15-й день

Свята́го апо́стола Они́сима

Святой апостол от 70-ти Онисим

Преподобнаго Пафну́тия, затво́рника Пече́рскаго, в Да́льних пеще́рах почива́ющаго

Преподобный Пафнутий Слезливый

На Го́споди, воззва́х: стихи́ры, глас 1.

Подо́бен: Небе́сных чино́в:

Всыня́ема благода́тию ве́ры ра́ди Бо́гу/ и рождена́ Па́вловой ве́рою,/ Боже́ственнаго апо́стола Они́сима Богому́ченика,/ днесь свяще́нную его́ па́мять/ пе́сньми соверша́юще, восхваля́ем.

Сообра́зно рабо́ты избежа́в, му́дре, преле́стныя,/ ча́до Бо́гу был еси́ по благода́ти,/ Ду́хом Святы́м и ве́рою Христо́вою/ Па́вловым Боже́ственным и прехва́льным приме́шься ученико́м,/ благопотре́бне Они́симе.

Я́ко учени́к быв Сло́ва,/ пропове́дником и апо́столом, Боже́ственным Па́влом всехва́льным,/ Они́симе треблаже́нне,/ три́щи сугу́б о Христе́ и вене́ц прие́млеши,/ я́ко свяще́нник,/ и я́ко проповедник,/ и я́ко страда́лец украша́емь, прехва́льне.

Сла́ва, и ны́не, Богоро́дичен, глас 1.

Подо́бен то́йже:

Же́злом Твоего́ предста́тельства,/ Богороди́тельнице Чи́стая,/ звери́ныя стра́сти окая́нныя мое́й души́ отжени́ у́бо,/ ми́рно к жи́зни мя направля́ющи,/ и свято́му мя ста́ду/ и́збранных Твои́х ове́ц причти́.

Крестобогоро́дичен.

Подо́бен то́йже:

Воздви́жена я́ко ви́де на Кресте́ А́гнца,/ Непоро́чная Де́ва, пла́чущи, вопия́ше:/ сла́дкое Мое́ Ча́до,/ что но́вое и пресла́вное виде́ние?/ ка́ко, содержа́й вся́ческая го́рстию,/ на Дре́ве пригвожда́ешися пло́тию?

Тропа́рь, глас 3:

Апо́столе святы́й Они́симе,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Кано́н, его́же краегране́сие: Страсте́й мя, раба́ су́ща, изба́ви, блаже́нне. Феофа́н. Глас 6.

Песнь 1

Ирмо́с: Я́ко по су́ху, пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.

Просвеще́н Боже́ственною и светоза́рною Спа́са благода́тию,/ омраче́нную ду́шу мою́, моля́, Они́симе, Христа́ Человеколю́бца Бо́га,/ блаже́нне, просвети́.

Светосия́нными Па́вла озари́вся луча́ми, сла́вне,/ неве́дения мглы удо́бь избегл еси́,/ Христу́ благода́рственную песнь вопия́, всеблаже́нне.

Боже́ствен показа́лся еси́, преблаже́нне, священноде́йственник/ и, Боже́ственным Ду́хом сия́я све́тло, всю́ду проте́кл еси́,/ Христа́ возвеща́я благоче́стно, Богоблаже́нне.

Богоро́дичен: Укра́шена доброто́ю доброде́телей, Богома́ти Чи́стая,/ Бо́га и́стиннаго па́че ума́ зачала́ еси́,/ нас Боже́ственными доброди́тельми уясни́вшаго.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Вод Боже́ственных исто́чнику прибли́жил еси́ уста́ и, сла́дости пото́к от него́ прие́м,/ лице́ честныя Це́ркве, славне, напои́л еси́.

Прича́стием сия́ния мысленнаго светле́йший яви́лся еси́,/ благоче́стия свещами сердца́ ве́рных просвеща́я светло́/ и светоно́сною заре́ю про́поведи.

Разреши́лся еси́ Павловыми у́зами от рабо́тныя ле́сти/ и свобо́дою благода́ти почти́лся еси́,/ сын Бо́жий быв и насле́дник Божествен показа́лся еси́.

Богоро́дичен: Ле́стно змий мя пе́рвее, я́ко пле́нника, взят, ле́стию плени́в;/ Тобо́ю же рабо́ты его́ изме́нься, Богома́ти,/ пе́сньми ублажа́ю Тя.

Седа́лен, глас 4.

Подо́бен: Ско́ро предвари́:

Вре́менныя, Они́симе, отреши́вся и́стинно работы,/ был еси́ раб Христа́ Бо́га/ и сосу́д благопотре́бен;/ те́мже порабоще́ныя враго́м свобо́дны пока́зал еси́ Боже́ственным сло́вом/ и Небе́сныя гра́жданы сотвори́в./ С ни́миже свяще́нную твою́ па́мять ве́рно сла́вим.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м,/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к Животу́ нетле́ния./ Темже Тя по до́лгу блажи́м вси,/ Де́во препросла́вленная, я́коже прорекла́ еси́.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ ка́ко, Жизнь всех, вкуша́вши сме́рти,/ оживи́ти ме́ртвыя хотя́, я́ко Милосе́рд?

Песнь 4

Ирмо́с: Христо́с моя́ си́ла/ Бог и Госпо́дь,/ честна́я Це́рковь/ Боголе́пно пое́т, взыва́ющи,/ от смы́сла чи́ста о Го́споде пра́зднующи.

Хотя́й вся спасти́ Госпо́дь/ от и́га тя рабо́ты священноде́йственника, блаже́нне, поставля́ет,/ священноде́йствующа честно́е, Богоявле́нне, Ева́нгелие.

Сын ты был еси́ Бо́жий благода́тию,/ Того́ возвеща́я Единоро́дное Сло́во Присносу́щное,/ с пло́тию су́щим на земли́ пресла́вно прибли́жшася.

Сло́вом суда́ и Боже́ственным пома́занием свяще́нства,/ я́ко святи́тель, всему́дре, пожи́л еси́,/ и терпе́нием лю́тых Божествен му́ченик был еси́.

Богоро́дичен: Естество́м Безнача́льный Сын и Безле́тный/ вре́менное от Де́вы Отрокови́цы начало во́льно прие́млет,/ сущия под ле́том от тли обнови́ти промышля́я.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Ума́ острото́ю и души́, блаже́нне, чистото́ю, вра́жия прелете́в се́ти,/ возвы́сился еси́ к Небе́сным селе́нием,/ криле́ Богоразумия прие́м.

Твой апо́стол, Бла́же, плотско́е Твое́ к челове́ком прише́ствие пропове́да,/ заблу́ждшия к позна́нию наставля́я и просвеща́я заре́ю ве́ры.

Храм яви́лся еси́ всеблаголе́пен,/ внутрь име́я, я́ко све́щник, сия́ние Боже́ственныя благода́ти,/ зда́нием Боже́ственнаго Ду́ха основа́н,/ блаже́нне Они́симе.

Богоро́дичен: Греха́ моего́ плени́цы Твои́м хода́тайством и предста́тельством, Де́во, расто́ргни:/ Ты бо отча́янных еси́ наде́жда,/ ве́рою притека́ющих в Боже́ственный кров Твой.

Песнь 6

Ирмо́с: Жите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Облиста́в, я́ко со́лнце, с Небесе́ зва́нный/ просвеще́нием благода́ти оста́ви тебе́ зарю́,/ издале́ча благомо́щно отгоня́щу неве́дения мрак, всеблаже́нне.

Светло́ обличи́л еси́ беззако́нных гнила́я и злочести́вая шата́ния,/ благоче́стия веща́я вои́стинну Боже́ственная уче́ния,/ святи́телю Госпо́день всече́стне.

Богоро́дичен: Сый пови́нен грехо́м и лю́те уя́звлен, окая́нный,/ к Тебе́, Богома́ти, ми́лостивей прибега́ю, моля́ся/ стру́пы очи́стити прегреше́ний мои́х.

Конда́к, глас 4.

Подо́бен: Яви́лся еси́ днесь:

Я́ко луча́, возсия́л еси́ вселе́нней,/ заря́ми сия́я со́лнца, блаже́нне,/ всесве́тлаго Па́вла, мир просвети́вшаго:/ те́мже тя почита́ем, Они́симе сла́вне.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Блаже́нную прия́л еси́, Они́симе, кончи́ну/ и неги́блемое безсме́ртие наде́ждею, блаже́нне, чи́стою/ и пое́ши, ра́дуяся, Христу́:/ благослове́н еси́, Бо́же оте́ц на́ших.

Тве́рдым твои́м мудрова́нием, Они́симе, пре́лести кова́рства попра́л еси́,/ благоче́стия сия́ низложи́в ору́диями, Богому́дре, вопия́:/ благослове́н еси́, Бо́же оте́ц на́ших.

Богоро́дичен: Я́ко су́щи Всенепоро́чная, Богоневе́сто, Сло́во Бо́жие зачала́ еси́,/ неразлу́чно в не́дрех Отца́ Су́ща,/ рука́ми же держи́мо Твои́ми,/ благослове́нна Богома́ти Неискусобра́чная.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Со А́нгелы лику́я, блаже́нне Они́симе,/ муче́ния венце́м украша́емь, престо́лу же све́тло Влады́чню предстои́ши:/ Его́же превозно́сим во вся ве́ки.

Апо́столу Бо́жию служа́, Боже́ственне Они́симе,/ неизрече́нных чуде́с име́л еси́ де́йство,/ пропове́дник и́стинен Христо́в, блаже́нне, быв:/ Его́же превозно́сим во вся ве́ки.

Исцеле́ний благода́тию от незави́стна исто́чника Спа́сова обогати́вся, всем препода́л еси́,/ Сего́ повину́яся, блаже́нне, Боже́ственным веле́нием:/ Его́же превозно́сим во вся ве́ки.

Богоро́дичен: Научи́вшеся чудеси́ Твоего́ Рождества,/ воспева́ем я́ко Боже́ственно па́че смы́сла,/ Всесвята́я, Чи́стая, Богома́ти Пренепоро́чная, та́инство,/ Тя превозноша́юще во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/на Него́же не сме́ют чи́ни Ангельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Свети́льник пресве́тел показа́лся еси́, све́тлыми заря́ми сия́я духо́вными,/ мирски́я концы́ освеща́я све́том Богоразу́мия, блаже́нне Они́симе./ Те́мже со апо́стольскими ли́ки тя велича́ем.

Плоды́ духо́вными ты укра́шен, на Небеса́ взя́лся еси́, Богоявле́нне, ра́дуяся,/ Христо́в апо́стол яви́лся еси́ че́стен,/ прему́др святи́тель, му́ченик непобеди́мь, пропове́дник и́стинен/ су́щих па́че ума́, Богобла́женне.

При́сно предста́ни пою́щим тя всегда́ и твое́ восхваля́ющим торжество́,/ Влады́це предстоя́, Они́симе,/ весь просвеще́н, весь пресве́тел,/ весь отону́дными блиста́яся светлостьми́.

Богоро́дичен: Изба́влен быв Рождество́м Твои́м, Неискусобра́чная Ма́ти Бо́жия,/ дре́вняго ко́жнаго умерщвле́ния, и кля́твы, и тли, и сме́рти,/ ю́же от греха́ оттря́с, с Небе́сными во́и при́сно сла́влю Тя.

Святой апостол от 70-ти Онисим в молодости был рабом святого Филимона, христианина знатного рода, жившего в городе Колоссах Фригийской области. Провинившись в чем-то перед своим господином и боясь наказания, святой Онисим бежал в Рим, но там как беглый раб попал в тюрьму. В тюрьме он встретился с апостолом Павлом, содержавшимся в узах, был просвещен им и принял святое Крещение. В тюрьме святой Онисим служил апостолу Павлу, как сын. Апостол Павел, лично знавший святого Филимона, написал ему письмо, полное любви, прося простить беглого раба и принять его как брата; с этим письмом он отправил святого Онисима к его хозяину, лишив самого себя помощи, в которой очень нуждался.

Святой Филимон, получив письмо, не только простил Онисима, но отпустил его на волю и послал обратно в Рим к первоверховному Апостолу. Впоследствии святой Филимон был рукоположен во епископа города Газы (память его также 4 января, 19 февраля и 22 ноября).

После смерти апостола Павла святой Онисим служил апостолам до их смерти и был поставлен ими во епископа. После кончины святых апостолов он проповедовал Евангелие во многих странах и городах: в Испании, в Колоссах, в Патрах, был епископом в Ефесе.

В царствование императора Траяна (98–117) святой Онисим был схвачен и приведен на суд к епарху Тертилу, который продержал святого Онисима 18 дней в темнице, а потом сослал в Путеолы. Через некоторое время епарх опять вызвал узника и, убедившись, что святой Онисим все так же твердо исповедует веру во Христа, подверг его жестокому избиению камнями. После этого святому усекли голову мечом. Тело мученика взяла одна знатная женщина и положила в серебряную раку. Это было около 109 года.

Тропа́рь, глас 2:

Ве́лия ве́ры исправле́ния,/ в пеще́рнем затво́ре, я́ко на воде́ упокое́ния,/ преподо́бне о́тче Пафну́тие, ра́довался еси́,/ огне́м бо любве Боже́ственныя распаля́ем,/ бде́нием и моли́твою безстра́стия дости́гл еси́/ и яви́лся еси́ равноа́нгельный на земли́,/ того́ моли́твами, Христе́ Бо́же, спаси́ ду́ши на́ша.

Ин тропа́рь, глас 8: Слез твои́х:

Конда́к, глас 8:

Помышля́я исхо́д души́ твоея́/ и пра́ведное мздовоздая́ние по дело́м,/ непреста́нными слеза́ми умоли́л еси́ Го́спода/ дарова́ти тебе́ неизрече́нных ра́достей насле́дие,/ я́же уже́ со святы́ми предвкуша́я, Пафну́тие преподо́бне,/ помина́й и нас пред Бо́гом, чту́щих тя.

Преподобный Пафнутий Слезливый (XIII), затворник Печерский, был погребен в Дальних пещерах. В «Сказаниях о житиях преподобных, почивающих в пещерах преподобного Феодосия», о нем сказано: «Заставите законников (монахов), беспрестанно (он) плакал, вспоминаючи себе, иже приидет час, когда душа с телом разлучатися будет, где станут Ангелы? Кому душа достанется? и який декрет Христос учинит? Где мает душа достатися чи до Неба, чи до пекла? В котором плачу содержась аж до смерти, а умираючи видел хоры Ангелов, которые по его душу пришли и в Небо запровадили»