Повесть Никодима типикариса Соловецкого о некоем иноке

Повесть душеполезна старца Никодима Соловецкого монастыря о некоем иноке

Поведа нам отец Никодим типикарис¹³¹ о некоем брате сице¹³² глаголя «Живущу ми, – рече, – во обители преподобных отец наших киновиарх Зосимы и Саватия, иже близ сущи понта¹³³ от акиана Соловецкого отока¹³⁴, и тамо пребывающу ми лета доволна и типикарийскую службу хранящу. В то время прииде некий брат в той же монастырь, юн сый леты, добр возрастом, поведа ми о себе повесть страшну, исполнь сущу пользы и умиления и слезам достойну, могущую слышащих удивити и устрашити, и во умиление привести. Сам же со многими слезами, со воздыханьми же и рыданьми глаголя сице «Бысть, – рече, – в лета 7146 (1638) году при державе благочестивого государя царя и великого князя Михаила Феодоровича всея России самодержца. Сущу ми во обители Пресвятыя Живоначалныя Троицы Сергиева монастыря, близ сущи царьствующего града Москвы. Тамо пребывающу ми во всяком небрежении о своем спасении, и свою всю жизнь зле провождающи, и о душевном своем спасении не пекущуся, заповеди же Божия преступающу ми и во всякой нечистоте и в пиянстве пребывающу и в небрежении, о своем спасении не радяще, и иноческого пребывания обещание забывшу и во всем презревшу, и яко скоту невоздержно живущу. Испроста рещи¹³⁵ яже суть Богом любима, сих отвращахся, а яже Бог ненавидит, сия любима Быша мне, и сими душу свою помрачах – и тако пребывающу ми. Абие посылает ми ся жезл наказания за грехи моя, внезапу бо зле пострадах и мзду по делом моим восприях. И аще¹³⁶ не Господь Бог помогл бы ми, вмале¹³⁷ вселилася бы во ад душа моя, понеже¹³⁸ той, яко чадолюбивый отец, наказует, но обаче¹³⁹ с милостию, по реченному «Накажет мя праведник милостию и обличит мя, не хощет бо той смерти грешному, но яко еже обратитися и живу быти ему, и хощет всем спастися и в разум истинный приити». И тако ми, – рече, – некогда во едину от нощей во дни пентикостиа, близ праздника Святого Духа сошествия во мнозе пиянстве пребывающу ми, по реченному «Спящии бо в нощи спят, и упивающиися в нощи упиваются». Приспе время спати и от пианства душегубителного престати. Обычай же имех от юности моея сицев егда хотящу ми спати, тогда вся чувства своя рукою своею не забывах крестити. Сице ми и тогда такожде сотворшу и уснувшу, и не вем¹⁴⁰, колико¹⁴¹ спавшу. И убудивешу ми ся от сна, и зрящу внезапну растворишася двери храмины, в ней же лежах на одре греховнем лености моея, и сосуды греховные окрест мене на ложи моем со мною Быша. И се зрю идущих к себе во храмину множество темнообразных ефиоп, сиречь¹⁴² бесов, во одеждах худых, синих и червленых, со многою яростию, с воплем и кричанием, и бесчинныя гласы испущающе, и страшаще мя, и яко зверие дивии¹⁴³ внезапну хотяще мя поглотити. Тогда нападе на мя боязнь, и страх, и трепет, и ужас объят мя. Глас же кричания их сицев бысть «Глаголи, черноризче «Ваш есмь!» Овии¹⁴⁴ же глаголаху «Отчайся! Яко уже несть ти спасения, понеже наш еси, нам предан». Инии же, страшаще, вопияху «Аще сего не сотвориши повеленная нами и не отчаешися, да веси, яко злою мукою погубим тя и скоро умреши в руках наших. Уже бо лета твоя скончашася, и время исчезе живота твоего»¹⁴⁵. Аз же яко от сна воспрянув и страх весь отверг, начат глаголати к ним «У Бога милость велика, Божий есмь аз, а не ваш, якоже вы глаголете. Не отчаюся его милости, понеже вем, яко щедроты его на всех делех его».

Един же от них, яко князь над ними, повелеваше им, глаголя «Что стоите праздни? Пожените¹⁴⁶ и имете¹⁴⁷ его». И внезапну все множество их устремишася и нападоша на мя, во еже¹⁴⁸ расторгнути мя, и удавити, и погубити, и снедь своей злобе сотворити, и фиал¹⁴⁹ горести своея на мя излияти. И приступиша ко главе моей и к ногама, яко пчелы сот обыдоша¹⁵⁰ мя. Аз же именем Господним противляхся им. Мнимому же князю их бесовскому повелевающу им, онем же к нему отвещающим и глаголющим «Невозможно есть нам со главы его действовати и сокрушити его крестного ради¹⁵¹ бывшего на нем знамения и глаголания ради стиха «О тебе радуется». И глагола им князь их мнимый «Возмите свиту его, снизу и с ног его подидите нань¹⁵² и сокрушите его». Они же абие, яко зверие, устремишася со многою яростию, и нападоша на мя немилостивно, и тако подидоша под ребра моя. И наполнися их чрево мое и пазухи¹⁵³. И начаша мя мучити зле, и прегибающе с чрева на хребет, якоже и кольцем. И яко огнь воспалиша во внутренних моих болезнию лютою. Аз же от сего вельми¹⁵⁴ изнемогох, и возжадахся пити, и возбудих близ мене спящих отроков. Они же, видяще мя тако страждуща, и болезненно вопиюща, и пити просяща, зело¹⁵⁵ устрашишася и принесоша ми воды пити. Аз же испих чашу едину и абие изблевах вся брашна и пития из чрева моего, настоящая и прежнее, устнама и низом. И от зельного¹⁵⁶ огненного зазжения иже во чреве моем зело изнемогающу ми. И паки возжадахся, и испих вторую чашу воды, и такожде изблевах, якоже и первую, с брашном и питием. Испих же и третию чашу воды изыде из мене пиемая вода усты и низом чиста, без брашна и пития. И абие возмогох мало¹⁵⁷, и устрабихся¹⁵⁸ от немощи моея, и легчае ми бысть. И свиту свою измених, и в чистую облекохся, и благодарих Бога, избавльшего мя от врагов моих. И мнех¹⁵⁹ имети мир и утвержение души моей.

И во вторый же день внезапну нападе на мя всегубительство. Паки по прежнему образу приидоша множество бесов, стужающе ми¹⁶⁰, кричаще, вопиюще и глаголюще «Отчайся и глаголи «Ваш есмь». Аще сего не сотвориши и не послушаеши нас, злою смертию уморим тя». Аз же глагола к ним «Уповаю на щедроты Божия и не отчаюся милости его. Вас же не послушаю, погубити мя хотящих». Они же, слышавше, мало усумнешася¹⁶¹, отидоша, не мучивше мене, точию¹⁶² се глаголющу ми с поношением и страшаще «Свиту переменил еси, и крестишися, и стихи глаголеши, и на книги надеешися, и на старца своего уповаеши, а душу и тело свое нечисто имееши. Не очистит тебе чистая свита твоя, и не помогут тебе образы и книги твои, старец твой не избавит тя от рук наших. И ты мнишися тем очиститися, избыти от нас? Но сотворим тебе, яко же хощем».

Имех же аз стара наставника своего, древня мужа, и добра, и зело искусна во иноческих исправлениих. И прихождах к нему правило совершати, рекше каноны и часы пети, и у него благословение и прощение приимах, отхождах во свою службу, свойственнейше¹⁶³ же рещи отхождах на погубление души своея и на делание беззакония. И в то время, в неже аз без своего старца пострадах, и старца наставника моего не бысть тогда в монастыре, отшел бо бяше во царствующий град Москву потреб ради монастырских. В то же время аз без своего наставника, аки овца, не имущая пастыря, заблудих от пути истинного и к путем нечестия уклонихся. Правило свое все презрех и по обычаю своему иноческому ничтоже совершах – и сего ради зле пострадах от лица моего¹⁶⁴. Врази мои совет зол совещаша на мя, ощутиша бо мя без наставника моего и кроме¹⁶⁵ правила благих дел пребывающа, и в нечистоте и пиянстве живуща. Глаголюща к себе человекоубийцы «Ныне обретохом время благопотребно действу нашему дóндеже¹⁶⁶ без правила и в нечистом житии и пианстве пребывает, приидем и тако зле умучим и уморим его, якоже хощем». В третий же день и в третий час дня по мучениих первого дня лежащу ми в некоей храмине единому, изнемогающу зело. И абие забывшу ми ся и бывшу яко во иступлении зрю свой живот яко на две части разделен¹⁶⁷. И внезапну яко врата растворишася, и мене яко за руку ятъ некто и исторгнув из врат вне, и паки врата затворишася. И обретохся негде, яко на зелене траве стою, а тело свое зрю на земли лежащее пред собою. И прежде удивихся сему и размышляя в себе како единого себе положена сугуба¹⁶⁸ суща зрю и разделена? И в недоумении о сем бысть. Потом же зело ужасеся, и нападе на мя страх и трепет. И се внезапну явишася окрест мене множество бесов, полк велик зело. Аз же сугубо¹⁶⁹ убояхся и вострепетах, видя их зверски устремившихся на мя. И абие все множество их обступивше мя и удержаша мя крепко, по реченному «Врази мои душу мою удержаша, уста их глаголаша гордыню, изгонящии мя ныне обыдоша мя». И начаша глаголати мне с поношением «Где суть Бог твой? Се день, егоже чаяхом, и час, егоже многа лета ждахом ныне в руки наша пришел еси и в сети наша впал еси». И тако врази мои реша мне злая «Се ныне уже умерл еси, и погибе имя твое от земля живых». Держаще и душу мою и вкупе глаголюще: «Ныне уже несть ему спасения о Бозе его, Бог оставил его. Поженете и имете его, яко несть избавляяй его». И бяху ликующе, веселящеся и радующеся о грешней души моей, яко обретоша сю корысть многу. И тако на мя шептаху вси врази мои, на мя помышляху злая и глаголюще «Сердце его собра беззаконие ему». И начаша приносити свитки, в нихже писана суть греховная дела моя от юности моея. И развивающе их, показующе мне, обличающе душу мою, и сотвориша, якоже восхотеша. Сия же им творящим, и веселящимся, и душу мою держащим, и внезапну друг ко другу шептати начаша, и глаголюще «Михаил грядет!» Сами же устрашишася, побегоша и невидими Быша, а мене единого оставиша на том же месте, идеже держаша.

Аз же сия от них слышах, яко Михаил грядет и яко Михаилом нарицают, и не ведех, кто есть. И се абие архистратиг силы Господня Михаил прииде и яко свет блистаяся, солнечныя лучи испущая, и глагола ко мне «Последствуй ми». И тако поиде на небеса выспрь. Аз же вослед его радованною ногою идях беструдно, яко ветром носим. Егда же идох на небо, и аз припадох к нему, поклонихся на ногу его и глагола ему «Господи мой, великий архистратиже Божий! За что тако благодетелствуеши мя и руководствуеши раба твоего грешного? Аз бо к тебе не сотворих ни единого блага, точию се едино помню написах твой канон – и сей за пенязь отдах». Он же рече ми «Аз ни единого от человек требую к себе приношения, точию повеление Творца нашего совершаю. Порученно бо ми от Бога всех крещеных душа к нему водити на поклонение и объявляти вся ведущему по повелению его». И доидох до облак, облацы же пред ним расступахуся. И доидохом до вод, якоже выше облак, и до тверди леденовитой. И видех иныя облаки, красны зело, яко огненовидны. И потом доидохом до небес, яже выше вод. Твердь же и воды и небеса расступахуся пред ним якоже улицею ввыспрь. И видех тамо свет неизреченный. И рече ми архистратиг Божий Михаил «Стани, не достоин бо еси тамо идти». Аз же стах. И рече мне «Поклонися престолу величествия Божия». Аз же прекрестихся и поклонихся, якоже повеле ми, ко свету оному, егоже видех на небесех.

И паки архистратиг обрати лице свое к земли и сниде на землю низу, аз же вослед его идях. И абие расступися земля, и внидохом в ню. И доидохом до воды, иже под землею, и вода такоже пред ним раступися. Под водою же приидохом в места темная некая зело, в немже мнех зрети свет точию от светлости архангеловы. И видех тамо якоже улицы некия и палаты. И в некую во едину от них внидохом, яко в проходную палату, по обема странама имущу окна. На едину же от окон воззре очима своима Михаил. И абие расстворися окно, изыде из него огнь горе¹⁷⁰ пламенем, яко гром страшен зело. И глагола ми архангел Михаил «Се есть место, идеже повеле быти тебе праведный Судия до второго его пришествия». Аз же, сия услышав от него, зело вострепетах, и убояхся, и страхом великим объят быв, припадох к ногама его и глагола ему «Господи мой, великий архистратиже Михаиле! Возможно ли есть грешному покаятися и избыти от сея огненныя муки?» Он же, сия слышав, умолча, и отвратися лицем своим от мене, и возвед очи свои выспрь. И абие расступися вода и земля горе, расступишися же облацы, и твердь, и воды яже выспрь, и небеса якоже трубою вверх. Архангел же горе зря. Такоже и аз возрев и видех вверх яко трубою же даже до оного света, его же прежде на небеси видех, не слышах же его глаголюща ничтоже. И паки обрати лице свое ко мне и глагола ми «Милостив ти бысть праведный Судия. И се дал тебе сохранити три заповеди сиа иже престани от нечистоты и не пити вина и табака. Аще сия сохраниши, избавлен будеши от муки сея». Аз же с радостию великою и с клятвою обещахся сохранити и поклонихся до земли. Он же глагола ми «Последъствуй ми». И поидохом от тоя палаты. И се на другой стране тоя улицы – яко палата же, и окна имущи. Михаил же возрев на едино от них окно, излияся из него смола со огнем. И ничтоже ми архангел глагола, проидохом мимо якоже улицею. И расступися вода и земля, и изыдохом по тому же пути вверх, имже прежде в землю снидохом, и тако изыдохом на землю.

И внезапну обретохомся на месте, идеже тело мое грешное лежаше. И глагола ми архангел «Сохраниши ли заповеди, ихже рекох?» Аз же паки глаголах ему «Ей, господи мой, сохраню, точию помилуй мя». И нача его молити и глагола ему сице «Велика ми есть вера, господи мой, во обещании моем быти, в Соловецком монастыре да идеже власы своя остригох, тамо бы и кости своя положити». Он же рече «Просися у старца, наставника своего. И аще отпустит тя, мощно ти есть. А ныне, аще хощеши, можеши, тамо шед, помолитися и паки возвратитися и зде быти». Аз же отвещах «Ей, господи мой, желаю того и тамо итти помолитися». И се внезапну обретеся некто зовомый Елисей, иже есть в царствующем граде Москве странствуя Христа ради ходил. И сего позвал архангел и глагола ему «Проводи сего до Соловецкого монастыря помолитися тамо и паки возвратися семо»¹⁷¹. И абие, не вем како, обретохся в Соловецком монастыре со преждереченным Елисеем, и у гробов чудотворцовых быхом и помолихомся, якоже лепо¹⁷² и по чину. Елисей же он и во церковь Спасову вниде и благословение прият. Аз же не смех дерзнути еже в церковь Спасову внити – сего ради, чтобы мене не познали, но стоях во церкви преподобных. И, тако помолившеся, не вемы како, в мгновении ока обретохомся во граде Костроме, в немже мати моя живяше. И с нею видехся, еще бо тогда жива бяше.

Идущим же нам от града того путем, иже к Москве лежащим, и внезапну срете¹⁷³ нас вид некий бесовеск, женска обличия имущи, простовласы и без пояса. Ошибь¹⁷⁴ же ея за нею бысть на воздусе ввыспрь, яко круг велик зело, всякими бесовскими мечты испещрен. Сама же вопиет, вельми кричаще, яко обидима или досаждаема от кого. Глас же ея слышашеся к нам сицев: «Согнаша сестру мою с Москвы, но обаче не по мнозе времени и все будем к Москве». И мне мнится, яко се есть зовомая кикимора, иже бысть на Москве не в давных временех. И тако оно бесовское мечтание зайде от очию нашею, мы же своим путем идохом.

И внезапну обретохомся у тела моего, Елисей же от мене невидим бысть. И видех архангела Михаила стояща, и зрях, яко врата растворишася. И глагола ми архангел «Поиди во врата сия». Аз внидох и, не вем како, обретохся в теле моем. И возвед очи мои, яко от сна возбнув¹⁷⁵, и видех старца некоего сидяща с кадилом у тела моего. И рече ми старец «Мы вси видехом, яко мертв был еси с полчаса, и тело твое осязахом, и свещу ко устом твоим приносихом тонкого ради дыхания¹⁷⁶ твоего. Отнюдь¹⁷⁷ без дыхания лежал еси – сего ради и кадихом тя. И како ныне ожил еси, не вем, Бог весть един». Аз же о сем не поведах ему ничтоже. И потом зело изнемогох болезнию лютою, десять дней не могох брашна вкусити. Аще что и покушахся вкусити, но утроба не принимаше. И тако помалу едва устрабихся от немощи во многи дни и оздравих благодатию Христовою. И пребых во обители Живоначалныя Троицы до Великия Четыредесятницы. Потом послан бых от настоятеля обители тоя в монастырское село и тамо лето едино пребых. И забых испытающего сердца и утробы¹⁷⁸, праведно истязающего тайная, тамо пребывая, по реченному мурин¹⁷⁹ не обеляшеся, и рак прямо ходити не научашеся. Наступих бо на тижение¹⁸⁰ греховное, избодох ноги моя душевныя, и благия пути погладих¹⁸¹, и правыя стезя порастих былием леностным, и яко в безлунной нощи кривыми стопами жизнь мою измерих – и сими душу мою помрачих, и в покое телеснем и во всяком сладострастии живях. И что архангел три заповеди сохранити мне повеле, и те все преступих. И паки во обитель приидох и едино лето в ней пребых. И паки послан бысть на службу в другую монастырскую весь и тамо такожде по прежнему обычаю вся притяжах, яже ненавидит Бог.

В то же время бысть Божие посещение на люди прииде бо язва смертоносная, глаголемая пострел. Язва же та не на долгое время простреся, но обаче кого постреляше, того в третий день и гробу предаяше. В то же время ятъ бых и аз тою же язвою и в лице устрелен наказанием Божиим. Нос мой и лице все опухло бяше, и очи воглубившеся и невидими Быша, покрышася кожею иже со главы, яко мехом, даже и до носа. И отнюдь¹⁸² страшно видение бысть зрящим на мя. Объят же мя страх велий, и вниде трепет в кости моя, во мне смятеся крепость моя, и исчезох о обличении моем о беззакониих моих¹⁸³. И помышлях в себе, яко зол душа моя наполнися, и живот мой аду приближихся, и яко страшно есть еже впасти в руце Бога живаго. И помышлях в себе виновна быти таковыя язвы грехов ради моих и преступления ради заповедей оных, ихже архангел мне рек сохранити и не соблюдох. И сего ради вмале¹⁸⁴ не отчаяхся спасения своего. Обаче уповаю на милость Божию, веде, яко милостив и щедр есть, дерзнух поискати своей немощи во уме, прием пророческое слово, глаголюще «Поражу и аз исцелю». И паки глаголет Господь «Во гневе же моем поразих его и за милость мою исцелих и». И тако язвою тою лютою люди уязвляеми, скорбяще зело и умирающе мнози.

И внезапну исцеление обретше своим болезнем сицевым образом. Село есть глаголемая Нерехта, отстоит от града Костромы тридесять поприщ. В том селе есть монастырь девический, и в том монастыре во церкви поставлена чудотворная икона Пресвятыя Владычицы нашея Богородицы нареченная Владимерская. К той тогда притекаху людие мнози и яко от источника приснотекущего¹⁸⁵ здравие почерпающе, исцеление приемлюще болезнем своим, влекущеся прихождаху и скачуще отхождаху в домы своя, радующеся и славяще Христа Бога и Пречистую его Матерь. Слышав же и аз сия неизреченная чудеса, творимая Богоматерию, и повеле себе тамо вести, негли¹⁸⁶ и аз, грешный, милостию Богоматери отраду получу своея болезни и жив буду. И яко приидох во церковь, идеже чудотворная икона Богоматери, и по обычаю молебная пения соверших и помолихся Богоматери с верою по силе своей, елико мощно¹⁸⁷. Оле силы твоея, Христе Царю и Богоматере твоея! И якоже окропихся священною водою, и абие милостию Божиею и молитвами Пречистыя Богородицы, христианския теплыя заступницы и скорыя помощницы, весь здрав и цел бых, яко николиже болех, ни следа почух¹⁸⁸ немощи своея. Идеже умножися грех, ту преизбыточествова благодать. И благодарих Господа Бога, разорителя ада и победителя смерти, и спасшего от толиких¹⁸⁹ смертоносных бед и погубления молитвами Матере своея Пресвятыя Богородицы. И помышлях в себе, яко ждет мя Господь Бог на покаяние, и где ключимо¹⁹⁰ есть мне со Давидом глаголати «Кто Бог велий, яко Бог наш! Ты еси Бог наш, творяй чудеса едИн.Слава Тебе, Боже мой! Наказал¹⁹¹ мя еси от юности моея, и доныне возвещу чудеса твоя и даже до старости и матерства¹⁹². Боже, кто подобен Тебе? Елики¹⁹³ явил ми еси скорби многи и злы, и обращь¹⁹⁴ оживил мя еси, и от бездне земли возведе мя. Умножил еси на мне величествие твое, и обращъ утешил мя еси, и от бездне греховных паки возвел мя еси».

И от того времени начах в чувство приходити о согрешениих своих. И размышлях в себе, глаголя сице, яко сия вся пострадах грех ради моих, раждателен бо есть грех казни и смерти. И во всем себе зазрех¹⁹⁵ и сердечныма очима к Богу возрев, ему же слава ныне и присно и во веки веков. Аминь».