№ 63. Мнение неизвестного лица¹⁰⁷ и выписки из правил Св. Апостол, Св. Отец и Св. Соборов, о епископе, самовольно оставившем свой епархию, написанное для соборного деяния, и заключение неизвестных лиц о виновности патриарха Никона

Толкование яко вкратце.

14-е правило святых апостолов повелевает: яко епископ, сиречь всякий архиерей, да не оставит епархию свою, и пойдёт в иную епархию кроме совета собора, аще случится и благословная вина за пользу веры и церкви. Понеже и во благословном деле повелевает то же правило не идти архиерею кроме совета собора, колико наипаче в ином хотении своём есть возможно идти инуды оставляющу престола своего на долгое время, и не запрещену быти. В настоящем правиле пристоит патриарху, хотя и не сотвори отрицания, токмо за еже оскудети толико время от престола своего, кроме нужной потребы, и кроме совета собора есть повинен сему правилу.

25-е правило отвергает клятвопреступника архиерея и священника. И в сем пристоит: аще патриарх заклялся и проклялся, яко вящи не требует патриаршества, якоже глаголют некие. И аще есть сие истинно, ниже искать вящи патриаршества есть возможно, яко извергается.

34-е правило повелевает: архиереям каждого языка, яко подобает ведать первого своего, и ничтоже творить, ни во единой церковной или иной вине великой, кроме его намерения; но ниже самому первому творить подобное нечто, кроме всех намерения. В настоящем правиле пристоит ему, ибо аще имяше дело нужное, якоже глаголют некие еже глаголют ныне, и не бяше возможно иначе творить, токмо идти самому творить их дел, подобает творить с советом и хотением тишайшего царя и собора; и сего ради есть повинен и сему правилу.

37-е правило повелевает: яко дважды в лето да будет собор архиереев во всякой епархии, церковных ради вин, или распрей, или иных потреб, случающихся между архиереями и прочими церковными человеками, испытывать и исправлять всё добрым образом, да будет мир и единомыслие в Церкви Христовой. В настоящем правиле пристоит ему: ибо якоже глаголаше, и глаголет, яко не послушаху его, и не покоряхуся ему причт и людие епархии его, и обретахуся сопротивницы ему в церковных и в иных многих. Подобаше собор архиереев созвать судить, и исправлять вся с собором, якоже подобаше всякие вины; но не унывать и гневаться, отрицаться и бежать с гневом от церкви своей и престола своего, и сего ради есть повинен и сопротивен и сему правилу.

16-е правило глаголемого 1 и 2 собора повелевает чище и яснее, во второй части той же главы: яко который архиерей оставит престол свой с отрицанием, или и кроме отрицания, и ходит инуде вне стада своего, кроме нужды великой возбраняющей, более шести месяцев, известно изрекает епископа чести и седалищу отъяться. Сие правило хотя и не творяше отречения, извергают его токмо, зане оскудевает толико время от стада и престола своего.

Об отречении архиереев яснее пишет Матфей Властарь, и показывает от святого Кирилла еже к Домну послание; и от десятого правила святого Дионисия, патриарха Александрийского, и от послания святого и вселенского третьего собора, еже к сущим в Памфилии и изрекает: яко который архиерей отречётся престола своего и стада своего, да обнажится абие и священства своего; и яко больше является погрешен той, иже сам отречётся, нежели он, иже за согрешение извержется. Зане которого за согрешение извергают, может тот искать суда и собора; а юже волею отречётся престола своего, более ни едино праведно имать ниже что рещи, ниже что более иное творить, токмо стоять в оном, еже сам изрече себе.

9-я глава от закона приснопамятного царя Иустиниана содержит и изрекает, якоже и 14-е и 34-е правило святых Апостолов и 16-е правило глаголемого 1 и 2 собора: Яко не оставлять архиереям своих епархий и ходить по иным епархиям, кроме нужной потребы и кроме повеления царского. Аще же который архиерей или так, или иначе оскудеет от престола своего более единого лета, он убо да извержется, иной же вместо него да рукоположится.

Прочие все правила святых апостолов и святых соборов и царские законы содержат и изрекают, яко который архиерей, и кроме творит отречения, токмо ходит вне церкви своей, кроме нужный потребы церковной, или царской, и оскудеть от престола своего шести месяц, или по снисхождению царя Иустиниана единого лета более, кроме возбранену быти от Великой нужды, той убо да извержется и ин да рукоположится, кроме ни единого возбранения. Аще же который сам отречётся престола своего своим произволением, ни едино правило обретается, ниже закон кто помогать и оправдать его иметь волю и праведно искать паки престола своего; но стоит токмо власть и воля в совете и власти тишайшего царя, собора и синклита. Аще им есть нужный и потребен снисходить паки призвать его на престол его есть возможно, якоже является в писании, еже бысть и иногда. Аще же ни, по правилам и законам ни едину власть имать вяще искати от престола чесого иного, токмо за живопитание своё; в нём же царь самодержец и синклит умилосердятся и упокоят его, и в которой мере повелевают обратиться и миритися, в той послушать мирствующу, и моля Господа Бога о величайшей державе самодержца и тишайшего царя и о благочестивых всех, ищущему и спасения души своей во Христе Иисусе Господе нашем. Ему же слава во веки. Аминь.

Слово ответное¹⁰⁸ в предписаных главах и в вине патриарховой.

Господь наш Иисус Христос и Бог всех, наказывая и научая нас, да не небрежём еже в нас дарования, и даже до беды смертной, повелел в божественном и священном евангелии: Пастырь добрый душу свою полагает за овец. И верховный апостол Павел, иже вселенной великий учитель, иже до третьего неба возшед и оттуда неизреченные глаголы слышав, повелевает: пасите еже в вас стадо Божие, епископствуя не нуждой, но волею, ниже злоприобретно, но усердно. И к Титу, истинному своему ученику и апостолу, пишет: поставь священников и учителей по всей церкви, якоже аз ти повелех. И паки инде научая нас тот же сосуд избрания и великий апостол; яко не токмо в мирном времени держать престол и пасти стадо, но и во время нужды и мятяжей, наипаче когда от неких незнающих человеков смущается Церковь Христова, повелел: братия, непрестанно молитесь, показывая нам, яко кроме Божия помощи, ничтоже исправляем. Якоже и Господь наш Иисус Христос рече: сей род, сиречь соблазн, не исходит, токмо молитвой и постом. И бдите и молитесь. И паки, сосуд избрания учит нас: яко не токмо когда нас хвалят, и благоговение и благопокорение меньшие нам подают, благодарить нам; но и когда по времени приидет сопротивное, долгодушием и терпением исправлять и управлять вся, рече, еже во всем благодарить. И паки тот же вселенский великий учитель повелительно повелевает: да никтоже будет самоволен оставлять престол свой и церковь свою, и ходить где хочет. И рече: еже, братия, каждый в нем же зван бысть да пребудет; убо который архиерей обрящется презритель преднаписанных выше божественных правил и апостольских повелений их же Духом Святым святые апостолы и святые отцы святых соборов писали, и повелительно повелел: яко никто же да дерзнёт погубить и обновить что от оных, яже тии законаположиша; якоже сам апостол повелевает: аще кто вам хощет благовестить чрез еже благовестих, анафема да будет. Обаче, царю святый самодержче, в ветхом писании является, яко и он великий Моисей погреши на воде прекословия, якоже глаголет божественный Давид во псалтыри: и озлобися Моисей о них, ибо рече ему Бог: иди умири люди, и рцы им иметь надежду свою на Мя, и Аз иже свободих их от пленения, воздам, и аще что требуют, и рцы им, яко рече мне Бог, да ударю по сему камню избыть воде. Той же уныл и озлобился, понеже стекошася люди все, когда видеша его, и прошаху его воды, стужающе ему, и той не умирил их словами Божьими, но злобой великой и жестокостью рече им: еда аз есмь Бог ударити по сему камню дать вам воду. И оле чудо бысть Божие слово дело абие, и изыдоша из камене двунадесять источников воды. И за прекословие сие повелел Бог Моисею, яко не видеть землю обетования, сиречь Иерусалим, и так умер на горе. Но и пророка Илию хотя Бог творить познать немощь человеческого естества, опечалиться за человеки, зане Бог упечаловашеся за человеки, и животная же вопияху снедения ради и пития, и той от ревности, юже имяше, не опечаловашеся рещи Богу одождити, зане Бог не хотяще преслушати слово пророческое одождити кроме воли его; но что по последи Бог устроил. Оскуде изътока вода, и вранове ему не приношаху пищу, и помале паки оскудела от него часть божественной благодати, и прииде ему боязнь и страх в сердце. И оттуда идеже обличаше бесстрашно единого страшного царя, глаголя: не развращаюсь аз Израиля, но ты и дом отца твоего. Тогда же потом за единое жены слово Иесавеля бежит четыредесят дней течете, кроме снеди и пития. И от верховного апостола Петра взять иногда на время благодать свою, и отвержется трижды, да навыкнет смирению, и да научит и иных не гордиться и не гневаться зело на человеки, аще и погрешат яко человеки, ведый яко и тии естество и немощь телесную имут. Еще и сынове Зеведеевы, когда чающе, яко Христос воцарится на земли, просили сесть един одесную и другой ошуюю, и Владыка Христос, показывая, яко не властительно и мучительно подобает ученикам его архиереям пасти, но со учением и утешением, с кротостью, и со иными добрыми своими делами пасти. Сего ради рече, яко не тако будет в вас, Моих учениках, но первый вас да будет всех последний, и всех служитель, зане аз, Господь и Учитель, не приидох служим быти, но служити и дати душу Мою и цену избавления за мир. Человеческое же восприим естество, не токмо жертва, но и архиерей быв и архиерейство яко нужное благочестивых священным своим ученикам даровал, повелев другопринимательно подавающе, да ни едина от церквей пребудет сицевыя благодати лишена безсчастна. Обаче, царю святый самодержче тишайший, является во многих местах писания, яко многие архиереи оставили свои престолы, и иные отягчаемы попечением людей и мятежом мира, и идоша и безмолствоваша в монастырях, другие же за иные страсти человеческие. Обаче, который архиерей за человеческие страсти или за некое искушение, или соблазн, случившийся ему, не терпя соблазнится и отступит от стада своего, о сицевых глаголет Христос: наёмник и не сый пастырь, видит волка грядуща, и оставит овец и бежит, и волк восхитит их и распудит; но пастырь добрый душу свою полагает за овцы. Имже оным и святой Иоанн Златоуст повелевает и глаголет: Аще убо есть мятеж в стаде, да не отступиши; аще хощеши исправити, помолися Богу особо прослезись, моли, поущай, покажи любовь к согрешшим; аще воистину исцелить и врачевать хочешь, держи ноги, облобызай руки, да не постыдишься; и аще досажден будешь, или уничижен, вся претерпевай за любовь, иже тебе ради крест претерпевшего. И ты убо, когда требует церковь или люди исправление, аще есть возможно, и живот твой положите не отрицайся за слово Христа, рекшего: Пастырь добрый душу свою полагает за овцы. И аще господин Никон патриарх сия вся презрев, и кроме ни единой благословной вины, кроме нужды или насильства, но своим произволением себе отрину престола, и остави еже от Христа вверенное ему стадо, во время, когда то бяше во своей чести добре утвержен, по 16-му правилу глаголемого 1 и 2 собора, и не своя восхоте пасти люди, но своего отступ стада, не паче шести месяц, но паче осмьнадесять месяц во ином пребывает месте, ничесому нуждому возбраняющу. Аще сице будет по настоящему правилу епископа честь и седалище праведно отъемлется; но и паче аще сам себе воистину своими устнами анафеме подложи, еже не ктому обратитися на патриаршество, сам на себе суд изнесе, подложився анафеме, и анафемой совершенное извержение. Священное глаголет слово: сеть крепкая мужи свои уста, и поимется устами своих уст; иже бо исповеданием уст содержився, тенетами не разрешенными состегняется, и ни единым образом имеет освободиться. Аще не стоять и пребывать долженствует во обещанных оных ему и исповедаемых, отнюдуже и преступльшему явлшуся, праведное воздаяние предлежит и противу достойного наказания бежать сицевый не может. Понеже убо, аще негли воистинно будет и сие, повинен в том есть, и от 25 правила святых апостолов, и не может вящи иметь престола своего, ниже паки просить его, зане бывает клятвопреступник. Се убо по вышеписанным правилам святых апостолов и святых отец, и святых соборов, и по царским законам, и по божественному и священному евангелию, и в прочих святого писания словесах, есть погрешен господин Никон патриарх; но якоже повелит великое твоё царство и собор.