́ннейшая.

Сла́ва, и ны́не, Богоро́дичен:

И́же со Отце́м и Ду́хом/ славосло́вимый Сын в вы́шних от Серафи́мов,/ первозда́ннаго па́ки обнови́ти хотя́,/ всего́ Себе́ истощи́ неизрече́нно/ во утро́бе Твое́й, Богоро́дице Всепе́тая,/ и, из Тебе́ возсия́вый, просвети́ весь мир Божество́м,/ изба́вивый от идолонеи́стовства,/ Собо́ю обожи́вый,/ на Небеса́ возведе́ челове́чество,/ Христо́с Бог и Спас душ на́ших.

Крестобогоро́дичен. Подо́бен то́йже:

Не рыда́й Мене́, Ма́ти,/ зря́щи на Дре́ве пове́шена Твоего́ Сы́на и Бо́га,/ И́же на вода́х пове́сившаго зе́млю неодержи́мо/ и всю тварь созда́вшаго,/ и́бо воскресну́, и просла́влюся,/ и а́дова ца́рствия сокрушу́ кре́постию,/ и погублю́ того́ си́лу,/ и свя́занныя изба́влю от злоде́йства его́,/ я́ко Благоутро́бен,/ и Отцу́ Моему́ приведу́, я́ко Человеколю́бец.

На стихо́вне Окто́иха.

Преподо́бнаго Ака́кия слу́жба пое́тся на повече́рии.

Кано́н, его́же краегране́сие: Ака́кия, избраннаго послу́шателя, пе́сньми пою́.

Феофа́н. Глас 4.

Песнь 1

Ирмо́с: Мо́ря чермну́ю²⁴³ пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Незло́бным нра́вом обло́жся,/ благообра́зную доброде́телей стяжа́л еси́ добро́ту,/ Христо́ву во́льному послуша́нию подо́бяся да́же до сме́рти, всеблаже́нне.

Зло́бы обрета́теля посрами́л еси́ беззло́бием свои́м,/ терпе́нием же, о́тче, искуше́ний того́ го́рдую и вознесе́нную вражду́/ к земли́, всеблаже́нне, смири́л еси́.

Воздержа́нием терпели́вным, преподо́бне, предъобуча́яся и страсте́й отсека́я нача́ла,/ безстра́стия оде́ждею украси́лся еси по́слежде,/ благода́тию Боже́ственною покрыва́емь.

Укрепи́в душе́вное устрое́ние терпе́нием тве́рдым и до́блим, всеблаже́нне, по́мыслом,/ по вся дни терпе́л еси́ му́ченический по́двиг/ и вене́чник показа́лся еси́.

Богоро́дичен: Кре́пость твори́тельная и пе́ние,/ Бог и Госпо́дь,/ И́же нас ра́ди из Тебе́ воплоще́йся и рожде́йся,/ проро́чески я́коже Иса́ия, Пречи́стая, благовести́.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Всего́ тебе́ сама́го Творцу́ твоему́ и Бо́гу, преподо́бне, возложи́в,/ терпе́л еси́ томи́тельное изничтоже́ние.

Зако́нно страда́льческое терпе́ние, возде́ржниче, показа́л еси́ на земли́,/ те́мже тебе́ Небе́сное весе́лие даде́ся.

Смире́ние и́стинно, долготерпе́ние опа́сно держа́л еси́,/ терпе́ние, воздержа́ние с послуша́нием, преблаже́нне.

Богоро́дичен: Всех Соде́тель зи́ждется,/ нас ра́ди, Пречи́стая, плоть прие́мь одушевле́нну,/ из Тебе́, Пресвята́я Богоневе́сто.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Умертви́в, о́тче, му́дрость пло́ти твоея́,/ твою́ ду́шу оживи́л еси́ и пра́вды вене́ц прия́л еси́, зовы́й, Ака́кие:/ сла́ва си́ле Твое́й, Го́споди.

По́двиги до́лги прие́мля,/ и́же по вся дни терпели́вное пока́зывал еси́ сопротивле́ние, о́тче./ Те́мже по сме́рти, я́ко жив, возопи́л еси́:/ сла́ва си́ле Твое́й, Го́споди.

Тве́рдым умо́м томле́ния за Христа́ претерпе́л еси́, Ака́кие блаже́нне,/ Сего́ помышля́я, на Кресте́ пригвожде́на за спасе́ние ро́да на́шего.

Богоро́дичен: Чисте́йши еси́ Небе́с и Мы́сленных Сил,/ я́ко сих Зижди́теля, Пречи́стая, ро́ждши./ Те́мже Ти зове́м:/ ра́дуйся, Богоро́дице Всепе́тая.

Песнь 5

Ирмо́с: Ты, Го́споди, мой свет/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ты, преподо́бне, я́звами му́жески ураня́емь/ и бие́нии по вся дни терпя́ кре́пко,/ преподо́бно почи́л еси́.

Тече́ние до́брое сконча́в, Ака́кие незло́бный,/ и трудо́в свобо́дный и боле́зней восприя́л еси́ поко́й.

Ум твой чи́стым по́мыслом окормля́емь, Ака́кие Богоно́се,/ к Вино́вному всех благополу́чно устреми́ся.

Богоро́дичен: Ни А́нгельский ум, ни челове́чь мо́жет Рождество́ Твое́ сказа́ти,/ превосхо́дит бо вся́ко постиже́ние ра́зума.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Усну́л еси́ блаже́нным сном, блаже́нне,/ и по сме́рти яви́ся, послу́шая, о́тче, вопроша́ющих,/ я́ко не умира́ет послуша́ние име́яй.

Сконча́в до́брыя по́двиги, тезоимени́те,/ нетле́ннаго, Богому́дре, сподо́бился вои́стинну безсме́ртия,/ иде́же, ра́дуяся, венцы́ побе́ды восприя́л еси́.

Боже́ственное, и до́брое, и Богоуго́дное воздержа́ние жития́ твоего́, блаже́нне,/ мно́гия утвержда́ет Боже́ственным стра́хом/ и жела́нием благ бу́дущих, Ака́кие.

Богоро́дичен: Вои́стинну Богоро́дицу Тя ве́рою сла́вим,/ я́ко Бо́га заче́ншую и ро́ждшую Сего́ неискусобра́чно,/ соеди́ншася из Тебе́ прия́тыя святы́м хра́мом.

Седа́лен, глас 4.

Подо́бен: Ско́ро предвари́:

Све́тлостию ве́ры и де́тельным све́том/ яви́лся еси́ равноа́нгелен на земли́ вои́стинну, Ака́кие всему́дре./ Показа́л еси́ му́жески кре́пкое ума́ твоего́,/ сокруши́л еси́ напа́дания страсте́й посто́м,/ те́мже и по кончи́не я́ко жив яви́лся еси́, непобеди́ме.

Песнь 7

Ирмо́с: В пещи́ Авраа́мстии о́троцы перси́дстей/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Всем жела́нием Влады́це иды́й,/ доса́ды, и безче́стия, преподо́бне, и я́звы терпя́, взыва́л еси́:/ благослове́н еси́ в хра́ме сла́вы Твоея́, Го́споди.

По́мысл твой, Влады́чния помышля́я стра́сти и распя́тие/ и сме́рти поуча́яся, ураня́емь, пел еси́:/ благослове́н еси́ в хра́ме сла́вы Твоея́, Го́споди.

Мертв во гро́бе, по зако́ну умира́ющих лежа́ без дыха́ния,/ глаго́лющему веща́еши па́че естества́, я́ко не у́мерл есмь, взыва́еши:/ благослове́н еси́ в хра́ме сла́вы Твоея́, Го́споди.

Богоро́дичен: Уме́ршия, и́мже, Де́во, держи́ми бе́хом зако́ном,/ Жизнь ро́ждши и́стинную, возста́вила еси́ зову́щия:/ благослове́на Ты в жена́х, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Кре́пким воздержа́нием Бо́гу тебе́ бысть смеси́тися, преподо́бне,/ уз те́ла разре́шшуся и плоть изнури́вшу,/ и виде́нием де́тельным о́тче, зовы́й:/ благослови́те, вся дела́ Госпо́дня, Го́спода.

С му́ченики Христо́вы сочета́емь и вчиня́емь, непреста́нно, преподо́бне,/ пой Человеколю́бца и моли́ся о нас, восхваля́ющих тя и вопию́щих:/ благослови́те, вся дела́ Госпо́дня, Го́спода.

Пострада́в зако́нно на земли́,/ небе́сный обре́л еси́ поко́й, ра́дуяся, преподо́бне, со святы́ми,/ и соприча́стник весе́лия и ра́дости их быв, и взыва́я:/ благослови́те, вся дела́ Госпо́дня, Го́спода.

Богоро́дичен: Воплоща́ется Безпло́тный пре́жде,/ Соде́тель зи́ждется из Тебе́, Всенепоро́чная,/ и́бо в пречи́стая ложесна́ Твоя́ вшед Непостижи́мый,/ описа́нием плотски́м хотя́ объя́тся./ Те́мже вси Тя благослови́м, Мари́е Богоневе́сто.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,–/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Ми́лостивно вмести́ся, о́тче, ко вся́ческих Благоде́телю,/ незло́бия добро́тою украша́яся и красото́ю доброде́телей сия́я,/ те́мже тя вси ублажа́ем.

Зако́ну повину́яся Влады́чню,/ твою́ преклони́л еси́ вы́ю мона́шествующих боре́нию/ и, победоно́сец, о́тче, быв,/ к незло́бию дости́гл еси́ соверше́нному, всеблаже́нне.

Пе́ние Бо́гу возсыла́ти со Безпло́тными сподо́бился еси́,/ я́ко соблю́д о́нех житие́ и чистоту́,/ терпе́нием же дел му́чеников сла́ву прия́л еси́.

Приими́ от нас, Богоно́се, приноси́мое тебе́ пе́ние от чи́ста се́рдца/ и возда́ждь мольба́ми твои́ми/ согреше́ний оставле́ние и спасе́ние, всече́стне.

Богоро́дичен: Я́ко ко́рень су́щу вои́стинну нетле́ния, Тя, Де́во,/ вси ве́рнии, и утвержде́ния, хвала́ми почита́ем,/ Ты бо Ипоста́сное Безсме́ртие нам родила́ еси́.

Стихи́ры преподо́бнаго, глас 4.

Подо́бен: Я́ко до́бля:

Воздержа́нием му́дрость плотску́ю умертви́л еси́/ и ду́шу оживи́л еси́ посто́м/ и доброде́телей соверше́нием./ Отсю́ду же и яви́лся еси́ я́ко жив по кончи́не вои́стинну,/ я́коже бо сон вмени́ся тебе́ смерть,/ к Бо́гу преста́вльшуся и в ру́це ду́шу прело́жшу Ему́,/ Ака́кие сла́вне.

Страсте́й успи́л еси́ жела́ния, Ака́кие,/ бде́ние всено́щное я́ко стяжа́в,/ послуша́ние и смире́ние,/ поуче́ние же Боже́ственных писа́ний,/ и се́рдце чи́сто, и ум несмуще́н./ Те́мже был еси́ и прия́телище Ду́ха Свята́го,/ зари́ чуде́с возсия́в конце́м.

Мирска́го пристра́стия до конца́ возгнуша́вся,/ безстра́стия сосу́д был еси́,/ любому́дрия же, сла́вне, де́тельным восхожде́нием/ возвы́сился еси́ к самому́ жела́нию коне́чному/ и узре́л еси́ та́йным виде́нием/ неви́димых недомы́сленныя и Боже́ственныя добро́ты,/ Ака́кие всему́дре и блаже́нне.

Сла́ва, и ны́не, Богоро́дичен:

Отцу́ единосу́щна и Ду́ху сопресто́льна/ из чи́стых крове́й Твои́х воплоти́ла еси́/ и па́че сло́ва породила́ еси́,/ во двух познава́ема де́йственных существа́х, и́стинно и хоте́ниих./ Его́же моли́, Пресвята́я Де́во,/ я́ко Сы́на Твоего́ и Бо́га,/ спасти́ ве́рою чи́стою Тебе́ блажа́щия.

Крестобогоро́дичен. Подо́бен то́йже:

А́гнца и Па́стыря, Тя на Дре́ве я́ко ви́де,/ А́гница ро́ждшая рыда́ше/ и ма́терски Тебе́ веща́ше:/ Сы́не возжеле́нне,/ ка́ко на Дре́ве кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве, пригвозди́шася от беззако́нных,/ и Кровь Твою́ излия́л еси́, Влады́ко?

НА У́ТРЕНИ

О́ба кано́на Окто́иха и свята́го на 4, его́же краегране́сие: Воспева́ти твою́ ны́не даждь, му́чениче, благода́ть. Ио́сиф. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Пою́ща светоно́сную твою́ па́мять, му́чениче Парамо́не,/ свеща́тельными Ду́ха заря́ми се́рдце мое́ просвети́/ и пребыва́ти ми Боже́ственными законоположе́ньми укрепи́.

Му́ченическим пресве́тло благосла́вием, блаже́нне, обогати́лся еси́,/ му́ченическими просия́в добро́тами и кра́сными ра́нами украси́вся, Парамо́не./ Те́мже тя ве́рно ублажа́ем.

Вод животво́рных Ду́ха сый испо́лнен,/ безбо́жия зно́ем лю́те иста́явшия ороси́л еси́/ и к воде́, сла́вне, воспокое́ния путеводи́л еси́.

Богоро́дичен: В ле́то Безле́тнаго родила́ еси́, Челове́ка бы́вша,/ Его́же приле́жно моли́, Чи́стая, я́ко Сы́на Твоего́ и Го́спода,/ души́ моея́ ле́тныя стра́сти уврачи́ти, Всенепоро́чная.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Возноше́ние вра́жие, смири́вся Христа́ ра́ди, разруши́л еси́/ и того́ полки́ мече́м терпе́ния ссекл еси́.

Разруши́л еси́ лука́вый сове́т и́же на ве́ру на́шу/ и кре́пко пострада́л еси́, му́чениче страстоте́рпче Парамо́не.

Укрепи́лся еси́ Боже́ственною благода́тию, я́ко во́ин си́лен,/ и лю́тыя му́ки, му́чениче, я́коже сон, вмени́л еси́.

Богоро́дичен: Укрепи́ мой ум,/ совраща́емь мно́гими страстьми́, Ма́ти Бо́жия Пречи́стая,/ я́ко да по до́лгу сла́влю Тя.

Седа́лен, глас 4.

Подо́бен: Вознесы́йся:

Терпе́нием Боже́ственных повеле́ний очи́стил еси́ ду́шу от скве́рны/ и к страда́льческому пости́гл еси́ соверше́нию, жре́ти бо куми́ром отре́клся еси́ преле́стным,/ подража́я Христа́, копие́м закла́н был еси́, но приле́жно моли́ Его́ о ми́ре, всеблаже́нне Парамо́не.

Сла́ва, и ны́не, Богоро́дичен:

По Бо́зе в Твой, Богоро́дице, прибега́ю смире́нный покро́в Боже́ственный,/ припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу./ Моле́ние сотвори́, Чи́стая, к Сы́ну Твоему́, от сих изба́вити мя.

Крестобогоро́дичен:

Из Безнача́льнаго Отца́ рожде́ннаго,/ напосле́док Тя пло́тию Ро́ждшая, на Кресте́ ви́сяща зря́щи, Христе́,/ увы́ Мне! любе́знейший Иису́се,– вопия́ше,–/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́ распина́ешися?/ Пою́ Тя, Долготерпели́ве.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Се́рдце твое́, му́жеством огражда́емо и дерзнове́нием, сла́вне, разжига́емо,/ му́ки многоплете́нныя младе́нец стреля́ния, му́чениче доблему́дренне, вмени́л еси́.

Умерщвля́емы повеле́нием мучи́теля, страда́льцы ви́дев,/ я́коже они́, Боже́ственную ре́вность прия́ше му́ченик Парамо́н/ и к страда́нию прии́де.

Кре́пко тя растяга́ема и копии́ неми́лостивно бодо́ма,/ и ко́зни вра́жия побежда́юща,/ Христо́с венча́ тя подвигополо́жник, блаже́нне Парамо́не.

Терпе́нию удивля́яся му́чеников и тех соверше́нию дивя́ся, сла́вне,/ тех приобщи́лся еси́ ре́вности ве́ры и пречестно́му страда́нию.

Богоро́дичен: Умерщвле́ны челове́ки преступле́нием,/ живоно́сным Твои́м Рождество́м, Де́во Мари́е, всех оживи́ла еси́./ Тем Тя сла́вим и Боголе́пно ублажа́ем.

Песнь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обращя́яй из мра́чна неве́дения/ ве́рою воспева́ющия Тя.

Дар многоце́нный, тебе́ сама́го, прине́сл еси́ Творцу́ твоему́, пострада́в/ и пре́лесть победи́в, му́чеников удобре́ние.

Куми́ры, му́дре, и де́монская ка́пища сокруши́л еси́,/ утвержде́но помышле́ние стяжа́в на ка́мени Боже́ственныя ве́ры, Парамо́не.

Де́монов мно́жество му́жественно острупи́л еси́,/ острупле́нием пло́ти твоея́, страда́льче доблему́дренный,/ те́мже тя ублажа́ем.

Богоро́дичен: Равноче́стен Отцу́ Сый и Ду́ху Госпо́дь/ от чи́стых Твои́х крове́й воплоти́ся, Чи́стая, Челове́к быв.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Не был еси́ во вре́мя подвиго́в лени́в, встанли́в же па́че/ и Боже́ственному страда́нию до́блествен./ Сего́ ра́ди вене́ц сла́вы получи́л еси́.

Му́чеников собо́ру себе́ сочета́л еси́,/ сконча́вшихся усе́рдно пре́жде твоего́ страда́ния, приснопа́мятне,/ и с ни́ми Небе́сному черто́гу сподо́бился еси́.

Ко́пия подража́теля тя Христо́ва соде́лаша,/ и́миже пробода́емь, му́чениче, к Нему́ восте́кл еси́, венцено́сец,/ умертви́в терпе́ния ору́жием несмы́сленныя.

Богоро́дичен: Изба́ви мя собла́знов жите́йских, Пренепоро́чная,/ в нощи́ неве́дения безме́стными помышле́нии одержи́маго/ и зло́бою вра́жиею при́сно омрача́емаго.

По 6-й пе́сни му́ченичен Окто́иха.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Враче́вств и чуде́с благода́тию, му́дре му́чениче, от Бо́га обога́щся све́тло,/ врачу́еши зову́щия:/ благослове́н еси́ в хра́ме сла́вы Твоея́, Го́споди.

Простира́емых мук небре́гл еси́,/ все попече́ние имея́ на Небесе́х и зовы́й, достосла́вне:/ благослове́н еси́ в хра́ме сла́вы Твоея́, Го́споди.

Ты крове́й, страда́льче, огне́м всю попали́л еси́ вещь безбо́жия, сла́вне, лука́вую;/ росо́ю же чуде́с твои́х су́щия в зно́и лю́тых ороша́еши, Парамо́не, зовы́й:/ благослове́н еси́ в хра́ме сла́вы Твоея́, Го́споди.

Богоро́дичен: Ра́дуйся, еди́на ра́дость ро́ждшая челове́ком,/ ра́дуйся, Не́бо и престо́ле Херуви́мский,/ и пресла́вная пала́то ца́рствующаго всех веко́в, всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша, доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Бо́драго тя храни́теля душа́м стяжа́вше, обогати́хомся,/ успову́юща де́монская мечта́ния всегда́, и пло́ти свире́пыя во́лны,/ и бу́рю помышле́ний, му́чениче многострада́льне, вопию́щих:/ благослови́те, вся дела́ Госпо́дня, Го́спода.

Струя́ми твои́х свяще́нных крове́й багряни́цу очервлени́л еси́ себе́,/ обветша́ние весьма́ прия́ти не иму́щу,/ и, све́тло украша́емь, на Небесе́х обита́еши, вопия́, блаже́нне:/ благослови́те, вся дела́ Госпо́дня, Го́спода.

Я́коже овча́ чи́стое, и же́ртва непоро́чная,/ и приноше́ние, всесожега́емо у́гльми свяще́ннаго, му́чениче, страда́ния,/ страстополо́жнику твоему́ Христу́ прине́слся еси́, му́дре, поя́:/ благослови́те, вся дела́ Госпо́дня, Го́спода.

Богоро́дичен: Зако́на Тя се́ни и проро́ков проначерта́ша, Чи́стая, пропове́дания,/ неизрече́нно хотя́щу бы́ти Бо́га на́шего роди́тельницу, Богоблагода́тная Чи́стая./ Ему́же вси пое́м:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,–/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Се светоза́рнаго страстоте́рпца светоявле́нная осия́ па́мять,/ всех ве́рных сердца́ просвеща́ющи Боже́ственным Ду́хом,/ ра́достно ликовству́ющих и ве́рою блажа́щих.

Я́ко седмокру́жною десяти́цею и трегу́бною со́тницею непобеди́мых му́чеников совокупля́емь,/ с ни́миже те́ло твое́, му́чениче Христо́в, лежи́т,/ и с ни́ми моли́ спасти́ся нам.

По́прище проше́дше боле́зненное, многови́дных мук испо́лнено,/ и со Христо́м, мир победи́вшим, све́тло победи́вше,/ венцено́сцы му́ченицы, на Небесе́х жи́тельствуете.

Взят был еси́ от земли́ и по́чести твои́х по́двиг прия́л еси́,/ ны́не же ре́ки источа́еши нам чуде́с, тебе́ чту́щим/ и благоче́стно па́мять твою́ торжеству́ющим, Парамо́не.

Богоро́дичен: Просвети́ души́ моея́ зе́ницы,/ омраче́нныя невиде́нием тлетво́рнаго греха́, Богороди́тельнице Пречи́стая, Влады́чице,/ Ты бо ве́рных еси́ по́мощь и просвеще́ние, Чи́стая.

Свети́лен.

Подо́бен: Жены́, услы́шите:

Мно́жество непобеди́мое во́инства,/ сосло́вие Боже́ственно непобеди́мое му́чеников, благочестному́дренно воспои́м,/ иму́ще чинонача́льника Парамо́на чу́днаго, обличи́вшаго мучи́теля,/ и́же со все́ми му́ченики вене́ц получи́ сла́вы.

Богоро́дичен: Ра́дуйся, Бо́жия пала́то;/ ра́дуйся, горо́ осене́нная;/ ра́дуйся, купино́ неопали́мая;/ ра́дуйся, престо́ле сла́вы;/ ра́дуйся, Боже́ственная трапе́зо;/ ра́дуйся, ста́мно всезлата́я;/ ра́дуйся, све́щниче всесве́тлый;/ ра́дуйся, ле́гкий о́блаче, Де́во Ма́ти Мари́е.

Святой мученик Парамон и с ним 370 мучеников пострадали за веру во Христа в 250 году при императоре Декии (243―251). Правитель восточных областей Аквилин заточил в темницу 370 христиан, принуждая их отречься от Христа и принести жертву идолам. Заключенных предавали пыткам, надеясь мучениями и угрозой смерти заставить их отречься от Христа и поклониться языческим божествам. Один из местных жителей, по имени Парамон, видя мучения христиан, открыто обличил жестокость правителя и исповедал свою веру в Единого Истинного Бога, Господа Иисуса Христа. Святого Парамона после жесточайших пыток обезглавили вместе с остальными 370-ю мучениками.

Преподобный Акакий Синайский жил в VI веке и был послушником в одном монастыре. Смиренный инок отличался терпением и беспрекословным послушанием своему старцу, у которого был грубый характер. Он заставлял преподобного непомерно работать, морил его голодом, нещадно бил. Несмотря на такое обращение, преподобный Акакий кротко терпел невзгоды и благодарил Бога за всё. Недолго пробыв в таком тяжелом послушании, святой Акакий скончался.

Старец через пять дней рассказал о смерти своего ученика одному великому старцу, который не поверил, что молодой инок умер. Тогда учитель Акакия позвал этого старца к могиле Акакия. Великий старец, придя к гробу, громко спросил: «Брат Акакий, умер ли ты?» Из могилы раздался голос благоразумного послушника: «Нет, отче, не умер; кто переносит послушание, не может умереть». Пораженный учитель Акакия со слезами упал перед гробницей, прося прощения у своего ученика.

После этого он изменился нравом, затворился в келлии близ погребения святого Акакия, в молитве и кротости окончил свою жизнь. Это сказание привел в «Лествице» преподобный Иоанн Лествичник (память 30 марта) как пример терпения, послушания и награды за них.