Ра́дуйся, Елиссе́е прему́дре:/ ты бо, очи́стив ум от сласте́й теле́сных,/ прия́л еси́, сла́вне, зари́ духо́вныя,/ про́чим же всем пре́дал еси́/ и весь яви́лся еси́ светови́ден./ Те́мже всели́лся еси́ к Све́ту незаходи́мому,/ о нас всегда́ моли́ся,/ восхваля́ющих тя.

Тя, Елиссе́е блаже́нне,/ ревни́тель Илия́/ в сугу́бей благода́ти просвеще́на оста́вль,/ возду́шный ору́жник вои́стинну я́вльшийся./ Его́же подо́бием/ быстрины́ речны́я уста́вил еси́ благода́тию/ и преше́л еси́, сла́вне,/ ра́достно украша́яся и велича́я Христа́.

Дре́вле ве́рней Сомани́тиде/ отроча́ да́руеши моли́твою,/ его́же, уме́рша, воздви́гл еси́,/ я́ко проро́к Боже́ственный, свяще́нно удивля́емь;/ со́лию же па́ки во́ды безча́дныя/ я́ве претвори́л еси́ в чадоро́дие,/ чудеса́ безме́рная соверша́еши/ благода́тию Вседе́теля Ду́ха, блаже́нне,/ те́мже пое́м тя.

И́ны стихи́ры свята́го Мефо́дия, глас и подо́бен то́йже:

О́тче Богому́дре Мефо́дие,/ я́коже лев, рыка́нием/ прему́дрых уче́ний твои́х/ и Анни́на ужаси́л еси́, льсти́ваго ли́са,/ и у́бо, не терпя́ твоего́ обличе́ния,/ я́звою меча́ ссека́ется злочести́вый./ Те́мже не остави́л еси́ ста́да ги́блемаго Христо́ва,/ побо́рник быв правосла́вным лю́дем.

Правосла́вия утвержде́ние,/ Це́ркве па́стырь, мона́хов удобре́ние,/ река́, наводня́ема вода́ми Ду́ха,/ ча́ша, пролива́ющая питие́ пресла́дко,/ свети́ло, просвеща́ющее ми́ра концы́,/ меч, обою́ду наощре́н благода́тию/ и злочести́вых полки́ ссека́ющ,/ ты еси́, Мефо́дие.

Испове́дания о́браз,/ святи́телей основа́ние,/ и Богодохнове́нен орга́н,/ воспе́вый уче́ния, благоче́стия испо́лнен,/ прему́дрости дом, любве́ пучи́на,/ ми́лования струя́ приснотеку́щая,/ окри́н, излива́ющ пи́во умиле́ния,/ и благоцвету́щ, сла́вне, рай/ ты еси́, Мефо́дие.

Сла́ва, глас 2:

Проро́к Боже́ственное прише́ствие возсия́ днесь,/ созыва́юще та́йно празднолю́бныя ду́ши./ И́же на колесни́це неботе́чне всед,/ восто́ка невече́рняго звезда́/ с Елиссе́ем, чу́дным му́жем,/ разширя́ет струи́ но́ваго Иорда́на,/ пропове́дание уясня́я благоче́стия,/ сугу́бым о́бразом вообража́юще я́сно/ ве́тхия и но́выя единогла́сныя сла́вы/ сугу́бо благослове́ние,/ во и́же ве́рно соверша́ющих/ всепра́зднственную па́мять их.

И ны́не, пра́здника или́ Богоро́дичен.

Крестобогоро́дичен.

Подо́бен: Егда́ от Дре́ва:

Дре́ву Кре́стному Тя, Иису́се, пригвожде́на/ зря́щи, Неискусобра́чная, пла́чущи, глаго́лаше:/ Ча́до сла́дкое,/ почто́ оста́вил еси́ Мене́, ро́ждшую Тя, еди́ну?/ Све́те непристу́пный Пребезнача́льнаго Отца́,/ потщи́ся и просла́вися,/ я́ко да сла́ву полу́чат Боже́ственную/ и́же Боже́ственныя стра́сти Твоя́ сла́вящии.

На стихо́вне пра́здника или́ Окто́иха. Пото́м глаго́лем припе́в: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

И пое́м стихи́ру, глас 4:

Ве́село днесь Це́рковь Бо́жия одева́ется/ и ра́дуется, зову́щи:/ уясни́ся моя́ добро́та па́че вся́каго гра́да,/ се бо святи́телей вели́кое сокро́вище,/ сла́вный Мефо́дий, ше́ствие к Небесе́м сотвори́./ Прииди́те у́бо, празднолю́бцы,/ правосла́вных собо́р, лик соста́вльше/ ку́пно о́крест Боже́ственныя ра́ки,/ исцеле́ний то́ки прие́мше от нея́,/ моли́теся Христу́ Бо́гу/ изба́вити вселе́нную от вся́кия е́реси.

Сла́ва, глас 6:

Проро́че, пропове́дателю Христо́в,/ престо́ла вели́чества никогда́же отлуча́ешися/ и коему́ждо боля́щу при́сно предстои́ши;/ в Вы́шних служа́, вселе́нную благословля́еши,/ всю́ду прославля́емь,/ проси́ очище́ния душа́м на́шим.

И ны́не, пра́здника или́ Богоро́дичен.

Крестобогоро́дичен.

Подо́бен: Тридне́вен:

На Дре́ве Живо́т наш зря́ще Всенепоро́чная Богоро́дица ви́сящ,/ ма́терски рыда́ющи, вопия́ше:/ Сы́не Мой и Бо́же Мой,/ спаси́ любо́вию пою́щия Тя.

Тропа́рь проро́ка, глас 4:

Во пло́ти А́нгел,/ проро́ков основа́ние,/ вторы́й Предте́ча прише́ствия Христо́ва, Илия́ сла́вный,/ свы́ше посла́вый Елиссе́еви благода́ть/ неду́ги отгоня́ти/ и прокаже́нныя очища́ти,/ те́мже и почита́ющим его́ то́чит исцеле́ния.

Ин тропа́рь, глас 4:

И́же во пло́ти А́нгел/ и проро́ков нача́льнику свиде́тельствова, сла́вный Елиссе́е,/ ди́вны чудеса́ соде́лал еси́, проро́че,/ поспе́шеством Свята́го Ду́ха;/ си́лою Илиино́ю исцели́в во́дное естество́,/ зве́ри же погуби́ пожира́ющия,/ и Неема́на очи́сти,/ и вдови́ча сы́на воскреси́л еси́,/ и всем чту́щим тя да́руй благода́ть и исцеле́ние.

Сла́ва, Мефо́дия, глас то́йже:

Пра́вило ве́ры и о́браз кро́тости,/ возде́ржания учи́теля/ яви́ тя ста́ду твоему́/ Я́же веще́й И́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ святи́телю Мефо́дие,/ моли́ Христа́ Бо́га/ спасти́ся душа́м на́шим.

И ны́не, Богоро́дичен.

НА У́ТРЕНИ

Кано́н Окто́иха еди́н и святы́х два, на 8. Кано́н проро́ка, его́же краегране́сие: Пою́ ве́село Елиссе́еву благода́ть, глас 5.

Песнь 1

Ирмо́с: Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,/ Тому́ еди́ному пои́м, я́ко просла́вися.

Изнача́ла о Бо́зе пое́мыми пе́сньми, и́миже пое́тся пое́мый,/ проро́ческими облиста́я хвала́ми, пою́ просла́вльшаго:/ я́ко просла́вися.

Взем ко́жу из руки́ проро́чи, совосприя́т сан,/ от ра́ла проро́к претворя́емь заре́ю духо́вною:/ я́ко просла́вися.

Я́ко предразуме́, Христе́, е́же к лу́чшему зва́нию, Елиссе́ево предложе́ние,/ проро́чества благода́тию просвети́л еси́, Спа́се Всеси́льне,/ я́ко просла́вися.

Богоро́дичен: Пречи́стая Ма́ти Бо́жия,/ воплоще́ннаго из Тебе́ и от недр Роди́теля не отлу́чшася Бо́га непреста́нно моли́/ от вся́кия беды́ спасти́, и́хже созда́.

Ин кано́н свята́го Мефо́дия, глас 4.

Песнь 1

Ирмо́с: Порази́вый Еги́пта/ и фарао́на мучи́теля погрузи́вый в мо́ри,/ лю́ди спасл еси́ из рабо́ты,/ моисе́йски пою́щия песнь побе́дную:/ я́ко просла́вися.

В посте́х, преподо́бне, порабоща́я те́ло твое́,/ ума́стил еси́ ду́шу твою́ восхожде́нии Боже́ственными/ и пи́щу прия́л еси́ Вы́шняго Ца́рства неиждива́емую.

Слове́сным мече́м вооружи́вся Ду́ха и, я́коже во броня́, ве́рою оде́явся,/ му́жески еретико́в полки́ пресе́кл еси́,/ всеблаже́нне Мефо́дие о́тче.

Река́ приснотеку́щая Це́ркви бы́ша уста́ твоя́ Боже́ственная,/ ерети́ческая моря́ я́ко вои́стинну, преподо́бне Мефо́дие,/ изсуша́я и напоя́я ве́рныя.

Богоро́дичен: Сень одушевле́нну, и ковче́г, и трапе́зу,/ го́ру, от нея́же усече́ся без руку́ челове́чу ка́мень, и́же всех Госпо́дь,/ Мари́ю Пречи́стую пе́сньми почти́м.

Песнь 3

Ирмо́с: Си́лою Креста́ Твоего́, Христе́,/ утверди́ мое́ помышле́ние,/ во е́же пе́ти и сла́вити/ спаси́тельное Твое́ вознесе́ние.

Земна́го пристра́стия отсту́пль, огнедохнове́нному послужи́л еси́,/ служи́телем угожде́ния Влады́ки бесе́дуя.

В ду́се прия́л еси́ сугу́ба учи́теля дарова́ния,/ не погреши́в ле́ностию о́наго восхожде́ния.

С рыда́нием Илии́ предста́в и растерза́в ри́зу,/ ми́лотию разделя́еши струи́ Иорда́нския.

Богоро́дичен: Моли́ непреста́нно, Чи́стая, Проше́дшаго из чресл Твои́х/ изба́вити от ле́сти диа́воли пою́щия Тя, Богоневе́сто.

Ин

Ирмо́с: Утвержда́яй гром и созида́яй дух,/ утверди́ мене́, Го́споди, да Тя пою́ и́стинно/ и творю́ волю́ Твою́,/ я́ко несть свят, я́ко Ты, Бо́же наш.

Тучено́сный бысть о́блак язы́к твой, Мефо́дие,/ сердца́ бо благочести́вых напоя́ющ сло́вом,/ нечести́вых же всегда́ подавля́ющ пле́велы.

Исправля́я ве́ры сло́во, ран иску́с прия́л еси́/ и в мра́чней, о́тче, темни́це седе́ти осужде́н был еси́./ Те́мже к Све́ту невече́рнему преста́вился еси́, веселя́ся.

Му́чеников страда́ния воспе́л еси́,/ сих причасти́лся еси́ неотъе́млемыя, о́тче, ра́дости,/ я́ко сугу́бо пострада́в непреста́нными скорбьми́ и ра́нами, Мефо́дие.

Богоро́дичен: Гаврии́л, ра́дуйся Де́ве пове́дуя, веща́ше:/ Дух Святы́й на Тя на́йдет, Де́во,/ и Спа́са Го́спода зачне́ши во чре́ве Твое́м.

Конда́к Мефо́дия, глас 2.

Подо́бен: Тве́рдый:

На земли́ подвиза́лся еси́, я́ко безпло́тный,/ и Небеса́ насле́довал еси́, Мефо́дие,/ я́ко изъясни́вый в конце́х ико́н поклоне́ние,/ в труде́х бо и боле́знех вя́щше пребы́в,/ не преста́л еси́ дерзнове́нием,/ облича́я отмета́ющияся ико́ны Христо́вы.

И́кос:

Грехо́в ми разреше́ние пода́ждь,/ е́же пе́ти по достоя́нию по́двиги твоя́, Мефо́дие пресла́вне:/ в ров бо глубо́к вве́ржен был еси́,/ да я́же пре́жде ду́ши, во глубине́ погребе́нныя неве́дения,/ разреши́ши к сия́нию Боже́ственнаго светоли́тия, научи́в я́ве подсо́лнечную/ Боже́ственному вои́стинну неизрече́нному Христо́ву покланя́тися воображе́нию,/ облича́я отмета́ющияся ико́ны Христо́вы.

Седа́лен проро́ка, глас 1.

Подо́бен: Гроб Твой:

Прозре́нием Боже́ственным Илия́ тя вели́кий, му́дре Елиссе́е, учени́ка взима́ет,/ проро́ка предпоказу́ет, сия́юща Ду́хом./ Те́мже, днесь всесвяту́ю твою́ па́мять пра́зднующе,/ благочестному́дренно почита́ем тя с ним, сла́вне.

Сла́ва, преподо́бнаго, глас 4.

Подо́бен: Яви́лся еси́ днесь:

Я́ко све́тлое со́лнце, возсия́в, о́тче,/ уче́ньми твои́ми всю вселе́нную, свяще́нне, просвеща́еши, Мефо́дие,/ и отгоня́еши мглу ерети́ческую.

И ны́не, пра́здника или́ Богоро́дичен:

Пречи́стеи ру́це Твои́, Де́во Ма́ти, просте́рши,/ покры́й упова́ющия на Тя и Сы́ну Твоему́ зову́щия:/ всем пода́ждь, Христе́, ми́лости Твоя́.

Крестобогоро́дичен:

На Дре́ве ви́дящи воздви́жена Сы́на Твоего́, Пречи́стая,/ утро́бою ма́тернею растерза́ема, жа́лостно взыва́ла еси́:/ увы́ Мне, ка́ко заше́л еси́, Све́те Мой Безле́тный?

Песнь 4

Ирмо́с: Услы́шах, Го́споди,/ из гро́ба Твое́ воста́ние/ и просла́вих/ Твою́ непобеди́мую си́лу.

Я́коже дре́вле во́ды, и ны́не непло́дный ум мой исцеля́еши, Благода́телю,/ Елиссе́евыми моли́твами.

Боже́ственне обогати́лся еси́ Вы́шних сказа́нием/ и зве́рем дете́й отъе́млеши злообра́зие.

Ви́ден был еси́, сла́вне, де́вством укра́шен,/ су́щим во тьме пре́лести, я́ко свети́льник, издале́ча сия́я.

Молча́ти не мо́жет Ду́хом дви́жим язы́к,/ твоя́ ди́вная в житии́, Елиссе́е, исправле́ния.

Богоро́дичен: Вои́стинну сла́вим Тя, Богоро́дице Безневе́стная,/ и в Твое́ приста́нище, ве́рнии, прибега́ем.

Ин

Ирмо́с: Услыша́х, Бо́же, слух Твой и убоя́хся,/ разуме́х дела́ Твоя́ и ужасо́хся, Го́споди,/ я́ко Твоего́ хвале́ния испо́лнь земля́.

Му́дрости разу́мною ча́шею омочи́в устне́, о́тче,/ ре́ки нам источи́л еси́ уче́ний, преподо́бне,/ благоче́стно творя́щим па́мять твою́.

Ты пропове́датель возжеле́нен, сла́док сло́вом, прост нра́вы,/ духо́вными дарова́нии, святи́телю преподо́бне, пребога́т яви́лся еси́, Мефо́дие.

Копие́м мы́сленным Боже́ственнаго Сло́ва/ я́же в ме́рзости ерети́честей су́щую пострека́в,/ уста́вил еси́ нече́стия на́глость, Мефо́дие.

Богоро́дичен: Ра́дуйся, две́ре мы́сленная,/ из нея́же про́йде неизрече́нным сло́вом Царь Небе́сный/ и, соблю́д непоро́чну, запеча́тану па́ки оста́ви.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе,́ ино́го не зна́ем.

Молчали́вое и кро́ткое, Богодохнове́нне, души́ твоея́/ проро́ка тя показа́, Елиссе́е, ве́ры ра́ди.

Боже́ственное твои́х слове́с де́йство просвеща́ет мя глаго́лы духо́вными,/ Елиссе́е всеблаже́нне.

Мертв грех, я́ко жи́ву предстоя́щу Го́сподеви, проро́че,/ тебе́, Елиссе́е, вменя́шеся.

Богоро́дичен: Не преста́й моля́щи, Его́же родила́ еси́, Богоро́дице,/ спасти́ ду́ши на́ша, воспева́ющих Тя, Пречи́стая.

Ин

Ирмо́с: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра.

Све́том просвеща́емь Трисо́лнечным, сла́вне,/ мра́чную и те́мную е́реси мглу благоче́стно отгна́л еси́/ и звезда́ был еси́, ве́рными блиста́я сия́нии.

Изощре́на трость Ду́ха язы́к твой, я́ко скоропи́сца кни́жника, Мефо́дие, показа́ся,/ на скрижа́ли начерта́я серде́ц благода́ти Боже́ственный зако́н нело́жно.

Сле́зныя то́ки всено́щными стоя́нии, я́ко би́серие, нося́, преподо́бне,/ си́ми грехо́вныя пото́ки изсуши́л еси́/ и Боже́ственнаго Ду́ха прия́телище яви́лся еси́ чи́сто.

Богоро́дичен: Избавля́еши моли́твами Твои́ми от вся́каго обстоя́ния/ прибега́ющия в покро́в Твой, Мари́е Богоро́дице:/ Ты бо чту́щих Тя Предста́тельница еси́ и упова́ние с Бо́гом.

Песнь 6

Ирмо́с: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.

Напо́лни пото́ки иногда́ ни дождь, ни дух возду́шный,/ возду́х же благода́ти, проро́че,/ и сло́во твое́ де́йством Ду́ха напо́лни.

От ма́ла сосу́да иногда́, проро́че, я́коже напо́лнил еси́ незави́стно еле́й жене́,/ и мне Боже́ственную ми́лость источи́ти, Елиссе́е, помоли́ся.

Честна́я жена́, проро́че, ве́рою вжиля́ема,/ в ста́рости непло́дствия разреше́ние прие́млет моли́твою,/ благоча́дие плодя́щи.

Богоро́дичен: Купину́ Тя неопали́му, и го́ру, и ле́ствицу одушевле́нну,/ и дверь Небе́сную досто́йно сла́вим, Мари́е сла́вная,/ правове́рных похвало́.

Ин

Ирмо́с: Бу́ря мя помышле́ний, пости́гши,/ во глубину́ низвлачи́т мя безме́рных грехо́в,/ но Ты, Упра́вителю Благи́й,/ предвари́в, упра́ви,/ я́ко проро́ка, и спаси́ мя.

Пчеле́ трудолю́бней поревнова́в, пи́сменныя собра́л еси́ цве́ты,/ я́коже в со́те, се́рдцем твои́м сие́ состроя́я/ и всем источа́я реку́ уче́ний твои́х.

Слове́с духо́вных напо́лнився, язы́к твой, прему́дре,/ языкобо́лия низложи́ ху́льников,/ пропове́дающ Христо́во воплоще́ние почита́ти и плотско́е подо́бие.

Пе́рвее у́бо на седа́лищи ста́рец похвали́в Го́спода,/ на святи́тельсте престо́ле, напосле́док же возне́слся еси́ сам,/ упа́с богоуго́дно избра́нныя, о́тче, сия́ лю́ди.

Богоро́дичен: Еди́ну Тя Бо́га на́шего Ма́терь, Богоро́дице Влады́чице, тварь вся познава́ет,/ я́ко еди́на вмести́ла еси́ Бо́га несказа́нно во утро́бе Твое́й,/ Боже́ственным не опали́вшися огне́м.

Конда́к, глас 2.

Подо́бен: Вы́шних ища́:

Проро́к Бо́жий яви́лся еси́,/ сугу́бую благода́ть прие́мь,/ вои́стинну досто́йную тебе́, Елиссе́е блаже́нне:/ Илии́ бо был еси́ совсе́льник,/ с ни́мже Христу́ Бо́гу моли́ся непреста́нно о всех нас.

И́кос:

В зако́не Госпо́дни возсия́вшаго, вси Елиссе́я му́драго пе́нии пе́сненными воспое́м:/ весь бо испо́лнен есть чуде́с сугу́быми о́бразы, нам источа́я исцеле́ний струи́,/ кропи́т бо ду́ши ве́рных и спаса́ет от бед,/ я́коже дре́вле лю́ди безча́дствующия,/ услажда́ет со́лию во́ды, креще́ния благода́ть возвеща́я я́ве,/ моля́ непреста́нно о всех нас.

Песнь 7

Ирмо́с: В пещи́ о́гненней/ песносло́вцы спасы́й о́троки,/ благослове́н Бог оте́ц на́ших.

Прему́дрости лу́чшия ты, Елиссе́е, испо́лнився, вопия́л еси́:/ благослове́н Бог оте́ц на́ших.

Ты, я́ко Жи́зни служи́тель, ма́тери а́бие жи́ва ме́ртва сы́на,/ проро́че, показа́л еси́.

Ненача́емыя ³⁴ иногда́ проро́ческия пита́я де́ти,/ всегуби́тельныя сне́ди сотвори́л еси́ неврежде́нны.

Богоро́дичен: И́же от Де́вы рожде́йся, Ю́же Богоро́дицу соде́ла,/ благослове́н Бог оте́ц на́ших.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Росо́ю Боже́ственныя любве́ погаси́л еси́ страсте́й, пресла́вне, разжже́нную пещь;/ иску́шся же напа́стьми, я́ко зла́то горни́лом,/ я́ко со́лнце, блиста́еши.

Адама́нтское се́рдце в ско́рбех име́л еси́ и в гоне́ниих, Мефо́дие,/ и ны́не блиста́еши луча́ми Небе́сными и огнедохнове́нными усты́,/ те́мже тя восхваля́ем.

Я́коже необори́м столп, неподви́жим пребы́л еси́ напа́стными прило́ги,/ пре́лести утвержде́ние низлага́я, святи́телю,/ си́лою твои́х слове́с, Мефо́дие преблаже́нне.

Богоро́дичен: Пречу́дный Ты черто́г, соеди́ншаго Себе́ челове́честву Бо́га/ еди́на породила́ еси́ и Де́вою пребыла́ еси́,/ Богоневе́стная Ма́ти, Мари́е Де́во.

Песнь 8

Ирмо́с: Ороси́вшаго пещь/ и о́троки сохра́ньшаго посреде́ горя́щаго пла́мене,/ о́троцы, славосло́вите, свяще́нницы, благослови́те,/ лю́дие, превозноси́те во вся ве́ки.

Сотво́ршаго очище́ние проро́ка повеле́нием о́троцы воспева́ют,/ святи́тели благосло́вят, лю́дие превозно́сят Его́ во ве́ки.

От ве́щи очи́щ ум,/ невеще́ственнаго жела́нием одержи́м, невеще́ственно ви́дел еси́./ Те́мже, игра́я, вопия́л еси́:/ Христа́ превозноси́те во вся ве́ки.

Благода́тию прови́дя бу́дущая, на дре́ве пречи́стый Крест зри́ши воображе́н./ Те́мже вопия́л еси́, ра́дуяся, Богонауче́нный проро́че:/ Христа́ превозноси́те во вся ве́ки.

Колесни́ц мно́жество, окру́жших тя, низложи́, чу́дне,/ мра́ком незави́стно уста́вил еси́, безу́мие облича́я, всеблаже́нне, вопия́:/ Христа́ превозноси́те во вся ве́ки.

Богоро́дичен: А́нгели сла́вят Рождество́ Твое́, Чи́стая Богоневе́сто,/ с ни́миже вси пое́м:/ о́троцы, благослови́те, свяще́нницы, песносло́вите,/ лю́дие, превозноси́те во вся ве́ки.

Ин

Ирмо́с: Земля́ и вся, я́же на ней,/ мо́ре и вси исто́чницы,/ небеса́ небе́с, свет и тьма, мраз и зной,/ сы́нове челове́честии,/ свяще́нницы, благослови́те Го́спода/ и превозноси́те Его́ во ве́ки.

Ты низложи́л еси́ ерети́ческая шата́ния, е́же пои́стинне злочести́вая,/ и совозне́сл еси́ ве́рных Це́ркве, о́тче, рог,/ Христо́ву наказу́я ико́ну чести́, Мефо́дие./ Те́мже тя пое́м и любо́вию почита́ем.

Тя звезду́ всесве́тлую Со́лнце показа́ Христо́с на тве́рди, прему́дре, церко́вней,/ и твои́ми сия́нии честны́х уче́ний концы́, о́тче,/ озари́л еси́ во вся ве́ки.

Твое́ сло́во, я́коже гром, Мефо́дие, возшуме́ на земли́,/ мамо́ны соде́йственника и роди́теля пре́лести, я́коже зми́я, связа́в,/ отсла́л еси́ тьме ве́чней, я́ко су́ща насле́дника.

Богоро́дичен: Еди́н еси́ единоро́ден горе́, еди́н и до́ле То́йже:/ без ма́тере горе́ от Отца́ и без отца́ из Ма́тере до́лу,/ в Не́йже вообрази́лся еси́ в чужде́е, Сло́ве, обнища́в,/ в мое́ смири́вшееся естество́ от греха́.

Песнь 9

Ирмо́с: Тя, па́че ума́ и словесе́, Ма́терь Бо́жию,/ в ле́то Безле́тнаго/ неизрече́нно ро́ждшую,/ ве́рнии, единому́дренно велича́ем.

Жезло́м сечи́тельным возвлача́ желе́зо проро́к,/ ве́щное челове́к существо́, Кресто́м вознесе́но, науча́ше.

Да теле́с пока́жет воста́ние Живонача́льник,/ возставля́ет мертвеца́,/ отню́д не иму́ща дыха́ния пло́тию,/ проро́ка показу́я пречестно́е.

Ны́не в Боже́ственнем поко́и Бо́га мо́лиши, чу́дне,/ блаже́нство улучи́ти при́сно тя блажа́щим.

Богоро́дичен: Ра́дуйся, Богоро́дице, Ма́ти Христа́ Бо́га,/ Его́же родила́ еси́, моли́ согреше́ний оставле́ние дарова́ти/ ве́рою воспева́ющим Тя.

Ин

Ирмо́с: Я́ко сотвори́ мне вели́чия Си́льный,/ и свя́то И́мя Его́,/ и ми́лость Его́ в род и род боя́щимся Его́.

Святи́телей красота́, мона́хов удобре́ние, всех ве́рных о́браз,/ Це́ркве па́стырь и правосла́вных степе́нь ты еси́, Мефо́дие.

Илиину́ ре́вность стяжа́в, испо́лнил еси́ студа́ беззако́нныя иере́и,/ воплоще́ния Госпо́дня непокланя́ющихся о́бразу, му́дре Мефо́дие.

Лику́я со А́нгелы пред лице́м Изба́вителя и сла́вы Его́ наслажда́яся,/ моли́твами твои́ми нас от вся́ких искуше́ний изба́ви, Мефо́дие.

Богоро́дичен: Пое́м Твое́ рождество́ и сла́вим из Тебе́ Рожде́ннаго,/ я́ко Бо́га же и Челове́ка, Ма́ти Де́во Чи́стая,/ Его́же моли́ приле́жно поми́ловати нас.

Свети́лен.

Подо́бен: Не́бо звезда́ми:

Илиину́ благода́ть сугу́бу прия́л еси́ от Бо́га, Елиссе́е Богоблаже́нне,/ и прося́щим у тебе́ ве́рно сугу́бо исцеле́ния дае́ши,/ душа́м же и те́лом.

Сла́ва, святи́теля.

Подо́бен: Ученико́м, зря́щим:

Прииди́те, ве́рнии, пое́м Боже́ственную па́мять святи́теля днесь Мефо́дия,/ в ро́ве преиспо́днем вве́ржена,/ да ду́ши изба́вит, погребе́нныя во тьме, от лука́ваго нече́стия.

И ны́не, пра́здника или́ Богоро́дичен:

Препе́тая Де́во и Богоро́дице, Бо́га неизрече́нно ро́ждшая,/ приле́жно моли́ Сы́на Твоего́ о нас, рабе́х Твои́х,/ уще́дрити и спасти́ любо́вию хва́лящих Тя.

На стихо́вне Окто́иха. Сла́ва, глас 6:

Звезда́ возсия́ благоче́стия от запа́д со́лнца ви́димаго,/ вели́кий во святи́телех Мефо́дий,/ и, мглу пресе́к злосла́вных,/ почи́ на и́стиннем восто́це,/ пра́веднаго Со́лнца, Христа́ Бо́га на́шего,/ и та́мо со Безпло́тными водворя́яся ли́ки,/ и престо́лу предстоя́ Тро́йческому,/ я́ко преподо́бен, я́ко му́ченик,/ я́ко святи́тель,/ я́ко патриа́рх дея́нием и виде́нием,/ нам про́сит, ве́рою творя́щим свяще́нную его́ па́мять,/ ве́лия ми́лости.

И ны́не, пра́здника или́ Богоро́дичен.

Крестобогоро́дичен:

Подо́бен: Тридне́вен:

Зача́тие Твое́ безсе́менное/ и рождество́ несказа́нное помышля́ющи,/ дивлю́ся зело́:/ ка́ко си́це, я́коже злоде́й,/ благоволи́л еси́ умре́ти, Сы́не?–/ Пречи́стая взыва́ше.

НА ЛИТУРГИ́И

Проки́мен, глас 4: Ты иере́й во век по чи́ну Мелхиседе́кову. Стих: Рече́ Госпо́дь Го́сподеви моему́: Апо́стол: Собо́рнаго Посла́ния Иа́ковля, зача́ло 57. Аллилу́ия, глас 4: Моисе́й и Ааро́н: Ева́нгелие от Луки́, зача́ло 14. Прича́стен: В па́мять ве́чную бу́дет пра́ведник:

И́на слу́жба бде́нная свята́го сла́внаго проро́ка Бо́жия Елиссе́я

НА ВЕЛИ́ЦЕЙ ВЕЧЕ́РНИ

Блаже́н муж: На Го́споди, воззва́х: стихи́ры на 8, глас 8. Сла́ва, глас 2.">(зри стихиры на Господи воззвах в службе выше) И ны́не: Пре́йде сень зако́нная:

Вход. Проки́мен дне. Чте́ния 3.

Ца́рств четве́ртых чте́ние (глава́ 2):

Бысть во дни о́ны./ Обре́те Илия́ Елиссе́я, сы́на Асафа́това,/ и той ора́ше вола́ми,/ и и́де Илия́ к нему́, и пове́рже Илия́ ми́лоть свою́ на нем./ И оста́ви Елиссе́й волы́./ И тече́ созади́ Илии́. И служа́ше ему́./ И бысть егда́ взя́ту бы́ти Илии́ Го́сподем в ви́хре я́ко на не́бо,/ и идо́ста Илия́ и Елиссе́й в Галга́лы./ Рече́ же Илия́ к Елиссе́ю:/ седи́ у́бо зде, я́ко Госпо́дь посла́ мя до Иорда́на./ И рече́ Елиссе́й:/ жив Госпо́дь, и жива́ душа́ твоя́, а́ще оста́влю тебе́./ И поидо́ста о́ба./ И пятьдеся́т муже́й от сыно́в проро́ческих приидо́ша и ста́ша пря́мо издале́ча,/ о́ба же ста́ста при Иорда́не./ И прия́т Илия́ ми́лоть свою́, и свит ю,/ и порази́ е́ю во́ды, и раздели́ся вода́ сю́ду и сю́ду,/ и преидо́ста о́ба по су́ху./ И бысть я́ко преидо́ста, и рече́ Илия́ Елиссе́ю:/ проси́, что сотворю́ тебе́, пре́жде да́же не взят бу́ду от Тебе́./ И рече́ Елиссе́й:/ да бу́дет у́бо дух, и́же в тебе́, сугу́б во мне./ И рече́ Илия́: ожесточи́л еси́ проси́ти;/ оба́че а́ще уви́диши мя взе́млема от Тебе́, бу́дет ти та́ко./ А́ще ли же не уви́диши, не бу́дет./ И бысть иду́щема и́ма и глаго́лющема,/ и се колесни́ца о́гненна, и ко́ни о́гненни, и раздели́ между́ обе́ма,/ и взя́тся Илия́ тру́сом я́ко на не́бо,/ и Елиссе́й зря́ше и той вопия́ше:/ о́тче, о́тче, колесни́ца Изра́илева, и ко́ни его́./ И не ви́де его́ ктому́./ И я́тся Елиссе́й за ри́зы своя́ и раздра́ я на дво́е,/ и взят ми́лоть Илиину́ Елиссе́й, па́дшую верху́ его́./ И обрати́ся Елиссе́й, и ста на бре́зе Иорда́на./ И прия́т Елиссе́й ми́лоть Илиину́, па́дшую верху́ его́,/ и уда́ри во́ды, и не раздели́шася./ И рече́ Елиссе́й:/ где у́бо есть Бог Илии́н Апфо́?/ И уда́ри Елиссе́й во́ды второ́е./ И раздели́шася во́ды, и пре́йде по су́ху.

Ца́рств четве́ртых чте́ние (глава́ 2):

Реко́ша му́жие гра́да Иерихо́нска ко Елиссе́ю:/ се жили́ще гра́да сего́ добро́, я́коже ты, го́споди, ви́диши,/ и во́ды злы и безча́дны./ И рече́ Елиссе́й:/ приими́те ми водоно́с нов и всы́плите ту соль./ И прия́ша и, и изы́де на исхожде́ние вод,/ и вве́рже та́мо соль, и рече́:/ та́ко глаго́лет Госпо́дь:/ исцели́х во́ды сия́,/ и не ктому́ бу́дет отню́д умира́я, ниже́ безча́дствующая си́ми./ И исцеле́ша во́ды до дне сего́,/ по глаго́лу, и́же глаго́ла Елиссе́й.

Ца́рств четве́ртых чте́ние (глава́ 4):

Бысть во еди́н день, и пре́йде Елиссе́й в Сома́н,/ и ту жена́ ве́лия и удержа́ его́ сне́сти хле́ба;/ и бысть ему́ входи́ти и исходи́ти мно́жицею,/ и уклоня́шеся та́мо я́сти хле́ба./ И рече́ жена́ к му́жу своему́:/ се ны́не разуме́х, я́ко челове́к Бо́жий свят сей,/ мимохо́дит нас при́сно./ Сотвори́м у́бо ему́ го́рницу ме́сто ма́ло/ и поста́вим е́му та́мо одр, и трапе́зу, и престо́л, и све́щник,/ и бу́дет внегда́ входи́ти ему́ к нам, и уклоня́ется та́мо./ И бысть во еди́н день, и вни́де та́мо, и уклони́ся в го́рницу, и спа та́мо,/ и рече́ ко Гиези́ю, о́трочищу своему́:/ призови́ ми сомани́тяныню сию́./ И призва́ ю, и ста пред ним./ И рече́ ему́:/ рцы у́бо ей:/ се удиви́ла еси́ нас всем попече́нием сим:/ что подоба́ет сотвори́ти тебе́?/ А́ще есть тебе́ сло́во к царю́, или́ ко кня́зю си́лы?/ Она́ же рече́:/ несть, посреде́ люде́й мои́х аз есмь живу́щи./ И рече́ ко Гиези́ю:/ что подоба́ет сотвори́ти ей?/ И рече́ Гиези́й, о́трочищ его́:/ вои́стинну сы́на несть у нея́, и муж ея́ стар./ И рече́: призови́ ю./ И призва́ ю, и ста при две́рех./ И рече́ Елиссе́й к ней:/ во вре́мя сие́, я́коже час сей живу́щи,/ ты зачне́ши сы́на./ Она́ же рече́:/ ни, господи́не, не солжи́ рабе́ твое́й./ И зача́т во чре́ве жена́,/ и роди́ сы́на во вре́мя сие́, я́коже час сей живу́щи,/ я́коже глаго́ла к ней Елиссе́й./ И возмужа́ о́трочищ, и бысть, егда́ изы́де ко отцу́ своему́, к жну́щим,/ и рече́ ко отцу́ своему́:/ глава́ моя́, глава́ моя́ боли́т./ И рече́ ко о́троку:/ неси́ его́ к ма́тери его́./ И несе́ его́ к ма́тери его./ И лежа́ше на коле́ну ея́ до полу́дне, и у́мре./ И вознесе́ его́, и положи́ его́ на одре́ челове́ка Бо́жия,/ и затвори́ его́, и изы́де,/ и призва́ му́жа своего́, и рече́ ему́:/ посли́ ми у́бо еди́наго от о́трок и еди́но от осля́т,/ и теку́ до челове́ка Бо́жия и возвращу́ся./ И рече́: что я́ко ты и́деши к нему́ днесь?/ не нов ме́сяц, ниже́ суббо́та./ Она́ же рече́: мир./ И оседла́ осля́, и рече́ ко о́трочищу своему́:/ веди́ и иди́, да не удержи́ши мене́, е́же все́сти,/ я́коже реку́ тебе́:/ гряди́, и иди́, и прииди́ к челове́ку Бо́жию, в го́ру Карми́льскую./ И и́де и прии́де до челове́ка Бо́жия в го́ру Карми́льскую./ И бысть я́ко ви́де ю Елиссе́й гряду́щую/ и рече́ к Гиези́ю, о́трочищу своему́:/ се у́бо сомани́тяныня о́ная,/ ны́не тецы́ в сре́тение ея́, и рече́ши ей:/ мир ли тебе́?/ И тече́ во сре́тение ей и рече́ ей: мир ли тебе́?/ Мир ли му́жу твоему́? мир ли о́трочищу твоему́?/ Она́ же рече́: мир./ И прии́де к Елиссе́ю на го́ру, и я́тся за но́зи его́./ И прибли́жися Гиези́й отри́нути ю./ И рече́ Елиссе́й:/ оста́ви ю, я́ко душа́ ея́ боле́зненна в ней,/ и Госпо́дь укры́ от мене́ и не возвести́ ми./ Она́ же рече́:/ егда́ проси́х сы́на у господи́на моего́?/ я́ко реко́х: не прельсти́ мене́./ И рече́ Елиссе́й ко Гиези́ю:/ препояши́ чресла́ твоя́, и возми́ жезл мой в ру́це твои́,/ и иди́, я́ко а́ще обря́щеши му́жа, да не благослови́ши его́,/ и а́ще благослови́т тя муж, не отвеща́й ему́,/ и возложи́ жезл мой на лице́ о́трочища./ И рече́ ма́ти о́трочища:/ жив Госпо́дь, и жива́ душа́ твоя́, а́ще оставлю́ тебе́./ И воста́ Елиссе́й и и́де в след ея́,/ и Гиези́й и́де пред не́ю./ И наложи́ жезл на лице́ о́трочища,/ и не бе гла́са, и не бе слы́шания./ И возврати́ся в сре́тение его́, и пове́да ему́, глаго́ля:/ не воста́ о́трочищ./ И вни́де Елиссе́й в хра́мину./ И се о́трочищ уме́рый положе́н на одре́ его́./ И вни́де Елиссе́й в дом, и затвори́ две́ри за двою́ собо́ю,/ и помоли́ся Го́споду./ И взы́де, и ля́же на о́трочищи./ И положи́ уста́ своя́ на усте́х его́,/ и о́чи свои́ на о́чи его́,/ и ру́це свои́ на ру́це его́, и плесне́ свои́ на плесну́ его́,/ и сляче́ся над ним, и ду́ну на него́,/ и согре́яся плоть о́трочища./ И обрати́ся и походи́ в хра́мине сю́ду и сю́ду;/ и взы́де, и сляче́ся над о́трочищем седми́жды,/ и отве́рзе о́трочищ о́чи свои́./ И возопи́ Елиссе́й ко Гиези́ю, и рече́:/ призови́ ми сомани́тяныню сию́./ И призва́ ю. И вни́де к нему́. И рече́ Елиссе́й:/ приими́ сы́на твоего́./ И вни́де жена́, и паде́ на но́гу его́ и поклони́ся ему́ до земли́,/ и прия́т сы́на своего́, и изы́де.

На лити́и стихи́ры, глас 2. Самогла́сны:

Свети́льницы возсия́ша вселе́нней два:/ всесве́тлый Илия́ и Елиссе́й./ Ов у́бо Боже́ственным сло́вом небе́сныя ка́пли затвори́ и царя́ обличи́,/ на колесни́це же о́гненней на небеса́ вознесе́ся;/ ов же, безча́дныя во́ды исцели́/ и, сугу́бу благода́ть прия́т, Иорда́нския струи́ раздели́./ И ны́не со А́нгелы лику́юще, о нас мо́лят:/ спасти́ся душа́м на́шим.

Свети́льниче невече́рний Це́ркве,/ Боже́ственною ре́вностию разжига́емь, Илие́ проро́че,/ небе́сныя ка́пли затвори́л еси́,/ и, вра́ном пита́н быв,/ царя́ обличи́л еси́,/ и свяще́нники умори́л еси́,/ огнь с небесе́ свел еси́/ и, пятьдеся́тника два умори́в,/ напита́л еси́ вдови́цу еле́ем и муки́ ма́лою го́рстию,/ сы́на ея́ моли́твою воскреси́л еси́,/ огнь разже́гл еси́ в воде́,/ Иорда́нския струи́ пеш преше́л еси́,/ колесни́цею же о́гненною на Небеса́ возне́слся еси́,/ Елиссе́ю благода́ть сугу́бую по́дал еси́./ Моли́ся непреста́нно Бо́гу/ спасти́ся душа́м на́шим.

Ра́дуйтеся, проро́цы честни́и,/ и́же зако́н Бо́жий добр учини́вше/ и ве́рою я́вльшеся непобеди́мии столпи́ и непрекло́ннии,/ вы бо и хода́таи яви́стеся Но́ваго Заве́та Христо́ва/ и, преста́вльшеся к Небеси́, Того́ мо́лите/ умири́ти мир и спасти́ ду́ши на́ша.

Сла́ва, глас 4. Самогла́сен:

Нетле́ннаго соедине́ния прича́стник,/ блаже́нне проро́че, был еси́/ о Бо́зе, Спа́се мое́м./ Моли́твою Иорда́н раздели́в, по су́ху преше́л еси́/ и на о́гненней колесни́це я́ко на Небеса́ восхище́н был еси́,/ сугу́бую благода́ть Елиссе́ю оста́вль,/ те́мже мо́лим тя:/ а́ще и те́лом восхище́н был еси́,/ но ду́хом от нас не разлуча́йся/ и всегда́ Христу́ моли́ся/ спасти́ся душа́м на́шим.

И ны́не, пра́здника или́ Богоро́дичен: При́зри на моле́ния:

На стихо́вне стихи́ры, глас 1.

Подо́бен: Небе́сных чино́в:

Иере́и сту́дныя ноже́м закла́л еси́,/ не́бо язы́ком на зе́млю не дожди́ти удержа́л еси́,/ ре́вностию Боже́ственною разже́гся,/ Елиссе́я же исполни́л еси́/ ми́лоти пода́нием сугу́бым, му́дре Илие́,/ Боже́ственныя благода́ти.

Стих: Моисе́й и Ааро́н во иере́ех Его/ и Самуи́л в призыва́ющих И́мя Его́.

Духо́вными пе́сньми/ проро́ки Христо́вы вси восхва́лим:/ Илия́ бо Фесви́тянин небоше́ственник бысть,/ и ми́лотию Елиссе́й благода́ть прия́т сугу́бу от Бо́га,/ и свети́льницы све́тлии вселе́нней яви́шася,/ моля́ще непреста́нно о душа́х на́ших.

Стих: Ты иере́й во век/ по чи́ну Мелхиседе́кову.

Дави́дски днесь, ве́рнии,/ проро́ка Госпо́дня пе́сньми почти́м,/ Илию́ Фесви́тянина и ревни́теля пресве́тла,/ сей бо язы́ком не́бо, я́ко ко́жу, затвори́/ и зе́млю плодови́ту непло́дну сотвори́./ О, пресла́внаго чудесе́!/ Зе́млен челове́к небесе́м одожди́ти дождя́ не даде́./ О, чудесе́!/ Тле́нен челове́к, в нетле́ние оде́яся,/ на небеса́ востече́ о́гненною колесни́цею,/ ми́лотию же Елиссе́ю сугу́бу благода́ть дарова́в,/ царя́ облича́я и лю́ди непокори́выя гла́дом растлева́ет,/ иере́и сту́дныя вся посрами́/ и вдови́ча сы́на сло́вом воскреси́./ Того́ мольба́ми, Христе́ Бо́же наш,/ в ми́ре сохрани́ лю́ди Своя́/ и побе́ды одоле́ния на враги́ тем да́руй.

Сла́ва, глас 8:

Проро́ков верхо́вники/ и всесве́тлыя свети́льники вселе́нныя/ в пе́снех почти́м, ве́рнии, Илию́ и Елиссея́,/ и Христу́ возопии́м ра́достно:/ Благоутро́бне Го́споди,/ пода́ждь лю́дем Твои́м мольба́ми проро́к Твои́х/ оставле́ние грехо́в и ве́лию ми́лость.

И ны́не, пра́здника или́ Богоро́дичен: Безневе́стная Де́во:

Тропа́рь, глас 4:

И́же во пло́ти А́нгел/ и проро́ков нача́льнику свиде́тельствова, сла́вный Елиссе́е,/ ди́вны чудеса́ соде́лал еси́, проро́че,/ поспе́шеством Свята́го Ду́ха,/ си́лою Илиино́ю исцели́в во́дное естество́,/ зве́ри же погуби́ пожира́ющия,/ и Неема́на очи́сти,/ и вдови́ча сы́на воскреси́л еси́,/ и всем чту́щим тя да́руй благода́ть и исцеле́ние.

Ин тропа́рь, глас то́йже:

Во пло́ти А́нгел,/ проро́ков основа́ние,/ вторы́й предте́ча прише́ствия Христо́ва, Илия́ сла́вный,/ свы́ше посла́вый Елиссе́еви благода́ть/ неду́ги отгоня́ти/ и прокаже́нныя очища́ти,/ те́мже и почита́ющим его́ то́чит исцеле́ния.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, пра́здника или́ Богоро́дичен.

По 1-м стихосло́вии седа́лен, глас 1:

На о́гненную колесни́цу, я́ко на крилу́ ве́тренню, возше́д, Боже́ственный проро́че,/ к Небесе́м пресла́вно ше́ствие днесь твори́ши,/ свы́ше сугу́бую благода́ть и ми́лоть Елиссе́еви оста́вль.

Сла́ва, и ны́не, пра́здника или́ Богоро́дичен:

Ма́терь Тя Бо́жию мо́лим вси, Де́ву вои́стинну и по рождестве́ я́вльшуюся,/ любо́вию прибега́ющии к Твое́й бла́гости:/ Тебе́ бо и́мамы, гре́шнии, Предста́тельницу,/ Тебе́ стяжа́хом в напа́стех спасе́ние, Еди́ну Всенепоро́чную.

По 2-м стихосло́вии седа́лен, глас 3:

Храм твой Боже́ственный всем исцеле́ния незави́стно источа́ет, проро́че пречу́дне,/ с Елиссе́ем преди́вным, Христу́ вку́пе моли́теся/ низпосла́ти мир ми́рови и лю́дем, чту́щим вас, ве́лию ми́лость.

Сла́ва, и ны́не, пра́здника или́ Богоро́дичен:

Ки́йждо, иде́же спаса́ется,/ та́мо пра́ведно и притека́ет./ И ко́е ино́е таково́е прибе́жище, я́ко Ты, Богоро́дице,/ покрыва́ющее ду́ши на́ша.

Велича́ние:

Велича́ем тя,/ святы́й проро́че Божи́й Елиссе́е,/ и чтим святу́ю па́мять твою́:/ ты бо мо́лиши за нас/ Христа́ Бо́га на́шего.

По полиеле́и седа́лен, глас 6. Византи́ево:

Прииди́те, правосла́вных совокупле́ние,/ соше́дшеся днесь в пречестне́м хра́ме Богоглаго́ливых проро́к,/ псало́мски воспои́м сли́чную ³⁵ песнь/ сих просла́вльшему Христу́ Бо́гу на́шему, и весе́лием и ра́достию возопие́м:/ ра́дуйся, земны́й А́нгеле и Небе́сный челове́че, Илие́ великоимени́те;/ ра́дуйся, и́же сугу́бую благода́ть от Бо́га прие́мый, Елиссе́е всече́стне;/ ра́дуйтеся, засту́пницы те́плии, и предста́телие, и вра́чеве душ и теле́с христолюби́вых люде́й,/ от вся́каго прило́га сопроти́вна, и обстоя́ния, и вся́ких бед/ изба́вите ве́рно соверша́ющия всепра́зднственную па́мять ва́шу.

Сла́ва, и ны́не, Богоро́дичен:

Никто́же, притека́яй к Тебе́,/ посра́млен от Тебе́ исхо́дит, Пречи́стая Богоро́дице Де́во,/ но про́сит благода́ти и прие́млет дарова́ние к поле́зному проше́нию.

Степе́нна, 1-й антифо́н 4-го гла́са. Проки́мен, глас 4: Ты иере́й во век/ по чи́ну Мелхиседе́кову. Стих: Рече́ Госпо́дь Го́сподеви моему́: седи́ одесну́ю Мене́. Вся́кое дыха́ние: Ева́нгелие от Луки́, зача́ло 14.

По 50-м псалме́ стихи́ра, глас 6:

Я́коже Елиссе́я дре́вле, Твоего́ уго́дника,/ во́инствы безпло́тными огради́л еси́,/ та́кожде и ны́не, Христе́,/ Це́рковь Твою́, Тебе́ превознося́щую, огради́ во ве́ки.

Кано́н пра́здника со ирмосо́м на 6, или́ Богоро́дицы со ирмосо́м на 6, глас 8: Во́ду проше́д: и проро́ка кано́н на 8 со ирмосо́м, глас 5 (зри 14 июня).

На хвали́тех стихи́ры пра́здника 3 и проро́ка 3, глас 1:

Гряди́, Елиссе́е проро́че, рцы я́ве,/ что дре́во о́ное, е́же в во́ду вложи́л еси́,/ Крест Христо́в, и́мже от глубины́ тли извлеко́хомся,/ Тому́ покланя́емся ве́рно во ве́ки.

Кто ви́де, кто слы́ша,/ я́ко воста́ челове́к ме́ртвый, смердя́щий?/ Илия́ у́бо воздви́же и Елиссе́й ны́не от гро́ба,/ но ниже́ четверодне́вна.

Глас 8: Дре́вом иногда́ извлече́ от реки́ секи́ру/ Боже́ственный Елиссе́й,/ преднаписа́в тя издале́че, Кре́сте всечестны́й,/ от глубины́ бо пре́лести тобо́ю к ве́ре возве́дшеся,/ изве́стный дне́шний день сподобля́емся ви́дети/ и ве́рою покланя́тися,/ тобо́ю объе́млюще спасе́ние.

Сла́ва, глас 6:

Проро́че, пропове́дателю Христо́в,/ престо́ла вели́чествия никогда́ же отлуча́ешися/ и коему́ждо боля́щу при́сно предстои́ши,/ в Вы́шних служа́, вселе́нную благословля́еши,/ всю́ду прославля́емь,/ проси́ очище́ния душа́м на́шим.

И ны́не, пра́здника или́ Богоро́дичен: Богоро́дице, Ты еси́ лоза́ и́стинная:

Славосло́вие вели́кое.

НА ЛИТУРГИ́И

Святой пророк Елисей

Святой пророк Елисей жил в IX веке до Рождества Христова, был родом из селения Авелмаум, близ Иордана. По повелению Господню он был призван к пророческому служению святым пророком Божиим Илией (память 20 июля).

Когда настало время взятия святого пророка Илии на Небо, он сказал Елисею: «Проси, что́ сделать тебе, прежде нежели я буду взят от тебя». Елисей дерзновенно испросил для дела Божия сугубую благодать: «Дух, который в тебе, пусть будет на мне вдвойне». Пророк Илия сказал: «Трудного ты просишь. Если увидишь, как я буду взят от тебя, то будет тебе так, а если не увидишь, не будет» (4Цар. 2:9–10). Когда они шли по дороге и беседовали, явились огненная колесница и кони и разлучили их обоих. Пророк Елисей воскликнул: «Отец мой, отец мой, колесница Израилева и конница его!» (4Цар. 2:12). Подняв упавшую с неба милоть (плащ) своего учителя, святой Елисей получил силу и пророческий дар Илии. Пророческое служение он проходил более 65 лет, при шести израильских царях (от Ахаза до Иоаса). «И во дни свои не трепетал перед князем, и никто не превозмог его» (Сир. 48:13). Святой пророк творил многочисленные чудеса. Разделил воды Иордана, ударив по ним милотию пророка Илии; сделал пригодной для питья воду Иерихонского источника; обильным изведением воды молитвой спас от гибели стоявшие в безводной пустыне войска израильского и иудейского царей; избавил бедную вдову от голодной смерти чудесным умножением масла в сосуде. Оказавшая пророку гостеприимство женщина-соманитянка была обрадована рождением сына по его молитве, когда же ребенок умер, то был воскрешен пророком. Сирийский военачальник Нееман был исцелен от проказы, а слуга пророка Гиезий поражен ею за то, что ослушался пророка и тайно от него взял деньги от Неемана. Пророк Елисей предсказал израильскому царю Иоасу победу над врагами и силой своей молитвы совершил много других чудес. Скончался святой пророк Елисей в глубокой старости в Самарии. «И при жизни своей совершал он чудеса, и по смерти дивны были дела его» (Сир. 48:15). Через год после смерти пророка Елисея мертвец, брошенный в пещеру, где лежали его останки, воскрес от прикосновения к честным костям святого пророка. Пророк Елисей, так же как и его учитель, святой пророк Илия, не оставил после себя книг: их проповедь была только устной. Иисус, сын Сирахов, написал похвалу обоим великим пророкам (Сир. 48:1–15).

Юлиан Отступник (361–363) приказал сжечь мощи пророков Елисея, Авдия и Иоанна Предтечи, но останки святых мощей были сохранены верующими, и часть их перенесена в Александрию.

Святой Иоанн Дамаскин написал канон в честь пророка Елисея, а в Константинополе был воздвигнут храм его имени.

Святитель Мефодий, Патриарх Константинопольский

Святитель Мефодий, Патриарх Константинопольский, родился в Сицилии, в богатой семье. По призванию Божию, еще в молодости, ушел в монастырь на острове Хиос и обновил его на свои средства. В царствование иконоборца Льва Армянина (813–820) святой Мефодий занимал высокую должность апокрисиария при святейшем Патриархе Никифоре (1828; память 2 июня). Однажды он был послан Патриархом в Рим с поручением к папе и задержался там. В это время Лев Армянин сверг святителя Никифора с престола и возвел на него иконоборца Феодота Мелисинского, по прозванию Касситер (815–822). После смерти Льва Армянина святой Мефодий возвратился и в сане пресвитера неустанно боролся против иконоборческой ереси. Император Михаил Косноязычный (820–829) вначале показывал себя милостивым и освободил многих заключенных его предшественником за почитание икон, но после возобновил гонение на Православие. Святой Мефодий был заключен в темницу в Акрите. После смерти Михаила Косноязычного воцарился сын его Феофил (829–842), также иконоборец. Более образованный, чем его отец, он освободил святого Мефодия, как человека ученого, превосходно сведущего в делах не только церковных, но и гражданских. Получив свободу, святой Мефодий возобновил борьбу с еретиками; император некоторое время терпел.

После поражения в войне против арабов Феофил обрушил свой гнев на святого Мефодия, говоря, что Бог покарал его за то, что он приблизил к себе «идолопоклонника» (так иконоборцы называли почитателей святых икон). Святой Мефодий возразил, что Господь прогневался на него за поругание Своей святой иконы. Святого предали истязаниям, ему нанесли множество ударов по щекам, отчего челюсть его была раздроблена. На его лице остался безобразный шрам. Святой Мефодий был сослан на остров Антигон и вместе с двумя разбойниками заключен в глубокой пещере. В мрачной темнице, куда не проникал солнечный свет, святой Мефодий томился 7 лет, до смерти императора Феофила.

В то время изгоняемые в заточение святые иноки-исповедники Феодор и Феофан Начертанные (память 27 декабря) послали святому Мефодию приветствие в стихах, на которое узник тоже ответил стихотворным приветствием.

После смерти Феофила воцарился его сын Михаил III (842–867), но ввиду его малолетства Византийской империей правила его мать, блаженная царица Феодора, почитательница икон.

Императрица старалась уничтожить иконоборческую ересь, повелела освободить заключенных за почитание икон исповедников. Занимавший патриарший престол еретик Анний был изгнан, а избран святой Мефодий. В Константинополе был созван Поместный Собор под председательством святого Мефодия (842). Собор восстановил иконопочитание и постановил ежегодно торжествовать победу Православия. Установленный святым Мефодием «Чин Православия» совершается в первую неделю Великого поста.

Стремясь подорвать авторитет святого Мефодия, любовь и уважение к нему паствы, еретики оклеветали его в нарушении целомудрия. Клевета была обнаружена, и враги святителя посрамлены. Последние годы жизни святителя прошли мирно, он много трудился, мудро управлял Церковью и своей паствой, восстанавливал разрушенные еретиками храмы, собирал мощи святых, уничтоженные иконоборцами, перенес мощи Патриарха Никифора из места его заточения в Константинополь. Скончался святитель Мефодий в 846 году. Святой Мефодий был духовно близок с преподобным Иоанникием (память 4 ноября), предсказавшим ему патриаршество и время кончины. Кроме «Чина Православия» Святитель составил также правила для обращающихся к вере, три чина браков и несколько пастырских поучений и церковных песнопений.

На русском языке издано:

1.Слова о святых иконах. Пер. епископа Арсения (Иващенко). М., 1893 (Московское общество любителей духовного просвещения).

Свята́го благове́рнаго вели́каго кня́зя Мстисла́ва, во свято́м Креще́нии Гео́ргия, Новгоро́дскаго

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Блаже́нне Богому́дре кня́же Мстисла́ве,/ чи́стая твоя́ душа́,/ правосла́вною му́дростию сия́ющи,/ облиста́ доброде́телей све́тлостию/ и озаря́ет ве́рных исполне́ние,/ бесо́в тьму отгоня́ющи./ Те́мже, я́ко прича́стника Невече́рней благода́ти,/ тя благоче́стно почита́ем, досточу́дне.

Име́я ду́шу ми́лостивну,/ и чист по́мысл, и се́рдце бодрели́во ³⁶,/ ве́ру небла́зненну и любо́вь нелицеме́рну,/ от земли́ преста́вился еси́ к Небе́сным,/ ли́ком пра́ведных причте́н./ Те́мже тя чтим свяще́нными пе́сньми/ и благоче́стно вси ублажа́ем,/ блаже́нне кня́же Мстисла́ве.

Боже́ственными поуче́нии вжиля́емь ³⁷,/ сла́сти сме́ртныя от души́ отгна́л еси́/ и Тро́ице селе́ние чи́сто был еси́./ Те́мже к Боже́ственному наслажде́нию отше́л еси́,/ Бо́гу соблюда́ющу ны́не неруши́мо/ твое́ честно́е те́ло Боже́ственными су́дьбами,/ и́миже Сам весть, прославля́яй тя,/ а́вво Мстисла́ве.

Житие́ твое́ по Бо́зе пожи́в,/ блаже́нне кня́же Мстисла́ве,/ в мо́литве и посте́,/ по апо́столу в за́поведех Госпо́дних пребы́л еси́./ Те́мже моли́ся Спа́су всех за правосла́вныя/ и нам испроси́ от Го́спода/ ми́лость в День Су́дный.

Сла́ва, глас то́йже:

Блаже́нне Богому́дре кня́же Мстисла́ве,/ твоя́ мо́щи честны́я оби́льно источа́ют всегда́ исцеле́ния/ ве́рою приходя́щим к твоему́ гро́бу,/ благоуха́ния всех исполня́я духо́внаго/ и тьму бесо́вскую дале́че отгоня́я,/ све́том благоче́стия ве́рных сердца́ озаря́я./ Те́мже мо́лим тя, раби́ твои́,/ вся́каго наве́та вра́жия нас изба́вити,/ я́ко да, ра́достно душе́ю свято́е твое́ успе́ние духо́вно пра́зднующе,/ прославля́ем Спа́са на́шего, тебе́ просла́вльшаго,/ еди́наго во святы́х Свои́х Бо́га на́шего.

И ны́не, Богоро́дичен. А́ще 50-ца, И ны́не, пра́здника.

Вход. Проки́мен дне. И чте́ния три преподо́бническая.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зани бы́вше, вели́кими благоде́тельствовали бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Свети́ло вели́кое яви́ся нам днесь,/ мир весь просвеща́ющее богодарова́нными чудесы́,/ кня́же прему́дре,/ я́коже исто́чник неисчерпа́емый показа́лся еси́,/ я́ко струи́ чуде́с то́чиши исцеле́ния/ ве́рою приходя́щим ти, блаже́нне,/ и припа́дающим ко гро́бу твоему́ свято́му:/ да́руеши же душа́м и телесе́м здра́вие неоску́дно,/ боля́щим вели́кое врачева́ние,/ чудотво́рче, блаже́нне кня́же Мстисла́ве./ И о нас ны́не моли́ся ко Спа́су Христу́,/ пра́зднующих ве́рою честно́е твое́ преставле́ние.

Сла́ва, глас 4:

Наста́ ны́не всечестна́я па́мять/ вели́каго кня́зя Мстисла́ва,/ нарече́ннаго по осмодне́вному зако́ну Госпо́дню но́выя благода́ти Гео́ргия,/ на́шего засту́пника, и помо́щника в ско́рбех,/ и боля́щим врача́ предо́бра,/ и на бра́нех посо́бника непобори́ма,/ сего́ ра́ди прииди́те, вси концы́ земни́и,/ его́же вку́пе досто́йно да ублажи́м/ и све́тло па́мять его́ торжеству́им,/ мо́лится бо Го́споду спасти́ся душа́м на́шим.

И ны́не, Богоро́дичен: При́зри на моле́ния: А́ще 50-ца, И ны́не, пра́здника.

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще/ Ду́ха Пресвята́го,/ прему́дре кня́же Мстисла́ве, был еси́,/ те́мже и нас домы́ Того́ соде́лай,/ свято́е твое́ преставле́ние почита́ющих.

Стих: Возвесели́тся пра́ведник о Го́споде/ и упова́ет на Него́.

Житие́ твое́, я́ко со́лнце,/ в сердца́ ве́рных возсия́,/ чуде́с зарю́ испуща́я./ Те́мже и нас све́том Невече́рним озари́,/ всечестно́е твое́ успе́ние почита́ющих.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Не преста́й моля́ся, кня́же Мстисла́ве,/ о при́сных твои́х рабе́х,/ и́хже духо́вным твои́м житие́м просвети́л еси́,/ да вси честно́е твое́ успе́ние,/ веселя́щеся, почита́ем.

Сла́ва, глас 8:

Доброде́телей твои́х, Богому́дре, исправле́ния,/ уясни́ша ве́рных сердца́;/ кто бо, слы́шав безме́рное твое́ смире́ние и терпе́ние, не удиви́тся,/ е́же ко всем кро́тость и беззло́бие,/ к скорбя́щим ми́лование/ и к су́щим в бе́дах ско́рое поможе́ние,/ в путь ше́ствующим благо́е поспеше́ние/ и пла́вающим немяте́жное приста́нище./ Вся боголе́пно предвари́, досточу́дне кня́же Мстисла́ве,/ и ны́не неувяда́емым одея́ся венце́м/ от руки́ Вседержи́теля Бо́га./ Его́же моли́ спасти́ся душа́м на́шим.

И ны́не, Богоро́дичен. А́ще 50-ца, И ны́не, пра́здника.

Тропа́рь, глас 4:

Измла́да яви́лся еси́, Богому́дре кня́же Мстисла́ве,/ Боже́ственный сосу́д, избра́н Бо́гови,/ благоче́стием воспита́н,/ ве́ру непоро́чну соблю́л еси́./ Те́мже предстоя́ Святе́й Тро́ице,/ моли́ся стране́ Росси́йстей сохране́нной бы́ти/ и всем нам спасти́ся.

Сла́ва, и ны́не, пра́здника или́ Богоро́дичен.

НА У́ТРЕНИ

На Бог Госпо́дь: тропа́рь два́жды. Сла́ва, и ны́не, Богоро́дичен.

По 1-м стихосло́вии седа́лен, глас 2:

Смире́н мудрова́нием, и ми́лостив, и боголюби́в,/ и любве́ испо́лнен яви́лся еси́, Богодухнове́нне,/ умиле́н и кро́ток, я́коже А́нгел, на земли́ пожи́в,/ те́мже почи́ на тебе́, я́коже на чистоте́, блаже́нне кня́же Гео́ргие,/ Оте́ц, и Сын, и Дух Святы́й.

Сла́ва, и ны́не, Богоро́дичен:

Да изба́вимся моли́твами Твои́ми, Пречи́стая, сете́й врага́,/ чту́щии па́че сло́ва Твое́ рождество́.

По 2-м стихосло́вии седа́лен, глас 4:

Благонарочи́тую па́мять пра́зднует вку́пе вся Це́рковь/ преставле́ния вели́каго кня́зя Мстисла́ва,/ нарече́ннаго по но́вой благода́ти Гео́ргия, уго́дника Христо́ва,/ и сего́ приле́жно моля́ща исцели́ти неду́ги и боле́зни на́ша/ и вся́ких искуше́ний изба́вити,/ ве́рою восхваля́ющих его́.

Сла́ва, и ны́не, Богоро́дичен:

В кров Твой, Пречи́стая Де́во, прибега́ющих,/ мольбу́ принеси́ о нас к Человеколю́бцу Бо́гу,/ спасти́ся рабо́м Твои́м.

По полиеле́и седа́лен, глас 5:

Во пло́ти я́вльшася безпло́тнаго и доброде́тельми преми́рно просия́вшаго,/ блаже́ннаго и Богоно́снаго кня́зя Мстисла́ва восхва́лим ве́рою и любо́вию,/ я́ко моля́щася Го́споду непреста́нно о всех нас.

Сла́ва, и ны́не, Богоро́дичен:

Чи́стая, Всенепоро́чная и Неискусому́жная,/ Я́же еди́на Безле́тнаго Сы́на и Сло́ва Бо́жия в ле́то ро́ждши,/ Сего́ с Богому́дрым кня́зем Мстисла́вом моли́/ дарова́ти нам очище́ние и ве́лию ми́лость.

Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Наста́ ны́не всечестна́я па́мять/ вели́каго кня́зя Мстисла́ва,/ нарече́ннаго по осмодне́вному зако́ну Госпо́дню но́выя благода́ти Гео́ргия./ Ве́рных сердца́ уясни́ па́че со́лнца/ доброде́телей свои́х блиста́нием/ и, я́ко луча́ све́тла, мир озаря́я чудесы́ свои́ми,/ Со́лнце бо Пра́ведное, Христо́с Бог наш,/ моли́твами его́ просвеща́ет ду́ши на́ша.

Кано́н Богоро́дицы, глас 8. Во́ду проше́д: со ирмосо́м на 6 и свята́го на 8, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Высо́ко житие́ име́я/ и восхожде́нии Боже́ственными весь све́тел быв,/ просвеще́ние ми испроси́, восхваля́ющу твоя́ честны́я по́двиги,/ и́миже до́бре пожи́в, улучи́л еси́, Мстисла́ве, и́хже наде́ялся еси́.

Мироуха́нная любя́ уче́ния/ и во чте́нии Свяще́нных Писа́ний упражня́яся,/ сласте́й уклони́лся еси́, блаже́нне, смра́дных и безче́стных/ и облагово́нился еси́, Боже́ственными добро́тами украша́емь.

Дрема́ние о́чию от души́, блаже́нне, отгна́л еси́,/ бдя и Бо́гови приединева́яся ³⁸ всено́щными стоя́нии,/ не преклоне́н ну́ждами естества́:/ те́мже ко дню невече́рнему дости́гл еси́.

Богоро́дичен: Я́ко черто́г одушевле́н Бо́жий/ и кади́льницу мы́сленнаго и светоно́снаго У́гля,/ при́сно Благода́тную ублажа́ем Богоро́дицу, зову́ще:/ ра́дуйся, Хода́таице спаси́тельнаго воскресе́ния.

Катава́сия по уста́ву.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, паче́ Тебе́, Го́споди.

Глаго́лом живото́чным внимая́,/ испи́л еси́ во́ду спасе́ния, возгнуша́вся го́рькаго греха́,/ и, поя́, глаго́лал еси́ Бо́гови, Мстисла́ве,/ я́ко несть свя́та, па́че Тебе́, Го́споди.

Ми́лование стяжа́л еси́ христоподража́тельно,/ разда́л еси́ бога́тство тре́бующим,/ Небе́сное бога́тство, хода́тайствующее тебе́,/ е́же и получи́л еси́, поя́, Мстисла́ве,/ я́ко несть свя́та, па́че Тебе́, Го́споди.

Присво́ився Зижди́телю любо́вию Боже́ственною,/ прия́л еси́ Небе́сное насле́дие,/ дре́ва живо́тнаго получи́ти сподо́бился еси́, блаже́нне,/ Боготворе́нием обожа́яся и поя́, сла́вне,/ я́ко несть свя́та, па́че Тебе́, Го́споди.

Богоро́дичен: Несеко́мую го́ру Тя дре́вле Авваку́м прови́де, Всенепоро́чная,/ из нея́же Бог яви́ся и нас, истле́вшия, обнови́л есть.

Седа́лен, глас 4.

Благоволи́в благи́ми дея́нии,/ искуси́лся еси́, я́ко зла́то в пещи́, напа́стьми, Мстисла́ве сла́вне./ Те́мже и по сме́рти источа́еши чудеса́ бога́тно,/ я́ко во́ды, неду́ги уставля́еши,/ о нас при́сно моли́ся,/ я́ко да согреше́ний проще́ние прии́мем.

Сла́ва, и ны́не, Богоро́дичен:

Чи́стая, Всенепоро́чная и Неискусому́жная,/ Я́же еди́на Безле́тнаго Сы́на и Сло́ва Бо́жия в ле́то ро́ждши,/ Сего́ с Богому́дрым кня́зем Гео́ргием и со все́ми святы́ми моли́/ дарова́ти нам очище́ние и ве́лию ми́лость.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Повеле́ния оте́ческая храня́ невреди́мо правове́рным смы́слом,/ ты от ю́ности име́л еси́ житие́ чи́сто и ми́лостивен нрав, досточу́дне.

Ни смуще́ние мирско́е, ни вла́сти держа́ние, ни сла́ва вре́менная/ твоего́ к Бо́гу раче́ния, кня́же Мстисла́ве, преврати́,/ но благоволи́л еси́ вои́стинну Боже́ственным дея́ниям.

Возне́сся, Боже́ственными поуче́нии вы́ну врага́ смири́л еси́,/ исцеле́ния де́тель ³⁹ прия́л еси́, Мстисла́ве,/ судо́м пра́ведным вся́ческая пра́вящаго.

Богоро́дичен: Препе́тая во́инствы,/ горе́ Препе́таго Бо́га родила́ еси́, Челове́ка вои́стинну бы́вша,/ Его́же за рабы́ Твоя́ моля́щи не преста́й, Присноде́во.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Све́том чи́стым Святы́я Тро́ицы просвеще́н,/ зако́ном же Сея́ огражде́н,/ нощь жите́йскую без претыка́ния преше́л еси́,/ виде́нии Боже́ственными возвыша́яся, Богому́дре,/ в Боже́ственный живо́т всели́лся еси́.

Ны́не на тебе́ чу́до ве́лие ви́дится и у́жаса испо́лнено,/ я́ко по погребе́нии вои́стинну надо́лзе соблюда́ется/ невреди́мо, блаже́нне, твое́ те́ло, во гро́бе лежа́щее,/ судо́м, и́мже весть Бог, прославля́яй тя.

Блаже́нне кня́же Мстисла́ве,/ твое́ дерзнове́ние к Бо́гу и любо́вь, ю́же от се́рдца, к Тому́ име́ти благоволи́в,/ и́стинно имени́то же возсия́в пресла́вно,/ Боже́ственными светлостьми́ просвети́ ве́рных со́нмища.

Богоро́дичен: За ны из Тебе́ вопло́щшагося, Де́во Ма́ти, всегда́ моли́,/ благоче́стно Тя блажа́щим,/ изба́витися бед, душетле́нных страсте́й, и печа́лей,/ и ве́чнующаго пла́мене муче́ния.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Ка́пли сла́дкия иска́паше, блаже́нне,/ пот твои́х сла́дость и исцеле́ний сия́ния/ на похвалу́ Христа́, Бо́га на́шего.

Во дво́рех Бо́га процве́л еси́,/ виногра́д многопло́ден прозя́б и доброде́телей гро́здие,/ Де́лателю душа́м оби́лие пода́в.

Ца́рства Бо́жия возжеле́л еси́,/ над страстьми́ ца́рствовав, кня́же Мстисла́ве,/ и по произволе́нию лу́чшему ра́дость пра́ведных получи́л еси́.

Богоро́дичен: Избра́нно Бо́гу бы́вши я́ко прекра́сное селе́ние и простра́нное,/ Сему́, Де́во, была́ еси́ и черто́г, и све́щник, и трапе́за.

Конда́к, глас 8:

Многому́дренно пожи́в в княже́нии твое́м/ в вели́ком Но́ве гра́де сем,/ благове́рный кня́же Мстисла́ве,/ плод благи́й Бо́гови в жи́зни сей был еси́,/ присноцвету́щ доброде́тельми,/ того́ ра́ди получи́л еси́ жизнь ве́чную на Небесе́х,/ те́ло же твое́ нетле́нием просла́влено бысть на земли́./ Мы же, предсто́яще ико́не твое́й, любо́вию вопие́м ти:/ ра́дуйся, утвержде́ние гра́ду на́шему.

И́кос:

Всечестну́ю па́мять почти́м уго́дника Христо́ва, вели́каго кня́зя Мстисла́ва,/ нарече́ннаго по осмодне́вному зако́ну Госпо́дню но́выя благода́ти Гео́ргия,/ оте́ческою диади́мою от ю́ности укра́шенна,/ хра́браго во́ина на супоста́ты и вла́стеля благоути́шна,/ и ра́достныя глаго́лы от се́рдца воззове́м к нему́, си́це реку́ще:/ ра́дуйся, я́ко из млады́х ногте́й Бо́га возлюби́в;/ ра́дуйся, я́ко за́поведей Его́ нело́жный храни́тель./ Ра́дуйся, изба́вивый Нов град от нахожде́ния инове́рных язы́к;/ ра́дуйся, нело́жный прави́телю оте́ческих преда́ний./ Ра́дуйся, благоче́стия сто́лпе, непоколеби́м вра́жиими прило́ги;/ ра́дуйся, бе́дным утеше́ние и засту́пниче./ Ра́дуйся, я́ко сподо́бился еси́ восприя́ти вене́ц пресве́тел и исто́чник исцеле́ний;/ ра́дуйся, пресла́вный кня́же Мстисла́ве, кня́зем росси́йским похвало́./ Ра́дуйся, утвержде́ние гра́ду на́шему.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Кре́постию возмо́г Живода́вца,/ плотско́е удержа́л еси́ жела́ние, пребога́те,/ и ум возвы́сил еси́ на Небе́сная, поя́ кре́пко:/ Сый благослове́н и препросла́влен.

Сам ся благоро́ден сотвори́в,/ благоро́дны нра́вы стяжа́л еси́ умо́м це́лым,/ поуче́нием же упражня́яся Богодохнове́нных писа́ний,/ все жела́ние твое́ к Бо́гу Всеви́дцу, блаже́нне, возложи́л еси́.

Го́рнее Ца́рство, Вы́шний град, Бо́жий рай,/ пра́ведных наслажде́ние и пи́щу несоде́янную,/ бога́тство некра́домое, Свет невече́рний, обрести́ сподо́бился еси́,/ кня́же Мстисла́ве блаже́нне.

Песносло́вивша тя богому́дренно по Христо́ве Це́ркве,/ Боже́ственная преда́ния и оте́ческий уста́в прие́м,/ Вели́кий Нов град соде́ржит, поя́:/ благослове́н Бог оте́ц на́ших.

Богоро́дичен: Его́же родила́ еси́, Влады́чице,/ при́сно моли́ от рабо́ты изба́вити мя страсте́й, и осужде́ния,/ и стужа́ющаго ми лю́таго окамене́ния,/ и оскорбля́ющаго, Чи́стая, одержа́ния, Богора́дованная.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Огнь помышля́я стра́шный,/ пред Престо́лом Христо́вым хотя́ще изы́ти,/ умиле́нием се́рдца те́плы пролива́еши пото́ки сле́зныя,/ погаша́я те́ми страсте́й пещь, Мстисла́ве Богому́дре.

Любо́вию предложи́л еси́ твою́, му́дре, к Бо́гу ду́шу/ и к Тому́ прилепи́лся еси́, вопия́ пе́сненно:/ Христе́ мой, Ты ны́не мя изба́ви страсте́й смертоно́сных во ве́ки.

Терпе́нием пожда́тель⁴⁰ и се́рдцем смире́н ты ви́ден был еси́,/ ми́лостив прося́щим, обы́чай при́сно благ име́я/ и нрав доброде́тельный, всече́стне,/ в ни́хже до́бре пожи́в, чуде́с то́чиши благода́ть.

Тобо́ю, Богоблаже́нне кня́же Гео́ргие,/ вели́кий Нов град вельми́ хва́лится,/ в не́м бо благочести́во пожи́л еси́, спасе́ние соде́лав,/ Тро́ицу чти́ти научи́л еси́ во Еди́ном Божестве́,/ и покланя́тися Той, и благослови́ти во ве́ки.

Богоро́дичен: Ада́мов Соде́тель от крове́й Твои́х чи́стых зи́ждется/ и млеко́м пита́ется, пита́яй вся́ко дыха́ние, Де́во Богоро́дице./ Тем, я́ко Ма́терь Тя Бо́жию, велича́ем.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Ви́дети жела́я сла́ву Бо́га на́шего,/ доброде́тельми Богоразуми́я себе́ удобри́л еси́/ и, свещу́ нося́, вшел еси́ во све́тлый черто́г,/ со А́нгелы живы́й, ясне́е наслажда́яся Божества́.

Я́ко у́треннее со́лнце,/ возсия́ днесь твоего́ от земли́ преставле́ния день,/ су́щия во мра́це сердца́ просвеща́я:/ ты бо све́та и дне яви́лся еси́ вои́стинну сын, Богому́дре кня́же Гео́ргие,/ сего́ ра́ди тя почита́ем.

Му́дростию украша́яся и ра́зумом просвеща́яся,/ смире́нием се́рдца красу́яся,/ высото́ю жития́, досточу́дне, в разу́мныя вшел еси́ дво́ры,/ иде́же нас помяни́, чту́щих тя,/ блаже́нне и досточу́дне кня́же Мстисла́ве.

Я́коже со́лнце блиста́я,/ зари́ испуща́еши чуде́с, просвеща́я всех сердца́,/ твоего́ сла́внаго успе́ния па́мять творя́щих ве́рно,/ треблаже́нне и Богому́дре кня́же Мстисла́ве.

Богоро́дичен: Не́бо ро́ждши, А́нно, но́вое – Мари́ю,/ Е́юже возсия́ Сла́вы Со́лнце,/ днесь от земли́ к Небе́сным прехо́диши,/ Христу́ моля́щися о спасе́нии душ на́ших.

Свети́лен.

Подо́бен: Со ученики́:

Влады́чню Престо́лу ны́не с пра́ведными ли́ки предстоя́, Богому́дре кня́же Мстисла́ве,/ моли́тися не преста́й дарова́ти побе́ды на сопроти́вныя вся,/ и междоусо́бныя бра́ни укроти́ти,/ и мир ми́рови устро́ити, и спасти́ ду́ши на́ша.

Сла́ва, и ны́не, Богоро́дичен:

Щедро́ты Твоя́, Бо́же, на лю́ди Твоя́ низпосли́/ моли́твами Пречи́стыя Твоея́ Ма́тере и всех святы́х/ и ра́ди уго́дника Твоего́ блаже́ннаго кня́зя Мстисла́ва/ да́руй нам ве́лию ми́лость.

На хвали́тех стихи́ры, глас 5:

Егда́ в честно́е преста́вление твое́/ вели́каго Но́ва гра́да наро́ды,/ я́ко от фимиа́ма церко́внаго, напо́лнишася благово́ния,/ тогда́ позна́ша лю́дие пра́ведное твое́ преставле́ние и стеко́шася вси,/ луча́ми бо чуде́с всех озари́л еси́,/ тем и ны́не Христа́ Бо́га моли́/ спасти́ся душа́м на́шим.

Егда́ правове́рнии лю́дие стеко́шася,/ в честно́е успе́ние твое́,/ тогда́ обрето́ша, я́ко безце́нное сокро́вище некрадо́мое,/ чудотвори́вое те́ло твое́, кня́же Мстисла́ве./ Лице́ же твое́, па́че со́лнечнаго све́та сия́юще,/ всю́ду благово́ния испо́лни,/ су́щим же хромы́м хожде́ние и слепы́м зре́ние дарова́л еси́./ Моли́ Христа́ Бо́га/ пода́ти отпуще́ние согреше́нием на́шим,/ пресла́вно соверша́ющим па́мять твою́.

Днесь, правове́рнии лю́дие, стецы́теся/ во храм Прему́дрости Бо́жия,/ иде́же лежи́т ны́не чудотвори́вое те́ло блаже́ннаго кня́зя Мстисла́ва,/ исцеле́ния подаю́тся всем челове́ком,/ ве́рою притека́ющим к Боже́ственней ра́це твое́й./ Те́мже и мы мо́лим тя:/ моли́ спасти́ся душа́м на́шим.

Блаже́нне Богому́дре Мстисла́ве,/ в ме́ру пра́ведных дости́гл еси́,/ смиренному́дрия же ра́ди де́монов вы́и сокруши́л еси́,/ по́стным же воздержа́нием и сле́зными то́ки/ ва́рваров ро́ги сломи́л еси́./ Христу́ приле́жно моли́ся,/ досточу́дне кня́же Мстисла́ве,/ соверше́ние испроси́ти во́инству на́шему/ на сопроти́вныя побе́ды.

Сла́ва, глас 6:

Воструби́м духо́вными пе́сньми,/ во псалме́х и пе́ниих,/ стеце́мся в це́рковь Прему́дрости Бо́жия/ и услы́шим засту́пника Вели́кому Но́ву гра́ду на́шему,/ его́же моли́твами свои́ми соблюда́ет всегда́ от наше́ствия сопроти́вных./ Те́мже ему́ вси та́ко рцем:/ досточу́дне кня́же Мстисла́ве приснопа́мятне,/ предвари́ и изба́ви нас от искуше́ний вся́ческих,/ любо́вию моля́щих тя,/ я́ко те́пла предста́теля ко Спа́су всех Бо́гу,/ за лю́ди твоя́,/ да спасе́т ду́ши на́ша.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся: моли́ся, Влады́чице,/ с благове́рным кня́зем Мстисла́вом/ поми́ловати ду́ши на́ша.

НА ЛИТУРГИ́И

Святой благоверный князь Мстислав

Святой благоверный князь Мстислав, в Крещении Георгий, жил в XII веке. Он был внуком великого Киевского Мстислава († 1132) и сыном Смоленского князя Ростислава († 1168). В 1168 году он участвовал в победе южно-русских князей над половцами. Святой князь принимал участие в других княжеских походах, он прославился необычайным мужеством, за что был прозван «Храбрым». Когда великий князь Владимирский Андрей Юрьевич объявил Ростиславичам войну, святой князь Мстислав сказал ему: «Доселе мы уважали тебя, как отца, но когда ты говоришь с нами, как с слугами, идем на суд Божий». Надеясь на милость Божию и помощь святых мучеников благоверных князей Бориса и Глеба, святой князь с малочисленным войском одержал победу.

Святой князь Мстислав не гордился своей победой и примирился с князем Андреем. В 1175 году смоляне пригласили святого князя на княжение в Смоленск. Когда же в Смоленск вернулся из Киева брат святого князя Роман, он уступил ему княжение.

Благоверный князь Мстислав отличался нестяжательностью, щедро расточал милостыню, помогал обителям. Он не вступал в распри с другими князьями и в период междоусобиц стремился к миру, довольствуясь малым.

В 1179 году новгородцы просили святого Мстислава быть их князем. Благоверный князь защищал новгородские земли от эстонцев, которые осаждали Псков. В 1180 году святой князь Мстислав неожиданно заболел и скоропостижно скончался 14 июня. Перед кончиной он велел отнести себя в храм, где причастился Святых Христовых Тайн. Новгородцы горько оплакивали кончину любимого князя. Летописец сообщает о благоверном князе Мстиславе: «Он был роста среднего, лицом красавец, а душа его была еще лучше. Щедро расточал он милостыню, помогал обителям. Был храбр и мужественен; он желал умереть за землю Русскую. Когда приходилось освобождать пленных у язычников, он говорил: «Братья! Если умрем за христиан, очистимся от грехов». Он не собирал ни золота, ни серебра, но раздавал то дружине своей, то церквам за свою душу».

Святой князь Мстислав был погребен в новгородском Софийском соборе, в приделе в честь Рождества Пресвятой Богородицы. По описанию 1634 года «мощи его нетленны, а рука ему правая выспрь».

Литература:

1. Филарет (Гумилевский), архиепископ Черниговский. Жития русских святых. Июнь. СПб., 1900.

Преподо́бнаго Мефо́дия, игу́мена Пешно́шскаго

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: Небе́сных чино́в:

Ка́ко тя по достоя́нию ублажи́м,/ преподо́бне о́тче Мефо́дие,/ или́ ки́я пе́сни хвале́бныя/ воспое́м к прославле́нию твои́х подвиго́в?/ А́нгел во пло́ти вои́стинну яви́лся еси́/ и уго́дник Христо́в, чудесы́ просла́вленный.

Дави́дски, о́тче, на всяк день/ посте́лю твою́ слеза́ми омыва́л еси́,/ очища́я ду́шу твою́ от скве́рны грехо́вныя,/ до́ндеже всели́ся в тя Пресвяты́й Дух,/ Его́же сосу́д освяще́н был еси́/ и таи́нник ве́лий Бо́жия благода́ти.

Помина́я, о́тче, исхо́д души́ твоея́,/ вся красоты́ мирски́я презре́л еси́,/ и, в пусты́ню всели́вся,/ труды́ святоподви́жными до́бре Бо́гу угоди́л еси́,/ и яви́лся еси́, я́ко сад прекра́сен,/ цвета́ми доброде́телей процве́тший.

Пусты́ни кра́сное прозябе́ние,/ преподо́бнаго и Богоно́снаго отца́ Се́ргия учениче́,/ о́тче Мефо́дие,/ ты с учи́телем твои́м до́бре подвиза́лся еси́,/ ревну́я того́ доброде́телей,/ и от бесо́в ско́рби мно́ги претерпе́л еси́,/ моли́твою непреста́нною на них вооружи́вся,/ вся искуше́ния их победи́л еси́,/ тем ны́не со А́нгелы лику́еши.

Сла́ва, глас 6:

Преподо́бне о́тче Мефо́дие,/ ты от млады́х ногте́й/ за́поведи Ева́нгелия Христо́ва возлюби́л еси́/ и, крест твой взем, Христу́ после́довал еси́,/ умо́м чи́стым вы́ну помина́я Того́ воздая́ние,/ де́лателем за́поведей Его́ обетова́нное,/ и при́сно размышля́я о сла́ве невече́рней Ца́рствия Небе́снаго,/ те́мже тя ублажа́ем.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод Живота́,/ Тебе́ мо́лимся: моли́ся, Влады́чице,/ со святы́ми апо́столы и преподо́бным Мефо́дием/ поми́ловати ду́ши на́ша.

На стихо́вне стихи́ры, глас 2.

Подо́бен: До́ме Евфра́фов:

До́ма Бо́жия строи́теля Богому́драго/ и па́стыря слове́сных ове́ц Христо́вых до́браго,/ яви́ тя Христо́с в стране́ Росси́йстей,/ о́тче Мефо́дие,/ моли́твенниче усе́рдный о душа́х на́ших.

Стих: Честна́ пред Го́сподем/ смерть преподо́бных Его́.

Дом Ду́ха Свята́го душа́ твоя́ бысть,/ о́тче Мефо́дие,/ в ней бо доброде́тели высо́кия возрасти́л еси́/ и дости́гл еси́ в му́жа соверше́нна о Христе́,/ си́льна и непобеди́ма в бра́нех со враги́ неви́димыми.

Стих: Блаже́н муж, боя́йся Го́спода,/ в за́поведех Его́ восхо́щет зело́.

До́ма Госпо́дня благоле́пие возлюби́л еси́/ и в само́м себе́ храм Триипоста́сному Бо́гу угото́вал еси́,/ в не́мже Христо́с со Отце́м и Ду́хом всели́ся,/ Мефо́дие Богоблаже́нне,/ моли́твенниче о душа́х на́ших.

Сла́ва, глас 8:

Кто изрещи́ возмо́жет твоя́ по́двиги и труды́,/ о́тче преподо́бне,/ бде́ния и сухояде́ния и непреста́нныя моли́твы,/ и́миже в пусты́ни многоле́тне подвиза́лся еси́?/ Вои́стинну дре́вним Богоно́сным отце́м подо́бен был еси́,/ с ни́миже ра́вное воздая́ние от Го́спода прие́м,/ вы́ну моли́ся, о́тче Мефо́дие,/ поми́ловатися душа́м на́шим.

И ны́не, Богоро́дичен:

Влады́чице, приими́ моли́твы раб твои́х/ и изба́ви нас/ от вся́кия ну́жды и печа́ли.

Тропа́рь пи́сан на вели́цей вече́рни.

Сла́ва, и ны́не, Богоро́дичен: И́же нас ра́ди ро́ждейся от Де́вы:

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 8.

Подо́бен: О, пресла́вного чудесе́:

О, пресла́вного чудесе́!/ В стране́ полуно́щней свети́льник Бо́жия благода́ти возсия́,/ преподо́бный и Богоно́сный оте́ц Мефо́дий,/ пусты́ни Пе́шношския светопроцве́тшее прозябе́ние/ и всея́ Росси́йския страны́ духо́вное украше́ние./ К нему́же, вопию́ще, рцем:/ о преподо́бне, помоли́ся ко Го́споду,/ Ему́же соверше́нно угоди́л еси́,/ дарова́ти нам мир и ве́лию ми́лость.

О, пресла́вного чудесе́!/ В стране́ хла́дней цвет прекра́сный доброде́телей возрасте́/ и Це́рковь Христо́ву благоуха́ния духо́внаго испо́лни/ преподо́бный и Богоно́сный оте́ц Мефо́дий,/ вели́каго во отце́х Се́ргия спо́стник и учени́к/ и того́ подвиго́в подража́тель./ К нему́же, взыва́юще, глаго́лем:/ о преподо́бне, помоли́ся ко Го́споду/ вку́пе с преподо́бным Се́ргием/ дарова́ти нам мир и ве́лию ми́лость.

О, пресла́вного чудесе́!/ Ка́ко ты, о́тче Мефо́дие,/ в бре́нней пло́ти/ а́нгельское житие́ проходи́л еси́/ и, сме́ртен те́лом,/ от сме́рти грехо́вныя ду́ши челове́ческие свобожда́л еси́/ уче́ньми твои́ми и чудесы́:/ моли́ся вы́ну, о́тче преподо́бне,/ о нас, ча́дех твои́х духо́вных,/ е́же упасе́нным бы́ти нам во спасе́нии/ и получи́ти тобо́ю мир и ве́лию ми́лость.

Сла́ва, глас 6:

Егда́, о́тче преподо́бне,/ по мно́зех по́двизех и труде́х/ уразуме́л еси́ ду́хом твое́ ко Го́споду отше́ствие,/ тогда́ со слеза́ми Бо́гу помоли́лся еси́/ о оби́тели твое́й и ученице́х твои́х/ и вся, ну́ждная им ко спасе́нию, изре́кл еси́,/ ти́и же го́рце пла́каху и вопия́ху:/ о па́стырю наш до́брый,/ не оста́ви нас, си́рых,/ но моли́твами твои́ми сохраня́й нас от вся́каго зла!/ Ты же, о́тче, благослове́ние твое́ им дав/ и моли́тися о них обеща́вся,/ с ми́ром ду́шу твою́ Го́сподеви пре́дал еси́,/ Ему́же помоли́ся/ нелише́нным бы́ти и нам насле́дия Небе́снаго.

И ны́не, Богоро́дичен: Кто Тебе́ не ублажи́т:

Вход, Проки́мен дне. И чте́ния три преподо́бническия

Прему́дрости Соломо́новы чте́ние (главы 5 и 6):

Прему́дрости Соломо́новы чте́ние (глава́ 3):

Прему́дрости Соломо́новы чте́ние (глава́ 4):

На лити́и стихи́ры, глас 2.

Подо́бен: Егда́ от Дре́ва:

Егда́ Боже́ственное зва́ние прии́де на тя, преподо́бне,/ е́же рабо́тати Го́сподеви в безмо́лвии пусты́ни,/ тогда́ к настоя́телю твоему́, преподо́бному отцу́ Се́ргию, прише́л еси́/ и твое́ жела́ние ему́ возвести́л еси́,/ он же тя благослови́, глаго́ля:/ иди́, ча́до, а́може Бог наста́вит тя./ Ты же, о́тче, в пусты́ню непроходи́мую отше́л еси́,/ и, в ней всели́вся, жесто́кое житие́ пожи́л еси́,/ и мно́гим путеводи́тель ко спасе́нию был еси́,/ и ны́не моли́ся, преподо́бне, ко Христу́ Бо́гу,/ да спасе́т и просвети́т ду́ши на́ша.

Егда́ Боже́ственная благода́ть призва́ тя в пусты́ню,/ Мефо́дие преблаже́нне,/ тогда́, я́ко безпло́тен, мно́га ле́та в ней пожи́л еси́/ в посте́, моли́твах и слеза́х непреста́нных,/ бде́нием и сухояде́нием изнуря́я плоть твою́,/ у́зким и приско́рбным путе́м ше́ствовал еси́/ и мно́жество и́нок собра́л еси́,/ подража́ти тебе́ в по́двизех пусты́нных,/ и́хже Христу́ вслед себе́ приве́л еси́,/ Ему́же помоли́ся, преподо́бне,/ спасти́ и просвети́ти ду́ши на́ша.

Егда́ благода́ть Свята́го Ду́ха/ тя осени́, преподо́бне о́тче,/ тогда́ наста́вник душеспаси́тельный мно́гим был еси́,/ ни́щия же, и вдови́цы, и сиро́ты/ препита́л еси́ во дни гла́да,/ я́ко вои́стинну подража́тель милосе́рдия Спа́сова,/ себе́ же сама́го, в посте́ и воздержа́нии мно́зе,/ к Небе́сному Ца́рствию приугото́вал еси́,/ е́же по достоя́нию и получи́л еси́,/ и мо́лишися непреста́нно Го́сподеви,/ спасти́ и просвети́ти ду́ши на́ша.

Сла́ва, глас 6:

Прииди́те, и́нок мно́жество,/ пе́сньми духо́вными восхва́лим/ до́браго па́стыря слове́сных Христо́вых ове́ц,/ преподо́бнаго отца́ на́шего Мефо́дия,/ его́же раче́нием Христу́ уневе́стишася ду́ши мно́ги./ Те́мже всечестну́ю па́мять его́ похвала́ми ублажи́м:/ мо́лит бо ся Христу́ Бо́гу/ дарова́ти ми́ру мир/ и душа́м на́шим ве́лию ми́лость.

И ны́не, Богоро́дичен: Творе́ц и Изба́витель мой, Пречи́стая:

На стихо́вне стихи́ры, глас 1:

В честне́й па́мяти твое́й, преподо́бне о́тче Мефо́дие,/ чуде́с сия́ньми ве́рныя озаря́еши:/ даде́ся бо тебе́ от Христа́ Бо́га ве́лия благода́ть,/ неду́ги исцеля́ти и бе́сы от челове́к изгоня́ти,/ я́ко вои́стинну подража́телю апо́стольскому./ Тем, припада́юще к моще́м твои́м, уми́льно глаго́лем:/ о́тче преподо́бне, моли́ся Триипоста́сному Бо́гу/ поми́ловати ду́ши на́ша.

Стих: Честна́ пред Го́сподем/ смерть преподо́бных Его́.

Преподо́бне о́тче Мефо́дие,/ ты измла́да Христа́ возлюби́в,/ все плотско́е мудрова́ние в себе́ умертви́л еси́,/ потща́вся ху́ждшее покори́ти лу́чшему/ и плоть порабо́тати ду́ху,/ тем сосу́д чист и освяще́н Бо́гови яви́лся еси́/ и, ми́ро Ду́ха Свята́го в себе́ прие́м,/ чуде́с исто́чник соде́лался еси́./ Моли́ся о нас, преподо́бне, Триипоста́сному Бо́гу,/ поми́ловати ду́ши на́ша.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Чу́вственныя стра́сти победи́в воздержа́нием,/ в пусты́ни возсия́л еси́ чуде́с заря́ми/ и ту́ю уплодоноси́л еси́ труда́ми подвиго́в твои́х духо́вных,/ просвеща́я ду́ши, грехо́вною тьмо́ю помраче́нныя./ И ны́не нас, о́тче, твои́ми моли́твами озари́,/ и просвети́ сердца́ на́ша к де́ланию за́поведей Госпо́дних.

Сла́ва, глас 8:

По́стников собо́ры,/ по́стника Госпо́дня пе́сньми духо́вными почти́м,/ преподо́бнаго отца́ Мефо́дия,/ и к нему́ моле́бно возопие́м:/ А́нгелов подо́бниче и челове́ков наста́вниче,/ наста́ви ны ходи́ти путе́м подвиго́в твои́х/ и моли́твами твои́ми/ соде́лай нас прича́стники бы́ти Ца́рствия Небе́снаго.

И ны́не, Богоро́дичен: Безневе́стная Де́во:

На благослове́нии хлебо́в тропа́рь, глас 8:

Боже́ственною любо́вию от ю́ности распала́емь,/ вся, я́же в ми́ре кра́сная, возненави́дев,/ Христа́ Еди́наго возлюби́л еси́,/ и, сего́ ра́ди в пусты́ню всели́вся,/ в ней оби́тель сотвори́л еси́,/ и, собра́в и́нок мно́жество,/ прия́л еси́ от Бо́га чуде́с дар, о́тче Мефо́дие,/ и был еси́ о Христе́ собесе́дник и спо́стник преподо́бному Се́ргию,/ с ни́мже у Христа́ Бо́га испроси́ правосла́вным христиа́ном здра́вие, и спасе́ние,/ и душа́м на́шим ве́лию ми́лость.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен: И́же нас ра́ди рожде́йся от Де́вы:

По 1-м стихосло́вии седа́лен, глас 4.

Подо́бен: Ско́ро предвари́:

Зва́нию Госпо́дню после́довав, о́тче преподо́бне,/ в пусты́ню всели́лся еси́/ и та́мо оби́тель и́ноком сооруди́л еси́,/ в не́йже И́мя Бо́жие сла́вится благоче́стно./ И ны́не моли́ся, преподо́бне Мефо́дие,/ сохране́нней бы́ти оби́тели твое́й от вся́каго зла/ и спасти́ся душа́м на́шим.

Сла́ва, и ны́не, Богоро́дичен:

Богоро́дице, Ты обнови́ла еси́, Пречи́стая, святы́м рождество́м Твои́м/ земны́х челове́к па́дшее естество́/ и сие́ па́ки Бо́гу присво́ила еси́,/ сего́ ра́ди Тя пе́сненно велича́ем.

По 2-м стихосло́вии седа́лен, глас 6.

Подо́бен: А́нгельския си́лы:

Крест Христо́в на ра́мо взем,/ к боре́нию со врага́ми неви́димыми устреми́лся еси́, преподо́бне,/ и полки́ бесо́вския в пусты́ни победи́л еси́,/ сего́ ра́ди, я́ко победоно́сец, по́чести вене́ц прия́л еси́/ от Христа́, Человеколю́бца и Спа́са душ на́ших.

Сла́ва, и ны́не, Богоро́дичен:

Ки́йждо, иде́же ча́ет спасти́ся, та́мо пра́ведно и притека́ет;/ мы же, обре́тше тя прибе́жище спаси́тельное, Богоро́дице,/ приле́жно мо́лимся Тебе́:/ покры́й нас ма́терним покро́вом Твои́м от вся́каго зла/ и спаси́ ду́ши на́ша.

По полиеле́и седа́лен, глас 4.

Подо́бен: Ско́ро предвари́:

Егда́ благода́ть Свята́го Ду́ха тя осени́, о́тче преподо́бне,/ тогда́ благослове́нием Богоно́снаго Се́ргия утвержде́нный,/ оби́тель пусты́нную соста́вил еси́/ и в сооруже́нии ея́ сам труди́лся еси́,/ трудолю́бцем о́браз и пра́вило быв./ Те́мже моли́, Мефо́дие преблаже́нне, Подвигополо́жника Христа́ Бо́га/ спасти́ ду́ши на́ша.

Сла́ва, и ны́не, Богоро́дичен:

При́зри, Влады́чице, на рабы́ Твоя/ и умилосе́рдися на лю́ди согреши́вшия:/ мо́жеши бо, ели́ка хо́щеши, я́ко Ма́ти всех Творца́ Христа́ Бо́га./ Те́мже Тя по до́лгу ублажа́ем.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Богоно́сне и преблаже́нне о́тче Мефо́дие,/ ты усе́рдно претерпе́л еси́ пусты́нное озлобле́ние,/ страхова́ния бесо́вская му́жески победи́л еси́/ и, я́ко со́лнце, луча́ми чуде́с просия́л еси́ в ми́ре,/ сего́ ра́ди почита́ем святу́ю и всечестну́ю па́мять твою́.

Кано́н Богоро́дицы со ирмосо́м на 6 и свята́го на 8, глас 8.

Песнь 1

Ирмо́с: Мо́ре огусти́л еси́,/ погрузи́вый со ору́жием го́рдаго фарао́на,/ и лю́ди спасл еси́ немо́кренно, Го́споди,/ и ввел еси́ я в го́ру святы́ни, вопию́щия:/ пои́м Тебе́, Бо́гу на́шему, песнь побе́дную, я́ко просла́вися.

Мо́ря страстна́го пучи́ною обурева́емы,/ к Тебе́, Иису́се Всеблаги́й, прибега́юще, вопие́м:/ от тиме́ния страсте́й нас изба́ви,/ да в тишине́ ду́ха уго́днику Твоему́ песнь хвале́бную принесе́м,/ его́же чудесы́ сла́вно просла́вил еси́.

Мо́рю песо́к преде́л положи́вый Госпо́дь,/ тя избра́, преподо́бне о́тче Мефо́дие, от ю́ности Ему́ благоугожда́ти/ и сего́ ра́ди к вели́кому Се́ргию тя наста́ви,/ от него́же подвиго́м духо́вным научи́вся,/ в них сла́вно просла́вился еси́.

Мо́ря жите́йскаго треволне́ние/ не потопи́ ладьи́ твоея́, о́тче преподо́бне,/ но, ве́янием Ду́ха Бо́жия управля́емый,/ в ти́хое приста́нище спасе́ния вшел еси́/ и чудесы́ мно́гими от Го́спода просла́вился еси́.

Богоро́дичен: Мо́ре слез испроси́ нам, Влады́чице Преблага́я,/ у Ми́лостиваго Сы́на Твоего́ и Бо́га на́шего,/ да, и́ми угаси́вше пещь страсте́й,/ омы́ем скве́рну грехо́вную душ на́ших/ и, спасе́ние ве́чное улучи́вше,/ воспои́м Христу́ песнь побе́дную, я́ко просла́вися.

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Утверди́л еси́ на ка́мени за́поведей Христо́вых се́рдце твое́, преподо́бне о́тче Мефо́дие,/ у́зким и приско́рбным путе́м ше́ствовал еси́,/ а́лчбою и жа́ждею плоть свою́ изнуря́я/ блаже́ннаго ра́ди бу́дущаго поко́я,/ его́же получи́в, весели́шися ве́чно со святы́ми.

Утвержде́нный благослове́нием и моли́твою преподо́бнаго Се́ргия,/ в пусты́ню удали́лся еси́, о́тче Мефо́дие,/ и, в ней многоле́тне потруди́вся,/ оби́тель и́ноком возгради́л еси́,/ я́же спасе́ния хода́таица бысть мно́гим.

Утвержда́л еси́ словесы́ твои́ми душеспаси́тельными бра́тию твою́, преподо́бне о́тче,/ и был еси́ о́браз благоче́стия твои́м ученико́м,/ и́же, тобо́ю наставля́еми, подража́тели бы́ша твоему́ житию́ свято́му/ и вку́пе с тобо́ю получи́ша спасе́ние.

Богоро́дичен: Утвержде́ние на Тя наде́ющихся, Пресвята́я Богоро́дице Влады́чице,/ не посрами́ упова́ния на́шего,/ е́же по Бо́зе на Тя возлага́ем,/ но бу́ди нам Засту́пница от нападе́ний диа́вольских,/ да, Тобо́ю помоществу́еми, возвесели́мся о спасе́нии на́шем.

Седа́лен, глас 4.

Подо́бен: Ско́ро предвари́:

Ско́рый помо́щник явля́ешися, преподо́бне о́тче Мефо́дие,/ с ве́рою в моли́твах тя призыва́ющим:/ даде́ся бо тебе́ от Го́спода благода́ть/ неду́ги врачева́ти и ско́рби утоля́ти,/ оби́тель же твою́ святу́ю и по сме́рти назира́ти./ Сего́ ра́ди с любо́вию почита́ем святу́ю и всера́достную па́мять твою́.

Сла́ва, и ны́не, Богоро́дичен:

Ско́рый Твой покро́в, и по́мощь, и ми́лость покажи́ на рабы́ Твоя́,/ и во́лны, Чи́стая, укроти́ су́етных по́мыслов,/ и па́дшую мою́ ду́шу возста́ви, Богоро́дице:/ вем бо, вем, Де́во, я́ко мо́жеши, ели́ко хо́щеши.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Проро́ком Бо́жиим Илии́ и Крести́телю/ уподо́бился еси́, преподо́бне о́тче Мефо́дие,/ пусты́нный жи́тель быв, я́ко го́рлица уедине́нная,/ славосло́вия пе́сни еди́н Еди́ному Христу́ возноси́л еси́,/ воспева́я Того́ Боже́ственное снизхожде́ние.

Проро́чески прови́дев преподо́бный Се́ргий/ име́вшую устро́итися в пусты́ни твое́й оби́тель,/ прише́д к тебе́, о́тче Мефо́дие, избра́ и благослови́ ме́сто,/ на сооруже́ние оби́тели удо́бное,/ его́же посеще́нием обра́дован быв,/ вку́пе с ним воспева́л еси́ Спа́сово Боже́ственное снизхожде́ние.

Проро́ка и царя́ Дави́да словесе́м после́дуя, преподо́бне о́тче,/ жи́ти бра́тии вку́пе в оби́тели твое́й законоположи́л еси́/ и о́бщаго жития́ ревни́тель был еси́ вели́кий,/ приме́р собо́ю всем подава́я/ и немо́лчно воспева́я Христо́во Боже́ственное снизхожде́ние.

Богоро́дичен: Проро́ческая рече́ния на Тебе́ сбы́шася, Де́во Богоро́дице,/ Ты бо Сло́во Бо́жие нетле́нно воплоти́ла еси́,/ и Невмести́маго во утро́бе Твое́й де́вственней нете́сно вмести́ла еси́;/ тем Тя хвале́бно ублажа́ем/ и воспева́ем спаси́тельное Христо́во снизхожде́ние.

Песнь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ И́мя Твое́ имену́ем.

Го́спода Бо́га освяти́л еси́ в души́ твое́й, преподо́бне о́тче,/ и же́ртвенник мы́сленный ду́шу твою́ соде́лал еси́,/ на не́мже же́ртву хвалы́ Го́сподеви возноси́л еси́ во смире́нии ду́ха,/ немо́лчно призыва́я И́мя Бо́жие спаси́тельное.

Госпо́дни за́поведи животво́рныя/ име́л еси́ напи́санныя на скрижа́лех се́рдца твоего́, преподо́бне о́тче,/ и пропове́дник бра́тии твое́й был еси́ ева́нгельскаго уче́ния,/ к Небеси́ возводя́щаго челове́ки,/ и́же, послу́шающе сего́, моли́твенно призыва́ют Боже́ственное Христо́во И́мя.

Госпо́день раб был еси́, Мефо́дие Богому́дре,/ день и нощь труди́выйся во сла́ву Бо́жию и на по́льзу душе́вную бли́жних твои́х,/ и́хже, я́ко сама́го себе́, возлюби́в усе́рдно,/ гла́дныя пита́л еси́,/ ни́щия, сироты́ и вдови́цы удовля́л еси́,/ подвиза́я их сла́вити о тебе́ Христо́во И́мя.

Богоро́дичен: Госпо́дня Ма́ти и Влады́чица всея́ тва́ри яви́лася еси́, Богоро́дице Мари́е,/ нетле́нно поро́ждши Еди́наго от Тро́ицы, Бо́га Сло́ва,/ Его́же моли́, Чи́стая, безслове́сных страсте́й нас изба́вити,/ да в тишине́ безстра́стия се́рдцем и усты́ воспева́ем Его́ Свято́е И́мя.

Песнь 6

Ирмо́с: Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мой, Благоутро́бне Го́споди.

Я́ко кипари́с высокове́рхий, возра́сл еси́, преподо́бне Мефо́дие, в пусты́ни непло́дней/ и плодоноше́нии духо́вными облагоуха́л еси́ Христо́ву Це́рковь,/ оби́тель созда́в, и, в ней и́ноков мно́жество насели́в,/ и́хже сло́вом и приме́ром твои́м ко Христу́ наста́вил еси́.

Я́ко при́сный учени́к преподо́бнаго Се́ргия, о́тче Мефо́дие,/ в устрое́нии оби́тели ему́ подража́л еси́ то́щно,/ слеза́ми моли́твенными па́че, не́же бога́тством земны́м, сию́ созида́я/ и при́сно моля́ся ко Го́споду,/ да от тли грехо́вныя соблюде́т де́ло руку́ твое́ю.

Я́ко воево́да благоиску́сный, о́тче,/ во́ины духо́вныя в бра́нех со враги́ неви́димыми к побе́дам руково́дствовал еси́:/ искуше́н бо быв сам в по́двизех пусты́нных,/ и искуша́емым удо́бно помога́л еси́ тли грехо́вныя избега́ти.

Богоро́дичен: Я́ко вои́стинну прибе́жище непосты́дное христиа́ном,/ и щит, и покро́в, Ма́ти Бо́жия,/ воспева́ющия Тя бед и скорбе́й свободи́:/ Тя бо, Еди́ну Благослове́нную в жена́х,/ Тобо́ю тли грехо́вныя изба́вльшиися,/ немо́лчными хвала́ми ублажа́ем.

Конда́к, глас 4:

Послуша́ния до́брый рачи́тель быв,/ безпло́тныя враги́ сле́зными моли́твами твои́ми кре́пко посрами́л еси́/ и яви́лся еси́ Пресвяты́я Тро́ицы жили́ще,/ Ю́же зря, блаже́нне, я́сно,/ Богому́дре Мефо́дие преподо́бне,/ чуде́с дар от Нея́ прия́л еси́./ Те́мже исцеля́еши с ве́рою приходя́щих неду́ги,/ утоля́еши ско́рби/ и мо́лишися непреста́нно о всех нас.

И́кос:

Возлюби́в Христо́вы Боже́ственныя за́поведи,/ возненави́дел еси́ ми́ра сего́ наслажде́ние:/ плоть твою́, преподо́бне, во вре́менней жи́зни/ посто́м, бде́нием и до́лу лега́нием изнури́л еси́/ и в умерщвле́нном телеси́ пе́сни немо́лчныя, хвалы́ и славосло́вия/ Триеди́ному Бо́гу приноси́л еси́, Мефо́дие о́тче наш,/ от нас же слы́шиши пе́сни таковы́я:/ ра́дуйся, А́нгеле земны́й и челове́че Небе́сный,/ А́нгелы удиви́вый жития́ твоего́ чистото́ю/ и челове́ки научи́вый благоугожда́ти Бо́гу;/ ра́дуйся, свети́льниче немерца́ющий Боже́ственныя благода́ти,/ в животе́ и по сме́рти сия́яй чудесы́/ и си́ми озаря́яй ду́ши и сердца́ челове́ческия./ Ра́дуйся, при́сный наш засту́пниче и о душа́х на́ших ко Го́споду моли́твенниче:/ мо́лишися бо непреста́нно о всех нас.

Песнь 7

Ирмо́с: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием,/ о́троцы поя́ху:/ благослове́н еси́, Бо́же оте́ц на́ших.

В пещи́ искуше́ний пусты́нных, о́тче Мефо́дие,/ благода́ть Госпо́дню, тя ороша́ющую, стяжа́л еси́, преподо́бне,/ те́мже непобеди́м враго́м неви́димым показа́лся еси́/ и вся прило́ги диа́вольския кре́пко сокруши́л еси́, зовы́й немо́лчно:/ благослове́н еси́, Бо́же оте́ц на́ших.

Поревнова́л еси́, преподо́бне о́тче, в житии́ твое́м/ вели́ким во отце́х Анто́нию, Пахо́мию и Евфи́мию/ и, сих нра́ву и чистоте́ вы́ну поуча́яся,/ я́ко безпло́тен, на земли́ подвиза́лся еси́,/ сего́ ра́ди сосу́д избра́н Ду́ху Свято́му сподо́бился еси́ бы́ти,/ Его́же де́йством чудеса́ пресла́вная соде́лал еси́ в житии́ и по сме́рти,/ о ни́хже ве́рнии благословля́ют Бо́га оте́ц на́ших.

Я́ко крин в пусты́ни, процве́л еси́, преподо́бне,/ и благоуха́ния Христо́ва испо́лнил еси́ оте́чество твое́ земно́е:/ све́том до́брых дел твои́х озари́л еси́ сердца́ челове́ков,/ просвеща́я их уче́нии твои́ми и науча́я пе́ти Го́сподеви:/ благослове́н еси́, Бо́же оте́ц на́ших.

Богоро́дичен: В пещи́ халде́йской та́инство рождества́ Твоего́ проразумева́я, Богоро́дице,/ ро́ждшимся от Тебе́ Искупи́телем спасе́ние обрето́хом/ и, подо́бно отроко́м Богосло́вцем, Сы́ну Твоему́ и Го́споду благода́рно зове́м:/ благослове́н еси́, Бо́же оте́ц на́ших.

Песнь 8

Ирмо́с: А́нгели и Небеса́,/ на Престо́ле сла́вы седя́щаго/ и я́ко Бо́га непреста́нно сла́вимаго,/ благослови́те, по́йте/ и превозноси́те Его́ во ве́ки.

А́нгелы собесе́дники име́л еси́, преподо́бне о́тче,/ и, си́ми укрепля́емый, в пусты́ни безлю́дней многоле́тне пребы́л еси́,/ еди́н Еди́ному Бо́гу рабо́тая./ Сего́ ра́ди ны́не со Безпло́тными водворя́ешися/ и пое́ши хвале́бную песнь Триеди́ному Бо́гу,/ Препе́тому и Превозноси́мому во ве́ки.

А́нгела тя плотя́наго ве́мы, преподо́бне о́тче Мефо́дие:/ ангелоподо́бно бо на земли́ пожи́л еси́,/ и чистоту́ души́ и те́ла ре́вностно соблю́л еси́,/ ны́не же водворя́ешися там, иде́же ничто́же скве́рно вхо́дит,/ и пое́ши немо́лчную песнь Бо́гу, Препе́тому и Превозноси́мому во ве́ки.

А́нгелов Творе́ц и всея́ тва́ри Созда́тель/ подви́жника доброде́телей яви́ тя, Мефо́дие,/ Его́же си́лою укрепля́емый, путе́м те́сным ше́ствуя,/ дости́гл еси́ соверше́нства духо́внаго,/ Ца́рствие же Христо́во унасле́довал еси́,/ и со святы́ми пое́ши ра́достно:/ Го́спода по́йте и превозноси́те Его́ во ве́ки.

Богоро́дичен: А́нгельское целова́ние прино́сим Ти с любо́вию, Богоро́дице Чи́стая:/ ра́дуйся, Благода́тная, Госпо́дь с Тобо́ю./ Ты же ра́дости нетле́нныя сподо́би Тя по до́лгу ублажа́ющия,/ Ро́ждшагося же от Тебе́ Го́спода пою́щия и превознося́щия во ве́ки.

Песнь 9

Ирмо́с: Чу́жде ма́терем де́вство,/ и стра́нно де́вам деторожде́ние:/ на Тебе́, Богоро́дице, обоя́ устро́ишася./ Тем Тя, вся племена́ земна́я,/ непреста́нно велича́ем.

Чужд был еси́, преподо́бне, превозноше́ния тщесла́внаго/ и в смире́нии глубо́цем житие́ твое́ препроводи́л еси́:/ о́браз смире́ния был еси́ твои́м ученико́м,/ и́хже при́сно поуча́л еси́ бе́гати душепа́губныя горды́ни/ и во смире́нии ду́ха велича́ти Христа́ Жизнода́вца.

Чу́ждым прише́льцем и стра́нником убо́гим/ врата́ оби́тели твоея́ незатворе́на бы́ша, преподо́бне о́тче,/ но, Авраа́мово страннолю́бие стяжа́в,/ сия́ с любо́вию приима́л и упокоева́л еси́,/ зря в них Самого́ Христа́, Его́же при́сно велича́л еси́.

Чужд пра́здности был еси́, блаже́нне,/ но при́сно в моли́твах и труде́х теле́сных подвиза́лся еси́,/ при сооруже́нии же оби́тели твоея́ святы́я/ мно́гия вели́кия труды́ подъя́л еси́, си́лою Го́спода сил укрепля́емый,/ Его́же гла́сы хвале́бными немо́лчно велича́л еси́.

Богоро́дичен: Чу́ждых нас яви́, Влады́чице, вла́сти лю́таго мироде́ржца/ и в час кончи́ны на́шея на по́мощь ускори́ к нам, безпо́мощным:/ мно́го бо мо́жет Ма́терняя моли́тва Твоя́ ко Го́споду,/ и трепе́щут пред Тобо́ю ду́си тьмы,/ и́хже наси́лия нас изба́ви, Всеблага́я,/ да Тя славосло́вии ра́достными велича́ем.

Свети́лен:

Процве́л еси́ в по́стнических по́двизех, прехва́льне о́тче,/ и плод чудотворе́ния прине́сл еси́ Христо́вой Це́ркви,/ я́же и́мать тя, я́ко шипо́к благово́нен,/ ми́ром Ду́ха Свята́го напо́лненный,/ и́мже злово́ние страсте́й упраздня́ется и исцеле́ния подаю́тся/ с ве́рою и любо́вию к тебе́ притека́ющим.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и яви́ла еси́ нам, потемне́нным, свет спасе́ния/ Боже́ственным и Пречи́стым Твои́м рождество́м.

На хвали́тех стихи́ры на 4, глас 5.

Подо́бен: Ра́дуйся, по́стников:

Ра́дуйся, о́тче Мефо́дие,/ звездо́ пресве́тлая,/ не́бо Росси́йския Це́ркве озари́вшая;/ ра́дуйся, вели́каго Се́ргия пресла́вный учениче́ и вселюби́мый,/ труда́ми подвиго́в твои́х ему́ подража́вый;/ ра́дуйся, предста́телю и помо́щниче ско́рый/ в моли́твах тя призыва́ющих:/ предвари́ и подви́гни святы́я моли́твы твоя́ о нас ко Го́споду/ и да́нною ти от Него́ благода́тию/ неду́ги на́ша душе́вныя и теле́сныя исцели́,/ прося́ дарова́ти нам ве́лию ми́лость.

Ра́дуйся, главо́ освяще́нная,/ жили́ще Ду́ха Свята́го,/ сосу́де избра́нный Бо́жия благода́ти,/ настави́ всех нас, о́тче,/ ходи́ти путе́м богоуго́дных исправле́ний твои́х/ и преклони́ся ми́лостивно к гла́сом хвале́бным,/ и́миже честву́ем святу́ю и всера́достную па́мять твою́./ Боля́щих цели́телю и печа́льных уте́шителю,/ помяни́ нас в моли́твах твои́х ко Го́споду/ и проси́ нам у бла́гости Его́ ве́лию ми́лость.

Ра́дуйся, и́ноков пра́вило,/ преподо́бных красото́,/ чуде́с Боже́ственных соверши́телю,/ Мефо́дие Богоно́сне,/ блиста́ньми чуде́с твои́х озаря́яй оте́чество твое́ земно́е/ и си́ми утвержда́яй нас в Правосла́вней ве́ре,/ честну́ю па́мять твою́ соверша́ющим,/ пода́ждь да́ры целе́бныя, коему́ждо по потре́бе,/ и моли́ Христа́ Бо́га/ дарова́ти нам ве́лию ми́лость.

Сла́ва, глас 6:

Преподо́бне о́тче Мефо́дие,/ во вся концы́ страны́ Росси́йския/ изы́де веща́ние чуде́с твои́х/ и сла́ва сострада́ния твоего́ к лю́дем,/ сего́ ра́ди честву́ем с любо́вию святу́ю па́мять твою́,/ я́ко вели́каго уго́дника Бо́жия,/ чудотво́рца же пресла́внаго,/ и уми́льно глаго́лем:/ о́тче преподо́бне,/ моли́ся ко Го́споду о спасе́нии душ на́ших.

И ны́не, Богоро́дичен:

Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́там, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О свяще́нная главо́, земны́й А́нгеле и Небе́сный челове́че, преподо́бне и Богоно́сне о́тче наш Мефо́дие! Припа́даем к тебе́ с ве́рою и любо́вию и мо́лим ти ся приле́жно: яви́ нам, смире́нным и гре́шным, свято́е оте́ческое твое́ заступле́ние, се бо грех ра́ди на́ших не и́мамы свобо́ды чад Бо́жиих, проси́ти о потре́бах на́ших Го́спода и Влады́ку на́шего, но тебе́ моли́твенника благоприя́тнаго к Нему́ предлага́ем и про́сим тя со усе́рдием мно́гим, испроси́ нам у бла́гости Его́ благопотре́бныя да́ры душа́м и телесе́м на́шим; ве́ру пра́ву, наде́жду спасе́ния несомне́нну, любо́вь ко всем нелицеме́рну, в искуше́ниих му́жество, в злострада́ниих терпе́ние, в моли́твах постоя́нство, душ и теле́с здра́вие, земли́ плодоно́сие, возду́ха благорастворе́ние, жите́йских потре́б дово́льство, ми́рное и безмяте́жное житие́, благу́ю христиа́нскую кончи́ну и до́брый отве́т на Стра́шном Суде́ Христо́ве. Испроси́, уго́дниче Бо́жий, у Ца́ря ца́рствующих и Го́спода госпо́дствующих правосла́вным христиа́ном спасе́ние и на враги́ одоле́ние и всему́ оте́честву на́шему мир, тишину́ и благострое́ние. Не лиши́ нас по́мощи твоея́ Небе́сныя, но моли́твами твои́ми всех нас приведи́ в приста́нище спасе́ния и насле́дники яви́ нас бы́ти всесве́тлаго Ца́рствия Христо́ва, да пое́м и сла́вим неизрече́нныя щедро́ты Человеколю́бца Бо́га, Отца́, и Сы́на, и Свята́го Ду́ха и твое́ свято́е оте́ческое заступле́ние, во ве́ки веко́в. Ами́нь.

Преподобный Мефодий, игумен Пешношский (XIV)

Преподобный Мефодий, игумен Пешношский (XIV) был основателем Пешношского монастыря. В юности он пришел к Преподобному Сергию Радонежскому и провел несколько лет под его руководством, затем, по благословению Преподобного Сергия, удалился в пустынное место и за рекою Яхромой в лесу поставил келлию. Вскоре в эту глухую и болотистую местность к нему явилось несколько учеников, желавших подражать его жизни. Преподобный Сергий посетил его и дал совет построить обитель и храм. Преподобный Мефодий сам трудился при построении храма и келлии, «пеш» нося деревья через речку, которую с тех пор стали называть Пешноша.

С 1391 года преподобный Мефодий стал игуменом своего монастыря. По временам он удалялся за две версты от монастыря и здесь подвизался в молитве, сюда же для духовных бесед к нему приходил Преподобный Сергий, почему эта местность и получила название «Беседа».

Преподобный Мефодий был погребен († 1392) в основанной им обители. В 1732 году над его мощами была сооружена церковь во имя преподобных Сергия Радонежского и Мефодия Пешношского. Начало местного празднования относят к концу XVII в.

* * *

³⁴

Неначае́мый – неожиданный.

³⁵

Сли́чную – приятную для слуха по согласию песнь.

³⁶

Бодрели́во – не дремлющее.

³⁷

Вжиля́емь – укрепляем.

³⁸

Приединева́яся – присоединяясь.

³⁹