28-й день

Преподо́бнаго отца́ на́шего Ники́ты, епи́скопа Халкидо́нскаго

Преподобный Никита Исповедник

Святитель Игнатий, епископ Ростовский

Пра́зднование Пресвяте́й Влады́чице на́шей Богоро́дице ра́ди ико́ны Ея́, имену́емыя «Нике́йская»

Икона Божией Матери Никейская

Святи́теля Геро́нтия, Митрополи́та Моско́вскаго и всея́ Руси́

Святитель Геронтий, Митрополит Московский

НА ВЕЧЕ́РНИ

Стихи́ры преподо́бнаго Ники́ты, глас 4.

Подо́бен: Я́ко до́бля:

Авраа́ма страннолю́бное/ и Исаа́ка боголю́бное,/ Иа́кова нехи́тростное подража́в,/ терпе́ние изобрази́л еси́ И́ова Авситиди́йскаго,/ и кро́тость Дави́дову,/ и Моисе́ово незло́бие,/ пома́занием святы́м,/ я́коже Ааро́н дре́вле,/ пома́зан, святи́телю Богоно́се,/ чудотво́рче свяще́нне.

Мно́гое беззло́бие твое́/ зло́бу прогна́ де́монскую/ благода́тию Боже́ственнаго Ду́ха,/ спострада́нием твои́м возвесели́в Бо́га,/ Его́же возжела́л еси́,/ моли́тв прилежа́нием просвети́ся дух твой./ Те́мже прия́л еси́ чуде́с благода́ть/ цели́ти неду́ги, Ники́то,/ благоче́стно притека́ющим к тебе́.

Сро́дством связа́еми,/ зако́ны удержа́сте Свята́го Ду́ха, свяще́нницы,/ и, стопа́м после́дующе бы́вше па́стыря Богому́драго,/ облиста́вшаго лучи́ пресла́вных исцеле́ний,/ украси́стеся подо́бными ви́ды исцеле́ний,/ пресла́вный Ники́то со Игна́тием Богому́дрым.

Стихи́ры Богоро́дицы, глас и подо́бен то́йже:

Осужде́ния изба́ви, Пресвята́я Богоневе́сто,/ и лю́тых прегреше́ний/ смире́нную мою́ ду́шу,/ и сме́рти измени́ моли́твами Твои́ми,/ и да́руй оправда́ние получи́ти в день испыта́ния,/ е́же получи́ша святы́х собо́ри,/ покая́нием очище́на мя пре́жде конца́ покажи ́/ и сле́зными излия́нии.

Ту́чами Ду́ха, Пресвята́го, Пречи́стая,/ мою́ мысль ороси́,/ Я́же ка́плю ро́ждшая, Христа́,/ неисче́тно безме́рная беззако́ния челове́ков щедро́тами измы́вшую;/ изсуши́ исто́чник страсте́й мои́х/ и пото́ка мя сподо́би пи́щи живы́я/ при́сно моли́твами Твои́ми.

Покая́ния изря́дное и спаси́тельное врачевство́,/ Я́же Бо́га ро́ждшая, Спа́са моего́,/ и слез то́ки, и часа́ по́мысл, гро́знаго и стра́шнаго,/ и Суда́ неумы́тнаго/ Ты ми да́руй избежа́ти моли́твами Твои́ми, о Де́во!/ муче́ния тре́петнаго/ и Боже́ственную улучи́ти благода́ть.

Сла́ва, и ны́не, Богоро́дичен:

Тьма́ми, Пречи́стая, обеща́хся/ покая́ние сотвори́ти о мои́х согреше́ниих,/ но не оставля́ет мя люби́мый зол мои́х обы́чай./ Сего́ ра́ди Тебе́ вопию́ и припа́даю, моля́ся:/ Ты мя, Влады́чице, изми́ такова́го мучи́тельства,/ наставля́ющи мя к лу́чшим/ и спасе́ния близ су́щим.

Крестобогоро́дичен:

На Кресте́ Тя я́ко узре́ пригвожде́на, Го́споди,/ А́гница и Ма́ти Твоя́ дивля́шеся/ и, что́ виде́ние сие́, – взыва́ше, – Сы́не возжеле́нне?/ сия́ Ти неве́рный собо́р воздаде́, беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному соше́ствию Твоему́, Влады́ко.

Тропа́рь, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́,/ Я́же веще́й и́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Ники́то,/ моли́ Христа́ Бо́га/ спасти́ся душа́м на́шим.

Кано́н, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Боже́ственными светоли́тии, преподо́бне, облиста́н, светови́ден был еси́;/ ве́рно светоно́сное твое́ успе́ние творя́щия просвети́,/ страсте́й мглу отъе́мля.

Яви́лся еси́ светови́дными дея́нии, све́та испо́лнен,/ су́щия в нощи́ лю́тыя просвеща́я и к све́ту Небе́сному наставля́я Ду́хом,/ о́тче Ники́то свяще́нне.

Чуде́с облиста́еши дарова́ния/ приступа́ющим всегда́ свяще́нней твое́й ра́це,/ вме́сто трудо́в и боле́зней твои́х от Бо́га воздая́ние сие́, преблаже́нне, прие́м.

Богоро́дичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на/ и пло́тию родила́ еси́ из Отца́ без ма́тере,/ нас же ра́ди из Тебе́ без отца́ бы́вша.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Возне́слся еси́, смири́вся Христа́ ра́ди,/ и бровь, преподо́бне, мы́сленнаго зми́я Ду́хом в зе́млю смири́л еси́.

Вели́ких от Бо́га сподо́бився даро́в,/ вели́к свяще́нник был еси́, о́тче святи́телю Богоприя́тне.

Беззло́бием твою́ жизнь, я́коже младе́нец, соверша́я,/ погуби́л еси́ враго́в, преподо́бне, всю зло́бу благода́тию.

Богоро́дичен: Еди́ну в жена́х благослове́нную Богоро́дицу,/ я́ко Бо́жие селе́ние преблаголе́пно, вси ра́достию просла́вим.

Седа́лен, глас 4.

Подо́бен: Ско́ро предвари́:

От младе́нства взем твой крест,/ благоче́стно Христу́ после́довал еси́,/ увяди́в плотско́е воздержа́нием мудрова́ние,/ те́мже на святи́тельсте седа́лищи, Ники́то, возне́сл еси́ Влады́ку,/ зна́меньми разли́чными твою́ украси́вша ра́ку, Богоблаже́нне.

Сла́ва, и ны́не, пра́здника или́ Богоро́дичен:

Чи́стая, Всенепоро́чная и Неискусому́жная,/ Я́же еди́на Безле́тнаго Сы́на и Сло́ва Бо́жия в ле́то ро́ждши,/ Сего́ со святы́ми и честны́ми патриа́рхи, и му́ченики, и проро́ки, и преподо́бными моли́/ дарова́ти нам очище́ние и ве́лию ми́лость.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что́ но́вое и стра́нное сие́ чу́до, Сы́не Мой?/ Ка́ко, Жизнь всех, вкуша́еши сме́рти,/ оживи́ти ме́ртвыя хотя́, я́ко Милосе́рд?

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Всено́щными бде́нии и вседне́вными, о́тче Богому́дре, стоя́нии,/ пло́ти движе́ния вся увяди́л еси́ и, ра́дуяся, взыва́л еси́:/ сла́ва си́ле Твое́й, Го́споди.

Повину́л еси́ непоко́рное пло́ти твоея́ душе́вными си́лами, Богому́дре,/ прия́л еси́ благода́ть, всеблаже́нне, отгоня́ти ду́хи и очища́ти неду́ги.

Си́лою Боже́ственною укрепля́емь, святи́телю,/ де́монския полки́ победи́л еси́ вся,/ побе́ды, я́ко тезоимени́т, вене́ц чуде́с от Венцеда́вца насле́дил еси́.

Богоро́дичен: Украси́лася еси́ духо́вными красота́ми,/ Отцу́ Собезнача́льнаго Сло́ва заче́нши и пло́тию ро́ждши, Де́во Всенепоро́чная,/ Его́же о ми́ре моли́.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Кро́тостию я́ве души́ украша́емь,/ всели́лся еси́, святи́телю, в зе́млю кро́тких, блаже́н быв.

Струя́ми, о́тче, напои́вся дарова́ний Ду́ха,/ целе́ния жела́ющим источа́еши, Ники́то Богому́дре свяще́нне.

Житие́ твое́, све́том доброде́телей сия́я,/ я́коже многоце́нною у́тварию, чуде́с благода́тию, всеблаже́нне, украси́ся.

Богоро́дичен: Тя ору́жие непобеди́мое на враги́ предлага́ем,/ Тя утвержде́ние и наде́жду на́шего спасе́ния, Богоневе́сто, стяжа́хом.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Свеща́ светоза́рная тро́ичная возсия́ла есть,/ со Игна́тием Ники́та, свяще́нное самобра́тство,/ и подаю́т исцеле́ния ве́рным, све́тло блиста́юще.

Друг дру́гу по пло́ти му́дрии сро́дствующе,/ и́стиннаго по Ду́ху сро́дства ны́не сподо́бистася, единонра́вно,/ и Бо́гу благоуго́дно пожи́вша.

Губи́тельныя отбе́г ересе́й ти́ны честны́м поклоне́нием Христо́вы ико́ны,/ е́же по о́бразу спасл еси́, святи́телю Ники́то Богоприя́тне.

Богоро́дичен: Дверь, е́юже про́йде еди́н Вы́шний,/ покая́ния ми две́ри и вхо́ды отве́рзи спасе́ния,/ от вся́каго мя соблюда́ющи вре́да, Всенепоро́чная.

Конда́к, глас 8.

Подо́бен: Возбра́нной:

Све́тлостию дел твои́х просия́л еси́, преподо́бне,/ апо́стольскаго престо́ла насле́дник был еси́, Ники́то,/ и, я́ко со́лнце, облиста́л еси́ твое́й па́стве, о́тче,/ вся Боже́ственных уче́ний испо́лнь./ Те́мже зове́м ти:/ ра́дуйся, Халкидо́ну удобре́ние.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Со святи́тели водворя́ешися вои́стинну, о́тче му́дре,/ сия́ния мы́сленнаго исполня́емь,/ и нас озари́, взыва́ющия:/ благослове́н еси́ в хра́ме сла́вы Твоея́, Го́споди.

Я́ко пастыренача́льник, я́ко Бо́жий предста́тель непоро́чен,/ Сему́ чи́сты же́ртвы, све́тло воспева́я, прине́сл еси́:/ благослове́н еси́ в хра́ме сла́вы Твоея́, Го́споди.

Па́стырь показа́лся еси́,/ слове́сною, Ники́то, цевни́цею ста́до слове́сное к па́жити и́стинных уче́ний призыва́я,/ благослове́н еси́, – вопия́, – в хра́ме сла́вы Твоея́, Го́споди.

Испове́данием житие́ украси́в, о́тче,/ целе́ний благода́ть и́стинную от Ду́ха прия́л еси́,/ благослове́н еси́, Бо́же мой, – вопия́, – в хра́ме сла́вы Твоея́, Го́споди.

Богоро́дичен: Да обожи́т челове́чество яви́ся Челове́к, Отрокови́це,/ из чре́ва Твоего́ плоть Изба́витель заимова́в хоте́нием./ Благослове́нна Ты в жена́х, Пренепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Вели́ких трудо́в воздая́ния я́ве прии́м: свет неизглаго́ланный,/ жизнь безсме́ртную, преподо́бне, и черто́г неразори́мый,/ Венцеда́вцу твоему́ Христу́ вопие́ши, ра́дуяся:/ благослови́те, вся дела́ Госпо́дня, Го́спода.

Ми́лостию ми́лости ища́, ни́щия удово́лил еси́,/ убо́гия напита́л еси́, наги́я оде́ял еси́,/ сла́вы себе́ оде́жду притворя́я,/ мона́шествующих о́браз, Ники́то, был еси́, вопию́щих:/ благослови́те, вся дела́ Госпо́дня, Го́спода.

Це́рковь быв прекра́сна Боже́ственнаго Ду́ха ума́ чистото́ю,/ отгоня́еши ду́хи лука́вствия и неду́ги очища́еши,/ приходя́щим к тебе́ и вопию́щим:/ благослови́те, вся дела́ Госпо́дня, Го́спода.

Моги́й вся о Христе́, и ны́не ясне́йши и чисте́йши Бо́гу соединя́яся,/ предста́ни, его́же стяжа́л еси́, ста́ду, преподо́бне,/ творя́щему твое́ ве́рно Боже́ственное успе́ние и вопию́щу:/ благослови́те, вся дела́ Госпо́дня, Го́спода.

Богоро́дичен: Все́лься во Твое́ чре́во, Христо́с,/ вся́ческих Госпо́дь, я́коже изво́ли,/ святе́йшу Тя показа́ А́нгел, Ма́ти Де́во,/ освяще́ние и просвеще́ние нам дарова́, вопию́щим:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.

Свещенноле́пно после́дуя твоему́ тезоимени́тому и Боже́ственному,/ сего́ сподо́бился еси́ о́бразом, Ники́то, о́тче Богоблаже́нне,/ и заре́ю Ду́ха благода́тною обогати́лся еси́, Богодохнове́нне.

Яви́стеся, Тро́йческою благода́тию обога́щшеся, Богоно́сцы,/ ра́вно от нея́ прие́мше исцеле́ний Боже́ственное де́йство/ и чи́сто пожи́вше и богоуго́дно, досточу́днии.

Днесь па́мять твоя́, о́тче, па́че со́лнца блиста́ет сия́нием доброде́телей,/ чудесы́ вселе́нную озаря́ющи и ве́рныя уясня́ющи/ священнотаи́нниче всече́стне.

Я́коже денносве́тлыя зве́зды, о́тче Ники́то,/ со священноде́йственным Игна́тием я́вльшеся,/ вся у́бо просвети́те, благочести́вии и блаже́ннии,/ восхваля́ющия вас всегда́.

Богоро́дичен: Све́та жили́ще яви́лася еси́,/ от Отца́ пре́жде денни́цы Сло́ву возсия́вшаго,/ Отрокови́це Де́во, еди́на Богора́дованная,/ и ве́рныя просве́щшаго, и преподо́бныя венча́вшаго.

Преподобный Никита Исповедник жил во второй половине VIII века. За свою святую и добродетельную жизнь он был возведен в сан епископа Халкидонского. Святитель Никита отличался милосердием, всегда помогал нищим, принимал в своем доме странников, заботился о сиротах и вдовах, заступался за обижаемых. В царствование иконоборца Льва Армянина (813–820) святитель Никита мужественно обличал иконоборческую ересь и убеждал своих пасомых благоговейно поклоняться святым иконам Господа Иисуса Христа, Божией Матери и угодников Божиих. За свое исповедничество святитель перенес много страданий от нечестивого императора и его единомышленников-иконоборцев, был подвергнут мучениям и отправлен в ссылку. После смерти императора святой Никита возвратился на святительскую кафедру.

Скончался святой Никита Исповедник в начале IX века. У мощей, которые находились в Халкидоне, совершались чудесные исцеления и другие различные знамения. «Знаменьми различными твою украсивша раку, богоблаженне, целение желающим источаеши», – свидетельствует об этом богослужебный текст. В каноне службы святителю, написанном константинопольским пресвитером и песнописцем Иосифом, прославляется также брат святителя Никиты – святой Игнатий.

Литература:

1. Святитель Димитрий, митрополит Ростовский. Жития святых. Т. 9. М., 1908.

2. Филарет (Гумилевский), архиепископ Черниговский. Жития святых, чтимых Православной Церковью. Май. СПб., 1885.

3. Дестунис С. Жития святых. Май. СПб., 1892.

4. Настольная книга священнослужителя. Т. 3. М., изд. Московской Патриархии, 1979.

И́же во святы́х отца́ на́шего Игна́тия епи́скопа, Росто́вскаго чудотво́рца

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Преподо́бне о́тче Игна́тие,/ ты еще́ во утро́бе ма́терии/ святи́тельства прозва́ние/ и́мя прие́м в нарече́нии./ Ты измла́да Христа́ возлюби́л еси́,/ прие́м па́ству слове́сных ове́ц,/ до́бре пасл еси́ Це́рковь Христо́ву,/ тем твое́ пра́зднуем успе́ние,/ ра́достию Христа́ велича́юще,/ возвели́чившаго тебе́, Своего́ уго́дника.

Преподо́бне о́тче Игна́тие,/ испроси́ к Бо́гу моли́твами твои́ми Це́ркве утвержде́ние:/ святи́тели покры́й ми́лостию твое́ю,/ христолюби́вому во́инству побе́ды да́руй на враги́ и одоле́ние,/ и недви́жиму и необори́му сохрани́тися гра́ду на́шему,/ и ве́рным лю́дем грехо́в оставле́ние,/ всем притека́ющим к ра́це моще́й твои́х,/ све́тло творя́щих пра́зднество успе́ния твоего́:/ за ны, свя́те, помоли́ся.

Преподо́бне о́тче, Богому́дре святи́телю Игна́тие,/ ты бо вои́стинну яви́лся еси́,/ просвеща́я всех омраче́нная сердца́,/ наставля́я на путь и́стинный./ Ты был еси́ убо́гих, и си́рых и вдови́ц засту́пник,/ вельмо́ж тве́рдое наказа́ние и утвержде́ние,/ и всем, ве́рою притека́ющим под кров Пречи́стыя Бо́жия Ма́тере,/ испроси́, свя́те, грехо́в оставле́ние,/ моля́ся за ны ко Влады́це.

Сла́ва, глас то́йже:

Апо́столом ревни́теля,/ Игна́тия, преблаже́ннаго отца́ и учи́теля,/ соше́дшеся, восхва́лим,/ и́мже Христа́ Бо́га позна́хом/ и, от тьмы к све́ту приближа́ющеся,/ о́чи и сердца́ просвеща́ем,/ в па́мять его́ ликовству́юще, ку́пно весели́мся,/ обре́тше вожда́ правове́рна во Ца́рствие Христо́во.

И ны́не, Богоро́дичен.

Вход. Проки́мен дне. И чте́ния 3 святи́тельская

При́тчей чте́ние (главы́ 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва;/ от уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т,/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзски же предо мно́ю устны́ лжи́выя./ С пра́вдою в си глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим,/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (главы 10, 6, 8, и 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́/ и от Го́спода обря́щут благода́ть и сла́ву./ Язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утру́дится,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю,/ таи́бница бо есть Бо́жия хи́трости/ и обрета́тельница дел Его́./ Труды́ ея́ суть доброде́тели,/ целому́дрию же и ра́зуму та учи́т,/ пра́вде и му́жеству,/ и́хже потре́бне ничто́же есть в житии́ челове́ком./ А́ще же и мно́гаго иску́сства жела́ет кто,/ весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ,/ яко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тварьми́/ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от престо́ла сла́вы Твоея́,/ да, су́щи со мно́ю, научи́т мя,/ что́ благоуго́дно есть пред Тобо́ю./ И наставит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (главы́ 4, 6, 7 и 2):

Похваля́ему пра́веднику возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете./ Нача́ло бо ея́ любы́ и соблюде́ние зако́на,/ почти́те прему́дрость, да во ве́ки ца́рствуете./ Возве́щу вам и не скры́ю от вас та́ин Бо́жиих,/ я́ко Той му́дрости Наста́вник есть,/ и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней Дух Разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца/ и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющих ей от боле́зней изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ я от ловя́щих,/ и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие,/ и никогда́же премо́жет зло́ба му́дрости,/ ни́же пре́йдет злы́я, облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному,/ не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго,/ я́ко неуго́ден нам есть,/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́нием на́шим,/ и тя́жек нам есть,/ и ви́дим, я́ко неподо́бно ины́м житие́ его́/ и измене́ны стези́ его́./ В поруга́ние вмени́хомся ему́,/ и удаля́ется от путе́й на́ших,/ я́ко от нечисто́т, и блажи́т после́дняя пра́ведных./ Ви́дим у́бо, а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́ и иску́сим беззло́бство его́,/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася,/ ослепи́ бо я зло́ба их,/ и не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла./ Щедр, и ми́лостив,/ и дая́й преподо́бным Свои́м благода́ть,/ и Свое́ю мы́шцею го́рдым противля́яйся.

На стихо́вне стихи́ры, глас 1.

Подо́бен: Всехва́льнии:

Богому́дре Игна́тие,/ твоя́ мо́щи, ра́дующеся, пресве́тло целу́ем/ и почерпа́ем благода́ть цельба́м, любе́зно тя хва́ляще/ и ве́рою непреста́нно моля́щеся:/ Христу́ моли́ся дарова́ти душа́м на́шим/ мир и ве́лию ми́лость.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Исцеле́ний во́ды твоя́ ра́ка притека́ющим источа́ет всегда́,/ святи́телю досточу́дне,/ и омыва́ет стра́сти,/ и потопля́ет полки́ бесо́вския/ де́йством Свята́го Ду́ха./ Те́мже моли́ся дарова́ти/ душа́м на́шим мир и ве́лию ми́лость.

Стих: Честна́ пред Го́сподем/ смерть преподо́бных Его́.

Апо́столом сопресто́льна,/ иера́рхом единому́дренна,/ по́стником единоревни́теля восхва́лим,/ учи́телей печа́ть и Боже́ственное изображе́ние Христо́вых та́ин,/ святи́телю блаже́нне./ Ему́же моли́ся дарова́ти душа́м на́шим/ мир и ве́лию ми́лость.

Сла́ва, глас 6:

Правосла́вныя ве́ры/ духо́вныя ра́ди му́дрости/ учи́тель яви́лся еси́, Игна́тие блаже́нне,/ Христа́ обре́т наста́вника,/ сове́ты злосла́вныя ерети́чества разсы́пал еси́./ Тем мо́лим тя, свя́те:/ моли́ся Христу́ Бо́гу о нас,/ до конца́ е́же от Тебе́ изве́ствованную пра́вую ве́ру/ недви́жиму сохрани́ти/ и получи́ти ве́лию ми́лость.

И ны́не, Богоро́дичен.

Тропа́рь, глас 4:

Благове́рия просве́щся уче́нии,/ святи́тельства прие́м па́ству/ и апо́столов насле́дник быв,/ тем прия́л еси́ от Бо́га дар чуде́с,/ святи́телю о́тче Игна́тие,/ моли́ Христа́ Бо́га,/ да спасе́т ду́ши на́ша.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

О́тче Богому́дре, святи́телю Игна́тие,/ отве́рзи ми, недосто́йному, устне́ воспе́ти тя/ и приими́, я́ко кади́ло, от убо́жества моего́,/ е́же ти принесо́х, недосто́йный.

Воспое́м вси свяще́ннаго святи́теля Игна́тия,/ почти́м засту́пника, и утвержде́ние гра́ду на́шему Росто́ву,/ и храни́теля неусы́пна.

Спаси́тельным Христо́вым за́поведем после́довал еси́, прему́дре святи́телю Игна́тие:/ вдови́цам и си́рым был еси́ засту́пник/ и гра́ду на́шему вели́кое защище́ние.

Богоро́дичен: Пречи́стая Богоро́дице, Соде́теля и Спа́са поро́ждши всем, пою́щим Тя,/ спаси́ от бед град Твой Росто́в,/ непреста́нно моля́щи Сы́на Твоего́ за ны и Бо́га на́шего.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю ве́рных утвержде́ние,/ еди́не Человеколю́бче.

Сокруши́ супоста́ты безбо́жныя, преподо́бне, моле́нием твои́м к Творцу́ и Бо́гу/ и си́лу их, вооруже́нную на ны,/ пога́нская наше́ствия покори́ под но́ги ве́рному во́инству на́шему.

Ты прояви́л еси́, Влады́ко, после́днему ро́ду на́шему чудотво́рца святи́теля Игна́тия,/ гра́ду Росто́ву утвержде́ние,/ Це́ркви Твое́й и́стовое пра́вило,/ иере́йскому же чи́ну наста́вника.

Прикосну́вшуся, свя́те, пречестна́го те́ла твоего́ Стефа́ну архимандри́ту,/ пе́рсту ручно́му, к дла́ни прико́рчившуся от рожде́ния,/ Бо́жиею благода́тию дал еси́ простира́тися.

Богоро́дичен: Бу́ди ми, Де́во, прибе́жище, и приста́нище,/ и стена́ необори́ма, и Засту́пница,/ Я́же Бо́га поро́ждши пло́тию, Пречи́стая,/ Изба́вителя всеще́драго и Спа́са пою́щим Тя, Богоневе́стная.

Седа́лен, глас 8.

Подо́бен: Прему́дрости:

Украша́яся прему́дростию ра́зума,/ горды́ню низложи́л еси́ плотски́я тяготы́/ и был еси́ оби́телище Ду́ха Пресвята́го,/ непреме́нным простира́яся ра́зумом к Лю́бящему тя./ Тем, ре́вностию Боже́ственною разгара́яся, сла́вне,/ си́рых, и убо́гих, и вдови́ц был еси́ засту́пник,/ гра́да же Росто́ва утвержде́ние,/ яви́вся А́нгелом собесе́дник, святи́телю Игна́тие,/ моли́ Христа́ Бо́га грехо́в оставле́ние дарова́ти,/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т,/ пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся Всесвято́му Рождеству́ Твоему́.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Благода́тию Богоно́сец нарица́емь вои́стинну, Игна́тие,/ во Христа́ обле́клся еси́ жития́ ра́ди чистоты́/ и научи́л еси́ сла́вити в Тро́ице Еди́наго Бо́га.

Изба́ви ста́до твое́ от грехо́вныя бу́ри, Игна́тие святи́телю, бед же и скорбе́й,/ приводя́ в приста́нище Боже́ственныя́ во́ли Его́.

Яви́лся еси́ вои́стинну Христо́в уго́дник, о́тче Игна́тие:/ моля́ся не преста́й от напа́стей, и бед, и скорбе́й изба́вити ста́до твое́,/ от ну́жды и печа́ли.

Богоро́дичен: Свяще́нно сла́вят Тя святи́тельстии собо́ри и всех преподо́бных ли́цы:/ Зижди́теля бо их я́ко Младе́нца на руку́ Твое́ю понесла́ еси́, Богоро́дице.

Песнь 5

Ирмо́с: Вcку́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

О́крест стоя́ще ра́ки твоея́ святи́телю Игна́тие,/ тя име́ем к Бо́гу хода́тая, и заступле́ние гра́да твоего́ Росто́ва,/ и утвержде́ние необори́мо.

Ми́лостив быв убо́гим, ми́лость душе́вную испроси́, прехва́льне,/ ми́лостыню стяжа́в, о́тче Игна́тие,/ свещу́ све́тлу устро́ил еси́.

Жили́ще быв Пресвята́го Ду́ха вои́стинну, блаже́нне Игна́тие,/ Того́ явле́нными Боже́ственными дарми́ до́бре обогати́лся еси́.

Богоро́дичен: Ми́ро та́йное Тя имену́ем, Пречи́стая,/ я́ко ро́ждши Бо́га пло́тию,/ источа́ющаго Боже́ственное ми́ро всем, притека́ющим под кров Твой.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Житие́ твое́ целому́дренно, священноявле́нне, соверши́в, пра́вдою украси́лся еси́,/ и му́жеством смы́сла доброде́тели сочта́в себе́,/ преблаже́нне святи́телю Игна́тие.

Сохрани́ град твой Росто́в, преблаже́нне святи́телю Игна́тие,/ от безбо́жных и чужеве́рных нахожде́ний и усо́бныя ра́ти,/ моля́ся не преста́й Влады́це Христу́ о ста́де твое́м.

Ты у́бо по сме́рти, я́ко жив,/ на погребе́нии твое́м прие́м сви́тки твои́ма рука́ма,/ и́хже свяще́нники в животе́ твое́м освяти́л еси́ Бо́гу,/ рече́ бо Госпо́дь:/ прославля́ющаго Мя просла́влю.

Богоро́дичен: Превы́шши бысть Вы́шних сил, Богоблагода́тная,/ заче́ншая Сло́во Бо́жие неизрече́нно, вся́ческая сло́вом сотво́ршее,/ от Отца́ пре́жде век ро́ждшееся,/ Того́, Чи́стая, ро́ждшая неизрече́нно.

Конда́к, глас 4.

Подо́бен: Яви́лся еси́:

Яви́ся днесь пресве́тлая па́мять твоя́,/ святи́телю преблаже́нне Игна́тие,/ в ми́ре све́тло сия́ющи и явля́ющи всем Боже́ственное сия́ние.

И́кос:

Из чре́ва ма́терня освяще́ннаго святи́теля Госпо́дня/ похва́лим ны́не вси, преподо́бнаго Игна́тия,/ гра́да Росто́ва утвержде́ние,/ благода́тныя да́ры прии́мша Боже́ственныя сла́вы и в чудесе́х сла́внаго,/ вси, ве́рою те́плою притека́юще к ра́це моще́й его́./ Тем и аз, недосто́йный и гре́шный, наде́юся/ моли́твами его́ ко Влады́це и Пречи́стей Его́ Ма́тери ми́лость прия́ти в День су́дный/ соде́янных мно́ю зол и проще́ние получи́ти,/ явля́ющи всем Боже́ственное сия́ние.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Отве́рзи ми дверь покая́ния, святи́телю Игна́тие,/ да омы́ю скве́рну окая́нныя моея́ души́/ и те́ла моего́ вся чу́вства,/ да приношу́ песнь Го́сподеви, све́тло зовя́:/ оте́ц на́ших Бо́же, благослове́н еси́.

Иму́ще тя твои́ раби́ засту́пника те́пла/ и сте́ну необори́му, гра́да Росто́ва утвержде́ние,/ не убои́мся супоста́тных враго́в,/ но побежда́ем си́лою Христо́вою, взыва́юще:/ оте́ц на́ших Бо́же, благослове́н еси́.

Уста́вы оте́ческими утверди́л еси́, му́дре,/ це́рковь Пречи́стыя Ма́тере Бо́жия,/ и свяще́нства ле́потою преукра́шенно сохрани́л еси́,/ и уче́ньми твои́ми наказа́л еси́ взыва́ти:/ оте́ц на́ших Бо́же, благослове́н еси́.

Богоро́дичен: Спаси́тельное приста́нище, Богоро́дице Де́во, Тя иму́ще,/ жите́йских бед и бу́ри избе́гаем,/ к приста́нищу тишины́ Твоея́ приходя́ще и Сы́ну Твоему́ вопию́ще:/ оте́ц на́ших Бо́же, благослове́н еси́.

Песнь 8

Ирмо́с: На горе́ святе́й просла́вльшася/ и в купине́ огне́м Приноде́вы/ Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Побежде́н быв враго́м прегреше́ньми мно́гими молв жите́йских,/ ве́рою прихожду́ и, я́ко Манасси́я, вопию́ Ти, Христе́,/ святи́теля моле́нием спаса́емь, зову́:/ Го́спода по́йте и превозноси́те Его́ во ве́ки.

Вооружа́ются на ны, смире́нныя лю́ди твоя́,/ святи́телю пречестны́й Игна́тие, сы́нове Ага́рины,/ но сокруши́ их неви́димою си́лою,/ моле́нием твои́м ко Влады́це за при́сныя рабы́, пою́щия:/ Го́спода по́йте и превозноси́те Его́ во ве́ки.

Моли́твы, преблаже́нне, и моле́ния творя́ща тебе́/ приле́жно к Бо́гу при́сно за рабы́ твоя́,/ в печа́лех засту́пника и побо́рника иму́ще тя к Бо́гу, от всех бед спаса́емся,/ Го́спода пою́ще и превознося́ще Его́ во ве́ки.

Богоро́дичен: Влады́чице, Де́во Чи́стая Препросла́вленная,/ со святи́телем к Сы́ну Твоему́, Царю́, моли́ся приле́жно,/ от вся́кия ну́жды и беды́ изба́витися гра́ду Твоему́ Росто́ву,/ Тебе́, Госпоже́, ве́рою блажа́щу, и пою́щу,/ и превознося́щу во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Вельми́ ра́дуется о тебе́, честны́й о́тче, святи́телю Игна́тие, при́сный твой град Росто́в,/ име́я тя на вся́ко вре́мя помо́щника и засту́пника,/ и ны́не не отходи́ от нас, моли́твы творя́ за ны к Бо́гу,/ я́ко да от безбо́жных ва́рвар нас изба́виши, тя велича́ющих.

Я́ко блудни́ца, и мыта́рь, и разбо́йник вопию́ ти от се́рдца:/ согреши́х, прости́ мя, Влады́ко, мно́гих мои́х злых прегреше́ний/ и изба́ви от вся́каго зла святи́теля моле́нием Игна́тия,/ я́ко да Твою́ ми́лость непреста́нно велича́ем.

Прииди́те, собере́мся, вси росто́встии наро́ди,/ к блаже́нней ра́це преподо́бнаго Игна́тия/ и со слеза́ми возопие́м к Бо́гу моля́щеся:/ изба́ви, Го́споди, лю́ди Твоя́/ и не даждь достоя́ния Твоего́ ро́ду исма́ильтескому,/ я́ко да возвели́чим ми́лость Твою́ во ве́ки.

Богоро́дичен: Мари́е Богоневе́сто, Влады́чице,/ омраче́нное мое́ се́рдце с душе́ю мольба́ми Твои́ми просвети́/ и жи́зни ве́чныя сподо́би мя, Госпоже́,/ не помина́ющи мои́х безчи́сленных зол,/ Сы́на и Бо́га Твоего́ моли́ за мя, окая́ннаго,/ и певцы́ Твоя́ сохрани́, Пречи́стая.

Свети́лен.

Подо́бен: Ученико́м:

Чу́днаго и сла́внаго святи́теля, Игна́тия вели́каго,/ прииди́те, пе́сньми свяще́нными да похва́лим,/ я́ко росто́вцем па́стыря и а́нгельским чино́м сослуже́бника бы́вша.

На хвали́тех стихи́ры на 4, глас 1.

Подо́бен: Небе́сных чино́в:

На небеси́ препочи́л еси́, веселя́ся,/ моля́ за ны Пресвяту́ю Тро́ицу,/ ми́лость пода́ти нам/ и ми́рно житие́ и безгре́шно,/ я́ко в Ту ве́рующим при́сно,/ ско́рби гонза́ти и ра́дование улучи́ти.

Милосе́рдия ра́ди твоего́/ исто́чник нам да́руй благода́ти,/ вско́ре ра́дости испо́лнь,/ пода́ждь нам утеше́ние, су́щим в печа́лех,/ моля́ Христа́, всесла́вне,/ спасти́ся душа́м на́шим.

Да в весе́лие вшед нетле́емо,/ весе́лия да́ти моли́/ и спасти́ рабы́ твоя́:/ мо́жеши бо, Игна́тие,/ призыва́ющих тя беды́ вся разгна́ти,/ моля́ Христа́, исцели́ти боля́щия.

Сла́ва, глас 1:

От зако́ннаго ко́рене прозя́бш, возра́сл еси́,/ усыне́ния вода́ми напое́н я́сно, Игна́тие:/ и́бо Христо́вы Це́ркве, я́ко фи́никс высокове́рхий, процве́л еси́ нам,/ преуцве́товая ве́рныя./ Тем, ны́не со святи́тели предстоя́,/ Христу́ моли́ся о душа́х на́ших.

И ны́не, Богоро́дичен.

На Литурги́и слу́жба сего́ ме́сяца в 23-й день святи́телю Лео́нтию Росто́вскому

Святитель Игнатий, епископ Ростовский, родился в благочестивой семье и был воспитан в строгих христианских правилах. В ранней юности принял постриг в Богоявленском монастыре Ростова Великого, в котором позднее за многие духовные подвиги был некоторое время настоятелем в сане архимандрита.

В 1261 году святой Игнатий был возведен на епископскую кафедру Ростова Великого. Он управлял епархией в течение 26 лет, в один из самых трудных периодов в истории Руси – монголо-татарского ига. В этих условиях епископ Игнатий самоотверженно служил Русской Церкви, утверждая паству в верности Святому Православию.

Святой Игнатий – единственный из всего сонма святых, в земле Российской просиявших, которого Господь прославил нетлением и целебным даром мощей еще до их погребения. Святой угодник Божий преставился 28 мая 1288 года. В Ростов Великий на поклонение усопшему архипастырю стали стекаться многочисленные верующие. Неутешным был их плач.

Гроб с телом облаченного в архиерейские одежды святителя из-за необыкновенного скопления народа не сразу могли внести в храм. Чин погребения совершался под открытым небом. Когда гроб понесли в храм, две благочестивые монахини, Феодосия и Ксения, и некоторые другие молящиеся увидели, как святитель восстал из гроба и, как бы летя по воздуху, остановился над тем местом, которое было предназначено для погребения, благословляя собравшийся народ. Прикоснувшийся к мощам святителя, архимандрит Стефан, у которого от рождения не разгибались пальцы руки, тотчас получил чудесное исцеление. При виде чудес, которыми Господь прославлял Своего угодника, было решено не предавать земле святые мощи почившаго.

На следующий день, когда ко гробу святителя Игнатия был принесен список с именами всех рукоположенных им при жизни священников и диаконов, усопший святитель, как живой, протянул руку и принял поданный ему свиток. Святые мощи славного угодника Божия покоились открыто, у северной стороны иконостаса в ростовском Успенском соборе. «Иконописный подлинник» дает следующее описание образа святителя Игнатия: «Подобием сед, брада аки Алексея митрополита, на главе клобук бел, ризы святительские камчатые лазоревые, исподняя багряная, в омофоре, в руках Евангелие».

Литература:

1. Толстой М. В. Книга, глаголемая описание о российских святых. 381, 1887.

2. О святых, прославленных в Российской Церкви. СПб., 1862.

3. Бухарев И. Жития святых. М., 1892.

Тропа́рь, глас 4:

Бысть чре́во Твое́ свята́я трапе́за,/ иму́щи Небе́снаго Хле́ба, Христа́,/ от Него́же всяк яды́й не умира́ет,/ я́коже рече́ вся́ческих,/ Богоро́дице, Пита́тель.

Конда́к, глас 6:

Предста́тельство христиан непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́ я́ко Блага́я на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чтущих Тя.

Икона Божией Матери Никейская относится к наиболее древнему иконографическому типу, получившему название Оранты. На иконе изображена Пресвятая Богородица с воздетыми руками. На престоле находится потир, а в нем Богомладенец. Символический смысл композиции состоит в том, что Богоматерь отдает Младенца всему миру.

Историческое содержание события, связанного с прославлением иконы, следующее. В 304 г. завоеватель Амир вторгся в пределы Малой Азии и осадил город Никею. Огромные полчища врагов наводили страх и ужас на немногочисленных воинов, оборонявших город. Не надеясь на свои силы, горожане стали искать Божественной помощи и Небесного покровительства. Но даже в этот критический момент среди защитников города не было единодушия в вере. Некий язычник Константин, видя в нашествии врагов наказание за отступление от языческой веры отцов к христианству, решил совершить поругание над иконой Богоматери. Он схватил камень, бросил его в икону, разбил ее и затем начал попирать ногами. В следующую ночь ему явилась во сне Богоматерь и сказала: «Ты учинил великое поругание Мне. Знай, что ты сделал это себе на погибель. Наказание святотатца последовало незамедлительно. Во время сражения Константин внезапно был поражен в голову камнем и пал бездыханным.

Об этом событии было рассказано отцам Первого Вселенского Собора (325 г.), которые установили петь перед этой иконой Пресвятой Богородицы песнопение: «Бысть чрево Твое Святая Трапеза».

Литература:

1. Поселянин Е. Богоматерь. Полное иллюстрированное описание Ее земной жизни и Ее чудотворных икон. СПб., 1908, с. 324.

2. Кондаков И. П. Иконография Богоматери. Пг., 1915, с. 124–151.

Тропа́рь, глас 6:

Днесь душа́ вся́ка весели́тся/ на па́мять успе́ния святи́теля Христо́ва Геро́нтия,/ прему́дрости ревни́теля/ и кро́тости учи́теля,/ смире́нию наказа́теля,/ уче́нием Боже́ственных слове́с ве́рныя наслади́вшаго./ Ру́сскаго митрополи́та похва́лим,/ святи́тельства па́ству прии́мшаго,/ украси́вшаго Це́рковь Христо́ву./ Тем и Христо́с ви́дя твое́ благопроизволе́ние,/ причте́ тя в лик пра́ведных,/ святи́телю Геро́нтие,/ моли́ Христа́ Бо́га и Пречи́стую Богоро́дицу/ непреста́нно о всех нас.

Конда́к, глас 2:

Бо́жиим Ду́хом и́ночество вожделе́/ и восприя́ Ду́ха Свята́го благода́тию,/ и святи́тельства са́на сподо́бился еси́,/ содержа́ще престо́л Ру́сския Митропо́лии,/ и бысть па́стырь и учи́тель от ро́да ру́сскаго,/ пасы́й ста́до Христо́во слове́сных ове́ц,/ и обре́те благода́ть от Го́спода, Геро́нтие святи́телю,/ Ему́же всегда́ о нас непреста́нно моли́ся,/ спасти́ся душа́м на́шим.

Святитель Геронтий, Митрополит Московский, был возведен на первосвятительскую кафедру 29 июня 1471 года. Прежде он был настоятелем Симонова монастыря в Москве, до 1465 года возведен в сан епископа Коломенского.

Время правления святителя Геронтия ознаменовано расширением церковного строительства. После пожара в апреле 1471 года был заново построен митрополичий дом и другие строения. В 1481 году им была заложена церковь Положения ризы Пресвятой Богородицы и освящена 21 августа 1486 года. При участии святителя Геронтия строился Успенский собор в Кремле, освящение которого состоялось 12 августа 1479 года. 24 августа происходило торжественное перенесение мощей святителя Петра в новый собор.

В период правления святителя Геронтия осложнились взаимоотношения Церкви с великим князем Иоанном III. Святитель Геронтий обладал твердым характером и отстаивал независимость Церкви от вторжения великого князя в церковные дела. Между ними возникали споры, в которых принимал участие и архиепископ Ростовский Вассиан, духовник великого князя. На некоторое время митрополит Геронтий оставил кафедру и удалился в Симонов монастырь. Но так как большинство духовенства признавало правоту Первоиерарха, великий князь Иоанн III просил у святителя Геронтия прощения и обещал не вмешиваться в церковные дела. После этого святитель возвратился на кафедру. Будучи непреклонным в делах церковных, святитель Геронтий всегда был добрым советчиком и союзником великого князя Московского в делах государственных. Так, в 1478 году Новгород Великий был окончательно подчинен Москве. С этого времени на Новгородскую кафедру возводились архипастыри, избранные в Москве.

В 1483 году святитель Геронтий на непродолжительное время вновь удалился в Симонов монастырь из-за болезни, но вскоре возвратился и благополучно управлял церковными делами до блаженной кончины, последовавшей 28 мая 1489 года, накануне праздника Вознесения.

Святитель Геронтий был погребен в Успенском соборе Кремля. Сохранились несколько грамот и послание к великому князю, составленные митрополитом Геронтием. После кончины началось его почитание. В XVII веке в Успенском соборе была известна икона святителя Геронтия. В Иконописных подлинниках содержатся указания о написании его изображений вместе со святителями Киприаном, Фотием и другими Первоиерархами.

Литература:

Русский биографический словарь. Герберский-Гогенлоэ. М., 1916, стлб. 83–85.