Преподо́бне о́тче Фео́доре,/ дар, Бо́гу избра́н, сам себе́ прине́сл еси́,/ бде́ние всено́щное и умиле́ние стяжа́в,/ поуче́ние Боже́ственно,/ коне́чное смире́ние,/ наде́жду, ве́ру, любо́вь нерастворе́ну,/ трезве́ние и милосе́рдие,/ и́стинное безстра́стие и моли́тву,/ столп тя показа́ша светови́днейший.

Преподо́бне о́тче Фео́доре,/ во одея́ние и́стинное/ и спасе́ния оде́жду/ благочести́вым ра́зумом ища́й оде́ятися,/ власяны́ми ру́бы всегда́/ твое́ те́ло покрыва́ти не преста́л еси́/ и обнажи́л еси́ нас обнажи́вшаго ко́зни,/ си́лою укрепля́емь,/ Боже́ственнаго Ду́ха.

Вопло́щшемуся Бо́гу на́шему/ от Де́вы Ма́тере нас ра́ди/ и обнища́вшему, я́ко нищ ду́хом,/ тебе́ сама́го прине́сл еси́,/ же́ртву жи́ву и всесожже́ние прия́тно, всеблаже́нне,/ и дар че́стен./ Те́мже прия́л еси́ Небе́сное наслажде́ние./ К Нему́же при́сно моли́ся,/ поми́ловати нас.

Сла́ва, и ны́не, Богоро́дичен:

Пло́ть от крове́й Твои́х прие́мь,/ Первове́чный Бог/ Тя Предста́тельницу показа́ челове́ком, Чи́стая./ Те́мже изба́ви рабы́ Твоя́/ от вся́кия беды́ и обстоя́ния/ и сете́й лука́ваго врага́/ и сия́ния причасти́тися сподо́би избра́нных/ Тя сла́вящия и покланя́ющияся Тебе́.

Крестобогоро́дичен:

Тя ви́дящи, пригвожда́ема/ на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне,– вопия́ше,– Ча́до сла́дкое!/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твои́м?

Кано́н, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь сла́вно бо просла́вися.

Дарова́нии Боже́ственными обога́щся,/ дар я́ко многоце́нен, Творцу́, о́тче, себе́ приве́л еси́./ Те́мже мой облагодати́ по́мысл,/ восхваля́ющу твою́ дне́сь па́мять светоно́сную и житие́ равноа́нгельное.

Я́ко напита́вся Боже́ственными добро́тами,/ взял еси́ на ра́мо твое́ по́стнически крест, Фео́доре,/ и после́довал еси́ во́льное тебе́ ра́ди Претерпе́вшему распя́тие, блаже́нне,/ стра́сти умертви́в теле́сныя.

Кре́пко, о́тче, проти́ву врага́ ополчи́вся, и, кре́стным ору́жием огражде́н,/ сего́ смири́л еси́, смири́вся и му́дре возноша́емь./ Те́мже победоно́сец яви́лся еси́ и преподо́бных равностоя́тель.

Богоро́дичен: Спа́сшиися, Де́во, Тебе́ ра́ди,/ Пренепоро́чную в жена́х и Бо́жию Роди́тельницу пе́сньми ублажа́ем,/ и почита́ем, и согла́сно зове́м:/ ра́дуйся, вино́вная пра́дедняго назда́ния.

Песнь 3

Ирмо́с: Процвела́ е́сть пусты́ня, я́ко крин, Го́споди,/ язы́ческая неплодя́щая Це́рковь/ прише́ствием Твои́м,/ в не́йже утверди́ся мое́ се́рдце.

Процве́л еси́ в поро́де воздержа́ния, преподо́бне, я́ко ши́пок благово́нен,/ сердца́ благоуха́я нам Боже́ственным твои́м житие́м, пресла́вне.

Кре́постию возмога́емь Спа́совою,/ ше́ствовал еси́ те́сным, сла́вне, жесто́ким и ско́рбным путе́м/ и к широте́ Вы́шняго Сио́на дости́гл еси́.

Ви́дится твой гроб,/ благово́нно ми́ро благода́тию источа́я, преподо́бне,/ и пропове́дует Бо́гу бы́вша тя благово́ние, о́тче свяще́нне.

Богоро́дичен: Черто́г безсме́ртия Твое́ чре́во бы́сть,/ из него́же Жени́х Госпо́дь возсия́в, Де́во Пречи́стая,/ преподо́бных лик Себе́ собра́.

Седа́лен, глас 4.

Подо́бен: Вознесы́йся:

Я́ко чист, к Чи́стому присту́пль ча́стыми моли́твами и чистото́ю,/ освяти́лся еси́ Ду́хом, Фео́доре,/ отону́дуже со А́нгелы ны́не водворя́яся, пое́ши пе́снь трисвяту́ю всех Влады́це./ Те́мже моли́, преподо́бне, Христа́/ поми́ловати любо́вию чту́щих тя.

Сла́ва, и ны́не, Богоро́дичен:

По Бо́зе во Твой, Богоро́дице,/ прибега́ю, смире́нный, покро́в Боже́ственный, припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу;/ моле́ние сотвори́, Чи́стая, к Сы́ну Твоему́ от сих изба́вити мя.

Крестобогоро́дичен:

И́же от Безнача́льнаго Отца́ рожде́ннаго напосле́док Тя пло́тию ро́ждшая,/ на Кресте́ ви́сяща, зря́щи, Христе́,/ увы́ Мне, любе́знейший Иису́се,– вопия́ше:/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́, распина́ешися?/ Пою́ Тя, Долготерпели́ве.

Песнь 4

Ирмо́с: Прише́л еси́ от Де́вы,/ не хода́тай, ни А́нгел, но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Воздержа́ния ча́стыми я́звами ура́нил еси́ стра́сти Еги́пта/ и наста́вил еси́, Фео́доре, к земли́ Небе́сней/ благоче́стно и преподо́бно после́дующия тебе́.

Истка́нии доброде́тельными соде́лал еси́, Фео́доре,/ себе́ уго́дну и чисте́йшую оде́жду,/ в ню́же оде́явся, в черто́г Вы́шний вшел еси́.

Изсуше́нием, се́туя, соверша́л еси́, Фео́доре,/ власяны́ми истка́ньми твою́ пло́ть покрыва́я,/ отону́дуже ти возсия́ мы́сленное весе́лие Боже́ственным Ду́хом.

Богоро́дичен: В час мя стра́шный, Пречи́стая, суди́ма/ спаси́ и изба́ви, гее́нны исхити́,/ я́ко да ублажа́ю Тя и по до́лгу честву́ю, Непоро́чная.

Песнь 5

Ирмо́с: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Житие́ равноа́нгельное восприе́м на земли́, преподо́бне,/ по́стнически вся́ким озлобле́нием умертви́л еси́ страсте́й воста́ния,/ Богому́дре Фео́доре.

Час Суда́ помышля́я всегда́,/ отри́нул еси́ от души́ сон уны́ния,/ у́тренюя к Бо́гу и Боже́ственною любо́вию удобря́емь.

Любя́ Вы́шния оби́тели, я́ко мона́х и́стинен,/ воздви́гл еси́ на земли́ оби́тели мона́шествующим,/ в ни́хже тобо́ю насажде́ни бы́вше почита́ют тя, преподо́бне.

Богоро́дичен: Еди́на родила́ еси́ ипоста́сную Жи́знь, Пречи́стая,/ Творца́ всех и Влады́ку,/ Его́же лю́бяще, мно́жество оте́ц преподо́бных преподо́бно пожи́ша.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Просве́щся виде́нии лу́чшими,/ от всех земны́х ду́шу обнажи́л еси́/ и о Бо́зе упраздни́лся еси́ непреста́нными поуче́нии, Фео́доре.

Све́тлаго твоего́ жития́ све́тлостию/ поднебе́сная освети́шася, блаже́нне,/ восто́чнаго со́лнца светосия́нную тя звезду́ пропове́дающе.

Мра́зом и сту́дению утесня́емь,/ и́же к Бо́гу огрева́лся еси́ манове́нии/ и зи́му отгна́л еси́ страсте́й Боже́ственною теплото́ю, Фео́доре.

Богоро́дичен: Я́ко добру́, я́ко красну́ я́вльшуюся,/ Сло́во кра́сное возлюби́, Чи́стая,/ и в Твою́ утро́бу всели́ся в на́ше, ве́рных, избавле́ние.

Конда́к, глас 4.

Подо́бен: Яви́лся еси́ дне́сь:

Яви́лся еси́ преди́вен житие́м,/ Фео́доре му́дре о́тче,/ власяны́ми ру́бы измени́в/ па́че ца́рских сокро́вищ,/ я́же на земли́,/ сего́ ра́ди небе́сную оде́жду восприя́л еси́,/ при́сно моли́ о нас, преподо́бне.

Песнь 7

Ирмо́с: Богопроти́вное веле́ние/ беззако́ннующаго мучи́теля высо́к пла́мень вознесло́ е́сть;/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Миродохнове́н был еси́ доброде́тельными твои́ми обе́ты, Фео́доре,/ и ми́ро благово́нно от честны́х твои́х моще́й/ источа́еши нам, ве́рно чту́щим тя,/ души́ и се́рдца благоуха́я, преподо́бне.

Я́ко а́гнец незло́бив, воспита́н на зла́це воздержа́ния, преподо́бне,/ всели́лся еси́ во огра́ду Небе́сную весели́тися с нача́льным Па́стырем,/ те́мже твоя́ о́вцы при́сно помина́й.

Ка́плями слез твои́х погаси́л еси́ вря́щую телесе́ пе́щь, свяще́нне,/ огне́м Боже́ственнаго Ду́ха распала́емь,/ свети́льник до́блести и свет су́щим во тьме́, о́тче, был еси́.

Богоро́дичен: Показа́ купина́ Тя, повива́ема огне́м, Пренепоро́чная, ника́коже опаля́ема у́бо,/ О́гнь бо носи́ла еси́ Божества́,/ И́же неопа́льну Тя соблюде́, Чи́стая, и по рождестве́ Де́ву нетле́нну.

Песнь 8

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте дела́, я́ко Го́спода,/ и превозноси́те во вся ве́ки.

Скве́рну отмы́л еси́ души́ сле́зными тече́нии/ и пото́к пи́щный насле́довал еси́ и кро́тких зе́млю,/ я́ко кро́ток, преподо́бне, и незло́бив, и пра́вдою я́ве укра́шен.

Сво́йственными к Бо́гу взира́нии при́сно просвеща́емь,/ непреткнове́нно премину́л еси́ стра́стныя по́мыслы и все омраче́ние теле́сное/ и к све́ту преше́л еси́ безстра́стия, о́тче.

Да и́стинному жела́нию приступи́ши, возде́ржник, и смиренному́др,/ и долготерпели́в яви́лся еси́, и ми́лостив вои́стинну,/ власяны́ми ру́бы покрыва́яся и де́монскую обнажа́я пре́лесть.

Богоро́дичен: Украси́вшися добро́тами доброде́телей/ и ря́сны преиспещре́нна златы́ми, Де́во,/ я́же па́че всех челове́к красне́йшаго Сло́ва породила́ еси́./ Его́же пое́т преподо́бных мно́жество во ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Распе́н пло́ть твою́ стра́хом Влады́ки твоего́,/ умертви́лся еси́ ми́ру, о́тче Фео́доре,/ и ны́не преше́л еси́, ра́дуяся, к жи́зни живы́х, треблаже́нне,/ прича́стием обоже́н и све́та при́сно исполня́емь.

Де́нь пра́зднственный и испо́лнен свяще́ния,/ твою́ Боже́ственную па́мять соверша́ем дне́сь:/ ты бо све́та и дне я́ко вои́стинну сын показа́лся еси́/ и во све́те невече́рнем живе́ши, ра́дуяся.

Свети́льниче светоза́рне, Бо́жия да́ра тезоимени́те,/ Богосия́нное свети́ло, невече́рняя заря́,/ доброде́телей мирополо́жниче и непрекло́нен сто́лпе мона́шествующих,/ ста́до твое́ изба́ви моли́твами твои́ми от вся́кия ско́рби.

Богоро́дичен: Све́та жили́ще чре́во Твое́ бы́сть, Де́во,/ просве́щшаго мир заря́ми Божества́,/ две́ре Со́лнца сла́вы,/ в жена́х прера́дованная, преподо́бных похвало́,/ Всесвята́я и Преблагослове́нная.

Преподобный Феодор Трихина

Преподобный Феодор Трихина родился в богатой Константинопольской семье. В юности он удалился в пустынную обитель во Фракии и принял монашество. Преподобный был строгим постником, носил только одну грубую, колючую власяницу, отчего и был прозван Трихиною, то есть «Власяничным». Этим именем был назван и монастырь, в котором он подвизался. При жизни преподобный творил много чудес и исцелений.

После смерти от его святых мощей, прославленных милостью Божией, истекало целебное миро, которое излечивало многие болезни и изгоняло нечистых духов. Время жизни преподобного Феодора неизвестно.

Преподо́бнаго Алекса́ндра Ошеве́нскаго

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 2.

Подо́бен: Ки́ими похва́льными венцы́:

Ки́ими похва́льными венцы́/ венча́ем преподо́бнаго отца́ на́шего Алекса́ндра,/ духо́вно вси достиза́юще чистоту́?/ Того́ лю́бящим и всем и́ноком предста́теля,/ и засту́пника тве́рда своему́ ста́ду,/ и всем ско́рбным уте́шителя,/ благоче́стию столпа́, ми́ру побо́рника,/ его́же ра́ди шата́ния враго́м Христо́с низложи́,/ име́яй ве́лию ми́лость.

Ки́ими пе́сньми и пе́нии/ похва́лим преподо́бнаго отца́ Алекса́ндра?/ Преподо́бным лико́м соприча́стника/ и благоче́стия побо́рника,/ це́рковь вели́каго святи́теля, чудотво́рца Нико́лы воздви́гша,/ и того́ духо́вное ста́до собра́вша, учени́к свои́х,/ и общежи́тельство в Ка́ргопольстей о́бласти устро́ивша,/ его́ же ра́ди Христо́с шата́ния вра́жия низложи́,/ име́я ве́лию ми́лость.

Ки́ими проро́ческими пе́сньми/ похва́лим преподо́бнаго Алекса́ндра?/ И́же не от Ри́ма, ни от Иерусали́ма прише́дша,/ но от зде ца́рствующаго гра́да Москвы́ дости́гша Бе́ла е́зера о́бласти,/ честна́го Успе́ния Бо́жией Ма́тери оби́тели Кири́лловы огра́ды,/ того́ уче́нию навы́кшаго,/ и отту́ду прише́дша к се́верным страна́м,/ и ви́девша та́мо лю́ди умно́жившияся,/ и общежи́тельства не бе в стране́ той,/ и пусты́ню, а́ки град, сотво́рша,/ его́же ра́ди бра́ни вра́жия Христо́с низложи́,/ име́яй ве́лию ми́лость.

Ки́ими дарми́ духо́вными и похвала́ми/ похва́лит град наш Ка́ргополь преподо́бнаго Алекса́ндра?/ Такова́ бо име́я свети́льника, в после́днем ро́де возсия́вша,/ та́ко бога́тство обре́те, не изда́вна сокрове́но,/ не под о́дром свети́ло, но на све́щнице,/ ра́ка же блаже́ннаго не от зла́та, ни от камы́к ¹⁶ драги́х светя́щися,/ но от Свята́го Ду́ха сия́ет благода́тию,/ чуде́с исцеле́ния подае́т приходя́щим с ве́рою,/ его́же ра́ди ко́зни вра́жия Христо́с низложи́,/ име́яй ве́лию ми́лость.

Сла́ва, и ны́не, глас 8:

Всечестна́я и чудотво́рная ра́ка,/ иде́же лежи́т трудолю́бное и свято́е те́ло твое́, Алекса́ндре, о́тче наш,/ исцеле́ния неоску́дна подае́т приходя́щим с ве́рою,/ душетле́нныя стра́сти исцеля́ющи,/ полки́ же бесо́вския побежда́ющи,/ тем и ста́до свое́ чудесы́ удивля́еши,/ сего́ ра́ди ра́достно, от души́ вопие́м ти:/ Богоблаже́нне, преподо́бне о́тче наш Алекса́ндре,/ моли́ Христа́ Бо́га спасти́ ны/ и ми́рови да́ти ве́лию ми́лость.

И ны́не, пра́здника.

Вход. Проки́мен дне. Чте́ния 3 преподо́бническая.

Прему́дрости Соломо́ни чте́ние (глава 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их:/ и е́же от нас ше́ствие – сокруше́ние, они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шников, проста́влен бысть./ Восхище́н бысть, да не зло́ба измени́т ра́зум его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 5):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры самогла́сны, глас 6:

Прииди́те, вси концы́ земли́,/ псалмы́ и пе́сньми свяще́нное и честно́е преподо́бнаго Алекса́ндра торжество́/ дне́сь благоче́стно восхва́лим,/ а́ще бо и последи́ возсия́,/ но дре́вних че́сти сподо́бися,/ и мо́лится Христо́ви/ спасти́ся душа́м на́шим.

Вы́шняго Про́мыслом вперя́емь,/ преподо́бне о́тче Алекса́ндре,/ воздержа́нием пи́щу Боже́ственную позна́л еси́/ и непреста́нною моли́твою и нощны́м стоя́нием/ Кири́ллу, блаже́нному своему́ учи́телю, снасле́дник бы́ти сподо́бился еси́,/ сле́зными же пото́ки бесо́вския ополче́ния погрузи́л еси́,/ тем же Христо́с тя дарова́нием чуде́с обогати́,/ Его́же возлюби́ и Его́же ра́ди тяготу́ дневну́ю поне́сл еси́,/ Того́ моли́ спасти́ся душа́м на́шим.

Преподо́бне о́тче Алекса́ндре,/ страстна́я взыгра́ния воздержа́нием изсуши́л еси́/ и Ду́ху Свято́му отсего́ жили́ще в себе́ учини́л еси́,/ с ве́рою приходя́щим подае́ши исцеле́ния,/ я́коже дре́внии отцы́, показа́шася чудесы́./ Ты же, преподо́бне, по сме́рти чудесы́ удивля́еши,/ не бо зерца́лом и гада́ньми,/ но я́сне зри́ши Святу́ю Тро́ицу,/ Ю́же моли́ и нам, ча́дом твои́м, спасти́ся/ и душа́м на́шим дарова́ти ве́лию ми́лость.

Сла́ва, глас 8:

Прииди́те дне́сь, Боголюби́вое и́нок мно́жество,/ псало́мская пе́ния и духо́вныя цве́ты своему́ отцу́ принесе́м,/ я́ко вои́стинну и́ноческому украше́нию и преподо́бным сожи́телю,/ хва́ляще, си́це рцем:/ ра́дуйся, светоза́рное свети́ло,/ приведы́й ко Христу́ и́нок мно́жество;/ ра́дуйся, гра́ду на́шему похвала́ и утвержде́ние,/ и всем ве́рным благоути́шное приста́нище,/ и очище́ние боля́щим во гресе́х,/ на Боже́ственное тех возвыша́я раче́ние./ Тем пречестны́й и святы́й твой/ и А́нгелом гове́йный обстоя́ще о́браз, ра́достно целу́юще,/ уши́ма и очи́ма прикаса́ющеся, здра́вие прие́млем, о́тче наш Алекса́ндре,/ испроси́ нам Бо́жия человеколю́бия улучи́ти/ моли́твами твои́ми, свя́те,/ и ми́ру смире́ние дарова́ти/ и душа́м на́шим ве́лию ми́лость.

И ны́не, пра́здника.

На стихо́вне стихи́ры, глас 1.

Подо́бен: Небе́сным чино́м:

Презира́тель до́льним,/ пресе́льник и рачи́тель Вы́шним/ и пусты́нный граждани́н Алекса́ндр быв Богому́дрый,/ всем нам торжествова́ти повелева́ет,/ и́же к Бо́гу отше́ствия его́/ в де́нь спаси́тельный.

Стих: Честна́ пред Го́сподем/ сме́рть преподо́бных Его́.

Вне пло́ти и ми́ра быв доброде́тельми,/ тем просла́ви Го́спода Сла́вы/ на земли́ житие́м, о́тче Богому́дре,/ по достоя́нию от Него́ просла́вися/ и исцеле́нием яви́ся Боже́ственный исто́чник,/ Алекса́ндре Богоприя́тне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Смире́н, незло́бив, кро́ток,/ прост, молчали́в, чадолюби́в оте́ц я́ко бы́сть, о́тче,/ па́че челове́ка вои́стинну невеще́ствен в вещи́,/ храм Бо́жия Ду́ха по достоя́нию яви́ся,/ и́же от Него́ пребы́вшая тебе́ дарова́ния/ ми́лостивно подае́ши ча́дом свои́м.

Сла́ва, глас 8:

Мона́хов мно́жества,/ наста́вника тя почита́ем, о́тче наш Алекса́ндре,/ твое́ю бо стезе́ю пра́во ходи́ти позна́хом,/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, пра́здника.

Тропа́рь, глас 4:

Христа́, и́стиннаго Бо́га, все́ю душе́ю возлюби́л еси́/ и Тому́ невозвра́тным жела́нием после́довал еси́,/ вся же кра́сная и сла́дкая ми́ра сего́ возненави́дев,/ я́ко небопа́рный оре́л, на Небеса́ возлете́/ и та́мо со А́нгелы лику́еши и со все́ми святы́ми Святе́й Тро́ице предстои́ши,/ моли́ и нам спасти́ся, ча́дом твои́м,/ я́коже обеща́ся, Алекса́ндре преподо́бне, о́тче наш.

Сла́ва, и ны́не, пра́здника.

НА У́ТРЕНИ

По 1-м стихосло́вии седа́лен, глас 3:

Земля́ на́ша и страна́, блаже́нне, чудеса́ твоя́ возвеща́ют и воспева́ют всю́ду,/ Христо́с бо тя нам свети́льника показа́,/ моли́ спасти́ся нам.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́ся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что́ же возымену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

По 2-м стихосло́вии, седа́лен, глас 2.

Подо́бен: Милосе́рдия су́щи:

Я́ко доброде́телем поло́жника и преподо́бным удобре́ние,/ Це́рковь сла́вит тя, вопию́ще:/ Алекса́ндре преблаже́нне, моли́твами твои́ми/ исцели́ неду́ги и боле́зни на́ша и вся́ческих изба́ви искуше́ний/ и́же ве́рою и любо́вию па́мять твою́ восхваля́ющих.

Сла́ва, и ны́не, Богоро́дичен:

Милосе́рдия су́щи исто́чник, ми́лости сподо́би нас, Богоро́дице,/ при́зри на лю́ди согреши́вшия,/ яви́ я́ко при́сно си́лу Твою́,/ на Тя бо упова́юще,– ра́дуйся – вопие́м Ти,/ я́коже иногда́ Гаврии́л, Безпло́тных Архистрати́г.

По полиеле́и седа́лен, глас 8.

Подо́бен: Прему́дрости:

Дух Святы́й тя, блаже́нне, наста́ви оте́чество свое́ оста́вити/ и на па́жить спасе́ную нас наста́вити,/ и Христо́с тя свети́льника нам показа́ я́ве,/ сего́ ра́ди, лику́я, весели́тся на́ша страна́, со дерзнове́нием моля́ся ти,/ я́ко сугу́бным венце́м украша́ешися от Го́спода.

Сла́ва, и ны́не, Богоро́дичен:

И́же нас ра́ди рожде́йся от Де́вы/ и распя́тие претерпе́в, Благи́й,/ испрове́ргий сме́ртию сме́рть/ и Воскресе́ние явле́й, я́ко Бог,/ не пре́зри, я́же созда́л еси́ руко́ю Твое́ю./ Яви́ человеколю́бие Твое́, Ми́лостиве,/ приими́ Ро́ждшую Тя Богоро́дицу, моля́щуюся за ны, и спаси́, Спа́се наш, лю́ди отча́янныя.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Прииди́те, лю́дие вси гра́да на́шего и ве́си гра́дстии,/ хвалу́ принесе́м отцу́ на́шему, вопию́ще си́це:/ ра́дуйся, пресве́тлый сто́лпе, просвеща́яй нас чудесы́ свои́ми;/ ра́дуйся, звездо́, от ю́га возсия́вшая на се́верных страна́х;/ ра́дуйся, о́тче, мра́ка грехо́внаго избавля́яй нас/ и Ца́рствию Небе́сному сподобля́яй моли́твами свои́ми.

Кано́н преподо́бному Алекса́ндру, глас 4, его́же краегране́сие: Хвалу́ пою́ но́вому чудотво́рцу Алекса́ндру. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Све́том озаря́емь благода́ти Твоея́, Христе́,/ уясни́ ми язы́к, и просвети́ очи мои́,/ и ду́шу освяти́, и се́рдце озари́,/ да воспою́ похвалу́ но́вому чудотво́рцу, преподо́бному Алекса́ндру.

Путе́м, вводя́щим ко гра́ду Небе́сному,/ невозвра́тно ше́ствовал еси́, Алекса́ндре,/ и́бо Святы́й Дух наста́ви тя, почива́ющ в се́рдце твое́м.

Вознося́шеся смире́нием, о́тче Алекса́ндре, любо́вь име́л еси́ ко Христу́,/ тем мо́лимся ти, преподо́бне,/ уще́дри смире́ние на́ше и боле́зни вся облегчи́ серде́ц на́ших.

Богоро́дичен: Па́дшим воста́ние и стоя́щим укрепле́ние су́щи, Всенепоро́чная,/ тем молю́ся Ти:/ па́дший грехо́м мой ум испра́ви, Влады́чице.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Теку́щих стоя́щими измени́л еси́ смы́слено,/ прие́м свой крест, о́тче Алекса́ндре,/ и в непроходи́мую пусты́ню, я́ко Илия́ вели́кий, отходя́, прибы́л еси́.

Путь тебе́, зело́ жела́емый, оте́ц пове́да, и́же рече́:/ иди́, ча́до, на о́ну страну́ реки́/ и обря́щеши мно́гими ле́ты сокрыва́ему пусты́ню,/ и та́мо всели́ся, поя́ Го́спода.

Коле́блемы страстьми́ разли́чными,/ ве́рою притека́ем к твоему́ покро́ву, Алекса́ндре преподо́бне,/ святы́ми твои́ми хода́тайствы вся ны посети́, моля́ся Человеколю́бцу.

Богоро́дичен: Кропле́нием ми́лости Твоея́, Де́во,/ у́глие погаси́ мои́х страсте́й, Богора́дованная,/ и уга́сший возжзи́ свети́льник се́рдца моего́,/ Златы́й Свети́льниче, Всенепоро́чная.

Седа́лен, глас 8.

Подо́бен: Прему́дрости:

Стра́стный мрак очи́стив и Христо́ва повеле́ния, я́ко свет, вои́стину прие́м,/ в посте́ просия́л еси́/ и, умертви́в те́ло, дух оживи́л еси́, вра́жия се́ти попра́в, блаже́нне,/ тем и Вы́шних Безпло́тных слуг соприча́стник бы́сть Ду́ха благода́тию,/ Алекса́ндре, о́тче наш, моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще и де́монов игра́лище в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши, Светода́тельная и Нетле́нная,/ разжени́ о́блак страсте́й/ и Вы́шняго прича́стия сподо́би и Све́та Невече́рняго моли́твами Твои́ми.

Песнь 4

Ирмо́с: Неизсле́дный Бо́жий Сове́т,/ е́же от Де́вы, воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Пусты́ни непроходи́мыя доше́д,/ верхи́ бесо́вския возвыша́емыя/ смире́нием смири́л еси́, му́дре Алекса́ндре, и на них мужествова́л еси́,/ сла́во и́ночествующим и утвержде́ние.

Мече́м обоюдуо́стрым в Христо́в страх вооружи́вся,/ зми́я отсту́пника низложи́л еси́ разу́мно и чу́вственно, блаже́нне Алекса́ндре,/ свяще́нными побе́дами прославля́емь.

Ве́сь Боже́ственным Ду́хом распали́вся, о́тче,/ мраз терпе́л еси́ и мно́ги беды́, в пусты́нях вселя́яся, иски́й Го́спода,/ благода́тию тя Боже́ственною согрева́юща.

Богоро́дичен: Тя, очище́ние всем земны́м, ве́рою молю́ и припа́даю, Благослове́нная,/ ми́лостива ми Судию́ и Сы́на Твоего́ сотвори́,/ я́ко да по до́лгу сла́влю Тя.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Ше́ствовал еси́, преподо́бне, у́зкий и приско́рбный пу́ть,/ Боже́ственными восхожде́нии се́рдца, и виде́нии разширя́емь, и положе́нием обожа́емь я́ве,/ тем бы́сть и́ноком утвержде́ние и украше́ние.

Я́ко очи́стившу помышле́ния, преподо́бне,/ благода́ть тебе́ даде́ся, я́ко проро́ку,/ я́ко настоя́щая, глаго́лати бу́дущая,/ зре́ти же да́льная, я́ко бли́жняя, Алекса́ндре, Бо́жие оби́телище.

Боле́зней мя изба́ви грехо́вных и скорбе́й,/ утоли́ се́рдца моего́ лю́тость/ и грехопаде́ниям разреше́ние да́руй,/ Благоде́теля Бо́га име́я, послу́шающа честны́х твои́х моли́тв.

Богоро́дичен: Ума́ моего́ уврачу́й изступле́ние, Всенепоро́чная,/ и исцели́ стра́сти душе́вныя моя́, и уны́ния тьму́ отжени́,/ я́ко да восхваля́ю Тя пе́сненно, Присноблаже́нная Богоро́дице Всепе́тая.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Увяди́в стра́сти теле́сныя, я́ко дре́во узре́ся высокове́рхое,/ плоды́ чуде́сныя израща́я/ и честна́я исправле́ния священнонося́, Богоблаже́нне.

Исцели́ тя Госпо́дь явле́нием Кири́лла чудотво́рца,/ и разуме́, я́ко от вели́кия боле́зни вско́ре премени́ся на здра́вие/ и, возбну́в ¹⁷ от виде́ния, ра́довашеся, поя́ Го́спода.

Тьма́м боле́зней прибли́жихся аз, те́лом не́мощен низлежа́, Алекса́ндре, о́тче,/ тем ве́рою зову́ ти:/ боле́зни утоли́ се́рдца моего́.

Богоро́дичен: Еди́на всем поможе́ние, помози́ нам, бе́дствующим,/ и ру́ку пода́ждь, и к приста́нищу введи́ спасе́ния,/ Отрокови́це Богоблагода́тная.

Конда́к, глас 8.

Подо́бен: Взбра́нной Воево́де

Роди́телей свои́х любо́вь отри́нул еси́/ и дом свой, я́ко чужд, оста́вил еси́,/ водвори́ бо ся в пусты́ню,/ и та́мо ви́де Бог труды́ твоя́ и по́двиги,/ па́стыря и наста́вника избра́нному Своему́ ста́ду сподобля́ет тя/ и по преставле́нии вели́кими чудесы́ прославля́ет тя,/ исцеля́ти разли́чныя неду́ги./ Моли́ о нас Христа́ Бо́га,/ пра́зднующих любо́вию святу́ю па́мять твою́,/ да вси единогла́сно вопие́м ти:/ ра́дуйся, Алекса́ндре преподо́бне, о́тче наш.

И́кос:

Други́й, о́тче, яви́ся врач и предста́тель/ неду́ги одержи́мым и скорбьми́, Алекса́ндре чудотво́рче,/ исцеля́я всех, ве́рно притека́ющих под Боже́ственный кров твой,/ тем и от нас слы́шиши:/ ра́дуйся, отца́ блага́го ко́рене;/ ра́дуйся, ма́тере благи́я ве́твь;/ ра́дуйся, и́же тех любо́вь отри́нувый;/ ра́дуйся, и́же еди́наго Бо́га прие́мый;/ ра́дуйся, я́ко оста́вил еси́ мирску́ю суету́ и дом/ и Пречи́стыя Ма́тере оби́тели Кири́лловы огра́ды дости́гл еси́;/ ра́дуйся, я́ко та́мо во и́ноческая обле́клся еси́/ и извы́че вся́кому благочи́нию и добронра́вию;/ ра́дуйся, я́ко отту́ду в Ка́ргопольския страны́ пресели́лся еси́/ и та́мо в непроходи́мую пусты́ню всели́лся еси́;/ ра́дуйся, я́ко в ней це́рковь вели́каго чудотво́рца Нико́лы воздви́гл еси́,/ и о́бщий монасты́рь соста́вил еси́, и собра́л еси́ учени́к мно́жество,/ и́хже стра́хом Бо́жиим и твои́м уче́нием наставля́емых,/ до конца́ соблюди́;/ ра́дуйся, я́ко ми́рови яви́ся столп непоколеби́м;/ ра́дуйся, свети́льниче, сия́я чудесы́./ Моли́ о нас Христа́ Бо́га, пра́зднующих святу́ю па́мять твою́,/ да вси единогла́сно вопие́м ти:/ ра́дуйся, Алекса́ндре преподо́бне, о́тче наш.

Песнь 7

Ирмо́с: Не послужи́ша тва́ри Богому́дрии/ па́че Созда́вшего,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Се́рдце твое́ Тро́ице жили́ще соде́лал еси́/ и ду́шу свою́ престо́л Бо́гови сотвори́л еси́,/ те́мже Боже́ственною благода́тию, о́тче Алекса́ндре,/ источа́еши неду́жным исцеле́ния, с ве́рою приходя́щим.

Душа́ твоя́, светозаре́нием Боже́ственнаго Ду́ха освяща́ема при́сно,/ душ зря́ше ве́рных, приходя́щих ти, свет, блаже́нне, и двиза́ния,/ проро́ческими провиде́ньми свяще́нно удивля́ема.

Неду́г, обурева́ющих мя, блаже́нне, души́ же и телесе́,/ твои́ми святы́ми моли́твами ско́ро изба́ви и пе́ти сотвори́:/ препе́тый оте́ц на́ших Бо́же, благослове́н еси́.

Богоро́дичен: Неизме́нно ро́ждшая Еди́наго Го́спода, Богора́дованная,/ десни́цею Его́, Чи́стая, премени́ти ми ум моли́ся к лу́чшим,/ лю́те совраща́емый жите́йскими печа́льми.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Пребыва́ющу ти в пусты́ни, я́ко на све́щнице свети́льник, преподо́бне,/ всех помышле́ния ве́рою просвеща́еши,/ показу́я изря́дно словесы́ и де́лы стезю́ живота́/ и возводя́ сих Боже́ственными словесы́ к высоте́ безстра́стия.

Умо́м безстра́стия очище́н, бесе́доваше Го́споду Вседержи́телю,/ от Него́ же неизглаго́ланным, преподо́бне, науча́емь, проро́чески предглаго́лаше,/ просвеща́я ду́ши, я́ко вели́к, всеблаже́нне, Свята́го Ду́ха сподо́бися,/ тем тя согла́сно, ве́рнии, похваля́ем.

Постиго́ша мя ра́ны тя́жкия, и неду́ги разли́чнии смуща́ют мя,/ сих мя изба́ви, о́тче, молю́тися,/ я́ко от Бо́га прие́м, Алекса́ндре, благода́ть врачева́ти стра́сти/ и боле́зни ве́рным облегчева́ти.

Богоро́дичен: Яви́ся А́нгел вы́шши, Бо́га неизрече́нно вопло́щши,/ Того́ умоли́, Влады́чице Всенепоро́чная, плотски́х вы́шша страсте́й бы́ти ми/ умо́м, высото́ю смире́ния, песносло́вящему Твою́ вели́кую благода́ть.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Укрепи́ся Бо́гу, ум ти утверди́вшу, удержа́ти стра́сти,/ А́нгел во пло́ти отсю́ду, о́тче, бы́сть,/ и со А́нгелы на Небесе́х живе́ши всегда́, и Небе́сныя сла́вы наслажда́ешися,/ Влады́чню предстоя́ Престо́лу и Све́та Невече́рняго исполня́емь.

Твоя́ свяще́нныя и святы́я мо́щи, во гро́бе лежа́ще, неду́ги погружа́ют,/ и попаля́ют полки́ бесо́вския всегда́, му́дре Алекса́ндре, Бо́жиею благода́тию,/ и источа́ют всем исцеле́ния, ве́рно тя при́сно блажа́щим.

Уже́ Христо́ви приближа́яся ясне́йше и чисте́йше,/ помяни́ ве́рою тя помина́ющих, Алекса́ндре о́тче,/ грехо́в проще́ния нам прося́ и неду́г всех избавле́ния,/ и Небе́снаго Ца́рства сподо́битися.

Богоро́дичен: Просвети́, Чи́стая, души́ моея́ о́чи, Свет поро́ждшая,/ да не пости́гнет мя грехо́вная тьма́ тя́жкая,/ ниже́ глубина́ покры́ет мя отча́яния,/ но Ты мя спаси́ и окорми́ ко приста́нищу Боже́ственнаго хоте́ния.

Свети́лен.

Подо́бен: Жены́, услы́шите:

Слы́шана бы́сть во всех страна́х превели́кая твоя́ доброде́тель и чудеса́,/ отвсю́ду стека́хуся ви́дети све́тлое по Бо́зе житие́ твое́,/ а́ки све́та дневна́го, наслади́тися жела́юще, преподо́бства твоего́.

Сла́ва, и ны́не, Богоро́дичен:

Ю́же дре́вле провозвести́ проро́ческий собо́р,/ ру́чку, и жезл, и скрижа́ль, и несеко́мую го́ру,/ Мари́ю Богоотрокови́цу ве́рно восхва́лим дне́сь, с Гаврии́лом зову́ще:/ ра́дуйся, Обра́дованная.

На хвали́тех стихи́ры самогла́сны, глас 8:

О, пресла́вное чу́до,/ сия́нием Ду́ха Пресвята́го просве́щся, Алекса́ндре Богому́дре,/ иногда́ тебе́ еще́ жи́ву су́щу во оби́тели чудотво́рца Кири́лла,/ роди́телю твоему́ на́йде не́кая напа́сть от земна́го властели́на,/ ты же, свя́те, того́ изба́ви моли́твами твои́ми/ и пресели́тися отту́ду повеле́:/ та́кожде, блаже́нне, и по твое́м отше́ствии к Бо́гу/ во оби́тели свое́й оте́чески наказу́еши не́коего священнои́нока/ и па́ки ми́луеши и изы́ти от оби́тели не повелевае́ши;/ и ино́му священноиере́ю, но́ги иму́щу больны́,/ на мно́га ле́та исцеле́ние дарова́л еси́,/ и и́ны мно́ги наказу́еши./ Моли́ спасти́ся душа́м на́шим.

О, ка́ко возмо́жем досто́йно похвали́ти/ пресла́вная чудеса́ твоя́, блаже́нне Алекса́ндре сла́вне,/ не то́кмо бо приходя́щим к моще́м твои́м исцеле́ния разли́чная подава́еши,/ но и в да́льних страна́х призыва́ющих тя спаса́еши./ Не́когда бо ю́ноша, стра́нствуя по мно́гим страна́м,/ прии́де в твою́ честну́ю оби́тель послужи́ти,/ не име́я язы́ка на мно́га времена́,/ вы́резану бо су́щу в горта́ни его́ из ко́рене,/ ты же, свя́те, исцеле́ние дарова́,/ и па́ки ю́ноша проглаго́ла,/ сего́ ра́ди, блаже́нне, во всех страна́х хва́льно и́мя твое́./ И ны́не моли́ умири́ти мир и спасти́ ду́ши на́ша.

О, пресла́вная чудеса́ Бо́жия милосе́рдия/ в на́ших страна́х соде́яшася:/ одари́ бо нас Бог, лю́ди Своя́,/ Свои́м уго́дником, преподо́бным Алекса́ндром,/ па́че зла́та и сапфи́ра ка́мене,/ не ло́жна бо е́сть псало́мская писа́ния:/ пра́ведник, я́ко фи́никс, процвете́т./ Та́ко и на́ша страна́ просвети́ся/ в после́днем ро́де сим свети́льником,/ ра́ка же преподо́бнаго, иде́же лежи́т трудолю́бное те́ло его́,/ всем подае́т исцеле́ния:/ слепы́м прозре́ние, хромы́м хожде́ние,/ и бе́сныя мно́ги исцели́,/ разсла́бленныя востягну́,/ ни́щим и сирота́м бы́сть печа́льник, и вдови́цам засту́пник,/ и нам, свои́м ученико́м, корми́тель и промы́сленик/ и о всем ми́ре моле́бник./ Моли́ о спасе́нии душ на́ших.

Сла́ва, и ны́не, глас 8:

Прииди́те вси, собери́теся наро́ды на́шего гра́да,/ му́жи, и жены́ Боголю́бныя, и до ссу́щих младе́нец,/ и пригра́дия, и око́льнии ве́си,/ и́ноцы свяще́ннии, иере́и и леви́ты,/ и́ноцы, иноки́ни и до про́стых люде́й,/ духо́вно возвесели́мся в наро́читом пра́зднице/ но́ваго чудотво́рца, блаже́ннаго Алекса́ндра,/ и, всечестну́ю па́мять его́ любе́зно почита́юще,/ того́, а́ки цве́ты, пе́сньми и похвала́ми увязе́м, реку́ще:/ ра́дуйся, сла́вне, Небе́сный челове́че,/ земны́й А́нгеле и Ду́ха Свята́го оби́телище;/ ра́дуйся, я́ко Ева́нгельскому глаго́лу после́довал еси́,/ и восприя́л еси́ в тле́нных ме́сто нетле́нно,/ и преше́л еси́ от си́лы в си́лу,/ от тле́нныя сла́вы во сла́ву;/ ра́дуйся, ве́рным лю́дем похвало́ и утвержде́ние;/ ра́дуйся, оте́честву пресве́тлый свети́льниче/ и моли́твенниче о душа́х на́ших.

И ны́не, пра́здника.

Славосло́вие вели́кое.

НА ЛИТУРГИ́И СЛУ́ЖБА ВСЯ ПРЕПОДО́БНЫМ.

Преподобный Александр Ошевенский

Преподобный Александр Ошевенский (в миру Алексий) родился 17 марта 1427 года в Вышеозерской волости в 80 верстах от Белозерска, в семье состоятельного земледельца Никифора Ошевина и его супруги Фотинии. Алексий был пятым ребенком в семье. Он родился по усердным молитвам Фотинии, которой явилась Божия Матерь и обещала рождение сына по ходатайству преподобного Кирилла Белоезерского († 1427; память 9 июня). Алексий с детских лет отличался кротостью, послушанием, любовью к посту и молитве. Родители видели в нем опору своей старости и наследника. Мальчика обучили грамоте и прививали ему навыки ведения хозяйства. Когда Алексию исполнилось 18 лет, его хотели женить. Однако юноша стремился к иноческому житию и ушел в Кирилло-Белозерский монастырь. В течение шести лет Алексий был послушником. В 1453 году он принял монашеский постриг с именем Александр. Подвижническая жизнь преподобного Александра вызывала удивление братии монастыря. Боясь славы, преподобный просил игумена благословить его уйти из обители и жить уединенно. Игумен не сразу благословил молодого инока на отшельническую жизнь, но, видя неотступное желание преподобного Александра, исполнил его просьбу. В то время родители святого поселились у реки Чурьюги, в месте, получившем название Ошевенской слободы. Побывав у родителей, преподобный Александр избрал недалеко место для своей пу́стыни – в глухом лесу на берегу Чурьюги (около сорока верст от Каргополя). Он водрузил на том месте крест и дал обет Богу пребывать здесь до конца жизни. Затем преподобный Александр вернулся в Кирилло-Белозерский монастырь, где был посвящен в диаконский сан. Игумен благословил преподобного на основание новой обители иконами Божией Матери Одигитрии и Святителя Николая Чудотворца. Вместе с преподобным Александром в пустынь отправился старец-монах из Кирилло-Белозерского монастыря, но, не вы держав трудностей пустыннической жизни, вернулся обратно. По возвращении на избранное им место преподобный Александр приступил к строительству храма. Вскоре архиепископ Новгородский Иона (1459–1470) рукоположил его в сан пресвитера и поставил игуменом основанного преподобным монастыря. Для собравшейся братии преподобный Александр ввел строгий общежительный устав. Иноки должны были хранить молчание за трапезой и в храме, в келлиях – заниматься рукоделием и молиться, во время исполнения послушаний – непрестанно творить Иисусову молитву или петь псалмы. Преподобный Александр показывал другим пример подвижничества и трудолюбия, он выполнял в монастыре самые тяжелые работы: очищал лес, готовил под пашню землю и засевал ее. Двадцать семь лет преподобный Александр совершал монашеские подвиги в своей обители. Однажды во время болезни ему явился преподобный Кирилл-Белоезерский и, исцелив, обещал помогать во всех его трудах. По молитвам своего Небесного покровителя преподобный Александр благоустроил монастырь и мудро руководил духовной жизнью не только братии, но и многих мирян, приходивших к нему за наставлениями. Преподобный Александр мирно скончался 20 апреля 1479 года. Нетленные мощи преподобного Александра Ошевенского были обретены при строительстве нового храма во имя Святителя Николая Чудотворца. По распоряжению митрополита Московского Антония, они были свидетельствованы епископом Вологодским Варлаамом. Тогда же была написана икона преподобного Александра, согласно рассказам знавшего его старца и иноков, которым преподобный являлся. Позднее мощи святого хранились в Успенском храме обители, в приделе во имя преподобного Александра (освящен в 1712 году). В 1567 году иеромонахом Ошевенского монастыря Феодосием написано житие преподобною Александра. Источником для жития послужили сохранившиеся воспоминания его родных и рассказы старцев, живших в монастыре еще при его святом основателе. В Иконописном подлиннике есть описание преподобного Александра: «Подобием брада черна, надседа, подоле мало Никодима Кожеозерскаго, и власы главные черные; ризы преподобнические и в схиме».

Свята́го му́ченика Гаврии́ла младе́нца, Белосто́кскаго

ВЕ́ЧЕР

Блаже́н муж: 1-й антифо́н. На Го́споди, воззва́х: поста́вим стихо́в 8, пра́зднику 3 и свято́му 5, глас 1:

А́ще не обратите́ся и не я́ко младе́нцы незло́бивии пребу́дете,/ не мо́жете в Ца́рствие Небе́сное вни́ти,–/ си́це науча́ет дру́ги Своя́ Христо́с,/ и́мже ча́шу страсте́й Свои́х обещава́ет пи́ти;/ сию́ у́бо спаси́тельную ча́шу и Гаврии́л младе́нец прие́млет,/ младе́нческим незло́бием му́ченический вене́ц преукраша́я/ и того́ ра́ди сугу́бое стяжа́в дерзнове́ние,/ во е́же моли́тися о спасе́нии душ на́ших.

Глас 2:

Стека́ется собо́рище иуде́йское,/ от Бре́ста же и Белосто́ка,/ да непоро́чнаго младе́нца му́кам преда́ст./ О, беззако́нных, о, неве́рных!/ сего́ непротивле́нием не вразуми́вшихся,/ и младе́нческую кро́вь до конца́ истощи́вших,/ и роди́тели того́ обезча́дствовавших,/ но мы, свята́го му́ченика благогове́йно почита́юще,/ того́ дне́сь призове́м в моли́тву,/ о е́же такова́го жестосе́рдия нам изба́витися/ и спасти́ся душа́м на́шим.

Не пла́чите, роди́тели убие́ннаго от иуде́й отроча́те,/ его́же хла́дное те́ло,/ от плотоя́дных птиц чуде́сне охраня́емое, обрето́сте;/ не пла́чите и не рыда́йте,/ сие́ исте́рзано от мучи́телей зря́ще,/ зане́ дух Гаврии́лов уже́ со А́нгелы ра́дуется,/ пору́ганное же те́ло его́ тле́нию непристу́пно яви́тся/ и я́ко исто́чник исцеле́ний всем ве́рным во ве́ки пребу́дет,/ во увере́ние и́стинныя ве́ры/ и во спасе́ние душ на́ших.

О́ле безу́мия иуде́йскаго!/ и́бо и пси разу́мнее вас яви́шася,/ ника́коже телесе́ свята́го косну́тися дерзну́вше,/ но сие́ от вран охрани́вше тща́тельно,/ неве́рствие ва́ше облича́юще/ и христиа́нскую ве́ру утвержда́юще,/ ве́сть бо Госпо́дь и безслове́сными тва́рьми Своя́ уго́дники прославля́ти./ О, блаже́нный жре́бий святы́х Твои́х, Го́споди,/ и́хже моли́твами просвети́ и спаси́ ду́ши на́ша.

Сла́ва, глас 8:

О, ужа́снаго твоего́ по́двига,/ младе́нче святы́й Гаврии́ле!/ О, тя́жких мук твои́х, надо́лзе претерпе́нных!/ Вои́стинну укрепля́ющей благода́ти Бо́жией/ досто́ин яви́лся еси́/ и дре́вним седми́ Маккаве́ом/ тве́рдостию души́ уподо́бился еси́,/ от недосто́йных единоплеме́нник тех умерщвля́емь,/ но все́ми стра́шными терза́ньми Христа́ не отлучи́выйся/ и ду́хом чи́стым к Нему́ пресели́выйся,/ нас же моли́твою твое́ю в ве́ре утвержда́яй/ и твое́й ре́вности подража́ти науча́яй.

И ны́не, пра́здника.

Вход. Проки́мен дне и чте́ния 3 му́ченическая.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз свиде́тель, глаго́лет Госпо́дь Бог,/ и о́трок, его́же избра́х,/ да позна́ете, и ве́руете Ми,/ и разуме́ете, я́ко Аз е́смь,/ пре́жде Мене́ не бы́сть ин бог и по Мне не бу́дет./ Аз е́смь Бог,/ и не́сть, ра́зве Мене́, спаса́яй./ Аз возвести́х и спасо́х,/ уничижи́х и не бе в вас чу́ждий./ Вы Мне свиде́тели,/ и Аз Госпо́дь Бог,/ и еще́ от нача́ла Аз е́смь,/ и не́сть, от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́ни чте́ние (глава́ 3):

Пра́ведных ду́ши в ру́це Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры, по сте́блию потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же е́сть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник, преста́влен бы́сть./ Восхище́н бы́сть, да не зло́ба измени́т ра́зума его́,/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры пра́здника или́ хра́ма.

Сла́ва, свято́му, глас 4:

Младе́нец и му́ченик и ве́ры и́стинныя утвержде́ние,/ свя́те Гаврии́ле, яви́лся еси́/ и безу́мие иуде́йское нетле́нием твоего́ телесе́ обличи́л еси́,/ те́мже и нас проти́ву неве́рия и е́реси моли́твами твои́ми укрепи́/ и Ца́рствия Небе́снаго уче́ние вложи́ в сердца́ на́ша,/ да тя просла́вим, засту́пника на́шего,/ подаю́щаго душа́м на́шим мир/ и всем, призыва́ющим тя, ве́лию ми́лость.

И ны́не, пра́здника.

На стихо́вне стихи́ры, глас 3:

Кто не умили́тся се́рдцем,/ му́ки твоя́ помина́яй, блаже́нне,/ я́же чрез де́вять дний от нечести́вых претерпева́ти изво́лил еси́?/ Пе́рвее бо, кро́вь твою́ пома́лу изли́вше,/ е́ле жи́ва су́ща тя оста́виша иуде́и,/ да мно́жайшим му́кам предаду́т твое́ непоро́чное те́ло,/ е́же и сме́рти преда́вше коне́чным кро́ве истоща́нием,/ на ни́ву в де́нь Свято́й Па́схи то́е безсту́дне изверго́ша;/ мы же, твоя́ безчи́сленныя ра́ны целу́юще,/ по́двиги твоя́ те́пле прославля́ем.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Собра́вшимся на коне́чное убие́ние Гаврии́ла младе́нца иуде́ом,/ того́ уже́ изму́ченное те́ло на стене́ ра́спято бы́сть,/ и ре́бра ему́ ору́жием мно́гажды прободо́ша,/ ниже́ стена́ниями его́ умили́шася нечести́вии,/ ниже́ об отмще́нии Госпо́дни помы́слити хотя́ху,/ но сего́, я́ко му́ченика, просла́ви Христо́с Бог наш/ и я́ко подо́бника Своея́ спаси́тельныя стра́сти/ христиа́ном чти́ти повелева́ет.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Зри, о душе́ моя́ окая́нная,/ каково́е му́жество во младе́нчестем телеси́ явля́ет Гаврии́л му́ченик,/ ка́ко той от Христа́ не отрече́ся,/ а́ще и па́че седми́цы муче́ниям предава́шеся;/ не облени́ся у́бо, душе́ моя́,/ проти́ву страсте́й подвиза́тися,/ устыди́тся младе́нца блаже́ннаго,/ мно́жество мучи́телей победи́вшаго,/ и тому́ со усе́рдием помоли́ся,/ да на неви́димыя враги́ победи́тель яви́шися.

Сла́ва, глас 7:

У́жас бе ви́дети роди́телем младе́нческое те́ло, лю́те исте́рзано,/ на ни́ве посреде́ псов, а́ки стра́жей ве́рных, лежа́щее,/ из него́же всю кро́вь мучи́тели извлеко́ша/ и ко́жу его́ повсю́ду прободо́ша,/ оба́че Боже́ственная сла́ва, чрез звере́й я́вленная,/ отцу́ и ма́тери сле́зы на упова́ние преложи́,/ и ве́ру Христо́ву в росси́йстех лю́дех утверди́,/ и нас к пе́нию сла́вы твоея́, му́чениче, воздвиза́ет.

И ны́не, пра́здника.

На благослове́нии хле́бов тропа́рь, глас 5:

Святы́й младе́нче Гаврии́ле,/ ты за Прободе́ннаго нас ра́ди от иуде́й/ лю́те от о́нехже в ре́бра прободе́н был еси́/ и за Истощи́вшаго кро́вь Свою́ за нас/ все те́ло твое́ на истоще́ние кро́ве/ в лю́тыя я́звы пре́дал еси́,/ ны́не же во сла́ве ве́чней с Ним всели́лся еси́./ Тем помяни́ и нас, мо́лим, зде чту́щих па́мять твою́,/ прося́ нам здра́вие телеси́/ и спасе́ние душа́м на́шим.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, свята́го. И ны́не, пра́здника.

По 1-м стихосло́вии седа́лен пра́здника или́ сей, глас 1:

Возсия́ нам па́мять муче́ний твои́х, Гаврии́ле,/ о младе́нцех к Бо́гу хода́таю тепле́йший,/ муже́м же и же́нам терпе́ния учи́телю;/ прииди́те, того́ подража́ем по́двиги и на бесо́вския прило́ги му́жественно ополчи́мся,/ младе́нца му́ченика в по́мощь призыва́юще.

Сла́ва, и ны́не, пра́здника.

По 2-м стихосло́вии седа́лен пра́здника или́ сей, глас 2:

Написова́шеся в ле́тописи Заблу́довстей,/ я́ко убие́нный от иуде́й Гаврии́л младе́нец/ то́йже в кни́зе живо́тней написова́шеся, я́ко му́ченик и чудотво́рец,/ его́же моли́твами и нас да не изгла́дит из кни́ги живота́/ Христо́с и Спас душ на́ших.

Сла́ва, и ны́не, пра́здника.

Псало́м избра́нный му́чеником и велича́ние:

Велича́ем тя,/ страстоте́рпче святы́й, младе́нче Гаврии́ле,/ и чтим честна́я страда́ния твоя́,/ я́же за Христа́/ претерпе́л еси́.

По полиеле́и седа́лен, глас 3:

Излия́нною твое́ю кро́вию, Гаврии́ле, му́чениче Христо́в,/ иуде́йское нече́стие посрамля́ется,/ и ерети́ческая блужда́ния облича́ются,/ и неду́зи разли́чнии исцеля́ются,/ и ду́ши на́ша ве́рою спаса́ются.

Сла́ва, и ны́не, пра́здника.

Степе́нна, 1-й антифо́н, 4-го гла́са. Проки́мен, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т. Вся́кое дыха́ние: Ева́нгелие от Луки́, зача́ло 63. Та́же, Воскресе́ние Христо́во ви́девше:

По 50-м псалме́ стихи́ра, глас 2:

Дне́сь льсти́вными словесы́ младе́нец из до́ма о́тча изво́дится,/ дне́сь непови́нная того́ кро́вь пролива́ется,/ и в подзе́мная святы́й Гаврии́л от иуде́й заключа́ется,/ и мучи́телей со́нмище собира́ется,/ дне́сь сове́т зло́бы исполня́ется/ и лю́той сме́рти отроча́ предае́тся,/ дух же его́ Небе́сным чино́м сочетава́ется,/ и мы тому́ вопие́м, уми́льно глаго́люще:/ спаса́й нас предста́тельством твои́м,/ уго́дниче Бо́жий и му́чениче Христо́в, Гаврии́ле блаже́нне.

Кано́н пра́здника на 6 и свята́го на 8, его́же краегране́сие: Младе́нца моли́твами спаси́ мя. Глас 4.

Песнь 1

Ирмо́с: Ли́цы изра́ильтестии/ невла́жными стопа́ми/ понт Чермны́й и вла́жную глубину́ прогна́вше,/ вса́дники триста́ты ¹⁸ , враги́, ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.

Младе́нче и му́чениче, чудотво́рче и боле́зней цели́телю, Гаврии́ле, уго́дниче Христо́в,/ досто́йными словесы́ твоя́ по́двиги восхвали́ти недоуме́ю,/ оба́че твоего́ терпе́ния и незло́бия красото́ю умиля́юся,/ сих дарова́ний прича́стника и мене́ покажи́, твоего́ моли́твенника.

Лю́дие росси́йстии от иуде́й уму́ченнаго младе́нца ви́девше,/ от псов же несмы́сленных, я́ко сокро́вище, охраня́ема, взыва́ху:/ Го́споди, того́ моли́твами поми́луй нас.

А́нна смиренному́дренная, Гаврии́ла му́ченика ма́ти,/ со отце́м его́ Петро́м трудолюби́вым сле́зы на ра́дость преложи́ша,/ своего́ отроча́те уве́девше неувяда́емую сла́ву.

Богоро́дичен: Жезл Ааро́нов прозя́бший, и́же от Иессе́я прообража́ше изра́стший ко́рень,/ Тя, Пречи́стую, цвет ми́ру возсия́вшую, Бо́га воплоще́нна,/ Его́же о нас моля́щи не преста́й, Присноде́во, прибега́ющих к Тебе́.

Песнь 3

Ирмо́с: Я́ко непло́ды роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.

Добро́ бы́ло бы́сть вам не роди́тися, нечести́вии мучи́телие,/ зане́ отра́днее бу́дет Содо́му и Гомо́рру в Де́нь Су́дный,/ не́же Христо́ва испове́дника уби́йцам./ Того́ моли́твами, Го́споди, утверди́ правосла́вных ве́ру.

Егда́ подписа́ние, е́же о твое́м муче́нии, от иуде́ев бы́вшем, му́чениче,/ сотвори́ша судии́ заблу́довстии,/ тогда́ исте́рзанное те́ло твое́ земле́ благоче́стно преда́ша лю́дие./ Но проше́дшим три́десятим ле́том то́ежде тле́нию неприча́стно обрето́ша/ и Госпо́дне о тебе́ промышле́ние просла́виша.

Ни́щим и оби́димым близ е́сть Госпо́дь:/ Той бо, от ни́щих роди́телей отъя́ти ча́до попусти́в нечести́вым,/ па́че царе́й земны́х безча́дныя прославля́ет,/ зане́ и ца́рие и святи́телие тех отроча́ти моли́твенно преклоня́ют коле́на.

Богоро́дичен: Я́ко но́сиши на руку́, Мари́е,/ и от сосцу́ пита́еши Пита́ющаго вся́кое дыха́ние,/ Его́же, Богоро́дице, чту́ще, пропове́даем:/ моли́ся Ему́, Чи́стая, о всех нас.

Конда́к, и и́кос пра́здника.

Седа́лен свята́го, глас 8:

О, какова́я муче́ния твоя́, отроча́, Бо́гу возлю́бленное!/ О, какова́я терпе́ния твоего́ кре́пость,/ избоде́ние бо, и ме́дленное кро́ве испуща́ние,/ и пло́ти твоея́ раздира́ние за Христа́ прия́л еси́,/ но Того́ ра́ди засту́пник о стра́ждущих младе́нцех у Христа́ Бо́га явля́ешися,/ ма́тери твоея́, обезча́дствованней бы́вшей,/ всем ма́терем, о ча́дех моля́щимся, уте́шитель быва́еши/ и мо́лишися при́сно о спасе́нии душ на́ших.

Сла́ва, и ны́не, пра́здника.

Песнь 4

Ирмо́с: Услы́шах Твое́, Христе́, вои́стинну пресла́вное,/ я́ко безсме́ртен сын Бог/ уподо́бися сме́ртным челове́ком/ и пребы́сть, е́же бе,/ и того́ ра́ди Твою́ сла́влю си́лу.

Царе́м и мучи́телем преклони́ша вы́и своя́ на убие́ние дре́внии му́ченицы,/ тех подо́бник бы́сть Гаврии́л младе́нец,/ кро́вь свою́ непови́нную на истерза́ние отда́в иуде́ом жестокосе́рдым./ Го́споди, того́ моли́твами вложи́ ре́вность о сла́ве Твое́й в ду́ши на́ша.

А́ще и в те́мней погребни́це заключи́ша тебе́ иуде́е, о му́чениче,/ а́ще и стра́шными му́ками тебе́ умертви́ша,/ но а́бие во све́тлый черто́г Госпо́день дух твой, ра́дуяся, всели́ся,/ иде́же со А́нгелы о сла́ве Госпо́дней дне́сь лику́ет.

Ми́лостив бу́ди к мои́м не́мощем, му́чениче святы́й Гаврии́ле,/ моего́ малоду́шия не возгнуша́вся, проще́ние ми от Го́спода испроси́,/ и́же себе́ за ве́ру Его́ не пощади́вый/ и в младе́нчестем телеси́ Того́ просла́вивый.

Богоро́дичен: Тебе́, Присноде́ву и вои́стинну еди́ну Богоро́дицу, сла́вим,/ Ю́же прообразова́ше Богови́дцу Моисе́ю неопа́льно, Пречи́стая,/ купина́, огню́ примеси́вшаяся.

Песнь 5

Ирмо́с: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй.

О́браз злострада́ния Гаврии́лова прии́мем, бра́тие,/ и своего́ о ве́ре нераде́ния устыди́мся,/ от убива́ющих те́ло не убои́мся,/ но Иму́щему вла́сть по убие́нии в гее́нну о́гненную вве́ргнути,/ Тому́ со стра́хом повини́мся,/ страстоте́рпца свята́го в по́мощь призыва́юще.

Лю́та е́сть му́ка, но сла́док рай,/ боле́зненно на земли́ безча́дие, но неисчерпа́емо утеше́ние на́ше,–/ роди́теля Гаврии́лова взыва́ху,–/ от земны́х бо печа́лей ча́до на́ше к ве́чной ра́дости пресели́ся.

И́же о боле́знех и му́ках чад свои́х скорбя́ще, роди́телие,/ с ве́рою ко гро́бу Гаврии́лову припади́те,/ е́сть бо засту́пник о них пред Христо́м,/ я́ко кро́вь свою́ за испове́дание и́стинныя ве́ры излия́вый.

Богоро́дичен: Мучи́телей ра́зум де́вственное посрами́ чре́во:/ Младе́нец бо я́зву а́спидную душегу́бную испыта́ руко́ю/ и, отсту́пника го́рдаго низложи́в, ве́рным под но́зе покори́.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Твои́х раб моле́ния не отве́ржи, младе́нче прему́дре,/ твое́ю сла́вою умиля́ющихся и твоя́ по́двиги со умиле́нным се́рдцем воспева́ющих,/ а́ще терпе́ния твоего́ не стяжа́вших,/ но испра́вити житие́ свое́ жела́ющих.

Вся́ческих сокро́вищ, и́миже земля́ украша́ется:/ зла́та, и би́сера, и ка́мений многоце́нных,/ честне́йша су́ть святы́х уго́дников нетле́нныя мо́щи,/ и́ми бо благода́тная си́ла Бо́жия де́йствует,/ сию́ у́бо нам испроси́, уго́дниче Христо́в,/ во исцеле́ние душ и теле́с на́ших.

А́ще и мно́гая гоне́ния правосла́внии христиа́не от иуде́й и от ерети́к прия́ша,/ о́крест сла́вныя оби́тели твоея́ живу́щии,/ оба́че стоя́ние твое́ о и́стинней ве́ре вспомина́юще,/ от прославле́ния и́стиннаго Бо́га и твоего́ предста́тельства ника́коже отпадо́ша.

Богоро́дичен: Дре́вле у́бо прельсти́ мя змий/ и умори́ мя прама́терию мое́ю Е́вою,/ ны́не же, Чи́стая, Тобо́ю Созда́вый мя из истле́ния воззва́л е́сть.

Конда́к, глас 6:

Оте́чество твое́ Зверки́ бы́сть,/ му́чениче Христо́в Гаврии́ле,/ иде́же от и́стых звере́й – иуде́ев восхище́н:/ а́бие роди́телей лише́н еси́,/ та́же вся поря́ду лю́те претерпе́в,/ в оте́чество Небе́сное пресели́лся еси́./ Восхища́й и нас зде от вся́ких напа́стей и скорбе́й/ и умоли́, мо́лим тя,/ улучи́ти ве́чное насле́дие твое́.

И́кос:

Просла́вим, бра́тие, Гаврии́ла младе́нца, о Христе́ злострада́ния прия́вшаго,/ той бо, я́ко ягня́ незло́бивое, льсти́вому иуде́ю после́довав,/ из до́ма о́тча восхище́н бы́сть/ и в те́мную погребни́цу вве́ржен,/ ужа́сная же терза́ния и избоде́ние пло́ти своея́ претерпе́в надо́лзе,/ я́ко же́ртва чи́стая Тро́ице принесе́ся/ и мно́гая заступле́ния о моля́щихся ему́ чрез мно́гая ле́та показу́ет,/ вся приходя́щия в це́рковь его́ зра́ком нетле́ннаго телесе́ своего́ умиля́я./ Тому́ у́бо возопии́м:/ умоли́, мо́лим тя, улучи́ти и нам ве́чное насле́дие твое́.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Ма́терей скорбя́щих уте́шителю,/ младе́нцев боля́щих цели́телю, Гаврии́ле, уго́дниче Христо́в,/ ду́шу мою́, скорбя́щую о гресе́х свои́х, уте́ши и исцели́/ и сию́ над пло́тию госпожу́ моли́твою твое́ю соде́лай,/ своея́ пло́ти Христа́ ра́ди не пощади́вый.

Или́ не разуме́ете, нечести́вии иуде́и,/ я́ко Бо́га оте́ц ва́ших врага́ себе́ соде́ловаете,/ Того́ созда́ние непови́нное лю́те терза́юще/ и сицевы́м дея́нием приноси́ти ему́ слу́жбу мня́ще, безу́мнии./ Го́споди, Гаврии́ла моли́твами чад их сердца́ умягчи́/ и се́рдца на́ша от сицевы́я лю́тости изба́ви.

Слуцк град вои́стинну блаже́н е́сть,/ та́мо бо проше́дшим пяти́десятим шести́м ле́том положи́ся му́ченика Гаврии́ла нетле́нное те́ло,/ та́мо до дне́сь сле́зы, моли́твы и благодаре́ния пред гро́бом его́/ от ма́терей о ча́дех свои́х излива́ются/ и всех ве́рующих прие́млются моле́ния.

Богоро́дичен: Превы́шши тва́рей всех еси́,/ я́ко Творца́ ро́ждши и Го́спода./ Те́мже Ти вопию́, Богоро́дице:/ Благослове́нная, Госпо́дь сил с Тобо́ю.

Песнь 8

Ирмо́с: Ра́дующеся по осужде́нии мучи́тельстем о́троцы,/ я́ко да не бого́м скве́рным послу́жат всем,/ но Живо́му Бо́гу,/ на о́гнь дерзну́ша,/ от А́нгела же ороша́еми, пе́снь поя́ху:/ дела́ Госпо́дня, Го́спода по́йте/ и превозноси́те во вся ве́ки.

Пти́цы сыроя́дцы, над исте́рзанным те́лом му́ченика ре́юще,/ и пси гла́днии, сия́ отража́юще и те́ло му́ченика храня́ще,/ обличи́телие злодея́ния иуде́йскаго яви́шася,/ сла́вы же свята́го неми́и пропове́дницы.

А́ще и зве́рие гла́да своего́ о свято́м телесе́ утоли́ти не дерзну́ша,/ ка́ко у́бо зло́ба иуде́ев тем насыща́шеся?/ Ка́ко ти́и, чу́до зря́ще, не пока́яшася?/ Зри, о душе́ моя́, сих ожесточе́ние, и ужасни́ся,/ и свято́му сему́ помоли́ся, да от вся́кия зло́бы тебе́ вы́ну огражда́ет.

Сле́зы умиле́ния о по́двизе и о сла́ве младе́нца и му́ченика пролива́юще, бра́тие,/ своего́ окая́нства воспла́чим и своего́ нераде́ния устыди́мся:/ а́ще бо та́ко Бо́гу угоди́ младе́нец ма́лый,/ почто́ мы, му́жие, су́ще о сем небрего́хом?

Богоро́дичен: От ре́бра Ада́мова созда́вый Тя,/ от Твоего́ де́вства воплоти́ся, И́же всех Госпо́дь,/ Его́же пою́ще, вопие́м:/ вся дела́, благослови́те, по́йте Го́спода/ и превозноси́те во вся ве́ки.

Песнь 9

Ирмо́с: От земноро́дных ро́ждшися и Творца́ ро́ждшая,/ на́ша похвало́, Богоро́дице Чи́стая,/ Тя, я́ко влады́чествующую тва́рьми, велича́ем.

И ны́не, уго́дниче Бо́жий Гаврии́ле,/ о наро́де росси́йстем бу́ди пред Го́сподом предста́тель, я́коже дре́вле:/ тогда́ бо от иуде́й и ерети́к муче́ния христиа́не приима́ху,/ ны́не же от обою́ собла́зном вдаю́тся лю́те,/ те́мже твоего́ стоя́ния да́руй нам па́мять/ и о подража́нии тебе́ ре́вность благу́ю.

Мы́сленнаго уби́йцу души́ моея́, сию́ поглоти́ти и́щуща,/ побежда́ти помози́ ми, Бо́жий уго́дниче,/ те́ло свое́ на истерза́ние преда́вый,/ но ду́шу свою́ непоро́чну от тех устраше́ния сохрани́вый/ и Христу́, а́ки дар че́стен, страда́ния своя́ принесы́й/ и сего́ ра́ди от Него́ благода́ть прия́вый,/ во е́же моли́твы на́ша Престо́лу сла́вы Его́ при́сно возноси́ти.

Я́звы, на твое́ младе́нческое те́ло от иуде́й возложе́нныя,/ я́звы врагу́ спасе́ния на́шего яви́шася,/ де́монов победи́телю, Гаврии́ле блаже́нне,/ от и́хже мучи́тельства изба́ви ду́ши на́ша/ и над тех искуше́ний победи́тели предста́тельством твои́м яви́ нас.

Богоро́дичен: От земноро́дных возра́стши и Зижди́теля ро́ждши,/ ра́дуйся, на́ша похвало́, Богоро́дице Чи́стая,/ Тя, я́ко облада́ющую тва́рьми, велича́ем.

Свети́лен.

Подо́бен: Пло́тию усну́в:

Пло́ть на растерза́ние иуде́ом вда́вшаго,/ дух же свой Бо́гу преда́вшаго,/ дне́сь воспои́м во младе́нцех му́ченика,/ того́ приводя́ще в моли́тву о умире́нии Це́ркви и о спасе́нии душ на́ших.

Сла́ва, и ны́не, пра́здника.

На хвали́тех стихи́ры пра́здника 3 и свята́го 3, глас 5:

Ра́дуйся, младе́нцев похвало́ пресла́вная;/ ра́дуйся, му́чеников соприча́стниче/ и росси́йскаго наро́да сла́во пречестна́я,/ от те́мныя погре́бницы просия́вшая/ и правосла́вных сердца́ просвети́вшая./ Ра́дуйся, моли́тв ма́терей скорбя́щих ско́рый слы́шателю;/ ра́дуйся, двоеду́шных челове́к молчали́вый обличи́телю./ Помози́ у́бо нам, пра́ведниче Бо́жий,/ за святу́ю ве́ру кре́пко подвиза́тися/ и моли́тву сотвори́ о спасе́нии душ на́ших.

Ра́дуйся, чуде́с исто́чниче,/ сам же чу́до до́лго терпе́ния яви́выйся;/ ра́дуйся, младе́нческую чистоту́ с му́жеством му́ченика сочета́вый/ и иуде́йское злоче́стие посрами́вый./ Ра́дуйся, Росси́йстей стране́ сокро́вище неоцене́нное/ в твои́х святы́х моще́х дарова́вый/ и моле́ние те́плое ко Христу́ вознося́й/ о умире́нии ми́ра, и Церкве́й стоя́нии,/ и о спасе́нии душ на́ших.

Ра́дуйся, сердца́ всех челове́ков умиля́яй;/ ра́дуйся, твои́м мучи́тельскому наси́льству противле́нием/ и хла́дныя ду́ши покая́нием сокруша́яй./ Ра́дуйся, смире́нных се́рдцем и ни́щих утеше́ние,/ и младе́нцев непосты́дное упова́ние,/ и и́ноков Ева́нгельскому младе́нчеству учи́телю,/ и моли́твенниче о душа́х на́ших.

Сла́ва, глас 2:

Страсте́й Христо́вых седми́цу соверша́ющим христиа́ном/ и ду́ши своя́ ко сре́тению Святы́я Па́схи приуготовля́ющим,/ Гаврии́л младе́нец от иуде́й стра́сть приима́ше/ и, на стене́ погре́бницы те́мныя распина́емый/ за распя́таго Спа́са,/ кро́вь свою́ излива́ше,/ прише́дшу же дню Госпо́дня Воскресе́ния/ дух его́ ко Христу́ в Небе́сная селе́ния отъи́де,/ пло́ть же его́ иуде́и вне гра́да изверго́ша,/ но сия́, нетле́нна пребыва́ющи,/ да́лее до дне́сь о́бщее воскресе́ние пропове́дует/ и уго́дника умоля́ти нас науча́ет,/ да мо́лится непреста́нно о душа́х на́ших.

И ны́не, пра́здника.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на пра́здника пе́снь рядова́я и свята́го пе́снь 3-я. Проки́мен, глас 4: Из уст младе́нец и ссу́щих/ соверши́л еси́ хвалу́. Стих: Небеса́ пове́дают сла́ву Бо́жию, творе́ние же ру́ку Его́ возвеща́ет тве́рдь. Апо́стол, зача́ло 58 от полу́. Бра́тие, отложи́вше вся́ку зло́бу и ле́сть: Коне́ц: Ны́не поми́ловани бы́сте. Ева́нгелие от Матфе́я, зача́ло 74. Прича́стен: Из уст младе́нец и ссу́щих соверши́л еси́ хвалу́.

* * *

А́ще случи́тся па́мять свята́го Гаврии́ла младе́нца во святы́й и вели́кий вто́рник, или́ в вели́кую сре́ду, или́ в четверто́к, и пое́м слу́жбу его́ в неде́лю Ва́ий, я́коже в Ти́пице, во главе́ о хра́мех показа́ся. А́ще ли бу́дет па́мять его́ в вели́кий пято́к, или́ в суббо́ту, или́ в са́мый святы́й де́нь Па́схи, и пое́м слу́жбу его́ в понеде́льник Па́схи; а́ще ли в той понеде́льник бу́дет па́мять свята́го Гео́ргия Победоно́сца, и пое́м слу́жбу свята́го Гаврии́ла во вто́рник Па́схи. Про́чее же пое́м его́ слу́жбу по уста́ву дне свята́го Гео́ргия Победоно́сца, и́же е́сть в 23-й день ме́сяца апреля. Сие́ же разуме́й, я́ко иде́же указа́ся кано́н, или́ стихи́ра, или́ тропа́рь ре́кше пра́здника, не́сть у́бо се пра́здник са́мыя святы́я Па́схи, но по Трио́ди дне того́, сие́ е́сть седми́чнаго дне Антипа́схи или́ Мироно́сиц, или́ разсла́бленнаго, или́ Преполове́ния, в о́ньже де́нь обря́щеши в Трио́ди подоба́ющия стихи́ры, и кано́ны, и седа́льны.

А́ще ли бу́деши пе́ти слу́жбу свята́го Гаврии́ла, кроме́ Пятидеся́тницы или́ неде́ли цветоно́сия, во ин де́нь го́да, и тогда́ вме́сто кано́на пра́здника глаго́ли кано́н Богоро́дицы от Окто́иха настоящего гла́са и Богоро́дичны воскре́сны стихи́р, и седа́льнов, и тропаре́й и свети́льна в то́йже глас, то́чию на Го́споди, воззва́х: Богоро́дичен пе́рвый настоя́щаго гла́са. А́ще ли бу́дет ко́е-ли́бо попра́зднство, то па́ки ин уста́в обря́щеши ка́ко подоба́ет тогда́ пра́вити па́мять свята́го, иму́щаго полиеле́й или́ бде́ние: е́сть бо сему́ о́браз января в 11-й день на па́мять преподо́бнаго Феодо́сия Вели́каго и попра́зднства Богоявле́ния. То́жде и в глава́х Типико́на о хра́мех обря́щеши.

МОЛИ́ТВА

Младе́нческаго незло́бия храни́телю и му́ченическаго му́жества носи́телю, Гаврии́ле блаже́нне, страны́ на́шея адама́нте драгоце́нный и иуде́йскаго нече́стия обличи́телю! К тебе́ мы, гре́шнии, моли́твенно прибега́ем и, о гресе́х свои́х сокруша́ющеся, малоду́шия же своего́ стыдя́щеся, любо́вию зове́м ти: на́ших скверн не возгнуша́йся, чистоты́ сый сокро́вище, на́шего малоду́шия не омерзи́, долготерпе́ния учи́телю, но па́че сих, не́мощи на́ша от Небе́с ви́дя, тех исцеле́ния нам твое́ю пода́ждь моли́твою и твоея́ Христу́ ве́рности подража́тели нас бы́ти научи́. А́ще ли терпели́вно крест искуше́ний и злострада́ний понести́ не возмо́жем, оба́че и тогда́ ми́лостивыя твоея́ по́мощи не лиши́ нас, уго́дниче Бо́жий, но свобо́ду и осла́бу нам у Го́спода испроси́. Та́же и моля́щияся о ча́дех свои́х ма́тери услы́ши, здра́вию и спасе́нию младе́нцем от Го́спода пода́тися умоля́яй. Не́сть такова́го жесто́каго се́рдца, е́же слы́шанием о му́ках твои́х, святы́й младе́нче, не умили́тся, и а́ще кроме́ сего́ умиле́ннаго воздыха́ния никоего́же блага́го дея́ния принести́ возмо́жем, но и таковы́м умиле́нным по́мыслом на́ши умы́ и се́рдце, блаже́нне, просвети́в, на исправле́ние жития́ на́шего благода́тию Бо́жиею нас наста́ви. Вложи́ в нас о спасе́нии души́ и о сла́ве Бо́жией ре́вность неуста́нную и о ча́се сме́ртнем па́мять неусы́пную храни́ти помози́ нам. Наипа́че же в сме́ртнем успе́нии на́шем терза́ния де́монская и по́мыслы отча́яния от душ на́ших предста́тельством твои́м отжени́ и сия́ упова́нием Боже́ственнаго проще́ния испо́лни, во е́же и тогда́ и ны́не сла́вити нам милосе́рдие Отца́, и Сы́на, и Свята́го Ду́ха и твое́ кре́пкое заступле́ние во ве́ки веко́в. Ами́нь.

Святой мученик-младенец Гавриил Белостокский (Заблудовский)

Святой мученик-младенец Гавриил Белостокский (Заблудовский) родился в 1684 году в деревне Зверьки Гродненского повета, в семье православных родителей Петра и Анастасии Гавдель. В 1690 году, в день, когда родителей не было дома, младенец был увезен в Белосток евреем-арендатором, где и претерпел мученическую кончину. Тело святого мученика-младенца было найдено и предано христианскому погребению. Через 30 лет после погребения мощи святого Гавриила оставались нетленными. В 1746 году храм в Заблудове, в котором был погребен младенец, сгорел (возможно, был сожжен), но святые мощи уцелели. Они были перенесены в Слуцкий Троицкий монастырь. Тогда же было установлено празднование святому мученику Гавриилу. Слуцкий архимандрит Михаил Козачинский составил стихотворную повесть о мученике Гаврииле.

Преподо́бнаго Иоаса́фа Се́рбскаго, Метеори́та

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 8: пра́здника 3 и преподо́бнаго 5, глас 4:

Распя́лся еси́ ми́ру/ и взял еси́ на ра́мена крест,/ Сло́ва Бо́жия стопа́м после́довал еси́,/ жите́йскую же любо́вь и вся́кое пристра́стие отря́с./ Отону́дуже и доброде́тельми просия́в,/ Боже́ственными де́тельми насле́дие ве́чное, Иоаса́фе, восприя́л еси́.

Боже́ственным промышле́нием наста́влен быв/ и просвеще́н Трисия́нною Богонача́льною све́тлостию,/ мир оста́вил еси́ и мглу страсте́й,/ к Небеси́ же веду́щую стезю́ ше́ствовал еси́,/ име́я Помо́щника еди́на Благоде́теля/ и Всеще́драго Го́спода.

Украси́вся све́тлостию ра́зума,/ ду́шу твою́ просвети́л еси́ Боже́ственными за́поведьми/ и, вся земна́я оста́вив,/ мона́шески жи́ти изво́лил еси́,/ соблюда́я за́поведи Христо́вы,/ Его́же моли́, преподо́бне о́тче Иоаса́фе,/ да спасе́т ду́ши на́ша.

От де́тска жи́знь свою́ Христу́ Бо́гу возложи́л еси́,/ преподо́бне о́тче Иоаса́фе,/ и, ху́ждшее покори́в лу́чшему,/ плотски́я стра́сти по́мыслу повину́л еси́,/ к му́дрому же ста́рцу Афана́сию прише́л еси́/ и с ним равноа́нгельно на земли́ пожи́л еси́,/ равноа́нгельную же че́сть досто́йно получи́л еси́./ Те́мже моли́ся с ним ко Го́споду,/ да спасе́т ду́ши на́ша.

Возлюби́в красоту́ Боже́ственную в дому́ Госпо́дни,/ иде́же шум пра́зднующих, ра́достно пою́щих,/ вся кра́сная ми́ра сего́,/ Иоаса́фе всече́стне, оста́вил еси́,/ обветша́вшаго же челове́ка совле́кся,/ незави́стным воздержа́нием/ обле́клся еси́ в но́ваго по Христу́,/ Его́же моли́, да спасе́т ду́ши на́ша.

Сла́ва, глас 6:

Смире́нием благосты́нным украша́яся,/ преподо́бне о́тче Иоаса́фе,/ возне́слся еси́ к высоте́ доброде́телей/ и безсме́ртную жи́знь и блаже́нство получи́л еси́,/ укрепля́ем ве́рою, наде́ждою и любо́вию./ Тем мо́лим тя, преблаже́нне,/ Христа́ Бо́га моли́ о нас,/ ве́рою твою́ па́мять соверша́ющих,/ спасти́ся нам напа́стей, и треволне́ния,/ и бу́ри, и бед, и страсте́й/ и всему́ ми́ру мир дарова́ти.

И ны́не, пра́здника.

Вход. Проки́мен дне. И чте́ния 3 преподо́бническая.

Прему́дрости Соломо́ни чте́ние (глава 3):

Прему́дрости Соломо́ни чте́ние (глава́ 4):

Прему́дрости Соломо́ни чте́ние (глава́ 5):

На лити́и стихи́ры самогла́сны, глас 1:

Христо́вою си́лою ду́шу свою́, о́тче, укрепи́в,/ Христо́во жили́ще све́тло был еси́,/ святы́ни испо́лнен, кро́тостию и смире́нием сия́я,/ к присносу́щней сла́ве и к Све́ту невече́рнему преста́вился еси́,/ иде́же непреста́нно мо́лиши,/ о е́же спасти́ся всем нам.

Украси́в житие́ свое́ мно́гим воздержа́нием/ отве́рглся еси́ ми́ра/ и вся, я́же в ми́ре кра́сная, преоби́дел еси́,/ ева́нгельским уче́нием после́дуя,/ жесто́ким житие́м те́ло свое́ изнуря́л еси́./ Те́мже на Небесе́х водворя́ешися/ и ны́не моли́ Христа́ Бо́га/ согреше́ний оставле́ние дарова́ти ро́ду се́рбскому/ и всем, чту́щим святу́ю па́мять твою́.

Сла́ва, глас 2:

Преподо́бне о́тче Иоаса́фе приснопа́мятне,/ многосве́тлый свети́льниче ро́да се́рбскаго,/ ты бо, мона́шеское житие́ возлюби́в,/ по́стников был еси́ похвала́,/ те́сный пу́ть ше́ствовал еси́/ и яви́лся еси́ А́нгелом собесе́дник,/ преподо́бным и пра́ведным сожи́тель./ Те́мже мо́лим тя,/ моли́ся непреста́нно/ о спасе́нии всего́ ро́да се́рбскаго.

И ны́не, пра́здника.

На стихо́вне стихи́ры, глас 1:

Пред лице́м Влады́ки твоего́ предстоя́, преподо́бне,/ моли́ся о избавле́нии ро́да се́рбскаго/ от рабо́ты тьмы́ и страсте́й мучи́тельства.

Стих: Честна́ пред Го́сподем/ сме́рть преподо́бных Его́.

Да прича́стник яви́шися нетле́нныя жи́зни,/ вся привре́менная, Богому́дре, пренебре́гл еси́/ и, к Бо́гу преше́д,/ непреста́нно мо́лиши спасти́ся всем нам.

Стих: Что возда́м Го́сподеви о всех,/ я́же воздаде́ ми?

Любо́вию Влады́чнею подстрека́ем,/ вся до́льная оста́вил еси́,/ и́го ле́гкое му́жески на ра́мо взем./ Тем ны́не, ра́дуяся,/ Влады́це всех Христу́ предстои́ши.

Сла́ва, глас 6:

Умертви́в двиза́ния пло́ти своея́,/ кре́пким поще́нием, преподо́бне о́тче,/ яви́лся еси́ Влады́чне оби́телище,/ Его́же моли́ изба́витися скорбе́й и страсте́й смуще́ния/ всем, к тебе́ прибега́ющим.

И ны́не, пра́здника.

Тропа́рь, глас 3:

Се́рдцем и душе́ю возлюби́в Христа́ Го́спода,/ вся кра́сная ми́ра сего́ оста́вил еси́,/ изво́лил же еси́ па́че в смире́нии и послуша́нии Бо́гу служи́ти,/ не́жели на престо́ле ца́рстем владе́ти./ Сего́ ра́ди благоче́стно восхваля́ем тя/ и, святу́ю па́мять твою́ соверша́юще, вопие́м ти:/ о́тче Иоаса́фе Богоблаже́нне,/ моли́ Христа́ Бо́га о спасе́нии ро́да на́шего христиа́нскаго.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, преподо́бнаго. И ны́не, пра́здника.

По 1-м стихосло́вии седа́лен, глас 8:

Мимотеку́щую сла́ву на земли́ в ничто́же вмени́в,/ отложи́л еси́ скиптр влады́чествия/ и избра́л еси́ ри́зу мона́шескую./ Но, оста́вив на земли́ ца́рство вре́менное,/ восприя́л еси́ бога́тство Небе́сное и сла́ву ве́чную./ Те́мже ублажа́ем тя, преподо́бне о́тче Иоаса́фе, и ве́рно вопие́м ти:/ моли́ Христа́ Бо́га дарова́ти ми́ру мир и всем нам ве́лию ми́лость.

Сла́ва, и ны́не, пра́здника.

По 2-м стихосло́вии седа́лен, глас 4:

Ду́шу твою́ благода́ти сло́во облиста́, я́коже заря́ све́та,/ тобо́ю бо вся Метео́рская гора́ испо́лнися Христо́ва сия́ния,/ Ему́же причаща́ющиися, сокро́вищу му́дрости твоея́ удивля́емся.

Сла́ва, и ны́не, пра́здника.

По полиеле́и седа́лен, глас 8:

Возше́д на го́ру ра́зума доброде́телей,/ к чу́вственней же горе́ Метео́рстей сама́го себе́ возве́л еси́, подо́бно я́ко ина́го Исаа́ка,/ иде́же вме́сто всесожже́ния овча́ се́рдце твое́ мы́сленно поже́рл еси́.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех,/ я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Престо́л на земли́ оста́вил еси́/ и Метео́рскую го́ру пости́гл еси́,/ иде́же высоту́ благоро́дия/ в раба́ смире́ния измени́в,/ моли́твами ду́шу просвети́л еси́,/ до́бре мона́шески пребы́в,/ А́нгельски пожи́л еси́./ И я́ко ны́не предстоя́ Христу́ Бо́гу,/ моли́ спасти́ся душа́м на́шим.

Кано́н пра́здника со ирмосо́м на 6 и преподо́бнаго на 8, глас 2, его́же краегране́сие: Пою́ и сла́влю Иоаса́фа му́драго. В Богоро́дичнах же и в седа́льне: про́та Ми́рко.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть:/ препросла́вленный Госпо́дь сла́вно бо просла́вися.

Преподо́бне о́тче Иоаса́фе,/ да́ждь ми сло́во, недосто́йному рабу́ твоему́,/ да возмогу́ досто́йно воспе́ти святу́ю па́мять твою́.

О́тче Иоаса́фе,/ ты на земли́ равноа́нгельно пожи́л еси́,/ равноа́нгельную же че́сть досто́йно получи́л еси́/ и ны́не со все́ми А́нгелы Бо́гу предстои́ши.

Ю́ность твоя́ чи́ста, житие́ же твое́ све́тло,/ я́ко пра́вило изве́стно в тебе́, о́тче, Боже́ственныя доброде́тели показа́ся.

Богоро́дичен: Покро́в Боже́ственный, ти́хое приста́нище,/ Пречи́стую Де́ву Мари́ю, ве́рнии, пе́сньми похва́лим, Богома́терь обра́дованную,/ всех же ве́рных Предста́тельницу.

Песнь 3

Ирмо́с: Процвела́ е́сть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием, Твои́м,/ в не́йже утверди́ся мое́ се́рдце.

И́хже о́ко не ви́де, ни у́хо слы́ша,/ ни на се́рдце челове́ка взыдо́ша,/ я́же угото́вана Бо́гом Того́ возлю́бльшим,/ сих ты возжеле́л еси́, Иоаса́фе Богодохнове́нне.

Соше́дшеся дне́сь, чту́ще любо́вию па́мять твою́, Иоаса́фе прему́дре,/ мо́лим тя приле́жно:/ моли́ о нас, ве́рно пра́зднующих честну́ю па́мять твою́.

Лику́я со А́нгелы на Небесе́х, не забу́ди нас, преподо́бне о́тче,/ но при́сно моли́ся ко Го́споду/ дарова́ти ми́ру мир и всем скорбя́щим утеше́ние.

Богоро́дичен: Ря́сны златы́ми укра́шена, Влады́чице,/ я́ко Цари́ца предстои́ши ны́не одесну́ю Царя́ и Бо́га,/ моля́щи о рабе́х Твои́х.

Конда́к и и́кос пра́здника.

Седа́лен, глас 8:

О́тче Богоно́сне Иоаса́фе,/ житие́ свое́ украси́л еси́ воздержа́нием/ и, попра́в вся прило́ги вра́жия,/ присво́ился еси́ Бо́гу еди́ному./ Тем ны́не в ве́чней сла́ве со А́нгелы лику́я,/ с ни́миже моли́ непреста́нно поми́ловатися всем нам.

Сла́ва, глас то́йже:

Тя ны́не ублажа́ем, преподо́бне,/ ты бо, влады́чество на земли́ оста́вив, Небе́сное насле́довал еси́./ Те́мже моли́твами прося́щим тя подае́ши Боже́ственная дарова́ния,/ моли́ся у́бо и о нас, чту́щих с любо́вию святу́ю па́мять твою́.

И ны́не, пра́здника.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

А́ще и владе́тель на земли́ был еси́,/ но, после́дуя уче́нию преподо́бнаго ста́рца Афана́сия,/ сочта́лся еси́ преподо́бным./ Тем с ни́ми тя почита́ем.

Возсия́в, я́ко со́лнце, и сын све́та быв,/ свя́то твое́ проводи́л еси́ житие́./ Тем ны́не весели́шися со все́ми святы́ми.

Ле́потственно¹⁹ возсия́ нам дне́сь па́мять твоя́ свята́я, преподо́бне о́тче Иоаса́фе./ Тем мо́лим тя:/ проси́ нам от Христа́ благода́ти, и ми́лости,/ и согреше́ний избавле́ние.

Богоро́дичен: А́дова сокро́вища упраздни́шася/ и сме́ртное мучи́тельство преста́ воста́нием Ро́ждшагося из Тебе́,/ и жи́зни сокро́вища напо́лнишася.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Ю́нии и ста́рцы, мона́си и свяще́нницы,/ славосло́вят ку́пно блаже́нную па́мять твою́,/ Богодохнове́нне о́тче Иоаса́фе.

Иоаса́фе Богоблаже́нне,/ ты яви́лся еси́ безсме́ртия прича́стник/ и о́бщник Боже́ственнаго Ца́рствия/ и с высоты́ бде́еши над певцы́ твои́ми./ Проси́ у Бо́га проще́ние грехо́в их/ и прича́стие в сла́ве Его́.

О Иоаса́фе, равноа́нгельне,/ име́ющу ти жили́ще на высоте́ Метео́рстей, возсия́ тебе́ с высоты́ Госпо́дь от Де́вы,/ Его́же ты возжеле́л еси́.

Богоро́дичен: Моего́ ума́ стра́сти лю́тыя утоли́, Ма́ти Бо́жия,/ и испра́ви мя, заблу́ждшаго,/ я́ко да сла́влю Тя.

Песнь 6

А́нгела на земли́ и на Небеси́ челове́ка вем тя, преподо́бне,/ насажде́н бо в дому́ Госпо́дни,/ процве́л еси́ пра́ведно, я́ко кедр в пусты́ни,/ умно́жив Христо́во ста́до слове́сных ове́ц в преподо́бии и пра́вде.

Соде́лав ду́шу твою́ храм Ду́ха Свята́го,/ премину́л еси́ зе́млю до́льную,/ Небе́сную же жи́знь стяжа́л еси́/ и со Безпло́тными ли́ки смеси́лся еси́./ Тем и кро́тких зе́млю насле́довал еси́.

А́нгельски на земли́, я́ко Безпло́тен, пожи́в,/ мир преоби́дел еси́, сла́вне,/ обветша́вшаго челове́ка я́ве, о́тче, совле́клся еси́/ и, я́ко скве́рну ри́зу отве́рг с грехо́вными страстьми́,/ в но́ваго обле́клся еси́,/ е́же по подо́бию о Христе́, преподо́бне.

Богоро́дичен: Из Тебе́ прозябе́ Цвет неувяда́емый,/ облагово́нствуя все челове́чество Боже́ственным ми́ром естества́ Своего́,/ и И́же Отцу́ Собезнача́льный из Тебе́ бы́сть ле́том, Де́во Всенепоро́чная.

Конда́к, глас 4:

Ве́дый прехва́льное житие́ твое́ и чистоту́/ и безме́рное смиренному́дрие,/ преподо́бный Афана́сий наименова́ тя прее́мника своего́,/ ты же показа́лся еси́ досто́ин сего́ нарече́ния/ и, служа́ Триипоста́сному Бо́гу,/ соблю́л еси́ вве́ренную ти оби́тель Метео́рскую./ Те́мже мо́лим тя, о́тче Иоаса́фе,/ не забу́ди оте́чество твое́ и ве́сь се́рбский род,/ но моли́ся всегда́ о всех нас

И́кос:

Утверди́вся стра́хом Христо́вым,/ ве́сь распя́лся еси́ ми́рови, Богоно́се о́тче Иоаса́фе,/ и, возвы́сив к Бо́гу серде́чное жела́ние, нищету́ возлюби́л еси́,/ в нищете́ же пожи́в, доброде́тельми обогати́лся еси́,/ испо́лнен же быв све́тлостию жития́,/ хра́мы благоле́пныя на Метео́рах Бо́гу воздви́гл еси́/ и вся оби́тели Метеори́тския ку́пно со сестро́ю свое́ю Мари́ею бога́тно снабде́л еси́./ Сего́ ра́ди и мы, ве́дуще тя храм Свята́го Ду́ха, приле́жно мо́лим тя:/ не забу́ди оте́чество твое́ и ве́сь се́рбский род,/ но моли́ся всегда́ о всех нас.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ е́сть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Фи́никс, насажде́нный в дому́ Госпо́дни, яви́лся еси́,/ мно́жеством бо мона́хов процве́л еси́/ и, я́ко кедр, и́же в Лива́не, доброде́тель умно́жил еси́.

А́ще и владе́тель был еси́,/ но, презре́в сла́дости привре́менныя,/ благослове́нное целому́дрие соблю́л еси́.

Метеори́тская похвала́ яви́лся еси́,/ поревнова́в блаже́нному Афана́сию – Метеори́ту,/ нра́вом и житие́м после́дуя ему́,/ страх бо Бо́жий восприи́м в се́рдцы свое́м,/ де́лы свои́ми ве́сь род се́рбский возвесели́л еси́.

Богоро́дичен: Родила́ еси́ па́че смы́сла и естества́, Богоро́дице Де́во, Свята́го святы́х,/ подаю́щи хода́тайством Твои́м освяще́ние и избавле́ние и оставле́ние грехо́в/ всем ве́рным, сла́вящим Его́ воскресе́ние.

Песнь 8

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода и превозноси́те во вся ве́ки.

Удаля́яся пути́ простра́ннаго,/ те́сный же предпочита́я,/ и́нок и́стинен был еси́/ и, дости́г широты́ ра́йския, ра́достно о Христе́ взыва́еши:/ по́йте и превозноси́те во вся ве́ки.

Да́ры мно́гими вся оби́тели Метео́рския ще́дро снабдева́л еси́,/ сим же ду́шу свою́ обогати́л еси́./ Те́мже ны́не со все́ми пра́ведными, ра́дуяся, о Христе́ пое́ши:/ по́йте и превозноси́те во вся ве́ки.

Ре́вность Боже́ственнаго жития́ твоего́/ яви́ тя и́стиннаго наста́вника мно́жества мона́хов,/ и́бо стяжа́л еси́ Христа́ соде́тельствующа./ Ему́же ны́не со все́ми святы́ми восклица́еши:/ по́йте и превозноси́те во вся ве́ки.

Богоро́дичен: Красне́йшаго добро́тою родила́ еси́, Всенепоро́чная,/ Сего́ умоли́ изба́вити мя огня́,/ и́бо житие́ мое́ все отягчи́ся,/ все порабо́тися лю́тыми греха́ми,/ аз же воспою́ к Нему́:/ по́йте и превозноси́те во вся ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

А́нгелом сожи́тель быв,/ я́ко в раи́ воздержа́ния процве́л еси́/ и, я́ко ма́слина, псало́мски яви́лся еси́,/ помазу́я сердца́ на́ша еле́ем трудо́в твои́х,/ благоче́стно чту́щих свяще́нную па́мять твою́.

Глас Христа́ твоего́ послу́шав, зако́н Бо́жий сохраня́я невреди́мо,/ чистоту́ и смиренному́дрие от младе́нства име́л еси́,/ и житие́ нескве́рно, и нрав ми́лостивен, Иоаса́фе, о́тче досточу́дне.

О́тче Иоаса́фе блаже́нне,/ доброде́тельми бога́т быв,/ испо́лнился еси́ све́тлостию жития́/ и преста́вился еси́ к Вы́шнему гра́ду,/ сего́ ра́ди мо́лим тя:/ моли́ся ко Го́споду изба́витися от бед ро́ду се́рбскому.

Богоро́дичен: Отрокови́це Богоневе́сто,/ из ко́рене Иессе́ова Ты прозябла́ еси́/ и родила́ еси́ Ко́рень, всех Царя́, Христа́ Бо́га на́шего,/ от Него́же вси ве́рнии прозяба́ют и получа́ют спасе́ние./ Тем непреста́нно моли́ Его́,/ да спасе́т правосла́вный род се́рбский.

Свети́лен:

Све́том Единосу́щныя Тро́ицы озаря́ем,/ возсия́л еси́ све́тлыми заря́ми доброде́тельных по́двигов твои́х,/ озари́ све́тлостию и ве́сь правосла́вный род се́рбский, да вси взыва́ем ти:/ ра́дуйся, о́тче Иоаса́фе, метеори́тов похвало́.

Сла́ва, и ны́не, пра́здника.

На хвали́тех стихи́ры на 4, глас 8:

Оста́вив престо́л на земли́, я́ко ве́щь тле́нную,/ и сла́ву теку́щую,/ восприя́л еси́ вои́стинну бога́тство нетле́емое и сла́ву ве́чную./ Те́мже блажи́м свято́е твое́ успе́ние,/ и, воспева́юще, вопие́м ти:/ име́я к Бо́гу дерзнове́ние,/ помина́й нас всегда́, Иоаса́фе всеблаже́нне.

В Метео́рскую го́ру всели́вся,/ пречестны́й храм Преображе́ния Госпо́дня в ней обнови́л еси́,/ украша́я его́ бога́тно./ Сего́ ра́ди и счи́слен был еси́ к самому́ кти́тору,/ преподо́бному Афана́сию./ С ним же моли́ся Христу́ Бо́гу/ грехо́в оставле́ние дарова́ти/ чту́щим любо́вию святу́ю па́мять ва́шу.

Щедр и даролюбе́зный показа́лся еси́ к метео́рским святы́ням,/ обогаща́я их мно́гими дарова́ньми и защища́я их./ К тому́ и боголюби́ва сестра́ твоя́ Мари́я/ ще́дро помога́ше ти./ Тем ны́не мо́лим тя:/ помози́ и нам, рабо́м твои́м,/ святу́ю па́мять твою́ почита́ющим,/ и испроси́ всем ве́лию и бога́тую ми́лость.

Име́я всегда́ во уме́ свое́м ра́йскую жи́знь/ и та́мо святы́х весе́лие,/ всю жи́знь на земли́, преподо́бне о́тче,/ во смире́нии и послуша́нии проше́л еси́,/ повину́яся зако́ну Бо́жию./ Те́мже и безстра́стия благода́тию обогати́лся еси́,/ ю́же испроси́ и всем нам,/ ублажа́ющим сла́вное твое́ успе́ние.

Сла́ва, глас 1:

От ю́ности твоея́ ум к Бо́гу впери́в,/ слуга́ Бо́жий был еси́,/ сохраня́я я́ко свяще́нник спаси́тельная повеле́ния,/ мирско́е смуще́ние оста́вил еси́/ и, я́ко до́брый купе́ц, тле́нными нетле́нная искупи́л еси́./ Те́мже ны́не, па́мять твою́ почита́юще, вопие́м:/ сла́ва Бо́гу, просвети́вшему тя,/ сла́ва Венча́вшему тя,/ сла́ва святу́ю твою́ па́мять Просла́вльшему.

И ны́не, пра́здника.

Славосло́вие вели́кое. Ектении́ и отпу́ст.

НА ЛИТУРГИ́И

Блаже́нны от кано́на пра́здника, пе́снь рядова́я, и от кано́на преподо́бнаго, пе́снь 3-я. Проки́мен пра́здника и преподо́бнаго, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех,/ я́же воздаде́ ми? Апо́стол дне и преподо́бнаго ко Гала́том, зача́ло 213. Аллилу́ия, глас 6: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Луки́, зача́ло 77. Прича́стен пра́здника и преподо́бнаго: В па́мять ве́чную:

Преподобный Иоасаф Метеорский

Когда сербский царь Душан Сильный Неманич (1331–1355) овладел Албанией и греческой областью Эпир, а его полководец Прелюб завоевал область Фесалию (1348), Душан провозгласил себя царем сербов, греков и албанцев, деспотом Арти (Эпир) и комитом Влахии (Фесалии). Правление этими областями он разделил соответственно: Фесалию – полководцу Прелюбу, а Албанию своему шурину, брату царицы Елены, деспоту Иоанну Комнену Асену. Область Эпирскую он отдал своему брату Симеону-Синиши, который женился на дочери эпирской деспотиссы Анны (от первого брака) Фомаиде, сестре бывшего деспота эпирского Никифора II (1335–1340). Мать Симеона, Мария, была гречанка и происходила из византийской царской семьи Палеологов (поэтому и Симеона стали называть Палеологом). Симеону и Фомаиде даровал Господь двоих детей, Иоанна и Марию, называемую Ангелина. По кончине царя Душана († 1335) Симеон Урош Палеолог (1355–1369) провозгласил себя царем и самодержцем греков, сербов и албанцев.

После смерти правителя Фесалии полководца Прелюба, царь Симеон Урош стал править и Фесалией. Свою столицу он переместил в центр Фесалии – в город Трикалу. Сын Прелюба, Фома, женился на дочери царя Симеона Уроша, Марии-Ангелине, и получил в управление Эпирскую область.

Перед своей смертью († около 1369) он передал царство своему сыну – Иоанну Урошу Неманичу-Палеологу, т. е. преподобному Иоасафу.

Святой Иоанн, в монашестве Иоасаф, родился около 1350 года. Детские годы он провел при дворе своих родителей, которые дали ему хорошее христианское воспитание. Еще в детстве он стремился к духовной жизни и отвращался мирской суеты. Умом он восходил к Богу, к вечным и непреходящим сокровищам на Небесах. Поэтому большую часть времени он проводил в храмах и в монастырях, а особенно часто посещал подвижников Святой Горы и монастыри на Метеорах. Перед смертью царь Симеон Урош Палеолог передал Иоанну престол. Но святой Иоанн, возлюбивший Господа больше, чем царские почести, вскоре передал власть своему родственнику Алексию-Ангелу Филантропину.

Святой Иоанн, будучи духовным сыном преподобного Афанасия Метеорского, поселился в общежительном монастыре на Платилитосу, т. е. на Великом Метеоре у преподобного Афанасия, приняв постриг и новое монашеское имя Иоасаф. С самого начала преподобный Иоасаф вел строгую жизнь и совершал богоугодные подвиги и добродетели. Вскоре он достиг такого совершенства, что преподобный Афанасий, умирая († 1382), благословил его как своего наследника быть игуменом монастыря.

Вместе с преподобным Афанасием преподобный Иоасаф построил много новых келлий, монастырскую больницу и другие помещения. Кроме того, он щедро помогал и другим метеорским монастырям, защищая их права своими царскими грамотами.

Когда турки захватили Фесалию, преподобный Иоасаф был вынужден в 1394 году на некоторое время удалиться на Святую Гору. Он прожил в монастыре Ватопед несколько лет. Около 1401 года преподобный Иоасаф вновь возвратился на высокие Метеоры. Там он и преставился ко Господу, Которого так много любил и жаждал. Блаженная кончина застала преподобного Иоасафа в монашеских молитвах и подвигах в маленькой келлии на Метеоре около 1422–1423 года. Святые мощи преподобного Иоасафа доныне почивают в его святом монастыре в честь Преображения Господня, вместе с мощами преподобного Афанасия Метеорского.

* * *

¹⁶

Камы́к – камней.

¹⁷

Возбну́в – проснувшись, очнувшись.

¹⁸

Триста́ты – военачальники.

¹⁹

Ле́потственно – пристойно, украшено.

19-й день21-й день

Источник: Минея : В 12-и том. - Москва : Издательский Совет Русской Православной Церкви, 2002-. / Апрель. - 2002. / Ч. 1. – 310 с.; Ч. 2. - 397 с.

Telegram-каналы

Комментарии для сайта Cackle