Краткое описание Воскресенского монастыря, до 1685 года, в надписи, изсеченной на каменных досках и помещенной на паперти соборной церкви

Надпись, высеченная на камнях, находящаяся на правой стороне паперти в стене соборной церкви, в Воскресенском монастыре

Таблица сия сложная яве положися,

В ней же суть о обители сей описася,

Како, когда и ким строити начата бысть,

И о церкви сей велицей описано есть.

Читателю честный вонми о сем внятно.

О сем бо зде истинно описано явно:

* * *

В Царство державы Благочестивейшаго

Великаго Государя Царя тишайшаго,

О Христе Бозе верна и благочестива,

Страшна врагом противным, христолюбива,

Самодержца Алексия Михаиловича,

Еже от прадед своих и Царства Наследича,

Княжств, Царств и многих земель Обладателя,

Московскаго Великаго Князя, Правителя

Росии всей Великия, Малыя и Белыя,

Право храня все люди благочестивыя,

Егда правившу иконно и церкви святыя

Российскаго Государства люди честныя,

Святыя православныя нашея веры,

Оборонителю на противныя нашея веры.

Еже во пастырех высочайшему,

Честнейшему Архиерею и Святейшему

Никону Архиепископу Москвы града

И всея Росии Патриарху си стада.

Сей во благочестии церковном правлении,

Твердо подвизася во всяком хранении,

Ко благочестивой вере всех наставляя,

Аки отец слово истины справляя,

Апостольски преданием и Святых отец,

Юныя и старыя уча аки отец,

Горняго ища, долняя вся презирая,

Щит веры име, кий на бесов простирая,

О благочестии святыни бысть ревнитель

И Веры Христианския Присный Хранитель;

Советом Царя благочестива и Собора

Монастыри три построи, – монахов збора;

Есть же и доднесь яко светила сияют,

Дивная бо в них чудеса присно бывают;

Господу Богу тако изволившу быти,

Любезне щедроты своя на всех излити,

В лето от Адама 7161-е

От Рождества Христова 1652-е

Обитель первая Иверская прекрасна,

Яже имат сокровища в себе преславна:

Матере Божия образ свят чудотворный,

Весь украшен златом, перлом яко цветом зорный;

Общежительство в сих обителех имуще,

Еже есть ко спасению путем текуще;

На море окиане вторая обитель,

Дивный бо там крест устроен чудотворитель,

А иже в нем положено и святых мощей,

Есть бо не мнее двою сот дражайших вещей:

Святаго Животворящаго древа часть,

Но и ризы Спасителя Нашего Христа часть,

Той же монастырь нарече Ставрос по Грецку,

Иже бо именуется Крест по словенску,

Ибо видим есть всем плавающим на море,

Яко пресветла луна стоит на острове,

Радостно приходящи той крест целуют,

Кресту твоему поклоняемся владыко глаголют.

Ясно бо о обители сей описую,

О велицей же церкви зде ознаменую,

Господа Иисуса Христа Воскресении,

Глаголю же о начатии и о свершении:

165 году, Святейшей Патриарх Никон здати нача

Древяную первее церковь ту исконча,

Еще правившу Ему престол Патриарший,

Апостольския Святыя Церкви бе старший,

Шествие творя в сей монастырь Воскресенский,

Бе бо с ним и собор Священный Архиерейский

На освящение храма древянаго,

Еже есть Воскресения си тридневнаго,

Освящению бывшу месяца Июня,

Оного же седмонадесятого си дня,

И бе ту Царь Благоверный на освящении,

Боляра и весь сигклит Царский в приобщении,

Абие, по освящении храма того,

Иде Царь с Святейшим круг монастыря сего,

Радуяся славя Христа Бога о сем,

Таково дело наченшем здати в месте сем,

Христа Бога в помощь Святейший призывая,

Еже вящше здание начати желая,

И дошедшима има горы Елеона,

Лавры сея к Востоку бе прямо Сиона,

Места сего на широту пространства зряше

Сюду и сюду, и возлюби тое вящше,

Абие Царь благочестивый сице рече,

Имя монастырю сему тако нарече:

Новый Иерусалим Воскресенский,

Яко же и древний Иерусалим Палестинский,

Да будет звание сей обители вечно,

Имя бо сие святаго града бе честно,

Руки своея писанием изобрази,

Царь Благочестивый мнение всем яви,

Иже глаголют яко Никон сам прорече,

Еже новый Иерусалим, тако бо Царь нарече;

То писание Патриарх в ковчежец вложи,

Ради вечнаго благословения положи,

Нынешняго настоящаго лета,

от Мироздания 7165-го,

От Христова Воплощения 1650-го года седьмаго,

Месяца Октоврия числа надесять осьмаго,

Крест идеже престолу быть водрузи,

И яко на камени основания положи,

I свидетельствует о сем той водруженный

Оный крест на горе Елеоне каменный.

Крест той письменный подписан в показание,

Во знамение всем чтущим в познание;

Аще кто хощет истинно о сем уведать

Сам да идет на Елеон гору Святу да видит.

Начата же бысть сия церковь велика монастырская,

Такова яко же бе и Палестинская,

Онаго лета еще бывшу Патриархом на престоле,

Росийска царства на Архиерейском столе,

Року того м-ца Июля в 10 день отъиде,

От царствующаго града семо прииде;

Ибо зданию сему тщательно прилежа

И жив зде, от осмь лет, мес. 3, Богови служа

Сим бо летом пришедшим отсюду преселен,

Тако изволившу Богу далече свезен,

И в Белоезеров монастырь Ферапонтов,

Нa вящий бо труд и терпение в Кирилов,

Абие пять лет тамо пребывавшу,

A зданию во обители сей преставшу.

При Святейшем Никоне-Патриархе

Зделано Великия церкви в высоту 15 сажень.

Паки в лето бысть 187-е – (1679)

Человеколюбец Бог призре на святое:

Ибо во царство бе Царя си благосерда,

Еже и ко обители сей милосерда,

Самодержца Ѳеодора Благочестива,

Тишайшаго Государя Христолюбива,

Абие церковь сию подвизати нача,

И в царствие свое тоя не доконча.

Любовию сердца о святейшем возжале,

Из Кирилова бо его взяти повеле,

Смерть бо того в Ярославле сконча напути,

К Богу отъиде обители не допусти;

Ибо о сем Царь благочестивый возжале,

Того в Лавру Воскресенску вести повеле,

ИОже сам Никон Патриарх сию заложи,

Оного бо тело Царь ту во гроб положи

В церкви Святаго Предтечи Иоанна,

Под Голгофою что с камени сдолблена,

Идеже разседеся в страсть ту гора Креста Свята Христова

Скважнею тою кровь Христова течет на главу Адамову;

Там гроб Мелхиседека Архиерея Иерусалимскаго,

Зде же гроб Никона Патриарха Московскаго,

О сем бо заповеда нам сам, егда жив бе,

По умертвии тело свое положити зде,

Есть же и писание руки его о сем

Во обители сей доднесь видимо всем.

Се бо вскоре и Царь Ѳеодор к Богу отыде,

Самодержавнейший сего света сниде.

Лавры же сея неостави Бог в презрении,

Еже мнози мнеша быти в совершении,

О еже верою çвoeю к Господу Богу,

Милость же творя ко обители сей премногу

Благородная Государыня Цесаревна,

Татиана Михаиловна Великая Княжна,

Ревнуя по Господе Бозе всеусердно,

Тщательно желая створити благосердно,

Недокончаемое дело навершити,

Сию великую Церковь совершити,

Обитель сию в толикую славу облече,

Бодрым бо своим тщанием к любви притече

Великих Государей Царей и Великих Князей

Иоанна Алексеевича и Петра Алексеевича

Великия и Малыя и Белыя

России Самодержцев всея;

Они же яко истинные послушатели,

Великие бо Монарси и Правители

Милостивым призрением своим призреша,

Церковь бо сию свершити благоволиша;

Но в Царство Их Великих Государей свершися

Сия великая церковь и украсися

Казною их великих Государей здаша,

Пребогатых бо даянием во вся быша,

Ко освящению Церкви сея сподобляя,

Вся же потребныя вещи устрояя.

Государыня благородная Царевна

И Великая Княжня Татиана Михайловна

Из своих сокровищ лучшая своя ту вда,

Церкви бо и олтареви вся Богу преда

Жизни бо вечныя на небеси желая,

Устрои дом Божий надежду полагая,

Нa небесная бо и вечная взирая,

Славу мира и земная вся презирая,

Уготова к освящению прекрасну,

Тщательне устроиша в России преславно,

Юже Всесвятейший Иоаким Патриарх

Российский освяти ю яко Иерарх,

Ту бе на освящении Царское Величество,

Освященный Собор, Сигклит и народ множество,

Архиереи: Варсонофий Митроп. Сарский и Подонский,

И Гавриил Архиепископ Новгородский,

Аѳанасий Архиепископ Колмогорский,

И Архимандрит Никифор Воскресенский.

Богу изволившу совершитися сему,

Такову зданию мнози дивятся всему;

Людие вернии приходяще отвсюду,

Еже бо слава изыде о сем повсюду:

Иностраннии издалече шествие творят,

Любезне со удивлением здания зрят.

Церковь же сия освятися в пролетие,

Бе тогда 7193-тие мца Генуария осмонадесятое,

Убо сим настоящим летом совершена

еже сложенную сию таблицу скончена.

В конце в одну строку есть особая приписка; но нельзя разобрать потому, что камни обломаны по краям. Вся надпись высечена вглубь на белых изжелта каменных плитах; она шириною 9½, вышиною 20 четвертей.

Надпись сия примечательна тем, что в ней заключается целая история Воскресенского монастыря, до разрушения соборного шатра и до возобновления его по повелению Императрицы Елисаветы Петровны. Она сочинена Архимандритом Никанором, бывшим настоятелем от 1686 до 1698 года.