Ѿпꙋ́сты влⷣчнихъ пра́здникѡвъ, Гл҃емїи въ вече́рню, во ѹтреню и҆ въ лїтꙋргі́ю по чи́нꙋ

На ржⷵтво хрⷵто́во:

Иже въ верте́пѣ роди́выйса, и҆ въ ꙗслѣхъ возлегі́й, на́шегѡ ра́ди сп҃се́нїѧ, хрⷵто́съ истинный бг҃ъ на́шъ: и҆ про́чее до конца̀.

На ѡ҆брѣ́занїе:

Иже во ѻ҆смы́й де́нь пло́тїю ѡ҆брѣ́затисѧ и҆зво́ливый на́шегѡ ра́ди сп҃се́нїѧ, хрⷵто́съ истинный: и҆ про́чее.

На бг҃оѧвле́нїе:

Иже во і҆ѻрда́нѣ крⷵти́тиса и҆зво́ливый ѿ і҆ѡа́нна, на́шегѡ ра́ди сп҃се́нїѧ, хрⷵто́съ истинный: и҆ про́чее.

На срѣ́тенїе:

Иже во ѡ҆б̾ѧ́тїихъ пра́веднагѡ сѷмеѡ́на носи́тисѧ и҆зво́ливый, на́шегѡ ра́ди сп҃се́нїѧ, хрⷵто́съ истинный:

На преѡбраже́нїе:

Иже на горѣ̀ ѳавѡ́рстѣй преѡбрази́выйсѧ бо сла́вѣ пред̾ ст҃ы́ми свои́ми ѹ҆ч҃нкѝ и҆ а҆пⷵлы, хрⷵто́съ истинный:

Въ недѣ́лю цвѣтнꙋ́ю:

Иже нд жребѧ́ти ѻсли сѣ́сти и҆зво́ливый, на́шегѡ ра́ди сп҃се́нїѧ, хрⷵто́съ истинный:

Въ тꙋ́же недѣ́лю ве́чера:

Грѧды́й гдⷵь на во́льнꙋю стрⷵть, на́шегѡ ра́ди сп҃се́нїѧ, хрⷵто́съ истинный:

Въ вели́кїй четверто́къ:

Иже за превосходѧ́щꙋю бл҃гость пꙋ́ть до́брѣйшїй смире́нїѧ показа́вый, внегда̀ ѹ҆мы́ти но́ги ѹ҆ч҃нкѡ́въ, да́же и҆ до крⷵта̀ и҆ погребе́нїѧ сни́зше́дый на́мъ, хрⷵто́съ истинный:

Во ѿпꙋ́стъ ст҃ы́хъ стрⷵте́й:

Иже ѡ҆плева̑нїѧ, и҆ бїє́нїѧ, и҆ заꙋшє́нїѧ, и҆ крⷵтъ, и҆ сме́рть претерпѣ́вый, за сп҃се́нїе мі́ра, хрⷵто́съ истинный:

Во ст҃ы́й и҆ вели́кїй пѧто́къ:

Иже на́съ ра́ди человѣ́кѡвъ и҆ на́шегѡ ра́ди сп҃се́нїѧ стра̑шныѧ стрⷵти, и҆ животворѧ́щїй крⷵтъ, и҆ во́льное погребе́нїе пло́тїю и҆зво́ливый, хрⷵто́съ истинный:

Во ст҃ꙋю и҆ вели́кꙋю недѣ́лю па́схи и҆ во всю̀ свѣ́тлꙋю седми́цꙋ:

Хрⷵто́съ, воскр҃сы́й и҆з̾ ме́ртвыхъ, сме́ртїю сме́рть попра́вый, и҆ сꙋ́щымъ во гробѣ́хъ живо́тъ дарова́вый, истинный бг҃ъ на́шъ:

Во всѧ̀ недѣ́ли всегѡ̀ лѣ́та:

Воскр҃сы́й и҆з̾ ме́ртвыхъ хрⷵто́съ истинный бг҃ъ на́шъ:

На вознесе́нїе:

Иже во сла́вѣ вознесы́йсѧ ѿ на́съ на нб҃о и҆ ѡ҆деснꙋ́ю сѣ́дый бг҃а и҆ ѻ҆ц҃а̀, хрⷵто́съ истинный:

Въ недѣ́лю пѧтдесѧ́тнꙋю:

Иже въ видѣ́нїи (въ ви́дѣ) ѻгненныхъ ѧ҆зы̑къ съ нб҃сѐ низпосла́вый прест҃а́го дх҃а на ст҃ы̑ѧ своѧ̑ ѹ҆ч҃нкѝ и҆ а҆пⷵлы, хрⷵто́съ истинный:

Въ тꙋ́же недѣ́лю ве́чера:

Иже ѿ ѻч҃їихъ, и҆ бж҃е́ственныхъ нѣ́дръ и҆стощи́вый себѐ, и҆ съ нб҃сѐ на зе́млю соше́дый и҆ на́ше всѐ воспрїе́мый є҆стество̀, и҆ ѡ҆божи́вый є: по си́хъ же на нб҃са̀ па́ки возше́дый и҆ ѡ҆деснꙋ́ю сѣ́дый бг҃а и҆ ѻ҆ц҃а̀: бж҃е́ственнаго же и҆ ст҃а́го, и҆ є҆диносꙋ́щнаго, и҆ є҆диноси́льнаго, и҆ є҆диносла́внаго, и҆ соприсносꙋ́щнаго дх҃а низпосла́вый на ст҃ы̑ѧ своѧ̑ ѹ҆ч҃нкѝ и҆ а҆пⷵлы, и҆ си́мъ просвѣти́вый ѹбѡ ихъ, тѣ́ми же всю̀ вселе́ннꙋю, хрⷵто́съ, истинный бг҃ъ на́шъ, мл҃твами пречⷵтыѧ и҆ пренепоро́чныѧ ст҃ы́ѧ своеѧ̀ мт҃ре, ст҃ы́хъ сла́вныхъ, прехва́льныхъ, бг҃опроповѣ́дникѡвъ и҆ дх҃оно́сныхъ а҆пⷵлѡвъ, и҆ всѣ́хъ ст҃ы́хъ, поми́лꙋетъ и҆ сп҃се́тъ на́съ, ꙗкѡ бл҃гъ и҆ чл҃вѣколю́бецъ.

Мл҃твы благода́рствєнныѧ по ст҃ѣ́мъ причаще́нїи

Егда́ получи́ши до́браго причаще́ния Животворя́щих Та́инственных Дарова́ний, воспо́й а́бие, благодари́ вельми́.

И сия те́пле от души́ Бо́гу глаго́ли:

Сла́ва тебѣ̀ бж҃е, сла́ва тебѣ̀ бж҃е, сла́ва тебѣ̀ бж҃е.

Та́же бл҃года́рственнꙋю сїю̀ мл҃твꙋ:

Бл҃годарю́ тѧ гдⷵи бж҃е мо́й, ꙗкѡ не ѿри́нꙋлъ мѧ̀ є҆сѝ грѣ́шнаго, но ѻбщника мѧ̀ бы́ти ст҃ы́нь твои́хъ сподо́билъ є҆сѝ. бл҃годарю́ тѧ, ꙗкѡ менѐ недосто́йнаго причасти́тисѧ пречи́стыхъ твои́хъ и҆ нбⷵныхъ дарѡ́въ сподо́билъ є҆сѝ. но влⷣко чл҃вѣколю́бче, на́съ ра́ди ѹ҆ме́рый же и҆ воскр҃сы́й и҆ дарова́вый на́мъ стра̑шнаѧ сїѧ̑ и҆ животворѧ̑щаѧ та̑инства, во бл҃годѣѧ́нїе и҆ ѡ҆сщ҃е́нїе дꙋ́шъ и҆ тѣле́съ на́шихъ, да́ждь бы́ти си̑мъ и҆ мнѣ̀, во и҆сцѣле́нїе дꙋши́ же и҆ тѣ́ла, во ѿгна́нїе всѧ́кагѡ сопроти́внагѡ, въ просвѣще́нїе ѻчїю се́рдца моегѡ̀, въ ми́ръ дꙋше́вныхъ мои́хъ си́лъ, въ вѣ́рꙋ непосты́днꙋ, въ любо́вь нелицемѣ́рнꙋ, во и҆сполне́нїе премꙋ́дрости, въ соблюде́нїе за́повѣдей твои́хъ, въ приложе́нїе бж҃е́ственныѧ твоеѧ̀ бл҃года́ти, и҆ твоегѡ̀ црⷵтвїѧ присвое́нїе: да во ст҃ы́ни твое́й тѣ́ми сохранѧ́емь, твою̀ бл҃года́ть помина́ю всегда̀ и҆ не ктомꙋ̀ себѣ̀ живꙋ̀, но тебѣ̀ на́шемꙋ влⷣцѣ и҆ бл҃годѣ́телю. и҆ та́кѡ сегѡ̀ житїѧ̀ и҆зше́дъ ѡ҆ наде́жди живота̀ вѣ́чнагѡ, въ присносꙋ́щный дости́гнꙋ поко́й, и҆дѣ́же пра́зднꙋющихъ гла́съ непреста́нный и҆ безконе́чнаѧ сла́дость зрѧ́щихъ твоегѡ̀ лица̀ добро́тꙋ неизрече́ннꙋю. ты́ бо є҆сѝ истинное жела́нїе, и҆ неизрече́нное весе́лїе лю́бѧщихъ тѧ̀ хрⷵтѐ бж҃е на́шъ, и҆ тѧ̀ пое́тъ всѧ̀ тва́рь во вѣ́ки.

Вели́кагѡ васі́лїа, в҃:

Влⷣко хрⷵтѐ бж҃е, цр҃ю̀ вѣкѡ́въ и҆ содѣ́телю всѣ́хъ, бл҃годарю́ тѧ ѡ҆ всѣ́хъ, ꙗже мѝ є҆сѝ по́далъ, бл҃ги́хъ, и҆ ѡ҆ причаще́нїи пречⷵтыхъ и҆ животворѧ́щихъ твои́хъ та́инствъ. молю̀ ѹбѡ тѧ̀ бл҃же и҆ чл҃вѣколю́бче, сохрани́ мѧ под̾ кро́вомъ твои́мъ, и҆ въ сѣ́ни крилꙋ̑ твоє́ю. и҆ да́рꙋй мѝ чи́стою со́вѣстїю да́же до послѣ́днѧгѡ моегѡ̀ и҆здыха́нїѧ досто́йнѡ причаща́тисѧ ст҃ы́нь твои́хъ во ѡ҆ставле́нїе грѣхѡ́въ и҆ въ жи́знь вѣ́чнꙋю. Ты́ бо є҆сѝ хлѣ́бъ живо́тный, и҆сто́чникъ ст҃ы́ни, пода́тель бл҃ги́хъ, и҆ тебѣ̀ сла́вꙋ возсыла́емъ, со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Метдфра́ста, по стїхѡ́мъ, г҃:

Да́вый пи́щꙋ мнѣ̀ пло́ть твою̀ во́лею, Ѻгнь сы́й и҆ ѡ҆палѧ́ѧй недостѡ́йныѧ, Да не ѡ҆пали́ши менѐ, содѣ́телю мо́й. Па́че же пройдѝ во ѹды моѧ̀, Во всѧ̀ соста́вы, во ѹ҆тро́бꙋ, въ се́рдце. Попалѝ те́рнїе всѣ́хъ мои́хъ прегрѣше́нїй. Дꙋ́шꙋ ѡ҆чи́сти, ѡ҆свѧтѝ помышлє́нїѧ. Соста́вы ѹ҆твердѝ съ костьмѝ вкꙋ́пѣ. Чꙋ́вствъ просвѣтѝ про́стꙋю пѧтери́цꙋ. Всего́ мѧ спригвоздѝ стра́хꙋ твоемꙋ̀. При́снѡ покры́й, соблюди́ же и҆ сохрани́ мѧ, Ѿ всѧ́кагѡ дѣ́ла и҆ сло́ва дꙋшетлѣ́ннагѡ. Ѡ҆чи́сти, и҆ ѡ҆мы́й, и҆ ѹ҆краси́ мѧ: Ѹ҆добрѝ, вразꙋмѝ и҆ просвѣти́ мѧ. Покажи́ мѧ твоѐ селе́нїе є҆ди́нагѡ дх҃а, И҆ не ктомꙋ̀ селе́нїе грѣха̀: Да ꙗкѡ твоегѡ̀ до́мꙋ, вхо́домъ причаще́нїѧ, Ꙗкѡ ѻ҆гнѧ̀ менѐ бѣжи́тъ всѧ́къ ѕлодѣ́й, всѧ́ка стра́сть. Моли́твенники тебѣ̀ приношꙋ̀ всѧ̑ ст҃ы̑ѧ, Чинондча̑лїѧ же безпло́тныхъ, Прⷣте́чꙋ твоего̀, мꙋ̑дрыѧ апⷵлы, Къ си̑мъ же твою̀ нескве́рнꙋю чи́стꙋю мт҃рь: Ихже мольбы̑ благоꙋтро́бне прїимѝ хрⷵтѐ мо́й, И҆ сн҃омъ свѣ́та содѣ́лай твоегѡ̀ слꙋжи́телѧ. Ты́ бо є҆ди́нъ є҆сѝ и҆ ѡ҆сщ҃е́нїе на́шихъ, бл҃же, дꙋ́шъ и҆ свѣ́тлость, И҆ тебѣ̀ лѣпоподо́бнѡ ꙗкѡ бг҃ꙋ и҆ влⷣцѣ сла́вꙋ всѝ возсыла́емъ на всѧ́къ де́нь.

Мл҃тва и҆на́ѧ:

Тѣ́ло твоѐ ст҃о́е гдⷵи і҆и҃се хрⷵтѐ бж҃е на́шъ, да бꙋ́детъ мѝ въ живо́тъ вѣ́чный, и҆ кро́вь твоѧ̀ честна́ѧ во ѡ҆ставле́нїе грѣхѡ́въ. бꙋ́ди же мѝ б̆л҃годаре́нїӗ сїѐ въ ра́дость, здра́вїе и҆ весе́лїе въ стра́шное же и҆ второ́е прише́ствїе твоѐ, сподо́би мѧ̀ грѣ́шнаго ста́ти ѡ҆деснꙋ́ю сла́вы твоеѧ̀, мл҃твами пречⷵтыѧ твоеѧ̀ мт҃ре и҆ всѣ́хъ ст҃ы́хъ.

Мл҃тва и҆на́ѧ ко прест҃ѣ́й бцⷣѣ:

Прест҃а́ѧ влⷣчце бцⷣе, свѣ́те помраче́нныѧ моеѧ̀ дꙋшѝ, наде́жде, покро́ве, прибѣ́жище, ѹ҆тѣше́нїе, ра́дованїе моѐ, бл҃годарю́ тѧ, ꙗкѡ сподо́била мѧ̀ є҆сѝ недосто́йнаго прича́стника бы́ти пречⷵтагѡ тѣ́ла и҆ чⷵтны́ѧ кро́ве сн҃а твоегѡ̀. но ро́ждшаѧ истинный свѣ́тъ, просвѣтѝ моѧ̑ ѹмныѧ ѻчи се́рдца: ꙗже и҆сто́чникъ безсме́ртїѧ ро́ждшаѧ, ѡ҆животворѝ мѧ̀ ѹ҆мерщвле́ннаго грѣхо́мъ: ꙗже млⷵтивагѡ бг҃а любобл҃гоꙋтро́бнаѧ мт҃и, поми́лꙋй мѧ̀, и҆ да́ждь мѝ ѹ҆миле́нїе и҆ сокрꙋше́нїе въ се́рдцѣ мое́мъ и҆ смире́нїе въ мы́слехъ мои́хъ, и҆ воззва́нїе въ плѣне́нїихъ помышле́нїй мои́хъ. и҆ сподо́би мѧ̀ до послѣ́днѧгѡ и҆здыха́нїѧ, неѡсꙋжде́ннѡ прїима́ти пречⷵтыхъ та̑инъ ѡ҆сщ҃е́нїе, во и҆сцѣле́нїе дꙋши́ же и҆ тѣ́ла, и҆ пода́ждь мѝ сле́зы покаѧ́нїѧ, и҆ и҆сповѣ́данїѧ во єже пѣ́ти и҆ сла́вити тѧ̀ во всѧ̑ дни̑ живота̀ моегѡ̀, ꙗкѡ бл҃гослове́нна и҆ препросла́вленна є҆сѝ во вѣ́ки. А҆ми́нь.