Повесть о купце, купившем мертвое тело и ставшем царем

Повесть о некотором купце, како мертвое тело у жидовина скупи и царство себе приобрете

В некоторой стране живяше купец славный и богобоязнив, и нищелюбив, имея у себя жену вельми благообразну и благонравну, имяше же у себя единого сына, первенца, в малых летех, которого вельми любляше и Бога о нем моляше. По некотором времени и сын их хождаше по торгу и пременяяся к товаром, которой товар и по какой цент купитца и по чему²¹⁹ надлежит его продать. И прииде ко отцу своему и рече ему «Отче, аз ныне бых на торжище и пременился к товаром и такой товар давал по такой цент, а надлежит его продать по такой же цент». Отец его слыша от него такой разум и прииде к жене своей, и рече жене «Госпожа моя! Сей сын наш хощет быть в торгу смыслом лучше меня и хощет жити славнее и богатее». Мати же его о том вельми радовашеся о разуме сына своего.

По некоторых днех сташа сбиратися родственники того купца за моря торговать. Сын же купцев услыша то и прииде ко отцу своему и рече «Государь мой милостивый батюшка и милостивая матушка, сотворите надо мною свое отеческое милосердие! Ныне сбираются дядья за моря торговать. Дайте мне триста рублев и отпустите с ними!» Отец же его даде триста рублев и отпусти, и наказа родственником своим, дабы его ни в чем ни покинули. Он же поклонишася им, и поехаша в корабле.

По наказании²²⁰ же сына своего, и вручи родственником своим, даде ему триста рублев, и отпустиша с великою печалию. Сын же купцев взем у отца и матери деньги, взял и благословение получил, паде, поклонися им, и сяде на корабль.

И ехоша три года и три месяца по морю, и приехаша в царство некоего града, и престаша у брегу. Они же взяша дары и поидоша к царю, потом ста торговати и також и товаров закупати. Купецкий же сын, ходя за ними, применяяся к товаром и ничего не купит. Потом же выде на площадь и видех по торжищу жидовин немилостивно мертвое тело влачаше; он же, не смея к нему приступити и вопрошаше, чесо ради волочит. Потом же виде во вторый и в третий – жидовин паки то тело влачаше.

Он же приступи к нему и вопроси жидовина «Чесо ради сие ты мертвое тело волочишъ?» Жидовин же отвеща ему «За то сие мертвое тело влачу:сей человек бысть христианин и взяша у меня в животе своем²²¹ взаем денег триста рублев. Я же у него просяше, он же мне не отдаде, в том и умре. После умертвия его прихождаше к сродником его и просяше, они же мне не отдаша, и я вынул его из могилы и таскаю по торжищу им в поругание и в посмеяние, дабы они мертвое тело скупили». Купецкий же сын рече «Жидовине немилостивый, отдашь ми сие тело мертвое, а у меня возьми за него триста рублев!». Жидовин же рад о том бысть и взя у него деньги, а тело мертвое отдаде ему.

Потом же тот купецкий сын взяша тело и не ведает, куды схоронити, и не смеет идти к дядем своим на корябль, и размышляше в себе «Како я приду и что себе сотворю? Сродники мои меня спрошают, что за товар купил, и станут мне смеятся, також скажут отцу моему, и мне от того будет великой срам, а родителем моим – велия²²² печаль. Не пойду ныне к ним и не скажу, и пойду на другую страну пристанища морского, и найду корабельщиков иных, авось либо поверят и свезут ко отцу моему!» Тело же спрята во удобное место, а сам поидоша искати корабля.

И придоша на пристанища морское и видеша корабль. Он же им, паде, поклонися. Они же вопросиша его, что за человек, из которого града и чесо ради семо пришел еси. Он же им поведа всю правду «Аз, господие, такого града и такого отца сын». Они же реша ему «Мы знаем добре отца твоего. Токмо чесо ради семо²²³ пришел?» Он же отвеща им «Аз егда поехал от отца своего с сродниками своими в сие царство с товаром, и на море корабль наш разбиша, а мы вси оскудеша и ныне не имеем, что дати в наем – доехати до отца моего». Они же реша ему «Мы отца твоего знаем. Садися в корабль без найму, мы довезем тя до отца твоего». Он же паки, паде, поклонися им: «Господа мои милостивыя! Аз зде бых с дядею своим. Он же, дядя мой, с такой печали, что корабль разбиша, и умре, а похоронить в сем царстве негде, понеже некрещеные живут». Они же реша ему «За хлеб, за соль отца твоего не токмо единое мертвое тело клади в корабль, хотя десять!» Он же вельми о том возрадовася, и принесе мертвое тело, и положиша в корабль, и поплы по морю.

Сродники же его хватишася и ста по граду искати, и не обретоша нигде. И поехаша до царства своего. И как приехаша ко отцу его, отец же его и мати вопросиша о сыне своем. Они же поведаша «Не вемы, где остал». Они же, отец его и мати, горько о том плакаше, о разлуки сына своего. Сын же купцев съеха со ономи купцами и приеха ко острову, на нем же монастырь чудотворца Николая. А как купцы сташа с корабля и поидоша молебное пение воздавать. Он же сниде с корабля и паде, и им поклонися: «Господа мои милостивыя, аще вы отца моего знаете, то сотворите такую любовъ, дайте мне сто рублев. А когда ко отцу моему приедем, то вторицею²²⁴ имам вам заплатити». Они же даша ему. Он же наня ерыжных²²⁵ и отнесе мертвое тело в монастырь, и погребе его честно, и разда по нем сорокоусты. Сам же размышляше «Что я сие сотворил? Четыреста рублев истратил, а что купил, не вем! И то отцу моему донесется, великую скорбь восприму, а мне великую срамоту доспеет. Поиду и куплю лошадь, и поеду от них прочь сухим путем, и приеду ко отцу своему, выпрошу на выкупку товаров еще сто рублев и поеду, куды очи несут, чтоб родителем моим не было печали». И купи лошадь и поехал сухим путем. Они же поехаша восвояси.

Он же приехаша ко отцу своему и, паде, поклонися ему. Отец же вельми милостивно его прият и возрадовася, и во слезах едва слова изрекли «О, чадо наш дражайший, откуда еси семо пришел и како, чадо наше, и где такое многое время пребых?» Он же им отвеща «Аз же приехав, отче, с сродниками своими в то царство, о котором они тебе возвещали, и, умедлих на час, купих товару на четыреста рублев, которой стоит десяти тысяч. У дядев своих стал денег просить, они же мне не даша, зна де, что товар дешев купил. И оставиша меня в том царстве, а сами уехаша. Я же, отче, пришед на другую страну к пристанищу московскому, и, паде, поклонися им. Они ж меня вопрошаша, которого царства и какова чину». Он же им об отце поведал, и о царстве, и о роде. Они же сказаша, что «мы родителя твоего знаем и хлеб-соль с ним водим». Я же у них попроси сто рублев на оной товар. Они же мне даша, и я с ними, отче, приехал, еже видиши мя». Отец же его вопроси «Да где тот товар, который ты купил?». Он же отвеща «Я, отче, оставих у них, а послали меня к тебе, дабы сто рублев дал, а товар взял». Отец же его даде ему сто рублев, чая, что вправду товар принесет.

Он же взяв сто рублев и поехав от отца, куды очи несут. И ехаша многа дней и много нощей, и плакаше горько и рыдая о разлучении родителей своих, такожде и от наследства.

И приеха к великому непроходимому лесу, чрез которой лежат две дороги одна через лес, а другая кругом лесу. Он же размышляя, како ему ехать, и которою дорогою, и в которое царство. И плакашеся горько и размышляя в себе «Аще бо кто мне ныне послужил, то бы я дорогою ценою поредил»²²⁶. Внезапу виде в лесу на дороге стоит человек вельми велик, в руках держит клещи железныя. Он же вельми ужасеся, чая, что стоит разбойник, не смея к нему ехати, измышляя «Лучше мне зде одному умрети, нежели родителем моим велию скорбь привести». И поехал к нему прямо.

И приеха к нему, вопроси его, что за человек и которого града. Он же сказа ему все поряду «А езжу я по разным государствам для торгу и торговых извычаев²²⁷ других государств». Купец же вопраси предстоящего «А ты что за человек?» Он же ему поведа «Аз есмь ищу господина, у кого бы нанятся служити». Купец же о сем вельми возрадовался и рече «Человеке, пойди ко мне во служение, аз имам дати великую плату». Он же отвеща «Готов тебе служити, токмо сотворим мы с тобою обет, чтоб тебе меня во всем слушатся. А ежели слушатся не будешь, то не иду к тебе во служение». Купец обещая ему тако сотворити.

И чрез тот лес лежаще две дороги одна – через лес, а другая – кругом лесу. Он же вопроси его: «Сии дороги в которое царство лежат? В разныя царства или в одно царство?». Он же сказа ему, что сии две дороги лежат к одному царству. Купец же рече «Для чего две дороге и которая ближе?» Человек же рече «Кругом лесу – тысяча верст, а чрез лес – пятьсот верст. И кругом лесу ехать – никакой нет опасности, а чрез лес, хотя и ближе, точию по ней великой разбой, никому проезду нет». Купец же рече «Лучше нам ехать кругом лесу, здоровие будет». Слуга же отвеща «Поедем прямою дорогою, чрез лес, ближе до царства». Купец рече «Не хощу ехать». Слуга же рече «Да ты меня слушатся обещался». Он же не преступи слова своего.

Поехали чрез лес. И как Быша среди лесу на поле, и тут стоит двор превеликой, в котором разбойники живут. Разбойники же, видя их, что стоящы в думе, и все бежаша из храмины²²⁸ и спряташася во един амбар, хотя их сонных погубити. Слуга же все то видя, а господин его не виде ничего сего, спрошаше у него о дворе «А сей двор чей?». Слуга же отвеща «Сей двор постоялой, тут нам ночевать». И стало на дворе смеркатся, слуга рече «Господине, начуй здесь, а я поиду на двор к лошади спать». Он же вельми о том печален бысть и не хотяше остатися во храмине и хотяще ити с ним на двор спать, с слугою. Слуга же рече «Да ты хотел, господине мой, во всем меня слушется, а ныне ты меня преслушаешь!» Он же с великою печалию и со страхом остася ночевать во храмине. Слуга же поиде и лег спать в телеге.

И едва приде полночь, разбойницы же совещаша в амбаре промеж собою и хотяше их погубити. Слуга же, слыша тот их совет, воста и взя клещи, и стал у притолоки дверей. Разбойники же един по единому стали из амбара выходити. Он же их клещами хваташе по единому за голову, и примаше их за шею, и дави их в руду²²⁹. Разбойники же видеша, что их един человек подавляше, уже и не смеяша из амбара вон выходить. Слуга же купцев вниде в амбар и передавиша всех до смерти, и покладе всех в амбаре, и запре их. Как свету светающу, поиде во храмину к господину своему. Господин же его не спит от страха, яко един ночеваше, а того не ведаше, что слуга их, разбойников, подави. И запрягши лошадь, и поехали до царства.

И приехаша во царство и ста на постоялом дворе. Егда же сташа, купец же по обычаю поиде по царству и применяяся ко всяким товаром. И егда будет среди торжища, встрете его того царства сенатор, которой ближе при царе, и удивляяся на красоту его. Сам же поиде за ним вослед, куда он поидет и коего царства. Купец же приде на постоялой двор, а сенатор смотрел и поехал до царя.

Во утрий же день приехаша в то царство из иные земли гости корабленики и придоша к царю с дарами. Царь же дары у них принял и унел²³⁰ их у себя обедать. Сенатор же вошед к царю и рече «Пресветлейший царю! Есть в нашем царстве иностранной купец, которой вельми прекрасен, а на обеде зде его нет, не вижу». Царь же рече «Да где тот купец стоит?» Он же сказа: «Аз, царю, видех его, где он стоит». Царь же посла по него. Сенатор же приде к купцу и просиша его, дабы к царю шел на обед. Купец же обещася и купи дары царю. Слуга же купцев рече: «Господине! Ты идешь к царю на обед, возьми и меня с собою!» Купец же отвеща ему «Да како я могу тебе взяти с собою?» Слуга же рече «Да ты хотел меня во всем слушатся!» Купец же взя его с собою. А слуга же рече «Когда ты, господине, придешь к царю в палаты, и царь увидит тебя, и востанет с своего места, и возьмет тебя за руку, и посадит подле себя, и станет потчивать лучше всех, аз же, господине, стану у дверей, и царь взглянет на меня и спросит тебя «Что за человек?», и ты скажи, что слуга. И он велит меня выслать вон. И ты ему поведай «Царю, сей слуга лучше мне отца родного!» И он велит мне сесть тут же, посадит за столом».

И пришел купец к царю, и увиде его, и ста из своего места, и взя его за руку, и посади подле себя, и стал его потчивать лучше всех. Слуга же купцев стоя у дверей. Царь же увиде его и вопроси и о сем, что за человек. Купец же рече «Раб мне». Царь же рече «Аще ли раб, посли его в другую палату, где люди²³¹ сидят». Купец же отвеща к царю «Сей мне слуга лучше отца родного!» Царь же повеле и слуге сести за стол и посадил через человека от купца.

По окончанию же обеда царь взял купца за руку и веде его во особливую палату, и ста ему глаголати «Аз тебе, купче, глаголю, не почитаю тебя за купца, почитаю тебя за сына и за зятя. Есть у меня единая дщерь, даю тебе в жену и будеши царству моему держатель, понеже не имел по обычаю себе зятя выбрать никого, и ныне един ты мне угоден». И выведе дщерь свою и показа ему. Купец же, паде, поклонися ему. Царь же обеща за нею приданые дати треть царства и заповеда ему, дабы сие никому не поведал «Аще ли поведаеши, то злою смертию умреши. А токмо будем ведать ты да я, да невеста твоя, поп да друшка». И удариша по рукам, и отпустиша его, а сам наказа «Жди дня уреченого, когда аз пришлю к тебе оного же сенатора». Купец же поклонися и поиде да квартиры своея.

И како идоша дорогою, слуга же купцев поздравляше ему: «Здравствуй, господине, на царской дщере сговорившись и треть царства взявши!» Купец же удивися сему, како он про сие сведа, никто не был в палате, кроме царя и невесты, а он про сие сведа. И приидоша до квартиры своей.

Уреченный же день приде. В полунощи прислал царь к нему того сенатора, дабы ехал к венчанию. Купец же сорежается для сочетования законного брака. Слуга же рече: «Господине, возьми меня с собою!» Он же сказа ему «Да како могу тебя взяти с собою? Царь не велел никому о сем поведати. А тебя взять – он меня злою смертию казнит!» Слуга же рече «Да ты хотел меня слушаться!» Купец же чрез великую мочь²³² взял его с собою и поехаша до царя к венчанию.

И как приехаша на царский двор, царь же повеле их вести в церковь и обвенчать священнику. По венчанию же их посади за стол, потом повеле их вести на ложу спать. Слуга же купцев кликнуша его к себе «Господине, поиди ко мне до слова!» Царь же то услыша и рече «Како еси смел сотворити сие, слуге поведати? Ведаешь, что смертию да умрешь!» Он же рече «Царю, но не могу сего сотворити, что его ослушатися, понеже под великою клятвою», и выйде к слуге своему. Он же рече «Господине, аще пойдешь спать на ложу с царевною, возьми меня с собою!» Он же ему сказа «Да како могу тебя взяти с собою?» Слуга же рече «Да ты меня слушаться хотел!» Купец же рече «Да како могу тебе пустити, понеже нас запрут двоих? Да како же ей, девичье дело, како ей раздеться при тебе?» Слуга же отвеща «Ты сего не моги! Токмо повели, хотя и двоих запрут, а я уже тамо буду. А коли она станет стыдитися, и ты ей скажи «Чего тебе стыдитися, сей слуга всегда при нас будет». И станет она с тобою играть, и захочет спать, ты же не спи и смотри на лице ея. Аще же она вздрогнет, ты еще смотри. Ежели же в другой раз вздрогнет, то ты сойди с постели и стань на мое место, а я возлягу на одре с нею».

Потом дружка взяша купца и царевну и поведоша в особливую палату припочинуть. И запре токмо двоих. Царевна же по обычаю раздевшися, и сташа в одной сорочке, и оглянулась ко дверем, и видит человека стояща. Она же вопроси его «Господине, аки что за человек стоит, понеже дело мое девичье? Како он семо²³³ зашел?» Купец же рече «Чесо тебе, душа моя, его стыдиться, понеже сей раб всегда при нас будет служить!» Она же сташа с ним играть. По игранию же восхоте спати и рече «Господине, не мешай, аз хощу спати!» Он же повеле ей спати, а сам ста на нее глядети. И как засне, вздрогнула необычно, он же прилежно ста смотрети на нее. Потом во вторый такожде вздрогнула так сильно, что от постели в высоту на аршин подняло ея и удари о постель. Купец же вельми ужасеся и сниде с постели долой, и ста на месте слуги своего. Слуга же взя клещи и возляже на постелю. Потом изо уст ея бысть пламе огненное и искры по всей палате. Купец же, сие видя, вельми ужасеся, и паде на землю, и бысть аки мертв, уповая, что слуга его уже умертве. Слуга же вста с постели, и взя клещи, ста у кровати, и виде изходяще изо уст ея змия велика, взя клещами за шею и удави его и, раздробя в мелкие части, спрята. И подня господина своего едва жива и рече «И возляжи на одре с женою своею!» Он же не хотяше возлещи с нею, но с нуждею его привлек и по обычаю сотвори, по закону брака.

Потом утру же светающу, царь же послаше дружку «Пойди, выкини кости, чаю, давно уже змий заел». Дружка же приде и отпер двери и ста отворяти, двери изнутри заперты. Дружка же удивися сему. Слуга же купцев вопроси «Ты кто еси?» Он же отвеща «А ты кто еси и како взошел сюда?» Слуга же отвеща «Аз купцев слуга». Дружка же рече «Да кто тебя пустил?» Слуга же рече «Господин мне повелел, не вас бо слушаюсь!» Дружка же рече «В добром ли здравии молодыя?» Слуга же отвеща «В добром здравии и лиходея нашего, змия, уходили!» Дружка же воззопи великим гласом к царю «Пойди скоро! Злодея нашего змия уходили, а молодые в добром здравии!» Царь же вельми воздрадовася и поиде с царицею и вельможеми, и виде молодых в добром здравии, а змия убита, возрадовашеся радостию велиею зело, а слугу почти и одари дарами честно. И живяше тут в царстве много лет.

Потом восхоте ехати ко отцу своему и просиша у царя. Царь же отпусти их и даша ему треть царства своего. Слуга же не велел ему силы²³⁴ брать, а велел взять триста подвод без людей. Купец же рече «Дако кто может их гнать?» Он же ему сказа «Ты о сем не тужи, я уже управлюся с ними, возьми подводы!» Царь же даде ему и отпусти их с честию.

Потом ехаша они дорогою, купец же с царевною, а слуга подводы гонит. И приехаша на тот разбойнический двор, где он давил разбойников, и въехаша, ста ночевати. И проводиша их в хоромы, а сам лег на дворе. Он же в храмине спаша с царевною своею, а слуга насыпал все подводы злата, и сребра, и камения драгоценого. Поутру же вышедша из храмины и видеша возы насыпана златом, и сребром, и удивишася сему и поехаша в путь свой.

Потом приехаша к тому месту, где у него нанялся, слуга же стал говорить «Господине, аз теперя от тебя иду, даси мне ряжено»²³⁵. Купец же даде ему и разделиша возы пополам. Слуга же рече «Да не обидно ли мне будет? Ты владеешь царевною, а мне что?» Он же вопроси его «Да како нам ея делити? Возьми ты все триста подводъ а ея не замай у меня!» Он же ему отвеща: «Тебе обидно будет. Ты ея разруби пополам!» Купец же заплака «Возьми ея один к себе, а не замай ея, живу!» Слуга же, не послушав его, выняша меч и удариша ее. Она же паде на землю, аки мертва. И выскочиша из нея, из уст, змеиное гнездо, в нем же змеенков семьдесят, аки черви колышуща. Слуга же подняв ее и перекрести и даде ему живу: «И поди ты живи с нею без опасения, а то бы она тебя съела от сих змиев. И возьми все подводы себе и мое наемное». И рече «Знаеши ли ты меня?» Купец же рече: «Воистину, не знаю». Он же ему поведал «Аз есмъ ангел Божий. Послал меня Господь Бог к тебе, за добродетель твою царство даровати, что ты у жидовина мертвое тело скупил и похоронил, и за то тебе царство и богатство». И пусти их, а сам невидим быстъ.

Купец же взял подводы и приехаша ко отцу своему с великою славою и честию. Отец и мати его вельми о том возрадовашеся. Потом, поживе малое время у отца своего и взял его со всем домом своим, и поехаша к царю, тестю своему. По преставлению царя, сяде на царство и правил царство свое добре и благополучно. Конец.