В 11-й день

Свята́го великому́ченика Ми́ны, чудотво́рца Еги́петскаго, святы́х му́ченик Ви́ктора, Вике́нтия и святы́я му́ченицы Стефани́ды и преподо́бнаго отца́ на́шего и испове́дника Фео́дора Студи́та

В то́йже день Свята́го и блаже́ннаго Макси́ма, Христа́ ради юро́диваго, Моско́вскаго чудотво́рца

Преподо́бнаго Марти́рия Зелене́цкаго, Великолу́кскаго, чудотво́рца

В то́йже день Свята́го великому́ченика во царе́х, Стефа́на Се́рбскаго, и́же в Деча́нех

НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чи́нов:

Небе́сныя добро́ты возжела́в, сла́вне,/ и Христу́ спребыва́ти со святы́ми А́нгелы,/ вся́кия му́ки претерпе́л еси́ тве́рдо/ и мучи́телей суровство́,/ и пострада́в до́бльственне по Христе́,/ и ра́дуешися с ли́ки му́ченическими.

Заря́ми чи́стыми облистава́емь/ мы́сленнаго со́лнца, о Ми́но блаже́нне,/ весь све́тел показа́лся еси́, му́чениче Христо́в/ и страда́лец му́жественнейший,/ тем, со Христо́м сый на Небесе́х,/ о всем ми́ре моли́ся.

С ли́ки победоно́сцев/ водворя́яся на Небесе́х, треблаже́нне,/ и предстоя́ Боже́ственней Тро́ице Безнача́льней,/ помина́й соверша́ющия па́мять твою́/ и всече́стным мо́щем твои́м/ благогове́йно покланя́ющияся с ве́рою.

Сла́ва, глас 2:

Це́рковь днесь торжеству́ет та́инственно,/ в но́ву оде́жду оде́яна,/ я́коже в багряни́цу и ви́ссон,/ кро́вию победоно́сца Ми́ны,/ того́ бо в благоче́стии воспита́вши,/ же́ртву непоро́чну, прия́тну/ и благоуго́дну Христу́ принесе́,/ тем победи́теля Того́ беззако́нных/ показа́вый, Христе́ Бо́же,/ и венча́вый, и просла́вивый,/ и нам низпосли́ того́ моли́твами ве́лию ми́лость.

И ны́не, Богоро́дичен:

Ра́дуйся, Мари́е Богоро́дице,/ хра́ме неразруши́мый, па́че же святы́й,/ я́коже вопие́т проро́к:/ свят храм Твой, ди́вен в пра́вде.

На стихо́вне, стихи́ры, глас 2.

Подо́бен:До́ме Евфра́фов:

Вся Александри́я Боже́ственне ны́не ра́дуется,/ держа́щи в не́дрех/ честны́я мо́щи великому́ченика Ми́ны.

Стих: Ди́вен Бог во святы́х Свои́х,/ Бог Изра́илев.

О, чудесе́ ужа́снаго! О, ди́вства стра́ннаго:/ ко́сти бо му́ченическия/ цельбы́ соверша́ют и чудеса́ пресла́вная.

Стих: Пра́ведник, я́ко фи́никс, процвете́т/ и я́ко кедр, и́же в Лива́не, умно́жится.

Собо́ра ны́не ве́рных, еги́петстии жи́телие,/ целу́йте усе́рдно/ му́ченика Ми́ны мо́щи всечестны́я.

Сла́ва, и ны́не, Богоро́дичен:

Всезлаты́й ковче́же и ста́мно манноприе́мная,/ Мари́е Богоро́дице,/ Твоего́ Сы́на моли́ спасти́ ду́ши на́ша.

Тропа́рь пи́сан на вели́цей вече́рни (зри день сей ни́же)

НА ВЕЛИЦЕЙ ВЕЧЕРНИ

Блаже́н муж: 1-й антифо́н. На Го́споди, воззва́х: стихи́ры на 8.

Стихи́ры святы́х му́чеников, глас 4.

Подо́бен:Я́ко до́бля:

Трезу́бцы стрека́емь,/ воло́выми жи́лами бие́мь,/ и огне́м те́ло твое́ изнуря́емо,/ не отве́рглся еси́ и́мене Христо́ва спаси́тельнаго,/ не победи́лся еси́ по́мыслом,/ ни куми́ром поже́рл еси́,/ но был еси́ самово́льное заколе́ние/ и же́ртва чиста́ же и соверше́нна,/ му́чениче Ми́но, Влады́це твоему́.

Очесы́ избода́емь,/ и на дре́ве пове́шаемь,/ и свеща́ми всю́ду пали́мь,/ и свире́пством судя́щаго жи́лы прере́заемь,/ и мече́м в главу́ усека́емь,/ ра́довался еси́, Ви́кторе сла́вне,/ страда́льче Спа́сов,/ победи́в вра́жия ополче́ния де́йством Ду́ха Свята́го.

Венча́ тя Госпо́дь благода́тей венце́м,/ Стефани́до многострада́льная,/ во́льно бо тебе́ саму́ю му́кам предала́ еси́/ душе́вною до́блестию,/ привя́зана же, двема́ раздели́лася еси́ фи́никома/ и возлете́ла еси́ к Бо́гу, я́ко вра́бий,/ плоть в руце́ оста́вльши лови́телей,/ му́ченице достосла́вная.

И́ны стихи́ры свята́го Ми́ны, глас 2.

Подо́бен: Егда́ от Дре́ва:

Ми́ра кра́сная оста́вив,/ ро́да све́тлость, бога́тство и красоту́,/ все же чу́вство отве́рг/ и, те́лом раздробля́емь, страсте́й подража́нием ра́дуяся,/ после́довал еси́ Христу́, му́чениче Ми́но,/ я́ко о́бщник страда́ньми, сла́вы был еси́ вои́стинну/ и Ца́рствия ны́не соприча́стник.

У́ды пожина́емь пло́ти/ и нестерпи́мыя боле́зни и ра́ны терпя́,/ му́чениче Христо́в достосла́вне Ми́но,/ и мучи́телей суровство́ попра́в му́жественно,/ побе́ды, блаже́нне, Боже́ственному Влады́ки твоего́ Престо́лу/ с пострада́вшими с тобо́ю предстои́ши.

Име́я дерзнове́ние ко Христу́,/ о всех, ве́рою соверша́ющих честны́й твой пра́здник,/ му́чениче приснопа́мятне,/ те́пле предстои́ши, от бед избавля́я и страсте́й свобожда́я,/ спасе́ние соде́ловая Боже́ственными твои́ми моли́твами,/ я́ко да све́тлыя твоя́ по́двиги просла́вим.

И́ны стихи́ры, преподо́бнаго Фео́дора, глас 8.

Подо́бен: О, пресла́внаго чудесе́:

О́тче Фео́доре,/ и́стинно тезоимени́та, па́че ума́ дарова́ния прие́м,/ благоче́стно препода́л еси́ лю́бящим тя/ и, умно́жив, блаже́нне, тала́нт,/ Боже́ственный глас услы́шал еси́,/ внутрь зову́щ тя Черто́га,/ иде́же ны́не живе́ши,/ у Престо́ла Всецаря́ досточу́дне.

О́тче отце́в Фео́доре,/ ты мона́шествующих мно́жества Христу́ приве́л еси́,/ спасе́ния вина́ быв Богоподо́бна,/ уче́ньми озаря́емь/ и предста́тельствы душ украша́емь,/ уста́ показу́емь Госпо́дня, всему́дре, проро́чески./ Ему́же ны́не предстоя́, нас помина́й.

Благода́ть оби́льная Ду́ха,/ священнотаи́нниче му́дре,/ излия́ся устна́ми твои́ми,/ исто́чник искипе́ уче́ний, Фео́доре,/ благоче́стия я́вльши побо́рника/ и и́стины зе́льна соглаго́льника,/ столп и твердь Правосла́вныя ве́ры,/ мона́шескаго жития́ известнейшее пра́вило, всему́дре.

И́ны стихи́ры преподо́бнаго Фео́дора, глас 6.

Подо́бен:Все отло́жше:

Все отло́жше мирско́е пристра́стие,/ Богому́дре о́тче Фео́доре,/ я́ко прах, вмени́л еси́/ благоро́дство и бога́тство ро́да о́тча,/ еще́ юн после́довал сро́днику своему́/ блаже́нному Плато́ну;/ с ним же вку́пе с бра́тии свои́ми Ио́сифом и Евфи́мием/ всели́ся в ме́сте, Саккудио́н зово́мо,/ иде́же восхо́ду на Не́бо нача́ло положи́.

Всю отри́нувши го́рдость жите́йскую,/ от ми́ра отре́клся еси́,/ блаже́нне Фео́доре,/ и, и́нок наре́кшись, и́нако нача́ жи́ти,/ всем служа́ше и безче́стию себе́ вдава́ше,/ смире́нию приле́жно обуча́яся,/ по вся дни усе́рдно испы́тывал еси́ ду́шу свою́,/ покая́нием нераска́янным спасе́ние соде́ловаше.

Все возложи́вше помы́шление свое́ ко Го́споду,/ непреста́нною моли́твою умиле́ние прия́л еси́ в ду́шу свою́/ и, разу́мно подвиза́яся,/ о́браз яви́лся еси́ доброде́тели прилежа́щим ея́,/ е́же и ви́дя Всеблаги́й Госпо́дь/ благода́тию свяще́нства осени́ тя, свя́те Фео́доре,/ да я́ко свеща́ не под спу́дом кры́ема/ на свети́льнице Це́ркви возсия́ет во спасе́ние всех.

Сла́ва, му́чеников, глас 6. Византие́во:

Па́ки нам ле́тняя па́мять/ ми́ра свети́л возсия́,/ Ми́ны же, и Ви́ктора, и Вике́нтия,/ ве́рных сердца́ просвеща́ющи/ и́же за Христа́ и за Крест Его́ борьба́ми./ Те́мже сла́вою и че́стию венча́вшаго ты́я,/ Христа́ Бо́га на́шего,/ в пе́снех почита́ем.

И́на сла́ва, преподо́бнаго, глас 6:

Преподо́бне о́тче Фео́доре,/ ты измла́да усе́рдно после́довал еси́ Влады́це твоему́/ и, труды́ ко труда́м прилага́я,/ о́браз спасе́ния всем яви́лся еси́/ и я́ко жив Це́рковь Христо́ву на ве́ки озаря́еши/ сия́нием души́ своея́./ Имже и мы, ча́да твоя́, просвеща́еми,/ по до́лгу ублажа́ем тя.

И ны́не, Богоро́дичен: Кто Тебе́ не ублажи́т:

Или́ Крестобогоро́дичен.

Подо́бен:Тридне́вен:

Лю́ди беззако́ннейшия,/ непра́ведно пригвожда́ющия Тя на Дре́ве,/ Де́ва Чи́стая и Ма́ти Твоя́ зря́щи,/ я́ко Симео́н прорече́,/ утро́бою Спа́се уязвля́шеся.

Вход. Све́те ти́хий. Проки́мен дне. И чте́ния три, му́ченическая, а́ще пра́зднуеши свято́му Ми́не (зри день сей ни́же) или преподо́бническая, а́ще пра́зднуеши преподо́бному Фео́дору (зри Мине́ю ноября́ 6-й день).

Чте́ния му́ченическая

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель, глаго́лет Госпо́дь Бог,/ и О́трок, Его́же избра́х./ Да позна́ете и ве́руете Ми, и разуме́ете, я́ко Аз есмь:/ пре́жде Мене́ не бысть ин бог, и по Мне́ не бу́дет,/ Аз есмь Бог и несть ра́зве Мене́ спаса́яй./ Аз возвести́х и спасо́х,/ уничижи́х и не бе в вас чужди́й./ Вы Мне свиде́тели и Аз Госпо́дь Бог,/ и еще́ от нача́ла Аз е́смь:/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я,/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и я́ко и́скры по сте́блию потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́, не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть:/ и живы́й посреде́ гре́шников, преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́:/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На литии́ стихи́ры Ми́ны, самогла́сны, глас 1:

Весели́теся о Го́споде, гра́ди еги́петстии,/ и взыгра́йте, ра́дующеся,/ мо́щи му́ченика Ми́ны в не́дрех держа́ще,/ я́коже сокро́вище глубокотала́нтное и неоскудева́емое,/ с ни́миже и мы, всегда́ почерпа́юще от них исцеле́ний струи́,/ всегуби́тельныя избавля́емся боле́зни,/ благодаря́ще Бо́га,/ Благоде́теля и Спа́са душ и теле́с на́ших.

Боже́ственным по́двигом до́бре подвиза́вся, му́чениче Ми́но,/ Небе́снаго Ца́рствия жи́тель был еси́/ и моли́шися о ми́ре, всехва́льне./ Терпели́вейшее бо твое́ те́ло на земли́ оста́вил еси́,/ лечбу́ спаси́тельную к нему́ ве́рно приступа́ющим/ и прикаса́ющимся с любо́вию подава́ющее;/ всечестны́я же мо́щи твои́ Александри́я,/ стяжа́ бога́тство неиждива́емо/ и сокро́вище многоце́нно,/ е́юже вои́стинну жела́емых получа́ет/ и сопроти́вных избавля́ется,/ осене́нием я́же в тебе́ Боже́ственныя благода́ти.

Ве́рою и жела́нием возгоре́вся ко Влады́це твоему́ горя́щим/ и страда́нием, е́же за Христа́,/ я́коже ле́ствицу употреби́в,/ возше́л еси́ к Небе́сным цветнико́м/ и отту́ду Бо́гом тебе́ да́нною благода́тию/ назира́еши соверша́ющия честну́ю па́мять твою́,/ и твоя́ почита́ющия по́двиги,/ и твою́ всечестну́ю главу́ облобыза́ющия, му́чениче Ми́но.

Лука́ваго изощре́нныя стре́лы притупи́л еси́, свя́те,/ противле́нием твои́х подвиго́в/ и посрами́л еси́ зми́я началозло́бнаго/ и того́ ору́дие – Диоклитиа́на злочести́вейшаго;/ непрекло́нным бо ра́зумом на ка́мени утвержде́н ве́ры,/ непоколеби́мь пребы́л еси́,/ тем проти́вная веле́ния нечести́вых/ не возмого́ша преврати́ти тве́рдое твое́ благоче́стие;/ сего́ ра́ди на Небесе́х лику́еши со А́нгелы/ и мо́лишися непреста́нно/ о и́же ве́рою и любо́вию почита́ющих всечестну́ю па́мять твою́.

До́блестию ума́ укрепле́н, сла́вне,/ му́ки безбо́жных ни во что́ же вмени́л еси́,/ но му́жески устреми́лся еси́ к подвиго́м./ Боже́ственным же Ду́хом просве́щся ра́зумом,/ царя́ беззако́ннейшаго обличи́л еси́,/ и му́чащия тя ка́знем преда́л еси́,/ и Правосла́вную ве́ру утверди́л еси́,/ и, ны́не на Небесе́х по́чести твои́х трудо́в прие́м,/ непреста́нно славосло́виши Святу́ю Тро́ицу, и мо́лишися/ о и́же ве́рою и любо́вию почита́ющих честну́ю па́мять твою́.

Сла́ва, глас 5:

Прииди́те, мучениколю́бцы вси,/ да учреди́мся во всечестне́м торжестве́ победоно́сца/ и духо́вно да торжеству́им,/ днесь бо созыва́ет нас всечестно́е торжество́ му́ченика Ми́ны,/ трапе́зу нам предлага́ющее изря́дства боре́ний его́/ и всехва́льныя его́ мо́щи,/ исцеле́ния, я́коже струи́, источа́ющия/ всем, ве́рно к ним приступа́ющим/ и почерпа́ющим от них исцеле́ние душ же и теле́с,/ и лю́тых измене́ние, и ве́лию ми́лость.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую предста́тельницу и прибе́жище душ на́ших.

И́ны стихи́ры на литии́ преподо́бнаго Фео́дора, глас 3:

Да ра́дуются ли́цы и́ночествующих/ в наро́читый день пра́здника отца́ на́шего/ и, похваля́юще житие́ его́,/ смиренному́дренно и умиле́нно зову́т ему́:/ ра́дуйся, Богому́дрый Фео́доре,/ наста́вниче наш к весе́лию ве́чному неле́ностный.

Сла́ва, глас то́йже:

Что́ возда́м про́тиву любви́ твоея́, о́тче,/ излия́вшейся оби́льно на наро́д наш любобезмо́лвный,/ а́ще не после́дуем стопа́м твои́м,/ оглаша́я при́сно житие́ твое́/ твои́ми Богому́дрыми словесы́.

И ны́не, Богоро́дичен:

Что́ принесе́м Тебе́, Влады́чице,/ а́ще не смире́ние, в лю́бви растворе́нное,/ е́же соверше́нное яви́ла еси́ нам.

На стихо́вне стихи́ры свята́го Ми́ны, глас 8:

Подо́бен:О, пресла́внаго чудесе́:

За всех жизнь стра́ждеши,/ кровь твою́ излива́я, страстоте́рпче Ми́но,/ Кровь Свою́ тебе́ ра́ди излия́вшему,/ приве́лся еси́ Христу́, блаже́нне;/ с тем о́бщника Своея́ сла́вы сотвори́ тя/ и Ца́рства соприча́стника,/ я́ко му́жествовавшаго кре́пко на льсти́ваго/ и сего́ ухищре́ния до конца́ низложи́вшаго.

Стих: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится.

Благоче́стия столп был еси́,/ основа́н тве́рдо на ка́мени ве́ры,/ искуше́ний ве́тры непоколе́блемь,/ муче́ний мно́гих, блаже́нне:/ с лю́тою бо я́ростию врази́ тебе́ прирази́шася,/ тща́шася низложи́ти и не возмого́ша кре́пости твоея́,/ но посра́млени падо́ша,/ победи́тельным бо от Христа́ венце́м украси́тися возжеле́л еси́.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Вопло́щшемуся Христу́ Бо́гу на́шему/ и стра́стию Кре́стною низложи́вшему отсту́пника,/ во́льным Того́ страсте́м, страстоте́рпче Ми́но, поревнова́в,/ и ра́нами протяза́емь,/ хва́лящагося неви́димаго врага́ с пло́тию, му́чениче, победи́в,/ на зе́млю низложи́л еси́.

Сла́ва, глас 2:

Прииди́те, ве́рнии,/ почти́м страстоте́рпца Христо́ва – Ми́ну сла́внаго,/ до́бляго в во́инех,/ до́бре подвиза́вшася по благоче́стии,/ царе́й же и мучи́телей держа́ву низложи́вша;/ тем дерзнове́ние име́я ко Христу́ Бо́гу,/ непреста́нно мо́лит спасти́ ду́ши на́ша.

И ны́не, Богоро́дичен: О, чудесе́ но́ваго:

И́на стихо́вна, Фео́дора, стихи́ры, глас 6.

Словесы́, я́коже мечи́,/ ерети́ческия чи́ны разсе́кл еси́, му́дре,/ правосла́вных мно́жество на ико́не писа́ти,/ Христа́ показа́л еси́ писа́нием на́шим./ Поще́нием бо пре́жде плотски́й мрак преше́д,/ взъи́де на го́ру доброде́телей,/ Боже́ственный ра́зум разбогате́в, Фео́доре,/ и, писа́ний бе́здну изсле́див,/ до́бре всем уясни́л еси́,/ я́ко пло́тию преты́ка́ется,/ и́же не чтый честне́ воображе́ния челове́ческаго о́браза,/ и́же целу́юще Ма́терь и святы́х, тя бла́жим ве́рно.

Стих: Что возда́м Го́сподеви о всех,/ я́же воздаде́ ми.

Любо́вию Распя́таго/ крест свой взял еси́, возсле́дуя Ему́,/ ме́ртвость живоно́сну пострада́вшаго пло́тию,/ и и́щеши Его́ Богому́жнаго о́браза,/ на всяк день яви́ся му́чеником,/ нося́ на те́ле свое́м Христо́вы я́звы/ и разруша́я па́губу ерети́ческую,/ таи́бник Сокрове́ннаго Живота́ сый,/ Того́ насле́довати страсте́м возжеле́л еси́/ и поклони́лся еси́ пло́тию нас ра́ди Челове́ку соверше́ну,/ о́бразом плотски́м в те́ло пи́сано ве́рно.

Стих: Честна́ пред Го́сподем/ смерть преподо́бных Его́.

Сло́вом безслове́сие,/ я́коже пре́жде того́ дея́нием недея́ния разо́рь,/ сло́вом па́че сло́ва,/ ра́дуяся, преступи́л еси́, пренебе́сных лик исполня́я,/ но жи́тница де́тельных нося́ сокро́вищ слове́с твои́х,/ лю́дие твои́ и ча́да/ прии́мут обеща́ния, я́ко дар, Фео́доре,/ приими́ рука́ма свои́ма/ в та́мо су́щая хра́мы вся́кого́ждо,/ млеко́м уче́ний твои́х я́же напои́л еси́./ Прииди́, яви́ся ны́не верхо́вник ли́ку сла́вящаго тя/ и тя оступа́ющаго торжество́м твои́м све́тло.

Сла́ва, глас 8:

И́ноком законополо́жник, правосла́вным обуча́тель,/ пра́вило правле́ния, повеле́ний стави́ло,/ свяще́нником све́тлость,/ Бо́жия уста́, се́чивом посека́я ерети́ческия проти́вныя полки́,/ яви́лся еси́, Фео́доре,/ и ны́не, Све́та коне́чнаго весь исполня́яся,/ Христо́ви моля́ся,/ не ослабля́й о ста́де свое́м.

И́ны стихи́ры на стихо́вне, преподо́бнаго Фео́дора, глас 5.

Подо́бен:Ра́дуйся:

Ра́дуйся, всеблаже́нне о́тче Фео́доре,/ па́стырю до́брый,/ ми́ра отре́кшийся,/ злострада́нием и до́брым исповеда́нием Христо́ва и́мени/ на Небеса́ возше́дый,/ отону́дуже и назира́еши всех ве́рных чад свои́х,/ в дне́шний день па́мяти твое́й сла́вящих тя/ еди́ными усты́ и еди́ным се́рдцем,/ да благослове́ние твое́ пребу́дет/ от ны́не и до ве́ка/ над пребыва́ющими в любви́ к тебе́.

Стих: Честна́ пред Го́сподем/ смерть преподо́бных Его́.

Ра́дуйся, до́брая о́трасле свяще́ннаго ко́рене,/ от млады́х ногте́й Бо́гу угожда́я,/ к Нему́ же от си́лы в си́лу восходя́,/ яви́лся еси́ оте́ц мно́жества спаса́емых,/ да́руя всем, к тебе́ приходя́щим, пра́вило жи́зни/ не то́кмо де́лом, но и письмене́м/ многосве́тлаго ума́ твоего́,/ я́же и мы любо́вию прие́млюще,/ потщи́мся восхвали́ти при́сно/ наставля́ющаго нас свята́го кир Фео́дора.

Стих: Восхва́лятся преподо́бнии во сла́ве/ и возра́дуются на ло́жах свои́х.

Ра́дуйся, свети́ло мона́шествующих изря́дное,/ от лет дре́вних возсия́вшее/ от Студи́йския оби́тели над страно́ю Росси́йскою,/ иде́же мно́зи любобезмо́лвницы прилежа́ху/ Богому́дрому уста́ву блаже́ннаго Фео́дора,/ его́ же, воспева́юще, восхва́лим/ и киновиа́рха на́шего Богосве́тлаго Феодо́сия,/ подража́юще им и наставле́ния их/ в па́мяти при́сно храня́ще.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Го́споду,/ мир испроси́ душа́м на́шим.

И ны́не, Богоро́дичен или́ Крестобогоро́дичен:

Подо́бен:Тридне́вен:

Ви́дящи Тя, распина́ема, Христе́,/ Тебе́ Ро́ждшая вопия́ше:/ что стра́нное е́же ви́жу та́инство, Сы́не Мой?/ ка́ко на Дре́ве умира́еши пло́тию пове́шен,/ жи́зни Пода́телю?

Тропа́рь свята́го Ми́ны, глас 4:

Я́ко Безпло́тным собесе́дника/ и страстоте́рпцем единовсе́льника,/ соше́дшеся ве́рою, Ми́но, восхваля́ем тя,/ ми́ра ми́рови испроси́/ и душа́м на́шим ве́лия ми́лости.

Сла́ва, преподо́бнаго Фео́дора, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ мона́шествующих Богодухнове́нное удобре́ние,/ Фео́доре прему́дре,/ уче́ньми тво́ими вся просвети́л еси́,/ цевни́це духо́вная,/ моли́ Христа́ Бо́га спасти́ся душа́м на́шим.

И ны́не, Богоро́дичен.

НА У́ТРЕНИ

На Бог Госпо́дь: тропа́рь: Я́ко Безпло́тным: Два́жды Сла́ва: Правосла́вия наста́вниче: И ны́не: Е́же от ве́ка утае́нное: и стихосло́вие.

По 1-м стихосло́вии седа́лен свята́го Ми́ны, глас 1.

Подо́бен: Лик А́нгельский:

Во́инство е́же на земли́ возненави́дев, му́чениче,/ ю́же на Небесе́х возжела́л еси́ сла́ву/ и боле́зни претерпе́л еси́/ и ну́жную смерть;/ те́мже днесь всесвяту́ю твою́ па́мять пра́зднуем,/ Христу́ принося́ще хвалу́, преблаже́нне Ми́но.

Сла́ва, преподо́бнаго Фео́дора, глас 1:

Взира́юще на светоле́пный лик преподо́бнаго отца́ на́шего Фео́дора,/ не забу́дем, ка́ко тя́жко и многообразно претерпе́ сей от безу́мных хули́телей ико́ннаго поклоне́ния/ и си́це нау́чимся гове́нием его́ мно́гим/ чти́ти честны́я изображе́ния на Небесе́х пребыва́ющих.

И ны́не, Богоро́дичен:

Ма́терь Тя Бо́жию и Де́ву мо́лим вси вои́стинну,/ в щедро́ты Твоя́ вопие́м, любо́вию прибега́юще к Твое́й бла́гости,/ Тя бо и́мамы, гре́шнии, Засту́пницу/ и Тебе́ стяжа́хом в напа́стех спасе́ние, еди́ну Пречи́стую.

По 2-м стихосло́вии седа́лен Ми́ны, глас 4.

Подо́бен:Яви́лся еси́ днесь:

Тече́ние соверши́в и́стинное,/ мучи́телей всю кре́пость победи́л еси́,/ и прия́л еси́ вене́ц от руки́ Вседержи́теля,/ му́чениче Ми́но всече́стне,/ и показа́лся еси́ А́нгелом соприча́стник.

Сла́ва, преподо́бнаго Фео́дора, глас 1:

Непреста́нно поуча́яся глаго́лом Господним,/ я́коже Дави́д Богооте́ц внуша́ет,/ де́лом и сло́вом потща́лся еси́ о́ныя исполня́ти, Богому́дре о́тче Фео́доре,/ е́же чрез все житие́ показу́я,/ во век не забы́л еси́ оправда́ний Госпо́дних,/ в них же и оживи́л еси́ при́сно дух твой в час разлуче́ния от те́ла.

И ны́не, Богоро́дичен:

Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла, моля́щи,/ кто бы нас изба́вил от толи́ких бед,/ кто же бы сохрани́л до ны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.

Та́же: Хвали́те И́мя Госпо́дне:

Припе́в: Велича́ем тя,/ страстоте́рпче святы́й Ми́но,/ и чтим честна́я страда́ния твоя́,/ я́же за Христа́ претерпе́л еси́.

Псало́м избра́нный: Бог нам прибе́жище:

По полиеле́и седа́лен свята́го Ми́ны, глас 4:

Во́ина Христо́ва непобеди́маго,/ победи́теля на враги́ до́бляго,/ в вели́ких чудесе́х возсия́вшаго,/ при́сно вси восхва́лим ве́рою, Ми́ну страстоте́рпца:/ то́чит бо цельбы́ притека́ющим с ве́рою,/ и утоля́ет стра́сти лю́тыя,/ и су́щия в ско́рбех челове́ки заступа́ет.

Други́й седа́лен свята́го Ми́ны, глас 5.

Подо́бен: Собезнача́льное Сло́во:

Доброде́тельными светлостьми́ просвещава́емь/ и муче́ния све́том украша́емь,/ па́че со́лнца, прему́дре, сия́еши тве́рде/ и просвеща́еши вои́стинну творя́щих ве́рно па́мять твою́ светоно́сную,/ пресла́вный страстоте́рпче Ми́но,/ покланя́ющихся моще́м твои́м спаса́й.

Сла́ва, преподо́бнаго Фео́дора, глас 8:

Да торжеству́ют ны́не вся духо́вная ча́да Богоно́снаго отца́ на́шего Фео́дора,/ любо́вию сте́кшияся в па́мять его́,/ и, внима́я его́ присноживу́щему сло́ву,/ к ра́дости ве́чной да восхо́дят в оби́тель его́ Небе́сную,/ храня́ще ве́рно обе́ты своя́, покая́нием сия́ обновля́я,/ со А́нгелы ликовству́я в обраще́нии свое́м ко Го́споду.

И ны́не, Богоро́дичен:

Повеле́нное та́йно прие́м в ра́зуме,/ в кро́ве Ио́сифове тща́нием предста́ Безпло́тный, глаго́ля Неискусобра́чней:/ Приклони́вый схожде́нием Небеса́ вмеща́ется неизме́нно весь в Тя,/ Его́же и ви́дя в ложе́снах Твои́х прие́мша ра́бий зрак, ужаса́юся зва́ти Тебе́:/ ра́дуйся, Неве́сто Неневе́стная.

Степе́нна, 1-й антифо́н 4-го гла́са: Проки́мен: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится. Стих: Насажде́ни в дому́ Госпо́дни,/ во дво́рех Бо́га на́шего процвету́т. Вся́кое дыха́ние: Ева́нгелие от Луки́, зача́ло 106. Псало́м 50-й. Сла́ва: Моли́твами страстоте́рпца му́ченика Ми́ны,/ Ми́лостиве, очи́сти/ мно́жества согреше́ний на́ших. И ны́не: Моли́твами Богоро́дицы,/ Ми́лостиве, очи́сти/ мно́жества согреше́ний на́ших. Стих: Поми́луй мя, Бо́же,/ по вели́цей ми́лости Твое́й/ и по мно́жеству щедро́т Твои́х очи́сти беззако́ние мое́.

Та́же стихи́ра самогла́сна свята́го Ми́ны, глас 6:

Днесь вселе́нная вся/ страстоно́сца просвеща́ется заря́ми,/ и Бо́жия Це́рковь, цве́ты украша́ема,/ му́чениче Ми́но, вопие́т ти:/ уго́дниче Христо́в и предста́телю тепле́йший,/ не преста́й моли́ти о спасе́нии душ на́ших.

И́на стихи́ра по 50-м псалме́, преподо́бнаго Фео́дора, глас 6:

Бла́гоже, бла́гоже ти, о́тче Фео́доре,/ я́ко прише́л еси́ от ю́ности ко Христу́/ и, яре́м Его́ на рамена́ своя́ взем,/ легко́ и ра́достно поне́сл еси́ его́,/ Бо́гу споспе́шествующи ти,/ те́мже и поко́й ве́чный обре́л еси́,/ я́ко мзду́ трудо́в свои́х/ о Христе́ Го́споде на́шем.

Кано́н Богоро́дицы, глас 8: Мно́гими содержи́мь: и святы́х два кано́на на 8.

Кано́н му́чеников, Иоа́нна мона́ха. Глас 4.

Песнь 1

Ирмо́с: Ли́цы изра́ильтестии/ невла́жными стопа́ми/ понт Чермны́й и вла́жную глубину́ прогна́вше,/ вса́дники триста́ты, враги́ ви́дяще, в ней погруже́ны,/ с весе́лием по́яху:/ пои́м Бо́гу на́шему, я́ко просла́вися.

Лю́дие свяще́ннии с Моисе́ем сла́вным/ и с Мариа́м, жено́ю му́дрою и проро́чицею,/ не глубину́ Чермну́ю, но ны́не Ми́ны страда́льца проходя́ще мо́ре по́двиг сла́вно,/ пое́м Бо́гу на́шему, я́ко просла́вися.

Я́ростию преще́ния и ре́вностию гне́ва дыша́/ свирепогуби́тель и беззако́нный мучи́тель,/ я́ко Христо́в во́ин, предста́ти изво́лил еси́,/ Ми́но, благоче́стия побо́рниче./ Ему́же и свети́льник яви́лся еси́, взыва́я:/ пое́м Бо́гу на́шему, я́ко просла́вися.

Егда́ возвы́шуся, привлеку́ земны́я, Ты, Христе́, проре́кл еси́,/ де́лом же соверши́л еси́,/ му́ченическия чи́ны и лю́ди от коне́ц призва́в, в ра́дости пою́щия:/ пое́м Бо́гу на́шему, я́ко просла́вися.

Богоро́дичен: Жезл Ааро́нов прозя́бший, и́же от Иессе́я прообразова́ше возра́стший ко́рень Тя, Де́во,/ нетле́нный цвет ми́ру возсия́вшую, Бо́га воплоще́нна./ Его́же о нас, Богоро́дице, моли́,/ при́сно прибега́ющих к Тебе́.

Ин кано́н преподо́бнаго, его́же краегране́сие: Сла́внаго Фео́дора в пе́снех почита́ю. Феофа́ново. Глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Светолу́чными блиста́нии Ду́ха Свята́го освеща́емь,/ всесве́тлый столп, о́тче, был еси́,/ путеводя́, Богоглаго́ливе, к земли́ обеща́ния Богому́дренно тща́щияся,/ таи́нниче неизрече́нных Фео́доре.

Всера́достно неосла́бными манове́нии¹⁰⁸ к Бо́гу исходя́,/ пре́жде конца́ яви́лся еси́,/ ме́ртвостию жизноно́сною одея́н, преподо́бне,/ и жизнь нестаре́ющуюся ны́не прия́л еси́ досто́йно,/ о́тче Богоно́се Фео́доре.

Победи́в страсте́й игра́ния/ и мучи́телей стремле́ния ю́ношески, блаже́нне,/ вся укори́л еси́, му́жество показа́в,/ Христо́в о́браз чти́ти науча́я, Богоприя́тне,/ и святы́х воображе́ния.

Очище́нною мы́слию, всему́дре,/ Богодухнове́нным писа́нием поуча́яся,/ бога́тство доброде́телей собра́л еси́ и благоче́стия догма́ты,/ виде́нием обогати́лся еси́ и жития́ све́тлостию,/ возсия́в обою́ду, преподо́бне.

Богоро́дичен: Сло́ва Бо́жия воплоще́нна родила́ еси́,/ И́же пре́жде безпло́тнаго,/ Богому́жно в ми́ре пожи́вшаго преесте́ственно,/ Всенепоро́чная Богоро́дице Де́во./ Тем Тя вси почита́ем, по Бо́зе Предста́тельницу на́шу.

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́, Человеколю́бче.

Гони́мь прему́дрыми твои́ми словесы́, мучи́тель/ тя ураня́ет¹⁰⁹ неща́дно суро́выми жи́лами говя́жиими,/ мнев¹¹⁰ си́ми преклони́ти тя, му́чениче непобеди́ме.

Взира́я очесы́ у́мными ко Го́споду,/ плотски́я неудобосте́рпныя мук тя́жести претерпе́л еси́/ нра́вом до́блественнейшим, достосла́вне.

Не убоя́вся муче́ний зело́ боле́зненных,/ дыша́ ре́вностию Боже́ственною,/ к подвиго́м отлучи́лся еси́, зовы́й:/ неи́щемь, приидо́х самозва́н.

Богоро́дичен: От а́довых мя врат из Тебе́ Воплоще́йся возведе́,/ дре́ва вку́сом лука́вым умерщвле́наго, Всенепоро́чная,/ смерть во́льную прие́мый.

Ин

Ирмос: Утверже́й в нача́ле небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.

Вжиля́емь Христо́вым, всеблаже́нне, всеору́жием,/ язв боле́зни претерпе́л еси́,/ ураня́емь лю́те и в темни́це заключа́емь,/ я́ко о́бщник страсте́й и Ца́рствия был еси́.

Богопокрыва́емь я́ве и Того́ ре́вностию разжига́емь,/ скве́рная уче́ния беззако́нных разруши́л еси́ твои́ми уче́нии, всему́дре,/ благода́тию бо от Бо́га, о́тче, обогати́вся досто́йно.

В виде́нии де́лателен,/ в дея́нии Богосло́в был еси́ нам, Богоглаго́ливе,/ по́стник учи́телен, священному́ченик сла́вен,/ Правосла́вия столп, Це́ркве утвержде́ние.

Богородичен: Соприсносу́щное Отцу́ и Ду́ху Бог Сло́во/ обнови́ти восхоте́в родонача́льника,/ по Ипоста́си того́ из Тебе́, Чи́стая, прия́т,/ святе́йшу всех Тя, Богома́ти, обре́т.

Конда́к преподо́бнаго, глас 2.

Подо́бен: Вы́шних ища́:

По́стническое и равноа́нгельное житие́ твое́/ страда́льческими уясни́л еси́ по́двиги/ и А́нгелом совсе́льник, Богоблаже́нне, яви́лся еси́, Фео́доре./ С ни́ми Христу́ Бо́гу моля́ся/ не преста́й о всех нас.

И́кос:

По́стников све́тлую добро́ту,/ Це́ркве Христо́вы утвержде́ние,/ ны́не Фео́дора восхва́лим:/ но́вый бо столп о́гнен яви́ся,/ попаля́я главы́ ерети́чествующих,/ ве́рных же просвеща́я ду́ши к ве́ре пра́вей,/ в Боже́ственный град, Вы́шний Иерусали́м,/ я́коже друга́го Изра́иля, вводя́./ К нему́же согла́сно возопие́м:/ всеблаже́нне о́тче,/ не забу́ди, Христу́ моля́ся непреста́нно о всех нас.

Ин конда́к му́чеников, глас 4.

Подо́бен: Яви́лся еси:

И́же сла́ве, Го́споди и все́х Соде́телю,/ Ты в ми́ре яви́л еси́ украше́нных доброде́тельми страстоте́рпцы и му́ченики,/ да и́мут непобеди́мую побе́ду.

Се́дален великому́ченика, глас 8.

Подо́бен: Прему́дрости:

И́же пре́жде неве́дения тьмо́ю лю́тою, Богому́дре му́чениче Ми́но, одержи́мый Еги́пет/ возсия́ тя, свети́льника всеми́рна,/ безбо́жия нощь кре́пко отгоня́ща заря́ми, блаже́нне,/ Боже́ственных по́двиг твои́х./ Тем, светоно́сный и честны́й твой день све́тло пра́зднующе, приле́жно зове́м ти:/ страда́льцев удобре́ние, моли́ Христа́ Бо́га/ грехо́в оставле́ние пода́ти чту́щим любо́вию святу́ю па́мять твою́.

Сла́ва, седа́лен преподо́бнаго, глас 3.

Подо́бен: Боже́ственныя ве́ры:

Боже́ственными догма́ты обогати́вся,/ ве́ру соблю́л еси́ Правосла́вия,/ предбе́дствовав за ню, Фео́доре,/ в заточе́ниих пострада́в и бие́ниих,/ в темни́цах претерпе́л озлобле́ния,/ о́тче преподо́бне, Христа́ Бо́га моли́/ дарова́ти нам ве́лию ми́лость.

Богоро́дичен: Боже́ственная ски́ния была́ еси́ Сло́ва,/ еди́на Пречи́стая Де́во Ма́ти,/ чистото́ю А́нгелы превозше́дшая,/ па́че всех мене́ персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Крестобогоро́дичен:

Нескве́рная А́гница, Сло́ва нетле́нная Девома́ти,/ на Кресте́ зря́щи пове́шена из Нея́ безболе́зненно Прозя́бшаго,/ матероле́пно рыда́ющи, вопия́ше:/ увы́ Мне, Ча́до Мое́,/ ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ нетле́нною дла́нию и спасе́ зову́щия:/ сла́ва, Христе́, си́ле Твое́й.

Кропле́нием твои́х крове́й погасо́ша у́глие многобо́жия,/ полк же де́монский погрузи́ся,/ Христо́ва же напои́ся Це́рковь,/ страстоте́рпче всеблаже́нне Ми́но, хва́лящи тя.

И́же на дре́ве пове́шением образу́еши страсть,/ Кресто́м зми́я, му́чениче, го́рькаго умертви́вша,/ строга́ния терпи́ши, хода́тайствующия тебе́ наслажде́ние,/ и́же на Небесе́х до́блественнейше.

Па́че естества́ боле́зней, страда́льче, искуше́ние прия́л еси́,/ и Боже́ственное раче́ние, твое́ удержа́вши естество́, забве́ние прия́ти творя́ше,/ поуща́я тя простира́тися к ра́нам, веселя́щася.

Богоро́дичен: Воплоще́нна неизрече́нно, Бо́га родила́ еси́,/ от Твои́х крове́й дом Себе́ созда́вшаго,/ во двух существа́х и хоте́ниих зна́емаго Боголе́пно, Неискусобра́чная.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Дар Бо́жий да́лся еси́ ми́ру тезоимени́т, бога́тыми дарми́ сия́ющ,/ я́ко исто́чник име́яй и́стинно озаре́ний су́щих, блаже́нне Фео́доре./ Тем учи́телем, по́стником и свиде́телем/ сликовствова́ти мно́жеству сподо́бился еси́.

О, тве́рдаго и кре́пкаго твоего́ противле́ния!/ И́мже мучи́телей свире́пство попра́л еси́,/ его́же ра́ди я́вственно ты па́че ума́/ благонача́льства коне́чное блаже́нство пости́гл еси́, Богому́дре,/ со Безтеле́сными поя́:/ си́ле Твое́й сла́ва, Человеколю́бче.

Глаго́л Бо́жий в тебе́ я́вственнейше все́лься,/ догма́тов, прему́дре Фео́доре, ре́ки то́чит оби́льно:/ те́ми же ны́не наслажда́ющеся, ученицы́ твои́, Богодухнове́нне,/ благода́рно вопие́м гла́сы немо́лчными:/ си́ле Твое́й сла́ва, Человеколю́бче.

Богоро́дичен: Всего́ в Тебе́ обновля́ет челове́ка,/ весь всему́, Всечи́стая, соединя́емь,/ И́же, Оте́ческих недр не отсту́пль, и в Твое́ чре́во всели́тися изво́ли,/ бога́тством благоутро́бия¹¹¹ во́льно обнища́в/ и обогати́в мир Божество́м.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще, воспева́ем Тя,/ Человеколю́бче.

Свиде́тельства облиста́в све́тлыми луча́ми,/ омрачи́в те́мное безбо́жие, всему́дре,/ просвети́л еси́ ве́рных исполне́ния,/ воспева́ющих тя, всехва́льне.

Исчезе́ вся́кое примышле́ние¹¹² враго́в кре́пким твои́м терпе́нием,/ ни глад бо, ни ра́ны, ни опале́ние,/ ни трезу́бец озлобле́ние твоего́ усе́рдия помрачи́ша.

Ве́рою огра́ждся, я́ко со́лнце луча́ми,/ в пусты́ню всели́лся еси́/ и гра́ды вся просвети́л еси́,/ пропове́дая Христа́, Сы́на Бо́жия, в пло́ти прише́дшаго, сла́вне.

Богоро́дичен: Новотвори́т истле́вша мя, ражда́емый из Тебе́ па́че естества́ Изба́витель,/ дре́вния мя кля́твы свобожда́я, Богома́ти Чи́стая,/ Его́же моли́ спасти́ мя.

Ин

Ирмо́с: Вску́ю¹¹³ мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я¹¹⁴ тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Ум, и ду́шу, и те́ло сло́вом очи́стив,/ храм всече́стен Бо́га всех был еси́, жив же и одушевле́н,/ благово́ния же́ртву, всего́ себе́ Христу́ принося́, о́тче,/ иере́й и же́ртва быв.

Осия́емь, блаже́нне, заре́ю Ду́ха,/ всем возблиста́л еси́ Богосло́вным язы́ком Тро́ичный Свет пречи́стый,/ воплоще́ния же е́же па́че ума́ Бо́жия Сло́ва неизрече́нное, о́тче, та́инство.

Разу́мно со А́нгелы ны́не водворя́яся,/ Христа́ моли́ страсте́й и бед изба́вити/ блажа́щия и чту́щия всече́стную и Боже́ственную па́мять страда́ний твои́х,/ Богоно́се Фео́доре.

Богоро́дичен: Неизглаго́ланным, Де́во, о́бразом/ Сын Бо́жий, в Тя всели́вся, Челове́к быва́ет,/ пре́жде век из Отца́ возсия́вый,/ челове́ка от тли избавля́ет/ и к жи́зни и нетле́нию возведе́, я́ко еди́н Благоутро́бен.

Песнь 6

Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве.

Безболе́знен пребыва́еши, огне́м изнуря́емь/ и власяны́ми претира́емь я́звы ру́бищи:/ Боже́ственная бо благода́ть, спрису́тствующи, Ми́но, укрепля́ше.

Предстои́ши пред суди́щи мучи́телей, суди́мь,/ и, лесть облича́я, Ми́но всеприснопа́мятне,/ тебе́ сама́го столп благоче́стия ве́рным подая́.

По́ты твои́х боре́ний лесть изсуши́л еси́ и́дольскую,/ тебе́ сама́го храм созда́л еси́ Честны́я Тро́ицы,/ страстоте́рпче Ми́но досточу́дне.

Богоро́дичен: Уврачи́ неисце́льныя стра́сти, Всенепоро́чная,/ души́ моея́ бы́лием Твоея́ бла́гости,/ блага́го Спа́са Христа́ су́щим в ми́ре ро́ждшая.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Целому́дренно твою́ жизнь, священноглаго́льниче, соверши́л еси́,/ пра́вдою же украси́вся, му́жеством и му́дростию,/ красне́йшую колесни́цу доброде́телей сочета́л еси́ себе́,/ всеблаже́нне преподо́бне.

Благоуха́ют благоле́пно догма́тов Боже́ственная словеса́ твоя́/ и из глубины́ злых ересе́й вся возво́дят, всему́дре,/ Правосла́вия к превы́шней кра́йности.

Возсия́ тебе́ свет,/ и сего́, о́тче, сопру́г¹¹⁵ весе́лие ны́не све́тлое я́ве:/ я́ко фи́никс, бо процве́л еси́, всеблаже́нне Фео́доре,/ и, я́ко кедр, умно́жился еси́, досточу́дне.

Богоро́дичен: Да изба́вимся от лю́тых прегреше́ний мольба́ми Твои́ми, Богороди́тельнице Чи́стая,/ и да улучи́м, Пресвята́я, Боже́ственнаго осия́ния/ из Тебе́ неизрече́нно воплоще́ннаго Сы́на Бо́жия.

Конда́к, глас 4.

Подо́бен: Яви́лся еси́:

Во́инства исхити́ привре́меннаго/ и нетле́ннаго показа́ тя Небе́снаго о́бщника,/ страстоте́рпче Ми́но, Христо́с, Бог наш,/ И́же му́чеников нетле́нный вене́ц.

И́кос:

Вели́каго хода́тай нам есть весе́лия па́мять му́чеников,/ на стра́сти му́жество/ и побе́ду на враги́ показу́ющи/ в све́тлем и ра́достнем испове́дании благода́ти./ Прииди́те у́бо в ней, празднолю́бцы вси, и возвесели́мся,/ вре́мя на́шего весе́лия лу́чшее и пребыва́ющее,/ Ми́ны страда́льца па́мять соверша́юще/ и прие́млюще страсте́й разреше́ния дар:/ сего́ же да́тель Христо́с Бог есть,/ му́чеников нетле́нный вене́ц.

Песнь 7

Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди, Бо́же оте́ц на́ших, благослове́н еси́.

Совле́кл еси́ ра́нами ты ко́жныя ри́зы греха́/ и во одея́ние оде́ялся еси́,/ не ктому́ обветша́ние прие́млющее, блаже́нне,/ е́же истка́ благода́ть я́вльшися.

Разжже́нием честны́х, му́чениче, и кре́пких твои́х по́двиг/ терно́вное лука́вое безбо́жие пепели́тся,/ крове́й же тече́ньми погаша́ется неве́дения возвы́шенный пла́мень, всеблаже́нне.

Име́яй оби́льныя да́ры,/ и чудоде́йствия источа́еши честны́й твой пра́здник соверша́ющим, Ми́но досточу́дне,/ и соде́йствуеши пою́щим:/ Бо́же оте́ц, благослове́н еси́.

Богоро́дичен: Благослове́н Плод благослове́ннаго Твоего́ чре́ва,/ Его́же благословя́т Небе́сныя си́лы и земны́х собра́ния,/ И́же нас изба́вивый кля́твы дре́вния, Благослове́нная.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Ви́дев Прови́дец твоего́ ра́зума чистоту́,/ слове́сных тя ове́ц па́стыря, о́тче, предлага́ет,/ Ему́же ны́не, всеблаже́нне, зове́ши, Фео́доре, веселя́ся:/ благослове́н Бог оте́ц на́ших.

Боже́ственному подо́бию о́браза, треблаже́нне,/ вочелове́чения Христо́ва, покланя́яся, пребыва́еши,/ богобо́рцем противля́яся да́же до кро́ве и поя́, Фео́доре:/ благослове́н Бог оте́ц на́ших.

Сло́во тво́е со́лию услажде́но яви́ся, всебога́те,/ и житие́ твое́, о́тче, просвеще́но заре́ю Ду́ха,/ И́мже ны́не блиста́яся, вопие́ши, ра́дуяся:/ благослове́н Бог оте́ц на́ших.

Богоро́дичен: Се ны́не испо́лнися Дави́да Боже́ственнаго Боже́ственное прорече́ние:/ мо́лятся и́стинно Твоему́ лицу́, Богороди́тельнице Чи́стая,/ иму́щии бога́тство благода́ти ны́не,/ благословя́ще Бо́га оте́ц на́ших.

Песнь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́ благослови́те, по́йте Го́спода.

Вене́чник, Ми́но, яви́лся еси́,/ враги́ Креста́ Го́спода твоего́, низложи́в у́бо, посрами́л еси́/ и вопия́л еси́, всеблаже́нне:/ вся дела́ Го́спода по́йте и превозноси́те Его́ во ве́ки.

Ди́вна творя́ Бог в па́мяти твое́й,/ источа́я нам мощми́ твои́ми душе́вная исцеле́ния и теле́сная, вопию́щим:/ вся дела́ Го́спода по́йте и превозноси́те Его́ во ве́ки.

Прине́сл еси́ Бо́гу служе́ние твое́/ и на земли́, преклони́в главу́ твою́,/ мече́м прия́л еси́ отсече́ние, му́чениче, зовы́й:/ вся дела́ Го́спода по́йте и превозноси́те Его́ во ве́ки.

Я́ко багряни́цею и ви́ссом¹¹⁶, кро́вию ва́шею Це́рковь украша́ется днесь,/ Ми́но, и Ви́кторе, и Вике́нтие, вопию́щи:/ вся дела́ Го́спода по́йте и превозноси́те Его́ во ве́ки.

Богоро́дичен: Де́вствует чре́во и ро́ждши Сы́на,/ Его́же без се́мене от Свята́го Ду́ха зача́т,/ Бо́га неопи́санна, в плоть обле́кшася, Отцу́ собезнача́льна Сло́ва./ Его́же вся дела́, яко́ Го́спода, пою́т и превозно́сят во ве́ки.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Прогна́ны показа́л еси́, Богоно́се Фео́доре, обрета́тели злочести́вых ересе́й,/ уча́ пречи́стый чти́ти о́браз Христо́в,/ покланя́тися же и че́стно почита́ти Богому́дренно и пе́ти Влады́це:/ свяще́нницы, благослови́те,/ лю́дие, превозноси́те Его́ во ве́ки.

Во всем житии́ твое́м, Богоглаго́ливе Фео́доре,/ Правосла́вия путево́ждь был еси́,/ свети́льник светле́йший, Богови́дный учи́тель,/ о́браз мона́хов и изве́стен законопи́сец, науча́я воспева́ти:/ свяще́нницы, благослови́те Влады́ку Христа́/ и превозноси́те Его́ во ве́ки.

На земли́ подвиза́лся еси́ благоче́стия защи́тник/ и непра́вды нелжи́вый обличи́тель, всеблаже́нне, быв, я́ко дар Бо́жий,/ и на Небесе́х пра́вды венча́лся еси́ венцы́,/ тече́ние соверши́л еси́ и ве́ру соблю́л еси́,/ превознося́ Христа́ во ве́ки.

Смы́слом ум украси́л еси́, целому́дрием жела́ние,/ я́ростное же му́жеством препоя́сал еси́, Фео́доре всему́дре,/ пра́вдою испра́вив священноле́пно душе́вныя твоя́ си́лы, согла́сно воспева́я:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Богоро́дичен: Благослове́нная Пречи́стая,/ души́ моея́ стру́пы и греха́ я́звы очи́сти:/ Бо́га бо ро́ждшая, су́щаго над все́ми, Отрокови́це Чи́стая,/ из де́вственныя неискусобра́чныя утро́бы./ Его́же благослови́т вся тварь и превозно́сит во вся ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся –/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Возлюби́л еси́ па́че не ме́ньше,/ не́жели возлю́блен был еси́, страстоте́рпче,/ возлю́бленную твою́ ду́шу предложи́в рачи́телю твоему́, Христу́,/ с Собо́ю просла́вльшему свиде́тельство твое́, приснопа́мятне.

Све́щник, све́том трисо́лнечным вжига́емь,/ му́чеников яви́ся тричи́сленная еди́ница,/ Ми́на, и Ви́ктор же, и Вике́нтий,/ ве́рных просвеща́ющий и мрак де́монский отгоня́ющий.

Приими́ хвалу́, я́ко долг, от усе́рдия исходя́щу,/ превосходя́ще тя, Ми́но, на́ших слове́с у́бо всем,/ и возда́ждь безчи́сленно от сокро́вищ твои́х дарова́ния.

Богоро́дичен: Досто́йно Тя вси, Ма́терь Царя́ и Влады́ки,/ дре́вле у́бо проро́цы хваля́ху,/ ны́не же апо́столи и му́ченицы, с на́ми сла́вяще,/ Тя, Богоро́дицу, велича́ют.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с:/ тем Тя, Богоро́дицу,/ А́нгелов и челове́к чинонача́лия велича́ют.

Тече́ньми твои́х слез, я́ко по́стник,/ и исто́чники крове́й, я́ко свиде́тель Христо́в, просвети́вся,/ сия́еши обою́ду све́тло, пра́вдою, преподо́бне, оде́ян, я́ко свяще́нник,/ в Боже́ственных жи́тельствуеши ли́цех,/ ны́не просвеща́емь в нехо́дных, треблаже́нне.

Чи́сте твое́ житие́ преше́д,/ во святы́х свята́я селе́ниих ны́не живе́ши,/ вене́ц благоле́пия прие́м/ и ца́рства одея́ние великоле́пное же и свяще́нное,/ в ни́хже ны́не, озаря́емь, предстои́ши Неве́стнику,/ наслажда́яся обоже́ния.

Ви́дети сподо́бился еси́ благи́х исто́чник, Богоно́се Фео́доре,/ я́ко проше́д житие́ Боже́ственнейшее и́стинно,/ от мирска́го сво́йства житие́м чи́стым ум свободи́в,/ я́ко свиде́тель и страстоно́сец был еси́, свяще́нне.

Глаго́л твои́х веща́ние, дарова́ние Бо́жие, нам всеслы́шан бысть, всехва́льне,/ я́ко гром, вселе́нныя в конце́х,/ и, я́коже ре́ки, истека́ют твои́х уче́ний списа́ния./ Тем тя Богосло́ва и Богоглаго́льника досто́йно имену́ем.

Богоро́дичен: Яви́лася еси́, о Де́во Ма́ти Бо́жия,/ па́че естества́ ро́ждши в телеси́ благо́е Сло́во,/ Его́же Оте́ц от се́рдца Своего́ отры́гну/ пре́жде всех век я́ко Благ,/ Его́же ны́не и теле́с превы́шша разумева́ем,/ а́ще и в те́ло облече́ся.

Свети́лен му́чеников.

Подо́бен: Не́бо звезда́ми:

Небеса́ зве́зды украша́ют, Иису́се,/ Це́рковь же Ми́на, и Ви́ктор, и Вике́нтий украша́ют и Стефани́да,/ и́хже ра́ди побе́ды на проти́вныя нам да́руй.

Други́й свети́лен, свята́го великому́ченика Ми́ны.

Подо́бен то́йже.

Я́коже со́лнце светоно́сно,/ чуде́сными заря́ми наставля́еши всю тварь,/ пресла́вне Ми́но, страстоте́рпче./ Те́мже, твою́ соверша́юще па́мять,/ про́сим от бед вся изба́вити Воскре́сшаго из Гро́ба.

Сла́ва, свети́лен преподо́бнаго:

Я́ко столп одушевле́н, яви́лся еси́ догма́тов Правосла́вия благоче́стно,/ обличи́в иконобо́рцов пре́лесть,/ тем и, страда́нием соверши́в испове́дание, Фео́доре, просла́вился еси́.

И ны́не, Богоро́дичен:

Вси ве́рнии Хода́таицу Тя к Ро́ждшемуся из Тебе́ ны́не предлага́ют, Всечи́стая,/ мы же мно́жае, и́же сраспина́емии Тому́./ Тем не преста́й, Де́во, за ны моли́тися.

На хвали́тех стихи́ры свята́го Ми́ны, глас 4.

Подо́бен: Зва́нный свы́ше:

Восхваля́ют лю́дие псалмы́,/ вку́пе и пе́сньми твою́ сла́вную па́мять, Ми́но,/ я́ко благоле́пна бо возсия́ и светоно́сна,/ укра́шена сла́вою и благода́тию./ Те́мже игра́ют ны́не А́нгельстии чи́ни,/ хва́лят же му́ченицы со апо́столы/ твои́х по́двиг, му́чениче, страда́ния/ и воспева́ют Просла́вльшаго тя Спа́са Христа́ Бо́га на́шего,/ Его́же моли́ спасти́ и просвети́ти ду́ши на́ша.

Облече́н во Христо́во всеору́жие,/ обре́лся еси́, Ми́но, не и́щущим тебе́,/ ты бо за Христа́ огне́м распаля́емь,/ и, руга́яся бого́в су́етных безбо́жному свире́пству тогда́, –/ во́инствую Царю́ моему́ Христу́, – беззако́нным взыва́л еси́:/ ни зве́рие, ни коле́са же, ни и́на му́ка/ мене́ разлучи́ти возмо́гут когда́/ любве́ Христа́ моего́,/ Его́же моли́ спасти́ и просвети́ти ду́ши на́ша.

Небре́г о сосу́дех многообра́зных,/ и о разли́чных му́ках, и о ору́жиях стра́шных,/ венцено́сче Ми́но,/ благоче́стия му́ченически тече́ние сконча́л еси́,/ те́мже пресве́тлую па́мять тво́ю/ цве́ты пе́сненными венча́ем/ и честны́я твоя́ облобыза́ем ве́рою мо́щи./ Но, я́ко Престо́лу предстоя́ Влады́ки Христа́ Бо́га на́шего,/ моли́ти не преста́й/ спасти́ и просвети́ти ду́ши на́ша.

Сла́ва, глас 2:

Прииди́те, любострада́льцы,/ трисия́нный му́ченик почти́м лик –/ Ми́ну, и Ви́ктора, и Вике́нтия,/ я́ко кро́ви да́ша и купи́ша ве́чную жизнь,/ тем и терпели́во противоглаго́лаху злых обрета́телю:/ не предсужда́ем тле́нная нетле́нных,/ не во́инствуем царю́ ме́ртвену земно́му,/ но живу́щему Царю́ во́инствуем,/ при́сно вопию́щу ве́рным:/ ве́руяй в Мя, а́ще и умре́т, жив бу́дет.

И ны́не, Богоро́дичен:

Непроходи́мая врата́, та́йно запеча́тствованная,/ Благослове́нная Богоро́дице Де́во,/ приими́ моле́ния на́ша и принеси́ Твоему́ Сы́ну и Бо́гу,/ да спасе́т Тобо́ю ду́ши на́ша.

И́ны стихи́ры на хвали́тех Фео́дора, глас 2.

Подо́бен: До́ме Евфра́фов:

Приими́, о Бо́же, я́ко Милосе́рд,/ глас раб Тво́их/ в похвалу́ уго́дника Твоего́, преподо́бнаго Фео́дора.

В хра́ме Бо́жии стоя́ще в моли́тве,/ вознесе́м хвалу́ Дарода́телю,/ осия́вшему ра́достию день свята́го Фео́дора.

Я́ко хвалу́ сию́ досто́йную/ отцу́ на́шему Фе́одору/ принесе́м смире́ние, любо́вию сопряже́нное.

Прииди́, о наста́вниче наш Фео́доре,/ и ста́ни с на́ми, запеча́таяй торжество́/ свои́м нам благослове́нием.

Сла́ва, глас 8:

Мона́хов мно́жества/ наста́вника тя почита́ем, о́тче наш Фео́доре,/ твое́ю бо стезе́ю вои́стинну пра́во ходи́ти позна́хом,/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви,/ поми́ловатися душа́м на́шим.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

или́ Крестобогоро́дичен:

Го́споди, егда́ Тя, Со́лнца пра́вды со́лнце ви́де,/ на Дре́ве пове́шена,/ лучи́ скры,/ и луна́ свет во тьму преложи́,/ Всенепоро́чная же Твоя́ Ма́ти утро́бою уязвля́шеся.

Славосло́вие вели́кое. Стихи́ра самогла́сная свята́го Ми́ны, глас 5:

Днесь возсия́ па́че денни́цы/ честна́я па́мять страстоте́рпца Христо́ва,/ ве́рных сердца́ просвеща́ющи/ и о́блаки душ отгоня́ющи/ де́йством благода́ти Ду́ха,/ к нему́же мучениколю́бцы воззове́м:/ ра́дуйся, и́же ве́рным я́влься Богодарова́нная благода́ть/ и чуде́с множе́ства простира́я/ к тебе́ же притека́ющим, му́чениче Ми́но блаже́нне,/ Христа́ непреста́нно моля́,/ не оскуде́й ве́чных благ получи́ти/ ве́рою соверша́ющим па́мять твою́.

НА ЛИТУРГИИ

Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода пре́до мно́ю вы́ну: Апо́стол к Ефесе́ем, зача́ло 233. И преподо́бнаго, Апо́стол ко Евре́ем, зача́ло 335. Аллилу́ия, глас 4: Воззва́ша пра́веднии: Стих: Блаже́н муж, боя́йся Го́спода: Ева́нгелие от Матфе́я, зача́ло 38. И преподо́бнаго, Ева́нгелие от Матфе́я, зача́ло 10. Прича́стен: Ра́дуйтеся, пра́веднии, о Го́споде:

Святой великомученик Мина, египтянин, был воином и служил в городе Котуане под началом центуриона Фирмилиана во время царствования императоров Диоклитиана и Максимиана (284–305). Когда соправители начали жесточайшее в истории гонение на христиан, святой не пожелал служить гонителям и, оставив службу, удалился в горы, где подвизался в посте и молитве. Однажды во время языческого праздника святой пришел в город, в котором раньше служил. В разгар праздничных игрищ, смотреть которые сошелся весь город, раздался обличающий голос угодника Божия, проповедовавшего веру во Христа, Спасителя мира.

Перед судом правителя Пирра святой мужественно исповедал свою веру и сказал, что пришел сюда, чтобы обличить всех в злочестии. Святой Мина отверг предложение принести жертву языческим богам, принял жесточайшие муки, после которых был обезглавлен в 304 году. Тело святого мученика приказано было сжечь. Христиане ночью собрали в погасшем костре уцелевшие останки мученика, которые положили в храм его имени.

В Русской Церкви святой великомученик Мина стал особо почитаться после того, как в день его памяти, 11 ноября 1480 года, произошло бегство хана Ахмата от Угры, явившееся одним из окончательных этапов борьбы против монголо-татарского ига.

Преподобный Феодор Студит родился в 758 году в Константинополе в семье благочестивых христиан сборщика податей Фотина и Феоктисты. Святой Феодор получил широкое разностороннее образование через обучение у лучших риторов, философов и богословов византийской столицы.

В то время в империи распространилась ересь иконоборцев, которую поддерживал император Константин Копроним (741–775). Фотин, ревностный поборник Православия, оставил государственную службу. Вскоре, по обоюдному согласию, родители святого Феодора раздали свое имение бедным и приняли монашеский постриг. Преподобный Феодор, глубоко изучивший Священное Писание, успешно противостоял еретикам-иконоборцам в диспутах о Православной вере. Совершенное ораторское искусство, знакомство с философскими учениями и глубокое знание православной догматики неизменно приносили ему победу.

Седьмой Вселенский Собор, созванный императрицей Ириной, авторитетными церковными постановлениями навсегда обличил и отверг иконоборчество.

Среди отцов Собора был блаженный Платон (память 5 апреля), дядя преподобного Феодора, долгое время подвизавшийся на горе Олимп. Богоносный старец по окончании Собора призвал своих племянников, Феодора и его братьев Иосифа и Евфимия к пустынному иноческому подвигу в красивом труднодоступном местечке Сакудион. Братья с благодарностью приняли указание опытного в духовной жизни родственника. Со временем уединившиеся подвижники построили храм во имя святого апостола Иоанна Богослова, к ним стали стекаться жаждавшие монашеского подвига. Так постепенно возник монастырь, игуменом которого стал блаженный Платон.

Подвижническая жизнь инока Феодора протекала в самых трудных послушаниях, он строго хранил пост, ежедневно исповедовался у своего духовного отца, старца Платона, открывал ему все греховные дела и помыслы, тщательно исполнял его советы и наставления. Особенное внимание уделял преподобный Феодор Богомыслию, молитвенно предстоял Богу, как бы совершая через это общение тайное служение Ему. Юный подвижник неопустительно читал Священное Писание и святоотеческие творения, среди которых наиболее близки были ему творения святителя Василия Великого (память 1 января).

После нескольких лет монашеских трудов по настоянию духовного отца преподобный Феодор был рукоположен в сан пресвитера святым Тарасием, Патриархом Константинопольским (память 25 февраля). Когда блаженный Платон ушел на покой, братия единодушно избрала преподобного Феодора игуменом монастыря. Уступая желанию своего духовного наставника, преподобный Феодор принял это избрание, но возложил на себя еще более суровые подвиги. Уподобляясь своему опытному учителю, священноигумен Феодор вразумлял и наставлял братию примерами своей добродетельной жизни, а также сердечными отеческими поучениями.

Когда император Константин VI (780–797), преступив церковные каноны, вторично вступил в незаконный брак, преподобный Феодор, ревнуя о хранении церковных правил, разослал по монастырям послания, в которых объявлял императора отлученным от Церкви за разрушение Божественных установлений о христианском браке. В 796 году преподобного Феодора и одиннадцать его сподвижников после жестоких мучений отправили на заточение в город Солунь. Но и оттуда продолжал звучать обличающий голос преподобного. Святая Ирина, возвратившая себе престол, освободила преподобного Феодора и других иноков и в 798 году передала ему почти опустевший при Копрониме Студийский монастырь.

Скоро в обители святого подвижника собралось около 1000 иноков. Для управления монастырем преподобный Феодор составил общежительный устав монашеской жизни, получивший название Студийского, а блаженный настоятель – наименование Студита.

Правила Устава строго распределяли послушания насельников обители по церковным должностям, которые неукоснительно должны были исполняться всеми. За проступки устанавливались епитимии: для одних – определенное число поклонов, для других – усиленный пост и т.п. Меры исправления были установлены за пренебрежение к Божественной службе, нерадивое отношение к монастырскому имуществу, оскорбление брата, необузданность языка, громкий смех, разговоры за трапезой, ропот на пищу, несмиренную походку, невнимание к душеполезному чтению и другие проступки.

Всё в обители было общим: одежда, пища, книги и каждая вещь. Братья монастыря обучались различным ремеслам: строительному, плотническому, кузнечному, портняжному, каменотесному и многим другим. Монастырские послушания братии сопровождались непрестанной Иисусовой молитвой и псалмопением.

Студийский Устав, или Типикон, с некоторыми изменениями и дополнениями, внесенными Константинопольским Патриархом Алексием (1025–1043), был принесен преподобным Феодосием Печерским (память 3 мая) в Киев ок. 1065 г. в Печерский монастырь, откуда он распространился по всем русским обителям. Преподобному Феодору Студиту принадлежат многочисленные духовные творения: «Догматическая книга об иконах против иконоборцев»; Большой и Малый катихизисы; Похвальные слова на Господские и Богородичные праздники, Крестителю Господню Иоанну и святым апостолам; каноны и трипеснцы со стихирами, включенные в состав Триоди Постной; Умилительный канон Господу Иисусу и другие творения, за которые блаженный Феостирикт назвал преподобного Феодора пламенным учителем Церкви. В своих творениях преподобный Феодор Студит указывает как достигать главной цели монашества – спасения. Преподобный поучал братию: «Если хотите спастись, никакого нет к тому препятствия или преграды. Имеете пред очами неложные примеры спасшихся и спасающихся. Трудитесь, чада мои, отложив непокорливость и отбросив неверие. Шествуйте со страхом путем заповедей Господних... Умоляю вас любовию Господа нашего Иисуса Христа, давшего Себя за грехи наши, тверды будьте и неподвижны в верном исполнении святых животворных заповедей Господних... Ведайте, что это Бог требует от нас, чтобы мы жили благоугодно ему, нудя себя в нынешнем веке к подвижническому самоутеснению, в чаянии получить Жизнь Вечную...»

В 802 году хранитель государственной казны Никифор сверг благочестивую императрицу Ирину и захватил императорский престол. Новый император грубо нарушил церковные установления приобщением к Церкви ранее отлученного Патриархом Тарасием пресвитера Иосифа с возвращением ему права священнодействия. Преподобный Феодор вновь обличил императора и вместе с братом Иосифом, блаженным старцем Платоном и многими другими иноками был отправлен в заточение. Через два года исповедники были освобождены благочестивым императором Михаилом (811–813), сменившим убитых на войне с фракийцами Никифора и его сына Ставрикия. Смерть их задолго была предсказана преподобным Феодором.

Чтобы избежать междоусобной брани, император Михаил уступил престол своему военачальнику Льву Армянину. Новый император оказался иконоборцем. Святители и учители Церкви прилагали все усилия, чтобы вразумить нечестивого царя, но их слова не воспринимались императором-иконоборцем. Лев запретил почитание икон и отдал эти святыни на поругание. В ответ на такое беззаконие преподобный Феодор совместно с братией совершил крестный ход вокруг монастыря с высоко поднятыми иконами и пением тропаря Нерукотворному образу Спасителя.

Император гневно угрожал святому смертью, но угодник Божий продолжал открыто утверждать верующих в Православии. Тогда император отправил преподобного Феодора и его ученика, преподобного Николая (память 4 февраля), в ссылку, сначала в Иллирию, в крепость Метопу, а затем в Анатолию, в Бониту.

Истязаемые палачами, присланными в Бониту императором, почти лишенные пищи и питья, покрытые язвами и едва живые, святые подвижники всё переносили с молитвой и благодарением Господу.

В Смирне, куда исповедников перевели из Бониты, преподобный Феодор исцелил от лютой болезни местного воеводу – царского племянника и единомышленника, от которого потребовал покаяния в совершенных злодеяниях иконоборчества. Однако тот вновь впал в ересь и вскоре его постигла смерть.

Льва Армянина, убитого его же воинами, сменил, хотя и нечестивый, но веротерпимый император Михаил II Травлий (820–829). Новый император освободил из заточения всех православных отцов и исповедников, однако запретил иконопочитание в столице. Преподобный Феодор не пожелал возвратиться в Константинополь и решил поселиться в Вифании, в городе Херсонесе, близ церкви во имя святого мученика Трифона. Несмотря на тяжелый недуг, преподобный ежедневно совершал Литургию и поучал братию.

Шел 826 год. Предуведав свою кончину, преподобный призвал братию и завещал им ревностно хранить истинную Православную веру, почитать святые иконы и соблюдать монастырский устав. Затем он повелел братии взять свечи и совершить канон на исход души.

При пении слов «...во век не забуду оправданий Твоих, яко в них оживил мя еси»,– преподобный Феодор отошел ко Господу.

В тот же час преподобному Илариону Далматскому (память 6 июня) была открыта Господом блаженная кончина угодника Божия. Он увидел, как воссиял Свет Небесный, послышалось Ангельское пение и Голос: «Это душа преподобного Феодора, пострадавшего даже до крови за святые иконы, отходит ко Господу».

Преподобный Феодор как при жизни, так и по кончине совершил много чудес: призывающие его имя избавлялись от пожаров, от нападения диких зверей, получали исцеление недугов.

НА ВЕЛИЦЕЙ ВЕЧЕРНИ

Блаже́н муж: стихи́ры свята́го на 6, глас 4:

Юро́дивыми притворе́нии/ мудреца́ зло́бы обезу́мил еси́, блаже́нне,/ соверша́я сла́вная, де́йствуя зна́мения,/ де́моны отгоня́я,/ просвеща́я су́щия в нощи́ грехо́вней, о́тче,/ и ум несмуще́н посреде́ молв соблю́л еси́, Макси́ме,/ безстра́стие от Бо́га прии́м.

Све́та незаходи́маго зри́тель быв, о́тче,/ мирски́ми красота́ми не восхоте́л еси́ наслажда́тися/ и, плоть презре́в,/ прираде́л еси́ о души́,/ и тоя́ доброде́телей све́тлостию свещу́ украси́в,/ незаходи́мым сия́нием облиста́емь,/ Го́сподеви предстоя́, о нас моли́ся,/ свяще́нное твое́ преставле́ние пра́зднующих.

Сосу́д Свята́го Ду́ха освяще́н/ сотвори́л еси́ себе́, о́тче,/ сего́ ра́ди и к подвиго́м приле́жно впери́в ум, Макси́ме,/ и на дусе́х нечи́стых власть прии́м, Богоно́се,/ сих моли́твою уязвля́еши/ и от челове́к отго́ниши./ И ны́не Престо́лу всех Царя́ предстои́ши,/ о нас моля́ся, ве́рно тя сла́вящих.

Сла́ва, глас 8:

Челове́че Бо́жий, Макси́ме чу́дный,/ ты у́бо, возше́д на ле́ствицу доброде́телей,/ по не́йже вшел еси́ к Го́рнему Иерусали́му/ и та́мо узре́л еси́ жела́емаго Христа́:/ Его́же ра́ди плоть твою́ изнури́л еси́/ и те́ло ме́ртвенное на безсме́ртную жизнь измени́л еси́./ И о нас непреста́нно моли́ся/ дарова́ти душа́м на́шим мир и ве́лию ми́лость.

И ны́не: Царь Небе́сный: Вход. Проки́мен дне. Чте́ния три (зри Мине́ю ноября́ 6-й день)

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще Ду́ха Пресвята́го, прему́дре Макси́ме, был еси́./ Те́мже и нас до́мы Того́ соде́лай,/ святу́ю твою́ па́мять почита́ющих.

Стих: Возвесели́тся пра́ведник о Го́споде/ и упова́ет на Него́.

Житие́ твое́, я́ко со́лнце, в сердца́ ве́рных возсия́, чудеса́ испуща́я./ Те́мже и нас све́том невече́рним озари́,/ всечестну́ю твою́ па́мять почита́ющих.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Не преста́й моля́ся, Макси́ме, о при́сных твои́х рабе́х,/ я́же духо́вным твои́м житие́м просвети́л еси́,/ да вси честно́е твое́ пра́зднество, веселя́щеся, почита́ем.

Сла́ва, глас 6:

Рачи́тель быв, о́тче, Небе́снаго жити́я/ и равностоя́тель Безпло́тных сил,/ Макси́ме преблаже́нне,/ Росси́йское утвержде́ние, Моско́вский свети́льниче/ и вселе́нныя удобре́ние./ Прииди́ ны́не к нам, пра́зднующим пресве́тлую па́мять твою́,/ и приими́ ма́лое на́ше моле́ние,/ испроси́ нам у Христа́ мир и ве́лию ми́лость.

И ны́не: Богоро́дице, Ты еси́ Лоза́:

Тропа́рь, глас 5:

Нагото́ю теле́сною и терпе́нием/ обнажи́л еси́ вра́жия кова́рствия,/ облича́я неподо́бное его́ дея́ние,/ зе́льне стражда́ со́лнечный вар/ и ну́ждныя вели́кия сту́дени,/ мра́за и огня́ не чул еси́,/ Бо́жиею по́мощию покрыва́емь,/ Макси́ме прему́дре,/ о ве́рою творя́щих па́мять твою́ че́стно/ и усе́рдно притека́ющих к моще́м твои́м/ моли́ изба́витися от бед/ и паде́ния избежа́ти.

Сла́ва и ны́не, Богоро́дичен воскре́сен, по гла́су.

НА У́ТРЕНИ

На Бог Госпо́дь: тропа́рь то́йже.

По 1-й кафи́зме седа́лен, глас 5.

Подо́бен: Собезнача́льное:

Тве́рдаго адама́нта и столпа́ непоколеби́ма вра́жиими прило́ги,/ Богоно́снаго Макси́ма пе́сньми почти́м:/ терпе́нием бо вои́стинну посрами́вша сопроти́внаго врага́,/ и без ве́сти его́ сотвори́вша,/ и ныне́ моля́щася о спасе́нии душ на́ших.

Сла́ва, и ны́не, Богоро́дичен:

Ужа́сно чу́до зача́тия/ и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет мой ум и удивля́ет по́мысл,/ сла́ва Твоя́, Богоро́дице, во всех простре́ся ко спасе́нию душ на́ших.

По 2-й кафи́зме седа́лен, глас 4.

Подо́бен: Ско́ро предвари́:

Посто́м, и воздержа́нием, и на земли́ лега́нием увяди́л еси́ плотски́я стра́сти,/ ду́шу же просвети́л еси́ и на Небесе́х от Христа́ вели́ко возме́здие восприя́л еси́./ Тем благоугоди́л еси́ Бо́гу,/ досто́ин сосу́д чуде́с и по кончи́не яви́лся еси́ притека́ющим к моще́м твои́м,/ Макси́ме преблаже́нне,/ моли́ Христа́ Бо́га грехо́в оставле́ние дарова́ти/ чту́щим любови́ю святу́ю па́мять твою́.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во препросла́вленная,/ я́коже прорекла́ еси́.

По Хвали́те И́мя Госпо́дне:

Величание: Ублажа́ем тя,/ святы́й пра́ведный Макси́ме,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Псало́м избра́нный: Блаже́н муж, боя́йся Го́спода:

По полиеле́и седа́лен, глас 4:

Подо́бен: Ско́ро предвари́:

Яви́лся еси́ чу́ден в терпе́нии твое́м,/ вся́чески Христо́ви угоди́л еси́, преблаже́нне Макси́ме,/ му́дрою мы́слию утверди́л еси́ ду́шу твою́,/ порабо́тив плотска́я мудрова́ния ду́ху/ и избра́в до́брая, е́же Бо́га ра́ди тружда́тися, му́жески глаго́лал еси́:/ а́ще и я́ра зима́, но сла́док рай;/ боле́зненно е́же тружда́тися, но блаже́нно восприя́тие./ Те́мже, преблаже́нне, моли́ Христа́ Бо́га спасти́ ду́ши на́ша.

Сла́ва, и ны́не, Богоро́дичен:

Тебе́ велича́ем, Богоро́дице, вопию́ще:/ Ты еди́на благослове́нная,/ из Тебе́ бо неизрече́нно роди́ся Христо́с Бог наш.

Степе́нна 1-й антифо́н 4-го гла́са. Проки́мен: Возвесели́тся пра́ведник о Го́споде и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 8:

Челове́че Бо́жий, Макси́ме чу́дный,/ ты у́бо, возше́д на ле́ствицу доброде́телей,/ по не́йже возше́л еси́ к Го́рнему Иерусали́му/ и та́мо узре́л еси́ жела́емаго Христа́:/ Его́же ра́ди плоть твою́ изнури́л еси́/ и те́ло ме́ртвенно на безсме́ртную жизнь измени́л еси́./ И о нас непреста́нно моли́ся/ дарова́ти душа́м на́шим мир и ве́лию ми́лость.

Кано́н, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Прича́стием е́же к Бо́гу, преподо́бне,/ свет был еси́/ и, к Нему́ отлучи́вся, Макси́ме блаже́нне, жела́нием кра́йним,/ благи́м наде́ждам свои́м, о́тче, исполне́ние при́ял еси́.

Жела́нием е́же к Бо́гу распала́емь, мир оста́вил еси́,/ спу́тника, о́тче, обре́т, Христа́, Макси́ме сла́вне,/ с Ни́мже стезю́ проше́л еси́ спаси́тельную, ра́дуяся.

Обогати́тися ника́коже истоща́емыми возжеле́в,/ бога́тство и сла́ву вре́менную, му́дре,/ и пи́щу мимотеку́щую, и мирско́е достоя́ние доблему́дренно отри́нул еси́.

Богоро́дичен: Кра́сную, и избра́нную, и всечестну́ю разуме́в Тя,/ Сын Бо́жий, Пренепоро́чная, Сын Твой бысть,/ сы́ны сотвори́ благода́тию, Влады́чице, чту́щия Тя.

Други́й кано́н. Юро́дство оста́вль, к Небе́сным прехо́дит и со А́нгелы совокупля́ется Макси́м предо́блий. Глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́ души́ трича́стное потопи́, молю́ся:/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Пода́ждь ми, Христе́, Ду́ха Твоего́ благода́ть,/ да по достоя́нию воспою́ песнь но́ву от усте́н мои́х/ в па́мять Твоего́ уго́дника Макси́ма преблаже́ннаго.

И́же крест на ра́мо¹¹⁷ взем, блаже́нне,/ и жела́емаго ти оте́чества дости́г, Го́рняго Иерусали́ма,/ и в нем со А́нгелы лику́еши, юро́де прему́дрый,/ моли́ся о нас, чту́щих па́мять твою́ всечестну́ю.

Бу́йством премени́в мирско́е мудрова́ние, о́тче,/ непокрове́но те́ло име́я, блаже́нне,/ покры́й на́ша стра́сти, Богому́дре,/ да твои́ми моли́твами от бед избавля́емся.

Богоро́дичен: Успи́ души́ моея́ свире́пую во́лну,/ я́ко мно́жество прегреше́ний, искуше́ний и печа́ли, Влады́чице, воста́ша на мя,/ но Сама́ мя спаси́.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Усе́рдно к мы́сленным совлече́ся дея́нием,/ побежда́я вра́жия полки́ Боже́ственным посо́бием Ду́ха.

Ра́нами, и моли́твенным воздержа́нием, и бие́нии, преподо́бне,/ стра́сти мирски́я, о́тче Макси́ме, уязви́л еси́.

Умори́ша врага́ по́стницы Твои́, Иису́се,/ умерщвле́ние ра́достно, Влады́ко, Твое́ живоно́сное возжеле́вше.

Богоро́дичен: Избавля́ющаго челове́ки преслуша́ния, лю́таго паде́ния,/ всему́ Вино́внаго, Чи́стая и Всенепоро́чная, родила́ еси́.

Ин

Ирмо́с: Лук си́льных изнемо́же,/ и немощству́ющии препоя́сашася си́лою:/ сего́ ра́ди утверди́ся в Го́споде сердце́ мое́.

Умо́м весь к преми́рным взе́мся, блаже́нне,/ юро́д прозва́лся еси́, о́тче,/ и нас, умовре́дных, сохрани́,/ да неврежде́ни пребу́дем ко́зньми чужда́го,/ и тебе́ ублажа́ем, Макси́ме преблаже́нне.

Ва́ром со́лнечным опаля́емь, о́тче,/ и нас, пали́мых грехо́вными страстьми́, ороси́ твои́ми моли́твами,/ да непреста́нно воспева́ем па́мять твою́, Макси́ме прехва́льне.

Зимо́ю томи́мь, свя́те,/ небре́гл еси́ о те́ле пе́рстнем/ и ны́не наслажда́ешися ра́йския добро́ты;/ и нам проси́ оставле́ния, озло́бленным прило́ги чужда́го,/ да тебе́ ублажа́ем, о́тче Богому́дре.

Богоро́дичен: Я́же еди́на в напа́стех и ско́рбех защища́ющи,/ под кров Твой, Пречи́стая, прибе́гша те́пле,/ приими́, я́ко Преблага́я, е́же от се́рдца моего́ моле́ние.

Седа́лен, глас 8:

Све́том Боже́ственным озаря́емь,/ в путь, веду́щий к Боже́ственным сия́нием, ходи́л еси́ ве́рно, о́тче преподо́бне,/ и вра́жиих отбе́гл еси́ прило́г,/ и сын све́та и дне яви́лся еси́, Макси́ме Богоблаже́нне.

Сла́ва, глас то́йже.

Подо́бен: Повеле́нное:

О́тче Богому́дре и преблаже́нне Макси́ме,/ кра́сная ми́ра сего́ я́ко уме́ты вмени́в,/ весь, умо́м измени́вся, измени́вшемуся нас ра́ди Христу́ после́довал еси́,/ и юро́д Его́ ра́ди наре́клся еси́ и от неразу́мны́х ско́рби претерпе́л еси́./ И ны́не о нас моли́ся, па́мять твою́ ве́рно сла́вящих, прехва́льне.

И ны́не, Богоро́дичен:

Предста́тельнице ве́рных, Богороди́тельнице,/ скорбя́щих ра́досте и пла́чущих вели́кое утеше́ние,/ от чре́ва Твоего́, Де́во, всесвята́го преесте́ственно Ро́ждшагося непреста́нно моли́ с Макси́мом преблаже́нным/ изба́вити нас в час испыта́ния лю́таго осужде́ния.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Соедини́вся к стезе́ пра́вды,/ в Богоспасае́мый Боже́ственный град вше́л еси́, преподо́бне,/ спаси́тельным сия́нием обогати́вся.

Единообра́зный, преподо́бне, смысл Богоно́сный ви́дев,/ Боже́ственными повестьми́ и Боже́ственною оде́ждею оде́ялся еси́.

Се́рдце твое́ скрижа́ль очище́ну, Свята́го Ду́ха благода́ть, обре́тши, о́тче,/ написа́ соверше́нное безстра́стие и любо́вь нелицеме́рну.

Богоро́дичен: Седя́й на Престо́ле превознесе́нне Херуви́мстем,/ я́ко престо́л, Тя име́я,/ на руке́ Твое́й почи́, Мари́е Богоневе́сто, препросла́вленный Бог.

Ин

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Любве́ сро́дников отре́кся, блаже́нне,/ любо́вию Христо́вою уязвля́емь,/ и плоть, я́коже рабы́ню, ду́хови покори́в,/ над страстьми́ царь показа́лся еси́, о́тче,/ и нас, плене́нных грехо́вными страстьми́, свободи́, Богому́дре.

Стезе́ю приско́рбнаго пути́ ше́ствовав, блаже́нне,/ и простра́ннаго жили́ща доше́д,/ с Безпло́тными ликовствова́ти сподо́бился еси́, о́тче Богоно́се.

Власть прии́м на дусе́х нечи́стых, о́тче Макси́ме,/ сих от челове́к прогоня́еши,/ вся́кими неду́ги боля́щия исцелева́еши,/ с ве́рою приходя́щия к моще́м твои́м.

Богоро́дичен: Ми́лости Твое́й сподоби́ мя, благоми́лостивное Сло́во ро́ждши,/ и ны́не, Влады́чице, прибега́юща мя к Тебе́ спаси́.

Песнь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Пресве́тлую зарю́, Макси́ме, прии́м,/ я́ко со́лнце, яви́лся еси́/ и де́монскую тьму отгна́л еси́, достосла́вне.

Твои́м жела́нием, Христе́,/ отве́ргл все преподо́бный жела́ние теле́сное,/ я́коже сгре́бие¹¹⁸ мирско́е оттрясе́.

Си́лою Боже́ственною ду́шу укрепи́в,/ в мир всели́лся еси́,/ опустева́я стра́сти, о́тче Богому́дре Макси́ме.

Богоро́дичен: Раче́ние преста́ тле́нное,/ Де́ва бо нетле́нно роди́ Бо́га Сло́ва,/ па́че естества́ и сло́ва Де́ва пребыва́ет.

Ин

Ирмо́с: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра.

Юро́д яви́лся еси́ изволе́нием, о́тче,/ и о́ному ди́вному Андре́ю после́довал еси́./ И я́коже той ви́де духо́вныма очи́ма/ Богоро́дицу на возду́се, за мир моля́щуюся,/ ты же ны́не зри́ши Святу́ю Тро́ицу,/ моля́ся непреста́нно о душа́х на́ших.

Ревни́тель быв ди́вному Симео́ну,/ пусты́ню и све́рстника оста́вльшему, и юро́дство на ся возложи́вшему,/ и Го́рния митропо́лии досги́гшу,/ с ни́мже ны́не и ты наслажда́ешися,/ и нас помина́й, пра́зднующих па́мять твою́ всечестну́ю.

Вторы́й Твердисло́в в Росси́и показа́лся еси́, о́тче Макси́ме,/ непокрове́но те́ло име́я,/ покры́й нас покро́вом моли́тв твои́х,/ да не уязви́т нас уязви́вый пра́отца преступле́нием.

Богоро́дичен: От ко́рене исто́чник и вину́ нетле́ния,/ Тя, Де́во, вси ве́рнии хвала́ми почита́ем:/ Ты бо Ипоста́сное нам Безсме́ртие родила́ еси́.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Ум твой весь к Бо́гу простира́я непреста́нными поуче́нии,/ плотску́ю любо́вь не пощаде́л еси́,/ благи́х тебе́ хода́тайству, Макси́ме, присвое́ние.

Ни скве́рны, ни вра́ски¹¹⁹ прия́л еси́, блаже́нне,/ посреде́ тебе́ ми́ра живу́щу,/ честны́ми же па́че мольба́ми твои́ми очища́еши от душе́вныя скве́рны притека́ющия.

Ты, плотски́х мудрова́ний вы́шше име́я по́мысл,/ не уязви́лся еси́, посреде́ жен обнажа́емь:/ безстра́стия бо оде́ждею, Макси́ме, оде́ялся еси́.

Богоро́дичен: Усты́, и по́мыслом, и се́рдцем, Пресвята́я Богоро́дице, Тя пропове́дуем:/ Тобо́ю Бо́гу примири́хомся,/ отринове́ннии преступле́нием пе́рвее пра́отца.

Ин

Ирмо́с: Очище́ние нам, Христе́,/ и спасе́ние, Влады́ко,/ возсия́л еси́ от Де́вы,/ да я́ко проро́ка от зве́ря морска́го пе́рсей Ио́ну,/ от тли исхи́тиши/ всего́ Ада́ма всеро́дна па́дшаго.

На безстра́стия го́ру возше́д доброде́тельми,/ на враги храбо́рник¹²⁰ чу́ден показа́лся еси́:/ и ны́не моли́ся Христу́ Бо́гу об оте́честве на́шем,/ я́ко да твои́ми моли́твами проти́внии побежда́ются.

Чуде́с исто́чник твои́ мо́щи яви́шася, Макси́ме блаже́нне,/ от ни́хже оби́льно вси притека́ющии прие́млют телесе́м здра́вие/ и душа́м спасе́ние твои́ми моли́твами.

Прему́дростию ра́зума объя́т, о́тче,/ су́етную му́дрость бу́йством премину́л еси́/ и утае́ная от му́дрых и разу́мных Тро́йческим благоволе́нием позна́л еси́.

Богоро́дичен: Моисе́й в купине́ Тя ви́де,/ в горе́ прие́млющу нестерпи́мый Божества́ огнь неопа́льно,/ тем Тя вси пе́сньми велича́ем.

Конда́к, глас 2:

Вы́шния красоты́ жела́я,/ ни́жния сла́дости и теле́сная одея́ния в ничто́же вмени́л еси́/ и нестяжа́ние па́че су́етнаго ми́ра возлюби́л еси́./ А́нгельское житие́ проходя́,/ сконча́лся еси́, блаже́нне Макси́ме:/ с ни́миже Христа́ моли́ непреста́нно о всех нас.

И́кос:

А́нгел на земли́ житие́м показа́вся,/ А́нгельския полки́ удиви́л еси́, и де́моны устраши́л еси́,/ и челове́ки просвети́л еси́ чуде́с твои́х заря́ми,/ Богоно́се и преблаже́нне о́тче наш Макси́ме./ И ны́не нас вразуми́ воспева́ти песнь к твоему́ хвале́нию,/ ра́достным гла́сом си́це глаго́лющих:/ ра́дуйся, оста́вивый тле́нное мудрова́ние и прие́мый нетле́нный вене́ц;/ ра́дуйся, терпели́вый душе́ю;/ ра́дуйся, целому́дренный ра́зумом и к Бо́гу воззре́нием;/ ра́дуйся, предо́блий юро́де, и́же злоко́зненнаго врага́ под нога́ми сотры́й;/ ра́дуйся, я́ко ни́жнее мудрова́ние оста́вль и вы́шняго Ца́рствия дости́гий;/ ра́дуйся, цели́телю боле́зней и отгони́телю страсте́й;/ ра́дуйся, Макси́ме блаже́нне, моля́ непреста́нно о всех нас.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Содержи́мь Христо́вою подо́бно, о́тче, Боже́ственною любо́вию,/ други́х спасти́ ра́достно весь са́м ся, вопия́, изда́л:/ благослове́н Бог оте́ц на́ших.

С Небесе́ тебе́ пода́нуто, о́тче, прии́м пи́щу,/ се́ю препита́л еси́ благопоко́рно прие́млющия твоя́ повеле́ния/ и до́лу влеку́щий грех оставля́ющия, блаже́нне.

После́довав оте́ческим преда́нием, о́тче му́дре,/ па́губы отринове́ние запове́да, зову́ще:/ благослове́н Бог оте́ц на́ших.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х, Всенепоро́чная Влады́чице.

Ин

Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше:/ препе́тый Го́споди,/ Бо́же оте́ц на́ших, благослове́н еси́.

Прича́стием Свята́го Ду́ха просвеще́н, блаже́нне,/ измени́вся добро́ты теле́сныя и позо́р быв челове́ком,/ непокрове́но те́ло тле́нными оде́ждами име́я, Христу́ вопия́л еси́:/ благослове́н Бог оте́ц на́ших.

Нищету́ и юро́дство изво́лив, преподо́бне, нас ра́ди Обнища́вшаго/ и Сего́ ле́гкий яре́м на ра́мена взем,/ Тому́ после́довал еси́, Христу́, вопия́:/ благосло́вен Бог оте́ц на́ших.

Злому́драго врага́ ко́зни премудри́в, юро́де прехва́льне,/ и сего́, я́ко ры́бу безгла́сну, сотвори́л еси́, Богому́дре, Христу́ вопия́:/ благослове́н Бог оте́ц на́ших.

Богоро́дичен: Я́коже ло́жницу Бо́жию и кади́льницу разу́мнаго и светоно́снаго У́гля,/ Приснора́дованную воспое́м, зову́ще:/ ра́дуйся, вина́ спаси́тельнаго воззва́ния, Благослове́нная во ве́ки.

Песнь 8

Ирмо́с: Ру́це распросте́р, Дании́л/ льво́в зия́ния¹²¹ в ро́ве затче́¹²²;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те вся дела́ Го́сподня Го́спода.

Всесве́тлая звезда́ сущ/ во тьме́ и стра́сти, световодя́ к жи́зни све́тлей:/ твори́ши бо жены́ нечи́стыя целому́дренно жи́ти/ и отго́ниши лю́тыя неду́ги, вопия́:/ благослови́те вся дела́ Госпо́дня Го́спода.

Ты исцели́ ум мой в кро́ве чу́дных и му́дрых, преподо́бне, повеле́ний Бо́жиих,/ мно́ги улови́л еси́ юро́дствовати Го́спода ра́ди,/ ве́дый наруга́емь бы́ти, вопия́ чисте́йшею душе́ю:/ благослови́те вся дела́ Госпо́дня Го́спода.

Соверше́н еди́н,/ И́же весть своя́ прославля́ти, Госпо́дь, преподо́бныя:/ сии́ бо гро́бу посыла́емь и А́нгелов светлословле́нии почита́емь, вопию́щих:/ благослови́те вся дела́ Госпо́дня Го́спода.

Богоро́дичен: Избавля́яй нас, возсия́ из Тебе́ Госпо́дь, Де́во Чи́стая,/ Его́же моли́, Влады́чице, просвети́ти пою́щия Тя и обстоя́ния нас изба́вити, вопию́щия:/ благослови́те вся дела́ Госпо́дня Го́спода.

Ин

Ирмо́с: Избави́телю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́ благослови́те, по́йте Господа́.

Присво́ився Соде́телю всех, о́тче,/ и грехо́вныя я́зи удали́вся,/ прия́л еси́ Небе́сное насле́дие/ и, со А́нгелы лику́я, вопия́л еси́:/ благослови́те вся дела́ Госпо́дня Го́спода.

Ю́ношеских и плотски́х страсте́й удержа́л еси́ взыгра́ния,/ очи́стив вся́кия скве́рны ду́шу же и те́ло, Макси́ме преблаже́нне,/ храм показа́лся еси́ нескве́рнен Бо́гу,/ Ему́же непреста́нно вопие́ши:/ благослови́те вся дела́ Госпо́дня Го́спода.

Незаходи́мый возсия́ тебе́ свет, о́тче Богому́дре, присносу́щнаго весе́лия,/ в не́мже ны́не наслажда́ешися, предстоя́ Святе́й Тро́ице/ и воспева́я Христа́ во вся ве́ки.

Богоро́дичен: Тя ору́жие непобеди́мое на враги́ предлага́ем,/ Тя основа́ние и наде́жду на́шего спасе́ния, Богоневе́сто, и́мамы/ и Тя воспева́ем во ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Всем се́рдцем, Макси́ме, Тро́ице усе́рдно предложи́вся/ и от Нея́ лучи́ Богоде́льно прие́мь,/ светови́ден был еси́ и со А́нгелы лику́еши.

Жела́нием Боже́ственным приедини́вся/ и воздержа́нием просвеща́емь,/ бу́дущих благ в прича́стии уже́ быв, Макси́ме Богоблаже́нне, и в наслажде́нии.

Твоя́ боле́зни и по́ты прия́т весе́лие,/ ника́коже конца́ иму́ще,/ в не́мже пита́яся, Макси́ме преподо́бне, нас непреста́нно помина́й.

Богоро́дичен: Разори́ души́ моея́ о́блаки, Све́та о́блаче, свята́я Влады́чице,/ и си́льна соде́лай мя́ на стра́сти, борю́щия мя,/ Спа́са всех ро́ждшая и Изба́вителя.

Ин. Ирмо́с то́йже.

Я́коже тве́рдый адама́нт душе́ю показа́лся еси́,/ непоколеби́мь вра́жиими прило́ги, о́тче,/ и нам тве́рдое забра́ло бу́ди, блаже́нне,/ моли́твами твои́ми от нахожде́ний проти́вных.

Освяти́ся во́здух, Макси́ме блаже́нне, па́мятию твое́ю,/ и нас торжествова́ти подвиза́ет ра́достно/ освяще́нное твое́ пра́зднество.

Жезло́м доброде́телей страсте́й мо́ре пресе́к/ и го́рдаго врага́, я́коже ина́го фарао́на, моли́твами твои́ми погрузи́в,/ избра́нное ста́до но́ваго Изра́иля невре́дно соблю́л еси́,/ Макси́ме блаже́нне, моли́твами твои́ми.

Богоро́дичен: Ски́ния свиде́тельства Тя прообрази́,/ Хлеб И́стинный жи́зни прие́мшую, Чи́стая,/ Сло́во Отца́ Соприсносу́щное.

Свети́лен:

Подо́бен: Не́бо звезда́ми:

А́нгельскаго жития́ жела́я, преподо́бне,/ покори́л еси́ стра́сти плотски́я му́жески/ и равноа́нгелен был еси́, Богоно́се о́тче Макси́ме.

Богоро́дичен: Тя Предста́тельницу и́мамы вси гре́шнии, о Пресвята́я Де́во!/ Ты благопреме́нна сотвори́ Твоего́ Сы́на ма́терними Твои́ми моли́твами.

На хвали́тех стихи́ры на 4, глас 4.

Подо́бен: Дал еси́ зна́мение:

Дал еси́ при́тчу терпе́ния и му́жества, Преблаги́й Го́споди,/ пра́веднаго Макси́ма, и многочуде́снаго/ доброде́тельми, и словесы́, и де́лы сия́юща,/ целому́дрием украша́ема и кро́тостию./ Тем Твое́ неизрече́нное строе́ние сла́вим,/ Иису́се Всеси́льне, и Спа́се душ на́ших.

Пра́веден и незло́бив,/ и́стинен же, и непоро́чен, и ве́рен,/ уклоня́яся от вся́кия зло́бныя ве́щи,/ показа́лся еси́, Макси́ме блаже́нне,/ просвеще́н доброде́тельми и благоче́стием сия́я./ Тем тя ублажа́ем/ и свято́е твое́ и честно́е днесь пра́зднуем успе́ние,/ ра́дующеся, Богому́дре.

Целому́дрием и благове́рием,/ я́ко багряни́цею многоце́нной, одея́вся, Макси́ме,/ пра́вдою же и кро́тостию, я́ко Боже́ственным венце́м, увя́злся еси́,/ со стра́ждущими Христа́ ра́ди ца́рствовати возжеле́л еси́./ И ны́не Царю́ сил предстои́ши,/ Иису́су Всеми́лостивому и Спа́су душ на́ших.

Сла́ва, глас 8:

Доброде́телей твои́х, Богому́дре Макси́ме, исправле́ния/ уясни́ша ве́рных сердца́:/ кто бо слы́ша безме́рное твое́ смире́ние и терпе́ние, не удиви́тся?/ Е́же ко всем кро́тость и беззло́бие,/ к скорбя́щим ми́лование/ и су́щим в бе́дах ско́рое поможе́ние,/ пла́вающим немяте́жное приста́нище/ и путеше́ствующим благо́е поспеше́ние/ вся Боголе́пно предвари́, досточу́дне,/ и ны́не неувяда́емым венце́м венча́лся еси́/ от руки́ Вседержи́теля Бо́га:/ Его́же моли́ спасти́ся душа́м на́шим.

И ны́не, Богоро́дичен:

Влады́чице, приими́ моли́тву раб Тво́их/ и изба́ви нас/ от вся́кия ну́жды и печа́ли.

НА ЛИТУРГИИ

Блаже́нны, песнь 3-я и 6-я. Проки́мен, глас 7: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же возда́де ми? Апо́стол к Гала́том, зача́ло 213. Ева́нгелие от Матфе́я, зача́ло 10. Прича́стен: В па́мять ве́чную:

Блаженный Максим, Христа ради юродивый, Московский чудотворец, подвизался в Москве в начале XV века. Он избрал один из самых трудных и тернистых путей ко спасению – добровольное юродство ради Христа. Полуобнаженным он ходил по площадям и улицам Москвы зимой и летом, поучая всех терпению и перенесению житейских невзгод.

Тяжелым было то время для Русского государства: татаро-монгольское иго, сопровождавшееся непрестанными набегами, засухи, голод и мор угнетали русский народ. Блаженный Максим своим примером помогал людям переносить невзгоды. Он говорил: «Хоть люта зима, но сладок рай».

Православный народ любил юродивых, ценил их глубокое смирение, внимал их мудрости, доходчиво излагавшейся образным народным языком пословиц. Поэтому юродивых слушали все – от великих князей до последних бедняков. Блаженный Максим говорил своим соотечественникам: «Не всё по шерсти, ино и напротив. За дело побиют, повинись, да пониже поклонись. Не плачь, битый, плачь, не битый. За терпение даст Бог спасение». Грозно обличал святой притеснителей народа, купцам и московской знати блаженный говорил: «Божница домашна, а совесть продажна. Всяк крестится, да не всяк молится. Бог всякую неправду сыщет. Ни Он тебя, ни ты Его не обманешь». Обличения юродивого не оставались бесплодными, многие из москвичей обращали свои сердца к Богу.

Блаженная кончина угодника Божия последовала 11 ноября 1434 года, и он был погребен у церкви святых князей Бориса и Глеба. У святых мощей блаженного Максима стали совершаться чудесные исцеления болящих. В 1547 году в окружной грамоте Московского митрополита Макария предписывалось: «Пети и праздновати на Москве новому чудотворцу Максиму, Христа ради юродивому». Память преставления блаженного Максима постановлено праздновать 11 ноября, обретение честных мощей – 13 августа. Храм в честь благоверных князей Бориса и Глеба, рядом с которым был погребен святой Максим, сгорел в 1568 году. На его месте позже была построена новая церковь, освященная во имя блаженного Максима, Христа ради юродивого.

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Доброде́телию Боже́ственною осиява́ем,/ преблаже́нне Марти́рие,/ на Небе́сныя кру́ги сла́вно вступи́л еси́/ разве́рзшимся ти зерца́лом та́ин,/ те́мже в благода́ти Боже́ственней яви́лся еси́,/ прие́мля неизрече́нная сия́ния.

Умо́м отве́рстым прие́м благода́ть,/ весь, преподо́бне о́тче, освяти́лся еси́/ и, от земны́х преста́вився,/ в Ца́рство Христо́вы сла́вы всели́лся еси́,/ Марти́рие всеблаже́нне;/ в по́стницех же быв, свети́льник пресве́тлый яви́лся еси́/ и пи́щи при́сно пребыва́ющия ны́не насыща́ешися,/ Боже́ственною сла́вою облистава́ем.

Тро́ица Безнача́льная и Единосу́щная/ яви́ тя Себе́ селе́ние, Богоно́се Марти́рие,/ и показа́ тя пресве́тла свети́льника:/ от жите́йских бо мяте́жей уклони́лся еси́ се́рдцем и житие́м,/ те́мже с Небе́сными А́нгелы водворя́ешися во Ца́рствии Небе́снем/ и ны́не Христа́ Бо́га моли́/ о и́же ве́рою восхваля́ющих всечестну́ю па́мять твою́.

Сла́ва, глас 6:

Прииди́те, мона́шествующих мно́жество, днесь,/ Марти́рия, благоче́стия подража́теля, пе́сньми и пе́ньми восхва́лим/ и, честну́ю и многоцеле́бную ико́ну, обстоя́ще,/ любе́зно облобыза́ем, глаго́люще:/ ра́дуйся, пресла́вне Марти́рие,/ оте́честву твоему́ пресве́тлый свети́льниче;/ ра́дуйся, чи́сте чисте́йшему Све́ту совокупля́яйся;/ ра́дуйся, я́ко со А́нгелы предстои́ши Пресвяте́й Тро́ице,/ ю́же непреста́нно моли́/ дарова́ти душа́м на́шим ве́лию ми́лость.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся:/ моли́ся, Влады́чице, с преподо́бным Марти́рием/ поми́ловати ду́ши на́ша.

На стихо́вне стихи́ры, глас 2:

Подо́бен: До́ме Евфра́фов:

Дом и жили́ще Ду́ху Пресвято́му, прему́дре Марти́рие, был еси́:/ те́мже и нас дом Тому́ соде́лай,/ святу́ю твою́ па́мять почита́ющих.

Стих: Честна́ пред Го́сподем/ смерть преподо́бных Его́.

До́м Ду́ха Свята́го,/ и гра́ду, и стране́ на́шей утвержде́ние,/ преподо́бным похвало́,/ соверше́нный ве́рою Марти́рие преподо́бне,/ спаса́й нас моли́твами твои́ми ко Го́споду.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дом неоску́дныя благода́ти и град кре́пкий,/ на враги́ побе́да,/ возвы́си рог правосла́вных моли́твами твои́ми ко Го́споду.

Сла́ва, глас 2:

Я́ко фи́никс, Дави́дски процве́л еси́, преподо́бне о́тче,/ и, кре́стное ору́жие восприи́м, Марти́рие,/ бе́здны страсте́й изсуши́л еси́ воздержа́нием,/ чистото́ю же возвы́сився,/ сосу́д яви́лся еси́ Пресвято́му Ду́ху./ Христа́ непреста́нно моли́ о нас,/ и́же ве́рою и любо́вию пра́зднующих всечестну́ю па́мять твою́.

И ны́не, Богоро́дичен: Все упова́ние мое́:

Тропа́рь, глас 2 (зри день сей ни́же).

Сла́ва, и ны́не, Богороди́чен: Вся па́че смы́сла:

НА ВЕЛИЦЕЙ ВЕЧЕРНИ

На Го́споди, воззва́х: стихи́ры на 8, самогла́сны, глас 8:

Преподо́бен и че́стен,/ свети́льник Боже́ственный и светоно́сный/ под спу́дом никогда́же скрыва́ется,/ но на версе́ полага́ет его́ высо́ких чуде́с Челове́колюбец./ Того́ моли́твами, Христе́,/ да́руй лю́дем Твои́м ве́лию ми́лость.

На ра́ло возложи́л еси́, всече́стне,/ де́лание рук твои́х,/ де́лая всегда́ Боже́ственная,/ и не возврати́лся еси́ зря вспять,/ но был еси́ упра́влен во Ца́рствие Христа́, вопло́щшагося Бо́га,/ во спасе́ние душ на́ших.

В лодии́ теле́сней вози́м,/ кро́ткими дыха́нии кро́ткаго ду́ха/ легко́ преше́л еси́ жите́йскую пучи́ну, му́дре,/ и, на би́сере многоце́ннем твои́ име́ния прода́в/ и обре́т его́, в себе́ удержа́л еси́,/ блаже́н быв Боже́ственными добро́тами его́.

Сла́ва, глас то́йже:

Преподо́бне и Богоно́сне о́тче Марти́рие преблаже́нне,/ Боже́ственным жела́нием распаля́ем,/ вся земна́я и жите́йская мудрова́ния ни во что́ же вмени́в,/ Христа́ Еди́наго возлюби́л еси́,/ и, в приста́нище пусты́нное доше́д,/ благоду́шно Бо́гу рабо́тал еси́,/ и, це́рковь прекра́сну Святы́я Тро́ицы воздви́г,/ оби́тель че́стну соста́вил еси́,/ и в ней трудолю́бно подвиза́лся еси́, Марти́рие о́тче,/ исцеле́ние неоску́дно подава́я притека́ющим с ве́рою/ и душетле́нныя стра́сти исцеля́я,/ мно́жество же бесо́в отрева́я,/ тем и ста́до ученико́в твои́х чудесы́ удивля́еши,/ ра́достно от души́ вопию́щих:/ Богоблаже́нне и преподо́бне о́тче наш Марти́рие,/ моли́ Христа́ Бо́га/ умири́ти мир и спасти́ ду́ши на́ша.

И ны́не, Богоро́дичен: Царь Небе́сный:

Вход. Проки́мен дне и чте́ния 3, преподо́бническая (зри Мине́ю ноября́ 6-й день)

На литии́ стихи́ры хра́ма и свята́го, глас 3:

Наста́, Богоно́се, со́лнца светле́йший твой пра́здник,/ озаря́я приходя́щия к тебе́ ве́рою./ Безсме́ртием бо облагоуха́еши ду́ши на́ша,/ источа́я исцеле́ние от святы́я благо́дати твоея́,/ Марти́рие преподо́бне,/ моли́твенниче о душа́х на́ших.

Чу́вственныя стра́сти победи́в воздержа́ния брозда́ми,/ преподо́бне Марти́рие,/ ре́вность на земли́ к Небе́сным показа́л еси́,/ вся́кое плотско́е жела́ние ду́хови повину́вши./ Тем ны́не в Небе́сных селе́ниих водворя́ешися,/ моля́ о душа́х на́ших.

Све́тлая твоя́ па́мять, преподо́бне Марти́рие,/ на́ша сердца́ просвеща́ет/ заре́ю нетле́нныя и блаже́нныя жи́зни./ Зря́ще бо честну́ю твою́ ико́ну,/ я́ко от нея́ врачевство́ от вся́ких неду́гов/ боля́щим неоску́дно подава́емо быва́ет,/ хва́лим просла́вившаго тя Го́спода,/ Его́же моли́ спасти́ ду́ши на́ша.

Глас 8:

Преподо́бне о́тче всече́стне Марти́рие,/ доброде́тельми возше́д душе́ю на Не́бо, я́ко на колесни́це,/ побе́дныя по́чести прие́млеши,/ те́ло же твое́ трудолю́бное,/ я́ко ма́сти, во гро́бе оста́вил еси́, о́тче,/ источа́еши бо исцеле́ния и прогоня́еши ду́хи лука́выя./ Те́мже тя ублажа́ем, всече́стне.

Сла́ва, глас 6:

Ра́дуйся и весели́ся,/ Росси́йская всеосвяще́нная Це́рковь,/ со архиере́и и свяще́нники благочести́выми,/ мона́хи же и просты́ми,/ блаже́ннаго Марти́рия па́мять днесь почита́юще,/ духо́вне соше́дшеся, пра́зднуем/ и, честну́ю его́ ико́ну обстоя́ще/ и любе́зно покланя́ющеся,/ мо́лимся, глаго́люще:/ ра́дуйся, преблаже́нне Марти́рие,/ свети́льниче пресве́тлый, врачу́ боля́щим,/ моли́твенниче ко Спа́су Христу́ Бо́гу на́шему/ о и́же ве́рою и любо́вию притека́ющих к тебе́,/ моли́ во е́же спасти́ся душа́м на́шим.

И ны́не, Богоро́дичен: Творе́ц и Изба́витель:

На стихо́вне стихи́ры, глас 6.

С ве́рою и любо́вию, празднолю́бцы, соше́дшеся,/ псалмы́ и пе́сньми восхва́лим днесь/ Небе́снаго челове́ка и земна́го А́нгела./ О всеблаже́нне и преподо́бне,/ по́стников похвало́,/ о нас моли́ся ко Го́споду, Марти́рие о́тче наш,/ поми́ловатися душа́м на́шим.

Стих: Честна́ пред Го́сподем/ смерть преподо́бных Его́.

Честны́й и светоно́сный, преподо́бне, твой пра́здник/ испо́лни ра́дости и весе́лия духо́внаго,/ те́мже, соше́дшеся, мона́хов мно́жество/ и христоимени́тии лю́дие,/ любо́вию восхваля́юще,/ блажи́м пресла́вная благодея́ния Твоя́:/ я́ко бо крин во юдо́ле, процве́л еси́,/ благоуха́еши ду́ши на́ша и чу́вства./ Марти́рие о́тче наш,/ моли́ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко уязви́выйся жела́нием Боже́ственным,/ преподо́бне о́тче Марти́рие,/ взем крест свой, после́довал еси́ Христу́,/ вся же плотска́я мудрова́ния умертви́л еси́/ и насле́довал еси́ вои́стинну кро́тких зе́млю,/ прича́стием обожа́ем,/ и неизрече́ннаго о́наго весе́лия наслажда́яся,/ помина́й нас, творя́щих всечестну́ю па́мять твою́.

Сла́ва, глас 8:

Мона́хов мно́жества,/ наста́вника тя почита́ем, о́тче наш Марти́рие,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

На благослове́ние хлебо́в тропа́рь свята́го два́жды и Богоро́дице Де́во: еди́ножды.

Тропа́рь, глас 2:

От ю́ности, Богоблаже́нне, Христа́ возлюби́в,/ оте́чество оста́вил еси́/ и, всех мирски́х мяте́жей уклони́вся,/ в ти́хое приста́нище пречестны́я оби́тели Богома́терни дости́гл еси́;/ отню́дуже уве́дев непрохо́дную пусты́ню,/ крестови́дною заре́ю пока́занную,/ жела́тельне ю́ обре́л еси́,/ и, в ней всели́вся,/ и́ночествующих собра́л еси́,/ и сих уче́ньми свои́ми, я́ко ле́ствицею восхо́дною на Не́бо,/ трудолю́бно тща́лся еси́ возводи́ти к Бо́гу,/ Ему́же моли́ся, Богому́дре Марти́рие,/ дарова́ти душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь два́жды. Сла́ва и ны́не, Богоро́дичен: Вся па́че смы́сла:

По 1-й кафи́зме седа́лен, глас 4:

Зва́нию Го́спода твоего́ после́довал еси́,/ мир оста́вив и вся кра́сная, преблаже́нне Марти́рие,/ претерпе́л еси́ теле́сное озлобле́ние усе́рдно,/ полки́ же отрази́л еси́ де́монов му́жественне./ Те́мже твою́ па́мять при́сно пе́сньми восхвали́ем ве́рно.

Сла́ва, и ны́не, Богоро́дичен:

Обнови́ла еси́, Чи́стая,/ Боже́ственным Рождество́м Твои́м/ истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния:/ те́мже Тя по до́лгу блажи́м вси, Де́во Препросла́вленна,/ я́коже прорекла́ еси́.

По 2-й кафи́зме, седа́лен, глас 5:

По́стника Госпо́дня пе́сньми почти́м,/ я́ко умертви́вша вся прило́ги страсте́й воздержа́нием/ и тве́рдым терпе́нием вои́стинну,/ и посрами́вша зело́ противобо́рца врага́ и всю его́ горды́ню,/ и ны́не моля́щася Го́сподеви/ поми́ловатися душа́м на́шим.

Сла́ва, и ны́не, Богоро́дичен:

Ужа́сно чу́до зача́тия и несказа́нен о́браз рождества́/ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние;/ сла́ва Твоя́, Богоро́дице, во всех простре́ся/ ко спасе́нию душ на́ших.

По полиеле́и седа́лен, глас 1:

Погре́бл еси́ страсте́й вся воста́ния/ умерщвле́нием пло́ти, свяще́нный о́тче,/ жизнь безконе́чную по сме́рти прия́л еси́;/ те́мже днесь Христо́ва Це́рковь/ пра́зднует твою́ па́мять досточу́дную, преподо́бных украше́ние.

Сла́ва, и ны́не, Богоро́дичен:

Наста́ви ны на путь покая́ния,/ уклоня́ющияся при́сно к злым безпу́тием/ и Преблага́го прогневля́ющия Го́спода,/ Неискусобра́чная Благослове́нная Мари́е,/ прибе́жище отча́янных челове́ков,/ Бо́жие обита́лище.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех,/ я́же воздаде́ ми. Вся́кое дыха́ние да хва́лит Го́спода. Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х,/ де́монския разори́л еси́ по́лчища/ и А́нгельския дости́гл еси́ чи́ны,/ и́хже житию́ непоро́чно поревнова́л еси́;/ дерзнове́ние име́яй ко Христу́ Бо́гу,/ мир испроси́ душа́м на́шим.

Кано́н преподо́бнаго на 8, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Благи́ми нра́вы укра́сився,/ Христу́ прилепи́лся еси́ от ю́ности,/ плотски́я стра́сти умертви́в воздержа́нием,/ и к Животу́, преподо́бне, преста́вился еси́.

Глаго́лов и зако́нов Бо́жиих исполни́тель быв,/ испо́лнился еси́, о́тче прему́дре, Боже́ственных даро́в/ и чуде́с всем лучи́ бога́тно испусти́л еси́.

Кре́постию Христа́ возмо́г,/ держа́ву же и си́лу вра́жию низложи́л еси́/ и похвалу́ побе́дныя по́чести, преподо́бне, чуде́сными сия́нии улучи́л еси́.

Со́весть име́л еси́ бла́гу,/ о́ко серде́чное, взира́ющее к Бо́гу,/ те́мже внят моли́тве твое́й, прему́дре,/ и с преподо́бными сочета́ тя, Богоблаже́нне.

Богоро́дичен: Стра́сти пло́ти моея́/ и ума́ моего́ двиза́ния неподо́бная утоли́,/ молю́ Тя, Пречи́стая Де́во,/ и испра́ви мя, заблу́ждшаго умо́м.

Катава́сия: Отве́рзу уста́ моя́:

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Весь прилежа́ Вседержи́телю, преподо́бне о́тче прему́дре,/ всея́ бесо́вския зло́бы избе́гл еси́/ досточу́дным водворе́нием в непроходи́мая.

Высото́ю смире́ния украша́ем,/ свергл еси́ на зе́млю велехва́льнаго гордели́вца пло́ти своея́/ Боже́ственными веле́ньми и до́брыми де́лы твои́ми.

Пло́тию обложе́н, о́тче прему́дре,/ смири́л еси́ надме́нную вы́ю нечести́ваго/ благи́ми к Бо́гу воздыха́ньми, непоро́чне.

Име́я поспешеству́ющую тебе́ Бо́жию си́лу, прему́дре,/ я́ко чу́ден во пло́ти сый быв,/ чудеса́ источи́л еси́ воскресе́нием ме́ртваго/ и ны́не отго́ниши неду́ги.

Богоро́дичен: В ложесна́ Твоя́ воплоща́ем, Всенепоро́чная, всели́ся Зижди́тель/ на благодея́ние ве́рно пою́щим Тя.

Седа́лен, глас 4:

Стра́стное порабо́тил еси́ пло́ти своея́ мудрова́ние/ и ни́зшее свое́ покори́л еси́ вы́сшему, о́тче пресла́вне,/ сокруши́л бо вы́и бесо́в смире́нием и посто́м,/ во всечестны́х дея́ниих су́щи, возсия́л еси́ в ми́ре;/ те́мже я́ко луча́ светоли́тнаго сия́ния Христо́ва возсия́ нам,/ днесь воспева́ющим тя, Марти́рие преподо́бне.

Сла́ва, и ны́не, Богоро́дичен:

Пое́м Тя, Богоневе́сто, Ма́ти Христа́ Бо́га,/ сла́вяще Рождество́ Твое́ непостижи́мое,/ и́мже изба́ви ны ле́сти и кова́рствия вра́жия/ и от вся́ких бед, Влады́чице Богоро́дице,/ и ве́рно Тебе́ вопие́м:/ поми́луй ста́до Твое́, Еди́на Пречи́стая.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Соде́яв, пресла́вне, ду́шу твою́ храм Свято́му Ду́ху,/ был еси́ насле́дник Го́рняго Ца́рствия,/ с Вы́шними чи́нами водворя́яся, всече́стне о́тче.

Многоболе́зненныя стра́сти всегда́ врачу́еши приступа́ющих к тебе́ те́пле:/ благода́ть бо, преподо́бне, и́маши от Го́спода/ содева́ти зна́мения и чудеса́, пребога́те.

Красне́йшим прозябе́нием, о́тче, в дому́ Бо́жии прозя́бл еси́,/ доброде́тельми укра́шен и плоды́ чуде́сными облагоуха́ем.

Богоро́дичен: Ни́ва духо́вная, я́коже из бразды́ Клас изнесла́ еси́,/ всю тварь пита́ющаго вся́ческих Бо́га, Присноде́во.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе́ ино́го не зна́ем.

Умо́м очи́щенным пресла́вне зри́ши, преподо́бне,/ добро́ту неизрече́нную – Христа́,/ вся́ческих Бо́га на́шего.

Я́коже Илия́ на колесни́це, о́тче,/ доброде́тельми твои́ми возше́л еси́ на Не́бо/ и та́мо чи́сте зри́ши Святу́ю Тро́ицу,/ к Ней же ду́хом горя́ и возлета́я.

Стягну́в¹²³ те́ло твое́, чистото́ю опелена́я/ и воздержа́нием покоря́ его́ ду́ху,/ стро́потная вся¹²⁴ оста́вил еси́/ любве́ ра́ди Христа́ своего́ и Небе́снаго приобре́тения.

Богоро́дичен: Исцели́, Милосе́рдная Ма́ти, неду́гующаго ума́ моего́ душевре́дное омраче́ние/ и озари́ све́том ра́зума Христа́ Твоего́, Всенепоро́чная.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Лука́вый умертви́ся змий свяще́нными по́двиги твои́ми, преподо́бне Марти́рие,/ те́мже и моля́щимся тебе́ вспомоществу́еши/ разреши́тися от его зло́бы, блаже́нне.

Отсе́кл еси́ приле́жно серпо́м,/ его́же ви́де Заха́рий серпови́дный,/ стра́сти от души́ твоея́,/ те́мже, приобре́т прему́дрости семена́,/ пожа́л еси́ мно́гих исцеле́ний бога́тныя кла́сы.

Кре́постию ду́ха, о́тче,/ и тве́рдостию постоя́ннаго ума́ твоего́/ возмо́гл держа́ву вра́жию и си́лу его́ низложи́ти от себе́/ и тем похвалу́ побе́дныя по́чести прия́л еси́, преподо́бне,/ ве́рных осиява́я умы́.

Богоро́дичен: Пресвята́я Чи́стая,/ Творе́ц устро́и Тя в жили́ще Себе́, Христо́с Бог наш,/ те́мже хода́тайствы Твои́ми изба́ви нас от о́бласти льсти́ваго,/ я́ко да по до́лгу Тя чтим и ублажа́ем.

Конда́к, глас 8:

Оте́чества, преподо́бне, и всего́ мирска́го мяте́жа/ уклони́тися возжеле́л еси́,/ и, в пусты́ню всели́вся,/ та́мо во блаже́ннем безмо́лвии жесто́кое житие́ показа́л еси́,/ и ча́да послуша́ния и смире́ния в нем возрасти́л еси́./ Сего́ ра́ди, дерзнове́ние стяжа́в ко Святе́й Тро́ице,/ е́же моли́тися, Богоблаже́нне, о нас, ча́дех свои́х, и́хже собра́л еси́,/ и о всех правове́рных, да зове́м ти:/ ра́дуйся, о́тче Марти́рие,/ безмо́лвия пусты́ннаго любителю.

И́кос:

Возлюби́в, преподо́бне, Христо́вы Боже́ственныя за́поведи/ и возненави́дев плоть и я́же по ней земна́я мудрова́ния,/ прише́л еси́ усе́рднейше в непроходи́мую пусты́ню бла́тную,¹²⁵/ и, та́мо всели́вся любве́ ра́ди Христо́вы и душе́внаго обогаще́ния,/ я́ко свети́льник, просия́л еси́ чуде́с дарова́нии:/ ца́рскаго бо сы́на я́ко от сна возста́вил еси́/ и тем царя́ Симео́на¹²⁶ удиви́л еси́./ Сия́ облобыза́я, ве́рнии, припа́дая, мо́лимся:/ просвети́ о́чи на́ша душе́вныя воспева́ти досто́йно по́двиги твоя́:/ поще́ния, бде́ния, сле́зы и боле́зни,/ изможде́ние те́ла блаже́нныя ра́ди бу́дущия жи́зни,/ ея́же наслажда́яся, моли́ непреста́нно о всех нас.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси.

Проше́д по́двиги по́стныя, о́тче,/ умо́м кре́пким го́рдую вы́ю смири́л еси́,/ Боже́ственным вдохнове́нием и спаси́тельным Богообра́зным подви́жничеством ду́шу твою́ укра́сил еси́, поя́:/ благослове́н Бог оте́ц на́ших.

Красне́йшее прозябе́ние, о́тче,/ в дому́ Бо́жии произра́сл еси́ ве́рою,/ сугу́бейший плод прине́сл еси́ доброде́тельми,/ те́ми укра́шен, чудесы́ облагоуха́л еси́.

Просвети́в твое́ се́рдце умиле́нием,/ нача́льник был еси́ свяще́ннейшаго собо́ра, о́тче,/ наказу́я, и уча́, и вся к Бо́жией во́ли приводя́, пою́ще:/ оте́ц на́ших Бо́же, благослове́н еси́.

Богоро́дичен: Но́во Отроча́ ро́ждшая, Пребезнача́льнаго Сло́ва,/ обетша́вшия ны зело́ грехо́м,/ ве́рныя обнови́ла еси́, Де́во,/ и воспева́ти научи́ла еси́:/ оте́ц на́ших Бо́же, благослове́н еси́.

Песнь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Насле́дниче Боже́ственных селе́ний, А́нгельски, о́тче, пожи́л еси́;/ тем, со А́нгелы водворя́яся,/ лику́ет в черто́гах Небе́сных со святы́ми дух твой.

Невозвра́тным умо́м и невозвра́тными стопа́ми, Богому́дре о́тче,/ ше́ствовал еси́, досточу́дне, к Небе́сным селе́нием,/ Ева́нгельскою стезе́ю направля́емь,/ от стро́потных путе́й до конца́ уклони́лся еси́.

Все́льшеюся в тя благода́тию Свята́го Ду́ха, о́тче Марти́рие,/ благоустроя́еши ду́ши притека́ющих к тебе́:/ лука́вно бо страстьми́ в челове́цех де́йствующии/ нечи́стии ду́си отгоня́еми быва́ют.

Богоро́дичен: Вода́ еси́ неисчерпа́емая, Деви́це,/ Дщерь Царя́ Небе́снаго,/ от Нея́же вси ве́рнии, пию́ще,/ благода́ти исполня́емся, душе́ю и те́лом освяща́еми.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к:/ те́мже Пречи́стую Богоро́дицу, ве́рнии, велича́ем.

Исцеле́ние источа́ет бога́тно честна́я твоя́ ико́на Бо́жиим Ду́хом,/ и стра́сти многовре́менныя исцеля́ет, о́тче, приходя́щих к тебе́,/ и прогоня́ет лука́выя ду́хи лю́тыя,/ и воздвиза́ет ве́рныя восхваля́ти твоя́ све́тлыя по́двиги.

Я́ко вели́кое со́лнце,/ нам вели́чием по́двиг твои́х возсия́л еси́ в преде́лах страны́ сея́:/ уме́рый бо, преше́л еси́ от све́та к Све́ту, от гро́ба возсия́вшему./ Тем вопие́м ти:/ просвети́ и на́ша помышле́ния, о́тче преподо́бне Марти́рие.

Те́ло твое́, блаже́нне, терпели́вое, вяза́вшееся вери́гами,/ стра́сти неисце́льныя прикоснове́нием исцеля́ет,/ Бо́гу и Спа́су, тя вельми́ просла́вльшу, о́тче прему́дре и досточу́дне Марти́рие,/ я́ко де́лы твои́ми до́брыми просла́вльшуся, преподо́бне.

Процве́л еси́ в по́стнических удо́лиях, прехва́льне о́тче наш, я́ко ши́пок многоцве́тен,/ и, я́ко крин, облагоуха́л еси́ со́вести ве́рных доброде́тельми и чудесы́:/ те́мже, преподо́бне, отжени́ от нас стра́сти смердя́щия.

Богоро́дичен: Просвети́, Чи́стая Де́во,/ се́тующее се́рдце мое́ при́сно преступле́ньми и жите́йскими молва́ми,/ не оста́ви мене́ враго́м бы́ти в ра́дость,/ я́ко да сла́влю Тя и любо́вию пою́, Препе́тая.

Свети́лен:

Мирска́го пристра́стия, я́ко от скве́рны уклони́лся еси́,/ и хвра́стие страсте́й веле́нием Бо́жиим я́ко огне́м попали́л еси́,/ и а́лчбою плоть свою́ увяди́л еси́, о́тче,/ и Небе́сною сла́вою со А́нгелы обогати́лся еси́:/ те́мже непреста́нно моли́ о нас Христа́ Бо́га, преподо́бне Марти́рие.

Сла́ва, и ны́не, Богоро́дичен:

Тя Предста́тельницу и́мамы, вси гре́шнии, о Пресвята́я Де́во,/ ты благопреме́нна сотвори́ Сы́на Твоего́/ ма́терними Твои́ми к Нему́ моли́твами.

На хвали́тех стихи́ры на 4, глас 5:

Преподо́бне о́тче и Богоно́се Марти́рие,/ в жи́зни вре́менней подвиза́вся,/ моли́твою, посто́м и воздержа́нием/ ду́шу свою́ с те́лом очи́стив,/ Ду́ху Пресвято́му прекра́сная оби́тель яви́лся еси́,/ И́же и сла́вна тя, преблаже́нне, соде́ла,/ в чудесе́х же вели́каго свети́льника,/ просвети́вшаго су́щих во мра́це неве́жествия:/ тя я́ко наста́вника мона́хов велему́дренно ублажа́ем.

Преподо́бне о́тче и Богоно́се Марти́рие,/ ты на Бо́га упова́ние о всем возложи́в,/ це́рковь прекра́сну Святы́я Тро́ицы воздви́гл еси́,/ Бо́гу ти помога́ющу,/ и к сему́ оби́тель че́стну поста́вил еси́ хотя́щим спасти́ся/ и е́же о всех моле́ние приноси́ти ко Влады́це Христу́./ Ему́же моли́ся, преподо́бне,/ пода́ти душа́м на́шим мир и ве́лию ми́лость.

Преподо́бне о́тче и Богоно́се Марти́рие,/ свети́льника тя стяжа́вше,/ свяще́нную твою́ па́мять восхваля́ем/ и свяще́нными пе́сньми ублажа́ем,/ я́ко нас при́сно назира́еши,/ и от бед и зол огражда́еши,/ и к покая́нию воздвиза́еши./ И ны́не, любо́вию припа́дающе, преподо́бне, мо́лимся/ тобо́ю прия́ти ве́лию ми́лость.

Слава, глас 6:

Преподо́бне о́тче Марти́рие,/ не дал еси́ сна твои́ма очи́ма,/ ни ве́ждома дрема́ния,/ до́ндеже ду́шу и те́ло от страсте́й свободи́л еси́/ и себе́ Ду́ху Пресвято́му жили́ще угото́вал еси́;/ те́мже Единосу́щныя Тро́ицы уго́дник быв,/ оби́льно благода́ть прия́л еси́,/ избра́нниче Христо́в, преподо́бне Марти́рие,/ моли́ся спасти́ ду́ши на́ша.

И ны́не, Богоро́дичен: Богоро́дице, Ты еси́ лоза́ истинная:

Славосло́вие вели́кое и отпу́ст.

НА ЛИТУРГИИ

Блаже́нны от кано́на, пе́сни 3-я и 6-я. Апо́стол к Гала́том, зача́ло 213. Ева́нгелие от Луки́, зача́ло 24. Прича́стен: В па́мять ве́чную:

Преподобный Мартирий Зеленецкий, в миру Мина, родился в середине XVI в. в г. Великие Луки, Псковской епархии. Родители умерли, когда ему не было и десяти лет. Его духовным отцом стал священник Благовещенского храма (в иночестве Боголеп). Не захотел и Мина оставаться в миру. Вслед за наставником он удалился в Великолукский Троицкий монастырь и принял ангельский образ с именем Мартирий.

Семь лет неослабно трудились учитель и ученик во славу Божию. Там преподобному Мартирию было первое явление образа Пресвятой Богородицы Одигитрии-Путеводительницы. Он стал горячо молить Царицу Небесную, чтобы Она указала ему, куда укрыться для совершенного безмолвия.

По указанию Божию он удалился в пустынное место за 60 верст от монастыря. В тиши пустыни святой погрузился в пламенную молитву. Великий страх наводили на него бесы, но были посрамлены мужественной верой святого. На предложение своего старца иеромонаха Боголепа Мартирий не пожелал вернуться в монастырь, чтобы не нарушить обет, данный Царице Небесной, а отправился в Смоленск на поклонение чудотворной иконе Божией Матери, Одигитрии. Преподобные Авраамий и Ефрем Смоленские в сонном видении возвестили святому Мартирию волю Божию, что ему предназначено жить в пустыне, «где Бог благословит и Богородица наставит».

Однажды во сне увидел преподобный Мартирий, будто бы над Тихвином, куда отправился по его совету на молитву об исцелении от тяжелого недуга пред иконой Пречистой Богородицы некий инок Авраамий,– высится огненный столп, на вершине которого сияет икона и к которой он устремляется, чтобы приложиться. Вспомнив это видение светозарного столпа и иконы над Тихвином, преподобный направился в ту обитель, уповая, что Матерь Божия окончательно разрешит его недоумение.

Инок Авраамий поведал преподобному Мартирию о сокровенной пустыне, над которой ему было видение сияющего Креста Господня. Преподобный Мартирий взял с собой две маленькие иконы – Живоначальной Троицы и Пресвятой Богородицы Тихвинской – и отправился в ту пустыню.

«Жестоко и многоболезненно» было житие преподобного в пустыне, но ничто не поколебало его решимости претерпеть испытание до конца. В поставленной собственноручно часовенке он удостоился вновь увидеть во сне образ Богоматери.

Пустыня освятилась жизнью отшельника, и люди, стремившиеся к духовной жизни, стали приходить не только, чтобы назидаться примером преподобного, но и для водворения вместе с ним в подвигах.

Тогда преподобный построил церковь для совместной молитвы. Так было положено начало обители, получившей впоследствии название Троице-Зеленецкого монастыря или «Зеленой Мартириевой пустыни».

Благодать Божия воссияла на преподобном. Далеко распространилась слава о его прозорливости и даре исцелений. Там однажды преподобному Мартирию также явилась Сама Матерь Божия. Известный своей ревностью к Церкви Христовой боярин Феодор Сырнов построил на свои средства теплую церковь, освященную в честь Благовещения Пресвятой Богородицы – в память о той первой церкви в Великих Луках, где преподобный начал свой путь к Богу.

Около 1570 года святой пришел в Новгород, принять от архиепископа сан священства (с 1582 года он был избран братией во игумена Зеленецкой обители, тогда в ней было 12 человек).

В 1595 году преподобный исцелил в Твери умирающего сына бывшего Касимовского царя Симеона Бекбулатовича, возложив на грудь больному икону Тихвинской Пресвятой Богородицы.

На пожертвования благодарного Симеона были построены храмы в честь Тихвинской иконы Божией Матери и святителя Иоанна Златоуста – Небесного покровителя исцеленного царевича.

Достигнув глубокой старости, преподобный ископал могилу, поставил в ней своими руками устроенный гроб и много времени проводил около гроба в молитвах, слезах и Богомыслии.

Почувствовав час отшествия своего из жизни временной, он умолял своих чад о Господе иметь непоколебимую надежду на Пресвятую Живоначальную Троицу и возложить упование на Матерь Божию, как и он всегда прибегал к Ее покрову. Приобщившись Святых Христовых Таин, он преподал братии благословение, изрек: «Мир всем православным»,– и почил блаженной кончиной праведника, 1 марта 1603 года.

Тело его было погребено близ церкви Богоматери, в указанном им месте. Затем мощи преподобного Мартирия покоились под спудом в подвальном этаже церкви святого Иоанна Богослова.

Бывший инок Зеленецкого монастыря Корнилий, впоследствии митрополит Казанский, а затем Новгородский, составил службу и написал житие преподобного Мартирия. Память преподобного Мартирия Зеленецкого, Великолукского, празднуется также 1 марта.

НА МАЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чи́нов:

Благоче́стия побо́рника и в царе́х изря́днаго,/ Стефа́на – страда́льца и вене́чника,/ духо́вно соше́дшеся, воспои́м/ и того́ пра́здник соверши́м, любо́вию ра́дующеся.

Небе́снии ны́не А́нгели торжеству́ют мы́сленно/ в па́мять до́бляго подви́жника/ и, к нам неви́димо сходя́ще,/ осеня́ют, поле́зная да́рующе.

Му́чеников честны́й собо́р,/ с на́ми совоку́плься, сликовству́ет и торжеству́ет,/ сла́вя и воспева́я Христа́,/ И́же Стефа́на си́це просла́вльшаго.

Сла́ва, глас 6:

Весна́ нам днесь в зи́мныя го́ды возсия́/ прииди́те, бра́тие мучениколю́бцы,/ обере́м цве́ты доброде́телей,/ я́же изнесе́ нам Стефа́н, Христо́в учени́к нело́жный,/ и́же да́нный ему́ тала́нт до́бре умно́живый/ и ве́рен яви́ся своему́ Влады́це,/ и и́же я́ко дре́во при исхо́дищих вод/ плод свой даст во вре́мя свое́,/ и нам про́сит от Христа́ Бо́га ве́лию ми́лость.

И ны́не, Богоро́дичен:

Арха́нгельски воспои́м, ве́рнии,/ Небе́сный черто́г и дверь запеча́тану вои́стинну:/ ра́дуйся, Ея́же ра́ди отрасте́ нам Спас всех Христо́с,/ Жизнода́вец и Бог./ Низложи́, Влады́чице, мучи́тели,/ безбо́жныя враги́ на́ша руко́ю Твое́ю, Пречи́стая,/ упова́ние христиа́н.

На стихо́вне стихи́ры, глас 2.

Подо́бен: До́ме Евфра́фов:

От за́пада со́лнце возсия́,/ зари́ благоче́стия испуща́я –/ Стефа́н, во царе́х му́ченик.

Стих: Пра́ведник, я́ко фи́никс, процвете́т,/ и я́ко кедр, и́же в Лива́не, умно́жится.

Се́рбская племена́ вся,/ усе́рдно стеци́теся,/ своего́ засту́пника сла́вяще.

Стих: Насажде́ни в дому́ Госпо́дни/ во дво́рех Бо́га на́шего процвету́т.

После́дним си вре́менем,/ ты красота́ показа́лся еси́,/ многострада́льне Стефа́не.

Сла́ва, глас и подо́бен то́йже:

Го́сподеви предстоя́, сла́вне,/ Его́же возлюби́л еси́,/ твое́ ста́до помина́й.

И ны́не, Богоро́дичен:

Богоро́дицу Тя, ве́рнии,/ вси испове́дуем,/ Мари́е Присноде́во.

Тропа́рь, глас 4 (зри день сей ни́же)

Сла́ва, и ны́не, Богоро́дичен:Е́же от ве́ка:

НА ВЕЛИЦЕЙ ВЕЧЕРНИ

Стихосло́вим Блаже́н муж: 1-й антифо́н, на Го́споди, воззва́х: стихи́ры на 8, глас 2.

Подо́бен: Ки́ими похва́льными:

Ки́ими благопохва́льными пе́сньми воспои́м Стефа́на,/ Небе́снаго челове́ка и земна́го А́нгела,/ благоче́стия побо́рника и нече́стия отгони́теля,/ столпа́ непоколеби́маго своему́ оте́честву,/ во бра́нех до́блественнаго и в напа́стех терпели́ваго,/ безчи́нствующих казни́теля стра́шнаго/ и благотеку́щих помо́щника те́плаго,/ и́мже Христо́с да́рует нам ве́лию ми́лость.

Ки́ими похва́льными венцы́ венча́им Стефа́на,/ Богоразу́мия красоту́, смиренному́дрия высоту́,/ горды́ни низложи́теля, стену́ необори́мую своея́ ему́ оби́тели,/ непобеди́маго страда́льца и втора́го Ио́ва ра́нами,/ бесо́в прогони́теля стра́шнаго/ и А́нгелов сожи́теля сла́внаго,/ и́мже Христо́с нам да́рует ве́лию ми́лость.

Ки́ими благососта́вными гла́сы возвели́чим Стефа́на,/ высокопа́рнаго орла́ чистото́ю у́мною,/ си́рых помо́щника и вдов пита́теля,/ стра́ждущих уте́шителя и ни́щих служи́теля усе́рдна,/ до́браго строи́теля да́нных ему́ от Бо́га,/ непра́вду возненави́девша и пра́вду предпоче́тшаго,/ и нам от Христа́ прося́ще ве́лию ми́лость.

Ки́ими добрособра́нными цве́ты увязе́м Стефа́на,/ Христо́ва сосу́да избра́ннаго,/ в не́мже со Отце́м и Ду́хом всели́ся,/ Ио́сифа втора́го в напа́стех/ и в кро́тости Дави́да друга́го,/ Соломо́ну в прему́дрости ра́внаго и Илии́ в ре́вности то́чнаго,/ царе́й о́браз к доброде́тели,/ и к ми́лости наказа́ние изве́стное,/ и́мже Христо́с нам да́рует ве́лию ми́лость.

Сла́ва, глас 8:

Днесь честно́е торжество́ Небе́сная пра́зднуют мы́сленно,/ земна́я к весе́лию созыва́юще/ в па́мять до́бляго подви́жника, Стефа́на терпеливоду́шнаго./ Сей бо всеизря́дный Христо́вых за́поведей храни́тель бысть изве́стнейший,/ не поми́лова тле́ющих ца́рствия/ ра́ди ве́чныя и блаже́нныя вои́стинну жи́зни,/ но расточи́ и даде́ убо́гим/ и му́ченическим венце́м венча́ся:/ Святе́й Тро́ице предстоя́ непосре́дственно,/ смире́ние про́сит ми́рови и грехо́в оставле́ние,/ и́же ве́рою того́ соверша́ющим торжество́.

И ны́не, Богоро́дичен: Царь Небе́сный:

Та́же вход. Прокиме́н дне и чте́ния.

Проро́чества Иса́йина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель,– глаго́лет Госпо́дь Бог,–/ и о́трок, Его́же избра́х./ Да позна́ете, и ве́руете Ми, и разуме́ете, я́ко Аз есмь:/ пре́жде Мене́ не бысть ин бог и по Мне не бу́дет,/ Аз есмь Бог, и несть, ра́зве Мене́, спаса́яй./ Аз возвести́х и спасо́х, уничижи́х и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь,/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На литии́ стихи́ры самогла́сны, глас 1:

За́падная вся, ра́дуйтеся/ и, веселя́щеся, взыгра́йте,/ посреде́ себе́ иму́ще звезду́ незаходи́мую и многосве́тлую,/ со́лнечныя зари́ превосходя́щую,–/ Стефа́на великоимени́таго,/ свята́го ко́рене ветвь многопло́дна и избра́нна,/ и́стиннаго за́поведей Христо́вых де́лателя,/ и́же Христа́ мно́го возлю́бльшаго/ и нам от Него́ прося́ща ве́лию ми́лость.

Се́рбстии ро́дове вси,/ духо́вно ликовству́юще,/ о́бщую по́льзу восхваля́йте/ в наро́читый день того́ па́мяти./ Посреде́ бо вас израсте́ пе́рвее,/ я́ко шипо́к благово́нный,/ и ны́не посреде́ му́чеников,/ я́ко звезда́ све́тлая, преосиява́ет,/ и нас не оставля́ет я́ко па́стырь до́брый,/ но посеща́ет неви́димо/ и от Спа́са нам да́рует ве́лию ми́лость.

Восто́чная, за́падным сра́дуйтеся и невысокому́дрствуйте,/ и́бо со́лнце дру́гое зде пресла́вно просия́,/ не к за́падом творя́ тече́ние/ и под земле́ю устремля́яся,/ но к Небе́сем восхо́д име́ет от земли́,/ и невеще́ственным спребыва́я умо́м,/ и я́же отту́ду нам предпосыла́ет лучи́:/ и соблюда́ет, и освяща́ет,/ и от Христа́ нам да́рует ве́лию ми́лость.

Сла́ва, глас 5:

Востру́бим духо́вною цевни́цею/ в наро́читый день пра́здника на́шего,/ я́же о́крест созыва́юще благочести́вому́дренне,/ с высо́ким пропове́данием и глаго́люще:/ се и́же на земли́ стра́хом ца́рствовавый,/ ны́не на Небесе́х свобо́дно ца́рствует./ Прииди́те, лю́дие, и сему́ поревну́йте/ и, поревнова́вше, после́дуйте де́ланию,/ да и вы подо́бным венце́м приобщи́теся,/ се ми́лостыни сокро́вище пребога́тое;/ прииди́те, стра́ждущии, и приими́те исцеле́ния./ Рука́ бо, я́же тогда́ пе́нязи да́ющая,/ та́яжде и ны́не да́ет исцеле́ния/ теле́сным боле́знем и душе́вным страсте́м./ Бога́тии и ни́щии, здра́вии и немощни́и,/ прише́дше, почерпи́те по ве́ре проше́ния/ от ковче́га свяще́ннаго, я́ко от нетле́нна исто́чника,/ во сла́ву Спа́са и Бо́га,/ прославля́ющаго и́же Того́ прославля́ющих.

И ны́не, Богоро́дичен, глас то́йже, творе́ние Ге́рмана Патриа́рха:

Востру́бим трубо́ю пе́сней,/ прекло́ншися бо свы́ше Всецари́ца, Ма́ти Де́ва/ благослове́ньми венчава́ет воспева́ющия ю́./ Благове́рнии лю́дие да стеку́тся/ и Ца́рице да воспле́щут в пе́снех, Царя́ ро́ждшей,/ сме́ртию одержи́мыя пе́рвее/ разреши́ти человеколю́бно благоволи́вшаго./ Па́стырие и учи́телие,/ До́браго Па́стыря Пречи́стую Ма́терь, соше́дшеся, восхва́лим:/ све́щник светоза́рный, светоно́сный о́блак,/ Небе́с простра́ннейшую, одушевле́нный киво́т,/ огнезра́чный Влады́чень Престо́л,/ манноприе́мную злату́ю ста́мну,/ заключе́нную Сло́ва дверь./ Всех христиа́н прибе́жище/ пе́сньми Богоглаго́ливыми похваля́юще, си́це рцем:/ пала́то Сло́ва,/ сподо́би смире́нныя ны Небе́снаго Ца́рствия,/ ничто́же бо невозмо́жно хода́тайству Твоему́.

На стихо́вне стихи́ры, глас 4.

Подо́бен: Я́ко до́бля:

Я́ко тве́рда адама́нта, всеблаже́нне Стефа́не,/ соше́дшеся днесь, восхваля́ем тя:/ я́ко напа́сти претерпе́в,/ и смерть подъя́л еси́ непра́ведную,/ я́ко да двои́м да́ром сподо́бит тя Христо́с,/ Его́же возлюби́л еси́,/ ца́рской диади́ме и венцу́ му́ченическому.

Стих: Пра́ведник, я́ко фи́никс, процвете́т/ и я́ко кедр, и́же в Лива́не, умно́жится.

Я́ко у́тро светле́йшее,/ терпе́ния све́тлостию, достосла́вне, показа́лся еси́./ Те́мже и стека́ются архиере́и и свяще́нницы,/ и́ноцы и мирсти́и, бога́тии и ни́щии,/ ковче́гу припа́дающе святы́х твои́х моще́й,/ освяще́ние прие́млюще.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

И́ов дре́вле на восто́це,/ сла́вен и имови́т,¹²⁷/ Богочте́ц и пра́веден и му́чеников нача́ло,/ но и Стефа́н на за́паде/ сла́вою и бога́тством нетле́нным,/ я́ко во́ин всех Царя́ и страда́льцев исполне́ние.

Сла́ва, глас 3:

Прииди́те, празднолю́бных составле́ния,/ прииди́те, и лик соста́вим:/ прииди́те, венча́ем пе́сньми/ венце́в тезоимени́таго Стефа́на,/ того́ ревну́юще я́же к Бо́гу любви́/ и терпе́ние похваля́юще./ Вои́стинну бо до конца́ претерпе́ в зако́не Госпо́дни/ и ну́ждную подъя́т смерть рука́ми уби́йственными,/ и к нему́ возопии́м:/ многострада́льне и преблаже́нне,/ оби́тель, ю́же возлюби́л еси́,/ в не́йже честны́м твои́м моще́м ста́ти изволи́л еси́,/ и ста́до, е́же собра́л еси́,/ сохраня́й и покрыва́й,/ я́ко име́я ко Христу́ дерзнове́ние.

И ны́не, Богоро́дичен:

Без се́мене от Боже́ственнаго Ду́ха/ во́лею же О́тчею зачала́ еси́ Сы́на Бо́жия,/ от Отца́ без ма́тере пре́жде век су́ща,/ нас же ра́ди, из Тебе́ без отца́ бы́вша,/ пло́тию родила́ еси́/ и Младе́нца мле́ком пита́ла еси́./ Те́мже непреста́й моли́ти/ изба́витися от бед душа́м на́шим.

Тропа́рь, глас 4:

В терпе́нии добрострада́льных по́двиг твои́х/ многообра́зныя ра́ны претерпе́л еси́,/ и по кончи́не свое́й/ вене́ц от Бо́га с му́ченическими ли́ки восприе́млеши,/ и в земли́ кро́тких досто́йно водворя́ешися, блаже́нне,/ о нас Христа́ Бога́ моли́/ дарова́ти душа́м на́шим ве́лию ми́лость.

Ин тропа́рь, глас 4:

Ца́рство, е́же на земли́ до́бре окормля́я, страда́льче,/ и, багряни́цу нося́, смире́нно стяжа́л еси́ мудрова́ние,/ ни́щих посеща́я и сим хлеб раздробля́я,/ тем Пребоже́ственная Тро́ица/ Ца́рствия ку́пно и му́ченичества венце́м увязе́ ти.

НА У́ТРЕНИ

По 1-м стихосло́вии седа́лен, глас 1.

Подо́бен: Ка́мени запеча́тану:

Ра́ка твой, свя́те, други́й бысть Силоа́м,/ и́же ве́рою приходя́щим разли́чных неду́гов исцеле́ния то́чит./ Сего́ ра́ди Се́рбская племена́ вся в па́мяти твое́й ра́дуются/ и во хвале́нии зову́т тебе́:/ сла́ва Просла́вльшему тя,/ сла́ва Венча́вшему тя,/ сла́ва Де́йствующему тобо́ю пресла́вная.

Сла́ва, и ны́не, Богоро́дичен:

Ма́терь Тя Бо́жию све́ми вси Де́ву вои́стинну, и по Рождестве́ я́вльшуюся,/ и́же любо́вию прибега́ющии к Твое́й бла́гости,/ Тебе́ бо и́мамы, гре́шнии, предста́тельство,/ Тебе́ стяжа́хом в напа́стех спасе́ние, Еди́ну Всенепоро́чную.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Удиви́шася А́нгели, па́че есте́ственное зря́ще, на тебе́ быва́емо,/ от ца́рствия преходя́ща в Небе́сная Ца́рствия:/ ужасо́шася бе́сове, венцено́сца тя ви́дяще,/ его́же бо мня́ху страда́ньми низложи́ти,/ сим посра́мльшеся, падо́ша,/ И́же сего́ тогда́ укрепи́вый, просвети́ ду́ши на́ша.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря, и внима́ше мы́слию,/ и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по Рождестве́ па́ки Де́вою пребыва́ет.

По полиеле́и седа́лен, глас 3.

Подо́бен: Красоте́ де́вства:

Кра́сен оте́честву твоему́ и вселе́нней благоцвету́щ,/ вои́стинну цвет показа́лся еси́:/ о́чи всех у́мныя и серде́чная привлача́ разуме́ния к добро́те твои́х исправле́ний./ Те́мже удивля́еми, от усе́рдия зове́м ти:/ ра́дуйся, Деча́ном похвало́ нело́жная.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чисто́те Тво́ей Гаврии́л, уди́влься,/ вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя?/ Недоумева́ю и ужаса́юся,/ те́мже, я́ко повеле́н бых, вопию́ Ти:/ ра́дуйся, Благода́тная.

Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой: Ева́нгелие от Луки́, зача́ло 63.

По 50-м псалме́ стихи́ра, глас 6:

Дне́сь Це́рковь озаря́ется страстоте́рпца луча́ми/ и, я́ко цве́ты, украша́ема,/ в весе́лии хва́лится, я́сным гла́сом веща́ющи:/ такова́ моя́ рожде́ния,/ такови́ моего́ чре́ва сы́нове./ И́хже породи́х креще́нием,/ воспита́х же млеко́м благоче́стия/ и му́ченики соде́лах и́стинны:/ да моля́тся о вселе́нней ко Го́споду.

И́на стихи́ра, глас 6, из кано́на моле́бнаго, по Ева́нгелии:

Днесь за́падная страна́ весели́тся,/ мощми́ твои́ми кра́сящися,/ и мы, раби́ твои́, сия́ объе́млюще,/ от души́ вопие́м ти:/ уго́дниче Христо́в и предста́телю те́плый Стефа́не,/ не премолчи́ о нас, моля́ся ко Го́споду.

Кано́н Богоро́дицы на 6, гласа́ 2-го, и свята́го 2 кано́на на 8.

Кано́н свята́го, его́же краегране́сие:

Но́вому му́ченику но́ву приношу́ да́ра пе́снь.

Глас 1.

Песнь 1

Ирмо́с: Твоя́ победи́тельная десни́ца/ Боголе́пно в кре́пости просла́вися./ Та бо, Безсме́ртне,/ я́ко всемогу́щая проти́вныя сотре́,/ изра́ильтяном путь глубины́ новосоде́лавшая.

Новоявле́нна, я́ко со́лнце,/ изнесе́ тя за́падная страна́ заря́ми светолу́чными, Стефа́не,/ концы́ осиява́юща и та́йно просвеща́юща/ Го́сподеви побе́дную песнь пою́щих.

О́чи стяжа́в у́мныя лише́нием чу́вственных,/ и ны́не зри́ши я́сно, я́же о́ко не ви́де, по апо́столу,/ и на се́рдце челове́ку не взы́доша,/ я́же тебе́ да́де Христо́с, Того́ возлю́бльшему.

Вои́стинну, – рече́ Соломо́н, – па́мять пра́веднаго с похвала́ми:/ се бо ны́не собра́шася разли́чных язы́к ро́дове,/ хвала́ми венчава́юще Стефа́нов верх нетле́нный.

Очи́стив ум и се́рдце/ и ду́шу свобо́дну соде́лав, сла́вне,/ был еси́ сосу́д избра́нный, досто́ин Бо́жия посеще́ния./ Те́мже и, прише́д, Христо́с/ с Отце́м и Ду́хом оби́тель в тебе́ сотвори́.

Богоро́дичен: Гора́ высока́, ю́же ви́де Дании́л,/ от нея́же ка́мень отсече́ся, му́жеских рук кроме́,/ Тебе́ прообразова́, Богоро́дице./ Без му́жа бо нам пло́тию породила́ еси́ Емману́ила.

Ин кано́н, моле́бный, глас 8, свято́му Стефа́ну Деча́нскому.

Песнь 1

Ирмо́с: Воду прошед:

Мно́гими одержи́ми напа́стьми,/ к тебе́ прибега́ем, сла́вне, о Христо́в во́ине Стефа́не,/ от наше́дших нас скорбе́й сохрани́.

Бу́ря вели́ка и мяте́ж врага́ злонача́льнаго/ на нас, свя́те, подви́жися,/ но, я́ко име́яй дерзнове́ние я́ко великоимени́т,/ сего́ низложи́ шата́ния.

На це́рковь твою́ и ста́до, ю́же созда́ и собра́,/ я́ко ски́мны ры́кающе, напа́сти устреми́шася,/ и́хже посрами́ до конца́.

Богоро́дичен: Неду́гующа те́лом и душе́ю,/ посеще́ния Боже́ственнаго и промышле́ния от Тебе́ сподо́би, Еди́на Богома́ти/ я́ко Блага́я, Блага́го же Роди́тельница.

Катава́сия по уста́ву.

Песнь 3

Ирмо́с: Еди́не ве́дый челове́ческаго существа́ не́мощь/ и ми́лости́вно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме, неизрече́нныя сла́вы Твоея́, Человеколю́бче.

Млеко́ ссав прему́дрости, от ю́ностнаго, блаже́нне, во́зраста/ и в стра́се Бо́жии поуча́яся при́сно,/ преплы́л еси́ жития́ пучи́ну, Христа́ име́я Ко́рмчия,/ И́же и наста́ви тя в Небе́сная блага́я приста́нища.

Уче́нию внима́я Ева́нгельскому, пребога́те, блажа́щему ми́лостивыя,/ ми́лостив был еси́ и кро́ток,/ те́мже и поми́лован быв,/ зе́млю насле́довал еси́, кро́тким уготова́нную.

Моли́твами приле́жными привле́кл еси́ Уте́шителя,/ И́же и, всели́вся в чи́стую твою́ ду́шу,/ светови́дна всего́ тя соде́ла,/ стра́шна же и чу́дна всем и́же о́крест царе́м в на́шу похвалу́ и торжество́.

Устыде́ся твои́х слове́с Боговеща́нных и прему́дрых/ самоде́ржец Гре́ческий и собо́р святи́тельский,/ не терпя́ше бо зре́ти злосла́вныя,/ я́ко во́лки, посреде́ ста́да благочести́вых.

Богоро́дичен: Рече́ Боже́ственный Иезекии́ль:/ и бу́дет дверь затворе́на./ Сие́ на Тебе́ испо́лнися, Влады́чице,/ вни́де бо несказа́нно в Тя О́тчее Сло́во/ и ми́рови яви́ся из Тебе́ пло́тию,/ Де́ву Тя сохрани́в во обои́х.

Ин. Песнь 3

Ирмо́с: Небе́снаго кру́га:

Ца́рствия нося́ диади́му, Ду́ха нището́ю обогати́ся,/ тем и Ца́рство Небе́сное дарова́ся ти,/ но не пре́зри ста́да твоего́ гла́сы,/ ны́не в печа́ли мне су́щу, тобо́ю хва́лимся.

Ди́вно житие́ твое́, блаже́нне, и пресла́вно терпе́ние,/ и чудеса́ достосла́вна, я́же святы́я твоя́ мо́щи соде́лаша,/ мно́зи бо твоего́ ста́да ра́тницы¹²⁸ тобо́ю пра́ведно казни́шася.

Мгла́ страсте́й ум наш покрыва́ет, к све́ту зре́ти не оставля́я,/ но на тя наде́емся, Стефа́не,/ от Бо́га да́ти нам просвеще́ние и спасе́ние.

Богоро́дичен: Лю́тыми неду́ги и боле́зненными страстьми́ истяза́ему, Де́во,/ Ты ми помози́:/ исцеле́ний бо неоску́дное Тя зна́ю сокро́вище, неиждива́емое.

Конда́к, глас 3:

В царе́х благоче́стно пожи́в/ и страда́ния путь проше́д, веледу́шне,/ и страда́льцем равноче́стен вене́чник яви́лся еси́,/ и це́рковь твоя́ прославля́ет тя сла́вно,/ святы́ми благоуха́нными мощми́ твои́ми освяща́ема,/ те́мже почита́ем и та́йно вопие́м ти:/ от бед изба́ви нас моли́твами твои́ми, свя́те.

Седа́лен, глас 8.

Подо́бен: Прему́дрости сло́ва:

Прему́дрости рачи́тель быв и сокро́вище доброде́телей,/ отону́дуже и поче́рпл еси́ Боже́ственная разуме́ния/ и, о тле́ющих нераде́в, нетле́нным внима́л еси́./ Те́мже и, я́же возлюби́в сия́, по кончи́не насле́довал еси́,/ прие́мля досто́йныя мзды́ де́ланием от правосудя́щаго вся про́мысла./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ покланя́ющимся ве́рою святы́м моще́м твои́м.

Сла́ва, и ны́не, Богоро́дичен:

Помышля́ю суд и бою́ся истяза́ния,/ трепе́щу стра́шныя и ужа́сныя му́ки,/ огня́ боле́зни, тьмы же и та́ртара./ Увы́! что́ сотворю́, студ ка́ко претерплю́?/ егда́ Кни́ги отве́рзутся и дея́ния облича́тся./ Сего́ ра́ди припа́даю Ти, Богоро́дице Пречи́стая,/ тогда́ предста́ни ми, нужды́ о́ныя изыма́ющи,/ Тебе́ бо и́мамы прибе́жище, Влады́чице.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Челове́к у́бо Стефа́н по естеству́,/ но па́че челове́ка ре́вностию, я́коже други́й Илия́,/ казня́ нечести́выя и снабдева́я правосла́вныя,/ ерети́ков же ча́да, я́ко душегу́бныя во́лки, от свои́х преде́л отгоня́ет.

Е́же у́бо по о́бразу до́бре соблюде́ Стефа́н вои́стинну,/ но и е́же по подо́бию в такове́м пла́вании жития́ на́шего мо́ри:/ ум бо влады́ку страсте́м устро́и, зовы́й с весе́лием души́:/ сла́ва си́ле Твое́й, Го́споди.

Ниже́ скорбь, ни теснота́, ниже́ заточе́ние многоле́тное,/ ни избоде́ние¹²⁹ оче́с твое́ возмого́ша поколеба́ти от Влады́ки жела́ние,/ но пребы́л еси́ неизме́нен, зовы́й с весе́лием:/ сла́ва си́ле Твое́й, Го́споди.

Име́я ко Влады́це Твоему́, великому́чениче, дерзнове́ние,/ вселе́нней мир испроси́,/ твоего́ оте́чества хору́гвы укрепи́ на ва́рвары безбо́жныя/ и тишину́ да́руй твои́м лю́дем,/ и́бо и с на́ми егда́ был еси́,/ ми́рно устрое́ние на́ше име́яше жи́тельство.

Богоро́дичен: Изобразова́ше иногда́ дре́вняго Изра́иля в Чермне́м проше́ствие/ Твое́ непостижи́мое Рождество́,/ я́коже бо он немо́кренными стопа́ми про́йде бе́здну морску́ю:/ та́ко и Христо́с, Де́во, без се́мене от пречи́стых Твои́х кро́вей произы́де.

Ин. Песнь 4

Ирмо́с: Услы́шах, Го́споди:

Царь и му́ченик быв,/ зри́тель ны́не бысть неизрече́нным,/ иде́же и нас помина́й.

Враг и ра́тник ро́да на́шего/ прило́ги и се́ти простира́ет,/ нас погуби́ти наде́яся.

Хва́лимся ра́кою моще́й твои́х и красу́емся, Стефа́не,/ любо́вию целу́юще и прие́млюще исцеле́ния.

Богоро́дичен: Наде́жду, и утвержде́ние, и спасе́ния сте́ну недви́жиму/ иму́ще Тя, Всепе́тая,/ неудо́бства вся́каго избавля́емся.

Песнь 5

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно по́ющих Тя.

К ца́рствия о́бласти и учи́тельства дар приложи́ся тебе́:/ веща́я бо поле́зная, всех сердца́ привле́кл еси́ к ве́ре и́стинней/ и плодоно́сных показа́в./ И, я́ко сотвори́в и научи́в,/ вели́к обре́лся еси́ во Царствии Небе́снем.

У́жас объе́млет мя слы́шаща непра́ведныя ти сме́рти о́бразы,/ но ра́дость прие́млет мя, честны́я твоя́ мо́щи зря́ща./ Вои́стинну бо, по вели́кому апо́столу,/ недосто́йна страда́ния ны́нешняго вре́мене ко откры́вшейся сла́ве на тебе́.

Не был еси́ ме́нший ве́рою и жела́нием Боже́ственным Симео́на и Са́ввы,/ свяще́нных и Богоно́сных твои́х оте́ц,/ но си́ми у́бо и и́неми доброде́тельми подо́бен им был еси́,/ превозше́л же еси́ тех и́менем и венце́м му́ченическим.

О́чи всех ни́щих на тя упова́ху,– я́коже к Бо́гу рече́ Дави́д,–/ и ты дая́л еси́ пи́щу им я́ко Бо́жий служи́тель пред очи́ма Госпо́днима./ Те́мже и насле́довал еси́, блаже́нне, угото́ванное ми́лостивым Ца́рствие.

Богоро́дичен: Гора́ Сина́йская дре́вле/ о́браз показа́ непостижи́маго Твоего́ Рождества́ законода́вцу в купине́,/ и́бо огнь та́мо не опали́ купину́,/ ниже́ зде, Богороди́тельнице, Огнь Божества́ Твою́ Боговмести́мую утро́бу.

Ин. Песнь 5

Ирмо́с: Просвети́ нас:

Просвети́ нас моли́твами твои́ми, свя́те,/ Све́ту бо предстои́ши Трисо́лнечному,/ и смири́ ста́до твое́.

Даря́ устраши́л еси́, и кня́зя низложи́л еси́,/ и ны́не твое́ ста́до ра́тующих низложи́.

Бе́сове убоя́шася, Стефа́не, тобо́ю посра́мленны,/ и ны́не честны́ми твои́ми моща́ми прого́нятся.

Богоро́дичен: Исцели́, Чи́стая, души́ моея́ неможе́ние,/ посеще́ния Твоего́ сподо́бльшая,/ и здра́вие моли́твами Твои́ми пода́ждь ми.

Песнь 6

Ирмо́с: Обы́де нас после́дняя бе́здна,/ несть избавля́яй:/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Во бра́нех до́блествен бы́л еси́,/ сопроти́вных побежда́я не щито́м, ни копие́м,/ не на лук бо тво́й упова́л еси́ когда́, но честны́х рук воздея́нием,/ я́коже Моисе́й Амали́ка в пусты́ни,/ и моли́твою го́рдых низлага́л еси́.

Ублажи́ша тя ца́рие, благослови́ша святи́телие,/ слы́шаше пресла́вная твоя́ исправле́ния:/ о́браз бо и надписа́ние к доброде́тели стяжа́ша тя./ И ны́не, ве́рою приходя́ще, честны́м стопа́м покланя́ются.

Прине́слся еси́, же́ртва непоро́чная,/ нас ра́ди Поже́ршемуся серде́чною чисто́тою и незло́бием:/ и всесожже́ние и́стинно, свя́то и одушевле́нно му́ченическим исхо́дом,/ заколе́ние соверше́нно Бо́гови.

Ра́зжже́ние стрелы́ неви́димаго стрельца́, тебе́ прирази́вшееся, Стефа́не,/ погаси́л еси́ благода́рственным терпе́нием и неде́йственна показа́л еси́,/ де́лы нас науча́я, терпе́нием того́ ко́зни побежда́ти.

Богоро́дичен: О́брази подоба́ше пе́рвее пречи́стому Твоему́ написа́тися Рождеству́,/ е́же и предвозвести́ и́же при Но́и ковче́г:/ я́коже бо он, Богороди́тельнице, от пото́па сохрани́ оста́нок ро́да,/ си́це и сие́ от пото́па грехо́внаго спасе́ челове́чество.

Ин. Песнь 6

Ирмо́с: Моли́тву пролию́:

Да́ры принося́ Го́сподеви,/ ми́лостыню и правосу́дие, ве́ру и незло́бие, наде́жду же и любо́вь,/ и́же и просла́ви тя сла́вою нетле́нною.

Чи́сто се́рдце соблюда́я/ и по́мысл непленя́ем в тле́нных и настоя́щих,/ те́мже и ста́ду твоему́ к Бо́гу бысть хода́тай.

Венце́м земна́го ца́рствия венча́ся пе́рвее, Стефа́не,/ ны́не же, треблаже́нне,/ Небе́снаго Ца́рствия венце́м от Христа́ увязе́ся.

Богоро́дичен: На одре́ ны́не немощству́яй лежу́,/ и несть исцеле́ния пло́ти моея́,/ но Бо́га, и Спа́са ми́ру, и Изба́вителя неду́гов ро́ждшая,/ Тебе́ молю́ся, Благо́й:/ от тли неду́г возста́ви мя.

Конда́к, глас 4.

Подо́бен: Вознесы́йся:

Друга́го Константи́на стяжа́ тя Це́рковь благоче́стием, блаже́нне,/ и кро́тостию, пра́вдою и ми́лостынями,/ но и великому́ченика и страда́льца и́стинна./ Те́мже и, тобо́ю кра́сящися, вопие́т:/ Стефа́н мне похвала́ и утвержде́ние.

И́кос:

До́брый Влады́ка, Бог и Созда́тель,/ я́коже в при́тчи Ева́нгельской рече́/ о де́лателех виногра́да того́ за́поведей спаси́тельных,/ коего́ждо во свое́ вре́мя де́лавша и мзду прие́мша,/ изнесе́ ны́не во еди́нона́десятый час к концу́ ле́том/ и в са́мое соверше́ние ты́сящам вели́каго/ сего́ му́ченика и царя́,/ своему́ оте́честву непоколеби́мое забра́ло, и свое́й оби́тели, неруши́мую стену́/ и гри́вну всезлату́ю Це́ркви,/ ю́же и нося́щи, с на́ми зове́т единогла́сно:/ Стефа́н мне похвала́ и утвержде́ние.

Песнь 7

Ирмо́с: Тебе́, у́мную, Богоро́дице, пещь/ разсмотря́ем, ве́рнии:/ я́коже бо о́троки спасе́ три превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Иису́с Нави́н иногда́ А́нгела ви́де,/ повелева́юща ему́ изу́ти сапо́г но́гу своею́,/ ме́сту бо, – глаго́лаше, – свя́ту бы́ти,/ ты́ же, всеблаже́нне, Никола́я ви́дел еси́ вели́каго,/ пло́ти совлещи́ся повелева́юща и в земли́ святе́й присели́тися.

Нощна́я твоя́ хожде́ния и я́же о ка́мень ча́стая претыка́ния,/ я́же подъя́л еси́, ни́щия посеща́я,/ ле́ствицы тебе́ устро́ишася и степе́нь к Небе́сным/ и́миже к Само́му Бо́гу дости́гл еси́, Того́ десни́цею венчава́емь.

Обои́ у́бо на тебе́ венцы́, блаже́нне, стеко́шася,/ ца́рствия ку́пно и му́ченичества:/ обои́х бо чин соблю́л еси́./ Те́мже царе́й еси́ похвала́ и му́чеников красота́,/ своея́ же оби́тели звезда́ многосве́тлая.

Широта́ земли́ и долгота́ со мно́гих язы́к ро́довы тебе́ вве́рися от Бо́га,/ от заточе́ния призва́вшаго тя,/ ю́же и соблю́л еси́ до́бре во благоче́стии и в зако́нех пра́ведных./ Те́мже и мзду прия́л еси́ досто́йную.

Богоро́дичен: Роди́выйся Соприсносу́щен Бо́гу и Отцу́, Бог Сло́во, Богоро́дице,/ и с на́ми Бог Челове́к Тобо́ю сни́де к на́шему смире́нию,/ свобожда́я от кля́твы пра́дедния:/ Тебе́ бо ви́де Иа́ков ле́ствицу, до Небе́с дося́жущу.

Ин. Песнь 7

Ирмо́с: От Иуде́и доше́дше:

Ца́рствия насле́дниче и великому́чениче Стефа́не, вене́чниче,/ Ца́рствию нас Небе́сному сподо́би,/ муче́ния избавля́я.

Симео́ну земно́му и Са́вве свяще́ннейшему/ житие́ и имени́тая печа́ть показа́ся,/ яви́шася бо мо́щи твоя́ луч со́лнечных светле́йше.

Име́я дерзнове́ние, я́ко пра́ведно ца́рствовав/ и непра́ведно пострада́в,/ ста́ду твоему́ от Бо́га проси́ смире́ния.

Богоро́дичен: Теле́сныя сла́бости и душе́вныя неду́ги, Богороди́тельнице,/ любо́вию приступа́ющих к кро́ву Твоему́, Де́во, исцели́ти сподо́би,/ Спа́са Христа́ нам ро́ждшая.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те вся дела́ Госпо́дня Го́спода,/ по́йте и превозноси́те во вся́ ве́ки.

Устне́ у́бо дви́жа и ру́це в моли́твах воздева́я,/ о́чи же Госпо́дни призира́ху, и Того́ у́ши моли́тву послу́шаху,/ и хоте́ния твоя́ блага́я пресла́вно соверша́хуся.

Дар че́стен вои́стинну принесе́ тя Го́сподеви благоро́дное твое́ оте́чество/ па́че даро́в А́велевых и жертв Но́евых:/ на всяк бо день сокруше́нием ду́ха же́ртва был еси́ Созда́телю.

Ага́рянская ча́да, блаже́нне, под но́ги господа́м на́шим подложи́:/ се бо часть достоя́ния твоего́ без ве́сти тща́тся сотвори́ти,/ но, предвари́в, досто́йною накажи́ ка́знию.

Разшири́ша уста́ свои́, я́ко зве́рие,/ спеша́ще твое́ поглоти́ти оте́чество, измаили́те безбо́жнии:/ си́лою у́бо твое́ю сих низложи́.

Богоро́дичен: Иса́ия ви́де Тя клещу́ у́гля Божестве́ннаго/ проро́ческима, Отрокови́це, очи́ма,/ того́ устна́м каса́ющася и грехи́ оставля́юща,/ и́бо из Тебе́ Бог вочелове́чися, ми́ра грехо́в оставле́ние.

Ин. Песнь 8

Ирмо́с: Царя́ Небе́снаго:

В черто́зех мы́сленных я́ко великому́ченик водворя́яся и лику́я,/ помина́й рабы́ своя́,/ нас, моля́щих тя, Стефа́не.

Ми́ра красота́ жесто́ка и приско́рбна,/ в мы́сли сей поуча́яся, сла́вне,/ те́мже красото́ю вои́стинну оде́я тя Влады́ка нетле́нною.

Дави́ду возлю́бленному и свиде́тельствованному от Бо́га/ ревни́тель показа́ся ве́рою и напа́стьми,/ но ты велича́йши креще́нием и муче́нием.

Богоро́дичен: Напа́стей Ты прило́ги отгоня́еши и страсте́й нахо́ды, Де́во,/ те́мже Тя пое́м во вся ве́ки.

Песнь 9

Ирмо́с: О́браз чи́стаго Рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свире́пеющую угаси́ти, мо́лимся, пещь:/ да тя, Богоро́дице, непреста́нно велича́ем.

А́ще и от нас преста́влен был еси́ я́коже Илия́,/ но нам оста́вил еси́ святы́я твоя́ мо́щи, я́коже ми́лоть честне́йшую:/ и́миже нас, страда́льче, покрыва́й от вся́каго вре́да душетле́ннаго.

Па́че зла́та и топа́зия ра́ка моще́й твои́х нам яви́ся,/ па́мять же твоя́ сла́вная па́че со́та медо́внаго горта́нем на́шим услади́ся,/ в не́йже нас осиява́ют А́нгели, с тобо́ю сходя́ще.

Ю́же жела́хом па́мять светоно́сную твою́/ и сладча́йшую прия́хом и облобыза́хом/ и мо́лимся, блаже́нне:/ твои́м ко Христу́ дерзнове́нием сохраня́й и спаса́й ста́до твое́.

Сию́ ю́же стяжа́л еси́ оби́тель, ю́же возлюби́л еси́/ и ю́же многоусе́рдне украси́л еси́, Стефа́не,/ и ны́не мощми́ твои́ми просла́вил еси́/ и ста́до, е́же в ней, моли́твами твои́ми окормля́еши.

Не и́мамы ина́го к Бо́гу хода́тая,/ и́же твоея́ оби́тели и́ноцы,/ то́кмо тебе́, Стефа́не, нас собра́вшаго,/ и мо́лим тя приле́жно:/ и та́мо нас не разлучи́ от дарова́нныя ти сла́вы от Бо́га.

Богоро́дичен: Его́же вси проро́цы рече́ниями ку́пно и гада́ньми провозвести́ша, Всецари́це,/ хотя́ща роди́тися и спасти́ челове́чество,/ Сего́ Ты, заче́нши несказа́нно,/ неизрече́нно породила́ еси́, Богоро́дице, проро́ков бы́вши сбытие́.

Ин. Песнь 9

Ирмо́с: Вои́стинну Богоро́дицу:

Лев душегу́бный неи́стовствует,/ обходя́ и напада́я пожре́ти ма́лое ста́до твое́,/ е́же умно́жи, Стефа́не, сего́ че́люсти сокруши́в.

Стреля́ния младе́нец бесо́м нахожде́ния,/ на тя наде́ющихся вменя́ем,/ тем бо бысть прогони́тель и нам покрови́тель.

Припа́даем ти, свя́те, и объе́млем любо́вию,/ целу́юще вожделе́нныя мо́щи и со слеза́ми зову́ще:/ спа́си нас, сла́вне, моли́твами твои́ми.

Богоро́дичен: На ме́сте озлобле́ния не́мощи смири́вшагося, Де́во, исцели́,/ из нездра́вия во здра́вие претворя́ющи.

Свети́лен:

Подо́бен: Пло́тию усну́в:

Позлаще́нныма крыло́ма доброде́телей к Бо́гу возлете́в,/ Стефа́н нас назира́ет, и́же па́мять его́ творя́щих,/ и Све́та исполня́ет Невеще́ственнаго.

На хвали́тех стихи́ры на 4, глас 4.

Подо́бен: Дал еси́:

Дал еси́ утвержде́ние лю́бящим Тя́, Го́споди,/ страда́льца Твоего́ до́бляго,/ и́мже подви́гл нас к терпе́ния напа́стем/ и си́м низложи́л еси́ Твоего́ созда́ния ра́тника./ Те́мже Твое́ Боже́ственное смотре́ние сла́вим,/ Иису́се всеси́льне, Спа́се душ на́ших.

Дал еси́ украше́ние деча́нской це́ркви, Го́споди,/ Стефа́на, твоего́ уго́дника,/ чудеса́ соде́вающа и исцеле́ния точа́ща,/ во сла́ву Твои́х дарова́ний./ Те́мже Твое́ Божественное смотре́ние сла́вим,/ и́же от него́ со́браннии:/ Иису́се всеси́льне, Спа́се душ на́ших.

Дал еси́ удобре́ние Се́рбским царе́м, Го́споди,/ Стефа́на прему́драго,/ того́ ревнова́ти де́ланием,/ я́же к Тебе́ любви́ созда́вшему/ и и́же к стра́ждущим ми́лости./ Те́мже Твое́ Боже́ственное смотре́ние сла́вим,/ Иису́се всеси́льне, Спа́се душ на́ших.

Сла́ва, глас 2:

Прииди́те, и́ночестии ли́цы,/ духо́вно возвесели́мся/ и киво́т, о́крест обсту́пльше, пе́сньми воспои́м похва́льными,/ благогове́йно устна́ми святы́м прикаса́ющеся моще́м/ и к слеза́м мольбу́ смеси́вше, к нему́ возопии́м:/ Христо́в уго́дниче Стефа́не/ и чудотво́рче вои́стинну,/ нас, и́хже собра́л еси́ зде,/ и та́мо собери́ в ча́сти спаса́емых.

И ны́не, Богоро́дичен:

Де́во Богоро́дице, поми́луй рабы́ Твоя́/ и изба́ви огня́ и вся́кия му́ки/ в нощи́ и во дни вопию́щих Сы́ну Твоему́, Пречи́стая:/ не пре́зри ста́до Твое́/ моли́твами, Христе́, Ро́ждшия Тя.

Славосло́вие вели́кое и отпу́ст.

Стихи́ра у́тренняя по славосло́вии.

Сла́ва, глас 5. Самогла́сен:

Святи́и Се́рбстии просвети́телие и учи́тели,/ преподо́бнии кра́льи, ца́рие и кня́зи,/ Симео́не мироточи́вый, Са́вво равноапо́стольный,/ Арсе́ние чудотво́рче, Стефа́не первовенча́нный,/ Владисла́ве и Са́вво вторы́й,/ со Феокти́стом всехва́льным и Евстра́тием,/ пресла́вный Милути́не, Никоди́ме,/ Дании́ле, Иоанни́кие, Ефре́ме,/ во прему́дрости преди́вный и во страда́ниих адама́нтный,/ све́тлый и вели́кий чудотво́рче,/ царю́ Стефа́не Деча́нский, и Еле́но;/ сла́ва и У́рошу младо́му,/ отра́сль его́ честна́ и свя́та;/ пресла́вный и вели́кий кня́же Ла́заре,/ и́же пролия́ кровь свою́/ за ве́ру и оте́чество и достоя́ние твое́./ Сла́ва тебе́, всехва́льна цари́це и вели́кая княги́не/ деспо́тице, госпоже́ А́нно,/ Анаста́сие, Еле́но и Ангели́но;/ святи́и сла́вни де́споти:/ Гео́ргие, Стефа́не, Макси́ме,/ Иоа́нне, Сирми́йския и Крушедо́льския оби́тели./ Сла́ва во бра́нех, во́ине Стефа́не Щиля́новичу,/ вели́кий целе́бниче приходя́щим к тебе́ с ве́рою./ Святы́й Пе́тре Кори́жский,/ Иоанни́кие Деви́чский, Про́хоре Пши́нский,/ Иоа́нне Ры́льский, Гаврии́ле Лесно́вский,/ Иларио́не Осого́вский, Иларио́не Мегли́нский,/ Ефре́ме, Евфи́мие, Не́сторе,/ и́же во Деча́нстей пусты́ни пости́вшиися,/ святы́й Васи́лие, но́вый чудотво́рче Захолми́йский,/ Пе́тре Черного́рский, архиере́ю преосвяще́нный,/ и́же всех вас прославля́ем и сла́вим,/ я́ко вели́кия сто́лпы и предста́тели/ ро́да Се́рбскаго крестоно́снаго,/ моли́те Бо́га о душа́х на́ших, спасти́ся нам.

И ны́не, хра́ма.

НА ЛИТУРГИИ

Блаже́нны от кано́на свята́го, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой,/ внегда́ моли́тимися к тебе́. Апо́стол Дея́ний, зача́ло 29. Аллилу́ия, глас 4. Пра́ведник, я́ко фи́никс, процвете́т,/ и я́ко кедр, и́же в Лива́не, умно́жится. Стих: Насажде́ни в дому́ Госпо́дни/ во дво́рех Бо́га на́шего процвету́т. Ева́нгелие от Иоа́нна, зача́ло 52. Прича́стен: В па́мять ве́чную:

Святой Стефан Сербский жил в конце XIII–начале XIV веков. Когда отроку исполнилось десять лет, отец его, святой король Милютин Урош II (1275–1321) (память 30 октября), желая предупредить вторжение в Сербию татарского хана Ногая, отдал ему в залог своего сына. Во дворе хана юноша прожил три года. Когда Стефан возмужал, то вступил в брак с дочерью болгарского князя. Ласковый, кроткий и любвеобильный он всех располагал к взаимной искренней любви. Мачеха – вторая жена князя, коварная гречанка, делала всё, чтобы посадить на княжеский престол своего сына Константина. Она внушила королю, что Стефан задумал недоброе на отца и даже побуждал ее к нарушению супружеской верности. По этому навету король приказал ослепить сына и вместе с семьей выслать в Царьградский монастырь Вседержителя. На пути в заточение близ селения Овчеполье святому Стефану во сне явился святитель Николай и сказал: «Не скорби, Стефане, вот на длани моей очи твои». Это видение утешило невинного страдальца и облегчило страшную боль. В монастыре он был примером для иноков, которые с любовью слушали его советы к духовной жизни. Святой Стефан приводил всех в изумление подвигами поста, смирения и молитвы. Через четыре года он терпеливо перенес и постигшую его сына смерть.

Святитель Николай вновь явился ему однажды во время всенощного бдения. Когда читали проложное житие святителя, святой Стефан, утомленный дневным трудом, заснул и увидел святителя, который сказал, что пришел исполнить свое обещание. Он осенил его крестным знамением, прикоснулся к глазам святого Стефана и полностью исцелил его от слепоты. Святой Стефан возблагодарил святителя, но, опасаясь врагов, продолжал носить повязку на глазах. Два года спустя после пережитых испытаний Господь возвеличил Своего угодника. По случаю монастырских нужд игумен отправился к королю Милютину Урошу. В разговоре король поинтересовался судьбой своего сына. «Ты спрашиваешь меня, король, о втором Иове, – отвечал игумен.– Да будет известно, что нищета его выше королевского величия твоего». В то же время явились к королю ходатаи за святого Стефана. Добрый отец, давно желавший видеть своего сына, возвратил ему свою отеческую любовь и снова поручил в управление отдельную область своего царства. Это было в 1316 году.

По смерти отца в 1321 году сербы признали законным наследником престола старшего сына – святого Стефана Уроша III. В его правление страной было много нападений со стороны венгерского и болгарского княжеств. Самым опасным был набег болгарского князя Михаила в 1331 году. Святой Стефан Урош послал письмо противнику, в котором склонял его к миру. Но, получив отказ, Сербский король вынужден был защищаться. «Господь мне помощник и не убоюся, что сотворит мне человек» (Пс. 117:6), – произнес святой, и по его молитве сербы одержали победу.

Благочестивый король в годы своего правления построил величественный храм Вознесения Господня с двумя приделами; южный – в честь святителя Николая, северный – во имя святого великомученика Димитрия Солунского.

Незадолго до смерти блаженному королю во сне явился в третий раз святитель Николай и сказал, чтобы он готовился к исходу. Мученическая кончина последовала в 1331 году. Сын Стефана – Душан, подстрекаемый врагами, задушил своего отца, чтобы занять его престол.

Тело блаженного Стефана было погребено в Дечанской обители. Через семь лет тело святого было обретено нетленным и перенесено в храм. Исцеления от слепоты у гроба святого свидетельствовали о стяжании им особого дерзновения перед Богом.