Чи́нъ, быва́емый на хїротоні́ю дїа́кона

По еже рещи́ архиерею: И҆ да бꙋ́дꙋтъ ми́лости:

приносят иподиакони кафе́дру и поставляют пред святою трапе́зою, мало ко стране́ левой, яко да не будут Святая созади́. И седа́ет архиерей на ней, и взе́млют иму́щаго хиротониса́тися от среды́ церкве два иподиакони, иму́ще его между́ собою и полагающе ки́йждо их едину ру́ку на вы́ю его, и второю рукою держа́т за ру́ки, и приклоня́ют его ни́чуща, елико мо́щно. И глаголет един диакон во олтари́: Повели́. Таже поступивше мало, приклоня́ют его, якоже и первее. Глаголет иный диакон: Повели́те. Таже и́дут близ святых олтарных врат, приклонше его пред архиере́ом.

Протодиакон же глаголет: Повели́, Преосвяще́ннейший Влады́ко.

И оставляют иподиакони иму́щаго хиротониса́тися в царских врате́х, приемлют же его два, протодиакон и диакон, един за десну́ю, вторы́й же за левую руку, он же покланя́ется архиерею. Архиерей же осени́т его рукою крестовидно, и обходят святую трапе́зу, поюще водя́щии, и прочии:

Святи́и му́ченицы, и́же до́бре страда́вше и венча́вшеся, моли́теся ко Го́споду спасти́ся душа́м на́щым.

Таже поют и вне еди́нощи. И целует хиротонису́емый четыри у́глы святыя трапе́зы, и архиерейскую руку и колено.

Таже обхо́дят па́ки, поюще: Сла́ва Тебе́, Христе́ Бо́же, апо́столов похвало́ и му́чеников весе́лие, и́хже про́поведь Тро́ица Единосу́щная.

И вне лик то́жде поет еди́нощи. И хиротонису́емый целует святую трапе́зу паки, подобне, якоже и первее, и архиере́ов епигона́тион, и руку.

Таже паки обходят, поюще: Иса́ие, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

И творят чин по предписанному. И поют вне то́жде.

Таже востаст архиерей, и взе́млют кафе́дру, и и́дет хиротонису́емый к десне́й стране архиереа, и покланяется пред святою трапе́зою, три́щи, глаголя: Бо́же, уми́лостивися мне, гре́шному. И, приклони́в едино колено десно́е, полагает длани крестовидно на святую трапе́зу, приложи́т же и чело между́ рук ко святей трапезе. Архиерей полагает край омофориа на главу хиротонисуемаго и благословляет его по главе, трищи.

Возглашающу протодиакону или диакону: Во́нмем, прочита́ет архиерей, возложи́в руку на главу его, в слух всех предстоя́щих во олтари́, возгласно:

Бжⷵтвеннаѧ бл҃года́ть, всегда̀ немощна̑ѧ врачꙋ́ющи и҆ ѡ҆скꙋдѣва̑ющаѧ восполнѧ́ющи, прорꙋчествꙋ́етъ, имⷬ҇къ, бл҃гоговѣ́йнѣйшаго ѵ҆подїа́кона во дїа́кона: помо́лимсѧ ѹбѡ ѡ҆ не́мъ, да прїи́детъ на него̀ бл҃года́ть всеста́гѡ дх҃а.

И поют внутрь иерее, и́же от десны́я страны́: Го́споди, поми́луй, три́щи. Таже паки от левыя страны, три́щи.

И певцы вне, на правом и левом кли́росех: Ки́рие, еле́исон, по три́щи, косно, до́ндеже архиерей прочте́т молитвы.

Таже благословляет его архиерей по главе трищи, имея и руку на главе хиротонисуемаго.

Глаголет протодиакон: Го́споду помо́лимся, тихим гласом.

Архиерей же глаголет молитву тайно:

Гдⷵи бж҃е на́шъ, предзна́нїемъ твои́мъ ст҃а́гѡ твоегѡ̀ дх҃а подаѧ́нїе низпосыла́ѧй на ѡ҆предѣлє́нныѧ ѿ твоеѧ̀ неизслѣ́дныѧ си́лы слꙋжи́телємъ бы́ти и҆ рабо́тати несквє́рнымъ твои̑мъ та́йнамъ, са́мъ влⷣко, и҆ сего̀, є҆го́же бл҃говоли́лъ є҆сѝ прорꙋчествова́тисѧ ѿ менѐ во дїа́конства слꙋже́нїе, во всѧ́кой че́стности соблюдѝ, и҆мꙋ́щаго та́йнꙋ вѣ́ры въ чи́стѣй со́вѣсти. да́рꙋй же є҆мꙋ̀ бл҃года́ть, юже дарова́лъ є҆сѝ стефа́нꙋ первомꙋ́ченикꙋ твоемꙋ̀, є҆го́же и҆ призва́лъ є҆сѝ пе́рваго въ дѣ́ло слꙋже́нїѧ твоегѡ̀, и҆ ѹ҆досто́й є҆го̀ по бл҃гоꙋго́дномꙋ тебѣ̀ стро́ити ѿ твоеѧ̀ бла́гости дарова́нный є҆мꙋ́ сте́пень, до́брѣ бо слꙋжи́вшїи степе́нь себѣ̀ до́брⸯ притворѧ́ютⸯ, и соверше́на покажѝ раба̀ твоего̀.

Возгла́с:

Ꙗкѡ твоѐ єсть црⷵтво, и҆ си́ла, и҆ сла́ва, ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Протодиакон же читает ми́рная тихим гласом: Ми́ром Го́споду помо́лимся. Отвеща́ют на ко́еждо прошение: Го́споди, поми́луй, еди́нощи. О свы́шнем ми́ре: О ми́ре всего́ ми́ра: О архиере́и на́шем [имярек], свяще́нстве, защище́нии, пребыва́нии, ми́ре, здра́вии, спасении его́ и де́ле рук его́ Го́споду помо́лимся. О рабе́ Бо́жием [имярек], ныне проручеству́емом диа́коне, и спасе́нии его́ Го́споду помо́лимся. Яко да Человеколю́бец Бог нескве́рно и непорочно ему́ диа́конство да́рует Го́споду помо́лимся. О Вели́ком Господи́не и Отце́ на́шем: О Богохрани́мей стране́ на́шей: О гра́де сем: О изба́витися нам: Заступи́, спаси́, поми́луй: Пресвяту́ю, Пречи́стую:

Отвещают: Тебе́, Го́споди.

Архиерей же, имея руку на главе хиротонисуемаго, глаголет и вторую молитву:

Бж҃е сп҃се на́шъ, нетлѣ́ннымъ твои́мъ гла́сомъ а҆пⷵлѡмъ твои̑мъ ѹ҆ста́вивый дїа́конства зако́нъ и҆ первомꙋ́ченика стефа́на сицева́го показа́вый и҆ пе́рваго є҆го̀ провѣствова́вый дїа́кона, полнѧ́ща дѣ́ло, ꙗкѡ писа́сѧ во ст҃ѣ́мъ є҆ѵⷢ҇лїи твое́мъ: иже кто̀ хо́щетъ бы́ти въ ва́съ пе́рвый, да бꙋ́детъ ва́шъ слꙋга̀, ты̀ влⷣко всѣ́хъ, и҆ раба̀ твоего̀ сего̀, є҆го́же ѹ҆досто́илъ є҆сѝ дїа́кона подвни́ти слꙋже́нїе, и҆спо́лни всѧ́кїѧ вѣ́ры, и҆ любвѐ, и҆ си́лы, и҆ ст҃ы́ни, наше́ствїемъ ст҃агѡ и҆ животворѧ́щагѡ твоегѡ̀ дх҃а, не бо̀ въ наложе́нїи рꙋ́къ мои́хъ, но въ посѣще́нїи бога́тыхъ твои́хъ щедрѡ́тъ дае́тсѧ бл҃года́ть достѡ́йнымъ тебѐ: да и҆ се́й, кромѣ̀ всѧ́кагѡ грѣха̀ бы́въ, во стра́шномъ днѝ сꙋда̀ твоегѡ̀ непоро́ченъ тебѣ̀ предста́нетъ и҆ мздꙋ̀ непрелга́ннꙋ ѡ҆бѣща́нїѧ твоегѡ̀ прїи́метъ.

Возглашение: Ты́ бо є҆сѝ бг҃ъ на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Таже воздвигнут его, и разреша́ют его препоя́сания. И, взем ора́рий, возлагает архиерей на левое ра́мо, глаголя велегла́сно: Аѯїосъ.

И поют во олтари́ три́щи: Аксиос. И вне подобне на о́ба лика. Таже даются поручи. И глаголет архиерей: Аѯїосъ.

И поют во олтари́ три́щи, и вне подобне. Таже дается рипи́да, и глаголет архиерей: Аѯїосъ.

И поют во алтари, и вне по обычаю. И целует архиере́а в ра́мо, и поставляется у престола стрещи Святая.