10-й день

Свята́го апо́стола Си́мона Зило́та

Святой апостол Симон Зилот

Святи́теля Си́мона, епи́скопа Влади́мирскаго и Су́ждальскаго

Святитель Симон, епископ Владимирский и Суздальский

Преподо́бнаго Си́мона Ра́донежскаго

Преподобный Симон Радонежский

Пренесе́ние моще́й свята́го пра́веднаго Васи́лия, му́ченика и страстоте́рпца, Мангазе́йскаго чудотво́рца

Блаженный Симон Юрьевский

НА ВЕЧЕ́РНИ

Пое́м Блаже́н муж: 1-й антифо́н. Стихи́ры на 8, пра́здника 3 и апо́стола 5, глас 4.

Подо́бен: Дал еси́ зна́мение:

Си́мон чу́дный,/ апо́столов похвала́,/ я́ко луча́ к блиста́ющая, про́йде концы́,/ отгоня́ мрак многобо́жия/ спаси́тельными свои́ми и светолу́чными Боже́ственными уче́нии,/ и всех просвети́ Еди́но сла́вити Божество́ в Трех Ипоста́сех,/ неразде́льно и несеко́мо.

Си́мон апо́стол,/ обте́к концы́,/ я́коже ко́ло, валя́яся,/ всю зе́млю попали́ идолонеи́стовства/ и, благоче́стием просвети́в,/ све́тлы лучи́ возжже́ ве́рным благода́ти:/ вся бо просве́ти Еди́но сла́вити Божество́ в Трех Ипоста́сех,/ неразде́льно и несеко́мо.

Си́мон апо́стол,/ всесве́тлый и пречу́дный,/ язы́ков учи́тель, мре́жа Боже́ственная,/ из глубины́ поги́бельныя нас улови́вшая Богосло́вием высо́ким,/ и́стинный пропове́дник,/ вся ко Христо́ву позна́нию ны́не му́дре приведе́/ и своя́ исправле́ния предло́жь трапе́зу красну́.

Сла́ва, глас 2:

Ре́вности тезоимени́т наре́клся еси́, Си́моне досточу́дне:/ ревну́я, поревнова́л еси́ Бо́гу Вседержи́телю,/ и, Боже́ственных тя чуде́с испо́лнь, показа́,/ стра́нну бо ре́вность име́я,/ тезоимени́т ре́вности, блаже́нне, назва́лся еси́/ и нра́ву зва́ние согла́сно стяжа́л еси́./ Те́мже в вы́шних сын, с вы́шними ли́ки вселя́емь,/ моли́ся, Богови́дче, Сло́ву, Христу́ Бо́гу на́шему,/ дарова́ти нам ве́лию ми́лость.

И ны́не, пра́здника.

Вход. Проки́мен дне. И чте́ния три.

Собо́рнаго посла́ния Иоа́ннова чте́ние (главы́ 3, 4):

Возлю́бленнии,/ а́ще се́рдце на́ше не за́зрит нам, дерзнове́ние и́мамы к Бо́гу./ И Его́же а́ще про́сим, прие́млем от Него́,/ я́ко за́поведи Его́ соблюда́ем/ и уго́дная пред Ним твори́м./ И сия́ есть за́поведь Его́:/ да ве́руем во И́мя Сы́на Его́ Иису́са Христа́/ и лю́бим друг дру́га, я́коже дал есть за́поведь нам./ И соблюда́яй за́поведи Его́, в Нем пребыва́ет, и Той в нем,/ и о сем разуме́ем, я́ко пребыва́ет в нас, от Ду́ха, Его́же дал есть нам./ Возлю́бленнии, не вся́кому ду́ху ве́руйте,/ но искуша́йте ду́хи, а́ще от Бо́га суть,/ я́ко мно́зи лжепроро́цы изыдо́ша в мир./ О сем познава́йте Ду́ха Бо́жия и ду́ха ле́стча²⁸:/ всяк дух, и́же испове́дует Иису́са Христа́, во пло́ти прише́дша, от Бо́га есть./ И всяк дух, и́же не испове́дует Иису́са Христа́, во пло́ти прише́дша, от Бо́га несть,/ и сей есть анти́христов,/ его́же слы́шасте, я́ко гряде́т, и ны́не в ми́ре есть уже́./ Вы от Бо́га есте́, ча́дца, и победи́сте тех,/ я́ко бо́лий есть, и́же в вас, не́жели и́же в ми́ре./ Они́ от ми́ра суть,/ сего́ ра́ди от ми́ра глаго́лют, и мир тех послу́шает./ Мы от Бо́га есмы́:/ и́же зна́ет Бо́га, послу́шает нас,/ и и́же несть от Бо́га, не послу́шает нас.

Собо́рнаго посла́ния Иоа́ннова чте́ние (глава́ 4):

Возлю́бленнии,/ а́ще си́це возлюби́л есть нас Бог,/ и мы до́лжны есмы́ друг дру́га люби́ти./ Бо́га никто́же нигде́же ви́де./ Аще друг дру́га лю́бим, Бог в нас пребыва́ет,/ и любы́ Его́ соверше́нна есть в нас./ О сем разуме́ем, я́ко в Нем пребыва́ем и Той в нас,/ я́ко от Ду́ха Своего́ дал есть нам./ И мы ви́дехом и свиде́тельствуем, я́ко Оте́ц посла́ Сы́на Спаси́теля ми́ру./ И́же а́ще испове́сть, я́ко Иису́с есть Сын Бо́жий,/ Бог в нем пребыва́ет, и той в Бо́зе./ И мы позна́хом и ве́ровахом любо́вь, ю́же и́мать Бог в нас/ Бог любы́ есть,/ и пребыва́яй в любви́ в Бо́зе пребыва́ет,/ и Бог в нем пребыва́ет.

Собо́рнаго посла́ния Иоа́ннова чте́ние (главы́ 4, 5):

Возлю́бленнии,/ а́ще кто рече́т, я́ко люблю́ Бо́га, а бра́та своего́ ненави́дит,/ ложь есть:/ и́бо не любя́й бра́та своего́, его́же ви́де,/ Бо́га, Его́же не ви́де, ка́ко мо́жет люби́ти?/ И сию́ за́поведь и́мамы от Него́,/ да любя́й Бо́га лю́бит и бра́та своего́./ Всяк, ве́руяй, я́ко Иису́с есть Христо́с, от Бо́га рожде́н есть,/ и всяк, любя́й Ро́ждшаго, лю́бит и Рожде́ннаго от Него́./ О сем ве́мы, я́ко лю́бим ча́да Бо́жия,/ егда́ Бо́га лю́бим и за́поведи Его́ соблюда́ем./ Сия́ бо есть любы́ Бо́жия, да за́поведи Его́ соблюда́ем,/ и за́поведи Его́ тя́жки не суть./ Я́ко всяк, рожде́нный от Бо́га, побежда́ет мир,/ и сия́ есть побе́да, побе́ждшая мир, ве́ра на́ша./ Кто есть побежда́яй мир, то́кмо ве́руяй,/ я́ко Иису́с, есть Сын Бо́жий?

На стихо́вне стихи́ры глас 1.

Подо́бен: Всехва́льнии му́ченицы:

Си́моне всеприснопа́мятне,/ сла́дости пото́к испи́л еси́/ и богому́дренно напои́л Бо́жия ра́зума те́пле жела́ющия,/ Христа́ подража́я./ К Нему́же ны́не ра́достно преше́л еси́,/ сла́вою обожа́емь Тро́ицы пресве́тлою/ и ми́ром неисчетноси́льным.

Стих: Во всю зе́млю изы́де веща́ние их/ и в концы́ вселе́нныя глаго́лы их.

Си́моне пречу́дне,/ Бо́жию созерца́я красоту́/ и я́ко дости́жно зряй,/ едине́нием лу́чшим наслажда́яся сего́,/ и положе́ньми обожа́емь,/ еди́наго, жела́емаго и блаже́ннаго,/ ра́дуяся, дости́гл еси́,/ христопропове́дниче всеприснопа́мятне,/ А́нгелом ны́не соводворя́емь.

Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.

Си́моне всеблаже́нне,/ Бо́гу и челове́ком показа́лся еси́ ве́рен хода́тай/ и ны́не ми́лостива/ благодерзнове́нными моли́твами/ сотвори́ нам Христа́,/ не преста́й Го́спода моля́ всегда́/ дарова́ти душа́м на́шим мир и ве́лию ми́лость.

Сла́ва, глас 6:

Тварь, я́ко оре́л высокопа́рный, преше́л еси́,/ Си́моне свяще́ннейший, учениче́ Спа́сов и апо́столе,/ и, лесть и́дольскую огневеща́нными твои́ми догма́ты,/ я́ко вещь, всю попали́в,/ язы́ки из глубины́ неве́дения к Бо́жию позна́нию приве́л еси́./ И ны́не моли́ся Христу́,/ я́ко да ми́лостив бу́дет нам в День су́дный.

И ны́не, пра́здника.

Тропа́рь, глас 3:

Апо́столе святы́й Си́моне,/ моли́ ми́лостиваго Бо́га,/ да прегреше́ний оставле́ние/ пода́ст душа́м на́шим.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, апо́стола. И ны́не, пра́здника.

По 1-й кафи́зме седа́лен, глас 2:

Улови́в язы́ки, апо́стол сла́вный/ научи́ концы́ земны́я Тебе́ кла́нятися со Отце́м и Ду́хом, Христе́ Бо́же./ Того́ ра́ди утверди́ Це́рковь Твою́ и ве́рным низпосли́ благослове́ние Твое́,/ еди́не Ми́лостиве и Человеколю́бче.

Сла́ва, и ны́не, пра́здника.

По 2-й кафи́зме седа́лен, глас 4:

Лучу́, я́ко со́лнце пра́вды, испусти́ тя Христо́с,/ просвети́ти всю зе́млю, апо́столе сла́вный Си́моне./ Боже́ственными твои́ми моли́твами озаря́еши/ и Боже́ственным све́том невече́рним всех просвеща́еши,/ ве́рою соверша́ющих святу́ю па́мять твою́.

Сла́ва, и ны́не, пра́здника.

По полиеле́и седа́лен, глас 8.

Подо́бен: Прему́дрости:

Мре́жею слове́с Боже́ственных ры́бы улови́в слове́сныя,/ сия́ прине́сл еси́ нача́ток Бо́гу на́шему/ и, в Христо́вы я́звы жела́я облещи́ся,/ подо́бник стра́сти Его́ яви́лся еси́./ Тем, соше́дшеся по до́лгу чтим, апо́столе сла́вне,/ всепра́зднственную па́мять твою́ и согла́сно вопие́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Во всю зе́млю изы́де веща́ние их: Стих: Небеса́ пове́дают сла́ву Бо́жию: Вся́кое дыха́ние: Ева́нгелие от Иоа́нна, зача́ло 67.

По 50-м псалме́ стихи́ра, глас 6:

И́же Боже́ственнаго Ду́ха я́сно благода́ть прие́м,/ свяще́ннаго ли́ка апо́стольскаго соприча́стник быв, Си́моне,/ тем носи́мое с Небесе́ иногда́ дыха́ние о́гненное/ о́гненным язы́ком вдохну́в/ и язы́ческое терно́вное попали́л еси́ безбо́жие./ Христа́ Бо́га, пропове́дниче, моли́/ спасти́ся душа́м на́шим.

Кано́н пра́здника со ирмосо́м на 6 и апо́стола на 8, его́же краестро́чие: Апо́стола Си́мона пою́ сла́ву. Глас 8.

Песнь 1

Ирмо́с: Песнь возсле́м, лю́дие, чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, еди́ному Влады́це.

В Вы́шних Влады́це предстоя́, апо́столе чу́дне, тя просла́вльшему/ и ученика́ Себе́ све́тло показа́вшему,/ просвети́ ду́шу мою́, да воспою́ Боже́ственную твою́ па́мять.

Вся́ко изоби́лие благи́х тебе́ Христо́с дарова́в,/ верх Боже́ственных дарова́ний, апо́столе, показа́ тя,/ судо́м пра́ведным, Богоявле́нне, пра́ведный еди́н.

Вседухо́вную зарю́ прии́м, апо́столе, соше́дшую на тя с Небесе́,/ огнедохнове́н был еси́,/ всю попаля́я пре́лесть многобо́жия.

Богоро́дичен: Ты, мое́ ме́ртвенное и тле́нное, безсме́ртное и нетле́нное, Спа́се, показа́в,/ во утро́бу всели́лся еси́ Святы́я Де́вы Пречи́стыя неискусобра́чно,/ вообрази́вся же в челове́ческое естество́.

Катава́сия пра́здника.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Боже́ственное та́инство воплоще́ния позна́л еси́ вои́стинну,/ апо́столе Си́моне Богоприя́тне,/ от Самаго́ Спа́са зарю́ прии́м преми́рную.

Сло́во Безнача́льное и Присносу́щное/ Своего́ служи́теля тя, Си́моне чу́дне,/ блиста́нии све́тлыми бога́тно просвети́ Боже́ственныя благода́ти.

Богоро́дичен: Све́щник всезлаты́й Тя проро́к прописа́, Богоро́дице,/ нося́щу Свет невече́рний, просвеща́ющаго мир луча́ми Божества́,/ Христа́ Бо́га на́шего.

Конда́к и и́кос пра́здника.

И седа́лен апо́стола, глас 3.

Подо́бен: Боже́ственныя ве́ры:

Боже́ственнаго Ду́ха светозаре́нием тьму разруши́л еси́ многобо́жия/ и ве́рных сердца́ просвети́л еси́, воспе́в спаси́тельная повеле́ния,/ и упраздни́л еси́ е́ллинския ба́сни, Си́моне сла́вне,/ Христа́ Бо́га моли́ дарова́ти нам ве́лию ми́лость.

Сла́ва, и ны́не, пра́здника.

Песнь 4

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

Весь сокро́вище сый дарова́ний Ева́нгельских, благода́ти испо́лнен,/ свет мира и соль вселе́нныя,/ Си́моне всеблаже́нне, был еси́.

Веще́й сту́днаго явле́ния отврати́лся еси́,/ невеще́ствен же Свет ви́дети сподо́бился еси́,/ Божества́ вид, прии́мшаго вещь челове́чества, досточу́дне.

Си́моне, учениче́ жи́зни нетле́нныя, умертви́ наш живу́щий грех/ живоно́сною си́лою Животода́вца,/ ея́же прия́л еси́ де́йствие.

Богоро́дичен: Ра́вен быв Отцу́ Твоему́ по существу́,/ ра́вен челове́ком был еси́ по естеству́,/ от Пречи́стыя Де́вы на́шу, Влады́ко, плоть прие́мый.

Песнь 5

Ирмо́с: От но́щи неве́дения/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Со огне́м, Богови́дче, ты зри́мый язы́к Ду́ха прия́л еси́ усе́рдно,/ на го́рнице седя́.

Я́ко высок сый, в превы́шних се́лех живы́й,/ высо́кая и вели́кая уче́ния нам прине́сл еси́.

Богоро́дичен: Зако́н пе́рвый, Де́во, рождество́м Твои́м преста́,/ процвете́ же благода́ть, и пра́вда возсия́.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Ре́вности тезоимени́т нарече́нный, Си́моне досточу́дне,/ ре́вностию поревнова́л еси́ по Го́споде Бо́зе Вседержи́тели.

Тя Боже́ственных чуде́с самоде́лателя Спас показа́,/ дав власть тебе́ де́йством Своея́ бла́гости.

Богоро́дичен: Да заградя́тся уста́ злочести́вых,/ Богоро́дицу Тя не му́дрствующих, Всенепоро́чная,/ и ли́ца в студ да облеку́тся.

Конда́к, глас 2.

Подо́бен: Тве́рдыя:

Изве́стно прему́дрости уче́ния в душа́х благоче́ствующих поло́жшаго/ во хвале́нии ублажи́м, я́ко Богоглаго́ливаго вси Си́мона:/ престо́лу бо сла́вы ны́не предстои́т и со Безпло́тными весели́тся,/ моля́ся непреста́нно о всех нас.

И́кос:

Апо́стола па́мять вси, я́ко спаси́тельный день, восхва́лим ны́не и благоче́стно ублажи́м:/ той бо всей вселе́нней, я́коже со́лнце, сия́ет,/ све́та луча́ми всю мглу отгоня́я,/ и просвеща́ет любо́вию сего́ па́мять соверша́ющия и любе́зно почита́ющия./ Те́мже усе́рдно стеце́мся, воспева́юще его́:/ той бо Христу́ предстои́т, моля́ся непреста́нно о всех нас.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Стра́нну ре́вность, Си́моне, име́я, тезоимени́т ре́вности, блаже́нне, наре́клся еси́/ и нрав, зва́нию согла́сен, стяжа́л еси́,/ благослове́н еси́, Го́споди, – вопия, – во ве́ки.

Вку́пе Сло́ву сликовству́я и собесе́дник Тому́ быв,/ Ца́рствия та́мо сопричасти́лся еси́, зовы́й:/ благослове́н еси́, Го́споди Бо́же, во ве́ки.

Богоро́дичен: Ле́стию дре́вле благожре́бия пра́отцы изгна́ змий,/ Ты же сих, Ма́ти Бо́жия, воззвала́ еси́./ Благослове́н, Пречи́стая, Плод Твоего́ чре́ва.

Песнь 8

Ирмо́с: Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху/ и славосло́вяху во вся ве́ки.

Я́ко красны́, Си́моне, твои́ но́ги,/ благоле́пен есть и язы́к, глаго́лющ сла́ву Христо́ву, и научи́ зва́ти:/ Го́спода по́йте и превозноси́те во вся ве́ки.

Добро́тами укра́шен светолу́чными и чуде́с пуща́я сия́ния,/ позна́лся еси́, Си́моне, лю́дем се́мя благослове́нное:/ Го́спода по́йте, дела́, и превозноси́те во вся ве́ки.

Богоро́дичен: Ум не мо́жет рождества́ Твоего́, Богороди́тельнице, сказа́ти/ и изрещи́ сло́во изнемога́ет:/ Бо́га бо, заче́нши, родила́ еси́, Де́во, Его́же превозно́сим во вся ве́ки.

Песнь 9

Ирмо́с: Чи́стую сла́вно почти́м,/ лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.

Явле́н был еси́ конце́м, све́том сия́я,/ и, огнь духо́вный прие́м, светови́ден показа́лся еси́,/ те́мже тя велича́ем.

Весь Бо́гу возложе́н, Тому́ сраствори́лся еси́,/ Его́же ны́не моли́, Богоявле́нне, о нас,/ ве́рою и любо́вию восхваля́ющих тя.

Богоро́дичен: Спасе́ния всех Хода́таицу, я́вльшуюся челове́ком/ и мир просве́щшую сия́нии богови́дныя чистоты́,/ в пе́снех велича́ем.

Свети́лен.

Подо́бен: Ду́хом во святи́лищи:

Тече́ние кра́сных твои́х ног, Си́моне апо́столе, возврати́в,/ к ше́ствию небе́сному возше́л еси́, ра́дуяся,/ и, Тро́ице предста́в, во Отце́ ви́диши Сы́на и Ду́ха Боже́ственнаго./ Сего́ ра́ди ве́рою пресвяще́нную твою́ и Боже́ственную пра́зднуем па́мять.

Сла́ва, и ны́не, пра́здника.

На хвали́тех стихи́ры на 4, глас 8.

Подо́бен: Что вы нарече́м:

Что́ тя имену́ем, апо́столе?/ Не́бо ли? я́ко сла́ву испове́дал еси́ Бо́жию./ Реку́ ли? я́ко тварь напая́еши та́йно./ Звезду́, озаря́ющую Це́рковь,/ ча́шу, пи́во свято́е излива́ющую,/ дру́га Христо́ва бли́жнейшаго,/ безпло́тных равносе́льника./ Моли́ о спасе́нии душ на́ших.

Си́моне, апо́столов похвало́,/ украси́шася твои́ но́ги,/ путе́м про́поведи ше́ствующия до́бре/ и пути́ вся вра́жия стесня́ющия/ широто́ю Боже́ственнаго ра́зума,/ Сло́ва, я́вльшагося дебельство́м пло́ти/ и ученика́ тя пресла́вна избра́вшаго, блаже́нне./ Его́же моли́ спасти́ся душа́м на́шим.

Си́моне, Богогла́сный апо́столе,/ по́слан был еси́,/ я́ко стрела́ от Христа́ светови́дна,/ уязвля́юща враги́,/ уя́звленным же душа́м я́вственно подаю́ща исцеле́ние./ Те́мже тя по до́лгу ублажа́ем/ и свято́е твое́ днесь соверша́ем торжество́./ Моли́ спасти́ся душа́м на́шим.

Сла́ва, глас 2:

Оста́вив земна́я, после́довал еси́ Христу́/ и, зна́менався дохнове́нием Свята́го Ду́ха,/ по́слан быв от Него́ в язы́ки поги́бшия/ обраща́ти челове́ки во свет Богоразу́мия,/ апо́столе Си́моне,/ и, сконча́в по́двиги Боже́ственныя твоея́ стра́сти/ и мук разли́чных,/ ду́шу твою́ Христу́ пре́дал еси́,/ Того́ моли́, всеблаже́нне,/ дарова́ти нам ве́лию ми́лость.

И ны́не, пра́здника.

Славосло́вие вели́кое. Ектении́ и отпу́ст.

НА ЛИТУРГИ́И

Блаже́нны пра́здника, песнь рядова́я, и апо́стола, песнь 6-я, на 4. Проки́мен, глас 8: Во всю зе́млю изы́де веща́ние их,/ и в концы́ вселе́нныя глаго́лы их. Стих: Небеса́ пове́дают сла́ву Бо́жию: Апо́стол к Кори́нфяном, зача́ло 131. Аллилу́ия, глас 1: Испове́дят Небеса́ чудеса́ Твоя́, Го́споди. Ева́нгелие от Матфе́я, зача́ло 56. Прича́стен: Во всю зе́млю:

Моли́тва

Святы́й сла́вный и всехва́льный апо́столе Христо́в Си́моне, сподо́бивыйся прия́ти в дом твой в Ка́не Галиле́йстей Го́спода на́шего Иису́са Христа́ и Его́ Пречи́стую Ма́терь, Влады́чицу нашу Богоро́дицу, и очеви́дцем бы́ти пресла́внаго чудесе́ Христо́ва, на бра́це твое́м явле́ннаго, претворе́ния воды́ в вино́! Мо́лим тя с ве́рою и любо́вию: умоли́ Христа́ Го́спода претвори́ти ду́ши на́ша из грехолюби́вых в боголюби́выя; сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных и испроси́ нам свы́ше по́мощь во вре́мя уны́ния и безпомо́щия на́шего, да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских, иде́же ты ны́не водворя́ешися и весели́шися. Ей, апо́столе Спа́сов! не посрами́ нас, кре́пце на тя упова́ющих, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, благу́ю и ми́рную христиа́нскую кончи́ну получи́ти и до́браго отве́та сподо́битися на стра́шнем суде́ Христо́ве, да, избежа́вше мыта́рств возду́шных и вла́сти лю́таго мироде́ржца, унасле́дуем Ца́рство Небе́сное и просла́вим великоле́пое И́мя Отца́, и Сы́на, и Свята́го Ду́ха во ве́ки веко́в. Ами́нь.

Святой апостол Симон Зилот происходил из Каны Галилейской, был сыном святого Иосифа Обручника, по плоти братом Господа, и одним из 12-ти апостолов. Первое чудо, которое сотворил Спаситель, – претворение воды в вино, произошло в доме Симона: во время брачного пира для гостей недостало вина. Тогда Господь, по предстательству Пресвятой Богоматери, претворил воду в вино (Ин. 2:1–11). Пораженный чудом, Симон всем сердцем и душой уверовал в Господа Иисуса как обетованного Мессию и, все оставив, последовал за Ним. Симон получил наименование «зилота», т. е. ревнителя. В день Пятидесятницы он принял вместе с другими апостолами дар Святого Духа.

Святой апостол Симон проповедовал учение Христово в Иудее, Египте, Ливии, Киринее и Британии. В Абхазии принял мученическую кончину. Впоследствии в XIX веке на месте подвигов апостола, близ Иверской горы, был сооружен Новоафонский монастырь Симона Кананита.

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры глас 5.

Подо́бен: Ра́дуйся, живоно́сный Кре́сте:

Ра́дуйся, церко́вное украше́ние,/ святи́тельская добро́то,/ о́тче свяще́ннейший, па́стырю до́брый,/ и́же Пастыренача́льника Иису́са от ю́ности своея́ возлюби́в,/ все́ю душе́ю Тому́ при́сно порабо́тал еси́,/ нас, страстьми́ порабоще́нных, от души́ тебе́ припа́дающих,/ на пе́рвую свобо́ду приведи́ моли́твами твои́ми.

Ра́дуйся, люби́телю Христа́, Го́спода своего́, те́плейший,/ Си́моне досточу́дне,/ и́же теплото́ю духо́вныя благода́ти/ зе́льне в любо́вь Бо́жию распали́вся,/ вся кра́сная ми́ра сего́ презре́л еси́/ и ум свой в послуша́ние Христо́во плени́л еси́,/ те́мже ны́не, я́ко свобо́дь, в свобо́дных живы́й ме́стех,/ на́ша у́мы, вра́жиими прило́ги плене́нныя,/ свободи́, о́тче блаже́нне,/ и твои́м к Бо́гу хода́тайством от бед изба́ви,/ мо́лимтися, о́тче, па́мять твою́ почита́юще.

Молва́ми жития́ сего́ одержи́мых/ и на пути́ страсте́й заблужда́ющих,/ Си́моне, святи́телю прему́дрейший,/ твои́м му́дрым уче́нием наставля́я и вразумля́я,/ приве́л еси́ на спасе́ния стезю́,/ быв тем руководи́тель к высоте́ Небе́сней,/ иде́же и сам ны́не со А́нгелы водворя́яся,/ наста́ви твои́м неви́димым управле́нием/ в живо́т и спасе́ние ду́ши на́ша.

Сла́ва, глас 6:

Ско́рый язы́к твой ко уче́нию/ лени́вых сердца́ и ны́не возставля́ет/ и призыва́ет к де́ланию за́поведей Госпо́дних;/ па́стырская же свире́ль твоя́ возглаша́ет боговеща́нная словеса́,/ и́миже, я́ко ле́ствицею, слы́шащии возно́сятся/ и Бо́гу присвоя́ются,/ те́мже Си́моне, о́тче преподо́бне,/ я́ко имы́й дерзнове́ние ко Христу́ Бо́гу,/ не преста́й моля́ся,/ да просвети́мся све́том ра́зума и благи́х дея́ний,/ любо́вию чту́щии святу́ю па́мять твою́.

И ны́не, Богоро́дичен.

Вход. Проки́мен дне. И чте́ния три святит́ельская.

При́тчей чте́ние (главы́ 10 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т, исхо́ди бо мои́ исхо́ди живота́/ и уготовля́ется хоте́ние от Го́спода./ Сего́ ра́ди молю́ вас/ и предлагаю́ мой глас сыново́м челове́ческим,/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте убо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки,/ честна́я бо реку́, и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая ме́рзость пред Го́сподем,/ вес же пра́веден прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну,/ не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́,/ и посеще́ние во избра́нных Его́.

На стихо́вне стихи́ры глас 1.

Подо́бен: Прехва́льнии му́ченицы:

Слове́сную трубу́ богосло́вия/ и доброде́телей чи́стое зерца́ло,/ я́ко таи́нника благода́ти,/ соше́дшеся днесь, пе́сньми тя восхваля́ем,/ Си́моне свяще́ннейший, и мо́лимся:/ моли́ся Христу́ Бо́гу/ дарова́ти душа́м на́шим мир и ве́лию ми́лость.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

От све́та у́мнаго прие́мь, блаже́нне, озаре́ние,/ я́ко све́тлое свети́ло,/ был еси́ посреде́ по́стническаго ли́ка,/ от него́же, избра́нием свы́ше,/ святи́тельскому вруче́н престо́лу,/ был еси́ добр па́стырь слове́сных ове́ц Христа́ Бо́га,/ Ему́же ны́не предстоя́,/ моли́ся дарова́ти душа́м на́шим/ мир и ве́лию ми́лость.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Ле́ствицу к Небеси́ у́мную/ мно́гими труда́ми твои́ми обре́т, святи́телю блаже́нне,/ возше́л еси́ к незаходи́мому Све́ту/ и с первонача́льники твои́ми живе́ши, ра́дуяся,/ с ни́миже и о нас моли́ся,/ я́ко да сподо́бимся в жи́зни ве́чней/ с тобо́ю и со все́ми святы́ми спребыва́ния.

Сла́ва, глас 2:

Све́тлаго жития́ твоего́ о́браз,/ свяще́ннейший Си́моне,/ мно́гия на доброде́тели испра́ви,/ река́ же спаси́тельнаго уче́ния твоего́/ ду́ши, уны́нием содержи́мыя, к бо́дрости подви́же/ и лени́выя к богохвале́нию возста́ви,/ тем твою́ всечестну́ю па́мять почита́юще,/ припа́даем и мо́лимся,/ я́ко да твои́м наставле́нием жизнь на́шу в ми́ре испра́вим/ и прии́мем от Христа́ Бо́га ве́лию ми́лость.

И ны́не, Богоро́дичен:

Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко неруши́мей стене́ и предста́тельству.

Тропа́рь, глас 1:

Жити́й преподо́бных оте́ц Пече́рских списа́телю изве́стный,/ святи́телю Христо́в Си́моне всеблаже́нне,/ моли́ся приле́жно с ни́ми Христу́ Бо́гу,/ да упра́вит в ми́ре живо́т наш/ и в кни́ги живо́тныя да напи́шет ны,/ спаса́я ду́ши на́ша.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь святи́телю два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Яви́лся еси́:

Я́ко златотка́нною порфи́рою,/ правосла́вным твои́м уче́нием Це́рковь Влади́мирская обложи́ся,/ ли́цы же и́ночествующих наставле́нием твои́м красу́ются,/ Тро́ицу Святу́ю во Еди́ном Существе́, о тебе́, иера́рше Си́моне, вы́ну прославля́юще.

Сла́ва, и ны́не, Богоро́дичен:

Пречи́стая Де́во, Ма́ти Бо́жия,/ нас, прибега́ющих к Твое́й бла́гости и и́щущих ско́раго Твоего́ заступле́ния, не пре́зри,/ но, прекло́ньшися на ми́лость, в ну́ждах на́ших помози́/ и изба́ви от бед ду́ши на́ша.

По 2-м стихосло́вии седа́лен, глас 3.

Подо́бен: Красоте́ де́вства:

Мы́сленное сокро́вище от первона́чальных оте́ц на́ших прие́м,/ о́тче преподо́бне Си́моне, святи́телю прему́дрейший,/ во стотру́дныя тала́нты сие́ умно́жил еси́/ и по тебе́ прише́дшим неоску́дно оста́вил еси́,/ сам же, я́ко благи́й раб, вшел еси́ в ра́дость Го́спода своего́,/ ея́же и нас, хвала́ми па́мять твою́ почита́ющих, моли́твами твои́ми сподо́би.

Сла́ва, и ны́не, Богоро́дичен:

Вруче́нныя нам от Бо́га тала́нты ле́ностию погуби́хом/ и стыди́мся тщи яви́тися Го́споду своему́./ К Тебе́ прибега́ем, Влады́чице:/ даждь поне́ еди́ну ца́ту от неоску́днаго сокро́вища ми́лости Твоея́,/ да не постыди́мся в день стра́шнаго испыта́ния,/ и Тя, Присноде́ву, хвала́ми непреста́нно велича́ем.

По полиеле́и седа́лен, глас 5.

Подо́бен: Собезнача́льное Сло́во:

Му́драго святи́теля и па́стыря неусы́пна,/ жити́й святы́х списа́теля ве́рна и ревни́теля тех благоче́стна,/ Си́мона свяще́ннейшаго в пе́снех, лю́дие, ублажи́м:/ той бо ны́не, в Вы́шних предстоя́ Престо́лу Влады́чню,/ чи́сте зрит Свет непристу́пный/ и мо́лится непреста́нно о любо́вию па́мять его́ пою́щих/ и Христа́ Бо́га прославля́ющих.

Сла́ва, и ны́не, Богоро́дичен:

Сло́ва, Отцу́ Собезнача́льнаго, Ма́ти су́щи,/ гре́шных ско́рая Помо́щнице и Засту́пнице в беда́х су́щим,/ простри́ пречи́стыя дла́ни,/ и́миже Безле́тнаго, в ле́то Младе́нца я́вльшася, носи́ла еси́,/ и умоли́ о нас, многогре́шных, Того́ бла́гость,/ да изба́вимся от находя́щих нужд и печа́лей,/ я́ко да при́сно непоро́чное рождество́ Твое́ велича́ем.

Степе́нна, 1-й антифо́н, 4-го гла́са. Проки́мен, глас 4: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Труды́ дея́ний твои́х, преподо́бне о́тче,/ во о́браз и́ночествующим бы́ша./ Кто бо ви́де безме́рное твое́ смире́ние/ и в житии́ свое́м не испра́вися?/ Или́ кто, ви́дев безро́потное твое́ послуша́ние,/ терпеливоду́шию твоему́ не удиви́ся?/ Всех собо́ю научи́л еси́,/ но и по отше́ствии твое́м уча́ не престае́ши,/ вразумля́я и наставля́я ти́хим наказа́нием./ Те́мже я́ко па́стыря тя, и учи́теля,/ и преподо́бным единовсе́льника,/ чту́ще па́мять твою́, ублажа́ем.

Кано́н Богоро́дицы со ирмосо́м на 6 и святи́телю на 6. Глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Доброде́тели святи́теля Твоего́ хвала́ми воспе́ти,/ а́ки мо́ре тече́нием преплы́ти;/ устремля́ющася мя упра́ви, Христе́, молю́ся,/ и, ум от бу́рных жития́ сего́ по́мыслов ути́шив,/ спаси́, песнь Тебе́, Бо́гу моему́, воспева́юща.

Груб сый и несмы́слен, но любо́вию к тебе́ влеко́м,/ дерза́ю па́мять твою́, Си́моне, иера́рше Христо́в, восхвали́ти,/ ты же моли́твами твои́ми мне посо́бствуй/ и наста́ви мя ны́не о тебе́ Влады́це моему́ песнь Бо́гу воспева́ти.

Житие́ твое́, преподо́бне, чту́ще, кто не почуди́тся,/ ви́дя ре́вность твою́ к подража́нию пе́рвым отце́м Пече́рским?/ Те́мже и аз, удивля́яся, смире́нно о тебе́ Бо́гу моему́ пе́ние возсыла́ю.

Прие́м а́нгельский о́браз в благоле́пной Пече́рской Ла́вре,/ прия́л еси́ и а́нгельское житие́,/ после́дуя Анто́нию Вели́кому и Феодо́сию чу́дному,/ с ни́миже ны́не живы́й, ра́дуешися, непреста́нно песнь Бо́гу воспева́я.

Богоро́дичен: Премени́х о́браз, но дел мои́х не премени́х, Ма́ти Бо́жия,/ благода́тию из Тебе́ Ро́ждшагося спа́сшая род челове́ческий,/ по благода́ти Твое́й спаси́ мя,/ о Тебе́, Влады́чице мое́й, пе́ние Бо́гу возсыла́юща.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

А́ки зве́зды небе́сныя, просия́ша доброде́тели твоя́, о́тче,/ и́хже луча́ми и нас озари́, во тьме страсте́й ходя́щих,/ да о тебе́ небе́снаго кру́га Творцу́ воспое́м:/ сла́ва Ти, Еди́не Человеколю́бче.

Све́та невече́рняго хотя́ прича́стник бы́ти,/ ми́ра тле́нных удали́лся еси́/ и, а́нгельский о́браз восприе́мь, а́нгельски приноси́л еси́ Бо́гу хвале́ние, зовы́й:/ сла́ва Ти, Еди́не Человеколю́бче.

Просиявшим великим отцем – Антонию и Феодосию Печерским – ревнуя,/ аки светлая звезда, просиял еси́ в жизни сей, преподобне, смирением и чистотою./ Имже удивляющеся, поем:/ слава Тебе, Еди́не Человеколюбче.

Послуша́ние твое́, блаже́нне, бысть, а́ки зерца́ло, посреде́ собо́ра бра́тий,/ и сим наипа́че прибли́жился еси́ бы́вшему послушли́ву да́же до сме́рти Иису́су./ Ему́же ны́не живе́ши посреде́ гра́ждан Небе́сных и пое́ши:/ сла́ва Ти, Еди́не Человеколю́бче.

Богоро́дичен: За́поведи Го́спода моего́ слы́шу, но та преслу́шаю;/ Ты же, Чи́стая Де́во, ре́кшая: се Раба́ Госпо́дня,–/ сотвори́ мя раба́ послушли́ва,/ да сла́влю Тя, Еди́ну Человеколюби́вую Ма́терь.

Седа́лен, глас 8:

Ле́ствицу доброде́телей обре́т,/ возше́л еси́ на го́ру безстра́стия/ и, узре́в пре́лесть ми́ра сего́,/ любостра́стнаго ца́рствия, во мгнове́нии о́ка преходя́щаго, отре́клся еси́,/ ни мироде́ржцу, но Еди́ному Царю́ веко́в поклони́лся еси́,/ тем тя пе́сньми почита́ем, Си́моне, о́тче преблаже́нне.

Сла́ва, и ны́не, Богоро́дичен:

Я́ко спасе́ния наде́жду и Помо́щницу в ну́ждах иму́ще Тя, Богоневе́стная Де́во,/ вра́жиих нахожде́ний не убои́мся,/ но о Тебе́ дерза́ем,/ Ты бо еси́ кре́пость на́ша и утвержде́ние.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Ты, преподо́бне, ве́дением и дея́нием к све́ту мы́сленному прибли́жився,/ све́тел житие́м показа́лся еси́,/ и́мже мно́зи наставля́еми, сла́вляху Бо́га, глаго́люще:/ си́ле Твое́й сла́ва, Человеколю́бче.

Слух дея́ний твои́х, о́тче, про́йде в разли́чныя страны́,/ и мно́зи жела́ху тя предводи́теля и наста́вника себе́ име́ти,/ я́ко да, наста́вльшеся тобо́ю, просла́вят Отца́ Небе́снаго,/ И́же просла́ви тя сицево́ю благода́тию.

Па́че ине́х Це́рковь Влади́мирская ускори́ призва́ти тя, блаже́нне,/ я́ко да ю, мятя́щуюся, твои́м прише́ствием возвесели́ши/ и упасе́ши жезло́м твоего́ правле́ния.

Предсрета́ют тя и су́ждальстии гра́ждане,/ ли́ки духо́вных пе́сней составля́ющее и, ра́дующеся, возво́дят на престо́л архиере́йский,/ на́ньже возше́д, был еси́ тому́ до́брый па́стырь.

Богоро́дичен: До́браго Па́стыря су́щи Ма́ти,/ слове́сныя Твоя́ о́вцы, мы́сленным во́лком распу́женныя, собери́/ и Сама́, Влады́чице, нас упаси́,/ да нектому́ а́дский волк дерза́ет ста́ду Твоему́ прибли́житися.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Тебе́, Си́моне, я́коже о́ному люби́мому ученику́ Своему́ Си́мону,/ вручи́л есть па́стырей Нача́льник Иису́с ове́ц па́ству,/ ю́же прие́мь, до́бре наста́вил еси́ к высоте́ Небе́сней;/ к не́йже и моя́ пути́ напра́ви, молю́тися.

От ю́ности возлюби́л еси́ всех Влады́ку,/ от Него́же за любо́вное воздая́ние прия́л еси́ честно́ю Его́ Кро́вию иску́пленныя о́вцы пасти́./ Того́жде Влады́ки овча́ и аз есмь,/ воззри́ на мя, святи́телю Си́моне,/ и пути́ моя́ напра́ви, молю́тися.

Па́стырская свире́ль уче́ний твои́х, о́тче, увеселя́ше слове́сныя о́вцы,/ и нектому́ предпочита́ху тле́нныя пи́щи, духо́вным пита́ющеся зла́ком;/ а́лчуща мя твои́м уче́нием напита́й/ и пути́ моя́ напра́ви, молю́тися.

Жезло́м правле́ния до́бре управля́л еси́ вруче́нное тебе́ ста́до,/ о́браз тем себе́ сама́го подая́,/ его́же, отча́сти напи́санный, и аз чту, но не могу́ тому́ ревнова́ти./ Ты, па́стырю до́брый, да бу́ду подража́тель того́,/ пути́ моя́ напра́ви моли́твами твои́ми.

Богоро́дичен: Онебеси́вшая земноро́дных существо́/ пресвяты́м Рождество́м Твои́м, Де́во Мари́е,/ ум наш, по земны́х су́етствиях пле́жущ³⁴, возведи́ к Го́рним,/ и к иска́нию о́ных, мо́лимтися, пути́ на́ша напра́ви.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Благода́тию Ду́ха Свята́го освяще́н,/ я́ко священнотаи́нник ве́рен, Престо́лу Бо́жию на земли́, Си́моне,/ в преподо́бии и пра́вде послужи́л еси́,/ тебе́ ны́не, с ве́рными рабы́ в ра́дости Го́спода твоего́ живу́щу, молю́ся:/ бу́ди ми моли́твенник к Бо́гу о спасе́нии мое́м.

Сугу́баго зва́ния, святи́телю,/ я́ко сугу́быя на ся труды́ прие́мый, сподо́бился еси́:/ па́стырским бо прилежа́ дело́м, и́ноческих по́двигов никогда́же оставля́л еси́;/ те́мже в по́чести сугу́бей ны́не живы́й, моли́ о мне,/ да не лишу́ся спасе́ния моего́.

При́сно помина́я, преподо́бне, отце́в Пече́рских труды́,/ навы́кл еси́ тем подража́ти,/ и́мже купнонра́вен и единому́др показа́вся,/ препосла́лся еси́ от ху́ждшаго к лу́чшему,/ я́ко да сугу́бым украси́шися венце́м.

Дея́нием Госпо́дних за́поведей умертви́л еси́ плоть твою́,/ но благода́тию Бо́жиею оживи́л еси́ ду́шу твою́./ Ве́дением же духо́вную ле́ствицу обре́т,/ восте́кл еси́ возвыше́нием у́мным к Бо́гу,/ Ему́же предстоя́, моли́ся о пою́щих тя, Си́моне блаже́нне.

Богоро́дичен: Дея́ние ле́ностию,/ ве́дение же омраче́нием страсте́й погуби́х,/ и ни еди́наго же не имый, сугу́баго бою́ся осужде́ния,/ оба́че к Тебе́, Богороди́тельнице, прибега́ю,/ я́ко си́льна и многомо́щна, обоя́ испра́ви/ и бу́ди Помо́щница спасе́ния моего́.

Конда́к, глас 2:

Святи́тельства оде́ждою,/ а́ще и досто́йне оде́ялся еси́,/ оба́че тем не вознося́ся,/ жела́л еси́ па́че сме́тием³⁵ пред враты́ Ла́вры Пече́рския поврещи́ся,/ смиренному́дре Си́моне./ Те́мже, не а́ки сме́тие, врат вне,/ но, я́ко сокро́вище, внутрь святы́я пеще́ры положе́н бы́ти сподо́бился еси́,/ и ны́не на Небеси́ Го́сподеви предстоя́,/ моли́ся о нас, чту́щих тя.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Бо́жия благода́ть де́йствоваше в тебе́, святи́телю,/ исхожда́ху бо вы́ну от уст твои́х струи́ святы́х уче́ний,/ напая́ющия сердца́ лени́вых,/ и́же твои́м окропле́нием произне́сше доброде́телей плоды́, зва́ху:/ благослове́н Бог оте́ц на́ших.

Се́ял еси́ се́мя сло́ва Бо́жия в вертогра́де па́ствы своея́,/ насажда́я крин чистоты́, а́ки стебло́³⁶ Лива́нове,/ моли́тву, милосе́рдие к бли́жним, а́ки ма́слину,/ а́ки кипари́с, помышле́ния вы́ну о Бо́зе:/ я́же бо сам твори́л еси́,/ сия́ и и́нех нака́зовал еси́ твори́ти.

До́бре написа́в на скрижа́лех се́рдца твоего́ доброде́тели оте́ц Пече́рских,/ не скрыл еси́ тех под спу́дом жите́йския молвы́, о́тче,/ но, ре́вностию дви́жим,/ весь ум свой обрати́л еси́ о́ных жития́ на по́льзу и́нем написа́ти,/ я́же и мы чту́ще, зове́м:/ благослове́н Бог оте́ц на́ших.

А́ки разу́мная пчела́ мы́сленныя цве́ты, жития́ преподо́бных собра́в,/ пода́л еси́ та, а́ки сот сла́дкий, по тебе́ живу́щим,/ и́миже мы услажда́юще ду́ши на́ша, с тобо́ю, Си́моне, пое́м:/ благослове́н Бог оте́ц на́ших.

Богоро́дичен: Стра́стнаго вкуси́в со́та, и́мам се́рдце и устне́, го́рести испо́лнены;/ Ты, Влады́чице, Сладча́йшаго ро́ждшая Иису́са,/ благода́тию Твое́ю услади́ ду́шу мою́, да воспою́:/ ра́дуйся, сла́дости святы́я Служи́тельнице/ и благослове́ние оте́ц на́ших.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Седмогла́внаго зми́я седми́цею дарова́ний духо́вных стерл еси́ главу́, о́тче,/ и, уя́звлен, трепе́щет до ны́не и́мене твоего́,/ е́же в дне́шний день мы помина́юще, о тебе́ зове́м:/ лю́дие, превозноси́те Христа́ во ве́ки.

Любо́вию к Пречи́стей Бо́жией Ма́тери и отце́м Пече́рским мне́лся еси́ отстоя́ти те́лом то́кмо,/ ду́хом же пребыва́л еси́ с ни́ми и подража́л житию́ их,/ тем любо́вию твое́ю посети́ нас и моли́,/ да превозно́сим Христа́ во ве́ки.

Пои́стине, я́коже Си́мон люби́тель Сама́го Христа́ бысть те́плейший,/ та́ко и ты, Си́моне иера́рше, к Богоро́дице и Ея́ оби́тели показа́лся еси́ усе́рдный ревни́тель/ и и́хже люби́л еси́, с те́ми ны́не живе́ши во ве́ки.

Сла́ву и честь свою́ с уме́тами Пече́рскаго монастыря́ не сравня́я, жела́л еси́, о́тче:/ лу́чше тебе́ еди́н день а́ки сме́тию в дому́ та́мо Бо́жия Ма́тере примета́тися,/ не́жели ты́сящу лет сла́вим бы́ти на престо́ле./ О, чу́днаго твоего́ смире́ния,/ тем ублажа́ем тя во ве́ки.

Богоро́дичен: Твои́м посо́бием, Чи́стая, приидо́х к сопребыва́нию оте́ц Пече́рских,/ но от невнима́ния зре́нием вспять уклони́хся,/ и влече́т мя враг в мир на пе́рвая па́ки./ Ма́ти Бо́жия, убеди́ мя зде приседе́ти и спасе́нию своему́ внима́ти,/ да не, испа́д, поги́бну во ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Удивля́емся свято́му житию́ твоему́, Си́моне преблаже́нне,/ прославля́ем по́двиги твоя́, чтим и па́мять твою́,/ ю́же ны́не со А́нгелы велича́ем.

Ни́жняя оставль, отше́л еси́ к Вы́шним,/ те́ло же твое́ по жела́нию принесе́но от престо́ла твоего́ в пеще́ру/ и показу́ет, любо́вь коли́ку име́л еси́ к сему́ ме́сту,/ на не́мже вси тя велича́ем.

Ра́дуется пеще́ра, содержа́щи мо́щи твоя́, святи́телю,/ и созыва́ет и́ночествующих и празднолю́бных собо́ры,/ да похва́льными пе́сньми па́мять твою́ вси, собра́вшиися в дне́шний день, велича́ют.

Отше́л еси́ сам чу́вственне,/ но неотсту́пне с на́ми па́мять твоя́ пребыва́ет:/ се бо де́ти твои́, любо́вию к тебе́ горя́ще,/ при́сно тя помина́ем и велича́ем.

Богоро́дичен: Неотсту́пне с на́ми су́щи, Пресвята́я Де́во,/ собра́вшияся в па́мять ве́рнаго Твоего́ раба́ лю́ди укрепи́,/ ле́ность отжени́ и ра́зум просвети́,/ да бо́дренно Тя и Сы́на Твоего́ вси велича́ем.

Свети́лен:

Богому́драго отца́, словеса́ прему́дра написа́вша, восхва́лим:/ честна́я бо его́ писа́ния суть а́ки роса́ у́тренняя,/ сот сла́дкий, хлеб живо́тный,/ некта́р Небе́сный, исто́чник воды́ живы́я,/ от него́же пия́й сла́дости духо́вныя исполня́ется/ и па́мять твою́ прославля́ет, Си́моне блаже́ннейший.

Сла́ва, и ны́не, Богоро́дичен:

Исто́чник недове́домый,/ и́же превы́ше небе́с, воды́ живы́я произве́дши, Де́во,/ напо́й мя, жа́ждущаго ми́лости Твоея́,/ да, прохлажде́н, сла́влю Тя.

На хвали́тех стихи́ры, глас 1.

Подо́бен: Небе́сных чино́в:

Зри́тель священнотаи́нный был еси́, всеблаже́нне,/ в ми́ре сем живы́й те́лом,/ преста́вився же к жи́зни лу́чшей,/ сама́го Боговиде́ния сподо́бился еси́/ и зри́ши я́сно Свет непристу́пный,/ Его́же и нас зре́ти досто́йны сотвори́/ те́плыми к Бо́гу моли́твами твои́ми.

Словесе́м твои́м внима́ющии/ и наказа́нию твоему́ прилежа́щии,/ Си́моне преподо́бне,/ по́льзу в житии́ познава́ют/ и по́лни явля́ются исправле́ния,/ духо́вная дея́ния прие́млют/ и благода́ть почерпа́ют уче́нием твои́м,/ и́мже обогати́ и нас,/ в дне́шний день па́мять твою́ хвала́ми почита́ющих.

Боже́ственный орга́н Ду́ха Свята́го/ и трубу́, пропове́дающую духо́вная исправле́ния,/ Су́ждальскаго первоседа́теля, Си́мона священноглаго́льника/ днесь, лю́дие, пе́сньми почти́м,/ кла́няющеся ра́це моще́й его́:/ той бо я́ко иера́рх и моли́твенник те́плый,/ предстоя́ Престо́лу Влады́чню,/ мо́лится, во е́же спасти́ся нам.

Сла́ва, глас 6:

Све́тлости жития́ твоего́/ и святи́тельскому исправле́нию/ удиви́шася А́нгел и челове́к собо́ри,/ во избра́нии бо священнотаи́нник свы́ше показа́лся еси́/ и по́стником зерца́ло изря́дное был еси́,/ те́мже я́ко досто́йна тя служи́теля Бо́жия,/ Си́моне, святи́телю блаже́ннейший,/ любо́вию в пе́снех велича́ем.

И ны́не, Богоро́дичен:

Богоро́дице, Ты еси́ лоза́ и́стинная;/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

Славосло́вие вели́кое и отпу́ст.

На Литурги́и слу́жба святи́телю о́бща.

Моли́тва

О всехва́льный и всечестны́й архиере́ю, святи́телю Христо́в, преподо́бне и Богоно́сне о́тче Си́моне! При́зри с сво́йственным тебе́ благосе́рдием от высо́т Небе́сных, иде́же со А́нгелы и все́ми святы́ми Го́споду сла́вы предстои́ши, на нас, недосто́йных и до́лу прекло́нных, смире́нных же и гре́шных, притека́ющих к многомо́щному предста́тельству твоему́ с ве́рою, любо́вию и упова́нием. Простри́ моли́твенно преподо́бныя ру́це твоя́ ко Го́споду и Влады́це и испроси́ от щедрода́тельныя Его́ благосты́ни оставле́ние согреше́ний на́ших во́льных и нево́льных, покая́ние серде́чное, здра́вие душе́вное и теле́сное, житие́ ми́рное и безмяте́жное, возду́ха благорастворе́ние, земли́ плодоно́сие, жите́йских потре́б дово́льство, во всем благо́е поспеше́ние, и да не во зло обрати́м да́руемая нам блага́я, но во сла́ву пресвята́го И́мене Его́ и во спасе́ние на́ше. Еще́ же, припа́дающе, мо́лим тя: потщи́ся, благосе́рде, предста́тельствовати ко Го́споду Человеколю́бцу, да изба́вит нас по вели́цей Свое́й ми́лости от вся́ких бед и скорбе́й, от вся́ких неду́гов и боле́зней, от внеза́пныя сме́рти и от всех озлобле́ний, от вся́ких ко́зней враго́в ви́димых и неви́димых и от вся́каго зла; да укрепи́т в нас пра́вую ве́ру и благоче́стие нелицеме́рное и да пода́ст нам си́лы к борьбе́ со страстьми́ и похотьми́ на́шими; да соблюде́т нас от нечести́вых и душепа́губных уче́ний неве́рия и суеве́рия, и́миже наве́туется в нас святооте́ческая Правосла́вная ве́ра, и да изба́вит нас от вся́ких прираже́ний ду́ха, и́же ны́не де́йствует в сыне́х противле́ния; да всади́т в сердца́ на́ша дух смире́ния и кро́тости, дух братолю́бия и незло́бия, дух терпе́ния и целому́дрия, дух святы́я ре́вности о сла́ве Бо́жией и спасе́нии бли́жних; да при́зрит благоутро́бно на вся́ку ду́шу, тре́бующую благода́тныя Его́ ми́лости, и да́рует по неизрече́нным щедро́там Своего́ человеколю́бия боля́щим исцеле́ние, скорбя́щим утеше́ние, малоду́шным успокое́ние, уныва́ющим ободре́ние, стра́ждущим осла́бу, бе́дствующим по́мощь, си́рым покро́в, безприю́тным приста́нище, оби́димым защи́ту, злосло́вимым терпе́ние, уничижа́емым великоду́шие, гони́мым заступле́ние, оклевета́емым оправда́ние, и всем, во вся́ких ну́ждах и злострада́ниих су́щим, душе́вную отра́ду и ско́рое избавле́ние. Ей, свя́тче Бо́жий, бу́ди те́плый моли́твенник и приле́жный хода́тай ко Го́споду о вся́кой души́ ве́рных твои́х чти́телей, и́щущих твоея́ по́мощи, да никто́же во упова́нии свое́м на тя посра́млен бу́дет, но вси предста́тельством твои́м да обря́щут во вся́ких обстоя́ниих благода́ть и ми́лость Всеще́драго Бо́га. Ему́же подоба́ет вся́кая сла́ва, че́сть и поклоне́ние, ны́не, и при́сно, и во ве́ки веко́в. Ами́нь.

Святитель Симон, епископ Владимирский и Суздальский, был первым епископом Владимиро-Суздальской земли. Он родился во второй половине XII века и подвизался в Киево-Печерской обители, где и принял монашеский постриг. Преподобный Симон во всем старался подражать известным печерским подвижникам, преподобным Антонию и Феодосию. В начале XIII века был игуменом монастыря в честь Рождества Пресвятой Богородицы во Владимире.

В 1215 году великий князь Владимирский Георгий II Всеволодович, желая избежать зависимости своего епископа от архипастыря Ростова Великого, решил основать отдельную епархию под названием Суздальской, Владимирской, Юрьевской и Тарусской. На эту вновь образованную кафедру был возведен святой Симон.

Перед своей блаженной кончиной, последовавшей, по свидетельству летописи и надписи на гробнице, 22 мая 1226 года, святой епископ принял схиму. Святитель Симон был погребен во Владимирском Успенском соборе. Существовало мнение, что мощи святителя по его завещанию были перенесены в пещеры Киево-Печерской Лавры. Это мнение ошибочно, так как в Антониевых пещерах почивают мощи Симона, епископа Ростовского и Суздальского, жившего в конце XI и первой половине XII века. Он был епископом в Ростове после епископа Ефрема, и о нем известно, что погребен в Киево-Печерской Лавре. О погребении святителя Владимирского и Суздальского Симона в Успенском соборе свидетельствует хранившаяся там выписка из книги о поминовении усопших, погребенных в соборе. В ней говорится: «По государеву, цареву великого князя Иоанна Васильевича всея Русии указу, по книгам пети панихиды... по Владимирским по пяти владыкам пети в год по одной панихиде на их памяти». Среди имен архиереев указан и епископ Симон. В той же рукописи сказано: «служить панихиды всем собором, туто, где кто лежит». Таким образом, во времена Иоанна Грозного не сомневались, что святитель Симон погребен во Владимирском Успенском соборе. О нахождении мощей святителя Симона в Успенском соборе свидетельствует также следующий факт. В 1882–1884 годах во время реставрации собора было произведено восстановление надгробной плиты на гробнице святителя Симона. Во время этих работ через отверстие в плите были видны святые останки святителя Симона. Об этом рассказал очевидец протоиерей Александр Виноградов в «Истории Успенского Владимирского собора», изданной в 1891 году.

В летописи святой Симон назван «учительным и милостивым». Ему принадлежат многочисленные труды. Поучительное послание святителя к Поликарпу, монаху Киево-Печерской обители, положило начало Киево-Печерскому Патерику. Святитель описал чудеса преподобного Антония Печерского и составил жития многих Печерских угодников. Известно его описание устроения гробницы преподобного Феодосия Печерского. Святитель Симон – автор «Сказания о святой чудотворной церкви Печерской Киевской, како создася, украсися и освятися». Все эти труды святого Симона были напечатаны в первой части Киево-Печерского Патерика, а упомянутое выше «Сказание» впервые вышло отдельным изданием в Киеве в 1701 году. Перу святителя Симона принадлежит вся третья часть Печерского Патерика.

Литература:

1. О святых, прославленных в Российской Церкви. СПб., 1862.

2. Толстой М. В. Книга, глаголемая Описание о российских святых. М., 1887.

3. Димитрий (Самбикин), архиепископ. Месяцеслов святых, всею Русскою Церковью или местно чтимых. Вып. 9. Май. Тверь, 1899.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры преподо́бнаго, глас 5:

Прииди́те, собо́ри Росси́йстии,/ восхва́лим преподо́бнаго Се́ргия,/ приня́вшаго в число́ бра́тии му́жа ди́внаго,/ старе́йшаго из архимандри́тов страны́ Смоле́нския,/ преподо́бнаго Си́мона,/ мно́го лет прове́дшаго в послуша́нии у свята́го игу́мена/ и с ним бо вои́стинну мно́гими труды́ Бо́гу угоди́вшаго./ Сии́ бо ны́не приле́жно мо́лятся о нас,/ соверша́ющих любо́вию све́тлое сие́ торжество́.

Ки́ими пе́сненными добро́тами/ похва́лим преподо́бнаго Си́мона,/ Бо́гу угоди́ти от ю́ности жела́вшаго/ и во стране́ Смоле́нстей доброде́тельми и стро́гой жи́знью просла́вльшагося?/ Сей бо слы́ша о по́двигах ди́внаго Се́ргия,/ сла́ву пре́жнюю ни во что же вменя́ет,/ но с по́сохом проста́го стра́нника и́дет в пусты́ню Ра́донежскую/ и та́мо поко́й души́ свое́й обрета́ет.

Вси помо́лимся Христу́,/ творя́ще па́мять днесь сла́внаго Си́мона,/ бы́вшаго архимандри́та Смоле́нскаго,/ прише́дшаго во оби́тель Се́ргиеву/ и с глубо́ким смире́нием к стопа́м свята́го ста́рца припа́дшаго,/ жела́я быть его́ послу́шником./ О святи́и уго́дницы,/ земли́ на́шея утвержде́ние вы есте́ вои́стинну!

Сла́ва, глас 1:

Земля́ весели́тся и Не́бо ра́дуется,/ творя́ще па́мять днесь смире́ннаго послу́шника Се́ргиева/ Си́мона, архимандри́та Смоле́нскаго,/ укра́шеннаго все́ми доброде́тельми подви́жника,/ в ста́рости масти́те к Бо́гу отше́дшаго,/ и к Престо́лу Сла́вы душе́ю свято́ю предста́вшаго,/ и ны́не моля́щагося о душа́х на́ших.

И ны́не, Богоро́дичен.

На стихо́вне стихи́ры, глас 8:

Обле́кшийся за по́двиги в преподо́бие/ и во святы́ню за незло́бие,/ послуша́ние па́че поста́ и моли́твы поче́тший,/ Богому́дре Си́моне,/ моли́ Многопе́тую Тро́ицу/ спасти́ся душа́м на́шим.

Стих: Честна́ пред Го́сподем/ смерть преподо́бных Его́.

Прииди́те, ве́рнии,/ ублажи́м преподо́бнаго Си́мона,/ и́же жи́знию, та́ко и сме́ртию свое́ю нас наставля́ет:/ честна́ бо пред Го́сподем/ смерть преподо́бных Его́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́ко жениху́ целому́дренну,/ возложи́ ти Госпо́дь вене́ц сла́вы,/ и, я́ко неве́сту, украси́ тя Всевы́шний за чистоту́ све́том пресве́тлым,/ Си́моне о́тче наш,/ моли́ся Христу́ Бо́гу/ дарова́ти ми́ру мир и ве́лию ми́лость.

Сла́ва, глас то́йже:

Пусты́ни Ра́донежския яви́лся еси́ до́брое прозябе́ние,/ преподо́бне о́тче Си́моне,/ от ю́ности бо возлюби́л еси́ честно́е житие́,/ духо́вному твоему́ учи́телю после́дуя,/ земна́я вся презре́в,/ соверше́нную любо́вь к Бо́гу стяжа́л еси́/ и к Небе́сным возше́л еси́, ра́дуяся,/ моли́ Христа́ Бо́га спасти́ся душа́м на́шим.

И ны́не, Богоро́дичен.

Тропа́рь, глас 5:

Ра́дуйся, пусты́не Ра́донежская,/ израсти́вшая крин духо́вный,/ в вертогра́де преподо́бнаго Се́ргия:/ Си́мона, архимандри́та Смоле́нскаго,/ позна́вшаго све́тлость послуша́ния/ и ди́внаго птиц виде́ния сподо́бившагося,/ сего́ воспомина́юще, Бо́га прославля́ем.

НА У́ТРЕНИ

На Бог Госпо́дь: тропа́рь преподо́бнаго два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Вельми́ ра́дуемся о тебе́, преподо́бне о́тче Си́моне,/ име́я помо́щника тя и засту́пника,/ пребу́ди, о́тче святы́й, ду́хом твои́м при́сно с на́ми,/ моли́твы творя́ за ны к Бо́гу Вседержи́телю,/ я́ко да изба́вит нас от вся́кия ско́рби и ну́жды,/ да тя при́сно ублажа́ем.

Сла́ва, и ны́не, Богоро́дичен:

О Тебе́, Благода́тная, ра́дуемся и хва́лимся/ и к Бо́гу Тя и́мамы предста́тельство,/ простри́ ру́ку Твою́ святу́ю/ и низпосли́ рабо́м Твои́м по́мощь от Сы́на Твоего́ и Бо́га на́шего.

По 2-м стихосло́вии седа́лен, глас 4:

Любо́вию чту́ще твою́ па́мять,/ мо́лим тя, преподо́бне о́тче Си́моне,/ моли́ приле́жно Христа́ Бо́га на́шего изба́вити нас от вся́кия ско́рби и напа́сти,/ да тя вси се́рдцем и усты́ непреста́нно ублажа́ем.

Сла́ва, и ны́не, Богоро́дичен:

К Тебе́ прибега́ем, Влады́чице,/ я́ко Помо́щнице безпомо́щных и наде́жде ненаде́жных,/ утеше́ние в ско́рбех и по́мощь нам бу́ди,/ от грехо́в и бед избавля́ющи нас, Пречи́стая.

По полиеле́и седа́лен, глас 4:

Влады́це Христу́ после́довав, мир оста́вил еси́/ и, в пусты́ню всели́вся, плоть покори́в ду́ху воздержа́нием,/ весь освяще́н и богоно́сен показа́лся еси́./ Си́моне преподо́бне, моли́ Христа́ Бо́га/ согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Проро́цы Тя, Пречи́стую, предвозвести́ша,/ апо́столы Тя, Пренепоро́чную, пропове́даша,/ Тя, Благода́тную, возвели́чиша святи́тели и му́ченицы,/ Тя, Отра́ду и утеше́ние, ублажи́ша преподо́бнии и пра́веднии./ Тем и мы с ни́ми, Богоро́дицу Тя испове́дающе, благоче́стно велича́ем.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Прииди́те, мона́шествующих мно́жество днесь,/ восхва́лим преподо́бнаго Си́мона,/ подража́теля доброде́телей а́ввы Се́ргия/ пе́сньми и пе́ньми восхва́лим/ и честну́ю его́ ико́ну любе́зно облобыза́ем, глаго́люще:/ ра́дуйся, оте́честву твоему́ пресве́тлый свети́льниче;/ ра́дуйся, я́ко Тро́ице предстои́ши со А́нгелы,/ Ю́же непреста́нно моли́/ дарова́ти ми́ру мир/ и душа́м на́шим ве́лию ми́лость.

Кано́н, глас 4. Его́же краегране́сие: А́нгелу своему́ пе́сни хвале́ния приношу́.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

А́нгельскому пе́нию подража́я,/ вси помо́лимся Христу́, на́шему Сладча́йшему Влады́це,/ сла́ве мона́шествующих, по́стников наслажде́нию,/ и просла́вим подви́жника святы́я оби́тели Ра́донежския – преподо́бнаго Си́мона.

Ны́не вси ученицы́ Се́ргиевы, неувяда́емии цве́ти рая́ мы́сленнаго,/ многоце́ннии сосу́ди, Христо́вы уго́дницы,/ прииди́те и ста́ньте с на́ми,/ да воздади́м сла́ву Бо́гу, ди́вному во святы́х Свои́х.

Гряди́те, лю́дие, воспои́м песнь Христу́ Бо́гу,/ просла́вльшему уго́дники Своя́,/ и ублажи́м преподо́бнаго Си́мона, ны́не на Небесе́х ра́дующагося.

Богоро́дичен: Еди́на Чи́стая и Непоро́чная Де́во, Пречу́дная ми́ра Го́рняго Цари́це,/ моля́щи не преста́й Творца́ и Сы́на Твоего́,/ дарова́ти нам грехо́в оставле́ние и душа́м на́шим спасе́ние.

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Любо́вь Боже́ственную в се́рдце свое стяжа́л еси́, преподо́бне о́тче Си́моне,/ в житии́ свое́м вели́кому учи́телю твоему́ а́вве Се́ргию подража́я,/ стра́хом Бо́жиим от лука́вств вра́жиих себе́ всегда́ ограждая́.

Умаща́еши ду́ши еле́ем ра́дости любо́вию тя пою́щих, преблаже́нне Си́моне,/ и ве́рою Христу́ вопию́щих:/ несть свят, па́че Тебе́, Человеколю́бче.

Си́лою Бо́жиею, поспешеству́ющею тебе́, преподо́бне о́тче Си́моне,/ я́ко чу́ден, чудеса́ источа́еши/ и отгоня́еши неду́ги немощству́ющих.

Богоро́дичен: Ве́рою под кров Твой прибега́ющих не пре́зри нас, Богоро́дице Де́во,/ да Тя просла́вим, Чи́стая, во ве́ки.

Седа́лен, глас 4:

Чистото́ю душе́вною Боже́ственно вооружи́вся,/ непреста́нную моли́тву Иису́сову в се́рдце свое́ стяжа́в,/ блиста́нием духо́вным ны́не прославля́ешися,/ те́мже, припа́дая, молю́ тя:/ просвети́ о́чи души́ моея́ и научи́ мя моли́тися,/ да позна́ю сла́дость в Бо́зе пребыва́ния.

Сла́ва, и ны́не, Богоро́дичен:

Под кров Твой держа́вный с ве́рою прибега́ем, Богороди́тельнице Чи́стая,/ покры́й и соблюди́ нас моли́твами Твои́ми,/ да Тя, Богома́ти, при́сно почита́ем.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Отцу́ своему́ досточу́дному Се́ргию после́дуя,/ светоно́сным житие́м украси́лся еси́,/ селе́ния в ве́чных оби́телех дости́гл еси́, пребла́женне Си́моне.

Ева́нгельский глас услы́шав, вся земна́я оста́вил еси́, о́тче Си́моне,/ в пусты́ню Се́ргиеву всели́лся еси́/ и, та́мо а́нгельски пожи́в, соде́лал еси́ ду́шу твою́ хра́мом Ду́ху Свято́му,/ указу́я нам путь к Небе́сному ше́ствию.

Мно́гих мои́х прегреше́ний егда́ в помышле́ние прииду́,/ себе́ сама́го пла́чу, но молю́ся:/ моли́ся о мне, уго́дниче Бо́жий, преподо́бне Си́моне.

Богоро́дичен: Услы́ши, Влады́чице, глас мой,/ молю́ся Ти прилежно:/ изба́ви мя ве́чнаго муче́ния.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Поще́ние изря́дное, коленопреклоне́ния и послуша́ния/ храня́ опа́сно до отше́ствия своего́,/ и́миже сподо́бился еси́ нетле́ннаго блаже́нства.

Егда́ виде́ния чу́днаго сподо́бился еси́ а́вва Се́ргий,/ зря Свет в нощи́ Небе́сный и птиц мно́жество,/ предуказу́ющих на мно́жество его́ ученико́в,/ тогда́ и ты, преподо́бне Си́моне, был еси́ сему́ свиде́тель,/ раздели́в ра́дость своего́ учи́теля.

Све́тло житие́ твое́ бысть, преблаже́нне Си́моне,/ обнови́в те́ло твое́ воздержа́нием и чистото́ю,/ в вы́шняя селе́ния ны́не водвори́лся еси́,/ и мой ум утверди́ во и́стиннем пути́ моли́твами твои́ми.

Богоро́дичен: Незаходи́маго Све́та Ма́ти,/ на Тя по Бо́зе наде́жду спасе́ния моего́ возлага́ю и молю́ Тя:/ изба́ви мя от належа́щих бед и скорбе́й,/ да сла́влю Тя, Чи́стая, во ве́ки.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Исцеле́ний бога́тыя кла́сы пожа́л еси́, свяще́нный о́тче,/ и́бо приле́жным трудо́м обогати́в ду́шу твою́,/ доброде́тельная и многопло́дная се́мена в ню ввергл еси́.

Христа́ возлюби́л еси́, Христу́ после́довал еси́,/ Им укрепля́емь, жите́йское мо́ре безбе́дно преплы́л еси́,/ преблаже́нне о́тче Си́моне.

Возвы́сився на доброде́тель и ум очи́стив,/ со А́нгелы ны́не на Небесе́х водвори́лся еси́,/ помина́й и мя, ве́рою чту́щаго па́мять твою́, Си́моне приснопа́мятне.

Богоро́дичен: А́нгелов сла́досте, скорбя́щих ра́досте,/ христиа́н Предста́тельнице, Де́во, Ма́ти Госпо́дня,/ заступи́ нас и изба́ви ве́чных мук.

Конда́к, глас 2:

Возлюби́в, преподо́бне, Боже́ственныя за́поведи,/ чистото́ю душе́вною вооружи́вся,/ непреста́нною моли́твою и трудо́м в пусты́ни Се́ргиевой подвиза́лся еси́,/ Христа́, Сладча́йшаго Иису́са, дости́гл еси́,/ Его́же моли́ непреста́нно о всех нас.

И́кос:

Послуша́ния ра́чительный, благоразу́мия испо́лненный,/ уве́рився тве́рдо, я́ко лу́чше быти послу́шником Се́ргиевым,/ па́че нача́льствовати в ино́м ме́сте,/ страну́ Смоле́нскую оста́вив, прише́л еси́ к а́вве Се́ргию,/ и в пусты́ни Ра́донежстей всели́лся еси́/ и, та́мо а́нгельски пожи́в, Небе́сныя оби́тели дости́гл еси́,/ иде́же ны́не весели́шися, зря́ще Христа́,/ Его́же моли́ непреста́нно о всех нас.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Лесть вра́жию отве́ргше,/ в пещи́ искуше́ний Боже́ственная благода́ть ороси́ тя, преподо́бне,/ и многосве́тла показа́ тя, зову́ща:/ благослове́н Бог оте́ц на́ших.

Егда́ проходи́л еси́ по́двиги по́стныя, о́тче,/ смири́л еси́ себе́ Боже́ственным смире́нием,/ поя́ Бо́гу, в Тро́ице сла́вимому:/ благослове́н Бог оте́ц на́ших.

Небе́сным Све́том Бо́жия благода́ти просвети́в се́рдце твое́, о́тче Си́моне,/ и ду́шу украси́в доброде́тельми,/ Бо́га зрел еси́ в жи́зни сей вре́менней/ и, ны́не в ве́чности с Ним пребыва́я, пое́ши:/ Го́споди и Бо́же, благослове́н еси́.

Богоро́дичен: Иму́щи Тя кре́пкую Засту́пницу, Богороди́тельнице Чи́стая,/ моли́ся, мо́лимся приле́жно, о ве́рою чту́щих Тя.

Песнь 8

Ирмо́с: О́троки благочести́выя в пе́щи/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́, и превозноси́те Его́ во вся ве́ки.

Я́ко свети́льник пресве́тлый, показа́ тя Всевы́шний Госпо́дь,/ Его́же моли́, о́тче преподо́бне, и мою́ ду́шу просвети́ти и к любви́ Го́рней уязви́ти/ да, тобо́ю направля́емь со храни́телем мои́м А́нгелом, получу́ от Христа́ Бо́га ве́лию ми́лость.

Пра́ведник во ве́ки жив бу́дет,/ смерть бо для него́, по апо́столу, – приобре́тение,/ исхо́д от све́та к Све́ту возсия́вшему./ Те́мже вопие́м ти:/ моли́ся о нас ко Го́споду, преподо́бне о́тче Си́моне,/ да просвети́т на́ша помышле́ния.

Ра́достен сей пра́здник христоимени́тым лю́дем Це́ркве Росси́йския,/ наипа́че весе́лие и отра́да насе́льником Ла́вры Се́ргиевы,/ моли́твенно ны́не предстоя́щих Бо́гу, ди́вному во святы́х Свои́х,/ Его́же превозно́сим во вся ве́ки.

Богоро́дичен: Исцеле́ния и цельбы́ подаю́тся оби́льно, Пресвята́я Влады́чице,/ всем, с ве́рою к Тебе́ прибега́ющим.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Насле́дниче Боже́ственных селе́ний,/ а́нгельски, о́тче Си́моне, на земли́ пожи́л еси́,/ те́мже со А́нгелы ны́не лику́ет дух твой.

Очи́сти на́ша согреше́ния, Сло́ве, и просвети́ о́чи серде́чныя,/ е́же чи́сто зре́ти Твою́ све́тлость Боже́ственнаго светоли́тия,/ моли́твами уго́дников Твои́х преподо́бных Се́ргия и Си́мона.

Шу́ия ча́сти избе́гл еси́,/ десны́я же страны́ сподо́бился еси́, преподо́бне,/ моли́ о нас, о́тче, да твои́ми моли́твами сподо́бимся и мы узре́ти Христа́/ и услы́шати вожделе́нный глас Его́:/ прииди́те, благослове́ннии, насле́дуйте угото́ванное вам Ца́рствие от сложе́ния ми́ра.

Богоро́дичен: Ум мой умири́ и просвети́, Ма́ти Всеблага́я,/ и напра́ви мя ходи́ти непреткнове́нно путе́м спасе́ния,/ я́ко да при́сно ублажа́ю Тя.

Свети́лен:

Процве́л еси́, я́ко фи́никс, дави́дски, о́тче,/ и оби́тель яви́лся еси́ Ду́ха Пресвята́го,/ И́же сла́вна тя вселе́нней показа́./ О нас непреста́нно моли́, почита́ющих ве́рою пречестну́ю па́мять твою́,/ преподо́бне Си́моне.

Сла́ва, и ны́не, Богоро́дичен:

Просвети́, Чи́стая Де́во, се́тующее се́рдце мое́,/ при́сно преступле́ньми и жите́йскими мно́гими молва́ми отягоще́нное,/ и не оста́ви мене́, своево́льнаго, еди́наго,/ я́ко да сла́влю Тя и любо́вию пою́ Тя, Препе́тая.

На хвали́тех стихи́ры, глас 4:

В послуша́ние ве́ры плени́л еси́, преподо́бне, весь ум,/ да благи́ми де́лы украси́ши ю,/ дости́гл еси́ безмо́лвнаго приста́нища,/ моли́ся Христу́ Бо́гу, о́тче Си́моне,/ спасти́ и просвети́ти ду́ши на́ша.

Преподо́бне о́тче Си́моне,/ душе́ю потруди́лся еси́ в богомы́слии,/ те́лом же – в послуже́нии тре́бующим от Тебе́ по́мощи,/ моли́ся Пастыренача́льнику Христу́,/ да упасе́т нас, чту́щих святу́ю па́мять твою́,/ в правове́рии, любви́ и единомы́слии.

Преподо́бне о́тче,/ измла́да доброде́тели приле́жно обучи́вся,/ наипа́че же послуша́нию и кро́тости,/ орга́н был еси́ Свята́го Ду́ха/ и, от Него́ прии́м дар прозре́ния,/ увеща́л еси́ челове́ки ше́ствовати путе́м Христо́вым,/ моли́ся и о нас, преподо́бне, ко Христу́ Бо́гу/ и Его́ Пречи́стой Ма́тери/ Небе́сных селе́ний сподо́битися.

Сла́ва, глас 8:

Воспо́йте, лю́дие, песнь но́ву,/ я́ко ди́вна сотвори́ Госпо́дь,/ просла́вив уго́дника Бо́жия, преподо́бнаго Си́мона,/ любе́знаго послу́шника а́ввы Се́ргия,/ ра́но ду́хом позна́вшаго,/ я́ко лу́чше бы́ти в послуша́нии во святе́й оби́тели,/ не́жели нача́льствовати в ино́м ме́сте.

И ны́не, глас то́йже:

Свети́ся и ра́дуйся, Ла́вра Се́ргиева,/ возрасти́вшая цве́ты ра́йския,/ А́нгелы земны́я и Небе́сныя челове́цы,/ трисвяту́ю песнь сла́дце воспева́ющия,/ и мы, гре́шнии, им подража́юще,/ просла́вим Бо́га, в Тро́ице сла́вимаго.

На Литурги́и слу́жба вся преподо́бническая.

Преподобный Симон Радонежский, ученик Преподобного Аввы Сергия, по сообщению Троицкого Патерика, до своего прибытия в обитель Преподобного Сергия был архимандритом и настоятелем одного из монастырей в городе Смоленске. Оставив управление монастырем в 1350 году, он передал значительное имущество в Троицкую обитель, подчинил себя руководству святого Сергия и окончил свою жизнь в смиренном послушании великому старцу, удостоившись быть свидетелем благодатного видения Преподобному Сергию о его учениках в образе птиц небесных. На средства архимандрита Симона была построена новая, обширная церковь во Имя Пресвятой Троицы, затем было возведено множество братских келлий вокруг храма и обитель окружена высокой и прочной оградой. С этого времени стало быстро умножаться число учеников Преподобного Сергия.

Служба преподобному Симону Радонежскому составлена архиепископом Рязанским и Касимовским Симоном.

Литература:

1. Кудрявцев М., диакон. История православного монашества в Северо-Восточной России со времен Преподобного Сергия Радонежского. Ч. 1. М., 1881, с. 40?41.

2. Патерик Свято-Троицкой Сергиевой Лавры. Сост. М. В. Толстой. Сергиев Посад, 1893, с. 6.

(Службу зри 22 марта)

Тропа́рь, глас 8:

От гра́да Яросла́вля Бо́жиим смотре́нием/ в страну́ Сиби́рскую прише́дшаго/ и за целому́дрие от господи́на своего́/ в Мангазе́и пострада́вшаго,/ блаже́ннаго Васи́лия почти́м,/ его́же Христо́с Бог му́ченическим венце́м венча́ на Небеси́,/ нетле́нием и чудесы́ просла́ви на земли́./ Ты же, честны́й страда́льче,/ предста́тельством свои́м страну́ на́шу в ми́ре сохрани́/ и моли́ся о спасе́нии душ на́ших.

Конда́к, глас 4:

Просвети́ся Боже́ственною благода́тию, Боголю́бче,/ целому́дрием и терпе́нием тече́ние свое́ му́ченически сконча́л еси́,/ те́мже и по сме́рти яви́ тя све́тлость жития́ твоего́,/ источа́еши бо чудесы́,/ с ве́рою приходя́щим к честно́му гро́бу твоему́ и вопию́щим:/ ра́дуйся, святы́й Васи́лие,/ Мангазе́йский и всея́ Сиби́ри чудотво́рче.

Сведения о святом мученике Василии Мангазейском помещены в Минеях – Март (22 марта) и Апрель (4 апреля).

Свята́го и блаже́ннаго Си́мона, Христа́ ра́ди юро́диваго, Юрьеве́цкаго чудотво́рца

(Службу зри 4 ноября)

Тропа́рь, глас 8:

Я́ко вои́стинну гла́са апо́стольскаго/ послу́шатель был еси́, блаже́нне Си́моне,/ Христа́ бо ра́ди изво́лив име́ти бу́йство,/ в не́мже соблю́л еси́ твоя́ к Бо́гу доброде́тели, посреде́ молв некра́домы,/ терпе́нием у́бо пачеесте́ственным Христа́ подража́в,/ посрами́л еси́ льсти́ваго всю горды́ню,/ тем и в лю́тых ра́нах,/ я́коже дре́вний Ла́зарь, в не́дра Авраа́мля пресели́лся еси́,/ иде́же и ны́не утеша́яся, посеща́й град твой,/ почита́ющий любо́вию святу́ю па́мять твою́.

Конда́к, глас 4.

Подо́бен: Вознесы́йся:

Возгоре́вся раче́нием Го́рним,/ же́стость³⁷ во́льнаго юро́дства па́че всех сла́дких ми́ра предпоче́л еси́,/ отону́дуже повину́ся ти огнь,/ от его́же запале́ния град твой Ю́рьевец изба́вил еси́,/ и во́ды немо́кренно, я́ко по су́ху, преше́л еси́,/ и хотя́щия бы́ти предре́кл еси́,/ просла́вльшу тя та́ко Бо́гу,/ к Нему́же моля́ся и о нас,/ пою́щих тя, блаже́нне Си́моне, помина́й.

Блаженный Симон Юрьевский родился близ города Юрьевца Поволжскаго. Покинув родителей, он принял на себя подвиг юродства Христа ради. Зимою и летом ходил босой, в одной рубашке, так что кожа его почернела и от поста иссохла. Неразумные люди нередко жестоко били его. Любимым занятием блаженного Симона была молитва на папертях разных церквей. Подвиг самоотречения очистил душу его, и он получил от Бога дар прозрения: многое предвидел и предсказывал будущее. Современники, призывая его имя, видели разные чудесные знамения.

Перед своей кончиной блаженный пришел в дом воеводы Феодора Петелина. Тот, не зная подвигов святого, в порыве гнева приказал его побить. Святой Симон тяжело заболел. Он призвал священника исповедался, причастился Святых Христовых Тайн и предал свою душу Богу. Воевода раскаялся в своем согрешении. Весь город собрался на погребение святого. Тело блаженного Симона было погребено в Богоявленском монастыре. Это произошло 4 ноября 1584 года. В 1635 году Патриарх Иоасаф повелел Богоявленскому игумену Дионисию составить описание жизни и чудес блаженного Симона и благословил написать его икону. Празднование блаженному Симону совершается с 1635 года. Память блаженного Симона празднуется также 4 ноября.