23-й день
Свята́го му́ченика Лу́ппа
В сий день отдае́тся пра́здник Успе́ния Пресвяты́я Богоро́дицы и пое́тся все пра́здника.
* * *
Ве́чера обы́чная кафи́зма. На Го́споди, воззва́х: стихи́ры пра́здника на 6. Сла́ва, и ны́не, пра́здника. А́ще в пято́к ве́чера: Сла́ва, пра́здника. И ны́не, догма́тик настоя́щего гла́са. Проки́мен дне, кроме́ вхо́да и пареми́й. И а́бие: Сподо́би, Го́споди: Ектения́: Испо́лним вече́рнюю:
На стихо́вне стихи́ры, и Сла́ва, и ны́не, пра́здника. По О́тче наш: тропа́рь пра́здника, еди́ножды, ектения́, и отпу́ст.
На повече́рии, конда́к пра́здника. Полу́нощницу же пое́м по обы́чаю с кафи́змою и с тропари́ обы́чными, а не пра́здника. Глаго́лем же и моли́тву: Помяни́, Го́споди:
На у́трени, на Бог Госпо́дь: тропа́рь пра́здника, два́жды. Сла́ва, и ны́не, то́йже. По кафи́змах седа́льны пра́здника. И чте́ние, и псало́м 50. Кано́ны пра́здника. Пе́рвый со ирмосо́м на 8 и други́й со ирмосо́м на 6, ирмосы́ же пое́м обою́ кано́нов, по два́жды. Катава́сия: Преукраше́нная: По 3-й песни ипакои́ пра́здника. По 6-й песни конда́к и и́кос пра́здника. На 9-й пе́сни Честне́йшую: не пое́м, но пое́м припе́вы пра́здника, я́коже на са́мый пра́здник. Свети́лен пра́здника, два́жды.
На хвали́тех стихи́ры пра́здника на 4. Сла́ва, и ны́не, пра́здника. Славосло́вие вели́кое. По трисвято́м тропа́рь пра́здника, еди́ножды. Ектения́ и отпу́ст. И исхожде́ние в притво́р. И час 1-й. На часе́х тропа́рь и конда́к пра́здника.
На Литурги́и: Бла́женны обою́ кано́нов, песнь 9-я, на 8. По вхо́де тропа́рь пра́здника. Сла́ва, и ны́не, конда́к пра́здника. Проки́мен, аллилу́ия и прича́стен пра́здника. Апо́стол и Ева́нгелие дне, и пра́здника.
* * *
Подоба́ет ве́дати, а́ще случи́тся отда́ние Успе́ния Богоро́дицы в Неде́лю.
В суббо́ту на ма́лой вече́рни стихи́ры воскре́сны по обы́чаю.
На стихо́вне стихи́ра воскре́сна еди́на и пра́здника сти́ховна, с припе́вы свои́ми, вели́кия вече́рни. Сла́ва, и ны́не, пра́здника. Тропа́рь воскре́сный. Сла́ва, и ны́не, пра́здника.
На вели́цей вече́рни, по обы́чной кафи́зме, на Го́споди, воззва́х: стихи́ры воскре́сны 3, и восто́чен Анато́лиев еди́н, и пра́здника 6, пое́мыя на са́мый пра́здник. Сла́ва, пра́здника. И ны́не, Богоро́дичен 1-й гла́са.
На литии́ стихи́ры и Сла́ва, и ны́не, пра́здника.
На стихо́вне стихи́ры воскре́сны, Сла́ва, и ны́не, пра́здника.
На благослове́нии хле́бов, тропа́рь: Богоро́дице Де́во: два́жды и пра́здника, еди́ножды. И чте́ние в Посла́ниих Апо́стольских.
На у́трени, на Бог Госпо́дь: тропа́рь воскре́сный два́жды. Сла́ва, и ны́не, пра́здника. По кафи́зме седа́льны воскре́сны с Богоро́дичны их и чте́ние во Ева́нгелии толково́м. И непоро́чны, и ипакои́ гла́са, и чте́ние. Степе́нна и проки́мен гла́са. Вся́кое дыха́ние: Ева́нгелие воскре́сно. Воскресе́ние Христо́во: Псало́м 50. Стихи́ра воскре́сна. И про́чая по обы́чаю. Кано́н воскре́сный со ирмосо́м на 4, и Богоро́дицы на 2, и пра́здника, оба кано́на на 8. Катава́сия: Преукраше́нная: По 3-й пе́сни конда́к пра́здника и и́кос, ипакои́ пра́здника. По 6-й пе́сни конда́к воскре́сный и и́кос, и проло́г. На 9-й пе́сни пое́м Честне́йшую: Свети́лен воскре́сный. Сла́ва, и ны́не, пра́здника.
На хвали́тех стихи́ры воскре́сны на 4 и пра́здника на 4, со сла́вным, с припе́́вы пра́здника. Сла́ва, стихи́ра ева́нгельская. И ны́не: Преблагослове́нна еси́: Славосло́вие вели́кое. По Трисвято́м тропа́рь воскре́сный то́чию. Ектении́, и отпу́ст, и оглаше́ние Студи́тово. И исхожде́ние обы́чное в притво́р, и час 1-й, и коне́чный отпу́ст.
На часе́х, тропа́рь воскре́сный. Сла́ва, пра́здника. И ны́не, Богоро́дичен часов. По О́тче наш: конда́к пра́здника и воскре́сный, пременя́юще, глаго́лем.
На Литурги́и: Блаже́нны гла́са на 6 и пра́здника, песнь 9-я на 4. По вхо́де тропа́рь воскре́сен и пра́здника. Сла́ва, конда́к воскре́сный. И ны́не, пра́здника. Проки́мен, Апо́стол, аллилу́ия и Ева́нгелие дне, и пра́здника. Прича́стен: Хвали́те Го́спода с Небе́с: и пра́здника.