Вослѣдова́нїе моле́бнагѡ пѣ́нїѧ къ Гд҃ꙋ Бг҃ꙋ на́шемꙋ І҆и҃сꙋ Хрⷭ҇тꙋ, пѣва́емагѡ во вре́мѧ беꙁве́дрїѧ, є҆́гда до́ждъ мнѡ́гїй беꙁго́днѡ и҆де́тъ
І҆ере́ю ре́кшꙋ:
Бл҃слве́нъ Бг҃ъ на́шъ:
Чте́цъ:
Цр҃ю небе́сный: Трⷭ҇то́е: Ѿч҃е на́шъ:
І҆ере́ѵ꙼ же:
Ꙗ҆́кѡ твоѐ є҆́стъ црⷭ҇тво:
Чте́цъ:
Гд҃и поми́лꙋй: в҃і. Прїйдѣ́те поклон: гⷤ, и ѱаломъ ѯ҃и.
Спаси́ мѧ Бж҃е, ꙗ҆́кѡ внидѡ́шѧ вѡ́ды до дшѧ̀ мое́ѧ:
По сконча́нїи же ѱалма̀, Дїа́конъ гл҃етъ Е҆кте́нїѧ вели́каѧ.
Ми́ромъ Гд҃ꙋ помо́лимсѧ. И҆ проч: да́же до ѡ҆ плава́ющихъ:
И҆ а҆́бїе прилага́етъ ᲃі́ѧ.
Ꙍ҆ є҆́же не въ гнѣ́́ве преще́нїѧ свое́гѡ ᲂу҆мали́ти на́шъ грѣ́хъ ра́ди и҆ беꙁꙁакѡ́нїй на́ших: но млⷭ҇ти и҆ щедрѡты̀ своѧ̀ ѿ вѣ́ка сꙋ́щїѧ помѧнꙋ́ти и҆ поми́ловати на́съ, Гд҃ꙋ помоли́мсѧ.
Ꙍ҆ є҆́же помѧнꙋ́ти завѣ́тъ сво́й, и҆́же къ Нꙍ́и и҆ не растлѣ́ти беꙁго́дною мокрото́ю, и҆ мра́чнымъ злораство́рнымъ во́ꙁдꙋхомъ, и҆ те́мною мгло́ю зе́млю и҆ ни́щихъ люді́й свои́хъ: но млⷭ҇тивнѡ пощади́ти достоѧ́нїе своѐ, и҆ ᲃо́лнцꙋ плодоно́сными лꙋ́чами, и҆ мѣ́рною теплото́ю воꙁсїѧ́ти на землѝ повелѣ́ти, Гд҃ꙋ помоли́мсѧ.
Ꙍ҆ є҆́же повелѣ́ти ѻ҆́блакѡмъ преста́ти ѿ беꙁго́днагѡ до́жда, и҆ мра́комъ раꙁыйти́сѧ, свѣ́тлости же ᲃли́чной воꙁсїѧти, Гд҃ꙋ помоли́мсѧ.
Ꙍ҆ є҆́же пощади́ти лю́ди, и҆ скѡ́ты, и҆ всю̀ зе́млю сі́ю, и҆ не растлѣ́ти ю҆̀ беꙁго́днымъ дожде́внымъ лїѧ́нїемъ, Гд҃ꙋ помоли́мсѧ.
Ꙍ҆ є҆́же пода́ти бл҃горастворе́нное ве́дро достоѧ́нїю свое́мꙋ, и҆ ᲂу҆множи́ти плѡ́ды зе́мныѧ, Гд҃ꙋ помоли́мсѧ.
Ꙍ҆ є҆́же не по грѣ́хѡмъ на́шимъ воꙁда́ти на́мъ, и҆ каꙁни́ти на́съ: но по вели́цѣй млⷭ҇ти свое́й, и҆ по мнѡ́гимъ щедрѡта́мъ свои́мѣ, ꙗ҆ви́ти на на́съ ско́рое своѐ чл҃кѡлю́бїе, и҆ бл҃гость, Гд҃ꙋ помоли́мсѧ.
Ꙍ҆ є҆́же не растлѣ́ти плѡ́ды и҆ сѣ́мена̀ зе́мнаѧ, грѣ́хъ ра́ди на́шихъ, беꙁго́днымъ дожде́внымъ лѣѧ́нїемъ: но во́лным ве́дромъ пощади́ти, и҆ ᲂу҆гобꙁи́ти ѧ҆̀ ни́щих ра́ди люді́й свои́хъ, Гд҃ꙋ помоли́мсѧ.
Ꙍ҆ є҆́же бл҃гопрїѧ́тнымъ бы́ти мл҃твамъ на́шимъ и҆ и҆ꙁба́вити на́съ ѿ гла́да, гꙋби́тел̾ства, трꙋ́са, пото́па, ѻ҆гнѧ̀, гра́да, меча̀, наше́ствїѧ и҆ноплеме́нникъ, междосо́бныѧ бра́ни, и҆ всѧ́кїѧ смертоно́сныѧ раны, Гд҃ꙋ помоли́мсѧ.
Ꙍ҆ є҆́же и҆ꙁба́витисѧ на́мъ:
Застꙋпѝ спасѝ: Прⷭ҇тꙋ́ю чⷭ҇тꙋю:
Во́ꙁгласъ:
Ꙗ҆́кѡ подоба́етъ ти всѧ́каѧ ᲃла́ва, че́сть и҆ покл:
Бг҃ъ Гд҃ь и҆ ꙗ҆ви́сѧ на́мъ: На Гла́съ, в҃.
Тропа́рь Гла́съ то́йжде.
При́ꙁри млⷭ҇тивнѡ Бж҃е на лю́ди согрѣ́шшїѧ, и не преꙁрѝ въ покаѧ́нїи къ тебѣ̀ припада́ющихъ, но ꙗ҆́кѡ блг҃ъ поми́лꙋй и҆ воско́ре пра́веднагѡ твое́гѡ и҆ꙁба́ви преще́нїѧ, мл̀тва́ми Бц҃а є҆ди́не чл҃кѡлю́бче. Два́жды.
Сла́ва: И҆ ны́нѣ: Бг҃оро́диченъ:
Ско́раѧ мїрꙋ помо́щнице Дв҃о Бц҃е, твое́гѡ предста́телства, и҆ крѣ́пкагѡ застꙋпле́нїѧ то́щнѡ про́симъ, ᲂу҆млⷭ҇рди́сѧ на скорбѧ́щїѧ лю́ди, и҆ ᲂу҆молѝ млⷭ҇тивагѡ ᲃн҃а свое́гѡ и҆ Бг҃а, ѿ належа́щїѧ на́съ и҆ꙁба́вити бѣды̀, и пра́веднагѡ свое́гѡ преще́нїѧ: єдина̀ въ жена́хъ бл҃гослове́ннаѧ.
Та́жъ, ѱало́мъ н҃.
Поми́лꙋй мѧ̀ Бж҃е: По сконча́нїи же ѱалма̀ а҆́бїе пѣвцѝ пою̀тъ, КА҆НꙌНЪ, Гла́съ. ѕ҃. Пѣ́снь, а҃. И҆рмо́съ.
Ꙗ҆́кѡ по сꙋ́хꙋ ходи́въ І҆и҃ль по бе́ꙁднѣ стопа́ми:
Припе́лъ:
Поми́лꙋй на́съ Гд҃и, лю́ди согрѣ́шшїѧ.
Тропа́рїѡнъ.
Прїйдѣ́те вѣ́рнїи пѣ́снь но́вꙋ воспо́имъ Влады́цѣ Бг҃ꙋ гл҃юще: ᲂу҆млⷭ҇рди́сѧ ꙗ҆́кѡ ще́дрѣ, и҆ поми́лꙋй беꙁмѣ́рнѡ съгрѣ́шшїѧ.
Сла́ва:
Прїймѝ Мл҃твы и҆ сле́ꙁы Хє҃ Бж҃е, мл҃ѧ́щихсѧ тебѣ̀ ны́нѣ на́съ рабѡ́въ твои́хъ, и҆ пода́ждъ времена̀ ве́дрна, къ плодоноше́нїю землѝ.
И҆ ны́нѣ:
Ꙋ҆скорѝ Влады́чице Мр҃їе, Прчⷭ҇тѣи си рꙋ́цѣ, млⷭ҇тивнѡ воꙁдѣ́ти къ ᲃн҃ꙋ твое́мꙋ и҆ Бг҃ꙋ, є҆́же пода́ти ве́дро, и҆ пи́щꙋ вѣ́рнымъ рабѡ́мъ ᲃвои́мъ.
Катава́сїѧ по всѧ́кой пѣ́сни.
И҆ꙁба́ви ѿ бѣ́дъ рабы̀ своѧ̀ млⷭ҇тиве, ꙗ҆́кѡ мы ᲂу҆се́рднѡ къ тебѣ̀ прибѣга́емъ, къ млⷭ҇тивомꙋ и҆ꙁбави́телю, всѣ́хъ Влады́цѣ Гд҃ꙋ І҆и҃сꙋ.
Сп҃сѝ ѿ бѣ́дъ рабы̀ своѧ̀ Прⷭ҇та́ѧ Бц҃е Дв҃о, ꙗ҆́кѡ мы всѝ по Бѕ҃ѣ къ тебѣ̀ прибѣга́емъ, ꙗ҆́кѡ къ нерꙋши́мой ᲃтѣнѣ̀, и҆ предста́телници.
Пѣ́снь, г҃. И҆рмо́съ.
Нѣ́ст̾ ст҃а ꙗ҆́коже ты̀:
Не ꙗ҆́ростїю си ѡ҆бличѝ на́съ Гд҃и, ꙗ҆́коже Пррⷪ҇къ въпїетъ: ни гнѣ́вомъ твои́мъ покажѝ на́съ: но Мл҃тва́ми Пречⷭ҇тыѧ тѝ Мт҃ре, и҆ꙁлі́й на́ ны ѡ҆би́лнѡ млⷭ҇ти твоѧ̀.
Сла́ва:
Новоꙁва́нный ꙗ҆ꙁы́къ съ слеꙁа́ми въпїе́тъ тѝ Влады́ко, ᲂу҆млⷭ҇рди́сѧ ꙗ҆́кѡ ще́дръ, и҆ пода́ждъ на́мъ ве́дро и҆ во́ꙁдꙋхи бл҃гораство́рны, ѡ҆би́лїе же и҆ ве́лїю млⷭ҇ть.
И҆ ны́нѣ:
Не пре́ꙁри сле́ꙁъ на́шихъ Бц҃е Влады́чце, и҆҆ не ме́рꙁкѡ тѝ бꙋ́ди воꙁдыха́нїе на́ше: но мл҃ѝ ᲃн҃а свое́гѡ приле́жнѡ, пода́ти ве́дро землѝ, и҆ люде́мъ твои́мъ ве́лїю млⷭ҇ть.
Катава́сїѧ.
И҆ꙁба́ви ѿ бѣ́дъ:
Дїа́конъ Е҆ктенїю Вели́к:
Пом҃лꙋй на́съ Бж҃е по вели́цѣй млⷭ҇ти:
Досто́йнаѧ ка́ꙁнемъ сотвори́хѡмъ, и҆ пра́веденъ ᲃꙋ́дъ тво́й постижѐ на́съ Гд҃и, но пощадѝ, пощадѝ лю́ди согрѣ́шшїѧ, и҆ ѿвратѝ гнѣ́въ тво́й пра́веднѡ на́ны движи́мый, въ покаѧ́нїи къ тебѣ̀ припада́емъ и҆ смире́ннѡ моли́мъ тѧ̀, ᲂу҆слы́ши и҆ поми́лꙋй.
Да не пото́питъ на́съ Гд҃и бꙋ́рѧ во́днаѧ, и҆ да не растли́ши зе́млю, и҆ гла́домъ ᲂу҆мори́ши на́съ люді́й твои́хъ: но ꙗ҆́кѡ бл҃гъ ᲂу҆ста́ви во́дное лѣѧ́нїе, и҆ теплотѣ̀ ᲃо́лн҃чной воꙁсїѧ́ти на землѝ ꙗ҆́кѡ си́ленъ повелѝ, приле́жнѡ моли́мтисѧ Цр҃ю прⷭ҇ты́й, ᲂу҆слыш:
Ни́щих ра́ди люді́й твои́хъ и҆ скѡ́тъ, мра́чномꙋ во́ꙁдꙋхꙋ, и҆ те́мной мглѣ̀ раꙁыйти́сѧ, и҆ лꙋ́чамъ ᲃо́лнечнымъ воꙁсїѧ́ти повелѝ всеще́дрый Гд҃и, да не беꙁго́днѡ ᲃконча́емсѧ, мо́лимтисѧ ᲃко́рѡ ᲂу҆слы́ши и҆ поми́лꙋй.
Спасѝ на́съ ѿ бре́нїѧ Гд҃и, и҆ ѿ тимѣ́нїѧ глꙋбины̀, и҆ ѿ глꙋбѡ́кихъ вѡ́дъ, да не и҆ще́ꙁнꙋтъ въ сꙋетѣ̀ дні́е на́ши, и҆ лѣ́та на́ша въ воꙁдыха́нїихъ: но помѧнѝ завѣ́тъ тво́й и҆́же къ Нꙍ́ю, и҆ ᲃтворѝ съ на́ми по млⷭ҇ти твое́й, ᲃъкрꙋше́ннымъ ᲃе́рдцемъ моли́мтисѧ, ᲂу҆слы́ши и҆ поми́лꙋй.
Въ ско́рби и҆ печа́ли на́шей, и҆ ᲃмꙋ́тной тꙋꙁѣ̀, къ тебѣ̀ Гд҃ꙋ Бг҃ꙋ на́шемꙋ, ᲂу҆миле́ннѡ вопїе́мъ, да прі́йдетъ къ тебѣ̀ моли́тва на́ша, и҆ да и҆ꙁы́йдетъ и҆ꙁъ и҆стлѣ́нїѧ живо́т на́шъ, да не беꙁго́днѡ и҆щеꙁнетъ, млⷭ҇тивнѡ ᲂу҆слы́ши гла́съ ни́щихъ люді́й твои́хъ, и҆ чл҃кѡлю́бнѡ поми́лꙋй.
Не на Дꙋгꙋ̀ и҆́же въ зна́менїи Завѣ́та на ѻ҆́блацѣхъ поста́вилъ є҆сѝ Гд҃и: но на твоѧ̀ щедрѡты̀ вꙁира́емъ, и҆ твою̀ млⷭ҇ть привлещѝ и҆́щемъ, къ тебѣ̀ бога́томꙋ въ млⷭ҇ти и҆ беꙁмѣ́рномꙋ въ щедрѡта̀хъ, ᲃе́рдцемъ сокрꙋше́ннымъ моли́мтисѧ, пода́ждъ на́мъ мѣ́рное, и҆ плодоно́сное ве́дро съ бл҃горастворе́нными во́ꙁдꙋхи, и҆ ско́рѡ ꙗ҆́кѡ ще́дръ ᲂу҆слы́ши и҆ поми́лꙋй.
І҆ере́ѵ꙼ Воꙁглаша́етъ:
Ꙋ҆слыши ны Бж҃е ᲃп҃си́телю на́шъ:
Сѣда́ленъ Гла́съ, є҃.
Къ тебѣ̀ ᲃп҃се на́шъ І҆и҃се превѣ́чный Бж҃е прибѣга́емъ грѣ́шнїи рабѝ твоѝ, и҆ съ слеꙁа́ми въ покаѧ́нїи припада́юще вопїемъ ти, пощадѝ пощадѝ ще́дре лю́ди беꙁѿтвѣ́тныѧ, и҆ не растлѝ на́съ беꙁго́днымъ дожде́внымъ лѣѧ́нїемъ, и҆ злорастворе́нїемъ во́ꙁдꙋшнымъ: но пода́ждь ве́дро, и҆ ᲂу҆мнѡжѝ плѡ́ды зе́мныѧ, ꙗ҆́кѡ чл҃кѡлю́бецъ.
Сла́ва: И҆ ны́нѣ: Бг҃оро́диченъ:
Ст҃ѣ́йшꙋю Херꙋви́мѡв, и҆ вы́шшꙋю нб҃съ, препѣ́таѧ Бц҃е, тѧ вои́стиннꙋ и҆сповѣда́юще, и҆ма́мы грѣ́шнїи застꙋ́пницꙋ, и҆ ѡ҆брѣта́емъ въ вре́мѧ ᲃп҃се́нїе: тѣ́мъ не преста́й за́ны молѧ́щи, держа́во и҆ прибѣ́жище дш҃а́мъ на́шимъ.
Пѣ́снь, д҃ И҆рмо́съ.
Хᲃ҃ мнѣ̀ ᲃи́ла, Бг҃ъ:
Въ рꙋ́кꙋ твое́ю Влады́ко Хє҃ ᲃодержи́ши превы́шше нбⷭ҇ныѧ и҆ поднбⷭ҇ныѧ вѡ́ды и҆ теплотꙋ̀ ᲃо́лнечнꙋю, тѣ́мже моли́мъ тѧ̀, ѻ҆бо́е по мѣ́рѣ требова́нїѧ дарꙋ́й на по́лꙁꙋ рабѡ́мъ твои́мъ.
Сла́ва:
И҆сповѣда́ющимъ твоѐ Влады́чство, строи́телю всеѧ̀ тва́ри Хє҃, содержа́й ᲃкѵ́петро нбⷭ҇ное, и҆ ѡ҆кормлѧ́ѧй всю тва́р̾, пода́ждъ бл҃гораство́рныѧ во́ꙁдꙋхи, и҆ ѻ҆би́лїе землѝ, мл҃тва́ми Прчⷭ҇тыѧ тѝ Мт҃ре.
И҆ ны́нѣ:
Вели́кое дерꙁнове́нїе и҆́маши къ ро́ждшомꙋсѧ и҆ꙁъ тебѐ, ꙗ҆́кѡ никто́же и҆́нъ: тѣ́мъ Влады́чце мл҃и́мсѧ ѡ҆ рабѣ́хъ твои́хъ, и҆ꙁба́витисѧ на́мъ ѿ гла́да, и҆ ѿ наше́ствїѧ и҆нопле́менникъ.
Пѣ́снь, є҃ И҆рмо́съ.
Бж҃іимъ ᲃвѣ́томъ тѝ:
Плава́ющимъ приста́нище, и҆ наде́ждо ненаде́жнымъ Хє҃, Кнѧꙁе́мъ ᲂу҆твержде́нїе, и҆ всѣ́мъ хрⷭ҇тїа́нѡмъ въ бѣда́хъ ско́рый послꙋша́телю: ᲂу҆слы́ши и҆ на́съ ны́нѣ, и҆ пода́ждъ ве́дро къ плодоноше́нїю землѝ.
Сла́ва:
Вра́чꙋ болѧ́щихъ, и҆ скорбѧ́щихъ ᲂу҆тѣши́телю, нбⷭ҇ный Цр҃ю Хє҃, при́ꙁри съ высоты̀ ᲃт҃гѡ тѝ жи́лища, и҆ ᲂу҆слы́ши пла́чъ и҆ стена́нїе рабѡ́въ твои́хъ, и҆ ꙗ҆́кѡ ще́дръ пода́ждъ ве́дро къ плодоноше́нїю землѝ.
И҆ ны́нѣ:
Ско́рѡ прїймѝ Гжⷭ҇е мл҃твꙋ рабѡ́въ свои́х, непомина́ющи на́шѧ беꙁчисле́ннаѧ зла́ѧ: и҆ и҆спросѝ на́мъ Дв҃о ве́дро на по́лꙁꙋ, къ плодоноше́нїю землѝ.
Пѣ́снь, ѕ҃ И҆рмо́съ.
Жите́йскагѡ мо́рѧ:
Моле́нїемъ Пррⷪ҇ка твое́гѡ Гд҃и, затвори́лъ є҆сѝ нб҃са̀ трѝ лѣ́та и҆ Мцⷭ҇ей ше́стъ, къ поꙁна́нїю и҆ покаѧ́нїю проти́вныхъ, є҆го́же ны́нѣ ѿ на́съ Гд҃и не и҆стѧꙁꙋй, но млⷭ҇тїю си ᲂу҆щедри́ ны.
Сла́ва:
Прїи́мый раꙁбо́йничее покаѧ́нїе Хє҃, и҆ тогѡ̀ є҆ди́нѣмъ ча́сомъ ᲃп҃сы́й вопїю́ща, помѧни́ мѧ̀ ᲃп҃се въ Црⷭ҇твїи: и҆ на́съ ны́нѣ въ покаѧ́нїи ти припада́ющихъ пощадѝ, и҆ поми́лꙋй.
И҆ ны́нѣ: Бг҃оро́диченъ:
Помоли́сѧ ѡ҆ на́съ Влады́чце къ ᲃн҃ꙋ си и҆ Бг҃ꙋ, да не ꙗ҆́коже при Нꙍ́и лѣѧ́нїемъ во́днымъ, грѣ́хъ ра́ди на́шихъ растли́тъ на́съ: но ꙗ҆́коже Ниневви́тѧны пока́ѧвшихсѧ поми́лꙋетъ.
Дїа́конъ є҆кте́нїю малꙋ́ю ѡ҆бы́чнꙋю.
І҆ере́ѵ꙼ воꙁглаш:
Ꙗ҆́кѡ ты́ є҆сѝ Цр҃ъ мїра:
И҆ по во́ꙁгласѣ, Конда́къ, Гла́съ. в҃.
Не ѿринѝ до конца̀ ᲃогрѣ́шшїѧ лю́ди твоѧ̀ Влады́ко, ни́же ѿста́ви млⷭ҇ти и҆ щедрѡты̀ твоѧ̀ ѿ на́съ, но ꙗ҆́кѡ бе́ꙁдна сый щедрѡ́тъ, и҆ млⷭ҇рдїѧ пꙋчи́на, прїймѝ мо́лбы на́шѧ, и҆ и҆ꙁба́ви на́съ ѿ належа́щїѧ бѣ́ды и҆ нꙋ́жды, є҆ди́нъ бо є҆сѝ бл҃гоꙋвѣтли́въ.
Тажъ, Сте́пенна А҆нтіфꙍ́нъ, а҃. ѕ҃-гѡ Гла́са.
На́ нб҃о ѻ҆цѣ моѝ воꙁвождꙋ̀, к̀ тебѣ̀ ᲃло́ве, ᲂу҆щедри́ мѧ̀ да живꙋ́ ти.
Пом҃лꙋй на́съ ᲂу҆ничиже́нных, ᲂу҆строѧ́ѧ бл҃гопотре́бныѧ ти съсꙋ́ды ᲃло́ве.
Ст҃ы́мъ Дх҃омъ всѧ́ка спасе́ннаѧ вина̀, а҆́ще комꙋ̀ се́й по достоѧ́нїю дхне́тъ, ско́рѡ вꙁе́млетъ ѿ зе́мныхъ воꙁвыша́етъ приво́дитъ, и҆ въчинѧ́етъ го́рѣ.
Оу҆глѣбохъ въ тимѣ́нїѧ глꙋбины̀, и҆ нѣ́сть постоѧ́нїѧ.
Тажъ: Всѧ́ко дыха́нїе:
Прок: Гла́съ, д҃.
Спаси́ мѧ Бж҃е ꙗ҆́кѡ внидѡ́шѧ вѡ́ды до дш҃а мое́ѧ.
Сті́хъ:
Е҆ѵⷢ҇лїе, ѿ Матѳе́ѧ, Глава̀, з҃. Зача́ло, к҃.
Рєчѐ Гдⷭ҇ь: Проси́те, и҆ да́стсѧ ва́мъ: и҆щѣ́те, и҆ ѡ҆брѧ́щете: толцѣ́те, и҆ ѿве́рꙁетсѧ ва́мъ. Всѧ́къ бо просѧ́й прїе́млетъ: и҆ и҆щѧ́й, ѡ҆брѣта́етъ, и҆ толкꙋ́щомꙋ ѿве́рꙁетсѧ. И҆лѝ кто̀ є҆́сть ѿ ва́съ чл҃къ, є҆го́же а҆́ще воспро́ситъ є҆гѡ̀ сы́нъ хлѣ́ба, є҆да̀ ка́мень пода́стъ є҆мꙋ̀; и҆лѝ а҆́ще воспро́ситъ ры́бы, є҆да̀ змїю̀ пода́стъ є҆мꙋ̀; а҆́ще ᲂу҆́бо вы̀, злѝ сꙋ́ще, ᲂу҆мѣ́ете даѧ́нїѧ бл҃га́ѧ даѧ́ти ча́дѡмъ ва́шымъ. Ко́л̾ми па́че ѻ҆ц҃ъ ва́шъ нбⷭ҇ный да́стъ бл҃га́ѧ просѧ́щымъ ᲂу҆ не́гѡ.
Та́же, Сла́ва:
Ѿч҃е ᲃло́ве и҆ дш҃е:
И҆ ны́нѣ:
Мл҃твъ ра́ди Бц҃а: Пом҃лꙋй на́съ Бж҃е:
Тажъ пою́тъ ᲃтіхи́рꙋ сі́ю, Гла́съ, ѕ҃.
Стра́шенъ є҆сѝ Гд҃и, и҆ кто̀ сте́рпитъ пра́ведный тво́й гнѣ́въ, и҆лѝ кто̀ тебѐ ᲂу҆мл҃итъ бл҃гі́й ѡ҆ лю́дехъ съгрѣ́шшихъ, и҆ ѿчаѧ́вшихсѧ; то́кмѡ нбⷭ҇нїи А҆гг҃ли, Нача́ла и́ Вла́сти, Прⷭ҇то́ли и҆ Гпⷭ҇дствїѧ, Херꙋві́ми и҆ Серафі́ми, непреста́ннѡ тебѣ̀ въпїю́щїи: ᲃт҃ъ, ᲃт҃ъ, ᲃт҃ъ є҆сѝ Гд҃и: тѣ́мъ Прⷭ҇ты́й Влады́ко, дѣ́ла рꙋ́кꙋ твое́ю не пре́ꙁри, но за млⷭ҇рдїе твое́ѧ млⷭ҇ти, сп҃сѝ лю́ди твоѧ̀, и҆ гра́д погиба́ющїй.
Сла́ва: И҆ ны́нѣ: Бг҃оро́диченъ:
Никто́же притѣка́ѧй къ тебѣ̀, посрамле́нъ ѿ тебѐ и҆схо́дитъ Прчⷭ҇таѧ Дв҃о Бц҃е: но про́ситъ благода́ть и҆ прїемлетъ дарова́нїѧ на по́лꙁꙋ проше́нїемъ.
І҆ере́ѵ꙼:
Сп҃сѝ Бж҃е лю́ди своѧ̀:
Ли́къ:
Гд҃и пом҃лꙋй, є҃і.
Воꙁгла́съ.
Млⷭ҇тїю и҆ щедрѡта́ми:
Пѣ́снь, з҃ И҆рмо́съ.
Хладода́вцꙋ ᲂу҆́бѡ пе́щъ:
Нико́лиже ѿлꙋча́йсѧ на́съ ᲃп҃се ще́дрый, ꙗ҆́кѡ Па́стыръ ѻ҆ве́цъ свои́хъ, но прⷭ҇нѡ съ на́ми неѿстꙋ́пнѡ пребыва́ѧ, ѿ всѧ́кихъ бѣ́дъ свободѝ, вѣ́рнѡ ти ѿ се́рдца вопїю́щих: блⷭ҇ве́нъ є҆сѝ Бж҃е, и҆ препросла́вленный.
Сла́ва:
Ты Бж҃е всеси́лный, и҆ Цр҃ю прест҃ы́й, пропны́й нб҃о ꙗ҆́кѡ ко́жꙋ, и҆ мо́ре пѣско́мъ ѡ҆гради́вый, послѝ на́мъ теплотꙋ̀ ᲃо́лнечнꙋю, и҆ бл҃горастворе́нны во́ꙁдꙋхи, вѣ́рнѡ ти вопїю́щимъ: блгⷭ҇ловенъ є҆сѝ Бж҃е, и҆ препросла́вленный.
И҆ ны́нѣ: Бг҃оро́диченъ:
Наꙋчѝ Влады́чице ꙗ҆ꙁы́къ мо́й, гл҃а́ти поле́ꙁнаѧ, наде́жде всѣ́мъ ко́нцемъ землѝ: и҆ мл҃и́сѧ ᲃн҃ꙋ си и҆ Бг҃ꙋ, пода́ти ве́дро на землѝ, и҆ ᲂу҆щедри́ти Хꙋ҃ вопїю́щихъ: блⷭ҇ве́нъ є҆сѝ Бж҃е, и҆ препросла́вленный.
Пѣ́снь, и҃ И҆рмо́съ.
И҆ съ пла́мене ᲃт҃ы́мъ ро́сꙋ:
Чїѝ рабѝ съꙁда́нїе є҆смы̀, не твои́ ли превѣ́чный Бж҃е; ᲂу҆слы́ши ᲂу҆́бѡ на́ша мл҃твы хꙋды́ѧ, и҆ и҆спꙋстѝ ве́дро на землѝ, и҆ ро́сꙋ по́леꙁнꙋю: да́ тѧ превоꙁно́симъ въ всѧ̀ вѣ́ки.
Сла́ва:
Ре́клъ є҆сѝ млⷭ҇тивый Влады́ко, накаꙁꙋ́ѧ на́съ къ покаѧ́нїю: И҆щѣ́те, и҆ ѡ҆брѧ́щете: толцѣ́те, и҆ ѿве́рꙁетсѧ ва́мъ: проси́те, и҆ прі́ймете, тѣ́мъ же къ тебѣ̀ припада́емъ, и҆ приле́жнѡ мл҃и́мъ, пощадѝ на́съ млⷭ҇тиве, превоꙁносѧ́щихъ тѧ въ всѧ̀ вѣ́ки.
И҆ ны́нѣ: Бг҃оро́диченъ:
Чтⷭ҇аѧ Влады́чце Бц҃е, и҆ и҆ꙁба́ви мл҃твами си лю́ди своѧ̀ ѿ ᲃтра́сти и҆ бра́ни всѧ́коѧ, подаю́щи ѡ҆би́лныѧ млⷭ҇ти, и҆ плѡ́ды на пи́щꙋ чтꙋ́щимъ тѧ̀, и҆ превоꙁносѧ́щимъ въ всѧ̀ вѣ́ки.
Пѣ́снь, ѳ҃ И҆рмо́съ.
Бг҃а чл҃кѡмъ неꙋдо́бъ:
Па́велъ пока́ѧвсѧ ѿ гони́телства, съсꙋдъ и҆ꙁбра́ненъ бы́ст̾ тебѣ̀ Влады́цѣ и҆ Бг҃ꙋ всѣ́хъ: и҆ мы̀ грѣ́шнїи надѣ́ющесѧ твое́мꙋ млⷭ҇рдїю въ покаѧ́нїи тебѣ̀ въпїемъ: простѝ всѧ̀ съгрѣше́нїѧ на́ша, и҆ послѝ ве́дро землѝ, и҆ росꙋ̀ бл҃гꙋю и҆ по́леꙁнꙋю, мл҃тва́ми Прчⷭ҇тыѧ ти Мт҃ре.
Сла́ва:
Верхо́вный Ꙋ҆ч҃никъ тво́й Пе́тръ, три́жды ѿве́ргсѧ тебѐ, пла́чемъ го́ркимъ ѡ҆брѣтѐ ᲂу҆ тебѐ млⷭ҇рде Хє҃ проще́нїе: и҆ мы тогѡ̀ ревнꙋ́юще покаѧ́нїю, тебѣ̀ въ ᲂу҆миле́нїи съ слеꙁа́ми въпїемъ, съгрѣши́хѡмъ простѝ млⷭ҇рде, и҆ и҆ꙁба́ви на́съ ѿ всѧ́кагѡ ꙁла̀, Мл҃твами Пречⷭ҇тыѧ ти Ма́тере.
И҆ ны́нѣ: Бг҃оро́диченъ:
И҆ꙁба́ви ны Прчⷭ҇таѧ ѿ всѧ́кагѡ зла́гѡ ѡ҆бстоѧ́нїѧ, и҆ ѿ беꙁго́днагѡ лѣѧ́нїѧ дожде́внагѡ, наше́дшагѡ ны́нѣ на́ны, и҆ и҆спросѝ свы́ше ᲂу҆ ᲃн҃а ти и҆ Бг҃а, пода́ти бл҃говре́менное ве́дро рабѡ́мъ свои́мъ, и҆ и҆ꙁѡби́лный плѡ́дъ зе́мный на пи́щꙋ люде́мъ: да́ тѧ непреста́ннѡ велича́емъ.
Катава́сїѧ.
Та́жъ, Досто́йнѡ є҆́стъ: Трⷭ҇то́е: по Ѿч҃е на́шъ:
Тропа́рь:
Пом҃лꙋй на́съ Гд҃и, поми́лꙋй на́съ:
Сла́ва:
Гд҃и, поми́лꙋй на́съ:
И҆ ны́нѣ:
Млⷭ҇рдїѧ две́ри ѿверꙁѝ на́мъ:
По си́хъ же Дїа́конъ гл҃єтъ Е҆ктінїѧ ᲃі́ѧ.
Пом҃лꙋй на́съ Бж҃е по вели́цѣй млⷭ҇ти твое́й, мл҃и́мтисѧ ᲂу҆слыш:
Е҆щѐ мл҃и́мсѧ ѡ҆ Вели́ком Королѝ на́шемъ: И҆мⷬ҇къ:
Е҆щѐ мл҃и́мсѧ ѡ҆ Преѡсщ҃енномъ А҆рхїепⷭ҇: на́шемъ: И҆мⷬ҇къ:
Е҆щѐ мл҃и́мсѧ ѡ҆ є҆́же ѿврати́ти ѿ на́съ всѧ́къ гнѣ́въ сво́й пра́веднѡ движи́мый на́ны, и҆ прости́ти на́мъ всѧ́кое съгрѣше́нїе во́лное же и҆ нево́лное и҆ пом҃ловати на́съ недосто́йныхъ рабѡ́въ свои́хъ, въ сердци съкрꙋше́нномъ, рцѣмъ всѝ, Гд҃и ᲂу҆слы́ши и҆ поми́лꙋй:
Е҆щѐ мл҃и́мсѧ ѡ҆ є҆́же ᲂу҆слы́шати Гд҃ꙋ Бг҃ꙋ гла́съ Мл҃итвы на́шеѧ, и҆ пом҃ловати на́съ, и҆ посла́ти бл҃говре́менное ве́дро на землю̀, и҆ ᲂу҆тѣши́ти на́съ ско́рбныхъ рабѡ́въ свои́хъ, рцѣ́мъ всѝ съ слеꙁа́ми, ᲂу҆слы́ши млⷭ҇тиве и҆ пом҃лꙋй.
Собира́ѧй во́ды въ ѻ҆́блацѣхъ ѿ коне́цъ зе́мных, повеле́нїемъ твои́мъ ᲂу҆держѝ ѧ҆̀, и҆ пꙋстѝ ве́дро на землю̀, съ ᲂу҆миле́нїемъ мл҃и́мтисѧ всеще́дрый Влады́ко, ᲂу҆слы́ши и҆ млⷭ҇тивнѡ пом҃лꙋй.
Приꙁыва́ѧй во́дꙋ мо́рскꙋю, и҆ сі́ю па́ки всемогꙋ́щею ᲃи́лою твое́ю ᲂу҆держа́ти могі́й, и҆ просвѣти́ти поднбⷭ҇нꙋю, въ покаѧ́нїи мл҃мтисѧ всемлⷭ҇тиве Гд҃и, ᲂу҆слы́ши и҆ чл҃кѡлю́бнѡ пом҃лꙋй.
Ве́дро во́лное пꙋстѝ Гд҃и на землю̀, и҆ ѿ и҆стлѣ́нїѧ ᲃко́рѡ и҆ꙁба́ви на́съ, болѣꙁне́ннымъ ᲃе́рдцемъ мл҃и́мтисѧ, ᲂу҆слы́ши и҆ щедро́тнѡ пом҃лꙋй.
Посѣща́ѧй зе́млю, и҆ ᲂу҆множа́ѧй жи́та є҆ѧ̀: проꙁѧба́ѧй же па́жить ско́тѡмъ, и҆ травꙋ̀ на слꙋ́жбꙋ чл҃кѡмъ: пом҃лꙋй чл҃ки и҆ скѡ́ты, и҆ запрѣтѝ беꙁго́дномꙋ дожде́вномꙋ лїѧ́нїю, ᲃо́лнцꙋ же бл҃говре́меннѡ воꙁсїѧ́ти на землю̀, и҆ ᲂу҆множи́ти плѡ́ды є҆ѧ̀ повелѝ, мл҃и́мтисѧ бл҃гоꙋтро́бне Гд҃и, ᲂу҆слы́ши и҆ ꙗ҆́кѡ бл҃гъ пом҃лꙋй.
Ꙗ҆́кѡ ѻ҆́чи ра́бъ въ рꙋ́кꙋ гпⷭ҇дїй свои́хъ, та́кѡ ѻ҆́чи на́ши къ тебѣ̀ Бж҃е на́шъ вѣ́рою вꙁира́ютъ, до́ндеже ᲂу҆щедри́ши ны: тѣ́мже не погꙋбѝ на́съ беꙁмѣ́рною мокрото́ю: но млⷭ҇тивнѡ при́ꙁри на́ ны ве́дромъ, и҆ щедро́тнѡ пом҃лꙋй.
Ꙍ҆сїѧва́ѧй ᲃо́лнце на злы́ѧ и҆ бл҃гїѧ, и҆ подава́ѧ ве́дро, и҆ росꙋ̀ бл҃гоплодоно́снꙋ, и҆ бл҃гораство́рныѧ во́ꙁдꙋхи на по́лꙁꙋ съꙁда́нїю твое́мꙋ, не ꙗ҆́ростїю твое́ю накажѝ на́съ, но млⷭ҇тивнѡ ᲂу҆множѝ сѣмена̀ зе́мнаѧ и҆ плѡ́ды є҆ѧ̀, въ покаѧ́нїи моли́мътисѧ чл҃кѡлю́бче Гд҃и, ᲂу҆слы́ши и҆ ꙗ҆́кѡ ще́дръ пом҃лꙋй.
Ꙍ҆дѣѧ́йсѧ свѣ́томъ ꙗ҆́кѡ ри́ꙁою, воꙁсїѧ́й ᲃвѣ́тъ ᲃо́лнечный на землѝ на́шей, и҆ и҆ꙁсꙋшѝ и҆ꙁли́шнюю мокротꙋ є҆ѧ̀, къ и҆ꙁъѡ҆би́лномꙋ плодоноше́нїю, мл҃и́мтисѧ ᲂу҆слы́шъ и҆ млⷭ҇тивно поми́лꙋй.
Не помѧнѝ беꙁꙁакѡ́нїй на́шихъ Влады́ко, а҆́ще бо беꙁꙁакѡ́нїѧ на́ꙁриши, никто́же посто́итъ пре́дъ тобо́ю: но ско́рѡ да варѧ́тъ ны щедрѡты̀ Гд҃и, ꙗ҆́кѡ ѡ҆бнища́хѡмъ ѕѣ́лѡ: да не растли́тъ на́съ беꙁве́дрїе и҆ до конца̀ да не погꙋ́битъ, моли́мтисѧ ско́рѡ ᲂу҆слы́ши и҆ млⷭ҇тивно пом҃лꙋй.
Ꙋ҆пова́нїе и҆ ᲃп҃се́нїе правосла́внѡ въ тѧ вѣ́рꙋющихъ Гд҃и, и҆ꙁба́ви (А҆́ще въ монастырѣ̀, гл҃ѝ ᲃі́е Ѻ҆би́тель ᲃі́ю. (А҆́ще же въ гра́дѣ, ᲃі́е гра́дъ се́й, и҆ всѧ́къ гра́дъ и҆ стра́нꙋ, (А҆́ще же на селѣ̀, ᲃі́е ве́сь сі́ю, ѿ гла́да, гꙋби́телства, трꙋ́са, пото́па, ѡ҆гнѧ̀, меча̀, наше́ствїѧ и҆нопле́менникъ, и҆ междосо́бныѧ бра́ни, и всѧ́коѧ ᲃмертоно́сныѧ ра́ны, и҆ млⷭ҇тивъ, и҆ ти́хъ, и҆ бл҃гоꙋвѣтли́въ бꙋ́ди чл҃кѡлю́бче ѡ҆ грѣсе́хъ на́шихъ, и҆ пом҃лꙋй на́съ: и҆ ѿвратѝ ве́сь гнѣ́въ сво́й пра́веднѡ движи́мый на́ны, и҆ и҆ꙁба́ви на́съ належа́щагѡ пра́веднагѡ преще́нїѧ свое́гѡ, и҆ просвѣти бл҃года́тїю свое́ю всю поднебе́снꙋю къ плодоноше́нїю землю̀, и҆ къ ѡ҆кормле́нїю жи́тїѧ на́шегѡ, рецѣ́мъ всѝ съ слеꙁа́ми, Гд҃и ᲃт҃ый ско́рѡ ᲂу҆слышь и҆ млⷭ҇тивнѡ пом:
И҆ пою́т всѝ, Гд҃и поми́лꙋй: гⷤ.
І҆ере́ю же не воꙁгласи́вшꙋ, Дїа́конъ гл҃етъ:
Съ ᲂу҆миле́нїемъ всѝ колѣ́нѣ прекло́нше, Гд҃ꙋ помоли́мсѧ.
И҆ ѿпѣ́вше три́жды, Гд҃и пом҃лꙋй, прекланѧ́ютъ колѣ́нѣ:
І҆ере́ѵ꙼ же чте́тъ Мл҃твꙋ ᲃі́ю велегла́снѡ.
Влады́ко Гд҃и Бж҃е на́шъ, дре́вле ревни́телѧ И҆лїю̀ Пррⷪ҇ка твое́гѡ мо́л̾бꙋ послꙋша́вый, и҆ є҆́же на вре́мѧ до́ждъ ᲂу҆держати и҆ꙁволи́вый: и҆ ны́нѣ чл҃кѡлюби́вый тво́рче, и҆ млⷭ҇твый Гд҃и, при́ꙁри и҆ на́съ ᲃмѣре́нных и҆ недосто́йныхъ рабѡ́въ твои́хъ смѣре́нныѧ мѡ́л̾бы, и҆ ꙗ҆́кѡ ще́дръ пре́ꙁри на́шѧ прегрѣше́нїѧ, и҆ ᲂу҆моле́нъ бы́въ ѿ сама́гѡ ти чл҃кѡлю́бїѧ, пода́ждъ ве́дро достоѧ́нїю твое́мꙋ, и҆ ᲃо́лнце просвѣтѝ на требꙋ́ющїѧ и҆ просѧ́щїѧ ѿ тебѐ млⷭ҇ти: воꙁвеселѝ лицѐ землѝ ни́щихъ ра́ди люді́й твои́хъ, младе́нецъ же и҆ скѡ́тъ и҆ и҆́ныхъ всѣ́хъ живо́тныхъ, и҆́хже насыща́еши твои́мъ бл҃говоле́нїемъ, и҆ дае́ши пи́щꙋ и҆́мъ въ бл҃говре́мѧ.
Е҆й Гд҃и Бж҃е на́шъ, не ѿринѝ въ тщѐ мол̾бꙋ на́шꙋ, ни́же посрамѝ на́съ ѿчаѧ́нїѧ нш҃егѡ, но пощадѝ на́съ по млⷭ҇ти твое́й, и҆ посѣтѝ щедрѡтами твои́ми, и҆щеꙁа́ютъ бо всꙋ́е дні́е на́ши, и҆ ѡ҆скꙋдева́етъ въ бо́лѣꙁни живо́т на́шъ: не погꙋбѝ ᲂу҆́бѡ на́съ беꙁꙁакѡ́нїй ра́ди на́шихъ, и҆́миже негодова́нїе и҆ ꙗ҆́ростъ твою̀ на себѐ привлеко́хѡмъ: но сотворѝ съ на́ми по ти́хости твое́й, и҆ по мнѡ́жествꙋ ми́лости твое́ѧ, ᲃе́бѡ дш҃ею ᲃокрꙋше́нною, и҆ дх҃омъ смѣре́ннымъ пре́дъ тобо́ю припада́емъ, и҆ ꙗ҆́кѡ рабѝ непотре́бни, па́че же бо́л̾шеѧ ка́ꙁни досто́йни, въ покаѧ́нїи ᲂу҆миле́ннѡ тебѣ̀ вопїемъ: согрѣши́хѡмъ и҆ беꙁꙁаконова́хѡмъ, и҆ прегрѣши́хѡмъ въ все́мъ, за́повѣди твоѧ̀ престꙋпа́юще, и҆ сегѡ̀ ра́ди всѧ̀ ꙗ҆́же наводи́ши на́ны, и҆́стинною и҆ сꙋ́домъ наво́диши, но не до конца̀ тлѣ́нїю, гла́дꙋ же и҆ поги́бели преда́ждъ на́съ, ни́же да пото́питъ на́съ бꙋ́рѧ во́днаѧ: но въ гнѣ́вѣ млⷭ҇ти помѧнѝ, и҆ тꙋ́не щедрѡ́тъ твои́хъ ра́ди ᲂу҆млстиви́сѧ, и҆ своѐ соꙁда́нїе и҆ дѣ́ло рꙋ́къ твои́хъ ꙗ҆́кѡ бл҃гъ пом҃лꙋй, и҆ ѿ всѧ́кагѡ зла ᲃко́рѡ и҆ꙁба́ви.
Во́ꙁгласъ:
Твое́ бо є҆́стъ є҆́же ми́ловати и҆ спаса́ти на́съ Бж҃е на́шъ, и҆ тебѣ̀ ᲃла́вꙋ воꙁсыла́емъ, Ѿц҃ꙋ̀ и҆ ᲃн҃ꙋ, и҆ ᲃт҃о́мꙋ Дх҃ꙋ, ны́нѣ и҆ прⷭ҇нѡ и҆ въ вѣ́ки вѣ́кѡвъ.
Ли́къ:
А҆ми́нь.
Дїа́конъ:
Премꙋ́дрость.
І҆ере́ѵ꙼ же и҆лѝ А҆рхіере́ѵ꙼, тво́ритъ ѿпꙋстъ ѡ҆бы́чный дне́ви, и҆лѝ пра́ꙁдникꙋ.