Редкий памятник Сибирской духовной письменности первой половины XVII века: [сказание об Абалакской иконе Божией Матери]

Всемогий Бог, милости ради своего человеколюбия, весма промышляя о своем создании, и своя Божественная хотения яве творит притчами и чудесы различными человеческому естеству, свобождая от дияволя порабощения, но привлачая к своему триипостасному Божеству. Искони бо Троица Бог наш – Отец и Сын и Святый Дух, о нашем спасении всяко промышляя, якоже сотвори первозданнаго человека Адама, к семуже и мы вси припрягохомся плотию во едино подобие. И сотвори нас Бог с Ним быти в раи пища, еже нас ради насади во Едеме на востоке. Сей же первозданный и мы с ним вси купно отпадохом от Божественныя рая пища, и смерти и тли подпадохом по дияволю искушению и преступницы быхом Божиих заповедей. Всемилостивый же Бог наш, множества ради своего человеколюбия, посла Сына Своего единороднаго спасти рода человеча, и в Пречистое Девическое ложесно вселися и плоть содушну словесну же и умну приим изволением и изыде Бог воплощен, родився неизреченно и девство сохранил нетленно, и приим рабий зрак истинною, а не мечтанием, но всячески нам подобен был разве греха. Волею трудися, волею пострада, волею умре безгрешный нашего ради спасения, и воскресе тридневен, истления же не виде, и человеческий род без (!) истления свободи, и на небеса вознесся, но никако же от нас не отлучаяся, но вопия любящим Его: Аз семь с вами и никто же на вы. О новый израилю! слышите Божие милосердие и смотрения к нам человеком, како печется о нашем спасении, якоже обещася нам: Аз есмь, рече, с вами, сиречь не отступлю от вас и не дам в попрание врагом вашим и избавлю от сети вражия. Но убо збыстся нам реченное пред очию нашею во дни и роды наша, еже очи наша видеша и ушеса наша слышаша, яко содеяся в новопросвященном месте, идеже древле оледеневшая сердца неверном помрачашеся и кумирослужения и бесобоязния исполнено бе.

Оле Божие милосердие и строение спасительное! Древле убо Сибирская земля тьмою безверия помрачашеся, ныне же благоверием сияя и Божественными чудесы прославляема. Тогда осквернися земля кровопролитием к идолам богомерских жрецов, ныне же освятися и очистися приносимыми бескровными дарами Господеви Богу нашему. Тогда нечестие, ныне же благочестие; тогда человецы яко во тьме в безверии быша, ныне же во свете непорочныя веры пребывающе присно. Тогда оледеневшие сердца неверием помрачашеся, ныне же Божественное семя всеяся в них, и евангельски духовно породишася и из неверия быша верни. Тогда действа и мечтания бесовская, ныне же Божественная чудеса и явления Божия Матери содеяся, еже ныне, упова на Бога, хощу предложити повести сия всем во услышание, понеже обретох писание, глаголющее сице: тайну цареву лепо крыти, дела же Божественная проповедати честно есть, инде же глаголет добро и души утешно.

В лето ҂ȝρ҃мд-е месяца июля в день в҃і, при державе благочестиваго государя царя и великаго князя Михаила Феодоровича всея Руси самодержца, святыя же и великия соборныя и апостольския церкви в царствующем граде Тобольске кормило правящу тогда пресвященному Нектарию архиепископу. В первое же лето святительства его, прииде в соборную церковь Софии Премудрости Божии из веси нарицаемыя Абалак вдова именем Мария, и поведа Нектарию архиепископу предо всем собором, паче же и предо всем народом, не обинуяся сице глаголя.

Спящу ми, рече, на ложи своем, и явися мне во сне Пресвятая Богородица со святым чудотворцем Николаю и с преподобною Мариею Египетскою, аз же исполнился трепета и ужасти. Глагола же ми Пресвятая Богородица во сне том: се заповедаю ти, да возвестиши во всем мире явление Мое к тебе и да речеши им Мое заповедание. Се же им заповеди Моя, да созиждут церковь нову на Абалаке во имя Мое Знамения, иже в великом Нове-граде, в предградии же обаполы во имя Николы Мирскаго архиерея и Марии Египетския, одесную страну ветхия церкви Преображения Господня. Тако ж явимися дважды, сия ж глаголы возвещающую ми. Аз же сему не ях веры, яко истинна суть, но мнех сон зрети и ни во что же вмених бывшее и никому сего явления не поведах, но слогах в сердцы своем, дóндеже паки явимися.

Слышите, людие Божии, яко снабдит Господь страну сию. Благодарим Содетеля Бога, яко наставляя нас на спасительные вещи, и ради истинного свидетельства предповелевает Пренепорочней Своей Матери чудеса творити, с Нею же и угодники Своя посылая, яко да послужат Царицы и не будет уединена.

Таже вдова Мария поведа, глаголя: того ж лета месяца июля в к҃s день, шедшу ми, рече, из клети своея, держах в руце своей хлеб, и абие прииде на мя яко мрак и умом смятохся и падох на землю яко мертва. И озрехся видех икону Пресвятыя Богородица, вторую ж икону Марии Египетския и очивесть святаго Николу, яко жива суща, во святительстей одежди стояща. Аз же от видения сего наипаче убояхся и вниде трепет в кости моя. Рече же ми святый Николае: востани, не бойся, но иди на погост Абалацкой и рцы во всем мире; иде же кого обрящеши, да глаголеши им не обинуяся. По прежреченному ти глаголю, яко да созиждут церковь нову во имя Пресвятыя Богородицы. Лес же на ту новозиждемую церковь да повелиши людем своими труды посещи и приплавити водою и положити его, идеже повелеся прежде создатися церкви. Аще ли презрят сие повеление и твое извещение ни во что вменят, то явити имать Господь казнь Свою на них и сами узрят будущая им в последних озлоблениих. Аще ли исполнят по глаголу моему, то Господь Бог умилосердится им и пополнятся гумна их жита довольно и во всем мире мир и здравие подаст. Аз же, яко от сна возбудихся, никого же видех и сего паки никому же поведах бывшаго ми явления.

Еще же сия Мария поведа нам. По вторем же, рече, явлении, седящу ми в дому своем едина, и внезапу исполнися храмина моя дыма благоуханна, яко фимияна, аз же ужасохся и яко вне ума своего бых, и видех две иконы на воздусе стоящи. Едина икона Пресвятыя Богородица, вторая же Марии Египетския. Святый же Николае паки очивесть явимися в ризах светлых. И глагола ми святый Николае: Мария! почто явления Пресвятыя Богородицы не поведаеши в мире; не веси ли, яко озлобление ти есть за твое неверие? И абие обратишася руце мои опако, и болезненно ми бысть, и падох на помост яко мертва. Слышах же сладкий глас ото иконы Пресвятыя Богородицы, глаголющ: тягость есть и не возможно ей тако терпети. И абие обратишася руце мои яко же бе и первие. Аз же от страха того много болезновах и недоумевахся, что ми напоследок. По не мнозех же дней мало от болезни устрабихся и идох ко отцу моему духовному и возвестих ему вся подробну прежния и сия явления, яже видех и яже слышах от Пресвятыя Богородицы, и молих его, дабы поведал в мире, яже исповедях ему. Сему же умолчавшу и никому же поведающу сих.

Божий Промысл не закосневает, но паче на успех бывает, якоже прежде Божие мановение коснуся нас, хотящее спасения нашего: не хочет бо смерти грешным без покаяния, но ожидает благий Казатель путь спасения нашего, многие знамения и явления и чудеса угодники своими являет на пользу нам. Аще ли же не возбудимся яко от сна и не вонмем благая в сердца своя, тогда обрящемся в последних озлоблениих, глаголюще сице: не сердце ли бе горя бе в нас, егда глагола нам жена она повеления Пресвятыя Богородица, яко снабдит Господь страну нашу. И повеления Божия не содеяхом и одебелеша сердцы своими тяжко. Сего убо ради, ища нашего спасения, Господь, и дóндеже не приидет на нас казнь Божия за неверие наше, будущая нам озлобления яве творит, да быхом познали и разумели, яко судьбы Божия неиспытанны, яко же вдова она Мария поведа нам сице: идущу ми, рече, во граде Тобольске подгорием и бых яко во мраце и видех, яко облачен столп до небеси досязаем. В том же столпе явися мне святый Николай тако ж, якоже и прежде в светле одеянии. И паки видех две иконы – едину Пресвятыя Богородицы и едину Марии Египетския на воздусе стоящи. Аз же стоях на долг час и возмятохся умом и бых яко мертва. Рече же ми святый Николае с яростию: аще прежнего и днешнего явления не возвестиши мирови, будеши разслаблена; аще ли же поведавши народом, они же ни во что вменят и по прежнему явлению не воздвигнут церкви Пресвятыя Богородицы, идеже повелено прежде, то казнь Божия имать быти на все народное множество, яко не верование. Аз же убояхся наипаче и не могущу ми двигнутися с места того, идеже стоях, и на мног час тако трудихся и едва изыдох от места того, и абие явльшася мне невидима бысть. И паки идох ко отцу моему и возвестих сия, и начах в мире поведати вся подробну, еже видех и яже слышах и дерзостне начах поведати вся.

По сему же явлению вси христоименитии людие града Тобольска, по совещанию всего християнства, обещашася воздвигнути церковь на Абалаке во имя Пресвятыя Богородица честнаго ея Знамения, иже в Великом Нове-граде, в пределех же – Николы Чудотворца и Марии Египетския, и испросивше благословение у пресвященного Нектария архиепископа, еже и воздвигнута. Некий же человек именем Евфимий, прозвище Кока, в разслаблении всем телом своим, яко ни единым удом телесным владети можаше и тако многи дни в том недузе проводи. Уведав же от ближних своих, яко по явлению вси православнии людие начаша созидати церковь на Абалаке во имя Пречистыя Богородица, и помолися Богу и Пречистей Его Богоматери и обещася написати образ местной Пречистыя Богородица Знамения, иже в великом Нове-граде, иже во святых отца нашего Николы Мир-ликийских чудотворца и преподобныя Марии Египетския. И якоже обещася, и абие, еще сущи молитве во устех его, бысть облегчение болезни его и мало укрепися удесы своими. Видев же себе облегчение, наипаче возгореся ревностию желания своего, яко да исполнит обещание свое и безо всякого закоснения повеле иконописцу святыя иконы написати. По мале же времяни иконописец иконы Пречистыя Богородица и святаго Николы и преподобные Марии Египетския написа на единой дске елико подобаше. Егда же совершена бысть причистая икона, и абие человек он бысть весь здрав и востав прииде во град и взят у иконописца святую икону и, своими руками любезно подъем, принесе во святую соборную церковь Софеи Премудрости Божии. Поведано же бысть о бывшем преславнем чюдеси, яко разслабленый прежде бывый человек он принесе пресвятую икону во святую соборную церковь своими руками. И возгореся духом благодарственныя молитвы со всеосвященным соборным Богови и Пречистей Богородицы воздаша, пеша молебная согласная пения, и поставиша пречистую икону в соборней церкви, и отоидоша в домы своя, радуяся духовне о Бозе.

Божественный пророк Иезекеиль яко от лица Божия к пастырем глаголет: сыне человеч, стража дах тя дому израилева, слыши от мене слово и запретиши им, и аще засвидетельствуеши им и не отстанут от беззаконий своих, во гресех своих умрут, ты же чист пребудеши; аще ли же не засвидетельствуеши им, кровь их от руки твоея взыщу. Ино же писание глаголет: подобает паствующим всегда о стаде своем попечение имети и неослабно и тщательно о сих прилежати. Сему же последующе, пресвященный Нектарей архиепископ, попечение имея о порученной ему от Бога пастве о многочисленем християнстем народе, паче же о сих прилежне подражая, о божественем орудии, еже о Святем Дусе порученныя ему чада града Тобольска, – христоименитии людие обещашася волю и хотение Божия Матери содеяти, еже создание храма на Абалаке по явлению, иже прежде рекохом, – повеле сий архиепископ прежереченную святую чудотворную икону нести на Абалак, идеже созидашеся святый храм ея, священником же и дьяконом воследовати ей повеле. Егда же понесоша сию пресвятую целебную икону, народи мнози воследующи иноцы и инокиня, мужи и жены, старый и младии и всяк возраст приключишиися быти тогда, не просто бо идуще, но свеща имуще, священником же и дьяконом молебная пения возсылающим и тако двадесять поприщ идуще, толико отстоит Абалацкая весь от града Тобольска. Егда же несоша сию святую икону и отоидоша от града пять поприщ и доидоша веси Шанталык именуема. Близ же тоя веси живяше человек именем Василей, архиепископль крестьянин. Узрев сию чудотворную икону и пад, со слезами моляся: бе бо дщи ему девица слепа, не виде солнечного сияния два лета, – дабы милость получила от Пречистыя Богородица, яко да прозрит, и обещася приложити к той чудотворней иконе, приложити серги тоя дщери своея, иже ношаше. Пришедшу же ему в дом свой, и абие дщи его прозре и здрава бысть, и прославиша Бога и Пречистую Его Матерь за бывшее чудо Пресвятыя Богородица.

Господь гордым противится, смиренным же и подобострастным, и сердце имущим сокрушено, и вся божественная дела подражающим, о своем же спасении промышляющим дает благодать свою; горделивым же и превозносящимся и о всяком божественнем орудии нерадящим томления и казни различными прилоги наводими бывают. Но не до конца дает погибнути; паки милосердие свое дарует и паки промысление бывает, да не порабощено будет дияволу человеческое естество, но приидет в покаяние и приимет милость, якоже в чюдеси сем известно будет, яко етеру мужу ключися в сия страсти впасти и последи покаянием милость получи. По совещанию убо всего християнскаго народа, иже попечение имеющей о Божественнем орудии, послан муж етер именем Антоней с пречестным образом Пресвятыя Богородица во область сибирскаго царствия во грады же и веси собирати на церковное здание и украшение новозиждемыя церкви, иже есть на Абалаке. Прииде же сей прежреченный муж во град, нарицаемый Верхотурье. Правовернии же людие чудотворней иконе велию честь и коленопреклоние и целование воздаша, слышаще от нея неизреченную милость. Овии Пречистей Богородицы пеша молебна, овии же чюдотворней иконе Ея приклади приложиша, и вси туне милость получиша. Пришедшу же сему мужу со Пречистою иконою в дом етера мужа именем Ондрей, рекомый Перхуров, и испроси у него, да воздаст елико на здание и на украшение церкви оноя. Он же слышав, яко со пречистою иконою приидоша в дом его, и не изыде во сретение сея чюдотворныя иконы и поклонения и целования не дасть, но вражиим научением неистовые глаголы от сердца своего испусти. Многия, рече, собиратели на церкви собирают, и беду, а не собратели нарицаше, и посла мужу оному четыре денги, сам же не изыде, отверже от себе сицевая, яко честь образа к первообразному существу восходит. И сего ради абие и отомщение приим, Пресвятая же Богородица прославися о чюдеси Своем. Преже реченный же муж с пречистою иконою отоиде от дому сего в монастырь тоя же верхотурския области, рекомый Нейвинская пустыня: преславных бо чудес ея ради повсюду желание ходити с тем пресвятым и чюдоцелебным образом, понеже мнози слышаша таковая превеликая чюдеса, тщахуся видения сподобитися чудотворней сей иконе и милость восприяти желаху. Егда же отоиде муж он от дому Андреева, и абие в той час впаде в недуг зело лют, огнем жегом бысть и всем телом разслабе и язык его отъяся и пены точа с кровию. И воспомяну грех свой, еже согреших пред Святою Богородицею, и вскоре посла по прежереченного мужа, оного Антония, да бы возвратился з Богородичною иконою в дом его. И егда же приспе неистощимая она радость и незамедленная скорая помощница в дом Андреев, жена ж и дети его со многими слезами ведоша его на стретение чюдотворного оного образа. Он же воспомянув грех свой и воздохнув со слезами пред чюдотворным образом Пресвятыя Богородицы, и призва в дом свой священники и клиросники и нача молебная пения и воду святити, и по совершении молебного пения и по освящении воды, приведоша его к чюдотворному образу Пресвятыя Богородицы. Он же едва поклонение сотворив: помогоша ему людие и приложиша его ко святей иконе и пеленою отре очи и главу и устне его и водою священною покропивше. И абие незамедленная Она скорая помощница вскоре милость свою дарова, и изцеление получи Андрей. И упокоив прежереченного мужа оного Антония в дому своем, и от имения своего Пресвятей Богородицы и святителю Николе и Марии Египетской на соружение пресвятого их храма подаст десять златник, сребряных же числом три рубли московскую, да хлеба полчетверти ржи, и проводи из дому своего пресвятую икону честне с поклонянием и со многими слезами, хвалу и славу воздая Пресвятей Богородицы и угодником Ея.

Якоже весне приспевшей, источницы исполняются текущих вод, наипаче день от дне прибывающа вода; и яко шипок мало процветший процветает днесь, тако заутра же благообразнейш и краснейш и дебелоцветен является, такоже и чюдеса Пресвятыя Богородица простирающеся присно. Всегда бо призываема предваряет на помощь нашу, якоже исповем дела Божественная: преславно бо слышание во ушию вашею водрузитися имать мысленне. Воистину велие чюдо Божия Матери паки содеяся в лето ҂ȝρ҃мs году месяца июля в ȝ҃ι день. Приведоша к сей чюдотворней иконе некую девицу именем Евдокею Полуяновых, четыренадесять лет не виде очима своими солнечного облистания и всего благообразнейшаго и благолепного небесного красования, но яко во тме пребывающу, не разуме дни и нощи, но едино име день и нощь, и от каменного претыкания нозе ея отерпоша. Егда же введоша ея во церковь Пресвятыя Богородица, она же со слезами милости просяще у Пречистыя Богородицы, стенание и воздыхание от сердца испущающе; пев же молебен, отведоша ея в дом свой. Егда же прииде в дом свой, и абие нача видети солнечное облистание, она же наипаче молящеся день и нощь: исхождаше бо молитва ко Пречистей Богородицы изо уст ея день и нощь. Приложи же ко образу Пречистыя Богородицы в приклад чепь сребряну и крест сребрен, еже сама ношаше о выи своей. И помысли попоститися и милости просити у Пречистей Богородицы, и постися. Приведоша же ю паки южики ея и ближняя ея ко пречистому чюдотворному образу Пречистыя Богородицы. Она же увиде чюдотворную икону и венец на главе Ея, и всех людей во церкви узре, и нача видети очима своими, славя Бога и Пречистую Богородицу. И пев молебна отьиде в дом свой радуяся.

В лето ҂ȝρ҃мs году февраля в г҃ день прииде на Абалак некий человек имянем Иван Матфеев сын кузнец з женою своею и поведа приключшееся быти ему. Спящу ми, рече, на ложи своем и видех во сне, яко некий человек прииде ко мне и удари мене во главу и рече ми: почто обещания своего не исполниши, еже обещася итти на Абалак пети молебна Пресвятей Богородицы и Николе чюдотворцу и Марии Египетцкой? Воставшу же ми, глава моя боляше. Но аз се видение ни во что вмених, но в сонное видение премених. Прежде же сего видения обещавшумися итти на Абалак Пречистей Богородицы и Николе чюдотворцу и Марии Египетцкой пети молебна и неидох, поне не тверду веру имуще и закоснех за орудием своим, яко всегда непраздна себе помышлях. В четвертый же день по видении сем, видех во сне паки, – прииде ко мне той же человек и рече ми: окаянне! нечто обещания своего не исполниши? узриши в будущих ти и да разумеши тогда, яко преступившу ти обещание свое. Воставшу же ми от ложа своего, и умы лице свое и помолися Богу, и по молитве вдох в кузницу свою паки на свое орудие. Се же видение паки видение (?) ни во что вмених, и взем железо, разже и ударих млатом, и абие оторжеся ото женнаго железа часть и лете и удари мене во главу. Аз же падох яко мертв и бых без памяти. Предстоящая же ту же приключшаяся пояша мя и внесоша в дом мой, аз же тако лежах без памяти до утрия. И абие яко от сна возбудихся, очи же мои бе ослепленнии, и яко не могущу ми ни возвести очию ни векома. Аз же воспомяну грех свой, яко согрешившу ми, обещание свое преступих и видения ни во что же вмених. И помолихся Святей Богородицы и отпущения своему согрешению испросих. И паки обещахся исполнити обет свой. В четвертый же день милость получих от Пречистыя Богородицы, и бысть оною болезнию здрав, яко николи же поболе. Пе же молебна человек сей Иван Пречистой Богородицы и Николе чюдотворцу и Марии Египетцкой, возвратися в дом свой, радуяся и славя Бога и Пречистую Его Богоматерь и угодника их великаго святителя и чудотворца Николу.

Ино чюдо поведа нам некто от простых поселян града Тобольска именем Григорей Семенов. Прииде на Абалак ко Пресвятей Богородицы по обещанию своему помолитися, и по совершении молебного пения сам о себе поведа. Был де яз в немощи полугодищное время, огнем жегом бысть и утроба моя окаменела, ничтоже во уста моя вниде ястия или пития, и свои ближнии мои обращаху мя, а сам от таковыя зелныя болезни не возмогох обратитися никамо. И егда же обещахся итти па Абалак ко Пресвятей Богородице помолитися, и в той час и здравие получи.

В тоже время того же града Тобольска из веси, глаголемая Кугаев погост, приде человек имянем Иван, прозванием же Смирной, и поведа: был де сын мой болен, очми не видя; из очей у него кровь истекала безпрестанно. И егда обещалися Пресвятыя Богородицы на Абалаке молебен пети, и в той час и изцеление получи и очи у него, якоже и прежде зарание, стажа. И пев молебная, и отъиде в дом свой, славя Бога, Пречистую Его Матерь и угодников их великаго святителя Николу и преподобную Марию Египетскую.

Многа же и неизреченная чюдеса от образа Пресвятыя Богородицы и изцеления многа бывах не токмо во граде Тобольске и во окрестных весех, но и во всех сибирских градех. Елико же слышаху, инии же сами видевше и друг другу поведаху. Некоторый человек града Тюмени именем Стефан Гаврилов сын поведа о себе: был де яз болен очми, не видел годищное время, ближнии мои провождаху. И обещахся итти на Абалак ко Пречистой Богородице и к Ея угодником помолитися, и абие милость Свою излия на мне Пресвятая Богородица, подала здравие, очми свет видети даровала, якоже и первие. И пев молебная, и возвратися в дом свой.

Якоже от неизчерпаема кладязя вода, такоже и от образа Богоматери бываху. Приде некий человек, имянем Фома Никифоров от веси глаголемая Киргинская слобода, вверх реки Невьи, близ града Верхотурья и поведа о себе: был де он от трясавицы одержим недель з двенатцать и отчаявся живота своего. И егда же обратихся и призвах на помощь Пресвятую Богородицу. Она же милость Свою вскоре дарова, и изцеление получих и доныне здрав. И пев молебная Пресвятей Богородицы и угодником Ея, и возвратихся в дом свой радуяся.

Приде на Абалак ко Пречистей Бородице помолитися чюдотворному Ея образу и угодником Ея человек некий града Тобольска, имянем Лука Афонасьев сын, прозванием же Кызылов, и поведа о себе: был-де яз болен полугодищное время нутряною болезнию и сердцем, и обещахся итти на Абалак помолитися Пресвятей Богородицы и в той час здравие очютих утробою и сердцем, якоже и преже. И пев молебная пения, и возвратихся в дом свой, славя Бога и Пречистую Богородицу и Ея угодников.

И иное чюдо, приехав на Абалак, поведа некто поселянин того же града Тобольска из веси глаголема Шондина, имянем Василей Иванов, прозванием же Шондин, сказа: сын-де мой болен был, томим от беса, рекомым черным недугом одержим, да сестра-де моя девица Соломония четырехнадесяти лет очми не видела четыре года, и яз-де обет положил, что на Абалак ехав Пречистой Богородице помолитися. И по моему обещанию, сыну моему и сестре моей от тех недуг исцеление Богородица даровала. И пев молебная пения и приложася к чюдотворным образом ко Пречистей Богородицы и ко святителю Николе и преподобной Марий Египетской и пеленами отре, и приклад, по силе своей елико возможно, приложиша. И поехав в дом свой, и конечное многое здравие стяжа и получи.

Оттогда же и доныне неизреченная и безчисленная чюдеса содеваются от чюдотворного образа Пресвятыя Богородица и от Ея угодников. Человек некий града Тюмени имянем Денис Стефанов прииде на Абалак з сыном своим Фаддеем и поведа нам о себе: был-де яз глух ушима, не слышал звону и человеческая речения, а сын-де мой Фаддей лежал болен, от трясавицы мучим, недель оба по десяти и больше. И обещалися ехати на Абалак помолитися Пресвятей Богородицы, и в той час изцеление прияли оба и доныне. И певше молебная пения, и отъидоша в дом свой радуяся.

Еще же поведаю вам еже содеяшася от образа Пресвятыя Богородица чюдо. Ин некто града Тюмени поселянин имянем Иустин, прозванием же Ошкоков, по обещанию своему молебна пети и сказал: был де сын болен, черным недугом одержим, томим от неприязни лукаваго диявола. И слышах неизреченная чюдеса от Пресвятей Богородицы, еже содеваются на Абалаке и изцеления многа бывают. Аз же обещахся ехати и помолитися тому чюдотворному святому Ея образу, и в той час и здравие сын мой получи. И пев молебная пения, и отъиде в дом свой радуяся, славя Бога и Пречистую Богородицу и великого святителя и чюдотворца Николу и преподобную Марию Египетскую.

Сообщил свящ. А. Юрьевский