Даниил Матвеев

Пречестнейший и премилостивейший господине отче имярекь.

Якоже убо сам пречестен еси и пресовершен во всем пред нами, прелюбезен же и всежелателен и всему братству, тако и настоящий день сий твоего тезоименитства люботоржествен, любопразднствен, радости и веселия всем нам преподателен. Отнюду же, якоже вкупе при твоемь отечестве, благодаряще Бога о всех благих, праздновахом и великаго во страдалцах Андреа Стратилата[1851] песньми и хвалами почтохом и о твоем душевном спасении и о телесном здравии за прешедшая благополучне благодарихом, за настоящая и будущая (дабы всемилостивый Господь в мире и благополучии всяцем паче и паче быти предустроил) всеусердно молихом, тако вседушно вси всепокорным усердием и вселюбовным учтивствомь с поклонением приступаем твое настоятельство поздравити и, елико подаст Бог, уветословием²³²⁰ почтити.

Но понеже о себе смыслити дивное что немощни и изрещи груби, сего ради до твоих предивных, имиже изобильствуеши, приходим и, яко от источника почерпше, словозаимствуем любезная. Что же нам любезное, разве слышати и глаголати пресладкое твое имя имярек, еже знаменает росийским диалектомь – мужественный. Темже что есть мужество и колико честно и велико и яко твоему превосходительству свойственно веема, кратким нашим словом припоказующе, на почесть тебе сообщаем.

Мужество есть сила некая умная, подвизающая человека на всякое благое и полезное дело: храбрость ума, души и сердца и прочих всех внутренних и внешних сил посреде наглости и страха ко всякому благому начинанию, известное безбоязньства к стропотству бесовскому знаменование, мужественных человек к мужеумному намерению мужественное устремление, добродетель честная, полезная, Богу любезная, угодная и от всех разумных удивительная. Мужество между мудростию, целомудрием и правдою первеньствует и пресветло сияет. Якоже солнце – украшение звездам, тако мужество – красота всем добродетелем. Омрачение бывает дневи²³²¹ нощь, но мужество и нощи злоб темных просвещение есть паче полудне. Наглости и рвению и самой продерзости остен противубодый²³²² есть мужество, ^2З23южичество богоподражательной небесных жителей ревности²³²³, предшествующий и совокупляющийся всем добродетелем спутешественник, имже последует безстрастна неотлучно совершение, самем Богомь насажденное в человеческое естество благо, несравнительне превосходящее прочая престолонаместничество совершенства.

Тая предивная, тая преславная, тая всеполезная и превеликая добродетель – мужество, мужество, глаголю, боголюбезное. Во инех убо гостит, в тебе же, превысочайший верше, дом свойственный и любезный имеет присно. Во инех прозябает – в тебе плод тучен сотворяет, во инех цветет – в тебе овощ зрел и вкус сладок вси сообращающиися с тобою обретают и наслаждаются. И свидетельствуют твоя мужественная начертания и характири, храбрых и мужественных словес и деяний, тако о вере православной ревность и о церковных благочестивых преданиих жалость: и словом разсудным, и деломь непритворным, и писанием, премудрости исполненым, яко не точию заборонити себе и единомысленныя своя возмогоста и возвеселиста, но и противныя и враждующыя и ищущыя нашу погибель посрамиста, опечалиста и брови их стиснуста.

Тако о добродетельном и богоугодном жительстве тщание, яко презрением мира, отхождением в пустыню, страданием постнических подвигов, наветов и козней противных терпением доблественным, лщений²³²⁴ и лукавств проныривых отвращением храбрым и постоянным, во всяких искушениих устремлением и себе, и братство все, и окрестныя, и безчисленныя толико пользова, так поможе, яко безплотныя некоторыя, в славословии Божии и в трудех пустынных присно пребывати настави и преспевати на лучшая научи.[1852] Оставляю пустыни сея жителей обхождений честных и целомудренных пребываний и благоструйных соседствований, иже вси твоим уставлением предприяша и украшаются. Преминую наук свободных тщателей неких желание, иже твоим премудрых изданий подражанием, день от дне преспевающе, возрастают. Волею²³²⁵ прехожду, паче же самем яснее трубы вещати оставляю: обители и храмов молитвенных дивное сооружение и прочая киновии домостроения и службоуставления, иже вся сия твоим премудрым предусмотрением тако начерташася и вообразишася, яко и благочинно руководствуются и прекрасно светлеются. А еже всегдашная попечения, присныя труды, повсечасныя поты тако о братском благоустроении, яко окрестных благоутишии и всем о всех полезных, како можем молчати, како восхощем не исчисляти, но убо и сочислити в кратком сем слове неудобно есть.

Сего ради обще изъявляем: вся общая тягота на тебе лежит, все общее бремя на твоей выи висит, все, аще что полезное всему пустынному жительству, в твоей главе согнетает²³²⁶и ключимая²³²⁷ всем твоима очима созерцаются и твоими усты разчиняются и определение приемлют.

Темже благополучне имене твоего знаменование, еже есть мужество, на почесть тебе преизящне описати потщахомся, понеже и житие твое по имени твоему обретохом, его же поминание, яко плод трудов твоих, тебе, любезнейший, от нас же, яко дар честнейший, приносим, твоему отечеству и просим приятися благодарно, аще и грубо счинено и непорядно²³²⁸, обаче от всея души и всеусердно. К сему же молим словоприношения нашего приятием и утешитися отцелюбне, и возутешити по обычной ти благости и яко присная своя чадолюбне. Ибо якоже рыбам питательна есть вода, тако нам желательна суть твоя словеса. И якоже птенцы к пищи зияют, так и мы ко устом твоим и к явлению лица взираем. Да якоже в сий твоего тезоименитства, паче же общия всех нас радости день, обще сторжествовахом, обще спраздновахом, тако обще словоутешившеся, славу воздадим Собравшему ны на сию общую радость и Сподоблыпему в мире и тишине торжествовати и ликовствовати.

Прочее вси мы, церковницы и богомолцы, припадите, любезно поздравляем тя: здравствуй, наш государь, премилостивый отец имярек, на новое и впредь на неисчетная лета буди и буди. Аминь.

1726.

Благоревностный церковный сподвижниче, господине пречестный и друже изряднейший, прелюбезнейший Н<икифор> С<еменови>чь.

Хотел убо бых твоему честнейшему велеумию каковыя бы гостинечни²³²⁹ послати, но неимениемь отвсюду обдержимь есмь. Помыслил бых словосчиненную формицу тебе, словолюбителю, прислати,[1853] но грубословия мракомь одеваюся. Темже вместо подарка краткое сие писемко, но печалным случаем удовольствованное, шлю тебе, моему другу.

Яко воевода церковный, воюющия Церкве предстатель смиренныя ны, отшед, остави. Камень, адаманта²³³⁰ крепчайший, на неведомую страну отиде. Столп прекрепкий православия смертнымь падежемь падеся. Тяготоносительный христианскаго сонма атлант, Сампсона воистинну силнейши,[1854] вечным сном успе. Другий Моисей[1855] законоположений и обрядов всепустынных и церковных смертною косою ложатся. Давыд новый, поражающий пращею слова тмочисленыя Голиафы,[1856] инославныя полчища, многоскорбною болезнию объяся, умре. Вселюбезный и пресладчайший всепремудрый и всеразсудительный отец и государь наш всемилосердый А<ндрей> Д<ионисиевич> скончався, ко Господу отиде. О, слез! О, сиротства последняго! О, безчастия неначаяннаго, яже обшед, духи наши сокруши и сердца наша, сломив, утруди!

Сия тебе, любезный, в малое токмо от Мене извещение и знаменования ради братския любве шлю, да знаеши, яко и аз, последний, теми же облаки печалей покрываем есмь. Теми же горкими слез тучами помазую свои очи. Теми же каплями жалостей обливается и мое сердце. Ты же, сладчайший, сия услышав, не над меру сокрушай си душю, но оное Иова песнопение умиленно и себе, и нам припевай: «Господь даде, Господь и взя; якоже Господеви годе, тако и бысть, буди имя Господне благословено во веки».[1857]

Пишай непотреб<ный>иконник Д<аниил> краткописменно любовь твою целуя и прочия при тебе чествующ<е>нижайшим поклонением.

Марта дня 8

1730-го.

Преставися всечестнейший и всеусердный отец, всецерковный, всепустынный екклисиарх, Божий поистинне человек, любезнейший Петр Прокопиевич в лето от мироздания седмь тысящь двести двадесять седмое, от по плоти же Рожества Божия Слова 1719, индикта[1858] втораго на десять, априля к пятому числу, в суботу Светлыя недели, вечер, в начале втораго часа нощи, нощнаго жития избыв, к вечному и непомерцающему упокоению всежелателно прейде. Мир оставль, летом сущь девяти на десятим, в пустыни скончав двадесять и седмь. Тако всех лет прежив четыридесять и шесть.

Его же блаженную кончину вси братия и постници видевше, судиша плачющими сердци согласну преподобней жизни его: имже бо образом начало доброе сотворь, тако преподобно и богоугодно и соверши, всей Церкви и пустыни благ образ положив, незабытныя памяти воистинну достойный.

Бяше убо возраста средняго, главу имеющь умерену, власы русы и мягцы и мало корчавы. Плотию смугл, лицем благоговейн, очима чист, чело взлысо²³³¹, ²³³²нос прав и мало нагорб²³³², устне червлене, брадою скудою и редковласою, руце долзе, персты умерены и равностию удобрени.

Ведением книжным и живою памятию толико преобогащен, яко вся свидетелства и припоказы вещей и образы бывших действ и вся древности безтрудно на языце носящий и желающим к ползе душевней преподавающий и со услажьдением подобающим слышим бывая. Кий убо патерик или повести отеческия потаишася от него? Поистинне убо бе муж духовен и во чтении книжном повыну²³³³ упражняющься, воображая каталоги, преписуя обиходники, и вся уставы и обряды чиновныя древнейших отец в книги сгромаждая, и жития святых списуя, и по последованию чина в книги полагая;[1859] жив образ и поистинне одушевлен всей Церкви бывая.

Нравом же бяше честен и от многаго воздержания временем остр словесы, якоже другий Паламон, являшеся.[1860] Незлобив же обаче и тал²³³⁴, емлющь веру всякому словеси и жизнию безхитростною и простою приснодышущь. Нищеодежен же и безименен, яко и Антоний и отец Памва.[1861] Памятию Суда и последняго часа воспоминании со излитием горких слез Ефрем другий показовашеся[1862] и Арсений молитвенными поприщи к Богу в велице рети²³³⁵ возвышающься и умне тому собеседующь, якоже Моисей, за люди Божия ходатайствуя.[1863] Воздыхания сердечная и частая умиления его кто исповесть? Молитва убо Исусова, подобне дыму кадилну, от уст его куряшеся, по реченному: «Да исправится молитва моя, яко кадило пред тобою».[1864]

Часто обыкл бяше глаголати во мнозе услаждении: «Исусе пресладкий, души моей утешение». И паки: «Весь еси желание и весь сладость, Сыне Божий, Девыя Сыне». И паки: «Миро благовонно имя твое, любезный Исусе».

И тако преподобно и святоподвижно Божий сей раб настоящее житие претек, к концу блаженнаго пристанища дойде, весь к желаемому преложься, о Господе успе. Того молитвами и мы, неключимии, просим Господа в настоящих безпакостно и мирно преити и будущих благ достигнути. Аминь.

Преставися смиренный и многопремудрейший отец, киновиарх и а<р>хиктитор всепустыный, всепрелюбезнейший наш о Господе Андрей Дионисиевичь в лето от сотворения мира седмотысящнаго и двусотаго и тридесят осмаго, а от по плоти Рожества Бога Слова 1730-го, индиктиона[1865] осмаго, месяца марта в первый, на память святыя преподобномученицы Евдокии,[1866] в неделю третию святаго и Великаго поста, в начале третияго часа дне.[1867]

«Подвигомь добрым подвизася, течение скончав и веру соблюд»[1868] невредиму. От мира изшед лет 17, в пустынном претерпении препроводив лет тридесять и седмь, яко всех леть жития его быти пятидесятим пятим. О его же преставлении вся Церковь и пустыня на многи дни плакасте велиим плачем горко и Рахили подобно.[1869]

Бяше убо возрастом телесным доволен, плотню сухоняв²³³⁶. Власы главы имущь кудрявы и лепы²³³⁷ и по всему подобны Феодору великомученику и Стратилату,[1870] малонадседы²³³⁸ же и белы²³³⁹. И брадныя власы такожде светлы с белию²³⁴⁰ и надседы. Браду имущь по всему Златоусту подобну, округлу и частейшими струями сияющу.[1871] Очи имеющь светле, брови чисте и вознесене²³⁴¹, продолгующь нос и направь, мало нагорб, ноздре умеренне, руце долзе, персты в длинности тонкостию цветущии. Мало наклонен²³⁴², словесы и духомь присно себе нижащь, Господеви работают.

К сим живость памяти, остроту ума, силу разсуждения имеющь многу. Могущь на мно<го>трудныя задании или подлоги отвещавати безтрудно и решения подавати светла и ползодатна. В про<по>ведех же и в казательстве²³⁴³ к братии готовословесен являшеся и радостным лицем ко всем благоговея. Очи опрятане²³⁴⁴ и образ умилен повыну показоваше. Беседа же его и от природы благоуветлива²³⁴⁵ и разумна и от иже дарования свыше зело преяснейша и благодати и премудрости исполнена, яко вси слышащий и видящии, удивляющеся, глаголаху: «Откуду сему сия суть?»

Но и в прочих тих поистине муж и многосмыслящь и в случающихся поведениих умерен и постоянен и нескоропрелагающся, ревностен же обаче и тепл по потребе и любоистинен видяшеся. И просто рещи, огнем вседобрейшаго продерзания²³⁴⁶ всегда дышущь, яко вси зрящии того могли и миловати, и боятися. Нравомь преукрашен, целомудрием неусыпно зрящь, душевную и телесную чистоту сохраняющь, видении и деянии лепотствуя.

Ведением многопремудр, весь не точию Ветхий и Новый Завет на языце носящь и яже по нас богословская отец тайноучительства и догматы опасно²³⁴⁷ соблюдающ, но и внешних мудрец и софист²³⁴⁸ многохитростных онех наказаний ведетель не токмо многоведущий, но и весма непостыдный. И являют того самая богомудрая ответословия и разглагольствия, церковнаго ради исполнения бывшая, коликими и каковыми светлос<т>ми премудростныма и разумом благодатным сия<ю>щая суть и, яко лва от пазноктей²³⁴⁹ или орла от высоколетания²³⁵⁰, тако сего от живущия в нем благодати мужа преясно доказующая и являющая.

Того ходатайством и молитвами да соблюдет Церковь свою Божий единородный Сын, враты адовыми никогдаже одолену[1872] и всякаго диавольскаго и гонителнаго искушения и волнования вышшую. Аминь.

Преставися преподобнейший общий наш отец и всепустынный первейший архиктитор Даниил Викуловичь лета от создания мира осмыя тысящи двусотаго и четыридесять втораго, а от по плоти Рожества Сына Божия 1733-го, индикта 12, октовриа месяца дня 12, на память святых мученик Прова, Тарха и Андроника и преподобнаго Козмы священноепископа Маиумскаго,[1873] в час 14 нощи,[1874] в последній четверти пред отдачею.

«Течение скончав и веру соблюд»,[1875] сый летом осмидесятим. Плачь всем братиям и постницам неутешимый остави, живш в пустыни лет четыридесят четыри.

Бяше же возрастом тела средний, поглядомь²³⁵¹ смирен, плотию от природы небел²³⁵² точию, но и крепок и могущь. Якоже Антоний,[1876] власы седы и просты²³⁵³ имея, браду скуду, на ланитех нимало влас имеющу, и отнюд Ефрему отцу подобну.[1877] Лице благоокругло, продолгующь нос, ноздрат²³⁵⁴. Плещи высоце, перси пространне имея. Очима черными и ⁵зракама в них немалама²³⁵⁵, ими же случашеся видение весело имети. Уши немале, шию кратку, чело сморщено, слух чист и в самом исходе показующь свою целость.

Подвигомь готоводвижимь, безсонен, бдящь присно и плачющь, час исхода и день Суда разсуждая. Обычаем приветен, всякаго к себе любовию толико влекущь, нежели магнит железо, и никакоже кого когда отревающь²³⁵⁶: ни сира, ни вдову, ни нища, ни злородна²³⁵⁷, но вся милующь, утешающь, согревающь, одевающь, награждающь уды Христовы, нищетою давимыя. И тако благотворя, блаженным сномь успе, носящь с собою евангелское ублажение: «Блажени милостивии, яко тии помиловани будут».[1878]

Того молитвами да даст и нам Господь отпущение грехов обрести и милость в день судный получити. Аминь.

1733.

Преставися любоучимейший и многоучимейший, пречестнейший и всеподвижнейший отец, прелюбезнейший о Христе настоятель Симеон Дионисиевичь в лето от сотворения мира осмыя тысящи двести четыредесять девятаго, индиктиона четвертаго, а от еже по плоти Рожества Сына Божия 1741-го[1879] месяца септеврия в 25, на память преподобнаго отца Сергия чюдотворца Радонежскаго.

Сей еще во отроческом возрасте мира и яже в нем, яко серна от тенета, самоволне избегши, сущ летом четыренадесятим. В пустынном же и постническом неослабном подвизе и отнюдном²³⁵⁸ исповедническом воздержании и правительстве препроводив, сконча. Толь многотщателно и всеусердно, яко всем зрящим и слышащим дивитися и Бога благодарити о себе сотворь и вину всем о себе подаде всенадежну и безсумнительну зело. Чесо ради во отхождении своем на вечьная обителища плачь несказанен и жалость неисписану всем християном и пустыни остави, никогдаже по достоинству оплакати возможную.

Возрастом²³⁵⁹ бяше умерен, власы русы, корчавы же и густовласы имущь, лицем округл, брадою скуд и беловлас. Теломь сухоняв и от многаго воздержания Издш²³⁶⁰ плотию. Руце и персты имеющь долзе, носомь тупоняв, очима светел, зеницами свободь, зраком²³⁶¹ усмехлив. Мало нагорб. Рукама борзо и добре²³⁶² пишущь. Внутреними силами и качествы преудобрен. В разумениих глубок и смыслом ис природы остр и памятную силу имущь многу: и случимая проповеди и поучения во времена праздник и Божиих угодник проповедующь часа на два, овогда же и на три, изо уст сказующь и художественне с благоукрашеньми риторскими, в тропосах и схимах, яко седмоустный Нил, преизливающь являшеся и медвенными источников Израилевых текущими струями преизливающимися наказаньми услаждая слышащия, являшеся.

Многоподвижен же всегда видяшеся и малоспящь и потребу плотную²³⁶³ и в целое нощеденство едва на два часа и не вящьше исполняющь. Целость же умную опасно всегда соблюдающ и страхом Божиим и памятию смертнаго часа усветляющь. Воздержанием же цветущь преизлиха и всегда в час осмаго или девятаго часа трапезу признавающ и книжному чтению по вся дни в церкви и за трапезою со вниманием и умилением внимающь и главою, якоже обыкл бе, с действы умными и зыблющь²³⁶⁴, и согласующь. Многажды же и слезы видно и умно видяшеся ронящь, и всем зрящим дивитися и пользоватися духовно не словесы, но вещьми убеждавающь.

В прямейшей же вере и любви и надежде достигш, самым християнским отшествием к своему Содетелеви прешед, дух свой предаде. В самый час исхода лице свое знаменающь персты на челе крестный образ. Последовне же и конечне руце свои и длани горе возносящь, вкупе же и очима сладостныма к десным взирающь и глаголы неглаголными к Богу вопиющь, и лицем и устнами осклабленными²³⁶⁵ в самый души исход радующься и к своему Владыце и Господеви, от негоже бысть и к нему отходящь с блаженным воистину и верным упованием.

Таков убо и толик бывый в нас треблаженнейший во Христе отец и настоятель всеизряднейший, доброчистотный целомудрия цвет, пустынное воистинну и церковное воспитание и трапеза всем спасающимся, и духовная, и преизобилнейшая. Его же молитвами и мы, грешнии, надеемся не в настоящих токмо обьстояниих безпакостно и безвредно прейти и добродетелным о Христе по силе нравом последствовати, но и будущаго со всеми святыми участия сподобитися, еже даждь Боже, даждь. Аминь.

«Даждь нам помощь от печали».[1880] Словеса сия пророка Давыда, во псалмех 59 и 107 написаная.

Настоящее сие годищное воспоминание превожделеннаго отца и пастыря нашего Д<аниила> есть предваршия²³⁶⁶ печали жалостное возбуждение, есть прешедшия нашея скорби многосетовное напоминание, есть несноснаго и несравнителнаго нашего лишения и тщеты²³⁶⁷ всеплачевное обновление, слышателие возлюбленнии!

Како убо не есть жалость, егда уже седмолетное время не видим и не имеем любезнаго нашего отца, и не отца просто, но и наставника сладчайшаго, всепустыннаго посетителя, вдов и сирот снабдетеля, девствующих прямейша²³⁶⁸ рачителя и всем общаго всяческих нужд, душевных вкупе и телесных, велеумнейшаго исправителя.

Како убо не есть скорбь, егда в каковых-любо печалных ищем искреннейша утешителя – и не обретаем; в каковых-любо болезнех требуем врача – и не находим; взыскуем – и нигдеже когда слышимь есть; в каковых-либо разсуждениих ищем добляго судию – и взыскати, ни обрести возмогаем.

Како убо не есть сетование и сокрушение, самаго сердца касающееся, егда лишихомся толикаго богатства духовнаго, толикия ползы подобающия, таковыя наживы²³⁶⁹ и обрящи²³⁷⁰, и зде, во временных, и к будущим благонадеждно руководствующия.

Како не есть явная наша тщета и убыток в толиком несравнительномь лишении, егда прежде видно зрехом любимаго – и чудихомся, егда видехом всеговейный того зрак – и удивляхомся, видехом старческия того седины – и услаждахомся, видехом того святопостнический и аггелолепный образ – и за утеху себе вси причитахом. Зрехом стопы того святыя и погляди²³⁷¹ милосердии, обычай тихий и поступки приветнии, спасение некрадомое и любовь предивно изобразующии, и прочая того честная и ²³⁷²тому единому прикладная обстояния²³⁷² зрехом – и Господа Бога от души благословствихом. Ныне всех таковых лишихомся, удалихомся и в руках мнящийся прибыток поистине утеряхом, плачевнии. Ах, нашего несчастия, ах, крайняго неблагополучия!

Како убо не есть обновление печали, како не есть крайное умножение неутешнаго сетования и печали и скорби, и не точию перомь, но и словесы и вещми отнюд неизрицаемыя и неописуемыя. Паче же ныне от прибывшаго нам неоплаканнаго урона, неисписанныя тщеты, несравнителнаго убытка, неповестнаго злоключения в толикомь лишении пречестнейшаго и отца, и пастыря недреманна, присновоспоминаемаго С<имеона> Д<ионисиеви>ча.[1881]

Темже что сотворим, любоплачевнии? Сотворим – да возблагонадежствуим, сотворим – да возмужествуим, сотворим – да поне малейшую отраду печалем своим учиним, и краткою ко отцеви беседою соутешимся²³⁷³, и хотя невеждными обще вси к нему, но любезными вопиенми и моленми самех себе поувещаем, и яко к живу тому сущу побеседуем, сице умиленно глаголюще:

«Даждь нам, о, пречестнейший отче и господине, даждь помощь от печали: опечалихомся и прежде бедне печалию в твоем лишении и зелне сокрушихомся, ныне же и конечно осирехом, последнее убожество объя нас лишением и тщетою твоего рачителя и нашего по тебе вожда. Ах, нашего бедственаго случая, ах, неслышанныя и печали, и жалости, преподобнейший настоятелю! Лишихомся вседобрейшаго поистине правления, лишихомся велеумнаго и боговразумляемаго казателства, потеряхом духовное богатство, гладки остахомся душевныя пищи, отщетихомся²³⁷⁴ в Дусе безмезднаго врача. Пресохну учений источник, повсядно лиющийся; умолче язык, закону духа работающий. Затворишася уста, всеблагодатное учителство истакати²³⁷⁵ ведящая; затворишася и очи, безстрастно и всеговейно зрети навыкшии. Недействени ктому²³⁷⁶ руце, к полезным помавати обыкшии; нешествени ктому нозе, в путь Божиих заповедей тещи повыну обучившийся. Безвестно отскочи от нас пастырь добрый, и вси овци разытися умышляют. В толикомь бесприкладном²³⁷⁷ убытце вси отчаяние пострадати готовы. Вси к падежу недоуменному предуготовлени. Вси из малодушия сокрушени. Вси от многообразных обстояний злейших душевредный себе быти урон возчаявают. Вси многоужасными мира сего волнами, нестерпимыми гонении, неизрицаемыми теснотами неначаянно себе бедствие и розгон, увы, жалостный разсуждают и неминутыя²³⁷⁸ беды, облоги²³⁷⁹ и клеветы плачевно, плачевнии, горко ожидают.

Даждь помощь, добролюбезный отче, даждь избаву и поне малу утеху, многомилостивый совещателю. Видят убо скудость руководителную – и рыдают; видят лишение крайнее – и исчезают, беднии; видять и вселютейшая диаволская обстояния, и рать многокозненую – и ужасаются; зрят свою безсилную мощь – и уязвляются душею; помышляють и сумнителныя шатания – и во уныние приходять; ощущають и нововпадающыя каковыя случаи – и от безименства²³⁸⁰ разсуждающаго низлагаются омышлением²³⁸¹. К сим же и самомнением и самоволством томими и страстми вражиими и духовы лукавствия ратуеми, аки стрелами, смертноуязвляеми и отвне и отвнутрь тмообразно присно повлачими и искушаеми, многажды и неводная страждут, печалнии; и, ниоткуду помощи чающе, скланяются пастися; и прежде побеждения плещи дати врагом хотят, злочастнии²³⁸²; и толикими и толь несносными раними ранами, неповестными утесняющеся бедами, не ведять, что сотворити, ничтожнии и неключимии.

Даждь помощь от печали, всеблагодатный управителю, присети, Дóндеже не разыдутся вси; призри, Дóндеже в неизлезный²³⁸³ ров бедствий не вринутся; утеши, донележе и еще от Тебе, господине, от вашего преподобия и помощи, и утехи чают. Буди ходатай теплейший о нас, всегда ны, убогшыя, заступающь и спасающь и от всех видимых и невидимых враг охраняющ. Постарайся к начальствующым на земли, верховную и всякую власть умоляя; паче же ко иже всею тварию владущему Цареви помолися, побори за обидимыя. Увещай враждующий, возбрани клевещущыя, возврати ратующыя, далече отели злояростно дыхающыя, безвестно заточи гонительствующыя, но и в нас сбывающих²³⁸⁴ внутренних злых попечитель благ буди. Сумнителныя научи, пререкающия укроти, всеупорныя покори, лжебратию примири. Ленящыяся воздвигни, малодушныя исправи, непокаянныя покаянию, неповинующыяся послушанию научи. На вся воззри, всем всегда присутствуй и домашныя святоуправи, и в путех и в отездах помози, и во усердии что творящыя снабди, и ко иже целомудрствующым вонми, и на яже действующая с Божиим страхомь подутверди, и вся своя любезныя собственаго и свойственаго и заступления, и довлетворения, и заслуг преисполни, яко ближайший и действителнейший христоименитаго исполнения поборник».

Таковыми и толь умиленными поутешихомся забавленми, любезнии; в таковых жалостных повестех мал час поизнурихом, плачевнии; прочее не ктому совносим неутешная, не ктому злостраждем отчаянная, но вместо иных иная предлагающе: вместо посупленых²³⁸⁵ умеренная, вместо разлиянных подобающая и Богови любезная. Воспомним Иова великодушнаго, всетвердейшаго адаманта, незыблемаго столпа, и глаголюща, и вопиюща благовременная: «Аще, –рече, – благая прияхом от руки Господни, злых ли не претерпим».[1882] Да якоже в лишении двою, и не двою, но и целую четверицу отец святых отщетившеся²³⁸⁶,[1883] но не стужим си над меру²³⁸⁷, себе сокрушающе, но Господеви, и сия возложше, Иовле благодарение пригласим, глаголюще: «Господь даде, Господь и взя, якоже годе бысть Господеви, тако и буди, да будет имя Господне благословено отныне и до века».[1884]

Возглашахом многожеланно к своему пастыреви, умершу сущу, приветствуще, возгласим и к началному пастырей, Цареви и Богу, истовому содетелеви и никогдаже умирающему: Владыко и Господи, не остави ны, сирых, даждь мир миру церковному, мирный Царю; даждь помощь и отраду безпомощным, Избавителю блаже. Даждь утешение озлобленным, многомилостивый Творче, Отец щедрот и Бог всякия утехи. Покрый от всякаго вышесилнаго искушения, Покровителю и Помощниче на тя надеющимся. Сотворивый милость со отцы нашими и помянувый завет святый свой, низпосли и нам, бедне оскорбляемым, свою милость; услыши ны, Боже Спасителю наш, упование всем концем земли и сушим в мори далече; услыши ны, Господи, яко блага милость твоя; и паки воспоим, и паки воззовем царственнаго пророка глаголы: «Где суть милости твоя древняя, Господи»,[1885] юже скрыл еси боящимся тебе; даждь нам помощь от печали, суетно спасение человеческо. Аминь.

1740, октовриа дня 12.

«Велик человек и драг мужь, творяй милость».[1886] Притчи Соломони, глава двадесятая.

Дивно, поистине дивно и хвалы подобающия достойно дело и тщание ваше, о, смиреннейший соборе сиротственный, богоревнивейшия матери и сестры и даже до старших и больничных, яко не токмо даже до устнаго и словеснаго благодарения и сердечнаго внутреннаго любочестия к своим благотворителем и всегдашним милостивцам и любезнивы, и учтивы всегда бываете, но и молитвами о них к Богу (к самой пучине или бездне благодатей) прибегаете, и припадаете, и жалостно и слезно от души просите, и нощеденно неусыпно скучаете²³⁸⁸.

И свидетель неложен есть в таковых нынешний всерадостный день, таковыми и молитвенными, и благодарными украшаемый торжествы, таковыми и толь жалостными и прилежными о любезнем и знаменитем в вас благотворители осияваемый моленми. Ибо на таковое сладкое тризнище всем вам изшедшым: церковным служителем, песньми по силе и хвалами торжество глашающым; управителем, в подобающих церемониях или обрядах свой чин сохраняющым; повелеваемым, в достойных велениях и управах прилежно пекущымся; молитвенником, свою бодрость в деле и тепло, и смиренномудренно во уши Господа Саваофа возсылающым и со умиленьми и слезами многими сладко и жалостно деющым; различных потреб служителие, повелеваемыя, нежели повелевающия и присутствующий зде и отсудствующия, вся усердно и всеохотно, вся всекелейно и всеместно о тех же пекущияся, вся престарелыя и дряхлыя, вся немощныя и деньми ветхия и ниже рук прострети за старость возмогающия, но, аки орли пернатии, на толикое и толь дело нуждное молитвенное со многою ревностию потщавающияся и ниже своея немощи и безсилия во своей учтивости и ревности к толь дивному и давному добротворителю признавати и ощутити могущия, яко о таковых писаному сбыватися: «Окрилатеют, яко орли, потекут, и не утрудятся»[1887] (Исаиа, глава 40).

Кто же сей и колик есть благодетельствуяй в вас, яко не точию устными и сердечными и молитвенными труды за нь²³⁸⁹ утешаетеся и толь заочную любовь показуете, но аще бы можно вашей ревности (якоже мнится) и душю за таковаго благодателя положити, никакоже в толикой любви и жалости отреклися бы убо, толико о нем вопиете, толико за нь и молитвенныя фимиамы, и тучи слезныя целым окианом всеусердно проливаете.

Сей есть дивный и от природы или от самаго в нем боговлияннаго естества, натуральный всехитрый и неутружденный²³⁹⁰ делатель, всехудожный и всехитрейший всяких материй велеумнейший обыскатель, а наипаче земленых многим не знаемых минер²³⁹¹, или руд, всеприлежний усмотритель; новых и неслышанных фабрик, или заводостроений, и материалов и недомысленных²³⁹² орудий, или инструментов, всесловущий и всеми хвалимый новосодетель разумнейший.

Сей есть высокословущия и богопрославляемыя Российския империи всевысокия тоя славы разумный умножитель, интересов императорскаго величества вседивный исполнитель и всерадительный наградитель изряднейший; не торги и прибыльми многшими, не купечествы и иностранными многовременными и местными переезды дальнейшими управляющий, но поземными минеры²³⁹³, хитрообретаемыми металлы, находящимися того труды богатствы, пребогато и преполно и славу всесловущей везде всероссийской империи, и казенное государское богатство богатою рукою своих трудов дненощно и всеудивително отдавна уже велеумнейше наполняющий[1888] и везде вся и видящыя и толь неусыпныя того труды и заслуги и зрящыя, и слышащыя, не токмо своя российския различных мастерств и художеств рачители²³⁹⁴, но и иностранныя искуснейшия персоны преславный сей преславно удивляющий.[1889]

Сей есть, да тако реку, аще и общий всем, нам же собственный²³⁹⁵ и всегдашний благотворитель и милостивец и велеумнейший, и действителный,[1890] и по благостному его к нам предприятию и наипаче же собственнейшему его в нас ныне познаваемому вседражайшему тезоименитству и празднеством, и торжественным в душах нашых воспоминанием, и молением объявляемому; всеизрядный и вседивный добротворитель и благородный богопочтенный господин, и вещию, и именем прямейший, камень яхонт предрагоценный,[1891] якоже и самое знаменование того явствует, наилюбезнейший и присновоспоминаемый имянинник Иакинф Никитич, со всею того боголюбивою фамилиею единоумно и единоревностно везде во всем поступающий.

Что же, возлюбленнии, чесому над сими удивитися имате, есть ли что высочайше и удивительнейше в дивнем семь мужи? Аще убо поищем, со удобством обрящемь, ибо удивляемый сей не точию во временных высокими поступает разумы, несочтеннымь, по нам мнится, или крезовым, леть есть рещи²³⁹⁶, богатеет богатством,[1892] не леностною ревностию и поныне во всех бодрствует, но превыспренними мудростьми преизлиха обогащается. Многия убо не точию при себе разумно и всехитро удержавает народы и питает делателно²³⁹⁷, но и нищыя и бедныя, вдовы и сироты, и сущыя в темницах, и бываемыя в различных скорбех и бедностях, вся богатою рукою, вся простертыми дланми дненощно и милует, и питает, и рука хромым, и жезл старости, и покров пищи, по Иову, всем бывает.[1893] И не близ сущыя токмо, но и далече отстоящыя, вся богорадныя и пустынныя обыватели, вся с подобающим удобством и целою верою, вся с христоподобною милостию и совершает, и действует всякому в нужде всякой требующему. Не от инаго коего милосердными лучами солнцезарно согреваеми и мы, всеубожайшии и ничтожнии, не инь сиротное и наше снабдевает гнездо, не другий кто и нашя наполняет потребы, нашы насыщает утробы, толь человеколюбно милосердует и награждает, не благодетелно и отечески точию, но богоподобно и щедро и выше всякаго сказания.

Сицеви того всесловущия доблести и заслуги, такова того не земная, но небесная мудрость, не поземным богатством богатеющая, но прямейшими и небесными изобилствущая благими, сущими поистинне богатствы неистлеющими. И толь разумный и действителный тем делатель находится, идеже и скрывает; не «идеже тля тлить или татие подкопывают и крадут»,[1894] но идеже неистление. Паче же рещи, самаго Владущаго всеми одолжевает[1895] и тому в руце всехитро присно дарствует, по реченному самого Спаса Христа гласу: «Понеже сотвористе единому от сих братии моих менших, мне сотвористе»[1896] (Матфея, 25, зачало 106).

Се толикими и таковыми и толь подобающими украшеньми усветлити потщастеся вселюбезнейшее торжество и хвалам достойнаго имянинника, елико возможно по силе похвалити удостоистеся и молитвенная о нем к Богу вопиения по можному²³⁹⁸ совершити, возлюбленнии, сподобистеся. Прочее, умиленный соборе постничествующий, возмогай и на будущее теми же или паче сих украшайся потщанми²³⁹⁹, таяжде или лучшая в сих производи всеусердно чиноуправления. Слыпиши ли, яко велик есть в милости нами торжествуемый, велику и жалостну и ты о нем производи хвалу и драгости не сея, привременныя, но грядущия жизни достойную. Познаваеши ли, яко всехитрейший и всехудожнейший делатель есть и в неутружденных и неспокойных присно пребывает трудех, не себе точию, но и инем добрая промышляяй. Потщавайся и ты неленостно и востанливо²⁴⁰⁰ жити житие и в трудех и потех, по реченному, снедати хлеб свой[1897] и иным образ благ быти в добродетелных заслугах и подвизех. Приемлеши ли чювство, яко добротворителный он многшими окружаем благими, к прочим добрым и милостынями и щедротами к нищым, вся с верою, вся с подобающим намерением благим и творя, и действуя с достойною того благородия благостынею и яко пред очима имеющь всегда писанное: «Доброхотна бо дателя любить Бог».[1898] Тако доброхотно деющь, сице дивно вся совершающь благодатнейший он действитель, усердствуй и ты удержавати при себе таковыя же, аки верныя други, вся роды добродетелныя, и, в первых, вернии трие при тебе и окрест тебе да обыдут, якови суть дивнейшии трисиянныя Троицы изобразителие: вера, глаголю, и любовь и надежда и прочий соборь неисчисленный, споследствующий добрейшим сим естественно, яко сень²⁴⁰¹ телу.

Сими украшайся, таковыми преобогащайся ближайшими детельми, яко дафниевыми цветы,[1899] увенчавай своего спасения верх; яко Аравиею, благоуханным милованием облагоухавайся; яко сладчайшими райскими дивно и щедро ко всем повевай зефиры, яко златоструйными духовнаго седмоустнаго Нила очищайся верными и милостынными омовенми, по гласу божественнаго тайноглаголника: Милостынями и верами очищаются греси (Сирах, 3, стих 8; Григ<орий> Богосл<ов>в слове о нищ<елюбии>).[1900]

Над всеми сими и обычными, и всецерковными удержевайся и украшайся подвиги и заслуги, о, смиреннейший сонме девственный, задняя²⁴⁰² забывающь, на предняя²⁴⁰³ простирающся. И якоже ближайшими окончевающе настоящий благополучный день, в нас совершаемый (то есть тезоименитство вселюбезнейшаго в нас благотворителя), тако окончим той и подобающими хвалословленьми словесными, Богу живу жертву словесну, благоугодну,[1901] по апостолу, возделающе.

Блажен еси поистинне, соборе девственный, яко толикаго честнаго мужа, такова превосходителнаго господина сподобился еси и хвальными, и благодарными увенчати приветствы. Блаженш паче и ты, хвалимый добротворителю наш милостивейший, яко не токмо желателнейш от премудрейших хвалимь и почитаем бывати, но и от последнейших и ничтожных с любовию и слезными жалостьми сладко сльшимь и приветствуемь (за несрав<н>ителныя от Тебе к тем благостыни) показуешися. Блаженшь и род твой благостынный, блаженна и высокохвалная и вся вседражайшая фамилиа твоя: блаженша и всякаго почтения достойнша и словущая²⁴⁰⁴ супруга твоя,[1902] теми же нравы благими увенчевающаяся, паче же своему велеумнейшему супругу всеславный и зде венец славы зело разумно плетущая. Блажени и вси вселюбезнейшии торжественници, прямейшее²⁴⁰⁵ поистинне пустынное воспитание и всеусерднии настоящаго торжества содейственници, яко толикими хвалами, таковыми подобающими о Божии пособии воспоминанми таковаго словущаго благотворителя всепочтеннейшими почестьми получьше ублажити, прославити, возвеличити и оныя премудрейшаго Соломона, аки благоключимейше²⁴⁰⁶ и времени и случаю прикладнейше²⁴⁰⁷, паче же Духа Святаго, утешительнаго, благаго и праваго, глаголы, яко дражайший бисерь на свещнице²⁴⁰⁸ предложити в похвалу словущаго мужа, паче же в славу триипостаснаго Бога и аки печатаю или венцемь преславнейшим увенчати, всеучтивейшим по нам и паче нас предложением симь: «Велик человек и драг мужь, творяй милость».[1903]

Здравствуйте. Аминь.

Июля дня 18 1741.

«Кто тя утешит, девице дщи Сионя, яко возвеличися чаша сокрушения твоего».[1904] Плачь Иеремиин, глава 2.

Се уже и четыредесятый день преходит, отнележе приснопоминаемый нами бысть поминаем, всего сиротства всеискренний попечитель и отец сладчайший, превожделенный наш Гавриил Семеновичь, о, вы, желанныя постницы; а отнележе вечным сном успе сто пятый надесять минует,[1905] и еще зелною печалию снедаетеся, еще душами вашими о церковном и братском уде, яко дщери церковныя, жалостно и болезненно сламляетеся. И наипаче ты, наичестнейшая Февронья Семеновна, о своем единоутробнем, яко о отце родимомь, еще горко плачеши и внутренними сердца жалы, яко оружии некиими, прободаема горко, горкоплачевно повсядно²⁴⁰⁹ сокрушаешися,[1906] яко Марфа и Мария о Лазаре или Рахиль о Иосифе.[1907] Колици сожалеющыя и соплачющыя с тобою зриши, паче же молящыяся о души его к Богу и тебе ко отраде благонадежныя вины представляющыя и ниже сими утешаешися. Слышат твоя девическая слуха, какова и кончина случися желанному твоему: не внезаапу бо восхищен сладчайший он, тако бо божественному промыслу к ползе усмотревшу, ниже чрез надежду²⁴¹⁰ и скоро преселен бысть ко иному животу, но некое время болезнова яко человек, а яко благоразумный ово радостотворными себе очищающ слезами и к хотящему прийти часу смертному пребыв готовящей, дненощно благодаря и моля вся творити мощи всесилнаго Бога и присно разсуждая из крайныя милости Содетелевы толикими себе наказуема, и не точию в покаяние правилное христианскаго закона видя себе приводима, но и в смиренномудрия глубину человеколюбно и благополучно оправдаема, поя и восклицая благовременная и сия со осклаблением уст, яко «прииде, – рече, – кротость на ны, и накажемся»,[1908] и прочая. И паки: «Благо глаголя мне, яко смирил мя еси, поне отныне научюся оправданий твоих»;[1909] ово же и Иевле благоумие воспоминая, возглашаше: «Аще, – рече, – благая приях от руки Господни, злых ли не претерплю».[1910]

И тако велеумнейший он отец и в таковых, яко Божий сущь раб, ²⁴⁰⁹забавлялся глаголех и помышлениих²⁴¹¹, воли Сотворшаго вся восписуя бяше, дух свой Господеви предаде. О, жалости, восхищен бысть по писанному, «да не злоба изменит разума его или лесть прельстит душю его».[1911] Ты же, желанная, ни поне сими мало утешение приемлеши, но обычными слезами, яко природная маслина, миром жалость естественую точиши и свой плачь дненощный, яко горлица, лишившаяся своего супруга, за утеху причитаеши, жалость сердечную и слезы за отраду внутреннюю себе судиши, печаль за благополучие вземлеши.

Но, о, девице желанная, потщися уставити меру²⁴¹² своим слезам, предел подобающий положи неутешимой печали твоей, ибо многая от страны умершаго благая находятся и суть паче глагол вещи вопиют, вящше трубы твоего господина и братца честныя заслуги и поступки к подобающему утешению твоему неложно тебе увещевают, правду засвидетельствующе о нем: не бе ли нрава богобоязливаго благоумный он, не человеколюбия ли многаго и споболения к сущым в каковых-любо злоключениих преисполнен бысть, коликим в нищете и вдовстве крайнюю сотворь помощь, колики обидимыя непритворно заступи, колики от смертных по делом их наказании правилных свободных учини, колики теснимыя из различных века сего перемен несчасливых и случаев наипротивных горких напротив в пространное и отвсюду спокойное житие приведе и мирную им и благополучную, яко отец, исходатайствова жизнь. Оставляю исчитати, елики неисчитаемыя четы человек из тмы сомнения в целость благочестия приведе и к будущему веку, яко исповедники благочестия честны и добросовестны препусти и яко жертву живу, святу, благоугодну самому Цареви сил представи,[1912] якоже учит Павел.

Прехожду, елико и каково несравнительное в прешедшыя времяна и к братству, и к сиротству радение и тщание неусыпно показа, ово дивным и собным²⁴¹³ награждением, множае же присылками в братство, наконец же в торговых случаех нашым компанийщыком и поверенным вручающ не конец перстомь, но богатою подаяний рукою, множа, а не умаляя роскошы и пиянством братския и сиротския суммы, якоже случается другим, напротив же паче не точию милостивцы некия и благотворители зелно моля, но и господьскую благость к человеколюбию всякими образы скланяя, да милостивы будут, да братскому состоянию к пропитанию и несносным платежем[1913] способ учинят. Всеми сими показуя себе и братии и отцем служителя верна и достойна таковыя чреды и молитвенаго от всех благословения.

Не воспоминаю первейшыя и началнейшыя еговы плоды, колики и каковы за Божиею помощию благоревнителный он муж многолетно сотворь в христианском должном подвизании: в посте отнюдномь²⁴¹⁴, в молитве, в молчании говейном, в слезах повсядных²⁴¹⁵ и нощных; о чесом не дает солгать град Тоболеск,[1914] внутренныя сожителницы не умолчат,[1915] не забудут кошуки[1916] частыя его волокиты и переезды всегдашния, наставления правилныя о добродетелех и неисчитаемы ползы духовныя ко учимым, наиболшее о хранении целости благочестия, о твердости и постоянстве вседолжнейшем за случившаяся тогдашними времяны бедственная обстояния и гонителнии случаи: ведящ бо, «яко силнейши есть всех благочестие».[1917]

И что много глаголати о частоупоминаемомь нами мужи, аще вящшая изрицати будем, постигнет ны лето сказующих, самеми бо делы благоразумная она душа исполнил бяше и засвидетельствовал о себе, якоже кратчайшее наше споведание²⁴¹⁶ представляет, исполняющ писанное чрез пророка, паче же самемь Богом реченное: «Изводяй, – рече, – честное от недостойнаго, яко уста моя будет чест».[1918]

Сицевая слышав, что ²⁴¹⁷протчее чрез меру слезиши²⁴¹⁷, о, плачевный соборе девический, паче же ты, аки пред другими обиденная многоплачливая горлице, для чего труды себе безмерны даеши, аки б безвестно лишившися толь добрых рачителя, единоутробнаго ти братца, нашего превожделеннаго во благих спомощника. Но не стужай себе²⁴¹⁸, желанная, ниже труды излишни приноси своему сердцу, но, яко велеумнейшая мудрых дев рачительница, присно Господа Бога благослови. Благодари, яко толикаго и таковаго сердоболя, такова благоумна и добротворителнаго мужа, единоутробнаго своего государя братца, в горкия сия и плачевныя дни не точию во благочестии цела, но и плоды духовными по силе преукрашена, удостоилася еси имети и, аки многоценный маргарит²⁴¹⁹, на дланех сердца твоего толь долговременно держати и веселитися,[1919] не точию же, но и на оную нестареемую жизнь препустити благополучно и сего не лишилася еси, зрящи неисчитаемыми христианских богатств молитвами всюду того ограждена, ктому же братскими и сиротскими во усердии поминаньми украшена, всех другов и знаемых, сродных и ближних молитвенными жалостными почтеньми и честно и братолюбно, паче же богоугодно провождаема и дароносима, по реченному, «даже до дому Божия во гласе радования и исповедания шума празднующаго».[1920]

При сем и к тебе обращаем слово, превожделенный наш господине отче,[1921] яко одушевлену ти предлагаем, и яко друга объемлем, и яко брата целуем, и яко церковнаго и братскаго уда всецерковными и духовными провождаем провожденьми, должную тебе, нашему отцеви, по силе отдавающе честь. Приими, честнейше, приими всебратственное любовное и преполезное провождение и нам взаимно, яко любовный отец, вознаграждай еликими возмогаеши, аще стяжал еси дерзновение к Вышнему, моли того, яко человеколюбца, всех благих подателя, со иже прежде тебе к нему отшедшими отцы и братиею, в настоящих напастех помогайте, от враг, видимых и невидимых, спасайте, в ратех бесовских тепли и неукоснительни избавители будите, в целомудрии укрепители, в смирении и терпении обучители, в слабости и малодушии наказатели, в трезвости и постоянстве руководители, в путех и во отездах помогающе, пред начальствующими упремудряюще, во ответахь и прошениих подоболепно наставляюще, вся от всякаго душегубителнаго вреда охраняюще, яко бодрии общежителнаго сего села блюстители, аще и велико просимое о самом Христе Бозе нашем, яко тому слава ныне и присно и в некончаемыя веки. Аминь.

Здравствуйте.

Июня дня 27

1750-го.

Непотребный Д<аниил> М<атфее>в низоземно кланяюся.

«Покой, Господи, душу усопшаго раба твоего имярек».[1922]

Се уже и четыредесятый день приспе, о, неутешно горкоплачющыя постницы, отнележе²⁴²⁰ преставися от сего привременнаго жития на не имущую конца жизнь прелюбезный и брат, и господин, и друг сладчайший, и собеседник любомудрый, а вашего сиротскаго собрания многолетный всеискреннейший попечитель и непритворный многожеланный отец и ктитор велеумный, пречестнейший Мануил Петровичь, который своими добрыми и всякия хвалы достойными к вам заслугами неугасную жалость во глубину сердец ваших о себе вообразивши, и аки идею или образ некий одушевлен не на скрижалех каменных, но на скрижалех сердец по вам плотяных, в незабвенную по себе память любве ради Христовы действително и благодатно живописав не чернилом, но духом, аки наследие некое сиротскому вашему сонму остави. О, дивнаго сего добрых рачителя! О, многопопечительныя и бодрыя души к сиротскому споможению!

Кто от разумных не причтет того неусыпное и всем ведомое о вас бывшее попечение к нелицемерной того заслуге и к труду вышесильному всечасному и вседневному, который той сохрани во управлении и надсмотрении веема неотменномь, в советех подобающих в прикладная²⁴²¹ времяна с нарядники и старостами, ко отпуску братии и сирот к работам весненым, летным и есенным, и наипаче в припадших печалных случаех, в напрасных и бедственных, в сиротское ваше гнездо наездах, ко истязанию и ответу многообразному, к допросам за вся, коварств и бед исполненым, в защищение сиротскаго и братскаго исполнения, ко всем таковым бедствам и во всех вкратце помянутых первейший и главнейший попечитель и всеискреннейший поборник и заступник сиротский и братский познавашеся.

И кто исчислити может несочтенныя того поты и труды действительныя за все сиротство и братство, яже той, велемужественная душа, с помощию Сотворшаго сотворил бяше, особливо же в строении братскомь[1923] и в вашем сиротском, колико прилежание сотворь, потрудився. И кроме других частных мест свидетель неложен есть болница сугубая сиротская,[1924] покоища престарелых и немощных, вдов и сирот, дивства и благодарения виновная, рай поземный²⁴²², вседневно и немолчно усты сиротскими славу Божию воспевающий. Вся сия неописанный того труд и попечение и частыя нарочныя переезды самеми вещми, аки словесы, на всяк час бодрое усердие добраго нашего строителя и препохвалную его повсядную прилежность неложно представляющая.

Колико же человеколюбие и милость доблий он и окрестным сиротам безнадежным показа в приеме ко упокоению болничному. И кому сия несравнителная его пред Богомь заслуга не есть известна, еюже он, любезный наш, обогатися, к будущему преселен веку, носящ с собою евангелское ублажение: «Блажени милостивии, яко тии помиловани будут».[1925]

Оставляем по части воспоминати еговыя давныя труды во обществе ко всему или за все христианство, за все церковное исполнение о целости благочестия, неописанныя по указам к Петровским заводам волокиты, многообразная по потребе смысленная ответствования;[1926] непостыдная к наношению извинения в защищение благочестия ко охранению древлецерковных святоотеческих преданий и обычаев. Вся таковая и прочая творил бяше с прочими единоумными и единоревнительными клевреты мужеумным смыслом по наставлению отец и с толикою добраго послушания ревностию; не исповедати токмо ретився новый он всебратственный исповедник, но и пострадати беяше за ня готовый. Волею²⁴²³ умолчаваем или кратко надпоминаем внезаапу нашедший тогда страх коммиссический, аки туча темная и молниеносна наступивши, гром недоведомаго²⁴²⁴истязания возвещающая и преужасное и многопечальное держимым за караулом бедствование,[1927] непрестанная печалная слышания, ежечасный смертный страх всем подписующая. Вся сия веледушный он подвижник с Божиею помощию претерпев добре, вышше всех страхов явлься, образы братолюбныя и полезныя в самый час бедства в неволе ко увеселению во уменшение общия всех печали соседствующей с собою братии предлагая бяше, честными разглагольствы и любомудрыми диспуты украшеныя, отчего видели в нем весма мужественное и небоязливое к бедам ополчение.

Таковыми того вкратце нами воспоминаемыми общаго всем, и нам, и вам, добротворителя, удовлившеся заслугами, о, горкоплачевныя бедницы, и аки седмоустнаго Нила златомедвеных сладких струй, того подвигов, давными времяны богатно насладившеся, за что ныне жалостная она жалостно воспоминаем, умиленно и слезно написуем не чернилом, но самыми слезами, плачющима очима, пред плачливыя вашы зеницы плачевную о нем и жалостную вам представляем историю, вечныя воистинну памяти достойную.

Теперь что сотворим, о, пустыныя горкоплачевныя горлицы, доколе неутешным плачем себе трудити изволяете, доколе, о, вы, умиленныя, подобно Рахили,[1928] слезити не престанете: ныне время молитв прилежных, ныне теплейших воздыханий час, ныне время, апостольски рещи, благоприятно о желанном вашем отце подобающаго поминовения.[1929] Потщитеся согласно и усердно отменити общий по вам²⁴²⁵ о нем плачь на честное великодушие, теплейшыя и горкия слезы – на мужественное и препохвалное в терпении пождание²⁴²⁶. «Всю печаль возложите, – по гласу Верховнаго, – на Бога жива, яко той почетен о вас».[1930] Воздадите своему благодетелеви и отцу желанному доброе и честное взаимное воздаяние, да и вам неложно возмерится, по реченному: «В нюже меру мерите, возмерится и вам».[1931]

Вознесите ко своему Владыце и Богу о покои души его и прилежныя, и благоговейныя молитвы. Помяните своего любезнаго, по апостолу, поминанием святым[1932] и, еликими он потщався одолжил вы благими, о нихже выше вкратце воспомянухом, усугубите вы, молящеся о нем усердно. Уже бо присновоспоминаемый он, ничесого требуя, взыскует от вас разве молитвенаго приношения, яко кадила благовонна, о себе к Вышнему. Подадите ему напутный молитвенный жезл, яко да тем подпирался, силу некую возимеет безопасно преити начала тмы воздуха мрачнаго и лютаго князя благополучно минути, истязующаго всея нашея жизни словеса и помышления, волная и невольная, даже и до празднаго словесе. Ей, помолитеся всеусердно, боголюбивыя матери и сестры; ей, горко и умиленно прослезите ко общему всех Цареви и Богу, яко да вашим теплейшим поспешествомь и прилежными к Волителю милости молитвами, безбедно путешествовав ужасный он путь, достигнет, идеже есть всех веселящихся жилище, и воспоет псаломски она благовременная: «Нога моя ста на правоте»[1933] и прочая. Аще бо жезл оный вербовый великому Макарию ключим бысть к чювствительному путешествию,[1934] якоже о сем древния повести сказуют, кольми паче ваш всего сиротства мысленный жезл, веществом духовным, молитвенным благодатно и желанно сгромажденный, может немалым способом обрестися души брата и отца умершаго и воздушныя оны испытатели сотворити безделни²⁴²⁷.

Помолите, о, вы, смиренныя, помолите прилежно воина Христова, страстотерпца Георгия, дабы точное способство учинил нашему добрых рачителю и оным жезлом руководство чрез надежное учинил, егоже в соннем видении прежде смерти показав, вручи преподобному Феодору Сикеоту, зовущ того в долгий он путь, егоже несть когда шествова, и послежде самою вещию дивен тому явлься, в прехождении воздушнем и от духов лукавствия преславно избавляющ, о чесом пишется априля 22 в житии преподобнаго.[1935]

Сицево ключимое воздаяние по возможному своему нелестному попечителю сотворше и любовное и жалостное и умиленное тому провождение соделавше, ныне поне мало утешим себе, о, желанныя вся матери и сестры, от излишныя безнадежныя печали и сетования и надлежная она с великодушным Новом о любимом воспоем песнопения, вся на Бога, яко благоразумныя, возлагающе: «Господь даде, Господь и взя, якоже угодно Господеви, тако и бысть; буди имя Господне благословено отныне и до века».[1936] Наконец, премудраго Соломона заключим словом и, аки печать, приложим пешим нашим словесем: «Восхищен бысть (желанный наш), да не злоба изменит разума его или лесть прелстит душю его».[1937] О всех сих да будет слава Христу, истинному Богу и Спасу нашему, к ползе нашей вся премудре устрояющему.

При сем к тебе обращаем слово, о, велеумный господине, и брате, и друже, и собеседниче преполезный, благоразумный М<ануил> П<етрови>чь. Не яко к мертву, но яко к живу ти сушу, беседуем и яко одушевлену разглагольствовати мнимся. Не зазри²⁴²⁸ грубаго нашего предложения и не припиши к скуке твоему вечному упокоению.

В прешедшыя дни вмале послужихом достодолжными ти надгробными провожденьми, со псалмы и песньми провождающе твое любезное нам тело и, землею землю покрывше, жалостными слезами, аки миром, помазавше, печални прочее и уныли возвратихомся. Ныне же жалостными по силе нашей словес положеньми, слезоплачевно паче воспомянувше, нежели братолюбный твоих прямейших заслуг к братству и сиротству должный венец исплетше, являемся, ктому же ниже риторски и витийски, идеже бы надлежало нам тебе, словолюбителю, яко надлежный долг отдати, но пешими за невежество словес положении и понужденными удовлитися за благо судихом. Вчера при обычном чине погребения[1938] и видно и любезно соборне целовахом твое братолюбное тело, последнее целование и прощение взаимное отдавающе, аки уже ктому не видети тебе, сладчайшаго, разумевающе, Дóндеже приидет общее всех человеков востание.

Ныне же мысленное и разумеваемое от души целование и прощение творим, умно зрети непщуем твоя братолюбныя уды, послужившыя много братскому и сиротскому собранию, сего ради аще и простыми по нам надгробными словесы, но любовными, но жалостными тебе, нашему словолюбителю, приносим благодарение: четыредесятодневный братосболителный поминания долг в славу Божию и единородныя души твоея ползу совершити усердствующе.

И аще в чесом, яко человецы, до словес и помысл согрубихом любви твоей, прости ны Господа ради, прости, велеумный господине и брате. Вемы бо, яко непамятозлобив был еси в привременных, колми паче надеемся тя быти в вечных. И понеже много словоизлишествовавше явихомся, и сим, яко благоразумный, никакоже подивися; знатно, что сами себе надлежно не осмотрехом, не помыслихом о себе, яко человецы есмы и человеческий подлежим страстей. Кийждо своего бревна, по Христову словеси, во очесех своих не почювше, а малый сучец во очеси братнем узревше,[1939] к великому по нам мнимому соблазну неразсудне приписахом, не помысливше или за грубость Павлова возбранения не познавше, грозно и опасно глашающего: Братие, «прежде времене ничтоже судите, Дóндеже приидет Господь, иже во свете приведет тайная темная, и объявит советы сердечныя»[1940] и прочая. Ты же, велеумный, всем вся остави, да взаимно и твоей любви оставится, в нихже, яко человек, повинен еси, разумевающ писанное: «Аще оставите человеком согрешения их, оставит ивам Отец ваш, иже на небесех».[1941]

Прочее препочивай, любезне, Дóндеже возбудителная труба возгласит и во<с>ставит тя всего цела и нетленна, не ктому умирающа, но жива животом, конца не имущимь. И ежели стяжал еси дерзновение пред праведным Судиею, о нас, грубых, прилежно помолися. Виждь, в каковых находимся злых, не посреде ли скорпиев плачевное житие наше есть, не волнами ли напастными выну обуреваемся, не пленицами ли, по Премудрому, своих согрешениих присно обязуеми есмы.[1942]

Подвигни, господине и брате любезный, подвигни к заступлению за ны отеческий и братский сонм, вкупе же и страдалческия полки. Помолите обще благаго человеколюбца Бога, в настоящих напастех помозите. Бури гонительныя и клеветныя уставите.[1943] Многообразную в нас действующуюся слабость на благодатную твердость преложите. Многозазорное пиянство и напои хмелныя и всякое безобразие и нечистоту далече за гадир прогоните. Всякое душевредное несостояние и бесчинныя продерзости и самомнителныя разсуждения, яко смятие²⁴²⁹, из села братскаго и пустыннаго изждените²⁴³⁰. Напротив, вечную чистоту и препохвалное целомудрие посреде нас, паче Аравии, возблагоухайте,[1944] воздержание и трезвость возрастивше. Богатно умножите любовь, верховную добродетель, и смирение, Христово подражание, в сердцах и душах наших утвердивше, скрыйте, над всеми сими мир и превожделенную тишину не нам токмо, но и всей вселенной благодатно и пребогато испросите. Аще и велико просимое, о Христе Исусе, Бозе нашем, емуже слава в безконечныя веки. Аминь.

Слово на память преподобнаго отца нашего Александра, игумена Ошевнева монастыря, каргопольскаго чюдотворца

Евлогисон, патер о²⁴³²

«В память вечную будет праведник».[1946] Псалом 111.

Якоже небо пресветлыми звездами преиспещренно светится, тако земля мужи праведными украшается, и яко звезда звезды преизобилует во славе и вечности, тако праведницы своих памятей светлостьми в церковнем небеси, по писанному: В церкви стояще славы твоея, на небеси стояти мнимся. Друг друга праведнии праведна в вечных памятех преимуществуют. Ибо ²⁴³³за превыспреннее в небеси²⁴³³ нашими телесными очесы не вси суть звезды небесныя зрению достижны, сице и в Церкви за непостижное промысла Божия не вси службоприношеньми праведницы исповедаеми, ниже памяти всех почитаются, разве за обще возношение всем святым ведомым и неведомым благодарения приносяще.[1947] Убо и в небеси не токмо зримыя, но и незримыя за недостижение быти разумеются, от многих же некии в видимых звездоблюстители собственными имены быти сказуются. Священнословуяй бо и пророк божественный, изчитаяй множество звезд и всем им имена нарицая.[1948] Тако и во праведницех на земли собственныя имены и достоинства, паче же чюдесы прославляются за славление добродетельми Господа. О таковых бо Христос Спаситель рече: «Славящия бо мя прославлю».[1949] О, слышателие благочестивии, яко праведника за воспоминание, яко за всеусерднейшее вас, доброжелателей, собрание, понеже полезных к слышанию за оные труды и подвизи к памяти отца, праведне правде служителя преподобнаго Александра, игумена Ошевнева монастыря, каргопольскаго чюдотворца, желаю приступити днесь.

Но убо священная Церковь поет: «Очистим чювствия и узрим неприступный свет».[1950] При нем же оному праведнику за блаженное и всеспасительное его на земли житие быти непщуем, по писанному: «Яко вси праведнии присно видят лице его».[1951] Ибо «праведных души в руце Божии»,[1952] премудрый глаголет.

Како же аз, осквернений всяким грехом и окалян²⁴³⁴, нося же помысла в себе многосмущенную бурю, о иже толикаго отца и чюдотворца памяти покушуся поне вмале вашей любве побеседовати, не имый чювства очищена? Аще и многое к Божию угоднику желание нудит мя, но боюся, да не како, хотя²⁴³⁵ потрудитися на успех человеком, буду им на вред. Аще ли воспомяну Божие человеколюбие, желанию уступити покушаюся. Аще ли многомутное страстей моих помысла в разуме прииму, на толикое блаженнаго отца доброплодия поле запрещаюся происходити и, конечно грешный, боюся и совестию весма зазираюся. Премногое же угодника Божия аввы моего венечника Александра к нам милосердие о блаженнейшей памяти его нас молчати не оставляет, и Божие человеколюбие иногда²⁴³⁶ к принесшей две лепти[1953] надежду подает. О, преподобие отче авво Александре, виждь мое к тебе всеусердное желание и даждь ми молитвами своими слово во отверзение уст о блаженней памяти твоей побеседовати, да слышащим в благослышание, чтущим же и пишущим во спасение и пользу изрядную, тебе же в славу и похвалу благоприятную. Якоже иногда оная две лепти от усердия Христу моему принесе и не бысть презрена, сице и аз тебе, моему сожалетвенику²⁴³⁷, отцу преподобному Александру, приношу воспоминательное слово от всего усердия моего, аще и не риторственно, но любве и желания преисполнено.

Принеси днесь з божественным пророком вознесем глас: «Услышите сия вси язы́цы, внушите вси живущии по вселенней».[1954] Иже бо всяк град хвалится своими угодники и всяка страна преспевает²⁴³⁸ и славится своими чюдодействейнники, тако Палестина, запад и восток, яко Российская на севере и полунощи²⁴³⁹ страна своими угодники славится, своими праведники хвалится и присно почитается, не мнее прочих, тако в животе, яко по смерти чюдеса и дела преславно показавшими. Градец же малый Российскаго государства Каргополь близ окиана хладнодышущаго предивно предивным угодником в предивных чюдоделиих моим венечником аввою отцем Александром предивно хвалится, яко предивная знамения и чюдеса содеявшим, чесо ради, аки на тверди небесней пресветлая звезда возсия, в каргопольской области преподобный отец Александр прославися добродетельми же и чюдодействии, паче солнечных лучь во всей России просветися и подобно древним чюдесодейственником счюдодействовася. Да впишем зде поне едино от многих чюдодействие онаго ко уверению.

Понеже молитвами своими сей преподобный Александр от области и земли каргопольския ползающих змиев всех отгна, уже бо ²⁴³⁸не ктому доселе²⁴⁴⁰ обретаются пресмыкающии змиеве, яко исчезоша молитвами его и без вести от земли каргопольския Быша. Аще убо древле в Вавилоне вместо Бога почтеннаго змия Даниил, чюдный во пророцех, вержением²⁴⁴¹ токмо гомули²⁴⁴² разсестися оному сотвори, царя же и люди о погибели змия возвесели и всем радость велию содела,[1955] зде же преподобный не вержением гомули токмо единаго, но молитвами бесчисленное множество ползающих змий без вести сотвори, радость же и веселие даже доныне всему роду живущим во области каргопольстей введе. Сего ради аще кто тя и Даниилу подобным непщевати²⁴⁴³ будет, не погрешит, по подобию чюдодействия, яко Даниилову, о, преподобие.

Ибо и Моисей великий иногда египетских волхвов коварствующих, чрез жезлы своя змия вообразивших, своего повержением чюдодействуемаго жезла она змии поглотивша[1956], зде же преподобный отец Александр, аки жезлом, своими к Богу всеприлежными молитвами от земли каргопольской сущих змий ползающих до конца изгна и невидимы сотвори. Сим бо вторый Моисей явился еси, о, преподобие. Он бо египетских коварствуемых змий чюдодеевым своим жезлом чюдодейственне поглоти – ты же молитвою к Вышнему сущия по земли ползающий змии за антиподы[1957] прогна. Он жезлом своим море раздели[1958] – ты же страсти, яко Аммалика,[1959] победи и непроходную пустыню немятежным умом прошел еси. О, праведниче, богоданными тебе силами знаменодействуемыми чюдесы хвално прославляемый, угодниче Христов авво Александре, не от человек, ни человеки похваляемый, но всесильным Божиим мановением умудряемый во истинней правоте чюдодействеными способы и в пустыни добродетелными подвиги. Довлеет тебе свидетельство се, яко праведнику похвална память.

А понеже вещем бывают памяти не суть единовидни, но многовидни и различии, якоже в пролетии²⁴⁴⁴ солнечное круготечение в нощеденствии двадесять и четырми числимо часы, в коих два вида зовется: тма и свет, день же и нощь, – благим убо и злым уничижителная же и похвалная тако бывает память. Яко нас и евангельская притча о дву сынох, старейшем и юнейшем,[1960] две воспоминании имеющими, научает: единаго блудно живуща, другаго же праведна пребывающе Церковь воспоминает, яко древле вещию двема виды дву братов, Иякова и Исава, памятствует: Едомом перваго и Израилем же втораго, сего Бог возлюби, Исава же возненавиде.[1961] Внемлеши ли неравномерныя памяти, спасителной и вредной, ругательной и похвалной? Ах увы! Трепещет ми ум пагубную и злейшую паче прочих воспомянути память: Июды злочестиваго, Владычня предателя, Искариотянина.[1962] Память же бывает при добрех и гневу тезоименитаго Ариа со множеством анафематисуемых.[1963] Но нам убо не едино слово о заблуждьших сих, точию памяти доброй для несточнения²⁴⁴⁵ зде вкратце она проминухом, якоже божественный пророк глаголет: «Не помяну имен их устнама моима».[1964]

Слышавше же убо воспоминание злых же и добрых, лучшая избирати, хуждьшая отметати, неполезных же отвращатися и бегати, добрых же всеусердно снискати и чрез труды и поты, елико удобно, приобретати да прилежно потщатся, ибо доброслытие от хранения Божиих заповедей и добродетелей от исполнения бывает. Тако Моисей он великий (во пророцех) прежде приятия от Бога перстописателных на скрижалех заповедей самописателная в души действием изобразуя заповеди: егда видех израильтянина биема египтенином, не стерпе единоплеменному досаждения, возлюби искренняго, яко сам себе, врага же возненавиде, мстив ему (и уби и скры в песце),[1965] якоже послежде от Бога на горе прият на скрижалех каменных, перстом Божиим писанну: «Возлюбити искренняго своего, якоже сам себе, и возненавидиши врага своего».[1966] Тако великий он возненавиде, яко бегати с людми Божиими изволи.[1967] Свидетельствует о нем и божественный апостол Павел: «Верою Моисей велик быв, отвержеся нарицатися сын дщери фараоновы, паче же изволи страдати с людми Божиими, нежели имети привременнаго греха сладость. Болшее же богатство вменив египетских сокровищь поношение Христово, взираше бо на мздовоздаяние. Остави Египта, не убояся ярости царевы, невидамаго бо яко видя, терпяше».[1968]

Убо за толикое Моисеа великаго исполнение Божиих хотений, заповедей же и повелений, полководца роду израильтескому божественный промысл устрой ѝ, Святаго Духа пребогат сосуд показа ѝ. Пророк и чюдодейственник преславен от рождения своего и до сего дне во всей подсолнечной проповедася, яко памяти достойная вся жизнь его бяше, вся многия пользы и благодарения содействуемая им виновна Быша.

Что же Авраам,[1969] Исаак,[1970] Ияков, праотцы, отцы и патриарси наши, что полезнаго не сотвориша, что памяти достойнаго не содеяша! Не воспомянух зде праведнаго Ноя кораблеплавателя под небесем, и на гноищи Иова претерпеливаго, и во искушении Иосифа мужественноцеломудреннаго, и Иону, в ките тридневно бывшаго.[1971] Вси сии образ и предписание Христова смотрения²⁴⁴⁶ Быша, и вси праотцы и отцы и пророцы вси пречюдным знаменованием и действием вещей о Христе Исусе, Спасители нашем, прознаменовавше и премудро проповедаше. Яко наполнени убо вся книги свидетельств, наполнена вся страны, вся языки, вся грады, вся церкви, свидетельствуют, вопиют, велегласнейшии²⁴⁴⁷ трубы преизобилно проповедают, вся преславная от века таинства и всяк ум превышающая сказуют. Апостоли научиша, соборы святых отец утвердиша и запечатлеша знаменьми и преславными чюдесы, яко вся суть благопамятьству достойная содеяху, за еже и вечное блаженство от Господа Бога получиша.

Сице и преподобный отец наш Александр памяти достойная всею жизнию своею действова, истинный бо он евангельский послушатель: презре юность свою, остави отца и матерь свою, дом и по плоти братию,[1972] и ужики²⁴⁴⁸, и соседы, и сродники и всякое зависящее²⁴⁴⁹ спасению остави и презре. Отлучися всех привременных и иде в Кириллову ограду на Белоезеро и тамо пребыв у отец в послушании, труждаяся на братию всеприлежно. По мнозех же трудех его облечен бысть по его желанию игуменом, ту сущим²⁴⁵⁰, [1973] во иноческий образ[1974] и конечне со отъятием влас отъят и мирская вся пристрастия, со отрезанием же влас своих и долу²⁴⁵¹ влекущая мудрования соотреза²⁴⁵². Христов же ярем всеусердно на раму²⁴⁵³ взем, тому последовати изволи и понесе благодушне иго его и всякий вид добродетелей исправль и возвратися во свое отечество. Аще бо и возвратися в каргопольскую от белозерския области, яко ко Аврааму,[1975] преселившемуся отцу своему, во свое гнездо, но не возвратися мыслию от обещания, благо иго носящаго.[1976]

Не бо в дом прииде отцев обитати,

но в пустыню боголюбцев собрати.

Не богатства ради тленнаго,

но приобретения дельма²⁴⁵⁴спасеннаго.

Не родителей токмо возвеселити,

Но родителем Содетеля преславно прославити.

Его же ради студень²⁴⁵⁵ и вар²⁴⁵⁶ дневный понесе и всякое напастей искушение доблественне претерпе,[1977] идеже паче славных возвеличися, паче вельмож прославися и Господу глаголющу: «Славящая бо мя прославлю».[1978]

Ельма убо толик и таков быв угодник Божий Александр, темже Христос его обогати даром чюдес вышеестественных,[1979] воеже времени ко оживлению ядовитых змий паче других времен в маии месяце и потом совершающе пасхалиею круготечение вспять и напред июня месяца бывающее второпервая неделя Петрова поста, в ню же всенародное множество града Каргополя и всея области каргопольския жители собираются во обитель твою Ошевенскую праздновати моего венечника преподобнаго отца Александра память[1980] молитвоприношением за умерщвление чювственных змиев и невидимо коварствующих прелукавых, от еже сохранитися – от уязвления же чювственых и от прелести умных, якоже прельсти иногда праотец наших Адама и Евву мысленный чрез чювственую змию[1981]. Темже за исходатайство умерщвления чювственным и за отгнание и погубление мысленных, во здравие же телесное и спасение душевное, совершающе память оную, собираются.

Почто, ея же ради вины²⁴⁵⁷ в житии его не повествуется,[1982] да никтоже зазрит ми вышеупомянутую вину пишущу, Дóндеже приклад вещи прочитаем зде будет. А яко о образе (Нерукотворенном), егоже сам Владыка Господь Бог и Спас наш Исус Христос прежде страсти своея от Авгаря едескаго посланником живописцем, желающим его изобразити и не могущим, зане, провидец сый, различно себе пременяше, сам прием убрус четверосвитный²⁴⁵⁸ омоченый, отре божественное свое лице, чюдесно изобрази и посла ко Авгарю с посланием своим сице: «Божие видение, божественное чюдо», его же прием, Авгарь поклонися и любезно лобыза и получи исцеление и прочая.[1983] Пресвятое Евангелие сего не благовествует, отцы же святии историчествуют и повествуют,[1984] и есть истинна, яко евангелист верховнейший при концы своего благовестия глаголет: «Суть же и ина многа, яже сотвори Исус, яже аще по единому писана бывают, ни самому, мню, всему миру вместити пишемых книг. Аминь».[1985]

Сице лепо благоверным о ученицех и угодницех его помышляти: не вся суть в житиях за множество чюдодеемых и за долговременство не пишемо в житиях вписуется, но многа суть оставляема за долговременство и забвени бывают.[1986]

Тако у преподобнаго отца нашего Александра в житии аще о умерщвлении змиев и изгнания от каргопольския области не повествуется, но многонародным словом свидетельствуется быти истинне, яко молитвами его ползающий змиеве с каргопольской земли изгнани, яко и о памяти во второпервую неделю Петрова поста в житии не написано, но всенародно же даже до сего дне съездом во обитель и празднованием действуется.

Но что достохвално, что добродетелей добротами преукрашено, что великоделие величеством преизящественно? – Благостраждущих чюдоделия предивностей, властное²⁴⁵⁹ души в Церкви ликующей благосодержание вечностей, пребывающе и в воюющей чиносодержание власти, по иже разрешении от плоти благопамятству бысть виновное обою власти держание, в настоящем же и будущем благопребывании. Онаго прелюбезнейшаго отца Александра волею по Христе моем благопоследствующе стезями всеблагоразумне, помощию и силою всемогущаго и всесильнаго Бога, благоподвизателне лехко бременеблагоношствующе, во истинней правоте преславно. Ибо сам истинна Христос Бог наш рече: «Без мене не можете ничтоже творити».[1987] Творяй же в вас благоугодная пред Господем,[1988] един дух с Господем имети будете,[1989] – глаголет божественный апостол.

Ибо здравое мудрование и высокое смиреномудрие творит се, о, подражателю смиреномудрия, ниоткуду бо инуду²⁴⁶⁰ и се навыкл еси, разве от праотец и отец, патриарх и пророк, от Моисеа и Давыда[1990] и Иова, от Иякова, Исаака и Авраама, паче же Авраамова и Давыдова Владыки Христа Спасителя, от июдей неблагодарных поношаемаго, якоже есть писано. Колицы онии Быша смиренномудрии и праведни! Ов бо глагола: «Аз есмь земля и пепел»,[1991] ов же отрицашеся пред Богом, не могущь Израиля водити, гугнива себе нарицаше,[1992] ов же от Авесолома, сына своего, гонение претерпеваше.[1993] Владыка же наш Господь Исус Христос за всех распинашеся.

Не сих ли днесь ты подражатель еси, о, авво Александре, заеже яко распятожительствуя, егда начат уединятися в пустыни, един к Единому мыслено прибегати, излагая свое всесердечное желание Сердцеведцу, яко любве его ради вся находящая искушения – скорби, тесноты²⁴⁶¹ и нужды пустынныя – терпети всеусердно понужаяся. И что не творяше, киих не деяше, пребывая же и Бога моля во оной пустыни, добродетельми украшайся и страхом Божиим предивен быв. Бог же, видя труды его и спасителныя поты, яви его пустыни доброе прозябение, ибо от юности преподобный изволи честное житие, последуя Христову учению, по апостольскому гласу, «взирающе на началника вере и совершителя Исуса»,[1994] егоже желанием распалився, страсти плотьския воздержанием отряс и того учением ум свой к небесным вперив, и стаду своему премудре наставник показася,[1995] и божественнаго света незаходимое светило явися, яко и Христос пресветла тя светилника чюдес лучами по преставлении всех притекающих к раце мощей[1996] просвещати обогати.

И сими убо свойствы преподобный себе благопамятство умножи: еже церковь Николы Святителя воздвиже,[1997] еже и общий монастырь состави, еже множество ученик собра, обучив я не тройской брани,[1998] но всякому добронравию и благочинию, ополчающеся к духовом злобе поднебесным, и веры щитом защищатися, смиреномудрием же, а не ризами украшатися, благопослушанием безропотным присно обогащатися, постом и молитвою и всенощными стоянии плоть свою изнуряя, очищатися, умом непостижимаго ума, умне наставив, зрети и на подобствие²⁴⁶², якоже мощно, востекати научил еси.

Сего ради Бог преблагий и превеликий одари тя чюдесы даров, преславно обогати тя преславными знамении, преудиви предивными добродетелей исполнения предивностьми. Како не удиви, яко в тленной плоти безплотных на земли житие поживе. Како не прослави, яко подобно богопрославленым Моисею и Даниилу,[1999] преславная зделавшими, преславноделателя прослави тя, отеческую доброту, мысленнаго света зарю, послушником украшение, источника чюдес, свидетельствующи же Церкви кондакопением, яко по преставлении великими чюдесы прославляющу тя Господу и к Богу молитвенника непостыдна.[2000] Стекшеся днесь, о, празднолюбцы, песненными похвалами воспоем, глаголюще: «Радуйся, иноческаго жития правило, идея и образ и печать известная. Радуйся, свещниче пресветлый, озаряяй всяку добродетель светлостми. Радуйся, иже в бедах великий утешителю и теплый заступниче печальным. Радуйся, постником началник быв и непобедим поборник, страстем бо отсекая корень и бесом стремления представ мужественно, Александре, тех посрамил еси душепагубную прелесть. Креста же Спасова действо и непобедимую явил еси силу змия от каргопольския области изгнанием, еже всему свету известны благодатныя труды, поты и подвиги, таковы, яко удиви мысленных, ужаси и земленыя. Пречюдны труды воздержания твоего жития, якоже бо бесплотен отнюд, во плоти старостне враги невидимыя преборил еси и видимыя змия изгнал еси даже доселе. Роди же убо тя вси поют благочестивых, изряднее же твое честное стадо, светлость твоих болезней, лавры згромаждение, еже показал еси яко град в пустыни красен, иже жилище собором иноческим богоподобно составил еси, еже, яко одеждами многочестными, твоими красуются чюдесы и доблественными страдании, еже вострубим ли трубою песней, благодать бо духа всякия трубы благолепнейши, всех к пению созывает богоноснаго отца память. Цари и князи да чюдятся всех Царя искреннему рабу, иже миродержца начала и власти[2001] Духа божественнаго всеми оружии победившаго. Пастырие и учителие изряднаго воистинну пастыря, правила же и образ пастве да восхвалят, иже в повелениих светлаго и вере добляго, иже в видениих высокаго, в деяниих выше облак, во учениих пищу потока, наставника заблуждьшим, подпор преклоненым, иже всех болящих милующаго, Каргополю великое украшение». Похваляюще, вси рцем: «Отцем верховне Александре, предстани твоим рабом всегда, отче наш, и спаси стадо свое молитвами твоими. Тем убо, Александре, не престай, моля Христа Бога о стаде твоем сем и всех верных почитающих всечестное твое успение и память, во славу Святыя Единосущныя и Неразделимыя и Животворящыя Троицы, Отца и Сына и Святаго Духа, ныне и присно и во вся веки. Аминь».

Слово похвалное преподобным отцем Александру Ошевенскому, Кирилу Челмогорскому, Пахомию Кенскому, Антонию Сийскому, Никодиму Кожезерскому, Диодору Юрьегорскому, чюдотворцем каргополским

«Дивен Бог во святых своих, Бог Израилев»,[2002] – глаголет царственный пророк Давыд.

И кто убо не удивится, и кто не возглаголет со царьствующим пророком Божию благодать, во святых его угодниках преудивителне сияющую, и толико преудивителне, яко не человеческий ум точию, но и ангельский на удивление привлещи могущих. Еже убо ангелом по естеству²⁴⁶³ предивная действовати и творити чюдеса от Бога дадеся, оная же паче естества человеки святыми действует и творит нечто и дивнейше, яко глаголет Павел: «Не ангелом бо покори Бог вселенную грядущую, о нейже глаголет, засвидетельствова же негде некто, глаголя: „Что есть человек, яко помниши его? Или сын человеческий, яко посещаеши и? Умалил еси и малым чим от ангел; славою и честию венчал еси его и поставил еси его над делы руку своею; вся покорил еси под нозе его"».[2003] И паки тойжде: «Что убо речем к сим? Аще Бог по нас, кто на ны? Иже убо Сына своего не пощаде, но за ны вся предал есть его, како убо не и с ним вся нам дарствует? Кто поемлет на избранныя Божия? Бог оправдаяй, кто осудаяй?»[2004] И сам Бог: «Славящыя мя прославлю»,[2005] – глаголет, «яко Бог искуси их и обрете их достойны себе. Яко злато в горниле, искуси их и, яко всеплодну жертву, прият их. И во время посещения их возсияют и яко искры по стеблию потекут. Судят языком и обладают людми, и воцарится Господь в них вовеки».[2006] И сосуд избранный искушения изъявляя: «Кто ны, – глаголет, –разлучит от любве Божия: скорбь ли, или теснота, или гонение, или глад, или нагота, или беда, или мечь? Якоже есть писано: „Яко Тебе ради умерщвляемы есмы весь день; вменихомся якоже овца заколению». Но о сих всех препобеждаем за Возлюбльшаго нас. Известих бо ся, яко ни смерть, ни живот, ни ангели, ни начала, ни силы, ни настоящая, ни грядущая, ни высота, ни глубина, ни ина кая тварь возможет нас разлучити от любве Божия, якоже о Христе Исусе Господе нашем».[2007] Темже и обоя совокупляет, Псалмопевец взывает: «Бог прославляем в советех святых, велий и страшен есть над всеми окрестными его»[2008] (и ниже), «Господи, во свете лица твоего пойдут и о имени твоем возрадуются вовеки»,[2009] «яко похвала силы их Ты еси».[2010]

Ельма же преднаписахом глаголати в предтекущем сложении²⁴⁶⁴ на похвалу преподобным отцем, чюдотворцем каргопольским, прииди зде и срадуйся с нами, о, Каргополие, градец малый, но местоположением изрядный, изобилием всяким доволный, селами и полями пространными облежащий, нивами превеликими обстоящий, людьми народов учтивых исполненный и всякими потребными к сожительству человеков нескудный; градец от российских градов царствия российскаго един, державы царей московских подданый, страны близ моря Соловецкаго, вскрай границ асийских в части Европы; градец от времен доволних²⁴⁶⁵, верою благочестивою просвещенный, исповедания Церкви восточныя последующий. Прииди, о, Каргополие, и сторжествуй твоим согражданом, паче же – вышняго Иеросалима первенец согражданом,[2011] яко и ты ничимже осталася²⁴⁶⁶ от прочих градов российских, и не токмо российских, но и от восточных, во произвождении святых Божиих угодников, яко и ис тебе произыдоша святии Божии угодницы.

Сияют на тверди церковней преподобнии твои, в преподобии Господеви служившей и преподобне пучину жития преплывшии, преподобне скончавшийся и к преподобным преселившиися, царствуют со Христом. Светлеются во историях церковных пустыннии ошелницы твои, в пустынях скитающийся, озлобляемии пустынным озлоблением, пустынный подвиг трудившеся, со зверьми и с духи бесовскими бравшийся и одолевшии, и в пустынях богоугодне в будущую жизнь отшедшии, и наслаждаются вечных благ. Озаряют на места церковном солнца твои – чюдотворцы, чюдодействующии в концех пределов твоих, яко лучами проницающии чюдно, нетлением мощей и дарованием немощным различных болезней и недугов здравия, и бесов от человек отгнания без вести, и прочих благ подаванием и повсюду, идеже кто верне просит, егоже требуют, нескудно приемлют и, радуйся, благополучив желаемое, отходит благодарствуя. Молниелучне проницают во всю Россию славою денницы и вечерницы²⁴⁶⁷ твои – священных обителей ктитори святии, от основания святоводрузившии в славу Божию, и здати²⁴⁶⁸ и совершити прекрасне потщавшиися, и яко райская селения всеми благими преисполнивший и четы иноков собравший, чины же и пределения²⁴⁶⁹ спасителныя предавший им, и яко грады великия множеством живущих и доволством хитростей всяких умноживший, и дивно стенами оградивше, скинии Моисейской[2012] подобне вообразивший, яко можно пригласити Валаамово,[2013] еже прорече, зря²⁴⁷⁰ на израильтяны: «Яко добри доми твои, Иакове, и скиния твоя, Израилю! Яко разделы осеняющеся и яко сади при реках и яко куща, яже поткну Господь, аки кедр подолг воды».[2014] Оле славы и величества, чрез святых, в пределех твоих святопочивших и лежащих в нетлении, славная Каргополие, и ты, яко Вифсаида,[2015] славу от сограждан, иже и та иногда мала бе и неславна, от произшедших же Петра апостола и прочих последи бысть славна, Тарс[2016] – от апостола Павла, Византия[2017] – от великаго Константина,[2018] Кесария[2019] – от Великаго Василия[2020] и прочия мнози гради, прежде славни не суще, от сограждан бывших славных последи прославишася и ведоми Быша.

И поскольку изъявишася святии каргопольстии чюдни, от еже градец Каргополь мал и немногим знаем бе, просиявших ради в пределех его преподобных отец последи прославися и во всех российских церквах во имнах, сочиненных святым преднаписанным, поется и во историях сложенных прочитается, но светлейше от еже в подвизех и кииждо в местех своих доблестьми добродетельными процвете и на столп совершенства духовнаго востече и светлеется благодатными даровании, нижеписанными созерцатися имеет.

Прежде же всех цветет, аки райское древо благоплодное, преподобный Александр Ошевенский, Александр игумен и ктитор Ошевенскаго монастыря, иже от основания оную обитель начен и согради церкви святыя и храмы служебныя и келия иноческия и огради стенами. Александр богочтец всеусердный, иже от юности Бога возлюбивый, дом и родители и братию оставивый и во обитель святаго Кирила Белозерскаго прежде в белцех труждатися вшедый, таже по времени вожделев и во иночество облекийся и не укосне²⁴⁷¹ в новоначалных, но абие отец чюден показавыйся.[2021] Александр подвижник зельный, иже ²⁴⁷²недоволна себе суди быти Кириловы обители трудами²⁴⁷², но возжеле болшим понудитися²⁴⁷³, просив игумена[2022] и, благословен, изыде и в пустыню вшед, пустынник высок показася. Александр молебник теплый, иже в молитвах пребываяй, во бдениих всенощных, в воздыханиих сердечных, в слезах приснотекущих, в плачех безчисленных и в боговидение достиг, тайнозритель чюдный и сказатель неявленных неложный бысть. Отнюду же и чюдотворец предивен и милостив явися, источаяй чюдеса и подаяй исцеления всем приходящим к нему и с верою просящим помощи и заступления, засвидетельствуют того дарования богатство в животе бывшая и по преставлении в будущий век изливающаяся, яко от источника, чюдеса.

Чтем в «Бытии» у Моисея, егда праотец Иаков «изыде от студенца клятвеннаго[2023] и иде в Харрань[2024] и обрете место и спа ту²⁴⁷⁴, зайде бо солнце, и взят от камения места того, и положи возглавие себе, и спа на месте том, и сон виде. И се Лествица утвержена на земли, ейже глава досязаше до небес, и ангели Божии восхождаху и исхождаху по ней, Господь же утверждашеся и рече: Аз Бог Авраамов, отца твоего, и Бог Исааков, не бойся: земля, идеже ты спиши на ней, тебе дам ю и семени твоему».[2025]

Чтем историю и преподобнаго Александра о месте, идеже монастырь стоит, како обрете, и воздремався, глас слыша: «Александре, угодниче мой, се ти уготовах место, идеже ныне самозван пришел еси. Сотвори себе селение и пребуди зде и спасеши душу свою. И се ти будет покой вовеки и тобою мнози спасение улучат²⁴⁷⁵». И абие в той час возбнув от сна и никогоже виде. От гласа же онаго радости многи наполнися и почюдися Божию посещению и оному неизреченному званию.[2026]

Чтем во истории о царе Константине, болезнующем люте, како во сне явишася ему святии апостоли Петр и Павел и повелеша ему взыскати Силивестра епископа, иже его от недуга исцелит. Он же поискав, призва и крестися и тако от болезни свободися, здрав бысть.[2027]

Чтем в житии преподобнаго Александра, како болящу ему и вси уди²⁴⁷⁶ его ослабеша, ни главы воздвигнути, ни руку возвести, ни ногу двигнути, ни устну²⁴⁷⁷ отверсти, ниже языком проглаголати могущу, явися ему преподобный Кирил Белозерский во образе старца святолепна, сединами украшена, в белых ризах и крест в руце держаща, егоже видев позна по образу написаному. И начат со слезами молитися: «Отче Кириле, избави мя от болезни сея»; святый же знаменав его крестом и рече: «Не скорби, брате, прочее²⁴⁷⁸, аз бо помолю Бога и Пречистую Богородицу, яко да исцелееши». Возбнув же от видения преподобный и разуме, яко болезнь облегчися ему, наутрие же воста здрав и иде в церковь.[2028]

Темже и по смерти, яко солнце сияет лучами, всюду дарование чюдес гроб преподобнаго.

Изрядно известиша некогда великомученицы Евстратий, Авксентий, Евгений, Мардарий и Орестий явлением своим во обители их игумену и братии и печаль их гостей за неприбытие и потребных за скудость во утешение премениша и не токмо доволными по обычаю от христолюбцев, но аки от царя и патриарха и от царицы преизобилными исполнивше. Таже святому Евстратию на службе чтущу: «Обувен же бысть святый Евстратий в сапоги з гвозми железными», – и возопи: «Мало мое страдание противу Божия дарования». И абие потче²⁴⁷⁹ жезл и невидим бысть. Жезл же процвете и листвие испусти и гроздие²⁴⁸⁰ изнесе. Темже возвестиша чюдо царю и патриарху и всему граду. И собрася весь град и царь и патриарх и дивящеся, совершиша праздник светлейте, хваляще святыя мученики.[2029]

Кто не сравнит и прославит и преподобнаго Александра явление: на праздник святаго Николы храма, иже во обители Ошевенской,[2030] некогда по обычаю гостем прията непогодою возбранися, игумену Максиму в недоумении бывшу и по вечернем пении воздремавшуся, и слышит гремение декам и виде из гробницы изшедша старца светоносна, грядуща к келии его, и пришед ко оконцу келии, сотвори по обычаю молитву, игумен же отвеща: «Аминь». Старец же ко игумену рече: «Како, брате, хощеши таковый праздник без службы оставити. Не буди та того ни помыслити; ничтоже разсуждая, ни размышляя и не буди неверен, но верен и праздник честне проводивши, вся бо недостатки вашы Бог исполнит, еще же и в прочая времена нескудни будете». Игумен же зря святаго, почюдися и позна преподобнаго Александра, многажды бо в житии сем виде его, и абие возбнув от сна и не виде никогоже, страхом и трепетом одержим, чюдеси дивяся, славя Бога. В то же время бысть буря велия и слана²⁴⁸¹ и снег, и паки уяснися²⁴⁸² небо и бысть тишина велия и мраз, и ²⁴⁸¹

устройся путнее шествие²⁴⁸³. Егда же начата утреню пета, приидоша множество гостей и даша в монастырь от имений своих и от рыб, игумен же прием, благослови их, они же отидоша в путь свой. И по сем приидоша множество народа от окрестных весей и вдаша в монастырь от сребра и от хлеба всякаго. Игумен же и братия радостни бывше и молебная певше, праздноваху, духовне веселящеся, и бывшее посещение преподобнаго Александра игумен поведа всей братии. Братия же слышавше, прославиша Бога, яко молитвами святаго недостатки их вси исполни.[2031]

Убо и молебник дерзновенный не токмо о своей обители, но и о всех приходящих ко гробу святаго и просящих с верою помощи и заступления теплейший проповедается велегласнее всякия трубы к Богу: вопиют лиющаяся чюдеса, болящих от болезней востание, недугующих от недугов избавление, вредных от вредов очищение, беснующихся от бесов свобождение, огненнаго запаления церкве угашение,[2032] слепаго прозрение и прочая многшая, яже история жития преподобнаго сказует, имиже всеми чюднейшими пречюдне пречюднейшаго преудивляет и светлейшими пресветле всепресветлейшаго преусветлевает и высочайше превысокаго на высоте достойнства поставляет. Что к сим от дел самых преподобнаго хвалам риторских сокровищ хвалы и витийских цветов испещрения и софистических маргаритов златоблещения, еллинских блядословов изобретения? – Песок при злате, кал при цветущем алмазе, паче же сон при истине. И в лепоту сам Бог прослави угодника своего, по реченному: «Славящая мя прославлю».[2033] Сему грому, славу славящым Бога гремящу, вси хвальнии от человек бывающыя звуки умолчевают, и мы елико словствовавше²⁴⁸⁴ на честь святому, с молитвою припадше, о да будут, молим, просяще, яко о всех и о нас ходатайствовати, да получим милость в День судный.

Кто убо преподобный Кирил, и от места звания Челмогорский зовется?[2034] Убо ли от места и хвалу имать? Точию Кирил от места начало прият зватися, хвалу же, званию равную, припряже²⁴⁸⁵ от жития высокаго. Кирил преподобный чюден в доблестех духовных показася, пустыня, в нейже подвизася, свидетельствует: в нейже долговременно со зверьми поживе и от духов бесовских, мечетными²⁴⁸⁶ козньми устрашаем,[2035] претерпе и от скудости потребных, пищи, одеяния, обущь[2036] и прочих пострада. Кирил преподобный на верх добродетелей многими труды и поты взыде: уясняет²⁴⁸⁷ времяни долгота, отнележе в пустыню вселися и даже до отшествия своего в будущую жизнь неисходен труждаяся пребысть, егоже подвиги кто исповесть, разве Испытаяй сердца и утробы. Кирил преподобный ктитор и киновиарх премудр и преизящен бысть, усветлевает обители основание и храмов молитвенных и служебных згромаждение, и братии собрание иноков, и чредовождение²⁴⁸⁸ изрядное с Богом и хранение опасное иноческих должностей, и преспеяние²⁴⁸⁹ всеусердное превосхождений постнических, и конечное устаменение²⁴⁹⁰ в меру совершения возраста Христова.

Кирил преподобный чюдотворец велик златоблещает чюдесами, аки звездами. Жив некогда, виде келию, ²⁴⁹¹огнем текущи погорети чаему²⁴⁹¹: «Боже, в помощь мою вонми»,[2037] – возпсалмотисавшу²⁴⁹² святому, абие пламень, яко от воды, угасе (равно трием отроком, иже халдейскую: «Благословен еси, Господи Боже, отец наших»,[2038] – поюще, пещь огненную угасившым). Преподобный же видев таковое скорое посещение, возрадовася духом, воспеваше, глаголя: «На Господа упова душа моя, и помилова мя».[2039] [2040] Паки же разбойницы со Онеги реки, по прозванию чюдь белоглазая, прийдоша ко преподобному, он же уразумев злый их залог²⁴⁹³ разбойства и возвед очи свои на небо, моляся со слезами Богу, глаголя: «Не остави мене, Господи Боже мой, не отступи от Мене, вонми в помощь мою».[2041] Разбойницы же с великим прещением воспросиша его: «Старче, повеждь нам, где твое сокровище». Преподобный же: «В келии, – рече, – во угле²⁴⁹⁴», – имя рек: бе бо в том угле образ Богородичный с Превечным Младенцом стоящь. Разбойницы же вскочивше в келию и возревше во угол, реченный от святаго, и внезапу от святыя иконы искипеша лучи паче солнечных и приразишася зеницам²⁴⁹⁵ разбойников, и абие ослепше, падоша на помост и никако двигнутися не могуще. Помале же вниде святый и сам в келию и виде их лежащих: «Собирайте, – рече, – по что пришли есте». Они же просиша о согрешении прощения, плачющеся много зело. Преподобный, милосердовав, помолися, и в том часе абие прозреша, емлющеся по ногам²⁴⁹⁶, благодаряще святаго. Он же, запретив таковых ктому не творити, отпусти их.[2042]

Убо и провидения благодатию сияет преподобный. Ловец некий от дружины его послан бяше с рыбою ко святому, и пришед ударяше молитвою во оконце, преподобный же не даде ему ответа, той же, стужив, отиде к дружине своей, поведая. Они же печални бывше, глаголюще: «Еда²⁴⁹⁷ ты некий грех сотворил еси, ибо не туне²⁴⁹⁸ отвратися от Тебе святый». Рыболовец же поведа грех свой: нечисто тело свое от блудныя страсти. Рыболовцы послаша другаго с рыбою, преподобный же срете его и прият со благодарением посланное и, благословив, отпусти.[2043] И пророчествова, чему быти, и не солга. Некогда ис Каргополя пустыни Строкины игумен Иосиф прибытием своим посети преподобнаго Кирила, и беседующима има, рече ко игумену: «Отче святый, по моем отшествии от здешних имать Бог воздвигнути на горе сей другую церковь во имя Пресвятыя Богородицы. И место сие будет пребывание иноком» (еже последи и збысться). Таже рече ко игумену: «Отче святый, время уже приближися моего отшествия к Богу». Игумен же сотворив молитву и мир дав, целовастася о Христе и отиде. Преподобный же возвращся, затвори себе в келии, востав на всенощное правило. И по совершении правила прием кадилницу и сотвори святым иконам каждение и, малу болезнь ощутив, возляже на одр и преставися, вечным блаженным уснув сном, лета от сотворения 6876 (1367) месяца декабря в 8 день.[2044] И погребен бысть преждепомянутымь игуменомь Иосифом близ церкве Богоявления со удивлением, яко прорече ему преподобный свое к Богу отшествие, и збысться абие пророчество.

Не умали же ся чюдотворя²⁴⁹⁹ и по отшествии в будущий век преподобный Кирил, и не отлучися благодать Духа, юже трудов за возмездие притяжа, но сеяв слезами – веселием жнет и по смерти, по реченному: «Блажени умирающий о Господе, дела бо их ходят вслед их». Повествуется в житии святаго о образе, у негоже чюдо бысть таково: мних Антоний, слеп очима, многа лета неисходно в келии седяй, моля Бога и святаго отца в помощь призываяй. В то время, егда первый образ преподобнаго написан и на солнце сушитися изнесен, оный инок, предреченный Антоний, вышед ис келии, седя помышляя, добре ли написан образ святаго, понеже знаяше святаго отца, егда жив бяше, и, востав, дойде, идеже образ стоит, и, мир людем, ту стоящим, дав, глаголя: «Допустите мя ко образу святаго отца, да осяжут руде мои недостойнии и да целуют уста моя образ отца нашего». Братия же поставиша его пред образомь, он же, воздохнув от сердца, со слезами моляшеся преподобному; зряше душевными очима, приближися целовати, и внезапу абие прозре и телесныма, возгласив: «О, преславнаго чюдесе! Како изгнившая моя зеница ясно ныне зрят святый твой образ, старче Божий, воистинну бысть изображен по подобию, и се, твоим заступлением прозрех, вижу». Братия же, видевше таковое преславное чюдо, радости исполнишася и в церковь вшедше, молебствовавше, внесоша той святый образ и поставиша над гробомь преподобнаго, и доныне стоит покланяем приходящими верными во обитель.[2045] Сими и прочими безчисленными доблестей преподобнаго цветущими каменцы²⁵⁰⁰, нанизавше предражайший венец и с благоговением ублажающе, полагаем слову конец.

Блажен еси воистину, о, блаженне отче Кириле, яко священнаго Евангелия блаженства титулами славы вечныя зватися не от человек токмо, но и от самого Бога улучил еси, ибо «блажени нищии духомь» на твоем версе²⁵⁰¹ «яко тех есть Царство Небесное» лучи сияют; «блажени плачющии» на твоих ланитах «яко тии утешатся» светлеет; «блажени кротции» на твоем говении²⁵⁰² «яко тии наследят землю» озаряет; «блажени алчющии и жаждущий правды» на твоих персех «яко тии насытятся» престольствует; «блажени милостивии» в твоей душы «яко тии помиловани будут» владычествует; «блажени чистки сердцем» в твоем сердце «яко тии Бога узрят» царствует; «радуйтеся и веселитеся» в твоих сокровищах «яко мзда ваша многа на небесех» преизобилует.[2046]

Темже, блаженне отче Кириле, присно моля Бога о всех нас, к нему же яко имея дерзновение, да молитвами твоими спасет душы нашы.

²⁵⁰³И елико светилома двоима – Александром, глаголю, и Кириломь – просвещаему Каргополию, кружая, насытихся²⁵⁰³, толико преподобным отцем Пахомием[2047] аки солнцем озарен, зрети возбудихся: Пахомиемь, иже на уст Кены, из езера Кенскаго текущыя реки, подолг себе Пахомиеву напояющыя обитель, юже, якоже другий едемский рай, воздела, от основания водрузив, воздвиже святыя церкви во престольстви, жертвенники, аки точила точащыя кровь и воду, потче, вседневно закалаемаго и жремаго и никогдаже истощаемаго и снедаемаго агньца пречистаго Христа Бога.

Иноких четы собра и на чреды распредели и делати свое спасение и хранити наказа и оплотом законоположения общежительнаго огради,[2048] не крадомь от татей мысленных и не поядаемь от инок дивиих, утверди. И славится священным именем преподобнаго отца Пахомия и, яко тяжчайшимь камбаномь²⁵⁰⁴, повсюду благовествуется, проповедая самовидениемь ктитора чюдна, архитектона²⁵⁰⁵ дивна, киновиарха изрядна, отца велика и наставника спасителна,[2049] в самой той живша добре и богоугодне, и на высоту совершения востекша, и доблестей цветы духовными процветша, и плод трудов своих в житницу Царствия Небеснаго собравша, и духом тамо преселившася, останком же своих мощей и гробом, в немже почивает, светлеется во обители и, яко звездами, всюду чюдесы и знамении озаряем.

И не яко гроб прахом помрачается, но яко царьский престол почитаем светлеется и покланяем бывает всеми и не туне отходят тщима руками²⁵⁰⁶, но, яко требуют, обидно приемлют и, елико пожелают, вся добрая получают и, радующеся, возвращаются, благодаряще Бога, тако удивившаго своего раба, тако прославляющаго своего угодника, тако на свещнице церковнемь да светит всем церковным чадом, яко да видят добрая его дела и прославят Бога Отца, иже на небесех. Кто ли не удивится и слава единому премудрому Зиждителю Богу не воспоет: грады великия, многолюдством и богатством преизобилующыя, и не сия токмо, но и царства самыя и монархии, славою гремящыя и владетельми премудрыми и силными предводительствуемы и законами тминных²⁵⁰⁷ человек умов утверждаемы, от благостояния купно и от славы под солнцем отпадают и всеядца времене течением в небытие ниспадают – селища же Божиих угодников, яко преподобнаго Пахомия обитель, от единаго начало прият и нищетою богатеющим воздвижется и смиренно предводительству благочинствуют и от жизни сея в будущую преселися духом, останком телесе и гробом святаго наследствуема, присно стоит и не падает, изрядно цветет и не умаляется и именем зовема Пахомиева и не отменяется. Что сия и кая содержащая сила, яве по гласу сему: отвещав же Исус, рече: «Аминь, глаголю вам, никтоже есть иже оставил есть дом, или братию, или сестры, или отца, или матере, или жену, или чада, или села мене ради и Евангелия, аще не приимет сторицею, ныне во время се, домов и братии и сестр и в век грядущий живот вечный».[2050] Марк, зачало 46.

Оле, глас силы, глас Божий, колико действителен, егоже слыша, преподобный Пахомий, вся оставль, последова Христу: живый во время се – сторицею восприят, отшедый в век грядущий – живот вечный наследствует. Тем же силою Божия гласа действуяй благая и в грядущий вечный живот вознаследствовал еси, не забуди и нас, чтущих память твою, о, блаженне, еси бо ходатай, яко божественная благодать на тебе светлее солнца возсияла и вся притекающыя под кров молитв твоих просветила.

Благо же зде подчинити при корени и ветвь, израстшую и белоцветущую и благоплодствующую преизобилно, благовоинствующую же и мирисающую²⁵⁰⁸, от корени, глаголю, Пахомия, Кенскаго светилника, лозу преподобия израстшую и ветвь священия процветшую – Антония, Сийскую доброту,[2051] добре учением удобрившуюся и на верх доброты наставлением блаженнаго превозшедшую и всюду добрами детельми светлеющуюся. Антоний ученик не именем Пахомиев токмо, но и деломь подражатель:[2052] якоже бо и той обитель Кенскую воздвиже, такоже и Антоний обитель Сийскую от основания воздвиже и соверши. Прежде место бывшее пустыню нежительствуемую, лесы зарастшую и осеняемую темную, ²⁵⁰⁹зверми дивиими точию перомую²⁵⁰⁹ и птицы пустынелюбными паримую, [2053] яко виноград, воздела и насади и умножи, церкви водрузи, и келии назда²⁵¹⁰, и огради, и четы иноков собра, и насели, предав общежительства образ, молитв церковных и келейных, и в трапезе седания и ядения, и в хлебне и в поварне и в прочих службах чин служения и благочиния, отнюду же и ктитор изряден, отец и наставник предивен, игумен и вождь иноческаго изящен показася.[2054]

Кто же преподобнаго Антония в згромаждении обители, и в собрании братии, и во уряждении²⁵¹¹ жительства, и в наставлении на подвиг иноков спасительный и на прочая богоугодная воображения труды изчислит, яже тайная сердец Ведущему токмо единому вся ведома; киих ради и благодати сподобися и чюдотворения дар прият.

Повествуется в Житии святаго о иконе Святыя Троицы, юже преподобный повеле написати иконописцу и сам способствова, понеже от юности, учився, искус имяше, и Дóндеже писаша, на пост и молитву бе упражняйся.[2055] И некогда по заутреннем пении забывшу пономарю свещи угасити, от неяже загореся церковь Святыя Троицы, не случившимся самому преподобному, ниже братии во обители, абие же возвещено бысть и притече з братиею, но ничтоже успеша, пламеню велику возвысившуся. Преподобный же аще и о церковней возгорении оскорбися, но о образе Святыя Троицы рыдание к рыданию и плачь к плачю прилагая, глаголаше: «Увы мне, грешному, яко не прияти Быша молитвы моя пред Богомь и труды моя ни во что же вменишася, яже простирах о святем образе сем! Упование бо имех, да образ сий святый на вечное поминание будет грешной душы моей». И церкви уже в пламень превратившися, внезапу икона Живоначалныя Троицы сама изыде ис пламени, никимже носима, и среде монастыря обретеся. Преподобный же Антоний, яко узре икону среде монастыря стоящу, притек к чюдотворней иконе, паде к подножию ея, со слезами многими благодарение воздаваше. Братиям же стекшимся на чюдо и видевше икону, прославиша Бога, творящаго дивная чюдеса рабомь своимь во спасение.[2056]

Предивный Бог в чюдесех и паки прослави угодника своего преславным чюдотворением образа чюдотворнаго. Бывшу наместнику на Двине болярину князю Димитрию Жижемскому, у него же раб беяше именем Ияков, падучим недугом зле страдаше, от нечистаго духа зело мучимь. Болярин же той присылает его в монастырь Живоначалныя Троицы к преподобному Антонию игумену, веля ему молитву сотворити, да исцелеет раб его. Святый же моли Живоначалную Троицу и Пречистую Богородицу о беснующемся человеце. Бог же и Пречистая Богомати не презреша молитв святаго своего угодника Антония, но, егда приложиша беснаго ко образу Живоначалныя Троицы, тогда от приложения того абие исцеление получи молитвами святаго и отиде в дом свой радуяся, славя Бога и преподобнаго Антония.[2057]

И второму болярину именем Василию Воронцову, наместнику же на Двине, егоже рабу именем Самойлу случися падучая болезнь, ему же страждущу люте и гласы нелепы, яко волу, испущающу и зубы скрегчющу, и едва от многих привлечену бывшу во обитель святаго. И по совершении молебнаго пения преподобный приложи беснаго к чюдотворному образу Живоначалныя Троицы. И в той час бесновавый от недуга своего исцеление получи молитвами святаго: начат смысленне и разумне глаголати. Полагает же и обет пострищися во обители преподобнаго Антония, и тако отиде в дом свой, славя Бога и Пречистую Богородицу и преподобнаго Антония.[2058]

Убо и прозорливаго дара благодати преподобный Антоний не лишися: юнному брату от ученик святаго, Филофею именем, бориму унынием, и вложи ему враг рода християнскаго отити в мир и розстрищися и жену пояти. В таковей же ему страсти намнозе бориму, человеколюбивый же Бог не хотящь смерти грешным, влагает ему во ум ити в пустыню и благословитися у преподобнаго. Егда же прииде в пустыню ко блаженному, тогда узре его преподобный и возгласи к нему со смирением и тихим гласом рече ему: «Что, чадо, прииде семо, от помысла зла смущаем? Хощеши в мир отити и рострищися помышляеши и утаити мене мнишися?» Юный же инок яко услыша от преподобнаго отца тайну свою извествуему и видяше, яко не утаися, и притек, припаде пред ногами преподобнаго, исповеда вся помышления своя и просяше прощения о согрешении своем. Преподобный же воздвиже его, глаголя: «Востани, чадо, и престани от слез, Бог да простит тя». И поучив его пещися о спасении своем, отпусти.[2059]

И паки кто не удивится Христову проречению и не почтет за велико, егда ловившим апостолу Петру с прочими и ничтоже уловити могшим, по гласу же Господню ввергшим мрежю и яша много множество рыб.[2060] Кто не удивится и преподобнаго Антония прозрению: приспевшу бо празднику Преображения Господня, и ловцем, ловившим рыбы нощь всю и ничтоже не могшим уловити, потязуемым же яко ленивым от преподобнаго, извествующым вся места ловившым, глагола им преподобный: «Вем, чада, труд ваш и аз, но еще поедите к Красному Носу и вержите мрежу тамо». Они же, крепящеся, глаголаху: «Всю нощь трудихомся, и паки ли повелеваеши?» Он же с кротостию рече: «Но обаче сотворите послушание и узрите славу Божию». Они же, благословение вземше, ввергоша невод по словеси святаго и яша множество рыб, яко николиже бывало толико, и, ядше рыбы, вся братия прославиша Бога и Пречистую Богородицу и преподобнаго Антониа.[2061]

Но якоже кто бы в рай цветущий различными блески блещащимися вшед и размотряя надолзе, ²⁵¹²умножи желание к прочим зияти²⁵¹², тако и мы, ²⁵¹³в предних размотряя²⁵¹³ цветы доблестей, рая – преподобнаго Антония жития – возраст<их>ом²⁵¹⁴ желание к прочим зияти. Повествуется во истории о преподобнем, яко по еже соградити обитель и братию собрати и вся добре устроити и, единаго от ученик священноинока Феогнаста избрав, паству свою ему вручи и пещися повеле. Сам же преподобный с единым братомь тай²⁵¹⁵ отиде, никомуже ведущу, ²⁵¹⁶недоволно благоразсуди на совершение оныя обители згромаждение и братское попечение и прочая²⁵¹⁶, яко любя безмолвие, еже есть корень безгрешию. И вниде в пустыню, идеже потче²⁵¹⁷ хижу и часовню устрой во имя святителя Николы и нача труды к трудом прилагати. Оле, многострадателнаго трудника, распали бо ся душею на течение духовное, яко елень на источники вод, пия нектары умиления и страха, чаши воздыхания и плача, фиалы сердечнаго дрогания и слез, чреждение²⁵¹⁸, непрестанное пение и молитвы, утешения всегдашний пост и воздержание, ²⁵¹⁹происхождения комаров и мшиц стужение²⁵¹⁹, непочивания нощию, ²⁵²⁰в жерновах наг до пояса, убодаем стрецалами несекомых, томление²⁵²⁰; молчанием прохожу безчисленныя в правилех поклоны, священных псалмов пропитание, святейшия Исусовы молитвы благоговейное учащение и огнепалное духа выспрь зрение рук с воздеяниемь и протяженное со страхом «Судии живых и мертвых, помилуй» звание.[2062] Отсюду блаженный страдалец явися столп непоколебим от всех наветов вражиих, притекающим к нему, светилник, просвещаяй сущыя во тме греха, солнце правды заблужшим в беззакониих, приводя к востоку света благоразумия, источник неистощеваемь исцеления болящим страстьми душевными и телесными; море, окружающее всех благих исполнений требующыя. Темже моли Бога, молим тя, чтущим святую память твою подати грехов прощение и велию милость.

Кто зде место похвалам приимет, кто почести хваления ряд получит, кто ублажения чин наследит? – Явственно той, иже ученику Христову нощному тезоименством сравняется, той, иже погребению Оживившаго мертвыя послужившему соименством возглашается, той, иже положившему во гроб Испразднившаго гробы, Никодиму праведному[2063] подобноименно и Никодим преподобный Кожезерский[2064] именуется. Поживе убо мало во оной обители и дивен бысть всем Никодим, пресветлое светило пустыни Хозьюския, в нейже, изшед из обители, крыяся и елико пустынным мраком скрывашеся, славы и чести человеческия бегая, толико доблестей светом всю Каргополию освети и елико желая неведом быти никим же близ мирской чади живущим, толико святостию, яко молниею, возблесне даже до самого патриарха Иоасафа Московскаго, иже с молением посла шубу, да молится о нем Богу.[2065] И елико мняшеся уже сокровен под сенами²⁵²¹ частых гор и лесов и дебрьми непроходимыми окружен, толико постничеством и воздержанием, яко хризолив²⁵²² железо, четы иночествующих привлечаше и на постничество и воздержание собою воображаше.

Тем же не ктому сокровен²⁵²³, но всем ведом и яко легким пером всюду славим бысть и не ктому уединен и под сенми гор, но многим братии отец велик и взорен²⁵²⁴, и не ктому дебрьми непроходными от приходящих неведом, но, яко от морских волн во пристанище, от мирскаго жития во мнишеское восходити наставник и вождь чюден явися. ²⁵²⁵Неоткуду сия изрядная прибыша преподобному, негли понеже славнаго града Ярославля гражданин бяше, – никакоже²⁵²⁵. Сам убо по благости его Бог на смирение раба своего призре и, еще младу сущу ему, со скоты в пусте месте пасущу, слышавшу свыше глас сице: «Никодиме, Никодиме»,[2066] – имже именем последи, егда пострижеся, наречен бысть, ибо от святаго крещения Никита нарицашеся. И се паки бывшу ему в Москве и виде на месте, зовемом на Кулишках, человека именем Илию, живуща в наземной кущи²⁵²⁶, иже, пришедша его близ кущи возгласи: «Откуду убо семо прииде хозьюский пустынник»,[2067] – юже пустыню напоследок достиже и многа лета постничествова. И виждь ми, слышателю, благодать проречения и сбытая²⁵²⁷ истину и удивися. И кто, аще не Бог, сице возва и в сбытие на преподобнем соверши, во истину по реченному: «Ихже Бог восхоте, тех и прослави, а ихже прослави, тех и оправда».[2068] И понеже званный гласомь «Никодиме, Никодиме», ²⁵²⁶бодяше присно зовемаго²⁵²⁸: «Что есть?» – приходит убо в монастырь архангела Михайла, иже наричется Чюдов, в Москве, и молит архимандрита Пафнотия, иже потом митрополит бысть на Крутицах, да облечет его во образ иноческий, еже и сотвори и нарече имя ему Никодим,[2069] и не всуе имя нощнаго ученика получи, но и дело, подобное званию, показа: вся убо нощи бдением и в молитвах стоянием, постом же и воздержанием сердце свое согнетая и плоть истончевая и слезами и воздыханием и воспоминанием смерти смиряя себе и сокрушая. И тако преспевая не укосне в новоначалных, но чюден во отцех является.

Ельма же Ведый промысл ведяше на место прореченное, возревнова абие духомь уединитися преподобный Никодим и умолив митрополита Пафнотия и благословение приим, устремися в путь, глаголя: «Настави мя, Господи, на путь твой, и пойду во истине твоей»[2070]. И прииде в Кожезерской монастырь, несый с собою благословение отча Пафнотия митрополита – икону Пресвятыя Богородицы.[2071] Есть же оная икона и доныне в Кожезерском манастыре покланяема от всех. И пребысть преподобный в монастыре лето едино и месяц 6, любим и почитаем всеми, еже тяжко себе вменяше, по гласу Великаго Афонасия: «Якоже ржа снедает железо, сице снедается и мних от славы человеческий, аще сердце его прилпнет к ней». Отиде убо от обители преподобный во внутреннюю пустыню на реку, нарицаему Хозьюга,[2072] и виде, яко збысться проречение, на Кулишках от кущника Илии прореченное, еже «откуду семо хозьюский пустынник пришел». И глаголаше к себе: «О, смиренный Никодиме, се обрел еси место, предуготованное тебе ко спасению, восприими убо в малое сие время и подвизайся во единонадесятый час. Вечер приближился есть, и мздодавец Христос грядет со славою».

Брани же и одоление его на духи лукавствия и на страсти плоти, яко многи и тяжки зело, иже венец совершения всех доблестей указует благодать дарований сице. Еще бо живущу преподобному в лето 7138 (1630) человек именем Кириак, зовомый Козлов, и с ним Иоанн Максимов прозванием Пешков, пришедше во обитель святаго Богоявления помолитися и поведаша настоятелю и братии, яко пловущим им по морю и от належащыя²⁵²⁹ бури и от ледов отчаявшимся живота своего и молящеся со слезами Богу и Пречистей его Матери, призывающе и всех святых, еже спастися от потопления. «Егда же помянухом и преподобнаго отца Никодима, молящеся, да помолится, и абие в сон тонок сведени быхом и видехом в лодию нашу пришедша старца, и рече: „Знаете ли хозьюскаго пустынника Никодима, егоже призываете в молитве?» И се рек, ста на корме, лодию ко брегу управляя, глаголя: „Не бойтеся, чада, но все упование свое возложите на всесилнаго Бога». И бысть нам путь чист ко брегу, аки река, молитвами преподобнаго отца Никодима».[2073]

И паки прежде преставления явистася преподобному святитель Алексий митрополит и преподобный Дионисий, архимандрит Сергиева монастыря, глаголюще: «Се бо Господь <посла>нас к тебе возвестити о преставлении твоем, се бо имаши восприяти благая Иеросалима, яже уготова Бог любящим его». И по сем прииде в монастырь, умолен настоятелем, и 47 дней пребыв, преставися в вечный покой, свидетельствующе Богу исход душы его благоуханием, ис келии исходящым, еже игумен и братия мнози видеша очима и обоняша, и прославиша Бога.[2074]

По преставлении же преподобнаго многа Быша знамения и чюдеса, имиже прослави Бог угодника своего, ихже за множество оставихом, от всех же обаче удивляем предивный, превзыде на высоту похвалы и ублажения, ему же яко сравняющуся святым, Церковь святая память торжествовати устамени²⁵³⁰ и с веселием духовным во псалмех и песнех празднует и ликовствует, молящи, да ходатайствует о нас, чадех ея, воеже молитвами великаго спастися нам.

Но и Диодор Юрьегорский[2075] не недивен и во всей Каргополии не неведом, убо и во всей России не неславен. Диодор яко претеплый отец пустынных питатель, тако и жития их и безмолвия огнепалный ревнитель, и елико на бесы крепкий ратник, раним на теле, не изнемогаше, но молитв стрелами на сопостаты стреляше, тако храбро, яко с воплем чрез езеро бежащыя прогоняя, немощь их обличаше.

И елико на страсти силный одолетель, постом и воздержанием изнуряем, доблественно телом терпяше, но душевным желанием распалаем, усердствуя на слабость и малодушие ревностию, по Давыду, яко на голиады пращи меташе,[2076] тако мужественно воста и ²⁵²⁹без вести от себе сотвори²⁵³¹, яко не ктому борити востаяти, но плещи дати²⁵³² и бегати и смертно ниц падати. Диодор Соловецкаго отока ошелник, пустыни того же острова ошелников всеусердный служебник, пищею оных пустынников пустынное овча травою питаем:[2077] «Посещаяй, посещай ошелников, да и сам посещен от Бога», – увещаем, наг ходящь зимою, рек к Диодору, и абие гоним невидим бысть Никифор.[2078] Диодор же болшею жалостию воспалися и ошелником оным питати в нем же надолзе потрудися.[2079] Диодор пустыни Юрьегорския населник, юже воздела и яко рай насади, монастырь от основания воздвиже, церкви водружи и всякими лепотами украси,[2080] четы иноких совокупи и делати спасение наряди и добре труждатися и преспевати на лучшая устреми. И на толикая возведе, на коликая сам востече, и тамо постави, идеже сам стати получи. Глаголаше к братии, уча со апостолом: «Подобии мне бывайте, якоже и аз Христу».[2081] Темже и взирающии на нь, аки в зерцало, уподобляяся оному, воображахуся всеми добрыми во образ преподобнаго, и прилично бяше глаголати: «Процветаху, яко садове при реках и яко крини селныя на нивах, сторично добродетелей плоды Богови в пренебесный мысленный жертвенник приносяще, полагаху».[2082]

Диодор преподобный, егда нача здати на горе Юрьеве церкви во славу Святыя Троицы, тогда взаимно прослави его чюдотворением Святая Троица: положившим убо здателем²⁵³³ основание, абие под горою шум и крик бысть и гора начат трястися, елико здателем смястися²⁵³⁴, не можно бяше стояти, но падати. И от страха прибегоша к преподобному, поведающе трясение горы, отрицающеся ^253Зи здати²⁵³⁵. Оному же изшедшу ко основанию храма и сотворшу молитву, и «Достойно есть», и прочая, и отпуст, и покропившу водою священною основание и место все, и рекшу: «Не бойтеся», сяде на едином угле. Здателем же повеле на других углах рубити, в то время под горою паки шум и крик и трясение велие бысть. И егда наздаша²⁵³⁶ три венца, тогда шум и крик изыде с-под горы в Юрьево езеро, вопия разными гласы: «Блядивый, блядивый, изгнал еси нас из жилища нашего», – и чрез езеро прешед в лес, ломя древие, из слуха изыде.[2083] И по сем совершиша церковь мирно, славяще Святую Троицу, яко святаго Диодора молитвами бесовское мечтание погибе.

И паки. Некогда во обители скудости бывши и братия розитися²⁵³⁷ хотящим, Диодор же преподобный моли Бога, глаголя: «Господи, не остави нас уповающих на тя»[2084]. И се предста ему старец светолепен и рече: «Не малодушствуй и братию укрепляй и ловите во езерах рыбу». И абие невидим бысть. Таже второе и третие той же светолепный старец явися, Диодор же, яко и апостол Петр, мняшеся сон зрети,[2085] и явльшемуся повеле молитву сотворити. Той же крестообразно руце простер, возгласи молитву Исусову и вниде в сени и «Достойно есть» изрече, еже зря Диодор и светлости лица явльшагося не стерпев, паде ему на нозе, глаголя: «Господи мой, кто еси таково попечение имый о нас?» Он же отвеща: «Аз есть постриженник Кирилова, игумен же Ошевенскаго монастыря, имя мое Александр. Посем, Диодоре, не скорби», – прирек, и прочая, и невидим бысть. Святый же прослави Бога, творящаго дивная угодники своими.[2086]

Убо и по преставлении преподобнаго[2087] не оскуде благодать молитвами его действовати преславная чюдеса. Во обители той человек живяй, Андрей именем, многа лета и сый в возрасте юннем, согрешая ручным осязанием и очным зрением, и попущением Божиим нападе на очи его мрак, аки мгла велия. И много поискав помощников, не обрете. И прииде ко гробу преподобнаго отца Диодора и припаде, плачася, исцеления прося, очи утирая покровом гроба и клобука Диодорова частию и главу свою. И в том часе молитвами преподобнаго Диодора исцеление получи в лето 164 (1656). И помале той же мужь прииде в забвение, и бяше грехолюбия в помыслех, и, спящу ему, явися преподобный Диодор, запрещая ему, глаголаше: «Не согрешай, не согрешай, да не постраждеши болезнию, яко и прежде». И паки помале уклонися мысльми к любодеянию и падеся в грех и по том падении болезнию телесною объя бысть. Таже помяне запрещение святаго и моли Господа Бога и Пречистую Богородицу, призывая на помощь и преподобнаго Диодора. И бысть легчае и потом совершенно исцеле.[2088]

Темже таковыми чюдотворении и прочими не в Каргополии точию чюден просия Диодор, не во обители Юрьегорской токмо прославляется преподобник, не в соборе Юрьегорскаго монастыря едином поется блаженник, но и во всей России ведомь, во всех градех российских чюден, и во всех соборех и обителех поется, и достойно, яко угодник Божий, ублажается,[2089] по реченному: «Весть добродетель честь даяти стяжавшим ю».[2090] Убо и на небеси со всеми благоугодившими в Церкви первенец сравняется и лица Божия зрения наслаждается, по гласу: «Яко кто во облацех сравнится Господеви, уподобится Господеви в сынох Божиих».[2091] Отнюду же и дерзновение имать и на земли сущыя славящыя святую память его назирати и просимая тем полезная подавати, ихже и мы не лишитися, о, преблаженне, даждь, помолимся.

И понеже по единому кийждо в частех собственных похвалами своих доблестей, яко златыми изваянии, солнцезрачно позлатишася преподобнии отцы Александр Ошевенский с прочими и славою, юже от дел славных притяжаша, превзыдоша даже до конец не токмо Каргополии, но и всея России, не погрешит, кто возглаголет – и всея земли, по пророку: «Восхвалятся преподобнии во славе и возрадуются на ложах своих».[2092] И даровании благодатными, имиже Бог обогати и удиви, сравнишася великим, в чюдесех просиявшими мужем, иже тии живи суще и по смерти чюдодействоваша, таковая же и сии и ничимже меншая, живи суще и по смерти чюдеса и знамения содевающе, просияша. Их же обще, яко златоплетенныя пленицы конец, маргаритами²⁵³⁸ доброты преподобных отец нанизующе, окончеваем сих священная жизнь, преславная деяния, пречюдная натрижнения, пребогатая имства²⁵³⁹, вся неизреченна, вся преестественна, вся удивления преисполнена, доброта добрых, вседоброе изображение, неисповедимыя доброты Божия и зерцало пресветлое несказаннаго великолепия его, величество великих, пространное вместилище, вмещающее в себе неизмеримую благодать Божию, премудрость премудрых; книга откровения, показующая задних и предних тайн Божиих сокровенных; огнепалное желание благих неотлучное, слоение²⁵⁴⁰ хотениом спасителных хотений Божиих, крепость всемощная, всекрепчайшия десницы Божия помощь, всесилно сокрушающая духи лукавствия; правда праведных, мерило правды истиннаго правдосудия Божия, пребывание неотменное в добродеянии, гора среди моря, биема волнами, в пены разсыпующая приражающыяся²⁵⁴¹ тей волны; слава превознесенных, пресветлыя солнца мысленнаго лучи, протекающыя вселенную, власть самовластных, человеком спаси, бесовом бози, страстем господие, по премудрому Лествичнику.[2093] Таковый благодатнии источницы, напаяющии и оживляющий душы, жаждущыя спасению. Таковии благоуханнии сади райстии, облагоухающии горесть и зловоние страстей сердец человеческих. Таковии животнии тученоснии облацы, изливающии нам милосердия Божия всеспасителный дождь, пресладкая Божия уста, изведшая многих от заблуждения жития многострастнаго на путь Царствия Небеснаго; друзи Христовы ближнии, венценосцы Иеросалима вышняго, яко делом всякую добродетель исполнивший, тако словом многи человеки добродетелем научившии, по гласу великаго Бога: «Иже сотворит и научит, сей велий наречется в Царствии Небеснем».[2094]

О, шестокрилнаго вида виденнаго Исаием серафимовидцем шесточисленное изображение,[2095] шестерица отец преподобных, призрите ныне от высоты Небеснаго Царствия на чтущыя вы с верою, и торжествующыя честно памяти вашы, и притекающыя к ракам мощей ваших любовию, и прославляющих богоугодныя подвиги ваши со усердием. Призрите на ны, смиренныя и паче всех живущих на земли уничиженныя, содержащие ваше благочестие, имже вы спасостеся, имже Богу благоугодисте, имже служисте Царствие Небесное наследовасте. Просим, виждте нестерпимыя беды, обстояния злая, наветы лукавыя, напасти неизбежныя и милостивное избавление, молим, припадающе, нам дадите, и в тихое и мирное в жизни сей житие устамените²⁵⁴², и отсюду в будущую жизнь без препятия воздушных мытарств проведите, и Царствию Божию сподобите, ему же слава ныне и во вся веки. Аминь.