Божественная литургия святого славного апостола Иакова, брата Божия и первого иерарха Иерусалимского

Предлагаемый текст литургии Святого Апостола Иакова брата Божия и первого Иерарха Иерусалимского переведен с греческого служебника означенной литургии, изданного в 1931 году Александрийской Православной Патриархией. По этому служебнику в Иерусалиме однажды в год, 23 октября, в день памяти святого Апостола Иакова брата Господня, совершается Божественная литургия святого Апостола Иакова. Поэтому настоящее издание не представляет собою издания научно-археологического, а является изданием литургически-живого чина, ибо издаваемая литургия служится в наши в Православной Церкви Иерусалимской, на Кипре и в Александрии. В виду этого, перевод сделан не на русский язык, а на церковно-славянский, т.е. на богослужебный язык славянских Православных Церквей, чтобы сохранить богослужебный характер перевода. Эти же причины заставили нас особенно внимательно отнестись к уставным указаниям, которыми мы и постарались снабдить издание, желая передать не только литургический текст, но и предание внешней обстановки богослужения и богослужебных действий.

Примечания эти сделаны нами на основании личного наблюдения во время совершения литургии св. Апостола Иакова Блаженнейшим Тимофеем Патриархом Иерусалимским 23 октября 1935 года в Св. граде Иерусалиме, и дополнены по изданию этой литургии (на греческом языке), сделанному Архиепископом Закифским Дионисием Лата – в тех случаях, когда это требовалось (при служении этой литургии одним иереем с диаконом).

Краткие общие сведения относительно истории этой литургии, ее судьбы в восточных церквях, а также более подробные сведения относительно перевод даны нами в вводной статье к изданию настоящей литургии на страницах журнала “Святая Земля” (№1) за 1937 года, в каковом журнале и напечатан нижеследующий текст в разных номерах в течение 1937 года. К упомянутой статье мы и отсылаем интересующихся.

Долгом своим считаем выразить искреннюю благодарность высокоученому архимандриту Иерусалимской Патриархии о. Каллисту, доставившему нам греческий служебник литургии Св. Апостола Иакова и много помогшему своими учеными советами.

Все указания относительно настоящего перевода и издания будут приняты нами с благодарностью.

Святой город Иерусалим.

10 февраля 1937 г.

Св. священномученика Харалампия.

* * *

Поставляется на среде храма амвон, подобный амвону, на нем же стоит архиерей в начале Божественной литургии святого Иоанна Златоуста или Василия Великого, и на сем амвоне поставляется аналогий, зря к западу. Если служит архиерей, поставляются седалища на амвоне, одно посередине архиерееви, таже по обою страну, ступенью ниже, седалища пресвитером, вси зряще к западу, восточнее аналогия.

Приспевшу времени Божественныя службы, приходит архиерей (или иерей, аще архиерей не литургисает) с хотящими сослужити ему пресвитерами и диаконами и вошедши в храм целует святые иконы ничтоже глаголя, и входит во святый олтарь северной дверью. Сотворив поклонение святей трапезе, облачаются вси во вся священныя одежды. Диакони же препоясуются орарями своими и тако пребывают во все время службы. Святитель же саккос не облачает, но вместо него пресвитерский фелонь и поверх него омофорий великий, его же не отлагает во все время Божественной службы. Такожде ни крест ниже енколпион одевает, ниже митры.

Ведомо буди, яко дикирий с трикирием и орлецы не потребны суть на литургии святого Апостола Иакова, точию пастырский жезл архиереев и той без плата, сиречь, сулка.

И полагаются на святей трапезе со Святым Евангелием по обою страну его книги Божественных Писаний: едина книга писаний апостольских, иная книга писаний пророческих.

Егда же облачатся все, отходит один из пресвитеров в предложение и приуготовляет святый дискос и святый потир, таже ничтоже глаголя изымает из просфоры агнец, якоже обычно есть на литургии златоустовой, точию не приглаголет ничесоже. Таже вливает вино во святый потир и растворяет е водой по обычаю, паки ничтоже глаголя. И так скончав приуготовление, не покрыв сосуды, отходит к святей трапезе. Ведомо же буди, яко в Закинфе покрывают сосуды обычно, ничто же глаголя.

Диаконы же изыдут из святаго олтаря и станут на солее по обою страну святых дверей, два два, зря к народу, сиречь, к западу. Аще един служит диакон, делает такожде.

И станет архиерей (или иерей, аще служит един токмо иерей) пред святою трапезою, пресвитеры же по обю страну ея, якоже обычай есть. И глаголет архиерей тайно молитву сию, стояще пред святою трапезою и зря к востоку:

Оскверненна грехми многими, да не презриши мя, Владыко Господи Боже наш. Се бо приступих к Божественному сему и пренебесному Твоему Таинству, не яко сый достоин, но взирая на Твою благостыню. Глас ти пущаю: Боже, милостив буди ми грешному: согреших на небо и пред Тобою и несмь достоин воззрети на святую Твою сию и духовную трапезу, на ней же Единородный Твой Сын и Господь наш Иисус Христос, мною грешным и всякою скверною окалянным, тайно предлагается в жертву. Сего ради Тебе моление и благодарение приношу, еже ниспослати ми Духа Твоего Утешителя, укрепляюща, утверждающа мя к службе сей, и от Тебе ми возвещенный глас неосужденно проповедати людем сподоби, во Христе Иисусе Господе нашем, с Ним же благословен еси, со Всесвятым, и Благим, и Животворящим и Единосущным Твоим Духом, ныне и присно и во веки веков.

И по молитве отверзается завеса и святыя двери, архиерей же (или иерей) стояще пред святою трапезою возглашает нам восставшим:

Слава Отцу, и Сыну, и Святому Духу, Троичному и Единичному Свету Божества, сущаго во Троице единичне и разделяемого нераздельне. Троица бо Едина Бог Вседержитель, Его же славу небеса поведают, земля же Его владычество и море Его державу, и всякая чувственная и умная тварь Его величество выну проповедуют. Яко Тому подобает всякая слава, честь, держава, величие же и великолепие, ныне и присно и во веки веков.

Людие отвещают: Аминь.

И глаголет первый пресвитер в слышание всем молитву сию:

Благодетелю и Царю веков и всея твари Содетелю, приим приходящую Ти чрез Христа Твоего Церковь Твою. Коемуждо полезное исполни, приведи всех в совершение и достойны ны соделай благодати освящения Твоего, совокупляя ны во святую Твою соборную и апостольскую Церковь, юже стяжал еси честною кровию Единородного Сына Твоего, Господа же и Спаса нашего Иисуса Христа, с Ним же благословен еси и препрославлен со Всесвятым, и Благим, и Животворящим Твоим Духом, ныне и присно, и во веки веков.

Людие: Аминь.

Диакон же, став посреди солеи и зря к людям глаголет: Господу помолимся.

И ничтоже людем отвещавшим, приемлет архиерей (или иерей) кадильницу и глаголет молитву сию пред святою трапезою, зря к востоку:

Боже, приемый Авелевы дары, Ноеву и Авраамову жертву, Аароново и Захариино кадило, приими и от рук нас грешных кадило сие в воню благоухания и во оставление грехов наших и всех людей Твоих. Яко благословен еси и подобает Тебе слава, Отцу, и Сыну, и Святому Духу, ныне и присно, и во веки веков.

И отвещают людие: Аминь. Диакон же входит во святый алтарь южною дверию. И абие певцы начинают пети со сладкопением тропарь: Единородный Сыне и Слове Божий, безсмертен Сый, и изволивый спасения нашего ради воплотитися от святыя Богородицы и Приснодевы Марии, непреложно вочеловечивыйся, распныйся же, Христе Боже, смертию смерть поправый, Един Сый Святыя Троицы, спрославляемый Отцу и Святому Духу, спаси нас.

Архиерей же или иерей кадит святую трапезу трижды с предния страны и отдает кадильницу единому от диаконов. И дает архиерей единому от иерей книгу писаний апостольских, иному же книгу писаний пророческих, сам же, прияв в десницу свою жезл, в шуйцу приемлет святое Евангелие и творит вход, обходя святую трапезу с южныя страны. Аще един есть иерей служай, дает иерей диакону в десную руку святое Евангелие, в щуйцу же писания апостольская, сам же приемлет писания пророческая и держит я у левыя страны персей. И тако творят вход предыдущима лампадома, диакону предходящу иерееви. Исходят же северными враты и идут даже до западныя стены храма, аще же мощно есть, исходят в притвор. Предходят же два диакона со свечами два два, последуют има два иных диакона с кадильницами, паки два два, последуют сим един пресвитер с книгою пророческою, паки же иный пресвитер с книгою апостольскою, последи же всех архиерей. И входят в храм великими дверми, иже суть в западной стене храма. Пришедше же ко аналогию, иже есть на амвоне среди храма, восходит на него архиерей (или иерей) и полагает книгу на аналогий, таже прием от диакона (или пресвитера) святое Евангелие и Апостола, такожде полагает я на аналогии, и идут вси далее даже до ступеней солеи и зде станут, дóндеже скончают певцы тропарь: Единородный Сыне. Пресвитеры и диаконы позади же стоят. Егда же скончают певцы пение, глаголет архиерей или иерей молитву сию в слышание всем, зря к востоку:

Боже Вседержителю, Великоимените Господи, давый нам вход во Святое Святых пришествием Единороднаго Твоего Сына, Господа же и Бога и Спаса нашего Иисуса Христа, молим и просим Твою благостыню, понеже пристрашни и трепетни есьмы хотяще предстати святому Твоему жертвеннику; ниспосли на ны, Боже, благодать Твою благую и освяти наша души и телеса и дуси и обрати помыслы наши ко благочестию, да в чистой совести принесем Тебе дары, даяния, плоды, во отложение согрешений наших и во умилостивление за вся люди Твоя. Благодатию и щедротами и человеколюбием Единороднаго Твоего Сына, с Ним же благословен еси во веки веков.

Людие: Аминь.

И входит архиерей или иерей с пресвитеры во святый олтарь, отлагает же зде архиерей жезл свой, и станут вси на своих местах. Диакони же стоят на солее, зря к народом. И став посреди солеи един от диаконов глаголет зря к людем диаконства сия:

Миром Господу помолимся.

Людие: Господи, помилуй. И отвещают сие на всякое прошение диакона.

Диакон: О свышнем мире и Божием человеколюбии и спасении душ наших, Господу помолимся.

О мире всего мира, и единении всех святых Божиих Церквей, Господу помолимся.

О спасении и заступлении Святейшаго Отца и Архиепископа нашего (имрк.), о всем причте и христолюбивех людех, Господу помолимся.

О оставлении грехов и прощении согрешений наших, еже избавити нас от всякия скорби, гнева, беды и нужды и возстания врагов, Господу помолимся.

Пресвятую, Пречистую, Преславную, Благословенную Владычицу нашу Богородицу и Приснодеву Марию, Святаго Иоанна, славнаго пророка, Предтечу и Крестителя, Божественныя и Всехвальныя Апостолы, славныя пророки и добропобедныя мученики и вся святыя и праведныя помянем, яко да молитвами их и молении вси помиловани будем.

Людие: Господи, помилуй.

Глаголемей же ектении, архиерей или иерей перед святою трапезою молится тайно сице:

Щедре и Милостиве, Долготерпеливе и Многомилосливе и Истинне Господи! Призри от святаго жилища Твоего и услыши ны молящияся Тебе, и избави ны от всякаго искушения диавольскаго же и человеческаго, и не отстави от нас помощь Твою, ниже тягчайшего сил наших наказания не наведи на ны. Не мощны бо есьмы препобеждати противная, Ты же силен еси, Господи, во еже спасати от всяких противлений. Спаси ны, Боже, от бедствий мира сего по благости Твоей, яко да вошедше в чистой совести ко святому Твоему жертвеннику, блаженную и трисвятую песнь с пренебесными силами неосужденно возсылаем Ти и благоприятную и Божественную совершив Ти службу, сподобимся вечныя жизни. Аминь.

И скончавшу диакону ектению, возглашает архиерей или иерей:

Яко свят еси, Господи Боже наш, и во святых обитаеши и почиваеши, и Тебе славу и трисвятую песнь возсылаем, Отцу, и Сыну, и Святому Духу, ныне и присно и во веки веков.

Людие: Аминь.

И поют певцы трисвятую песнь обычно, яко служащу единому иерею, сиречь: десная страна начинает: Святый Боже, таже левый лик: Святый Боже, паки же десная страна. Таже, Слава и ныне, Святый Безсмертный от левого лика. И возгласит диакон: Динамис, и поют певцы десныя страны высочайшим гласом: Святый Боже.

Скончавшу ся же пению трисвятаго, станет архиерей или иерей во святых дверех зря к западу и благословит по обычаю предстоящих глаголя:

Мир всем.

И отвещают людие: И духови твоему.

И абие поется от певцов косно и со сладкопением: Аллилуиа, трижды. Архиерей же, прием жезл, исходит со пресвитеры из олтаря святыми дверми и идет на среду храма, на амвон. И сядет святитель на месте своем и повелит сести и пресвитером, диаконы же стоят позади амвона, сиречь с восточныя его страны, по обою страну, два два, зряще к западу. И приемлет чтец от архиерея благословение, и станет на амвоне пред аналогием зря к западу. И скончавшейся Аллилуиа, возгласит чтец:

Пророчества Исаиина (или иныя книги) чтение.

Диакон глаголет: Вонмем.

И начинает чтец чести писания пророческая. Архиерей же, пресвитеры и вси людие, седяще внимают чтению. Скончавшуся чтению, паки поется Аллилуиа, по сем диакон возглашает:

Прости. Услышим святаго Евангелия.

И востают вси, востает и архиерей вкупе со пресвитеры и приемлет жезл свой. (В Закинфе мирствовати зде архиерееви (или иерееви, аще архиерей не литургисает), людем же отвещати: И духови твоему, указуется. Обаче во Иерусалиме сего не обретохом). Хотяй же чести Евангелие пресвитер возглашает:

Чтение от Иоанна (или инаго Евангелиста) святого Евангелия.

Диакон: Вонмем святому чтению.

И чтет пресвитер святое Евангелие зряще к западу, всем стоящим. Ведомо буди яко в Закинфе пред возгласом: Вонмем святому чтению, поют певцы Слава Тебе, Господи, слава Тебе, и Евангелие чтет на амвоне диакон. Во Иерусалиме же сего не обретохом. Архиерей же или иерей глаголет молитву сию тайно:

Возсияй в сердцах наших, человеколюбче Господи, разума нетленный свет, и мысленная наша отверзи очи, во евангельских Твоих проповеданий разумение: вложи в нас и блаженных Твоих заповедей страх, яко да плотския похоти поправше, духовное жительство пройдем, вся яже ко благоугождению Твоему и мудрствующе и деюще.

Исполнившуся чтению святаго Евангелия, паки поют певцы Аллилуиа трижды, со сладкопением. По сем возглашаем диакон:

Вонмем святому чтению.

Хотяй же чести писания апостольская возглашает:

Ко Ефесеем (или инаго писания апостольскаго) послания святого Апостола Павла чтение. Вонмем.

И чтет писания на том же месте. Архиерей же со пресвитеры паки возсядет на месте своем, дóндеже скончается апостольское чтение. По чтении поют певцы Аллилуиа трижды, по пропетии же сего, поучает архиерей люди, седяще на месте своем. Егда же скончает архиерей поучение свое, востает с места своего вкупе со пресвитеры и вземлет от аналогия святое Евангелие, имея жезл в шуйце, таже повелит пресвитером взяти прочия книги и входит во святый олтарь святыми дверми, последующим пресвитером. Людие же поют косно: Слава Тебе, Господи, слава Тебе. И станут вси у святыя трапезы, диакони же на солее зря к западу, якоже стояху в начале божественныя службы. И полагается святое Евангелие на святей трапезе, в горней ея стране, прочия же книги отлагаются. Отлагает архиерей и жезл свой. И глаголет диакон перед святыми дверми зря к людем ектению сию:

Рцем вси: Господи, помилуй.

Людие: Господи, помилуй. И отвещают сие на всякое прошение диакона.

Диакон: Господи Вседержителю, Пренебесне, Боже отец наших, молимтися, услыши.

О мире всего мира и единении всех святых Твоих Церквей, помолимся.

О спасении и заступлении святейшего Отца и Архиепископа нашего (имрк.), о всем причте и христолюбивех людех, помолимся.

О еже избавитися нам от всякия скорби, гнева, беды и нужды,

пленения, горькия смерти и беззаконий наших, помолимся.

О предстоящих людех, ожидающих от Тебе богатыя и великия милости, молимтися, умилостивися и помилуй.

Зде архиерей или иерей, зря к людем, возгласит знаменуя предстоящих:

Спаси, Боже, люди Твоя, и благослови достояние Твое.

Людие: Господи, помилуй.

И паки диакон: Призри на мир Твой милостию и щедротами.

Вознеси рог христианский, силою честнаго и животворящаго Креста, молитвою Пресвятыя, Благословенныя Владычицы нашея Богородицы, Предтечи и Апостолов Твоих, и всех святых Твоих, молимтися, многомилостиве Господи, услыши ны молящихся Тебе, и помилуй.

Людие: Господи, помилуй. Трижды.

Архиерей возглас: Ты бо еси благовестие и просвещение, Спас и Страж душ и телес наших, Боже, и Единородный Твой Сын, и Дух Твой Всесвятый, ныне и присно, и во веки веков.

Людие: Аминь.

[Зри: сице во Иерусалиме чтутся Божественная Писания. Обаче и иный есть чин чтения Божественных Писаний, его же в Александрии совершают.

Скончавшуся чтению Ветхаго Завета, приемлет диакон кадильницу и певаемей Аллилуиа, кадит по обычаю. Иерей же, егда благословляет кадило, глаголет молитву сию тайно:

Тебе, преисполнену всякаго благоухания и радования, Господи Боже наш, приносим кадило сие, от нихже, яже даровал еси нам: да приимется, молимся, пред Тобою от убогих рук наших во святый и пренебесный Твой жертвенник, в воню благоухания, во оставление грехов наших и во умилостивление за люди Твоя. Благодатию и щедротами и человеколюбием Единороднаго Твоего Сына, с Нимже благословен еси, со Пресвятым, и Благим, и Животворящим Твоим Духом, ныне и присно и во веки веков. Аминь.

И по сем бывает чтение Апостола, якоже предписася, По апостольстем чтении, паки поют певцы Аллилуиа, таже диакон глаголет вышереченные диаконства: Рцем вси, Господи помилуй. Иерей же молитву тайно: возсияй в сердцах наших. И по возгласе: Ты бо еси благовестие, и прочая, возглашает диакон: Вонмем святому чтению. И бывает чтение Святаго Евангелия, по немже поучает архиерей или иерей. Скончавшуся поучению, входит архиерей (или иерей) со сослужащими во святый олтарь.]

После возгласа: Ты бо еси благовестие, глаголет архиерей или иерей молитву сию тайно:

Боже, огласивый ны божественными и спасительными Твоими словесы, просвети души нас грешных ко восприятию преждечтеннаго, яко да не токмо слушатели явим себе божественных речений, но и творцы дел благих, содержащия веру нелицемерну, живот непорочен, жительство неукорно, во Христе Иисусе Господе нашем, с Ним же благословен еси, со Всесвятым, и Благим, и Животворящим Твоим Духом, ныне и присно, и во веки веков.

Диакон же глаголет диаконства сия, стояще на солее, зря к людем:

Да внемлем усердне: Миром Господу помолимся.

Людие: Господи, помилуй. (И сие на всякое прошение.)

Диакон: О свышнем мире и Божием человеколюбии и о спасении душ наших, Господу помолимся.

О мире всего мира и единении всех святых Божиих церквей, Господу помолимся.

О спасении и заступлении святейшаго Отца и Архиепископа нашего (имрк), о всем причте и христолюбивех людех, Господу помолимся.

О оставлении грехов и прощении прегрешений наших, и о еже избавитися нам от всякия скорби, гнева, беды и нужды, возстания врагов, Господу помолимся.

Дне всего совершенна, свята, мирна и безгрешна, вси у Господа просим.

Люди от зде отвещают: Подай, Господи

Диакон: Ангела мирна, верна наставника, хранителя душ и телес наших, у Господа просим.

Прощения и оставления грехов и прегрешений наших, у Господа просим.

Добрых и полезных душам нашим, и мира мирови, у Господа просим.

Прочее время живота нашего в мире и здравии скончати нам, у Господа просим.

Христианския кончины живота нашего, неболезненны и непостыдны, и добраго ответа на страшнем и трепетнем судищи Христове, просим.

Пресвятую, Пречистую, Преславную, Благословенную Владычицу нашу Богородицу и Приснодеву Марию, святаго Иоанна, славнаго пророка, Предтечу и Крестителя, Божественныя и всехвальныя Апостолы, славныя Пророки, подвизавшияся и мученики и вся святыя и праведныя помянувше, сами себе, и друг друга, и весь живот наш Христу Богу предадим.

Людие: Тебе, Господи

Бываемым диаконствам, молится архиерей пред святою трапезою, зря к востоку, тайно:

Владыко Животворче и благих Подателю, давый человеком блаженную надежду жизни вечныя, Господа нашего Иисуса Христа! Сподоби ны, Блаже, во освящении и сию Ти божественную совершити службу, в наслаждение будущего блаженства.

И простирает с пресвитеры антиминс. Скончавшимся диаконствам возглас:

Яко да под державою Твоею всегда храними, и во свете истины путеводими, Тебе славу и благодарение возсылаем, Отцу, и Сыну, и Святому Духу, ныне и присно, и во веки веков.

Людие отвещают: Аминь.

Диакон: Миром воспоим Христу. Да никто от оглашенных, да никто от непосвященных, да никто от не могущих молитися с нами. Познайте друг друга: Двери! Прости вси.

И входят диаконы во святой олтарь южными враты.

И начинают певцы херувимскую песнь: Да молчит всяка плоть человеча и да стоит со страхом и трепетом, и ничтоже земное в себе да помышляет: царь бо царствующих, и Господь господствующих, приходит заклатися и датися в снедь верным. Поют же сия косно и со сладкопением. Архиерей же, или иерей аще архиерей не литургисает, приемлет кадильницу и кадит по обычаю святую трапезу, таже святыя иконы, лики и народ. Архиерей кадит, имея в шуйце руке жезл свой. Егда же совершит архиерей каждение, исходят пред царския двери два диакона, держащие умывальницу и утиральник, и умывает архиерей пред лицем народа руце по обычаю,таже окропит има народ и утирает утиральником. По нем умывают руки пред лицем народа и сослужащии пресвитеры, точию не кропят. Аще служит един иерей, то умывает руце в предложении. Входят же диаконы с умывальницею во святый алтарь святыми дверми (якоже и изошли из святаго олтаря). Архиерей же, или иерей, целовав с сослужащими святую трапезу, ничтоже глаголя, мало поклонясь народу, отходит в предложение ко уготованным святым дарам. И дает архиерей первому пресвитеру дискос со святым хлебом, ничимже покровен, ничтоже глаголя, таже святую чашу ничимже покровену, второму пресвитеру. Несет же первый пресвитер дискос при персех своих. И исходят северными дверьми святого олтаря, предыдущим им двум диаконом со свещами, два два, таже двум диаконом с кадилы, два два, непрестанно кадящим на несомыя дары. По них же идет пресвитер с дискосом, последует же ему пресвитер с чашею. И тако идут северною страною храма до западного его предела, или аще могут, исходят в притвор, и паки входят в храм великими дверьми иже суть на западе, ничтоже глаголя, диаконом непрестанно кадящим. Егда же придут ко амвону, иже есть на среде храма, глаголет первый пресвитер тихими гласом.

Помяни нас, Господи, во царствии Твоем.

И идут далее даже до святых дверей и зде станут в ряд: пресвитер, несый дискос ошуюю, пресвитер же со святым потиром одесную его зря к востоку. Диаконы же со свещами и с кадильницами станут по обою страну святых дверей. Исходит же архиерей из олтаря в царския двери, без жезла и кадила, и глаголет первый пресвитер тихим гласом:

Архиерейство твое, да помянет Господь Бог во царствии Своем, всегда, ныне и присно, и во веки веков.

Архиерей же отвещает: Священство и диаконство ваша да помянет Господь Бог во царствии Своем, всегда, ныне и присно, и во веки веков, аминь.

Таже глаголет молитву сию гласно в слышание всем, в царских дверех, зря к западу:

Боже, Боже наш, небесный хлеб пищу всему миру Господа нашего Иисуса Христа, пославый Спаса и Избавителя и Благодетеля, благословляюща и освящающа нас, Сам благослови и предложение сие (Зде приемлет от пресвитера дискос и поставляет его на святей трапезе, таже возвращься, молится): и приими его в пренебесный Твой жертвенник. Зде приемлет от второго пресвитера чашу, и поставляет ю на святей трапезе. Пресвитеры же входят во святый олтарь и станут на своих си местех, таже молится архиерей или иерей сице пред святою трапезою, зря к востоку, возгласно:

Помяни, яко благ и человеколюбец принесших и их же ради принесоша, и нас неосужденны сохрани в священнодействии Божественных Твоих Таинств. Яко святися и прославися всечесное и великолепое имя Твое, Отца и Сына и Святаго Духа, ныне и присно и во веки веков.

[Аще не литургисает архиерей и служить токмо иерей со диаконом, творят сице: по каждении, целовав иерей святую трапезу и поклонясь людем, отходят иерей со диаконом в предложение и зде, умыв руце,подает иерей диакону святой дискос, ничто же глаголя. Диакон же приемлет дискос не на главу, но противу персей держить его. Такожде и иерей вземлет святый потир и тако творят, якоже предписася, святый вход. И пришедше ко амвону, иже есть на среде храма, станут иерей со диаконом на первой его степени, зря к западу, и зде помянут, за нихже приносится Святая Жертва. И по сих возглашает диакон:

Всех вас да помянет Господь Бог, всегда, ныне и присно и во веки веков.

И отвещавшим людем Аминь, идут иерей со диаконом к царским дверем, и зде станут во святых дверех, зря к востоку. И глаголет иерей возгласно преждеписанную молитву: Боже, Боже наш, небесный хлеб, и по скончании молитвы входят иерей со диаконом царскими дверьми во святый олтарь и поставляют святая на трапезе, якоже обычай есть на литургии Златоустовой. Аще покровены суть сосуды, отлагаются зде все покровы.]

И отвещавшим людем: Аминь, и паки поют певцы херувимскую песнь: Предходят же сему лицы ангельстии, со всяким началом и властию, многоочитии херувимы и шестокрылатии серафимы, лица закрывающе, и вопиюще песнь: Аллилуия, аллилуия, аллилуия. Архиерей же, или иерей прием кадильницу, глаголет молитву сию тай:

Владыко Вседержителю, Царю славы, Боже, ведый вся прежде бытия их, Сам прииди к нам во святый час сей призывающим Тя и избави ны от срама греховнаго, очисти наш ум и помышления от нечистых похотей и мирския прелести и всякаго диавольскаго действа, и приими от нас грешных фимиам сей, якоже приял еси приношение Авелево, и Ноево, и Аароново, и Самуилово, и всех святых Твоих, избавляя ны от всякаго деяния лукаваго и спасая во еже всегда благоугождати, и покланятися, и славити Тебе Отца, и Единороднаго Твоего Сына, и Духа Твоего Всесвятаго, ныне и присно и во веки веков, Аминь. Таже кадит предложенная. Диаконы же прием благословение, и исходят северными и южными дверьми и станут на своем месте, зря к западу. Скончавшуся же пению, херувимския песни глаголет диакон зря к людем:

Премудростию Божиею вонмем.

И глаголют людие вси мерным гласом вкупе: Верую во Единого Бога, и прочее символа православныя веры. Архиерей же, или иерей тайно глаголет молитву сию:

Боже и Владыко всех, достойны ны соделай часа сего недостойных, Человеколюбче, да очистившеся от всякаго коварства и всякаго лицемерия, соединимся друг другу мира и любве союзом, утверждены Твоего Боговедения священием, ради Единороднаго Твоего Сына Христа, с Ним же благословен еси, со Пресвятым, и Благим, и Животворящим Твоим Духом, ныне и присно и во веки веков.

И по скончании символа православныя веры, возглашает диакон зря к народом:

Станем добре. Миром Господу помолимся.

Таже иерей возглас: Яко Бог милости, любве, щедрот и человеколюбия еси, и Единородный Твой Сын, и Дух Твой Всесвятый, ныне и присно и во веки веков.

Людие: Аминь.

И благословляет архиерей народ рукама, глаголя: Мир всем.

Людие: И Духови Твоему.

Диакон: Возлюбим друг друга лобзанием святым.

И поют певцы со сладкопением: Возлюблю Тя, Господи, крепосте моя, Господь утверждение, и прибежище, и Избавитель мой.

Архиерей же, или иерей целует край дискоса, таже край чаши, святую трапезу, такожде творят и пресвитеры сослужащии, таже целуют архиерея в руку, друг же друга в уста; подобне творят и диакони, стояще вне святаго олтаря на солее, дающе целование в уста друг другу, якоже мы в святый день Пасхи творим. Скончавшуся пению, возгласит диакон:

Главы наша Господеви приклоним.

Людие косно: Аминь.

Архиерей же, или иерей глаголет молитву сию тайно, преклонив главу и мало простер руце свои ко святей трапезе:

Едине Господи и Милостиве Боже, приклоншим выи своя пред святым Твоим жертвенником и просящим у Тебя духовныя дары, ниспосли благодать Твою благую, и благослови всех нас всяким благословением духовным и неотъемлемым, иже в вышних Живый и на смиренныя призираяй. Яко хвально, и покланяемо, и препрославленно есть всесвятое имя Твое, Отца и Сына и Святаго Духа. Аминь.

Диакон же, зря в святые двери, глаголет возласно:

Господи, благослови.

Архиерей же, или иерей возглас: Господь да благословит ны и да сослужит нам, и достойны ны да сотворит предстояния святаго Своего жертвенника и пришествия (зде знаменует дискос) Святаго Своего Духа (зде знаменует чашу) Своею благодатию и человеколюбием, всегда, ныне и присно, и во веки веков.

Людие вельми косно: Аминь.

И покланяется архиерей со пресвитеры глаголя в себе: Слава в Вышних Богу, и на земли мир, в человецех благоволение (трижды). Господи, устне мои отверзеши и уста моя возвестят хвалу Твою. (трижды). Да исполнятся уста моя хваления, Господи, яко да воспою славу Твою, весь день великолепие Твое (трижды). И поклоняся мало служащим с ним, поет вкупе со пресвитеры благолепно со сладкопением во глас 5:

Возвеличите Господа со мною и вознесем имя Его вкупе.

Людие же отвещают с пением, глас тойже: Дух Святый найдет на Тя, и сила Вышняго осенит тя.

Аще служит един токмо иерей со диаконом, исходит иерей святыми дверьми из святаго олтаря и зря к людем поет сия, и поклонясь людем, возвращается ко святей трапезе.

Егда же поют сия, глаголют служащии архиерееви тихим голосом: Помяни и нас Владыко Святый. Архиерей же отвещает такожде: Да помянет вас Господь во царствии Своем, всегда, ныне и присно, и во веки веков.

И по скончании пения, абие диакон зря к людем:

Миром Господу помолимся.

Людие: Господи, помилуй. И отвещают сие на всякое прошение диакона.

Диакон (обращься мало ко святей трапезе): Спаси, помилуй, ущедри и сохрани нас, Боже, твоею благодатию.

Диакон, паки зря к народу: О свышнем мире и Божии человеколюбии и спасении душ наших, Господу помолимся.

О мире всего мiра и единении всех святых Божиих церквей, Господу помолимся.

О святей, вселенстей и апостольстей Церкви, еже от конец земли даже до конец ея, Господу помолимся.

О спасении и заступлении Святейшего Отца и Архиепископа (имрк), о всем притче и христолюбивех людех, Господу помолимся.

О благочестивейших и боголепных православных царех, всей палате и воинстве их и о еже с небесе помощи и победе, Господу помолимся.

О святом Христа Бога нашего граде, царствующем граде, всяком граде и стране и иже в православной вере и благочестии Божии живущих в них, о мире и безмятежии их, Господу помолимся.

О плодоносящих и добродеющих во святех Божиих церквах и поминающих убогия, вдовицы и сироты, странныя и в нужде сущия и заповедавшия нам яко да поминаем их в молитвах, Господу помолимся.

О еже в старости и немощи сущих, болящих, труждающихся и от духов нечистых стужаемых, еже от Бога скором исцелении и спасении их, Господу помолимся.

О еже в девстве и чистоте и постничестве и в честнем браце прибывающих и еже в горах, вертепах и пропастях земных подвизающихся преподобных отцех и братиях, Господу помолимся.

О плавающих, путешествующих, странствующих христианех, и о еже в пленении и изгнании и в темницах и в тяжких работах сущих братиях наших, мирном возвращении коегожде в домы их с радостию, Господу помолимся.

О предстоящих и сомолящихся нам в час сей святый и во всякое время отцех и братиях, трудолюбии и усердии их, Господу помолимся.

И о всякой души христианстей, скорбящей и озлобленней, милости Божией и помощи требующей и в нужде сущей и обращении заблудших, здравии болящих, о освобождении плененных, упокоении преждепочивших отец и братий, Господу помолимся.

О оставлении грехов и прощении согрешений наших и о еже избавити ны от всякия скорби, гнева, беды и нужды, возстания язык, Господу помолимся.

Пространнее о благорастворении воздухов, дождех мирных, росах благих, плодов изобилии, совершеннем плодородии, и о венце лета, Господу помолимся.

О еже услышану и благоприятну быти молению нашему пред Богом и ниспослатися нам богатству милостей и щедрот Его, Господу помолимся.

Пресвятую, Пречистую, Преславную, Преблагословенную Владычицу нашу Богородицу и Приснодеву Марию, святых и блаженных Иоанна славнаго пророка, Предтечу и Крестителя, Стефана перводиакона и первомученика, Моисея, Аарона, Илию, Елисея, Самуила, Давида, Даниила пророков, и вся святыя и праведныя помянувше, яко да молитвами и предстательсты их всем нам помиловатися.

О предлежащих честных и пренебеснех, неизреченных, пречистех, славнех, страшнех, ужаснех, божественнех дарех и спасении предстоящаго и приносящаго сия честнаго отца нашего и архиерея (или иерея, аще служит един токмо иерей) , Господа Бога молим.

Зде людие отвещают: Господи, помилуй. (трижды).

Глаголющу диакону ектению сию, архиерей или иерей молится пред святою трапезою приклонив главу и простер пред собою руце ко святой трапезе, тайно, сице:

Призревый на ны милостию и щедротами, Владыко Господи, и даровавый дерзновение нам смиренным и грешным и недостойным рабом Твоим предстояти святому Твоему жертвеннику и приносити Тебе страшную сию и безкровную жертву о наших гресех и о людских неведениях, призри на мя, непотребнаго раба Твоего и изглади моя прегрешения благоутробия ради Твоего, и очисти моя уста и сердце от всякия скверны плоти и духа и отстави от мене всякий помысл срамный же и неразумный, и удовли мя, силою Всесвятаго Твоего Духа, в службу сию, и приими мя ради Твоея благости, приближающагося святому жертвеннику, и благоволи, Господи, приятным быти приносимым Тебе даром сим руками нашими, снисходяще нашим немощем, и не отвержи мене от лица Твоего, ниже возгнушайся недостоинства, но помилуй мя, Боже, и по множеству щедрот Твоих презри беззакония моя, яко да неосужденно пришед пред славу Твою, сподоблюся покрова Единороднаго Твоего Сына и озарения Всесвятаго Твоего Духа, и не яко раб греха отвержен буду, но яко раб Твой обрету благодать и милость и оставление грехов, в сем и будущем веце. Ей Владыко Вседержителю, всесильне Господи, услыши моление мое: Ты бо еси вся совершаяй во всех и от Тебе вси чаем во всех помощи же и заступления и от Единороднаго Твоего Сына и Животворящаго Духа, ныне и присно, и во веки веков.

Паки молитву сию:

Боже, иже на многое и неизреченное человеколюбие ниспославый Единороднаго Твоего Сына в мир, да заблуждшее возвратит овча, да не отвратишися нас грешных, вручающих Ти страшную сию жертву. Не бо на правды наши уповающе есмы, но на милость Твою благую, ею же род наш соблюдаеши. И ныне молимся и просим Твою благостыню, да не будет во осуждение людем Твоим устроенное сие нам во спасение таинство, но во оставление грехов, во обновление душ и телес, во благоугождение Тебе Бога и Отца.

Таже молитву сию Святого Василия. Ведомо же да будет, яко в Иерусалиме сия молитва не глаголется, зане не Святого Иакова, но Святого Василия есть и обретается в его рукописях в его литургии. Мы же написахом зде сию молитву, зане в древних рукописях обретается на сем месте:

Господи Боже наш, создавый ны и введый в жизнь сию, показавый пути во спасение, даровавый нам небесных таин откровение. Ты бо еси положивый ны в службу сию силою Духа Твоего Всесвятаго. Благоволи, Владыко, быти нам служителем новаго Твоего завета, слугам пречистых Твоих таин и приим нас приближающихся Святому Твоему жертвеннику по множеству милости Твоея, да будем достойны приносити Тебе дары же и жертвы и своих и о людских невежествиих. И даждь нам, Господи, со всяким страхом и совестию чистою приносити Тебе духовную сию и безкровную жертву, юже приимше во святый и пренебесный и мысленных Твой жертвенник, в воню благоухания, возниспосли нам благодать Всесвятаго Духа. Ей, Боже, призри на ны и воззри на словесную сию службу нашу, и приими ю, якоже приял еси Авелевы дары, Ноевы жертвы, Авраамовы всеплодия, Моисеова и Ааронова священства, Самуилова мирная, Давидово покаяние, Захариино кадило, якоже приял еси от рук святых Твоих апостол истинную сию службу: сице приими и от рук нас грешных предлежащия дары сия в благости Твоей и даждь быти приношению нашему благоприятну, освященну Духом Святым, во искупление наших прегрешений и людских неведений, и во упокоение преждепочивших душ, яко да и мы грешнии и недостойнии раби Твои, сподобившеся без порока служити святому Твоему жертвеннику, приимем мзду и мудрых строителей и обрящем благодать и милость в день страшный воздаяния Твоего праведнаго и благаго.

Приглаголет же и сице:

Благодарим Тя, Господи Боже наш, яко дал еси нам дерзновение во входе святых, его же обновил еси нам путь новый и живый через завесу плоти Христа Твоего. Сподобившеся же внити на место селения славы Твоея, внутрь же быти завесы, и святая зрети, припадаем благостыни Твоей, Владыко, помилуй нас: понеже пристрашни и трепетни есьмы хотяще предстояти святому Твоему жертвеннику и приносити Тебе страшную сию безкровную жертву о наших согрешениих и о людских неведениих. Ниспосли на ны, Боже, благодать Твою благую, и освяти наши души и телеса и дуси, премени помышления наша ко благочестию, яко да чистою совестию принесем Ти милость, мир, жертву хваления.

Возглас: Милостию и щедротами и человеколюбием Единороднаго Твоего Сына, с Ним же благословен еси со Пресвятым и Благим и Животворящим Твоим Духом, ныне и присно и во веки веков.

Не отвещают же певцы ничесоже, но абие благословляет Архиерей (или иерей) глаголя:

Мир всем.

Абие диакон (паки певцы ничто же не отвещают) глаголет зря к народом:

Станем добре. Станем благочестне. Станем со страхом Божиим и сокрушением. Вонемем: святое возношение в мире Богу.

И входят диаконы во святый олтарь южными дверьми.

Людие: Милость мира, жертву хваления.

Архиерей же, или иерей глаголет тайно молитву сию:

И знаменательне одевающия священнодействие сие покровы гаданий открыв, издалека покажи нам, и умная наша очи необыменнаго Твоего света исполни, и очистив нищету нашу от всякия скверны плоти и духа, достойны соделай страшнаго сего и ужаснаго предстояния, яко преблагоутробен и милостив Бог еси и Тебе славу возсылаем, Отцу и Сыну, и Святому Духу, ныне и присно и во веки веков.

Изшед же из святых дверей архиерей, или иерей, станет на высшей степени амвона и возгласит зря к людем:

Любы Бога и Отца и благодать Господа и Бога и Спаса нашего Иисуса Христа, и причастие и дар Всесвятаго Духа, буди со всеми вами. И знаменает люди.

Людие отвещают: И со духом твоим. Архиерей или иерей, воздев руце очи свои горе паки лицем к людем возглашает: Горе имеем ум и сердца.

Людие: Имамы ко Господу.

Архиерей или иерей: Благодарим Господа.

И сложив крестообразно руце свои на персех, мало поклонясь людем, возвращается ко святей трапезе.

Людие поют со сладкопением и косно: Достойно и праведно.

(Зри, яко прочих слов, сиречь. Поклонятися Отцу и прочая, на сей литургии не поем). Архиерей же, или иерей зря к востоку преклонив главу и мало простер руце ко святей трапезе пред собою, молится тайно:

Сице воистину достойно есть и праведно, подобно же и потребно, Тя хвалити, Тя пети, Тебе кланятися, Тебе славословити, Тебе благодарити, всякия твари видимыя и невидимыя Содетеля, сокровище благих, Источника жизни и безсмертия, всяческих Бога и Владыку, его же поют небеса и небеса небес, и вся силы их, солнце, луна и весь звездный лик, земля, море и вся яже в них, Иерусалим пренебесный, собор избранных, церковь перворожденных, написанных на небесех, дуси праведных и пророк, души мученик и апостол, ангели, архангели, престолы, господствия, начала же и власти и силы страшныя, Херувими многоочитии и шестокрылатии Серафими, иже двема крилама покрывают лица своя, двема же нозе, и двема летающе взывают друг ко другу неусыпными усты, немолчными славословенми:

Возгласно: Победную песнь великолепныя Твоея славы, светлым гласом поюще, вопиюще, славословляще, взывающе и глаголюще.

Людие: Свят, Свят, Свят, Господь Саваоф. Исполнь небо и земля Славы Твоея. Осанна в вышних. Благословен Грядый во имя Господне. Осанна в вышних.

Архиерей же, или иерей, певаемей песни сей, молится тайно: Свят Еси (знаменует дискос) Царю веков и всякия святыни Господи и Подателю (знаменует чашу) Свят и Единородный Твой Сын, Господь наш Иисус Христос, им же вся сотворим еси (таже знаменует обоя). Свят же и Дух Твой Всесвятый, проницаяй всяческая и глубины Твоя, Бога и Отца. Свят еси, Всесильне, Страшне, Боже, Благоутробне, паче же состраждаяй о создании Твоем. Сотворивый от земли человека по образу Твоему и подобию, и даровавый ему наслаждение райское, преступивша же заповедь Твою, и ниспадоша, сего не презрел еси, ниже оставил еси, Блаже, но наказал еси сего, яко благоутробен Отец, призвал еси его чрез закон, наздал еси его чрез пророки, последи же Самаго Единороднаго Твоего Сына, Господа нашего Иисуса Христа ниспослал еси в мир, да Сам, пришед Твой обновит и возстаив образ Иже снизшед с небесе и воплощся от Духа Свята и Марии святыя Богородицы, споживе же человеком, вся устрои ко спасению рода нашего. Хотяще же вольную и животворящую крестом смерть безгрешен за ны грешныя прияти, в ночь, в нюже предаяшеся, паче сам себе предаяше за мирский живот и спасение. (Зде приемлет архиерей или иерей святый хлеб с дискоса, знаменует его и держит крайними персты десныя руки своея мало возвышен, и глаголет тайно прием хлеб во святыя и пречистыя и безсмертныя своя руки, воззрев на небеса, и показав Тебе Богу и Отцу, благодарив, благословив, освятив, преломив, подаде святым и блаженным Своим учеником и Апостолом рек: Возгласно: Приимите, ядите, сие есть тело Мое, еже за вы ломимое и раздаемое во оставление грехов. – Зде полагает архиерей или иерей святый хлеб на дискос.

Людие: Аминь.

Архиерей же, или иерей приемлет святую чашу и держит ю мало возвышь, глаголя тайно:

Такожде по еже вечеряти прием чашу и растворив от вина и воды, зряще на небеса и показав Твоему Богу и Отцу и благодарив, освятив, исполнив Духа Свята, подаде святым и блаженным Своим учеником и Апостолом рек:

Возгласно: Пийте от нея вси: сие есть кровь Моя нового завета еже за вы и за многие изливаемая и раздаемая во оставление грехов. (Зде поставляет чашу на святую трапезу).

Людие: Аминь.

Архиерей же тайно:

Сие творите в Мое воспоминание. Елижды бо ядите хлеб сей и чашу сию пиете, смерть Сына Человеческого возвещаете и воскресение Его исповедуете, дóндеже не приидет.

Диакон зря к святей трапезе возглашает светлейшим гласом:

Веруем и исповедуем.

Людие же поют во глас 8 со сладкопением и косно:

Смерть Твою, Господи, возвещаем и воскресение Твое исповедуем.

Архиерей же знаменует святой дискос, таже святую чашу и молится тайно преклонив главу:

Поминающе убо и мы грешнии животворящия Его страсти, спасительный крест и смерть, и погребение, и тридневное из мертвых воскресение, и еже на небеса восхождение и одесную Тебе Бога Отца седение, и еже второе славное, страшное Его пришествие, егда приидет со славою судити живыя и мертвыя, егда хощет коемуждо воздати по делом его – пощади ны, Господи Боже (трижды), наипаче же по благоутробию Своему, приносим Ти, Владыко, страшную сию и бескровную жертву, моляще да не по грехом нашим, ниже по беззаконием нашим воздаси нам, но по Твоему снисхождению и неизреченному Твоему человеколюбию презрев и изгладив еже о нас рукописание Тебе молящихся, подаси нам небесная и вечная Твоя дарования, их же око не виде, ниже ухо слыша и на сердце человеческое не взыде, яже уготова Бог любящим Тя, и не ради моих грехов отринеши люди Твоя, человеколюбче Господи.

Таже поет со пресвитеры со сладкопением: во глас 8:

Людие бо Твои и Церковь Твоя молят Тя.

Людие же отвещают такожде, со сладкопением глас тойже:

Помилуй нас, Господи Боже, Отче Вседержителю.

И паки поет архиерей или иерей с сослужащими тожде: Людие Твои и прочая, и паки отвещают людие: Помилуй нас и прочая, тако до трищи поет архиерей со пресвитеры и трищи отвещают ему люди. Третие же люди поют весьма косно, еже имати время архиереови или иереови глаголати молитву.

Архиерей же, или иерей преклонь главу, молится сице (нецыи глаголют словеса сия возгласне, но во Иерусалиме глаголют тайно):

Помилуй нас, Боже Вседержителю, Помилуй нас Боже, Спасителю наш, помилуй нас Боже по велицей милости Твоей и ниспосли на ны и на предлежащия святыя дары сия Духа Твоего Всесвятаго. (От зде всяко глаголет тайно) Господа Животворящаго, сопрестольнаго Тебе, Богу и Отцу и Единородному Твоему Сыну соцарственнаго, единосущнаго же и совечнаго, глаголавшаго законом и пророки и новым Твоим заветом, сошедшаго в виде голубине на Господа нашего Иисуса Христа во Иордане реце и пребывающего на Нем, сошедшаго на святыя Твоя Апостолы в виде огненных язык в горнице святаго и славнаго Сиона в день святыя Пятидесятницы, сего Духа Твоего Всесвятаго ниспосли, Владыко, на ны и на предлежащия святыя дары сия (таже возвышь руце глаголет тайно, в Закинфе же, согласно древним хартиам возгласно да посетив святым и благим и славным своим пришествием, освятит и сотворит хлеб убо сей тело святое Христово. (И знаменует святый хлеб).

Диакон же зря, глаголет: Аминь

Архиерей же, или иерей знаменуя чашу глаголет, во Иерусалиме тайно, в Закинфе возгласно: И чашу сию кровь Честную Христову.

Диакон, такожде: Аминь

Архиерей же или иерей обоя не знаменует, но абие глаголет тайно:

Да будут всем иже от них причащающымся во оставление грехов и в жизнь вечную.

Диакон, такожде: Аминь

Архиерей или иерей молится тайно сице:

Во освящение душ и телес, аминь, во плодоношение дел благих, аминь. Во утверждение святыя Твоея соборныя и Апостольския Церкве, юже основал еси на камени веры, да врата адова не одолеют ю, избавляя ю от всякия ереси и от соблазна делающих беззаконие, сохраняя ю даже до скончания веков.

И знаменует паки дискос и чашу раздельне.

Диакон же, глаголет: Аминь.

Людие же начинают тихим и мерным гласом глаголати многажды, дóндеже возгласит архиерей или иерей. Изрядно о Пресвятей, Глас 6:

Помяни, Господи Боже наш.

Глаголемым же сим, молится архиерей или иерей, преклонь главу и мало простер руце ко святой трапезе, мерным гласом, во еже слышати и предстоящим:

Приносим Ти Владыко, и о святых Твоих местех, их же прославил еси богоявлением Христа Твоего и посещением Всесвятаго Твоего Духа; наипаче же о святем и славнем Сионе, Матери всех церквей, и о еже по всей вселенней святей Твоей Соборней и Апостольстей церкви, богатыя дары Всесвятаго Твоего Духа и ныне подаждь ей, Владыко. – Помяни, Господи, и иже в ней святыя отцы наши и епископы, иже во всей вселенней право правящия слово Твоея истины. – В первых помяни, Господи Боже наш, преподобнаго отца нашего, святейшего нашего Архиепископа (имрк), старость ему честную подаждь, многолетна его сохрани, пасуща люди Твоя во всяком благочестии и досточестии. – Помяни, Господи еже зде честное пресвитерство и повсюду, еже во Христе диаконство, прочее всякое служение, весь церковный чин и еже во Христе братство наше и вся христолюбивые люди. – Помяни, Господи, сопредстоящие нам иереи, служащие во святый час сей пред святым Твоим жертвенником во еже приносити Святую и бескровную Твою жертву и даждь им и нам слово во отверзение уст наших, во славу и похваление всесвятаго имене Твоего. – Помяни, Господи, по множеству милости Твоея, и мене смиреннаго, и грешнаго, и недостойнаго раба Твоего, и призри на мя милостию и щедротами и избави и свободи от гонящих мя, Господи, Господи сил, и не вниди в суд с рабом Твоим, и понеже умножися во мне грех, да преизбыточествует Твоя благодать. – Помяни, Господи, и святый Твой жертвенник окружающия диаконы, подаждь им жительство непорочно, чисто служение их сохрани, и на степени лучшыя возведи. – Помяни, Господи, святый Бога нашего град и царствующий град, и всякий град и страну и во православной вере и благочестии живущия в них, мир и безмятежие их. – Помяни, Господи, благочестивейшия и христолюбивыя цари, всю палату и воинство их, и еже с небесе помощь и победу их. Коснися оружия и защити, востани в помощь их, покори им вся враждебные и варварские языки. Устрой их советы, яко да мирное и тихое житие поживем во всяком благочестии и досточестности. – Помяни, Господи, плавающия, путешествующия, странствующия христианы, во узах и темницах, в пленении и изгнании, в рудах и мучениях, и в горьких работах сущих отцы и братию нашу, мирны возврати коегождо в домы их. – Помяни, Господи, в старости и немощи сущия, болящия, труждающияся и от духов нечистых стужаемыя, от Тебе, Бога скорое исцеление и спасение их. – Помяни, Господи, всякую душу христианскую, скорбящую и умученную, милости и помощи Тебе Бога, требующую, и обращение заблуждших. – Помяни, Господи, иже в девстве и благочестии и подвизе пребывающия, и иже в горах и вертепах и пропастех земных подвизающияся преподобныя отцы же и братия наша и иже по места православных соборы, и иже зде во Христе собор наш. – Помяни, Господи, труждающияся и служащия нам отцы же и братия наша, ради имене Твоего Святого. – Помяни, Господи, всех во благое, всех помилуй Владыко, всех нас примири. Умири множество людей Твоих. Истреби соблазны, упраздни брани. Умири разделения церквей. Ересей востания скоро утоли. Ниспроверзи гордыню язык. Вознеси рог христиан православных. Твой мир и Твою любовь подаждь нам, Боже, Спасителю наш, упование всех концев земли. – Помяни, Господи, благорастворение воздухов, дожди мирныя, росы благия, плодов изобилие, совершенное плодородие, и венец лета благости Твоея. Ибо очи всех на Тя уповают и Ты даеши пищу их во благовремении, отверзаеши Ты руку Свою и исполняеши всяко животно благоволения. – Помяни, Господи, плодоносившыя и плодоносящия во святых Божиих церквах и поминающия убогия и заповедавшия нам еже поминати их в молитвах. – Паки сподоби помянути, Господи, и приношения сия принесшия в днешний день на святый Твой жертвенник, и о них же кийждо принесе, или в помышлении имать, и совершенне Тебе ведомых, – Помяни, Господи, и родители наша, сродники, и други (имрк). Сих всех помяни, Господи, их же помянухом и их же не помянухом, православныя. Воздаждь им вместо земных небесная, вместо тленных нетленная, вместо временных вечная, по обетованию Христа Твоего, понеже живота и смерти область имаши. – Еще помянути сподоби, Владыко, и иже от века Тебе благоугодившия по родам, святые отцы, патриархи, пророки, апостолы, мученики, исповедники, учители, преподобныя, и всякий дух праведный в вере скончавшийся. – Помяни, Господи, Архангельский глас глаголющий: Радуйся, Благодатная, Господь с Тобою. Благословенна Ты в женах и благословен плод чрева Твоего, яко Спаса родила еси душ наших.

Возгласно: Изрядно о Пресвятей, и Преблагословенней, Пречистей, Владычице нашей Богородице и Приснодеве Марии.

И паки глаголют люди, якоже прежде:

Помяни, Господи Боже наш.

Архиерей же или иерей, преклонь главу, молится тайно:

Святаго Иоанна славнаго пророка Предтечу и Крестителя, Святыя Апостолы, святыя пророки и патриархи праведныя, святыя мученики и исповедники. Помяни Господи Боже святыя отцы наша и архиепископы и всякую плоть, юже понянухом и юже не помянухом. Тамо их упокой во стране живых, во царствии Твоем, в наслаждении рая, в недрех Авраама, и Исаака, и Иакова святых отец наших, отнюду же отбежит болезнь, печаль и воздыхание, идеже присещает свет лица Твоего и просвещает выну. Скончание же живота нашего христианское и благоугодно и безгрешно в мире устрои, Господи, собирая под нозе избранных Твоих, егда хощеши и како хощеши, един токмо без стыда и прегрешений, ради Единороднаго Твоего Сына, Господа же и Бога и Спаса нашего Иисуса Христа, Той бо Един есть безгрешен, явивыйся на земли.

Аще архиерей литургисает, глаголют сослужащии иереи вкупе гласно:

В первых помяни, Господи, отца и патриарха нашего (или епископа (имярек)), егоже даруй святей Твоей Церкви в мире цела, честна, здрава и долгоденствуща, право правяща слово Твоея истины.

Диакон глаголет зря к людем (аще и един иерей служит):

И о мире и благостоянии всего мира и святых Божиих Церквей, и о них, за них же кийждо принесе, или в помышлении иметь и о предстоящих людех, и о всех и за вся

Абие архиерей или иерей возглас:

Даждь и нам и им, яко благий и человеколюбец, Владыко.

Люди же вси вкупе глаголют во глас 6:

Ослаби, остави, прости, Боже, прегрешения наша, вольная же и невольная, яже в ведении и неведении.

Архиерей же или иерей возглашает:

Благодатию и щедротами и человеколюбием Христа Твоего, с Ним же благословен еси и препрославлен со Всесвятым, и Благим, и Животворящим Твоим Духом, ныне и присно и во веки веков.

Людие: Аминь.

Архиерей или иерей, знаменует люди, и глаголет: Мир всем.

Людие: И духови твоему.

Абие диакон, зря к людем, глаголет диаконства сия, ничто же людем отвещающим:

Паки и паки и непрестанно миром Господу помолимся.

О принесенных честных, пренебесных, неизреченных, пречистых, славных, страшных, ужасных, божественных дарех, Господу Богу нашему помолимся.

Яко да Господь Бог наш, прием я во святый и пренебесный, мысленный и духовный Свой жертвенник, в воню благоухания, возниспослет нам божественную благодать и дар Всесвятаго Духа, помолимся.

Соединение веры, и причастие Всесвятаго Его и покланяемаго Духа испросивше, сами себе и друг друга и весь живот наш Христу Богу предадим.

Зде людие отвещают: Тебе Господи.

Глаголемым диаконствам сим, молится архиерей или иерей тайно:

Боже и Отче Господа и Бога и Спаса нашего Иисуса Христа, великоимените Господи, блаженное естество, независтная благостыне, всяческих Боже и Владыко, сый благословенный во веки веков, седяй на херувимех и прославляемый от серафим, Ему же предстоят тысящи тысящ и тьмы тем святых ангел и архангел воинств! Принесенная убо Ти дары, даяния, приношения, в воню благоухания приими, ихже освятити и совершити сподобил еси, Блаже, благодатию Христа Твоего и Всесвятаго Твоего Духа. Освяти, Владыко, и наши души, и телеса, и духи, и прикоснися помышлений, и испытай совести. И отвержи от нас всякое помышление лукавое, всякий помысл срамный, всякую страсть и похоть постыдную, всяко слово неподобно, всяку зависть и суемудрие и лицемерие, всяку лжу, всякое лукавство, всякое искушение житейское, всякое любостяжание, всякое тщеславие, всякое зло, всяку ярость, всякий гнев, всякое злопомнение, всякое оклеветание, всякое сребролюбие и нерадение, всякое движение злое плоти же и духа, чуждее воли Святыни Твоея.

Возглас: И сподоби нас, Владыко человеколюбче Господи, со дерзновением неосужденно чистым сердцем, душею просвещенною, непостыдным лицем, освященными усты смети призывати Тебе, иже на небесех Святаго Бога Отца, и глаголати.

И глаголют люди вси вкупе: Отче наш, и прочая.

Архиерей или иерей пред святою трапезою молится тайно сице:

И не введи нас во искушение, Господи, Господи сил, ведай немощь нашу, но избави нас от лукаваго и от дел его и от всякаго оскорбления и козни того, ради имене Твоего святаго, еже наречеся на нашем смирении.

Возглас: Яко Твое есть царство, и сила и слава Отца и Сына и Святаго Духа, ныне и присно и во веки веков.

Людие: Аминь.

Архиерей или иерей благословляет глаголя: Мир всем.

Людие: И духови твоему.

Диакон: Главы наша Господеви приклоним.

Людие: Тебе, Господи.

Архиерей или иерей тайно молитву:

Тебе приклонихом, раби Твои, Господи, своя выи, пред святым Твоим жертвенником, чающе от Тебе богатыя милости. Богатую и ныне благодать Твою и благословение Твое ниспосли нам, Владыко и освяти наша души и телеса и духи, яко да достойни будем причастницы и участницы быти святых Твоих таин во оставление грехов и в жизнь вечную.

Возглас: Ты бо еси покланяемый и препрославленный Бог наш, и Единородный Твой Сын, и Дух Твой Всесвятый, ныне и присно и во веки веков.

И знаменует архиерей дискос и чашу.

Людие же отвещают: Аминь.

И обращся архиерей к людем, воздвиг руце своя мало горе (иерей десную токмо руку), глаголет благословение сие, знаменуя на конце люди:

И да будут благодать и милость Святыя, и Единосущныя, Несозданныя, и Нераздельныя, и Покланяемыя Троицы со всеми вами.

Людие: И со духом твоим.

Диакон, зря к людем и воздвиг десную руку свою глаголет:

Со страхом Божиим вонмем.

Архиерей же или иерей, подъяв Святый Хлеб крайними персты своею руку, держит его мало подъем и глаголет молитву сию тайно, бывает же, дóндеже молится архиерей или иерей, молчание велие во храме, людем приклонившим главы своя:

Святе, во святых почиваяй, Господи, освяти ны словом Твоея благодати и наитием Всесвятаго Твоего Духа. Ты бо еси рекий, Владыко Святи будете якоже Аз свят есмь, Господи Боже наш.

И молитву сию: Непостижиме Боже, Слове, Отцу и Всесвятому Духу единосущное, совечное, нераздельное, приими чистую песнь во святых Твоих бескровных жертвах с херувимы и серафимы и от мене грешнаго, вопиюща и глаголюща:

Возгласно: Святая Святым.

Людие: Един Свят, Един Господь Иисус Христос, во славу Бога Отца со Святым Духом, Ему же слава во веки веков.

Диакон: О спасении и заступлении святейшего отца и архиепископа нашего (имрк) и о всякой душе скорбящей и озлобленней, милости и помощи Божией требующей, и о обращении заблуждших, исцелении болящих, свобождении плененных, упокоении преждепочивших отец же и братий, вси усердно рцем: Господи, помилуй.

Людие: Господи, помилуй. (12)

Егда же глаголет диакон диаконства сия, архиерей или иерей преломляет Святый Хлеб, его же держит обема рукама, первее знаменовав его. Часть, юже держит в шуйце, полагает паки на дискос. Часть же юже держит в деснице своей, паки преломляет на две части, якоже зде изобразихом, держаще часть с печатию ХС в десней руце, часть же с печатию КА в шуей. И знаменовав паки десною рукою часть ХС, ея же прелагает для сего в шуйцу, полагает десницею во святый потир, глаголя тайно:

Соединение пресвятаго тела и честныя крове Господа и Бога и Спаса нашего Иисуса Христа.

Часть КА полагает на дискосе. Таже преломляет часть, еже бысть первее в шуйце на ней же печати IC и HI суть, глаголя:

Соединися и освятися и совершися во имя Отца и Сына и Святаго Духа – Се Агнец Божий, Сын Отечь, вземляй грех мира, закланный за живот мира и спасение ¹.

Таже раздробляет рукою части IC, NI и KA за еже довольно быти всем хотящим причаститися. Зри, яко теплоты в чашу не указася вливати, якоже то обычай есть на литургиях Златоустовой или Василиевой, или Преждеосвященных даров. Приглаголют же нецыи, раздробляему Святому Хлебу:

Часть святая Христова, исполнена благодати и истины, Отца и Святаго Духа, Ему же слава и держава во веки веков.

Егда же скончают людие Господи помилуй, глаголет диакон зря к людем:

В мире Христовом поим.

И входят диакони во святый олтарь малыми дверми. Люди же поют причастен:

Вкусите и видите, яко Христос Господь. Аллилуия.

Затворяют же зде царские двери и завеса, дóндеже причастятся священнослужители.

Егда же раздробит архиерей Святый Хлеб и диакони войдут в святый олтарь, станут все благоговейно окрест святыя трапезы, архиерей же, приклонь главу молится пред святою трапезою сице, во еже слышану быти сослужащими:

Молитва прежде святого причащения:

Владыко Христе, Боже наш, небесный хлебе, пище всего мира, согреших на небо и пред Тобою, и несмь достоин причаститися святых и пречистых Твоих таин. Но ради благости Твоея и неизреченного долготерпения, достойна мя сотвори и неосужденна, и непостыдна, причаститися всесвятаго тела и честныя крове во оставление грехов и в жизнь вечную.

(Зде в нецыих рукописях и якоже обычай есть в Закинфе, вливается теплота во святый потир, мы же в Иерусалиме сего не прияхом).

И причащается архиерей Святого Тела, глаголя в себе:

Тело Христово.

И его причастится преподает всем иереям и диаконам Святое Тело, глаголя при коемждо даянии:

Тело Христово.

И отвещает приемляй часть по обычаю на длани своя, глаголя: Аминь.

Таже и снедает Святый Хлеб. И егда причастит архиерей сослужащия, приемлет Святый потир с платом, якоже обычай есть и причащается из него по обычаю, глаголя:

Кровь Христова, чаша жизни.

Таже причащает сослужащия Святыя Крове, якоже обычай есть на литургиях Златоустовой или Василиевой, глаголя коемуждо приходящему:

Кровь Христова, чаша жизни.

И отвечает причащающийся: Аминь.

Зри: да части, яже суть на святом дискосе никакоже по причащении в потир не влагаеши.

Сице бывает причащение, и приемлет архиерей, или иерей, и диакони теплоту и помывают уста своя, по обычаю. Един диакон, хотяй потребляти Святая, не еприемлет теплоты. Антидора несть на сей литургии, зане просфоры не приносятся, точию обрезки великия просфоры, из нее же Святый Хлеб изъят бысть.

Егда же совершится во святом олтаре причащение, и настанет время причащения мирян, глаголет диакон, стояще у десныя страны Святыя трапезы, тихим гласом:

Господи, благослови.

Архиерей или иерей такожде:

Слава Богу, освятившему и освящающему нас.

Диакон: приемля от архиерея или иерея Святую чашу:

Вознесися на небеса Боже, и по всей земли слава Твоя, и царство Твое пребывает во веки веков.

Архиерей или иерей такожде тихо:

Благословенно имя Господа Бога нашего, во веки веков.

Отверзается завеса и царския двери, и диакон, пришед во святыя двери показует людям Святую чашу возглашает:

Со страхом Божиим приступите.

Людие поют: Благословен Грядый во имя Господне.

(Зри: бывает же зде причащение мирян. Бысть же сие, согласно древнейшим рукописям сице. Егда подаст арихиерей диакону Святую чашу, сам примелет Святый дискос со Святым Хлебом обеими рукама, и возвышь обоя глаголют якоже предписася; диакон: Господи благослови , архиерей же: Вознесися на небеса и прочая. Егда же речет архиерей: Благословенно имя Господа Бога нашего , тогда идут архиерей же и диакон во святыя двери; архиерей держа обеима рукама Святой дискос, диакон же чашу, и станут оба в святых дверех. И возгласит диакон: Со страхом Божиим. И мало отшед станет одесную страну архиерея мало на стране, у иконы Пресвятыя Владычицы. И приходят людие со смирением ко архиерею и архиерей, держа в шуйце дискос влагает во уста приходящему часть Святого Хлеба, глаголя: Тело Христово. И отвещает приходяй: Аминь , и приемше часть Святаго снедает ю и приходит к диакону. И глаголет диакон: Кровь Христова, чаша жизни . И отвечает приходяй: Аминь . И сице причащаются люди.

Аще и православно сие и лепо есть, обаче не обычен есть в наши дни сицевый чин. Подобает, глаголет архиепископ Закинфский Дионисий, да потребные части Святого Хлеба положит Архиерей во Святой потир по еже причаститится служащим, и причащает зде люди приходящие, аще будут, Тела и Крове Христоы вкупе лжицею, якоже ныне обычай православным христианам есть).

Егда же скончают причащение, благословляет архиерей дискосом люди глаголя:

Спаси, Боже, люди Твоя, и благослови достояние Твое.

И входят архиерей и диакон во святый олтарь и поставляют Святая на святей трапезе: архиерей, или иерей убо дискос, диакон же святый потир.

Аще несть причащающихся мирян, тогда диакон по возгласе: Со страхом Божиим относит паки чашу и поставляет ю на Святей трапезе. И влагает архиерей или иерей части Святаго Хлеба во святую чашу и опрятает по обычаю святый дискос. И прием кадильницу, глаголет молитву сию тайно таже кадит Святая.

Возвеселил еси ны, Боже, в единении Твоем, и Тебе приносим песнь благодарственную плод уст, исповедающе благодать Твою, с кадилом сим да взыдет к Тебе Боже, да не возвратится тщи, но подаждь нам его ради благоухания Всесвятаго Твоего Духа, миро пречистое и неотъемлемое, исполни уста наша хваления и устне радования и сердце радости и веселия, во Христе Иисусе Господе нашем, с Ним же благословен еси, со Всесвятым Твоим Духом, ныне, и присно, и во веки веков.

И относит Святая един от иереев от Святыя трапезы на жертвенник ничтоже глаголя. Диакон такожде относит дискос, без каждения.

Зри. Яков в древних списках указася по еже возгласити диакону: Со страхом Божиим, пети людем сие:

Исполни уста моя хваления, Господи, и радости исполни устне мои яко да воспою славу Твою. – Благодарим Тя, Христе Боже наш, яко сподобил еси нас причаститися Тела и Крове Твоея во оставление грехов и в жизнь вечную. Неосужденны ны сохрани, молимся, яко благ и человеколюбец.

Диакон же, изшед северными враты, станет на своем месте, зря к людем и глаголет диаконства:

Паки и паки, непрестанно миром Господу помолимся. Яко да будет нам причащение святынь Его во отвращение всякаго лукаваго деяния, в напутие живота вечнаго, в причащение и дар Святаго Духа, помолимся. Пресвятую, Пречистую, Преславную, Благословенную Владычицу нашу Богородицу и Приснодеву Марию, со всеми Святыми и праведными помянувше, сами себе, и друг друга, и весь живот наш Христу Богу предадим.

Людие: Тебе Господи.

Глаголемым же диаконствам сим, архиерей или иерей пред святою трапезой тайно сице. Антиминс же подобает свити.

Боже, великаго ради и неизреченнаго благоутробия снисшедый немощи рабов Твоих, и сподобивый ны причаститися сея пренебесныя трапезы, не осуди ны о причащении пречистых Твоих таин, но сохрани ны, Блаже, во освящении, яко да достойны бывше Всесятаго Твоего Духа, обрящем часть и наследие со всеми святыми от века Тебе благоугодившими в свете лица Твоего, щедротами Единороднаго Твоего Сына, Господа же и Спаса нашего Иисуса Христа, с ним же благословен еси, со Всесвятым, и Благим, и Животворящим Твоим Духом, ныне, и присно, и во веки веков.

Возглас: Яко благословися и святися и препрославися всечестное и великолепое Святое имя Твое, Отца, и Сына, и Святаго Духа, ныне, и присно, и во веки веков.

Людие: Аминь.

Архиерей или иерей благословляет люди глаголя: Мир всем.

Диакон же абие глаголет: Главы наша Господеви приклоним.

Людие: Тебе Господи.

Архиерей же или иерей молитву сию тайно:

Боже великий и дивный, призри на рабы Твоя яко Тебе приклонихом выи, и простри руку Твою державную, исполнену благословений, и благослови люди Твоя, и сохрани достояние Твое, яко да всегда и непрестанно прославляем Тя, Единаго Живаго и Истиннаго Бога нашего, Святую и Единосущную Троицу, Отца и Сына и Святаго Духа.

Возглас: Тебе бо подобает и долженствует от всех нас всякое славословие, честь, поклонение и благодарение Отцу, и Сыну, и Святому Духу, ныне, и присно, и во веки веков.

Людие: Аминь.

Диакон: С миром Христовым изыдем.

Архиерей же или иерей исшед святыми дверьми из олтаря, и став среди народа глаголет молитву сию, зря к востоку:

От силы в силу восходяще, и всю еже в храме Твоем исполнив Божественную службу, и ныне молимся Ти, Господи Боже наш: совершеннаго человеколюбия сподоби ны, исправи путь наш, укорени ны во страсе Твоем, всех помилуй и пренебеснаго царствия Твоего достойны покажи, во Христе Иисусе Господе нашем, с Ним же подобает Тебе слава, честь, держава, вкупе со Всесвятым Духом, ныне, и присно, и во веки веков.

Диакон: Отпущается в мире.

Архиерей или иерей: Благословен Бог, благословляяй и освящаяй ны причащением святых и пречистых Его Таин, ныне, и присно, и во веки веков.

Людие: Аминь.

И отходят людие с миром в домы своя. Иерей же совлачается святых одежд тожде творит и диакон, потребив святая, и идут в домы своя благодаряще Бога.

Сице совершися Божественная Литургия Св. Апостола Иакова.

Конец и Богу слава.