Вослѣдованїе моле́бнагѡ пѣ́нїѧ къ прⷭ҇тѣй живонача́лнѣи Трⷪ҇ци, пѣва́емагѡ въ вре́мѧ гꙋби́телнагѡ не́дꙋга, и҆ напра́сныѧ ᲃме́рти
Наче́ншꙋ І҆ере́ю ѡ҆бы́чнѡ, Блⷭ҇венъ Бг҃ъ на́шъ:
Чте́цъ же: Цр҃ю нбⷭ҇ный, Трⷭ҇то́е: Ѿч҃е на́шъ:
І҆ере́ѵ꙼ же:
Ꙗ҆́кѡ твоѐ є҆́стъ Црⷭ҇тво:
Чте́цъ:
Гд҃и поми́лꙋй: в҃і Прїйдѣ́те поклон: гⷤ. и҆ ѱало́мъ, п҃ꙁ.
Гд҃и Бж҃е сп҃се́нїѧ мое́гѡ, въ дни воꙁꙁва́хъ:
По сконча́нїи же ѱалма̀ Дїа́конъ гл҃етъ, Е҆кте́нїѧ вели́к:
Ми́ром Гд҃ꙋ помо́лимсѧ. И҆ про́чаѧ да́же до ѡ҆ плава́ющихъ: И҆ а҆́бїе прилага́ет̀ ᲃі́ѧ.
Ꙍ҆ є҆́же не помѧнꙋ́ти беꙁꙁакѡ́нїй и҆ со́блаꙁнъ на́съ грѣ́шныхъ и҆ недосто́йныхъ рабѡ́въ свои́хъ, но млⷭ҇тивнѡ ѡ҆чи́стити грѣ́хѝ нш҃а, и҆ ѿврати́ти гнѣ́въ сво́й пра́веднѡ движи́мый на́ны, Гд҃ꙋ помоли́мсѧ.
Ꙍ҆ є҆́же не ꙗ҆́ростїю свое́ю ѡ҆бличи́ти, ни гнѣ́вомъ свои́мъ покаꙁни́ти на́съ, но помѧнꙋ́ ти ꙗ҆́кѡ пло́тъ є҆смы̀, дꙋ́хъ ѿходѧ́й и҆ не ѡ҆браща́ѧйсѧ, и҆ млⷭ҇тивнѡ пощади́ти ѿ сме́рти дш҃а на́ша, и҆ въ гнѣ́вѣ млⷭ҇ти помѧнꙋ́ти, Гд҃ꙋ помоли́мсѧ.
Ꙍ҆ є҆́же не внитѝ въ сꙋ́дъ съ рабы свои́ми, и҆ не на́ꙁрѣти беꙁꙁакѡ́нїѧ на́шѧ, но ѡ҆чи́стити ѧ҆̀, и҆ млⷭ҇тивъ бы́ти и҆ пощади́ти лю́ди ненача́емыѧ, Гд҃ꙋ помоли́мсѧ.
Ꙍ҆ є҆́же помѧнꙋ́ти щедрѡты̀ и҆ млⷭ҇ти ᲃвоѧ̀, ꙗ҆́кѡ ѿ вѣ́ка сꙋ́тъ, и҆ грѣ́хъ ю҆́ности и҆ невидѣ́нїѧ и҆ ста́рости ѡ҆каѧ́нства нш҃гѡ не помѧнꙋ́ти, и҆ поми́ловати на́съ, Гд҃ꙋ помоли́мсѧ.
Ꙍ҆ є҆́же ᲂу҆слы́шати ѿ хра́ма ᲃт҃а́гѡ свое́гѡ гла́съ на́шъ, и҆ и҆сцѣли́ти бо́лѣꙁни сме́ртныѧ ѡ҆держа́щїѧ на́съ, и҆ потѡ́ки беꙁꙁакѡ́нїѧ смꙋти́вшїѧ на́съ и҆ꙁсꙋши́ти, Гд҃ꙋ помоли́мсѧ.
Ꙍ҆ є҆́же въско́рѣ и҆ꙁѧ́ти на́съ, ѿ сѣ́тїй см҃ртныхъ предвари́вшихъ на́съ, и҆ ѿ бо́лѣꙁнїй а҆́довыхъ ѡ҆быше́дшихъ на́съ и҆ꙁба́вити, Гд҃ꙋ помоли́мсѧ.
Ꙍ҆ є҆́же млⷭ҇твнѡ продолжи́ти рабѡ́мъ свои́мъ покаѧ́нїѧ вре́мѧ, и҆ небеꙁго́днѡ ꙗ҆́кѡ непло́днꙋю ᲃмоко́вницꙋ посѣщѝ, но бл҃госе́рдїемъ ѡ҆копа́ти, и҆ милосе́рдїѧ гно́емъ ѡ҆сы́пати, плѡ́ды покаѧ́нїѧ и҆ ѡ҆браще́нїѧ на́шегѡ, чл҃кѡлю́бнѡ є҆щѐ ѡ҆жида́ѧ, Гд҃ꙋ помоли́мсѧ.
Ꙍ҆ є҆́же воꙁнестѝ на́съ ѿ вра́тъ сме́ртныхъ, и҆ ме́чъ и҆ꙁѧ́тый, и҆ лꙋ́къ сво́й напрѧ́женый, и҆ въ не́мъ сосꙋ́ды ᲃме́ртвыѧ на́ны пра́веднѡ ᲂу҆готова́нныѧ, съ стрѣла́ми горѧ́щими, млⷭ҇тивнѡ донде́же не поги́бнемъ, ѿ на́съ ѿврати́ти, Гд҃ꙋ помоли́мсѧ.
Ꙍ҆ є҆́же ᲂу҆слы́шати мл҃твꙋ на́шꙋ, и҆ моле́нїе на́ше внꙋши́ти, и҆ сле́ꙁы на́ша не премолчи́ти: но ѡ҆сла́бити на́мъ да почі́емъ пре́жде да́же не ѡ҆тыйдемъ, и҆ ктомꙋ̀ не бꙋ́демъ, Гд҃ꙋ помоли́мсѧ.
Ꙍ҆ є҆́же и҆ꙁба́витисѧ на́мъ:
Застꙋпѝ спасѝ поми́лꙋй:
Прест҃ꙋю чⷭ҇тꙋю преблгⷭ҇ве́ннꙋю сла́внꙋю:
Во́ꙁгласъ:
Ꙗ҆́кѡ подоба́етъ тѝ всѧ́каѧ ᲃла́ва:
Бг҃ъ Гд҃ь и҆ ꙗ҆ви́сѧ на́мъ:
На Гла́съ, в҃. И҆ Тропа́ръ Гла́съ то́йжде.
Въ гнѣ́вѣ твое́мъ Бж҃е помѧнѝ щедрѡты̀ твоѧ̀, пра́хъ бо и҆ пе́пелъ є҆смы̀: дꙋ́хъ ѿходѧ́й и҆ не ѡ҆браща́ѧй сѧ: и҆ не ꙗ҆́ростїю твое́ю ѡ҆бличѝ на́съ, да не поги́бнемъ до конца̀: но пощадѝ дꙋша̀ на́ша, ꙗ҆́кѡ є҆ди́нъ млⷭ҇рдъ. вⷤ.
Сла́ва: И҆ ны́нѣ: гла́съ, ѕ҃.
Застꙋ́пнице христїѧ́нѡмъ непосты́днаѧ:
Та́же, ѱало́мъ, н҃. Помл҃ꙋй мѧ̀, Бж҃е, по вели́цѣй млⷭ҇ти твое́й:
По сконча́нїи же ѱалма, а҆́бїе пѣвцѝ пою́тъ, Канꙍ́нъ Гла́съ, и҆ Пѣ́снь, а҃. И҆рмо́съ.
Въѡрꙋже́нна Фараꙍ́на погрꙋꙁѝ, чꙋдотвор:
Припѣ́лъ.
Гд҃и не ꙗ҆́ростїю твое́ю ѡ҆бличѝ на́съ, ни гнѣ́вомъ твои́мъ покажѝ на́съ.
Вседѣ́телнаѧ и҆ съра́слнаѧ, и҆ съпрⷭ҇то́лнаѧ, и҆ є҆диноси́лнаѧ, и҆ трисвѣ́тлаѧ ᲃла́во, Ѿч҃е непостижи́ме, ᲃн҃е и҆ дш҃е ᲃт҃ы́й, лю́тыѧ бо́лѣꙁни рабѡ́въ свои́хъ свободѝ, ꙗ҆́кѡ да бл҃годарстве́ннѡ тѧ сла́вимъ.
Грѣхѡ́въ бꙋ́рѧ и҆ꙁринꙋ́ мѧ̀ въ глꙋбинꙋ̀ не́мощи: и҆ ча́стыѧ бо́лѣꙁни, ꙗ҆́коже треволне́нїе мѧ̀ ѡ҆бꙋрева́ютъ ѡ҆каѧ́ннагѡ: є҆диноси́лнаѧ держа́во, Трⷪ҇це ᲃт҃а́ѧ ᲂу҆млⷭ҇рди́сѧ, ᲃп҃си́ мѧ лю́тѣ погиба́емагѡ.
Ѿ съдержа́щегѡ грѣ́ха̀ и҆ꙁба́ви Трⷪ҇це нераꙁдѣ́лнаѧ на́съ рабѡ́въ твои́хъ, росо́ю млⷭ҇ти твое́ѧ ᲂу҆гаша́ющїй зно́й лю́тыхъ бо́лѣꙁнїй, и҆ здра́вїе подающи: ꙗ҆́кѡ да правосла́внѡ воспѣва́емъ тѧ.
И҆ ны́нѣ: Бг҃оро́диченъ:
И҆ꙁбави́телѧ и҆ вседѣ́телѧ и҆ Гд҃а, въ чре́вѣ носи́вшаѧ, на́шѧ не́дꙋги всечⷭ҇таѧ поне́сшагѡ: тогѡ̀ ᲂу҆́бѡ мл҃ѝ, лю́тыѧ бо́лѣꙁни твои́мъ рабѡ́мъ и҆ꙁба́витисѧ, є҆дина̀ чл҃кѡмъ помо́щнице.
По семъ пою́тъ Катава́сїѧ ᲃі́ѧ.
И҆ꙁба́ви ѿ бѣ́дъ рабы̀ своѧ̀ млⷭ҇тиве, ꙗ҆́кѡ мы ᲂу҆се́рднѡ къ тебѣ̀ прибѣга́емъ, и҆ млⷭ҇тивомꙋ и҆ꙁбави́телю, всѣ́хъ Влады́це въ Трⷪ҇ци слави́момꙋ Бг҃ꙋ.
Катава́сїѧ Бц҃и.
Сп҃сѝ ѿ бѣ́дъ рабы̀ своѧ̀ Прст҃а́ѧ Бц҃е Дв҃о, ꙗ҆́кѡ мы ᲂу҆се́рднѡ къ тебѣ̀ прибѣга́емъ, ꙗ҆́кѡ къ нерꙋши́мой ᲃтѣнѣ̀, и предста́телници.
Сїѧ по кое́йждѡ Пѣ́сни пою́тъ.
Пѣ́снь, г҃ И҆рмо́съ.
Нбⷭ҇номꙋ крꙋ́гꙋ верхотвор: Нбⷭ҇нїи ᲂу҆́мѡве, А҆́гглⷭ҇тїи Чи́ни, Прⷭ҇ли и҆ Нача́ла, и҆ Си́лы и҆ Гдⷭ҇тва, ᲂу҆молѧ́ютъ тѧ бл҃га́гѡ и҆ ᲃп҃са, гꙋби́телнагѡ свободѝ не́дꙋга рабы̀ твоѧ̀.
Да чл҃кѡлю́бїѧ на мнѡ́ꙁѣ Влады́ко твое́гѡ пока́жеши бе́ꙁднꙋ, всеси́лне: не́дꙋга свободѝ см҃ртоно́снагѡ и҆ бо́лѣꙁнїй лю́тыхъ рабы твоѧ̀, є҆ди́не долготерпе́ливе.
Сла́ва:
Ꙗ҆́кѡ Бж҃іи предста́телїе, слꙋже́бнїи д҃си, А҆́гг҃ли и҆ А҆рхагг҃ли сегѡ̀ ᲂу҆моли́те, преста́ти не́дꙋгꙋ, раꙁори́ти мо́ръ, и҆ смертоно́сныѧ ча́сти и҆ꙁба́вити.
И҆ ны́нѣ:
И҆сцѣле́нїй и҆сто́чника тѧ бл҃гихъ покаꙁа̀, бе́ꙁдна и҆ꙁъ тебѐ проше́дшаѧ Хᲃ҃ Гдⷭ҇ь, ѻ҆трокови́це пренепоро́чнаѧ: тѣ́мже рабы̀ твоѧ̀ и҆ꙁба́ви, бо́лѣꙁнїй бꙋ́рею потоплѧ́емыхъ.
По Катава́сїѧхъ же а҆́бїе Дїа́конъ гл҃етъ Е҆кте́нїѧ ᲃі́ѧ.
Пом҃лꙋй на́съ Бж҃е по вели́цѣй ми́лости твое́й, моли́мъ ти:
Согрѣши́хѡмъ и҆ беꙁꙁаконова́хѡмъ, и҆ сегѡ̀ ра́ди пра́ведный тво́й гнѣ́въ постижѐ на́съ Гд҃и Бж҃е на́шъ, и҆ сѣ́нь ᲃме́ртнаѧ ѡ҆бы́йде на́съ, и҆ къ А҆́довымъ вра́тѡмъ приближи́хѡмсѧ: но къ тебѣ̀ Бг҃ꙋ на́шемꙋ въ бо́лѣꙁни на́шей ᲂу҆миле́ннѡ въпїемъ пощадѝ, пощадѝ люди твоѧ̀, и҆ не погꙋбѝ до конца̀, ᲃмире́ннѡ моли́мтисѧ, ᲂу҆слы́ши и҆ пом҃лꙋй.
Живото́мъ и҆ см҃ртїю Владычествꙋ́ѧ Гд҃и, не затворѝ въ см҃рти дш҃а̀ рабѡ́въ твои́хъ: но преста́ни ѿ гнѣ́ва, и҆ ѿста́ви ꙗ҆́рост̾, занѐ и҆щеꙁа́ют ꙗ҆́кѡ ды́мъ дні́е на́ши, ᲂу҆ѧꙁве́ни є҆смы̀ ꙗ҆́кѡ трава̀, и҆ и҆сшѐ крѣ́пость на́ша, и҆ погиба́емъ до конца̀ грѣ́хъ ра́ди на́шыхъ, и҆ млⷭ҇тивъ бꙋ́ди рабѡ́мъ твои́мъ: въ покаѧ́нїи съ слеꙁа́ми мл҃и́мтисѧ, ᲂу҆слы́ши и҆ пом҃лꙋй.
Помѧнѝ ꙗ҆́кѡ пло́ть є҆смы̀ Гд҃и, дꙋ́хъ ѿходѧ́й и҆ не ѡ҆браща́ѧйсѧ, и҆ млⷭ҇тивнѡ ѿвратѝ гнѣ́въ сво́й пра́ведно на́ны движи́мый, и҆́мже ꙗ҆́кѡ мече́мъ беꙁго́днѡ посеща́еши на́съ: ᲂу҆ста́ви бо́лѣꙁнь, и҆ ᲂу҆толѝ ꙗ҆́ꙁвꙋ напра́снѡ гꙋбѧ́щꙋю на́съ: не ме́ртвїи бѡ восхва́лѧт тѧ̀, ни всѝ нисходѧ́щїи въ а҆́дъ, но мы̀ живы́и хва́лимъ тѧ̀, и҆ въ бо́лѣꙁни ᲃе́рдца стенѧ́щи мл҃и́мтисѧ, ᲂу҆слы́ши и҆ пом҃лꙋй.
Па́че всѣ́хъ съгрѣши́хѡмъ ти и҆ беꙁꙁаконова́хѡмъ Влады́ко, и҆ а҆́ще покаѧ́нїѧ не стѧжа́хѡмъ, предложе́нїе на́ше вмѣ́сто покаѧ́нїѧ прїймѝ, и҆ на млⷭ҇ть прело́жсѧ, см҃ртоно́снагѡ не́дꙋга, и҆ бо́лѣꙁнїй лю́тыхъ, ꙗ҆́кѡ всеси́ленъ свободѝ рабы̀ ᲃвоѧ̀, болѣ́ꙁненнѡ стенѧ́щи мл҃мтисѧ, ско́рѡ ᲂу҆слы́ши и́ пом҃лꙋй.
Не помѧнѝ беꙁꙁакѡ́нїй и҆ непра́вдъ люді́й твои́хъ, и҆ не внидѝ въ сꙋ́дъ съ рабы̀ твои́ми, ни ᲂу҆клони́сѧ гнѣ́вомъ ѿ рабѡ́въ твои́хъ: а҆́ще бо беꙁꙁакѡ́нїѧ на́ꙁриши Гд҃и, Гд҃и кто̀ посто́итъ; съста́въ бо на́шъ ꙗ҆́кѡ ничто́же пре́дъ тобо́ю: но ꙗ҆́кѡ ще́дръ и҆ чл҃кѡлю́бецъ ᲂу҆млⷭ҇рди́сѧ, и҆ не помѧнѝ на́съ въ гнѣ́вѣ твое́мъ съ беꙁꙁако́н̾ми на́шими, моли́мтисѧ Бж҃е пребл҃гі́й, у҆слы́ши и́ пом҃лꙋй.
Не хотѧ́й см҃рти грѣ́шныхъ, но є҆́же ѡ҆брати́тисѧ и живы́мъ бы́ти и҆́мъ, ꙗ҆́кѡ живота̀ и҆сто́чник ѡ҆животворѝ на́съ, пра́веднымъ твои́мъ ᲃꙋ́дом см҃рти досто́йныхъ, Бг҃ъ бо є҆сѝ живы́х, и҆ мр҃твыми ѡ҆блада́ѧй, и҆ не погꙋбѝ на́съ въ гнѣ́вѣ преще́нїѧ твое́гѡ, во́племъ крѣпкимъ въ го́рести ᲃе́рдца, съ слеꙁа́ми мл҃и́мтисѧ, ᲂу҆слы́ши и҆ пом҃лꙋй.
Млⷭ҇тивнѡ при́ꙁри Гд҃и на ѡ҆ꙁлобле́нїе люді́й твои́хъ, и҆ ᲂу҆млⷭ҇рди́сѧ, и҆ повелѝ А҆́гг҃лꙋ просте́ршомꙋ рꙋ́кꙋ свою̀ є҆́же погꙋби́ти всѣ́хъ на́съ, ꙗ҆́коже и҆́ногда при Дв҃дѣ повелѣлъ є҆сѝ, є҆́же довлѣ́ти ны́нѣ, и҆ ᲂу҆держа́ти рꙋ́кꙋ свою̀, да не до конца̀ на́съ погꙋ́битъ: и҆ мы́ бо въ покаѧ́нїи тебѣ̀ и҆сповѣда́ющесѧ, въпїемъ: съгрѣши́хѡмъ, и҆ беꙁꙁаконова́хѡмъ, и҆ нѣ́смы досто́йни твое́гѡ млⷭ҇рдїѧ: но ты са́мъ ꙗ҆́кѡ ще́дръ є҆ди́нагѡ ра́ди сама́гѡ млⷭ҇рдїѧ твое́гѡ, и҆́мже ᲂу҆моле́нъ бы́въ покажѝ млⷭ҇ти твоѧ̀ дре́внѧѧ, и҆ пощадѝ лю́дий и҆ ѡ҆́вцѧ па́жити твое́ѧ, мл҃мтисѧ ско́рѡ ᲂу҆слы́ши и҆ млⷭ҇тивнѡ пом҃лꙋй.
І҆ере́ѵ꙼ Воꙁглаша́етъ:
Ꙋ҆слы́ши ны Бж҃е ᲃп҃си́телю на́шъ, ᲂу҆пова́нїе:
Сѣда́ленъ, Гла́с, є҃.
Ско́рбъ и҆ бо́лѣꙁнь ѡ҆бы́йде на́съ Гд҃и, и҆ бѣ́ды а҆́довы ѡ҆брѣтѡ́ша на́съ ᲃп҃се, и҆ прикры́ ны ᲃѣнь ᲃм҃ртнаѧ грѣ́хъ ра́ди на́шихъ чл҃кѡлю́бче, и҆ беꙁго́днѡ жи́ꙁни лиша́емсѧ, и҆ чтѡ̀ твори́ти недоꙋмѣва́ем: то́кмѡ къ тебѣ̀ дш҃а́мъ и҆ тѣ́лѡмъ вра́ча, и҆ млⷭ҇рдїѧ бе́ꙁдны, въ бо́лѣꙁни ᲃе́рдца, ᲂу҆миле́ннѡ припада́юще зове́мъ: и҆сто́чниче жи́ꙁни, пощадѝ и҆ пом҃лꙋй лю́ди ѿчаѧ́нныѧ Бц҃а ра́ди, ꙗ҆́кѡ є҆ди́нъ млⷭ҇рдъ.
Пѣ́снь, д҃ И҆рмо́съ.
Ты́ ми Хє҃ Гдⷭ҇ь, ты́ же:
Ни́нѣ сѣ́нь въи́стиннꙋ см҃ртнаѧ ѡ҆бы́йде на́съ, и҆ къ а҆́довымъ вра́тѡмъ приближѝ: но ты ᲃп҃се ꙗ҆́кѡ ᲃи́ленъ на́съ воставлѧ́ѧ ᲂу҆дивѝ млⷭ҇ти твоѧ̀: ᲃп҃са́ѧй въ вѣ́рѣ несꙋмнѣ́нной вопїю́щихъ, ᲃи́лѣ твое́й ᲃла́ва чл҃кѡлю́бче.
Хв҃и та́йници, ᲃамови́дци и҆ проповѣ́дници, прїи́мшїи да́ръ и҆сцѣле́нїй, и҆ вра́чеве сꙋ́ще дш҃евнїи: ѿ нꙋ́жды мѧ̀ А҆пⷭ҇ли и҆ꙁведѣ́те, ᲃъдержа́щагѡ не́дꙋга: І҆и҃са молѧ́ще Влады́кꙋ, и҆ и҆ꙁбави́телѧ и҆ Гдⷭ҇а.
Сла́ва:
Грѣхѡ́въ бꙋ́рѧ ны́нѣ на́съ постижѐ, недꙋга во́лны ѡ҆бꙋрева́ютъ, бо́лѣꙁни погрꙋжа́ютъ ча́стыѧ: ско́рби бо и҆ бо́лѣꙁни на́съ ѡ҆каѧ́нныхъ ѡ҆брѣтѡ́ша: А҆пⷭ҇ли Гдⷭ҇ни, ва́шими мл҃ьба́ми по́мощи рꙋ́кꙋ пода́йте.
Бг҃оро́диченъ:
Бо́лѣꙁн̾ми лю́тыми и҆ ча́стыми ᲂу҆дарѧ́еми Дв҃о, всѝ тебѣ̀ припада́емъ: держа́внымъ покро́вомъ твои́мъ чⷭ҇таѧ ᲃп҃сѝ на́съ всѣ́хъ: ᲂу҆щедрѝ Бг҃оневѣ́стнаѧ, и҆ꙁба́ви мо́ра и҆ лю́тагѡ не́дꙋга, и҆ бо́лѣꙁни и҆сцѣлѝ Влады́чице.
Пѣ́снь, є҃ И҆рмо́съ.
Воскꙋ́ю мѧ̀ є҆сѝ ѿринꙋ́лъ:
Мо́рѧ пре́лести, медото́чными вш҃ими моле́нми, ᲃщ҃еннїи Пррⷪ҇ци наводни́вшїи, ны́нѣ преложи́те го́ресть всю̀ гꙋби́телнагѡ настоѧ́щагѡ не́дꙋга, на Бжⷭ҇тве́ннꙋю бл҃гомо́щїѧ сла́дость.
Пронꙁе́ни бы́хѡмъ стрѣла́ми бо́лѣꙁнїй, повелѣ́нїемъ твои́мъ Гд҃и, и҆ ᲂу҆тверди́сѧ на на́съ рꙋка̀ твоѧ̀ всеси́лне: но ꙗ҆́кѡ Бг҃ъ ще́дрый, ᲂу҆щедрѝ всѣ́хъ млⷭ҇рдїемъ твои́мъ: Мл҃тва́ми ᲃты́хъ твои́хъ Мч҃никъ.
Сла́ва:
Сн҃а ꙗ҆́коже дре́вле вдови́ча воꙁста́вилъ є҆сѝ твои́мъ повелѣ́нїемъ, ᲂу҆мерщвле́нныѧ ᲃло́ве лю́тою бо́лѣꙁнїю рабы̀ твоѧ̀: є҆ди́нъ сы́й бл҃гъ, ꙗ҆́кѡ млⷭ҇рдъ и҆ꙁба́вивъ, ѡ҆животворѝ є҆ди́не чл҃кѡлю́бче.
И҆ ны́нѣ: Бг҃оро́диченъ:
Въ но́щи жите́йстѣй, бꙋ́рѧ постижѐ всѧ́кагѡ ѡ҆ꙁлобле́нїѧ, и҆ покры́ла мѧ̀ є҆́стъ не́мощи Дв҃о глꙋбо́каѧ тма̀: но воꙁсїѧ́й ми прохлажде́нїѧ Прчⷭ҇таѧ ᲃвѣ́тъ, и҆ къ свѣ́тꙋ бл҃гомо́щїѧ наста́ви.
Пѣ́снь, ѕ҃ И҆рмо́съ.
Ꙍ҆чи́сти мѧ̀ ᲃп҃се мно́га:
Въ пꙋчи́нѣ ѕѣ́лѡ про́пастной бо́лѣꙁнїй ѡ҆бложе́ни є҆смы̀, и҆ гꙋби́телнагѡ злоключе́нїѧ воꙁмꙋща́ютъ во́лны: Ко́рмчїю Гд҃и, по́мощи рꙋ́кꙋ просте́ръ ны́нѣ ᲃп҃си.
Раꙁслабле́ннагѡ ꙗ҆́коже дре́вле, стѧгнꙋ́лъ є҆сѝ Бжⷭ҇тве́ннымъ ма́нїемъ, ѿ не́дꙋга болѣꙁне́ннагѡ, и҆ ѻ҆́дра ѡ҆ꙁлобле́нїѧ: и҆ бо́лѣꙁни тѧжча́йшїѧ ᲂу҆щедривъ, пода́ждъ здра́вїе многомлⷭ҇тиве.
Пррⷪ҇че́скїй Ли́къ, А҆пⷭ҇лъ съсло́вїе, и҆ по́лкъ страда́л̾ческїй ны́нѣ мо́лѧтъ тѧ̀, є҆динѐ многомлⷭ҇тиве ѡ҆ люде́хъ твои́хъ бл҃же, си́хъ ᲂу҆щедрѝ.
Бг҃оро́диченъ:
Мр҃іе чⷭ҇тое Двⷭ҇тва̀ съкро́вище ты ѡ҆чи́сти на́съ, и҆ не́дꙋгѡвъ и҆ ско́рбїй, и҆ съдержа́щїѧ ны́нѣ бо́лѣꙁни и҆ꙁба́ви: да вѣ́рою тѧ прославлѧ́емъ.
А҆́бїе же по си́хъ Дїа́конъ Е҆кте́нїю малꙋ́ю ѡ҆блі́чнꙋю гл҃етъ.
І҆ере́ѵ꙼ же воꙁглаша́етъ:
Ꙗ҆́кѡ ты́ є҆сѝ Цр҃ь ми́ра:
По Воꙁгла́сѣ же, Конда́къ Гла́съ, ѕ҃.
Бо́лѣꙁни а҆́довы ѡ҆быйдѡ́шѧ на́съ, и҆ прикры́ ны сѣн̾ см҃ртнаѧ, и҆ ꙗ҆́кѡ во́скъ ѿ ѡ҆гнѧ̀ дні́е на́ши та́ютъ ѿ лица̀ гнѣ́ва твое́гѡ Гд҃и: но ꙗ҆́кѡ ще́дръ въ гнѣ́вѣ млⷭ҇ти помѧнѝ, и҆ пощадѝ лю́ди твоѧ̀, да жи́ви сꙋ́ще, въ покаѧ́нїи сла́вимъ тѧ є҆ди́нагѡ чл҃кѡлю́бца.
Посе́мъ Степе́нна ѕ҃-гѡ Гла́са А҆нтифѡ́нъ, а҃.
На́ нб҃о ѻ҆́цѣ моѝ воꙁвождꙋ̀, къ тебѣ̀ ᲃло́ве: ᲂу҆щедри мѧ̀, да живꙋ́ ти.
Пом҃лꙋй на́съ ᲂу҆ничиже́нныхъ: ᲂу҆страѧ́ѧ бл҃гопотре́бныѧ ти съсꙋ́ды, Сло́ве.
Ст҃о́мꙋ Дх҃ꙋ, всѧ́ка ᲃп҃се́ннаѧ вина̀: а҆́ще кое́мꙋ сей по достоѧ́нїю дхне́тъ: ско́рѡ въꙁе́млетъ ѿ зе́мныхъ: воспирѧ́етъ, воꙁраща́етъ, и҆ ᲂу҆строѧ́етъ горѣ̀.
Проки́менъ Гла́съ, д҃.
Гд҃и не ꙗ҆́ростїю твое́ю ѡ҆бличѝ на́съ, ни гнѣ́вомъ твои́мъ покажѝ на́съ.
Сті́хъ:
Нѣ́сть и҆сцѣле́нїѧ въ пло́ти мое́й, ѿ лица̀ гнѣ́ва твое́гѡ: нѣ́сть ми́ра въ кѡ́стехъ мои́хъ, ѿ лица̀ грѣхѡ́въ мои́хъ.
По се́мъ: Всѧ́кое дыха́нїе да хвали́тъ Гд҃а.
Сті́хъ:
Хвали́те Бг҃а въ ᲃт҃ы́хъ є҆гѡ̀.
Е҆ѵⷢ҇лїе ѿ Лꙋкѝ, Гла́ва: д҃. зач: ѕ҃і. Нача́ло є҆гѡ̀ сі́е.
Въ вре́мѧ ѻ҆́нѡ: вни́де І҆и҃с въ до́мъ Си́монѡвъ, Те́ща же Сі́монѡва ѡ҆держи́ма бѣ ѻ҆гне́мъ ве́лїимъ:
Коне́цъ же се́й.
И҆ бѣ проповѣда́ѧ на ᲃо́нмищихъ Галиле́йскихъ.
Ѿпѣ́вшимъ же пѣвце́мъ, Сла́ва тебѣ̀ Гд҃и.
А҆́бїе пою́тъ, Сла́ва:
Ѿч҃е, ᲃло́ве, и҆ Дш҃е, Трⷪ҇це ᲃт҃а́ѧ, ѡ҆чи́сти мнѡ́жество грѣхѡ́въ на́шихъ.
И҆ ны́нѣ:
Мл҃твъ ра́ди Прⷭ҇ты́ѧ Бц҃а млⷭ҇тиве, ѡ҆чи́сти мнѡ́жество грѣ́хъ на́шихъ. Пом҃лꙋй на́съ Бж҃е по вели́цѣй млⷭ҇ти твое́й, и҆ по мнѡ́гимъ щедрѡта́мъ твои́мъ ѡ҆чи́сти беꙁꙁакѡ́нїѧ на́шѧ.
Та́же, Стіхи́рꙋ ᲃі́ю Гла́съ, ѕ҃.
Стра́шенъ є҆сѝ Гд҃и, и҆ кто̀ сте́рпитъ Пра́ведный тво́й гнѣ́въ, и҆лѝ кто̀ тебѐ ᲂу҆мл҃и́тъ бл҃же, ѡ҆ люде́хъ ᲃъгрѣ́шшихъ, и҆ ѿчаѧ́вшихсѧ: но неисче́тныѧ твоѧ̀ щедрѡты̀, и҆ само́е чл҃кѡлю́бїе, мл҃твы же Пречⷭ҇тыѧ Бц҃а, и҆ всѣ́хъ ᲃт҃ы́хъ ѡ҆ на́съ къ тебѣ̀ да вопїю́тъ, и҆ на млⷭ҇ть прекло́нѧтъ: мы́ бо всѧ́кѡ беꙁъѿвѣ́тни, ꙗ҆́кѡ рабѝ ᲃогрѣши́вшїи є҆смы̀: тѣ́мъ ско́рѡ ᲂу҆млⷭ҇рди́сѧ, и҆ ᲂу҆щедрѝ съꙁда́нїе ᲃвоѐ Влады́ко, да не злѣ̀ преще́нїемъ си́мъ поги́бнемъ рабѝ твоѝ ще́дре.
По се́мъ Дїа́конъ глаголе́тъ.
Спасѝ Бж҃е лю́ди твоѧ̀:
Ли́къ же пое́тъ съ ᲂу҆миле́нїемъ:
Гд҃и поми́лꙋй, є҃і.
І҆ере́ѵ꙼ воꙁглаша́етъ:
Млⷭ҇тїю и҆ щедрѡт:
И҆ а҆́бїе пою́тсѧ про́чаѧ Канꙍ́на.
Пѣ́снь, з҃ И҆рмо́съ.
Бж҃іѧ съхожде́нїѧ:
Ꙍ҆палѧ́етъ пе́щъ беꙁмѣ́рныхъ бо́лѣꙁнїй, и҆ съжига́етъ мѧ̀ ѻ҆гне́вицъ гꙋби́телныхъ пла́мен̾, непреста́ннѡ беꙁстꙋднѣ́йшїй: но посо́ю млⷭ҇ти твое́ѧ, ᲃп҃се прохладѝ пою́щихъ блⷭ҇ве́нъ Бг҃ъ Ѻ҆ц҃ъ на́шихъ.
Пррⷪ҇ци А҆пⷭ҇ли, Мч҃никъ ᲃобо́ры, Бжⷭ҇тве́ннїи Ꙋ҆ч҃тлїе, бо́лѣꙁни недꙋгꙋ́ющихъ на́съ свои́ми молба́ми ᲂу҆кроти́те, и҆ здра́вїе дарꙋ́йте пою́щимъ, блгⷭ҇ве́нъ Бг҃ъ ѡ҆ц҃ъ на́шихъ.
Сло́вомъ Ла́ꙁара въскр҃си́вый: ни́нѣ ꙗ҆́кѡ и҆ꙁъ гро́ба на́съ лю́тыѧ бо́лѣꙁни воꙁъста́вивъ, ѡ҆живѝ Гдⷭ҇и: да вопїе́мъ пѣ́снь благодарстве́ннꙋю, бл҃гослове́нъ Бг҃ъ ѡ҆те́цъ нш҃ихъ.
Бг҃оро́диченъ:
Щедра сꙋ́щаѧ, и҆ Мт҃и всеще́драгѡ, ᲂу҆щедривши и҆ꙁба́ви своѧ̀ лю́ди, приꙁыва́ющїѧ твоѧ̀ млⷭ҇ти Дв҃о, и҆ пою́щїѧ, блⷭ҇ве́нъ Бг҃ъ ѡ҆те́цъ на́шихъ.
Пѣ́снь, и҃ И҆рмо́съ.
Се́дмъ седми́цею пе́щъ:
Болѣꙁне́ннѡ стене́мъ ѿ ѡ҆́дра бо́лѣꙁни нш҃еѧ, и҆ въ гꙋби́телнѡмъ не́дꙋꙁѣ, въпїемъ къ тебѣ чл҃кѡлю́бцꙋ, и҆ ᲃерде́чныѧ ѻ҆́чи ны́нѣ простира́юще, здра́вїѧ про́симъ: посѣтѝ на́съ ᲃп҃се, и҆ воꙁста́ви пѣ́ти: ᲃщ҃еннїи по́йте, лю́дїе и҆ превоꙁноси́те въ всѧ̀ вѣ́ки:
Въ на́шꙋ не́мощъ млⷭ҇тивнѣ ѡ҆болкїйсѧ, и҆ ᲂу҆подоби́тисѧ чл҃кѡмъ и҆ꙁво́ливый: мл҃тва́ми преподо́бныхъ твои́х, ѿчаѧ́нныхъ ᲃп҃сѝ на́съ, и҆ воꙁдвигнѝ и҆ꙁъ гро́ба ѿчаѧ́нїѧ въ є҆́же пѣ́ти тебѣ̀: дѣ́ти бл҃гоⷭ҇ви́те, ᲃщ҃еннїи по́йте, лю́дїе превоꙁноси́те въ всѧ̀ вѣ́ки.
Содѣ́телю є҆стества̀, пода́телю и҆сцѣле́нїй, ᲂу҆тро́бы щедрѡ́тъ, и҆ бл҃гоꙋтро́бїѧ пꙋчинꙋ̀ ꙗ҆́кѡ и҆мѣ́ѧй долготерпе́ливе, посѣще́нїемъ посѣтѝ ѿ гꙋби́телныѧ бо́лѣꙁни лю́ди твоѧ̀, и҆ ѡ҆живѝ въпи́ти: ᲃш҃енници блⷭ҇ви́те лю́дїе превоꙁноси́те въ всѧ̀ вѣ́ки.
Бг҃оро́диченъ:
Крѣ́пкаѧ по́мощи, и҆ꙁвѣ́стное застꙋпле́нїе, ѿчаѧ́вшихсѧ наде́жде пренепоро́чнаѧ, посѣтѝ стра́ждꙋщихъ болѣꙁне́ннѡ рабы̀ твоѧ̀: ѡ҆блегчѝ тѧ́жесть го́ркїѧ бо́лѣꙁни: ѿжени не́дꙋгъ гꙋби́телныѧ нꙋ́жды: и҆ ᲃп҃сѝ рабы̀ твоѧ̀ Дв҃о Бц҃е.
Пѣ́снь, ѳ҃ И҆рмо́съ.
Ꙋ҆жасе́сѧ ѡ҆ се́мъ нб҃о:
Чꙋдеса̀ ве́лїѧ и҆́мже нѣ́сть числа̀, сътвори́вый беꙁсме́ртне, на рабы̀ твоѧ̀ млⷭ҇ти твоѧ̀ Бж҃е ꙗ҆́кѡ млⷭ҇рдъ покажѝ, и҆ съдержа́щїѧ на́съ ны́нѣ свободѝ бо́лѣꙁни: моле́н̾ми ро́ждшїѧ тѧ̀, и҆ ли́ка побѣдонѡ́сецъ твои́хъ.
А҆́гг҃лъ, А҆рха́гглъ, Пррⷪ҇къ же и҆ А҆пⷭ҇лъ, Мч҃никъ, Преподо́бныхъ, І҆ера́рхъ, ᲃщ҃енномч҃никъ твои́хъ Мл҃тва́ми, пла́чъ ѕѣ́лный рабѡ́въ твои́хъ ѡ҆братѝ всеси́лне въ ра́дост̾: и҆сцѣлѝ бо́лѣꙁнь, ѡ҆блегчѝ не́дꙋги, и҆ здра́вїе на́мъ дарꙋ́й.
Дш҃ъ же и҆ тѣле́съ вра́ча, въ млⷭ҇ти бога́тагѡ Гд҃а, тебѐ мл҃ю̀: и҆сцѣлѝ моѧ̀ стра́сти мнѡ́гїѧ, бо́лѣꙁни и҆ꙁмѣнѝ, и҆ ско́рбныхъ мѧ̀ ꙗ҆́кѡ бл҃гъ, и҆ є҆ди́нъ бл҃годѣ́тель свободѝ, и҆ ᲃп҃са́й вѣ́рою чⷭ҇тою тѧ велича́ющихъ.
Бг҃оро́диченъ:
Ще́драгѡ ро́ждшаѧ и҆ млⷭ҇тивагѡ Влады́кꙋ, и҆ съꙁда́телѧ и҆ Гдⷭ҇а: ны́нѣ на мнѣ̀ покажѝ твоѧ̀ ѡ҆бы́чнѡ щедрѡты̀, и҆ лютагѡ мѧ̀ и҆ꙁба́ви не́дꙋга, и҆ꙁнꙋрѧ́ющагѡ дш҃ꙋ мою̀ Дв҃о Бц҃е, и҆ пода́ждъ мѝ здра́вїе, ꙗ҆́кѡ да непреста́ннѡ велича́ю тѧ.
И҆ а҆́бїе съвокꙋ́пшасѧ ли́ка пою́тъ вкꙋ́пѣ:
Досто́йнѡ є҆́стъ: ᲃъ всѧ́кимъ ᲂу҆миле́нїемъ и҆ слеꙁа́ми.
Та́жъ, Трⷭ҇то́е: по Ѿче на́шъ:
Троп: Гла́съ, ѕ҃.
Поми́лꙋй на́съ Гд҃и поми́лꙋй:
Сла́ва:
Гд҃и поми́лꙋй на́съ:
И҆ ны́нѣ:
Млⷭ҇рдїѧ две́ри ѿверꙁѝ на́мъ:
По си́хъ чте́тъ І҆ере́ѵ꙼ Мл҃твы сі́ѧ, и҆лѝ всѧ̀, и҆лѝ є҆ли́кѡ и҆́хъ хо́щетъ, на и҆́ныѧ днѝ ѡ҆ставлѧ́ѧ, и҆лѝ по двѣ̀ и҆лѝ по трѝ.