Месяца апреля в 7-й день

Преподо́бнаго отца́ на́шего Гео́ргия, епи́скопа Мелити́нскаго

Преподобный Георгий, митрополит Митиленский

Преподобнаго отца́ на́шего Дании́ла, Пересла́вскаго чудотво́рца

Преподобный Даниил Переславский

НА ВЕЧЕ́РНИ

Стихи́ры, глас 1.

Подо́бен: Всехва́льнии му́ченицы:

О́тче Гео́ргие,/ Христо́ве честне́й и пречи́стей/ че́стно поклони́лся еси́ ико́не, всему́дре,/ богобо́рцов на́глости ника́коже ужаса́яся,/ си́лою Того́ укрепля́емь./ Его́же ны́не моли́/ дарова́ти душа́м на́шим/ мир и ве́лию ми́лость.

О́тче Гео́ргие,/ я́рость нечести́вых претерпе́л еси́,/ гне́вающихся безслове́сне,/ я́же и ви́дел еси́ превознося́щияся/ злочести́вым шата́нием/ и па́ки сокруша́емы лю́те/ я́вственно промышле́нием,/ ко отмще́нию несмы́сленных/ дви́жимо, сла́вне.

О́тче Гео́ргие,/ Бо́гу соде́йственник быв/ я́ко иере́й и земледе́латель,/ стори́чествующ плод Влады́це –/ ду́ши приве́л еси́/ ны́не спасе́нных сло́вом твои́м./ И ны́не моли́ся/ дарова́ти душа́м на́шим/ мир и ве́лию ми́лость.

Сла́ва, и ны́не, Богоро́дичен:

Ра́дуйся, купино́ неопали́мая,/ Сове́та Вели́каго А́нгела,/ ра́дуйся, еди́на ро́ждшая./ Ра́дуйся, изволе́ние Честны́я Тро́ицы./ Ра́дуйся, земны́м утвержде́ние./ Ра́дуйся, рая́ клас прозя́бши невозде́ланный,/ Царя́ и Го́спода,/ прозябе́ния изсуша́юща зло́бы.

Крестобогоро́дичен:

Своего́ А́гнца А́гница и непоро́чная Влады́чица/ на Кресте́ я́ко ви́девши, зра́ка не иму́ща, ниже́ добро́ты,–/ увы́ Мне,– рыда́ющи, глаго́лаше,–/ где добро́та Твоя́ за́йде, Сладча́йший?/ Где благоле́пие,/ где благода́ть блиста́ющая о́браза Твоего́,/ Сы́не Мой любе́знейший?

Кано́н, глас 8.

Песнь 1

Ирмо́с: Песнь возсле́м, лю́дие, чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, еди́ному Влады́це.

Зарю́ благоутро́бия мне, Христе́,/ испо́лньшемуся прегреше́ний и грехи́ лю́тыми, возсия́й, Ще́дре,/ и мрак отжени́ моего́ ослепле́ния мольба́ми Твоего́ иера́рха.

Всю возде́лал еси́, му́дре, боле́зньми и по́ты твои́ми воздержа́ния зе́млю/ и, се́я в се́рдцы пшени́цу Ду́ха,/ клас безстра́стия прине́сл еси́, Гео́ргие блаже́нне.

На ра́мена крест твой взем,/ и земны́я красоты́ мироде́ржцу тьмы отве́ргл еси́, Христу́ после́довав,/ и сокро́вище стяжа́л еси́ невеще́ственнаго Ца́рствия Его́.

Богоро́дичен: Ору́жие и приста́нище тве́рдое, и сте́ну, и кре́пость, и Боже́ственное основа́ние,/ и мост, и покро́в, Твое́, Богоневе́сто, иму́ще предста́тельство,/ от бед избавля́емся всех.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

На высоту́ вшед, блаже́нне, доброде́телей,/ и во глубины́ ду́ха досто́йно воззре́в,/ и виде́ния прия́телище быв, преподо́бне,/ водворя́ешися со А́нгельскими ли́ки.

Обнища́в ду́хом, обогати́лся еси́, му́дре, Ца́рством невеще́ственным,/ в не́мже ста́ду твоему́ сокро́вища ве́чная ве́рно предугото́вал еси́,/ те́мже тя ублажа́ем.

Простото́ю, преподо́бне, и кро́тостию душе́вною/ уподо́бился еси́ нра́вы твои́ми и исправле́ньми Иа́кову/ и показа́лся еси́ чистото́ю ду́ха Изра́иль, ум, зряй Бо́га.

Богоро́дичен: Безо́тча родила́ еси́, безма́терня пре́жде Тебе́,/ и я́ко Младе́нца дои́ла еси́, Пита́ющаго вся,/ Его́же моли́ спасти́ся ве́рно пою́щим Тя госпо́дственно, Богоро́дицу Чи́стую.

Седа́лен, глас 8.

Подо́бен: Прему́дрости:

Смире́ния высото́ю све́тел быв,/ возноше́ния вра́жия до конца́ потреби́л еси́, хра́брствовав све́тло;/ ми́лостив же быв, о́тче преподо́бне,/ оби́льным подая́нием а́лчущия удовли́л еси́./ Те́мже нестаре́ющуюся по сме́рти наследо́вал еси́ пи́щу,/ ра́дуяся во ве́ки, Гео́ргие иера́рше блаже́нне./ Моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии,/ Огнь бо всели́ся в Тя Божества́, и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

Ты душе́вный кора́бль спасл еси́ от страсте́й ве́щнаго треволне́ния,/ во приста́нище устреми́лся еси́/ и тишину́ воздержа́ния, о́тче преподо́бне.

Ангелови́ден ра́зум стяжа́в,/ Тро́йческое от А́нгел песнопе́ние послу́шал еси́,/ быв во изступле́нии смы́сла твоего́, прехва́льне.

Ты, мы́сленною пра́щею вооружи́вся,/ я́коже ино́го Голиа́фа, кня́зя тьмы, гордя́щася, низложи́л еси́, иера́рше, дави́дски/ и Боже́ственною ве́рою твое́ю.

Богоро́дичен: Наде́жда и предста́тельство ми́ра, Богоро́дице,/ моли́ из Тебе́ Воплоще́ннаго о рабе́х Твои́х,/ Тя бо свято́е очисти́лище стяжа́вше, от греха́ избавля́емся.

Песнь 5

Ирмо́с: От но́щи неве́дения/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Тя, я́ко чистоты́ столп и целому́дрия ключ, приснопа́мятне, ве́дуще вси,/ да улучи́м у́бо ми́лость моли́твами твои́ми.

Богови́дным прозре́нием во свяще́нный оде́ялся еси́ чин,/ Непоро́чней Де́ве я́ко непоро́чна тя в сие́ призва́вшей.

Ми́лости щедро́тство всажде́но име́я и всегда́ соживу́що,/ был еси́ ни́щим бога́тныя пи́щи де́лателище.

Богоро́дичен: Небе́снаго Влады́ку во утро́бе заче́нши, Всенепоро́чная,/ была́ еси́ вы́шши Небе́с и всея́ тва́ри.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Дух Всесвяты́й в тебе́ обре́т селе́ние,/ духо́в лука́вых отгна́в легео́ны моли́твами твои́ми.

Тишины́ яви́лся еси́ река́ и струя́ кро́тости,/ от ни́хже напая́емся пото́ка сла́дости, преподо́бне о́тче.

Умертви́в плотски́я сла́сти, ду́хом ожи́л еси́,/ и мене́ же, страстьми́ па́дшаго, возста́ви, сла́вне.

Богоро́дичен: Сло́во во утро́бе, и́же от Отца́ безле́тно возсия́вша,/ в ле́то зачала́ еси́ Бо́га Сло́ва/ па́че сло́ва, Присноде́во.

Песнь 7

Ирмо́с: О́троки ороси́вый в пещи́/ и Де́ву сохрани́вый,/ ро́ждшую Тя, по рождестве́,/ благослове́н еси́, Бо́же оте́ц на́ших.

Осия́нием Ду́ха Боже́ственнаго,/ е́же отсю́ду проразуме́л еси́ к лу́чшим преста́вление твое́,/ и ны́не лику́еши, преподо́бне, во о́нех оби́телех.

Я́ко звезде́, я́вльшуся тебе́,/ житие́м и заре́ю Боже́ственною чу́вствы просвеще́нну,/ преставле́ние, преподо́бне, твое́ звезда́ провозвести́.

В черто́г Вы́шняго Ца́рствия, оде́ян, вшел еси́ досто́йно/ и восклони́вся с Женихо́м, преподо́бне,/ на трапе́зе невеще́ственныя сла́дости.

Богоро́дичен: Небе́сныя Тя си́лы, я́ко Ма́терь Жи́зни всех,/ по до́лгу дорино́сят и воспева́ют, Влады́чице,/ я́ко Предста́тельство душ на́ших.

Песнь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Богоуправля́емое име́я се́рдце,/ страсте́й мои́х мра́чную, о́тче, отжени́ бу́рю/ и ко приста́нищу тишины́ твоея́ наста́ви.

Насажде́н при Боже́ственных исхо́дищах любве́ вод,/ дре́во жи́зни возрасти́/ и плоды́ благоче́стия во вре́мя отда́л еси́.

Я́ко врач неисце́льных неду́гов/ и отгони́тель нечи́стых духо́в, блаже́нне Гео́ргие,/ и моего́ греха́ неду́г уврачи́.

Богоро́дичен: Кто изрече́т Боже́ственное рождество́ Твое́, Богороди́тельнице Мари́е?/ Вся́ко бо естество́ диви́тся земноро́дных и А́нгел,/ и Тя ублажа́ют.

Песнь 9

Ирмо́с: Проявле́нное на горе́ законополо́жнику во огни́ и купине́/ рождество́ Присноде́вы/ в на́ше ве́рных спасе́ние/ пе́сньми немо́лчными велича́ем.

Твои́х слез исто́чники безстра́стия возде́лал еси́, преподо́бне, рай непоро́чно/ и многооби́лен плод изно́сиши,/ пита́я доброде́тельми Боже́ственное ста́до.

Ты чи́сто Бо́гу прине́сл еси́ служе́ние/ и, ве́ры, преподо́бне, тече́ние соверши́в,/ ны́не прия́л еси́ вене́ц пра́вды из руки́ Христа́ Подвигополо́жника.

Днесь игра́ет и лику́ет ве́рных мно́жество,/ мона́хов стада́, свяще́нников собо́ри:/ тя бо вси о́браз спасе́ния обрето́ша, и пра́вилу изображе́ние.

Богоро́дичен: Богому́жно Твое́ рождество́, Всенепоро́чная Отрокови́це,/ я́ко Бо́га су́ща и Зижди́теля веко́в моля́щи не оскудева́й непреста́нно,/ спасти́ ду́ши воспева́ющих Тя.

Преподобный Георгий, митрополит Митиленский, с юности вел монашеский образ жизни. В царствование Льва Исаврянина (716–741) святой претерпел гонения от иконоборцев и получил именование Исповедника. В годы царствования Константина Порфирородного (780–797) святой Георгий был возведен на архиерейскую кафедру города Митилена, расположенного на острове Лесбос. Жизнь святителя сияла целомудрием и чистотой и была подобна жизни Ангельской. Он имел дар чудотворения, изгонял нечистых духов и исцелял неизлечимые болезни. Святитель отличался милосердием, щедро помогал всем нуждающимся. В конце своей жизни в 815 году, во время царствования иконоборца Льва Армянина (813–820), святой архипастырь был изгнан и сослан в Херсонес, где и скончался после 820 года. В час его кончины над городом Митилена на небе воссияла яркая звезда.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 6:

Трисве́тлаго Божества́ заря́ми просвеща́емь,/ преподо́бне Дании́ле,/ озари́л еси́ ве́рных сердца́/ сло́вом и́стины и непоро́чным житие́м./ Просвети́ у́бо и нас,/ любо́вию чту́щих тя.

Благода́тию Ду́ха Свята́го озаря́емь,/ от ю́ности Бо́га возлюби́л еси́, преподо́бне:/ крест бо взем, после́довал еси́ Христу́./ Того́ моли́ о хва́лящих тя.

Мир оста́вив и вся кра́сная его́ презре́в,/ Христо́ви сраспя́лся еси́,/ неукло́нно к Тому́ зря, о́тче Дании́ле./ К Тому́ и на́ша сердца́ напра́ви,/ плене́нныя страстьми́.

Сла́ва, глас 2:

Прииди́те, по́стник сосло́вие/ и христолюби́вии лю́дие,/ днесь восхва́лим блаже́ннаго отца́,/ и́ноков вои́стинну украше́ние/ и похвалу́ земли́ Росси́йстей,/ па́мять его́ духо́вно пра́зднующе/ и с ли́ки святы́х А́нгел похваля́юще Христа́,/ просла́вльшаго Своего́ уго́дника,/ при́сно моля́щагося о душа́х на́ших.

И ны́не, Богоро́дичен:

Ра́дуйся, Мари́е Богоро́дице,/ хра́ме неразруши́мый,/ па́че же святы́й,/ я́коже вопие́т проро́к:/ свят храм Твой,/ ди́вен в пра́вде.

На стихо́вне стихи́ры, глас 2.

Подо́бен: До́ме Евфра́фов:

Дом Ду́ху Пресвято́му,/ о́тче преподо́бне, был еси́/ и, стра́сти умертви́в,/ де́монския полки́/ победи́л еси́.

Стих: Честна́ пред Го́сподем/ смерть преподо́бных Его́.

Дом прече́стен/ во сла́ву Святы́я Тро́ицы/ воздви́гл еси́,/ собра́в и́нок мно́жество,/ вы́ну моли́ о пою́щих тя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Приста́нище благоути́шно/ духо́вным твои́м ча́дом был еси́,/ кро́тко тех наставля́я/ к све́ту Богоразу́мия,/ блаже́нне.

Сла́ва, глас 8:

Днесь гра́да Пересла́вля лю́дие духо́вно торжеству́ют,/ зря́ще блаже́ннаго отца́,/ побе́дным венце́м от Бо́га венча́нна,/ и си́це, похваля́юще, воспева́ют:/ ра́дуйся, свяще́нная главо́,/ благоути́шное на́ше по Бо́зе приста́нище,/ не премолчи́, о нас моля́ся ко Го́споду.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 1.

Подо́бен: Прехва́льнии му́ченицы:

Днесь град Пересла́вль тобо́ю хва́лится,/ о́тче наш Дании́ле,/ в нем бо, яко со́лнце, оте́честву твоему́ возсия́л еси́/ благода́тию нетле́ния и чуде́с./ Бу́ди у́бо вы́ну пред Бо́гом хода́тай нам/ и испроси́ душа́м на́шим мир и ве́лию ми́лость.

Безстра́стия рачи́тель быв в житии́ твое́м/ и по́двиги по́стными себе́ украси́в,/ Христу́ сообра́зен был еси,/ Его́же моли́, преподо́бне,/ дарова́ти душа́м на́шим мир и ве́лию ми́лость.

Стра́сти умертви́в, неви́димых враг полки́ победи́л еси́,/ просвети́в же у́мныя о́чи се́рдца,/ Боже́ственных виде́ний сподо́бился еси́./ Просвети́ у́бо и на́ша очеса́ серде́чныя,/ во е́же ви́дети и возвеща́ти/ чу́дный свет ве́ры Правосла́вныя/ и просла́вити Отца́ на́шего Небе́снаго,/ ча́юще от Него́ ми́ра и ве́лия ми́лости.

Чу́дный свет ви́дел еси́, преподо́бне,/ а́ки мно́гим свеща́м, горя́щим ту,/ иде́же погреба́л еси́ стра́нныя,/ отню́дуже разже́гся Боже́ственною ре́вностию,/ храм на ме́сте том воздви́гл еси́,/ во е́же моли́тися о них./ Ны́не же и о нас моли́ся ко Го́споду,/ да пода́ст душа́м на́шим мир и ве́лию ми́лость.

Возде́я преподо́бныя ру́це/ и преклоня́я коле́на твоя́,/ приле́жно к Бо́гу моли́лся еси́/ не то́чию о спасе́нии твое́м и бра́тии твоея́,/ но и о устрое́нии всего́ ми́ра/ и благостоя́нии святы́х Бо́жиих церкве́й,/ те́мже и о нас помоли́ся ко Го́споду, я́ко о твое́м ста́де,/ дарова́ти душа́м на́шим мир и ве́лию ми́лость.

Сла́ва, глас 5:

Прииди́те, христоимени́тии лю́дие,/ восхва́лим преподо́бнаго отца́ на́шего Дании́ла,/ в после́дняя ле́та нам возсия́вшаго/ и чуде́с заря́ми мир озари́вшаго,/ и возопии́м к нему́, глаго́люще:/ ра́дуйся, па́стырю и учи́телю наш;/ ра́дуйся, покро́ве и прибе́жище духо́вным ча́дом твои́м;/ ра́дуйся, гра́ду на́шему/ похвало́ и утвержде́ние.

И ны́не, Богоро́дичен: В Чермне́м мо́ри:

Вход. Проки́мен дне. И чте́ния преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, суди́и конце́в земли́./ Внуши́те, держа́щии мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шник преста́влен бы́сть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 2:

О́тче преподо́бне Дании́ле,/ от ю́ности Христу́ после́довати потща́лся еси́,/ поревнова́в бо преподо́бному Симео́ну Сто́лпнику,/ у́жем ³ влася́ным те́ло обви́,/ че́рвие же, яко би́серие, себе́ вмени́в,/ со благодаре́нием страда́льчески терпе́л еси́./ Моли́ся о душа́х на́ших.

О́тче преподо́бне Дании́ле,/ Христо́вою любо́вию распала́емый,/ а́ще и боле́зненно терпе́л еси́ отъя́тие у́жа,/ блага́го же изволе́ния не отре́клся еси́:/ ну́ждно роди́телие отторго́ша у́же от многострада́льнаго те́ла твоего́,/ любве́ же, я́же ко Христу́, отъя́ти не возмого́ша,/ Ему́же приле́жно моли́ся о душа́х на́ших.

О́тче Дании́ле,/ оте́чество твое́, град Пересла́вль, иногда́ оста́вив,/ водвори́лся еси́ в пусты́ни, ча́я Бо́га;/ дости́г же оби́тели преподо́бнаго Пафну́тия,/ прия́л еси́ от руку́ его́ А́нгельский о́браз,/ еще́ же и преподо́бнаго Левки́я пусты́нника учени́к был еси́./ С ни́миже ны́не моли́ся Христу́/ спасти́ся душа́м на́шим.

Сла́ва, глас 8:

Ра́дуйся, преподо́бным сожи́телю,/ пусты́нником собесе́дниче,/ земны́й А́нгеле, Небе́сный челове́че,/ послуша́ния ревни́телю и чистоты́ рачи́телю,/ вдови́цам и сирота́м прибе́жище,/ до́брый вои́стинну и безме́здный врачу́/ и всех, притека́ющих к тебе́, хода́таю,/ не премолчи́, о нас моля́ся ко Го́споду.

И ны́не, Богоро́дичен:

Ра́дуйся, вселе́нныя похвало́;/ ра́дуйся, хра́ме Госпо́день;/ ра́дуйся, горо́ приосене́нная;/ ра́дуйся, всех прибе́жище;/ ра́дуйся, све́щниче златы́й;/ ра́дуйся, Мари́е, Ма́ти Христа́ Бо́га;/ ра́дуйся, Боже́ственная трапе́зо;/ ра́дуйся, всех упова́ние.

На стихо́вне стихи́ры, глас 1.

Подо́бен: Небе́сным чино́м:

Ревни́телю благоче́стия,/ изря́дный де́лателю виногра́да Христо́ва,/ о́тче преподо́бне,/ доброде́телей исправле́ния яви́в,/ наста́вник и́ноком был еси́,/ не преста́й моля́ся о чту́щих тя.

Стих: Честна́ пред Го́сподем/ смерть преподо́бных Его́.

Сосу́д че́стен Уте́шителя Свята́го Ду́ха был еси́,/ А́нгелом собесе́дниче,/ во пло́ти бо сый, Безпло́тных житие́м пожи́л еси́,/ озаря́яся Боже́ственною благода́тию./ Ми́лостивно избавля́й нас от бед/ твои́ми моли́твами.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Соизволе́нием преподо́бных твои́х наста́вник/ па́ки прише́л еси́ в оте́чествие твое́,/ не ми́ра мудрова́ние гоня́,/ но послужи́ти хотя́ гра́ду,/ в не́мже роди́лся и воспита́лся еси́,/ той и ны́не спаса́й моли́твами твои́ми.

Сла́ва, глас 3:

Ка́ко не диви́мся/ Богому́дрому твоему́ житию́, о́тче Дании́ле,/ ты бо победи́тель страсте́й и безпло́тных враг низложи́тель показа́лся еси́,/ и, на ра́мена своя́ усо́пших стра́нных, на распу́тиих пове́рженных,/ телеса́ взима́я,/ со псалмопе́нием в скуде́льнице погреба́л еси́,/ и оби́тель над мощми́ их во сла́ву Святы́я Тро́ицы воздви́гл еси́./ Сего́ ра́ди мо́лим тя:/ и нас, чад твои́х, не забу́ди,/ при́сно моля́ся о душа́х на́ших.

И ны́не, Богоро́дичен.

Тропа́рь, глас 3:

От ю́ности, блаже́нне,/ всего́ себе́ Го́сподеви возложи́в,/ вы́ну повину́яся Бо́гу,/ проти́вяся же диа́волу,/ стра́сти грехо́вныя победи́л еси́,/ тем сам храм Бо́жий быв,/ и оби́тель кра́сну во сла́ву Пресвяты́я Тро́ицы воздви́гнув,/ и со́бранное тобо́ю в ней ста́до Христо́во/ богоуго́дно упа́с,/ преста́вился еси́ к ве́чным оби́телем,/ о́тче Дании́ле./ Моли́ Триипоста́снаго во Еди́ном Существе́ Бо́га/ спасти́ся душа́м на́шим.

Сла́ва, и ны́не, Богоро́дичен: Тя, хода́тайствовавшую спасе́ние ро́да на́шего:

НА У́ТРЕНИ

На Бог Госпо́дь: тропа́рь преподо́бнаго, дважды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Угоди́ти хотя́ Христу́ Бо́гу,/ разли́чными доброде́тельми, я́коже драги́м ка́мением, себе́ украси́л еси́, преподо́бне,/ и, ева́нгельски после́довав Христу́,/ кра́сная ми́ра сего́ уме́ты бы́ти вмени́./ Те́мже со А́нгелы на Небесе́х водворя́яся/ и Святе́й Тро́ице предстоя́,/ непреста́нно моли́ о всех нас.

Сла́ва, и ны́не, Богоро́дичен:

Безневе́стная Богоро́дице Де́во,/ еди́на ве́рных Предста́тельнице,/ бед и скорбе́й вся изба́ви, на Тя упова́ние иму́щия,/ и ду́ши на́ша спаси́ моли́твами Твои́ми.

По 2-м стихосло́вии седа́лен, глас 2:

Го́рдаго велиа́ра смиренному́дрием победи́л еси́,/ благода́ть разсужде́ния духово́м стяжа́в,/ ду́хом же впери́в себе́ к Небе́сным,/ воздви́гни и нас всех к све́ту Богоразу́мия, блаже́нне,/ и моли́ спасти́ся душа́м на́шим.

Сла́ва, и ны́не, Богоро́дичен:

Милосе́рдия су́щи исто́чник,/ ми́лости сподо́би нас, Богоро́дице,/ при́зри на лю́ди согреши́вшия,/ яви́ я́ко при́сно силу́ Твою́:/ на Тя бо упова́юще, ра́дуйся, вопие́м Ти,/ я́коже иногда́ Гаврии́л, Безпло́тных Архистрати́г.

По полиеле́и седа́лен, глас 3:

Боже́ственною ре́вностию разже́гся,/ о́браз и пра́вило и́ноком был еси́:/ до́бре ста́до Христо́во упа́сл еси́/ и чистоте́ А́нгельскаго жития́ духо́вная ча́да твоя́ научи́./ Но я́коже о них, та́ко и о нас Христу́ Бо́гу моли́ся/ и испроси́ нам ве́лию ми́лость.

Сла́ва, и ны́не, Богоро́дичен:

О́тча не́дра не отлу́чся,/ плоть бысть во чре́ве Твое́м Бог Сло́во,/ Иже по рождестве́ Ма́терь Тя Де́ву, я́ко пре́жде рождества́, сохрани́в нетле́нну./ Того́ приле́жно моли́ дарова́ти нам ве́лию ми́лость.

Степе́нна, 1-й антифо́н 4-го гласа. Проки́мен, глас 4: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Всякое дыхание: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Мзда твоя́ мно́га на Небесе́х,/ я́ко возлюби́л еси́ мно́го,/ мно́гими по́двиги восходя́ к Бо́гу,/ к Нему́же и прибли́жився, призира́й на лю́ди,/ тре́бующия от Бо́га ми́лости, блаже́нне.

Кано́н Богоро́дичен со ирмосо́м на 6 и преподо́бному на 8. Кано́н преподо́бному, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь, сла́вно бо просла́вися.

Распали́лся еси́ к Бо́гу жела́нием/ и на вся́кое вре́мя ум име́л еси́ к Нему́ впере́н, преподо́бне,/ вы́ну ⁴ возводи́л еси́ к Тому́ о́чи твои́, поя́:/ препросла́вленный Госпо́дь, сла́вно бо просла́вися.

Поревнова́в Симео́ну Сто́лпнику,/ у́жем влася́ным те́ло обви́/ и от него́ че́рвие, я́ко би́серие, вмени́,/ наде́ждою же бу́дущих благ укрепля́яся, к Бо́гу вы́ну взыва́ше:/ препросла́вленный Госпо́дь, я́ко просла́вися.

Страстьми́ содержи́ми, мо́лим тя, преподо́бне,/ сокруши́ти ты́я помози́ нам/ и от бед изба́ви ны.

Ду́хом горя́ще, ча́да твоя́, мо́лим тя:/ к ти́хому приста́нищу нас возведи́/ и лю́тых обстоя́ний свободи́.

Напра́ви ны на путь покая́ния/ и на стези́ жи́зни Богоуго́дныя наста́ви,/ мо́лим тя, о́тче Дании́ле.

Богоро́дичен: Пречи́стая Богоро́дице,/ утиши́ боле́зни се́рдца моего́,/ Христа́ безболе́зненно па́че ума́ и сло́ва ро́ждшая.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Просвети́ся житие́ твое́, блаже́нне,/ и посреде́ оте́ц преподо́бных, я́ко со́лнце, возсия́л еси́,/ ревнова́в их чу́дным подвиго́м.

По двоюна́десяте ле́ту послуша́ния твоего́/ па́ки град Пересла́вль прише́ствием твои́м освяти́л еси́/ и был еси́ ему́ во утвержде́ние.

Ты на́ше утвержде́ние, о́тче Дании́ле,/ утверди́ у́бо нас в де́лании за́поведей Христо́вых,/ да пое́т тя дух наш.

Мо́лим тя, о́тче Дании́ле,/ озло́бленных нас от бед свободи́/ и ми́рное житие́ на́ше устро́й моли́твами твои́ми.

Ско́рый нам помо́щниче и до́брый наш врачу́,/ преподо́бне о́тче,/ теле́сныя же и душе́вныя на́ша неду́ги уврачу́й.

Богоро́дичен: Укроти́ неуста́вное ⁵ мои́х помышле́ний, Де́во Влады́чице Чи́стая,/ и отыми́ от души́ печа́ль,/ Я́же всех Ра́дость ро́ждшая.

Седа́лен, глас 3:

При́сно пеки́йся о доброде́телех,/ жела́ние имел еси́, преподо́бне, е́же Безкро́вней Же́ртве вы́ну соверша́тися/ над погребе́нными тобо́ю мощми́ стра́нных;/ трие́ же и́ноцы совеща́ша ти о триле́тнем отложе́нии того́,/ и́хже сове́та любе́зно послу́шав,/ воздви́гл еси́ це́рковь, при́сно Бо́гу моля́ся./ Моли́ у́бо и о нас,/ да спасе́т Госпо́дь ду́ши на́ша.

Слава, и ныне, Богородичен:

Прибе́жище и си́ла нам еси́, Богоро́дице,/ кре́пкая ми́ру Помо́щнице,/ моли́твами Твои́ми спаси́ рабы́ Твоя́.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Пеку́щу ти ся, преподо́бне, о зда́нии це́ркве,/ Боже́ственный свет, а́ки от мно́жества свещ, над мощми́ стра́нных ви́дел еси́ и взыва́л еси́:/ сла́ва си́ле Твое́й, Го́споди.

Боже́ственнаго светоявле́ния сподо́бився,/ благо́е наме́рение и жела́ние о зда́нии це́ркве/ ди́вным трие́м стра́нником откры́л еси́, преподо́бне,/ ти́и же три ле́та пожда́ти совеща́ша./ По сих же наде́ждою на Бо́га утверди́вся,/ во благовре́мении храм созда́л еси́, вопия́:/ сла́ва си́ле Твое́й, Го́споди.

Стра́нных прие́мля и сам взыску́я Небе́снаго Иерусали́ма,/ о́нех ди́вных стра́нников во исхо́де души́ от те́ла твоего́ ви́дел еси́, преподо́бне о́тче, и вопия́ше:/ сла́ва си́ле Твое́й, Го́споди.

Страсте́й на́ших смуще́ние и бу́рю прегреше́ний утиши́, преподо́бне о́тче,/ да послу́жим Бо́гу в преподо́бии и и́стине.

Услы́ши нас, преподо́бне, уми́льно призыва́ющих тя,/ и подража́тели сотвори́ доброде́телей твои́х,/ да, спаса́еми тобо́ю, вни́дем в ра́дость Го́спода на́шего.

Стена́ и утвержде́ние бу́ди нам, о́тче Дании́ле,/ вся́ких враг избавля́я нас и богоуго́дно пожи́ти наставля́я,/ в насле́дие жи́зни ве́чныя.

Богоро́дичен: Пречи́стая Богоневе́сто, Влады́чице ми́ра,/ Ты мя спаси́, от бед пременя́ющи/ и страсте́й молву́ отгоня́ющи.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Просвеще́ния от Боже́ственныя благода́ти ища́й/ и чи́сто имы́й душе́вное о́ко,/ к Отцу́ све́тов вопия́ше:/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Священнои́нок не́кий, слы́шав пречу́ден звон/ на ме́сте, иде́же оби́тель хотя́ше бы́ти,/ и ви́дев у́мныма очи́ма мно́гия служб монасты́рских сосу́ды,/ пове́да ти сия́;/ ты же, ра́дуяся, блаже́нне, Царю́ сил вопия́ше:/ ино́го, ра́зве Тебе́, бо́га не зна́ю.

Вельмо́жа при́сная обои́ бра́та, во опа́ле ца́рстей бы́вша,/ моли́твами твои́ми, блаже́нне, па́ки ми́лостивно от царя́ честь получи́ста/ и наказу́ема от Тебе́ доброде́тельному житию́, к Бо́гу зовя́ста:/ ино́го, ра́зве Тебе́, бо́га не зна́ем.

Имы́й дерзнове́ние к Бо́гу,/ умоли́, преподо́бне о́тче,/ от наве́т вра́жиих изба́витися нам.

Благ быва́я живы́м, и над мертвеца́ми не возбрани́л еси́ благода́ти:/ тех бо собира́я, че́стне погреба́л еси́,/ я́ко у́ды Христо́вы.

Благ и ми́лостив сый, преподо́бне,/ благода́ть и ми́лость у Бо́га обре́л еси́,/ и́хже и нас о́бщники соде́лай твои́ми, блаже́нне, моли́твами.

Богоро́дичен: Неду́гующую ду́шу мою́ исцели́,/ ро́ждшая всех Взе́млющаго неду́ги,/ Пресвята́я Влады́чице.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Человеколю́бию Тови́та подража́яй,/ о погребе́нии стра́нных промышля́ше/ и на свою́ ра́му ты́я ноша́ше.

От сподо́бльшейся светоявле́ния/ и в скуде́льницу прише́дшей жены́,/ слы́шав о виде́нии е́ю мно́жества горя́щих свещ,/ уразуме́л еси́, преподо́бне,/ я́ко Бог благоволи́т о ме́сте,/ иде́же оби́тель твою́ созда́л еси́.

Я́ко Богосве́тлое свети́ло, на тве́рди це́ркве сия́ющее,/ ве́рных сердца́ озари́л еси́, преподо́бне, све́том Богоразу́мия.

Ми́лостивно при́зри на предстоя́щия ти, о́тче Дании́ле,/ и от напа́стей и печа́лей сохрани́ нас.

Ум наш освяти́ и просвети́ све́том за́поведей Христо́вых/ и мы́слити поле́зная всегда́ наста́ви ны.

К тебе́ припа́дающе, усе́рдно и со слеза́ми вопие́м, блаже́нне:/ умоли́ Влады́ку Христа́ мир ста́ду твоему́ дарова́ти.

Богоро́дичен: Вопие́м Ти вси, и́стинней Богома́тери:/ прогне́вавшия Бо́га рабы́ Твоя́ гее́нны изба́ви,/ ма́тернее дерзнове́ние к Сы́ну Твоему́ иму́щая.

Конда́к, глас 8:

Невече́рняго Све́та пресве́тлое свети́ло,/ жития́ чистото́ю просвеща́ющее всех,/ яви́лся еси́, о́тче Дании́ле:/ о́браз бо и пра́вило и́ноком был еси́,/ сирота́м же оте́ц и пита́тель вдови́цам./ Сего́ ра́ди и мы, ча́да твоя́, вопие́м ти:/ ра́дуйся, ра́досте и ве́нче наш;/ ра́дуйся, мно́гое имы́й к Бо́гу дерзнове́ние;/ ра́дуйся, гра́ду на́шему ве́лие утвержде́ние.

И́кос:

Ди́вен на земли́ А́нгелом показа́лся еси́/ и челове́ком пресве́тлое свети́ло, блаже́нне, был еси́./ Те́мже, ра́дуйся, и мы тебе́ усе́рдно зове́м:/ ра́дуйся, бесо́вския полки́ до конца́ низри́нувый и стра́шен тем бы́вый;/ ра́дуйся, над страстьми́ воцари́выйся./ Ра́дуйся, прекра́сный до́ме Святы́я Тро́ицы;/ ра́дуйся, неукло́нно ше́ствовавый стезе́ю к Безсме́ртному животу́./ Ра́дуйся, вдови́цам, и сирота́м, и всем, су́щим в напа́стех, помо́щниче;/ ра́дуйся, и́стинный вождю́, духо́вных твои́х чад направля́яй на путь спасе́ния./ Ра́дуйся, до́брый па́стырю, подража́вый Пастыренача́льнику Спа́су Христу́;/ ра́дуйся, предста́телю за ны Христу́ Бо́гу на́шему./ Ра́дуйся, Росси́йстей стране́ и гра́ду на́шему утвержде́ние.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

В по́двизех по́стных просия́вый, преподо́бне,/ безстра́стие стяжа́л еси́, поя́:/ благослове́н Бог оте́ц на́ших.

Кре́пкаго подви́жника огнь страсте́й не опали́,/ но Боже́ственная благода́ть ороси́ и све́тла житие́м показа́, зову́ща:/ благослове́н Бог оте́ц на́ших.

Не на песце́ суеты́ мирски́я,/ но на ка́мени ве́ры основа́ние положи́в, блаже́нне,/ во сла́ву Святы́я Тро́ицы оби́тель созда́/ и духо́вная твоя́ ча́да зва́ти научи́:/ благослове́н Бог оте́ц на́ших.

Послуша́нием и милосе́рдием, посто́м же и моли́твою Бо́гу благоугоди́л еси́:/ сего́ ра́ди просла́ви тя пред А́нгелы и челове́ки благослове́нный Бог оте́ц на́ших.

Услы́ши нас, чад твои́х, моля́щих ти ся,/ и ви́димых и неви́димых враг изба́ви,/ да моли́твами твои́ми дерзнове́ния сподо́бимся, е́же зва́ти:/ оте́ц на́ших Бо́же, благослове́н еси́.

Теле́сныя и душе́вныя на́ша не́мощи, любо́вию притека́ющих к тебе́,/ исцели́ти сподо́би, преподо́бне о́тче, да с тобо́ю зове́м:/ оте́ц на́ших Бо́же, благослове́н еси́.

Богоро́дичен: Прему́дрости испо́лни всех и кре́пости Боже́ственныя,/ Ипоста́сная прему́дросте Вы́шняго,/ Богоро́дицы ра́ди, ве́рою вопию́щих:/ оте́ц на́ших Бо́же, благослове́н еси́.

Песнь 8

Ирмо́с: В пе́щь о́гненную ко отроко́м евре́йским снизше́дшаго,/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Огне́м Боже́ственныя любве́ попали́л еси́ плотски́я стра́сти/ и обрати́л еси́ в бе́гство де́монская ополче́ния, зовы́й:/ по́йте, вся дела́, Го́спода и превозноси́те Его́ во ве́ки.

Прославля́яй избра́нныя Своя́, Бог/ просла́ви и тебе́, преподо́бне,/ чи́стаго ра́ди жития́ твоего́,/ и, я́ко свети́ло, показа́л еси́, при́сно осиява́ющее ве́рою зову́щих:/ по́йте, вся дела́, Го́спода и превозноси́те Его́ во ве́ки.

Дале́че изы́де свята́го и́мене твоего́ сла́ва, преподо́бне,/ и всем на по́льзу был еси, зря́щим тя:/ всех бо науча́л усе́рдно воспева́ти Го́спода/ и превозноси́ти Его́ во ве́ки.

Моле́бно притека́ющии к моще́м твои́м, преподо́бне,/ по́мощи от Тебе́ про́сим,/ пою́ще и превознося́ще Христа́ во ве́ки.

Неможе́ние душ на́ших и теле́сныя боле́зни исцели́, преподо́бне,/ и научи́ нас прославля́ти Христа́ во ве́ки.

От Всесвята́го Ду́ха, блаже́нне, бога́тую благода́ть прие́мь,/ исцеля́еши ве́рою пою́щия и превознося́щия Христа́ во ве́ки.

Богоро́дичен: Напа́стей Ты прило́ги отгоня́еши/ и страсте́й нахо́ды, Де́во,/ те́мже Тя пое́м во вся ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Христу́, Сыну Бо́жию, ве́рою послужи́л еси́, преподо́бне,/ сего́ ра́ди Оте́ц Небе́сный оби́тель у тебе́ сотвори́л есть,/ с Ним и Пресвяты́м Свои́м Ду́хом.

Аще и почте́н был еси́, преподо́бне, от вели́каго кня́зя, я́ко восприе́мник чад его́,/ оба́че кро́ток и смире́н был еси́,/ коего́ждо че́стию бо́льша себе́ творя́.

И́стинный учени́к был еси́ Спа́са Христа́,/ нищету́ духо́вную возлюби́в,/ сла́ву же ве́ка сего́ нивочто́же вмени́в,/ тем тя при́сно ублажа́ем.

То́ка слез на́ших не отврати́ся, о́тче Дании́ле,/ всегда́ к Бо́гу моля́ся о чту́щих тя.

Ра́дости испо́лни сердца́ на́ша и грехо́вныя печа́ли потреби́,/ я́ко да сла́вим тя.

Благода́тными заря́ми просвети́, преподо́бне о́тче, ве́рных сердца́,/ мрак неве́дения отгоня́я от нас,/ любо́вию тя сла́вящих.

Богоро́дичен: Твоего́ несказа́ннаго рождества́ пропису́я проро́к,/ кни́гу запечатле́нну прови́де,/ ея́же никто́же разуме́/ и не пости́же та́инства вочелове́чения от Тебе́ Бо́га Сло́ва.

Свети́лен:

Воздержа́нием плоть твою́ умертви́л еси́, о́тче преподо́бне,/ труды́ же и по́двиги святу́ю твою́ жизнь украси́л еси́,/ и ны́не во све́те Святы́я Тро́ицы пребыва́я,/ разжени́ мрак душ на́ших моли́твами твои́ми.

Сла́ва, и ны́не, Богоро́дичен:

Сия́нием, Де́во, из Тебе́ возсия́вшаго Све́та/ ум мой озари́, се́рдце просвети́, тьму грехо́вную отгоня́ющи/ и мглу ле́ности моея́ потребля́ющи.

На хвали́тех стихи́ры, глас 8:

Богоно́сче преблаже́нне,/ все плотско́е мудрова́ние ду́хови повину́в,/ и стремле́ния страсте́й укроти́в,/ был еси прия́телище Пресвята́го Ду́ха,/ собра́в же и́ночествующих мно́жество уче́ньми твои́ми,/ я́ко ле́ствицею восхо́дною,/ на высоту́ доброде́телей возве́л еси́ я./ Помина́й у́бо и нас, преподо́бне о́тче, чту́щих тя.

Днесь возсия́ пресве́тлая па́мять твоя́,/ созыва́ющи многочи́сленное по́стник сосло́вие/ и преподо́бных ликостоя́ния,/ днесь А́нгели и че́ловеки, торжеству́юще,/ восхваля́ют просла́вльшаго тя Го́спода;/ те́мже и мы, притека́юще к моще́м твои́м,/ исцеле́ний да́ры оби́льно прие́млем/ и венча́вшаго тя Христа́ сла́вим,/ Спа́са душ на́ших.

Измла́да возлюби́в Христа́ Бо́га на́шего,/ не дал еси́ сна очи́ма твои́ма,/ ни ве́ждома дрема́ния/ и вся́кую доброде́тель и пра́вду,/ я́же подоба́ет святы́м, соблю́л еси́,/ све́тел яви́вся о́браз ста́ду твоему́./ Сего́ ра́ди тя вси, преподо́бне, ублажа́ем.

Сла́ва, глас 4:

Преподо́бне о́тче Дании́ле,/ измла́да в доброде́телех подвиза́вся,/ был еси́ сосу́д че́стен Бо́жия благода́ти,/ источа́яй чудеса́ исцеле́ний/ с любо́вию чту́щим святу́ю па́мять твою́;/ сего́ ра́ди и мы, ча́да твоя́,/ усе́рдно вопие́м ти, глаго́люще:/ ра́дуйся, освяще́нная главо́;/ ра́дуйся, гра́ду на́шему похвало́ и утвержде́ние./ Приле́жно моли́ся Христу́ Бо́гу/ о спасе́нии душ на́ших.

И ны́не, Богоро́дичен, глас тойже:

Ра́дуйся, Свята́я Богоневе́сто;/ ра́дуйся, Свет ми́рови ро́ждши ве́рным;/ ра́дуйся, стено́ и покро́ве всех нас,/ Бо́га, яко Благода́теля,/ за ны непреста́нно моли́.

Славосло́вие вели́кое. Ектении́ и отпу́ст.

НА ЛИТУРГИ́И СЛУ́ЖБА ВСЯ ПРЕПОДО́БНИЧЕСКАЯ.

МОЛИ́ТВА

О, преподо́бне и Богоно́сне о́тче наш Дании́ле, всесмире́нно к тебе́ припа́даем и тебе́ мо́лимся: не отступа́й от нас ду́хом твои́м, но всегда́ помина́й нас во святы́х и благоприя́тных моли́твах твои́х ко Го́споду на́шему Иису́су Христу́. Моли́ся Ему́, да не потопи́т нас бе́здна грехо́вная, и да не бу́дем враго́м, ненави́дящим нас, в ра́дование; да прости́т Христо́с Бог наш твои́м предста́тельством за нас вся согреше́ния на́ша, и Свое́ю благода́тию водвори́т среди́ нас единоду́шие и любо́вь, и изба́вит нас от ко́зней и наве́тов диа́вольских, от гла́да, огня́, вся́кия ско́рби и ну́жды, от боле́зней душе́вных и теле́сных и от напра́сныя сме́рти; да сподо́бит Он нас, притека́ющих к тебе́, в и́стинней ве́ре и покая́нии пожи́ти, христиа́нския непосты́дныя и ми́рныя кончи́ны живота́ на́шего дости́гнути, и насле́довати Ца́рство Небе́сное, и сла́вити Пресвято́е И́мя Его́ со Безнача́льным Его́ Отце́м и Пресвяты́м Ду́хом во ве́ки веко́в. Ами́нь.

Преподобный Даниил Переславский, в миру Димитрий, родился в 1459 году в городе Переславле-Залесском от благочестивых родителей Константина и Феодосии, в иночестве Феклы. С юных лет содействовала ему благодать Божия, проявлявшаяся в его стремлении к строгим христианским подвигам. Однажды, слушая житие преподобного Симеона Столпника, он обратил внимание на то место, где рассказывается о том, как святой обвил себя для обуздания своей плоти власяной веревкой. Отрок решил понести такой же подвиг: он отрезал конец веревки, которой рыбаки привязывали к берегу свою лодку, и обвил ею свое тело так крепко, что со временем она впилась в кожу. Раны причиняли сильные мучения юному Димитрию, но он терпеливо их сносил. Родители недоумевали о причине болезни сына и были крайне удивлены, обнаружив на спящем отроке пояс. На их вопрос, для чего он это сделал, Димитрий смиренно отвечал: «По неразумению моему». Но когда они захотели освободить сына от мук, он стал слезно умолять не снимать с него веревку и позволить ему терпеть это страдание за свои грехи. Через некоторою время отрок был отдан на воспитание в Никитский монастырь к своему родственнику игумену Ионе, где полюбил иноческое житие и сам решил стать иноком. Однако, боясь, как бы родители и родственники не помешали исполнению его намерения, он вместе со своим братом Герасимом тайно ушел в монастырь преподобного Пафнутия Боровского († 1477; память 1 мая). Здесь, приняв иноческое пострижение, преподобный Даниил под руководством опытного старца святого Левкия Волоколамского (память 17 августа) прожил десять лет. Получив навыки подвижнической жизни, опыт пустынножительства (вместе с блаженным Левкием он прожил еще два года в пустыни на реке Рузе), преподобный Даниил вернулся на свою родину в Переславль. В Успенском Горицком монастыре он принял священный сан. К святому стали многие приходить на исповедь и за духовными советами. Среди них был священник Андрей, будущий царский духовник, впоследствии – Всероссийский митрополит Афанасий (1564–1566), автор жития преподобного Даниила, написанного по благословению митрополита Макария. Как искусный врач, он исцелял душевные язвы и греховные страсти прихожан. Никто не уходил от преподобного Даниила неутешенным и без душевной пользы. Но особенно сердце его было открыто странникам и людям, удрученным различными бедствиями,– они всегда находили у него помощь и спасительное слово утешения. Как и у ветхозаветного Товии, своеобразным подвижническим проявлением заповеди любви к ближнему стала забота преподобного Даниила об умерших беспризорных, нищих, бездомных и безродных людях. Если он слышал о каком-либо человеке, погибшем в результате стихийного бедствия, от нападения диких зверей или разбойников, о внезапно умершем и брошенном на распутьи, об утопленнике и замерзшем в дороге, то всячески старался отыскать мертвое тело и даже платил немалые деньги тому, кто укажет ему, где оно лежит без погребения. Ночью втайне от других святой Даниил выходил из монастыря и по указаниям видевших отыскивал мертвецов, со слезами и молитвой относил их на своих руках в скудельницу (место общего захоронения бездомных), служил панихиду и погребал их по церковному чину, а после поминал их при совершении Божественной литургии. Призреть несчастного покойника – было истинным утешением для любвеобильной души преподобного. По ночам, смотря из келлии на скудельницу, святой Даниил думал иногда о том, сколько тайных рабов Божиих, истинных и верных христиан, лежат, быть может, на этом месте и никто не погребает их по церковному правилу, не вспоминает их в своих молитвах во время Божественной литургии. Такие мысли стали особенно часто приходить преподобному после того, как он нашел замерзшим одного странника, нередко посещавшего Горицкий монастырь и ночевавшего в его келлии, то ли немого от природы, то ли безмолвствовавшего ради Господа, и предал погребению его в скудельнице. Как бы в ответ на сердечные помышления преподобного Даниила Господь прославил место упокоения безродных людей чудными знамениями. Сам святой и многие другие не раз видели по ночам, как сиял над скудельницей Небесный свет и горели над нею свечи, не раз слышали, как доносилось оттуда пение и колокольный звон. В душе преподобного возродилось неискоренимое желание построить на месте скудельницы святой храм с тем, чтобы приносилась в нем бескровная жертва Богу и возносилась молитва о упокоении безвестно умерших христиан. Однажды в обитель пришли три чудных старца-инока, которых святой Даниил, подобно ветхозаветному Аврааму, принял как Ангелов Божиих, и у которых он по смирению своему решил взять благословение на постройку храма. Старцы отвечали ему, что если человек очень хочет совершить какое- нибудь важное и полезное дело, то святые отцы советуют ему оставить человеческое хотение и полностью предаться воле Божией, которая обязательно даст о себе знать. Преподобный Даниил последовал совету старцев, смиряя в себе все возраставшее желание сердца скорее начать строительство. Наконец, на исходе трехлетнего срока Господь неожиданно явил ему Свою благую волю. Избавленные молитвами преподобного Даниила от княжеской опалы два знатных боярина представили преподобного великому князю Василию Иоанновичу, отдавшему святому в его собственное владение скудельничью землю, и Митрополиту Московскому, благословившему на этой земле построить храм. Примерно в это же время святой Даниил нежданно получил три богатых денежных пожертвования, необходимых для начала строительства. Преподобный принял эти приношения как свидетельство того, что Господь благословил его намерение. Вскоре на месте скудельницы был устроен храм для поминовения погребенных в честь Всех святых, вокруг которого несколько монахов выстроили себе келлии, образовав таким образом небольшой монастырь. Каждый день преподобный Даниил приходил из Горицкого монастыря, в котором он еще оставался насельником, в созданную им новую обитель наставлять монахов в иноческих добродетелях, участвовать в совместных службах и строительстве новых монастырских зданий и храмов. В благоукрашении обители принимал участие Новгородский архиепископ Макарий, духовный друг преподобного, также постриженик Пафнутиево-Боровского монастыря. Не обошлись подвиги святого Даниила без тяжких искушений. Ему с братией пришлось вынести поношение, вредительство и козни со стороны местных вельмож. Не хватало средств на пропитание. Наконец и братия не выдержали и стали роптать на крайнюю скудость в пище и в одежде. Преподобный Даниил молился и утешал братию душеспасительными наставлениями, говоря, что Бог Своим неизреченным Промыслом, устрояющий все в пользу душам человеческим, не оставит монастырь, строительство которого Он Сам благословил. Так и произошло. Постепенно Даниловская обитель, которую принял под свое покровительство великий князь, стала состоятельней, а братия в ней значительно умножились. После кончины архимандрита Горицкого монастыря братия просили преподобного Даниила стать во главе обители. Он долго не соглашался, но потом, предложив инокам как условие своего настоятельства строжайший устав и получив от них обещание исполнять его, он принял это трудное послушание. Святой Даниил руководил обителью не властью, а примером своей собственной жизни и любви. Он вместе со всеми иноками носил дрова, копал землю, одевался в ту же одежду, что и послушники. В 1525 году по воле великого князя преподобный Даниил перешел настоятельствовать в свой монастырь. Одна из главных заповедей, которую преподал инокам новый настоятель, призывала, кроме постоянной молитвы о душах погребенных в скудельнице безвестных христиан, принимать всех странников, убогих и голодающих. Бедняки и нищие всегда находили в обители добрый приют и получали милостыню. Зная любовь преподобного к несчастным, многие приносили к воротам монастыря больных и увечных и оставляли их там. Святой Даниил принимал всех убогих и с радостью кормил, одевал и лечил их. Во время голода, когда в монастырской житнице оставалось хлеба на несколько дней, он отдал его нищей вдове с детьми, и с тех пор в награду за милосердие преподобного мука в житнице по воле Божией не оскудевала в продолжение всего голода. Еще при жизни преподобного авторитет его был настолько высок, что по его просьбе великий князь освобождал приговоренных к смертной казни, выделял средства на строительство и ремонт церквей в Переславле-Залесском. Великий князь, наслышанный о духовных подвигах старца, просил его дважды быть восприемником при крещении своих детей. К концу жизни святой Даниил получил от Господа дар чудотворения. Многие удивлялись его прозорливости, умению читать тайные помыслы и видеть события на расстоянии. По его молитвам больные выздоравливали, а разбойники приносили покаяние. Предчувствуя приближение кончины, преподобный Даниил постригся в великую схиму и, созвав своих учеников, дал им последнее наставление: «Отцы и братия, Богом собранное стадо! Потщитесь всеми силами сохранять Божественные заповеди и предание святых отцов; не забывайте своего обещания при пострижении, любите друг друга, носите немощи немощных, не презирайте странных и убогих, удаляйтесь всякого бесчиния и празднословия, уклоняйтесь от пьянства, особенно же храните чистоту душевную и телесную, всегда имейте в душе плач о смертном часе и о воздаянии каждому по делам его...». Перед блаженной кончиной святого Даниила в видении посетили три чудных старца-инока, некогда преподавшие ему урок смиренномудрия. Блаженный старец преставился на 81-м году своей жизни, 7 апреля 1540 года. Нетленные мощи его после неоднократных освидетельствований были торжественно открыты 30 декабря 1652 года.

Литература:

1. Основание Переславскаго Троицкаго Данилова монастыря преподобным Даниилом, Переславским чудотворцем. М. 1853.

2. Жития святых Переславских чудотворцев: Никиты Столпника, Даниила-игумена, благоверного князя Андрея и Корнилия молчальника. Вязники. 1890

3. Житие преподобного Даниила, Переславского чудотворца. Повесть о обретении мощей и чудеса его. М. 1908.

4. Служба и акафист преподобному отцу нашему Даниилу, Переславскому чудотворцу. М. 1890.