Анонимные сочинения первой половины XVIII в.

Житие и подвизи выгопустыннаго отца Иоанна, иже Внифантьевичь именовася, иже ныне в северных странах за Мезению в нетленныx мощех почивает

Сей блаженный отец наш Иоанн – колское воспитание, выгопустынное обучение, Мезени же и прочим северным странам благодатное осияние – родися убо в студеной северной стране, во граде или острозе, нарицаемем Кола, в лето от создания мира 7167 (1659), от християну и верну родителю, отца Внифантия именем и матере Екатерины, иже по умертвии мужа своего воздержным и постным житием пребываніе, чрез день постную пищу приимая, даже и до смерти своея тако препроводи, во иноческом образе наречена быст Евфимиа.[1640] Такоже и сына своего, сего блаженнаго Иоанна, воспита во всяком благочестии и чистоте, иже последи от отец свидетелствован быст девственник от чрева матерня. Пребывая бо блаженный, якоже научен от родителю своею²⁰²⁶, во страсе Божии, смирении же и кротости, в любви нелицемерней, долготерпении же и безгневии глубоком, и просто рещи, во всяком благочинии. И всегда смерть пред очима си имея, ходя и седя, идя и пия, и страшное Христово Второе пришествие помышляя, праведных убо почести, грешных же мучения воспоминая, умиляшеся.

Научен бо бе блаженный от родителю своею от юности книжному учению. Тем и часто прочитан Божественная Писания, умиляшеся и слезы теплы всегда ко Господу проливая, яко да наставит и на пут спасения и части святых да сподобит. Ненавидя же блаженный юнных играния и глумления²⁰²⁷ и зело от них удаляйся. Прибегая же в церков Божию на молитву, но и тамо слыша и видя в славословии Божии церковная пременена и оскорбляшеся о сем зело и. сетуя, хождаше.

Тем и от новолюбцев чина, глаголю же Никонова нововводства любителей, познаваем бяше, яко не согласен им бе. Крестное бо знамение на себе, якоже от родитель своих от детска²⁰²⁸ и от Божественнаго Писания научен, двема перстома воображая, по Кирилу Иеросалимскому, исповедая Распятаго на челе со дерзновением персты, не стыдяся; и по Петрову Дамаскина словеси, еже два перста, а едина рука являя единаго Господа нашего Исуса Христа во двою естеству – в Божестве и человечестве.[1641] Ведый убо блаженный сей от Святаго Писания, яко Христос плотию пострада, а Божество его безстрастно²⁰²⁹ пребыст. Тем и триперстнаго крестовоображения зело опасаяся и трегубаго аллилуия с приглашением еже в четвертый «Слава тебе, Боже», такоже и прочих новин бегая, да под анафему не подпадет. И по книгам, с новинами печатанным, службы опасаяся. И двочастным крестом назнаменанных просфор не приимаше. За сия от новолюбцев оскорбляем и утесняем бе зело. И что сотворити, недоумевашеся.

Прибегает убо ко всемилостивому и всесилному Богу на молитву, припадает тепле, проливает многия и горкия слезы, просит милости и заступления. Вопиет умилно, глаголя: «Ты, о, Владыко, создал мя еси, ты и помилуй мя, аз бо не вем, к кому прибегнути. Пастырие о стаде своем не брегут,[1642] еже пещися²⁰³⁰ о спасении преданных им душ, но возлюбиша сластолюбие, пиянство же и пирогощение²⁰³¹ и славу века сего и лжу²⁰³². Оставльше бо Священное Писание и Никону нововводителю последоваша. Гоняще, вяжуще же и в темницы предавающе иже двема персты знаменующыяся. Истиннии же пастырие, отец Павел епископ Коломенский,[1643] Аввакум протопоп,[1644] Лазарь священник,[1645] Феодор диакон,[1646] иноцы Епифаний,[1647] Аврамий,[1648] Иоасаф[1649] и прочии многочисленнии, еще же и соловецкия отцы за содержание благочестия еже по старопечатным книгам московский печати (по нихже и аз, раб твой, спастися надеюся) многими и страшными муками замучени Быша. Такоже и прочий иже от соловецких отец, яко семя благочестия, на то от Соловецкия обители отпущеннии отцы, различными смертьми скончашася.[1650] Прочее²⁰³³ к кому прибегнути ми, не вем. Ты убо, Творче мой и Создателю мой, настави мя, и буди воля твоя». И тако возложи упование свое на всесилнаго Бога и претерпевая досады, поношения же и утеснения от новолюбцев.

И по сих услыша, яко и еще есть осталцы от соловецких отец, якоже некая искра, оставшая в пепеле, тако и сии, в пустых и непроходных местех крыющеся, пребывают.[1651] О сих убо зело возрадовася душею, «яко обретаяй корысть многу»,[1652] и множае подвижеся на любов Божию. И совещався со своими сродники, ища по многим пустыням около Соловецкаго моря, и многих обрете, не токмо Соловецкия обители, но и Кириловы Белозерскаго и Корнилиевы Вологоцкаго[1653] и прочих, по разным местом, а множае в Выгорецкой пустыни: отца Корнилия, постриженика суща Корнилиевы обители, суща леты 120, а пострижена бывша 12 лет и живша с патриархи Московскими Ф<иларетом>, Иоасафом, Иосифом и со Авфонием митрополитом Новгородским.[1654] И Авфонию убо старостию изнемогшу, и Никону на Авфониево место на Новгород<скую> мит<рополию> пришедшу, и Авфоний о Никоне нечто прорече и по умертвии своем погребалная пети Никону отречеся, псков<скому> же митрополиту погребалная над ним отправити повеле.[1655] Такоже последи отец Досифей, игумен Беседнаго монастыря иже на Тихфине, и отец Пимин соловецкой, случившася оба во едино время в Новеграде и видеста тогда Никона, мит<рополита> суща, 5-ю персты благословляюща люди, иже последи един от нею²⁰³⁴ и Корнилию сказа, и Корнилий и сам такоже видев,[1656] чесо ради оттогда²⁰³⁵ к пустынным местом уклонися, плачеся и рыдая и Бога моля, да устроит полезная, бе бо Никон потаенне тако действуя. Сей Корнилий отец муж зело добродетелей и бестрастия достиг и пророческа дара сподобися, яже прорече – и сбышася. Такоже и прочий отец соловецких: отец Виталий, дивен муж и зело нестяжателен, духовник отцу Корнилию; такоже отец Генадий и отец Серапион и прочии.[1657] Отец же Даниил, аще и в белеческом образе сый, но зело боголюбив и по благословению отца Досифея игумена и отца Корнилия и прочих отец со отцем Андреем, зело разсудителным и в Писании ведущим, устроиста²⁰³⁶ общее житие при реце, именуемей Выг.[1658] Гонению бо тогда на староверцы утишившуся, великодержавнейшему бо тогда государю царю Петру Первейшему престол великороссийскаго царствия держащу и благоразсудившу не гонити староверцы, зане прародителей его царских книги держат.[1659]

И тогда убо, егда общежительство созидашеся, прииде сей блаженный отец Иоанн в лето 7205 (1697) ко отцема Данилу и Андрею со прочими своими сродники во общежительство[1660] и, видев благодат Божию, возрадовася зело: виде бо толикое множество о Христе собранных отец, сединами украшены, при едином месте суща и яко аггелы Божия вменяя быти я равноаггельнаго их ради и высокаго жития, и братию о Христе, во смирении живущих и настоятелема²⁰³⁷ повинующуся с безмолвием, яко самому Богу, и друг другу поклоняющуся до земли, – виде бо, яже николиже видел есть. А наипаче же виде толикое множество божественных книг и отцы премудры и разсудителны зело, напоени бо, яко от едемскаго источника, от Божественных Писаний. Свидетель сему иже по скончании блаженнаго Иоанна сотворенныя ими ответы, яже по указу императорскаго величества от Синода посланному иеромонаху Неофиту истязати староверцы о содержании благочестия по старопечатным книгам.[1661]

Сицевы убо премудры, раз<с>удителны же и боголюбивы предводители блаженный видев, вдаде себе онем в послушание и яко самого Бога без всякаго размышления послуша их с верою и братию яко земныя аггелы быти вменяя. Сице убо блаженный и сам подвижеся на всяко дело благо, телесне убо в заповеданных ему службах усердно подвизаяся, духовне же от духовных отцев заповеданная ему посты и поклоны усердно исправляя и молитвенная Господеви предстояния умилно и со многими слезами совершая. Во время же ручнаго дела умне Господеви моляшеся, внутреннее делание непрестанное имея, по писанному: деянием боговидения восход обретая. И никогдаже кто виде его смеющася или глумящася или праздная глаголюща, но и самая та нуждная яже к потребе со многим смирением и говением²⁰³⁸ краткословне вещающа, якоже подобает рабом Божиим. Внутрения же своя помышления часто отцем духовным блаженный исповедоваше.

В свободное же от заповеданных ему служеб время из книг выписывая себе потребная, ова²⁰³⁹ ко славословию Божию, яже на молитву, ова же ко обучению ума своего и ползе духовней. Писание же руки его не зело хитро²⁰⁴⁰ бяше, обаче зело усердствоваше еже писати, и не обретая хартии чисты, за скудост стяжания²⁰⁴¹ тогда во общежителстве, мирских дел скорописныя книги, яже во употребление лестовочнаго дела²⁰⁴² сут, тыя разбирая и, идеже праздно²⁰⁴³ место между строк обретая, писаше,[1662] якоже древнии отцы заповедаша, глаголюще: аще обрящеши словеса отца Афонасия, не обрящеши же хартии, на ризах своих напиши, тако и сей раб Божий творяше.

Видяще же выгопустыннии отцы таковаго усердна суща в дело Божие и могуща немощи немощных носити, учиниша того обучителя²⁰⁴⁴, надсмотрителя же и казателя²⁰⁴⁵ юнным, иже от мира пришедшим: бе бо тогда вново собирайся общежителство, да обучает я, якоже подобает, пустынному и общежителному свойству и книжному учению,[1663] и не попущая посреде братии молвы творити, но бе им особая келия и около ея особое ограждение стеною ограждено.[1664] Якоже и Великий Евфимий голоуса²⁰⁴⁶ кого не постризаше во своей лавре, но отпущаше к спостнику своему Феоктисту,[1665] сице и зде выгопустыннии учиниша, и бе сей блаженный Иоанн новый Феоктист. И пребыст убо блаженный и в сей службе время немало.

Таже потребе бывши отцем еже послати того к братии того же общежителства, сущим за послушание труждающимся в ловитве зверей, общежительных ради нужд, в северных странах, близ Студенаго моря, между Мезению и Пустозером, на месте пусте о речку, именуемую Пеша, или Пьоша (бе бо место оно выгопустынное, идеже общежителство учинися, зело нужно²⁰⁴⁷ велми всеми потребами, якоже напреди объявих, и сея ради нужды мирскою чадию²⁰⁴⁸ ненаселено бе, да не реку, и незнаемо непроходимых ради блат).

Послаша бо того отцы к братии могуща и в ловитве спомощствовати и в нуждах и скорбех и печалех во удалении от общежительства далее 1000 верст пребывающих утешити, и не токмо братии своей, но и окрест сущих, такоже зверей и рыб ловящих и к братии приходящих, ползовати житием своим могуща. И пребыст сей раб Божий Иоанн в службе сей 19 месяц, и впаде в недуг телесный тяжек зело и боле в недузе том седмиц²⁰⁴⁹ пят, ни ядый, ни пия, и до толика исше плоть его, яко точию кости едины видети кожею покрыты, якоже тростие сухо суще в мешце²⁰⁵⁰, и знаемым его не бе мощи познати от вида, точию от гласа.[1666] В пятую же седмицу боления его нача ко Господу Богу вопити со многими слезами, да сподобит и святаго просвещения (бе бо сего отдавна некий²⁰⁵¹), еже и получи от некоего боголюбива брата, Луки именем,[1667] по утренем славословии в последнем часе нощи. И по сподоблении таковаго дара, зело рад и светел быст видением и на своих ногах несколико места прешед и Богу помолився, возлеже паки на одр свой.[1668]

В той же час, в онже Иоанн сподобися благодатнаго дара, бе ин²⁰⁵² общежителный брат, Симеон, егоже вси ведят²⁰⁵³ житием искусна суща, случися во иной келии вдалее за 20 поприщ или верст, по утренней молитве ожидая совершеннаго дневнаго света, да пойдет на ловитву²⁰⁵⁴, порученную ему, и бе седя и молитвы Господеви творя и мало воздремався, видит некоего общежителнаго клирика Иоанна именем, брата суща предпомянутому настоятелю Андрею,[1669] чтуща книгу и глаголюща: «²⁰⁵⁵Иже за послушание живет²⁰⁵⁵, тому грехи отпущаются, да Ивану Внифантьевичю грехи отпущаются». И возбнув, дивяся, в себе помышляя²⁰⁵⁶, что видение се, недоумеяся²⁰⁵⁷, и паки помыслив, еда²⁰⁵⁸ преставился есть Иоанн Внифантьевичь.

И в другий день востав, прииде, идеже бе Иоанн, и виде того и еще жива, и пред всеми иже при Иоанне случившимися братиями исповеда ведение. И се слышав раб Божий Иоанн и возвеселився зело, прослави всемилостиваго Бога. И по сем во другий день предаде дух свой в руце Господеви месяца октября в 19 день в лето от создания мира 7216 (1707). И погребен быст ту близ преждепомянутой речки, именуемой Пьоша.

По погребении же отца Иоанна мало лет прейде, мезенстии жители, Архангелогородския губернии сущи, завистию движими, согнаша Новгородский губернии выгопустынныя общежители от того места и начаша сами ту зверей ловити. Выгопустыннии же прейдоша на ино место, именуемое Канин Нос, вдалее 100 верст или боле. И прейде по погребении отца Иоанна времяни лет 18, мезенцы же промышляюще, иже ест ловяще зверей наймитами²⁰⁵⁹, и неспособна им быст ловитва, и начаша молити выгопустынных прийти к ним и научити ловитве зверстей. И моляще, глаголаху: да и брата вашего тамо погребена видите, ибо гроб его вмале²⁰⁶⁰ в реку не упал ест.

Бе бо, идеже погребен быст раб Божий Иоанн, место низко при реце и вода от моря по обычаю своему на коеждо нощеденство²⁰⁶¹ дважды приходя и отходя, потопляя бреги при реце, Северному понту окияна тако дыхающу, и размы брег он²⁰⁶² и разсыпа перст и разнесе вода. И показася гроб блаженнаго отца Иоанна, уже бо со обою страну более полугроба видети бе, точию под гробом и на верху гроба бе земля цела. О, чюдеси! Иже около гроба твердая земля разсыпася, а иже на гробе пресыпанная цела:[1670] «хранит бо Господ кости раб своих, и ни едина от них сокрушится».[1671]

Приидоша же выгопустынная два брата, Леонтий и Петр, и удивишася Божию милосердию и со многим благоговением очистивше перст, иже на гробе, призывающе в помощ блаженнаго отца. И бе видети гроб зело напоен водою, ²⁰⁶³яко не мощи има двема подняти тяготы ради²⁰⁶³. Призваша же единаго от прилучившихся ту²⁰⁶⁴ мезенских звероловцев, егоже видяще поискуснейша прочих, в помощ себе. И тако подъяша гроб с мощми блаженнаго отца Иоанна. И пренесоша на ино место вдалее от реки, идеже паки погрести. И открыта гроб и удивишася Божию милосердию: видяще бо тело блаженнаго отца все цело и ничемже вреждено. О, чюдо како! В толиких летех и толикими многими водами по вся дни омочаемо, а не истле. И не токмо тело, но и погребалныя его ризы видети бе все целы и белеющися бяху, яко вчера погребены. Точию от лакти²⁰⁶⁵ десныя руки и до запястия ризы истлеша и кост обнажися; свое бо ест земли сродное к себе взяти. Но веруем, яко на воскресение отдати имать Божиим повелением и всецело и с душею востанет пред своим Владыкою.

Выгопустынная же брата Леонтий и Петр любезно целовавше со многи слезами любезнейшаго отца и паки земли предавше, скутаста²⁰⁶⁶, в лето 7233 (1725) и на гробе его крест постависта на поклонение християном. Предпомянутый же муж, ²⁰⁶⁷иже мощи отца пренести случивыйся²⁰⁶⁷, прост сый словесы, к дружине²⁰⁶⁸ своей пришед, рече: «Чюдо видех ныне: выговляне пренесоша своего мертвеца, бывша в земли 18 лет, а весь цел ест он свять». И от того времени той муж и инии мнози возимеша веру ко отцу и, приходяще, поклоняхуся кресту Христову и у отца Иоанна благословляхуся на ловитву.

Сицев мужь Иоанн бяше, сицева того по благочестии ревност, такова добродетелная его по Бозе исправления²⁰⁶⁹. Благодать Богу, апостолски реши, о неисповедимем даре, яко толика и такова добродетелна и благочестива мужа показа в настоящее время и нетлением тела благодатно цветуща, и людем христолюбивым ползу и поспешество²⁰⁷⁰ обилно везде являюща. Но, о, любезный наш брате и господине, и нас, всеубогших, не презри, тол печалными и напастными скорбми обстоимых и лютыми дияволскими волнами обуреваемых, утиши и возбрани благоприятными ти к Богу молитвами, яко да и мы, обещницы благодати твоей явившеся, прославим Содетеля нашего Бога, тому слава ныне и присно и во веки веком. <Аминь>.

О преславных чюдесех, содеявшихся милостию и щедротами Господа нашего Исуса Христа чрез богомужный его образ, стоящий в молитвенном боголепнаго Преображения Его храме, иже в Выговской пустыни, в месте, нарицаемом на Бору у Спаса

Бысть убо в том скитонаселении юноша некий, учтивости тезоименитый,[1672] иже имеяше веру и усердие к чюдотворному всемилостиваго Спаса образу. В лето же текущее от мироздания по седмой тысящи и двою сту седмое на десять[1673] июня третияго дня, в пяток первыя недели Петрова поста, послану оному юноши бывшу от перваго скитонаселителя и по тогдашному времяни мужа суща нарочита²⁰⁷¹, имянем Петра,[1674] в Гавшезерское ладожское пустынное население (еже первее блаженный отец Корнилий святопожитием своим основа[1675]) для относу некоторых писменных извещений.

Идущу же ему к Богоявленскому общежителству, еже на Выгу, по сущему на том пути блату, слыша за собою якобы некоего вслед идуща. И обратився видети, и узре некоего страшна взором и высока зело возрастом²⁰⁷², яко и леса высоту превосходяща. Его же видев, юноша зело ужасеся. Лютый он похватив его за правое плече, верже на раму²⁰⁷³ своею и понесе зелною борзостию. Юноши же от страха того во изступлении памяти бывшу и не ведяше, что содевашеся о нем, от ужаса бо и страха связану языку его бывшу.

И яко мало в себе пришед, потече мыслию своею абие к чюдотворному Спаса Христа образу, моляся ему от настоящий тоя беды избавитися. И виде себе оным велиаром[1676] принесена к совокуплению²⁰⁷⁴ рек, именуемых Рязанки и Сосновки, идеже обычай имяху вси пустынножителие преходите оную реку Рязанку, яже от общежителства Выгорецкаго отстоит за три поприща. И се слыша некоего глаголюща ко оному велиару: «Почто убо раба моего взяти дерзнул еси? Его же скоро возвратив, положи в доме моем невредна». Сие слышав, лютый он возвратився, понесе юношу со всякою борзостию. Юноша же скоростию несения сотрясаем, паки от ужаса забывся, бысть бес памяти.

В то же время вышереченному пустынножителю Петру (иже и соградитель²⁰⁷⁵ того молитвеннаго храма Спасова первый беяше) случися тогда со обитателми своими обедовати. Храм же оный близ келии его бяше, яко точию треми саженьми отстоящ. Видеша же, яко бы некоего мимо оконца келии его прошедша. Смотряще же, узреша молитвеннаго храма двери отверсты, ибо незаключены²⁰⁷⁶ бяше. Шедше же, обретоша онаго юношу повержена в притворе того храма, всего тиною болотнею очернена. Его же, вземше, в келию приведоша. Измывше²⁰⁷⁷ же его, премениша ему одежду и вопрошаху его, глаголюще: «Что ти бысть?»

Той же, не могий проглаголати, пребываше нем. И помаав²⁰⁷⁸ дать ему трость и бумагу и чернило. И взем, испроси написанием Псалтырь, юже взем и мало пищи причастився, поиде в молитвенный Спасов храм и пребываше, чтый мыслию²⁰⁷⁹ псалмы Давыдовы, мало сна и пищи приемля.

И тако пребысть всю седмицу до тогожде именнаго дне пятка и до времяни часа, в кий обретеся повержен во оном молитвенном храме. И абие языку его от уз немотования²⁰⁸⁰ разрешившуся, и поведа оному Петру и сущим с ним вся бывшая ему. Еже слышавше, радостною душею и веселым сердцем должное со слезами Господеви Богу благодарение воздаваху. Певше же молебное хвалословие преобразившемуся на Фаворе Спасу, приписующе сие содеянное чудо верою своею тогда и послежде боговочеловечному Владыки нашего чюдотворному образу. Последующе же и мы вере их, написахом сие в славу Христа Бога нашего, в ползу же и во умножение веры слышащим боголюбивым братиям. Аминь.

Сему же великому чудеси последова иное преславное. Есть убо в пределех града Олонца весь²⁰⁸¹ некоторая, зовомая Пуйгуба, яже присудствует²⁰⁸² селу Мунозерскому. В той же веси бяше у некоторых родителей дщи, шестому дню тезоименитая.[1677] Родителие же ея в поселянстве том изобилием потребных и слытием добраго крестьянства нарочиты²⁰⁸³ бяше. Дщи же их добротою бяше незлообразна и художеством женских рукоделий искусна. Ногу же имуща от рождения повреждену, и того ради в сопряжение мужеви нарочиту²⁰⁸⁴ не бысть угодна, а за безславныя родителие ея вдати не восхотеша.

Исконному же врагу диаволу, не терпящу видети человеческаго рода в целомудрии быти, позавиде и сей отроковице окаянный. Юже прельстив к юноши некоему, с нимже впадше она в ров любодеяния, зачат болезнь и роди беззаконие. Надымающуся же тоя чреву растущим в нем семенем, она же всякими козньми ухищряше погубити то. Но Божия всемогущая сила сохрани зачатое во чреве ея невреждено, еже и роди. О, лютаго безстудства дияволя! Всея в мысль тоя хотящий ей быти родителский страх и поношение²⁰⁸⁵ народное и стыд, конца не имущий. И таковых ради студных обстояний²⁰⁸⁶ восприя намерение умертвити отроча. И убивши, камень на выю тому навязав, пусти в глубину езера, никомуже о том ведущу.

Но что творит сохранивый во чреве ея младенца праведный Судия! Изшедши убо тоя же веси жена некая на той же иордан, идеже бяше отроча свержено, измыти²⁰⁸⁷ ко тканию постава[1678] испряденныя нити, от нихже единому мотку во глубину того иордана случися погрузитися. Она же, вземше багор, моток той забагривши²⁰⁸⁸, извлече вон из иордана и виде к тому прилепша²⁰⁸⁹ младенца, на егоже шии камень привязан висяше.

Видяще же сие, жена ужасеся и теком пойде²⁰⁹⁰, возвещающе домашним своим таковыя беды обретение. Они же, шедше, возвестиша села того управителю. Той же взем некоторых от жителей тоя веси и с ними поиде по домом искати родившия. И между прочими обретеся сия лютая губителница своего чрева, юже вземше, связаша и отведоша в Петрозаводскую канцелярию к сущим тогда судиям, каменданту Вилиму Генину,[1679] лантракту Григорью Муровьеву.[1680] Тии же приемше оную и по законом, якоже достойно, испытавше, повелеша ю воврещи²⁰⁹¹ в темницу. Блюдоме же ей тамо с прочими злодеи, воепомяну грехов своих – блуда и убийства – тягость, моляшеся Господеви Богу тако о отпущении грехов, яко о свобождении от предлежащий²⁰⁹² ея по законам горкия смертныя казни.

Не хотяй же смерти грешнику всемилостивый Господь, видев сокрушение сердца ея, укроти лантрактову мысль, воеже протяжену²⁰⁹³ быти животу ея, и смотряше подобна²⁰⁹⁴ времяни, да ю пустит. Камендат же Генин хотяше ю по законам убити. И бяше между ими о том пря²⁰⁹⁵ немала. И тако пребысть оная в том узилищи блюдома два лета. Имяше же у себе оная бедница образ Пресвятыя Богородицы меднолитый с воображенным на руку ея превечным Младенцем Господемь нашим Исус Христом, иже поставлен бяше противу лица ея на столбике, пред ним же оная узница, молящися, выну плакате.

В та же лета близ преждереченныя Пуйгубския веси разстоянием за четыре поприща явися источник целебных теплых вод, различныя внутренняя недуги многим исцелевающ.[1681] К тем целебным водам изволися неоднократно прибыть его императорскому величеству Петру Великому со многими высокопочтенными князи и боляры для получения себе возжеленнаго здравия.[1682]

В лето же мироздания 7230-е, от воплощения же Бога Слова по исчислению нынешних времен 1722, изволися паки пребыти его императорскому величеству и с преславною августою его Екатериною Первою на Петровския заводы, якоже и прежде. Тогда вложися в мысль преждереченному лантракту Муравьеву испросити у императора оную осужденную на смерть отроковицу на получение сладкаго ея живота.

О чесом убо ей не ведущей, во един же день слыша узница глаголющих в темнице между собою узников, яко мунозерскую колодницу казнити смертию скоро будут. Еже слыша, оная ничтоже ино помышляше, разве по озарении наступающаго дня к смертным вратам изведена быти чаяше. И того ради стрясе смертною печалию унылую свою душу. И оцепеневше, не можаше в память прияти слезолиятелныя к Богу молитвы. И тако на мног час смертным страхом колеблема, едва уставися²⁰⁹⁶ мыслию своею прибегнути ко всемогущему Богу. И что не творяше бедная сия! Падаше убо пред образом Пречистыя Богоматере, кланяшеся пред державною Божиею властию. Прошаше от Всевидящаго ока ослабу своим грехом прияти: «Пощади, – глаголющи, – Владыко Христе, мене, бедную рабу свою. Даждь мне видети и еще сладкий века сего свет. Не погуби мене со грешники,[1683] подобными мне, и с делающими беззаконие не отрини мене,[1684] но даждь мне, Владыко, время покаяния[1685] и изведи мене от мрачныя сея темницы,[1686] яко Иону от чрева китова[1687] и яко Манасию от утробы медянаго вола[1688]». Моляше же и Пречистую Богоматерь, глаголюще: «О, всемилостивая Владычице, простри пречистыя твоя длани к рождьшемуся ис тебе Христу Богу нашему, да не отимет главы моея дышущий спекулаторовою яростию кроволиятелный мечь, да не напиется сиротския моея крови петрозаводское поле, да не полижут ея пси, Ахавовы[1689] злобы мстители, да не восплещут руце презоривых²⁰⁹⁷ о поносной²⁰⁹⁸ моей смерти, да не стиснутся утробы родителей моих о безчестней моей кончине и аз, окаянная, во отчаянии сущи, да не сниду с печалию во ад».

Сицевая и болша сих, во многом и горком плачи и рыдании ей молящейся, глаголющи, сведеся абие в тонок сон и виде пред собою стоящу непостыдную всех заступницу Пречистую Деву Марию, держащую на руце своей Содетеля всея твари, рождьшагося от нея без семене Божия Слова превечнаго Младенца, Господа Бога и Спаса нашего Исуса Христа, неизреченною добротою сияюща. Юже видевши, бедная сия грешница мняшеся пред непостижимою славою тоя величества пасти на землю и просити согрешению своему прощения и от временныя смерти свобождения. К ней же зрящи Пречистая Мати тишайшима своима очима, щедро к ней глаголаше: «Не бойся, ничтоже люто имаши пострадати, ни влас убо главы твоея имать погибнути. Егда же тя отпустят, не возвратися в дом родителей твоих, но иди в Выговскую пустыню, в Боровское скитонаселение и, в храме Сына моего благодарственныя песни воздавши, пребуди в тамошних пустынных селениях до конца жизни твоея неисходно». Она же, слышавши сия, возбну²⁰⁹⁹ абие и глядаше семо и овамо и не виде никогоже.

Осветающу же дню²¹⁰⁰, прииде преждереченный лантрат Муравьев во узилище с камергером владычествующий августы, емуже оная узница, падши, поклонися плачющи. Муравьев же объявив ему вся яже о ней обстоятелно. И чрез доклад его превосходителства оные Муравьев с женою просят высочайшую августу склонити к милосердию государя императора. Она же, яко щедрая мати сущи всероссийских чад, обещает свое августейшее заступление к высокодержавнейшему монарху за повинную²¹⁰¹ предложити.

²¹⁰²Бывшима же монархома у поминаемаго лантрата на обеде²¹⁰² и егда радостотворное вино возвесели императорское сердце, тогда воздвигшися щедрая августа²¹⁰³ от места, идеже седяше, и испроси позволения у монарха, да повелят ей поднести ему возжеленную дражайшими руками ея вина чашю и испити ю и по испитии прошение ея исполнити. Императору же о таковом ея начинании удивльшуся²¹⁰⁴ и глаголющу: «Что за новое сие диво, яко толикою склонностию возмнеся тебе власти моей таковое просителное утруждение показати? Не терпит убо сердце мое толиким трудом толь высочайшую тебе, августу, обложену видети. Хощу убо слышати прошения твоего вину²¹⁰⁵».

²¹⁰⁶Сему убо, яко наченшуся, содеватися²¹⁰⁶. Реченный лантрат и з женою своею, падше на колену, стояху пред монархома, яко пред светлым солнцем и пред сиятелною луною. Тогда царствующая августа к державнейшему императору об осужденной смертию обстоятелно объяви, яко оная, по законом осуждена сущи, во утрий²¹⁰⁷ день на смертное посечение идет. «Ты же, – глаголаше, – о, великодержавне, даждь бедной сироте покаянию время²¹⁰⁸. Повели пождати²¹⁰⁹ и еще несечене ее быти: за грешныя бо праведные Сын Божий умре. О, даждь, владыко царю, бедныя души ея окормление в высокодержавную и над всеми цари царствующую божественную Небеснаго Царя волю. Пусти ю живу каятися к безсмертному Владыце. Буди подражая Давшаго ти высокославную корону. Отпусти сию бедную, якоже и Он отпусти древле в прелюбодеянии ятую²¹¹⁰ тоя клеврету,[1690] ибо и посажденнии тобою на столе сего града просят со мною ваше величество о свобождении оноя и, на колену падше, трепетно говеют пред вашею высокодержавною властию. Вы же, премилостивый государь, пощади ведомую к смертным вратам бедную грешницу. И мое, твоея любезныя супруги и сопрестолницы царствия твоего, изливаемое к вашей высочайшей императорской власти приими прошение и твоих высокодержавных устен премилостивым отпущения глаголом порадуй мене, рабу твою, да будет сие мое за оную бедную сироту приносимое к вашему величеству заступление на всемирном Царя и Бога нашего Суде души моей обороною, и ваше величество, яко милостивый государь, премилостивым Господем Богом помилован будеши в случающихся по немощи человеческаго рода предкновениях».

Сицевое августейшия ластовицы сладчайшее чвебетание²¹¹¹ слушая, высокодержавный орел склонися к прошению сопрестолныя ему супруги и рече к лежащему пред ногами его лантрату: «Скоро повели осужденную ону от узилища и смерти свободить, да в покаянии своем испросит совершенный отпуск грехом своим от Вышняго Бога». Лантрат же, исполняя повеленное, приходит в канцелярию и, призвав осужденную от узилища, глаголет ей пред всеми светлым гласом: «Се дарует тебе живот его императорское величество. Моли Бога за здравие его и за всемилостивейшую государыню императрицу». И то рекши, взем ю за десную руку, за левую же взят господин адмирал Феодор Матвеевич Апраксин[1691] и изведоша ю из канцелярии, глаголюще: «Се мы тебе изводим, бедная. Иди, аможе²¹¹² хощеши». И тако пустиша ю быти свободну.

Она же паче надежды получивше себе от горкия смерти свобождение и, явльшуюся ей во сне Пречистую Богоматерь и Спасителя, яко яве, пред очима своима зрящи, скоро идяше в путь свой, аможе повелено ей бяше.

И вопрошающи пути к выговским обитаниям и малыми денми долготу разстояния прешедши, достиже Боровскаго скитонаселения. И приспевши к молитвенному дому боголепнаго Преображения Спасова, вопрошаше о служители того храма Петре. Тому же случися тогда спати, и зряше во сне некоего глаголюща ему: «Скоро востав, исполни прошение пришедшия, ибо не возможеши ты сотворити того, еже Аз сотворих, от смерти бо тую избавих». Той же, слышав сия, возбну²¹¹³ абие и виде пришедшую отроковицу, яже, падше ему на нозе, моляше его, да исполнит о ней Господеви Богу молебное благодарение. Вшедше же во храм, виде светлое изображение Спасителева образа. Пред ним же падши, теплейшии от радости изливаше слезы, имиже мыяше помост молитвеннаго храма, яко водою. И тако плачющи жалостно, и тако рыдающи усердно, воздаде молебное пение Творцу и Избавителю своему и Владыце. И поведа храма того служителю збывшееся на ней толикое Божие милосердие, еже он, слышав, прослави всесилнаго Бога, владеющаго всех животом и смертию. Она же "не приложи ктому возвратится²¹¹⁴ восвояси, но в пустынных тех селениих нача жителствовати неисходно.

Блика убо от святыя иконы Вседержителевы бываху чудеса, толика и болша тех от живоноснаго того источника изливахуся знамения, якоже слово изъявити хощет. Некий убо юноша возрастом и юностию цветый, благодати тезоименитое звание[1692] точию, а не исправление добродетелей имый, иже род свой влечаше от тихвинских посадников, той восхоте древлеотеческое благочестие по старопечатным московским книгам с подобающим молитвоприношением соблюдати. И того ради прииде в Богоявленское, еже на Выгу реце, жителство. И живый ту, горячею ревностию к добродетелному житию разгарашеся. Потом же, яко неискусен сый во искусителных ополчениях, вступи²¹¹⁵ чюжия недостатки своим высокоумием надзирати. И таковыми мысльми томимь, остави богоспасаемое то жителство, поиде искати покоя на разбивающия добродетелныя корабли брега. И пришед, вселися в Боровское скитонаселение. И идеже хотяше мысли своя покоем безстрастия удовлити, ²¹¹⁶ту улучи на болшее страстей собрание²¹¹⁶. И нача поносити многия, различными страстей обуреваниями страждущия. И тако ему пребывающу и ревность ону не по разуму содержащу, коснуся диавол и его сердцу и всея²¹¹⁷ в онь великую любодеяния страсть. Сотвори бо его на едину от сродниц его, девою сущу, лютою тою страстию воспалитися, яже елико стыдение девическое имуще, толико сродства срамляющеся, яростным взором и гнева полным словом того от себе отгна. Он же, борим²¹¹⁸ похотию, не возможе страсти своей одолети терпением и, гневася на оную родственницу, подшед тайно нощию, зазже²¹¹⁹ дом родителей ея. Храняй же Господь боящихся Его, сотвори ощутити им огня пламень, егоже угасивше, пребываху в великой опасности и страсе, яко до шести седмиц на кажную нощь наимующе стражей²¹²⁰, во многом трепете великою опасностию себе спасаху.

Видяще же себе от онаго врага толикою теснотою томимых, а свободитися от лютости его не ведуще како, воспомянуша богатаго источника чудес всемилостиваго Спаса Христа образ. И собравшеся всем домом своим, приидоша в приснопоминаемый Спасова Преображения молитвенный храм, просяще от Спасителя милости и заступления и з горким плачем и слезами падше пред чудотворным его образом, вопияху, глаголюще: «Изми нас, Господи, от человека лукава и от мужа сего неправеднаго избави нас».[1693] И паки: «Суди, Господи, обидящыя ны и возбрани борющим нас.[1694] Не предаждь нас до конца губителю сему погубити, но имяни Твоего ради святаго избави нас от настоящий беды[1695]». И тако в сокрушении сердца плачуще, пеша молебное прошение, отидоша в дом свой, имуще упование на Создателя.

В то же время земских дел управителие[1696] сотвориша об оном злодеи обстоятелное обыскание²¹²¹, где он в нощь онаго пожара был, и прииде обыскателный след до его пагубныя главы. Он же, видя скверное его дело молчанием не покрываемо и, яко зверь, рану обыскания ощутив, паче возъярився и хотяше подобающия ему за такое злодейство по законам казни угрозами избыти. И начат на все скитожителство и на общее Выгорецкое братство вымышляти бедонаводителныя²¹²² напасти. И являя богомерскою буестию окованное свое сердце, прииде в некоторый дом в день святаго пятка и испросив чашу млека, всю испи и браду свою остриже, показуя себе быти безбожна, мысляше бо теми законопреступлениями в болший страх всех вложити.

Приспевшу же празднику святителя и чудотворца Николы, егоже декабрь месяц Церкви представляет светло торжествовати,[1697] и бывшу времяни всенощнаго бдения, той же злонравный святоотеческих обычаев ругатель, взем у некоего человека коня, ²¹²³не бо смеяше кто что с ним вопреки рещи²¹²³, поеха в Богоявленское общежителство с лукавым своим намерением: аще не повелят того общежителства предводителие вышеупомянутая сродницы его родителем удовольствовать его двадесятью рублями денгами, то хвалитися хотяше поколебати бедонаведением все общежителство и Боровское скитонаселение. Се же умысли, да стяжавши то сребро, возможет свою пагубную клевету в присудных местех разсеяти.[1698]

Нощь же она, в нюже сие содевашеся, бяше безлунна и зело темна. Бывшу же ему противу вышереченнаго молитвеннаго Спасова храма, в немже чюдотворный его образ стояше, внезапу конь его весь торопом²¹²⁴ объяся и задрожал, ста неподвижимь. И абие оный зломысленник видит: и се отверзеся небо, отнюду же свет велий возсия. Оному же на сие возревшу, видит мужа грозна и велика зело, на воздусе стояща и мечь остр и велик обнажен в руце имуща и глаголюща ему с яростию: «Зри, что под тобою». Он же, возрев, виде противу себе землю разседшуся и в ней бездну глубоку зело и ад темен, грозныя в себе муки имущ, в нихже зряше грешныя мучимы люте и слышавше их «горе» и «увы» со скрежетом зубным взывающих. Сия же зря, ужасеся и весь вострепета. Держай же в руку обнаженный мечь юноша глаголаше ему: «Аще не покаешися о всех злых твоих делех и злобы, юже²¹²⁵ имаши на християн, не отимеши от сердца твоего, то сим мечем отсещи тебе имам главу твою, душу же твою во адския грозныя муки, яже видиши, ввергну».

Тогда он от великаго того страха не могий что языком своим провещати, ни устнами помолитися, но точию мыслию своею от сокрушенна сердца возопи к всемилостивому Спасу, зовый: «Отпусти мне, Владыко, лукавую мою мысль и прости дерзнутая²¹²⁶ моя согрешения. Уже бо обещаюся тебе, Творцу и Богу моему, ктому сих не сотворити. Точию помилуй мя, милостивый мой Творче и Зиждителю». Сице же ему мыслию своею помолившуся, абие все видение от очию его скрыся.

От великаго же трепета и ужаса едва некако в себе пришед, возвратися вспять и, пришед в дом господина, егоже конь бяше, поведа по ряду вся, яже виде и слыша, и ктому не приложи обидети никогоже. И исповедая православную веру и каяся о согрешениих своих, бедовметно скончася.

Месяца апреля в 17 день.

Слово на память преподобнаго отца нашего Зосимы игумена, соловецкаго чюдотворца

«Уведите, яко удиви Господь преподобнаго своего». Псалом 4, стих 4.

Светоносная память настоит днесь – Зосимы, преблаженнаго отца нашего, слышателие пречестнии, Зосимы, друга Божия,[1699] соловецкаго пресветлаго солнца, поморскаго чюднаго светилника, Зосимы, славнаго чюдотворца, всю Россию чюдесы удивившаго. Ныне слепни радуются, получающе очесем своим сладкий свет. Ныне болящий неисцелными недуги весело торжествуют, приемлюще желаемое исцеление туне²¹²⁷ от преподобнаго отца.[1700] Ныне плавающий во окияньстей пучине, молитвами угодника Христова от страшных потоплений спасающеся, радостныя Богу воспевают песни. Ныне и мы, грешнии, торжествуем прекрасную память своего скораго помощника, от бесчисленных зол и бед избавляющаго нас неусыпным своим к Царю Небесному ходатайством. И понеже Зосима есть предстатель наш и заступник, должни есмы по силе нашей похвалу ему принести. Но кую принесем похвалу от ангел похвалами увенчанному? Не доволен бо есть земный язык небеснаго хвалити гражданина. Темже поне грубым словом воспомянем о преславном житии его, да пользу душам своим обрящем.

Понеже преподобный отец наш Зосима есть украшение преподобным, есть иноком чюдная доброта, есть чюдес неистощимое сокровище, благодати Божия река приснотекущая, исцелений пучина неисчерпаемая, одушевленная икона всякия добродетели, правды правило изрядное, целомудрия всекрасный образ, мужества столп неподвижимый, мудрости дом пресветлый, веры пещь, седмицею разженная,[1701] надежды град всекрепкий, любве море великое и пространное, смирения учитель, кротости наставник, чистоты рачитель, послушания делатель, разсуждения светилник, орудие Божие, Церковь Святыя Троицы, жилище пресветлое триипостаснаго Божества, престол высокий и превознесенный Отца и Сына и Святаго Духа, и Христов искренний ученик, и креста его носитель усердный, смерти же и воскресения пресветлый общник²¹²⁸ и славы причастник всеблаженный.

Сей есть любитель преблагаго Бога, возлюбивый его всем сердцем и всею душею и дивно есть воистинну, яко, поселянин сый, груб и невежа мним, толикою любовию к Богу возгореся. Село бо некое мало и худо, Толвуя именуемо, имяше отечество.[1702] И кую в нем хитрость позна, кую философию изобрет? Вемы бо, яко мнози святии от познания божественных и человеческих вещей снискаша огнь негасимый божественныя любве, Зосима же, в Толвуи живый, едва возможе и священное Евангелие до конца прочести, едва обрете время и Новаго Завета все писание испытати,[1703] наук же свободных[1704] и книг христианьских философов ниже во сне виде, языческих же философов не точию писаний, но и имен не ведяше.

Обаче толикий невежа толикою любовию к Богу уязвися, елико не точию мира и самого себе презре, но и яко ангел поживе в плоти. И егда ему время приспе жену пояти, и чада сотворити, и дом строити, и о собрании богатьства пещися²¹²⁹, тогда он иное обрете дело достохвалное и преблаженное, дело, вечныя славы достойное, дело не токмо человеком, но и ангелом удивителное. Кое сие дело? – Еже крест взяти и Христу последовати, еже за любовь его оставити сладкия страсти, желанныя похоти, любезную волю свою, еже за желание Владычне жестокому и острому иноческаго жития правилу вдатися. Презирает славу и богатьство и бывает ученик и последователь сладкому Христу. И недоволно²¹³⁰ бысть ему отвержение мира и мирскаго пристрастия, но и вселенную остави и во оток²¹³¹ морский вселися, да никтоже спону²¹³² сотворит ему в добром течении, еже к Богу. Коликия же труды и подвиги на острове показа, в посте и молитвах, в коленопреклонениих и воздыханиих в борбе с невидимыми враги, во удручении плоти, на дух воюющия; во отсечении закона удов телесных, противу лежащаго закону Духа Святаго! Недовольно есть всякое слово сказати, немощна есть всякая риторская трость написати. Негли могл бы труды его видети многоочитый херувим,[1705] негли могл бы язык ангельский сказати и желание его к Богу, и пост, и молитву, и прочия спасительныя подвиги?

Но всякий человек за немощь свою естественную и за высоту толикия добродетели слову оному не веровал бы, понеже житие преблаженнаго сего мужа не тако человеческому, яко ангельскому житию подобно есть. Егда же весь закон евангельский исполни, егда и любовь к Богу отвержением самого себе соверши и любовь к ближнему истину, а не лицемерну показа расточением²¹³³ имения своего требующим,[1706] тогда малу и недостойну Царства Христова вознепщева²¹³⁴ быти толикую свою добродетель.

Темже, егда начата к нему приходити на остров хотящий иночествовати, тогда он поминаше глаголемое: «Аще кто речет, яко люблю Бога, а брата своего ненавидит, ложь есть».[1707] И крепко сам себе увеща, яко ложная любовь его и к Богу будет, аще не всех приходящих к нему начнет приимати, по Христову словеси: «Грядущаго ко Мне не изжену вон».[1708] О, любве крепкия! Сия есть любы, о нейже пишется: «Крепка, яко смерть, любы».[1709] Не помысли в себе блаженный, еже мощно бе помыслити не толикою любовию ко всем человеком разженному²¹³⁵: «Аще соберу мнихи на пустом сем месте, чим могу питати и одевати их? Моя бо будет печаль не точию о спасении их, но и о пищи всего стада моего, и о питии и одежди и обущах²¹³⁶, и о всех потребах телесных». Аще бы сие мыслил, не могл бы толикаго множества братии собрати и толикую пустыню град сотворити. Но ина мысль бе в нем: яко Бог печется о всех, яко той всем животным дает пищу и яко «не о хлебе едином жив будет человек, но о всяком глаголе, исходящем изо уст Божиих».[1710]

Темже толики мнихи постриже, елицы к нему на остров приидоша; толики души ко Христу приведе, елики к себе, яко магнит или цевница Орфеова,[1711] привлече. Не мнози убо обретаются в народе любящий остроту и худость жития чернеческаго, безмолвнаго же и пустыннаго жития жители толь мала суть, яко из тысящи земнородных едва един обретается. Еже бо оставити славу и богатьство, обнажити же ся всех тленных, яже имать мир, и предатися пустынному озлоблению, сплести же ся²¹³⁷ со диаволом мужески и братися с ним до самыя кончины живота – дело есть не точию великое, но и преестественное. А еже вселенную оставити и в морския внити островы и тамо, аки на небеси, жити, ниже о земных пещися, ниже плотьская помышляти, но присно со ангелы славити Бога, кому есть возможно? Кто может таковый жития образ показати? Кто не убоится толикаго подвига? Кто не устрашится толиких болезней? Кое сердце не вострепещет от таковых и толиких страхов и смущений, идеже от величества подвига силы изнемогают естественныя, плоть, немоществующи, преклоняется к падению; ум, к небеси восходящий, ужасается и низпадает, диавол ратует, беси нападают, страсти внутрь воюют и весь человек, аки злато в горниле,[1712] на всяк день и час искушается. А еже на острове морском ограду велию от основания воздвигнути и церквей наполнити и мнихов толикое собрати множество и ангельскому научити житию – дело есть толико преславное, толико превысокое, толико невозможное, толико пресвятое и божественное, яко ироев неких на совершение свое требующее, ихже род, глаголется, создан быти от Бога и от человек. И коль убо мнози святии обретаются в преславной России, коль мнози преподобнии просияша добрыми дели в наших странах, изочту их по Давыду: «И паче песка умножатся».[1713] Толикими же и таковыми делы прославившихся ниже вемы, ниже отцы наши поведаша нам.

Предвариша чюднаго Зосиму в Соловецком острове преподобнии отцы Саватий и Герман, но точию на нем келейцу поставиша малу и в ней свято и преподобно поживше,[1714] угодиша Богу и благодать прияша преславную за своя подвиги. Темже, яко пресветлыя, звезды в северных странах возсияша, ов нетлением мощей, ов же чюдесы преславными. Приснопетый же Зосима пришед на Соловки, житием и чюдесы, яко солнце, возсия. Кто бо остров он, слезами и поты священными священно напоив, яко рай Божий сотвори? – Зосима. Кто бесы изгна изо острова,[1715] диавола же, связав молитвами, далече посла осужденна? – Зосима. Кто обитель велию в славу Божию воздвиже? – Зосима. Кто мнихов стада собра и ангельски жити научи? – Зосима. Кто пустыню Соловецкую церквей наполни[1716] и, яко Иеросалим,[1717] красну и славну показа? – Зосима. Кто, во гробе лежа, чюдес источает реки[1718] и всю Россию преславно удивляет? – Зосима. Кого поморстии житилие имеют просветителя, кого лопская страна[1719] стяжа учителя? Кого плавающий в мори призывают спасителя, кого недужнии знают исцелителя? Кого вся Россия славит яко отца и к Богу предлагает ходатая? Не соловецкаго ли чюднаго игумена, не Зосиму ли преблаженнаго, не того ли, егоже Толвуя изнесе и Соловки прияша, небо же восхити и вечною славою увенча? Кто убо от святых Божиих толикими и таковыми прославися делы? Не един ли сей божественный муж толикую приять благодать? Не едино ли сие пресветлое солнце толикою светлостию возсия в поднебесней? Где бо обрящется другий Зосима, просветитель толикий морскаго острова? Где хощеши обрести таковаго мужа? В Палестине ли? – Но несть. Во Елладе ли? – Но не обретается. Во Италии ли? – Но не может быти. Во Ефиопии ли? – Но не леть²¹³⁸ есть нигдеже толикому возсияти светилу. Един еси Зосимо таков и толик на земли.

Тебе единому дадеся сия благодать. Ты един толь пресветлый приял еси венец, ты един толикое совершил еси дело. Остров морский инно²¹³⁹ небо сотворил еси, пустыню непроходную и незнаемую, яко солнце, благодатию сияющу показал еси; место, всей вселенней неведомое, яко Иеросалим, прославил еси, сотворил бо еси то жилище Божие, град святый, скинию возлюбленную, ангелом чюдное зрелище, человеком спасительное пристанище, небо новое, поведающее присно славу великаго Бога. К твоей пустыни отвсюду текут народи, яко воды многи; к твоему преславному селению приходят россиане, яко ко Иеросалиму, в твою святую обитель стекаются богатии и убозии²¹⁴⁰, малии и велицыи, мужие и жены, юноши и девы и вси твоей раце со страхом поклоняются.[1720] Вси твоим мощем честно припадают, вси твоего заступления требуют, вси молитв твоих просят, вси благодати твоея наслаждаются. Но, о, слав Зосиминых! Аще пустыня, в нейже поживе преподобный, толико прославися на земли, коль множае сам угодник Божий на небеси присноцветущею сияет славою. И аще останку чюдотворца с толикою честию поклоняются народи, коликими венцы дух его венчается от ангел и от самого Бога.

Толикаго убо имуще отца, мы, слышателие возлюбленнии, не должни ли есмы славити его и величати, яко сынове его, зане писано есть: «Сын славит отца».[1721] Кая же слава может ему быти от нас? – Еже подобитися ему добродетельми, еже ревновати чистоте его, целомудрию его, терпению его, воздержанию его, лощению его, молитве его. Сию славу приемлет от нас отец наш. Сицевою честию Зосима наш хощет почитатися от нас.

Темже поревнуем святому житию его. Будем кротцы и смирени духом,[1722] стяжем чистоту, дар Божий преславный; удержим очи свои от зрения нелепаго, обуздаем языки своя от бесед неполезных, удалимся любве, вредящия душа наша; научимся же любити Бога всем сердцемуе и ближних наших, яко сами себе[1723]; поработаем Господеви со страхом и порад мся ему с трепетом.[1724] Кийждо нас да знает дело звания своего и с кротостию и смирением да делает е²¹⁴¹, не яко человеком угождая, но яко самому Богу служа и за службу свою в наслаждение Небеснаго Царствия желая, егоже да сподобимся вси молитвами преподобнаго отца нашего Зосимы, благодатию же самого человеколюбца Бога, яко тому подобает слава во веки. Аминь.

Пречестнейший пастырю, благополезный всесладчайший учителю и наставниче, превозлюбленный вседражайший государь мой батюшко Андрее Дионисиевичь.

Понеже возсия нам благорадостное всесветлейшее торжество прелюбезнейшаго всеизряднаго тезоименитства твоего, понеже возблиста нам всекрасный день тезоименитаго ти великомученика и многомужественнаго страдалца Христова,[1725] чесо ради всебратственно подвизаются усердно и все любезно вселюбезное вседражайшее тезоименитство твое почтити. Приносит боголюбнаго вашего научения стадо: постники – любовное благодарение, молитвенники – теплую молитву, девственники – желателное ублажение, послушники – радостное хваление, церковники – благодатное песнопение, витии²¹⁴² церковнии – златоплетенная словеса, учители – благодарныя мироуханныя глаголы, служители – усердное учреждение²¹⁴³, сироты – благодарственныя гласы, верная чада – теплоту молитв, возжжение свещь, канонов неленостное пение, псалтырное усердное воспевание. Вси всецерковне и всеусердне, вси всерадостно и всежелателно, вси многотщателно торжество украшают. Вси просим и молим всемилостиваго Спаса и Пречистую Богородицу и всех святых и святаго великомученика Андрея Стратилата о любезном нам здравии и спасении твоем, вси боголюбно день почтити предуготовляются, вси пресладостными словесы приветствовати христолюбное благородие, ретящеся²¹⁴⁴, усердствуют.

Что же я, малоумнейший и последний твой сирота, вселюбезному всесладчайшему моему свету учителю и прежеланнейшему родителю принесу? Что моему всерадостному пречестнейшему торжеству совнесу? Яже желание неусыпное имею, но недоумею. Яже почтити всесердечно ретюся, но не вем по достоинству како. Яже о всежеланнем и вселюбезнем ми твоем тезоименитстве всеверно усердствую: с теплыми молитвенники с теплотою, недостойный, привмешаюся, с торжественники любезно сторжествую, с благодарящими всеусердно благодарствую, с любовными празднолюбцы всерадостно спразднствую, с почитающими мученик²¹⁴⁵ вселюбовно спочитаю, с прославляющими тезоименитство вселюбезное вселюбезно всесердечно срадуюся. Слышав источенная от церковных витиев златотканная приветства, радостною душею почитаю благодарная словеса. Слышав почитающих любезно, приветствующих всежеланно, благодарящих всеговейно тебе, многолюбезнаго вседражайшаго моего государя, о сих радостию несказанною наслаждаюся. Принести же вселюбезное приветство колико должен, но не умею. Колико желаю почтити златозарными словесы, но не разумею.

Темже в надежде благоутробных родительских твоих щедрот детскими моими гласы малое мое сие грубословие приношаю, яко непотребнейший сынишко своему пресладчайшему вселюбезному родителю, яко недостойный ученик своему благополезнейшему вседражайшему наказателю²¹⁴⁶ и учителю, яко последний во всех и скудоумнейший сирота своему всеблагоразсуднейшему пастырю и многомилостивейшему добротворителю батюшку. Всежеланно о сладчайшем здравии и спасении твоем Бога моля и Пречистую Богородицу и всех святых и великаго в мученицех Андреа Стратилата, сице всеусердно восклицаю: здрав (3-жды), благосчастен, многолетен, благополучен и долгожизнен, всерадостен, богохраним, богопросвещаем, богонаучаем, богособлюдаем и с нами, твоими непотребными сиротами, неразлучен всезравственно зде на премножайшая лета, в будущем же превечнем Божии Царствии вечных благих наслаждался вечно, дай Бог буди (2-жды) и буди.

Вашего вседражайшаго учительства, многомилостиваго моего всесладчайшаго государя батюшка всенепотребнейший сынишко, нижайший раб и сирота твой И. И. всеусердно, всежеланно, вселюбезно, благодарно, премножественно челом бью.

Похваляему праведнику возвеселятся людие.[1726] Словеса сия премудраго Соломона, в Притчах в главе 29 написаная суть.

Якоже в нощи мрачней и темней, егда небо, ²¹⁴⁵сволкся дебелых облакь²¹⁴⁷, объявит аще и немноги звезды, но едину паче же сияннейшую и светлостию озарения других превосходящую, не возрадуется ли человекь благодарный, благодарити Бога выну навыкший, яко в толикой отвсюду темными мраки покровенной нощи звезду светозарную зрит. Сице нам нощь разумеется, о, церковное собрание, людие христоименитии, настоящая ныне греховная и пагубная лукаваго века сего тма, в нейже толико темномрачными многоковарных прелестей и находов лестьчих²¹⁴⁸ покрываемо видим выну небо церковное, яко едва обзирати возмогаем в нем звезду, сиянием своея доброты вся ны преславно озаряющую, звезду всесветлую, звезду, мраком лестьчим мрачимую, но несоодолеваемую, – тебе, вселюбезнаго нам отца и наставника, честнейшаго господина Д<аниила> В<икули>ча.

Сего ради, церковнии ликовственици, боголюбивии отци и смиреннейшая о Господе братия, лепо нам, чадом его любезным, радостная воспети о таковомь великомь даре, от Господа нам дарованнем, а еще от нас не отъятомь; лепо нам благодарная Господеви возслати и всеусердно возслати, яко еще наш сладчайший, яко зеница ока, блюдется среде христоименитых множества, яко шипок благовонный посреде винограда церковнаго.

Но аще и выну лепо есть обычная благодарения чадом церковным Господеви возсылати, на что выну и упражняетеся, по писанному: «Всякою молитвою и молением молящеся на всяко время духом» (Ефесеом, зач<ало> 234).[1727] Но понеже нынешняго богодарованнаго дне приспе нам и торжество пресветлое, святейшаго нашего отца день рожественый, во нь же должно нам наипаче благодарными к Богу вопиеньми воскликнути, должно нам, вся чювства наша опрятавше²¹⁴⁹, предуготовитися на славословие Божие, должно нам всеми словесными органы на хвалу Господеви разверстися, должно нам и сладчайшаго учтивыми по нашей силе благословленьми почтити: сие бо и Богу любезно, еже по силе, яко да вкупообщными сими благословении, и Бога, и отца почетше, исполним писаное: похваляему праведнику возвеселятся людие (Притч. глава 29).

Елма²¹⁵⁰ хотения нашего многоскудостный поток скланяется уже к похвалению великодаровитаго отца потещи, да покажем, коль нуждно, о, всежеланный соборе церковный, похвальная исплести и благодарственая воскликнути; елма нуждно ныне и Божию помощь призвати, без коея не можем и творити ничтоже, нужда и слова силу прострети и умножити хвальная.

Понеже приходяй к нам виновный похваления не ин кто, но нами любимый любовный отец, высокий во смирении, верх настоятельства, елей милосердия, глубина смиренномудрия; врачь, душевныя струпы исцеляющий; пластырь, готово изврачюющий; любве светящая заря, миросоветия глубочайшая бездна, страха Божия всебогатное сокровище, чистоты сердечныя неоцененое хранилище, душеспасителнаго наказания благоухающая весна и прочих добрейших нескудный преизливающийся источник, како похвалится, како ублажится, киими хваленьми воспет будет. Ельма²¹⁵¹ свое солнцу сняти и луне светети и звездам зарити, тако честнейшему нашему отцеви своими ему добродетелей деланьми осияватися и благовонствовати свойствено есть.

Кто недреманное око стяжа, воеже добре созерцати братское состояние? – Даниил. Кто соузы любве и мира между чады церковными премудре художествуя? – Даниил. Кто во всех первеньствуя высотою смирения и богатея? – Даниил. Кто верх предстательства снабдевая²¹⁵², елей милосердия источая? – Даниил. Кто, по Иову, «нога хромым, око слепым»?[1728] – Даниил. Кто милостивыя стяжавает утробы, щедроты ко всем проливает? – Даниил. От кого ущедрися сирота, помиловася вдова, утешися нищий, призреся странный, разве²¹⁵³ Даниила, смиреннейшаго отца, пастуха добляго? Кто плещи убогих согрея, кого уста вдовыя благословиша, кроме Даниила кроткаго? К кому текуще требующий ссуды и ищущии поруки, разве Даниила добляго и милосердаго?

Тем вси церковнии собори, всепразнственая торжества, братолюбная собрания, совети всенужнейшии Даниила требуют, к Даниилу благоговеют, о Данииле радуются. Иди в пустыни, тецы в скиты, приникни в горы – и везде услышиши Даниилово имя, яко некое священие, на языцех всесладостно обносимо²¹⁵⁴ и похваляемо. Иди во окиянскую пучину, на бреги, в пустыни – и тожде услышиши, яко Даниилу и молитвеныя, и похвалныя венцы плетутся. И аще малое отроча вопросиши: «Кто выгопустыннаго богообещнаго села предстательствуяй?» – о Данииле, сладчайшем отце, услыши<ши>извествующа.

Темже от кратких сих показаний явствуется, яко наш смиреннейший и любезный отец толикими роды добродетелей и богатеет, и украшается. И понеже несть насыщения в злых лукавому, не есть конца злоумышлений яже на человеческий родь, но, безчисленая лщения²¹⁵⁵ и наветы происпущая, хитрует: воставляет²¹⁵⁶ и на смиренаго нашего отца различная злобы, различная надхождения²¹⁵⁷, воеже бы киими-любо умышленьми низложити сопротивоборца крепкаго, воеже бы како погасити светилникь, огнем благочестия сияющий, воеже бы помрачити славу непрестанно Царю славы славу возсылающаго человека. Посылает злославных полчищ ратники, колебати благочестивыя отискони²¹⁵⁸ навыкшия, смущати и шатати избранныя вседушно хотящия, якоже и нынешняго настоящаго времене новопрозябшую²¹⁵⁹ безбожную новорасль (трости, ветром колеблемыя,[1729] ничимже разликующую²¹⁶⁰, по глаголу Спаса, за гнилое и нетвердое своего ей основания), всюду падающую, везде шатание страждущую, к станию²¹⁶¹ же познания истины нимало возрети изволяющую, паче же гнилыми си основаньми твердыни благочестия разорити усердно насилующую.

Посылает и домашныя июдоподражатели,[1730] буия и ненаказанныя, яже не менши внешних враговь Церкви Божией тщету²¹⁶² творящыя, не мнее²¹⁶³ церковное состояние колеблющыя, не мнее благорастворному Церкве святыя соединению урон приносящыя, паче же вящший: внешнии убо аще и зверем подобно рыкают, но временно терзати обыкоша²¹⁶⁴, временно хищати и грызати получиша; «внутренний же домашний»,[1731] по Спасову гласу, врази присно между благочестивыми соводворяти получающий, но подобно змии язвляти благоверныя произволяющии, присно обгадити злослышаньми²¹⁶⁵ и уничтожити злонанесенми поучающийся. С сими сопривходят и иная тмочисленая, яже Церкви Божией несносныя печали подавающая, яже горчайши пелыни скорбная раждающая, паче олова за неотрадное печалей отягощающая, яже вся искусомь навыкнуяй сразумети может.

По всех сих и посреде сих нашь сладчайший отець, яко голубица посреде крагуев²¹⁶⁶, яко овча посреде волковь, яко звезда посреде облака темна, яко крин²¹⁶⁷ посреде терния, прозябение благочестия посреде селения неправедных, соблюдается от вышняго промышления, покрывается от Божия человеколюбия, по речению Премудраго: «Яко десницею,– рече, – покрыет их и мышцею защитит их» (Прем<удрость>, глава 5).[1732] И «аще не бы Господь Саваоф» хранил двойцу преподобнейших отцевь – единаго ныне нами ублажаемаго смиреннейшаго господина Д<аниила> В<икули>ча, другаго же премудрейшаго наставника и господина А<ндрея> Д<ионисиеви>ча, егоже словеса – словеса жизни, меда сладчайши, изливающая нам токи учения, емуже хвалная поздравления в прешедших днех отдашася,[1733] убо «якоже Содом были быхом и яко Гомору уподобилися быхом» (Исаия, глава 1),[1734] но милосердия ради милости Бога нашего помиловани обретаемся.

Сия вся, о, священное церковное совокупление, всесветлейший благоверна соборе, совокупляет ны и убеждает и песненыя произносити глаголы, и празднолюбное составляти торжество: едина предлежащая нам вселюбезнейшая вина, честнейшая нашего о Господе вкупосожития главо, конечнаго смирения и миросоветия отверзающаяся дверь, благовонием кротости дыхающий зефир, красотою долгодушия сияющее злато, премудростию пождания²¹⁶⁸ искушеное сребро, тяготою дружняго ношения²¹⁶⁹ обремененый корабль, отець отцевь – смиреннейший господинь Д<аниил> В<икули>чь, егоже в торжественое сие празднество рожественаго дне всерадостныя и истекают чреды, сих ради песненыя в ликох гласы вознесем ему, должныя хвалы отдамы ему.

Церковнаго клира церковнии служителе, аще что божественых снискавше, люботоржественая о отце приносите. Молитвеници усерднии, аще что молителных снискавше, к Богу о отце всеусердно вопийте. Трудолюбнии послушници, аще в добрых сих вообычившеся²¹⁷⁰, отцеви ухо приклоните. Состаревшиися старци, исконными святых добродетельми сладчайшаго увеселяйте. Юнии и превозрастнии, юности целоумныя любезнейшему любезныя цветы воздавайте и любочистотными себе и отца благовонии облагоюховати благоволяйте. Иноки, иноческими уставохранении отца почтите. Болнишнии и немощнии, жезл и подпору милостивейшаго имейте и от самых глубин сердца Бога о нем молити не престайте.

Таковая отцеви благодарения (мню же, и Богу) любезна, таковая поздравления сладчайшему сладостна и благоприятна, паче дароношений тленных и согнивати обыкших, паче почтений любочестных и маловременных. И аще кто в чесомь еще за поздением²¹⁷¹ медлит, да притекает со усердием, ведая отца, усердно вся приимати обыкшаго и коснением лежащаго порицати не навыкшаго, но ведущаго сохранити писанное: еже «приходящаго ко Мне не иждену вон».[1735]

Буйством ли когда занят²¹⁷², лишаешися отеческия его ползы, и ты, буйственую бурю отверг, приближися ко смиренному отчю уставу, и, навыкнув смиренномудрия, будеши овчате кротчайши. Злонравием ли каким беснуешися, шатаяся, и ты благоговейный и присным ко отцу присвоением²¹⁷³ всяко раззориши всепагубное злонравие. Лакомства ли и сластолюбия сетию запинаешися, токмо притецы к бодрому поста рачителю, и абие с пришествием вся разыдутся: отець бо благодатным просвещением одарен сый, без вести²¹⁷⁴ от имущых таковыя страсти прогоняет. Страстная ли взыграния состреляти тебе усилуют, прииди, ²¹⁷⁵молнийным ретяся шествием²¹⁷⁵, и зрак²¹⁷⁶ отчь ненадеждно²¹⁷⁷ пременитися тебе от сих сотворит. Вожделения ли небоголюбным мракомь омрачаешися от всегубителя, токмо не умедли прервати душепагубную ону сеть приближением тишайшему и с припаданием вкупе ²¹⁷⁸слабейши паучинныя мнящуюся²¹⁷⁸ крепку быти узриши. Сицевая и сим подобная отцу приносите благодарения, сицевая ему любезна всегда и благоприятна, сия приемлет усердно, о сих радуется присно, о сих торжествует светло.

Но, о, отче честнейший и полезнейший, мы, твоея богохранимыя паствы смиреннейшии овцы, твоего богоумудряемаго руководства покорнии раби, тебе, нашему пастырю, словесныя сия исплетаем хвалы, не яко тебе, кроткому, от нась таковых требующу: весть бо смиренномудрых нрав похвалных не искати. Но понеже нам, ведущым, каковая полезная от сих происходят и люди благонравныя на веселие и радость скланяют, по писанному у Премудраго: «Похваленом бывающим праведным возвеселятся людие».[1736] Сего ради сия тщимся приносити поздравления, ты же не отрини, но усердно приими, якоже и Христос вдовыя две лепте[1737] (Лука, зачало 103).

Прочее уже к тебе утружденое окончеваем слово. Предел вещей всех, Боже преблагий и превеликий, безначалнаго Отца Слово собезначалное Исусе Христе! Ты даль еси нам сия вещати (о тебе бо хвала наша выну), ты даждь и желанию нашему непогрешну быти, еже отца нам сладчайшаго зрети всегда цела, здрава и многодетна, право исправляюща слово твоея истины молитвами и заступлением Пречистыя и преблагословеныя Владычицы нашея Богородицы и Приснодевы Марии и всехь святых и святаго пророка Даниила.

Ты же, отче благоумнейший, при окончении сем приими общежеланнейший от всех глас: здрав, здрав, здрав буди и многолетень ныне в настоящих, в будущая же неизреченная получая благая. Аминь.[1738]

Светел есть нам настоящий день, светел и премногия радости и веселия ходатайствен, понеже великаго в преподобных и дивнаго житиемь и именемь Симеона многочюдесная приспе память, иже от самых пелен Богом освященнаго, иже в посте и воздержании пресветло возсиявшаго, иже аггелы удививша и демонския полки побеждьша, иже мир весь чюдесы и страшными знаменми наполниша, иже на Дивней горе жившаго и, яко солнечными лучами, оттуду вселенную озаряющу чюдесы предивными.[1739]

Паки нам радостен сей день, яко воспоминание боголюбивейшаго ти именонаречения соприспе день, еже поновлятися рождению, обновлятися лета круговращению, чесо ради всесоборне и особь кийждо Господа Бога благодарственне славословихом, яко даровавши ти препроводити летотечение делу и всездравственну и яко такова разума светлостми тебе облиставшаго и премудростию словес обогатившаго. Чего ради, вселюбовным усердиемь подвигами, и мы, грубии, сопривнести малое словопоздравление, аще и велми грубостию одержими, обаче надеждею укреплынеся, на се дерзнухом.

Вемы бо и вас имети тую же любовь, якоже и отцы к любимым младенцем, воеже и немотованию²¹⁷⁹, от них произносиму, радоватися. Приносим грубосочиненное сие поздравление: здрав, здрав, здрав и благопребытен буди, боголюбивейший господине 200. 4-чь[1740] и с единоутробным ти братцем, нашим же отцемь и учителем 1. 4-м.[1741] Молим же ваше отеческое боголюбие по данней вам от всемогущаго Бога премудрости наше малоумие вразумляйта, юность нашю наказуйта²¹⁸⁰, невежество и грубость исправляйта, яко да и мы, последншии, вашим руководствием окормляеми, малейшими сосудцы ума нашего от повсюду преизливающагося нилоструйнаго источника словеснства вашего сподобимся почерпсти малую каплю чистейшаго разума и якоже при ваю²¹⁸¹ зде, тако и по отсюду отшествии будем неразлучни.

Но, о, всевидящее пресветлое и вся назирающее Око, призревши, сохраняй наша окормителя под крилу твоего благоутробия яко в прешедшая, тако в настоящее и в будущая века лета вся цела, здрава, радостна, спасена, вышша всех козней диаволих. В будущем же веце, в невечернем твоем свете вкупе со всеми святыми Царствие Небесное получити сподоби. Aμen.

Вашего предводителства грубии келиожители, земней припадше персти, всеусердне покланяемся.

Пречестнейший господине, благоутробнейший отче, богодарованный наш предстателю, новый исповедниче, светлейший венечниче Симеоне Дионисьевич.

Нынешнее твое к нам, сирым, пришествие тако нам радостно есть, тако светлости благодушия виновно, тако пресладкаго веселия исполнено, яко радости и сладости своея исповедати весма не можем. Понеже шесть месяц уже и вящьше²¹⁸² прейде, отнележе²¹⁸³ отеческаго ти лица не видехом и толь далече твое благоутробие мнехом быти от нас, яко и возвращения твоего к себе не чаяхом. И сице огорчена чюветва имехом, яко ничтоже вещественное сладко нам бяше. И что рещи, не вем: самый живот²¹⁸⁴ горек нам явися, самый свет солнечный помрачися во очию нашею, самыя дни прекрасныя тма древняя египетская[1742] бяху пред нами – за сие самое, яко тебе, светила благочестию, не имехом и медвенными твоих поучений не наслаждахомся словесы.

Егда же прилете к нам радостная и возжеленная²¹⁸⁵ весть она, яко Богом сохранен от толиких зол, грядеши к нам, тогда, тогда забыхом свое сетование, отбежа печаль наша от нас, престаша рыдания наша и исхоша²¹⁸⁶ горких слез наших источницы. И быхом вне себе, явихомся инии от иных, вси в радости, вси в веселии, вси в сладости и красоте неизреченней. Удивихомся щедротам Божиим, толь богатно на нас излиявшымся. Прославихом благость Владычню, тако обрадовавшую наше убожество, и преславное твое спасение чюдо нам бысть предивное. Зане ин Иона в ките спасен еси,[1743] ин Данил лвом уста заградил еси,[1744] ин Анания в пещи огненей неопален явился еси,[1745] ин Моисей сквозе море пеш прешел еси.[1746] Слава единому преблагому Богу, толикую милость на тебе удивившему и нас, недостойных раб своих, толикаго веселия исполнившему. Се получихом нечаянное, се обретохом желаемое, се узрехом тя, храбрый воине Царя Небеснаго, и блажени есмы, яко предстоим честному лицу твоему.

Но понеже дела Божиа преславно проповедати,[1747] должни есмы, праведно судихом, ныне при твоем благоутробии и при сущих зде христолюбцех кратким и неискусным за грубость нашу словом бывшее на тебе предивное Божие проповедати дело. Не яко да увесться²¹⁸⁷ всем ведомое, но яко да мы по должности своей нечто отдамы Богу, помиловавшему нас и толикую радость печалным источившему. Молюся тебе, честнейший отче, да по твоему благоволению будет слово сие, еже бо аще реку, помощию всех Царя в славу его реку и, яково-либо будет глаголемое, во общую ползу будет нам.

Понеже неизглаголанными судбами Божиими толикая напасть найде на нас, толикая беда окружи нас, толикое злоключение постиже нас, яко рещи по апостолу: «По премногу и паче силы отяготихомся, яко не надеятися нам и жити»,[1748] но сами в себе осуждение смерти имехом. О, злобы диявольския! О, страшнаго рыкания многоглавнаго зверя! О, дивнаго лукавства врагов наших! Сеть скрыта²¹⁸⁸ нам премудрии ловцы толь широку и крепку, яко всех нас объяти и удержати могущую. При стези нашей новыя соблазны положити нам ненавидящий нас, древних соблазнов чюдейшия и славнейшия. Яму глубочайшую ископаша пред нами гонящий нас, еяже дно недалече бяше от врат адовых. Тую кознь обретоша на нас, яже крайнему нашему падению виновна²¹⁸⁹. Тое лукавство умыслиша, еже на конечную погибель нашу ключимо²¹⁹⁰. ²¹⁸⁹Тую мрежю пропяша²¹⁹¹ нам, в нюже увязнути убо нужда необходимая лежит, избыти же от нея дело есть не человеческаго скуднаго разума, но Божия неизреченныя премудрости.

Обыдоша²¹⁹² нас не яко врагов своих, но яко горких супостатов отечеству. Окружиша нас не яко церковный мир раздирающих уже, но яко и гражданскаго благополучия ненавидящих. Начата ловити нас не яко расколников точию, но яко и самой верховной власти злейших противников.[1749] Темже в толикую приидохом напасть, яже едина бе всех злых наших главнейшая и тяжчайшая лютейшая.

Лет бо множае четыредесяти прейде, отнележе пустыня сия благочестивыми населися жительми. И колико на ню воеваху врази, колики напасти нахождаху на церковная чада, колика бедствия и злоключения окружаху святое место сие, сказати невозможно есть. Врази бо наши умножишася паче власов наших, беды наши равночисленны суть песку морскому, злая нашя толика суть, елики черты времене²¹⁹³ живем в мире сем многомятежном.

Провожденная же ныне напасть всех напастей наших злейши нам явися и, аки всех зол наших мати, прииде на нас; и аще бы на части разделится имела, было бы четыредесять бед страшных и великих, равночисленных четыредесятим летом жития пустыннаго. И бе видети в десять месяц толики струи горких слез сиротских, елико несть тем числа равнаго обрести, аще бы кто и арифметическое художество совершенно знал: от праздника бо Введения Пресвятыя Богородицы[1750] до праздника великаго Богослова, то есть сего сентября до 26 числа,[1751] вся пустыня, аки в мори волнующемся, бедствоваше, всякое сердце трепеташе, всякая душа трясашеся, всякий ум колебашеся, всякое око слезы точаху. Прихождаху праздники Владычни,[1752] прекрасныя и многорадостныя, – мы же сетованием помрачахомся. Бяху торжественныя дни, но мы печалию погружахомся; воспевахом радостныя песни, но радость наша удаляшеся от нас. Чтохом сладчайшая словеса медвенноязычных славиев²¹⁹⁴ церковных, но не прильпе сладость гортани нашему.[1753] Зане горести окиян обыде и покры нас.

И наше убо бедство толико и таково бяше, твое же кто изрещи может, предстателю наш, разве ты сам своею риторскою силою, всеми образы витийства, всеми правилы многоглаголания. Мы бо льжицами горесть пихом, аще и в горком мори скорбей потопляхомся, – ты же целыми чашами пил еси. И да реку²¹⁹⁵ яснее: мы фиял скорбей по частем разделихом друг со другом – ты же един благодарно приял еси. Един за всех нас бедствовал еси. Един тмы болезней понесл еси. Един безчисленныя скорби мужественно претерпел еси. Вся бо беда наша на твоей главе висяше, все множество зол наших к тебе единому приражашеся²¹⁹⁶. Вся стрелы вражия, на нас пущенныя, тебе единаго прохождаху, зане стена и покров по Бозе был еси нам. Ты бо и прежде из всего множества нашего горчайшая язва был еси врагу душ наших: твой язык богодвижимый, аки молния, опали невидимаго супостата и, аки стрела разженная²¹⁹⁷, пройде сердце его. Темже вся ковы и козни своя попущением Божиим на тебе паче подвиже, нежели на нас, и всею злобою своею на твою душу наступи паче, нежели на стадо твое.

Что же преславный Господь сотвори с тобою? – знамение велие воистинну и преславное, да уведят²¹⁹⁸ сынове российстии, яко не туне²¹⁹⁹ знамения имя имаши.[1754] Знаменит мужь был еси от юности своея, ныне же светлейшим знамением просиял еси. Немочный победил еси силныя, безоружный – вооруженныя, и агнец, един сый, безчисленныя волки прогнал еси. Овча одно – многия лвы смирил еси, бежащий един – гонящих множество попрал еси, Сампсон наш непобедимый явился еси, низлагая враги не челюстию ослею, но помощию Божиею.[1755] Паче же Ектора мужествовал еси,[1756] паче Ахиллея воинствовал еси,[1757] паче Ираклия страшен врагом был еси.[1758] Адаманта крепчайшее имел еси сердце, мудрость твоя дивна бысть супостатом твоим, словом твоим посрамишася противницы твои. Свет разума твоего просветил еси многих сердечная очеса, воеже видети сети ловящих. Забрало²²⁰⁰ был еси нам, вавилонских стен высочайшее.[1759] Услышит ныне славу твою вся Россия, заградятся уста зависти, и многих клеветников языки немы будут. Такова победа твоя, юже получил еси молитвами непрестанными и постом частым. Таково одоление, данное тебе свыше. Силно твое оружие на разорение твердей²²⁰¹, зане не плотско есть, но духовно, оружие тебе есть пост и молитва, оружие тебе – всенощное стояние и вопиение к Богу, оружие тебе – слезный источник и коленопреклонение частое и призывание святых, оружие тебе – слово премудрости, дар Божий пречестный, данный тебе за чистоту души твоея.

Сими оружии воинствуеши Христу, сими спасаешися преславно, сими противныя низлагаеши и победитель всегда являешися и доволно уже с Павлом можеши вопити: «Богу благодарение всегда, победители нас творящему о Христе Исусе, и воню разума его являющу нами во всяком месте».[1760]

Кто не почюдится²²⁰² толико преславному действу Божию, яко враг твой злейший бысть друг твой и поборник по тебе[1761]. Клеветник великий на твое благочестие бысть проповедник твоих добродетелей, досадитель и ругатель твой обретеся помощник твой и страдалец за честь и славу твою. О, дивства твоих дел, Христе мой! Лев, пришедый растерзати нас, во агньца претворися при нас. Змий ядометный, прежде горко уязвивый нас, потом язву нашу врачевати потщася, и не точию, но и сам за ны уязвитися сладко восхоте. Ехидна лютая сладкий врачь показася нам, ин Валаам прииде проклинати нас, и не попусти ему Бог.[1762] Темже начат гласом велим²²⁰³ благословити нас. Той проповеда правость нашу, иже прежде оболга нас неправедно; той оправда нас, иже прежде многими лжами хотяше смертному суду повинных нас сотворити.

Таково действо имать прилежная молитва и толь полезно есть нам о вразех молитися. Кто не удивится твоей нелицемерной любви, учениче Христов, яко и за толикаго врага, оболгающаго и оклеветающаго и тебе, и други твоя, и братию твою, молитву прилежную творил еси и нас на повседневную молитву о спасении его подвигнул еси и не всуе сие сотворил еси, сим бо невозможное исправил еси и хотящыя ревновати тебе образ и прописание чистыя любве был еси. Делом исполнил еси заповедь Божию, поучающую о вразех молитися.[1763] Да знают бедствующии в бедах стену твердую и оружие, побеждающее враги видимыя и невидимыя.

Кто не почюдится мужеству и великодушию твоему, яко в толикой бури, в толиком треволнении, в толиком потоплении корабль нашего жительства тщанием велиим управлял и управил еси к тихому воли Божия пристанищу? Кто не похвалит ти дивныя ревности, яко и далече сущыя от себе, заарестован, посещал еси посланьми душеполезными и якоже сам пост и молитву умножил еси, тако и нас на сие богоугодное дело подвизал еси и коегождо нас на делание своего дела укреплял и укрепил еси? Кто постоянства твоего не прославит, яко обычнаго ти любомудрия и снискания словес Божиих и правых догматов не оставил еси, егда толь страшная напасть смущаше душу твою? Но елико время в заключении седел еси, не тако требовал еси от нас пищи и пития, якоже книг святых учителей церковных. И отсюду вемы, яко присутствоваху тебе невидимо Василии Велиции, Григории Богословы, Иоанны Златоусты, Иоанны Дамаскины,[1764] и прочии приснопамятнии мужие присутствоваху тебе, аще и не видел еси их внешнима очима, и поучаху тя, якоже поучаше Павел великий святаго Златоустаго, егда той чтяше прилежно послания его.[1765] Ибо и ты не туне имел еси у себе толикия книги, но вемы, яко непроходимую их пучину днем и нощию шествовал еси и разума богатство велие снискал еси в них.

Кому же не велика и не дивна чюдная добродетель твоего исповедания, зане не убоялся еси пред князи и владыки исповедати гонимаго от них благочестия. Не устрашиша тебе прещения, колеблющая всякое сердце; не развратиша ума твоего увещания многоковарная. Мученик изволением был еси, дерзнул бо еси на самую смерть за святое благочестие. Аще и чюдесно из самых смерти челюстей избавился еси действом Божиим и заступлением неусыпным Небесныя Царицы и теплыми молитвами святых апостол и пророк и мученик и святителей и преподобных отец, толико крепка показася любы твоя к распятому Царю славы и скипетру[1766] его честному, яко и нам ныне с Соломоном глаголати: «Крепка, яко смерть, любы».[1767]

Темже толикими венцы венчался еси с небесе, елики часы за арестом седел еси. Толикими радостми обрадован еси, елика оружия скорбей прохождаху сердце твое. Толикия молитвенники стяжал еси о себе в небе, елики святыя свидетели пред страшным Судиею имаши православному своему исповеданию.

Блажени суть и треблажени мужие они доблественнии, бывший с тобою в напастех твоих и бедам твоим мужественными душами приобщившийся, яко с самем Христом Быша в напастех и от него услышати имут сладкий глас: «Вы есте пребывше со мною в напастех моих, и Аз завещаваю вам, якоже завеща мне Отец мой Царство, да ясте и пиете на трапезе моей во Царствии моем».[1768] Достохвални суть и служителие твои, послуживший требованию твоему, яко, елика тебе сотвориша, самому Сыну Божию сотвориша,[1769] и от него приимут мзду велию в день славнаго и страшнаго пришествия его. Блажу аз и помогшыя тебе молитвами, и постом, и труды, и тщанием, и советом, яко и тии усердно сострадаху тебе по силе своей. Аще и отсутствоваху от Тебе, аще и далече бяху от твоего лица, но тая же ревность бе в них, тая же любовь, темже и упование то же имут с тобою будущих благ, яже уготова Бог любящим его.

Но, о, пресветлый венечниче, истинный носителю креста Христова, добрый воине Царя Небеснаго и нам заступниче крепкий, обрадовавый нас своим пришествием, утеши нас и словесы благодатными, искапай нам от честных своих устен сот небесныя сладости, источи нам струи сладкаго поучения, ²²⁰⁴упои от воды животныя²²⁰⁴ иссохшая скорбию сердца наша; насыти душы наши, алчущыя разумнаго брашна; укрепи нас, изнемогших от печали; услади огорченных желчию шестомесечнаго злоключения, подвигни нас данныя ти премудрости на большее благодарение ко всемогущему Богу о настоящей радости нашей. Ничтоже бо тако сладко душам нашым, яко слово Божие, яко глаголы живота вечнаго. Ничтоже сице возлюбленно нам, яко еже слышати что и разумети от закона Господня. От сего бо и еже удалятися злых наказуемей. Сие дает нам в напастех отраду, в печалех утешение, в теснотах пространство, в горестех сладость и в самых падениях наших возставляет нас, в самых смертех нашых веселит нас неизреченным веселием. От слышания бо слова Божия раждается в нас вера к Богу, умножается любовь, утвержается надежда, разгарается усердие, распаляется сладкое желание к Создателю нашему. От слышания слова Божия приходим к деланию заповедей Божиих. Делающе же заповеди его, обретаем вечный живот во Христе Исусе Господе нашем, ему же подобает всякая слава, честь и поклонение со Отцем и со Святым Духом ныне и присно и во веки веком. Аминь.

Премногомилостивейший наш государь, пречестнейший настоятелю, всеблажайший учителю, любезный отче Симеон Динисьевичь.

Что тебе мы, смиреннии и грубословеснии твоея отеческия паствины словесныя овчата, преплачевныя сироты, всяк чин и возраст, скровныя споболителницы, плачевныя сродственницы и вси воспитавшиися от вашея благочестивыя отеческия трапезы, безнадежныя бедницы, в нынешнее настоящее сие и печалное время восписати дерзнем, понеже видим твое отеческое конечное изнеможение и безослабное немощи тяготоношение? И киими усты возглаголем и каковыми печальными плачевными гласы жалостно воскликнем, зане зрим твое изнеможение, ужасаемся своего хотящаго быти конечнаго осирения? Ах, нас злочастных! Уже нас последняя злая окружают, понеже твое отеческое изнеможение, нашим сердцам пронзение, тако печално есть, тако всякаго безнадежьства и горкодушия виновно и таковыя жалости и горкости своея исповедати, исповедати же и исписати весма не можем.

Понеже наипервая печаль нашего сиротства, еже о твоем отеческом отвезении и всетомителном под неволею седении[1770] в забьітие прииде, а вторая горчайши первыя привниде. Зане тогда велиим страхом содержими быхом, и тебе, своего отца, жива лишени и за некую надежду возвращения чаяхом и ожидахом и чрез твое отеческое писание, аки лицевидно²²⁰⁵ присещаеми, утешахомся и от великой печали теми твоими отеческими наказаниями прохлаждахомся и жити во отеческих основаниих укрепляхомся. Такоже братия от Тебе к нам приезжаху и прихождаху, известие о тебе, нашем отце, нам приношаху и нашей скорби отраду подаваху. Егда же приспе время Божию милосердию излиятися тебе, нашему отцу, в свобождение, а нам, печалию безнадежства отягченным, во облегчение, о, коль радостно твое отеческое к нам пришествие бедным показася! О, коликаго веселия преисполнено явися! Яко от радости друг друга поздравляюще, Владыце свету и Пресвятей Богородице и прочим святым благодарение изустное воздавающе и друг другу, аки ластовицы, щепещуще, торжествовахом. Тебе, своего пастыря, бедное разпуганное стадо, в церкви стояща усмотрехом и ины от иных быхом. И от таковаго благополучия исполныпеся нечаяннаго веселия, друг другу глаголахом: «О, бедный плачевный сиротский соборе, видите отца человеколюбива и чадолюбива стояща, сетование ныне отложим и во упование Божия надежди сладце себе вложим. Ныне и горкодушие наше на благодушие преложим. В радостная благополучия вступивше, безнадежныя сироты, горкорыдателная забытию предадим». Тебе, своего пастыря, всеприлежно и прерадостно узревше, сиротьство свое забыхом и благонадежны себе быти усмотрехом и друг другу от радости глаголахом: «О, бе...[1771]

...изволи и, еже душу положити, не отречеся? Кий пастырь, зря стадо овец от волк расхищаемо и снедаемо, не убоится и не скрыется, да что люто не постраждет и сам не снеден будет? Ты же, отче, за словесныя овца себе не пощаде вдати и не скрыся, но всего себе в немилостивыя руки предаде, да словесныя овцы во ограде невредны упасеши и целы соблюдеши. Сего ради, якоже ты о нас попечеся, тако и Господь тебе своею десницею милостивно снабде и сохрани и человеколюбно свободу подаде и во свое достояние дивно введе во общее наше спасение.

Благодарим твое человеколюбное милосердие, всеми виды нам показанное, понеже коликия реки милости твоея к нам истекаху, овогда в терпении, овогда же в тяготоношении недостатков наших. Такоже и в томлении сущи, а нас, сирот, не забывал. Яко и в неволи седя, а нас милостивно писанием утешителным награждал и печалем нашим облегчение подавал. Иногда же отеческими словесными приказаниями утешал и окончения блага ожидати увещевал. И отдалека распуганное плачевное стадо пастырски назирал и, аки присный отец, собранная и Богом порученная чада с болением приседал и всяким увещанием терпети пождателно²²⁰⁶ укреплял и попечение неусыпное к нам, бедным, изливал.

Благодарим тя, любезный настоятелю, яко и в великой неволи седя, а свободным отеческое утешение подавал, и в неослабной бедности долговремянно томим, а питающимся обилно от твоея благочестивыя трапезы, духовныя пищи цветы чюдныя и сладости духовныя полныя сбирая, писал и наша устрашенная и огорченная лютою печалию сердца отеческим поучением прохлаждал. Ах, нас, бедных! Коликими и каковыми отеческими учении обогащахомся и благословении награждахомся, аки кладязи чюднии, сладкия воды издаваху, и аки златоструйныя реки отеческих милостей вседивно к нам истекаху, и наши дни напояху, и всеми виды, аки приснии отцы, предивно учении своими премудрено руководствоваху.

Ныне же, бедницы, всего сего тщи быхом²²⁰⁷. Увы, увы, нашея нищеты! Тебе единаго имеем, а пожити и нас поруководствовати надежди не имеем, понеже всячески видим тебе немощию утомлена. О, премилостивый наш отче, кое тебе мы благодарение, печалию огорченнии, принести возможем? Аще имеем желание и преимеем тщание по должности поблагодарити и тебе, своему отцу, за любовь любовная отдати, но против твоей отеческой благости, показанной к нашей последней худости, не есть нашей грубости дело, понеже язык груб имеем и отдати благодарная по долгу не могущ. Писати ли дерзаем, и в том зазор²²⁰⁸ немал имеем, понеже ум наш недоумением и помрачением погружен и смыслити благодарение отдати недоволен²²⁰⁹. Аще за належащия болезни сетования нашего и за упрошение плачевных сирот понудихомся сие писати, а известно ведаем, яко от наученных за грубость и простоту уничижены имамы быти. Сего ради, аки дети, немотуя²²¹⁰, стояще, слезно рыдаем и, аки бе<с>словеснии овцы, блекотающе жалостными гласы, плачевно восклицаем: «Не остави нас, пастырю добрый, не остави, но еще поживи и недостатком нашим потерпи и о душах наших побди или нам, сиротам, общий гроб у Бога испроси».

При сем своем плачевном написании и грубости нашего продерзания просим прощения и отеческаго благословения, лицеземно вси кляняемся.

«Жалость дому Твоего снесть мя».[1772] Словеса сия Давыд царь воспет во псалме 68.

Кто не весть, колика и какова бывает жалость, каково сокрушение сердечное, каково уныние, каков и колик исток лиющихся слез, о, слышателие плачевнии! Егда кий-либо дом или жилище лишится первенствующаго руководителя, егда увидит того смертною косою пожата, на ин век внезаапу восхищена, жития сесветлаго²²¹¹ изменшася, оставльше ближняя, и сердоболи, и знаемыя, и други, и весь свой сладчайший род, покинувше горкую сию и окаянную жизнь, забывши в здешних бываемая вся, уединившися на ину незнаемую страну, ²²¹²крайний ответ дати претима единому и страшному Цареви²²¹², испытающему сердца и утробы. Ах, жалости! Ах, болезни несносныя! Увы, неповестнаго²²¹³ злополучия! Слезят оставшиися горко, из жалости вопиют, рыдают и стенют неутешне; на что-либо воззрят – сокрушают си сердце, о чесом ли помыслят – вящше и зелнейше уязвляются душею и никакоже хотят утешитися, когда Давыдово оно воспоминающе: «Отвержеся утешитися душе моя»[1773] (Псалом 76).

Таково несравнително²²¹⁴ видети есть в нас, о, возлюблении, деющееся, како дом наш, си есть все и братское, и сиротское сочленение, весь и христианский всецерковный сонмь, горко от души плачет, слезно и неутешно рыдает, всесердечно и многосетовно тужит. Како лишихомся всехудожнаго²²¹⁵ врача, како потеряхом вседобраго пастыря, како надчаяние²²¹⁶ аки из рук испустихом прямейшаго²²¹⁷ настоятеля, непритворнаго всем руководителя, неотменнаго и любезнаго всем господина и отца превожделеннаго С<имеона> Д<ионисиеви>ча.

Ах, жалости нестерпимыя! Ах, сетования, оплакати никогдаже отнюд возможнаго! Сетуют церковнии служителе, яко всецерковный торжественник в неведомая восхитися. Плачют книжнии мудролюбителие, яко прямейший любомудрец книжный и ведетель Священных Писаний многопремудрый, от здешних преставлься, горняя проходит разумения и самеми вещьми навыкает превыспренних²²¹⁸ тайнств. Тужат старшин братства, яко старожитный богообещник иную уже жизнь находится познавая; во иная взирает, нам неведомая и чюдная. Рыдают над меру²²¹⁹ вся киновиате, и юнии, и превозрастнии, яко вседобрейший чиноуправитель ко иным обителем превземся.

Позорует²²²⁰ и созерцает видения и удивления воистинну достойная сиротский плачевный собор, вси плачющима очима, вси жалостными сердцы, вси горящими слезами и умиленно, и горко стенют, рыдают и вопиют, горлице пустыннолюбней подобно, или, рещи, Рахилин плачь деют, по реченному: Глас в Раме слышан мног, Рахил плачющися и не хотящи утешитися, яко не суть.[1774] Вси сокрушающеся неутешно, своего наставителя, своего искренняго управителя, своего подлиннаго сердоболя оплакующе, истовый совершают плачь. Аки птенцы, зияюще²²²¹, взирают ²²²⁰семо и овамо²²²² и нигдеже обретают уже желаемаго. Церковная вместилища того праздна²²²³ зрятся. Служебная делателища того не имеют. Келейное сожитие того не являет. Отхожия службы того не стяжавают. Во отъездах не слышится. В неволних нигли случаех находится, и ниже тамо чают. Нигдеже в здешних любезнейшаго обретают. Нигдеже в земленных²²²⁴ может от кого и киим обрестися превозжделеннейший. Жалеют и скитницы, тужат попремногу и любезнии друзи, и советницы, и бывший иногда единоцерковнии и единохрамнии и единотрапезнии, в любви и крайней о Христе дружбе друг другу спомощницы и добротворителме изряднии, жалостно и слезно воспоминающе в толиком лишении добрых рачителя, своего милостиваго отца и наставника непритворнаго.

Но доколе пребудем сокрушающеся и сетующе, умиленнии? ²²²⁵Подотрем поне мало слез, установим печалныя жалобы²²²⁵. Притупим терн печали, сердца наша над меру уязвляющий; воспомнихом жалостная, воспомним нечто и благонадеемых, приимем на длани нашего разсуждения отчюю жизнь и того пред Богом и братством неукорныя²²²⁶ заслуги и деяния, и самый того християнский исход, и в разуме от здешних отхождение. И сия повествующе, поисполним²²²⁷ урон лишения нашего, да якоже сеюще слезами, отрадная себе пожнем; вступихом в плачевная, негли ныне увидим и готовыя обимающе рукояти²²²⁸, по реченному: «Ходящий хождаху и плакахуся, грядуще же приидут, вземлюще рукояти²²²⁹ своя»[1775] (Псалом 125).

И понеже приснопамятный наш наставник и от самых начал предивен в довлетворениих²²³⁰ возявствовася, и первое послушания и смирения богатство с подоблющим покорением своему сердоболю и отцу, единоутробному А<ндрею> Д<ионисиеви>чю, показуется, стяжавая, вящшее же подвиг книжный восприим. Кая убо от того потайся книга, кая не познася история, которую не прошед повесть, кий остави патерик! Не неведоми тому и летописци, не непознаваеми от него и хронологии. Весь Ветхий и Новый Завет на языце того обносим бываше,[1776] еще же и правилная,[1777] и Апостол, и отец святых вселенская и особная, и веления, и завещания изследована и ведома тем показовахуся и по потребе к вещи искомей с ползою многою употребляхуся: бяше убо и памятию преизлиха мног и ²²³¹от естества имея остроты богатство²²³¹, к тому же и преохотный притяжа нрав и любомудренный благий обычай. И за доброе сия себе судив, еже поучатися всегда в законе Господни, по Премудрому, а еже разумети закон помысла есть блага.[1778] Темже и неусыпными подвиги, недреманными прилежаньми понуждая себе, да явится, «яко древо саждено при исходящих вод, иже плод свой даст во время свое, и лист его не отпадет, и вся, елика аще творит, успеет».[1779] Что послежде и самеми делы исполнися.

К сим и внешнему любомудрию преискусен рачитель²²³² явлься, и свидетелствуют самая того любомудрая действия: ответословное с единоутробным подвизание[1780] и прямейший за Церковь и верныя о Господе спасителный и подвиг, и труд,[1781] и ползодатное всея Церкве рачение. И внимаяй и прочитали сия, паче же силу и глаголемых, и пишемых пряме разумеваяй: кто не исповест ²²³³богомудрая всецерковная столпа²²³³ и превысокое ею, и любомудрое, и от естества многохитрое наставление, и разум преопасный²²³⁴ и многопремудрый, и во обысканиих²²³⁵ и ответословиих весма непогрешимый и многохитрый. И не дают лгати внешних любомудрий совершеннейшии снискателие, не точию грамматика и риторы велеумныя именующе, но и других всехудожных и философских и богословских наук знателей тыя прославляюще, наглаголуют. И витийственыя формы и пириоды, ²²³⁶тем неподозрителныя²²³⁶, излагати приписующе, разсуждают.

Кто изочтет особный того и частный труд, неисчисленная любомудрая словеса, формы и схимы и самая злата дражайшая панигирическая хвалная словеса Божиим угодником, и императорским персонам, и другим высочайшим лицам, и собственное о церемониях, о вере же и догматох и преданиях церковных, яже не токмо риторския красоты, но и духовныя ползы и сладости исполненая суть и к подражанию прямейшему рачители, паче слова, понуждающая. Кто от иже ведящих без повести минет особный исповеднический того о Господе труд, и многохитрый о благочестии подвиг, и словесы племенными и вещьми бывший в Новеграде: темничьное во узах четверолетное претерпение, всехитросмысленная на вопросы словеса, всековарная искушения неисчисленнии страси. Новоизменяемыя земляныя темницы и узы, яже вся она особнаго требуют повествования,[1782] еже многострадалный претерпе подвижник и наконец от промысла Божия дивную получив свободу, новый исповедник явлься блаженный.

Оставляю глаголати книжное снискание, премногопотный и долговременный труд, саморучное повестей списание, получение вещей²²³⁷ долговременное, всякаго разума обыскание, церковнаго и гражданского всеобразными и неусыпными тщаньми, вседневными и частыми разглаголствы, многохитрыми и ползодатными диспуты утверждаемыя. Прехожду многохитрое того по потребе реэстров, всетщателное в преписании и сочинении каталогов на скорейшее обретение вещей, на самый нужднейший искус, по потребе каковаго случая бывающий. Вся же сия творяше в говении мнозе и ко всем весма чаемой ползе, яко збытися о нем и всем премудраго Павла словеси: «Всяк убо разум пленяя в послушание Христово».[1783] Вся убо миную еговая²²³⁸, едино токмо пред очеса вращаю, емуже и удивляюся, яки вящшему в блаженнице дарованию Божию: како таковым богатством просвещен, каковым дарованием одарен, коликия и каковыя благодати от божественнаго приприя и получи Утешителя. Егда празднику какову приходящу когда, многотщателное о сем показоваше рачение, в церемониях и обрядох искусное, в пениих и хвалословиих подобающее, во внутренних душевных благоговейное и весма опасное²²³⁹. Самому же, яко Аарону, просте стоящу[1784] и, якоже другому Самуйлу, о Божиих людех на небесный верх всех Содетелю и Владыце, Волителю милости, скучающу²²⁴⁰.[1785] И ничтоже ино зрети в нем познаваемо, разве уста его, согласная внутреннему приношению содевающа и немолчными труды молитвенный Богу жертвенник совершающа и строяща. И кому подоблющий отдох²²⁴¹ бывайте на чтениих? – Нашему же любезному тщателю вящший и новый признавашеся труд и неседалное, но обнощное²²⁴² Богови совершашеся правило. И толь того тепло и разженное усердие бывайте, присно убо восхождение в сердцы своем полагая, видяшеся, и аки явно Давыдово оно напеваше речение: «Готово сердце мое, Боже, готово сердце мое, воспою и пою во славе моей».[1786]

По всех сих и посреде сих, внегда окончевающуся уже всенощному славословию, исходит блаженный трудник, не поеже возлещи, но поеже братию и вся слышащая Божиим словом ползовати. И бывающу ему таковому труду на два часы и вящше, егда от великаго сокровища всеблагодатныя памяти своея изношаше: с коликим преохотным любопремудрством, с каковою всеблагодатною о Господе ревностию, и бяше слышащим не точию удивително, но и сладко бяше священное казателство²²⁴³ его, и разумно, и ползы поистинне и хвалы духовныя исполнено и солию божественною растворено.

Не без удивления воспомнити десятолетное и седьми месяц настоятелское правление его, коль дивно и попечително управляя и паче силы везде себе понуждая, являшеся: аще в церковных надсмотрениих, аще в книжном благоискустве, аще в киновийномь и всего братства попечении, аще в сиротствующих и всех постниц говейном управлении, аще в нужднейших советах, аще от внешних в каковых-либо привпадших печалех. Везде благоискуствоваше, везде с подобающим разумом творяше, везде с хитрыми и всесмысленными поведении и догатками преславно действоваше и везде и вся ему без зазора бываху, всюду с целомудренным и происком²²⁴⁴, и хранением совершахуся.

Что же в самый искус вмале предварших²²⁴⁵ клеветных плевел сотворьсодела, показуется, егда и страху непостояну, и грозе нестерпимоужасной всюду общедшии, аки облаку темну, всю пустыню и дебри покрывшу? Еда бегством спасти себе умышляет, еда скрытися и время где пробыти похотевает?[1787] – никакоже, но и в самую бурю, в самый вихор напастей, истейше рещи, в самый огнь искушений вступив, показуется «пастырь бо добрый, душю свою полагает за овца»[1788] и не умыслы каковыми действует, но моленми прилежными, постом неослабным, воздержанием крайним, терпением отнюдным²²⁴⁶, неусыпными к Богу прошеньми подвизаяся. К сим общими к Содетелю служеньми, утреними и вечерними, понуждаяся и понуждая, а имянно: молебными повседневными, канонами акафистовыми Исуса пресладкаго и Владычицу Богородицу скланяя к милосердию и умоляя.[1789]

Таковое словесное служение, жертву живу и святу, по блаженному рещи Павлю, Богу живу и истинну[1790] избранный Божий, показуя, явствуется, яже не токмо бывшия при нем, но и вся внешния таковыми ко удивлению и прославлению Божию приведе. И не требуется на сия крепчайших доводов: сам убо вышний Содетель и промысленник Бог преславно о нем содела и оконча, своего раба непостыдна показуя. Свобождается доблий указом императорскаго величества,[1791] падшим всем плевелом, погасшим всем коварством, раздравшимся всеклеветным и лженаговорным сетем и в ничтоже обратившимся. Исходит Божий раб, отвсюду удивляем и хвалословимь, отвсюду приятствуем и почитаемь, от своих обвеселяемь и от внешних похвалными словесы возвышаем, яко подвижник крепчайший, яко страдалец терпеливый, яко збыватися о нем писанному, якоже древле о веровавших сице и о сем вернейшей Божии служители: «И бе рука Господня с ним».[1792] И по Давыдову речению: «Си измена десница Вышняго».[1793] Но что дивному страстотерпцу, что благодарному тяготоносителю, яко Иову многотерпеливому,[1794] яко всемужественному Атланту,[1795] вся понести могущему; по блаженному Павлу: «Вся, – рече, – могу о укрепляющем мя Христе»;[1796] не аз же, но благодать, яже во мне, творит, и благодать Его не тща о мне бысть.[1797]

Что еще тому ключается²²⁴⁷. От Божия промышления находит тяжкая болезнь, яко темный некий облак, яко тягота, олова тяжчайша и презмерна²²⁴⁸, обиде того, яко рой пчелный, велеумнейшаго ироя²²⁴⁹, всеми стрелами, всеми острейшими жалы, даже и до шестимесячнаго времяне труды даваше велемужественному подвижнику. Той же благодарною душею вся подъемляше, вся по Иову велеумному разсуждаше: «Аще, – рече, – благая приях от руки Господни, злых ли не претерплю?»[1798] И таковыми наш любезный нравы и благодаренми благодать Волителю милости исповедаша. Егда же и конец уже подвига блаженному труднику настаяше и брег пристанища смертнаго показовашеся, что не творит дивных удивляемый сей! Коих преславных не сотворяет! Исповеданием християнскаго закона, яки венцем многоценным, увязуется, сподобляется сладчайшаго, паче же небеснаго дара великия поистинне и аггелом говейныя²²⁵⁰ Божия святыни, напутника нетленнаго и нетленней жизни и руководителя непрелестнаго, и, сия получив, бывает весь обожен, весь светел и обрадовенен и взоромь инымь образуем показуется, осиявается убо внешний взор от внутренняго дражайшаго бисера, и показует того, яко втораго Моисея, лицем светлеющася и сияюща.[1799]

О, колико о сем благодарствив Содетеля является! Колико песнословив, яже вся ведящии засвидетелствовати истинное могут! Но уже наста и самый час блаженнаго на оный век преставления. Содействовав и в сем Божий человеколюбивый промысл Божию рабу; в онь же день прежде предварив, свободися внешняго обстояния, отпустився указомь царским на свободную жизнь, сице и настоящыя многотеснотныя жизни временныя свободися повелением царствующих Царя и Бога, на лучшую и дражайшую прескочив жизнь, восхищся²²⁵¹ к неумытному Божию правдосудию в самый годищный день, то есть септемврия в 25, лета от создания мира осмыя тысящы двесте четыридесят девятаго, индикта четвертаго, а по исчислению настоящаго гражданства лета Господня 1740, в третию стражу, то есть в девятый час нощи,[1800] крестную на челе печать многократным руки положением християнски начертав, с треми дохновеньми дух свой Господеви предаде, очи и руце горе возвышают, сими явственно изъяви себе Святыя и Единосущныя Троицы поклонника и верна в самом исходе служителя и молебное и благодарное хваление своему Содетелю воздавающа.

Сицев наш предстатель дивный явлься, сицева того пред Богом и братством подвизания. Такова того святая, поистинне рещи, и богоугодная жизнь и треблаженное всеблаженнаго подвижника к Богу преставление. Такову убо Божию рабу и быти готствует, таковыми и толь удивляемыми и заслуги, и действы подобающими осияватися.

Вы же, о, многопечалнии слышателие, сицевая и толь преславная слышавше, таковыми и толь удивляемыми добротами отчими огласившеся, не будите над меру самех себе сокрушающе. Лишихомся ли добляго наставника, но не лишихомся добраго того видети и с ним сложити и доблих о нем и повестей, и слышаний благодатных насладитися. Отпустихом ли на иную жизнь велеумнаго пастыря, но не отпустихом того Божия ради благостыни тщама рукама²²⁵², но по силе и паче силы о Божией силе за веру и верныя, за Церковь и церковныя рачители в жизни сей подвизавшеся и заслуги, всем ведомая, и спасения показавши и Божию оную заповедь со опаством сохранила: «Ничтоже, – рече, – сея любве есть болше, да кто положит душю свою за други своя»,[1801] – и тако преставлшеся.

Преставися ли от нас всехитрый врачь, но не остави ны не уврачеваны, вся бо ны, ²²⁵³в нелико время с нами поживе²²⁵³, и словеси, и вещми²²⁵⁴ врачевав и образы спасеныя всем предложив и увещевая ны и поущая²²⁵⁵, якоже годе²²⁵⁶, и тако свое соделав, к неведомым восхищен бысть, по Премудрого словесе: «Восхищен бысть, да не злоба изменит разума его или лесть прелстмт душю его».[1802] Мним ся ли лишением отчим лишитися уже и всех благих – никакоже, но, подвиги прямейшаго управителя шествующе, образы еговы во всех сохраняюще, нравом того и делом подобящеся, паче же и Бога и Владыку присно и боящеся, и взыскующе, не имам лишитися благих, по гласу псаломску: «Яко несть лишения боящимся его».[1803] И паки: «Взыскающи же Господа не лишатся от всякаго блага».[1804]

Отшедши ли того непщуем от нас и ктому²²⁵⁷ ниже посетити ны убо могуще, ни на се изволяюще. Ниже помыслим сего, но паче возверуем верно о сем, яко аще Бог живый в животе безначалном и безконечном царствуяй, и «Бог Авраамов, и Бог Исааков, и Бог Ияковль»[1805] глаголется и при купине является и глаголяй: Аз есмь сый,[1806] си есть присно и всегда сый, убо «Бог несть мертвых, но Бог живых есть»,[1807] вси бо тому живи суть. Сице и наш добрый о Христе, живою верою в живаго Бога веруяй, жив есть духом, по словеси Христову: «Веруяй в Мя, аще и умрет, жив будет».[1808] Темже аще и телесне от нас видится отшедш, но духом (си есть душею) с нами обретается, пребывая. Токмо аще умножится, а не умалится в нас самех вера, любовию поспешествуемая, ниже и того умалится с нами всеблагодатное присутствие и присещение.

Темже, возлюбленнии, сицевыми возуповавше надеждами, потщимся блажайшему совещателю во всех подражати по силе. Церковнии служителе, всеискусному служителю сему и благоговейну чиноуправителю подражаим, всеговейно и благоискусно Божия отправляюще дела, и ниже в чесом паче подобающих сотворим, но яко самому ту Цареви, силам предстоящу и созирающу наша и испытающу дела и словеса и помышления, тако з говеющим страхом и служити, и управляти потщимся. Поющии же и чтущии и Божия песнохваления послушающии, велеумному тщателеви поревнуим, поюще убо разумно и чтуще богомысленно, говейно же послушающе, якоже и научаемся, песнопоемая она взывающе: «Пойте Богу нашему, пойте, пойте Цареви нашему, пойте, яко Царь всей земли Бог, пойте разумно».[1809] Сице убо разумно поюще и сице пречестно слушающе и аки оная во уме живописующе и во устну благодатное оное и новое песнопение имеюще, по царствующему оному песнохвалителю: «Вложу, – рече, – во уста их песнь нову, пение Бога нашего».[1810] Тако сия добрая при себе удержим, благому наставителю последствующе, яже вся он дивный отец со опаством²²⁵⁸ сотвори и нам по себе добрый образ или идею благоизмечтанну и красну остави.

Книжнии читателие, книжнаго рачителя потщимся подражавающе недреманно и ежечасно о книжном разумении и чтении внемлюще и плод отсюду сицевый собирающе, обрящемся, по святому Дамаскину:[1811] аще убо будем любоучими, обрящемся и многоучими; и по святому апостолу Петру, наказующему: «Будите убо готови всякому вы вопрошающему о вашем уповании, совесть имуще благу»;[1812] и по святому Евангелию (паче же самому Спасителю), увещавающему ны: «Испытайте Писания, яко вы мните в них имети живот вечный».[1813] И с прилогомь: «Всяк книжник, научився Царствию Небесному, подобен есть человеку домовиту, иже износит из сокровищ своих ветхая и новая».[1814]

Старожительнии в братии, воспомним прямейшаго вкупожителя²²⁵⁹, истоваго, а не притворнаго братскаго уда, всяк к ползе и хранению общему и действующаго, и совершающаго. И сами тожде потщимся усердствовати и хранити богообещныя законы и правилная хранения и образ благ быти, а не соблазн прочей братии. Юнии и средовечнии, приимем в препоказ²²⁶⁰ юности премудраго руководителя, сластей обуздателя, злоукорных страстей дивна попрателя и чюдна победителя.

Многосиротный соборе девствующий, усердно и плачевно поминай вседобрейшаго своего казателя²²⁶¹ и целоумная того учителства и совещания, яко дар, драгое у себе удерживайте и незабвенно на скрижалех сердечных начертавайте, яко златая писмена, якоже и прочая того преполезная наставления, не языком просто, но духомь премудро к вам произносимая.

Сродници и сердоболи ближнии, жалостно и умиленно желаемаго память совершайте, и сердечными и умными воображеньми присножелаемый того зрак²²⁶² присно пред очесы представляйте и тем, всеплачевнии, выну и выну утешайтеся. Вси друзи и советницы сладчайшии, внутреннии[1815] и скитстии, воспомните единоумнаго вашего советника, действително вам и любезно иногда советующаго, и доброхотно вся к ползе общей предлагающаго. Воздохните и жалостно проплачте и подобающими помяновеньми преставлшагося помяните. Прочее, соборе церковный и всепустынное совокупление, отпущайте во ин мир обще вси всепустыннаго вашего гражданина, пустынно, а не мирски и жителствовавшаго, и глаголавшаго, и образ спасения благ всем подавшего. Не плачи ктому, ниже чрез меру сокрушайся в толиком нечаянном лишении, но паче, о благих надеждах возуповав, десно о нем разсуждай, яко толикаго и таковаго и толь дивнаго наставника не точию сподобися времянно имети, но и со многим прикупом получи отпустити к нетлеющему блаженству, всего беззазорна и о Божией помощи всего непостыдна, молящася о нас и ходатайствующа Господеви, единому безсмертному невидимому премудрому Богу: Господи, «се аз и дети мои».[1816]

Сия тебе от нас, о, честнейшая и превожделеннейшая главо, преохотный словолюбителю и отче честнейший. И зде ми уже настоит уставити²²⁶³ слово, аще и недостойно ставления, но убо по силе не оскудихом, но в мере усердней, елико возможно определити, понудихомся. Ты же назирай нас свыше, вознаграждая нас, всю нашю окаянную жизнь милостивно руководствуя и в защищении собственном имея, аще в ратех диавольских безбедно спасая, аще в слабостех греховных благодатно охраняя, аще во обстояниих напастных премудре оберегая и преславно освобождая, аще в случаемых здешных каковых невидимо наставляя, упремудряя и соблюдая. Везде благоспомощьствуя, везде чюдесно и чрез чаяние исхищая и на конец к будущым горним верный возводитель и наставитель непостыден являяся и поставляя тамо с прочими подобными тебе. Аще и велико прошение, но верно и желанно просим всяко и надеемся восприяти о самомь Христе Господе нашем.

Но, о, и ты, пречюдный старче и руководителю первейший, треблаженне отче Д<анииле>,[1817] приими доброхотно своего любезнаго Симеона, отскочившаго от братскаго недра и с вами витати извольшаго во входех небесных кровов. Упокой, яко отец чадолюбив, и возведи внутрь выспренних²²⁶⁴, идеже шум празднующих, спридружи и соедини с прочими горними жители, да поликует²²⁶⁵ с вами вмале и еще горких сводобь²²⁶⁶ быв, да порадуется, яко обретый корысть многу, да забудет дольняя и горкая, преестественными и новейшими осияваемь дарованьми. Ей, честнейший отче, ей, милостивый в потребах снабдителю и утешителю готовый!

Но и ты, о, пречестный и богомудрейший наш наставителю и отче преподобнейший А<ндрее>, простертыма дланьми потщися прияти своего искреняго сердоболя, единоутробнаго своего брата, восхищенна бывша, яко птенца, и к Божию правдосудию в страсе мнозе тещи понуждающася. Приими яко отец, иже прежде отечески о нем пещися изволяющий, и представи к страшному и превознесенному царскому престолу, яко имеяй дерзновение много. Постарайся великим ходатайством великому и грозному Судии, да призрит, да утешит, и в части избранных своих спричести, яко благ, да изволит, и десным стоянием нашего любезнаго, особливо же твоего единоутробнаго да почтет друга. Ей, молим тя, любезнейший наш ходатаю, попещися, благоволи умолити неумытнаго²²⁶⁷ Судию, великаго и страшнаго Царя, да милостив будет к нему, да человеколюбный и милосердный на нь изнесет ответ.

Но, о, и ты, Петре, любезный, честный и всеискусный екклисиарше церковный, помози своему сладчайшему по плоти и духу сроднику,[1818] приими его во свое отеческое защищение со своими ти сердоболи и рачители. Подими священными ти в Дусе крилы и постави и в лице аггелолепнаго вашего достоинства, да получит и той узрети откровенным лицем неугасную славу Святыя и всепетыя Троицы и тамо нетрудныма²²⁶⁸ души ногами получит заступити, идеже о нас взыде предотеча Христос, и веселуяся и припевая она благовременная, возблагословит, глаголя: «Нога моя ста на правоте», в Церкви ликующей благословлю Тя, Господи.[1819]

Но и ты, о, двойце преизрядная Иоанне и дивный старче Дионисие,[1820] ов убо яко брата, ов же яко сына любезна приимита усердно и, ²²⁶⁷елико можета, порадейта²²⁶⁹ своему искреннему рачителю и милость и человеколюбие тому испросита от иже всеми Владущаго.

Но и вы, о, двоице же избранная и отца богоревнивая Исаакие и Прокопие с Мемнономь подвижником и страдальцем[1821] и с прочими святоотеческим собором и страстотерпческими соньмы, помозите вашему усердному о благочестии сревнителю и руку помощи подадите ему и еще убо яко человек требует и яко всевернейший уповает и надеется чаемых. И не точию сему церковному и братскому уду богоснабдимая благая испросите, но и нам, бедуемая страждущым, непогрешимое благонадежие произведите: рати церковныя умирите, ратующыя возбраните, бури и смущения движющыяся в тишину приведите, огнь многообразных искушений милостивно погасите, ярость и гордыню, ополчащуюся на ны, смирите. Клевещущыя языки, яко рыбы, безгласны сотворите. Темный гонения облак прожените²²⁷⁰, всяк страх и ужас, от бесов и злых человек на ны движимый, отразите; церковное колебание на твердое и незыблемое установите, христианский рог возвысите. Сиротствующыя возмужите и утешите. Вдовствующыя заступите, сумнящыяся и шатающыяся научите, несогласующыяся и ропщущыя мирны и покорны содейте, вся увещайте, вся примирите и к Божию хотению направите, всепустынное состояние и в святоотеческом содержании, и в незазорном житии утвердите. Целомудреныя и девственныя цветы неугасны и святопросвещенны израстите. Пиянственный гнус воздержанием успите; безчестныя страсти, яко злое терние, от среды пустыннаго жития исторгните; вражды и безсоветия²²⁷¹, яко негодное смятие²²⁷², изрините. Леность и уныние и татебную злость, яко вселютейший яд, под ногами поприте. В сих же место добродетелный род, яко краснейший виноград, насадите; любовный сот, яко сладчайший мед, во улиях душевных соделати потщитеся. Милосердие и милование в братии и святейшее братолюбие, яко свет благодатный, воспалите, смирение и кротость и молитвенное богатство, яко злато в горниле, в наши души скрыйте. Прочая же вся по апостолу: елика праведна, елика пречиста, елика прелюбезна, елика доброхвална.[1822] И аще кая добродетель, и аще кая любовь, сия вся содействуйте и совершите, и яко отцеве искренний своим чадом и яко пастырие своим овцам и яко блазии²²⁷³ учителие своим учеником, яко всеблагодатное наследие подавше, наделите, яко да вашим поспешеством²²⁷⁴, Божиим же человеколюбцем и в настоящих непогрешни явимся, и в будущих не лишимся благих о Христе Исусе Господе нашем, яко Тому слава и хвала вечная, от всякаго дыхания да будет, будет во вся веки. Аминь.

1740, ноемврия в день 3.

Пречестнейший благотворителный господин, всегдашний сиротский приятный отец, велеумнейший добросоветный наш государь Трифон Петровичь!

Обычно есть из самыя природы внутреннему человеков желанию к намеренному любовно восприходити концу и оттуду чаемыми утешатися надеждами и не насыщатися, Дóндеже чаемое изобрящут и рекут к себе взаимно: «Приидите, взыскахом желаемаго».

Таково видети есть и в нашем, о, пречестнейший отче и господине, желании деющее: из колика времене и случаев и бедственных обстояний и от другая страны напротив чаемых полз, аки из природы некоея любовнаго союза, влекома к вашему боголюбию всеогорченная наша сердца: когда, когда к намеренному²²⁷⁵ краю притечет, когда желаемаго брега коснется, то есть добрых события: егда бы всех очесы видно узрети ваше пречестнейшее достояние внутрь плачевных наших оград, когда бы сие действително един от нас до другаго взаимно рекл: «Приидите, – глаголющь, – обретохом желаемаго отца. Приидите, обретохом велеумнаго и добросоветнаго мужа. Приидите, взыскахом всеползодатнаго наставителя, обретохом немощи немощных со удобствомь носити могущаго».

И понеже толико и таково есть намерение наше до вашего боголюбия, егоже предел и перомь исписать невозможен есть, однако же паки и паки возновляюще²²⁷⁶, просим ваше отеческое милосердие: Подлегчися²²⁷⁷ Господа ради до наших краев прийти, паче же до природнаго по тебе плоти и духа отечества и возрождения, его же, чаю, и в совести нося незабвенною благих мыслей памятию, яко благоразумнейший, обновляеши. Имамы поистинне, любезнейший отче, имамы всенужнейшую потребу о тебе, в которой и о многих толики не имеем нужды, о которой ваше велеумие²²⁷⁸ по лепоте разсудити может.

Не посреде ли самыя, ²²⁷⁷по отцех святых рещи²²⁷⁹, громады всякия злобы стоим, не отвсюду ли обстоими и стреляеми всеми вражиими стрелами повсядно²²⁸⁰? Воистинну среде скорпиев, по писанному, наше житие:[1823] во правду²²⁸¹ всяк камень врази наши мещут на ны, всякая убо видственно²²⁸² беда и напасть и убытки зияют на убогшия ны, а имянно: и клеветная, и небратолюбная, и июдоподражателная, и вседневных плетей побои, живыя на ны оболгатели находятся и творят действително частыя наезды, грабежи и волокиты и убытки, и просто рещи: весь ад напастей на ны зинул²²⁸³ есть и многообразными коварствы повсядно бедствия обновляет.

И в толиких и таковых обретающеся злых, не имеем добляго совещателя, не стяжаваем многосмысленнаго вседогадливаго наставителя, многажды убо всегорчайшыя наши совести ово от напраснаго напастей возгорения, ово от внововпадающих многохитрых умыслов налягателства²²⁸⁴ приходят в некая недоумения, обаче Божиею помощию и вашими негли отеческими молитвами паки и паки на полезная преобращаются. И в толиких обращающеся злых, не стяжаваем, у кого бы совопросилися к лучшему, у кого бы прияли вседобрейшее к полезным наставление. Поистинне наши почти робячьи умы уже одебелели²²⁸⁵ противу толиких несносных бед стужению²²⁸⁶ и многоухищренному в лукавстве неисчисленных искусов нахождению. И что много глаголати: препобеждает помысл толиких бедствий облак, еликий наши горкия страны покрывает, во описанный предел привести. Поистинне неописанная²²⁸⁷ напасть нашедшая есть.

Того ради молим и премолим ваше благоразсудителное велеумие потщатися посетити всегорчайшыя бедники, всеми старшими и премудрыми в настоящее время паче надежды оставленныя и своими очесы чюветвително осмотрети любве ради Христовы наша несостояния.

Молим тебе, нашего отца, на сие истое²²⁸⁸ всебратское и сиротское состояние: слезно просят вси соборныя и старшыя братства, скучают и вопиют вси престарелии и немощнии, вси сироты и вдовы, от мала и до велика и стопам вашего отеческаго подножия умиленно и жалостно касаются. Не презри ради Сына Божия многосиротнаго всех прошения, понеже в толикомь до вашей благости потребовании находимся, яко уже нарочнаго повереннаго слугу и брата нашего с писании сими понудити потщахомся, который вашему отечеству в потребной в пути услужности потрудитися должный есть.

К сим еще просим твою отеческую любовь, поусердствуй не точию прошениемь попросити, но и убедити, елико возможно, с собою честнейшаго господина и благотворителнаго сирот отца Гавриила Семеновича, чтоб и он единокупною с вашим боголюбием ревностию подлегчитися благоволил посетити всеубогшыя ны и среде многообразных напастных случаев волнующийся христианства корабль не посмотрети бы точию, но и соутешити братолюбно и отечески потщался бы: ей, непритворно и о того благости чаянии находимся и, яко птенцы зияющии²²⁸⁹, надеемыя и от него чаемыя о Христе кормли²²⁹⁰ и всякия ползы в получении быти. Потщитеся Господа ради, аки два некая светила всеубогшую нашу страну, нестерпимыми напастей мразы ознобленную²²⁹¹, теплохладными лучами вашего прибытия согреяти и неосяжную²²⁹² всяческих искусов тму вашего боголюбнаго пришествия осияниемь далече прогнати, да негли весна добраго благополучия нововосияет и блажайшее благополучия лета да возблаговонствует вашим вселюбезнымь тщанием, Божиими же свыше поспешествы. Еже даждь, Боже благий, даждь, ей, да будет молитвами всех святых.

Вас, добросовестнаго и велеумнейшаго вселюбезнаго отца, всегорчайшии ничтожнии докучники, всенепотребнии обоего пола выгопустыннии обыватели.

Декабря 24-го лета 1743.

Есть некий в человецех и добре уставленый²²⁹³ обычай: егда некоего от любезных и знаемых во страны далечайшыя отпущают, способы некия в помощь оному, от любве промышляюще, спосылают²²⁹⁴: аще на морское широкоплавание – корабли, якори, парусы и конаты, аще на рати – оружия, пансыри и шлемы, аще на мразы – одежды, обущи и постели употребляют, вся же сия творят, да же здравие оного цело и невредно паки восприимут.

Что же аз сотворю (тебе, чистоты и целомудрия рачителю), кия способы дарую в толиком обуревании, в толиком противосражении, в толиком воздухопременении плавающему? Кая утверждения, кая согреяния воспослю, пустый и бесплодный, разве апостольский он и многополезный глас, яко дар некий честный и многоценный, яко помощь твердую и некрушимую во утешение послю²²⁹⁵, тако глаголющий: «Блюдите, како опасно ходите».[1824] Глаголомь сим от апостол всякому везде и всегда пособ²²⁹⁶ крепкий и защищение предлагает и, идеже аще требуеши, помощь великая есть присно в себе и с собою оный носящым.

В мори ли настоящаго жития плаваеши посреде толиких мятежей и волн, толиких луд²²⁹⁷ и мелей, таковыми изменами вихров обуреваемь, блюди, како опасно ходити: ²²⁹⁸еда тя волны страстей потопляют²²⁹⁸, еда луды миролюбия остановляют, еда вихры ярости и дерзости корабль души твоея разбивают. В рати ли еси к невещественным сопостатом, блюди, како опасно ходити: еда стрелами тя помыслов нечистых уязвляют, еда мраком уныния омрачают, еда копиями сластей прободают, еда острейшим греха мечем главу целомудрия усекают. Посреде ли пламене грехогорения живеши, блюди, како опасно ходити: негли искра грехожелания, впадши, сердце твое опаляет, негли пламень нечистоты, напад, сожигает, негли дым вещелюбия, покрыв, задавляет. Посреде ли зимы богоневедения терпиши, блюди, како опасно ходити, да не студень²²⁹⁹ маловерия теплоту изстудит благочестия, да не мраз сомнения познобит²³⁰⁰ плоды доброделия, да не лед нечювствия окаменит сердечный воск благодатоизображения. И что много глаголю: присно и на всяком месте глагол сей и каждому в помощь довлеет²³⁰¹.

И якоже преизряднейшая были²³⁰² на всяку врачевства потребу, тако блюдение и опасность на всяко осмотрение и цельбу душевных язв потребно есть. Елико бо неблюдение и небрежение души язвы наводит, струпы возращает, страсти умножает, греховному ярму подкланяет, конечно смертию душю убивает, тако блюдение и опасность целость чистоты соблюдает, сердце непорочно, душю чисту, ум безстрастен и всего человека цела, невредна и безгрешна творит. Страж убо бодрый град от нашествия всякого противных, от всех огнепожарных случаев цел и неврежден показует, пестун²³⁰³ же опасный²³⁰⁴ детище от досад и падений, от язвлений и вредов и от всякого неполезньства, сохраняя, отдаляет. Добродетель же блюдения опаснаго и трезвости человека от нечистоты помыслов, от гнусности страстей, от раны грехов и от всякаго душевнаго падения и смерти здрава, свободна и невреждена соблюдает. Что убо Моисеови древле Бог заповеда во охранение себе? – Токмо внимай себе.[1825] Что в Законе Новом Христос апостолом завеща? – «Блюдите, да не прельститеся».[1826] Что уста Христова – св<ятый>апостол писа? – «Бодрствуйте, стойте, мужайтеся, утверждайтеся».[1827] Се отвсюду бодрость и трезвение заповедается. Се везде внимание и опаство законополагается. Се всюду блюдение и осторожность завещавается и охотныя²³⁰⁵ благорачители всеблагий ярем блюдения носити увещевает.

Темже, о, любезнейшии, восприимем сей священный глас и сокрыем, аки богатство многоценно и неотъемлемо, в сердечнем сокровищи, стяжим оный всегда и во всяком месте утверждение и помощь: в треволнениях миросмущения – котву²³⁰⁶ твердую и невлаему²³⁰⁷, во бранех бесовских ратей – оружие крепко и несокрушаемо, во пламени страстонахождения – щит и воду охраняющую, и во всякой вещи, во всякомь напастномь случаи сия помышляем, сия напевания приглашаим: «Блюдитеся». И елико о блюдении опаснемь и трезвенемь²³⁰⁸ тщатися, толико о прилежнемь в молитвах к Богу сердечновопиении, толико о призвании церковных и отеческих молитв всеусердно долженствуем, да же честное и драгое девства и целомудрия сокровище и блаженныя чистоты богатство цело и непокрадено соблюдем и настоящаго житиотечения многобурное море преплыти и будущих всесладчайших благих достигнути возможем, еже подаждь, всесладчайший Христе Боже, достигнути твоею благодатию сохраняемым. Αμιν.

Поучение труднику общаго жития

Дивна вещь братскаго общежителнаго пребывания, чюдно поистинне зрелище вседобраго того богоугоднаго сожития. Ибо якоже во едином благосочетании тела премнози уди²³⁰⁹ едино благостройное уряждение²³¹⁰ исполняют: овии зрителнымь сладкаго светолития освещают, ови слышанием всяких вещей оглашают, ини обоняниемь арамат, друзии вещаньми, прочий деланием и ношением – и вси вкупе едино благочинное красотосочетание творят, единей покаряющеся главе, живот человека всекрасне окормлевают. Тако во общем житии мнози христокупне собравшийся различными делании пречюдно украшают христорадный сонм: ови, всенощными молитвенными бряцалы²³¹¹ божественное умоляюще, милость Божию низводят; овии, от источник Израилевых черплюще воды, жаждущыя напаяют; друзии, на усилие дел руце простираете, алчющыя питают; ини, страны и грады обтекающе, благослужением си церковныя сироты препитовают – и вси вкупе под единым надсмотрением руковождения единоумне ко единой сочленяются главе Христу, благосочетанно и всекрасно показуют братскаго соединения жительство.

Убо и ты, любезнейший, сподобився послужити Церкви святей, потрудитися на христорадное собрание питати своим служением богособранныя сироты, всеобщебратственный собор, молитвенники за себе стяжавый. Прочее, яко Божий слуга в Божией службе божественными возвышайся степеньми; купльствуя потребная братству, душевный ти умножай прибыток, безпорочно свое служение ко Христу приноси, да светится внутренний чистоты светилник, да блистает целомудрия ясность, просвещая и уясняя и сохраняя служения сокровище, да сподобишися услышати пресладкаго гласа: «Благий рабе верный»,[1828] и прочая.

Послание к трудником нравоучително

Церковнаго вседобраго служения и общебратственнаго блаженнаго послушания всеусерднейшым трудоносцем и послушником, сукосечныя работы старосте с прочими.

Всякий же труд, всякое дело настоящаго жития тогда удоботворится, егда усердием начинается, егда упованием творится, егда любовию совершается. Тако рыбарие, мрежи и неводы плетуще, обнощно²³¹² глубины езер испытают. Тако ковачи в тяжчайшая железоварения и млатобиения вреваются. Тако земледелателие лесосечения, жжения и очищения и сеяния сотворяют. Тако и прочии различных художеств трудницы, дела своя усердием чрез упование совершающе, хлеб на пищю себе приобретают, оным упованием вжигаеми, сладостно труды и поты подъемлют надежды ради приобретения. И понеже усердное ваше предложение за любовь всесладчайшаго Владыки в полк воинов его написастеся, благий ярем того и легкий восприемше, ярем преподобнаго послушания, воеже служити трудами своими церковному исполнению, воеже кормити богорадныя сироты потом усилия рук своих, колико усердствовати долженствует, каковою верою, коликим всежелательным предложенном пребывати, яко преподобнаго послушания ярмоносителем, яко церковнаго сиротокормления служителем, имже не земная благая, но небесная предлежат, имже богатство сокровиществуется вечно, имже сладость готуется²³¹³ бесконечна.

Мирстии бо трудницы аще и многая труждаются, но мало приобретают, едино токмо чрева наполнение приемлют; духовнии же послушания трудницы аще и мало за немощь потрудятся, но многая и великая приобретают. Приобретают себе пищу, по писанному: «Труды плод своих снеси».[1829] Приобретают сиротокормления плод. Кий? – Алчен бех, и напитаете мя.[1830] Приобретают милосердия прибыток. Который? – «Блажени милостивии, яко тии помиловани будут».[1831] Приобретают кроткаго послушания корысть²³¹⁴ – «Блажени кротцыи, яко тии наследят землю».[1832] Приобретают церквослужения прибыток – Елика сотвористе братии моей, Мне сотвористе.[1833] Приобретают всеусердныя веры рукояти²³¹⁵ – «Благий рабе верный, о мале бысть верен, над многими тя поставлю, вниди в радость Господа своего».[1834]

Сицевых убо сподобившыяся блаженных трудов, таковым текущыя послушания добрейшим путем, молим вашю любовь, присная Церкве и благопослушная чада, освятите труд, украсите послушание, удобрите поты и внешняя любострадания внутренними процветите красотами. Старосты, ко братии кроткое и терпеливое к благопокорным, мужественное же к непокорным, и милостивое к прощающымся стяжите. Грамотнии, службу Божию со страхом и говением²³¹⁶ совершайте, в праздники и недели прочитанием словес Божиих братию утешайте. Братия же и сотрудницы, покорное и послушное и благосоветное к старостам, мирное и кроткое к друг другу, крепкое же и несоглашательное к прекословным имейте. Юнии, к старейшим повиновение имейте, старии, ко юным милосердие по Бозе показуйте; И вси вкупе, яко мирнаго Владыки ученицы, мирно друг со другом жителствуйте; яко святаго Бога раби, свято пребывайте, со страхом и трепетом на пении и молитвах стояще, молчанием на трапезе и по павечерницах украшающеся, молитвами на трудех труды просветляйте, к сим целомудрием облистающе, чистотою яко телесною, тако и душевною светящеся. Над всеми же сими, яко неким кровом, божественною покрывающеся любовию, яже к Богу и ближнему, да же, настоящее житие тако добре текуще и тако богоугодне шествующе, возможем получити будущих благих наслаждения в милости Христа Бога нашего. Аминь.

Общежителства Выгорецкаго настоятели и прочий старцы, церковницы и вся братия, любезно любезныя трудоделатели целующе и любезньшее благословение подающе, нижайше поклоняемся.

Понеже благорачителная добродейства твоя паче Аравии[1835] облагоухаша нас, боголюбная поможения нилоструйно от вашея благости источишася нам, а любезная твоя писания и смиреномудрая, меда сладчайшим качеством услаждающе и косателною бридкостию[1836] обдолжающе, возбуждают нас принести убо доброрачително нас обдолжившему вашему мудролюбию, грубую нашю трость протягше, краткоприветственным словом, стыда нерадения избывше, любовный отдадим долг.

Аще бо доныне облацы сует не допустиша нас своеписаниемь приветствовати ваше добротворителное благородие, но сердцерачителными искры возбуждаеми, повыну ваше мудрорачителное боголюбие благодарствовахом, усердно желающе, да доброрастущий сад вашего мудрорачителнаго благоплодия, добрейшими добронравия качествы цветущь, возрастает, удобряем воздержаниемь, усветляемь боголюбиемь, украшаем благоразумиемь, услаждаем смиреномудриемь, сладкоплоден человеколюбиемь, шипконосен целомудриемь, благоплоден еваггельскими добродетельми, ограждаем и сохраняем Божиею благодатию, дабы в настоящее процветал благодатно, в приходящее от смертоносных ветров соблюдаем неврежденно, в будущее совершенными благоразумии исполнен изрядно, в приидущем же некончаемемь веце вечнаго всекраснаго и всеутешительнаго Божия Царствия наследник (желаю) да явишися.

Понеже ваше многомилостивое благородие природною благостию и боголюбным милосердиемь, повсюду добротворительным дыханиемь мироухаете, изрядным благотворениемь паче нилотечных струй пресладостно напаяете, откуду, яко от преизобилнаго человеколюбиваго источника, и нас, убожайших, беззаступных, богорадных сиротин, господским вашим милосердием снабдеваете, и старших наших, богорадне нас снабдевающих, человеколюбне милуете, и помощника их и нашего сиротскаго снабдителя, при вашей благости живущаго,[1837] по своей господской милости жалуете. В киих мироуханных добродеяниих твое благородие, яко доброплодная лоза, милосердиемь прозябаеши; яко прекрасный виноград, боголюбным человеколюбием процветаеши; яко пресладостный сад, убогия утешаеши; яко сладкоструйный источник, нищыя богорадне щедротами напаяеши; яко Сарра, боголюбным страннолюбиемь благоухавши,[1838] яко Ревека, милосердия ради дом ваш Божия заступления сподоблеваеши,[1839] яко страннолюбивая сумантяныня, благословения Божия и молитв усердных сподоблеваешися.[1840]

Таковыя бо милостивыя добротворцы сам Христос ублажает: «Блажени, – рече, – милостивии, яко тии помиловани будут».[1841] Пророцы Божии сицевым благая обетовают: Блажен разумеваяй на нища и убога, в день лют избавит ѝ Господь и живот его на земли.[1842] И богогласный Исаиа о милостивых благотворцех глаголет: «Тогда возсияет рано свет твой, и исцеление твое скоро изыдет, и предидет пред тобою правда твоя, и слава Божия покрыет тя».[1843] Яже вся сия благая, от Бога милостивым обетованная, вашему милостивому благородию желаем получити.[1844]

Дивно дело древле макковейскими израилтяны Господь показа, егда мнейшии²³¹⁷ многочисленная воинческая воинства богопомощно победита.[1845] Не дивно ли ныне Бог в вашем высокогосподском доме содея, егда вашего дома посланнии шесть служителей, в степных местех от пятисотных варвар вооруженных окружены, тех самех богопомощно победивше, устрашены и посрамлены отгнаша.

Чесо ради России, в храбрости сынов российских красуяся, над варвары славится, преславный ваш дом, на славу России происходя, прославляется. Варварстии язы́цы, остен²³¹⁸ страха в сердце носяще, от сынов российских, срамом покрывшеся, устрашаеми бегают. Степи сибирския глашают победныя ваша почести. Колыванския горы, радостная вопиюще, премудраго вашего строения на славу российскую и впредь ожидающе, веселятся. Колыванския жители и богоревнивии служители, в надежде Божией мужающеся, пророчески, радующеся, к варваром вопиют: «С нами Бог, разумейте, язы́цы, и покаряйтеся, аще бо паки возможете и паки побеждени будете, яко с нами Бог».[1846]

Мы же, убожайшии, всякаго возраста и чина общежительнии вашего благородия обдолженнии слуги, премножайше за премножайшее милосердия излияние благодаряще ваше премилостивое господствие, Господа Бога молим, да даст вам, нашему многомилостивому государю, яко в благополучном здравии многолетным и во всех делех благопоспешным быти, тако благосчастливо и безнапастно на славу России и на честь, ползу и украшение вашему благородию преславныя заводы Колыванския преславно устроити.[1847]

Почтеннейшему благородному господину, господину премилостивому нашему государю А<кинфию> Н<икитичу> со всем своим светлым благополучным домом[1848] в сиятелном благополучии всездравствену и всерадостну на многа лета всеусердно быти желаем.

Понеже должность наша – желати усердно вашему многомилостивому господству всякаго блага, радоватися о светлем вашем благополучии, утешатися слышанием сиятелнаго вашего благородия, от Божией благости просити благополучнаго вам всездравствования.

Ибо ваше сиятелное благополучие слава есть российская, утешение господствующих, радование гражданствующих, пристанище поселянствующих, прибежище скорбящих, прекормление сиротствующих, заступление напаствуемых, препитание богорадных, всем нам всерадостное добротворение.

Где есть толико славное в России заводов произведение? – У вашего благородия.[1849] Где толикими почестьми господствующий почитаются? – У вашего сиятельства. Где праведнымь и милосерднымь обхождением граждане нужды исполняют? – У вашего господствия. Где служащий честное и жаловательное милосердие стяжавают? – У вашего благоразсуждения. Где нищии милосердие, напаствуемии заступление, богораднии прибежище имеют? – У вашего многомилостиваго благородия.

Якоже всекрасное пролетие²³¹⁹ плодами премногими живущыя услаждает, прекрасными цветы возвеселяет, пищу и питие в наслаждение источает, сиянием светлости вся утешает, тако пресветлое ваше благородие изрядным вашим обхождением и благоразумным правдолюбительным устроением и человеколюбным добросиятельнымь милосердиемь всекрасное удобрение источает, всесладчайшее добротворение изливает, всесиятельное милосердие нам преизобилно подавает.

Чесо ради всем нам желательно есть вам, нашему государю, всездравственное благополучное многолетне, пресветлому вашему благородию пресветлое благополучие, благодатному вашему дому преизобилное благосчастие тако усердно желающе, приветствуем, тако желательно...[1850]